.

.

أيام الفرح  

Posted by: فاتيما in


يا جمااااااااااعة
ممكن لو سمحتم عاوزاكم فى كلمتين على جنب
تعالوا هنا و سيبوا اللى ف إيدكم ثوانى بقى و يا ريت تفهمونى
إيه حكايتكم يا عيال ؟
زهقتوا و لا إيه ؟
يعنى نجيب ضرفها و كفاية كدا
نبطل نعمل تجمعات تدوينية
و محدش يبقى عاوز يشوف حد
و لا يتعرف على حد و بلاش منها
وكفى الله المدونين شر اللقاء ؟
كدا يا بشر اليوم الخيخى للتبرع بالدم ميجيش فيه
غير هذوها العدد البسيط من المدونين .. بذمتكم ينفع ؟
طبعا أول الحاضرين كانت
بت خيخة و أى كلام حبيبتى
و معاها شريف شيكو شكشوكة
شيماء مشمشة اونلى سبوت
ميرا الاميرا امراءة بعقل رجل
z_diva
داليا قوس قزح وش الخير
إبن حجر عسقلانى عسقول الغالى
إيهاب الشنكوتى العزيز
عمرو العزيز عليا برضو amr...
فاروق يوميات طالب ثانوى بعد ما ربنا فك حبسه من الامتحانات
و .........
لأ بتبصوا على إيه تانى ... خلاويص كدا
فين باقى البشرية إن شاء الله ؟
إيش حال ما كان دا يوم جيمعة يعنى
و المدارس و الجامعات خلصت
و الجو مكنش حر مقارنةً بأيام سابقة
و بقالنا مدة متقابلناش و إتلمينا فى أى مناسبة قريبة
مجيتوش لييييييييييه ؟؟
طبعا الناس اللى بره الكاهرة و بره مصر كلها معاهم عذرهم
إنما اللى جواها م جوش ليه إن شاء الله ؟
أدورلى على حيطة و احط وشى فيها يعنى و أنقمص ؟!!!
مااااااااااااااشى
بالعند فيكم اليوم كان جميل و مثمر
نص الحاضرين تقريباً إتبرع و الحمدلله
روحنا بعد كدا عند تسيباس حسب الإتفاق مع خيخة
و المكان كان لطيف و مكيف و مريح و مش مكلف
الواد شريف حبيبى ى ى ى ى ى ى ى
نور عليا دنيتى النهاردة قوى
قعدنا سوا نلعب و خدت كام حضونة و بوسة يكفونى سنة قدام
الواد دا عسولة و أنا من مدونتى هذوهى
بأتقدم لخطبته رسمياً
لعدة أسباب .. أولها إنه متربى ما شاء الله احسن تربية
و ثانيها إنه حنين قوى و لطيف بكل معنى الكلمة بجد
و كمان حصل منه موقف رجولى النهاردة
خلانى مستمسكة بيه عل الآخر
الكافيه اللى روحناه مبيشتغلوش ساعة صلاة الجمعة
فروحنا الجامع اللى عند النفق ننتظر هناك و نتقى حرارة الجو
قولوا قعدنا ساكتين حلوين هاديين نسمع الخطبة
الخطيب قاعد يتكلم كلام كويس و كلنا مركزين معاه
عادى ..... مفيهاش حاجة
و نلاقيلكم خيخة قايمة من جنبنا و رايحة تقعد على الكرسى اللى قصادنا
عادى ..... يعنى مش مشكلة
ثانية واحدة و راحت قاعدة على الحصيرة المفروشة على الأرض
عادى ...... مخدناش ف بالنا
فيمتو ثانية و راحت ممددة على الأرض و مغمن عليها
متهيألى أنسب نقول .... يا لهوتينييييييييى
طبعاً إتلمينا عليها و حاولنا نتصرف
دى زيفا قعدت تهوى بالجرنال و ميرا خرجت جرى تجيبلها عصير
و أنا قعدت أصحصح فيها
واحدة ست كبرة و طيبة قوى جت تسألنا
مالها يا بنتى
مفيش يا حاجة اصلها كانت بتتبرع بالدم و داخت شوية
ربنا يكرمها يا رب و يديها الصحة
