.

.

البر التانى  

Posted by: فاتيما in

أصعب حاجة لما تبقى عاوز تقول اللى ف قلبك
و متملكش من رصيد الكلمات ما يكفى لذلك
فرحان قوى
زعلان قوى .
تعباااااااااااااان قوى
نفسك تخرج اللى جواك و ترتاح
و تقول للى بتعزه ... عن مشاعرك الحقيقية و دون أى مواربة
دا بالضبط كان إحساسى النهاردة و أنا بحضر
حفل توقيع الحياة بدون كاتشاب
الواحد مشحون إنسانياً و نفسياً بشكل كبير .. و عميق
خطواتى تسبقها مشاعر فخر و إحساس بالإمتنان للدنيا كلها
لأن حد غالى على قلبى
ناجح و متميز و محبوب لهذه الدرجة .. يتقدم خطوات و بنجاح للأمام
طب الواحد يختصر و يكثف مشاعره فى كلمات إزاى ؟!!!
السؤال على قدر صعوبته
على قدر سهولة الإجابة عليه

و الحل ..غالباً بلاقيه عند المراكبى
نبع الحكمة كما يحلو لى أن أسميه
منذ اوقعتنى الصدفة و الحظ السعيد بدخول مدونته
من اول تدوينة و الواحد مستشعر إنه امام شخص غير عادى
إنسان تجاربه الحياتية ثرية و مليئة بالعقبات
اللى قد تكون كافية لعرقلة اى حد

لكنه بقدرة و حكمة و براعة هندسية
بيحولها لجسور

يعبر بها الازمات و المحن
نادراً لما تجده يشكو .. رغم الحزن المتجلى بين السطور
كل ما اروحله عشان أقرى بوست جديد .. اجد مواقف
و حاجات
احياناً لو تتاملها
تلاقى المفروض إنها تسد نفِس أى بنى آدم عن الحياة
بينما هو و بكل سلاسة الدنيا يعرضها و يحللها
و يخليك تحس ... إن فيه إيه بس ؟
منتا ف إمكانك تتخطاها لوتتروى شوية
و متسبهاش تكسرك

مش هتكلم عن أسلوب المراكبى و لا براعته الادبية لأنى مش متخصصة
قد اكون متذوقة وعلى قدى .. لكن كم السخرية و الواقعية
و الممزوجة بالألم فى سطوره مش مهمة سهلة لأى حد بيكتب
و على رأى العزيز محمد مفيد .. المراكبى القلم بيطاوعه
قدرته على تكثيف اللحظات و المواقف فى بوست قصيرو موجز
بجد شىء مبهر
يبدأ البوست بفكرة بسيطة كفيلة بإثارة شهيتك للتفكير
فيما بعد الحكاية

و غالباً ما تكون تعليقات الناس عنده جزء مكمل خفى فى تدويناته
معرفش إن كان يقصده و لكنى اظنها الموهبة الربانية
فى أن تتوحد معه
و تبقوا سوا ف فكرة واحدة و معضلة واحدة
و إن إختلفت النهايات
ممكن أتكلم عن تأثير الراجل الجميل دا فيا إنسانياً ؟؟
كام مرة اكتب عن حاجات بتقهرنى ... ومن وسط التعليقات يبزغ تعليقه
و دائما و أبداً موجه فى طريق واحد .. الامل
مكنش لازم يقولى ف وشى ..
قومى ..
إتحركى و إعملى حاجة بقى
لكن بيد حنونة يلقى جمل اكثر دفئاً خالية من القسوة
- ممكن نتخطى المحنة و نعمل كذا...
- بكرة هيكون احسن و الأزمات بتعدى ...
بيستخدم عبارات تشجيعية تخلى الواحد حاسس بالرضا
حتى عن عجزه أحياناً
- يوسف بقى إبننا كلنا و منتظرينه معاكى
- المدونة دى حصل فيها تطور كبير .. وبقت عاملة زى دوار العمدة
جمل و عبارات قد يكتبها هو
و مش مركز قوى فى تأثيرها عليا

