.

.

يستاهل الف حمد  

Posted by: فاتيما in

الحمدلله
إنك كنت معايا 8 سنين مفارقتش فيهم حضنى
الحمدلله
إنى مبطلتش اقولك فيهم بحبك و أبوسك و احضنك و ألعب معاك
الحمدلله
إنك شوفتنى كفاية عشان متنساش شكلى
الحمدلله
إنى عندى صور كتير ليك عشان أقعد أشوفها كل ما توحشنى
الحمدلله
إنك بتقدر تكلمنى كل كام شهر تسمعنى صوتك
الحمدلله
إنى شوفتك مرة فى السنة اللى فاتت و لقيتك بقيت طولى
الحمدلله
إنك هتتم 10 سنين و قربت تكبر شوية وهتبقى تقدر تجيلى لوحدك
الحمدلله
إنى لسه عندى امل ترجعلى ف يوم من الأيام
الحمدلله
إنى عارفة على الأقل عنوان سكنك و مكانك فين
الحمدلله
إنك عايش وإحنا الاتنين ما موتناش يعنى فرصة لقانا تانى ممكنة
الحمدلله
إنك موجود فى حياتى
لأنك تقريباً الأنجاز الوحيد اللى حققته ف حياتى
و خلى لأيامى معنى و إنها ما راحتش منى على الفاضى
الحمدلله
إنى بقيت امك
يا حبيبى

