.

.

لـونّها  

Posted by: فاتيما in


النهاردة كان يوم لقاء المدونين
صاحبة الدعوة ... ستوتة حبيبتى
ستيتة حسب الله الحمش على سن و رمح
و أعلن عنه فى مدونات كتير
المكان ... حديقة الازهر بارك
الزمان ... بدءاً من عشرة و نص صباحاً
و رقمين موبايل عشان اللى تايه و محتاس ف السكة يبقى يتصل
و بعد نشر البوست و وعود ممن ناوى ييجى و اللى ناوى مييجيش
جه يوم السبت الموعود و فى المكان و المعاد
كان اولنا مجيئاً
مصطفى الشهير بالمعتصم ... مش عارف
اللى إستقبلنى ببشاشة الصعايدة من على الباب
وأثناء إنتظار الحضور قعدنا نرغى و نخمن ف الوشوش اللى داخلة
مين فيهم مدون و مين لا
قولتله المدون بيبان من نظراته الباحثة .. و فيه ناس محترفة فى معرفتهم
الله يصبحك بالخير يا خالد همس الاحباب
بدا المدونين فى التوافد علينا .. و مش فاكرة الترتيب طبعااااااا
الالزهماير يا عيال ...
بس قائمة الحضور كالتالى
عادل .. البلد دى فيها حكومة
ميمى ...Mimaya
أحمد ابوالعلا
محمد غاليه .. هل تبحث عن السعادة
بدراوى ...طعم البيوت
خالد فودة ..الباحث عن المتاعب
رامز عباس
Eno ...رقة الإحساس
الإستاذ صلاح ...فشكول
د.ياسر عبدالفتاح ... ومضات
فتاة حالمة .. عيش أحلامك
كيكى ... fokaak meny
رنيم ... مبتسمة دائما
هند ... دموع الملائكة
إيمى ... غلطة مطبعية
صلاح .. مسدس صغير
مصطفى حسان .... هرتلة
هانى ... نط ف الكوز
و طبعا
س س ... يعنى ست الكل ستيتة ..مش عارفة بس نفسى أعرف
و مصطفى او المعتصم .. مش عارف
كالعادة ... لا يخيب رجائى و توقعاتى
و الحضور جميعهم و بلا إستثناء تقريباً .. كانوا مميزين و محترمين
الحوار اللى دار ما بيننا كان حوالين مواضيع مختلفة
طبعا أبرزهم التدوين و أثره فى حياة كل حد فينا
حقوق الملكية الفكرية و المحافظة على البوستات عشان متتسرقش
الحلو و الوحش اللى كل حد قابله من وقت ما دخل العالم السحرى المسمى المدونات
حرية الرأى و ثقافة الإختلاف التى يجب أن تحترم دائما
تحديد يوم ثابت كل شهر او كل مدة يكون مقدس بدل الأيام المتفرقة دى
اللقاء الجاى هيكون إمتى و فين ؟
حفل توقيع ديوان مصطفى حسان و أستغلينا الولد أسوأ إستغلال
و ألقى علينا كام قصيدة و تألق جدا بصراحة
كمان د. ياسر عبدالفتاح ربنا فتح عليه بقصيدتين ..بس عجبتنى الاولى اكتر يا دكتور
إتكلمنا عن الإنتماء و الجميل إن الموضوع دا شاغل قلوب و عقول الناس كلها
و دا شىء مبشر إن لسه فيه خير
كمان جبنا سيرة البت الشقاوة مونى الشريف و الفيلم الكوميدى الطحن
اللى هتنافس بيه احمد مكى و احمد حلمى الموسم دا
و اللى عملته فى أغلب البشر
لما الهااااااااااانم أل قلقانة عشان نازلة مصر لوحدها
و كتبت رقم موبايلها غلط و بتقول للعالم كلها
طب يا ريت يعنى أل يبقوا يكلموها على الموبايل و ياخدوا بخاطرها
تقوم الناس بسلامة نية يكلموها .. فيروح صاحب النمرة ( الغلط )
يريح معاهم ف الكلام حبتين
و طبعا الكل إستبعدواااااااا تماماااااااا إن مونى بتعمل مقلب .. هاه
اخدينلى بالكم
ملاحظات .... بس مش عابرة
الواد عادل دا خلاص هيبقى إبنى بالتبنى ... و طلع أطيب قلب زى ما قلت
و شبه احمد صلاح السعدنى يا عياااااال
طبعا ... ما هو انا أصلاً مبجبش إلا ولاد زى القمر !
الأستاذ فشكول شخصية محترمة .. و كان فخر ليا
إنى أعرف إنه بطل من أبطال اكتوبر
بدراوى عاوز يهج من التدوين .. خسارة يا شيخ و متعملهاش
خالد فودة ..هادىء لكن مبشر
إينو كالعادة .. الرقـــة و الاحســاس
غلطة مطبعية ..الدكاتورة بتدرس طب بيطرى و بتخاف مل القطط !!!
هند دموع الملائكة إسم مدونتها بالفرنساوى و كل ما تنطقه ... نتنح !
كيكى فكك منى .. مش تقولى يا بنتى إنك اللى كاتبة حبيبى يا أبو أشرف ؟!!
د. ياسر ومضات شخصية محترمة و تستحق المتابعة فعلاً
هانى نط ف الكوز شكله حكاية كبيرة قوى و رايح الساحل الشمالى يا عم
إبقى طمنا عليك
رامز عباس ..إعاقته السمعية لم تمنعه ولو ثانية عن المشاركة و بإيجابية فى اللقاء
حقيقى إنا فخورة بمعرفتك يا رامز
محمد غالية .. إنتا عارف رأيى فيك ..إنتا حاجة تفرح يا بنى
و اختك نورتنا و صدعناها
أحمد أبو العلا .. شخصية جد قوى و مهذب قوى و محترم قوى
صلاح .. مسدس صغير .. إيه يا بنى كم الطيابة الرهيبة اللى عندك دا ؟!!
مصطفى حسان .. شاعر حقيقى مش بهزار و لا هرتلة
فيه بنوتة كتكوتة إسمها رنيم و مدونتها مبتسمة دائما ...البونية أصلاً منقبة
لكن إبتسامتها باينة من تحت النقاب .. بصراحة تخطف قلبك ببراءتها
و كان معاها اختها اللى متقلش عنها رقة و اخلاق
مصطفى يا مش عارف .. المرة الجاية تنزلنا كايرو إن شاء الله
و إنتا لابس دبلة العروسة اللى بجد .. ربنا يسعدك
أخد نفسى بقى
عشان أتكلم عن الكوم الكبير و س س
ست الكل .. ستوتة حبيبتى
بس اقولك إيه؟ ماهو ساعات الكلام بيبوظ المعنى و ميوصلش حاجة
إنتى إنسانة جميلة من اول طلة ف وشك و يا ستى تعيشى و تجمعينا كدا
بصراحة لما سالنا النهاردة كل واحد إيه احلى ما صادفك ف التدوين
وإيه أسوأ ما شوفته ؟
تقريباً أنا الوحيدة اللى ملقتش حاجة وحشة أقولها
يمكن أكون حالمة حبتين .. بس عندى اسبابى يا جماعة
طب يعنى لما يكون الجمع النهاردة كان فيه شباب زى الفل و بنات زى الورد
و رجالة و ستات لأول مرة تقريبا بيشوفوا بعض
صحيح فيه توجس و لو بسيط و قليل من الرهبة و الخوف من الإحباط
لما كل دا يتلاشى فى اقل من نص ساعة و اللى يشوفنا من بعيد قاعدين
يقول دول عارفين بعض من سنين .. يبقى أنا متهيألى و لا الواحد بيبالغ؟!!
طب لما الولاد الصغيرين اللى فى عمر اخواتى و ولادى
يبقوا بالجمال و الرقى و المواهب المبهرة دى
اللى بيقول شعر عامى زى مصطفى حسان ولا شعر فصحى زى ياسر ومضات
و اللى مجنون سينما و مبدع زى عادل و غيرهم و غيرهم
طب مش الواحد المفروض يكون فخور بالعيال الحلوة دى ..و لا الواحد بيبالغ ؟؟!
لما حد زى مصطفى ييجى من آخر الدنيا و لا بدراوى و صلاح مسدس صغير ييجوا من سفر
عشان يقابلونا و يعملوا لنا خاطر
طب مش دى حاجة تخلى الواحد حاسس بإن الدنيا لسه بخير ...و لا ببالغ ؟!!
لما صغار السن زى خالد فودة اللى مخلص ثانوية عامة و رنيم المبتسمة دائما
اللى فى عمر الوردة 14 سنة يكونوا مدونين و تتكلم معاهم دون أن تشعر إن فيه
و لو سنتى واحد مسافة بينك و بينهم ف التفكير و تفرح من كتر النضج الفكرى اللى هما فيه
طب المفروض وقتها قلبك يتنطط من الفرحة .. و لا الواحد بيبالغ ؟؟!!
طب لما نبقى قاعدين و تيجى سيرة الاحباب زى خيخة و دوبا
و غادة عبدالعال و رحاب بسام
و الصباغ و سوووو الغالى و وش الخير داليا قوس قزح و آبى هانم بتنجانى
و قلم رصاص و بنجاواتى و عمرو حبشتكنات فلسفية
و البت المشمشية وآيوشة و رئيس جمهورية نفسى و سبهللة
و ميخو و ... و .... و غيرهم من أسماء الأحباب
طب لما ناس حلوة متقدرش تيجى و تتصل ف الموبايلات و تحرص على السلامات
زى أخويا الغالى خالد همس الاحباب
و عروسة البحور دودو عاشقة الرومانسية حبيبتى
والطيوبة عاشقة و غلبانة
الجميلة ام مالك صاحبة الدعوات الطيبة
و عين حماتى فيها عود
و غيرهم ...مش يبقى عندى حق ؟!!
و مبقاش ببالغ فى مشاعرى
حقيقى اليوم كان جميييييل .. ربنا يعيده و يكتر من أيامنا الحلوة
قبل ما أنهى التقرير المفصل دا فيه
كام حاجة عاوزة أقولهم فى الآخر كدا
(1)
الشاعر الجميل مصطفى حسان حفل توقيع ديوانه حدوتة الشاطر مفيش
يوم الخميس الجاى فى مكتبة البلد - بجوار الجامعة الأمريكية
مبروك يا مصطفى