لكنه ببراعة و قلب صافى يطلقها
لترشق فى روحى و تطبطب على قلبى
النهاردة ... مكنش يوم عادى
وبالنسبالى أنا كمان

لأنى شفت ملاك حارس من ملايكة سمايا
بينجح و يحلق ... خطوة صحيح كنت متوقعاها
و بتمناها و الحمدلله تحققت
لكن الحقيقة كل ما يصدر كتاب لمدون من احبابى و سكان خريطتى
بحس كدا إن حتة ف قلبى نورت
إعتبروها نوع من التماحيك فى نجاح الاحبة .. عبط غريب من نوعه
لكن حقيقى لو كنت بعرف أزغرط .. مكنتش سبت عمارة واحدة
فيكى يا جاردن سيتى و مسمعتهاش صوت فرحتى بالحياة بدون كاتشاب
الحفل كان يشبه صاحبه .
راقى و هادى و رصين و حميم جدا
الباشمهندس حضر مع اسرتة الصغيرة .. الحكومة كما يسميها او المدام يعنى
و التلات عصافير الصغيرين اولاده
مكتبة حنين اللى إستضافت الحدث موقعها مميز و هادىء
و القائمين عليه باذلين مجهود واضح
كالعادة احمد مهنى و احمد سلامة كما نتوسم فيهم
إهتمام و خير إستقبال و براءة اطفال عجيبة
رغم النضج و الموهبة الحقيقية
وصلنا سلام أحمد البوهى الضلع التالت لمثلث صانعى البهجة
ربنا يقصر غربتك يا أحمد
قبل المراكبى ما يوقع النسخ للمريدين
ألقى كلمة قصيرة عن التدوين بشكل عام
و كتابته للقصة القصيرة بشكل خاص
و إندهشت جدا لما عرفت إن طقوس الكتابة عنده
تتمثل فى رحلة عودته من عمله
تصوروا بيكتب ف العربية و هوه راجع بيته
لأنها على حد وصفه الفترة الوحيدة اللى بيستقطعها من اليوم و المشاغل
مكنش فيه اى سلبيات تقريباً ف الحفل
كل شىء منظم و جميل

حتى النقد اللى وجه للكتاب كان بناء و بشكل مهذب
و الحضور كانوا حاجة مختلفة
أنا شخصيا كنت سعيدة لأنى شوفت ناس تمنيت أن أقابلهم ف يوم
و تحققت إمنيتى و بفضل المراكبى ... جه
إيهاب الطائر الحزين و راجى عفو الله .. لم يدهشنى لأنه ف الواقع
يكاد يكون كما تخيلته... حييى و لطيف متكلمأ أو صامتاً
المفاجاة التانية .. حضور احمد شقير حكاوى آخر الليل .. حد كمان مميز
يشبه المراكبى و فيه منه كتير .. بس على اكثرجرأة و حماسة
كمان شوفت هانى جورج و عرفته من اول ثانيتين
إنسان حكاية و زى كتاباته تمام
عبير الأحباب اللى ملا الجو كان متمثلا فى حضور
داليا قوس قزح وش الخير
و آبى هانم بتنجانى و الاستاذ شريف
خالد همس الاحباب و ميرا امراءة بعقل رجل
و احمد يا سكررررررررومروة زهرة الجنة
وفاروق يوميات طالب ومحمد مفيد وأحمد عبدالمنعم
و أسامة عبدالعال و شموسة ربة السيف و القلم
و احمد الصباغ و إيناس لطفى
وشخصية جميلة لم أملك وقت للأسف عشان أرغى معاها اكتر
هيا رشا صاحبة مدونة مكان ف القلب ... بس حقيقى أنا إتشرفت
إتشرفت إنى كل لقاء تدوينى بعرف ناس حلوة
و أشوف ناس كنت بحبها من ورا الشاشة و بس
و إتشرفت إنى كنت النهاردة ف يوم توقيع
الحياة بدون كاتشاب
و متهيألى كان باين عليا
معرفش ليه بيجيلى حالة فرحة هيستيرية عارمة تكاد تصل
لدرجة الذهول لما بشوفكم
آه .. قبل ما انسى ...كان فيه شاعر موهوب
و جميل قوى إسمه

