.

.

خريطة قلبى  

Posted by: فاتيما in ,


قلبى من بدء التكوين إنشطر
و إنفصل ليكون بذاته عالم واسع
يسكنه العشرات من الأشياء و الكيانات و الأهم من دول
الناس
و الناس دول
دون أن يدركوا أو يعرفوا أو حتى يطلبوا ... أصبح قلبى لهم وطناً
و الناس دول
منهم اللى شفته بعينى
و منهم اللى شفته بقلبى
وفيهم اللى شوفته بالإتنين سوا و منهم اللى كمان مشفتوش خالص لحد الآن
كلهم عبروا من البوابة و اتخذوا قلبى مطرح و سكن
البعض اختار مكانه و بنى له داراً و قرر البقاء فيه للأبد
و منهم من قرر أن يأتى مرات و يرحل مرات
و منهم من قرر الرحيل على غير عودة
مدونتى و هى جزء من قلب قلبى
أصبحت هى الأخرى عالم كبير له خريطة واسعة
موزع فيها سكان كثر
و خريطة قلبى مقسومة لبلاد و مدن و محافظات
تشبه خريطة العالم الحقيقية تمام بخطوط طوله و عرضه و مداراته
و سهوله و جباله و انهاره العذبة و بحوره الخطرة الخاطفة
فى اقصى هذا العالم البعيد
تكتب زيانور ام نور و زياد بحنين دفين من كندا
و تقترب كاميليا الحالمة بشجن رقيق من ألمانيا
على القرب منها يختبىء و يعود معتز وجهة نظرى من رومانيا
يعبر الأحباب الآخرون السماوات الأفتراضية البعيدة
و يطلون على قلبى من قارة أسيا
من الكويت ياتى كل من نسرين بسيونى لتنادى إسكندرية
و حفصة الحائرة ف الناس و العالم و حازم شلبى العصفور الذى أرقه الحنين
على بعد خطوات فى قطر
تذوب من هموم الغربة هنودة أرق قمراية إسكندرانية
معها فى نفس البلد واحد يهيم بالماريا شوقاً هو الباشمهندس أسكندرانى اوى
و محمود الغالى الخايف دايما من الحقيقة الاخ و الصديق
و ست الناس مراته و حبيبته و أخيراً من هى عكس ما تدعو إليه كفاية طيبة
يقاسمهم على الحدود و من المملكة العربية السعودية
شادد القلوع و المهدد دوماً بعدم الرجوع عم المراكبى نبع الحكمة
و سعيد صاحب القلب الطيب و الملقب بجنى
و فى نفس البلد تعيش إيما ام البنين وفريق الزعر حبايبى عاصم و زياد و رامز
و الشقية الاهلوية الجميلة مونى الشريف و الهادئة الرقيقة جنة
و مادو 80 قلب الحياة اللى على إسم اخويا الصغير ماجد
و آخر سلاسل المغتربين للسعودية المهندس مصرى محمد ودعاءه الذى لا ينقطع
و من الامارات يسكن إيهاب رضوان المقطر موهبة و معاه فى البلد ذاته
وليد الرقيق عارفة ... مش عارف ليه
و فى مكان ما من الخليج لا أعرفه يقطن تامر طه اكتب الرصاص
و من لبنان تطل غيدا مجرد كلام و من الأردن تطل بصمت خجول مياسى
و من أقصى الشمال الأفريقى
يزورنى بكل ود أسافو اناروز من المغرب و حنان العزيزة من تونس
اما فى حدود هذا البلد الغالى الذى عذبنا كثيرا و عذبناه
مصر
ام الدنيا
فتتوافد القلوب من كل مكان
من الأسكندرية الماريا اجمل بقاع الدنيا
تاتى لماضة مروة عامر التى تأسرنى لما بتنادينى ماما
و دودو عاشقة الرومانسية عروسة البحور الجدعة
حنين القلب حنونة جنية البحر و بنت القمر امانى اللى إحترت فيها
ستيتة حسب الله الحمش ستوتى و مروة ست البيت أنا اهتم
و daliha الحنونة ماى كورنر و الطيوبة janaالإسكندرانية الأصيلة
و أم مالك صاحبة الدعاء الطيب من القلب و درتها المكنونة
لجين أبو الدهب نهر الفضة الخالص و تتبقى اللى مطنشانا زمردة و لحظات حنينها
و شيمو القمر و الشمس فى سما واحدة و أسير الجراح احمد الطيب
و وليد احلى صباح الخير يا مصر المختفى و rovy الرقيقة
و الرقيقة التى تنبض حباً نبض إسكندرية و مروة ست البيت اللى بتهتم
و سموكتى سمكة واحدة و hopiz الوحيدة و حروف الجميلة و عالمها الخيالى
و t3ban صاحب الحكاوى و حنان الشافعى و رياح الحنين و مجداوية اللى بألف راجل
كمان من احلى بلاد الدنيا elmasrya- mrs writer الحنونة دوما
و نهايةً ahmed talk آخر نسايم بحر إسكندرية
من السويس
خالتى الغالية فرنسا و عبدو باشاااا الرايق و kochiaكوشكش و قصاقيصها
و من بورسعيد الباسلة
الغالى بابا أبو خالد و إيناس نهر الحب المتدفق و نسمة الرقيقة هيا فوضى
داليا تؤامى أهو ده عيبه و البورسعيدى عن حق طارق الغنام
و شيماء العيلة المفترية
من إسماعيلية بلد أبويا الله يرحمه
رودى ام نور القمر بنوتة مصرية مرهفة الإحساس و القلب
من بنها العسل
كريم بهى
و من المحلة
غادة عبدالعال ست البنات اللى كانت عايزة تتجوز
و نيجرو الواد أبو قلب دهب عيار 24 صافى
و من الدقهلية
خطيبة إبنى ميادة قاف ميم و أيضاً أيمن بدر عرضحالجى التدوين
و رحيل و محاولات بحثها التى لا تتوقف
من كفر الشيخ
أحلى متغاظة أند مفروسة الجميلة المشاكسة
و من الشرقية بلد الكرم و باين فى عينيها و قلبها محاسن صابر
بنت ابيها و النص التانى لقلبى
و من المنصورة
برقش إبراهيم الدكتور اللى زى الفل و sourah و الأستاذ عبدالجليل
و الجميلة الراقية الخيط الرفيع
و من دمياط
سالى الطيوبة ام دودو حاجات جوايا و الرهيفة الحس ليساندرا الحبيبة
من محافظة 6 اكتوبر و مش اللعينة لأن فيها تسكن
البت خيخة و مش أى كلام ام شريف الجميل
و واحدة مفروسة فروستى حبيبتى و أرض احلامها
و كمان ضياء العقل الجميل والاخلاق متجسدة فى بنى آدم
أما فى القاهرة الجديدة و حبة ف العريش
قمر التدوين كله آبى هانم بتنجانى و بطوط عربيتها و شوية خرفان بمبى
على طرف الخريطة تحديداً الغردقة
يعيش ahmed-k و أحلى دردشة عربى
و من قلب الصعيد الجوانى أجدع ناس
رئيس جمهورية نفسه محموووووود و اميرة الصعيد أخته
و إيوشة ام المشاعر و الاحاسيس
الكوم الكبير من القاهرة
التى يسكنها روح قلب ماما يوسف
و شاهى مفيش حاجة غير قلب طالعله إنسانة و دوبا الميس بتاعتى فى فن التعايش
و ام يسوفة العسل و النونة الجاية ف السكة إن شاء الله
شيماء فضفضة أونلى سبوت اللى هيا مشمشة و ميرا الاميرة وومن بعقل رجل
و ياسمينا الفنانة المفروسة العسولة و كيارا و عالمها الجميل بتاع مولان
الدكتور زين و احلى تسابيح ف الكون و صاحب مفتاح البوابة الخيالية
نبضات نبوضتى عرافتى الساحرة و عاليا حليم و العندليبيات
ميدو راين مان و رحيل مباغت و الواد اخويا سوووو العجوز ابو 30 ربيعاً
عسقلانى الجميل عسقول و تؤامه الباحث محمد
و الأستاذ محمد مشاعر و أفكار و شوية كلام بس مش أى كلام
الطيب قلباً و قولا بدرية عبد الجواد بدروة و بسبسة بسبوسة بوس بوس الروح
شيماء سمير العصفورة الصغيورة مشموشتى و هدى عبدالقادر
رينبو شقيقة الروح و سيدة الألوان و همسات صمت نرمين المعبرة
مصطفى إبنى فراك جوست و شبوراته و إزازه و روحه الشفافة الحائرة
العزاز احمد مهنى و احمد البوهى و احمد مستر كوفى الغاليين عليا
مى بهاء ميومة البهية الأبهى من البهاء ذاته و دودا هانم و ست الهوانم كلهم
إيمو شخابيط أيمان فوزى حبيبتى و أزميرالدا اهو كلام و السلام و معاهم إنسانة
الغزالى و قلب مصرى و صباح الصباح و احمد يا سكررررررر
و محمد غاليه المرهف و اللى حاجة تفرح
وليد كنج توت راعى الملك و اميرة احلامه bobo وعمر احلى ولى العهد
نور شاهين و تعالوا نفكر سوا و ميمو اخف دم قريتله و حاسوبتية
مهاميهو احسن تستاهل و مهرة و حرافيشها و رحاب مصطفى ام الطف صوت
و دريم فضفضة على السريع
الأستاذ شريف و تحضر و شياكة مبقتش موجودة الزمن دا
و داليا قوس قزح وش الخير و قلب و عقل و جدعنة الدنيا
و احمد كمال و رحايا العمر و المرايا اللى فى كل ركن من مدونته
نورهانتى الرقيقة و eno و همساتها الحالمة و فريدة المتفردة من نوعها
حسام غانم السهل الممتنع و إيهاب الشنكوتى اللى تحس إنه إبن خالك إبن عمك كدا
سهى زكى الساحرة مش الشريرة و الام الجميلة و نهنوهتها الصغننة
محمد مفيد و صميم قلبه و احمد الاغلبية الصامتة خاااااالص و العزيز عبدالله
عمرو الطيب unknown و دكتور فانكى المختفى و إنسان مقيد المتحير
شفقة و إحسان الروحين ف زكيبة و إبراهيم و إبراهيم اللى علطول معاه
طه عبد المنعم فاوست و الكبرياء اللى مزعل الناس
أسامة عبدالعال و الدنيا اللى ملخبطة معاه و كريم يوميات مطلق ونور عيونه زينة
سيد سعد صاحب المكسرات الفنان و مها زين احلى ما فى إنها الحياة
محمد حمدى و دماغ مليانة صحافة صرفة و دعاء مواجهات دودى حبيبتى
صاحبة أشجع مواجهات و نوارة قائد الكتيبة الرابض على جبهة التهييس الشعبية
و سبهللة سبهللولتى و نعكشة كمان نعكوشتى و سحورة المفقوعة مرارتها من حماتها
و سلوى لولى رئيسة حزب احلامنا كلنا و صمت المشاعر و خال المخاليل سى إن إن التدوين
احمد الصباغ و محمد عبدالعاطى الصحفى الهمام اللى مش مجرد جست هيومن
مايكل مايكليتو صغير السن كبير العقل و joudy الجميلة
و الشاطر حسن أرابيسك الفنان الكبير قلباً و مقاماً
و اللى من غير ما توش بترفلاية رقيقة صغننة هبة العسولة
مش قولتلكم القاهرة الكوم الكبير دكتور حر و امانى آخر العنقود السكر المعقود
إيناس لطفى ام وش بسام و و مونى الزوجة الشابة و عاشقة و غلبانة
هانى و بيكا روببكيا و uniqueو مسدس صغير و لقد خلقنا الله احرارا
و إسلام المواطن المصرى النايم و قهوته
و إمبارح كان عمرى عشرين و ghorbty و شمس ربة السيف و القلم شموستى
و nona و عندى امل اللى قفلت مدونتها للأسف
حبيبة القمر و نور سيبك أنت و صيدلانية طالعة نازلة القلب الصافى
مون مون موناليزا امة الله الطيبة و سنووايت اميرة الحواديت و وزة
سنوهى الآت من عالم بعيد و راندا فنارة القلوب و نونو يم عاشقة النقاب
البت المشمشية و عمو الباحث عن وطن و بطوط حبوب اشطر دكتور سنان ف مصر
مهند الباحث عن الحقيقة و عصفور المدينة المحلق دائما بعيداً
و adelالكلمة الطيبة ف شخص و بسنت صلاح الدين
و سوما المجنونة و ( مش حقيقى ) فى بلد عاقل و الراقية شيماء إسماعيل
و صبصب صبرنى يا رب أم القمرين و مروة زهرة الجنة الشفافة
و هشام و جعلونى مريضا نفسياً أحمد شقير دفتر احوال الوطن من الغربة
و وزة أنين الحزن الغائبة و خمسة فضفضة فضفوضتى حبيبتى
و founoon و راجى عفو الله إيهاب طائرى الحزين المرهف
و أخيرا من أحسهم أولادى و ليسوا اخواتى فقط أنس صاحب المضيفة أخويا الصغير
و احمد مبارك الحنون اللى مش جليل الحيا
و آخر سلاسل الردالة عن حق خالد همس الاحباب السوهاجى المنشا و القلب
و القاهرى المسكن و اللى شوية شوية هيكتبنى ف ورق الرقم القومى فى خانة الاخت
كل هولاء احبابى و سكان عالمى
مهما تنقلوا ما بينها أو بعدوا أو رحلوا لأماكنى و بلاد آخرى
و العابرون منهم على أراضى المدونة و من يهمون بالمغادرة فى أى لحظة
ومن أيضا لا يملكون مدونات خاصة بهم و يكتبون لى عبر الإيميلات
هانى حسين و مى و هانى أبو آيه و azza و زينب و ياسر مسلم
و إيمان اللى من طرف أحمد سكر و رحاب السيد
صديقاتى الغاليات الثلاث وصديقات العمر و المحن
داليا و عبير و تغريد
كل هولاء ما يزالون فى قلبى ساكنوه و لم يغادوره
لهم الحق فى العودة و الرحيل كيفما يشاؤون
ليس عليهم أن يخشوا شيئاً.. لأنى لن انسى لهم أبداً اى كلمة طيبة كتبوها
ليخففوا بها ألمى و يطبطوا بها على قلبى
و عليهم جميعاً أن يتأكدوا جيداً من إنهم بالفعل موجودن
و منذ بدء التكوين على خريطة قلبى
ما بين الحياة و الموت
اعيش كنجمة
فى سماء حالكة
أنير ذاتى ...
اسعد ذاتى
اعطينى وردة اهواها
حياة الانا بداخلنا
تسمو بنا
و تبعدنا
عن الآم الفراق
شيماء سمير
( أطياف الصمت )