و مالت على نوران و حطت كفها على جبينها
و قرتلها قرآن
ست تانية راحت جابتلنا مية نشربهلها و نرشها على وشها
البت خيخة فاقت ثانيتين و ندهت
فين شريف ..... تعالى جنبى
قولتها متقلقيش شريف معانا اهو
رفعت راسها و شافته قاعد جنبها
إطمنت
و راحت نايمة تانية
يا لهوتينى قومى يا بنتى
الحمدلله قامت خيخة و قعدت
ميرا جابتلها العصير و شربته
و بعدين وقفت خوخة اخيراً
الست الكبيرة مرضيتش تمشى غير لما إطمنت عليها
و غمرتنا بدعوتين حلوين
و خرجنا بخير الحمدلله
الواد شريف كان مثالاً للرجولة و كان واقف متماسك
و بيسمع الكلام
خليك هنا يا شريف
حاضر
متقلقش على ماما هتصحى علطول
طيب
الرجالة بتبان من صغرها يا إخوانا و أنا وقعت فى غرام الواد شيكو
و شوفولى حل فى كصة الحب الوليدة اللى تفجرت شرارتها النهاردة دى
ربنا يحرسه يا نوران و يخليه ليكى و لينا كلنا كمان
القعدة كانت حلوة قوى
ناس كتير إتكلمت و سلمت و رمت التماسى و بشكرهم جدا
اولهم نيجروووو أبو قلب دهب اللى كلمنا من الامارات عشان يطمن علينا
و ربنا يوفقه و ادعوله يا جماعة
دوبا حبيبتى كالعادة لازم تحيطنا بحنانها و لو على البعد
و تبعت سلام يسوفة و النونا
آبى هانم بتنجانى كانت جاية بس تعبانة شوية و سلامتك ألف سلامة يا بيبى
و وحشتينى قوى
خالد همس الاحباب إتزنق ف الشغل و عرفش يفلفص معلش يا خالود
حواء إتكلمت و إنا إتشرفت بيها و منذر كمان سال على الكل و بعت تحياته
المجموعة اللى كانت فى الأوبرا ملحقتش تيجى بس بعتت السلام عبر الموبايل
دى زيفا كانت مفاجاة اللقاء و هيا إنسانة جميلة قوى
و يا ريت تيجى دايما كل ما ظروفها تسمح
شيماء فضفضة قعدت حبة صغنين بس عملت حركة شياكة
و جت تطل علينا و عبرتنا و جريت ع الشغل
ميرا الاميرة مجهدة جداااااا و عاوزة راحة من الشغل و التفكير عشان تقدر
تعود للدنيا بكامل نشاطها و تستمع بيها إن شاء الله
داليا يا وش الخير أنا بحبك قوى قوى
فاروق شاب لطيف و محترم جدا و حاجة تفرح حقيقى
إيهاب الشنكوتى و عسقول و عمرو مينفعش و إنت معاهم متتمناش يكونوا
اخواتك او من بقية عيلتك عشان تفضل متونس بيهم علطول
نوران يا بت خيخة و مش أى كلام ربنا يسعد قلبك قدر ما تسعدين غيرك
و بوسيلى شريف بوسس كتييييييييير
و كالعادة يوم التبرع بالدم كان يوماً من أيامك اللى كلها خير و فرح
الفرح
الذى لا يأتى كثيرا و ينكسف على دمه و يظهر إلا ف وجودكم
يا احلى صحبة و ناس و عالم
حنين
أراك كل يوم ...
آتيا بتلك الحقيبة
تجلس على المقهى ...
يلتف حولك أطفال ...
لا يتجاوز طولهم
ثلاثة أشبار من يدى الصغيرة
ثم ينفضون ..
مهللين ... فرحين
و كأنه إنتصار الحياة على الموت
تخرج بعض المأكولات
و تأكل ..
يتبقى فتات
و ترحل
يأتى عصفور
يأكل و يأكل
و كأنه ينتظرك مثلى !!
... مرت الأيام ...
مات العصفور جوعاً ...
و مات قلبى إشتياقاً ...
شيماء سمير
( أطياف الصمت )

