.

.

عبط الدنيا  

Posted by: فاتيما in ,

فى زيارة لعمى و كان بقالى أكتر من سنة مشفتوش
بعد السلامات و التحيات جاء السؤال
و اللى واضح إنه كان بإيعاز من أمى ... ليه مش عاوزة تتجوزى تانى ؟
كنت اعلم مسبقاً قبل ما اجاوب .. إن رد الفعل هيكون ضدى .. لكن جاوبت
بأن باب الشقة متكسرشى من تخبيط العرسان يعنى
وبأنى لن أفكر فى الموضوع بشكل حقيقى وعملى غير لما يرجع يوسف الاول
و اللى ياخدنا ... ياخدنا إحنا الجوز فى شروة واحدة
و كان الرد من عمى
إن يوسف يا بنتى عمره ما هيرجع
و مفيش راجل أصلاً يرضى يربى فى غير ولده
و إنك ضيعتى سنين من شبابك ملتزمة بهذا الطفل و دا كافى لأنك متعاقبيش نفسك
و تضيعى باقى العمر فى إنتظار ما لن يأتى خلاص
و بغض النظر عن درجة الألم التى أصابتنى من كلمة
يوسف عمره ما هيرجع
إلا إنى على غير العادة ... مسكت دموعى من النزول
و قررت ادافع عن معتنقاتى بكل شجاعة بدت إنها غباء مطلق
بكل قوة رديت بإن ربنا اكبر من كل شر باعدنى عن يوسف
و قادر يرده لحضنى
و إن لو كل الرجالة بتفكر التفكير الغريب الأنانى دا
يبقى يشرفنى إلا أتزوج مرة تانية و أفتخر بذلك
نظرة عمى و كلماته لى بعدها تلخصت فى إن يبدو الظروف بتاعتى
أثرت فيا سلبياً و إن مخى عايز صنفرة
و انى أعانى من حالة مثالية عبيطة و ملهاش لزوم
بصراحة ... حسيت إنه عاوز يقول عبيطة من غير مثالية
بس محبش يحرجنى
و بصراحة اكتر ... حسيت إن الوصف دا يعتبر مدح مش إنتقاد
و قعدت أفكر فى نظرة الناس و مدى أختلافهم معايا للدرجة دى
هل حبى الشديد لإبنى يعد مثالية عبيطة ؟
هل لما كان عايش معايا فى ظروف غير طبيعية
و بعيد عن الدنيا و الناس
و ميروحش مدرسة
و ملوش أصدقاء و لا عائلة مقربة منه
تمر علينا الأعياد و المناسبات وحيدين و خائفين من كل شىء
و كل هذا بسبب ظروف لا دخل له فيها غير إختيارى الغلط لشريك حياتى
و بعد كل هذا لما نعود لحياة المفروض شبه طبيعية
فبرضو مينفعش و أضطر أسفةً إنى أوديه لأبوه
وميقدرش رغم ذلك إنه يعيش مع أبوه اللى أتجوز و خلف
فيسيبه مع الجدة الكبيرة فى السن و العم بدل ما يرجعهولى
و الولد يبقى عايش يتيم الام و أمه على قيد الحياة
ماضيه كان ملخبط
و حاضره مؤلم
و مستقبله مشوش و لا يعلم به غير الله
بعد كل ده ... أل المفروض بقى إنى اكبر دماغى
و أعيش حياتى
و أعوض اللى ضاع من عمرى أنااااااااااااا
و أتجوز ...لا و إيه .. أبدأ حياتى من جديد مع راجل معندوش إستعداد
يربى فى غير ولده
طب يعنى بذمتكم .. بلاش نتكلم بالقلب و المشاعر و لننحى الامومة جانبا
خلينا عقلانين ... هوه البنى آدم مش المفروض يكون مسئول عن تصرفاته ؟
أليس هذا الولد مسئوليتى و يجب أن أتحملها !!
مش كفاية إنى بعيدة عنه و اجبن من أن أروح أنتزعه مما هو فيه
لإعتبارات كتير قوى تعرفوها
ألا يكفى إن مصير إبنى بين أيدى الغرباء و ليس بيدى
أليس من المنطقى إنى أتحكم فى نفسى على الأقل .. حتى يعود
طب لما أرفض إنى اعيش حياتى كما يطلبون ... أبقى عبيطة ؟!!
ليه التفكير فى الولد اللى ملوش ذنب و لا اختيار فى مجيئه لهذه الدنيا
بكل ما فيها من قرف و لخبطة إتفرضت عليه ... يبقى عبط ؟
هذا الطفل الجميل
ألا يستحق هذا المخلوق الرقيق المسكين
أن يجد شخص واحد وحيد يكرس له حياته و يوقف له الآتى من العمر ؟
دا إبنى و هو فى نظرى يستاهل كل الحب اللى فى الحياة
و الكون
و المجرات السماوية المجاورة
انا بحبه و بجنون و أنانية و عبط الدنيا
ألا يستحق ابناء المرء الحب الغير مشروط
و الغير أنانى و الغير مرهون بأشخاص آخرين يتدخلوا فيها
أنا امه و احمد الله على هذه النعمة التى كرمنى بها الله
و ليتنى اكون قدرها حتى أموت
ألا يلزمنى الواجب الانسانى و بلاش العاطفى حتى
التفكيرا فيه و فى مستقبله و فى حياتنا سويا إذا اعاده الله إلى حضنى فى أى وقت
توقيت الرجوع دا ممكن يكون بكرة ( يا رب ) أو بعد سنة
أو لما يكبر أكتر و يدور عليا لوحده دون مساعدة حد
لما يرجع ... أين ساكون أنا وقتها ؟
لما أتجوز ...من يضمنلى ؟
إن الراجل اللى هتجوزه هيرحب بوجود يوسف فى بيته
و لو كنا متفقين سلفاً ... كيف أتاكد من إلتزامه بالوعد
و لو إضطريت للتعامل مع طليقى عشان يرجع إبنى و وارد جدا
ماذا لو لم يقبل الزوج العزيز و قالى إبنك دا مسمار جحا و غير مقبول تواجده
وديه لأبوه تانى هوه اولى بأنه يصرف عليه و يتحمل مسئوليته
او فى احسن الأحوال هيطلع مراعى و ذوق شوية و يقولى ... وديه لمامتك
و إبقى شوفيه هناك
مش ده بيحصل فى النوع دا من الجوزات ؟!!
و غالباً الام اللى زى دى لو عندها اطفال من الجوزاة الجديدة
بتبقى بين نارين .. و لو أخترت حد هتتحرم من الحد التانى من عيالها ؟!!
محدش يقولى إنتى بتشوفى أفلام عربى كتير و بتاع
أنا بتكلم عن الواقع اللى بيخلى أى أم مطلقة تحجم عن الزواج مرة آخرى
و غالباً هيا دى بتكون أسبابها
كم أم تعرضت لهذا الموقف و اولادها عانوا الآمرين
كم ام و طفل تمزقوا بهذه القسوة الغير عادية
محدش يقولى تفكير الرجالة إتغير و ممكن قوى تلاقى واحد مستعد
يربى ولد مش إبنه ... معاكم فى إمكانية دا
و عشان مكونش مجحفة حصل قصادى مع قريب لينا
لكن فى الواقع لم أشاهد سوى حالة واحدة و لم تتكرر تانى
انا مش من كارهى الرجال
و لا من أنصار المرأة المتوحشة
و عندى عقد و كلاكيع و فيونكات من الجمع المذكر سالم
أنا بتكلم عن حال مؤلم يرعبنى
و لصعوبة التعامل معه بقى علاجى الوحيد لتجنبه هوه الإحجام عنه
ليه أعقد حياتى و ألخبطها بزيجة ممكن تخرب علاقتى بإبنى
الحمدلله أنا احسن من ستات كتير غيرى
عندى حيطان تسترنى و متعلمة و هشتغل و مش مضطرة أدور على حد يعولنى مادياً
حياتى الإجتماعية فيها ناس كتير امى و أخواتى و صديقاتى و معارفى
و المدونة دى بكل ما حملته من عبير الاحباب اللى هما إنتم
كم الدعم و الثقة بالذات و التناغم مع الدنيا
و الرضا بالمقسوم موجود و بيكبر كل يوم
يعنى عندى حياة صاخبة مليئة بالأمل بجانب إنتظارى لأبنى
كل هذه النعم مجتمعة ...هل يصح أن أتركها كلها
لأبكى على نعمة وحيدة لم احصل عليها وهى الزوج الصالح ؟
الحكاية عندى أشبه بجوهرة نفيسة طالما تمنيت أن أقتنيها
و لسؤ الحظ و التصرف اتغشيت فى واحدة فالصو دفعت فيها كل ما املك
و فى الآخر رميتها لما عرفت أصلها المزيف
الآن ..لا املك الامكانية لشراء جوهرة حقيقة ... و إيه يعنى ؟
القدرة النفسية على العيش راضية بكل ما لدى موجودة و لا اطمع فى زيادة
ماذا تفعل المرأة التى تعدت سن الزواج و لم يعد يتقدم لها احد
و الارملة التى مات زوجها و بقيت وحيدة تربى عيالها
مجرلهموش حاجة يعنى و عاشوا الحياة
قد تقسو عليهم احيان كثيرة
لكنها حياة تستحق و ممكن تتعاش لو الواحد كانت نظرته إيجابية بعض الشىء
و أنا ... عندى أسباب كتير تجعلنى إيجابية أولها و أهمها
يوسف إبنى
انا لا أقلل من شأن الرجال ... و لا احاول أن أعمم
بس بقول إن الزواج عبارة عن شراكة تذوب فيها كل الحدود و الحقوق
و الرجل الشرقى و غير الشرقى حتى
لا يقبل أن تكون زوجته ام لغير اولاده اللى من صلبه
و أى اطفال لها من زواج قديم ... ليس مستعدا لحمل همهم و لا إستقبالهم فى حياته
مش بأقول كل الرجالة كلهم ذئاب و متوحشين و أنانيين و بشعين
فيهم ناس حلوة و قوى و متحضرة بشكل كبير .. بس دول إتحجزوا خلاص
و أنا كمان بعتبر نفسى محجوزة و لأجل غير مسمى
و لتختفى كل أفرخ الصنفرة اللى ف العالم
و لأكن مثالية
و عبيطة
لأنه عبط يجعلنى أشعر إنى ام حقيقية
و لست مجرد واحدة و خلفت و خلاص
و لو كان التخلى عن يوسف هو الشرط الأساسى علشان اعيش حياتى
فأنا أفضل اكون ميتة
التوقيع
أم عبيطة

