.

.

البر التانى  

Posted by: فاتيما in

أصعب حاجة لما تبقى عاوز تقول اللى ف قلبك
و متملكش من رصيد الكلمات ما يكفى لذلك
فرحان قوى
زعلان قوى .
تعباااااااااااااان قوى
نفسك تخرج اللى جواك و ترتاح
و تقول للى بتعزه ... عن مشاعرك الحقيقية و دون أى مواربة
دا بالضبط كان إحساسى النهاردة و أنا بحضر
حفل توقيع الحياة بدون كاتشاب
الواحد مشحون إنسانياً و نفسياً بشكل كبير .. و عميق
خطواتى تسبقها مشاعر فخر و إحساس بالإمتنان للدنيا كلها
لأن حد غالى على قلبى
ناجح و متميز و محبوب لهذه الدرجة .. يتقدم خطوات و بنجاح للأمام
طب الواحد يختصر و يكثف مشاعره فى كلمات إزاى ؟!!!
السؤال على قدر صعوبته
على قدر سهولة الإجابة عليه

و الحل ..غالباً بلاقيه عند المراكبى
نبع الحكمة كما يحلو لى أن أسميه
منذ اوقعتنى الصدفة و الحظ السعيد بدخول مدونته
من اول تدوينة و الواحد مستشعر إنه امام شخص غير عادى
إنسان تجاربه الحياتية ثرية و مليئة بالعقبات
اللى قد تكون كافية لعرقلة اى حد

لكنه بقدرة و حكمة و براعة هندسية
بيحولها لجسور

يعبر بها الازمات و المحن
نادراً لما تجده يشكو .. رغم الحزن المتجلى بين السطور
كل ما اروحله عشان أقرى بوست جديد .. اجد مواقف
و حاجات
احياناً لو تتاملها
تلاقى المفروض إنها تسد نفِس أى بنى آدم عن الحياة
بينما هو و بكل سلاسة الدنيا يعرضها و يحللها
و يخليك تحس ... إن فيه إيه بس ؟
منتا ف إمكانك تتخطاها لوتتروى شوية
و متسبهاش تكسرك

مش هتكلم عن أسلوب المراكبى و لا براعته الادبية لأنى مش متخصصة
قد اكون متذوقة وعلى قدى .. لكن كم السخرية و الواقعية
و الممزوجة بالألم فى سطوره مش مهمة سهلة لأى حد بيكتب
و على رأى العزيز محمد مفيد .. المراكبى القلم بيطاوعه
قدرته على تكثيف اللحظات و المواقف فى بوست قصيرو موجز
بجد شىء مبهر
يبدأ البوست بفكرة بسيطة كفيلة بإثارة شهيتك للتفكير
فيما بعد الحكاية

و غالباً ما تكون تعليقات الناس عنده جزء مكمل خفى فى تدويناته
معرفش إن كان يقصده و لكنى اظنها الموهبة الربانية
فى أن تتوحد معه
و تبقوا سوا ف فكرة واحدة و معضلة واحدة
و إن إختلفت النهايات
ممكن أتكلم عن تأثير الراجل الجميل دا فيا إنسانياً ؟؟
كام مرة اكتب عن حاجات بتقهرنى ... ومن وسط التعليقات يبزغ تعليقه
و دائما و أبداً موجه فى طريق واحد .. الامل
مكنش لازم يقولى ف وشى ..
قومى ..
إتحركى و إعملى حاجة بقى
لكن بيد حنونة يلقى جمل اكثر دفئاً خالية من القسوة
- ممكن نتخطى المحنة و نعمل كذا...
- بكرة هيكون احسن و الأزمات بتعدى ...
بيستخدم عبارات تشجيعية تخلى الواحد حاسس بالرضا
حتى عن عجزه أحياناً
- يوسف بقى إبننا كلنا و منتظرينه معاكى
- المدونة دى حصل فيها تطور كبير .. وبقت عاملة زى دوار العمدة
جمل و عبارات قد يكتبها هو
و مش مركز قوى فى تأثيرها عليا

لكنه ببراعة و قلب صافى يطلقها
لترشق فى روحى و تطبطب على قلبى
النهاردة ... مكنش يوم عادى
وبالنسبالى أنا كمان

