.

.

مالك؟!!  

Posted by: فاتيما in


مستغربة ؟!!...و لاّ مصدومة ؟!!
و لاّ الاتنين سوا ؟
و لاّ حاجة تالتة ملهاش وجود من الأساس
مكنتيش متوقعة اللى سمعتيه مثلاً؟
و لاّ عشان سمعتيه من حد غير متوقع ؟
أيوه .. غالباً دا السبب
و مفيش غيره
بس عادى .... أومال إنتى كنتى فاكرة إيه؟!!
تكونيش فاكرة إن الدنيا سلسة
و هتيجى معاكى بالساهل و كأن شيئاً لم يكن ؟؟
طب لاّ إنتى قليلة الخبرة و لاّ بعد اللى شوفتيه يصح تكونى عبيطة
و ساذجة ف تفكيرك و توقعاتك لردود الأفعال عموماً
منتى مهيأة نفسك دايما لأسوأ حاجة ..اومال مالك؟
مكنتيش متخيلة اللى حاصل
و إن مفيش حد بيلعب مش بس ف دماغه
لأ و كمان قلبه
طب دا كان ممكن تسمعى اللى أسوأ من دا
و لاّ كنتى بتضحكى على روحك و تقولى كلام منتيش قده؟!!
الله ... اومال مالك ؟ّّ
فيها إيه لما يقولك يا ماما أنا قعدت معاكى 8 سنين
و مع بابا سنتين بس
و دا مش عدل منك تقولى إرجع عيش معايا
فيها إيه لما يسألك مباشراً .. هوه إنتى إتجوزتى ؟!!
و عادى ما تتجوزى مفيش مشكلة شوفى نفسك
بس خلاص متعمليش حسابى وقتها بقى
فيها إيه لما يخيرك و يقولك يا نعيش سوا إحنا التلاتة
يا مش هينفع
و الراجل ممكن يتجوز أربعة عادى
فيها إيه لما يفهمك إنك إنتى إتنازلتى عنى بمزاجك
فمينفعش دلوقتى تقولى عاوزاك ببساطة و الناس توافق
فيها إيه لما يواجهك بحقيقة إنك هتعمليله مشاكل
و ان مفيش مدرسة هتقبله لأنك اخرتيه فى الدخول
و بقى عنده عشر سنين و فى سنة تالتة إبتدائى بس
و... و..... عادى
فيها إيه ؟ّّ
مانتى كنتى متوقعة تسمعى لوم و عتاب
و أصعب من كدا
و لاّ عشان قالهولك بمنتهى الهدوء و البراءة
و الإقتناع الشديد
لدرجة حسستك بالعجز
ردودك عليه كانت بنفس الهدوء و البساطة
وكويس إنك مسكتى نفسك
صحيح قلبك كان بينزف
بالذات لما كل ما تفكريه بأى حاجة و يقولك مش فاكر
أنا نسيت يا ماما
بس و ماله ؟
ما كنتى متوقعة فوق كدا عشر مرات
كنتى متوقعة يكرهوه فيكى كمان و كمان
و لا متفاجئة من ذكاء التعابين ؟!!
منتى خارجة من الجحر دا بإعجوبة و المفروض عارفاه كويس
مستغربة من تأثيرهم عليه ليه ؟!!
الطفل الصغير هيكون أقوى و لا اعقل منك ؟!!
بتحمليه ليه اكتر ما يتحمل .. و تطلبى منه ميتغيرش من ناحيتك ؟
عارفة و فاهمة و مقدرة ...و مش زعلانة
اومال مالك ؟!!
ليه فجاة حسيتى إن ضهرك للحيطة
و إن مفيش امل؟
مش ربنا كبير قوى ؟
و لاّ بتقولى الجملة دى مجرد إكليشيه و مش حساها بجد
ثقتك الرهيبة في اللى خلقك راحت فين فجأة ؟
موجودة !!
اومال مالك ؟!!
كام جملة يرعبوكى كدا ؟
دا لسه السكة طويلة قوى
طولى بالك
جمدى قلبك .. ومتيأسيش بسرعة
إنتى ف قلبه مهما حصل
أيوه .. قوليها ف سرك و لو تضحكى على روحك
متخليش لحظة تخوفك من اللى راح و اللى جاى
متخلنيش تانى أقولك .... مالك ؟!!

فاوحينا إلى أم موسى
أن أرضعيه
فإذا خفت عليه
فألقيه فى اليم
و لا تخافى
و لا تحزنى
إنا رادوه إليك
و جاعلوه من المرسلين


This entry was posted on السبت, أغسطس 15, 2009 and is filed under . You can leave a response and follow any responses to this entry through the .

78 كــــلام بيطــبطـــب عـــلى قــــلبى و روحــــى

انت صح علي فكرة
انتي نفسك اتضحك عليك متنتظريش من يوسف هو اللي يدرك و يفرق بين الصح و الغلط

وكلمة ربنا كبير عمرها ما كانت اكليشية


-------
انتي قبلتي يوسف ولا ده تليفون ولا ايه ؟

لأ
كلمته ف التليفون بس يا عادل
فاكر لما قولتلك
إنى بتفاوض مع عمه عشان يتنازلولى عن حضانته و يرجع يعيش معايا
حبيت اتصل بس عشان أشوف آخر قرار ليهم إيه و اتصرف بناء عليه
و إتفاجئت بكلام يوسف معايا
مع إن المفروض ميبقاش فيه
أى مفاجأت
مانا كنت متوقعة إنهم يأثروا فيه بالسلب
بس مش عارفة برضو
مالى ؟!!!
و على جنب كدا
انا بدعيلك علطول يا بنى
و ربنا هيكرمك إن شاء الله مش عشان بدعيلك من قلبى ..لأ
عشان إنت تستاهل كل الخير يا ولدى العزيز

يا امي ان شاء الله مرحلة و تعدي
وانا قريت التغريبة علي فكرة
وللاسف لسه معنديش رد
لما يبقي عندي هاكتبه

انا نفسي اضحكك بس مش عارف
كتبت بوست مش قد كده
ااقولك زوري مدونة خالتوا ستيتة من الكومنت ال600 يمكن و ااقري الاغاني اللي الفتها :):)

أنا بخير يا عادل
متقلقش عليا .. قلبى متنح حبتين كدا و هيبقى كويس
اما أروح أشوف الشقاوات اللى سيادتك عاملاها هناك عند س س

امي بجد بيسعدني كلامك قوي
بس صدقيني بقولهالك ل3 مرة
يوسف هيكون احسن مني وانا عارف
دعوتك يكون زي مش في محلها
بجد انا وحش قوي و اتبهدلت قوي
و اتغيرت قوي
وهو اساسا تعب مش حمل يتعب التعب اللي انا شوفته
الدعوة اللي تنفعه بجد
يارب يشوف اللي مكتوب له وعمره مايشوف اللي انا شوفته :)

فاتيما
قلقتينى عليكى قوى
هو فيه ايه؟
يوسف عمل ايه؟
ومهما عمل ده ابن قلبك
وانتى عارفه هما ممكن يلعبوا فى دماغه ازاى
معلش
اعذريه
مهما كان طفل
منتظره ايميل ضرورى
عايزه اطمئن عليكى
يارب خير

هو باباه اتجوز فعلا ولا ايه النظام؟

ينفع ترجعى وتخلى العصمة فى ايدك؟

لو اتجوز يبقى قشطة
ممكن ترجعيله ويبقى ابنك فى حضنه
وابو يوسف كدة كدة مش فاضيلك هيبقى فرحان بالعروسة الجديدة
واساسا بعد فترة ممكن العروسة الجديدة تضغط عليه انه يسبك
ممكن يسبك وابنك يرجعلك



