.

.

خليهم كدا  

Posted by: فاتيما in ,




شعرياتى البيض و مش عاوزة ألونهم
عشان بيفكرونى دايماً بيك
لما وعيت ع الدنيا
ولقيتهم تاج بيبرق فوق جبينك
كنت بخاف منهم زمان
و كمان منك
بس دلوقتى بقيت أحبهم
و بيوحشنى أشوفك وأشوفهم
كل ما أبص ف المراية ... الاقيك
اقول خلاص .. خليهم كدا
شعرياتى البيض و مش عاوزة ألونهم
عشان بيفكرونى دايماً بيك
و فراق ما بيننا و حكاية مخلصتش
وسنين طويلة علينا و مرت
وصحيح عايش ف بيت تانى
و حضن تانى
لكن إنتا لسه ساكن قلبى
كل ما أبص ف المراية ... ألاقيك
أقول خلاص .. خليهم كدا
شعرياتى البيض و مش عاوزة ألونهم
عشان بيفكرونى دايما بيك
بحتة منى كانت نونو صغير
بقى كل ما يكبر يوم
تكبر معاه الفرحة
وأقول إيه يعنى ؟
بيعدى العمر .؟! .. ما يعدى و مش هزعل
لما يبقى عندى شعريات بيضا
عشان يوم ورا يوم بتاكد
إن كل ما هيطولوا
كل ما هيزيد طولك سنتى
و كل ما هيكتروا
كل ما هتمر معاهم أيامك
و كل يوم هأبص ف المراية
الأقيك
و اقول كويس إنى قولت
هخليهم كدا
و مكنتش ابداً ... عاوزة ألونهم

عيرتنى بالشيب .. و هو وقار
و يا ليتها عيرتنى .. بما هو عار
ناظم الغزالى

This entry was posted on الخميس, أغسطس 06, 2009 and is filed under , . You can leave a response and follow any responses to this entry through the .

32 كــــلام بيطــبطـــب عـــلى قــــلبى و روحــــى

انا قلت مفيش زيك :):)
كلمات جميلة قوي و حستها قوي
ياماما(دي مش تريقة و لا بكبرك) :):)

هاقولك بعد كده يا ماما مع انك مش اكبر مني قوي يعني :):)

بس بجد الكلام تحفة قوي

--------------
حوار الازهر بارك
السبت 8/8/2009 الساعة 10:30 صباحا
في الازهر بارك
محدش يعرف حد اساسا بس انا هاروح لة ينفع تيجي تعالي ماشي

ده رقم تليفون مصطفي حد من المنظمين للقاء وانا برضه معرفوش :):)
0103076271 عشان لو جيتي متوهيش
قشطة :):)
-----------
يارب يطلع اول تحليق بقي :)

يا ستي اذا كانت كل شعراية بيضا بتزيد هتزيد قصادها سنة ف عمر روح قلب مامته وقلبنا كلنا يبقى معلش يا طماطم هدعيلك يكون عندك مليون شعراية بيضا.. ربنا يحلي ايامك وايام يوسف وتبقى كلها بيضا

صباح السعادة
الحق احجز المقعد الثالث

فاتيما الغالية
شوفي الشعر الابيض ما هو عيب و لا حرام
الشعر الابيض يمنح وقار للانسان
و في حالتك الشعر الابيض ارتباط بالاخر ارتباط بالذاكرة و احساس ان الابن البار بيكبر سنة بعد سنة
عزيزتي ربنا يرجع لك ابنك لحضنك و تأكدي مهما طال الزمان راح يرجع
مودتي

ADEL
مشكرين يا فندم على كل الكلام الحلو دا ...
و عالله لما أشوفك يوم السبت إن شاء الله متقوليش يا ماما و إلا ...
هحاول آجى بدرى و ربنا يسهل
هستنى قصاد الباب الرئيسى و متسيبونيش أتحمص ف الشمس يا عياااااااااااال
سلام مؤقتاً يا ابوقلب طيب




BOBO
الله
حلوة قوى الدعوة بتاعتك دى يا هبة
حلوة زيك و زى عمر و باباه
متحرمشى منك يا حبيبتى



ASSAFO ANAROZE
و الله يا سافو دا نفس رأيى
الشعر الأبيض وقار مهما حواليا ناس عمالة تقولى أصبغيه
و انا فخورة بيه و حاساه فعلاً وقار و شىء يزيدنى قيمة مش العكس مهما رأى الناس مكنش كدا خصوصاً الستات .
كل الود ليك
و ربنا يسمع منك يا عزيزى