من غير حب
كيف ستغفو قليلاً
على حجر امك
تطلق يدها فى جسدك
كجناح ملائكة
يخطفك من نفسك
يسرقك من الدنيا لحظات
لحظات
لحظات...
كريم بهى

This entry was posted on الأربعاء, يونيو 24, 2009 and is filed under , . You can leave a response and follow any responses to this entry through the .

61 كــــلام بيطــبطـــب عـــلى قــــلبى و روحــــى

فـ المواضيع دي بالذات بيختلف الفكر من شخص للتاني
انتي لوحدك سيدة قرارك ..
ربنا يريح بالك ويهنيكي ويرجعلك ابنك انشالله :)

مين قال ان ده عبط ؟؟؟
ده لو عبط اعتربيني عبيط و برفعلك القبعة علي كل العبط اللي اظهرتيه

يابخت يوسف بام زيك
و كمان ردك اكثر من رائع و موفقك عليه قلبا و قالبا

و كمان مفيش حاجة اسمها يوسف مش راجع تاني
ده اختبار من ربنا لقوة تحملك و اكيد اكيد هيرجعوهلك و انا متأكد من كلامي جدا

هيرجع يافاتيما
والله هيرجع
وان شاء الله هيكون قريب جدااااااا
مش قلت لك انك عندك حسن ظن بالله
وربنا عند حسن ظن عبده بيه
وياستى المؤمن مصاب
واللى ربنا بيحبه بيبتليه
وانتى ابتلائك جه فى بعد ابنك عنك
وعندك من الصبر ماشاء الله كتير
ربنا يقوى قلبك ويصبرك يااارب
ومفيش حد يقدر يقرر حاجه فى حياتك انتى شيفاها هتكون سبب فى بعدك عن حبك الحقيقى (يوسف)
ويوسف لما يكبر ان شاء الله هيعوضك كل الالم وكل لحظات الفراق
ويكون لك احسن من اى زوج صالح
لانه هيكون ابن صالح
انتى زرعتى الحب
ولازم تجنى الحب
وكفايه انه يكون من ابنك


ربنا يقدر لك الخير ياااااارب

ب ح ب ك ياطمطم

امضاء
عروسه البحور
زى ما بتقولى عليه

امووووووووووووووووووووه

انا معرفش قانون الاحوال الشخصية

بس اللى اعرفه ان لنفترض ان ابنك كان معاكى من الاساس
ولو اتجوزتى تانى
الولد حضانته بتروح لابوه
وبياخده منك

فبالتالى فى حالتك يا فاتيما هتستنى يوسف لحد مايرجعلك ولما يرجعلك نفترض انك اتجوزتى
ايه اللى هايحصل ؟
ماهو ابو يوسف مجرد انه يعرف انك اتجوزتى هايروح ياخد منك الولد تانى

يبقى عملنا ايه بقى

بدل اتجوزتى ماتجوزتيش ابنك هيفضل عند ابوه

يبقى اتجوزى

ده المنطق بيقول كدة


اما انا فبقولك
جاتها نيلة اللى عايزة الجواز
وجاتها ستين نيلة اللى اتجوزت خلاص



انتى كاتبة فى البوست انك بتشتغلى

هو انتى اشتغلتى يا فاتيما؟


لو اشتغلتى فعلا يبقى الف الف الف مبروك يا حبيبتى
لو مجرد كلام مجازا كدة وخلاص يبقى ان شاء الله يتحقق قريب


سلام

اختك خيخة

يا زهراء
الحمد لله على السلامة من بعد غياب
يا أم يوسف
الزواج هو طريق السعادة ما اجتمع رجل و امرأة على تقوى الله. فإن أردت الزوج الصالح من يتقى الله فيك و يكون أبا للصديق يوسف فعليك بالدعاء الصادق المخلص المستجاب بإذن الله.

تحياتي

مش عارفة
مادام حضرتك مش عايزة يبقى مفيش مشاكل
فين المشكلة بقة

حضرتك وضحتي حاجة وسط الكلام
هوه هيبقى عامل اية لما يكبر شوية
مادام هوه دلوقتي في سن الطفولة عاشها و خلاص

لما يوصل لسن المراهقة
ويلاقي ابوة متجوز و مخلف و سايبه
و تيتة مش عارفة عنه حاجة تقريباً
وماما متجوزة و مش عارفة تكلمه

إذا كان اللي أهلهم محرصين عليهم قد ينحرفوا
فما بالك بحد نشأ و هوه مش لاقي حد يحوط عليه

دة من وجهة نظر باصة ليه
يا رب يا رب يا رب
يطلع من خيرة شباب المسلمين و يطلع ولد صالح آمين

انا بس بقول نظرية افتراضية

طيب من وجهة نظر باصة للسيدة
بعد سنيييييييييييييين

ربنا يديكي طوله العمر يا رب
لما هوه يتجوز
و حضرتك تبقي كبيرة في السن و محتاجة حد يراعيكي
هوه هيراعيكي
لإنك قبليها فضلتيه على كل الناس
وبعدين احصائياً
الرجالة بتموت قبل الستات بعشرة عشرين سنة
يعني حتى لو اتجوزتي واحد تاني
هتلاقيه مات قبل ما تبقي ست كبيرة
و هتقعدي لوحدك و ابنك يشأر عليكي
غير الجيران طبعاً و الصحاب و هلم جرجر
بس الفكرة تكمن
لو في الونس
حضرتك بتقولي في هذه الفترة عندك والدتك و صحابك و احنا :$ زي ما حضرتك افترضتي
و بعد فترة ان شاء الله يرجعلك يوسف بكرة قبل بعده
يااااااااااااااااااارب
اللهمي ا جامع الناس ليوم لا ريب فيه اجمع بينها وب ين يوسف

هيبقى معاكي


طيب

بصي مش عارفة اقولك إيه

مش عايزة اقولك سيبك من الجواز و قُطعه و الحركات دية
بس فعلاً من حقك تتجوزي
و مش من العبط أبداً تحافظي على ابنك
اللي زي ما وصفتي
تقريبا مفيش حد ليه في الدنيا غيرك انتي

أنا مش عايزة أبقى مجحفة لأحقيتك في انك تستمتعي ببقية حياتك مع زوج
بس هل احنا ضامنينه

بصي
نصيبك هيجيلك
مين عارف
مش يمكن يجي راجل ملائكي الهيئة
طيب الطباع
يقسم لكِ انه هينفذ وعده في الحفاظ على ابنك
و ابنك يرجعلك
و تربوه مع بعض
و جوزك ربنا يهديه و مياخدش باله


محدش عارف إيه هيحصل بكره

زي ما قولتلك فوق

مش عارفة

ربنا يا رب يعملك اللي فيه الخير ليكِ ياااااااااااااااااااااااااااااااااارب
اسعد ايامها و ارضيها و ارضى عنها

آمين

سلام عليكِ

ربنا يريح بالك وينجى ابنك من كل شر ويهدى ابوه ويرجعه بسرررررررررعه من غير اى مشاكل
وربنا قادر على كل شئ

ايمان مصرى مش عارفه فاكرانى ولا لا؟

والله انا مش عارفة اقولك ايه
لانهم برده خايفين عليكى وعايزين يشوفوا انك مبسوطة وسعيدة صحيح انهم غلطانين لانهم مش عرفوا مكان سعادتك الاصلى وهو ابنك
هم حابين يخرجوك من حياتك الحالية باى شكل واقرب شئ يكون بالزواج وانك تعيشى حياة جديدة من اول وجديد
بس بينى وبينك كل الاختيارات اللى انتى قلتيها صحيح
افرضى ربنا رجعلك يوسف بعد انتظارك كل ده وبعد ما حسيتى ان روحك اترديت لك تانى
يطلع لك واحد مش حاسس بيكى ولا باللى جواكى يقولك مش عايزه
الصراحة هاتبقى صعبة اوى

علشان كده انا معاكِ جــدا ..
ربنا يرده الى حضنك عن قريب يارب حبيبتى ..

