.

.

يستاهل الف حمد  

Posted by: فاتيما in

الحمدلله
إنك كنت معايا 8 سنين مفارقتش فيهم حضنى
الحمدلله
إنى مبطلتش اقولك فيهم بحبك و أبوسك و احضنك و ألعب معاك
الحمدلله
إنك شوفتنى كفاية عشان متنساش شكلى
الحمدلله
إنى عندى صور كتير ليك عشان أقعد أشوفها كل ما توحشنى
الحمدلله
إنك بتقدر تكلمنى كل كام شهر تسمعنى صوتك
الحمدلله
إنى شوفتك مرة فى السنة اللى فاتت و لقيتك بقيت طولى
الحمدلله
إنك هتتم 10 سنين و قربت تكبر شوية وهتبقى تقدر تجيلى لوحدك
الحمدلله
إنى لسه عندى امل ترجعلى ف يوم من الأيام
الحمدلله
إنى عارفة على الأقل عنوان سكنك و مكانك فين
الحمدلله
إنك عايش وإحنا الاتنين ما موتناش يعنى فرصة لقانا تانى ممكنة
الحمدلله
إنك موجود فى حياتى
لأنك تقريباً الأنجاز الوحيد اللى حققته ف حياتى
و خلى لأيامى معنى و إنها ما راحتش منى على الفاضى
الحمدلله
إنى بقيت امك
يا حبيبى

This entry was posted on الأربعاء, مايو 27, 2009 and is filed under . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

الحمد لله يا حبيبتي
الحمد لله يا فاتيما
الف حمد وشكر لله على كل حال

انت عارفة ربنا مش بيختار لأبن آدم أصلا غير الخير
وابن ادم عمره ما يقدر يدرك الحكمة الربانية في قضاء معين
لو مؤمن بيقول الحمد لله على كل حال ومن غير ما يفهم ولا يشغل حتى عقله

ولو ايمانه ضعيف او عديم الإيمان بيفضل يقول ليه؟ طب ليه؟
لا بيغير شيء في قضاء الله
ولا بياخد أجر الصبر والشكر
ولا بيرتاح

فالحمد لله ان ربنا وهبك الحمد لله

كتير من المصائب حكمتها مخفية
يمكن تعلو بيها الدرجات
يمكن تبلغي بيها درجة الصابرات
يمكن يكون خير ليه ولصفاته الشخصية "بشكل احنا مش فاهمينه" أنه يمر بالتجربة دي
يمكن ويمكن

بس الأكيد أن رحمن الدنيا والآخرة ورحيمهما ها يفك عنك الكرب ويذهب عنك الهم ويرد إلى أحضانك أغلى الحبايب بحوله وقوته واسمه المنان واسع الرحمة ذو الجلال والإكرام

يارب أرنا منك آية في ساعة يصعد لك الملائكة فيها بدعوات أهل الأرض وأعمالهم

يارب أنا أهون العباد وأكثرهم ذنوبا وليس لي سواك رب استغفره وادعوه فلا تحرمها صحبة يوسف ابدا ولا تأجل لها فقد طال عليها الأمد

اللهم يا مفرج كرب يونس لا إله الا انت سبحانك اني كنت من الظالمين

اللهم يا من شفيت ايوب رب اني مسني الضر وأنت أرحم الراحمين

قولي أمين
وصباح العسل والسكر والنسكافيه وبلاها نوم ههههههههههههههههههه

يالا بقى ضحكة واحده فيها امل بالفرج تلاقيه على اعتابك

الحمد لله حمدا كثيرا طيبا مباركا فيه كما ينبغى لجلال وجهه وعظيم سلطانه

الحمد لله عدد ما كان وعدد ما يكون .. عدد الحركات وعدد السكون

الحمد لله عدد خلقه وزنة عرشه ورضاء نفسه ومداد كلماته

أسأل الله ان يردلك يوسف ردا جميلا ويقر عينك به اللهم آمين يارب العالمين


وحشتينى يا طمطم
:-*

جعلة الله قرة عين لكم في الدنيا والاخرة وادعو الله ان يعود اليكم لإنتم بع الحنان الروحمة وامد الله في عمركم لكي تهنئو به ويهنأ بكم
فاتيما أسعد بتواجدي هنا ولكن معذرة فالنت عني بطئ جدا!!!اليم بقه؟؟!!