انا عارفة ان كلامى اهبل
وضرب من ضروب الجنون

انا بفكر معاكى بصوت عالى

اللعب اللى حصل فى دماغ يوسف ممكن يتصلح عن طريق سنفرته من اول ومن جديد


الفكرة انتى قدرتك اد ايه على الاحتمال علشان خاطر يوسف؟

هل ما ينفعش تتكلمى مباشرة مع ابوه


فاتيما بصى
انا مش عارفة اخد راحتى فى الكلام كدة

اعملى مودريش لانى عايزة اقولك على حاجات


اوسبيلى اى رقم تليفون اكلمك عليه
وقوليلى وقت مناسب اقدر اتصل بيكى وتكلمينى فيه

او قابلينى فى اى يوم ندردش انا وانتى
لان حتى الكلام لو كتبته فى تعليق مش للنشر مش هاينفع

انا محتاجة اتواصل معاكى مباشرة
يا اما اشوفك او اكلمك تلفونيا


سبيلى تعليق مش للنشر عندى
وقوليلى اقدر اتواصل معاكى ازاى


سيبك من كلامي اللى فوق ده

انا مجرد بفكر بصوت عالى معاكى وعارفة اجابتك من غير ما تكتبيها


سلام
اختك خيخة

معلش كان فيه غلطات املائية

انا اقصد ممكن ترجعيله ويفضل فى حضنك
مش حضنه

واقصد يسيبك مش يسبك


اسفة على الغلطات

انتى تستاهلي الخير يا فاتيما

بس يا ريت تعرفي قصتك للناس في بوست فيه كل الاحداث ..

قلوبنا كلها معاكي

لا حول ولا قوة الا بالله
بصى يا طمطم
مافيش قدامك غير الدعاء واللجوء الى الله عز وجل واحنا فى ايام مفترجة وداخلين على رمضان
وأكثرى من الدعاء دة
اللهم انا نجعلك فى نحورهم ونعوذ بك من شرورهم
اللهم رد اليا ابنى مردا جميلا
أكثرى من الاستغفار
خدى بالك الالف مرة استغفار بياخدوا نص ساعة بس
جربى وان شاء الله فرجه قريب اوى
ولما يوسف يكلمك تانى قوليله براحتك يا حبيبى مش لازم تيجى تعيش معايا
بس على الاقل خلينى أشوفك ولو مرة فى الاسبوع عشان انت بتوحشنى اوى يا حبيبى
ولا ماماى مش بتوحشك؟؟
ولما ربنا يسهل ويعرف يجيلك مرة فى الاسبوع ساعتها ممكن نشيل الغبار اللى على دماغه دة واحدة واحدة
ودايما حاولى تفهميه ان حب الام لابنها غير حب الاب
هو صحيح بابى بيحبك بس انا تعبت فيك اوى تسع شهور حمل وولادة وفراقك صعب عليا اوى
دة غير ان الرجالة تقدر تستحمل لكن انا يا حبيبى مش قادرة استحمل انى ما اشوفكش
وعلى رأى خيخة فيه كلام كتير عايزةاقوله ليكى ومش هاينفع هنا خالص
حاولى تتواصلى معايا
بأى طريقة تحبيها
دة الميل بتاعى
raniarachad@yahoo.com
فيه خطط لئيمة كتير ممكن من خلالها تستقطبى قلب يوسف ليكى وتلبسيهم العمة

زي ما يكون عندي احساس ان دة مش كلام طفل عندة 10 سنين

مش لاقي حاجة أقولها تاني يصراحة

بصى يا بنتى
عمرو بيتكلم صح
ده مش كلام طفل
ده كلام واحد كبير بيلقن يوسف الكلام

ولو حتى مافيش حد جانبه فاممكن فعلا يكونوا لعبوا فى دماغه




انا معنديش خطط علشان اقولك ازاى تشوفى يوسف

لكن

انتى قوية يا فاتيما
فبالتالى بتتكسري

انا عايزة اتكلم معاكى فى كيفية
تكونى خيخة ولو لمدة كام ساعة

لما تكونى خيخة
صدقينى ممكن تاخدى حقك

لكن لما تبانى انك قوية
ممكن تخسري



وبرضه محتاجة اتكلم معاكى وجها لوجه او تليفونيا

ماينفعنيش انا كلام الايميلات ولا التعليقات


شوفيلك طريقة للتواصل وبلغينى

لسلام عليكم
كل رمضان و انتم إلى الله أقرب
تحياتى

أختي العزيزه فاتيما
مش هواسيكي ولا احاول اطبطب عليكي

بس اللي شايفه ان ربنا بيحطك في ابتلاء, بس في نفس الوقت عارف ان الابتلاء على أد المقدره "لا يكلف الله نفسا إلا وسعها"

الصبر والصبر بس هوا دليلك

عندك ميزه أوعي تنسيها, اوعي الظروف تخليكي تحسي انك ضعيفه

عندك ميزه اقوى من أي سلاح في الدنيا
ميزتك انك أم
والله بجد, حسي بالميزه ديه
السلاح ده اللي محدش يقدر يهزمه أبدا

قلب الأم فيه نعمه صدق من ربنا توصل من القلب للقلب على طول

جايز يكونوا بيكلموا عقله, جايز يكونوا بيملوا دماغه, لكن انتي عندك قلب أم يستحمل ويغفر ويسامح ويداوي ويعرف كويس مين هوا الابن وامتى وازاي نوصل لقلبه

بصدق قلبي بيدعيلك ربنا يثبتك

أنا موافق على رأي سبهللة
إذا كانوا هما لعبوا في دماغه
إنتي ممكن ترجعي تنضفيها له تاني بالهدوء و الحوار العاقل و الإقناع
ما دام معاكي الحق يبقى ربنا حينصرك
و دعواتي ليكي يا ام يوسف
و إتجدعني كده و شدي حيلك
إحنا كنا فين و بقينا فين
فاكرة لما كان نفسك تكلميه بس في التليفون
دلوقتي مكالمة التليفون بقت شئ عادي و إبتدينا ننقل على الخطوة اللي بعدها
إصبري و الصبر مفتاح الفرج
حأدعي لك كتير ربنا ينصرك

يا عيني يا فطيمة معلش ده بردو بابي ومش عارف إيه ألي حصل زمان معاكي واكيد مفهيمنو ألي حصل على مزاجهم ومحافزينه الكلام ألي هيقوله لما تتصلي بيه ربنا معاكي وربنا هيرجعهولك إن شاء الله

شوفي يا أختي

عندي ردود لكل التساؤلات دي

وردود مفحمة


بس

انتي من الأول ضحيتي بمنتهى الحب

ودة يجبر الكافة على احترام تضحيتك والتضاؤل أمام ما تمثلة من قيمة نادرة

انتي أخترتي تحبي أبنك وتضحي بنفسك متحملة ومتظرة الاسوأ


مسير الايام تورية أنتي عملتي اية علشانة


ومش بس علشانة يا ستنا

انتي علمتنيني شخصيا معاني أستقر في يقيني انها انتهت بأنتهاء زمن المعجزات

لا تيأسي ولا تقنطي

وثقي تماما ان ربنا (العدل) موجود


مش انا ولا غيري اللي هيطبطب على قلبك

لا يا ستنا

أسأل اللة العلي القدير ان يتولى تلك المهمة عنا

لانك تستحقين ذلك

مش عارفة اقول ايه
كلمتينى على المفاوضات وساعتها قلبى
طار من الفرح
وحتصدقينى ياطمطم لما اقولك مش عارفة
ليه كنت حاسة ان ممكن حاجة زى ديه تحصل
وعلشان كده حتلاقى ان الكلام مع
يوسف يقى سهل دلوقت
الله يجازيهم سهلوا الامر بعد مابرمجوا الواد وغالبا فى السن ده بيكون رد الفعل بتاع الاولاد زى يوسف
اهم حاجة متزعليش وربنا معاكى
ربنا يجازيهم عن كل شىء قالوه عنك
وحسبنا الله ونعم الوكيل
بس انتى لاتوقفى الاتصال بيه
ومتحاوليش تبينى انك متاثرة من كلامه
وسنظل ندعى
ان يرده الله اليكى ردا جميلا
وباذن الله ربنا يتقبل دعواتنا
ودايما سأتذكر الدعاء لكى عند الافطار
وباذن الله محنة وتفوت بخير اوعى تاثر عليكى يافاتيما ربنا يثبتك
انا كان نفسى تكونى امامى واخدك
فى حضنى
وكمان الواد عادل خلانى ابكى من تعليقه
ان يوسف حيكون احسن منه
مش عارفة قلبى وجعنى من كلامه
ربنا يكتب له الخير هو كمان
تحياتى