يحيى قدرى
و يا ب أكون كاتبة الإسم صح و يسامحنى لو اخطأت
لكن بجد ... قال تلات قصايد من العيار التقيل
احييه من قلبى و هوه دكتور
و يا جماعة و النبى تشوفولنا حل فى الحكاية دى بقى
الدكاترة و المهندسين
داخلين على مجال الادب و الشعر
و هيقفلوه و يخلوا بتوع الادبى ينشوا
يبدو إن الدراسة العلمية بتخلى الناس تتعبقر
ألف مبروك يا مراكبى
و مبروك عليا إنى أخدت توقيع صاحب السعادة على نسختى
و مع إهداء ليوسف
ويا نبع حكمتى عقبال الكتاب الجاى و الى بعده و اللى بعده
و عقبال الطبعة العشرين من كل عمل مذيل بإسمك
و لما كنت دايما بدخل عندك و أقرى الترويسة و فيها
شد القلوع يا مراكبى مفيش رجوع يا مراكبى
كنت أتضايق قووووى .. و دماغى تتربس و أقول لااااااااااا
دايما فيه فرصة ... و بكرة تبطل غربة و ترجع
و مكنتش فاهمة إن إسمك الإفتراضى دا
و بالنسبالى أنا شخصياً

هيكون على مر الأيام
إسم على مسمى ... عارف ليه ؟؟
لإنك إنتا اخدت بإيدى من بر للتانى
و قصرت عليا تعب الرحلة و المشوار
بالونس و السند المعنوى و الحكمة المستترة

كنت واحد من اللى عدوا بيا من شط اليأس ... لشطوط بكرة
و ما يحمله من امل
عشان كدا هدندن مع روحى و أقول

شد القلوع يا مراكبى

الخوف راح يا مراكبى

شد القلوع يا مراكبى

الحزن ضاع يا مراكبى

يا مراكبى

-------------------------------------------------------
لا تقيدى عقلك بإية حدود أو إتجاهات
جربى ذلك يوماً و ستتفاجئى بإنك ستذكرينى
أعدك بذلك
" أحمد القاضى "


نور ف القلب  

Posted by: فاتيما in


شمعة منورة بنور النعمة
عشان حنين القلب
الحمد لله حااااااااااااااااااامل
-------
شمعة منورة بنور البهجة
عشان دوبا
و سنة جديدة من عمرها الغالى ى ى ى ى

---------

شمعة منورة بنور النجاح
عشان فاروق يوميات طالب
خلاص هيروح الجاااااااااااامعة
---------
شمعة منورة بنور الإنجاز
عشان يا مراكبى
و مبروووووووووك أول كتاب
-----------
شمعة منورة بنور الفخر
عشان شيماء سمير إحتمال
إتخرجت أخيراً و بتفوووووووووق
------
شمعة منورة بنور براءة البدايات
عشان دكتور حر
هيعملها و يتجوووووووووز
------------
شمعة منورة بنور الفرحة
عشان كاميليا
عادت لنا من تاااااااااااانى
-------
شمعة منورة بنور السعادة
عشان ياسمينا فنانة مفروسة جدا
أصلها إتخطبااااااااات
-----
شمعة منورة بنور المحبة الخالصة
عشان عاشقة الرومانسية
دودو حبيبتى
هتحصل فنانة مفروسة فى جمعتهااااااااا
------
شمعة منورة بنور الامل
عشان روح قلب ماما
يوسف




ياااااااااااه
دنتو كنتوا وحشينى قوى
اللى عاوز ينقادله شمعة
و ينور قلبى كمان و كمان ... يقول

