.

.

نجوم الليل  

Posted by: فاتيما in























لأ مش غنوة أنغام
ولو إنى بحبها برضو ... بس دا إسم البتاعة اللى ف الصورة
و اللى عملتها عشان يوسف
و قولت يمكن تعجبكم و تحبوا تعملوها لعيالكم
و تعملوها سوا ... إنتوا و العيال ...هاه
بكرة الامتحانات و الدراسة تخلص و تلاقوهم فاضيين
و ممكن تبقى نجوم الليل فكرة تشغل وقت فراغهم
و بدل ما يوروكم هما نجوم الليييييييييييل
اللى على أصلها
الحكاية دى خدت منى وقت ييجى أربع تيام ... بس كنت لوحدى
إنما لو انتم عملتوها مع العيال هتاخد وقت أقل شوية
و أصل الحكاية جاتلى من زيارة لصديقة غالية جدا عليا إسمها تغريد
و توتو زى ما بدلعها عندها ولدين زى القمر
احمد و معاذ
و فى آخر مرة زرتهم قعدنا فى أوضتهم كالعادة
و جت توتو تنيم الولد الشقاوة معاذ
راحت مطفية النور ... ببصلكم ع السقف
ألاقيلكم إيييييه
نجوم و قمر و شمس فسفورية من اللى بتنور ف الضلمة
متعلقة فووووووق
و منورة بشكل تحفة و جميييل جدااااااا
عجبتنى الفكرة قوى و قولت لازم أعمل حاجة مشابهة ليوسف
و انا مروحة عديت على محل من بتوع إتنين و نص
و جبت من النجوم الفسفورية دى 3 باكت
و بعدين إبتديت امخمخ فى فوكيرة
بس أول عقبة قابلتنى .. إنى مينفعش احطهم فى السقف
أصل السقف بتاعنا عالى قوى و أصلا محدش يعرف يوصله
غير الناموس و الزعافة
و السلم بس هأتشعلق شعلقة محترمة
و بعدين فى الآخر النجوم برضو مش هتبان قوى
طب الحل إييييييه ؟؟
ففكرت ألزقهم على الحيطة اللى جنب سرير يوسف
و عملت كدا فعلت
بس مطلعش شكلهم حلو لما طفيت النور
لأن الحيطة لونها فاتح
و هما لونهم كمان فاتح فمبناوش أساساً
طب و بعديييييييين
و بعدييييييين
بس
مفيش غيرها
أعمل خلفية سودا كانها سما فى ليلة ظلماء و ليلاء
و ألزق النجوم عليها
طب طالما هعمل سما و سودااااا
طب ما أعمل عمارات تحتها عشان المنظر يبقى فيه ألوان فرايحى
طب طالما هعمل عمارات
ما أعمل برج القاهرة بالمرة عشان نبقى حطينا حاجة ترمز لمصر
طب طالما هحط برج القاهرة
طب ما أعمل بيت ليوسف وسط البيوت عشان يبقى حاسس إنه جزء من المكان
المهم
الأفكار إبتدت تتوالى معرفش إزاى
يمكن عشان الواحد بيعمل حاجة بحب و رغبة فى إسعاد حد تانى
فربنا بيفتحها عليه
بدأت المشوار بتجميع الحاجات اللى هستخدمها فى عمل اللوحة
فرخ كارتون كبير
الوان مية عشان تبقى زاهية و تنفع لتلوين مساحات كبيرة
سلوتيب شفاف عريض
و كولة او صمغ قوى للزق العمارات و النجوم
شوية كراكيب كانت عندى من قبل كدا و مرضيتش ارميها
لأن كل حاجة بيجيلها وقت و تنفع
الكراكيب كانت شجر بلاستيك ملوش لازمة
و مكعبات أطفال المعمولة من الفل الخفيف دا اللى بيبقى مكتوب عليه الحروف و الأرقام
ألوانه بتبقى زاهية و بيتلزق بالصمغ بمنتهى السهولة
الحكاية سهلة قوى يا جماعة
1
فرخ الكارتون الكبير يتلون بالاسود
و يفضل بألوان المية لأن المساحة كبيرة و ألوان المية بتكفى لأكتر من طبقة
لحد ما توصلوا للدرجة السودا الغامقة قوى
و على فكرة فيه فرخ كارتون بيبقى أسود جاهز للى عاوز يخلص بسرعة
2
بعدين بالسلوتيب تلزقوا اللوحة كلها
الحكاية عاوزة نفس طويل و دقة بس مش صعبة خالص
و سبب الحكاية دى إن السلوتيب بيعمل طبقة بلاستيك على اللوحة
تخليكم تلزقوا عليها اى حاجة و ممكن تشيلوها بعد كدا لو حبيتوا
من غير ما اللوحة الأصلية ما تبوظ او تتقطع
يعنى تغيروا مكان النجوم او العمارات زى ما تحبوا
3
بعد كدا تعملوا العمارات .. و برضو مش صعبة .. أى كراتين قديمة عندكوا
تغلفوها بكرتون أبيض و تلونوها
أو تعملوا شكل مربع او مستطيل او أسطوانى ...أى شكل للعمارة و اى طول يعجبكم
و بعدين تلونها زى ما يعجبكم من الوان
البيت الصغنن بتاع يوسف برضو سهل يتعمل قوى
4
بعد كدا البيبان و الشبابيك بقى تتحط على العمارة و البيت
و دى بتبقى معمولة من الفل الالوان اللى قولتلكم عليه
بيتقص بالمقص شرايح او مربعات او أى شكل يعجبكم
و يتلزق زى ما باين فى الصور كدا
و ممكن لو مفيش فل ملون ... ترسموها بالالوان العادية
5
بعد ما تخلصوا العمارات و كل الأشكال اللى عاوزينها ... تجيبوا اللوحة
و تاخدوا آخر 20 سنتى فى نهايتها من تحت
و تروحوا تانينوا لقدام
و تحاولوا تقوه بكارتون زيادة و تلونه على شكل رصيف
و تلزقوا عليه سلوتيب برضو لأن الرصيف دا اللى هيبقى المكان
اللى هتتحط فوقه العمارات
6
خلاص عملنا كل الحاجات دى
نبتدى بقى الخطوات النهائية لنجوم الليل
ندق مسامير طويلة و نحط فوقيها الرصيف بتاعنا اللى عملناه فى آخر اللوحة
7
و بعد ما نحطه و نثبته كويس و نتاكد من أن دا الوضع المناسب
نجيب سلوتيب شفاف و نلزق باقى جوانب اللوحة التلاتة
من كل جنب و نثبتها بدبابيس رسم من كل ناحية
عشان نتاكد من ثبات اللوحة على الحيطة
طييييييييب
8
كدا بقى عندنا السما و الرصيف ....نجيب العمارات و البيت
و نرصهم جنب بعض من غير فواصل يستحسن يعنى عشان يدوا منظر المدينة
و بعدين بعد ما نرسى على شكل يعجبنا ... نلزقهم بكولة او الصمغ
و بقول كولة لأنها بتجيب نتيجة هايلة فى لزق أى بلاستيك ببعضه
9