This entry was posted on الجمعة, يوليو 03, 2009 and is filed under . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

انا معرفش الحوار ده اصلا
ولو في تجمع قاهري اكيد هاجي عشان علي الاقل اتعرف علي الناس

بس يوم الجمعة حتي كنت مشغول من 11 ل 5 :(:(:(

المرة الجاية ان شاء الله
بس ابقوا قولوا

انا كمان بحبك اوى
دى احلى كلمة ممكن اسمعها قبل ما انام

تصبحى على خير

اولا السلام عليكم

دخلت مدونتك كتير وقريت لكى قبل كده أعتقد فى كتاب المدونين الاول

وبجد حبيتك وحبيت يوسف

بدعيلك من كل قلبى ربنا يرجعه لحضنك بسرعه بسرعه

ربنا يكرمك

نفسى أحضر مره اللقاء الخيخى

وان شاء الله احاول

دعواتك

وان شاء الله هتلاقينى عندك كتير

دمتى قلبا جميلا رقيقا

كان نفسي ابقى معاكم والله ..

لكن ما باليد حيله ..


ربنا يجعله فــ ميزان حسناتكم يارب ..


وربنا يجمعنا على الخير كلنا ان شاء الله فــ الجنه مع سيدنا محمد عليه الصلاة والسلام ..

وان شاء الله ربنا يرجع يوسف لحضنك قريب ان شاااااء الله ..

ربنا يخليكى على كلامك الجميل دة وفعلا كان اليوم رائع وتسيبس احسن من سلطان الجمال-اسمة سلطان الجمال-وكان بجد نفسى كل شهر كدة يبقى فى لقاء

Saba7 elfol ya set elkol :D

walahy bgad ana ely etbasat gedan inny shoftoko we wlahy ha7wel agy 3la ad ma2dar tany 3shan ashofko.. wento taego alx b2a.. we hawdyko elba7r.. yalla inshallah ma7d 7awesh :D

mtgam3en 3ala 5er dayman isa :)

ربنا يجمعكم فى الخير دوما

wa allahi ya tamtam ana eli sa3ida eni shoftokom embareh we kan nefsi begad 3aod ma3akom ketier bas el zorof ba2a , in sha3 allah fe 3rab forsah net3abel we merci ya gamiel 3la klamek el gamil , bas ana kont 3mla hesaby in shiko khatiby , bas maye3'lash 3alik ya 3mr ,bahebek ya tamtam we tnanks ketier 3la zo3ek ma3ayaa

ربنا يديم الود الجميل ده

والعمل الإيجابي للخير

دايماً إن شاء الله

وإن شاء الله المرات الجاية

يكون الحضور أفضل من كده بإذن الله

الف سلامها عليها بت خيخة ليه انتو لم خرجتوا مش روحتوا شربتو عصير اهم شي احد لم يتبرع بالدم يكثر من عصير برتقال عشان مش حصل له شي
ربناي يجعل لكم في ميزان حسناتكم
طبعا انا السودان مش ينفع اجي كنت بتمناه لك كنت في مصر يكون في حاجه بس شهرين كنت قعدت مش حصل له حاجه مره جايه ان شاءالله اكون معاكم

الف سلامها عليها بت خيخة ليه انتو لم خرجتوا مش روحتوا شربتو عصير اهم شي احد لم يتبرع بالدم يكثر من عصير برتقال عشان مش حصل له شي
ربناي يجعل لكم في ميزان حسناتكم
طبعا انا السودان مش ينفع اجي كنت بتمناه لك كنت في مصر يكون في حاجه بس شهرين كنت قعدت مش حصل له حاجه مره جايه ان شاءالله اكون معاكم

وانا من هنا احب اهني وابارك وافرح للخطوبة السعيدة دي وربنا يتمم بخير يارب


كنت عاوز اكون موجود لكن الشغل يتربص لي بالمرصاد


:):):):)

تحياتي يا خالتي الغالية

عااااااااا مليش دعوة أنا غيرانه مووووت حقيقى مش لاقية حد عندنا بالحماس ده أو مش عارفة أوصلهم مليش دعوة نفسى اشارك بأى حاجة يا جماعة أنامن ساعة مخلصت امتحانات وانا فى البيت وزعلانة مش حابه انى أتعاطف بس من بعيد لبعيد عايزة أشارك ده ايه المحافظة اللى تخنق دى شكلى لأنا اللى هبدأ بس لازم الأول ألاقى شغل علشان أشارك على حق ادعى لى يا تيما ان ربنا يهدينى للطريق الصح

حقيقى ربنا يسعدكوا ويبارك لكوا يارب ويجعله فى ميزان حسانتكوا وبصراحة من عندك أحب أقول لبت خيخة انها مش خيخة دى جميلة بجد وربنا يبارك لها يارب ويسعدها

