.

.

يا مزاميزو  

Posted by: فاتيما in ,

المكان 
الأوضة بتاعتى أنا و يوسف
الزمان 
ما بعد صلاة الضهر بشوية
الموقع 
السرير بتاعى و المخدة فوق دماغى
الحدث 
حركات شقاوة و نغبشة معتادة تجرى غالباً 
و بشكل شبه يومى
متخذة مكانها ورا سلسلة ضهرى 
اتلفت ورايا زى كل يووووووم
عشان الاقى القط السيامى بتاعى ميزو 
فأمسكه من زمارة رقبته المسكة المخبرينى 
وابتدى موال كل يوم

الله !!
أى 
إيه اللى بيشكنى دا؟
يا دى النييييييلة
إنتا يا مزغود يا ميزوووووووووووو
يا بعجر هوه كل يوم القصة دى ؟
إسشتنى بس متجريييييش
تعالى هنا ف حضونتى 
متخافش أنا هفهمك غلطك
و أقولك كلمتين ينفعوك
و مش هضربك دنا يا دوب هقطعك ترنشات 


ممكن تقولى جبت البتاعة دى من أنهى فازة ؟
دنتا نهارك مش فايت
مش قولتلك ميت مرة يا ميزو يا مزاميزو
يا حبيبى ملكشى دعوة
بالورد البلاستيك اللى ف أنحاء الشقة
لحسن تيتة اللى هيا امى
اللى هيا الحاجة 
اللى هيا صاحبة البيت
لو شافتك هتبعتر كرامتك وكرامتى وكرامتنا جميعا

أنا عارفة يا بابا إنك بتحب تلعب بيه
و تعضعضه بسنانك
و صدقنى لو عليا  ... مش معيترضة
و عارفة كمان إنك عاوز تصحينى من النوم بشياكة
و عاملى فيها عم الرومانسى
و هذا بحق يا عزيزى يسعدنى
بس الحاجة امى مبتحبش تفضل تمشى تلملم
فى كراكيبك ف كل حتة
و بتشتكى من شعرك اللى مالى السجاجيد


خلى بالك إنها مش طيقاك اساساً 
و لولا جبتك من فلوسى و دخلتك البيت بلطجة وعنوة
و صممت أقعدك و قررت الإستعانة بماجد اخويا
للتمسك بيك
كان زمانك و لمؤاخذة قاعد زى البوبى
فى محل الحيوانات جنب إخواتك
و محدش عبرك و لو قولت يا ناو للصبح



يبقى الصح إنك تلم التعابين بقى 
و متزعلش الحاجة منيك 
عشان يبقالك عيش ف البيت دا
هاه 


لأ متبصليش كدا و تسبلى عينك 
و تهزيلى ديلك و تنام على بطنى
و كماااان تتمطع و الحركات دى كلها 
عشان مش هتاكل معايا
أنا بتكلم جد دلوقتى



و بعدين تعالى هنا .. امتى هتبطل تغتت 
على لوزة و تاكل اكلها ؟
يعنى إنت صحيح ولد وحيد على تلات قططات
كانوا معاك فى القفص
و متعود تفترى عليهم و هما يسكتولك
بس خد بالك إن لوزة نظام تانى دى
لما إشترتها من عند الراجل كانت وحيدة مامتشها
و بنت ناس قوى 
و بالتالى متعرفش فى شغل البلطجة بتاعك دا
فخليك لو سمحت جنتل كات
و مش كل ما هتيجوا تاكلوا أحطك فوق التلاجة 
واشعلقك لحد ما البونية تخلص نصيبها



أصل منظرك مش لطيشف 
قدام المجتمع القططى كله
دنتا شاب وسيم و متربى و متجوز 
و كلها كام شهر و هتبقى أب
لشوية قطاقيط مساخيط قدك
مش حلوة ف حقك و إنت معتقل فوق التلاجة 
و العيال بيبصولك
و كل هذوها عشان فجعنتك



و بعيييييين إنت راجل ذو مهام محددة
إنتا جاى البيت دا 
عشان تتجوز لوزة
و تجيبولنا عيال
عشان لما يوسف يرجع يلاقى قطط صغنونة
يلعب معاها
أيوه يوسف 
اوعى تكون نسيته ؟!!!
دنا كل يوم احكيلك عنه
الكلام طار طبعاًااااااااا
ما إنتا دماغك مش معايا
و تلافيف نافوخك دلوقتى فى صنية الفراخ
اللى بتستوى ف الفرن حاليا و ريحتها وصلالنا