ياااااااااااااااااااااه
موقف صعب على اى ام
ماتقوليش "مالك"
اللى انتى فيه طبيعى جدا ..انا متأكده ان اللى جواك اكتر
ربنا يصبرك
بس زى مانتى قلتى هو لسه صغير و بكره يعرف و يقدر
ربنا معاكى


وحشتينى جدا و رغم كل حزنك برضه هاقولك كل سنه و انتى طيبه و رمضان كريم

مش عارفة اقولك ايه
اكتر من الكلام اللى قريته فى التعليقات
اولا يمكن يوسف بس ماشاء الله عقله ناضج وانت بتحبى فيه الطفل

ثانيا اى طفل فى عمره وظروفه متهيألى ده ممكن يكون تفكيره
نفسه يجمعكم تانى
صحيح اللعب فى دماغه وارد بشدة
بس ييجوا ايه دول فى قدرة ربنا سبحانه وتعالى
استعينى بالله
وقولى ويمكرون ويمكر الله والله خير الماكرين
ربنا يصرف اذاهم عنه
ويفرحك بيه وبقربه
بس عودى نفسك انه يوسف ان شاء الله هيرجع لك بسم الله ماشاء الله بعقل راجل مش طفل

كلام سبهلله مقنع جدا
وخطط خيخه اللى مش عايزة تفصح عنها ممكن تكون مفيدة جدا كمان
ومهندس مصرى يمكن اللى حصل يخليه يركز معاك اوى فى عمرة رمضان بأذن الله

ربنا كبير اوى يافاتيما
بأذن الله هيستجيب دعائك ودعائنا وهيحفظ لك يوسف من اى سوء

لما قرأت تعليق مهندس مصرى تانى افتكرت دعاء سيدنا نوح
ربى انى مغلوب فأنتصر
ربنا ينصرك ويفرحك ويرد كيدهم فى نحورهم
ادعى اكتر واكتر
هى الحلقة بتضيق عليك اوى
بس ضاقت ولما استحكمت حلقاتها
يمكن خير
ربنا سبحانه وتعالى عايزنا نتضرع اليه ورمضان على الابواب


لما بتعدى عليا ايام صعبة بحفظ تاريخها واقول لنفسى السنة الجاية فى نفس الميعاد هيكون الحال احسن ان شاء الله
رمضان الجاى ويمكن ده
ربنا قادر على كل شى يكون الحال احسن بكتير

ماما جيت هنا لحاجتين
لا تلاتة تصدقي :)

1-طمنيني عليكي ....معقولة ابقي ابنك و الناس تسالني وااوقل معرفش ..؟؟
هما لسه مسالوش بس احتياطي :):)

2-بعتذر لام مالك اني كنت سبب في عياطها دا ... بس صدقيني انا مش بحب المجاملة وبعتبر يوسف اخويا فعلا و عشان كده محبهوش يكون شبهي ابدا في اي حاجة
الا طبعا يحب الاطفال :):)

3-ماما انا قريت تعليقات الناس تاني و عندهم حق في نقطة انه لسه دماغه بتتشكل و انتي لو قعدتي معاه هتكسبي صدقيني .... انت عارفة انتي بحب الاطفال قوي و اتعملت معاهم و كان في اهالي مثلا مش بيحبوني و بيقولوا للاولادهم مايلعبوش معايا ...
الاولاد دول كانوا بيقولوهم حاضر و يجوا يحكولي :):)
وانا علي العكس كنت بفهم اهلهم بيقولوا كده مثلا عشان ميعطلونيش او ميتعبونيش (اكيد مش هكره العيال في اهلايهم) ....
معني كلامي ...انك بسهولة تعرفي تغيير اللي زرعوا في يوسف .... مش هاقولك ليه بسهولة ... هاسيبك تفهميها
اللي عملت كل ده مع ابنها تقدر تعمل اكتر من كده

ولو فعلا رجع شوية حتي .... انا هجيله و يمكن اللي اتعلمته في سنين عمري القليلة دي .... يكون ربنا كاتب انه ينفع مع يوسف :):)

فاتيما
اعانك الله ونصرك على من يبث السم فى عقل ولدك .. ولكنها حرب طويلة لا بد لك فيها من سياسة النفس الطويل
وصدقينى مهما طال البعد وامتلات نفس ابنك بالتغيرات فمرجعه اليك ولا من مخلوق مهما كان سنه او ظروفه ان يبعد عن امه التى نادت بتكريمها كل الاديان
ولكنها وسيلة ضغط ربما تنازلت بها وقبلت العودة لابيه
ومهما كانت الظروف فانا ضد العودة لحياة زوجية كرهتيها سابقا وملاتك بالمرارة والالم سنوات طويلة
قاومى واجمدى وحتما سيعود ابنك طواعية
حبى ودعواتى وكل رمضان وانت بالف خير

طبعا انا مش هقول كلام زياده عن كل الكلام الي اتقال قبلي

انما الي هقوله بجد ..

ان ف يوم م الايام (زقريب كمان ان شاء الله )

الموازين هتتقلب و انتي الي هتبقي في الجهه المنتصره ..

لان الله يمهل و لا يهمل و انتي ايمانك عالي اوي بربنا

وهو ده اهم حاجه عشان ربنا بيقول انا عند ظن عبدي ..

صح .. حببتي بجد مش عاوزاكي تزعلي

بكره يوسف اما يدخل المدونه و يلاقي ان في ناس كتير بتحبك اكتر من نفسها

من غير حتي ما يشوفوكي لايف

هيعرف ان الناس الي حواليه لعبوا في دماغه

:)

أنا مش متابع الحكاية من الأول
يمكن علشان جديد متأخر

بس كل اللي أملكه إني أدعي لحضرتك إن ربنا ييسرلك الخير ,, ويبعد عنك كل التعابين والخنافس كمان :)

ربنا يفرح قلبك يا فاتيما
معلش يا طمطم هما اكيد اللى لعبوا فى دماغ طفل صغير واكيد كمان هيقولوا كلام غلط كتير بس انتى عارفة كده؟ والايام هتثبت ليوسف اد ايه انتى ام جدعة بتحب ابنها
مفيش غير حسبى الله ونعم الوكيل
ربنا يريح قلبك ويرجع يوسف لحضنك
وكل سنة وانتى طيبة يا اجمل ام
اموووواه

طمطم يا حبيبه هقلك الكلمه اليى طبيعى اى ام عارفاها وبتتقلها

مفيش حد بينسا امه ولاا بيعرف يكرها صدقينى

وهو راجع راجع لحضنك وليكى هيكبر ويعرف ماما الحنان ويرجع ليه علطول

ده من اليى بشوفه صدقينى

ربنا يطمن قلبك الموجوع ده واليى اناحاسه بوجعه كانه جوايا
ربنا يهديلكم الحال يا طمطم
اللهم امين

وكالعادة تلاقي عقلي في اتجاه عكس كل البشر

اولا مصدومة ومتضايقة انك مصدومة؟
لأ عادي جدا كل ما حد بيضربنا على نفوخنا بنقول اي وبنتألم عادي
لا الضرب بيخلص ولا الدماغ بتنحس

ثانيا نصيحتي اوعي اوعي تناقشي الواد خالص مالص
عارفة لو جيتي ناحية غسيل المخ دلوقت ها يمنعوه يكلمك تاني

هل تكلمي يوسف وتسمعي صوته مؤقتا زي ما هو كده والا ترجعي تاني مش عارفة تطمني عليه خالص؟