عبد الجليل

السلام عليكم


الحمد لله علي كل شئ
الحمد لله انه في قلبك لم يغادره أبداً
الحمد لله أنك حاسة به - حتي لو في أخر الدنيا

وربنا يخليه لك
ويجمعكم علي خير
وان شاء الله تشوفيها كما كنتي تتمني
ربنا يرده الي حضنك ردا جميلا

الله عليكى بحبك وانتى عندك امل كده ومش بتيأسى ابدا بس شد حيلك بقى يا قوى شويه برضه

حبيبتى فاتيما
الحمد لله على كل شىء،سبحان الله ربما منعك ليعطيك ، و هو يأخذ منك ليس لشىء الا ليعطيك شيئا اعظم

الحمد لله أنك أمه

الحمد لله انك عارفه ان ربنا دايما بيقدر لنا الخير حتى لو مش عجبنا

الحمد لله انه لطيف دايما بينا وبيحبنا وبيقدر لنا الخير على طول


الحمد لله على نعمه التي لا تحصى

الحمد لله خالق السماوات الأرض

لا تملي من الحمد
احمدي ربنا
وأكيد ربنا مش بيريد حاجه وحشه
تأكدي أنه هيقر عينك به تاني

الحمد لله على كل الاشياء خيرها و شرها
الحمد لله انى حاسه انك قويه و عندك امل كبير فى ربنا
حاسه ان الامل عندك بقى اكبر و افوى من زمااااااان بكتير و انشاء الله كل ما تنجحى اكتر حتبقى اقوى و اقوى
ربنا معاكى و مين عارف يمكن ربنا يحقق الامل و تلاقيه جاى يحتفل معاكى بعيد ميلاده

الحمد لله ان ربنا جاعل فى قلبك الرضا بقضائه
الحمد لله ان ربنا الهمك قول الحمد لله
ربنا يبارك لك فيه ياطمطم
ويجعله حنون عليكى نص حنانك عليه

ب ح ب ك ياام يوسف

الحمد لله علي كل شئ يافاتيما

ربنا يقرب بينكم وتشوفيه علي خير يارب وتملي عينك منه وهو يغمرك بحنانه عليكي

احمدي ربنا واشكريه ده هو القائل سبحانه وتعالي (ولأن شكرتم لاأزيدنكم)

ربنا ينعم عليكي بي رؤيت ابنك ويقر عينك بيه :)

برضه انتي ام جميله اوووووووووووووي
وانا بكون مبسوطه وانا داخله عندك اووووووووووووووووووووي بجد
تحيااتي:)

ألف حمد إنك بتنوري شمعة بدلا من لعن الظلام

والحمد لله إنك بتحمديه وتشكريه لأن اللي انتي فيه ده يا فاطمة إبتلاء من ربنا كي يرى مدى صبرك وإيمانك وثقتك فيه ويسمع منك إبتهالك ودعائك ويفرح بحمدك وشكرك ليه رغم الألم

والحمد لله إن يوسف كبر وخلاص هانت وبكره مش هيسيب حضنك أبدا

ربنا مايحرمكوش من بعض ويفرح قلبك بيه

أنا برضه عندي يوسف وسنه 11 سنه وهخليه بعد الإمتحانات يدخل يكتب ليكي ويكتب ليوسف في المدونة بتاعته

ربنا يحميهم ويحفظهم ويسعد أيامهم وأيامنا

بحبك قوي يا تيما

السلام عليكم ورحمة الله وبركاته

الحمد لله يا طمطم

وان تعدوا نعمة الله لا تحصوها

اكيد ربنا مش هايضيع صبرك ده من غير اجر وان شاء الله يجعلك بعد العسر يسر قريب جدا

بصراحة مش لاقية كلام أبلغ من اللى قولتيه يا فاتيما الحمد لله وربنا يصبرك ويجمعك بيه على خير يارب ويفرح قلبك بيه كمان وكمان ومن عارف ربنا رايد ايه يمكن ان شاء الله يرجعه لحضنك وما يحرمك منه ويفضل معاكى تفرحى معاه وتعيش معاه أحلى اللحظات ربنا يحقق لك مناك يارب ويرزقك بكل خير ويقوى قلبك ويصبرك

دمتى بكل خير وصبر وسعادة

يارب يجمعك بيه علي خير قريبا جدا ان شاء الله

آه يا طماطم
حاسة بيكِ اوىىىىىىى وعايزة حضن كبيييييييييييييير
هيرجعلك تانى ياحبيبتى
كونى واثقة من ده
وقريب اوى كمان
ربك كبير ومش ممكن يخذلك ابدا مهما طال الوقت فرجه قريب وآت لا محالة

الله سبحانه وتعالى عند حسن ظن عبده به

مش عارف ليه كل ما اقرا هنا أحسن باحساس بالظلم يقتلني

الله يكون في عونك ويعنيك ويجمعك مع ابنك

الله يكون في عونك ويعنيك ويجمعك مع ابنك

ربنا يخليكوا لبعض يا رب

الحمد لله


سلام عليكِ

الحمد لله رب العالمين ..

