.

.

حد غيرك  

Posted by: فاتيما in

إنتا أصلك حاسس بيا
ومن غير ما أنطق ربع كلمة حتى ... صح؟!!
بس أنا المرة دى نطقت الكلمتين بصوت عالى و مش بينى و بينك كالعادة
دايما أقولها بقلبى و ساعات كتير بعينيا
بس قليل لما تخرج من بين شفايفى و حد تانى يسمعها
إمبارح مقدرتش أحوشنى أكررها مية مرة و انا راجعة البيت
لكن مكنتش متصورة إنك سامعنى و بتحبنى قوى غير اليومين اللى فاتوا دول
مش عشان الشغل الجديد اللى إستلمته .. رغم إنه نعمة كبيرة منك
بس مش هوه السبب الأساسى .. و مش عارفة ليه كل ما حد يسالنى
أقوله إن دا رزق يوسف و ربنا باعتهوله هوه ... مش أنا
إحساس غريب عبيط بيقولى إنك هترده لحضنى
رغم إن مفيش شواهد تدل على ذلك
بقالى شهرين و زيادة .. كل كام يوم أتصل بيه ف التليفون
و دايما محدش بيرد عليا
و ف أوقات تانية السكة بتتقفل ف وشى و أقول معلش
مسيره يوم هيرد عليا صدفة و إسمع صوته
بقالى شهرين و زيادة بترجى حسه من الدنيا و محاولاتى تذهب هباء
لكنى لا اكل و لا امل
عارفة إنها لعبة شد و جذب و حرب نفسية طويلة الأمد و إتعلمت أتكيف
إمبارح وحشنى قوى زى ما علطول بيوحشنى قلت و أنا راجعة من الشغل اكلمه
لعل و عسى
المرة دى ردت عليا جدته و قالتلى مش موجود و لما يرجع يبقى يكلمك
قلبى غاص فى سابع أرض .. إتكبست ...حزنت .. سكتت
إتمنيت إنهم بس يقولوا قصاده إنى سألت عليه عشان يعرف إنى بفكر فيه علطول
الليل كان طويل .. بس كلمتين فضلوا يرنوا ف ودنى و مبطلوش
سيبك من العبد و خليكى مع الرب
صحيت الجمعة و يوم اجازتى قررت أقضيه فى عمل مسرح عرايس عشانه
عدى الوقت و أنا بقولك الكلمتين اللى بينى و بينك و محدش سامعنا غيرك
حمولى عليك و توكلى .. مفيش غيرك هيقدر يساعدنا ...
أرجوك
متسبيناش لوحدنا فى الدنيا الواسعة دى أنا و هوه
أنا عارفة إنى غلطت كتير ...و سببت مشاكل لناس كتير
و اذيت نفسى و غيرى ساعات بقصد و ساعات تانية ف الأعم الغالب من غير قصد
صحيح بتعلم الصح ببطء بس بحاول مكررش نفس الغلطات تانى
ببص لبكرة بتفاوءل غريب لا يليق بواحدة زيى .. لكن بجاهد يأسى و ضعفى
برفع راسى بكرامة لأنى عارفة إنى من غيرها هنهزم
و هيدوسنى اللى مستقوى عليا
هل من الممكن إنك تدينى فرصة تانية أصلح بيها اللى إنكسر ؟
ممكن تساعدنى عشان اعوضه عن اللى فات و الحاضر باللى جاى من أيامنا
مش عاوزاه يكرهنى و لا يكره الدنيا ... و مش هستحمل اكون السبب
إدينى بس فرصة و مش هضيعها المرة دى
أنا مستعدة النهاردة اكتر من أى يوم فات ف عمرى
المسرح جهز و شكله بقى حلو .. يا ترى هيعجبه؟!!
يا حبيبى .. وحشتنى ضحكة عيونه و فرحته لما كان بيشوف حاجة جديدة
يا عالم .. يمكن بكرة يرجع و يشوفه
هرجع الالوان و المقص مكانهم و اجيب قماشة اعملها ستارة للمسرح
و اجيب كمان مية لحسن عطشانة .. يا ترى بيشرب و لا بيأكل إيه دلوقتى ؟!!
اول حاجة عملتها لما قعدت على مكتبى ف أول يوم شغل
إنى حطيت صورته على الديسك توب
كل يوم أفتح الجهاز و أصبَح عليه و اقول يا ترى هل ترى ؟؟؟
ممكن يحصل إنه ييجى معايا الشغل
و أعرفه على كل الموجودين و أقولهم .. دا إبنى .... معقول ؟!!!
المعقول يبدو مستحيلاً .... ف واقعى الفعلى
لكن لو أنتظره منك إنت ...فمش بعيدة و لا صعبة و أكيد هتحصل ف يوم
لوحك اللى عارف معاده
وعارفة إنك قادر تحققها قبل ما أغمض عينى و أفتحها
تقدر و مليار تقدر
كلمتين إنتا عارفهم و هفضل أقولهم
إبنى يا رب
يا رب
أقوم اجيب إزازة المية و كوباية بقى
تررررررررررررن
طب أرد على التليفون الاول
الله !!!
النمرة دى .... مش هيا .... معقولة ؟
ألو
ماما
أنا يوسف .. ازيك
س : حد غيرك ؟
ج : محدش غيرك يقدر