حد غيرك  

Posted by: فاتيما in

إنتا أصلك حاسس بيا
ومن غير ما أنطق ربع كلمة حتى ... صح؟!!
بس أنا المرة دى نطقت الكلمتين بصوت عالى و مش بينى و بينك كالعادة
دايما أقولها بقلبى و ساعات كتير بعينيا
بس قليل لما تخرج من بين شفايفى و حد تانى يسمعها
إمبارح مقدرتش أحوشنى أكررها مية مرة و انا راجعة البيت
لكن مكنتش متصورة إنك سامعنى و بتحبنى قوى غير اليومين اللى فاتوا دول
مش عشان الشغل الجديد اللى إستلمته .. رغم إنه نعمة كبيرة منك
بس مش هوه السبب الأساسى .. و مش عارفة ليه كل ما حد يسالنى
أقوله إن دا رزق يوسف و ربنا باعتهوله هوه ... مش أنا
إحساس غريب عبيط بيقولى إنك هترده لحضنى
رغم إن مفيش شواهد تدل على ذلك
بقالى شهرين و زيادة .. كل كام يوم أتصل بيه ف التليفون
و دايما محدش بيرد عليا
و ف أوقات تانية السكة بتتقفل ف وشى و أقول معلش
مسيره يوم هيرد عليا صدفة و إسمع صوته
بقالى شهرين و زيادة بترجى حسه من الدنيا و محاولاتى تذهب هباء
لكنى لا اكل و لا امل
عارفة إنها لعبة شد و جذب و حرب نفسية طويلة الأمد و إتعلمت أتكيف
إمبارح وحشنى قوى زى ما علطول بيوحشنى قلت و أنا راجعة من الشغل اكلمه
لعل و عسى
المرة دى ردت عليا جدته و قالتلى مش موجود و لما يرجع يبقى يكلمك
قلبى غاص فى سابع أرض .. إتكبست ...حزنت .. سكتت
إتمنيت إنهم بس يقولوا قصاده إنى سألت عليه عشان يعرف إنى بفكر فيه علطول
الليل كان طويل .. بس كلمتين فضلوا يرنوا ف ودنى و مبطلوش
سيبك من العبد و خليكى مع الرب
صحيت الجمعة و يوم اجازتى قررت أقضيه فى عمل مسرح عرايس عشانه
عدى الوقت و أنا بقولك الكلمتين اللى بينى و بينك و محدش سامعنا غيرك
حمولى عليك و توكلى .. مفيش غيرك هيقدر يساعدنا ...
أرجوك
متسبيناش لوحدنا فى الدنيا الواسعة دى أنا و هوه
أنا عارفة إنى غلطت كتير ...و سببت مشاكل لناس كتير
و اذيت نفسى و غيرى ساعات بقصد و ساعات تانية ف الأعم الغالب من غير قصد
صحيح بتعلم الصح ببطء بس بحاول مكررش نفس الغلطات تانى
ببص لبكرة بتفاوءل غريب لا يليق بواحدة زيى .. لكن بجاهد يأسى و ضعفى
برفع راسى بكرامة لأنى عارفة إنى من غيرها هنهزم
و هيدوسنى اللى مستقوى عليا
هل من الممكن إنك تدينى فرصة تانية أصلح بيها اللى إنكسر ؟
ممكن تساعدنى عشان اعوضه عن اللى فات و الحاضر باللى جاى من أيامنا
مش عاوزاه يكرهنى و لا يكره الدنيا ... و مش هستحمل اكون السبب
إدينى بس فرصة و مش هضيعها المرة دى
أنا مستعدة النهاردة اكتر من أى يوم فات ف عمرى
المسرح جهز و شكله بقى حلو .. يا ترى هيعجبه؟!!
يا حبيبى .. وحشتنى ضحكة عيونه و فرحته لما كان بيشوف حاجة جديدة
يا عالم .. يمكن بكرة يرجع و يشوفه
هرجع الالوان و المقص مكانهم و اجيب قماشة اعملها ستارة للمسرح
و اجيب كمان مية لحسن عطشانة .. يا ترى بيشرب و لا بيأكل إيه دلوقتى ؟!!
اول حاجة عملتها لما قعدت على مكتبى ف أول يوم شغل
إنى حطيت صورته على الديسك توب
كل يوم أفتح الجهاز و أصبَح عليه و اقول يا ترى هل ترى ؟؟؟
ممكن يحصل إنه ييجى معايا الشغل
و أعرفه على كل الموجودين و أقولهم .. دا إبنى .... معقول ؟!!!
المعقول يبدو مستحيلاً .... ف واقعى الفعلى
لكن لو أنتظره منك إنت ...فمش بعيدة و لا صعبة و أكيد هتحصل ف يوم
لوحك اللى عارف معاده
وعارفة إنك قادر تحققها قبل ما أغمض عينى و أفتحها
تقدر و مليار تقدر
كلمتين إنتا عارفهم و هفضل أقولهم
إبنى يا رب
يا رب
أقوم اجيب إزازة المية و كوباية بقى
تررررررررررررن
طب أرد على التليفون الاول
الله !!!
النمرة دى .... مش هيا .... معقولة ؟
ألو
ماما
أنا يوسف .. ازيك
س : حد غيرك ؟
ج : محدش غيرك يقدر