بعد ما رصينا العمارات نجيب الشجر البلاستيك و نعمله قاعدة من الفل الملون
و نغرسه فيه و بعدين نلزقه برضو
ما بين العمارات او على جنب اللوحة زى ما نحب يعنى
و الشجر الى عملته فى الرصيف دا كان عبارة عن مكعب فل أصفر قصيته من جوا
و لونته من برا و بعدين حطيت الشجرة البلاستيك جواه
و قصيت فل برتقانى حتت و لزقته حوالين الشجرة كأنه طين
و شكله طلع زى مانتوا شايفين
شغال يعنى
10
آخر حاجة بقى فى المنظر كله ... النجوم الفسفورية
تلزقوها على اللوحة و كل ما النجوم تكتر
كل ما يبقى الشكل احلى و اجمل
طبعا الشكل دا لما النور بينطفى مش عاوزة أقولكم
تحفففففففة
كان نفسى أصوره ... بس منفعشى ف الضلمة
بس شكله جميل جدا و مبهر و متهيألى العيال هتحب حاجة زى دى فى اوضتها
دنا اللى مش عيلة و شحطة أهو
و فرحانة قوى بالمنظر دا ... معرفش ليه
ممكن تحطوا عربية زى ما حطيت ليوسف كدا ...و يافطة كمان
و أى حاجة تيجى ف بالكم
لقيت عندى رمز لجسم كان ضمن لعبة بوليس عند يوسف
و المفروض يتنشن عليه بالمسدس
عجبنى و روحت وخداه و حطيت عليه وش يوسف و خليته ف اللوحة
و بحطه جنب البيت شوية
و فوق العمارة دى شوية
و العمارة دى شوية كدا يعنى ...حركات
و يمكن بعد شوية أطلعه البرج يطير بالوناااااات
بلعب .... مش بقولكم الواد الطعامة يوسف بيخلينى اعيش طفولتى
حتى فى بعاده بيسعدنى لما بعمله حاجة
اى حاجة
يا رب نجوم الليل تعجبكم
و اللى عنده أفكار و إقتراحات يضيفها
يبقى كتر خيره
سلام يا احلى صحبة
و ناس
و عالم
بيعدوا نجوم الليل ... ما يعدوا نجوم الليل
و يغنوا يا عينى يا ليل
ما يغنوا ياعينى
يا ليل
أنا حبى باينلك زى الشمس
يا حبيبى

This entry was posted on الاثنين, مايو 04, 2009 and is filed under . You can leave a response and follow any responses to this entry through the .

59 كــــلام بيطــبطـــب عـــلى قــــلبى و روحــــى

فكرة حلوة مووووت يا فاتيما واكيد هتفرح يوسف موت ان شاء الله لما يرجع بألف سلامة بجد حلوة جدا وكفاية انك عملاها بحب هو اى حاة تعمليها تطلع وحشة أبدا ........ يالا بقى يا يوسف ارجع بقى لماما علشان تفرح بالحاجات الحلوة دى

يارب يرجع لك بألف سلامة وتقضوا أجازة سعيدة

دمتى بكل خير وسعادة وفن

هاحجز مكان وارجع كمان شويه
بوسه وحضن وشيكولاتايه

جميييييييييييييييييله اوووووووي والله

شكلها تحففففففففه انا قلت انتي شرياها جاهزه كلها ع بعضها كده

الفكره جميله اوي وعايزه رواقه بال

والله وطلعتي فنانه يامامتي

والله يوسف هتعجبه اوووووووووووي

تسلم اديكي ياقمر

الله يا فاتيما
تجنن
فرحتنى اوى

والله حاجات حلوة جميلة

كلك ذوق

الله عليكى يا فاتيما

جت فى وقتها نجوم الليل
كل اللى انا عملاها من فكرتك انى حاطة عندى فى سقف الليفنج رووم اللى فيها سرير شريف نجوم ودولفين

وكنت لسة عمالة افكر فى تقصيرى مع شريف وان بقالى كتير معملتش معاه حاجة كدة

وعمالة امخمخ دماغى ايه اللى ممكن اعمله انا وهو ونتبسط احنا الاتنين

وخصوصا انه هيخلص يوم الخميس الجاى و هيكون عنده وقت فراغ كبير وعايزة اخليه يحس انه خد اجازة بجد
ويحس ان كل لحظة فى اجازته فيها حاجة جديدة و ممتعة

لاقيتك انتى عاملة نجوم الليل


انا هاسرق منك الفكرة والادوات وهاجهزهم علشان ان شاء الله اعملهم مع شريف
بس هاعملهم هناك عند ماما لان الشقة هناك اوسع وهاقدر اخد راحتى بشكل اكبر واوضتى تعتبر هى اوضة شريف المستقلة



عارفة فكرتينى ب بابا الله يرحمه
كان عنده هواية انه يصنع حاجات من بواقى الحاجات
ياما عملنا انا واسر جنينة حيوانات من الصلصال ومن شجر بلاستيك

بابا علمنا الحروف الابجدية عن طريق التفاح
كان بيقطع التفاح شرايح على شكل الحروف



فاتيما لو طلبت منك انك تعملى معايا نجوم الليل
توافقى؟
هو ده هيتطلب انك تيجى تشرفينى فى بيت ماما

شريف هيتبسط من وجودك معانا اوى

لو فيها احراج ليكى
ومش حابة فكرة انك تروحى لحد فى البيت مافيش مشكلة مش هازعل منك يعنى وهاتفهم موقفك