و دماغك كمان مركزة مع ماجد اخويا 
إكمنوكو الرجالة الوحيدين ف البيت يعنى
و بتعملوا روبطية
طب شوفت إنت بتحب ماجد إزاى 
و بتقعد فى أوضته علطول ؟؟!!
لما تشوف يوسف يا بنى دنتا هتتجنن من حبه 
و مش هترضى تفارقه لحظة
اصله ولد جميل و حنين 
و مفيش قطة جبناها إلا و وقعت ف غرامه
فمل الآخر كدا خليييييييييك شييييييييك
عشان تفضل معانا و تلحق تشوفه لما يرجع


قلبى حاسس إن دا هيحصل قريب 
و هتشوف إن كلامى كان كله صح 


إيه الصوت دا ؟
يوه ... دى تيتة بتزعق و متنرفزة !
دى عمالة تجيب ف سيرتك 
و سيرة عيلتك كلها
نهارك ازرق مقلم بفوشيا 
إنتا موقع إيه تانى ف الطرقة ؟!!!
طب إتفضل بقى إستلقى وعدك 
أديك إتقفشت يا حلو



لاااااااا معلطكشى و لا أعرفك 
كل واحد يخلص نفسه
و لا أقولك ...  حراااااام
انا هعمل بأصلى برضو
طب إجرى بسرعة روح عل البلكونة  استخبى 
و لو ماما سألتنى عليك 
هقول مشفتكشى 


استنى 
خد الوردة دى فى بوقك وإنت ماشى
و داريها فى أيى مطرح ونلتقى بعد الفاصل
يلا بااااااااى يا ميزو
يا مزاميزو


This entry was posted on الاثنين, يوليو 06, 2009 and is filed under , . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

السلام عليكم ازيك ياام يوسف وازى اخبارك اتمنى تعتبرينى اختك ونتواصل اما بالنسبه لمزاميزو فخفى عليه شويه حرام كده هيلاقيها منك ولا من لوزة ههههههههههه

ماهو من حقه ياطمطم
اللى يلاقى دلع ومش يدلع ربنا يحاسبه
بقولك ايه
اتبنينى بدل ميزو
وموافقه اقعد على التلاجه واتحبس كمان فى البلكونه
بس انام فى حضنك
ههههههههههههههههه
اشمعنى ميزو يعنى؟
يابختك ياسى ميزود
(:


والله انتى سكر ياطمطم حتى مع الحيوانات حنينه وطيبه وجدعه
بحبك ياام يوسف

تحياتى
قبولاتى
اشواقى
وشيكولاتاتى كمااااااااان
اموووووووووووووه

واضح ان ميزو دا شخصية محورية جبارة
هو عبقري
وكمان شقي
وواضح ان اعدائه كثبر ومحبيه اكثر
انا من رأيي المتواضع
نعملة جروب ع الفيس بوك
وننشر اخباره وصوره واحداثه اليومية
وانتصاراته ومعاركه فى البيت

وانا من هذا الموضع على الكرسى
بعطيه نيشان الدلع من احن ام ف الدنيا

اما عن لوزة
واضح ان جوزها شديد ربنا يقدره



ههههه
كريم

هههههههههههههه عسل قوي الحوار الجامد ده كان نفسي يكون مزاميزو بيكلم شكله لمض موت بس عسول وان شاء الله يوسف يشوفه ويعاكسوا في بعض

فتيما أنا جايا أسلم عليكى وأقولك أخبارك ايه ويارب تكونى بخير ويطمنك على يوسف يارب ويفرح قلبك