فاتيما أزيك وحشتيني

انا قريت وكل ما اقرا اتخض

اه بجد أتخض
عمك ومامتك عندهم حق
وأنتي كمان عندك حق

طب خلينا نفكر بالعقل والمنطق كدة

علي قد تفكيري يعني
عمك عنده حق لما قالك يوسف مش هايرجع هو مش قصدة زي ما انتي فهمتي بس يوسف كبر وربنا يحمية وأتأقلم علي الوضع الجديد ووالده استحالة يخلي راجل تاني يربية

كمان انتي حرام عليكي تضيعي فرصة انك تتجوزي تاني ويبقي عندك أبن أو بنت تانية اخت ليوسف

فعلا صعب انك تلاقي راجل يربي أبنك لكن سهل تلاقي راجل عارف ان أبنك محتاجلك ووجودة في حياتك شئ طبيعي

انتي بتقولي شوفتي مثل عندك وانا كمان عندي مثل تاني بنت خالة بابا بعد ما جوزها توفاه الله وسبلها ولدين اهل ابوهم أخدوهم زي ما والد يوسف اخده كدة وهي حياتها وقفت علي كدة لاء الحمد لله ربنا كرمها بزوج كويس وولدها لما كبروا رجعولها من نفسهم وهما مستوعبين انها متخليتش عندهم ولا سبيتهم الحقيقة مش بتستخبي

دلوقتي عندها ولدين وبنت من جوزها والحمد لله مستقرة من سنين طويلة ولدها بيزروها وتزروهم

حاولي تعيدي تفكير في الموضوع محدش فيكم صح ومحدش غلط بس أكيد في حل وسط

ربنا يوفقك للي فيه الخير ياااااااااااارب

السلام عليكم ورحمة الله وبركاته

هو عمك بينصحك كوالد بس النصيحة كانت طريقتها ناشفة حبتيين وفي الأخر القرار قرارك

ممكن اقول رايي في موضوع الجواز ده
انتي متقفليش الباب خالص يعني حددي مواصفات او شروط معينه في الراجل الي يصلح زوج ليكي مع الظروف بتاعتك وإذا جه الزوج الي فيه المواصفات دي او نسبة كبيرة منها والي اكيد اولها واهما هو يوسف يبقي تستخيري ربنا وتتكلي علي الله انما متقليش من دلوقتي مفيش راجل مناسب ومحدش هيوافك علي وضع يوسف علشان محدش يعرف الخير فين
وطبعا في الأول والأخر القرار قرارك


والف مبروك علي الشغل وعقبال يوسف لما يرجعلك إن شاء الله


هشام توفيق

ازبك يا فطوم
يارب تكوني بكل الخير

في موضوع النهاردة بقي .. انتي عاوز الحق ولا ابن عمه ؟؟؟

امك وعمك واهلك عندهم حق في تساؤلهم لان احنا كشعب لا نري للمرأة امان الا مع زوجها حتي لو كان شيطان رجيم فهو في كل الاحوال افضل من عدمه

يعني اللي قالوه طبيعي
دي نقطة

النقطة التانية يوسف
الواقع بيقول انه غالبا هيكون موجود فترة مع ابيه .. الي ان يكون هناك تفاوض ما او تنازل ما
وانا مش عارفة هو ليه مش سايبه معاكي مادام انتي مش متجوزة وهو متجوز .. بس خلينا في الواقع برده انه معاه دلوقتي بشكل كامل حتي كمان فهمت الرؤية متعذرة

وبما انه حاليا مع ابيه في كل الاحوال يبقي المتوقع اني هيجي ويدور ويسال لوحده لو محصلش صلح بين الكبار او اتفاق .. المتوقع انه هيجي ليكي في حدود سن المراهقة لما يبقي حر شوية انه ياخد قرارات وانه يتحرك بعيد عن رقابة الكبار
تمام ؟؟

وساعتها لو ابوه مش موافق انه يعيش معاكي برده مش هيعيش معاكي
وسن المراهقة بتحصل فيه تغيرات كتير للولد واقصد الذهنية والفكرية والاهتمامات .. يعني مش هيكون عاطفي كالاطفال او كما عهدتيه وتعرفيه والعلاقة بينك وبينه هتبتدي من جديد ومش هترتكز علي علاقة الام بطفلها الوليد .. لا .. دي هتبقي علاقة صداقة وتفاهم وحوار متبادل مشترك ..

نيجي للنقطة اللي بعد كدة .. انتي مش كبيرة اني تخافي من اي حاجة عشان تتجوزي والسلام عشان ترضي الاخرين
لكن اتركي باب قلبك مفتوح للحياة وان وجدتي يوما من ترتاحين له وتحبيه سوف تتقبلي فكرة الزواج بدون عناء .. وساعتها سوف يكون هذا الشخص معينا لك في بناء علاقتك الجديدة مع ابنك .. من خلال حبه واحترامه لك
وان لم تجدي هذا الشخص فلا تتزوجي
الامر اولا واخيرا استعداد وابنك جزء منك ومن حياتك

لكن ان تغلقي كل الابواب في وجه الحياة انتظارا لان يكون يوسف معكِ غدا ؟؟
اتمني ذلك من كل قلبي .. لكن الحياة والواقع ليس كذلك ..

اعذريني
انا اول مرة اتدخل في الموضوع ده يمكن لاني لم اعاصره منذ البداية لكن فهمته خلال الوقت لكن حبي لكِ هو ما جعلني اتكلم
خاصة انني اري انك تعاملين الامر برومانسية مطلقة .. وهي لا وزن لها عند المشاكل الحقيقية بالحياة وهو ما تعانينه انتي

فكري بعقلك
واوصلي للصح .. مش للمفروض ان كان يحصل منذ سنوات مضت

تحياتي

لأ طبعا منتيش أم عبيطه

أنتى أم خلتينى أحس بقيمة أولادى فى حياتى

كلماتك البسيطه عن يوسف فكرتنى أد أيه أنا غبيه لما بشتكى من دوشة الولاد ولا مسؤليتهم

مدونتك أكدتلى أن كلمة ممكن الواحد يكتبها أو يقولها تغير حياة بنى آدمين كتير من غير ما يحس

حبك ليوسف خلى حاجات كتير فى حياتى انا واولادى أتغيرت

وتعرفى انا واثقه أن يوسف هيرجعلك وقريب ان شاء الله هيكون فى حضنك
وكمان واثقه أن حبك ليه بيحميه وأنه حاسس بالحب ده رغم بعده عنك
أنا معرفش ايه المشكله بالضبط وليه انتى كنتى محرومه انتى ويوسف من الحياة الطبيعيه
وليه انتى مش قادره تسترديه
لكن لو فى أى محاوله حتى لو صعبه أو حتى مستحيله ياريت تعمليها يمكن ربنا يجعلها سبب وتستردى ابنك
أما موضوع الزواج فشرحو يطول
ومادام ربنا رزقك بقلب حنون وأمومه عبيطه يبقى صعب عليكى جدااا انك تتجوزى تانى على الاقل فى الوقت الحالى
ربنا يعمر قلبك بالايمان والحب دايما
وتقبلى مرورى

تسمحيلي بقي ارفع القبعه لام زيك

ام بجد فوق الوصف

وربنا وربنا هدعيلك في صلاتي ان يسف يرجع

بس لو رجع ارجوكي تعرفيني

ربنا يجمع بينكوا يارب

السلام عليكم:

ازيك يافاتيما

اولا :احب اقولك انى علاقتى بالمدونين لسه فى الاول وانك من المدونين اللى حبتهم جداومن المدونات اللى تابعتهم وكمان بقرأالارشيف بتاعك.