(2)
حفل إفطار الصائم و تجمع المدونين ف رمضان بدأ الترتيب له
و التفاصيل هنا عند خالد همس الاحباب
هنا

(3)
ستيتة ناقشت موضوع مهم عن الإنترنت و الإستغلال
و دعوة منا للإعتراض عليه و التفاصيل هنا


(4)
بحبكم و فخورة بيكم جدا
يا احلى صحبة و ناس و عالم



الدنيا لو جارحة

لونها لون فرحة


This entry was posted on السبت, أغسطس 08, 2009 and is filed under . You can leave a response and follow any responses to this entry through the .

72 كــــلام بيطــبطـــب عـــلى قــــلبى و روحــــى

اول تعليييييييق
:-)
لسة مقرتش مش فاضى
معلش
مسافر القاهرة بكره تانى

تاني تعليق بعد بدراوى افندى فين الصور يا با طلعها يا معلم لانت حر بقا



الاخت العزيزة تكلمتي عني بصورة جعلتني اشعر شعور رائع بجد كلام كبير من قلب احتوى اللقاء بحب هو قلب ستيتة لقاء حلو جدا جدا


وبعدين اعاقة ايه بس ده نص الناس في مصر مش مصدقيني


يارب بخير دايما ليا رجاء انزل صورك في التغطية ولا مش مسموح وياريت لو تنفذيلي الرجاء ده تنزلي تحديث صغير اعرف منه هل باستطاعتي انزل صوركم ولا صور الشباب والرجال فقط علشان مبقا محرج

يا روح قلب ماما يا ناشرة السعادة
وكل إبتسامتك أصالة وطيبة زيادة
وقلب يحب بإخلاص جميل كأن المحبة بقت من العبادة

يا روح قلب ماما تحيةوسلام وأمنيات بالسعادة

اكتر حاجة مضايقني
اني ملحقتش اول تعليق :):):)

بجد انا انبسط قوي النهاردة شكرا ليكم كلكم و خصوصا انتي و سامبا بتاعت يوسف
و يارب المرة الجاية يبقي معاكي في اللقاء
انا مستني الافطار من دلوقتي عشان هنتقابل :):)
وبجد في ناس غيرت فكرتي عنهم و بحي ناس تانية بس هابقي اكتب ده بقي :):)

شكر خاص ليكي بجد و طبعا لدكتور ستيتة
بس شكر مخصوص ليكي قوي قوي
و هاقولك ياماما بس مش هاقول عشان انا كبير قوي :):)

انا مبسوطة قوي
ومبهورة قوي
وطايرة في السما السابعة

تعرفي يعني ايه اشوفك؟
تعرفي يعني ايه احس فعلا اني بحضنك من غير احضان؟
يا بنتي "ايوه بنتي طبعا" انا بحبك كلمات فما بالك رؤية وسماع ومشاركة وابتسامة منورة

اللقاء كان تحفة وياريت تكوني ها تيجي الخميس عند مصطفى حسان تاني

انا مبسوطة بعادل لأني مكنتش اعرفه بس متوقعة انه حلو كده
مبسوطة بقى بالباقي لأني اغلبهم اعرفهم من حروفهم وهم مطابقين للحروف دي بالمللي

ربنا يجمعنا بيكي انت ويوسف في رمضان
آمين
آمين
آمين

قولي آمين

بحبك

السلام عليكم ازيك ياام يوسف اخبارك ايه من زمان مجتش المدونة اسفة على التقصير ده واتمنى تعذرونى بجد
كان نفسى اكون معاكم فى اللقاء ده بس اتمنى الظروف المرة الجاية تكون سامحه ويكون فى لقاء تانى باذن الله
انا قولت اجى اسلم عليكى علشان انا من فترة غايبة عن مدونتك الجميلة

فاتيما
يسعد مساك
انا فرحان لفرحكم و للمتكم الجميلة
انا دلوقتي بحلم و كاني في وسطكم و كان نفسي و منى عيني احظى بشرف اني اكون مع ناس زي حبيبي عم صلاح ابو زيد فشكول
ممكن ربنا يحقق امنيتي بزيارتك يا مصر يا ام الدنيا و اشوفكم
مودتي

بدراوى
منور المدونة يا أستاذ
حمدلله ع السلامة
و يا ريت تستمع للنداء اللى ف البوست و متعملهاااااااااش




رامز عباس
بصراحة يا رامز ليهم حق ميصدقوش
انا مبهورة بيك و بحماسك و بالكلمات الجميلة اللى صوغتها النهاردة و إنتا قاعد معانا ...و اللى كتبتهالى كمان كلك ذوق ..أشكرك
بالنوسبة لموضوع الصور دى بقى فهقولك زى ما يوسف كان بيقول ...
ننوع
أيوه ننوع تحطلى صور يا فندم الله يخليك يعنى لدواع امنية و كدا ...
بس لو فيها رزالة ممكت تبعتهالى على الإيميل بتاعى عشان يهمنى احتفظ بصور لليوم الجميل دا معاكم
كل الود ليك و متقطعش الزيارات