و إنت فعلاً طيب  

Posted by: فاتيما in

Webfetti.com

كل سنة و إنت طيب يا عمرو
لأنك فعلاً
إنسان جميل و طيب

دوس هنا

يا مزاميزو  

Posted by: فاتيما in ,

المكان 
الأوضة بتاعتى أنا و يوسف
الزمان 
ما بعد صلاة الضهر بشوية
الموقع 
السرير بتاعى و المخدة فوق دماغى
الحدث 
حركات شقاوة و نغبشة معتادة تجرى غالباً 
و بشكل شبه يومى
متخذة مكانها ورا سلسلة ضهرى 
اتلفت ورايا زى كل يووووووم
عشان الاقى القط السيامى بتاعى ميزو 
فأمسكه من زمارة رقبته المسكة المخبرينى 
وابتدى موال كل يوم

الله !!
أى 
إيه اللى بيشكنى دا؟
يا دى النييييييلة
إنتا يا مزغود يا ميزوووووووووووو
يا بعجر هوه كل يوم القصة دى ؟
إسشتنى بس متجريييييش
تعالى هنا ف حضونتى 
متخافش أنا هفهمك غلطك
و أقولك كلمتين ينفعوك
و مش هضربك دنا يا دوب هقطعك ترنشات 


ممكن تقولى جبت البتاعة دى من أنهى فازة ؟
دنتا نهارك مش فايت
مش قولتلك ميت مرة يا ميزو يا مزاميزو
يا حبيبى ملكشى دعوة
بالورد البلاستيك اللى ف أنحاء الشقة
لحسن تيتة اللى هيا امى
اللى هيا الحاجة 
اللى هيا صاحبة البيت
لو شافتك هتبعتر كرامتك وكرامتى وكرامتنا جميعا

أنا عارفة يا بابا إنك بتحب تلعب بيه
و تعضعضه بسنانك
و صدقنى لو عليا  ... مش معيترضة
و عارفة كمان إنك عاوز تصحينى من النوم بشياكة
و عاملى فيها عم الرومانسى
و هذا بحق يا عزيزى يسعدنى
بس الحاجة امى مبتحبش تفضل تمشى تلملم
فى كراكيبك ف كل حتة
و بتشتكى من شعرك اللى مالى السجاجيد


خلى بالك إنها مش طيقاك اساساً 
و لولا جبتك من فلوسى و دخلتك البيت بلطجة وعنوة
و صممت أقعدك و قررت الإستعانة بماجد اخويا
للتمسك بيك
كان زمانك و لمؤاخذة قاعد زى البوبى
فى محل الحيوانات جنب إخواتك
و محدش عبرك و لو قولت يا ناو للصبح