This entry was posted on السبت, يوليو 18, 2009 and is filed under . You can leave a response and follow any responses to this entry through the .

53 كــــلام بيطــبطـــب عـــلى قــــلبى و روحــــى

أنتى أم يوسف
ومروة الشربينى أم مصطفى
أرجوكى أدعى لها بالرحمه
http://comentonnews.blogspot.com

يا حبيبى
كلمك يا فاتيما
واخباره ايه
عامل ايه فى الدنيا
واخبار نتيجته
واجازته
ربنا يطمنك عليه يا حبيبتى
ويرده لحضنك يارب يارب يارب
وحشتينى يا طمطم
ان شاء الله فرج ربنا قريب اوى
هانت ان شاء الله
هانت

طب أرد على التليفون الاول الله !!!النمرة دى .. مش هيا .. معقولة ؟
ألو ماما أنا يوسف .. ازيك
***********************

ايه ده؟؟؟
يعنى كلمك ولا دى بس امنيه منك؟
حاسه انها امنيه
لانك مش بتبخلى علينا وبتشاركينا فرحتك
ان شاء الله يرجع وكل الامانى تتحقق معاه وبيه
وان شاء الله يروح معاكى الشغل
ويشوف مسرح العرايس ويفرح بيه جدااااااااااا

ربك كرييييييييييم ياطمطم قوووووى
اسئلينى انا
انا عايشه فى كرمه وحسه بنعمته قوووووووووى دلوقتى


على فكره
الفرح كان جنان
انا لسه مش نمت رغم انى هلكانه
بس قلت ابص بصه نونو على احبابى
الواد العريس كان سكررر الله اكبر عليه
والعروسه كانت قمررررر ماشاء الله
عقبال يوسف يارب
وتحسى باحساس ماما كده ان شاء الله
هابقى ابعت لك ميل احكى لك فيه كل الحاجات والمحتاجات بس افوق من الفرح والهده

ازيك يا ام يوسف يا احن ام فى الدنيايارب تفتكرينى انا مى اللى كانت فى خريطة قلبك من غير مدونة بس الحمد لله ربنا كرمنى وعقلت وعملت مدونة
ازيك يافاتيما وحشااااااانى جداااااااااااا وفى بالى عالطول والله بدعيلك عالطول ربنا يرجع يوسف لحضنك
ونفرح بيه ومعلش جت متأخر مبروك عالشغل
فرحتينا بمكالمة يوسف بس طمنينا عليه
خلى بالك على نفسك ياقمر ومتتاخريش علينا
ربنا يوفقك ويكرمك

ربنا يخليهولك ياااااااااااااااارب ..