لأنى شفت ملاك حارس من ملايكة سمايا
بينجح و يحلق ... خطوة صحيح كنت متوقعاها
و بتمناها و الحمدلله تحققت
لكن الحقيقة كل ما يصدر كتاب لمدون من احبابى و سكان خريطتى
بحس كدا إن حتة ف قلبى نورت
إعتبروها نوع من التماحيك فى نجاح الاحبة .. عبط غريب من نوعه
لكن حقيقى لو كنت بعرف أزغرط .. مكنتش سبت عمارة واحدة
فيكى يا جاردن سيتى و مسمعتهاش صوت فرحتى بالحياة بدون كاتشاب
الحفل كان يشبه صاحبه .
راقى و هادى و رصين و حميم جدا
الباشمهندس حضر مع اسرتة الصغيرة .. الحكومة كما يسميها او المدام يعنى
و التلات عصافير الصغيرين اولاده
مكتبة حنين اللى إستضافت الحدث موقعها مميز و هادىء
و القائمين عليه باذلين مجهود واضح
كالعادة احمد مهنى و احمد سلامة كما نتوسم فيهم
إهتمام و خير إستقبال و براءة اطفال عجيبة
رغم النضج و الموهبة الحقيقية
وصلنا سلام أحمد البوهى الضلع التالت لمثلث صانعى البهجة
ربنا يقصر غربتك يا أحمد
قبل المراكبى ما يوقع النسخ للمريدين
ألقى كلمة قصيرة عن التدوين بشكل عام
و كتابته للقصة القصيرة بشكل خاص
و إندهشت جدا لما عرفت إن طقوس الكتابة عنده
تتمثل فى رحلة عودته من عمله
تصوروا بيكتب ف العربية و هوه راجع بيته
لأنها على حد وصفه الفترة الوحيدة اللى بيستقطعها من اليوم و المشاغل
مكنش فيه اى سلبيات تقريباً ف الحفل
كل شىء منظم و جميل

حتى النقد اللى وجه للكتاب كان بناء و بشكل مهذب
و الحضور كانوا حاجة مختلفة
أنا شخصيا كنت سعيدة لأنى شوفت ناس تمنيت أن أقابلهم ف يوم
و تحققت إمنيتى و بفضل المراكبى ... جه
إيهاب الطائر الحزين و راجى عفو الله .. لم يدهشنى لأنه ف الواقع
يكاد يكون كما تخيلته... حييى و لطيف متكلمأ أو صامتاً
المفاجاة التانية .. حضور احمد شقير حكاوى آخر الليل .. حد كمان مميز
يشبه المراكبى و فيه منه كتير .. بس على اكثرجرأة و حماسة
كمان شوفت هانى جورج و عرفته من اول ثانيتين
إنسان حكاية و زى كتاباته تمام
عبير الأحباب اللى ملا الجو كان متمثلا فى حضور
داليا قوس قزح وش الخير
و آبى هانم بتنجانى و الاستاذ شريف
خالد همس الاحباب و ميرا امراءة بعقل رجل
و احمد يا سكررررررررومروة زهرة الجنة
وفاروق يوميات طالب ومحمد مفيد وأحمد عبدالمنعم
و أسامة عبدالعال و شموسة ربة السيف و القلم
و احمد الصباغ و إيناس لطفى
وشخصية جميلة لم أملك وقت للأسف عشان أرغى معاها اكتر
هيا رشا صاحبة مدونة مكان ف القلب ... بس حقيقى أنا إتشرفت
إتشرفت إنى كل لقاء تدوينى بعرف ناس حلوة
و أشوف ناس كنت بحبها من ورا الشاشة و بس
و إتشرفت إنى كنت النهاردة ف يوم توقيع
الحياة بدون كاتشاب
و متهيألى كان باين عليا
معرفش ليه بيجيلى حالة فرحة هيستيرية عارمة تكاد تصل
لدرجة الذهول لما بشوفكم
آه .. قبل ما انسى ...كان فيه شاعر موهوب
و جميل قوى إسمه