ثالثا ادخلي ع الإجراء اللي اتكلمنا عليه واللي انت ناوية عليه .. بس انا قلقانة من الإجراء قوي يا طاطا لأن محدش نخاف منه قوي الا اللي لا يخشى الله ولا يعمل حساب للآخرة قوي واظنك عارفة اقصد ايه .. انا خايفة يقلبوا حاجات ويزوروا حاجات وتلاقي نفسك في الدوامة تاني وطبعا فورا برضه ها يمنعوا يوسف يكلمك

رابعا بطلي خالص تفكري يوسف بحكايات يقول لك عليها مش فاكر ويتعود انه يرد كده وخلي دايما الحوار مُعد له سلفا .. زي جبت ايه لرمضان والأكل والفسح والصحاب وهدوم العيد والمدرسة وممكن حتى موضوعات عامة خالص على قد عقله ومتكلميش يوسف بصيغة النونو الصبيان عند سن عشر سنوات بيحبوا قوي اللي يكلمهم بجدية ويحبوا يعملوا كبار .. خليه هو اللي يحكي وانت اسمعي ومش لازم تدافعي خالص عن نفسك لا بهدوء ولا بعصبية وصدقيني شويتين كده وهو ها يفهم لوحده

ببساطة يا حبيبتي التمساح ميعرفش يتحول لقط اليف يعجب ابنه طول الوقت والطبع غلاب
ثانيا كونه بيقول لأبنه انا اتحرمت منك وبيقنعه فيوسف فعلا عارف انه ما شافوش 8 سنين ومش ها يفهم دلوقت الأسباب بس فيه يوم ها يفهم واليوم ده لسه بعيد شوية يا فاتيما

بس انت مستنية جوائز الصبر من الرحمن .. يبقى تتعشمي ليه في البشر

وبالنسبة لعادل اجمد كده يابني انت شفت حاجة امال لو عرفت انا شفت ايه كنت تعمل لي تمثال؟
اخشوشن واجمد للدنيا ياذكي يا رستم .. الدنيا لا تتعاطف مع المتألمين من أذيتها .. الدنيا عاوزة اللي منفض لها وهي مش عارفة تغلبه

ماما معلش لخامس مرة
ههههههههههه

جيت بس اقول حاجة لخالتوا ستيتة :
كلامك حضرتك صح قوي قوي بالنسةب لمسالة ان سن 10 سنين بيحب بيتعامل كحد كبير و ده فعلا ومش من 10 سنين بس لا من قبل كده بشوية كمان
وبيحب ان يبان بيقول حاجة قوية و ليها معني او لو نكتة يبقي دمه خفيف ويحب الناس تتجاوب معاه

انا من كتر من اتعملت مع اطفال خدت خلفية عن كل سن شوية :)

وياخالتوا من غير حاجة تمثال حضرتك بيتعمل من اول ما اتعرفت بيكي :):)
وهخشوشن حضرتك
بس هو ليه الناس اعتقدت اني متكئب و بعيط و بفكر انتحر :):)
انا فعلا شفت حاجات صعبة محبش لحد انه يشوفها و بالذات يوسف (اخويا بقي ) :):)
لكن انا واخدها مع الدنيا قفش ويا انا يا انا برضه :):)

السلام عليكم ورحمة الله وبركاته
ازيك يافاتيما
يارب تكونى بخير
لااملك الا الدعاء
وربنا يصبرك ويردهولك ان شاء الله
معلش تصبرى واحتسبى عند ربنا واكيد مش هيخيب ظنك فيه

بصي كلامك على قد مازعلني على قد ماهو متوقع حدوثه في رايي لما يكبر هيعرف لوحده فين الصح وفين الغلط ومين الي غلطان فعلا بس انتي خليكي على هدوئك ومعلش اصبري واستحملي وفهميه براحه وربنا يجمعك بيه على خير يارب

يااااااااااه يافتيما على أد فرحتى بزيارتك ليا فى مدونتى على أد حزنى بجد ودموعى اللى بجد مقدرتش أخبيها أنا مش بتصنع ولا بقول كده لأنى متعاطفة معاكى بس الانسان المجروح ما يحسش بجرحه إلا اللى اتجرح زيه جرحك كبير أنا عارفة وبرغم الاختلاف بين الجروح إلا إن الأمل فى الله واحد والخوف من إننا نفقده واحد ربنا ما يخلف ظنك أبدا ويصبرك ويجعل الخير كله من نصيبك ويفرح قلبك يارب

يارب بحق ما رجع موسى لأمه وحماه فى وسط أعداءه وبحق ما حمى يوسف ونجاه ولم شمله بأهله يحميلك يوسف ويرجعه لحضنك يارب

مش عارفة اقول ايه بس ربنا يرجعهولك بالف سلامة يارب ربنا مش بينسى حد وانتى صبرتى كتير وربنا هيكرمك باذن الله علشان ثقتك الكبيرة فيه

المشكله ان الاطفال سهل التاثير عليهم
لانهم مش بيبقوا فاهمين مين وليه وهيكسبوا ايه من كلامهم ده
بس فعلا يوسف مالوش ذنب ابدا
ربنا يقويكى
ويرجعولك بالسلامه يارب

مع انى كنت متوقعه كل ده بس مش عارفه اتلخبطت ليه اما سمعته جايز عشان حصل بسرعه
جايز لان حاسه ان يوسف حصله غسيل مخ جامد و مكثف
الكلام فوق تفكيره بكتير و غالبا ده ردهم على موضوع الحضانه بس بطريقه تضربك انت فى مقتل و تخليكى تنسى الموضوع خالص
بس انتىمينفعش تستسلمى كثفى مكالماتك للولد و حاوليه تقابليه كتير و تنضفى مخه من الزباله اللى حطوها فيه
الموضوع محتاج بال طويييييييييييييل قوى و بروووووووووود شديييييد
انا عارفه انه صعب بس انتى لازم ترجعى لعقل ابنك من تانى لان قلبه اكيد انتى موجوده و متربعه فيه

adel
يا عااااااادل متقولشى كدا على نفسكلو سمحت ..إنتا زى الفل يا بنى
كونك مريت بتجارب قاسية فدا مش ذنبك إنتا
دا ذنب من هو مسئول عنك
و هو دا مربط الفرس و اللى بيجننى يا عادل
إنى مسئولة عن هذا الملاك الصغير و كل ما يعانيه الآن بسبب اخطائى و سوء إختيارى ...
أرجع و أقول زى ما قلت ..كله مكتوب و لازم نشوفه
و مين عارف
لعل و عسى ما يمر به يخليه أقوى و احسن
زيك تمام يا ولدى الغالى



عاشقة الرومانسية
أنا بخير يا حبيبتى متقلقيش
يوسف معملش حاجة ..دا معمول فيه
متقلقيش يا عروسة البحور و طمنينا على أميرك الغالى




بت يا خيخة يا مش أى كلام
أقطم رقبتك ؟!!
و لا أعضك ؟
و لا أعمل فيكى ايييييييه ؟
أرجع لطليقى و العصمة تبقى ف إيدى كمان ...إنتى يا بنتى عايشة ف الخيال
إيش حال ما كنتى شوفتى كتير و عارفة ؟؟
إنتى رعبتينى لما إقترحتى الإقتراح دا
عارفة ليه ؟
لأن امى متصورة طول الوقت إنى ممكن أرجع لطليقى بسلاسة كدا من كتر منا مشتاقة ليوسف و إنى ممكن أتهور تانى و أرجع لأبوه عشان خاطرهو طبعا دا مستحييييييييييل بكل الاشكال و أنا قولت كدا ليوسف ف المكالمة
كنت برد بهزار و ضحك و ببرود أعصاب و طبعا دا هيخلينى أتاكد غنهم مش هيخلونى اكلمه تانى
و هو دا اللى تاعبنى بجد
اللعب فى دماغه وضع طبيعى و مكنتش متفاجئة
أنا متفاجئة من ما بعد ذلك يا خوخة
إننا وصلنا لحارة سد
بس