اه صحيح
انا كمان عايزة اقولك بسم الله ماشاء الله عليكى
انتى فنانة يا فاتيما

عارفة انتى ممكن تاخدى الصور دى
وتوريها لاى حضانة او مدرسة محترمة
وممكن تشتغلى مدرسة نشاطات
بجد عندك افكار وابتكارات تحفة

ربنا يحميكى يارب



سلام

اختك خيخة

ما شاء الله عليكي يا فاتيما..بجد فنانة و طبعاً أنا كمان بستأذنك اني أخد منك الفكرة و أعملا أنا و فارس و يحيي..و أراهنك انها حتبقى علامة مميزة للمدونين اللي عندهم أولاد و اللي منتظرين أولاد و اللي معندهمش خالص كمان:)
ربنا يحميكي و يسعدك و يرجعلك يوسف بالسلامة..بوسة و حضونة مني ليكي

طمطم دى تحفه ورائعه بس اختك فاشله معتقدتش انى اعرف اعمل زيها

يعنى فى الابتكارات دى صفر محطوط على جنب كده

لس عارفه هتعجب يوسف جدا عشان مامته عاملاها بحب يا حبيبة قلبى

وحشتتتتتتتتتتتتتتتنى جدا جدا جدا وكمان جدا يا اختى الغاليه

كان نفسى احضر لقاء البؤجه عشان اشوفك
بس الظروف بئه

بس تتعوض ان شاء الله

عارفه يا طمطم اخو بيرو شبهه بالضبط نسخه منه وهو صغير تخيلى ملاك يا طمطم ملاك

ربنا يهديهم لبعض

وحشانى قوى قوى قوى ونفسى اتطمن عليكى يا جميله

تحفة

بجد انتي مدخلتيش فنون جميلة ليه

ولا مشتغلتيش مدرسة رسم للأطفال ليه

ولا مبتطلعيش في البرامج بتاعت الاطفال ليه

أفكارك حلوة قوي بجد

لأ مبهرجش

انا مبسوطة

لأ حلوة

لازم تستغلي الموهبة دية عندك و تنميها

و يا رب يوسف يشوف اللي بتعمليه كله وي فرح بيه يا رب
و يفرحك معاه

سلام عليكِ

الله بجد فكرة تحففففففففففففه

طول الوقت نفسي حاجة اعملها مع الولاد

وتكون بتاخد وقت

بجد فكره جميله ربنا يفرحك بيوسف

ويرجعه لحضنك وتعملو سوا حاجات اكتر واحلى

جميلة جدا جدا جدا
ان شاء الله يوسف يرجعلك و توريهاله

فاتيما
انا لا اعرف شيئا في التصميم و الالعاب مثل ماعملت لكن لوحتك ديه و تصميماتك كويسة و جميلة
و الاروع الهدف اللي اتملت من اجله
من اجل يوسف ربنا يخليه لك يا رب
مودتي

انا جييييييييييت
تسلم ايدك ياطمطم
بجد روووعه
وانا برضه باقول فاتيما فين مختفيه بقالها يومين
معلش بقى اتاخرت عليكى
اصل كان عندى فرح صاحبه عمرى ايمان النهارده الحنه وبكره الدخله
ورجعه بقى ايييييه
صوتى رايح اتلككت وطلعت كل الكبت
على فكره
البوست الاخير عندى ليكى فيه جزء يخصك

بحبك
وحشتينى

فكره تحفه والله يا فاتيما
وان شاء الله تعجب يوسف وتفرحه زى ما هى مفرحاكى كده
وربنا يخلهولك :)

خطييييييييره!!!!

خصوصا العمارات
حبيتها كتير جد!!!

جميلة او تحفة بجد انا عندى نفس النجوم دى حاطها فى اوضتى بس فكرتك اجمل بكتييييييييير ومبتكرة اوى
وان شاء الله هتعجب يوسف اوى لما يشوفها

حملة التبرع الشهرية بالدم

التفاصيل هنا

http://elroh.blogspot.com/2009/05/blog-post.html

تسلم ايديكى يا حبيبتى ربنا يرجعهولك بالسلامه عشان يشوف الحاجات الجميله دى،انتى و افكارك هايلين ماشاء الله عليكى،و ميرسى اوى على الشرح المفصل الجميل ده، انا بما ان لسه مفيش اولاد ولا حاجه،هعملها مع اختى الصغيره،هتفرح بيها مووووت، والبركه فيكى بقى، هاتخليها اجازه شكل تانى بأفكارك

ما شاء الله ..

شكلهم حلو فعلا تبارك الله ..

اكيد يوسف هايفرح اوى لما يشوفهم ان شاء الله ..

انا بحب النجمات الفسفورية دى جدا ..

اول مرة شوفتها عند واحدة صاحبة مامتى واحنا صغيرين كانوا جيبنها معاهم من امريكا وكانت تحففة ..

لما تطفى النور بتعمل ضوء فسفورى وقوى جدا كأنها لمبة ..

عقبال ما يشوفهم يارب ..

دمتِ بخير ..

فاتيما الغالية
اولا وحشنى جدا
حاسة ان بعدت عنك مدة طويلة
لان فاتنى البوست اللى فات
والله قلبى بيتلاقى معكى دون روءيةودايا اقول عنكى ابنة قلبى التى لم يحملها رحمى
انا لاابالغ ولكن هذا ماشعر به ناحيتك
واكيد هو واصلك لانه طالع من قلبى
تسلم ايديك ياجبيبتى ويارب يرجع الغالى ويشوف عمايل ماما الام العظيمة
والفنانة الجميلة
لكى محبتى وقبلاتى

تحفه وربنا يحمعك بيوسف قريب انشاء الله

فكره جميله قوي, ياريت كل الامهات تفكر بالطريقه دي,
ربنا يرجعلك يوسف ويباركلك فيه ويعرف قد ايه ماما بتعشقه ويعرف ان ماما مش زي اي ام وحبها ليه مش عادي


تحياتي

أولا - صباح الخير
ثانيا وانا بقرا البوست الواد يوسف لزق جنبى وقالى الللله ايه الصور الحلوة دى ومكنتش قريت البوست فقلتله اللى عاملهم ولد جميل قوى اكبر منك شوية واسمه يوسف وقالى شكلهم حلو قوى انا عاوز اعمل كده