دمتى بكل الخير

هو ميزو دا قريب لولو قطتي ...؟
دي محرمانا يا بنتي نحط فازة ولا حاجات مندي لا يونكن بتاتا البتة
لولو أفندي كل يوم الصبح تحكم على ماما انها تحط الكرسي اللي كانت جايباه للعمرة على السريير عشان لولو هانم ست القطط تقدر تقف عليه تشوف العصافير من الشباك ...وبما أن الشباك ليه سلك فاحنا مطمنين لعدم تهورها
اصلها متهورة جدا جدا
وبما انها مش حتعرف تصاد العصافير فكل يوم تقف على ايدها عى ضهر الكرسي زي العيال الصغيرة
وتبصل للعصافير وبعدين تنزل تجرى تاكل من طبقها ...وتخيل لنفسها انها بتاكل العصافير
طبعا لولو قطتي شنباتي وفروتي
لازم الصبح سنفونية زي ميزوو كده
بس مع الفارق انها رومي
فمش بتحب حد يشيلها
هي تيجي تتمحك فينا بهدوء
والصبح تنام في حضني وطبعا لازم بعد ما تاكل سمك تخلينا نايمين انا ومنولة اختي وتيجي تبوسنا وتدخل شنباتها في بقنا
شفتي الهنا ؟
ويا ويحك لو جبنا عيش فينو تفضل واقفة لماما
بت عارفة حقوقها كويس
يعني من الاخر احمدي ربنا على ميزووو اهو برضه بيسيبلك حته تنامي فيها
اما لولو ....
فبراحتها خالص
ولو حد فكر يقومها تزقه باديها وناو ناو
اما المغرب دا وقت اللعب حضرتك فمالهاش دعوة انك جاية تعبانة من الشغل
لازم تلعبيها وتستخبيلها
علشان تنط على الحيطة وتقولك
باغووو

وصباحها كل يوم شقلبة اول ما اقوم لازم تتقلب على ضهرها وتقولي نونو بسهوكة
ولازم طبعا اطبطب عليها وامحكها واقولها صباحو كريمة لباني وبندق ولوز وسوداني
يا بسكوتي

فصباحك كريمة لباني يا فاتيما
وبندق ولوز وسوداني
وسمكة كبيرة لميزووو
وحضن اكبر ليوسف

صباح جميل يا فاتيما
هههههههههه
ايه الحوار الجميل ده مع مزاميزو
بس بيبان في مزاميزو انو قط عفريت اوي
*******
ربنا ينول لك اللي في قلبك و يرجع يوسف لاحن حضن حضنك يا فاتيما
مودتي

السلام عليكم ورحمة الله وبركاته

ازيك يا طمطم
يارب تكوني بخير

انا مش باحب القطط

باقلق منهم

وبعدين انت قلبك جامد اوي بتصحي كده تلاقي القط جمبك علي السرير وعادي خالص مش بتتخضي ولا اي حاجه

دا انا كان جرالي حاجه من الخضه ههههههههه


سلام ياقمر

yaaah, ana b7b elotat bas ommy la tsma7 bahza elhora2 :'(

bas inty gaybah syamy, fa la tloumyn ella zatik, elsyamy de ottat motashareda, we sha2ya gedan, ana law agyb agebha sherazy, 3shan brotta zayey keda :D, mtet3bnesh m3aha :D

هههههههههه ده ضحك على الافتتاحيه بتاعتك انتى وميزو كل يوم

يا رب على جمالك
ربنا يسعدك بجد ويعوضك حير

انتى وحشششششششششششششششانى قوى قوى قوى
وانا عارفه انا وحشه لا بسال ولاا ميل ولاا اى حاجه خالص

اعذرينى يا طمطم بجد الدنيا دوامه

ربنا يطمنى عليكى دايما يا حبيبتى

بقلك لو نزلت القاهره ينفع اشوفك من غير اجتماع مدونيين لو مفيش اجتماعات يعنى

انا بحب القطط والكلاب
بس ممنوع عليه اربيهم
كل ما اقول لجوزى اجيب كلب صغنن واربيه يقولى هاتى نونو نربيه احسن
هههههههههههههههههههههههههه

مرة وانا راجعه من شغلى لقيت كلب نونو خااالص اشتريت كارتونه واخدته معايا وجوزى شافه وزى ما يكون شاف عفريت
هههههههههههههههههههه
وحلف ميت يمين يا هو يا الكلب فى البيت وبما انى مش هصرف على البيت ولا الكلب هيصرف عليه يبقى كلمت جوزى تمشى
هههههههههههههههههههههههه

حبيبتى بكرة يوسف يرجع بالف سلامه وينور عليكى دنيتك كلها
بحبببببببببببببك موت
ووحشتينى اوى
بووووووووسه كبيرة وحضونات لحد عندك

ايه حوار داه من الصباح عدنا واجده في البيت بس مجنينا انا عايزه طالعه لان تعبت جدا منها ربنا يرجعليك يوسف ياسلامه

السلام عليكم

كيف حالك اختنا فاتيما ..