ويقر عينيكي بيه ..

ويرجعه لحضنك في اقرب وقت يااااااارب ..

حقيقي بحس بفرحه غير عاديه وانتي بتتكلمي عنه ..
ربنا يحفظه ليكي يارب ..

وتشوفيه زي ما بتتمني واكتر شويااااات يارب ..

قلبي معاكي بجد ..

وبدعيلك دايما والله ان ربنا يفرح قلبك بيه ويرجع يوسف ليكي ..

سلااااام يا احن ام لاجمل يوسف ..

السلام عليكم
ربنا يرده الي حضنك رداً جميلاً

ويطمن قلبك عليه

ويحقق أحلامك

ويقر عينك برؤيته

قلبى وجعنى وعنيا دمعت
ربنا يفرحك دايما ويهون ايام البعاد
فى احد الصالحين سأل عن الباب اللى يوصل منه لربنا سبحانه وتعالى فوجد ابواب الصلاة والصيام والصدقة مزدحمة بالمحبين وذهب الى باب التذلل لله مالقاش هناك اعداد كبيرة
يارب نكون حريصين دايماعلى الوقوف امام هذا الباب
وفى حديث قدسى فيما معناه ان ربنا سبحانه وتعالى بيقول لسيدنا ادم بعد المعصية والتوبة
كنت تدخل علينا دخول الملوك وتدخل علينا الان دخول العبيد على الملوك وذلك احب الينا


ربنا ان شاء الله يحقق لك كل احلامك وتكون تجربتك دى رفع لدرجاتك لان الابتلاء للمؤمنين
ربنا يفرح قلبك دايما

انتي جبارة في طريقة السرد


ربنا يرد لك يوسفك يارب وينعم عليكي بالخير

كل التحية

أنا بعت لك ميل مهم جدا خالص على الاخر قوي

ياريت تقريه كويس وبتمهل كبير وتاخدي بالك من كل كلمة فيه



يارييييييييييييت


سلام يا غالية

نفس سؤال عاشقة

هو رد ولا امنية ؟؟؟

انت خلايني اعيط ياريت يكون بجد :):)

وربنا كبير و هو بس اللي يقدر
و هيرجعهولك وانا متأكد
استحملي و اجمدي و هو جاي جاي :)

احلي سلام لاحلي امهات الدنيا

دايما يافاطيما بخاف ادخل عندك من كتر ما انا حاسس بظلمك

ربنا معاكى

وربنا مبينساش حد خليكى مع ربنا واللى عند ربنا احسن من اى حاجه

اقسم بالله العظيم عيطت ودموعي نزلت فى آخر البوست لاني عارف احساس ام بيغيب عنها أبنها لاي سبب كان وعارف شعورها
انا وبقري البوست الظهر اذن ولسة بيأذن وقتها دعيتلك بس أنى ربنا يرد ليكى يوسف لحضنك تانى وما يفرقهوش ابدا



الف مبروك الشغل يا طمطم ربنا يجعله قدم الخير عليك لاني عارف أنى بعدها حيكون الوقت أذف تعملى اللى انتى عايزاه

السلام عليكم

ربنا يرد ليك يوسف بالسلامه ويفرح

قلبك ويريح بالك يا فاطمه اللهم امين

الف مبروك على الشغل الجديد وعقبالنا

كده

فى رعايه الله انتى وكل حبايبك

حملونا كلنا عليه
مش حمولك لوحدك
يـــاأم يوسف

مبروك سماعك لصوته
ومبروك الشغـــــل
ودايماً مبروك مراجعتك
لنفسك بينك وبين نفسك

لا لا لا

انا عايزه تفاصيل من فضلك


هو كلمك بجد ؟؟

والنبى ابقي قوليلي يا فاتيما

ومبروك الشغل يا جميل

ومبروك انك اطمنتى على يوسف

الف مبروك على الشغل
والحمد لله انك بخير
والحمد لله ان يوسف بخير
وان شاء الله فاتحة خير من جميعه
ربنا يطمنا عليه دايما
وعايزين نعرف باقى المكالمة
اول مرة تخلينا على نار كده ومنتظرين النتيجة