قوم ايييييييه

قالى انا عاوز اشوف الولد ده فورتله عيونه الحلوة اللى جنبهناك وقلتله تعرف انه بيرسم حاجات جميلة قوى قالى عاوز اشوفها

فركبنا تاكسى وروحنا للبراح بتاع يوسف وقعدت اوريله الحاجات اللى راسمها وانبسط قوى وقالى انا عاوز ارسم كده فقلتله هحاول اجيبلك البرنامج - عاوزين اسم البرنامج

قوووووووووم ايييييييه


نزلنا لاخر المدونة ونلاقيلك اللعبة
ومن ساعتها وهو لازق فيها واول مفتح عيونه الصبح يقولى مامى انا عاوز اترج على صور يوسف والعب اللعبة اللى بيلعبها دى

ودلوقتى هو قاعد على رجلى علشان نروح نلعبها - فبعد إذنك هنروح نلعب

==============
عدناااااااااا

بجد بجد
يسلم ايدك وتفانينك يا بت يا طماطم
وبجد مش بهزر لما بقول بتدى افكار حلوة للأمهات وانهم ازاى يستمتعو بأوقاتهم مع اطفالهم وانا مع خيخة روحى اى مدرسة واشتغلى ف النشاطات لان افكارك مبدعة

بس خلاص
متناميش شهر ف الدرة بقى
ودعواتك للنونو لانه ف مرحلة حرجة
وانا قاعدة لازقة ف البيت
==========

يوس رجع يزن تانى عشان يروح يزور ابنك
فسلالالالالامو عليكو


هبة ويوسف
امواااااااااه

ازيك ياقمر انا اسفة على التأخير بس انا بقالى فترة عايزة اعلق بس مش عارفة التعليقات عندك كانت معلقة كل ماافتح ماترضاش تفتح
بس بجد ايه الجمال دة بجد انا نفسى اعملها فى الشغل بجد افكار حلوة وهتشغل الاولاد بحاجة مفيدة
تحياتى لكى ياقمر

فناااااااااانة ياطمطم فنااااانة والله يابخت يوسف بيكي يابخته ربنا يرجعهولك بالسلامة وينبسط بالحاجات دي دمت بكل الخي ياطماطم

السلام عليكم

ما شاء الله يا ام يوسف ..

فكرة رائعة ومبتكرة وقليلة التكاليف وتدخل البهجة والسعادة على نفوس اولادنا ..

اسعدك الله دائما واقر قلبك وعينك بيوسف ..

جاية اقول وحشتينى اوى انا يمكن لسة مرجعتش للتدوين بس بحاول ...وبردو بجتهد اتابعك واتابع كل اللى بحبهم
مبروك يا حبيبتى صدور الكتاب اللى بيضم بعض مقالاتك ...عقبال ما يصدر ليكى كتاب
على فكرة مدونتك لما اجى اكتب اسمها فى جوجل بلاقيها من الكلمات اللى لما اكتب كلمة البحث تظهر كلكمة من الكلمات المعتمدة أكثر بحث وممكن تجربى

تحياتى ومودتى

آه صحيح لى مرور تانى على العمل الفنى ده احتمال انفذه لانى مش قريته :)))

فاتيما ا
انا كتبت حاجه كنت في بالي قوي وانا بكتبها
ابقي اقريها وقولي رأيك
مروه

وحشتييييييييينى
بس خلاص

برافو عليكي .. عمل جميل جدا جدا بجد

بس تفتكري ان الولاد ممكن فعلا يسيبوا التليفزيون ويستحملوا يعملوا الحاجات دي؟ ده جيل ما يعلم بيه الا ربنا

تحفة بجد
تسلم الايادى
انتى فعلا موهوبة بجد ولاحظت ده من يوم التيجان فى اسطبل عنتر
وسبحان الله عندك قدرة جميلة على جذي الاطفال وانك تخليهم يسمعوا الكلام ويحبوكى
ربنا يديم عليكى نعمه وبفرحك بيوسف
تحياتى

( joudy )
إن شالله منحرم منك يا جودى
رافعة معنوياتى و مجاملانى علطول كدا
عقبال يا ستى لما تعمليها و احسن منها مع ولادك إن شاء الله
كل الحب ليكى





عاشقة الرومانسية
قريت يا حبيبتى البوست و كتبتلك الرد فى آخره كعادتى متاخرة معلش
ألف مبروك لصديقتك و عقبالك يا ست البنات دنا هحجزلك المدونة كلها تفاريح و شكولاتة و ورد بس شدى حيلك إنتى
بوسة و حضونة و خديلك شكولاتاية مؤقتا كدا من علبة محمد مهندس مصرى ف الخباثة و أنا هتفاهم معاه ملكيش دعوة



mony elshreef
لأ شرياها إيه يا مونى
يا بت بطلى مبالغة شكلك بتحبينى قوى عشان كدا بتجاملينى قوى ...
هيا من ناحية الرواقة فمجتاجة فعلا حد فاضى بس كمان محتاجة نفس و إستعداد
يعنى لو مليش نفس أعملها مش هيحصل
فكرة بتطق ف دماغ الواحد فجأة و تنور زى اللمبة و مبترضاش تطفى
خالص حبى ليكى يا بسكوتة




dodda
يا ست الهوانم إنتى اللى تجننى
عقبال يا رب اللى ف بالى ما يحصل و تعمليها مع روح قلبك إن شاء الله
فين حضوناتى و بسابيسى ؟؟؟!!