مع حبى  

Posted by: فاتيما in


من اولها كدا و خبط لزق
اللوكاء الحريماتى كان فى منتهى الروعة
و اللى مجتشى أحب أغيظها قوى
لأن فاتها كتيييييييير
يكفى مثلاً إنى أقولها إن واحدة مفروسة جت و قعدت معانا
و نورت المكان و الدنيا
كمان دوبا حبيبتى أم يوسف العسل جت و بطنها الصغنونة سابقاها
و إدعولها يا عيال
و شاهى مفيش حاجة... يا لهوى على شاهى و رقتها
الشخصية دى تحس كدا إنها حضن و طالعله بنى آدمة
سحر مفقوعة مرارتها عملت أحلى مفأجاة و جت نورتنا
كنتى وحشانا يا سحورة قوى
داليا وش الخير قوس قزح كعادتها نشرت ألوان السما السابعة
بمجرد ما هلت علينا و معاها فروستى حبيبتى
جت كمان شخصية لطيفة و ماما لعيلين حلوين إسمها دعاء و هيا صديقة لخيخة
و من هنا ناتى للبت خيخة و أى كلام
و اللى مينفعش معاها أى كلام
هل هناك وصف للبت دى يوفيها حقها ؟!!
.....................
مظنش
جابت معاها تورتاية عشان تحتفل بينا
و الله أعلم ... و كلام ف سركم
البت خيخة الظاهر بتطلع زكاة المال بتاعتها تورت
و إل ما فيه واحدة فينا ييجى عيد ميلادها إلا و تجيبلها تورتاية
كرم حاتمى خيخى بحت يعنى و بكل ترحيب و ود أحب أثير احقادكم و أقولكم
أيوووووووووه ... كانت تورتة شكولاتة
قعدنا فى النادى براحتنا و كان تقريبا فاضى
و رايق بسبب الامتحانات
و الجو كان حلو و مش حر
دوبا جابت لخيخة حرنكش و قعدنا نحرنكنش شوية
و روحنا بعد كدا اكلنا فى حتة تانية و إتمشينا و إنبسطنا
إيييييييييه .... دى تنهيدة تسبق الجملة الخاتمة واللى هيا
كان يوم جميييييييييل
أنصحكم بأنكم تيجوا المرة الجاية
و هتعرفوا ساعتها إنى مكنتش مش ببالغ فى أى كلمة بكتبها هنا
الناس الجميلة اللى حرصت تكلمنى فى موبايل خيخة
أنا ممتنة ليهم من قلبى
دودو عاشقة الرومانسية عروسة البحور
و حنونة حنين القلب
و عاشقة و غلبانة
و مون مون موناليزا اللى خلت واحدة مفروسة تبوسنى بالنيابة عنها
و دريم فضفضة ع السريع و ريم
و مشمشة حبيبتى شيكو شيماء فضفضة
يا رب منساش حد تانى و معلش يا خوخة شغلت موبايلك
و الرجالة برضو طلعوا جدعااااان و إيهاب الشنكوتى أناب عنهم
و إتكلم يطمن علينا
كاد اليوم يكون عشرة من عشرة لولا غياب آبى حبيبتنا كلنا
عاشقة و غلبانة بلغتنا بالبوست الاخير بتاع رحاب
و داليا كلمتها تشوف اخبارها إيه
و يا ريت يبقى حد يطمنا عليها لو سمحتوا
حاجتين كمان عاوزة أقولهم
عاوزة أقولكم إن مشروع
مودة و رحمة
خلاص إتلغى
ليه ؟
لأن صديقتى فؤجئت بإن المتحمسين للمشروع غالبيتهم بنات و فقط
و الشباب ممتنعون
مودة و رحمة بتعتذر لكل البنات اللى كانت تتمنى تقدملهم أى خير
لكن واضح إن الظروف الحالية غير مشجعة
و حاجة برضو غريبة أن البنات ممكن يشتركوا فى فكرة زى دى
بينما يحجم عنها الشباب
بس برضو كان متوقع نوعا ما
لغرابة الفكرة ... بس الاحجام كان متوقع من البنات الحقيقة
عشان كدا بحييهم من قلبى على شجاعتهم و جرأتهم
عموماً داليا بتشكركم على حسن ظنكم فيها
و بتتأسفلكم جدا
على عدم قدرتها على إستكمال الفكرة
و إن شاء الله حد تانى ممكن ينفذها فى توقيت و شكل مختلف
قبل ما البوست يخلص
يا ريت متنسوش نداء آيوشة
و اللى يقدر يقدم المساعدة يبقى جزاه الله خير
القصيدة اللى على جنب دى جت ف بالى قوى و أنا مروحة
يوم اللقاء الحريمى
حسيت إن كل اللى جئن تقريباً بيطلوا ما بين سطورها
احب اهديها لهن ... كلهن
و مع حبى
بتحطى كحل
عشان تكونى احلى
و لا عشان دموعك تبقى سودا ؟
حبر القلم
شايفاه قصايد عالورق
و لا بقعة ع الهدوم ؟
الوحدة عندك
فرصة للخيال ...
و لا تقليب للمواجع ؟
الأزمة بتقويكى ..
و لا بتقوى الزمن عليكى ؟
كادر الحياة مليان زوايا
و عيونك الكاميرا
و اللقطة تحت امرك
مى بهاء
( ميومة البهية )