من الرحمة والشفقة التي وضعها الله تعالى في قلوب عباده حب الحيوانات وكل ذات كبد لنا فيها صدقة .. وعلمنا رسولنا الكريم صلى الله عليه وسلم ان رجل دخل الجنة في كلب ودخلت امرأة النار في هرة .. الأول اشفق على الكلب وسقاه من عطش .. والثانية حبست الهرة ولم تطعمها او تتركها حرة .. ( عن أبي هريرة رضي الله عنه : أن رسول الله صلى الله عليه وسلم قال بينا رجل يمشي فاشتد عليه العطش فنزل بئرا فشرب منها ثم خرج فإذا هو بكلب يلهث يأكل الثرى من العطش فقال لقد بلغ هذا مثل الذي بلغ بي فملأ خفه ثم أمسكه بفيه ثم رقي فسقى الكلب فشكر الله له فغفر له قالوا يا رسول الله وإن لنا في البهائم أجرا قال في كل كبد رطبة أجر
)البخاري ..

اقر الله عينك بيوسف ..

أيوا صح طبعا كلامك كله صح
محدش يقدر يقول نو .. قصدي لأ
إن شاء الله ميزو ولوزة هيلعبوا مع يوسف هم وقطاقيطهم وقطاقيط قطاقيطهم كمان
حلوين أسمائهم أوي
صاحبتي كان عندها سرسأ ومستكة
بس كان لونهم أبيض خالص وكانوا بيقعدوا يحضروا معانا حصة التجويد

على فكرة يا أم يوسف أنا عايزة أعرف المكان اللي فيه التبرع بالدم فين عشان آجي
ابقي قولي لي يا قمر
وبعدين ما تعوديش ميزو على الحضونات عشان دي للمدونات (البنات يعني )بس

أسجل حضوري

عبد الجليل

اسألك ربي أن ترد لها يوسف
كي تقر عينها و تضمه إلي صدرها
فأنت العزيز الحكيم

أزال المؤلف هذا التعليق.

عارفة
والله بجد بجد
المفروض تعملي كتاب في حواديتك دي
وصدقيني هيكسر الدنيا إن شاء الله

أما بخصوص شقاوووة ميزو

ففي عندي سؤال فلسفي شويتين

إلا الأخ ميزو يقرب لتووووم؟


-------------------

بوست (خريطة قلبي)

مع الأسف مشوفتوش قبل كده
وفرحت جدااا بيه والحمد لله إن ده شعور المدونين ببعضهم

لأني بصراحه بشوف بشكل عام مشاعر حقيقيه بينا

وبشكل خاص ده بيكون واضح أوووي هنا دايماً عند "روح قلب ماما"

والبوست بتاعك ده فكرني أوووي بأغنية منير

تعالى نلضم اسامينا
الفلة جنب الياسمينا

قنا سوهاج الاسماعيلية
بنت الصعايدة بحرية
الاقصر غزالة محنية
في اسكندرية ترسينا

وانا رشيدي و دمياطي
واخدك يا منصورة في باطي
واغني و ارقص سنباطي
قبل القمر ما ينسينا

واعدي عالجيزة خفاجة
وردان دموعي الخفاقة
عيوني طلت يا رفاقة
من وادي حلفا علي المينا

بلبيس حنلبس دبلتها
شربين شربنا في قلتها
بعد المحلة ما حليتها
بنها العسل راح يشفينا

الشاي يا واسطة في السكة
نقعد يا منيا علي الدكة
توصل بني سويف الضحكة
نلاقي اسيوط وسطينا

وطنطا شي لله يا سيد
و طهطا نفرح و نشيد
و نزور مغاغة و نعيد
في بورسعيد عالتراسينة

من السويس قلت ياللي
دي القنطرة الفجر التملي
والوز الاخضر بيصلي
علي القنايا من سينا

عصرت قلبي الجواني
علي التراب الاسواني
رجع يا نوبة عنواني
كوم امبو رايقة و امينة

تعالى نلضم اسامينا
الفلة جنب الياسمينا


وأنت فعلا لضمتي مدوناتنا في عقد جميل بيزين كل المدونين وأنا واحد منهم

شكراً جزيلاً :)


وليد

يا عيني علي الجمال والحنية حتي القط ياربي في ناس كدة

بقولك يا فاتيما مينفعش تتبنيني زي القطط بتوعك دول

علي فكرة صفين اللولي بخير والحمد لله والضرس طلع فيه حاجة بسيطة وهاخد بالي من صحتي حاااضر يا احن فاتيما في الدنيا