ahmed talk
إنت الأذوق يا احمد و الله




بت خيخة و مش أى كلام
إنت هتقرى التعليق دا بعد كتيييير بقى لأنك دلوقتى عند مامتك
بس يا خوخة دايما اخلاق
و بتحرجينى بذوقك
و رفعك لمعنوياتى و تشجيعى
ألف شكر ليكى على الدعوة الجميلة بس إنتى عارفانى يا نوران و عارفة ندالتى ف حكاية زيارة البيت دى ...
بس على فكرة انا مصرة أشارك برضو ف نجوم ليل شريف و جبتله نجوم فسفورية و اللوحة السودا الكبيرة و علبة ألوان مية و لو جبتيه معاكى اللقاء الحريمى ممكن اقعد اعلمه يعمل شوية حاجات زى العمارات و البرج و هعمله تاج يلبسه كمان و نقعد كلنا نلعب ...
بوسيلى شيكو لحد ما أشوفكم و ترجعى بألف سلامة من عند ماما إن شاء الله
بوسة و حضونااااات يا حبيبتى




dahlia
يا ستى أنا حطاها عشان يمكن تطق ف دماغ حد فيكو يعملها مع عياله و يتشجع يعنى
تعرفى لما هتعملوا نجوم ليلكم إنتو التلاتة هتسيب ذكرى فى عقلهم و قلبهم
فيه حاجات عملتها مع يوسف و محتفظة بيها و ليها ذكريات عندى و عنده
كمان تعلمهم اللعب بالالوان و الأبتكار و متبقاش صعبة عليهم فى أى وقت قدام فى حصص الرسم و عمايل انشطة و حاجات للفصل بتاعهم
بوسيلى العيال و خلى بالك من نفسك يا حبيبتى
و إنتى وحشتينى أصلا و نسيت أكتبها ف الاول فدينى بقولها أهو فى الآخر
بوسة و حضونة ليكى يا دودى



mahsen saber
يا سونسن لا فاشلة و لا حاجة و بعدين يا هانم لازم تتعلمى و تحاولى
عشان بيرو لما يروح المدرسة و المرسة تطلب منه لوحة و لا أى نشاط ..مين بقى اللى هيتدبس فيه ؟؟؟
مش حضرتك برضو
يبقى منظرك قدام عبدالرحمن و زمايله ف الفصل و المدرسة و الناظرة و وزراة التربية و التعليم كلها يبقى أزاى ؟؟؟؟!!!!
لازم تحاولى تتدربى و الأفكار دى بتبقى محاولات و على فكرة لو حاولتى إنشالله ف لوحة نص الحجم اللى ف الصورة تبقى أسهل شوية و بعدين ممكن تندهشى من نفسك و تكتشفى انك مستمتعة بالحكاية و تبدعى كمان
يلا بلاش كسل يا بنت أبيها الغالى
و يا النص التانى لقلبى برضو عندك نفس التفصيلة بتاعة أخو يوسف ؟!!!
يعنى لما أقول النص التانى مبقاش ببالغ
بوسيلى بيرو و نفسك كمان و متسألنيش أزاى ؟؟!!!!
هيه

نعكوشتى
أزيك يا حبيبتى و عاملة إيه ف الامتحانات
إيه دا كله ...إنتى بتقرى الغيب و لا إيه ؟؟
كان نفسى و الله ادخل فنون جميلة
و حاولت أشتغل مدرسة رسم بس منفعش اكمل و حكاية البرامج دى انا غاوية فرجة عليها من زماااااااان قوى
لما كنت بشتغل ف مدرسة أبتدائى من عشر سنين كنت بعمل أعمال زى دى مع العيال فى مهرجان القراءة للجميع و كنت بجيب كاسيت صغير كدا و أشغل أغانى و نقعد نغنى و إحنا بنرسم و نلون
و كان العيال بيدونى أفكار هايلة و بتعلم منهم
كل اللى بعمله إنى أقلد الافكار و أقعد اعملها مع يوسف و نلونها سوا
أنا بحس بالرضا لما بعمل حاجات زى دى ليوسف و بستمتع بيها جدا و دا يكفينى و مش لازم يكون شغلانة يعنى
كل الود ليكى يا نعكوشتى



إيمان
الله يخليكى يا إيمان
الف شكر يا فندم و يلا إبتدى مع العيال و ورينا الشطارة بتاعتهم و بتاعتك و ألعبو و إنبسطو




المعلم محمد صاحب المطعم - طعمية سخنة
ألف شكر ليك يا معلم احمد
منتحرمشى من ذوقك يا سيدى



assafo anaroze
ازيك يا أسافو
بص بقى أنت جبت التايهة زى ما بيقولوا ...
إنت حددت بالظبط اللى ورا الحكاية
يعنى لولا إنى متحمسة و فرحانة لأنى سمعت صوت يوسف و حاسة إنه ممكنيرجع فى أى وقت ...يمكن دا اللى خلانى أتحمس و أعملها
إنت قريت اللى بين السطور يا عزيزى
احييك بشدة و بزاف





bent men elzaman da !!
ميرسى جدا
كلك ذوق




مياسى
صحيح ؟!!
طب يلا ورينا الشطارة و إنتى عندك جمهور ممكن يشجع و يشارك كمان




أيوشة
ميرسى يا أيوشة
يا رب تعجب يوسف فعلا و ميقولش أنا كبرت على الحاجات دى يا ماما زى ما قال عن اللعب ...
يا رب



bos bos
هروح أشوف يا بسبوسة حاضر




بسنت صلاح الدين
بجد يا بسنت عجبتك و هتعمليها مع اختك ؟؟
طب كويس و الله إن الشرح واضح أنا قولت الوصفة هتلخبط اللى بيقرى اصل مفيش صور توضيحية للمراحل لأنى بصور بموبايل اخويا فمينفعش أقعده جبنى يسجل الخطوات كل شوية ...
إبقى صورى نجوم ليل أختك و فرجينا
على فكرة مكن اختك تقترح أقتراحات مميزة و إنتوا بتشتغلوا و هتشوفى اد إيه الحكاية دى بتستنفر فيهم طاقات و أفكار حلوة
كل الود ليكى يا بسنت



لجين أبو الدهب
لاااااا دلوقتى تلاقيها فى كل حتة يا لجين
و فى محلات ال 2,5 هتلاقيها كتيرة و متنوعة ...
دمتى إنتى بكل الخير يا نهر الفضة




ام مالك
القلوب عند بعضيها يا حبيبتى
ربنا يكرمك و يزيد قلبك جمالا و نور
و حب يملأ الكون
دعواتك تسعدنى و تفتح ف وشى باب امل و خير و بتفائل بتعليقاتك جدا
كل الحب ليكى و على رأى يوسف بوسات و حضونات كتييييير