ثانيا:انت فكرتينى باختى لان لها تقريبا نفس الظروف بس الحمدلله طليقها ترك لها الولدين.
وهو كان انسان طماع لابعد الحدود حتى رفض يصرف على اولاده وماكانش عاوزهم اصلا، وطبعا اخد كل حاجة حتى دهبها وفى الاخر ماضها على شيك على بياض وطلقها ورفع قضية بالشيك.

بس الحمدلله ربنا قدر والدى وقدر يبطل الشيك ويجيب عليه قضايا وفلوس من النقفه وفى الاخر طلب الصلح لعجزه عن السداد ووالدى اتنازل علشان احفاده مايقولوش جدنا سجن ابونا حتى لو كان على حق
.
كانت دايما اختى بتقول طليقى اخد كل حاجة بس ترك اعز حاجه الاولاد.


ثالثا:انت ام رائعه بكل معنى للكلمه وبوستاتك مع يوسف فادتنى كتييير مع اولادى.

وطبعا مامتك وعمك خايفين عليك وعاوزين يطمنوا عليك،وساعات من كتر الخوف يبقى الكلام فى عنف .
بس صدقينى ده بيبقى حب كبير.

وانت ممكن تعيشى لنفسك وليوسف فى نفس الوقت
ماتقفليش باب الزواج وماتفتحيهوش على مصرعيه لو قابلتى انسان تقى يخاف الله صدقينى مش هتحتاجى وعد منه هو هيسعى معاك لأستعادة يوسف ولو ماقابلتش انسان تقى احسنلك الف مرة تفضلى من غير زواج.

وحتى التضحية لازم تكون بحساب علشان مانندمش حيث لاينفع الندم لان اكيد لما يوسف يكبرهتكون له حياته وهيتجوز وياما امهات ربوا والاولاد لما كبروا بعدوا
ومن باب اولى لو مش هتتجوزى لو يوسف معاك مش لما يرجع
ربنا يرجعه لك بالسلامه ويعوضك عن الاسى اللى شوفتيه ويوفقك فى زوج صالح يتقى الله فيك وفى يوسف.

وعلى فكرة انا شفت اكتر من مثال لزوج ام تقى وبالعكس لولاه كان الاولاد ضاعوا


عذرا للتطويل بس صدقينى انا فعلا حبيتك ونفسى احط قدامك التجارب دى علشان تستفيدى منها انشاءالله


وانشاءالله طول ما بتتقى الله وثقتك بالله كبيييييرة اكيد ربنا هيفرح قلبك ويرجعلك روح قلبك.
تقبلى مرورى

والله كلامك منطقي فعلا يعني عارفه كان ممكن اقولك اجوزي لو يوسف معاكي فعلا والي هتجوزيه عارف وموافق وبيحبوا بعض لكن دلوقتي عندك حق ممكن يقولك ماشي وموافق ويجي وقت الجد يتهرب فانتي صح وام عظيمه ربنا يخليهولك يارب ويجمعكم على خير

بصراحة يا بخت يوسف بيكى كل الحب ده والخوف عليه بصراحة مش عارفة أقولك ايه غير ان ربنا يرجعه ليكى بالسلامة ويفرح قلبك بيه وما يحرمك منه أبدا ويوسف كمان يوصله شعورك ده ويعرف حقيقة الوضع ولما يبقى القرار ليه يقرر بإنك أحن حد عليه وبعدين لو كان حبك ليه عبط يبقى أحلى عبط فى الدنيا و بصراحة مش عارفة أقولك ايه فى موضوع الزواج ده لأنى مش هقدر أفتيكى انتى اللى فى الموقف ده ومش حد تانى وانتى اللى تقدرى تحددى ايه الأفضل ليكى وربنا يرشدك للصح ويلهمك الصبر

ربنا معاكى يارب

دمتى بكل الحب والخير والسعادة والأمل

ساعات كتير بيبقى اللي حوالينا شاغلين نفسهم بينا
و غالبا بيكون مصلحتنا هي شغلهم الشاغل حتى لو مصلحتنا دي مش مناسبة لينا
بس لازم نقدر حبهم لينا

اوعي تتخلي عن نفسك مهما كان راي الناس فيك
مهما كان كلامهم صح او غلط لان وقت الندم وحساب النفس كله هيتنصل من اختيارك وقرارك
لو عبيطة ده رايهم بس المهم الشيء الاغلي والاعز في حياتنا نحافظ عليه ونضحي عشانه بعبط لو الناس شايفة كده
لو شايفة انك المفروض تمشي ناحية يوسف خطوة امشي له مليون خطوة مش بس خطوة واحدة حتي لو كانت في كل خطوة تضحية ايا كانت و ايا كنتي في نظر الاخرين

السلام عليكم إزيك يا فاتيما
طبعا معاكي حق ولا يجب أن تتخلي عن أبنك أبدا والأمل في عودته يوما ليكي
ولكن في كتير مستعدين يتقبلوا أن يربوا أبن زوجته من زواج سابق
وخصوصا أنك أم لولد واحد مش أكتر من كده فأحمدي ربنا أنك مخرجتيش من تجربتك السابقه بعيلين تلاته
أنا أعرف أكثر من واحد متزوج من إمرأه لها زواج سابق ولها منه أبن
ويعيش هذا الإبن معهم وبيعتبروهم أبناءهم
يا فاتيما حب الرجل لزوجته يجعله يقبل بأي شيئ يخصها ويعتبر أن إبنها من زوجها السابق أبنه لأنه قطعه من قلب حبيبته
فالحب يصنع المعجزات
فكري في نفسك برضو يا فاتيما دون التخلي عن أبنك مكلاهما لا يتعارض مع الآخر
أحسني الإختيار وأبدأيه بالإستخاره ولن يقدر لك الله إلا كل خير

دمتي بكل خير

ازيك يا فاتيما يارب تكوني بالف خير وتكون الأجازة حلوة

موضوع يوسف انتي عارفة رأيي فيه ومش ها أكرر نفسي

صغير مراهق شاب متزوج راجع بعون ربنا راجع
ولي في هذا شهود وامثال قصاد عيني وعلشان كده عندي يقين بالله

اما عن الجواز فلو ربنا كاتبه ولاااااااااااااااااااااااااا
حاجة من اللي انتي كتباها دي ها تتحط في الحسبان
لأن ببساطة شديدة
وما ربك بظلام للعبيد
وربنا هو المعوض المخلف

فلو كان عوض تعبك في صلاح يوسف وعودته
يبقى ده خيرك

وان كان العوض في زوج حنين يطبطب عليك فربنا يجيبه بسرعة
وساعتها ها تكوني مدينة لنا ببوست طويل زي ده تشرحي فيه ان كرم ربنا مش بيجي بالتفكير ولا بالتحليل ولا بواحد اتنين تلاتة

تحياتي

الهى ربنا يطمن قلبك ويريح بالك ويرجع لك يوسف ويرزقك الزوج الصالح ويعوضك عن المك فى الدنيا والاخرة
اللهم امين

ربنا سبحانه وتعالى فى حديث قدسى بيقول
وعزتى وجلالى لارزقن من لا حيلة له حتى يتعجب اصحاب الحيل
سيبى نفسك لربنا يدبرلك زى ما ستيتة قالت لك
ويكتب لك هو سبحانه الخير
بس اهم حاجة عدم الاصرار على موقف معين
يعنى لو الجواو خير لك ولظروفك وليوسف ربنا ييسره ولو شر يبعده عنك
اجمل حاجةتتمسكى بحالة الرضا والسلام النفسى لان دى هتكون زادك لغاية ماربنا يحقق احلامك
انت مثالية ومش عبيطة ولا حاجه
عمر الدنيا ماكانت بالنصاحة والحسابات الدقيقة وده مش تواكل والله بس انا مفيش حاجة حتى لو تافهة جدا حسبتلها ونفعت معايا ومفيش حاجة فوضت امرى فيها لله الا وكانت اجمل بمراحل من تفكيرى الناقص المحدود

اللهم ارزقنا حسن التوكل عليك

امشى ورا عقلك واختيارك عندى والله قصة يمكن لو سمعتيها تخفف عنك بس للاسف مينفعش تتقال كتعليق هنا

ربنا يقر عينك بولدك

الموضوع بسيط وفى ايدك انتى مش حد تانى يوسف هيرجع هيرجع على الاقل لما يكبر هيعرف انه ليه ام ومحدش هيقدر يحوشه انه يروح يشوفها وبعدين طالما انتى قادره تعيشيى من غير راجل يبقى خلاص ممحلوله ملوش لزمه الزواج وانتى عندك اغلى راجل فى حياتك ( يوسف ) وان شاء الله هيرجع تحياتى

أنعم به وأكرم من عبط نبيل .. بالفعل ليس كثيرا على يوسف أى شيء وكذلك ليس كثيرا عليك أن يجمعكما الله عما قريب ولكن ليتك مع ذلك تتيحين الفرصة أمامك وأمام الآخرين فلا توصدى الباب تماما فربما يأتى منه بصيص يغير حياتك وحياة يوسف معا للأفضل بإذن الله ، وطالما رأينا الحياة البخيلة تجود على الكريمات مثلك بما يستحقونه من خير ورضا .. دعائى لك من القلب .. ودمت محبة مخلصة .