يختييييييييييي
يعني لما يبقى بقالي كتير مادخلتش عندك ويوم ما ادخل الاقيكي كاتبه عن قطط؟؟؟

يامه!! بصراحة انا بخاف منهم اعععععععععع وبقشعر انجججججججج ععععععععععع فففففففففف ححححححححح

احم.. دي اشعره :)

فيفي الجميلة .. وحشتيني وحاولي بينك وبين الاخ ميزو تفهميه كده بالهداوة لا ف يوم تقومي من النوم على مامتك بتجري وراه في الشقة بعصاية المقشة

فاتيما الجميلة.. مممممممممواااااااااه

مها ميهوووو

دى الدنيا اطوررررت اوى ياطماطم
بقى مزميزوووو بيصحيكى بوردة
بلاستك من الفازة بتاعة ماما
شفتى ازاى:)على ايامنا ولما
كنت غاوية اربيها فى البيت
كنت بصحى على ناوناوتها
او الاصح جعورتها:) لانها
عايزة تخرج(اتفسحى يزكزوكا)
بصراحة فى الطريق العام :):)
كانت غاوياه :)اعملها ايه؟
احبس حريتها:)اضيق عليها ليه؟

ربنا يحقق لك كل امانيكى
ياأميرة يابنت الناس الامرا
وام الامير الصغير الجميل :يوسف:)

يا كوكو

انا نفسي في قطة بس ماما مش راضية :(

يلا خير


سلام عليكِ

فاطمه
أم يوسف
ولية أمر مزاميزو
يسعدنى أن أراكى سعيده
لكن أيضا لاتجعلى أم فاطمه تغضب
فكما أن فاطمه غاليه علينا
فأم فاطمه أيضا غاليه
لنكات مدوناتى لأن هناك مدونتين جداد
ttp://kalamfekalamm-mohamed.blogspot.com/
http://informationtoknow-mohamed.blogspot.com
http://kalamfekalamm.blogspot.com
http://comentonnews.blogspot.com

تحياتى ليكى
محمد

بعيداً بعيداً عن خفة الدم و الشقاوة اللي مكتوب بيهم البوست
إنما قط .. قطة .. قطط
يا نهاااااااااااااار
ده أنا بخااااااااااااااااااااااااااف منهم جدا يا طمطم
و ده ناتج عن رواسب من الماضي الأليم
ده انا لما شفت الصورة قلبي انقبض
هو صحيح من الواضح إن اللامؤاخذة القط بتاعك تري جانتي و مؤدب خالص و ابن قطط مأصل و مولود في باسكت قطط مش في خرابة
بس برده ده ما يغنيش حاجة عن كونه قط

سيبك انت .. المهم انت كويسة



يلا سلام

ليس فقيراً من يحب
أزيك إنتى يا رانيا و طبعاًُ هنتواصل علطول بس أعذرينى الأيام دى لأنى لسه مستلمة الشغل جديد و محتاسة حبتين بس اوعدك أظبط امورى سريعاً و متقلقيش على ميزو دنا و لوزة و ماما و العيلة كلها مش خالصين معاه !!



عاشقة الرومانسية
يا دودو يا حبيبتى إنتى بتهرجى ..صح ؟
بتعملى راسك براس ميزو ؟!!!
دا و لا مليون ميزو يا ماما ييجوا جنبك أول حروف من إسمك حتى مش إنتى شخصياً ...كدا هتخلينى أروح أقطعهولك كرباً كرباً يعنى ...و لا بلاش الراجل معملش حاجة برضو غير الأجرام العادى
أنا كمان بحبك يا عروسة البحور




كريم بهى
مش للدرجة دى يا كريم ..إنتا عاوز تمرعه علينا و محدش يعرف ينونو معاه بنص نونواية بعد كدا ؟؟؟!!!