يوميات شاب منوفى
الله يكرمك
شكرا لذوقك و لزيارتك
و تعالى نورنى دايما



soma
ميرسى يا سوما
ربنا يجعلنا أنا و يوسف من دعواتك نصيب
كل الحب ليكى

doba
يا حبيبة قلبى
أولا صباح الورد و الفل و الياسمين و كل حاجة حلوة
ثانيا يسوفك حبيبك يؤمرنى أمر و اللينك دا
http://drawing.gamemaker.nl/
فيه البرنامج التانى اللى كان يوسف بيرسم بيه قبل ما يمشى أما البرنامج الاولانى فللأسف مش عارفة إسمه و أتمسح من عندى بسبب فيروس بس لما أصادفه هقولك علطول ...
ثالثاً مدونة يوسف تحت امره زى ما هوه عاوز و يلا شدى حيلك و إبقى غعمليله مدونة مخصوص يلعب فيها و يحط رسوماته هوه كمان ..يعنى ملوش نفس و لا إيه يعنى ؟؟؟
و إنتى و خوخة رافعين معنوياتى دايما كدا بس إنتى اكتر و أكتر يا ميس
سلامة النونو و بلاش بقى يوقع قلبنا و يعمل حركات ...
لأ
تعمل حركات
عشان بنوتة إن شاء الله و بدون مقاطعة
و خلى بالك من نفسك يا هوبى و النبى
ربنا يتمملك الحمل على ألف خير و تفرحى و تفرحينا معاكى بإذن الله
اشوفك يوم اللقاء الحريمى أول ما تنوى خيخة و تفضوا إنتم شوية
بوساااات و حضونااااااااات ليكى و ليوسفك وللنونا





رئيسة حزب الاحلام
و لا يهمك يا سلوى
و الحاجات دى كنت بعمل زيها فى مهرجان القراءة للجميع فى الصيف
الأفكار دى بتعجب العيال قوى لما تشاركيهم معاكى فى التلوين و القص و تقعدى تقسمى عليهم الحاجة و تقعدوا تحكوا الحكايات و إنتم بتشتغلوا فبيحصل رابطة حلوة بينك و بينهم
إنتى شخصية هادية و حنونة و عليكى ابتسامة رقيقة تشجع الحجر على التعاون و المشاركة
جربى و قوليلى ...



قلب ينبض بالحب
يا خراشى على كل الكلام الحلو دا يا بدورة يا قمراية
متحرمشى منك يا حبيبتى و رافعة نعنوياتى





جنى
و عليكم السلام يا سعيد
إنت دايما كدا مشجعنى و تعلقاتك مليانة خير و طيبة
متحرمشى من طلتك عليا يا رب
كل الود ليك




إيمان فوزى
إنتى كمان يا إيمو وحشتينى
و وحشنى أندهلك و أقول يا إيمو
عقبال ما نفرح بيكى و نباركلك على الرسالة و آجى بنفسى احضر و أفرح و أفخر بيكى كل الفخر و يبقى معايا يوسف إن شاء الله
الملحوظة بتاعتك بتسعدنى جدا و تحسسنى بفخر
عارفة ليه ؟
لانى حاسة انها حاجة ممكن أقولها ليوسف و انا بدلل له على حب الناس ليه و متابعتهم لقصة حياته
و تشجيعهم ليه و ليا
متحرمشى منك يا حبيبتى
و بوسة و حضونة كبيييييرة ليكى
و سلامى لكل من عندك





my dreem
حاضر يا مروة
هروح أقرى
إنتى نورتينى





سبهللة
يا لهووووووووووى
ألف نهار أبيض يا ناس
سبهللة ف صفحة التعليقات
دا الصفحة و البوست نور
لأ ...
دا المدونة نورت
لأ .. المدونة إيه ؟؟
البلوج سبوت كله نور
و النور زغلل العيون ...
ألف مليون حمدلله على سلامتك يا سبهللولتى و إن شاء الله عودة بلا إنقطاع ...
فكرى فى حكاية اللقاء الحريمى دى زى ما قولتلك ...
هيكون ف اواخر مايو
و ربنا يسهلك الامور و تيجى
هتوحشينى لحد يومها
و إنتى أصلا وحشااااااااانى يا حبيبتى
متغيبيش علينا تانى بقى
و بوسيلى العيال قوى



يا مراكبى
يا نبع الحكمة مشكرين على التشجيع
بس ممكن العيال تتحمس
الاطفال ف المدرسة اللى كنت بشتغل فيها زمان كانوا متحمسين و بليشاركوا طواعية و كل يوم يسالونى هنعمل غيه النهاردة يا ميس ؟؟
يوسف كان بيشاركنى برضو التلوين و القص و الحاجات دى كلها و يبقى مبسوط
أوقات الولاد بتحس بالملل و عاوزة حاجة تانية غير الفرجة على الكارتون و بس ...
يبقى إن الام او الأب او الاخت او الاخ يشجع على حاجة زى دى و يشوف
طب فادى لما بيبقى عنده نشاط او معرض آخر السنة مش بيطلبوا منه يشارط باى عمل فنى ؟؟؟
بتعملوا إيه ساعتها إنت و مامته ؟؟





همس الاحباب
ازيك يا خالد
تسلملى إنت يا اخى الغالى
أنا أصلى بحب الحاجات دى يا خالد و بحس إنى برجع طفلة تانى و ألعب و انبسط
مش بخدها على أنها ألزام و لا واجب و لا فرض
دى متعة و عمل فنى و حرية
فكروا تعملوها لهموسة هتحبها اكيد
بس إنت تفضى و تلاقى وقت إن شاء الله
خالص الود ليك يا عزيزى

ههههههههههههههههه
ازاي ابقي احمد و محمد مع بعض
صلحي الغلطة المطبعية دي !

فاطيماتااااا
الله ينور عليكي
تسلم إيديكي بجد
بجد انتي فنانة وأنا أعتقد ان سبب العبقرية دي هي أمومتك الجميلة
يابخت يوسف بأمه
اللي بتعمله كل الحاجات الحلوة دي
تحياتي
حسن أرابيسك

حلوة البتاعة دي يا فاتيما ، هم الستات دايما بيعرفوا يعملوا المشاريع الفنية بشكل جميل ، لكن أنا حرمت أبوظ حاجة تاني!!

بحب الحاجات دي أوي أوي يا تمتومة
:)
و المدرسة اكيد لما اشتغلت فيها زمان علمتني كتيــر من الحاجات دي

بس القمر و النجوم الفسفوري دول موضوع كبير بالنسبة لي :). بتمنى أحطهم في أوضة نومي أصلا عشان بالليل أشوف القمر و النجوم :)

بوسة و حضونة ليكي المرة دي :)

فكرة رائعة وتنفيذها أروع .. أتمنى أن يعود إليك يوسف لتستمتعا بها معا وتعوضا كل ما فات بإذنه تعالى ..
خالص احترامى وحبى .