This entry was posted on الاثنين, يونيو 01, 2009 and is filed under , . You can leave a response and follow any responses to this entry through the .

105 كــــلام بيطــبطـــب عـــلى قــــلبى و روحــــى

ولو إني جيت فينهاية القايمة إلا انه هنعديها المرة دي

ربنا يسعدك ويرضى عنك ويقدر لك الخير دايما وينور لك طريقك يارب

تحياتي

امممممممم ايه الخريطه الجامده دى بس يا طمطم
عموما ربنا يجلعنا جميعا فى قلوب بعض يا حبيبتى ومتجمعين دايما كده

يااااااه يا فاتيما
دنتي قلبك كبييييير قوي و يساع الدنيا كلها..بجد قلبك ده مفيش زيه عشان مليان حب يكفي الناس كلها و ميخلصش..يا بخت يوسف بيكي يا فاتيما يا أحلى ماما في الدنيا

كان نفسى اكون منهم والله بس مشاء الله ذاكره حلوة وقلب كبيرررررررر مشاء الله

يا حبيبه قلبى كل ده قلب
عارفه طبعا ان قلبك كبيررررررررر

الحمد لله انى لحقت فيه مكان
بجد يا فطوم انا بحمد ربنا انى عرفت حد زيك قلبها نضيف وروحها جميله وحنينه

مش تتاخرى علينا ماشى
هتوحشينى
مووووووووووووووووووووه دى ليوسف

ربنا يسعدك
وينولك كل ما تتمني

ربنا يجعلها سفرية سعيدة فيها الخير

وابقي طمنينا عليكي ذي ما قلتي
ربنا يرجعك بالسلامة

ربنا يكرمك
وبجد يشرفني أنك ذكرتيني في مدونتك الرائعه
وتحيه لكي ولوفاءك

يااااااااااه
الواحد تعب على ما خلص البوست
اقعد ارتاح شويه بقى
كوبايه مايه ساقعه ياطمطم لو سمحتى
(:

جميل انى اخد مكان فى قلبك وذاكرتك ياطمطم
بجد فرحانه انى من احبابك
انتى اللى سكنتينى قلبك اهو متجيش تقولى لى اخر الشهر فين الايجار
ثم تعال هنا مين دى اللى انتى بتقولى عليها خطيبه ابنك؟
امال انا رحت فين؟
وبصرف النظر عنى انتى كده هتعملى حرب تدوينيه بين بنات حوا

يسوفه ده بتاعى انا
واعلن من موقعى هذا
ان اللى هتقرب منه هاقطعها كربا كربا

ربنا يبارك لنا فى قلبك الكبير ياطمطم
وبتقولى ان احبابى كتير ؟
بسم الله ماشاء الله
الله اكبر ونمسك الخشب يعنى
انتى حبابك اكتر
ربنا يحبب فيكى خلقه كمان وكمان ياقلبى


ب ح ب ك جدااااا

فاتيما
اجازه ايه اللى هتخديها؟
انتى تعبانه ولا ايه؟
ولا عايزه تريحى قلبك مننا شويه؟
انا اخدت بالى دلوقتى من التنويه
يااااارب يكون خير

انتى مش متصورة فرحتتتتى الكببببببيرة
لما شوفت انك كتبتى اسمى يا فتيما قلبى يا ام يوسف الغالى انا مصدقتش نفسى والله العظيم بس ده بيدل على انك اصيلة وكفاية اننا فى قلبك ده احلى مكان فى الدنيا وربنا يخليلك يوسف وتفرحى بيه ويوم رجعوه لنا هنعمله اكبر حفلة فى مصر
ربنا يخليكى لنا

ايه دة
انا اسمى مكتوب؟؟
ما كنتش اعرف انى واخدة حتة من قلبك
طيب انتى كمان خدى الحتة دى من قلى حطيها عندك بدل اللى انا واخداها
عشان نبقى خالصين
بجد بجد
بحبك جدا ومن قبل ما اشوفك
ربنا يديم المحبة بينا وبعض نحن معشر المدونين

انا كمان اسمي مكتوب يااااااااهو

مبسوطه اوي اني ليه مكان في قلبك حتي لو كان ملي واحد المهم انه موووووووجود

ربنا يسعد قلبك وايامك وطبعا في وجود يوسف معاكي ياام يوسف :)

بحبك في الله :)

ايه ده ؟؟؟ مش قادر اصدق
كل دول ؟؟؟؟؟
و اسمي مش مكتوب ...سقط سهوا يعني
ههههههههههههه


بجد ربنا يدوم المحبة و يابخت اللي الناس تحبه كده :):):)

ايه ده يا ام يوسف
الخريطة زحمة قوى احنا كده هنفطس جووه
ههههههه
ربنا يسعدك ويكرمك دنيا واخرة
هو انا اسمى مكتوب
طيب
اجازة سعيدة مقدما ورينا يطمنا عليكى
تروحى وترجعى بالسلامة
بس حاولى تطمنينا عليكى بقدر المستطاع
تحياتى

أزال المؤلف هذا التعليق.