sharm
القصة موجودة فى بوست التغريبة يا شارم و شكراً على ذوقك

سبهللة
أولا يا سبهللولتى
متحرمشى منك
ثانياً يا حبيبتى الخطط اللئيمة اللى بتتكلمى عنها أنا بدأتها من اول مافتحت الخط الساخن مع يوسف من شهر و زيادة دا بعد موافقتهم طبعا لأن قبل كدا كانوا مبيرضوش ...
لكن أنا تصورت بعبط غن خلاص آن الاوان يرجعهولى خلاص ...المهم
انا رديت على يوسف كل الردود الهادئة اللى ممكن تتخيليها و كمان قولت الجملة بتاعتك لو عاوز تقعد ما بابا مفيش اشكال أنا بحاول محاولة و يمكن تنجح يا يوسف لأنى بحبك و عاوزاك تعيش معايا ...و المناقشة إنتهت بأنى منتظرة رد عمه عليا
لكن أنا متوقعة الرد ..بالرفض
و متوقعة يقطعوا الإتصالات بيننا
و للأسف انا مضطرة ادخل فى مجاهل تانية مكنتش عاوزة ألجألها و هى المحاكم و حتى دى عاوزة صبر شوية و مينفعشى دلوقتى
هو دا اللى مزعلنى يا سبهللة
عارفة إيه اللى مزعلنى اكتر
‘نى السبب فى وضع طفل صغير جميل زى يوسف فى موقف بشع زى دا ..
مش زعلانة على نفسى و الله
انا قلبى واجعنى عليه
و جزينة لأنه فى قبضة ناس زى دى و انا مش قادرة اخلصه منهم
ربنا كبير و هنفذ نصايحاك
يا رب
يا رب



amr...
عافة يا عمرو و مش زعلانة منه
انا زعلانة عليه
حمدلله على سلامة جدك



sonnet
و عليكم السلام يا سونيت
و رمضان كريم علي الجميع إن شاء الله
المدونة نورت




أحمد أبو العلا
دعواتك هى الطبطبة بعينها يا احمد
و ربنا يسمع منك يا عزيزى
اتمنى فعلاً لو يوسف رجع لحضنى اقدر انسيه التأثيرات السيئة دى و متبقاش موجودة للأبد

مهندس مصرى
طبعا فاكرة يا محمد
و هو دا اللى مزعلنى
لأن المكالمات دى هتنتهى خلاص
بعد تحقيق الهدف منها
ومن اول ما سابونى اكلمه و انا بقول لروحى خير هو فيه ايه
اصل مفيش حاجة ببلاش كدا عندهم ...اتارى إن فيه هدف محدد ف دماغهم كالعادة و انا بس اللى كنت حسنة النية ..
و اللى مزعلنى حال يوسف مش حالى يا محمد
متحرمشى منك ابدا و لا من دعواتك



ranim
يا حبيبتى عارفة و الله
و مش متضايقة منه انا متضايقة من اللى حاصله
سلميلى هلى هند و على والدك العزيز




مصرى دا
متحرمشى منك يا هانى
كلامك بين سطوره حاجات كتير متفاجئة بيها ..بس مفاجاة حلوة قوى
أشكرك من قلبى بجد




ام مالك
أنا كمان يا حبيبتى كان قلبى متوجس خيفة منهم بس كنت متصورة غنهم زهقوا خلاص من مسئوليات يوسف و عاوزين يرجعوه بالتفاوض
اللى صدمنى مش يوسف ..
اللى صدمنى إنى رجعت للمربع صفر فى التعامل معاهم
عادل شخصية جميلة قوى يا ام مالك
لو شفتيه يخطف قلبك ببراءته و نقاوءه
عشان كدا قولتله هتبناك يا بنى
و لا زلت بقول اتمنى اشوف يوسف زيه
يا رب
دعوتك ليه حاجة تفرح و ربنا ما يحرمنا لا انا و لا يوسف و لا عادل
من قلبك الطيب

mohra
إنتى كمان وحشتينى قوى
و انتى طيبة يا مهورة و رمضان كريم عليكى
و يا ريت تحاولى تيجى معانا فطار رمضان عشان اشوفك



لقد خلقنا الله أحرارا
جميل قوى دعاء سيدنا نوح
و كلامك كله صح بس الوحد قلبه بيوجعه لما يكون قليل الحيلة
كلام سبهللة و خطط خيخة من قبل ما أسمعها عارفة إنها غير قابلة للتنفيذ مع العالم دى ..لأنى حافظهم كويس و بعد كل العمر دا كنت متوسمة فيهم أنهم يكونوا إتغيروا فإكتشفت إن دا مش حقيقى و هما زى ما هما للأسف
ربنا يرد كيدهم و يحفظ يوسف منهم
يا رب



adel
1- انا بخير يا عادل أهو
2- ام مالك اصلها حنونة جدا و طبيعى تتأثر بكلماتك الصادقة
3- اتمنى كلامك يكون حقيقى لما انفذه مع يوسف ..لن الناس دى انا للأسف و لازم أعترف عندهم قدرة غريبة على قلب الحقايق و تشويه أى شىء و التأثير على الل حواليهم ..تعرف يوسف لما بكلمه طبعا ميخلهوش يرد عليا علطول .زجدته بتقولى دا ف الجامع بيصلى الضهر ...او فى المقرئة بياخد درس ..ألخ
طبعا اللى يسمع و يشوف يقولك دول ناس الورع واخد حقه معاهم قوى ..و بيخدعوا اللى حواليهم بامظاهر دى
أنا نفسى اتخدعت فيهم اكبر خدعة ف حياتى و للأسف يوسف دلوقتى واخد عنهم فكرة إنهم المنقذين و اللى بيعرفوا ربنا و العدل و الكلام دا ...
بتمنى من ربنا يرجعلى قبل ما يخلصوا على دماغه و يغيروه تغيير معرفش اصلحه تانى ..و بس يرجع يا عادل و إنتا تظبطه معايا و تقوم بواجبات الاخ الكبير بقى ..ماشى ؟

القدر و انا
ماهو دا اللى حارق دمى برضو يا رانيا
حكاية التلاعب بالولد عشان حاجة زى دى المفروض إنها من عاشر المستحيلات ..دنا ضيعت 8 سنين من عمرى عشان اطلق منه هرجعله ازاى بعد كل الأذى اللى سببهولى ...
بس أرجع و اقول يوسف معندوش فكرة عن الأذى دا و كنت بحاول مقولش حاجة ..
محزننى قوى حكاية إنه بيتكلم عن جواز الراجل من اكتر من واحدة بالإقتناع الرهيب دا مع غنى اتكلمت معاه ف الموضوع دا قبل كدا زمان و قولتله رأيى و المحاذير اللى حطاها ربنا ف الحكاية دى لكن للأسف هما عرفوا يغيروا المفاهيم دى و لخبطوا دماغه ..
ربنا كبير يا حبيبتى و رمضان كريم عليكى انتى كمان إن شاء الله



ثلوج
يا رب يا ثلوج و يسمع منك ربنا و يكون قريب
انا مش زعلانة
أنا صعبان عليا حال الولد و غنى مش قادرة اساعده





د.ياسر عمر عبدالفتاح
مجراش حاجة يا ياسر
و المهم إن قلبك فيه الخير و بتدعى ليوسف ..دا يكفينى و يفيض




مى
و الله يا مى بقولها طول الوقت
أصلى ببقى عاوزة اشتم و انفس عن غصبى
و بعدين ارجع و اقول ليه ياخدوا حسنات على حسابى طب ما اقول الجملة اللى أقوى و اشد و مفيهاش اى غلط
و بحسبن عليهم طول الوقت





mahsen saber
أنا خايفة يا محاسن ينسانى
و شوية شوية يكرهنى خالص
ربنا يسمع منك يا رب
الواد ماجد اخويا جاب جريدة الشارع و قريت خبر عنك فيها و قعدت افتخر بيكى قوى
ربنا يسمعنى عنك كل الخير دايما
مشرفنا علطول يا النص التانى لقلبى
سلميلى عليه قوى
مين ؟؟
بيرو طبعااااااااا
وبوسيلى عينيهزى ما بتقول فيروز