يحيى قدرى
و يا ب أكون كاتبة الإسم صح و يسامحنى لو اخطأت
لكن بجد ... قال تلات قصايد من العيار التقيل
احييه من قلبى و هوه دكتور
و يا جماعة و النبى تشوفولنا حل فى الحكاية دى بقى
الدكاترة و المهندسين
داخلين على مجال الادب و الشعر
و هيقفلوه و يخلوا بتوع الادبى ينشوا
يبدو إن الدراسة العلمية بتخلى الناس تتعبقر
ألف مبروك يا مراكبى
و مبروك عليا إنى أخدت توقيع صاحب السعادة على نسختى
و مع إهداء ليوسف
ويا نبع حكمتى عقبال الكتاب الجاى و الى بعده و اللى بعده
و عقبال الطبعة العشرين من كل عمل مذيل بإسمك
و لما كنت دايما بدخل عندك و أقرى الترويسة و فيها
شد القلوع يا مراكبى مفيش رجوع يا مراكبى
كنت أتضايق قووووى .. و دماغى تتربس و أقول لااااااااااا
دايما فيه فرصة ... و بكرة تبطل غربة و ترجع
و مكنتش فاهمة إن إسمك الإفتراضى دا
و بالنسبالى أنا شخصياً

هيكون على مر الأيام
إسم على مسمى ... عارف ليه ؟؟
لإنك إنتا اخدت بإيدى من بر للتانى
و قصرت عليا تعب الرحلة و المشوار
بالونس و السند المعنوى و الحكمة المستترة

كنت واحد من اللى عدوا بيا من شط اليأس ... لشطوط بكرة
و ما يحمله من امل
عشان كدا هدندن مع روحى و أقول

شد القلوع يا مراكبى

الخوف راح يا مراكبى

شد القلوع يا مراكبى

الحزن ضاع يا مراكبى

يا مراكبى

-------------------------------------------------------
لا تقيدى عقلك بإية حدود أو إتجاهات
جربى ذلك يوماً و ستتفاجئى بإنك ستذكرينى
أعدك بذلك
" أحمد القاضى "


This entry was posted on الجمعة, يوليو 31, 2009 and is filed under . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

مبروك :)

بس هو انتوا كلكوا قاهرة ما انا كمان من القاهرة :)
قولولي علي التجمعات دي :)
و حوار الازهر بارك انا مش فاهمة لو حد عندة معلومات يقولي :)

انا مبسوطه اول عشان شايفاكى فرحانه، و حسيت بطعم فرحتك للناس و بالناس ،و الف مبروك للمراكبى شوقتينا لكتابه ربنا يوفقه و يكرمك يا قمر

بجد بوست جميل والفرحه كانت باينه من عنيكى
--
مكتبتيش ليه عن الهديه اللى انتى جبتيها للمراكبى
:))

الف مبروك للمراكبي أحمد القاضي

تعرفي يا فاتيما.. اللي سدني اول مرة خااالصاني ادخل عنه هو اسم المدونة.. يامراكبي

كنت بعمل سيرش عن الأغنية لمحمد منير ولسة ماكنتش اعرف حاجة عن المدونات
وانبهرت باللي مكتوب
لقيت كلام قريب و نافذ للقلب على طول و زي ماقلتي بيجبر العقل انه يفكر و يتأمل و يطبق كل كلمة على مواقف في حياته

و بقيت مش فاهمة ايه الموقع ده بالضبط و الناس اللي بتعلق بتعلق منين يعني و يعرفوه منين

لحد مافهمت و بقيت عندي مدونة و دخلت اتسحب واحدة واحدة لعالمه

وكنت بطييير فرح لما الاقي حاجة كتبتها عجبته لاني كنت متخيلة حد بمستوى تمكنه صعب يعجبه اي كلام

كلامك عنه وفى كل اللي ممكن أقوله و كانك عارفة كويس قوي نظرتي للباشمهندس شكلها ايه
وصفك لبوستاته و قدرته العجيبة على السخرية و الهزار في امور باين بين السطور انها مؤلمة
تعامله مع حياته و الصعوبات اللي فيها
تعامله مع اسرته
معانا و كل الاختلاات اللي بين المدونين

بيبهرني
ودايما بقيس مدى جدية تفكيري و نضجه بكلمات في تعليقه
و منها اقرر .. انا بفكر صح ولا بهبل


تعليقه دايما فيه تواضع و كانك انت اللي بتفهمي اكتر منه مع انه عقلية كبيرة جدا

كنت بتمنى اكون هناك و اتشرف بتوقيعه و بقابلة افراد اسرته
واتشرف بمقابلة كل الناس الجميلة اللي كيتي عنهم