تحياتى ودعواتى

فاتيما
لك رب كريم قادر على كل شيء و انت شفت النتيجة
خلي اتكالك على الله و اكيد الامور حترجع لظبيعتها الاساسية
اصلا الله لا يرضى ابدا بالظلم و ما الله بظلام للعبيد
ربنا يرجع يوسف لحضنك و دايما بدعي معاكي
و اكيد حيرجع حيرجع
مودتي
على فكرة الف مبروك على الشغل الجديد

يعني يوسف كلمك و سمعتي صوته و إطمنتي عليه

هيييييييييييييييييييه
ألف مبروك يا أم يوسف
و إن شاء الله حيرجع لحضنك

اى عروسة اتصلت بك؟
ربنا يجعل كل أمانيك حقيقة

فاتيما
يسعد مساك في انتطار رايك الذي يهمني ادراجي الجديد في انتظارك
مودتي

بصى بقى
مع ان المفروض ابارك لك ونحمد ربنا انك سمعتى صوته
بس البوست دة فكرنى بافلسطنين واليهود
الارض كلها بتاعتهم
لكن اليهود وصلوهم انهم بس يتمنوا عيشوا على الارض ما ينطردوش منها
بيتمنوا بس انهم ياخدوا حتى ضغيرة زى غزة
وياريت اليهود مهنينهم عليها
=====
الولد من حقك شرعا وقانونا
بلاش استسلام
حاربى لحد ما تاخديه
ماتخليش كل املك فى الدنيا انك بس تسمعى صته او تشوفيه مرة كل كام شهر
=====
اسفة يا فاتيما يا حبيبتى
عارفة ان اللى ايده فى الميه مش زى اللى ايده فى النار
بس انا كنت متغاظة وخلاص قولت البوقين اللى فى نفسى
====
ربنا يجمع بينك وبينه فى القريب ان شاء الله
قادر على كل شىء

:) يا ماانت كريم يارب
الحمدلله ياحبيبتى
الف حمد وشكر ليك يارب
عينيا دمعت بجد من الفرحة
هو احنا اصلا لينا مين غير ربنا نشكيله همنا ونطلب منه واحنا واثقين انه مش هيخذلنا
ياااه يا طماطم بإذن الله ياحبيبتى فرجه قريب اوى

انا بعيط وبضحك
وبطنى وجعتنى مش عارفة ليه

عقبال مايرن جرس الباب
وتقولى مين
تلاقيه بيرد عليكى بيقولك
انا يوسف يا مامى افتحى بقى
وتفتحى الباب تلاقى يوسف
بشنطة هدومه قدامك


مبروك على المكالمة

واسلوبك حلو يا فاتيما

سلام يا حبيبتى
اختك خيخة

كل الناس فاكرين ان يوسف كلمك
وانا احساسى بيقول انها امنيه منك
هو انا احساسى خانى ولا ايه؟
عايزه افهم
هو انا بس اللى فهمت كده ولا ايه؟
هو كلمك فعلا؟
طيب هو انتى بتتمنى وبتتخيلى بس؟
فاتيما بجد الفضول هيقتلنى
عايزه افهمممممممم

يارب يا فاتيما يحقق لك كل اللى بتتمنيه سبحانه كريم وعمره مايرد سائل أبدا وادعى مش هو اللى قال واذا سألك عبادى عنى فانى قريب اجيب دعوة الداع اذا دعانى . . . . ادعى يا فاتيما وكلنا هندعى ان ربنا يجمعك بيوسف فى أقرب وقت وما يحرمك منه أبدا