ADEL
يا واااااااد متزعلش
اول تعليق اخر تعليق دى مدونتك خلاص مش أنا إتبنيتك رسمى يعنى عيش حياتك فيها و لا يهمك ...
إنا منتظرة البوست بتاعك بس الجملة اللى كتبتها قلقتنى ..اوع تزعل حد منك ..هاه
و إن شاء الله تكون معانا ف رمضان اومال هتسيب مامتك فاتيما تروح كدا من غير ردالة ؟؟
يا رب
يا رب يوسف يكون معانا
يا لهووووى دا ممكن يغمى عليا مل الفرحة وقتها ...أبقى إديله شوية من خفة دمك و طيابتك و اخلاقك العالية
كل الود ليك يا اطيب قلب




ستيتة حسب الله الحمش
مبسوطة قوى ؟؟
مش قدى يا س س
بصى أنا سعيدة لأن إحساسك دا كان عندى فى اول لقاء تدوينى ..لأنه مر بكل خير و دون أى شوائب
كنت طايرة كدا برضو
و الحمدلله الحال لم يتغير للآن و يا رب دايما
إن شاء الله جاية لمصطفى ..الشاب بصراحة حد موهوب و يستاهل كل خير
مشاركى جدا فى الإنبساط بعادل ..ربنا يحرسهم كلهم يا رب
ميرسى يا ست الكل ع التوصيلة
و على الدعوة و على اليوم الحلو بسببك إنتى و كل الاحباب
آمين
آمين
آمين

آيوشة
أزيك إنتى يا أيوشة
بتعتذرى ليه ..كلنا بييجى علينا وقت و ننشغل و ننقطع و نعود ...
المهم إنك بخير الحمدلله
جبنا سيرتك النهاردة و بالخير طبعا
المفروض تكونى حكيتى و شرقتى و كدا
صح؟؟!!!




ASSAFO ANAROZE
إن شاء الله تنورنا ف مصر يا أسافو ونعمل لقاء ليك مخصوص
الأستاذ فشكول شخصية محترمة و مميزة
كل الود ليك يا عزيزى

لا انتي فهمتي غلط :)
انا قصدس انا كنت الصراحة متوجس اللقاء بس بعد كده انبسط قوي و ده قصدي :):)
بالعكس الناس كلها عسل بجد :):)

وانا بس اشوف يوسف ده :):)
انا اللي احتمال يغمي عليا :)

لا و جاي الفطار اكيد :):)
حد بسيب ماماته :)

فاتيمااااااااا

هههههههههههه ليه الفضايح دى على بلوجر بس انا بخاف من القطط لاسمح الله

وش مكسوف

بجد والله انا حسيت فيكى بحنية كبيرة اوى وقلب يساع الكل

تحياتى يا اجما اخت

ايمى

غلطة مطبعية

يا اجمل اخت مش يا اجما اخت

علشان تعرفى انها اسم على مسمى ههههههههههه

أول ما قريت البوست اتصدمت يا فاتيما..أولاً لأنيكنت في القاهرة النهاردة..و ثانياً لأني الساعة 5 كدة كنت رايحة حديقة الأزهر لولا الحر!!كان نفسي أشوفك قوي بس ملحوقة ان شاء الله..و الحمد لله انكم قضيته وقت جميل زيكم.بحبك قووويي

ياهلا ياهلا يا ماما
بجد بجد سعيد بكلامى معاكى النهاردة
ربنا يكرمك ويسعدك دايما

ايه دة كل دة حصل وانا فين طب كونتي قوليلي يا قاتيما ما أنتي عارفة انا بقيت لا شغلة ولا مشغلة معلش تتعوض إن شاء الله

المهم أن اليوم كان جميل وكلكم أنبسطم وحلوة فكرة توقيت للتجمع يكون معروف للجميع

عقبال كل التجمعات الجاية إن شاء الله

اية دة مش خدونى معاكم لية
فينا من الحركات دى
لو قررتم تانى قولولى وبلاش تنفيض
انا فرحانة لانكم انبسطوا ربنا يديم المحبة بينكم

على فكره انا زعلان بقي ولاحد عزمنى ولا اى حاجه ولاعشان انا جديد طيب والله زعلان بس يلا كرما منى هزور برده مدوناتكم ومتعودتش اكون منافق يلا مش زعلان
اعمل قلبي الصغنون مش مطاااااوعنى
ربنا يارب يجعل كل الموجودين هنا اخوات ونعم الاصدقاء وربنا يسترها معاكوا جميعا

بجد كان لقاء جميل جدا وسعت بمعرفه حضرتك جدا جدا
انا كمان كتبت عن الموضوع
وعندي الصور للي عاوز صور يقووووووول

السلام عليكم

أكيد كان لقاء جميل و ممتع
لأنه في مكان جميل
وجمع ناس حلوين
وجمع بين أفئدة وعقول نيرة
فكل المقاييس تجمعت ليصبح لقاء رائع
ان شاء الله يتكرر
ويزيد العدد والعدة والتعداد
والاجمل أن نلتقي في الله ولله


تحياتي

adel
بعد الشررررررر عليك من الاوغماءات يا بنى ( أصل يوسف كان دايما يحط واو زيادة فى الكلمات ..يعنى مثلاً عندى اوكتئاب ..اوغماءة .. ألخ )
و كويس إنك طمنتنى
منتظرة البوست بتاعك عشان احطه فى القايمة الجميلة ف آخر البوست
خلى بالك من نفسياتك لحد ما نشوفك تانى
و جميلة قوووووووى ماماته دى
ربنا يسعد قلبك يا عادل
بجد





emmy baby
لا فضايح و لا حاجة أنا بحطك ف مزنق تاريخى بس ...
و بعدين لازم تتشجعى عشان لما القطط بتوعى يجرالهم حاجة و لا الست لوزة تولد مثلاً و تبقى ولادة متعسرة حبتين
لما أحب أخاطب الشعب المصرى ..اخاطب مين أنا بقى ؟؟
يلا عشان هشغلك
و بعدين بتخافى من القطط و الحصنة لأ؟!!!
كل الحب ليكى يا حبيبتى و |غلطى يا ستى غلطات مطبعية زى ما تحبى أنا فاهمة قصدك إيه ....



dahlia
تصدقى يا دودى أنا كمان إتصدمت لما قريت تعليقك دا ...
و زعلت من روحى قوى لأنى مسبتش تعليق عندك بالخبر ..بس مكنتش أعرف إنك ف مصر قريب قوى كدا كنت فاكرة الحكاية عاوزة تحضير منك من قبلها بمدة عشان كدا متكلمتش و قولت لو كانت قرت الخبر عندى كانت هتيجى لو تقدر و حسيت إنك عاوزة لقاء حريمى مخصوص زى ما سالتى ...
حقك عليا يا حبيبتى
و بصى من دلوقتى أهو فيه إفطار صائم فى رمضان غن شاء الله يوم 4أو 5 سبتمبر
حضرى روحك من دلوقتى عشان مفيش إعتذرات و غير مسموح بيها
بوسة و حضونااااااااات يا حبيبتى




mohamed ghalia
يا هلا بيك إنت يا محمد
إنتا اللى كنت منور و كعادتك زى النسمة الصافية