فظيــــعة الخريطة بتاعتك
:)))
بجد جميلة و رقيقة زيك

عارفة إن بقالي فعلا فترة بفكر أكتب عن المدونين اللي بجدبحبهم في دنيتي الصغيرة دي؟؟ بس أكيد أكيـــد مش كنت هعمل زي خريطتك الجميلة أوي دي :)

ربنا يسعدك دايما يا تمتومة يا جميلة :). انت فعلا قلبك كبير ودي حاجة عارفاها
اممم.. اللي مش تعرفي أراضيهم ياستي..ليساندرا من دمياط برده، الخيط الرفيع من المنصورة،وانا من مدينة نصر :).و انت كمان بجد جوا قلبي

معقول ؟ اهتممت بذكر اسمى وأنت تكادين لا تعرفيننى ولا تدخلين مدونتى سوى نادرا .. خالص امتنانى وحبى .. وسبحان الله فقد أتيت هنا لأترك لك عرضا ما ففوجئت باسمى وسط الأحبة .. فاإليك أولا ما جئت لأجله :

( الأخت / روح قلب ماما ..
خالص تحياتى .. أعرفك بشخصى المتواضع أولا .. إيهاب رضوان قاص مصرى وحاليا مغترب فى الإمارات ، صاحب مدونة دخل الشتا ..
أنشأ بعض أصدقائى موقعا للنشر الإلكترونى أسموه دار رواية ثم منتدى أدبى منذ أيام قليلة وشرفونى بإسنادهم لى قسما عن التدوين والمدونات .. ولا يزال القسم خاليا من المواضيع تماما .. ويشرفنى أن تكونى من أوائل ضحاياى من أصحاب المدونات لو قبلت .. فاسمحى لى باستئذانك أولا ولو وافقت فيمكنك اختيار الطريقة المناسبة لإجراء حوار مطول معك عنك وعن مدونتك الجميلة ، كأن أرسله لك على إميلك كاملا كملف وورد أو نقوم به على الهوتميل أو الياهو أو كيفما يحلو لك ..
هذا إميلى : tootmahrook_99@hotmail.com
وهذه مدونتى :
http://dakhalelsheta.blogspot.com/
وهذا رابط دار رواية للنشر الإلكترونى :
http://www.dar-rewaya.com/
وهذا المنتدى :
http://www.dar-rewaya.com/vb/
أعرف أنك لم تقرئى الكثير من مدونتى فاسمحى لى بإهدائك هدية متواضعة لن تنسيها طوال عمرك ، إكراما لشخصك الكريم ومن باب التعارف أيضا ، وهى قصتى الغالية التوت المحروق هنا :
http://dakhalelsheta.blogspot.com/2008/02/blog-post_6167.html
فى انتظار ردك سواء هنا أو فى مدونتى .. ومرة أخرى أشكرك .. دمت بخير

مش عارفه اقولك ايه انا من الناس اللى استغربت ان اسمها فعلا موجود
انا اسمع عنك كتير وعن قلبك وطيبتك
ربنا يوفقك لفته جميله منك جدا انك تكتبى عن ناس ليهم مكان فى قلبك
كل شئ بيروح وبيفضل الحب فعلا ذكرى حلوه
ربنا يهنيكى دايما ويسعد ايامك
فى ناس اعرفهم انتى وصفتيهم فعلا زى مانا شايفاهم
على فكره
موناليزا ومسدس صغير دقهلية
راجى عفو الله اسكندرية
احمد الصباغ قاهرى
:)
ترجعى بالسلامه ان شاء الله

الجميلة والرقيقة دائما/ فاتيما

ربنا يكرمك يا فاتيما، ويشرفني أن يكون لي عش صغير داخل قلبك الكبير فلم تنسيني وسط الزحام. ووضعتيني على خارطتك.
أسأل الله لكِ الفرح والسعادة والبركة والرزق والصحة .. وأن يزيدك من الإيمان والعلم وحب الناس وأن يزيد خريطة قلبك بالناس والسكان الذين وجدوا في قلبك الطيب الطاهر خير سكن وأجمل مأوى وأسأل الله أيضا أن يرد إليك قرة عينك يوسف بإذن الله.

ربنا يسعدك يا فاتيما ياااااااااارب

يااااااااااه
بسم الله ماشاء الله انا صحيح دوخت وانا بجري ورا خريطة قلبك شرقاً وغرباً وفي بر مصر صعوداً وهبوطا مع النيل

بس ربنا يزيد ويبارك ويسعدك بينا ويسعدنا بيكي يارب يارب

وقلبك يساعنا دايما وزينا وأكتر كمان

فاتيما مالك يا حبيبتى تعالى هنا فى خضنى كده وراسك على قلبى مالك ياطمطم
انا عنيه دمعت حاسه فى كلامك شئ ما

مالك يا حبيبتى روحك تعباكى ومش مبسوطه ليه
فيه شئ جواكى بيقول نفسى اعيط

وحشتينى ووالله انا وحشه واوحش كائنات الارض لانى مقصره فعلا فيكى
وابدا يا فاتيما ده مش حقك عليا
انتى ليكى حق عليا كبير قوى قوى يا حبيبتى

يكفى ان ربنا عالم رغم اى بعد انتى ازاى محبتك مزروعه من عنده سبحانه وتعالى جوه فى قلبى

ويكفى انك عمرك ما رحتى عن بالى
انا حاسه انك شئ غالى عندى قوى قوى اختى الملاك اليى الدنيا بتزعلها شويه كتير عشان عارفه انها طيبه وهتسامحها علطول

ربنا يرد ليكى يوسف فى حضنك تانى

وابوس دماغك وايدك متزعليش من محاسن اختك ابدا لو قصرة فى السؤال عليكى
اصلها انسانه وحشه والكل عارف عنها كده

ربنا يصلحلك حالك ويبارك فى قلبك قلب الملايكه ده يا طمطم

اشهد ان لا اله الا الله

بجد يا فاتيما

انا تعبت من التعليقات عندك
ومضايقة جدا
مش بترضى تفتح ودايما ايرور
واللى دخل ججديد مجداوية
مش بترضى تفتح معايا ابداااااااااا

وببقا عايزة ارد
حتى لو بمجهول زى دلوقتى

وانا مستعجلة

بس والله مفيش بوست بيعدى من غير ما ااقراه

وواخده على خاطرى
مش بتسالى على عصفورتك
وهى بتموت فى المشروع والامتحانات
فين الدعوات الجميلة

فاتيما وحشانى

وقعدت ادور على اسمى كتير
لقيته فوق
مقترن بهدى ونرمو

الله يا فاتيما على قلبك

بحبك فى الله

وادعيلى ومش تبعدى كدة

حتى لو كنت انا مقصرة ووالله ما مقصرة صفحة التعليقات العجيبة اللى مش بتتفتح

سامحينى


بحبك
وادعيلى


شيماء سمير

دى محجوزة للموضوعات القادمة

بحبككككككككككككككك
بحبكككككككككككككككككككككك
بحبككككككككككككككككككككككككككككك


يا فاتيما

حضونات كتير


مشمشتك

يسلمللي قلبك يا فاطمة يا حبيبتي

السلام عليكم


ازيك يا ام يوسف



اخبار حضرتك اية اتمنى تكونى بخير بام الله


كل دى خرسيطة دى اكبر من خريطة العالم

بجد انتى قلبك كبير جدا

وربنا يحبب فيكى خلقة يارب

وشكرا لذكرك ليا فى مدونتك العظيمة

ودة شرف ليا طبعا ان اسمى ينزل فى مدونتك

ربنا يباركلنا فيكى يارب

وربنا يسعد ايامك يارب

كل الود

اسير الجراح

شكر لك إني كنت ضمن هذه الخريطة

أنت أيضا في القلب

حبيبه قلبى ربنا يخليلنا قلبك الحنين ده ،و ليا الشرف انى واخدالى حته صغنتوته منه ربنا يكرمك و تفضلى علطول ساكنه قلوبنا

دي احلى خريطه تدوينيه شفتها
طبعا انا واخده البطين اليمين لوحدي ومستربعه وحجزاه تمليك من دلوقتى
وممكن ادفعلك المقدم واعتبريه شبكة يوسف
انا بحبك يا ماما

ميرسيييييييييييييي كتير يا طمطم انك فاكرانى افتركينى بالدعاء انا عندى امتحان الصبح اوعى تنسى ربنا يستر ويعدى الا متحانات على خير ان شاء الله ويوفقك الجميع وعقبال ما تشوفى يوسف كده متخرج زينا بس مش شيوف مر الامتحانات يارب أقولك سلام أشوفك على خير

دمتى بكل ود وسعادة وخير

بجد مش عارفه اقلك ايه
لو هقعد اقلك انتي حد جميل اوي وراقي وزي العسل قديمه جداااااااا ومعروفه
يعني انتي خليتي الواحد مش لاقي كلام يقوله فيكي بجد
علي رأي السيده ام كلثوم
نفسي اقلك كلمه متقلتش لحد تاني
كلمه اد هواك ده كله مش عارفه بقي الباقي ولا حتي الجمله صح ولا غلط
بس اصلها كانت بتبعجبني اوي الجمله دي
يارب يافتيما يسعد ايامك وديما حوليكي كل الناس اللي بيحبوكي
وحبيبك كتير كده
انت تستهلي كل خير
وربنا يرضي عنك يارب ويبارك فيكي
بجد بجد انتي
عسللللللللللللل

عارفه قلت انا بقالي كتير مش باجي وهتلاقيها نسيتني بسبب عدم مجي عندها
وانا عماله ابص علي الاسامي وارفع حاجب وانزل التاني كاني بدور علي اسمي بين الناجحين واول ما شوفته ابتسمت
وقلت يااااه اد ايه انتي زوق ومبتنسيش حد وقلبك طيب
رغم كنت متوقعه اني ملقهوش
ومكنتش هزعل
لالا كنت هغير وازعل واتقمص
هههههههههه

الله على قلبك الطيب ياام يوسف ربنا يديم الحب والمودة دايما اللى بين المدونين دول اسرتنا التانية وان شاء الله دايما فى وسطنا ويوسف كمان يكون معاكى دايما وفى حضنك امين يارب العالمين

صحيح ترجعى بالسلامة ان شاء الله الغياب مش يطول :)