ربنا يسعده بيكى ويسعدك بيه
ويجمعكم على الخير ولا يفرقش بينكم أبدا يااااااااارب
طمنينى عليكى وعلى يوسف
عاملين إيه
يارب تكونوا بخير

هو يعنى مش عيد ميلادك 10 مايو ولا انا ضحكوا عليا ولا ايه بقى
عموما لو مش هو ابقى قولى علشان نزلت لكى تورته قبلى فافضل مشعلقاها كده ولا اعمل ايه

على حسب ما أوردت آبي انى النهاردة عيد ميلادك فكل سنه وانتى طيبه وان شاء الله السنين الجاية تكون احسن واجمل

المعلم محمد صاحب المطعم - طعمية سخنة
يا معلم مجراش حاجة العتب على النظر
و بعدين اصل إنت إسمك التدوينى طويييييل قوى و عقبال ما بكتب أول كلمتين فيه باجى على الأواخر و اخطرف
محصلش حاجة و عديها يا معلم احمد
يوووه
قصدى يا معلم محمد
نورت




حسن أرابيسك
يا فنان يا كبير المقام و القلب
لما بتقولى على حاجة إنها حلوة بتبرجل
بحس إنك بتجاملنى تعاطفا يعنى
أصلى مبقدرش أستوعب بسلاسة كدا إن فنان جميل و كبير كدا زيك يعجبه نكش الفراخ بتاعى دا
بس إنت كالعادة نشنت على الحقيقة اللى متاكدة انا شخصيا منها
إن يوسف هوه سبب أى حاجة بعملها و تطلع حلوة و مفيدة
متحرمش منك أبدا



أحمد كمال
يا احماااااااااااااد
يا كمال يا صاحب الرحايا
و المرايا
إنت نورت صفحة التعليقات و المدونة كلها ...
و بعدين يا فندم لما الهندسة كلها تقول البتاعة دى حلوة يبقى إحنا المفروض نتوارى خجلا من شياكتك و ذوقك و كرم اخلاقك اللى أصلا شىء معتاد و طبيعى
الحمدلله طمنتينى عليك و كان نفسى أشوفك يوم البؤجة ...
بس ملحوقة ف يوم تانى قريب إن شاء الله
خالص الود و الأحترامات ليك يا عزيزى




wish i were abutterfly...
يا خرابى على تمتومة اللى بموت فيها دى و بحبك قوى لما تندهينى بيها
الأولة وحشتينى
و التانية مدام عجبتك إعمليها و علقيها عندك و لا يهمك و صدقينى شكلها فى الضلمة بيبقى حلو قوى
و الثالثة إنتى كمان خدى بوسات و حضونات
و الرابعة خلى بالك من هبهوبة اللى من غير ما توش بترفلاية رقيقة صغننة



إيهاب راضون
شكرا يا أستاذ و لو عجباك حاول تنفذها مع كتاكيتك الصغيرين
هتعجبهم
متهيألى كدا
خالص ودى و إحتراماتى أنا الأخرى





المنسى
يا منسى ى ى ى ى ى ى
حمدلله ع السلامة يا بنى
إنت فين أراضيك ؟؟؟
يا رب تكون دايما بخير
متشكرين يا فندم على الدعوات الحلوة و السؤال و التحية
و طمنا عليك دايما و متغبش
كل الود ليك




appy
يا قمر التدوين كله
كله
يا حبيبتى عيد ميدانى ( يوسف كان بيقولها كدا زمااااان ) المهم عيد ميدانى يوم 15 تزامنا مع قيام دولة إسرائيل و ثورة التصحيح و مش عارفة إيه كمان حصل فى اليوم المنيل دا
بس لو إنتى قولتى عشرة يبقى مش هتنيلك كلمة و اللى تؤمرى بيه يمشى
كفاية إنك مدلعانى و جايبة تورتة كمان
اما أروح أشوف فضلى حتة و لا إتلهطت عن آخرها
بوسة و حضونة كبييييييييييرة يا حبيبتى




رئيس جمهورية نفسى
يا نحنوت كما تدعوك آبى هانم بتنجانى
و إنت طيب يا محمود و بالصحة و السلامة
متحرمشى منك أبداً يا رب
و يباركلى في عمرك يا ريس
خالص ودى ليك

كل سنة وأنتي طيبة يا فاتيما ويخليكي أنتي ويوسف لبعض
تحياتي

وحشنى كلامك يافاتيما
فين البوستات الجديده؟
ايه البخل ده؟
ماليش دعوه عايزه بوست جديد
هه
بعدين الم عليكى المدونين ونعمل مظاهره قدام باب المدونه
نطالب فيها بتنزيل بوست جديد
وتوقيع غرامه عليكى علبه شيكولاته لكل مدون

فكره حلوه اوووووووي ياام يوسف :)

تسلم ايدك بجد :)
علي فكره انتي ام جميله اوووووووووي ربنا يبارك فيكي :)

تحياتي :)

و أنا كمان هقول كل سنة وانت طيبة زي آبي و "نحنوت" اللي مختفي و مايكل

يارب السنة الجاية كل أحلامك تكن اتحققت ويكون يوسف في حضنك يا حبيبتي
يا تمتومة:) بدل عجبتك

ياريتني فعلا أفضل "صغنتوتة"زي ما بتقولي. أنا حاسة إني كبرت أويييي،و غلست أوييي :). ادعيلي أرجع طفلة بيبي مش مهمومة تاني
كل سنة وانت أرق و أحلى :)...ياللي برجك زي برج بابايا

طيب أقول إيه أنا دلوقتي ؟
والله مش عارف أرد اقول إيه ؟

ألف شكر على الإعلان عن الخطوبة يا أم يوسف
رغم إنها على الضيق و إحنا كان نفسنا نعزموكوا
الخطوبة و تلبيس الدبل حتكون في حفل عائلي بسيط في بيت العروسة ليلة الجمعة الجاية

شاكر لمشاعرك الجميلة دي
ربنا يكرمك بكل الخير دايماً يارب و يريح بالك

و كل سنة و داليا طيبة
:) و إنتي كمان ما دام من نفس البرج يبقى عيد ميلادك قريب
كل سنة و إنتي طيبة و بخير دايماً

عملت لك عيد ميلاد عندى ياطمطم
(:
مش معقول هتيجى متأخر حتى فى عيد ميلادك
بوسه كبيره علشانك
مستنياكى علشان نطفى الشمع سوى
اوعى تتاخرى

ازيك يا فاتيما ؟؟

ما شاء الله عليكى حبيبتى ..
اكيد انسانه برقتك و قلبك الكبير لازم تكون فنانه ..
ربنا يفرحك بيوسف ياارب و يرده لحضنك سالما و يعوضك عن كل اللى فات و يفرح معاكى بكل اللى بتعمليه علشانه ..