وومن

طب يا هاااااانم لما سيادتك قاعدة فاضية مبتدخليش ليه تشوفى آخر الاخبار ..منا حاطة اللينك بقالى يومين و اكتر يا ست البنات ...
معلش ملحوقة و تتعوض ..كان عاوزك اللقاء دا و الله
التجمع الجاى اللى متحدد من دلوقتى بتاع رمضان
و يوم الخميس الجاى حفل توقيع مصطفى حسان فى مكتبة البلد ..أنا رايحة بإذن الله تعالى نتونس ببعضينا يا حبيبتى
بوسة و حضونااااات



بنوتة مصرية

قولت والله يا رودى فى الشريط الجانبى عملت تنويه
خلاص المرة الجاية هكتب بوست كامل ...و تبقى تيجى و تنورى و مفيش تنفيض خالص و لو إنه مش مقصود يا ام نور القمر





لا تشتاق

يا عم اللقاءات دى مفيهاش عزومة جانبية
غنتا تيجى و تشرف ف أى وقت
مدامت الدعوة نشرت فى المدونات تبقى عامة و مش لازم حد مخصوص يقولك ..تعالى نتعرف عليك و تشوفنا ...
تابع عندى المدونة على الشريط الجانبى و البوستات و إنت تعرف أول باول اللقاءات دى و مواعيدها
كل الود ليك





خالد فودة - khaled fouda
مشاركك فى الرأى تماماً يا خالد
و إنت نورتنا و تغطيتك لللقاء مميزة بالصور ...لو حداك صور لاختك فاتيما إبقى غكسب فينا ثواب و غبعتهالى على
modynoty@gmail.com
و يبقى كتر خيرك جدا
كل الشكر ليك



hasona
شكرا يا حسونة على مشاعرك الطيبة دى
و إبقى شرفنا و تعالى بصفتك متابع للمدونات دا لو مكنتش عامل مدونة بالفعل بس مخبى علينا و لا حاجة
ماشى ؟
كل الود ليك

سعيد اني شوفتك ياطماطم يااحن واطيب قلب في الدنيا بجد ربنا يكرمك ويباركلك في يوسف ويقر عينك بيه بجد لو لف الدنيا كلها في هيلاقي ذره من حنان قلبك

بحبك اوووووووي يافاتيما :)

يا فاتيما مش كل الناس بتقرأ الشريط الجانبي
ثم أي تحديث في الشريط الجانبي مش بيظهر في الجوجل ريدر
أنا أول مرة أعرف إن كان فيه لقاء تدويني
ثم اغلب المدونين اللي حضروا ما اعرفهمش فطبيعي مش متابع مدوناتهم و ما عرفتش من عندهم
لما ما أعرفش من عندك أعرف من عند مين ؟

:)
طبعاً كل الغاغة دي على الفاضي لإني بره مصر و مكنتش حأحضر
:)
بس بجد بأحس بحنين رهيب لمصر لما أقرأ عن اللقاءات دي و افتكر اللقاءات اللي حضرتها زمان
ربنا يفرح قلبك و يسعدك علطول
و سلامي لكل من حضروا

سلام عليكم

والله انا من اجمل الاسباب اللى كانت بتدفعنى انى احضر اللقاء انى اشوفك واشوف باقى المدونين الافاضل
لكن قدر الله وما شاء فعل

انا بحس انك قريبة من القلوب كده ما شاء الله

تحياتى

الاجمل والاجمل والاجمل
فى اللقاء انى سمعت صوتك
وباذن الله اشوفك يااجمل فاتيما
كل التعليقت اللى فى حقك لم تكن مستغربة فهذا هو انتى كما اتخيلك
من اول دخولى لمدونتك
سعدت بالاخبار الحلوة اللى قلتها لى
ويارب كل الخير من ساعتها والله وانا بدعى من قلبى ربنا يرقق القلوب
عليكى وعلى ابنك ياحبيبتى
وتاتى قدرة الله فوق الجميع ويرده اليكى
ردا جميلا
فاتيما انا عاملة لقاء تدوينى عندى
فى البوست الاخير وانتى حضرتيه
ازاى000000 ادخلى وانتى تشوفى
تحياتى

فاتيما
انا تعليقي ملوش علاقة باللقاء ولكن انا عاوزة اقولك ان النهاردة كانت اول مرة اتصفح مدونتك واكيد حظي السعيد هو اللى قادني لمدونتك الجميلة الحنينة
بجد حنينة من اول ما دخلتها وانا حاسة بحنيتها
وحبيتك من كلامك وحبيت يوسف من حبك ليه
وبدعي ليوسف يرجع لفلب مامي بسرعة
وليكي انتى بقول ان اغلى الاحلام هي الاحلام التي تبقا بعيدة لوقت طال ام قصر
ابقي على حلمك وربنا قادر يردلك قلبك
وبعد اذنك انا كتبتلك قصيدة عنك انتى ويوسف بهديهالك وبهديهاله
كتبتها في مجونتى اتمنى تزوريها وتقريها
انا مدونتى عبارة عن قصائد بكتبها بالانجلش
كتبت قصيدة صغنتوتة على لسانك ليوسف
ياااااااااااارب تعجبك
وقوليلي رايك

مش ها قول كان نفسى أكون معاكم لأن دة حقيقى لكن بعد قرآتى للبوست شعرت قد أيه أنا خسرت كتير أنى ما كنت معاكم ، بس أنا مش كنت أعرف شيئ عن الميعاد ، لكن اتمنى المرة الجاية أكون معاكم ، يمكن فى كتير من المتواجدين لا يعرفوننى ، لكنى أكون سعيدة بتعرفى عليهم ، فاتيما و ستيتة بحجز مكان معاكم للقاء الثانى ، أشوفكم بخير و ربنا يسعدكم كلكم .

فى الخير متجمعين دوما ان شاء الله

ان شاء الله اللقاء الجاى ان ربنا اراد هحضره

كان نفسى اكون معاكوا اللقاء ده بس الظروف بئا

انتى يا طمطم يا بخته اليى يعرفك ويقابلك يا جميله

كل سنه وانتى يالف خير يا حبيبتى
ودايما فى كل خير وسعاده

http://elbald-dy.blogspot.com/2009/08/blog-post.html

ادي البوست يا ماما :)
يارب يعجبك :)

ازييييييييييك يا جميييله

انا ندمانه و زعلانه و مقهوره اني ما جتش

انا كنت هاجي يا جماعه بس ظرووووووووووف

لكن ان شاء الله هاجي عشان اشوفك مخصوص يا فاتيما ..

انا علي فكره سألت الناس الي راحوا عليكي اول حاجه


بالمناسبه انا بنت خالت

(( رنيم الي هي مبتسمه دائما دي :D

وهند دمووووع الملائكه ,,

هما قالوا لك عني بس انتي ماتعرفنيش

عشان كده قلت اعرفك يا جميله ..