كلامك اللي مليان حب ده يا فاتيما بيحرك في الركود اللي بقاله شهور طويلة وبيحسسني ان الدنيا جمييييييييلة و صافية و فيها لسة مكان
وانا بحب الاحساس اللي بحسه من خلال كلامك.. بيديني أمل في حاجات ضايع مني الامل فيها و عارفة ان ضياعه وهم انا واهمة نفسي بيه و بفرح لما بلاقي حد بيشدني من غير ما ياخد باله
أهو انت الحد ده
زي ما المراكبي برضه حد فعال في حياتك يمكن من غير ماياخد ياله

يارب نكون(احنا اهل بلدي) في خطوات للأمام اكتر و أكتر عشان ده هو اللي محتاجاه بلدنا
الحكمة و الحب


بحبكم قوي

اليوم كان لطيف والحفلة كانت هايلة وألف مبروك للأستاذ أحمد القاضي

وكنت مبسوطة اني شوفتكم كلكم وبالذات انتي فاتيما

كنت سعيد ايما سعادة بالتواجد والتعرف عليكم - بالنسبة لمهندس أحمد فهو موهوب حقا تقريبا انتهيت من نصف الكتاب قراءة فهو يضع الانسان فعلا بين ما يفعله وبين الضد الذى يرفضة فى وقت ولكن بعد برهة ينقلب الفعل الذى كان مؤمن به الى ضد لكن فى احد مقربية او له شخصية لكن فى ظروف أخرى

-------
كان يسعدنى التواجد أكثر لكن كنت خلصان من السفر وكمان كنت صايم

اشكرك جدا على حفاوة الاستقبال

صدر العدد السابع عشر من مجلة رؤية مصرية بالمفاجأة القوية الجديدة .. تصميم وبرمجة مختلفين تماما ليواكبوا نجاحات المجلة ويتفقوا مع مادتها وأقلامها
دعوة خاصة مني أنا رئيس تحرير المجلة لزيارة المجلة والتفاعل معنا فيها وإبداء آرائكم .. سجل عضويتك وارسل مشاركتك .. معنا فؤيق كامل من المحررين والصحفيين يقومون لكل أعباء المجلة لتخرج لكم في أبهى صورة وأجمل منظر
ننتظر تشريفكم
دمتم بخير
إبراهيم العدوي

بجد مش عارف اعلق
لان فاتيما الوفيه
تتحدث عن المخلص القاضي
فتعتقدي هلاقي رد

أنا فعلا مبهور بالكلام الجميل اللي كتبتيه عني ده .. باتمنى فعلا اني اكون استاهله بجد .. لكن في كل الأحوال ده ان دل على شيء فانما بيدل على جمال روحك ونقاء وصفاء شخصيتك

مش هأقدر الاقي اي كلام ارد بيه على الكلام الجميل ده بجد .. ربنا يديم الود بيننا جميعا

adel
الله يبارك فيك يا عادل بالنيابة عن عم مراكبى ...
يا واد مجتش ليه دا مدونات كتيرة نوهت عن الحدث ...أعمل فيك إيه بس ؟؟
حوار الأزهر بارك دا أنا زيك فيه
إيه حكايته ؟!!!!

بسنت صلاح الدين
بصراحة يا بسنت مينفعش حد يعرف المراكبى و ميفرحش من قلبه عشانه
عقبالك يا حبيبتى لما نفرحلك كدا

فاروق عادل
إنت كمان حد جميل يا فاروق
و تغطيتك للحدث كانت مميزة
و متجيبش سيرة الهدية بقى ربنا أمر بالستر ....
لو سمحت تبقى تطمنا لما نتيجة التنسيق تبان يا فندم

hannoda
يا قمرايتى يا حزينة العينين
عاوزة أقولك حاجة و مش عارفة هتصدقينى و لا لأ ...هتصدقينى انا عارفة
لما كتبت البوست و دورت على غنوة مصاحبة ليه أوشكت احط غنوة محمد منير يا مراكبى !!!
و ترجاعت ف آخر لحظة ..عشان قررت احطله حاجة بعشقها و بحبها اكتر و هيا موسيقى خلى بالك من عقلك ..لن الفيلم دا بموسيقته له ذكريات عندى لا أحيا بدونها
و لأن المراكبى نبع الحكمة و عطر الذكريات فحبيت اخليها ف الخلفية لأنها شبهه ...حزينة جريئة رقيقة نافذة للقلب لا تنسى ...كل كلامك عن المراكبى أنا معاكى فيه جداااااااااااا
تواضعه هوه اللى خلاه ساكن فى قلوبنا و يصاحبه الإحترام و الود
لما تحطينى فى مكانة مشابهة ليه يا هنودتى تبقى بتدينى حجم اكبر من قدرى بكتيييييييييير ...
بس أنا فخورة بوصفك دا
لنه معناه إن احساسك ناحيتى يوازى احساسى بيكى و الحب الخالص اللى بينا مهما طالت المسافات و البعد
أنا بحباااااااااااك يا احلى قمراية إسكندرانية ف الكون