ستيتة حسب الله الحمش
بالعكس يا ستوتى
إنتى معايا على الخط و مروحتيش بعيد خالص
فعلا أنا لما لقيت الكلام مع يوسف مودى فى سكة مقفلة كدا
اكتفيت بالاجابات عليه
و ف الآخر قولتله انا ف انتظار رد عمك و لو مش عاوز تيجى تعيش معايا خلاص يا بنى براحتك
بس باباك بقى عنده ولد
و جدتك عندها تلاتة انا مليش غيرك و اولى بيك من اى حد
و لو اتجوزت انا عند وعدى ليك زمان (قالى مش فاكر) أن لازم رأيك يكون اولاً لأنك رجــلى الوحيد و الجواز دا يخصنا احنا الاتنين و مش معنى انك فى بيت تانى يبقى خلاص ملكش وجود ف حياتى و ابطل افكر فيك ...
قولت كلام كتير كنت قاصدة يوصل ليوسف و كمان يوصل للى سامعين على الخط التانى
قولت إن الرجوع لباباك من عاشر المستحيلات ...
و إن التعامل مع اهل باباك دا عشان خاطرك لكن هما مش قرايبى و لا مربوطة بيهم لأخر العمر ( مفهمينه كدا )
و إنى حجزالك مكان فى احسن مدرسة خاصة فى حيينا و إن معايا علاقات و امكانيات لذلك بينما باباك معندوش و متقلقش من حكاية المدرسة دى ( مفهمينه برضو إنهم انقذوه و انا اللى هبهدله )...
قولتله ف الاخر خلى عمك يرد عليا بكلام نهائى عشان عندى خطوات بعد كدا
طبعا قعد يسالنى خطوات إيه ياماما
مرضتيش ارد عشان أقرف اللى بيسمعوا على الخط التانى و مريحهموش ..
و توهته و سالته عن الفانوس هييجى ياخده امتى و عيد ميلاده و الكلام دا ...
طبعا هما دلوقتى قاعدين يفكروا فى الخطوة القادمة و انا هأجلها شوية عشان الاذى المتوقع و ربنا يستر
و يحلها من عنده من غير ما أضطر اواجهم تانى لانهم متغيروش للاسف
و لن يتورعوا عن فعل اى شىء
أنا بس قلبى مموتنى على يوسف
و على الحفرة الزفت اللى هو واقع فيها و مش قادرة امد إيدى انقذه
دعواتك يا س س

adel
أنا معاك ف حكاية التمثال دى يا عادل
و يوسف اخوك و براحتك أساشا





المعتصم
و عليكم السلام يا مصطفى
و متحرمشى منك و لا من دعواتك



حاسوبتيه
يا حسوبة أنا معاكى فى كل اللى قولتيه بس إنتى عارفة الواحد قلبه مش جايبه بس و حبيت أفضفض معاكو مش اكتر



(joudy)
حاسة ما بين السطور إن عندك قصة مشابهة ليوسف يا جودى
ربنا يسعد أيامك و ينسيكى كل جرح يا جبيبتى و سامحينى على التقصير فى زيارتك



آيوشة
متحرمشى منك يا آيوشتى




bent men elzman da!
بس المشكلة إن فيه تأثير يخلص و فيه تأثير يمتد مدى العمر و يسيب آثر فى صاحبه و ميطلعشى أبداً و دا سبب خوفى
ميرسى على الدعوة الحلوة



صيدلانية طالعة نازلة

كل الأسباب اللى قولتيها يا علا
و اكتر
انا عارفة الكلام دا بيتقال ليه ؟؟
بس مع ذلك استغربت من كم الجرأة فى طرحه
يعنى المسألة عموماً ماشية كدا طول الوقت ...طلبات منهم و غريبة و مرفوضة اصلاً لكنها تثار فى كل مرة و سواء طلبات بالجوع أو طلب فلوس او تنازل عن احكام نفقة و غيرها
و لما تيجى تدخلى معاهم فى تفاوض حقيقى باللى تقدرى عليه و هو الاحكام مقابل رجوع الولد يتراجعوا هما عشان عاوزين اللى اكتر و اكبر
عاوزين قلوس
و عاوزينك ترجعى عشان تتذلى و يتم الانتقام منك
و عاوزين يتسلوا و يستفيدوا باللى ف إيدهم قدر الأمكان بغض النظر عن المصلحة و إن دا إنسان لازم يتعمل حساب ليه ...
حسبى الله و نعم الوكيل فيهم
حسبى الله و نعم الوكيل
و ربنا يحفظ يوسف مطرح ما يكون
معاهم و لا معايا
دى آخر دعوة ممكن ادعيها لأن ضهرى خلاص للحيطة
بس على جنب شكرا لأنك لسه بتدخلى و تعلقى عندى أنا قولت هتزعلى من قلة ذوقى و مش هتعرفينى تانى بس كما توقعت إنتى اكرم ميت مرة
خالص ودى ليكى

يالله أنها بالفعل جريمة في حقك فعلها من كان يسمي زوجاً وسانده شقيقه وساندتهم أمهم والعائلة كل هذا ليبدونكي عن عالم طفل حدث في أعوامه تلك طالما ليرغب بصدر حنون طيب يجوب معه لحظات سروره وأحزانه يالله أنها لأشد الأحساسيس ثقلاً علي قلبك المفتوح لنا جميعا وليوسف قبلنا كيف طاوعهم قلبهم أن يجعلونه ضد الأ أنك بعيده عنه لا تملكين أن تظهري حقائق تنفد أكاذيب يبثونها بقسوة وحقد وإنتقام
لأأعرف ماذا حدث لقضائنا لماذا لا يحكم بقسوة علي من ينتزعون الأبن من أمه
وخاصة من هي مثلك (هناك أمهات أقل عاطفة منك يتركون أبنائهم للشوارع فدعينا منهم)

سيدتي لن أقول لكي عليكي بالدعاء فأنا بت لاأؤمن بإن الدعاء سيفعل شيئا في زمن يحتاج منا تشغيل العقول في الدراسة والتخطيط

عودة يوسف لكي مؤكدة وتحتاج منكي أن تصبحي أما لها قلب الأسود وعقل الثعالب ومكر الذئاب
أعذريني علي نصيحتي فنحن في عصر يحترف ظلم المرأة وخاصة أن أصبحت أما تنشر الحنان بإيديها

***********
خارج المود
بعتلك حاجة علي الأيميل من يومين وصلتك سليمة

قصدت كلمة ليبعدونكي

معلش لما بكتب بقلبي بنسي ارجع اللي كتبته

بس براجعه برضه



ليكن التوفيق حليفك ونحن معك

فنحن الان اسرة متشابكة نحتاج منك فقط ان تثقي فيما يمكن ان تفعله أسرتك التدوينية من أجلك في الأفراح والأحزان


شقيقك/رامز عباس

خال الواد عادل

حاسة بيكى قوى و بكل كلمة قولتيها ، حاسة قد ايه كل حرف سكين ينغرس فى القلب ، ولأنى أم و يمكن تقريبا ظروفى مشابهة ليك عموما لكن التفاصيل تختلف ، عاوزة أقول لك حاجة نفس الكلام كان ممكن يوسف يقوله لك حتى و هو مقيم معاك ، و لما يكبر ها يقول لك أكتر من كدة ، الأم دايما بتدى دون أنتظار المقابل ، لأن حبك حب ربنا زرعه فى قلبك يوم ما زرع يوسف فى رحمك ، أرحمى حمولك على الله وقولى يارب ، وربنا كريم قوى ، كل شيئ أن شاء الله ها يتصلح ، و أن شاء الله يوسف ها يرجع و يعرف قد أيه أنت حبتيه ، وضحيتى عشانه كتير دون أنتظار لكلمة شكر حتى ، أنتى أم فاتيما و الأم معناها كبير قوى ، معناها عطاء بلا حدود و الأهم من العطاء هو عدم انتظار المقابل يعنى مش بتدى حب علشان تاخدى مكانه حب ، لأ أنت بتدى حب لأنك ما تقدريش ماتحبيش .
كلامك وجع قلبى قوى ، لكن أوقل لك أوعى تضعفى و تستسلمى ، خليك دايما قوية و استعينى بالله ، فهو وحده القادر على كل شيئ ، ومن استعان به يجد قوة غريبة تساعدة على تخطى كل المحن و الأزمات ، قولى دايما يارب .