ربنا يزيد من شعرتك البيض و
يزيد معاها ف عمر يوسف

بدعى لك من قلبى ربنا يرجعه لك
و تضميه لحضنك و تفرحى بيه وهو عريس
و يومها تحنى شعرك علشان تدارى الأبيض
لأن و قتها مش ها تشعرى بالسنين الى مرت
ها تحسى بيه لسة طفل صغير محتاج حضنك
ووقتها حضنك ها يكون أكبر يتسع ليوسف و حبيبة يوسف و أولاده كمان .
ربنا يهنيكى و يسعدك

ربنا يخليكى له ويخليه ليكى ويرجع هو عشان يمحى الالام السنين ويرد الروح لانه ساكن الروح

السلام عليكم ورحمة الله وبركاته

طمطم


انت جميله اوي يا طمطم وكلماتك كمان جميله اوي


كل سنة وانت طيبه

اللهم بلغنا رمضان واجعلنا من صوامه وقوامه
آمين

كلامك رقيق اوي اوي
بيلمس القلب ويدمع العين
ربنا يحفظه يارب
وقوليله كل يوم
استودعك الله الذي لاتضيع ودائعه


ربنا معاك يايرب
ان شاء الله هيرجعلك

وحشاني جداااااااااا وعارفة اني بقالي كتير مزرتكيش يارب تكوني لسة فكراني
يا ممتي

السلام عليكم

ازيك يا ام يوسف وازى اخبارك

كل سنه وانتى طيبه يا حبيبتى

ربنا يسعد قلبك ويرجعلك الغايب

بالسلامه

وبعدين مفيش اروع من الشعر الابيض

والوقار اللى بيديه لصحبه

بس اهه انا بقولك لصحبه مش لصحبته

ههههههههههههههههههههههههه

ربنا يفرحك ويسعد قلبك يارب

وتشوفى يوسف عريس كده وتفرحى

بالقطاقيط ولاده وهتبقى احلى واطيب

تيته فاطمه فى الدنيا

تقبلى تحياتى

فى حفظ الله

من قلبك الصادق احسسنا بكل ما تحوية من مشاعر نحو ابنك الحبيب

يارب اجمعهم على خير يارب

اوعي تلونيهم
الشعر الابيض دة تاج يزين اي رأس
رجل او امرأة

مهما تحاولى تكبرى نفسك برضه انتى صغنونه
ربنا يبارك لك فى عمرك ويجعله كله فى طاعته
انا بحب بيت الشعر ده قوى لانه بيفكرنى بانسان غالى عليا
كان صديق بابا وكان دايما يقوله

انا منقطعه عن التدوين بس عند فاتيما استووب محدش يقدر يتكلم
ولازم ايدى تاكلنى واعلق


اتمنى يوم السبت يكون يوم سعيد
هاتشوفى الدكتوره ستيته( خالتى حبيبتى)
وهاتشوفى الواد عادل اللمض (صديقى اللدود)
يابختكم ببعض
اجدع صحبه كنت اتمنى انى اقابلها من زمااان
افتكرونى فى اللقاء
وتاكدى انى بروحى معاكم
سلميلى على ستيته وبوسيها ياطمطم
وطبعا هى عارفه انا بحبك اد ايه وانتى كمان عارفه انا باموووت فيها اد ايه
ربنا يجمعنى بيكم قريب يااااااااارب
اكيد مش كبيره على ربنا لانه قادر على كل شئ

تحياتى يااغلى من حياتى

يارب واحنا فى ايام مباركة يرجع يوسف لحضنك ومتتحرميش منه ابدا اللهم امين
بحبك يا فاتيما اوى والله ونفسى اشوفك مبسوطة عالطول والشعر اللى بيبض بيدل انك احن ام واحسن ام انا شفتها ربنا يخليكى لنا وكل سنة وانتى طيبة
تحياتى ليكى

لما اشوفهم هقولك
كل سنه وانتى طيبه يا طمطم

كلمات حلوه جدا ومعبره جدا قد ايه انتي جميله بجد ربنا يرجعه لحضنك يارب امين

الله عليكى يا جميله و على احساسك الرائع،ربنا يطمن قلبك و يرجعه لحضنك امين يارب

فاتيما العزيزة
--------------
وارق ام .. اعترف بان مقل فى زيارتى هنا .. ولابد ان اقر بان زيارتى تملؤنى اشجانا لااستطيع الفرار منها ..