حاسوباتية
دا كل يوم الحوار المنيل دهوه يا بوتى
أصله شقى قوى و بينى و بينك اجمل حاجة شقاوته دى أصلى مبحبش القطط الرخمة اللى تبقى قاعدة هادية كدا و إن شاء الله يسوفة يرجع و يلعب معاه زى ما بتمنى




(joudy)
أزيك إنتى يا حبيبتى
و تسلميلى من كل شر




ست البيت
اهلاااااااااا يا زمل
منتى معايا فى نفس الغرام و الشقاوات و الادمان القططى دا ...
ميزو بيعمل زى لولو بس مع الحمام اللى بيقف ساعات فى بلكونتنا
و حركة السمك دى بتحصل برضو و الواحد عاوز يخترع لهم صابون إيد و وش معجون سنان و لا حاجة عشان المنظر المقرف اللى بيحصل دايما دا ...
القطط الرومى لطيفة بس براوية حبتين إنما السيامى رخم و لزقة و عشان كدا بحبهم أصل القطة لو مكنتش نغشة و حبوبة مقعدهاااااااااش
ميزو ينام فى حضنى سعادتك و إلا يبقى ليلته مش فايتة إحنا محدناش قطط تنام برا إنما لوزة مراته براحتها يعنى مبغلسشى عليها قوى أصلى مشتبهة فى إنها حامل و مش عاوزة أعكننها لعل و عسى .... و عقبال ما تجوزوا لولو و تشيلى عيالها
ميرسى يا مروة على صباحاتك الحلوة
زيك




assafo anaroze
صباحك إنتى اللى جميل و مساوءك كمان يا أسافو و يا سيدى القطط أصلها دنيا تانية الواحد بيحس فيها بطفولته شوية و ميرسى على الدعوات الحلوة


خمسة فضفضة
و عليكم السلام يا فضفوضتى
ليه بس مش بتحبيهم ؟!!
أنا بزعل قوى لما الاقى حد كمان بيخاف منهم أصل القطط المنزلية دى بتبقى حاجة تانية غير قطط الشارع و بيبقوا لطاف و نضاف و عشريين قوى
بوسة و حضونة يا حبيبتى

z-diva
هراااااااااء
ازاى يتقال هذوها الكلام على ميزو و لوزة و القطط كلها عموماً ...
يا ماما الهراء جنب ميزو يبقى منتهى الجد و الثراء اللى ف الدنيا
بالنوسبة بقى لنوعيات القطط فأختك بقى مخلتش جبت سيامى و رومى و شيرازى و بلدى كمان بس للأسف ماما مبتوافقشى غير على السيامى عشان شعرهم قصير نوعا ما و مبيبهدلوش السجاد زى الشيرازى و الرومى و طبعا البلدى شكلهم مش عاطفشى فوافقت على السيامى إنما لو عليا شخصياص أربى كل الانواع
على فكرة و ملحوظة على جنب كدا
إنتى فيكى شبه من القطط قوى
يعنى فيكى و لطافة و شقاوة و براءة القطط و لما شوفتك فكرتينى بيهم



mahsen saber
يا بنت أبيها الغالى بطلى الحساسية دى أنا عارفة إنى ف بالك زى مانتى فى بالى و بعدين من كام يوم سمعت صوتك فى برنامج كل ليلة و فرحت قوى و عجبنى طريقة كلامك قوى و مبروك على خطوة بتعمليها يا حبيبتى




حنين القلب
يا حنونتى معلش بس إسمحيلى دى غلطتك يا ماما من البداية ..
كان المفروض اول ما أشرف غتقدملك تساليه علطول من اول قعدة ..
بتحب القطط و لا لأ
علطوووووول كدا عشان تبقى على بينة من اولها و ميرجعش هوه ف كلامه قدام
إنما إنتى إتضحك عليكى يا ماما و اللى كان كان ...
بس على فكرة حكاية الكلب دى صعبة قوى أصله عاوز ميزانية كبيرة للتطعيمات و الاكل المخصوص و التنضيف مكانه و ألا حكاية الحمام بتاعه دا لوحده مأساة و كمان يقال إن الكلاب بتطرد الملايكة من البيت و بالتالى لازم أشرف يقلق
أنما القطط مفيهاش كل المشاكل دى خالص و إبتدى معاه بقطة صغنونة قوى عشان بتبقى شكلها لطيف و مبتعملش شقاوة فظيعة و ممكن تحطيها ف السطوح بتاعكو كبداية
بوسة و حضونااااااات يا حنونتى



عاشقة القمر
اللى فهمته من كلامك إنك لقيتى قطة إحتلت البيت عندكو ..صح ؟؟




جنى
أزيك إنت يا سعيد
و إزاى صحتك دلوقتى
و يا رب دايما بخير
و يا رب دايما منور مدونتك
و مدونتى و مدونات احبابك
و يا رب دايما كلامك كله خير و نفع كما عودتنا يا عزيزى