تحياتي و حبي (( ثلـــــوج))

والله أنا سعيد جداً إن حضرت معاكم اللقاء ده
رغم إني كنت زي ما قلت لخالتس ستيتة الحاضر الغائب ,, لأني كنت تعبان جداً

لكن كنت هخسر كثير لو مكنتش حضرته
كفاية إني شفت حضرتك .. دي كفاية لوحدها

شكراً جداً لحضرتك

أه بخصوص القصائد
هيه الأولي كانت أجمل بس لأني كنت حافظها
التانية كنت نسايها
واتكعبلت كثير فيها وأنا بقولها ,, علشان كده مبانتش حلوة ,,

السلام عليكم ورحمة الله

اختنا العزيزه الغاليه فتيما

انتي فعلا انسانه جميله جدا والكل فعلا خرج من اللقاء واحترامنا وتقديرنا ليكي زاد ومبقاش ليه حدود (تاني بقول كلامي صادق وملوش ادنى علاقه بالمجاملات)

انا فخور حقيقي بمعرفتك

الواضح بصراجه اننا كلنا خرجنا من اللقاء بحب في الله كلنا بنشيله لبعض

انا كنت اقلكم حظا لأني كنت اقل واحد اتشرف بالقعده معاكم, بس ان شاء الله تواصلنا يدوم

ايوه غيظونى بقى وافرسونى طيب كان حد ادانى ميسد اخص اخص

حبيبتي :]

ازيك يا قمر بجد انا حبيتك اوي بجد بجد انتي عسوله اوي
و انا اكيد هتابع البلوج انشاء الله

انا سعيده اوي اني اتعرفت عليكي

السلام عليكم ورحمة الله وبركاته
فاتيما
تحياتى
كان يوم جميل جدا والحمد لله
والاجمل انى اتعرفت فيه على ناس هايله اخلاق وادب وثقافه وخفة دم
والاجمل والاجمل انه ابتدى بالتعرف عليكى وانك كنتِ اول واحده انا قابلتها
بجد انسانه جميلة وذوق عالى وطيبه وخفة دم وتلقائيه
انا مبسوط جدا انى قابلت حضرتك وكل الناس اللى كانوا حاضرين اللقاء
بس بلاش تسييح فى موضوع الدبلة ده
هههههههههههههههههههه
تقبلى مرورى وتحياتى

)تاللاتالابياثصلرباثر(
بصى الى فوق دة حضن بس هو كبير شوية
xxxlarg
وبعدين انا معرفش ان حضرتك قبل كدة عديتى عندى ملقتش الصراحه اثار اقدام!!اظاهر لازم اجيب وجوه جديدة وكماااااان اشرف طلع مشهور عنى بعد كدة هسمى نفسى كيكى & حبيبها ابو اشرف!!
بجد بقى ومش اى كلام انا مش عارفة ايه حصلى فى اللقاء دة كدة قاعدة متنحه شوية اظاهر شعااااااااااااااع الشمس عامل فى دماغى حفرة مش عارفة اردمها لحد دلوقتى!!! بجد كان فى ناس كتير عايزة ارغى كتير معاها صدقينى العيب فى الشمس*************
وكمان اشمعنى عادل الى هتتبنى يعنى!!
دة فى ناس كتير عايزة الطلب دة بس مكسوفين ومى وابو اشرف نفسهم فى دة!!

♥♫♥♫♥طمطوووووووووووووووووم ♥♫♥♫♥

وحشاااااااااااااانى بشكل مش ممكن بجد
معلش انا عارفة انى مقصرة خالص
بس احداث كتيرة عدت كتيرة اوى فيها الحلو وفيها الى الحمدلله بس على فكرة دائما سيرتكِ بكل الخير موجودة بسال عليكى كتير اوى ومش هقولك مين بس كل الى حقولة ناس بتموت فى حضنك الدافئ وبقيت احسدهم اقول يابختهم عااا اشمعنى انا لا ^_^
اخيررررررررررررررا جبت كتاب انا انثى يامعلم وقريتة فى يوم مش قدرت اسيبة ابدا
بجد مبروك للجميع وليكى ياحبيبة قلبى من جوة طمنينى اخبار يوسف اية هو اكيد كويس فى حد يكون مامتة زيك ومش يكون كويس
وعقبال يوسف ياااارب ابنى اتخرج الحمدلله الحمدلله الحمدلله تخيلى انا عمالة اقولة ياواد لم نفسك بقى ومش تخرج معايا هههههههههههه
وال عايز يخطب قلتلة لا استووووووب كبرت وعدتها كمان تخلينى حما ولا اعرفك ههههههههه
بس التفكير كان قاسى بجد عليا اوى لان اولادى مصممين ان الكل يتجمع وانتى فاهمة لو حصل خطوبة طبعا لازم يحصل دة واكيد فاهمة احساسى
قلبى مقبوض جدا مش قادرة اقولك بجد الى حساة بكرة تحسية بجد لما ابنك يخطب والكل لازم يتجمع :((
انتِ بجد وحشانى بشكل لو قلت من هنا لميت سنة مش هيكفى
انا لسة راجعة من الشاحن الشمالى كنت بشحن حضرتك ههههههههههه
وشوفت كلماتك عندى وقريت كتتتتتتتتير عندك حسيت انى شماكى وشيفاكى
كفايا بقى احسن هعيط

صحيح انتى عاملة فيس بوك ولا علشان اضيفك علية والاقيكى فين ياترى فية لو عاملاة
يارب تكونى بخير وسعادهـ وفرحة
موووووووووووة كبيرة خالص وحضن دافئ جدا يارب تحسى بية

ارق قلب ممكن تشوفه فى الدنيا
ام
اخت
بنت
طيوبة
حبوبة
محترمة
هادئة
هقول ايه تانى
ربنا يحقق لكى اكثر مما تتمنين
ويرجعلك جو بالسلامة

يعني انا مش اعرف الا بعدها كده

كده ينفع يعني

على العموم انتوا اللي خسرتوا طبعا لاني مش كنت موجود

وبكده ذنبكم على جنبكم طبعا

:):):):)

ربنا يسعدكم دنيا واخرة

وحشتيني جدا والله
ليا عوده بتعليق طويل خالص
بوسه كبيرة ليكي وليوسف كمان
سلام يا ماما

فاتيما الجميلة
احلى ماما
انا مبسوطة جدا ان القصيدة عجبتك ويارب يكون معناها فدر يلمس قلبك
اتمنى اكون قدرت اعبر عن جزء صغير من احساسك
ان اتمنى تعتبريني صديقة ليكي
و يسعدنى جدا اننا نبقا اصحاب بجد

على فكرة كمان انا عاوزاكي تقري بقية كتاباتي وتقوليلي رايك فيا وفي كتاباتي
حقيقي رايك هيسعدنى جدا
بوسة كبيرة ليكي وواحدة كمان ليوسف
باااااااي

يارب تجمعو تانى وتالت
على فكرة
الواد عادل ده
بجد اطيب كمان مما تتخيلى
وقلبو قلب خساية
وعسل بس مش اوى
بلغيه بقه ان فى عروسة طالبة ايدو

eno
أنا كمان يا حبيبتى
متحرمشى منك و سلامنا لخطيبك العزيز
و يا بخته




مهندس مصرى
إيه يا عم الدخلة دى صحيح ...منتا مكنش ينفع تيجى أساساً
بس حسك معانا برضو
و الاجازة الجاية مفيش أعذار
كان نفسى تكون معانا فى فطار رمضان بس ملحوقة إن شاء الله
صحيح متعرفش منهم ناس كتير بس انا كمان يا محمد مكنتش أعرف غير ستيتة و عادل و محمد غالية و إينو و الباقى أسماء عبرت عندهم صدفة و فيه ناس معرفهاش خالص بس كالعادة الواحد كل مرة بيخرج بناس جميلة و يتحس إنه يتواصل معاهم علطول بعد كدا إن شاء الله و خالص ودى يا اخى العزيز رمضان كريم عليك
و يا رب أسمعك اخبار حلوة قريب عن يوسف ..ركز فى الدعوات أنا عارفة إنك مش ناسينى