وانت يا تيما ربنا يسعدك يارب ويفرح قلبك يارب

دمتى بكل الخير والسعادة والحب

انا كويسة يا طمطم والحمد لله

وانا امبارح اول مالاقيت نفسى بعرق
و وضعى جالسة تاعبنى
ووضعى متمشية تاعبنى برضه
قلت اقلع نضارتى و انبطح ارضا بكرامتي وبمزاجي
واهوه اسمنا كنا مستورين جوة الجامع

احسن مانبطح ارضا غصب عنى ومش بمزاجى واحنا برة الجامع




المهم
الف شكر ليكى يا فاتيما على حضورك

وعاجبتنى اوي الكدبة البيضا
بتاعة ان خيخة وشريف اول الحاضرين

علشان انا متأكدة انك كنتى اول واحدة تيجي

نيهاهاهاهاهاهاهاهاع

تحياتي ليكى

فاتيما
بجد كنت مبسوطة قوي اني شوفتك ولو ان حالة الكآبة اللي عندي كانت مبوظي مودي شوية قولي شويتين تلاتة

بس انبسطت اني شوفتكم كلكم واليوم كان يجنن ولو مكنتش ماما استدعتني علي وجه السرعه علشان الحق اروح لدكتور الأسنان اللي كنت مأجلاه علشان التبرع كنت قضيت باقي اليوم معاكم وكويس اني صمدت الوقت ده كلة وهو عمال يوجعني ومنكد عليا زيادة

ياريت علي رأي فاروق بيقي فيه كل شهر تبرع علشان اشوفكم يتوحشووووني قوي قوي

فاتيما
مبادرة جميلة جدا اتمنى ان اهدافها تكون اتحققت
مودتي الخالصة

ياه هو كان فيه تجمع وتبرع بالدم طيب مش حد يقول ينفع كده يعني

طبعا كنت عارف بس بستعبط وبصراحة كنت ناوي اجي بس افتكرت قبل الصلاه ب10دقائق او يمكن علشان مكنتش ناوي اتبرع بالدم فعقلي الباطن نساني أصل الواحد بصراحة مكسوف ييجي وميتبرعش بالدم والبنات هيه الي تتبرع ده يبقي الواحد معندهوش دم فعلا فعلشان كده عقلي الباطن نساني

أصلي بصراحة عمري معملتها ومعتقدش اني هعملها غير لو كان فيه موقف حد محتاج دم فعلا قدامي

مرة واحد صاحبي بيلعب كمال اجسام وعامل فورمة حلوة شبه الميكرباص التويوتا راح يتبرع لعمه علشان كان بيعمل قلب مفتوح المهم خلوه يتبرع بقلب جامد مهما شايفين واحد يفصل اربع رجالة
وهو يادوب في الأخر هوب قامت الدنيا لفت بيه ومحسش بحاجة غير بناس كتير بتفوقه وبيأكلوه شوكلاته وعصير وقعد بتاع ساعة لحد مافاق وروحوه بعربيه وقعد بعديها شهر كل ما يروح الجيم يلعب يدوخ في اول 10 دقائق وميقدرش يكمل لعب

صاحبي ده رياضي وحصله كده امال انا هيجرالي ايه لو اتبرعت بالدم

علي العموم ربنا يجعله في صحيفة حسناتكم ويقدركوا علي فعل الخير دائما

جزاكم الله خبرا
وجعله فى ميزان حسناتكم
معلش بقى حظى كده
زرت المريض وطلعت على الشغل
مع النية كانت موجودة
بس ان شاء الله نلتقى قريبا على خير
تحياتى

ربنا يجعل كل ايامك سعاده وفرح
والف سلامه على خيخه

واضح فعلا انه كان يوم جميل
اتمنى تبقى كل ايامكم جميلة
كنت اتمنى اكون معاكم بس ان شاء الله فى ايام جاية كثيرة يكون اللقاء
وكمان خفت على الناس اللى هتبرعلهم بدمي من العصبية بتاعتي وجنوني ودا بقي