قلبك كبير يا أم يوسف
فاكرة أغنية قلبي يا غاوي سبع قارات
:)

و الأغنية المحطوطة جميلة قوي برضه
ربنا يكرمك دايماً يا أم يوسف

و عمري ما بأنساكي و لو بأكون فين
ما حصلش نصيب نتقابل الأجازة اللي فاتت بس إنتي أكيد معزومة في فرحي الأجازة الجاية :)

و أنا عزمتك من قبلها بسنة أهوه

و نداء إلى لماضة
لما إنتي يا أختي تآخدي بطين بحاله يعني ربع القلب كاملاً يبقى إحنا نتحشر كلنا في الـ 4/3
لا يا لماضة لا
وسعي لي شوية جنبك
:)

ازيك يا فاتيما

كل ده دانا تعبت من كتر الاسامي

ربنا يديم المحبه ويرجعك بالسلامه

يخبر .. انتي فلبك كبير اوي
ربنا يخليكي لينا على طول

ايه ده انا اسمي مكتوب :)
ربنا يكرمك يارب بقلبك الجميل الكبير أوي ده

قلبك كبييييييييييييير قووووووووووى يا فاتيما
يا بختك يا ستى
ربنا يسعدك دايما

خريطة يونيك جدا .. ربنا يكرمك ويفرح قلبك خففتي عني عذاب الخرايط والامتحانات
آه على فكرة انا تبع الكوم الكبير بتاع القاهرة

مش عارفة

حسيت انك عندك قوة ملاحظة قوي

او انك بتركزي قوي

او انك بتاخدي بالك قوي

مش متخيلة اني اكون عارفة كل حد ساكن فين

ماشاء الله

لأ بجد ماشاء الله

و تسلمي إنك حطيتيني على بقعة من بقاع قلب حضرتك

:)

سلام عليكِ

ايه ده .. انا اسمي مكتوب؟

بوست من اجمل واغلى الموضوعات .. مش بقولك بقيتي عمدة؟

جاااااااااااااااااااااامده

خريطة انا متاكده انك تعبتي في رسمها

بحــــــــــــــبك

سلم قلبك يارب وريحه وطمنه اللهم امين
انتى بنى ادم جميل بجد ربنا يراضيكى

كده برضه يا فطومة تنسيني؟

ده أنا مش على الخريطة خالص

زعلااااااااااانه

بقى تكتبي عن حبايبك في اسكندرية وتنسي أختك المصرية اللي بتحبك من غير ماتشوفك وبتدعيلك بظهر الغيب؟

ماشي ماشي على العموم أنا قلبي أبيض

المهم بقى ربنا يخليلك حبايبك كلهم وماتتحرموش من بعض أبدا

وبرضه أحبك في الله يا فاطمة

يا سكان الخريطة جميعاااااااااااااا
بحبكم
و قوى
قوى
=========================
و بعتذر كمان قوى يا عادل
و يا مصرية
و الله إنتوا كنتم ف بالى
بس و الله دون قصد غفلت عن الكتابة و مش عاوزة أقولكم كتابة الأسماء و ترتيبها كان عاملى لخبطة شوية
و تقريبا احوليت شويتين و كمان البوست دا أنا كتبته ليلة السفر و ملحقتش أعدل فيه أى حاجة لكن هكتب فورا الاسماء ...
و إنتم من سكان الخريطة دون أدنى شك
==================
يا إيهاب رضوان
كونى لا أعلق أو أزورك كثيرا يبقى دا معناه إنك طلعت من الخريطة ؟!!
شكرا مقدما على القصة و أعذرنى مش هلحق أقراها دلوقتى
و لما أرجع هرد عليك فى حكاية الموضوع بتع المدونة دا إن شاء الله
=============
يا مراكبى يا نبع الحكمة
بتقول إسمك مكتوب و ناهى الجملة بعلامة تعجب
!!!!!!!!!!!!!!!!
أنا اللى بتعجب يا أبو فادى
دا إنت من السكان الأصليين يا باشمهندس ...
=====================
شيماء إحتمال
يا عصفورتى يا مشموشتى
إنتى فى قلب قلبى و ملقتش أجمل من قصيدتك دى اكتبها لأنها عبرت عن حالى ...و إزاى الواحد ممكن يسعد روحه و يرفعها فووق
===========
يا أنس يا صاحب المضيفة
يا عريس الهنا
الآخر فى السطور و بين الأوائل يا عزيزى و اخى الجميل الصغير الكبيييير قلباً
============
دودو يا عاشقةالرومانسية
يا حبيبتى انا بخير و متقلقيش
و الاجازة أجبارى عشان بنوضب فى شقة خالتى و مكنش ينفع نسيبها انا و ماما لوحدها مع النقاشين و الناس اللى بتوضبلها الشقة و هيا معهاش حد
و أنا كمان بحبك
==================
و بحبكو كلكم
و عندى خبر حلو على وشكم
و وش البوست دا
أنا هستلم شغل قريب قوى
عند واحد قريبنا
راجل محترم جدا و المكان كمان محترم ...
أنا حاسة إن الشغلانة دى رزق يوسف
عشان لما يرجعلى قريب ( يا رب ) اكون بشتغل و حالى احسن من الاول بكتير
الشغلانة دى جاتلى بعد كتابة بوست يستاهل الف حمد ...
ألف ؟!!
مليون
مليااااااار يمكن تكون معقولة
وشكم حلو عليا يا عيااااااال
و خريطة قلبى لو بتوسع
و تكبر
و تمتد
فدا لأنكم إنتم السبب
و إنتم اللى بتملوها حب و إهتمام و حنان و دعاء و طبطبة ....
سلام مؤقت يا أعز الناس
و احلى صحبة و عالم
و مش هقولكم إدعولى عشان دعواتكم ليا تكفينى لميت سنة قدام

يا رب يكون فيها الخير
و توفقي فيها يااارب

طبعا القلب اللى يشيل ده كله
لازم يكون قلب فطوم ام يوسف
معلش انى تعليقى متاخر والسبب عطل الجهاز ربنا يكرمك انك ذكرتينى
وذكرتى بنتى لجين ابو الدهب
بس توضيح بسيط احنا من اسكندرية
ومصر هى امنا طبعا
اما بالنسبة للعمل ربنا يوفقك
ويجعله فتحة خير وزيادة رزق علشان الغالى بس اوعى بخدك مننا
منقدرش على البعد
تحياتى ودعواتى

السلام عليكم
فاتيما..
ربنا يبارلك على قلبك الكبير..
و ربنا يحبب فيكي خلقه .. يا رب..

دعواتي ليكي بالتوفيق في شغلك الجديد
و ربنا يجمعك بيوسف قريبا ..

تحياتي ليكي..
حنان من تونس..

قلب يسع كل هذا بسم الله ماشاء الله
بارك الله فيكي وفي اصدقاؤك حقيقة ذهلت من تلك العقلية التي تسرد كل ها بتفاصيلة الدقيقة
تحية عميييقة لكي
عبد الجليل

ماشاء الله ولا قوة الا بالله على قلبك يا فاتيما
ربنا يخليكى للى بيحبوكى ويخليلك اللى بتحبيهم
بقالى مدة مش منتظمة فى متابعة المدونات
وحظى حلو انى جيت على خريطة قلبك الواسعة
سعيدة باحتلالى جزء من قلبك ..والله يعلم انى بحبك فيه وبادعيلك
...
بس ازاى نسيتى انى اسكندرانية
من هنا اعلن أنى اسكندرانية صميمة ..عمرى ما سبتها ولا اقدر اسيبها
ولازم تعرفى ان ليكى هنا اهل واخوات بجد بتنوريهم يوم ما تيجى اسكندرية الجميلة ..يا جميلة
:)

يا ام يوسف


انا عزمتك على عيد ميلادى خلاص

مليش دعوة هستناكى ان شاء الله


يوم 21\6


يلا سلام

ألف مليون مبروك على الشغل يا فاتيما يارب حالك من أحسن لأحسن يارب
ربنا يكرمك ويفرحك دايماً :)

هو انا مليش بيت عالخريطة دي ؟
ربنا يكرمك يارب فى شغلك الجديد ويكون بداية خير عليكي ان شاء الله
خدي بالك من نفسك :)

:) انتِ عارفة انى بحبك اوى صح؟
ومبسوطة جدا ان مشاعرنا متبادلة ربنا يجمعنا تحت ظل عرش الرحمن يارب

بس تعرفى حاسة ان الخريطة دى ناقصها ناس كتير اوى فين بتاع البالونات اللى بتشترى منه بالونات ليوسف وفين بتاع اللعب وفين بتاع الشوكلاتة وفين قطة يوسف و فين.. وفين.. وفين..
اصلى حاسة بجد انك بتحبى كل الناس اى حد تتعاملى معاه هتحبيه وهتشوفيه اى حاجة حلوة فيه حتى لو كانت صغيرة
بس لانك حد حلو من جوه اوى وعشان كده بيشوف الحلو بس فى كل حد
ربنا يسعدك ياطماطم ويرضى عنك ويفرح قلبك يارب
عاوزة بوسة كبيرة قبل ماامشى:)

سلام عليكم

طمطم الجميل انتى الى جوى قلوب ناس كتير اوى يا فاتيما وفعلا انتى متتنسيش يا طمطم ويعلم ربنا انك من الناس الى لمست معاهم حنان غريب يلمس القلب من اول لقاء فاكره ههههههههه اى نعم كان لقاء دموى من بتاع خوخه بس بجد يعلم ربنا انك فعلا اسرتينى باحترامك وحنيتك ورقتك معايا فى التعامل
ربنا يكرمك يا طمطم ومرسيه انى شغله حيز من خريطه قلبك وربنا يكرمك فى اعز و اغلى ما عندك ويبارك ليكى فى اهل بيتك دايما
بحبك يا طمطم ويا رب الايام الجايه تكون ايام فرح وسعاده عليكى وعلى الناس جميعا .
تحياتى