يبقى الصح إنك تلم التعابين بقى 
و متزعلش الحاجة منيك 
عشان يبقالك عيش ف البيت دا
هاه 


لأ متبصليش كدا و تسبلى عينك 
و تهزيلى ديلك و تنام على بطنى
و كماااان تتمطع و الحركات دى كلها 
عشان مش هتاكل معايا
أنا بتكلم جد دلوقتى



و بعدين تعالى هنا .. امتى هتبطل تغتت 
على لوزة و تاكل اكلها ؟
يعنى إنت صحيح ولد وحيد على تلات قططات
كانوا معاك فى القفص
و متعود تفترى عليهم و هما يسكتولك
بس خد بالك إن لوزة نظام تانى دى
لما إشترتها من عند الراجل كانت وحيدة مامتشها
و بنت ناس قوى 
و بالتالى متعرفش فى شغل البلطجة بتاعك دا
فخليك لو سمحت جنتل كات
و مش كل ما هتيجوا تاكلوا أحطك فوق التلاجة 
واشعلقك لحد ما البونية تخلص نصيبها



أصل منظرك مش لطيشف 
قدام المجتمع القططى كله
دنتا شاب وسيم و متربى و متجوز 
و كلها كام شهر و هتبقى أب
لشوية قطاقيط مساخيط قدك
مش حلوة ف حقك و إنت معتقل فوق التلاجة 
و العيال بيبصولك
و كل هذوها عشان فجعنتك



و بعيييييين إنت راجل ذو مهام محددة
إنتا جاى البيت دا 
عشان تتجوز لوزة
و تجيبولنا عيال
عشان لما يوسف يرجع يلاقى قطط صغنونة
يلعب معاها
أيوه يوسف 
اوعى تكون نسيته ؟!!!
دنا كل يوم احكيلك عنه
الكلام طار طبعاًااااااااا
ما إنتا دماغك مش معايا
و تلافيف نافوخك دلوقتى فى صنية الفراخ
اللى بتستوى ف الفرن حاليا و ريحتها وصلالنا



و دماغك كمان مركزة مع ماجد اخويا 
إكمنوكو الرجالة الوحيدين ف البيت يعنى
و بتعملوا روبطية
طب شوفت إنت بتحب ماجد إزاى 
و بتقعد فى أوضته علطول ؟؟!!
لما تشوف يوسف يا بنى دنتا هتتجنن من حبه 
و مش هترضى تفارقه لحظة
اصله ولد جميل و حنين 
و مفيش قطة جبناها إلا و وقعت ف غرامه
فمل الآخر كدا خليييييييييك شييييييييك
عشان تفضل معانا و تلحق تشوفه لما يرجع


قلبى حاسس إن دا هيحصل قريب 
و هتشوف إن كلامى كان كله صح 


إيه الصوت دا ؟
يوه ... دى تيتة بتزعق و متنرفزة !
دى عمالة تجيب ف سيرتك 
و سيرة عيلتك كلها
نهارك ازرق مقلم بفوشيا 
إنتا موقع إيه تانى ف الطرقة ؟!!!
طب إتفضل بقى إستلقى وعدك 
أديك إتقفشت يا حلو



لاااااااا معلطكشى و لا أعرفك 
كل واحد يخلص نفسه
و لا أقولك ...  حراااااام
انا هعمل بأصلى برضو
طب إجرى بسرعة روح عل البلكونة  استخبى 
و لو ماما سألتنى عليك 
هقول مشفتكشى 


استنى 
خد الوردة دى فى بوقك وإنت ماشى
و داريها فى أيى مطرح ونلتقى بعد الفاصل
يلا بااااااااى يا ميزو
يا مزاميزو