بنجاواتى
و عليكم السلام يا فندم
كان نفسنا كمان نشوفك
الناس جابت سيرتك بكل الخير و خصوصا ستوتة ستيتة بتشكر فى سعادتك قوى
المرة الجاية هنستناك



ام مالك
يا حبيبتى أنا أسعد بسماع صوتك
و الناس أصلها كانت حلوة قوى ذوق و محترمين قوى فكلامهم طالع زيهم تمام
هرروح أشوف لقاءك التدوينى لما نشوف المنافسات التدوينية اللى على أشدها دى
كل الحب ليكى يا حبيبتى




baskouta
يا بسكوتة أنا اللى حظى حلو بدخولك هنا عندى و عند يوسف
و قصيدتك نور ف قلبى بجد و هشيلها للذكرى عشان أفتخر بيها قصاد يوسف لأنها دليل على حبى ليه للدرجة اللى تخلى ناس جميلة زيك تنفعل و تكتب حاجة بالصدق دا
إن شاء الله نتواصل علطول يا حبيبتى
نورتينى نورين
نور بمجييك هنا
و نور بقصيدتك الحلوة

صبرك عليا أنا نازل عمرة في أول خميس في رمضان
و حتشوفي بقى دعوة عمرة رمضان
:)
إنتي مظلومة و لازم ربنا ينصرك

أم بتول
يا حبيبتى متزعليش إن شاء الله ملحوقة فى اللقاءات القادمة
عندنا حقل توقيع يوك الخميس فى مكتبة البلد للشاعر مصطفى حسان و عندنا إفطار صائم فى رمضان إن شاء الله
ضبطى مواعيدك و تعالى نشوفك
كل الود ليكى



الطائر الحزين
و إنتا معانا يا إيهاب
و حياتك تفكر فى إفطار رمضان دا
عشان نشووووووووفك



mahsen saber
إن شاء الله يا النص التانى لقلبى
إنتى معانا بروحك الحلوة و يا رب تكونى دايما بخير |نتى و بيرو حبيبى
إعملى حسابك على فطار رمضان ..هاه
مااااااااااااشى
رمضان كريم عليكى يا حبيبتى
و بنت أبيها الغالى
بوسة و حضونات كتير كتير


adel
قريته يا شقاوة و علقت هناك
و طبعا عجبنى إنتا هتكتب حاجة متعجبنيش إزاى يعنى ؟!!!
بس إتفضل سيادتك بقى إنزل تحت و شوف تعليق البت المشمشية و مش عاوزة اتتتتتتتتتتتتتتتكلم بقى
البنت بتخطبك منى أهو
و أنا هتعزز بقى
لاااااااااااااااااا ...
أصل بصراحة ميهونش عليا تيجى عروسة كداو زى القمر صحيح بس تاخدك منى و أنا لسه متبنياك أول إمبارح كدا ؟!!!
معقووووول !!



ثلوج
اهلا بيكى يا ثلوج
ازاى مش عارفكى إنتى علقتى عند يوسف فى مدونته مرة قبل كدا
و بعدين إنتى قريبة هند و رنيم يعنى معرفة و قوية اهو
تعالى معاهم اللقاء الجااااااااى بقى
تحياتى انا كمان يا حبات البرد

د.ياسر عبدالفتاح
طب حاضر و عرفناها
بس غائب إزاى و إنتا كنت منور القعدة كلها يا دكتور ...
و سيادتك النوبة الجاية تجيب القصائد معاك مكتوبة عشان مش هنسيبك من غير ما نستمتع ببعض من تجلياتك ...
أنا حقيقى متشرفة بيكو جدا
خالص ودى ليك يا فندم


أحمــــد أبو العلا
و عليكم السلام يا احمد
مش قدر سعادتى و فخرى بيكم يا احمد إنتوا بجد نماذج مشرقة للشباب المحترم المثقف المتميز و المنفتح على الدنيا
الحب اللى بتتكلم عليه أصدق جملة و تفسير للتعبير عن الحالة اللى بنمر بيها كلنا و بيمر بيها كل المدونين تقريبا بعد كل لقاء تدوينى
الحب ف الله
ناس بتتجمع دون مصلحة و غرض زى ما قال احمد القاضى صاحب مدونة يا مراكبى
و الجمع بيبقى ف الخير و للخير
و صحيح مقعدتش كتير بس سبت اثر طيب جدا فينا
أشوفك دايما على خير و إن شاء لا ينقطع التواصل بعد اليوم


سوما ..مجنونة فى بلد عاقل
يا سمسومة أنا بعتالك السلام مع خالك العزيز الأستاذ فشكول ...
و جبنا سيرتك بالخير يا بسبسة
تعالى النوبة الجاية بقى و متزعليش
إنتى كمان وحشتينا قوى قوى
بوسة و حضونااااااااات


im the crazy one
ميرسى يا هند على ذوقك
و رقتك و حضوركم الطيب و الرقيق يوميها
و بعدين كدا يطلع اسم المدونة بتاعتك عنوانها إنجليزى ؟!!!
أومال الكلام الفرنساوى راح فيييييين ؟
طيييييييييب
إنتى نورتى المدونة و البلوج سبوت كله
منتظراكى دايما يا حبيبتى
و سلامى للعسولات اللى معااااكى



المعتصم
و عليكم السلام يا مصطفى
أنا الى إتشرفت يا فندم بمعرفتك
إنتا كمان كنت فاتحة خير فى ابيوم دا أصل الأيام بيبقالها عتبات زى الجواز كدا ...يعنى حد تشوفه اول اليو م تلاقى الدنيا ماشية حلو و ناس تبتدى بيهم يومك فكل حاجة بعد كدا تبقى مش تمام ...
مش هسيح حاضر بس بشرط ..تفرحنا بيك و فيك عن قريب إن شاء الله
خالص ودى يا زعيم الأبر إيجبت



كيكى عووووووووو
إيه الحضن الحلو دا يا كيكى
و يا بنتى ازاى متعقديش تتباهى بأشرف دا وسط الناس ..طب إنتى بس كنتى قولتى عنوان البوست و كنتى شوفى اللى هيحصل
طب هنجيبها ف الشمس النوبادى
بس أنا حسيت إن و عيش احلامك مكنتوش مبسوطين و منسجمين معانا و إن دمنا كان تقيل حبتين عليكم ...و مرضتش أغلس
بس لاااااااا دحنا لينا حقوق تاريخية بسبب أشرف و المرة الجاية مش هنخليكو تاخدو جنب و هنفصل القوات
كل الحب ليكى يا كيكى

راندا
أولاً
حمدلله ع السلامة يا فنارة القلوب
ثانياً
ألف مبروك لحبيبك و عقبال الفرحة الكبيرة لما يتجوز و يجيبلك أعز الولد إن شاء الله
ثالثاُ
إنتى كمان كنتى وحشانى و اخيرا نورتى صفحة التعليقات عقبال كل الغائبين لما يتبعوا خطاكى و نور قلبك و يرجعوا يطمنونى عليهم زى ما عملتى
إن شاء الله تسمعوا خير عن يوسف قريب
لو ربنا أراد و حصل ما أسعى إليه حاليا...مش عاوزة اقول تفاصيل دلوقتى بس هقول لما يبقى فيه شىء ملموس
مش هقولك دعواتك عشان عارفة قلبك فيه إيه..
كل الحب طبعا
و بوسة و حضونااااااااااات منى للصبح



مسدس صغير
و طيب
و كل حاجة حلوة
أنا مبسوطة بمعرفتك قوى يا صلاح
و يا رب دايما متجمعين ف الخير
أشوفك إن شاء الله الخميس
و عقبالك كدا