حبيبتي و روح قلبي فاتيما
ألف مبروك على الوظيفة ويا رب يا رب تتوفقي فيها و تبقي أعظم سيدة أعمال في مصر كلها..هو صحيح يستاهل مليار حمد..و أنتي كمان تستاهلي ألف ألف ألف خير
ربنا معاكي

انتي كمان ساكنة قلوبنا والله وبنحبك كتيييييييييييييير انتي والولد الجميل روح قلب مامته وقلوبنا كلنا.. عمر مستني رجوع يوسف على فكرة عشان يلعب معاه زي ما وعدتيه

فاتيــمـــأ
روح قلب الام
وقلب الام اللى مليان روح

مقدرش اقول انى مندهش من البوست
لانى متوقع دا منك واكثر
لكن اقدر اقول
اننا دايما بنحلم بالملايكة
ومن كثر ما حلمنا بيهم تقريبا حفظنا شكلهم
لكن لو حسينا بهم او لمسناهم
اكيد هيكون عندنا احساس بالنشوة والحب والامان مختلف تماما
هو نفس الاحساس الساري فى عروقى وجسدي

زمان لما حبيت اقولك انك روحي
لانك اعظم ام
قولتيلى يوسف لو جالك هيجطعك جطيع
بس اسمحيلى المرة دي
المردة دي بس
اقولك انك فعلا روحى ورحنا كلنا
اصحاب الخريطة
وعندي دليل
انى دخلت على مدونتك النهاردة بالصدفة والله رغم انى فى عز امتحاناتى
ومعرفش ليه قولت اطل ع المدونة بتعتك
وكمان مخدتش بالى م البوست الاولانى لانى قعدت اتفرج ع الصور اللى ف الجنب
بس وانا فى 1/2 الصفحة لمحت اسمي وقولت اشوف ايه الحكاية ولقيت اعظم حكايا التدوين فى عمري

اظن انه هناك توافق ارواح
واذا كنا جزء م خريطة قلبك
فانتى خريطة قلوبنا ووجداننا
بدون اي مبالغات
صدقيني
انك اعظم ام لاعظم يوسف
باعظم قصة عذاب وحب

اسمحيلى اهديكي بالمناسبة دي
جزء من قصيدة جديدة خالص ليا
كنت ناوي افرج عنها بس فى ديوانى الاول
لكن اكيد متغلاش عليكي
هى عنوانها المؤقت حاليا
" الحب مفتاح الانسان "
وفى جزي منها بقول


من غير حـــبْ
كيف ستغفو قليلاً
علي حجر امك
تطلق يدها فى جسدك
كجناح ملائكة ٍ
يخطفك من نفسك
يسرقك من الدنيا لحظات
لحظات
لحظات ...


فاتيما يا اعظم خرائط الوجدان
حبك الكبير دا لايقابله سوي دمعات بريئة
كافال كفها الورد
وعينها زرقة السما

تحياتى
ــــــــــ
على فكرة
فيه مقال جديد ليا
اسمه
الايدي الخفية
ياريت لو قرأتيه

ـــــــــــــــــــ
كريم بهي

انتى انسانة جميلة يا طمطم وانا بحبك اووووووى
ربنا يبارك فيكى يارب
ما شاء الله بتعرفى تعبرى عن مشاعرك للآخرين كويس جدا وتحسسيهم دايما انهم حتة منك زى ما انتى حتة منهم مهما بعدت المسافات والازمنة

ربنا يديم عليكِ نعمته بحب الناس وصفاء قلبك

ترجعى بالسلامة يا قمر
فى انتظارك دائما

فاتيما
وام احلي يوسف ربنا يخليهولك

مش عارف ليه احساس الشجن اصابني بعد الانتهاء من قراءة خريطة قلبك
وفي نفس الوقت احتفظ بابتسامه خفيفة
اكيد مين يعتز بالناس .... الناس تعتز به
واشكرك لوجد مكان يخصنى على خارطتك

الله يبارك فيكي وشاكر جدا للتهنئة على الزواج
انتظري تعليقي بعد العوده
كل الود
سيد سعد

فاطمه
أم يوسف
لن أصف مدى عرفانى لكى
مجرد ان تذكرينى فى خريطه قلبك
كأنسان وأخ وصديق وربما أب
شرف لى لايدانيه شرف
الحياة تتسع ويصبح لوجود الانسانى معنى
حتى لو أنتهت بعد دقائق أو ثوانى عندما
يقدرك أنسان آخر بلا مصلحه وبلا هدف سوى المحبه فى الله تعالى.
لاتعلمى كم مس قلبى ذكرك لى رغم أننى أتابع دررك المنثوره على مدونتك دون
أن أعلق,ففى بعض الاحيان يستعصى أن أكتب رأيا لان القلب أمتلاء والعقل ضاق
بما يراه ويسمعه ويكاد القلم ان يكون مداده من دما وألما يعصف
بالافكار وبكلماتى التى تصورها
فاطمه
أيتها الام المصريه (ام يوسف)
أيتها الانسانه الراقيه
أيتها الاخت الصادقه
لكى منى
تحيه واحتراما

ملحوظه يبدو أنك نسيتى ان لى مدونه أخرى
شوية كلام
http://kalamfekalamm-mohamed.blogspot.com/

بخلاف مدونتى مشاعر وافكار
http://kalamfekalamm.blogspot.com/

مبروك الشغل ياطمطم
ربنا يرضى عنك ويراضيكى يارب

وحشتييييييينى
من كتر شوقى ليكى نفسى اعيط
حنين مش حزن
ارجعى بقى
وحشنى كلامك جداااااااااا
عندى ليكى خبر حلو
بس لما تيجى هاقولك عليه

اجمل بوسه لارق فاتيما فى الدنيا
امووووووووه

الف مبروك على الشغل
والحمد لله انك بخير
طمنينا عليكى من بعيد لبعيد كده
تحياتى

أولا: وحشتينى جدا
ثانيا: يوسف بيسلم عليكى
ثالثا: الاغنية بتاعت حليم عبقرية
رابعا: هترجعى امتى بقى زهقت كل يوم اجى اشقر وملكيش جديد
خامساً: الف مبروك عالشغل ويارب يكون فاتحة خير عليكى وعلى يوسف افندى

بس خلاص
سلام
هبة

انا كان عندى حق لما قلت عليكى صلة رحم التدوين
و مش رضيت وقتها اقول عليكى ام المدونين علشان مش اكبرك فى السن .. بس انتى فعلا فيكى حنان يغطى العالم كله .. و ده مش علشان كلامك هنا .. لا ده باين فى عينيكى لكل الناس

كل اسم انتى كتبتيه هنا جوه قلبه حب لكى يا فاتيما ..كتير او قليل .. بس موجود فى كل قلب منهم حبة حب لكى

شوفتى بقى اد ايه الخريطة مليانة حب لاجمل ام :)

القلب باب يفتح على الأحباب على طول
توصل مشاعر صداقه من غير اللسان ما يقول
يبعت نسايم برائة زي العيال الصغار
و إن كان لنا الإختيار نفضل صحاب على طول
و عجبي
______________
KING TOOOT
BOBO
OMAR

انا جاية ادحرج التماسى

سلام
اختك خيخة

قليل لما باجى هنا وده لانى باحس انى داخله بيت اختى وهى مش موجوده
كل حاجه فيه من غير روح ولا معنى

وحشتينى ياطمطم
ارجعى بقى

يــــــــــــاحبيبتى
يــــــــــــــاحبيبتى
يـــــــــــــــــاحبيبتى
يسعد قلبك ربنا زى ما اسعدتينى
وافتكرتينى وكمان كتبتينى ووصفتينى
بالرقيقة وما اعتقد ان فيه ارق منك ياطماطم يارح قلب يوسف من جوه .يحقق لكى ربى ما تريديه وتشتهيه ويرريح قلبك ويجبر بخاطرك انتى وكل اللى قال أمين .بدعى الحين والعصر بيأذن
الله اكـــــــــــــــــــبر

عارفة يافاطمة
فكرتينى بالاستاذ
احمد كمــــــــال
فى اول اجتماع للمدونين
ولما كتب يحكى عن اللقاء وانه
افتقد ناس كان يتمنى يشوفهم
والله انا ما بقيت مصدقة
نفسى من الفرحة ساعة
ما ذكرنى من بين الناس
دى .متشكرة ياطماطم

بس على فكرة
انتى انقذتى نفسك
لما كتبتينى لانك لو ما
كنتى ذكرتينى كنت جبت الشاش
والقطن وجيتلك بطحتك ومشيت :)
انتى عارفة ما عنديش ياأمى ارحمينى :)

بس على فكرة
انتى انقذتى نفسك
لما كتبتينى لانك لو ما
كنتى ذكرتينى كنت جبت الشاش
والقطن وجيتلك بطحتك ومشيت :)
انتى عارفة ما عنديش ياأمى ارحمينى :)

الغياب طول يا جميل
وحشتيناااااااااااا

ترجعى بالسلامة يا قمر

موااااااه

اسبوعين؟
):
مش واخده على الغياب ده ياطمطم
يارب يكون المانع خير
وتكونى كويسه ياقلبى
وحشتييييينى

بس كنت جاية أسلم عليكي
و بجد ألف ألف مبروووك على الشغل :). فرحت أوي بالخبر دة

يارب ربنا يوفقك فيه وتستريحي فيه جدا ويكون بداية فرج قريب ليكي في حياتك يا فاتيما

أتمنى تكوني بخير

يا خسارة نسيتيني بس عمري انا ما انساكي
افتكريني وادعيلي
احبك في الله
تحياتي

فاتيما :):)
يا اجمل الامهات

انا كنتبهزر علي الاسم و عارف انك مش ناسية و فعلا الاسماء كتير
لاننا كلنا بنحبك

و ميرسي علي سؤالك و اهتمامك

و اخبار يوسف ؟ يارب يكون بخير و طمنينه عليه
ده مش ابنك لوحدك ...ده اخونا
و انا اساسا بموت في الاطفال :):)
يوسف اول طفل بلوجري عالمي :):)

خريطة مبتكره جدااا تعبر عن صداقات غالية جداا .