ربنا يكبرهولك يارب ويعرف ياخد قراره بنفسه ويجيلك وقت ما هو عايز ..

بجد يافاتيما انا بحبك اوى وبحب كلامك وبتأثر بيه لانى بحس انه صادق ..

وما اقولكيش فرحت اد ايه لما شفت اسمك فى مدونتى .. والله العظيم قلبى طار من الفرحة ..

ياريت تبقى تنورينى من فترة لفترة كده ..

والله انى احبك فى الله ..

الحمد لله يا فاتيما
و الامل في ربنا دائما موجود و في ارادتنا لتحقيق ما نريد
اتمنى تحضني يوسف من جديد
مودتي

يارب تقدري تشوفيه قريب وتطمني عليه وتاخديه في حضنك والحمد لله دايماً

الحمد لله ان ربنا عطانا احلى ام والله وانسانة نقية وقلبها ابيض اوىىىىىىىىىى طول ما الحمد الله انتى مؤمنة ومتيقنة ان ربنا معاكى إن شاء الله ربنا هيرجعلنا يوسف وتفرحى بيه بإذن الله بحببببك اوىىىىىىى متتاخريش علينا يا احلى ام
ام يوسف الجميلة

فاتيما حبيبتى
طبعا الحمد لله على كل حال

هاقولك تانى على حاجة قلتهالك قبل كدة
بس شكلك ما نفذتيهاش

هاتى السبحة وتكون سبحة كبيرة 99 حباية
وطول مانتى قاعدة قولى
"استغفر الله واتوب ايه"
وماتعديش قلتهيا كام مرة
ال 100 مرة بياخدوا حوالى 4 دقايق
طيب دة ايه علاقته بموضوعك
انا اقولك
فى ايه فى القران الكريم بتقول

بسم الله الرحمن الرحيم
(( ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا
وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) ))
صدق الله العظيم

ودى تفسريها ان الاستغفار بيتسبب فى نزول الامطار ويتسبب فى توزيع الرزق وفك الضوائق المادية
ويتسبب فىفى ان اللى يتسغفر يرزق بأولاد
دة غير تكفير الذنوب ودخول الجنة وبالتالى
استغفرى وانتى على يقين ان ابنك هايرجعلك بفضل الاستغفار وسوف ترزقين به مرة اخرى

واقسم بالله العظيم يا فاتيما
ان انا جربت الاستغفار دة فى مواقف محددة وخاصة لما يكون ضائقة مادية ودى بتحصلى كتير لانى انسانة غير مدبرىة على الاطلاق
وإذا بالسماء تطر عليا فلوس من حيث لا ادرى وبدون حول منى ولا قوة

ارجوكى ما تسيبش السبحة من ايدك
وماتسبحيش على ايدك لانك هاتنسى
لكن طول ما السبحة فى ايدك بتفكر بالتسبيح والاستغفار

وان شاء الله فرج الله قريب جدا
اقرب مما تتصورى

اللهم يا من جمعت يوسف بأيبه يعقوب
ويا من جامع الناس ليوم لا ريب فيه
أجمع بين بين فاطمة وابنها يوسف
آميييييييييييييين

بحبك فى الله
سلام عليكم

موش عارفه اقول ايه

ربنا يجمعكم علي خيييييييير

ربنا يباركلك فية

وما يحرمك منة ابدا

ربنا يطمنك علية يارب

بجد انتى ام عظيمة جدا يام يوسف


ربنا يجمعكم على خير يارب


اسير الجراح

فاتيما

الحمد لله انك وسطينا بتزرعي فينا أمل بتعلمينا الصبر بتعلمينا الحب بتعلمينا الحنية

الحمد لله ان لسه في ناس زيك علشان محتاجين منهم كتير

ألف حمد وشكر ليك يارب علي ما أعطيتني وما حرمتني فما أعطيتني إلا لنعمة وما حرمتني الا لحكمة

الحمدلله يا فاتيما :)
الحمدلله ان في حد في حياتك بتحبيه و بيحبك .. الحمدلله ان ربنا انعم عليكي بنعمة الأمومة ..
ربنا يكرمك يا حبيبتي.