مشاعرك دون مجاملة .. واحساسه كل محبيك بها تحصدينه فلا تحتاجى منى اطراءا .. لانك اهل لجمال الكلمة التى تكتبيها باحساسك قبل فكرك

لك ان تتزينى سيدتى كما يحلو لك .. فهذا لا يغير احساسنا .. لاننا فى عيون الآخرين .. والشعر الابيض من الوقار هذا صحيح .. وقد كان الرجال اولى به ..

لكن للأسف الرجال هم الذين يصبغون .. وفقط فى بلاد المسلمين .. فانا لم ارى كلينتون ولا بوش ولا تونى بلير ولا يلتسين يصبغ ..

هونى على نفسك .. فالعواطف لاتحكم بالقانون .. ومصيره حين يشب عن الطوق .. وهذا قريب باذن الله .. سيبحث عن حضن امه .. وساعتها سوف يريد ان يرى امه كما بعد عنها .. لا وقد فاته الكثير .. بالتأكيد ليس أبيض

فاتيماحبيبتي
أنا فعلاً كتيير بحس ان مفيش أم في حنيتك وصبرك..و كتير بحسدك على كمية العطاءاللي عندك وبحس انها مش عند أي أم..ياا رب يا يوسف ترجع بقى عشان مفيش في الدنيا بحالهاأم في حنية أمك ولا في صبرها

كل سنة وانتى طيبة
وبعدين ماله الشعر الابيض ده وقار
اه وقار
حد معترض

تحياتى الجميلة لك ولشعراتك البيض


كلمات جميلة


كريم بهي

لونيهم وافتكرى عدد المرات اللى عملتى كدة

صدقينى كدة احسن

كالعادة

إحساس وقوة وتعبير جميل

تحياتي يا خالتي

اول لما قعدن قدام جهاز كمبيوتر دورت على اللينك بتاعك

اتمنى اني ازورك على طول وتشرفيني بزيارتك

السلام عليكم فاتيما هانم

حمدا لله على سلامة رجوعك ام يوسف ودعواتى لك بالتوفيق

كنت رائعه اليوم وبكره ان شاء الله اكتب عن اللقاء عشان انا اليوم مش قادر افتح عينى

تحياتى لحضرتك

حلم كان
ميرسى يا حلم ..و إنتى كمان ربنا يزيدك و يطول ف عمرك بس يكون مليان فرح و خير



ام بتول
متحرمشى منك يا اجمل الامهات
أبداً أبداً




لا تشتاق
حلو قوى قوى الأسم دا
بس تقريباص مستحيل ان لا أشتاق
و لا إنتا كمان ..مش كدا ؟
نورتنى




خمسة فضفضة
و عليكم السلام يا فضفوضتى
إنتى اللى جميلة و إنتى كنتى وحشاااااااااانى قوى
كل سنة و إنتى بألف خير يا حبيبتى
و فضفوضتى





شباك موارب
يا منار إنتى بتقرى بقلبك
عشان كدا بتدمعى ...
ربنا يسمع منك يا حبيبتى
إنتى بتكتبى كام كلمة جنب بعض و متتصوريش ممكن يعملوا فيا إيه لما بحسهم طالعين من القلب ...يعنى آخر أربع كلمات دول ...بشكرك عليهم من قلب قلبى يا منار فوق ما تتخيلى



حرووووووف
طبعااااااا يا بسكوتاية فاكراكى و وحشتنى كلمة يا ممتى الطعامة دى منك
كل ما أشوف قطط صغنونة أفتكرك إنتى و هنودة قوى ...يا رب تكونى دايما بخير يا حبيبتى
بوسة و حضونة ليكى



ليس فقيرا من يحب
و عليكم السلام
أنا بخير يا رانيا .. و إنتى ؟
يا لهوى ..تيتة فاطمة ؟؟
يارييييييييت ..معقولة ؟!!
ربنا يسمع منك يا حبيبتى
متحرمشى منك و لا من طلتك عليا

صباح الصباح
متحرمشى منك يا محمد


A.SAMIR
حاااااااااضر يا احمد
علم و ينفذ يا فندم
مفيش اخبار حلوة جاية ف السكة عاوزين نفرح فيك يا جدع ؟!!