دمتى بكل الحب والسعادة والخير

ياحبيبة قلبي

ربنا يصبرك ان شاء الله

وهيرجعلك يوسف باذنه قادر ربنا والله

اوعي تفقدي الامل وربنا دايما هيبقى معاكي

ربنا يهنيكي بيه ياااارب

أنا كمان مش عارفة دي مجرد أمنية ولا حقيقة!! بس حسيتها حقيقة

كلامك مؤثر أوي أوي، وطريقة سردك جميلة أوييييي ..ودة أكيد لأنها فعلا من القلب يا تمتوم

ابتسمت في آخر البوست لأني كنت حاسة إن دة اللي هيحصل.... وبتمنى يكون فعلا حصل مش بس أمنية

ربنا مش بيسيب حد أبدا،وهو دايما سامعنا. إدعي كتير وقربي منه.. وإن شاء الله هيساعدك أوي أوي وهتحسي بعونه دة

مكنتش أعرف إنه كل الفترة دي مش كلمتي يوسف. يارب تسمعي صوته قريب وهو أدامك، مش في التليفون

كل السعادة والراحة بتمناهالك

حلو ربنا اوى يا فاتيما
انتى بس صبرى نفسك شوية وهتشوفى
ان مع العسر يسرا .. ان مع العسر يسرا
فرجه قريب وكرمه واسع

ربنا يردهولك بالسلامه
وفعلا ربنا مهما اختارلنا بيكون الخير
ودى بلاء وامتحان ولازم تنجحى فيه باذنه
قولى يا رب

ارجو من الله الكبير الرحيم
ان يرده لكِ سالمة غانمة باذنه تعالي
كي تقري عينيك ويهدئ حضنك المتجمد من كثرة البرد فى غيابه عنكِ

كلنا ندعو ليوسف ولكِ
ولكن كلما استكمت حلقاتها فرجت وكنت أحسب .....

كوني واثقة ان اله معكِ دائما
يا اعظم أم لأعظم يوسف في الدنيا

ابقى فوتى على مدونتى
هتلاقى اخبار وصور ليا عن الامسية بتاع كورنيش بنها

تحياتي

كريم بهي

بصى
أنا مش هاعلق بصورتى لإنى بضحك فيها ودى أول مرة
عينيا تدمع وأنا بقرا بوست
فاهكتب اسمى بس

وربنا يرده فى أحضانك تانى وما يسبش حضنك أبداً إن شاء الله

تحياتى وامنياتى
ميخو

ربنا كبير قوي يا ام يوسف
قادر يرده ليكي
زي ما حنن قلب جدته ( أو كده فهمت )
وخلته يكلمك

ربنا مش قاصد يعذبنا
قاصد يقربنا منه اكتر

يارب تفرحي بيه قريب وتاخديه في حضنك وتقر بيه عينك

أزال المؤلف هذا التعليق.

قرءته بقلب و عين الأم ، علشان كدة حسيت بقشعريرة جامدة قوى فى قلبى ، بس أنا عارفة أنها حقيقة مش أمنية ، و أنه كلمك و سمعتى صوته ، و أن شاء الله ربكنا بكرمه ها يرجعه لك و يرده فى حضنك من تانى ، و البوست الى جاى ها تقولى أنك سمعتى جرس الباب و فتحتى و لقيتى يوسف بيرتمى فى حضنك أن شاء الله ، أنت بتتكلمى مع ربنا و بتناجيه ، وهو وحده الى حاسس بيك و كرمه كبير .