عزيزتي فاتيما
ربنا معاك و كوني متاكدة انه مش حيسيبيك ابدا
و حرجع اقول لك نفس الكلام اللي قلتيه لنفسك : دا لسه السكة طويلة قوى
طولى بالك
جمدى قلبك .. ومتيأسيش بسرعة
إنتى ف قلبه مهما حصل
كل الود لك عزيزتي
مودتي الدائمة

دى تالت مدونة ادخلها النهاردة واعيط

مالك بس يا مامتى

بكرة اكيد هيكبر وهيعرف يفرق مابين الصدق والكذب مابين الحقيقة والزيف مابين الحنان الاصلى ومابين حب الامتلاك

ارجوكى مش تزعلى

مش مستحملة اشوفك كدة ياريتنى كنت معاكى دلوقتى علشان اطبطب عليكى

كل سنة وانتى طيبة يا قمر

تحياتى

ايمى

أنا حاسة بيكي قوي قوي يا فاتيما..و كنت عارفة انك حتسمعي الكلام دة لأن في 3 أسابيع ولادي قالولي الكلام دة ما بالك سنتين؟!!هما الناس كلها وحشة كدة؟و لا ولدنا ذاكرتهم ضعيفة قوي كدة؟و لا احنا اللي شايفين الدنيا بطريقة غلط؟يا فاتيما الحاجة الوحيدة اللي بتصبرني و بتخفف عن قلبي اللي بيتقطع لما اسمع الكلام ده هي الحضن الحنين اللي ربنا رزقني بيه..أرجوكي يا فاتيما بصي قدامك و خلي يوسف دايما في قلبك بس برضه افتحيه للدنيا عشان احنا بتعيشها مرة واحدة بس..ربنا يهديهولك و يحميه..طمنيني عليكي

على فكرة يا حبيبتى
ده واضح جدا ان ده كلام متحفظ ليه من اللى حواليه وغسيل مخ

المفروض مش يوجعك بالصورة دى لانه اكيد هيكبر ويشوف بعنيه الناس اللى هو فى وسطهم ويعرف الصح من الغلط وده مستحيل هيعرفوا يخبوه عنه علطول

حاسه بيكى اوى والله
وكلامك وجعنى اوى
بس مش ملاحظه حاجه فى كلام يوسف ؟؟
يقصد ايه بنعيش سوا احنا التلاته دى معنى كده ان ابوه قال ادامه انه عايز يرجعك تانى وانك انتى اللى رافضه الرجوع لحضن العيله الحنون طبعا

فطوم يوسف لسه طفل مش يفهم انهم بيعملوا كده علشان يكرهوا فيكى والطبيعى انه يتأثر بكلامهم
دول ليل ونهار كلام فى ودانه متخيله ايه ؟؟

ربنا يهديه ليكى ويقربكم من بعض

كل سنة وانتى طيبة وبخير دايما يارب

انا احمد اللى كنت معاكم يوم ندوة مصطفى حسان انا و عادل وميمى
ياترا افتكرتينى

فاتيما.. انا مش بعرف ارد ولا بعرف اطبطب واقول كلام متكرر من معلش وقدر والكلام اللي تقريبا ما بيعملش حاجة غير انه بيزعل اكتر منه بيداوي وخصوصا لو متكرر

فاتييييييما.. بصي بقى انا عارفاكي من زمان مع اني مش بدخلك كتير.. بس مها اختي (احسن تستاهل) بتحبك اوي.. وانا لما قريت الكتاب بتاع المدونات البنات عجبني اوي اوي بوستك ودي كانت اول حاجة اقراهالك
ولسة عارفة ان في فطار للمدونين.. هتيجي بقى واشوفك وكدة؟؟

miro el niro kwanirooo

مش عارفة اقول كلمة واحدة بس قلبي واجعني لدرجة اني مش لاقية كلام

-----------------

كل سنة وانتي طيبة وبخير وبسلامة

عايزة اقولك على حاجة يا فاتيما وما تزعليش منى !
ما تفكرتيش مرة بينك وبين نفسك انك متمسكة جدا جدا بفكرة رجوع يوسف .. واللى انشاء الله هتتحقق علشان تخلى نفسك بصورة ما ما تفكريش فى نفسك ؟
شوفى وكلامى هقولهولك بمنتهى الامانة لانى بقوله لنفسى بالرغم من اختلاف الظروف :
لازم تعيشى حياتك .. تحبى وتتحبى من راجل بعينه .. حضن يختويكى على الرغم من خوفك من الظلم زى ما سبق وحصل ,,
حقك وحياتك ونفسيتك وافتقادك لحاجات كتيرة بتقول انك لازم ترتبطى .. وارتباطك مش هيأثر على حبك ليوسف او حب يوسف ليكى
العمر بيجرى يا بطة والخوف انك تفضلى كده ولما يجرى العمر ما تلاقيش الا الوحدة تتحضنى بيها والبرد بيلفك
دورى عليكى شوية .. مش عيب ولا حرام
ويوسف هيفضل ابنك وانتى امه مهما حصل ومهما طالت غيبته
ما تزعليش منى لان ربنا يعلم انى بحبك واللى انتى بتحسى بيه مر عليا .
كل سنة وانتى طيبة يا فاتيما وربنا يبلغك رمضان وينور لك بصيرتك
ونسيت اقولك كمان اوعى ترجعى لطليقك لانك هتتعبى واللى بيتعب ما بيعرفش يريح حد .. يعنى هتتعبى مش هتعرفى تريحى يوسف وانتى هتبقى بتموتى كل يوم .. مالهاش لازمة .
وحاجة كمان يا فاتيما كتير من الازواج لما بيكون بينهم مشاكل او يحصل بينهم انفصال بيسوئوا صورة الطرف التانى قدام عيون اطفالهم علشان يستأثروا بيهم فدى حاجة مش جديدة وما تستغربيهاش وما تنتظريش ان حد يكون نقى وطيب زى حلاتك مفيش اتنين زى بعض يا اوختى حتى صباعينك اللى فى كف ايدك مختلفين
اعتذر على الاطالة بس والله بحبك

حبيبتي الغالية

اصبري واحتسبي
ربنا هيهون كل حاجة ويحلها من عنده إن شاء الله

:(

قاسية جدا الكلمات ومهما قلت أكيد مش هكون حاساها أدك. ربنا يصبرك يا حبيبتي...ورمضان جاي ادعي كتيــر
و إن شاء الله الفرج هييجي من عنده

وأ،ا أكيد مش هنسى أبدا أدعيلك يا توما

ماما انا جه
النت رجع ورجعت تاني عشان ابتدي ادوشك اهو بقي
وحشتيني اوي
كلامك وجعني اوي
وكلام في سرك انا عارفه كل حاجه يوسف مر بيها
وكل احساس حاسس بيه
وكل كلمه بتتقاله تاثيرها عليه ايه
عايزة اتكلم معاكي لو ينفع اضيف ميلك علي الجي ميل قوليلي اه لو مش ينفع مش تردي علي الجزء ده
هكتب تعليق تاني بكره لما اطله من المود ده
تصحبي علي خير يا اطيب ام