أيام الفرح  

Posted by: فاتيما in


يا جمااااااااااعة
ممكن لو سمحتم عاوزاكم فى كلمتين على جنب
تعالوا هنا و سيبوا اللى ف إيدكم ثوانى بقى و يا ريت تفهمونى
إيه حكايتكم يا عيال ؟
زهقتوا و لا إيه ؟
يعنى نجيب ضرفها و كفاية كدا
نبطل نعمل تجمعات تدوينية
و محدش يبقى عاوز يشوف حد
و لا يتعرف على حد و بلاش منها
وكفى الله المدونين شر اللقاء ؟
كدا يا بشر اليوم الخيخى للتبرع بالدم ميجيش فيه
غير هذوها العدد البسيط من المدونين .. بذمتكم ينفع ؟
طبعا أول الحاضرين كانت
بت خيخة و أى كلام حبيبتى
و معاها شريف شيكو شكشوكة
شيماء مشمشة اونلى سبوت
ميرا الاميرا امراءة بعقل رجل
z_diva
داليا قوس قزح وش الخير
إبن حجر عسقلانى عسقول الغالى
إيهاب الشنكوتى العزيز
عمرو العزيز عليا برضو amr...
فاروق يوميات طالب ثانوى بعد ما ربنا فك حبسه من الامتحانات
و .........
لأ بتبصوا على إيه تانى ... خلاويص كدا
فين باقى البشرية إن شاء الله ؟
إيش حال ما كان دا يوم جيمعة يعنى
و المدارس و الجامعات خلصت
و الجو مكنش حر مقارنةً بأيام سابقة
و بقالنا مدة متقابلناش و إتلمينا فى أى مناسبة قريبة
مجيتوش لييييييييييه ؟؟
طبعا الناس اللى بره الكاهرة و بره مصر كلها معاهم عذرهم
إنما اللى جواها م جوش ليه إن شاء الله ؟
أدورلى على حيطة و احط وشى فيها يعنى و أنقمص ؟!!!
مااااااااااااااشى
بالعند فيكم اليوم كان جميل و مثمر
نص الحاضرين تقريباً إتبرع و الحمدلله
روحنا بعد كدا عند تسيباس حسب الإتفاق مع خيخة
و المكان كان لطيف و مكيف و مريح و مش مكلف
الواد شريف حبيبى ى ى ى ى ى ى ى
نور عليا دنيتى النهاردة قوى
قعدنا سوا نلعب و خدت كام حضونة و بوسة يكفونى سنة قدام
الواد دا عسولة و أنا من مدونتى هذوهى
بأتقدم لخطبته رسمياً
لعدة أسباب .. أولها إنه متربى ما شاء الله احسن تربية
و ثانيها إنه حنين قوى و لطيف بكل معنى الكلمة بجد
و كمان حصل منه موقف رجولى النهاردة
خلانى مستمسكة بيه عل الآخر
الكافيه اللى روحناه مبيشتغلوش ساعة صلاة الجمعة
فروحنا الجامع اللى عند النفق ننتظر هناك و نتقى حرارة الجو
قولوا قعدنا ساكتين حلوين هاديين نسمع الخطبة
الخطيب قاعد يتكلم كلام كويس و كلنا مركزين معاه
عادى ..... مفيهاش حاجة
و نلاقيلكم خيخة قايمة من جنبنا و رايحة تقعد على الكرسى اللى قصادنا
عادى ..... يعنى مش مشكلة
ثانية واحدة و راحت قاعدة على الحصيرة المفروشة على الأرض
عادى ...... مخدناش ف بالنا
فيمتو ثانية و راحت ممددة على الأرض و مغمن عليها
متهيألى أنسب نقول .... يا لهوتينييييييييى
طبعاً إتلمينا عليها و حاولنا نتصرف
دى زيفا قعدت تهوى بالجرنال و ميرا خرجت جرى تجيبلها عصير
و أنا قعدت أصحصح فيها
واحدة ست كبرة و طيبة قوى جت تسألنا
مالها يا بنتى
مفيش يا حاجة اصلها كانت بتتبرع بالدم و داخت شوية
ربنا يكرمها يا رب و يديها الصحة