وومن
و انتى كمان يا ميرا
بتوحشينى قوى يا حبيبتى
و لما بشوفك بحس كدا إن الدنيا مليانة براءة غير معقولة
عقبال مجموعتك القصصية يا اميرة

الطائر الحزين
يا إيهاب إنتا وجودك فى حد ذاته
إنجاز و مكنش لازم حتى تتكلم و لا تفتح بوقك خالص ..
كفاية مجييك
أنا سعيدة إنى شوفتك
و سعيدة اكتر انك كما توقعتك
شفاف و خجول و طيب
بس اخيراً عرفت أسمع منك كام كلمة
بدل الاختصار اللى إنتا كنت معذبنا بيه يا راجل
و كمان عرفت عنك حبة معلومات حصريأ و ممكن اهددك بيها
زى مكانك فين
فى انهى محافظة يعنى لأن كتير و أنا منهم كانوا متحير فى موقعك ...
المهم إنه حمدلله على سلامتك
و يا ريت تيجى تنورنا كل ما ظروفك تسمح يا إيهاب
اما كلامك عن المراكبى ...
فمعاااااااك يا طائرى الحزين فى كل حرف فيه

كاتب مصرى
شكراً يا إبراهيم على دعوتك
و بالتوفيق دايما

محمد مفيد
يا محمد متحرمشى منك
بس الحكاية مش حكاية وفاء و لا حاجة
الحكاية انك قصاد شخص مميز جدا
مينفعش و إنتا بتكتب عنه متكونش بتكتب من قلبك
إنتوا كمان جزء من الصورة الحلوة دى اللى هتفضل راسخة فى الذاكرة طول العمر
كل الود ليك يا محمد

يا مراااااااااااكبى
متردش و تقول حاجة يا نبع الحكمة
بص بقى
أنا اللى مكسوفة منك جدا
و حاسة إنى معرفتش أقول ربع اللى كنت عاوزة أقوله
بس هوعدك أحاول احسن من أدائى
فى حفل توقيع الكتاب الجاى
إن شاء الله
أنتا شئت ام أبيت و غلاسة كدا
شخص فارق ف حياتى يا باشمهندس
مهما حاولت تتواضع و عارفة إنك قمة ف التواضع و يا ريت كلنا نبقى زيك
بس دى الحقيقة
و أنا خايفة المدام تقرى البوست دا
و تفتكرنى بعاكسك و لا حاجة
بس بجد شعورى نحوك شعور اخت ممتنة
لأخ كبير ليا و لم تلده امى
أنا بحس معاك بالسند المعنوى
و الونس و القوة اللى يمكن إفتقدتها كتير فى عمرى اللى فات ...
إنتا عندك قدرة مذهلة على إمتصاص الالم و التعلم من الازمات و تبسيط الدنيا المكلكعة ...
دى قدرة من عند ربنا كدا
و متحاولش تنفيها
إحنا اللى حواليك حسينها اكتر منك
و كمان ترسيخك لقيم بنتعمد ننساها عشان منتضايقش
بينما الضيق الحقيقى هيروح لو إفتكرناها و حولنا الألم لعبير ذكريات و نتعلم منها
و الاهم نتعلم منكررهاش
و متهيألى دا هدف كبير ليك
أنك تخلى الواحد يتعلم من الماضى
و يختصر مزيد من الاسى ممكن يكون أتى مهما حاولت أوفيك حقك مش هقدر
لكن هفضل اتمنى اكون من زوار مدونتك
و من محبينك اللى بيسعدوا بإسمك
ف صفحة تعليقاتهم
و يفخروا بإنك عارفهم و فاكر إسمهم
و لما بتشوفهم بتسلم عليهم بود و بنظرة عين حانية و متفهمة ...
يوووووه
هاقول ايه و لا إيه بس
أقولك
اغنيها و ادندن تانى ...
شد القلوع يا مراكبى ...
............
............