بصي يا بطة
من ناحية انك عبيطة
ف ديه حاجة مؤكدة طبعا طبعا و ربنا مش بيقول اللى انتى بتعمليه
ربنا اكيد عاوزك تاخدى فرصه تانيه فى انك تتجوزي و تحلفى ولد تاني زي يوسف تحطي فيه كل المشاعر اللى جواكي
هوه ده الصح و التفكير السليم
اما رجوع يوسف
ف زي ما خيخة ام المفهومية قالت
اذا رجع يوسف و اتجوزتي ابوه حياخده منك تاني
فخليكي انسانه متحضرة و شوفي حياتك و يمكن ساعتها ابو يوسف يحس انه خلاص الولد حيفضل فى حضانته الى ان يكبر و يمكن يخليكي تشوفيه بصفة دورية و فى الحالى ديه حالك حيكون احسن كتير
و يوسف كمان حاله حيكون احسن
فكري بسرعة يا فاتيما قبل ما يفوت الاوان و نقول يا ريتنا
ربنا يعملك الخير كله يارب
لانك تستاهلى كل الخير و السعادة
بالرغم من عبطك
اه على فكرة ممكن الجدة تاخد حضانة الولد فة حالة زواجك بشرط انها مش تكون متجوزة واحد غير ابوكي

ازيك يافطوم
وحشتينى خالص خلتينى اقول
الشغل وسنينه اللى اخدك مننا
اقولك ايه فجرتى فيا حيرة عجيبة
هما صح وانتى صح والحل ايه
اللى كاتبه ربنا حتشوفيه
وباذن الله كل الخير وتعويض عن كل مافاتك
اصل انتى مش اى حد يستاهلك
عاوزين حد يعوضك انتى ويوسف عن المعاناة اللى شوفتوها وقلبى
حاسس انه حيجى وتحلو ايامك ياحبيبتى
والله مع الدعاء لن تخيب امالنا
وحشتينى يابطة
قبلاتى

"لأنه عبط يجعلنى أشعر إنى ام حقيقية
و لست مجرد واحدة و خلفت و خلاص
و لو كان التخلى عن يوسف هو الشرط الأساسى علشان اعيش حياتى
فأنا أفضل اكون ميتة
التوقيع
أم عبيطة"

-----------

أفتكر إن ده إقرار منك

والقرار أنت خلاص أخدتيه

ومحتاجة مننا شوية دعم لوجهة النظر إلي عندك علشان تقنعي نفسك أنك صح

بصراحه محتار ومش عارف أأيد فكرة الجواز ولا أعارضه

شوفي التأيد مشروط بالشخص يعني لو فعلا كويس والقناعة دي نسبته 100% ممكن يعني الموافقة مش مفتوحة كده على المطلق
وإن كنت أشك إنك توافقي بعد التجربة اللي فاتت

"اللي اتقرص من الحية يخاف من الحبل"

وأنت أووردي متبهدلة من جوه ومش حمل تجربة تحتمل النجاح أو الفشل

بصي أنا حاسس كده أني بلت واعجن

مالاخررررر

أنا معاكي أنك تنتظري يوسف وإن شاء الله يرجع بإذن الله

وحتى لو كان أتغير نتيجة للظروف والبيئة اللي هو فيها وحتى لو بقى له حياته وأخدته الدنيا منك


كفاية إنك أخلصتي لمعنى "الأمومة"


وليد

بما انك ام عبيطة
فاحنا مش هناخد على كلامك ولا هنزعل منك
اولا حمدلله على سلامتك
والف مبروك على الشغل
وعقبال ما تفرحى برجوع يوسف باذن الله
بالنسبة للموضوع البوست
اعتقد ان القرار النهائى قرارك انتى لوحدك
لان الايده فى الميه غير اللى ايده فى النار
مع انى بصراحة مختلف معاكى فى بعض الاشياء ومتفق مع انك اعظم ام وانك مثال للتضحية وايثار مصلحة ابنك على مصلحتك الشخصية وده شىء يحسب لكى طبعا
ولكن عمك ووالدتك خايفين عليكى ونفسهم يطمئنوا عليكى مش اكتر
على اى حال ربنا يكرمك دنيا واخرة
وبشر الصابرين
تحياتى وتقديرى

بصي يا أم يوسف
انتي على حق في حبك لإبنك
و إن شاء الله أكيد حيرجع لك

لكن زي ما كذا واحد قالك قبلي
ما تقفليش باب الجواز بالضبة و المفتاح

حطي مواصفات يكون من ضمنها إنه يقبل بوجود يوسف

و ما تقوليش إيش عرفني إنه حيوفي بوعده ؟

أظن بعد تجربتك القاسية جداً اللي فاتت شخصيتك نضجت و بقيتي تعرفي تحكمي على الناس و مبقاش سهل خداعك و مبقتيش عبيطة

و لا إيه ؟

فى الاول كنت خايفه اكتب رأيى لاحسن مش يعجبك
كلمه يوسف مش راجع تانى دى صحيح بس مش بالمعنى المباشر المعنى الحقيقى ان يوسف اللى انتى سيبتيه و تعرفيه يوسف الطفل الرومانسى الملتصق بامه اللى طول النهار معاه تغنيله و تحكيله حواديت لكن هو دلوقتى بقاله سنتين مش بيشوفك و مكلمكيش غير مره او مرتين يعنى خلاص اتفطم منك خلاص
و الحب الجارف اللى عنده هدى و بقى حب الطفل العادى الهادى لان بصراحه يا طماطم البعد جفا و اللى خلاه يستحمل سنتين حتخليه يستحمل عادى جدا الباقى من عمره
اللى عايزه اقوله ان قلب الابن غير قلب الام
ده حتى اللى بتربى ولادها للاخر و تجوزهم بيشوفوها كل حين و مين دى بقت سمه العصر التبااااااااااعد
يبقى انتى يا حبيبتى لازم تعيشى حياتك و تحاولى تبدأى من اول و جديد لان الحياه تستحق منا ان نحياها و ان نحاول اسعاد نفسنا عشان ميجيش وقت بعد كده تندمى على عمرك اللى راح و حياتك اللى اتدمرت منك
فكرى بجد عشان متندميش

ازيك يا طمطومة
حمدا لله على السلامة يا حبيبتى

شوفى يا قمر انتى معاكى حق فى تخوفاتك
بس انا عايزاكى تكونى اكثر ايجابية


انك مش عايزة تتجوزى الا لما يوسف يرجع ده فى حد ذاته غلط وصح
صح .. لانك مش هتقدرى تسعدى زوجك وانتى مش سعيدة وتفكيرك مع ابنك
وغلط .. لان يوسف لما هيرجع ان شاء الله هيبقى محتاجلك اوووووووى .. لانه اتحرم منك كتيررررررر جدااااااا ومحتاج تعوضيه عاطفيا ونفسيا وكل حاجة
طبعا مش هتقدرى توازنى بينه وبين زوجك .. اكيد هتيجى على حد فيهم ..واكيد الحد ده هيكون زوجك

طيب طالما كده كده الزوج هيتظلم لانه مش جاى فى ظروف مناسبة يبقى ايه الحل
؟؟؟؟؟
انتى لا طايلة يوسف
ولا قادرة تتجوزى

يبقى حاولى يا حبيبتى تتفاهمى مع طليقك باى طريقة .. حتى لو فيها بعض التنازلات عن اى حاجة فى الدنيا .. حتى لو على حساب كرامتك .. المهم ترسى على بر وترحمى نفسك من عذاب الانتظار .. وترحمى يوسف من الحياة اللى عايشها من غير ام ولا اب .. كتير عليه كده اوى خصوصا انه فى مرحلة تكوين مفاهيمه ومعتقداته عن الحياة والناس .. واللى هيتصرف على اثرها لما يكبر

حاولى يا فاتيما باى طريقة
كل يوم بيعدى بيغير فيه حاجات كتير اولها نظرته للحب والزواج

ربنا يكرمك يا حبيبتى ويقدرك تعوضيه خير ويملى قلبك بالفرحة برجوعه ليكى يارب

ازيك يا ام يوسف
وحشتينا ياقمر بجد وحشتينا اوى
اية رايك تخدى غطس عندنا
بس قولى انا جاية واحنا نفرش لك الارض ورد وفل