نجوم الليل  

Posted by: فاتيما in























لأ مش غنوة أنغام
ولو إنى بحبها برضو ... بس دا إسم البتاعة اللى ف الصورة
و اللى عملتها عشان يوسف
و قولت يمكن تعجبكم و تحبوا تعملوها لعيالكم
و تعملوها سوا ... إنتوا و العيال ...هاه
بكرة الامتحانات و الدراسة تخلص و تلاقوهم فاضيين
و ممكن تبقى نجوم الليل فكرة تشغل وقت فراغهم
و بدل ما يوروكم هما نجوم الليييييييييييل
اللى على أصلها
الحكاية دى خدت منى وقت ييجى أربع تيام ... بس كنت لوحدى
إنما لو انتم عملتوها مع العيال هتاخد وقت أقل شوية
و أصل الحكاية جاتلى من زيارة لصديقة غالية جدا عليا إسمها تغريد
و توتو زى ما بدلعها عندها ولدين زى القمر
احمد و معاذ
و فى آخر مرة زرتهم قعدنا فى أوضتهم كالعادة
و جت توتو تنيم الولد الشقاوة معاذ
راحت مطفية النور ... ببصلكم ع السقف
ألاقيلكم إيييييه
نجوم و قمر و شمس فسفورية من اللى بتنور ف الضلمة
متعلقة فووووووق
و منورة بشكل تحفة و جميييل جدااااااا
عجبتنى الفكرة قوى و قولت لازم أعمل حاجة مشابهة ليوسف
و انا مروحة عديت على محل من بتوع إتنين و نص
و جبت من النجوم الفسفورية دى 3 باكت
و بعدين إبتديت امخمخ فى فوكيرة
بس أول عقبة قابلتنى .. إنى مينفعش احطهم فى السقف
أصل السقف بتاعنا عالى قوى و أصلا محدش يعرف يوصله
غير الناموس و الزعافة
و السلم بس هأتشعلق شعلقة محترمة
و بعدين فى الآخر النجوم برضو مش هتبان قوى
طب الحل إييييييه ؟؟
ففكرت ألزقهم على الحيطة اللى جنب سرير يوسف
و عملت كدا فعلت
بس مطلعش شكلهم حلو لما طفيت النور
لأن الحيطة لونها فاتح
و هما لونهم كمان فاتح فمبناوش أساساً
طب و بعديييييييين
و بعدييييييين
بس
مفيش غيرها
أعمل خلفية سودا كانها سما فى ليلة ظلماء و ليلاء
و ألزق النجوم عليها
طب طالما هعمل سما و سودااااا
طب ما أعمل عمارات تحتها عشان المنظر يبقى فيه ألوان فرايحى
طب طالما هعمل عمارات
ما أعمل برج القاهرة بالمرة عشان نبقى حطينا حاجة ترمز لمصر
طب طالما هحط برج القاهرة
طب ما أعمل بيت ليوسف وسط البيوت عشان يبقى حاسس إنه جزء من المكان
المهم
الأفكار إبتدت تتوالى معرفش إزاى
يمكن عشان الواحد بيعمل حاجة بحب و رغبة فى إسعاد حد تانى
فربنا بيفتحها عليه
بدأت المشوار بتجميع الحاجات اللى هستخدمها فى عمل اللوحة
فرخ كارتون كبير
الوان مية عشان تبقى زاهية و تنفع لتلوين مساحات كبيرة
سلوتيب شفاف عريض
و كولة او صمغ قوى للزق العمارات و النجوم
شوية كراكيب كانت عندى من قبل كدا و مرضيتش ارميها
لأن كل حاجة بيجيلها وقت و تنفع
الكراكيب كانت شجر بلاستيك ملوش لازمة
و مكعبات أطفال المعمولة من الفل الخفيف دا اللى بيبقى مكتوب عليه الحروف و الأرقام
ألوانه بتبقى زاهية و بيتلزق بالصمغ بمنتهى السهولة
الحكاية سهلة قوى يا جماعة
1
فرخ الكارتون الكبير يتلون بالاسود
و يفضل بألوان المية لأن المساحة كبيرة و ألوان المية بتكفى لأكتر من طبقة
لحد ما توصلوا للدرجة السودا الغامقة قوى
و على فكرة فيه فرخ كارتون بيبقى أسود جاهز للى عاوز يخلص بسرعة
2
بعدين بالسلوتيب تلزقوا اللوحة كلها
الحكاية عاوزة نفس طويل و دقة بس مش صعبة خالص
و سبب الحكاية دى إن السلوتيب بيعمل طبقة بلاستيك على اللوحة
تخليكم تلزقوا عليها اى حاجة و ممكن تشيلوها بعد كدا لو حبيتوا
من غير ما اللوحة الأصلية ما تبوظ او تتقطع
يعنى تغيروا مكان النجوم او العمارات زى ما تحبوا
3
بعد كدا تعملوا العمارات .. و برضو مش صعبة .. أى كراتين قديمة عندكوا
تغلفوها بكرتون أبيض و تلونوها
أو تعملوا شكل مربع او مستطيل او أسطوانى ...أى شكل للعمارة و اى طول يعجبكم
و بعدين تلونها زى ما يعجبكم من الوان
البيت الصغنن بتاع يوسف برضو سهل يتعمل قوى
4
بعد كدا البيبان و الشبابيك بقى تتحط على العمارة و البيت
و دى بتبقى معمولة من الفل الالوان اللى قولتلكم عليه
بيتقص بالمقص شرايح او مربعات او أى شكل يعجبكم
و يتلزق زى ما باين فى الصور كدا
و ممكن لو مفيش فل ملون ... ترسموها بالالوان العادية
5
بعد ما تخلصوا العمارات و كل الأشكال اللى عاوزينها ... تجيبوا اللوحة
و تاخدوا آخر 20 سنتى فى نهايتها من تحت
و تروحوا تانينوا لقدام
و تحاولوا تقوه بكارتون زيادة و تلونه على شكل رصيف
و تلزقوا عليه سلوتيب برضو لأن الرصيف دا اللى هيبقى المكان
اللى هتتحط فوقه العمارات
6
خلاص عملنا كل الحاجات دى
نبتدى بقى الخطوات النهائية لنجوم الليل
ندق مسامير طويلة و نحط فوقيها الرصيف بتاعنا اللى عملناه فى آخر اللوحة
7
و بعد ما نحطه و نثبته كويس و نتاكد من أن دا الوضع المناسب
نجيب سلوتيب شفاف و نلزق باقى جوانب اللوحة التلاتة
من كل جنب و نثبتها بدبابيس رسم من كل ناحية
عشان نتاكد من ثبات اللوحة على الحيطة
طييييييييب
8
كدا بقى عندنا السما و الرصيف ....نجيب العمارات و البيت
و نرصهم جنب بعض من غير فواصل يستحسن يعنى عشان يدوا منظر المدينة
و بعدين بعد ما نرسى على شكل يعجبنا ... نلزقهم بكولة او الصمغ
و بقول كولة لأنها بتجيب نتيجة هايلة فى لزق أى بلاستيك ببعضه
9