ااااااه يا فاطمة!!!قلبي مش حيبطل يتوجع طول ما ابنك بعيد عنك و طول ما ولادي تايهيين و متشتتين و مش عارفة حيجرالهم ايه بسبب غلطة حفضل أدفع تمنها طول عمري و عمرهم..لما قريت البوست دة النهاردة افتكرت أول مرة دخلت المدونة بتاعتك و أول بوست قريته عن يوسف و عمل فيا ايه..ربناكبير يا فاطمة..أكبر من الكل

ام يوسف
الاخت العزيزة
اولا اشكرك على التهنئة الجميله وسلامك انا وصلته

بوست حد غيرك
واضحة جدا حالة الشجن اللي بين السطور زي ما واضح جدا العلاقة الشفافه الجميله اللي بتتمتع بيها ام زيك
ختمتى البوست بسؤال وجواب
س : حد غيرك ؟
ج : محدش غيرك يقدر

جوابهم الكلام اللي كتبتية واكتر بكتير
لباقة حلوه وجميله في التلخيض بمعنى خير الكلام ما قل ودل

تعليق الصورة:
ام تحمل طفلها يتقدم وجهه وجهها يشاور بأصبعه الي الامام لأشياء اغلبها مبهم بالنسبة له وام تغمض عينيها لترى اكثر واكثر ما هو مخبئ خلف الاشياء وكأن الاحساس هنا في هذه الصورة هو السؤال والجواب نفسهم س : حد غيرك ؟
ج : محدش غيرك يقدر

ربط جميل بين الصورة المنتقاه وبين ما كتبتية احيكي عليه

كل الاحترام والتقدير
صاحب المكسرات
سيد سعد

قلبى عندك
فى انتظار التفاصيل

بحبك
حضن كبير

هبة

فرحانه عشانك أوي أنه كلمك :))))

ربنا يجمعكوا علي خير يارب وقريب جداااااا

...

دمتِ وقرة عينك بألف خير

Lyssa

اوعى تياسى من رحمه الله يا بطه ربنا كبير

ان شاء الله يوسف هيرجعلك

انا رايى من رأى سبهلله و انك لازم تحاربى عشان تجيبيه و بلاش سلبيه مش حياكلوكى لو رحتى عندهم و خبطى على الباب و قولتى عايزه اشوف ابنى لانه حقك
مبروك على الشغل و رأيى انك تمسكى فيه بايديكى و سنانك عشان تقدرى ترفعى قضيتك و تاخدى ابنك و كفايه سلبيه لان الدموع و العياط مش حيرجعوا يوسف
بجد يا فاتيما الموضوع محتاج وقفه منك لانه ماضاع حق وراءه مطالب
اروح بقى امسح عنيا لان الدموع مليتهاو النضاره اتبلت

مش ممكن يا فاتيما
انا أول مدونة جيتلها جري اول مالقيت نفسي قادرة آجي و دخل على مدونات تاني هي انت

ودعيت يارب يكون البوست عن اليوسفيات
وفرحت اما لقيته
وقلبي قعد يدق مع اول كلمة اديتلي الاحساس بان فيه حاجة جديدة حصلت

وكل ما السطور تطول قلبي بيشد علي اكتر
لحد ما قلتي اخيرا

نفسي في البوست اللي جاي
نفسي اعرف قالك ايه وكان حاسس بايه وانت حسيتي بايه
زمانك لحد انهاردة فمود تاني خالص
وزمانه مالي الجو حوليكي بصوته و نفسه وكلامه
حتى لو كانوا كلمتين وبس
مبروك على الشغل يا فاتيما
وسامحيني على غيابي.. ماكنتش حاسة قد ايه غيابي كان حارمني من احساس كبير جدا و غالي جدا لحد ما دخلت عندك انهاردة
واحشاني قوي قوي
ونفسي بدل ما كنت اقرى الخبر ده فالبوست لو كنت سمعته منك بصوتك و انا عيني على ملامحك
يااارب يستجيب لكل دعوة دعتيها

وحشتييييني

فاتيما الحبيبة
وحشانى جدا ومايمنعنى عن متابعتك
غير ظروف المرض
المهم انا قلبى كان حيقف مع اخر البوست
هو اتصل ولا انتى بتوصفى حاجة
يارب يكون فعلا اتصل
عاوزاة اطمن وتفاصيل اكثر عن الغالى
دمتى بخير