عارفة يا فاتيما
رغم ان وضعك مع يوسف صعب وانه اكيد ابتلاء من ربنا عزوجل
لكن انا شايفة انك تحاولى تعيشى حياتك
وتتزوجى وتجبي اخوات ليوسف يشاركوه الحب والحياة
ويتقاسم معهم الافراح والمشاكل
يكونوا لبعض سند وعون
ان شاء الله
ويكون لكى رجل يشاركك الحياة

كلام غريب جدا

أولا الزوج أو الزوجة مش من الحاجات اللي ممكن نشتريها في أي وقت من السوق .. يعني مش في أي وقت الواحد يقرر يتجوز كده .. ده بيبقى توفيق من عند ربنا سبحانه وتوافق وقصة كبيرة

ثانيا .. التزامك أو قرارك بعدم الزواج حتى يعود ابنك ده مش قاعدة مطلقة .. ممكن يحصل انك تقابلي في يوم الزوج المناسب اللي يخليكي تغيري من القناعة دي

الأمور على اطلاقها كده مش صح .. كل شيء وليه ظروفة وملابساته

يا ست فاطمة
انا واحد بيتابعك من زمان و احب اقول كلمه لوجه الله يمكن تنفعك و تفوقك من غفوتك
حاولى تخرجى حبه من حبك لذاتك و نرجسيتك و اتكلمى عن حاجات تانيه فى المجتمع و الحياة تفيدى بيها نفسك و غيرك بدال حكاية جوزاك و لا طلاقك و الماضى و الحب و الكلام الفاضى
القصص ديا لا تنفع احد
يا ريت تاخدى كلامى بجدية و اعتبريه نصيحة اخ
انا بحس معكى اننا بنلف فى دايرة مغلقة و لا نخرج منها و كلام الناس لا يغير فيك شىء بدايتك كانت قوية لا تبدديها فى فرعيات و ذاتية شديدة
تقبلى نصيحة اخ و راجعى نفسك و مواضيعك
واحد مخلص

ان كان حب الام لأبنها عبط امال ايه الحب اللى يكون سليم يا حبيبتى،ان شاء الله طال الزمان او قصر يوسف راجع راجع مع احترامى لعمك، طبعا انا مقدره قلقهم عليكى و انهم نفسهم يشوفوكى فرحانه و مستقره ده حال كل الاهالى،و متتجوزيش تانى غير لما تكونى مستعده نفسيا عشان متكرريش غلطتك،و اكيد كل اللى حواليكى هايساندوكى فى قرارك مهما كان،وحتى وان قررتى الزواج وده حقك المشروع، محدش عارف مش يمكن ربنا يعوضك بيه و يصبرك الى ان يرد ليكى ابنك الغالى،بس برضه القرار يرجع ليكى
حبيبتى ان الله مع الصابرين ور بنا ميرضاش بالظلم و ان شاء الله ربنا هايردهولك لكى تقر عينيكى بيه
كونى واثقه من كده و الله سيكون عند حسن ظنك باذن الله

أنا شايف انك متشائمة حبتين اتجاه الرجالة علي فكرة في رجالة كثير ممكن تكون ما بتخلفش تفرح اوي بتربيتها لابنك وفي رجالة ثانية ما بتعرفش تفرق ما بين والدها وولاد غيرها في التربية بالعكس يمكن مع الغير بتكون أكثر حنيه خاصة لما بيكون ابواه مش معاه

انا اعرف امثلة كدة كثير

ادي نفسك فرضة ثانية يمكن يكون فيه اخ ليوسف يكون سند له في الحياة

fatima

السلام عليكم
موش عارفة شنوا نقولك..
اولا الحمد لله على السلامة
ثانيالا موش عبط بالعكس حب و ايثار و تضحية لا تقدر عليها الا الام..
اعتقد رايي من راي الاغلبية
انت معاكي كل الحق انك تستني ابنك اللي ربي يجمعك بيه عن قريب يا رب
و في نفس الوقت خلي الباب مفتوح و اعطي لنفسك فرصة ..
ربي يقدملك اللي فيه الخير و ربي كبير و قادر على كل شيء
ربي معاك ..
تحياتي..

خالى ردى عليكى فى الموضوع ده لما نتقابل

ان شاء الله احاول اجى يوم التبرع بالدم و نقعد سوا شوية لوحدنا

انتى كمان وحشتنى :)

يا حبيبه قلبى ده مش عبط ولا مثاليه زايده
لا طبعا ده تحمل مسئوليه
وانتى صح
بس هما عايزينك تعيشى ومش تحبسى نفسك ولا تضيعى عمرك
وهما برضه صح
ودى وجهات نظر

واللى ربنا كاتبه ليكى هيكون

بس اللى انا عندى يقين بيه
ان يوسف هيرجعلك
لان الله لا يضيع اجر من احسن عملا
وربنا العالم انتى بتعملى ايه علشان ابنك
ومستحيل ربنا هيكسر قلبك
وهيقر عينك بيه ان شاء الله
وحشتينى
وبحبك مووووووووووووووووت

دا ابنك

يعني مثاليه وعبط ملهمش وجود ي القاموس

يعني خالتو لما قالت مش هتجوز تاني عشان نهال رغم ان ابو نهال اتجوز تبقي عبيطه

لما اللي صرخت وهيا بتطلع من جسمها وششالتها تسع شهور ورضعت وكبرت تبقي محتجاها تفضل غيرها عليها

يتسمي مثاليه ازاي
يعني ماما لما تحبني تبقي مثاليه

انتي صح

وان شاء الله يوسف يرجع دا ربنا خلق انسان

وقادر علي كل شي

ادعي ياحبيبتي ربنا

رااااااااااااااجع ان شاء الله

الاستاذة العزيزة ام يوسف
تألمت كثيرا لقراءة هذا الادراج اعرف مشاعرك جيدا تجاة فلذة كبدك فلي اولاد اعشقهم حتي الجنون
اقدر موقفك العقلاني تجاة قضيتك واقدر امومتك وانا من راي ان تتصرفي بعقلك قبل قبلك تجاة ذلك الموضوع ولا استطيع ان افرض عليكي رأيا
ومن تجاربي رأيت نساء كثيرات عشن فقط من من أجل اولادهم
سلامي وتحيتي لكم
عبد الجليل

السلام عليكم

كيف حالك اختنا الطيبة أم يوسف أخلص أم واطيب قلب ..

لست الأولى التي تضحي بنفسها من اجل ولدها ولن تكوني الاخيرة فالامومة هي الامومة منذ ان خلق الله الارض وما عليها .. وسيرجع يوسف ان شاء الله وعندها تستطيعي ان تقرري الزواج ام التفرغ ليوسف وتربيته ..ربنا معاكي ويوفقك لاتخاذ القرار السليم ..

بوست خريطة قلبي اكثر من رائع ..

تحيتي

فاتيما حبيبة قلبي
وحششتيييييييني جدا
كده محدش يسأل عليا يشوفني عايشه ولا موت ولا انا فيني
ماعلينا برضوووو بجبك جدا جدا
المهم
بصراحه كده راي من رأي خيخه
لو جاتلك فرصه كويسه
المثل بيقوول
اللي بيتلسع من الشوربه بنفخ في الزبادي
يعني اكيد هيكووون الاختيار المره ديه سليم
ابنك يا فاتيما ان شاء الله هيكبر وهيتعلم وهيعيش
بس اوعي يا حبيبتي تضيعي سنين عمرك الجميله ديه من ايديك
ابدأي من جديد
وعوضي كل اللي فاااات ومش عيب ابد بالعكس ده حققك
وبوسه كده كبييييييييره لحد ماشوفك ان شائ الله علي الف خير
سلام يا طمطم

ربنا يديم عليكي نعمة العقل وحبك لاابنك ويقرب البعيد ويرجع لحضنك

تعرفي يافاتيما انا اعرف امهات عندهم اولاد وسابوهم ونزلو اشغال بالنهار بطوله ولما ابن من ولادهم يقولهم محتجين ليكم اوي يردو يقولو انتو خلاص كبرتو مش محتاجين ليه في حاجه !!
فعلا كلامك وموقفك تستحقي عليه التقدير وكل الاحترام والله بجد يوسف لما يكبر ويقرا كل كلامك ده هيعرف قد ايه اني امه عمله نادره في الزمن ده حد بيفكر فيه بدون اي مقابل

ربنا يكرمك :)