حمد الله على السلامه يااجمل فاتيما فى الكون
معلش هى متاخره يومين
بس انا قلتها على الميل والمدونه بتاعتى فى وقتها
عايزين بوست بقى ياطمطم
وحشنا كلامك
هو الشغل واخدك مننا ولا ايه؟
يارب تكونى بخير
اموووووووووووووووه

صاحب المضيفة
يا أنس النهاية ليس معناها موقعك فين لأنك متهيالى عارف مكانتك ف قلبى يا اخى الصغير الجميل
سلامى لآية النساء و يا رب أسمع اخبار حلوة تانى قريب ...اخبار بتوءوء يعنى




appy
يا قمر التدوين كله وحشتينى قوى
و الخريطة دى سبب وجودها إنتم يا حبيبتى و ربنا يسمع منك و يديم المحبة دوماً
وانا منستش احط بطوط و الخرفان البمبى الطعامة بتاعتك أهو


dahlia
يا حبيبة قلبى البركة فيكم و منكم
و ربنا يسهل إن شاء الله ف الشغل
بس بيزنس وومن دى صعبة عليا قوى دنا هفلس من تانى شهر أصل ماما بتقول عليا إيدى مخرومة و بتقع منها الفلوس !!!



أبو آيه
إنت منهم يا هانى بس إنت مخدتش بالك أنا كتبت إسمك فى الآخر مع الناس اللى ملهمش مدونات و مش نسياك


حنين القلب
لحقتى فيه مكان ؟!!!
دى جملة دى تقوليها يا حنونة
غنتى مكانك محفوظ و المفروض متكتبيش الكلمة دى إنتى غالية عندى يا حبيبتى و ربنا يسمع دعايا و أفرح باخبار حلوة عندك عما قريب إن شاء الله
البوسة دى ليوسف ؟
ماااااااااااااشى اطلع انا منها




maha zein
متحرمشى منك يا ميهو أبداً
و يا رب يا النت يتصلح
يا يجيلك لاب توب هدية
عشان متبعديش عننا أبداً
بوسة و حضونة يا حبيبتى


محمد مفيد
تحية ليك إنت يا محمد و كلمة يشرفنى دى كبيرة قوى يا فندم
دا أنا اللى بتشرف
بإنكوا بتطلوا عليا انا و يوسف
و تودنا و تونسونا و تاخدوا بإيدينا عشان نعدى الأيام الصعبة دى




عاشقة الرومانسية
يا دودو يا عروسة البحور
لا إيجار و لا حاجة متخفيش قلبى زى الوقف كدا ...
يعنى لما بينكتب لحد لا بيتباع و لا ينشرى و لا يتأجر و لا يتاخد وضع يد
دا مفتوح لكل الحبايب و دون مقابل
و بالنوسبة لموضوع يسوفة اظن يا هاااااااااانم بعد حكاية قراية الفاتحة بتاعت سعادتك يبقى ملكيش دعوة بالواد يوسف خلاويص و سيبه يشوف حاله و إنتى الله يسهلك بعدين احمد ييجى يقطعنا إحنا كرباً كربا
ربنا يسعدكو يا حبيبتى و يهدى سركم
و بخصوص الشغل إنا لسه مستلمتوش لحد دلوقتى بس قاعدة اتدرب على الكمبيوتر لانه هيكون شغل سكرتارية و كتابة على الكمبيوتر فماجد أخويا عمال يدينى فى كورسات مكثفة و كدا
هكتب بوست جديد إن شاء الله قريب
بوسة و حضونااااااااااااااااات كتير عشانك يا قطتى



مى
أنا فرحانة إنك فرحانة كدا
بس غريبة يا عيال إن فيه ناس مكنتش متوقعة إنى بفتكرها بقلبى
إزاى يا مى تتصورى إنى ممكن مجبش سيرتك مع الناس اللى بينى و بينهم محبة قد تبدو خفية لكن البوست دا كان مكانها المناسب للظهور
أنا حبيبت أقول لكل حد ساندنى غنت فى قلبى و ذاكراتى
و إنتى منهم يا مى
بس كدا


سبهللة
يعنى كدا نبقى خالصين ؟؟
لأ يا ستى حتتك اللى عندى اكبر شويتين من اللى عندك ..
هيه غلاسة بقى
أنا كمان بحبك يا سبهللولتى
و بوسيلى العياااااااااال




eno
أينعم يا إينو إسمك لازم يكون مكتوب
اومال إيه يعنى ؟؟
انا مقصرة معاكى فى الزيارات صحيح لكن دا مش معناه إنك مش عل الخريطة يا حبيبتى
سلامى لخطيبك و ربنا يفرحنا بيكم قريب إن شاء الله
أحبك من احببتنى فيه يا عزيزتى




adel
سهوا سهوا و الله سهوا
و حتى لو بتتكلم جد يا عادل
إنت عندك حق ...
بس عاوزة أقولك إنى كنت فاكرة اكتب إسمك بس بعيد عنك الحولان اللى كنت فيه منعنى
كلك ذوق و طيبة كعادتك أنا مبسوطة اكتر منك إنك على الخريطة يا عزيزى
حلوة قوى حكاية يوسف البلوجرى دى
انا همسك فيها و مش هسيبها خلى بالك و هصدق بجد
و ربنا يوفقك فى الإمتحانات إن شاء الله

همس الاحباب
ماهو النق دا اللى بيقلقنى
يا عم ربنا يزيد و يبارك و تكتروا اكتر من كدا و متقلقش الخريطة إن شاء الله تساع و من غير خنقة و لا حاجة
أدينا رجعنا لقواعدنا سالمين الحمدلله
و قريب إن شاء الله أستلم الشغل يا خالود
سلامى لهموسة و مامتها و لبابا همس سلام مخصوص


wish i were a butterfly...
و الله يا هبهوبة انا كنت زيك و كنت محتارة فى شكل الكتابة هيكون إزاى
لحد ما الطائر الحزين إيهاب راجى عفوا الله ما كتب عن المدونين و ازمة المياه و غدانى دفعة و شحنة قوية اطلع بيها اللى جوايا و معرفش إذا كان مناسب بس انا كنت عاوزة أقول كدا من زمان و الحمدلله طلع منى بشكل تلقائى و اتمنى يكون واصل لكل سكان الخريطة
أنا بحبك يا أرق بترفلاية فى حدائق الكون




إيهاب رضوان
أولا
يا أستاذ إيهاب أنا بشكرك على هديتك الجميلة جدا جدا و هعتبرها هدية ليوسف قبل ما تكون ليا
ثانياً
عدم التعليق عند الآخرين او عدم تعليق الآخرين عندى ليس معناه إن ليس هناك صلة أو خيط خفى يربطنا و اظنه سيكون المحبة لن ليس بيننا أى مصالح و مش مضطرين ننفاق بعض لأى سبب
و بالتالى ربنا يديم الود دوما إن شاء الله
ثالثاُ
أنا حطيتك فى مكان الدقيق فى الخريطة خلاص و صححته
رابعاً
حضرتك الأيميل هوه الطريقة الوحيدة تقريباً المثالية للتواصل بيننا عشان الموضوع بتاعك و طبعا يشرفنى انك فكرت فيا و تقدر تتفضل و تبعت كل الأسئلة اللى فى بالك و هجاوبك عليها بإستفاضة و صراحة قدر امكانى و متقلقش من إنك تبعت كل شوية سؤال انا بالى طويل جدا و مبتضايقش من الأيميل إطلاقاً و بفتحه علطول
و ف إنتظارك دائما و شكراً ليك




رحــيل
ليه يا رحيل كدا ؟؟
زياراتك و زياراتى قد تنقطع او تكون خلسة فى اوقات و دون تعليقات غالباً لكن دا مش معناه إنك مش من سكان الخريطة يا عزيزتى
مكانك محفوظ يا حبيبتى



shimaa esmail
كل الكلام الحلو دا يا شيماء بقولك قده و اكتر كتير
ربنا يوفقك يا حبيبتى و متحرمشى منك

وومن
ازيك يا ميرا يا اميرا يا ست البنات
خلاص يا فندم هنبقى زيكم و هيبقالى مدير و ربنا يستر و ميبقاش زى المدير اللطيشف بتاعك و يخلينى أقول جااااااااى
بوسة و حضونات جامدة عشان هنبقى دفعة



mahsen saber
يا النص التانى لقلبى
بصى أنا شفتك من يومين مع حسين فهمى فى الحياة بس كان الأعادة و بليل خالص كان هاين عليا اقوم أصحى اللى ف الشقة و العمارة كلها أقولهم أنا بعرف البت القمراية دى ام بيرو القمر
ما شاء الله عليكى يا محاسن
و بعدين كان لازم يسيبوكى تقولى اكتر لأنك كنتى متزنة جدا فى كلامك و عقلانية و كلمة على جنب كدا ( كنتى زى القمر ) ما شاء الله عليكى
شرفتينا كمدونات و امهات و ستات و مطلقات و إنسانات و كل حاجة
و من فضلك بطلى تقولى غنك مقصرة دى عشان معرفتك و رؤيتك مرة واحدة كانت كافية عندى و اظن عندك عشان ندخل قلوب بعض و نستقر للآخر
انا بحبك يا بنت أبيها الغالى




العصفورة الصغيورة
شيماء سمير
يا مشموشتى يا حبيبتى أنا كمان مفيش بوست بيعدى عنك من غير ما أفراه
بس إنتى اوقات بتكونى قافلة التعليقات و لا انا ببقى محولة و جايز مش شايفة كويس ...و متخديش على خاطرك عشان إنتى يا حبيبتى ف قلبى و بطمن عليكى علطول و وجودك مع هدى طبيعى و منطقى جدا و مع نرمين لأنها من ريحة الحبايب اللى هما إنتى
سلامى للعصفور المحظوظ و ربنا يوفقك فى الامتحانات إن شاء الله
و بوسة و حضونة كبيييييييييييييرة ليكى


nisreen basiouny
و إنتى كمان يا نسرينا يسلملى قلبك من كل حزن

أسير الجراح
يا محمد إتساع الخريطة سببه وجودكم
و كم المشاعر الطيبة اللى غمرتونى بيها و كل سنة و إنت طيب و عقبال ميت سنة و إنت عارف إختك هتستلم شغل جديد و هيبقى صعب افلفص فى الأول كدا و اخد اجازات و الواحد ما صدق يشبك فى شغلانة بس أنا حطيتلك حاجة على قدى كدا فى الشريط الجانبى و يا رب تكون مناسبة
كل الود ليك


ahmed talk
يا أحمد يكفينى إنك إسكندرانى يا جدع
أنا بشكرك على مشاعرك الطيبة دى يا عزيزى