صاحب المضيفة
معلش يا انس ..المرة جاية تنورنا
طب إعمل حسابك على فطار رمضان طيب
و تجيب معاك آية النساء
أيوااااااااااا
الدعوة الحلوة اللى فى آخر البوست دى اللى بحبها و بستناها
متحرمشى منك يا اخى الصغير الجميل



فتاة حالمة
طيييييييب ..مستنياكى يا حبيبتى
بوسة و حضونة مؤقتاً



البت المشمشية
يا ميشو حرام عليكى
دنا لسه متبنية الواد اول إمبارح .. قوام كدا عاوزين تاخدوه منى
و تكروتونى ف السريع
لاااااااااا ..
مفيش جواز غير لما يخلص دراسته الاول
و يشتغل و يكوم ف نفسه قد خمس ست عشر سنين
و بعدين نتأنى ف الإختيار و دا مش هيحصل غير لما نشوف ييجى خمسين ستين بنت حلال كدا
و بعيييييييين اشوف هوافق و لا لأ
مااااااااااشى
إبقى تعالى اللقاء الجاى و نبقى نتكلم ف الحكاية دى بروقان بس برضو مش هوافق .. سلام يا قطة

مهندس مصرى
متحرمشى منك يا محمد يا رب

شوفتي بقي اهو ده الي انا كنت خايفه منه
انكم تفتكرو اني رخمه ومش بحب اتكلم
انا مش مش بحب اتكلم
انا مش بعرف اتكلم اهون بصراحه اهون
مع ان وربي اعلم وكيكي كمان عشان قولتلها
ان حضرتك خصوصا كان نفسي اتكلم معاكي كتيييييييييييييير اوي واسمع منك واحكيلك كتير اوي اوي
طب اقولك علي سر ومش تضحكي عليا؟؟؟
انا ديما بدخل مدونتك اقراء البوستات واقرا التعليقات وابقي عايزة اكتب تعليق بس مش بعرف اقولك ايه
مع اني والله نفسي اكلمك انتي بالذات
واكتر بوست حبيته وعيطني في كتاب انا انثي هو البوست بتاع حضرتك
ده انا حكيه للدنيا كلها عنك عندنا في البيت يعرفوكي ويعرفو قد ايه انا بعزك وانك غاليه عندي اوي
طب اقولك علي حاجه انا مش المفروض كنت اكل اللمباده الي اديتهالي عشان الدايت الي خنقني
ومع ذلك اتخنقت مع اخويا عشان اكلها عشان انتي قولتلي من يوسف وانها منك طبعا
والله انا غير الفكره الي اتكونت عني تماما
بس ده للاسف رد الفعل الطبيعي الي بيتكون عني لما اي حد ياقبلني لاول مرة
بس الي يعرفني بجد بيعرف والحمد لله اني مش كدا
انا مش بعرف اتكلم او ادخل في مواضيع واشارك في الرائ خصوصا انكم كلكم مش تعرفوني ولا حتي شوفتو مدونتي يعني غير معروف بالنسبه لاي حد الا اربع بس الي يعرفوني من التدوين وشويه نت عشان كدا انا كنت محرجه اتكلم
غير اني بصراحه استويت من الشمس
انا روحت لبابا الشغل افتكروني روحت صيفت اه والله وماما اتخضت من كميه الاحمرار علي الاسمرار الي جاتني من الصبح لبعض الضهر
ولا ماسك ولا لمون عامل نتيجه غير الصداع الحمد لله رجعت عيانه اصلا
بس وربي اعلم اني كنت سعيده بجد اني شوفتكم كلكم وسعيده اكتر اني شوفتك وسمعتك وسمعتك وانتي بتتكلمي عن يوسف
ملحوظه انا مش كنت متضيقه منكم والله انا متضيقه من نفسي اني مش عارفه اتكلم ولا ادخل في الحوار انا اصلا فشله في كدا حتي كورس الانجليزي الي كنت باخده كان كله ممتاز ما عدا المحادثات عشان بتكسف
دي ازمه والله وملهاش حل
اوعي انتي خصوصا تزعلي مني
امواااااااااااااااااااااااااااااااة كبيره
وحضن اكبر كتيييييييييييييييييييير
سماح بقي يا مونتي؟؟؟؟

انا جاي اعتذر ليكي بجد

اولا لما علقتي فاول التعليقات علي سؤالي قوتيلي علي التحذير بس بشكل دعابي فظنيت انه هزار فعلشان كدة رغم اني كنت متردد نزلتها انا اول مصحيت من النوم شلت الصورة خالص



وحسيت اني برضه مدين باعتذار للعلم انا اغلب من صورتهم هم الشباب لا صور نساء مطلقاً خالد هو اللي كان شغال تصوير طوال الوقت واكيد بعتلك الصور بتعتك

فتاة حالمة
أهو بصى بقى أنا اللى هزعل من نفسى جداااااااااا دلوقتى
لأنى قولت حاجة بالعكس ..الحقيقة إنى حسيت إن ممكن نكون غحنا اللى مكناش لافتين إنتباهكو انتى و كيكى ...تقومى تفتكرى إنتى العكس ..ليه بس ؟!!!
و بعدين تعالى هنا
كل المعرفة السابقة بينى و بينك دى و أشرف اللى بينى و بين كيكى و فى الآخر تقولى إتكسفت و احرجت و الحاجات دى ..
طب فرمان فاتيمى رقم واحد
اول مرة هشوفك فيها إنتى و كيكى هجيب واحدة ع الشمال و التانية ع اليمين و مفيش رحمة و لا هوادة و كلام و رغى للصبح
بصى اللقاءات التدوينية دى بيبقى فيها رهبة جامدة ف الأول بس بعد كدا خلاص و الحمدلله إنى عرفت إن غحساسك مقلش عن مشاعرنا الجميلة الى خرجنا بيها من اليوم دا
هو دا اللى اسعدنى جدا ف تعليقك
و مفيش زعل و لا حاجة يا بنتى
سلامتك من الشمس بس كلنا خدنا كورس الصداع دا و دروخنا يومين مع نفسنا
أشوفك على خير يا حبيبتى
سلامنا لكيكى و أبو أشرف




رامز عباس
مفيش إعتذرات
لأنى مش هقبلها يا رامز
لأنى مش زعلانة منك و لا حاجة يا بنى انا بس حبيت اقولك خلى بالك ..
و كلمة ف سرك أصل الموقف دا حصلى مرة قبل كدا مع احد المدونين
بس بصراحة معملش زيك و مشلش الصورة إنتا كتر خيرك
و إحترامك لحرية الآخرين بيؤكد إنك شخص محترم من جواك و يوثق فيك
و مفيش إعتذرات و لا حاجة
إنتا اخويا الصغير يا رامز و بتشرف بذلك

فاتيما

انتى وحشانى اوى اوى

كنت هاتجنن لانى مش عرفت اكون موجودة في اللقاء واشوفك انتى وكل الناس الجميلة اللى كانت موجودة

ان شاء الله تتعوض في افطار رمضان

وبجد انا مبسوطة بالروح الحلوة اللى واضح انها كانت طاغية على تجمعكم

ربنا يديم المودة يارب

ربنا يكرمك يا احلى قلب ويكحل عيونك ويطمن قلبك برؤية يوسفك على طول ويحميه لكى يارب

ياماما
كل البنات هتجنن عليا اهو
هههههههههههههه

بس اللي عاوزني لازم انتي توفقي عليه
يعني بقول اهو لاي بنت عينها عليا
لازم تعجبك الاول :):)

أولا ميرسى أوى انك افتكرتينى بعد كل
الغيبة دى

ثانيا انا اللى بجد زعلانة اوى منكم كلكوا

كدة محدش يبلغنى ان كان فية لقاء ف حديقة الازهر وكمان يوم السبت يعنى احلى مكان بحبة واجمل توقيت ومحدش يقوللى مع انى موصياكى تقوليلى بس
مش مشكلة ..طبعا نسيتى

عموما ياريت توصى خالد همس الاحباب يخللى الفطار يوم سبت وان شاء الله اكون موجودة ما لم يحدث مكروة.