ربنا يرده لك سالم غانم باذن الله ويرزقك الخير واوعي تنسي الاستغفار والتسبيح

ومن يتق الله يجعل له مخرجا ويرزقه من حيث لا يحتسب

سلامي يا خالتي الرقيقة

الأول
أزيكم و أسفة لتاخرى عليكم فى الرد
ثانياً
كالعادة و بعد كل هذا الوقت
ما زلت أندهش من مدى اختلاف أراءكم و تعليقاتكم
تباينها و جمالها و مدى اخلاصها
و شدتها احياناً لكن المبررة
عدد كبير متفق فى أن القرار دا شخصى بحت بالرغم من ضغط الاهل و اللى لهم كل الحق فى ذلك لكن ليس القرار النهائى بإيديهم هم لأن الحكاية مش سهلة
و عدد لا بأس به
اكد على إن الاحجام عن الزواج فى المطلق عمل غير عقلانى بالمرة
لأن فيه اكتر من سبب منهم ان ربنا لا يقبل ذلك و إن يوسف بكره يكبر و يتغير و إن الوحدة هتكون صعبة فى الكبر لو ربنا إدانى عمر يعنى لا حاجة للإنتظار لو أتت الفرصة
و بالتالى لما ييجى النصيب كل الكلام دا مش هيكون مهم و لا محل له من الاعراب لأن ربنا بيحلها و يحط ترتيب تانى احسن الف مليون مرة من ترتيبات البشر
و هو ما توصلت أليه مؤخرا
إنى لن أنظر لقانون الاحوال الشخصية و لكن للقانون الربانى
اللى أعدل و أكبر من كل الظروف
و من جبروت طليقى
و من أى تغييرات هتطرأ على يوسف و من أى راجل ييجى يلخبط حياتنا او يخليها احسن او من أى خوف من الوحدة
و ضغوط الاهل و نظرة الناس و أى شىء تانى ...
كل دا جنب مشيئة ربنا و لا حاجة
و عشان هذا هرمى حمولى عليه
و ساظل مصرة على تنفيذ إتفاقى مع يوسف بصفته رجلى الاول و الاخير
إن اللى عاوز يتجوزنى
يبقى لازم يتقدمله الاول
و يوسف يقوله
بص يا بنى احنا بنشترى راجل
و هنسال عليك الاول
و بعدين نسأل البنت ...
و لو عجبنا احنا الاتنين نبقى نوافق ...
إبنى اولاً و اخيراً
و لن أندم إن شاء الله
و لن اجعله يدفع تمن إنتظارى لأنه إختيارى الشخصى و المبنى على حرية و تفكير عميق ...
كلمة اخيرة بس للاخ المخلص
الغير معرف نفسه ..
أنا بعتذرلك من غير ما أعرف هويتك
لأنى خذلتك و مكنتش الشخص اللى تتوسمه .. بس كمان عاوزة أقولك
إن الذاتية و حكاياتى مع يوسف
و الجواز و الطلاق
و الحب و الكلام الفاضى ..
كل دول يبقوا مفردات حياتى
و لو مش بتعجبك تفاصيلها
و كنت حاببلى حاجة احسن
يبقى سامحنى لأنى متغيرتش بالشكل الكافى و معملتش بنصايحك
لكن الحقيقة أنا تغيرت
و أزعم إن تغير للاحسن
بس إنت للأسف شايف غير كدا ..
لكن بشكرك على النصيحة
و بعتذر إنى مش هنفذها و أتخلى عن النرجسية و الذاتية لأن التدوين أساسا قائم على تجارب الانسان الشخصية و الحياتية و انا مبعملش حاجة غريبة للدرجة دى ..
جايز احبطتك
و إستفزيتك بجمودى و عنادى
فمعلش حقك عليا ...
أخيرا أنا قافلة التعليقات فى البوست الجديد لأنى حسيت إنى سمعت غنوة جميلة
و كنت عاوزة تسمعوها معايا بس و دون ان تضطروا لترك تعليقات
بحبكم و متحرمشى منكم
يا احلى ناس و صحبة و عالم

ااااااااااااااه
يا قلبى

مهما قلت من كلام مش هعرف اقول حاجة عن اللى شايفاه جواكى واللى لامس قلبى قوى

شايفة خنقتك وزهقك منهم ومن كلامهم وان كأنك بتهاتى ف مالطة ومحدش لا قادر يسمع ولا يفهم ولا يستوعب

بس انا واثقة انك عارفة ومتأكده ان كل واحد بيشوف المصلحة وبيقررها من خلال تجاربه الشخصية ولما مامتك ولا عمك يقرروا ان ده الخير ليكى فده لان هو ده آخر مداهم مع الخير

الناس اللى قالت يوسف هيتغير فانا معتقدشى ابدا انه هيتغير يمكن هيرجع عنده لمحة رجولة جميلة وأساس متين ده متربى عالغالى ومع الغالية

احب بس اقول للناس اللى متعرفشى فاتيما عملت ايه مع يوسف وبتعمل ايه دلوقتى وجواها ايه للمستقبل - انتو متعرفوش الست دى وقوتها - ابعدوا عنها لانكم ستصعقوا من قوتها واصرارها وايمانها بقواها

فاتيما

الاغنية اللى انتى حطاها كانت اول مرة اسمعها واتعلمت منها حاجات كتير يمكن امهات كتير مش بيفكروا ف النعمة اللى فى ايديهم كده وان ربنا مديلهم امانه لازم يراعوها وان ده اهم من اى حاجة ف الدنيا وان فيه كثيرون يشتاقون لكلمة ماما او احساس الامومة

مهما قلت عنك واتكلمت انتى عارفة غلاوتك ومش عارفة اقول حاجة تقويكى لكن انا شايفة شخصية ف منتهى القوة قدامى بسم الله ما شاء الله - شغلى الاستك وريحى عمك وامك بكلمتين واعملى اللى انتى عاوزاه من غير صدامات ولا حورارت - عاملى الناس على قدر عقولهم

فى النهاية اتمنى ان دعواتك ليوسف كلها تصيبه بالخير دوما وانه يبقى ف حضننا كلنا ف اقرب وقت يارب

ويارب يكون سندك وسند اخواته ويقولو ابنك راجل عال العال

ربنا يحميه ويباركلك فيه
هعيط بقى امشى يلا
سلام

هبة

إزيك يا طمطم أخبارك إيه؟
واحشااااااااااااااني جدا يا طمطوم
للأسف يا طمطم مش هأعرف آجي يوم التبرع الجاي
و ده لأني دلوقت بأكلمك من دولة الإمارات العربية الشقيقة
النهارده أول يوم ليا هنا
و أنا لسه واصل إمبارح بالليل
دعوااااااااااااااااااااااااااااااتك يا فاتيما
الواحد في عرض أي حتة فرفوتة دعوة
اشوف وشك بخير يا فاتيما


يلا سلام

أولا أدعو الله أن يجمعك بأبنك و يقر عينك به كما قرت عين أم موسى ، ثانيا أحيك على موقفك من ابنك و أدعو الله أن يقويك و يثبتك ، موضوع الجواز مش بأدينا دة بأيد ربنا وحده ، و الى ربنا كاتبه لنا هو الى ها نشوفه و نعيشه ، لو ربنا وضع فى طريقك من تشعرين معه بالأمان و الطمئنينة فلا ترفضى ، و لا أعتقد أنه سيرفض وجود أبنك فى حياتك ، و ابنك سيعود لحضنك مهما بعدت عنه و بعد الزمان و المسافات ، لكن بقدر الأمكان كونى حريصة على وجود و سيلة أتصال مباشرة به ، أسبوعيا على الأقل لا تبعدى عنه ، و بعدين فى حاجة مهمة جدا انت لم تتزوجى يبقى أزاى تروح الحضانة منك للجدة و أن كانت فالأمك و ليست لأم الأب , دة حقك و نص قانونى ، روحى لمحامى شاطر و يتقى الله و أن شاء الله يرجع أبنك لحضنك من تانى ، و اياك أن تستسلمى او تيأسى و تأكدى أن الله معك و لن يخذلك أبدا ،
مودتى و دعائى لك

ربنا يسامحك خليتي قلبي وجعني عليكي وعلى يوسف بكلمة ابني يا رب اللي انتي كتباها دي.. ربنا فوق الكل وهو سبحانه وتعالى اللي قال : لارزقن من لا حيلة له حتى يتعجب اصحاب الحيل.. مش نصر ربنا برضه رزق؟ ربنا يرزقك ويرجعلك ابنك لحضنك ولا تتفرقوش تاني ابدا .. يا رب

مش هقول لك رأيي لأن أكيــد انت شفتي تعليقات الناس أد إيه متضاربة،زائد إن أكيد خبرتي في الحياةبالنسبة لك وبالنسبة لكتير من المدونين التانيين اللي بتحبيهم تكاد تكون ... لاشيء
:)

فعلا لا أملك أي حاجة غير إني بجد أفتكرك في دعائي

ربنا يقدرلك الخير يا توما. إن شاء الله بجد.. ربنا هينورلك طريقك دايما

ابتسمي يا جميلة :)