و الله مع ان فيه مدونات نوهت عن الحدث ، إلا ان الحدث انتشر بعد ما الحفل خلص ، تقدري تقولي ايه السبب .


و بعدين حاجة تاني ، كل حاجة كاتشاب كاتشاب ، ده أنا شوية شوية هخلي مدونتي كاتشاب

ثالث حاجة أنا كان نفسي جدا أروح ، و بدور على تجمعات زي ديه ، و خصوصا انها حفلة ، و انا بقى بحب الافراح - طبعاًً مش عشان أشتغل سعد صغير ، لا ، علشان أستمد من اللي حواليا فرحهم




عقبالك يا ماما


مع ان اسمي مش يوسف

لكن القلب ع القلب رحمة

اولا احب اقول
الف مبروك لتوقيع الكتاب وعقبال كتب كتير تانيه ان شاء الله
ثانيا
احب اقولك اغيب كتير مهما اغيب وارجعلك بيبهرني كلامك واسلوبك وحنيتك اللي بتفط من الكلام اللي بتكتبيه ايوه بتفط ملهاش اي معني او كلمه غير كده
بتحسسيني بدنيا تانيه بحسك حاجه تانيه
منا متنيله مبعرفش اكلم كلمتين علي بعض بس عاوزه اقلك كل مره بنبهر بيكي اكتر من المره الي قبلها
بحبك جدااااا والله وبحترمك اوي وفي حاجه بتشدني ليكي
وبتمني والله اشوفك واعرفك عن قرب
انتي حد جميل اوي
ربنا يفرح قلبك

أنا مش دخلت مدونته غير مرة أو اتنين، بس فعلا هوشخصية بحترمها جداجدا جدا و كتير بشوف تعليقاته عند المدونين التانيين وبحسه حد طيب ونصوح و صاحب تجارب غنية أوي

يارب يبارك له ويباركلك يا تمتومة :). فرحت بفرحتك اللي باينة في كل كلمة في البوست دي
يارب سعادتك تكتمل يا توما

و يحي قدري.. عندك حق. أسلوبه جميــل ماشاء الله

وحشتيني أوي أوي. حسيتها في البوست دة أكتر وأكتر

صدقيني مش بحب اعلقك علي موضوع مرتين
بس بجد كلامك لازم الواحد يعلق عليه
وزي ما قلت فعلاً يومها
مستحيل لما تلاقي كل الحب اللي بدون غرض او مصلحه ده بيتجمع في مناسبه زي دي
أكيد أحنا محظوظين

فاتيما ..

رمضان كريم ..
كل سنة وأنت بألف خير

أحببت أن أكون أول من يقولها لك
(بعد يوسف طبعا)



كونى بخير
وجميلة حبيبتى





أحبك وأحب يوسف

كائن الإبداع ....محمد
يا سيدى الاول نورت المدونة و أهلا و سهلاً بيك هنا
ثانياً مدونات كتير قالت عن اللقاء بس يمكن يكونوا من الدائرة المحيطة بالمراكبى يعنى احبابه اللى يعرفوه من سنتين و أكتر
اللقاءات بتتوالى و هتلاقى عندى ان شاء الله تنويهات مستمرة ف الشريط الجانبى ..
منهم لقاء يوم السبت الجاى و دوس ع الصورة هتلاقى التفاصيل
نورت يا كائن الإبداع

سمكه واحدة
أولا
الله يبارك فيكى يا سموكتى و عقبال عندك لما نجيلك ف الفرح إن شاء الله دايما
ثانياً
الحنية و الفرحة اللى بتقولى عليهم سببهم إنتوا يا سموكتى ... الواحد بيستمد منكم المشاعر دى و تسكن قلبه غصب عنه و ساعات تيجى مناسبة ما تخليكى تبعبعى لوحدك ...
أنا احمل حب و مشاعر امتنان عميق للباشمهندس احمد القاضى من اول يوم دخلت مدونته ...
و جت فرصة الكتاب عشان اكتب بوست أنثر فيه بعض من قطرات الود لعلى أوصل بعض من احترامى و تقديرى ليه مش اكتر
و بوسة و حضوناااااااات يا حبيبتى ليكى

wish i were abutterfly...
كلامك كله ف محله يا فراشتى الرقيقة ...
هو شخص غير عادى فعلاً و انصحك بدوام الزيارة لمدونته علشان هتعمل معاكى فرق ف نظرتك لبعض الأشياء اللى ممكن تعدى على الواحد و ميخدش باله من تاثيرها عليه ..
على فكرة إنتى كمان عندك شفافية فى رؤيتك للأخرين و للدنيا و ممكن تلاقى نقاط تلاقى كتير بينك و بين كتابات الإنسان الجميل دا
أنا كمان بحبك يا هبهوب
يا من غير ما توشى بترفلاية رقيقة صغننة