عاشقة الرومانسية
يا عروسة البحور أنا فرانة اللى سمعت صوتك النهاردة
الشعر الأبيض بيفكرنى ببابايا برضو و دا كان ف الجزء الاول من الكلام
قابلت ستيتة و عادل و يا لهوى عليهم يا دودو
إيه الجمال و الاخلاق و الود الصافى دا ؟؟
طبعا ...اصلاً محدش ييجى من طرفك و ميبقاش حلو ؟!!!
بحبك قوى و خلى بالك من نفسك و النبى




مى
يا رب يسمع منك يا ميوية
أنا مبسوطة بيكم يا حبيبتى
كل الود ليك




APPY
لازم المعاينة يعنى
يعنى هخلع راسى و لا هكشف راسى و ادعى على اللى ف بالى ؟!!!
كل سنة و إنتى قمر التدوين كله اللى منورنا




حاسوباتية
متحرمشى منك يا حبيبتى



بسنت صلاح الدين
الله عليكى إنتى يا توتة
متحرمشى من دعواتك الحلوة دى



SHERIF
يا استاذى مش مسالة كم و لكنه غزاى
ليس ضرورى تعليقك دائما ..حضورك طاغى و إنتا مش واخد بالك يمكن
لكن أنا حساه و من غير ما تقول خالص
نظرتى مشابهة لحضرتك ..لما نخجل من الشعر الأبيض و هو دلالة على النضج
و الخبرة
و الوقار
و عبث الأيام بنا
و إنتصارنا عليها رغم كل شى ء
كل الود ليك يا أشيك من عرفت



DAHLIA
يا دودى إنتى علطول كدا شايفانى بعين المحبة و بتبالغى
و لا لأ هقولك ..الحب عمره ما كان مبالغة ..أصل إنتى شبههى فى حاجات كتير
فيه ناس التجارب و وطاتها بتغيرهم للأسوا و فيه ناس الصعاب بتخليهم اكثر سلاسة و تدفق ف المشاعر
غنتى من النوع الاخير دا
بحبك قوى قوى




همس الاحباب
و إنت طيب يا غالى
وقار يا عم حد فتح بوقه
أنا معاك يا ريس
بوسلى هموسة و سلامى الكتييييير لمامتها لو سمحت




كريم بهى
تحياتى ليك إنت يا كريم
و بهى




الطائر الحزين
إنت أصلك متعرفش اختك يا إيهاب
لو فكرت أقص شعرى او ألونه او حاجة كدا هعتبره نوع من الخيانة ...
آه
أصل شعرى بالنسبالى رمز كدا للحياة
عارف قصة السنة اللى فاتت لما زعلت و سافرت و الحكاية دى ...فى غمرة اليأس و الزعل مسكت المقص و قصيت شعرى
كنت حزينة و حبيت اخلى شعرى يحزن معايا ...
جنان
متقولهاش أنا قولتها قبلك أهو
بس هيا علاقة غريبة كدا
كل الود ليك يا طائرى الحزين


صاحب المضيفة
و كالعادة
اخى الصغير الجميل يا انس




احمد أبوالعلا
شرف ليا يا احمد إنك دورت على مدونتى
و شرف ليا إنى قابلتك النهاردة
تقبل كل ودى و تحياتى و سعادتى بيك
و بيكم كلكم



فشكووول
حمدلله على سلامة حضرتك كمان
أنت نورتنا النهاردة و يشرفنى إنى أعرف حضرتك و يا ريت تبلغ سلامى لسوما الغالية و تسلم لنا على احمد بالداااااال لو سمحت مش القاف
تحياتى أنا كمان لحضرتك

مكنش قصدى على الشعر بقدر ما كان قصدى ان تخلى الحياه تسير فى اتجاهين مش لازم فى اتجاه واحد

الطائر الحزين
وجهة نظرك صح ألف ف المية يا إيهاب
لكن ساعات الواحد يتمسك بشىء ما عشان قناعة معينة ف نفسه
و كمان إن شالله لمجرد إنه يشعر بالرضا عن نفسه
متحرمشى منك أبداً

ههههه برضو أنا قررت اقرا من الأخر لاول راسي ناشفة هههه

عندك حق تلونيهم ليه طالما بيفكروكي بيه ؟

وبجد أنا بحبك أوي يا فطيمة ويارب الجواب يكون عجبك

تحياتي مبتسمة دائماً

إرسال تعليق