ونعم بالله

انتى كل يوم بتحسسينى انك ام حلوة اوى وجميلة بجد

وبجد بتعلم منك كتير

تحياتى وحبى ومودتى

يااجمل ماما ف الدنيا ..

الحمد لله على كل حال
الحمد لله ملء السموات والارض ما بينهما
الحمد لله زنة عرشه ومداد كلماته
ربنا بخليكوا لبعض
وان شاء يرجع لحضنك قريبا
تحياتى

تستاهلي الحمد يا فاتيم يا حبيبتي..لأنك مؤمنة و قلبك مليان ايمان و لأنك أم مفيش زيها و ربيتي أحسن تربية و لأنك صابرة و راضية بقالك كتير و ان شاء الله ربنا حيفرح قلبك بيوسف تاني و تشوفيه راجل يحميكي و يضلل عليكي و يعوضك عن كل الحاجات الوحشة و الأيام الصعبة اللي مريتي بيها..البوست ده بجد مثل حي للرضا بقضاء الله و الصبر..ربنا يكرمك يا فاطمة

هو انا كنت فى غيبوبة ولا ايه؟

انا ازاى ماقريتش البوست اللى قبل ده


انا عايزة بتاع زى اللى عندكم كلكم
البتاع ده اللى بيخلى الواحد يعرف انتوا بتكتبوا ايه من وراه





يوسف قعد معاكى تمن سنين
وراح عند باباه فى يناير 2008 يعنى من حوالى سنة ونص زى ما فهمت
يبقى ازاى هايكمل حداشر سنة؟
ولا انا فهمت غلط؟

المفروض ان تمانية زائد واحد ونص يساوى تسعة ونص

فيه سنة ونص واقعين ليه؟



المهم مش ده موضوعنا دلوقتى

موضوعنا النهاردة
انك بتحمدى ربنا
ودى حاجة فى حد ذاتها شئ جميل
لان ده معناه ان الامل بدا يتسرب ويدحلب ويعشش جواكى تانى
وانك بدأتى تضحكى للدنيا

هو مين البامبينو اللى بيبصلى ده وانا بكتب التعليق ؟
اللى جنب اسم ستيتة

ماعلينا خلينا فى موضوعنا


كنا بنقول ايه؟
اه كنا بنقول انك بتحمدى ربنا


يستاهل الف حمد فعلا

انا عاجبنى اسم البوست جداااااااااااا
وعاجبنى البوست
هادى وفيه حتة حزن كدة
بس بتزقيها بالأمل اللى جواكى
فمدية البوست طعم الشكولاتة بالقهوة
معرفش ازاى
بس البوست فيه مرارة البن
وحلاوة الشكولاتة


سلام
اختك خيخة

الحمد الله
الحمد الله
الحمد الله
ربنا يعوضك خير
ويخفف عنك
ويهديكي
ويرحمك
ويرزقك بالخير كله
امين امين امين

يا كل احبابى
و يا أصحاب ال34 تعليق و للذين لم يعلقوا كمان ...
أنا كنت فاكرة و أنا بكتب البوست إنى وصلت لحالة جميلة و سعيدة من الإحساس
و الحقيقة إن التعليقات كانت اجمل و اروع ألف مرة مما كتبته او احسسته
ربنا يخليكم ليا و يجعل لنا نصيب أنا و يوسف فيها و يردها الله لكم بكل الخير و الستر و الصحة يا رب
ملحوظة صغنونة للبت خوخة ام شريف
الرقم كان غلطة مطبعية يا خيخة لأنى كتبت البوست و لم أراجعه و مفتحتش النت من وقتها إلا على التعليقات
صلحته خلاص يا فندم و كتبت الرقم الصحيح ...
ملحوظة بقى للكل
بحبكو جدااااااااااااااا
و محظوظة بيكم جداااااااا
ولدرجة لا توصف ... لذا فأعذرونى
لو كتبت البوست الجديد لكم بكثير من الحب و قليل من البراعةاللفظية و التعبير ...
لكنه بعض من هذيانى
و قد تعودتم عليه خلاص

أزال المؤلف هذا التعليق.

إرسال تعليق