السلام عليكم
اختى فاتيما ربنا يريح بالك ويرد ليكى يوسف بالسلامه ويعوض صبرك خير يارب ويرزقك الزوج الصالح اللى يسعدك ويعوضك سنين العذاب والالم لما الناس تتعجب لهناكى

فاتيما
اولا كنت فى اسكندرية ورجعت
والجو هناك يجنن
وافتكري ان قلبى هناك حاولت اشوفك بس منجحتش

المهم
بيـــــــان
ـــــــــــــ
الي الام العبيطة
او اللى مفكرة نفسها كدا
اظن ان فوق فيه 7 سموات
ومن فوقهم رب رحيم حنان منان
احنا يكن نكون بشر ظلامين وقاسيين
بس هو احن
انا ش هاطول عارفة ليه
لانك عارفة اللى هاقوله
بس احب افكرك
لو العتم ع الغيب لاخترتم الواقع

فاتيما اظن ان الاوان لام يوسف انها تبحث وتفتش عن بذرة للسعادة عشان يوسف يرجع لامه يلاقيها بقت زرعة حب وسعادة وخبرة كبيرة جميلة متفرعة الاغصان الخصراء


مبروووك ع الشغل
واقولك على اجة سر بس ماتقوليش لحد
انبسطت لما لقيت قصيدتى ف نهاية البوست
لو تحبي القصيدة كاملة
elshaer_karim@hotmail.com
دا ايميلى ابعيى وانا ابعتهالك

دومتى اماً
كريم بهي

doba
يا حبيبتى يا رافعة معنوياتى يا أم يسوفة العسل و النونة الجاية ف السكة
إفضل كدا قوليلى إنتى قوية قوية لحد ما ابقى المرأة الخارقة بتاعة مصر
أنا بحبك قوى و كان نفسى تيجى يوم الجمعة إنتى و النونة بس عارفة الفرمانات اليحيوية و كمان الدنيا حر عليكى و تجنبى النزول فى الجو دا قدر ما تقدرى يا حبيبتى
الغنوة من شريط هشام عباس الجديد و حطيت اللينك بتاعها تحت البلاير عشان اللى حابب يحملها عنده و لو قولتلك إن ماجد اخويا حطلى الشريط على الديسك توب مع شريط انغام الجديد عشان عارف إنى بموت فيها ...قولت أشغل هشام و أنغام و الخبطهم على بعض فى بلاليست واحد و للحظ العجيب دى كانت اول غنوة تشتغل فى العشرين غنوة و كأن ربنا بيسمعنى حاجة كنت عاوزة أسمعها و كأن يوسف بيطمنى ...
بوسة و حضونات كتييييييييير



nigro
يا أبو قلب دهب ألف حمدلله على سلامتك
الامارات نورت و يا بخت سكانها بيك
هدعيلك يا واد هو أنا أقدر مدعيلكشى
ربنا يفتحها ف وشك و يكتبلك الخير فى كل خطوة بس إنت كمان تخلى بالك من نفسك يا نيجرو و مش هقولك شد حيلك و الكلام دا عشان أنا متاكدة إنك هتشتغل بضمير من غير ما ينطلب منك أنا متهيالى إنك هتفحهم و تثير احقاد الكسالى و المتنطعين هناك و كن مستعدا لذلك بس خليك زى مانت برضو نيجروووووو أبو قلب دهب
خالص الود و التحية ليكى يا اخى الغالى



أم بتول
اهلا بيكى و نورتينى
شكرا على دعواتك الطيبة و قصتى فيها شوية قلق و ملابسات كتير عكس المفروض يمكن لو دعبستى شوية فى المدونة تعرفيها
و الجواز نصيب رغم كل شىء
مرورك أسعدنى يا ام بتول و تعالى دايما




bobo
سلامة قلبك من الوجع يا ام عمر الجميل
دا طلب بطلبه من ربنا يا حبيبتى و هوه لوحده عالم ببقيته و طبعا منتظرة رزقه بقدر ما أمكننى من صبر
سلامى لراعى الملك وليد و حبيبة قلبه و مليكته اللى هى سعادتك



wish i were a butterfly...
و الله يا هبهوبة التضارب دا مطمنى و محسسنى إنى مش شاطحة و متطرفة فى قرارتى برضو و ما تملكينه من دعائك اكبر مما أتمناه يا حبيبتى و ربنا يخليكى ليا و ليوسف لأنك دون قصد بتعمليله حاجة كويسة جدا إن شاء الله تكون بتنفعه و تكون من نصيبه و هى الدعوات
بوسيلى روحك و متسألينيش أزاى يا من غير ما توشى بترفلاية رقيقة صغننة




ليس فقيراً من يحب
أولا أهلا بيكى هنا
و ثانيا اهلا بيكى فى العالم الخيالى كله
ثالثاً عاوزة أسجل إعجابى الشديد بإسمك التخيلى دا لأنه فعلاً ليس من يحب فقير على الإطلاق و إحييكى على إختيارك
رابعاً شكرا على ذوقك و دعواتك الحلوة
خامساً تعالى دايما نورينى



كريم بهى
نصيحتك محل إحترام يا فندم
و قصيدتك كمان و الحقيقة شعرت إنها مناسبة جدا لموضوع البوست فحطيتها
و بكل فخر
إنت كنت ف إسكندرية ؟!! و مشوفتش حبيبتك هناك ..صح و لا انا مفهمتش كويس ؟؟؟
فى كل الاحوال ربنا يهنى قلبك و يسعدك يا شاعر بنها العسل
يا كريم
و بهى

كريم بهى
قبل ما أنسى ...
بخصوص باقى القصيدة
أنا هستنى لما تتنشر فى الديوان
و اجى احضر إن شاء الله حفل خروج الديوان للنور
و ساعتها بقى هخليك تحط توقيعك ليا و ليوسف فى الصفحة اللى فيها القصيدة يا أستاذ ..ماشى ؟

ايوا يا فاتيما
صــــح !!!
انا حاولت اشوف حبيبتى بس معرفتش
او بالمعنى الادق هى مرديتش !!
اظن انى لازم اصحى بقى من الكابوس دا
دي اول مرة اقول كدا على حبها
بس لو تعرفى وتقدري الجروح اللى استوطنت بين جنباتى وفرعت فى طينة ايامى
وبقى الشوك زى الموج بيحدف على شطى هموم الدنيا
ولما اقف ف البلكونة اشوف العربيات
احس كأن الهم والوجع بقى هما العربيات اللى بتجري فى طريق عمري بشكل متعاكس
وبتعمل مخالفات كثييييييييييييييرة اوي بسبب فشل فى نظام القلب الحي
اللى تقريبا واقع فى حب جير حي ( عارفة الجير الحي ) بياكل فى جسم البنى ادم
والحب اللى ملوش جذر قوي ملوس نبته ولا زرعة ومهما رويته بميه احساسى واخلاصى لازم هيموت بالسكتة مع اول ريح جايه من شباك القدر الى ملوش ضرف
وعجبي !!!!

*************
اما عن الديوان
تقريبا خلاص بس عندي شوية مشاكل
خصوصا قصيدة اسمها اغتصاب
لكن ادعيلى يبقى قريب
واكيد يوسف ومامته الجميلة هيكون ليهم اول نسخ واول توقيع
مع انك اخذتى توقيعى من زمان


كريم بهي

فاتيما
شكرا لمرورك اللطيف على مدونتي
مش حاضيف غير انك انت الصح و هما اللي غلط

ليكي وحشه والله يام يوسف

وبعد كلام الناس دي كلها ماعنديش حاجه اقولهالك غير .. ربنا يسعدك

اه صحيح .. انتي مش ام عبيطه
ولو هو ده مقياس الامهات .. يبقى ياريت كل الامهات تبقى زيك

اه صحيح .. انا جايب سيرتك عندي في اخر موضوع
عشان مايجيش حد كده ولا كده يفقع مهموز .. وهم كتير قوي الايام دي
قلت اجي افقع المهموز بنفسي

سلامي لوالدتك وبوسيلي ايدها

بوست مؤثر جدا خاصة الأغنية هي أثرت علي وابني معايا..
أقول لك حاجة لا تيئسي من رحمة الله..
سحابة صيف وتمر

ابنك سيرجع لك حتما

بانتظار ذلك لا تضيعي الوقت قومي بشيء من أجله

مودتي

إن شاء الله هيرجع هيرجع يا فطيمة هيرجع أكيد كل الناس بتدعي يرجع يبقى هيرجع خلي أملك في ربنا كبير إيه المشكلة أنك مش تجوزي تاني عادي موت مش يهمك كلام عمك وربنا معاكي

وفعلاً أنا أكاسفت من أسم مدونتي جداً

إرسال تعليق