بعد ما رصينا العمارات نجيب الشجر البلاستيك و نعمله قاعدة من الفل الملون
و نغرسه فيه و بعدين نلزقه برضو
ما بين العمارات او على جنب اللوحة زى ما نحب يعنى
و الشجر الى عملته فى الرصيف دا كان عبارة عن مكعب فل أصفر قصيته من جوا
و لونته من برا و بعدين حطيت الشجرة البلاستيك جواه
و قصيت فل برتقانى حتت و لزقته حوالين الشجرة كأنه طين
و شكله طلع زى مانتوا شايفين
شغال يعنى
10
آخر حاجة بقى فى المنظر كله ... النجوم الفسفورية
تلزقوها على اللوحة و كل ما النجوم تكتر
كل ما يبقى الشكل احلى و اجمل
طبعا الشكل دا لما النور بينطفى مش عاوزة أقولكم
تحفففففففة
كان نفسى أصوره ... بس منفعشى ف الضلمة
بس شكله جميل جدا و مبهر و متهيألى العيال هتحب حاجة زى دى فى اوضتها
دنا اللى مش عيلة و شحطة أهو
و فرحانة قوى بالمنظر دا ... معرفش ليه
ممكن تحطوا عربية زى ما حطيت ليوسف كدا ...و يافطة كمان
و أى حاجة تيجى ف بالكم
لقيت عندى رمز لجسم كان ضمن لعبة بوليس عند يوسف
و المفروض يتنشن عليه بالمسدس
عجبنى و روحت وخداه و حطيت عليه وش يوسف و خليته ف اللوحة
و بحطه جنب البيت شوية
و فوق العمارة دى شوية
و العمارة دى شوية كدا يعنى ...حركات
و يمكن بعد شوية أطلعه البرج يطير بالوناااااات
بلعب .... مش بقولكم الواد الطعامة يوسف بيخلينى اعيش طفولتى
حتى فى بعاده بيسعدنى لما بعمله حاجة
اى حاجة
يا رب نجوم الليل تعجبكم
و اللى عنده أفكار و إقتراحات يضيفها
يبقى كتر خيره
سلام يا احلى صحبة
و ناس
و عالم
بيعدوا نجوم الليل ... ما يعدوا نجوم الليل
و يغنوا يا عينى يا ليل
ما يغنوا ياعينى
يا ليل
أنا حبى باينلك زى الشمس
يا حبيبى