و مالت على نوران و حطت كفها على جبينها
و قرتلها قرآن
ست تانية راحت جابتلنا مية نشربهلها و نرشها على وشها
البت خيخة فاقت ثانيتين و ندهت
فين شريف ..... تعالى جنبى
قولتها متقلقيش شريف معانا اهو
رفعت راسها و شافته قاعد جنبها
إطمنت
و راحت نايمة تانية
يا لهوتينى قومى يا بنتى
الحمدلله قامت خيخة و قعدت
ميرا جابتلها العصير و شربته
و بعدين وقفت خوخة اخيراً
الست الكبيرة مرضيتش تمشى غير لما إطمنت عليها
و غمرتنا بدعوتين حلوين
و خرجنا بخير الحمدلله
الواد شريف كان مثالاً للرجولة و كان واقف متماسك
و بيسمع الكلام
خليك هنا يا شريف
حاضر
متقلقش على ماما هتصحى علطول
طيب
الرجالة بتبان من صغرها يا إخوانا و أنا وقعت فى غرام الواد شيكو
و شوفولى حل فى كصة الحب الوليدة اللى تفجرت شرارتها النهاردة دى
ربنا يحرسه يا نوران و يخليه ليكى و لينا كلنا كمان
القعدة كانت حلوة قوى
ناس كتير إتكلمت و سلمت و رمت التماسى و بشكرهم جدا
اولهم نيجروووو أبو قلب دهب اللى كلمنا من الامارات عشان يطمن علينا
و ربنا يوفقه و ادعوله يا جماعة
دوبا حبيبتى كالعادة لازم تحيطنا بحنانها و لو على البعد
و تبعت سلام يسوفة و النونا
آبى هانم بتنجانى كانت جاية بس تعبانة شوية و سلامتك ألف سلامة يا بيبى
و وحشتينى قوى
خالد همس الاحباب إتزنق ف الشغل و عرفش يفلفص معلش يا خالود
حواء إتكلمت و إنا إتشرفت بيها و منذر كمان سال على الكل و بعت تحياته
المجموعة اللى كانت فى الأوبرا ملحقتش تيجى بس بعتت السلام عبر الموبايل
دى زيفا كانت مفاجاة اللقاء و هيا إنسانة جميلة قوى
و يا ريت تيجى دايما كل ما ظروفها تسمح
شيماء فضفضة قعدت حبة صغنين بس عملت حركة شياكة
و جت تطل علينا و عبرتنا و جريت ع الشغل
ميرا الاميرة مجهدة جداااااا و عاوزة راحة من الشغل و التفكير عشان تقدر
تعود للدنيا بكامل نشاطها و تستمع بيها إن شاء الله
داليا يا وش الخير أنا بحبك قوى قوى
فاروق شاب لطيف و محترم جدا و حاجة تفرح حقيقى
إيهاب الشنكوتى و عسقول و عمرو مينفعش و إنت معاهم متتمناش يكونوا
اخواتك او من بقية عيلتك عشان تفضل متونس بيهم علطول
نوران يا بت خيخة و مش أى كلام ربنا يسعد قلبك قدر ما تسعدين غيرك
و بوسيلى شريف بوسس كتييييييييير
و كالعادة يوم التبرع بالدم كان يوماً من أيامك اللى كلها خير و فرح
الفرح
الذى لا يأتى كثيرا و ينكسف على دمه و يظهر إلا ف وجودكم
يا احلى صحبة و ناس و عالم
حنين
أراك كل يوم ...
آتيا بتلك الحقيبة
تجلس على المقهى ...
يلتف حولك أطفال ...
لا يتجاوز طولهم
ثلاثة أشبار من يدى الصغيرة
ثم ينفضون ..
مهللين ... فرحين
و كأنه إنتصار الحياة على الموت
تخرج بعض المأكولات
و تأكل ..
يتبقى فتات
و ترحل
يأتى عصفور
يأكل و يأكل
و كأنه ينتظرك مثلى !!
... مرت الأيام ...
مات العصفور جوعاً ...
و مات قلبى إشتياقاً ...
شيماء سمير
( أطياف الصمت )