محمد مفيد
هوه حظ فعلاً يا محمد
بس كمان اختيار
ساعات حظك يوقعك فى حاجات غالية و ببساطة تسيبها و تمشى و متقدرش قيمتها كويس ...فى حالتنا دى إحنا كل اللى عملناه إننا عرفنا قدر هذا الإنسان الجميل و تمسكنا بالمحبة دى
و يا عم خلاص هتذلونا بقى عشان علقتوا مرتين فى بوست واحد و لا إييييييييه !!!
إعتبر واحد فيهم للمراكبى و واحد ليا و نبقى كدا ف السليم
خالص الود ليك يا عزيزى

زهرة الكاميليا
كاميليتى ى ى ى ى ى ى ى ى ى
أخيراص نور أسمك صفحة تعليقاتى يا حبيبتى
ألف حمدلله ع السلامة
عقبال ديوانك و حفل توقيعه نيجى نحضره إن شاء الله و نفرحلك و نفرح بيكى و معاكى
كل سنة و إنتى بألف خير يا حبيبتى و رمضان كريم عليكى انتى كمان و دايما سباقة بالخير
هكون بخير طول ما قلوب طيبة زيك بتفتكرنى و تيجى تسلم عليا و تسيبلى كلام حلو يشبهها ...
أنا كمان يا كاميليتى ..بحبك قوى

وحشتينى
وحشتينى
وحشتينى

اولا: مبروك عالشغل وربنا يوفقك دايما يارب ولو عاوزة اى اى اى حاجة ف اى وقت معاكى كل التليفونات اتصلى ف اى وقت وانا اظبطك

ثانيا: اشكرك شكرا جزيلا على كل التحيات والتقديرات الخاصة بعيد ميلادى واحب من موقعى هذا ان اكون اول المهنئين بعيد ميلاد يوسف اللى هيكون فى اواخر الشهر ده ويارب يكبر حبة حبة ويبقى احسن راجل ف الدنيا

ثالثا: بعتذر عن الغياب ولكن ضغط شغل مش اكتر مخليانى بتابع ف صمت كل كلامكم كالعادة

رابعاً: عاوزين نتقابل بقى علشان تشوفو البلونة اللى بانت وكمان تشاركو الاستاذ اللى جوه المراجيح اللى عاملها

خامساً: طلع ولد يا طمطم مش بنوتة صغنونة ويوسف مصر اصرار فظيييييييييييع على اسم عمر فطبعا لازم موافقة ماما فاتيما على ابنها التالت هيبقى اسمه ايه - فى انتظار موافقتكم واحبك تحطى فى اعتبارك ان يوسف بيقولى انا قلت عمر يعنى عمر فاهمة ولا لا يا ماما - فمورينى العين الحمرا - فخافى وانتى بتفكرى

بوسات من هنا لسوهاج رايح جاى
فرحت كتير انك كلمتى يوسف مرتين
يارب يكون بخير

يلا فى حفظ الله يا بطوطه
هبة

doba
يا دوبى إنتى كمااااااااااااان وحشتينى قوى و كنت متوغوشة عليكى
و بقى كدا الدكتور يقولك ولد ... تصدقى علطول
و لو
هتطلع بنت ... إن شاء الله
منا لما كنت حامل ف يوسف الدكتورة قالتلى بنوتة و أهو طلع أسد صغنن أهو ...
عموما مش هغلس ف الموضوع دا و أركب دماغى
يا ستى ماشى ولد ولد هوه احنا كنا طايلين ؟
و عاوزة أقولك إن إسم عمر
كان هيبقى أسم اول عيل كنت هخلفه من خطيبى الاولانى
و كان هيبقى إسم اول بيبى كنت هخلفه من حبيبى الاولانى
و كان هيبقى أسم تانى بيبى هخلفه من أبو يوسف لو كنت فضلت متكوساه
( يعنى موكوسة و متجوزاه فى ذات الوقت ) بس هوه لما وكس واحدة تانية
و إتجوزها خلف منها ولد و سماه عمر يعنى اخو يوسف الصغير عمر برضو
فيظهر إن الإسم متفق عليه من جهات متفرقة
و النصيب لازم يصيب
من غير يسوفه ما يجز على سنانه و يبصلنا شذرا..
أعلنها موااااااافقة بالإجماع ...
ربنا يجعله من أسمه نصيب كبير و يكون فى عدل سيدنا عمر و مكانه من الجنة يا رب
طلب مهم بقى لو سمحتى
ممكن تخلى بالك من نفسك و صحتك قوى
بفتكرك علطول كل ما أتزنق فى حاجة ف الشغل و بعدين اقول لنفسى هتعلم و اتحسن عشان تتفشخروا بيا كلكم و أولهم إنتى يا دوبى
بالنوسبة بقى للقاء الحريمى إنتى عارفنى ...قولوا بس امتى و فين و أنا على نن عيونى آجى و من الفجرية
بوسة و حضوناااااااااااااات للصبح