يوم جديد
أولا بخصوص التبرع بالدم فيا ستى غحنا بناء على دعوة بت خيخة و اى كلام بنروح نتبرع فى المصل و اللقاح الى فى الدقى و العنوان مش صعب و إن شاء الله المعاد الجاى هكتب بوست بمجرد ما خيخة تحدد المعاد المناسب و اكيد هتعرفى و تنورينا و تخدى الحضونة بتاعتك و متبصيش للواد ميزو فى رزقه بقى
آه على فكرة .. القطط عندها حاسة سادسة زى ما بيقولوا و بيحسوا بالخطر و بالحزن لو صاحبهم زعلان او عيان يعنى حضور القطط لحصة التجويد و سماعهم القرآن شىء مش غريب ..و احمد بهجت الكاتب بيقول فى كتاب مذكرات صائم إنه لما بيسمع القطة و هيا بتعمل صوت قرقرة جاى من بطنها بيتهيأله إنها بتسبح بحمد ربنا زى ما كل المخلوقات بتسبح لربنا سبحانه و تعالى بس كلا بطريقته
سبحان الله



أستاذ عبدالجليل
نورت يا استاذنا



أبوخالد
يا باباااااااااااااا
متتصورش مجييك هنا فرحنى قد إيه
ربنا ما يحرمنى منك و لا من دعواتك الحلوة
وحشتنا قوى قوى قوى
إزى العروسة الننوسة ؟
يا رب تكون دايما بخير إنت و المحظوظين بوجودك معاهم يا بابا
الله ...كان واحشنى أقولها قوى
ربنا يخليك لينا يا بابا



عارفة .. مش عارف ليه !!!
توم ؟!!
يا وليد حرام عليك
غنت عاوز تسوء سمعة القط الغلبان توم و تخلى الناس تبطل تتفرج على كارتوناته يا شيخ
دا توم ملاك جنب ميزو
و بالنسبة لخريطة قلبى فدا أبسط تعبير منى عن حبى ليكم يا وليد و عن مكانتكم ف قلبى و اللى إتوجدت و كبرت يوم ورا يوم من وقت ما عملت المدونة دى و ربنا يديم الحب و الود دايما بينا
و بعدين إنت بتحسسنى إننا نشبه بعض قوى لما بتستعين بأغانى فى مواقف كتير اصلى دايما اعمل كدا برضو يعنى شكلك سمييع اغانى محترف و بترتبط بكلماتها مش بتسمع و السلام
كل الود ليك يا عزيزى




وومن
طب الحمدلله
انا كدا غطمنت على الصفين اللولى بتوع اجمل اميرة فى الدنيا
و يا ماما من غير ما تسألينى منتى زى بنتى يا ميرا انا بحس بكدا اوقات
أصلك إنتى طفلة صغنونة و بحس إن الدنيا برخامتها و سخافاتها الكتير مقدرتش تغيرك و تكبرك
و يا رب تفضلى كدا علطول يا ميرا
يا اميرة

أحسن تستاهل
هوه انا لسه هفهمه يا مهاميهو
دنا يا بنتى كل يوم أقعد احكى معاه الحدوتة دى و اعيد و زايد
و بقعد كمان احكيله عن يوسف
و ساعات اخد رأيه فى الحاجات اللى بعملها فى فيلا يوسف دا لما بينط يلعب فى الورق و يدلق كوباية المية و أنا بلون و الحركات دى ...
على فكرة .. إنتى كمان وحشتينى
و سلامى لكراكيب الشقاوة و واضح إن دا متوارث ف العيلة بتاعتكم




NORAHATY
ازيك يا نورهاتى يا حبيبتى
الحمدلله الجاعورة دى ماما اللى بتصحى عليها مش أنا اصل هى المسئولة عن اكلهم و بخصوص الفسحة بتاعة زكزوكة فدى بتحصل عندنا سعادتك بس ف البلكونة مش الطريق العام و الحمدلله
بوسة و حضونة كبيييييييرة


نعكشة
الحمدلله
على كل شىء كبعاً فى الاول
و على غنك لسه مطفشتيش يا نعكوشتى
أنا كل شوية أروح اشوف مدونتك و أقول يا رب ما تكون قفلتها
إنتى عملالى لخبطة ف نفسيتى التدوينية بسبب الحكاية دى يا ست إنتى ...
و يا ريت تتراجعى عنها و تشيلى بوست شطبنا لو سمحتى
و حاولى تقنعى ماما بس إبتدى بقطة صغننة ف الاول و يمكن تحنن قلبها
متغيبيش عنى عشان بقلق عليكى
ماشى ؟