بسنت صلاح الدين
دى حاجة مش على قدر رقتك يا بسنت بس أنا حبيت أقولك بس إنى بعتز بيكى
و إنى مبسوطة لوجودك هنا و بشكل جد مش عابر او غي ملحوظ



لماضة
يا خرااااااااشى على كلمة ماما دى منك يا مرمر يا طعامة يا حبيبة ماما و برضو مفيش فايدة لازم تتلامضى و تقولى هاخد بطين اهو مهندس مصرى أعترض أهو و مش هيفوتها ببساطة
يا عيال اقعدوا براحتكم و متتخانقوش البراح كبير و يساعكم بكل حب و فخر
انا كمان بحبك يا حبيبتى
قوى
قوى

( joudy )
ربنا يوفقك يا حبيبتى فى كل خطواتك
و أشوفك احسن الناس



سمكة واحدة
يا سموكتى متقوليش حاجة خالص بعد كل اللى قولتيه دا
بصى بقى انا كنت بفكر فى غنى أكتب حاجة زى دى من زمااااان و كنت عاوزة اقول للى مش بتواصل معاه بشكل منتظم او من قريب إنى مش نسياه و لا حاجة
و إنه ف قلبى و إنتى كمان عملتى زيى و بتيجى تزورينى أهو و تطلى عليا و دا كافى جدا عندى و مقدرش أطلب اكتر منه و حتى لو مجتيش تانى يا سمكة انا مش هزعل و لا الومك لأنى ببقى متفهمة أن فيه اسباب كتير لكدا انا كمان بتعرضلها زيك و زى كل حاجة و ببقى نفسى الناس اللى إنقطعت عنهم و قلل من زيارتهم ميزعلوش منى و يفتكروا إنى ناسية ...
انا مش ناسية خااااااااالص
و بحبك يا سموكة يا جميلة



ايوشة
دى حقيقة يا ايوشتى التدوين عالم تانى موازى يشبه العالم الحقيقى لكنه اجمل و ارحب و أنقى بكتييييييير
و ميرسى يا حبيبتى على تشجيعك

مهندس مصرى
يا محمد متحرمشى منك
و ربنا يكرمنا الاجازة الجاية
و اتشرف برؤيتك وجهاً لوجه
إن شاء الله
و ربنا يتمملك الفرح على خير
و مش هقولك إدعيلنا انا و يوسف
عشان مش محتاجة أقولهالك لأنى واثقة فيك جدا و مطمنة


soma
ازيك إنتى يا سوما و عاوزة أعتذرلك لأنى غفلت عن ذكر إسمك سهوا منى و ليس متعمد لكن صححت الخطا دا و ارجو تكونى مش زعلانة و كل الحب ليكى


ahmed mubarak
مش اكبر من قلبك يا حنون يالى مبتحبش الجبنة



rehab mostafa
طبعا يا رحوبة إسمك مكتوب دا سؤال؟!!


mohra
منتحرمشى منك يا دكتورة


unique
الخريطة اليونيك للناس اليونيك يا حبيبتى


نعكشة
انا آخر واحدة يقولوا عليها دقيقة الملاحظة ...
بس الواحد لما بيكون حابب حاجة ميقدرش ميركزش و ميقدرش ينسى
فيه اماكنى اخطات فيها بس بصحح الاخطاء اهو عشان تكون الخريطة دقيقة قدر الامكان
ممكن بقى لو سمحتى متعمليهااااااااااااش و تقفلى مدونتك ...مش كفاية قافلة التعليقات
كمان عاوزة تقفلى الطاقة اللى ممكن نشوفك منها و نطمن عليكى ؟!!!
أرجوكى تراجعى عن الفكرة دى لو سمحتى
يا رييييييييييت



يا مراكبى
تااااااانى
طبعاً إسمك مكتوب و ليك حق أصيل فى المدونة دى و أسهم و حتة من الارض



كيارا
أنا كمان بحبك يا حبيبتى

dreem
ميرسى يا دريم إنتى اللى انسانة جميلة بجد



elmasrya - mrs writer
معلش يا مسلمة أنا صححت السهو و النسيان دا و يا ريت متكونيش زعلانة
كل الحب ليكى


ام مالك
يا حبيبتى صححنا الخطأ اهو و وضعتك فى اجمل بقاع الأرض عندى إسكندرية الجميلة
و مكنتش عارفة إن لجين بنتك
ما شاء الله
اتارى البنت طيوبة و حنونة
زى مامتها
ربنا ما يحرمنى من دعاكى الحلو دا أبداً



7anan
و عليكم السلام يا حنان
أنا سعيدة جدا بيكى و عارفة إنك بتطلى عليا دايما و لهذا ذكرتك بكل الحب و شكراص ليكى على كلامك الطيب
زيك و زى بلدك الجميل




أستاذ عبدالجليل
لا ذهول و لا حاجة يا فندم
و الواحد برضو إتلخبط و نسى حاجات بس كويس عشان التصحيح يبقى واجب و أقرب اكتر من احبابى
تحياتى للأسرة الكريمة و لكل اهل المنصورة



jana
خلاص حطيت إسمك تبع اجمل بلاد الدنيا يا جانا و أنا سعيدة اكتر منك بأنك ف قلبى
ربنا يديم الود و المحبة يا عزيزتى


كفاية طيبة
الاول أنا أسفة على انى نسيت اكتب اسمك
بس كنت متلخبطة و أنا بوزع الأسامى و كنت فاكرة اكتبك فى إسكندرية و بعدين قولت لأ دا كفاية طيبة مع هنودة فى قطر و لا إيه ؟؟
و بعدين سهوت عن كتابته معلش بس رجعته أهو و حسب الخريطة و ميرسى على تمنياتك الطيبة



موناليزا
عارفة يا مون مون يا حبيبتى و الشعور متبادل و صادق و حقيقى
و مين سمعك بقى ...
لو عليا كنت كتبت كل سنتوفة ( دى من مصطلحات يوسف على فكرة ) كنت هكتبها و مش هتردد بس البوست مكنش هيكفى !!
خدى بقى البوسة المخصوصة و عليها حضونة كبيييييييييرة
امووووووووووووا

only spot
يااااااااه يا مشمشة ؟
إنتى يا بنتى لسه فاكرةالحكاية دى ...
طب أنا بحاول بقى أعصر ف مخى و أفتكر انا عملت إيه بس يستاهل كل المشاعر الجميلة دى منك ..مش قادرة أفتكر خالص
غير إنك كنتى مشمشة صغنونة رقيقة كدا
و يا ريت تيجى اللقاء القادم بتاع التبرع عشان أشوفك يا حبيبتى
بوسة و حضوناااااااااات كتير


bobo
ربنا يخلى عمر
و مامت عمر
و ابو عمر
و يرزق عمر باخوات كتيييييييير يلعب معاهم و مع يوسف



كريم بهى

إيه بس دا كله يا كريم ..إنتا غمرتنى بشياكتك دى و كرم اخلاقك ...
و أنا مش قد الكلام الحلو دا كله
مش عارفة أشكرك أزاى على القصيدة بس دا متوقع منك و اكتر و ربنا يسعدك و ينجحك و تبقى من اعظم الشعراء فى مصر و العالم كله
متحرمشى منك يا عزيزى
يا كريم
و بهى





حاجات جوايا
أنا كمان بحبك يا سالى يا ام دودو حبيبى و الحمدلله إن الشعور الموجود جوايا واصلكم كدا و بحبك قوى




sayed saad
ليه الشجن بس يا سيد دنت داخل على جواز و مش لازمة خالص الأحاسيس دى
يمكن لنك راجل فنان و شغلت خيالك و مشاعرك تدخلت و إتهيألك إنى بكتب بوست ختامى و لا حاجة للمدونة ...
بس بينى و بينك اهو البوست دا تقدر تعتبره خلاصة مشاعرى ناحية كل من عرفت من خلال التدوين و أعتزازى بيهم إينما كانوا
ربنا يباركلك و يهدى سرك و فى إنتظارك دايما يا سيد المكسرات



محمد

انا كتبت إسم المدونة التانية أهو علشان حضرتك متزعلشى انا فاكراها بس أصلى بحب أركز فى مدونة واحدة و ادخلها و شوية كلام أقربلى أكتر
مش هتكلم على تعليق حضرتك لأنه فوق قدرى بكتييييييير بس هقول بس إنى فخورة بحضرتك و بأنى اعرفك و بانك بتدخل تطمن علينا انا و يوسف و تمنحنا بعضا من كلامك الطيب و متحرمشى منك أبدا يا رب


doba
اولا : إنتى كمان يا حبيبتى
ثانياً : الله يسلم يسوفة العسل و يباركلى فيه يا رب
ثالثاً : الغنوة لايقة عليكم قوى
رابعاً: أدينا رجعنا أهو خلاص
خامساً : الله يبارك فيكى يا دوبى وشكم حلو عليا يا بنااااااااات
سادساً : أزى النونة البسكويتة حبيبتى كبرت شوية و إبتدت عاكسك و لا قاعدة هادية