بجددددددددددد

أنا فرحت جدا كأني أنا اللي سمعت صوته
ربنا يتم كرمه وفضله ونعمته عليكي يارب وما ذلك على الله بعزيز

أم يوسف لو سمحتي ممكن تدخلي هنا
http://mosh3arfa7aga.blogspot.com/2009/07/blog-post_22.html

نفسي أشوفك :'(

على الرغم من السرد الجميل للأحداث ، ونسبة التشويق العالية بها إلا إنى أحس بمرارة حقيقية بداخلك ليست مرارة كاتب بل مرارة حقيقية لأم
جعلتنى لا أعرف هل أستمتع بالأحداث
أم أحزن لفراق ابن عن أمه

أم يوسف
أسلوبك رائع وجذاب

دا أول تعليق لى على مواضيعك وأعجبت بها جداً
تقبلى ودى

حبيبه قلبى

ربنا كبير وعالم بحالك
ربنا يرجعهولك بالف خير
اطمنى فرجه قريب

بس فين باقى المكالمه
انا عايزة اكملها
عاااااااااااااااااااااااااااا

وحشتينى اوى يا فطوم
انا نشرت الخبر ابقى تعالى شوفيه عندى
ادعيلى
ربنا معاكى ومعايا

الله عالنهاية الجميلة للبوست ده .. قد بنتمنى انها تكون نهاية حقيقية حصلت بجد

وحتى لو ما حصلتش .. يكفيكي ايمانك العالي جدا ده بقدرة ربنا سبحانه وتعالى .. هو وحده قادر على كل شيئ واي شيئ في اي زمان ومكان

كل ما اقرا شوية كلام اقول هتقول انه كلمها
هتقول انه كلمها
يا رب تقول انه كلمها
لحد آخر تلات جمل
فقدت الامل
وبعدين رجعتيه لما قولتي الاول
سبحان الله
هيا كدة
ضاقت ولما استحكمت حلقاتها فرجت و كنت اظنها لا تفرجُ
ربنا كريم قوي

يا رب
رجعهم لبعض بالسلامة

ربنا يخليكوا لبعض دايما ولا يجعله ابداً يكره الدنيا ولا يكرهك بسبب غلطة معرفش إية هيا

وليكن

ان شاء الله هيطلع ابن صالح
هوه القادر على كل شيء

سلام عليكِ

ربنا ما يحرمنى منكم أبداً
خيال و لا حقيقة ؟!!
هرد عليكم بس فى بوست مفصل ملىء بتفاصيل ترضيكم .. بس إطمنوا مؤقتاً
كلمته و سمعت صوته ..
و يا رب خير
لأ ..هقول اللى بحبها أكتر و مببطلش أقولها ..إبنى يا رب
إبنى يا رب
أسفة لتاخرى عليكم النت كان بايظ و مكنتش بلاحق من الشغل أسيب غير كام تعليق متناثر .. وقت المرواح كدا
وحشتونى قوى
قوى
بدءت بيها و هننهى بيها
ربنا ما يحرمنى منكم و لا من دعواتكم
أبدا
أبداً

الف مبروك يافاطيما
الف مبرووووووك ياحبيبتى
انك سمعتى صوته وشوقك اليه
هدى ولو شوية.الف مبروك عقبال
ما تجتمعوا من تانى فى ارض الله يظلكم
رعاية الله وعنايــــــــــــــــته

والف مبروك يافاطيما
لكل من باركتى لهم فى تدوينتك
القادمة واللى قفلتى فيها التعليق
(ليــــه؟وش متغاظ جدا جدا جداً)

لحد وانتى راحه تجبيى مياه كنت خايفه احسن مش يكلمك

ربنا يحميه ليكى

إرسال تعليق