تحياتى
كريم بهي

ربنا يبارك فيكو يا اجمل خلق الله

ويجمعكوا دايما ع الخير ياااارب

مووواه

ربنا يجعل في ميزان حسناتكم
سلامتهابت خيخة ليه انتو او ل ماخرجتوا شربتوا العصير اهام شي احد بعد التبرع دم يشرب العصير برتقال كثير عشان يعوض

طيب ما اليوم كان جميل أهوه
أمال خيخة متضايقة من الناس في الجامع ليه ؟
شريف طبعاً واضح من صوره عند خيخة إنه واد عسل

بكره يبقى هو ويوسف إصحاب زيك إنتي و خيخة كده

و كلمة في ودن جعلوني مريض نفسياً

ما توهمش نفسك بالخوف من التبرع بالدم
إذا كان البنات بتتبرع يبقى إنت مش حتعرف تتبرع

ثم أنا يا سيدي لا رياضي و لا بتاع و عادي جداً
و مع كده إتبرعت بالدم كتير جداً مرات مش فاكر عددها

فشد حيلك كده و بلاش حجج
:)

أنا من اللي كانوا بيفكروا جديا ييجوا، بس بصراحة كان يوم زحمة جدا جدا من أوله لآخر لحظة فيه الحمدلله

مش كنت هتبرع للأسف :$ بس كنت حابة أقابلكوا أوي

الحمـدلله إنك اتبسطتي يا تمتومة في اليوم دة. دة أهم حاجة يا جميلة :)

يارب دايما كلنا متجمعين على الخير

ربنا يعينكم على فعل الخير

مش من القاهرة لكن قلوبنا معاكم وبنتمنى نكون معاكم

تحياتى

كان يوم جميل أوي أوي أوي و الله :)
ان شاء الله المرات اللي جاية يمون العدد أكتر و القعدة تبقى أجمل و أجمل
الولد شريف لذيذ موووت و يتاكل أكل بصراحة .. :) ربنا يبارك فية و في خطيبتة :)

انتى كمان وحشتينى وعلى راى خيخه ناس معندهاش دم بس اكمل لها واقولها عندها يورك اسيد
الجبايه لسه موصلتش داليا مأنتخه عليها فى اقرب فرصه هعمل تجمع حريمى بس اخف بجد رجلى مش عارفه ادوس عليها كويس ادعيلى

فاتيما
ادخلى ع اللينك دا حالا

مقالى
الايدي الخفـــة
على موقع شباب مصر
http://www.egyfanz.com/beta2/do-1355.html

هستنى رأيك

كريم بهي

جزاكم الله خير بجد وكان نفسي اقدر اجي بس لاسف ماقدرش وربنا يجازيكم خير يارب

وحشتيني يا فاتيما

كان نفسي اكون موجوده بس ظروف اقوي مني تتعوض ان شاء الله قريب

سلامي ليكي حبيبتي
رودي

تصدقى وحشتينى وربنا

وكان نفسى اكون معاكم

بس مش هتبرع

لا دا يونقل اليا يا حببتى

الصحه مبقتش زى زمان

يلا حصل خير

ديما متجمعين على خير وفى الخير يارب

واشوفك انا فى خير ديما

ADEL
ليه بس يا عادل ما خوخة قايلة عليه و آبى كمان و كنت حاطة عندى لينك على جنب من ييجى أسبوع و لا حاجة
و مع ذلك هنقول تانى و تالت و عاشر إن شاء الله و هتيجى لازم و ملكشى حجة الامتحانات خلصت خلاص
ربنا يسمعنا عنك كل خير و تنجح بتفوق يا عزيزى



قوس قزح
تصبحى و تمسى على كل الحب يا وش الخير



عاشقة الأقصى
و عليكم السلام يا عزيزتى
إنتى منورة المدونة دايما و شكرا ليكى على دعواتك الحلوة و شكراً اكتر على مشاعرك ناحية يوسف لا تتخيلى بتسعدنى أزاى و منتظراكى دايما




شقاوة مراهقة
يا شقاوة المرة الجاية إن شاء الله تكونى معانا و ميرسى على ذوقك و مرورك الطيب و دعواتك و ربنا يسمع منك




طالب ثانوى
يا فاروق أنا قولت اللى شايفاه و حساه إنت شخص جميل و حاجة تفرح و يا ريت كل الشباب اللى ف سنك زيك
إن شاء الله تتوالى اللقاءات قريباً