محمد
يا فندم متقلقش الحاجة متعودة على شقاوة القطط من زمان أصلنا بنربيهم من بدرى و من و انا عندى سبع تمن سنين يعنى خلاص خدنا على متاعبهم احيانا و على لطفهم غالباً ...
و ألف مبروك على المدونتين الجداد بس عاوزة اقولك كلمة على جنب إنى اصلا كنت عاوزة اقولك إنى مبعرفش أتابه اكثر من مدونة للشخص الواحد و غالباً بركز فى مدونة واحدة بس تقوم حضرتك تقولى هتزودهم ؟؟ دنا بدل ما اكون مقصرة هبقى مقصرة جدا معاك فأرجوك تعذرنى و تسامحنى لو مقدرتش الاحقهم كلهم يعنى
لل الود ليك



NIGRO
يا أبو قلب دهب
يا نيجرووووووووو
لا بقى ..إنت آخر واحد اتخيل إنه يخاف من القطط !!!!
دنا متهيألى إن القطط هتبقى عاملة
زى الاطفال ما بتعمل معاك
يعنى هيموتوا فيك
و ياخدوا عليك علطول ...
دنا كنت لسه هنصحك
و أقولك يا نيجرو يا إبنى
إبقى فكر إنك تربى قطة عندك
تونسك و تنونولك و تشغلك شويتين اصلهم بيعملوا حس ف الشقة
بدل ما تبقى قاعد لوحدك فى صمت و هوس هوس كدا ...تيجى سيادتك
تقولى بخاف ؟!!

السلام عليكم ورحمة الله وبركاته
بجد كلمات رائعة ومتميزة
ارجو التواصل عمادخلاف صاحب مدونتين واحدة للقصة القصيرة والتانية للمقالات

بموت فى القطط سيامى
واحدى صاحبتى كان عندها قط سيامى
كانت قطة واسمها كاتى
وكانت عسل
بس عيبها شعرها اللى بيلزق فى الهدوم
ربنا يخليهولك وتفرحى بيه وهو بيلعب مع يوسف ان شاء الله

السلام عليكم

ربنا يكون فى عونه

وربنا يخليهولك


تحياتى


احمد الشاعر

وأنا كمان كان عندي انا واخواتي قط وكان برضه ليه نفس المشاكل دي مع الكبار اللي في البيت

ليهم مزايا وعيوب .. بس دايما شكلهم ساحر وجميل

حلوة اوي الموسيقى اللي في المدونة دي

السلام عليكم ورحمة
الله تعالى وبركاته
وكمـــان صباح الخير
ياطمطم ياأم يــوسف
عايزة اعترفلك قبل ما حد
يقولك و(يخبث)عليا عندك
هى فكرة شفتها عندك وووو
(اقتبستها )مشيها اقتبستها:)
يافاطيما استرى عليا ربنا يستر
على ولايانا جميعاً المهم نفذتها عندى
فأرجو المشاركة فيها وذلك لانـــــ((خلللى بالك من الحتة الجاية دى))
لان بوجودك الامر يختلف (حلوة مش كده؟)

عارفة يا فاتيما؟
انا مؤمنة جدا ان الحياه محتاجة شوية مواهب عشان الواحد يقدر يتحملها و يعديها بسلام
والمواهب ده بتيجي من عند ربنا لحكمة وحده هو اللي يعرفها
وانت عندك موهبتين شفتهم في البوست ده وغيره تانيين
اولا انك بتخلقي من حاجات حوليكي تفاصيل تملي بيها الفراغ الكبير.. وبتعشيها قوي وتعملي منها زحمة كتيرة وربنا وحده اللي عالم هي بتملى الفراغ فعلا ولا لأ

والحاجة التانية انك عايشة بقلب يوسف مش بقلبك انت ويمكن ه بيعوضك ولو حاجة صغنووونة جدا من بعده

ده احساسي .. يمكن يشت شويتين بس حبيت احكيهولك و اعرفه صح ولا لأ

بحبك قوي يا أم يوسف

هههههه أما قط صحيح هههههه إن شاء الله يوسف يرجع اه فطيمة أنا لما اتجوز وأحلف هجيب ولد حلو زيك أسمه يوسف يا رب يطلع حلو زي ابنك بس مش هجيب قطط ههههههه

إرسال تعليق