فاتيما
ازيك يا ست الكل
شوفي بقا انا حزعل بجد ايه غيابك عن مدونتي طول
ها
انا حزعل
هههههههههههههههه
ربنا ميجيب زعل يا رب تكوني بالف خير
و الف مبروك للبشمهندس
اول مرة اسمع عنه اروح بقا اشوف مدونته
مودتي

وااااااء

أنا كنت ناوية الاجتماع الجاي فعلا آاااجي :(. و من المرات "النادرة:))" اللي أعرف إن المدونين هيتقابلوا قبل ما يتقابلوا
:)))

بس انا مش هكون موجودة!! عشان هروح أصيف بكرة :(.كنت نفسي أشوفييييييك

الحمدلله بأة. يارب يكون يوم جميل أوي

assafi anaroze
اوعى تزعل منى أبدا يا أسافو
معلش إنشغالى عن متابعة مدونتك ليس مقصود اطلاقاً
المراكبى إنسان مميز قبل ما يكون مدون متميز و صدقنى ستكسب بمعرفته الكثير على المستوى الإنسانى
كل الود ليك بزاف بزاف

wish i were abutterfly...
يا فراشتى الرقيقة تسافرى بالسلامة
و المعاد إتحدد بالصدفة البحتة من عند ستوتة الغالية
بس متزعليش البت خوخة شكلها هتعمل لوكاء حريمى قريب
كان قوس قزح وش الخير هتعمل إفطار صائم فى رمضان بإذن الله
إن شاء الله تكونى رجعتى بالسلامة و تعرفى تيجى نشوفك يا حبيبتى
هاف أنايس فيكشان يا هبهوبة
يا من غير ما توشى بترفلاية رقيقة صغننة ... بحبها

وصف جميل كالعدة يا فطومه نابع من حد جميل زيك
وألف مبروك للبشمهندس كان نفسي أتواجد بس أنا لسه بره مصر ..ياريت لما أجي أشوفك
لك كل حبي

بالمرة بقى عشان انتي مش معانا عالفيس بوك

لينكات حفل التوقيع

أحمد شقير – حكاوي آخر الليل
http://shokeir.blogspot.com/2009/08/blog-post_17.html

حوار صحفي من إعداد وتقديم أسماء رمضان
http://www.facebook.com/home.php?ref=home#/note.php?note_id=119957450945&comments

فاتيما – روح قلب ماما
البر التاني
http://ro7albmama.blogspot.com/2009/07/blog-post_31.html

دار الكتب
أحمد القاضي : يجب ان نظل خارج دائرة التصنيف مقارنة بالمؤلفين الكبار
http://www.facebook.com/ext/share.php?sid=144845602624&h=eByMs&u=d79bs&ref=nf

خالو أحمد الصباغ
http://ahmedelsabbagh.blogspot.com/2009/07/blog-post_30.html

البوم صور عالفيس بوك – شيماء الكردي
http://www.facebook.com/album.php?aid=288576&id=904085276&ref=nf

البوم صور عالفيس بوك – أحمد الصباغ
http://www.facebook.com/album.php?aid=129745&id=560132151

فاروق عادل – يوميات طالي ثانوي
http://yomyattalb.blogspot.com/2009/07/blog-post_31.html

http://www.facebook.com/note.php?note_id=131282903551&comments
أعشق في الليل ضوء القمر
http://shemies.blogspot.com/2009/07/blog-post_22.html

إرسال تعليق