Z-DIVA
صباح الفل و الورد و الياسمين عليكى يا ديفا
و إعملى حسابك إنتى معانا علطول لأننا المرة دى ملحقناش نشبع منك و إن شاء الله نجيلك إسكنكرية يا ستى زى ما بتقوليها إحنا لينا هناك احباب ياما
و اديهم زادو حبيبة بيكى
بوسة و حضونة على رأى يوسف




الطائر الحزين
و يجمكنا بيك إن شاء الله مرة يا طائرى الحزين و نشوفك بالعين زى ما شوفناك بقلوبنا




ONLY SPOT
يا مشمشتى عارفة و الله و أنا سعيدة إنك عبرتينا و جيتى على نفسك و شوفناكى و النوبة الجاية هتقعدى اكتر و لحد المرواح إن شاء الله
بالنوسبة بقى لموضوع شيكو فانا مش انانية انانية أنانيييييية
انا ممكن انصص فيه معاكى و نعتبره بتاعنا كلنا بس بشرط محدش ياخده فى الآخر يعنى مش اتنازل أنا و سيادتك تاكلى العسل دا كله لوحدك ..ماشى ؟
بوسة و حضونات يا حبيبتى



عارفة .. مش عارف ليه !!!
الله يكرمك يا وليد و نفسى مرة تقدر تيجى يا غالى




طيف السودان
يا طيوفة ما إحنا شربنا عصير بعد التبرع علطول
بس الجو أصله كان حر فظييييع
و البت خيخة لو شوفتيها و إن شاء الله يحصل ..هتلاقيها سوفيفة يعنى رفيعة و مفيهاش خالص بس الحمدلله ربنا سلم و بقت كويسة
تنورينا بمجييك بإذن الله المرة الجاية




صاحب المضيفة
لا شغل و لا بتاع
يا عم اللى إتجوز خلاص مش هيعبرنا بقى
و ييجى عشان يشوفنا و الحاجات دى
بص إنت لولا آية و غلاوتها و غلاوة الواد أنس جوزها عندى أنا كنت زعلت منك يا صاحب المضيفة لأنك مجيتش
بس عشان خاطرهم مش هفتح بوقى
تحياتك وصلت يا اخى الصغير والغالى جداااا على قلب خالتك




( JOUDY)
يا حبيبتى إن شاء الله هتلاقى شغل
و إن شاء الله هتلاقى إستجابة لى دعوة فى محافظتك
و إن شاء الله هتحضرى معانا لقاء تدوينى و نشوفك و تشوفينا
كلامك عن خيخة كلها صح
بوسة و حضونة يا جودى يا حبيبتى




بت خيخة و أى كلام
يا خوخة أنا كمان مكنتش اول الحاضرين
دا فاروق و عمرو يا نونو بس لازم اكتب إسمك ف الاول لنك صاحبة الفرح ينفع متكونيش اول واحدة إزاى ؟؟
شيكو حبيبى وحشنى من ساعتها و فرحانة إنه خد عليا و توطت العلاقة فيما بيننا و ربنا يخليهولك يا نوران
حقيقى لكى أن تفخرى بيه و ربنا يحرسه من كل شر يا رب
بوسس ليه و حضونات ليكى

وومن
كآبة إيه يا بنتى دنتى زى الفل
و بعدين إحنا بنتجمع عشان ناخد بحس بعض و نتكلم و نتونس ببعض و اللمة كانت صحيح عددها قليل بس كانت حلوة
المهم طمنينى صفين اللولى عاملين إيه معاكى ؟!!
و خلى بالم من نفسك و من صحتك يا حبيبتى



ASSAFO ANAROZE
المبادرة و الفكرة و المشجع على الخير
كل دول سببهم خيخة الجميلة يا أسافو
و بالنيابة عنها بشكرك بزاف على تشجيعك



جعلونى مريضا نفسياً
كل مرة تفلفض مننا يا هشام و متجيش
يا سيدى تعالى و متتبرعشى خالص لو بتقلق من الحكاية دى
تعالى ساند اخواتك المغمن عليهم دول طيب ...بس على فكرة متركزشى قوى فى الحالات التانية كل واحد مختلف عن التانى زى مهندس مصرى ما بيقول و التبرع مفيد جدا للصحة ما دام الشخص قادر على ذلك
و كنا عاوزين نشوفك بس مش اكتر