تحياتى ليكى ياأم يوسف ولكل الناس الحلوة وللجمع الجميل .

ماما يا ماما نزلت بوست تعالي شوفيه بقي
اموااااااااااااااااه كبيرة هتتبنيني انا كمان؟؟؟؟

حبيب قلبى؟؟؟
دة اشرف الى بيمسى!! وش بيغمز
ايه كمية الاعترافات دى يامى؟؟
دة بس انتى شوفتيها امال بقى لو فاتيما خدتك بالحضن ايييه هتعترفى عليه انا كمان ولا ايه؟؟؟
هع مين قال ان القاعدة مش كانت ع كفينا طب اقولك دة رابع لقاء ليا
دة انتى تعالى شوفينى زمان مع همس ودعاء وشفقة واحسان ودكتورة جنه وزهرة
الناس دى الى خطفوهم ولاد ابو اسماعيل!!!
هو كان كزوف بس مش اكتر
اوعدك المرة الجايه لمة اشوفك هتشقلب فى الهواء وطلع ناااااااااااار
وماشى ع الكمية الناس الى اتبنيتهم وانا بنت البطة السودة ولا ايه؟؟

روح قلب يوسف ،، أنا زرت مدونته النونو

عجبتني أوي

دوبا بتسلم عليكي

تحياتي

ايه ده؟
انا كنت سايبه تعليق هنااااااااااا

باينه ضاااااااااااع

أأأأأأأخ

معلش ،،، بجد وصف لليوم كأنك كنت معانا بالظبط


ههههههههههههههههه

انا بكتب بوست أهه عن اللقاء ،، مواااااااه

تحياتي

انا بس داخلة احييكى على المدونة الجميلة دى .. بجد مدونتك حلوة اوى وفيها من روحك كتير

:)

شكله كان يوم تحفه

مش تغظوني بقي اني مش جيت عااااااااا

reem
إزيك يا ريم و ازى احوالك
معلش يا ستى تتعوض المرة الجاية
و كويس انك عرفتى بفطار رمضان و تابعى عندى تلاقى التفاصيل أن شاء الله اول بأول ...
كل الود ليكى


adel
خلاص يا شقاوات إتفقنا
بس خلى بالك لو بدر البدور و قمر القمرات برضو مش هوافق هو بالساهل أسيبك كدا و لا هو ربى يا خايبة للغايبة ؟!!
خلى بالك من نفسك و بتذاكر المادة و لا مطنش يا واد ؟



دعاء مواجهات
متزعليش يا دودو و حياتك أنا اصلاً لآخر لحظة مكنتش عارفة هروح و لا ظروفى هتمنعنى و بعدين الإعلان كان فى أكتر من مدونة تبع ستيتة لأنها المحرض الرئيسى (ف الخير طبعا) على هذا اللقاء
ملحوقة إن شاء الله فى الجايات
و يا ستى خالد همس الاحباب عامل بوست مخصوص لتجميع الأراء و روحى هناك قولى رايك عشان يوازن ما بين الاختيارات
يلا بوسة و حضونة
و متزعليييييييش



فتاة حالمة
شوفته يا بسكوتة حطيت اللينك عندى و تعالى يا ستى أتبناكى اشمعنى انتى يعنى
و بعدين مش خلاص قولتى ياماما
يبقى بقيتى من عيالى و خلصنا من بدرى
ارد بقى على نص التانى العسولة



كيكى عوووووو
قولى يا ماما و إنتى تدخلى الموسوعة
و بعدين سيبى البونية تفضفض اكنك عاملالها كبت عاتشفى و لا ايه نظامك
أشرف واخد كل الحب الظاهر
سلميلنا عليه قوى و النبى
و خلاص لما أشوفكم النوبة الجاية هنعالج موضوع الكسوف دا من اول جلسة
بوسة و حضونة ليكى يا كيكى



mimi
الاول ..نورتى مدونة يسوفة
ثانياً ..الله يسلم دوبا من كل شر
ثالثاً ..علم بالبوست و إتحط لينكه كماااااان ..
سلام يا نايب الريس


غنسانة
ميرسى يا إنسانة على ذوقك و كلماتك الطيبة ..
و نورتينى جدا



كيارا
متتغاظيش يا كوكى
تعالى المرة الجاية و خدى بتارك
طفى نارك من اللقاء اللى قبل منه
سلام لحد ما أشوفك يا حبيبتى و تاخدى البوسة و الحضونة بتاعتك

فطوم وحشتينى موووووووت والله

الله يسهله يا عم
انا كنت عايزة اجى علشان اشوفك
عاااااااااااااااااااااااا

المهم انك بخير ويوسف بخير
وانا والحمد لله كويسه وحنين النونه بتسلم عليكى وبتقولك حوشى علشان السنه الجايه تجيبى ليها فانوس

فطوم مش انا سمعت نبضها وشوفتها
عسسسسسسسسسسسل كنت مبسوطه اوى

ربنا يخليكى ليه ولا يحرمنى من سؤالك عليه
مووووووووووووووووووه دى ليكى
وحضن كبير اوى ليوسف خطيب بنتى

مشكلتى فعلا انى مش بقدر ازعل من الناس اللى بحبهم بجد

انا مش زعلانة منكم

انا زعلانة علشان مكونتش معاكم

وانا هروح عند خالد واقولوا

سلام ياقمر

جميل أن ينتقل الود من النت إلى أرض الواقع حين يتقابل الجميع

أم يوسف

تقبلى مودتى

ام يوسف
كل سنة و انتى طيبة يا رب
و شكرااااااااااااا جدا عالسؤال
عادل قال لى
و بجد فرحت جدااااا
و سؤالك ده اكبر سبب بعد زن عادل عليا انى ارجع الحمدلله
كلكوا وحشتونى و الله

ربنا يسعدك يااااااااااااااااااااااااارب

ومايجيش رمضان د الا ويوسف في حضنك

بدعيلك دايماااااااااااا

مافيش أحلي من احسياس انك تكون شخصية لحد وتفضل تقراله كتير

وتستني اللحظة الى تشوفه فيها ولتعرفه ولا ماتعرفهوش

http://elham-me2.blogspot.com/

دي مدونة احمد يا ماما اللي قبلتيه حضرتك في حفلة توقيع ديوان مصطفي حخسان

---------
ادعيلي يا امي بجد

معلش ياطمطم
متاخره قوووووى فى التعليق
بس انا شفت البوست من اول مانزل
ربنا يجعل ايامك كلها فرح وحب وسعاده يابطه
مبسوطه قوى علشان انتى وستيته وعادل كنتوا متجمعين مع بعض فى مكان واحد
ربنا يجمعكم دايما على الخير ياااااااااااااارب

:)

كل سنة وانتي طيوبة...:)
رمضان كريم

للاسف لم تسنح لي الفرصة اني اجي اللقاء ده
بس ان شاء الله يبقى في فرصة في المرااات الجااية

بس نقلك للحدث جاامد,,,
دمتي بخير...:)

إرسال تعليق