قوس قزح
يا وش الخير
أنا بحباااااااااااااااااااااك قوى



king tooot
إحنا إصحاب يا وليد و على طول
على طول الحياة
إن شاء الله




بت خيخة و أى كلام
و انا تلقفت التماسى يا أجمل ورد قاعد على الكراسى فى مدوناتك يا مصر
بوسس لشريف لو سمحتى يا خوخة


dalia
شكراً ليكى يا داليا
إنتى نورتينى بزيارتك و تعالى دايماً

norahaty
إيه يا نورهانتى دا ؟؟
و هل كنت أجرؤ و مكتبش إسمك ؟؟
مش هرد عليكى غير زى ما قولتى
يا حبيبتى
يا حبيبتى
يا حبيبتى ى ى ى ى ى ى




نونو عاشقة النقاب
منستيكيش يا نونو إزاى تفتكرى كدا
و حياة يوسف أنا كتبت إسمك بعد موناليزا بأسمين تلاتة
لأنى حاسة إنكم فيكم من بعض كتير قوى و كتبت اسمك و الله
راجعى الخريطة كدا السطر 29 من آخر البوست و إنتى تعرفى إنى مش ناسية
و بدعيلك يا حبيبتى من قلبى

هو انتى اتاخرتى عن العشر ايام اجازة ولا انا اللى متهيالى؟


مش انتى قلتى انك اجازة وراجعة

انتى اتاخرتى ليه فاتيما؟

ايه ده؟
انتى بتردى على التعليقات بتاريخ النهاردة؟

يعنى رجعتى

هيييييييييييييييييييييه
فاتيما رجعت
هيييييييييييييييييه
فاتيما رجعت


طب امشى انا بقى واسيبك تظبطى حالك وحال مدونتك براحتك

خدى وقتك
والف حمدالله على سلامتك يا طمطم



سلام
اختك خيخة

بت خيخة و أى كلام
الله يسلمك يا خوخة يا حبيبيتى
وحشتوووووووووونى قوى قوى
ازى شريف حبيبى و أزيك إنتى يا ست مغرورة ؟!!!
هكتب بوست جديد إن شاء الله قريب
و يا رب يعجبك
بوسس كتيييييييييير ليكى و لشيكو

ربنا يعزك يا طمطم على كلامك الرقيق وان شاء الله هاجى يوم التبرع بس ادعيلى ان الامور الصحيه مع اختك تتظبط عشان اعرف اتبرع بامر الله

مبروك على الشغل يا طمطم ويا رب تكون فتحه خير عليكى وتقدرى تثبتى ذاتك يا احلى طمطم

الموقف الى بيعمله مش بيحس بيه لانه نابع من جواه فبيبقى بالنسبه ليه تصرف عادى لكن للمفعول به مش بيبقى عادى يا طمطم وبيأثر فيه
وانت يوميها قدرتى تأسرينى بذوقك وحسن معاملتك معانا كلنا يا طمطم لانك من الناس الى ربنا انعم عليهم بحب الناس ده كان قصدى والمعامله الطيبه الحسنه مش بتتنسى حتى لو قعدنا سنين مش بنشوف بعض يا طمطم

خلى بالك على نفسك ومن نفسك ويا رب دايما نسمع عنك كل خير

تحياتى

ممممممم .... أنا جسمي بيقشعر !!
و الله انا مكسوف منك ..

بس انا مش زي مانتي بتقولي كدة :)

بس اللي أقدر أقوله ان انتي من الشخصيات اللي اتشرفت بمعرفتها و مقابلتها .. انا عارف اني رديت متأخر أوي .. بس متبهدل شوية الايام دي .

ربنا يجازيكي خير و يوفقك في شغلك .. و تشوفي جو أحسن انسان في الدنيا :)

قولي امين

العزيزة أم يوسف
عودا حميدا وتقبلى بالغ امتنانى وتقديرى ..
سأبدأ فورا فى إعداد الحوار ولكن على مهل حتى يليق بشخصك الكريم .. يسعدنى أن أعجبتك هديتى المتواضعة وسيسعدنى أكثر لو اطلعت على مجموعتى القصصية المتواضعة التوت المحروق واقرئيها على أقل من مهلك فسوف تمتعك :
http://www.4shared.com/file/113641464/f38747ab/_____.html

خالص حبى .

only spot
يا مشمشة يا حبيبتى ربنا يسعد قلبك
و مش لازم تتبرعى تعالى بس نشوفك و اديكى الحضونة بتاعتك يا حبيبتى
فى إنتظارك إن شاء الله



amr ...
يا عزيزى و لا تشغل بالك و لا تنكسف أنا عارفة إنك مطحون ف الشغل و باين عليك من الناس اللى بتشتغل بضمير و متعرفش تكروت ...ربنا يعينك
رد على مهلك خالص او متردش خالص أنا عارفة إنك مهتم و دا كافى جدا ليا يا عمرو
أشوفك دايما على خير و فى الخير و خلى بالك من صحتك يا أستاذ
آه قبل ما انسى ...آميييييييييييين




دخل الشتا / إيهاب رضوان
الأمتنان و التقدير كله ليك إنت يا أستاذ إيهاب و أنا فى إنتظار أسئلتك و أرجو ان اكون عند حسن ظنك فيا
و لا اخذلك
كل الود ليك يا طير يا مهاجر

ابتسامة بوسع الكون
وحضن كبير للقلب ده
:)

مش هاقولك فرحت أد إيه
لما لقيت لي مكان علي الخريطة
:)
انه حد يفتكرني من غير ما أفكرّه بيا

ربنا يخليلي قلبك
ويخليلك يوسف يارب

تسلمي دايماً .. ويسلم قلبك
:))

...

Lyssa

خريطة ثرية وكلها دفء وصدق وتدل علي صاحبتها .. صاحبة قلب كبير

ربنا يخليلك كل اصحابك

تحياتي

فاتيما الجميلة قلبا وروحا

صاحبة الابتسامة المشرقة .. والوجه
الصبوح
أنا لاأدرى كيف تأتى اليك أفكار بهذه الروعة .. تذكرنى باغنية صورة صورة لعبد الحليم .. مافعلتيه فينا ياسيدتى هو انك جعلتى كل واحد يبحث عن نفسه فى هذه الصورة .. حتى وان كان يزاحم ليظهر وسط المئات من محبينك

أنت انسانة مبدعة ورائعة ومتججدة .. ومحبوك عددهم كبير أرجو مخلصا الا تكونى نسيتى أحد .. والا هايزعل جدا..

تحياتى لبوست وفكرة مذهلة أن جعلتى قلبك يساع العالم

علي فكرة نسيت اقولك
انا من السويس مش من بورسعيد
بس بورسعيد فيها ذكريات طفولة جميلة
وفيها جزء من اهلي
وارتباطي بيهم وثيق حتي الان
سلام

lyssandra
يا أحلى إبتسامة و حضن كبير
فرحتك عندى تساوى كتير قوى و الحمدلل لأنى عرفت أعمل كدا
تسلميلى إنتى دايما يا حبيبتى





kochia
ربنا يخليلى كل أصحابى و تكونى دايما بينهم يا كوشكش ...
إنتى من السويس ؟
يعنى من ريحة الحبايب خالتى فرنسا و الرايق ؟
حالا أصلح المكان يا حبيبتى
حالاااااااااااااااااااا




sherif
مش بقولك عليك شياكة مش موجود منها الزمن دا و لو فيه منك واحد فى كل حتة !!!!
بص بقى حضرتك حكاية أنسى حد دى عملالى رعب و كل شوية أفتكر أسامى و احطها و ربنا يستر ميكونش حد زعلان او متصور إنى مطنشاه عمدا مع سبق الأصرار و لا حاجة
لو إنتا شايفها فكرة مذهلة يبقى المفروض أنا اختفى خجلاً و فرحاً برأيك الطيب الجميل
ربنا يخلى حضرتك و دايما شيك شياكة مش موجودة الزمن دا

سلام عليكم

أنا ضيف جديد واتمنى أكون ضيف خفيف

الصراحة انا كنت بقلب فى المدونات اللى أعرفها ولقيت موضوع مكتوب عند هشام صاحب مدونة وجعلونى مريضاً نفسياً كان عن رحلة الإسكندرية للقاء المدونين هناك

وعجبنى الموضوع جداً والروح كمان وفضلت ماشى ورا كل اللينكات لحد ما قريتها كلها
ولقيت فيها كلها حاجة واحدة مشتركة

"إن كل الناس بتشكر فيكى قوى"

فحبيت آجى وأشوف مين الشخصية
وسعيد جداً إنى شوفت المدونة دى
وحزين جداً إنى شوفتها بعد ما أعتزلت التدوين
كان عمرى قصير قوى فى التدوين وكتبت بوست الاعتزال بنفس فكرة البوست الهايل ده

بس طبعاً الاعتزال ده بعيد عن السامعين والقاريين
ههههههههه

تحياتى

عجبني قوي البوست داه علشان أنا قلبي مشابه لقلبك شويتين يمكن سكانه الأكثرية منهم مش مدونيين بس فعلا ساعات زوجي يكون قاعد يقولي بتكلمي مين عالكمبيوتر أقولة صديقتي من العراق

فلانة من الهند

صاحبتي اللي عايشه في السويد

صديقتي الحبيبة من لبنان وووو ومرة قالي ايه داه عندك مكان لكل دول ؟ رديت عليه وقلتله : أنا قلبي مساكن شعبية

ربي يديم المحبة والمعروف بينا جميعا ويجعل صحبتنا صالحة لله ومن أجل الله

السلامـ عليكمـ

وهكذا دوما تكون القلوب الكبيره مليئه بالحب والوفاء

خريطه لا يقيدها حدود

الله يباركـ فيك دوما ويحبب فيك كل انسان ويجمعنا جميعا تحت عرش الرحمن ويبارك لك في يوسف ويجعله قره عين لك ويسعد ايامك من حيث لا تحتسبي ..

hola, Chicos, Hola, he tratado de correo electrónico usted en relación con este post, pero no son capaces de llegar. Por favor, un e-mail cuando recibe un momento. Gracias.

در واقع دوست شما وب سایت جزئیات ! بدون شک زیبا از اطلاعاتی که فوق العاده مفید است . استیک با آن برای حمل چاپ و نشر و من نمیخواهم ادامه تحصیل با استفاده از ! سلام .

إرسال تعليق