همس الاحباب
سلامك وصل يا خالد و عذرك معاك يا ابو همس و بعدين يا عم اللى إتبرع إتبرع من بدرى و اللهم لا حسد
دا مجرد قر


عاشقة الرومانسية
و أيامك يا عروسة البحور إنتى كمان يكون كلها فرح و سعادة يا حبيبتى





كريم بهى
المرة الجاية يا كريم و بنها مش بعيدة يا فندم بس إنتا إتشجع و تعالى نورنا مرة و متقلقشى من حكاية العصبية دى خالص و هروح اشوف اللينك إن شاء الله


MONY EL-SHREEF
و يبارك فيكى يا حبيية قلبى
عقبال ما ترجعى مصر و تيجى معانا
إن شاء الله




مهندس مصرى
أزيك يا محمد و مفتقديناك فى الخروجات دى على فكرة
خوخة متضايقة من موقف حصل كدا و طالما هيا محبتش تحكيه يبقى خلاص و بعدين ربنا برضو عشان بيحبها بعتلنا الست اللى قرتلها قرآن و الست اللى جبتلها كوباية المية يعنى المسألة توازنت بس إنتا عارفة خوخة عندها عين نافذة و بتحب تركز على سلبيات الناس عشان تلفت نظر الجميع ناحية الشىء الإيجابى و هيا حبت تقول إن من حسن إسلام المرء إنه ميحشرش نفسه فى اللى ميخصوش و دا حصل للأسف ف الجامع
كلامك الموجه لهشام جعلونى مريضا نفسياً أنا موفقاك عليه جدا و إن شاء الله يتشجع المرة الجاية و تبقى البركة فى ربنا و فيك
خلى بالك من نفسك يا اجدع مهندس مصرى فى مصر و السعودية



WISH I WERE A BUTTERFLY...
طب ليه يا هبهوبة مجتييييش؟؟؟؟؟
مش لازم تيجى تتبرعى تعالى يا بنتى أقعدى معانا دا القعدة كانت حلوة جداااا و طبعا غنبسطت بس هنبسط اكتر لما تيجى تشرفينا المرة الجاية ..ماشى ؟
طييييييييب
و هعتبره إتفاق ضمنى من دلوقتى
يا من غير ما توشى بترفلاية رقيقة
صغننة




بنجاواتى
قلبك فيه الخير يا بنجاواتى
و ربنا يكرمك إن شاء الله



AMR...
وش مكثوووووف و باصص ف الأرض
الله يبارك فى حضرتك و عقبالك يا رب لما تلاقى حد عسولة زى شريف بس على بنوتة و كبيرة شويتين تلاتة أربعة خمسة
أشوفك دايما على خير
و كل سنة و إنت طيب يا أستاذ



APPY
سلامتك يا قمر التدوين كله
كان نفسى اشوفك و لما لقيت داليا هتروحلك و خيخة باعتة حاجات قولت مبدهاش لازم مقطعش العادة دى حتى لو مش هتكونى موجودة بس كانك معانا
نفسى المرة الجاية متعطلكيش حاجة بقى
و الف سلامة يا حبيبتى
و حاولى تخففى من الحوادق قدر الامكان
و إن شاء الله تبقى زى الفل زى مانتى علطول




حاسوباتية
المرة الجاية تعالى يا حسوبة لو سمحتى
و ربنا يكرمك يا حبيبتى إنتى كمان




بنوتة مصرية
يا روووووووووودى
يا ام نور القمر إنتى فيييييين بس ؟؟
بذمتك ينفه الكلام دا ؟
وحشتينا يا بنتى قوى قوى
المرة الجاية تبرع مش تبرع
لقاء حريمى مش حريمى
هتيجى و مفيهاش فصال
بوسة و حضونة يا سيدة الكلمات




همس
و إنتى كمان يا هموسة وحشتينى
يا ستى تعالى و لا تتبرعى و لا حاجة
تعالى نشووووووووفك بس
و يا رب صحتك تبقى زى الفل دايما يا حبيبتى

طلباتك اوامر يا ماما فاتيما

وحشتيني والله وبوسة مني ومن نور ليكي

امووووووووه

أزال المؤلف هذا التعليق.

كده يا
أحن قلب تسيبيني عند أول محطة و تركبي قطر شيكو.

على أي حال أنا مش عاوز غير إنك تكوني سعيدة.

إرسال تعليق