سلمت يداكى غاليتى

ارق تحياتى

كل سنة وانتى طيبة وبالصحة والسلامة وان شاء الله السنة دى ربنا يحقق كل احلامك ويرجع يوسف لحضنك

الاول نقول كل سنة و انتى طيبة يا فاتيما

و كل سنة و انت بخير و صحة و سعادة يارب
و ربنا يطمن قلبك
و يحقق لك كل اللى نفسك فيه


و طبعا انا و دودو واحد مفيش فرق

يعنى اعتبرى ان انا اللى جبت الهدايا و نفخت البلالين
و جبت الجاتوهات
بس كل ما يمس الشيكولاتة بصلة ليا فيها نصيب طبعا
P:

............

ثانيا : أفكار مبدعة والله
ربنا يكرمك يارب

و يفرح قلبك بيوسف يارب


ربنا يوفقك يارب يا جميلة

و دمت دائما فى رعاية الله

فاتيما
كل سنة وانت طيبة يا ام يوسف
ويارب دايما فى سعادة ويرجع يوسف لحضنك الكبير الدافئ

كل سنة وانتى طيبة يا احلى فاتيما وعقبال 1000000000000000000000 سنة وحشتينا اوى أن شاء الله يوسف يكون فى حضنك قريب

فاتيما
اسف على التاخير في اني ابارك لك عيد مولدك السعيد و لسه شفت الخبر عند عاشقة و جيت جري علشان اهنيك و اتمنى انك تكوني بخير و يا رب عقبال مءة سنة كمان
و يا رب بهذه المناسبة يرجع لك يوسف الى حضنك عن قريب
مودتي

micheal
و إنت طيب يا مايكليتو
دايما أخلاق كدا و ذوق
متحرمشى منك يا عزيزى





عاشقة الرومانسية
يا دودو أعمل فيكى إييييييه بس ؟
أنا مش لاقية كلام و الله
يا حبيبتى متحرمشى من رقة قلبك دى أبدااااااااااا
و هكتب بوست جديد حاضر اهو
بس اخلص رد على تعليقات البوست دا
كل الحب ليكى يا عروسة البحور
و بوساااااااات
و حضوناااااااااااااااااااااات



eno
منورة يا بنوتة يا قمرا إنتى
ميرسى يا حبيبتى على تشجيعك و عقبال ما تعملى لولادك عن قريب بإذن الله





wish i were a butterfly...
يا حبيبتى و إنتى بألف خير
يا رب يسمع منك و يستجيب لدعواتك الحلوة دى و إنتى صغنونة لسه و عمرك ما هتكبرى طول ما قلبك برىء زى ما هوه دلوقتى
بوسة و حضونة كبيييييييييرة ليكى يا من غير ما توشى
بترفلاية رقيقة صغننة




مهندس مصرى
يا محمد ألف مليون مبروك ليك
و أنا كنت حطالك شكولاتة و تورتة و حركات يا رب تكون لحقت شوفتها و لا خلاص يا عم مشغول مع العروسة
بصراحة
يا بختها بيك بجد
ربنا يسعدكم و تكون عروسة السعد و الهنا و وشكم يبقى حلو على بعض إن شاء الله
الف مبروك يا اخى العزيز و عقبال ما نبارك على ليلة الفرح
و على النونو من بعدها





عاشقة الرومانسية
يا بنت يا شقاوة إيه حكايتك ؟؟
اما اروح أشوف إيه النظام




rovy
ازيك إنتى يا روفى و ازى احوالك يا حبيبتى
و يا بنتى لا فنانة و لا حاجة دا شوية لعب بالالوان و حركات كدا على قدى
يا رب بس تعجبه لما يشوفها
ان شاء الله
خالص الحب ليكى يا روفى




ايوشة
و إنتى طيبة يا أيوشتى
كلك ذوق يا حبيبتى دايما




soul.o0o.wishper
و إنتى طيبة يا ويسبر و كلك ذوق يا حبيبتى
طبعا كلكم ف قلبى و المحبة ربنا عالم بيها
بس الحب فى كل حاجة إلا الشكولاتة يا ماما معرفش أبويا فيها
طب ممكن اديكى حتة فتفوتة سنتوفة زى ما كان يوسف بيقول
سنتوفة شكولاتة و خديها بسرعة من غير ما آخد بالى و أشوفك عشان ضربات القلب بتتسارع و بيغمن عليا
كل الحب ليكى يا همس الروح




القدر و انا
و إنتى طيبة يا عزيزتى
متحرمش من ذوقك أبدا





مى
أزيك يا مى
كل سنة و إنتى كمان طيبة يا حبيبتى و بأحسن حال يا رب
و كل من عندك كمان يكونوا تمام و بخير و بصحة
إنتى كمان وحشانى برضو



assafo anaroze
يا اسافو بتعتذر على إيه
اولا انا اللى كسلانة شوية الأيام دى عن المدونة و التدوين عموما
ثانيا انا مقصرة ف حقك تقصير فظيع
لكن طيبة قلبك مخلياك تسال عليا و تودنى و تطمن عليا دايما
كل الود و الإحترام ليك يا اخى العزيز من اجمل بلاد الدنيا
الشكر بزاف بزاف لن يوفيك حقك
مودتى أنا أيضا يا اخى

يا حلولي يا حلولي أنا بكرة هعملها اشمعنى يوسف يعني بجد تحفة ويا رب تطلع حلوة وانتي أم الأفكار وأم يوسف هههه

إرسال تعليق