بصى يا فاتيما الناس دى ماسكه فى الولد ده بس عشان انتى هتموتى عليه
و عشان كده هقولك على حاجه وصلى استخاره عليها قبل ما تعمليها اتصلى بعمه وقولى له انا خلاص مطمنه على الولد عندكم واتطمنت اكتر لما لاقيته ماسك فى باباه ومش عايز يرجع لى واتأكدت انه مرتاح معاه
الحاجه التانيه تشوفى ابنك وتدلعيه جامد واليوم اللى بتشوفيه فيه تهنيه ومتكلميهوش فى حاجه وخليه يستنى اليوم ده بفارغ الصبر
واطمنى الطفل فعلا بيحس بالحنيه وهيجيلك والله والتعبان اللى جوه ابوه هيظهر هيظهر و مفيش حقيقه فى الدنيا بتستخبى و الكلام اللى قاله لك فى التليفون ده مش كلامه وهو قاله عشان عايز يقولك ده كلامهم انا بس زعلان منك عشان سايبانى عندهم فبيحاول يوجعك زى ما هو موجوع بس جمدى قلبك شويه و زى ما صبرتى السنين اللى فاتت خلاص ابنك فاضل له سنتين بالكتير وهيبتدى سن المراهقه اللى فيه صدقينى هيعرف باباه على حقيقته و اللى فيه بردو ابوه مش هيستحمله الأبهات من النوع ده معندهاش صبر على تربية طفل
عارفه ان الفكره اللى قلتها لك مجنونه بس صدقينى ده زمن المجانين والناس اللى من النوع ده اوعى تتصرفى معاهم بشكل هما متوقعينه منه
و ابنك راجع راجع مفيش حد بينسى امه
و لما بيقولك نسيت كذا او كذا ده مش حقيقى اول سنين فى عمر الطفل هى ذكرياته وهى شخصيته
الصبر ربنا يقدرك عليه
تقبلى تحياتى

أجمل حاجه فيكي ان الدنيا علمتك بطريقه قاسيه للغاية ازاي تكوني واقعيه

التجربه اللي انتي مريتي بيها خلتك واقعيه في نظرتك و تحليلك.. ربنا يعينك و يقربه منك كما يجب لأم و ابن

اكتر حد كان نفسي اشوفه يوم حفلة القاضي هو انت و للأسف مقدرتش آجي

ياريت نكون أصدقاء على المستوى الشخصي يا فاتيما
و لو ان ماشاء الله حبايبك كتير مش محتاجه اصحاب زياده

بحييكي

انا مش هعلق على البوست دا لانك عارفة تعليقي
انا بس عاوزة اسالك: انتي ليه عاملة مدونة يوسف للقراء المدعوين ليها بس؟ انا جيت ادخل عليها عشان اشوف حطيتي حاجة جديدة ولا لا لقيتهم مش راضيين يدخلوني على الباب وفضلت اخبط محدش سمعني.. عااااااااااااا

رامز عباس
هون عليك يا رامز و كان بودى اقولك إن القانون ظالم بس دا مش حقيقى ..
اللى متعهدين بيه و بيمشوا فى زوارقه هما اللى بيظلموا غيرهم ...
و ساعات الدعاء و ف حالتى انا غالباص هو الحل الاول و الاخير لأن خصومك أبشع من إنك تنتصر عليهم و للأسف الشديد دا اللى حاصل بع كل هذا العمر و الصراعات لسه كل حاجة متغيرتش
مبقاش فاضل غير إنى أقول يا رب
و احاول تانى و ف توقيت تانى
الحاجة وصبتنى يا رامز و كلك ذوق
و إبقى إبتعلى و النبى اى حاجة تخصنى لحسن انا مليش فى الفيس بوك دا لا ناقة و لا جمل و لا حتى قطة
كل الود ليك




ام بتول
ربنا يعينك و يقدرك على التحمل
إنتى كمان حمولك مش خفيفة
كل اللى قولتيه هو ما توصلته بعد الجولة دى و الجولة الجاية علها تنفرج
بقول يا رب و الله يا ام بتول
أنا بس حازز فى قلبى وجود يوسف هناك وسط كم الحقد و التشوية النفسى دا
بس



ASSAFO ANAROZE
بقولها علطول يا أسافو
و متحرمشى منك ... رمضان كريم عليكم فى المغرب الجميل الطيب
و بشكرك بزاف


EMMY BABY
إنتى مش بتعيطى عشان الصدفة
إنتى إتاثرتى لأن قلبك فيه الخير يا إيمى
انا مش زعلانة يا حبيبتى أنا بفضفض معاكو باللى ف قلبى
و كمان إنتوا ليكو نصيب ف يوسف
و مين قال إن الطبطبة مش حاصلة بالفعل ...أومال التعليق بتاعك دا تسميه إيه غير كدا ؟!!!!!!!

DAHLIA..
يا حبيبتى قلبى معاكى ...
بس عارفة لما قعدت مع روحى شوية فكرت ف إيه؟
بصيت لشىء تانى خالص
إن عيالنا أقويا و احنا مش واخدين بالنا يمكن ..
يعنى يوسف لما راح لهم كنت متوقعة يتبهدل معنويا جدا معاهم بسبب عصبيتهم و المشاكل المتراكمة و خفت كل دا يطلع على الولد بصورة ظاهرة و مربكة ..مش عارفة ليه حاسة زى ما دوبا قالتلى مرة إن يوسف عمل لروحه شرنقة يستخبى فيها عشان يتكيف مع اللى حاصل ...
حسيت بكدا الأيام دى مع يوسف
هو اكيد عاوز يعيش معايا ..اكيد من جواه بيتمنى
بس احباطه من عدم حدوث ذلك اول ما راحلهم من سنتين خلاه متكيف مع الرفض و ممشى حاله
جايز اكون بحمله فوق طاقته
او بضحك على نفسى و أصبرها
بس بقول يا رب
يا رب إحفظه و إحميه و لو بعيد عنى
و مش لازم يبقى معايا
هونى على قلبك يا داليا
ربنا كبير قوى
قوى



حنين القلب
عارفة يا حنونة كل اللى بتقوليه
مش زعلانة منه يا جماعة
انا زعلانة عليه و على صعفى و قلة حيلتى و هوانى على بعض الناس
بس
النونة عاملة إيه
انا عاوزة تؤام و إتصرفى مليش دعوة



إسماء و احلام ف وجدانى
و انت طيب يا استاذ احمد طبعا لازم إفتكرك الناس الذوق متتنسيش
نورت المدونة كلها و ان شاء الله هرد الزيارة
كل الود ليك



كراكيب
يا ميرو ازيك إنتى و يا حبيبتى قولى اللى براحتك و ميهمكيش
مهاميهو دى حبيبتى و باين عليكو عيلة جميلة و دمها خفيف قوى
مبسوطى جدا بتعليقك دا
و إن شاء الله جاية فطار رمضان طبعاااااا لو لم يحدث اى شىء
أنا متشوقة اشوف ناس كتير حلوة لأول مرة هتيجى الفطار و سيادتك غنضمتى للقائمة الجميلة دى
اشوفك على ألف خير يا حبيبتى و سلامى لمهاميهو الشقاوة



وومن
متقوليش حاجة يا ميروا أنا عارفة اللى ف قلبك
دعواتك بس و كفاية
و كل رمضان و إنتى بألف خير و إعملى حسابك على الفطار و مفيش تفاهم
جاية يعنى جاية
هيه

DREEM
اولا مش هزعل منك يا حبيبتى و إنتى عاوزة مصلحتى و مبتقوليش شىء يزعل أساساً ...
ثانيا كلامك صح و ليس عليه غبار بس الحكاية عاوزة نِفس و رغبة و إستعدادا للبدء من جديد و كل دا غير متوافر عندى ف الوقت الحالى و بعدين الجواز دا نصيب و مكتوب و محدش هيهرب منه مهما حاول ..
ثالثاُ رمضان كريم عليكى و على البنات يا رب


WISH I WERE A BUTTERFLY...
هو دا اللى بعمله يا هوبى
بقول إبنى يا رب
و حسبى الله و نعم الوكيل
رمضان كريم عليكى
و حاولى تيجى الفطار بتاع رمضان لو قدرتى



فتاة حالمة
يا ستى إدوشينى زى ما تحبى
و هستنى تعليقاتك الجميلة دايما يا حبيبتى
رمضان كريم عليكى و على كيكى عوووو
و كل سنة و سى احمد اخوكى طيب



غير معرف
و لو إنى بشبه عليك من أسلوب الكتابة
بس هنمشيها غير معرف
كلامك كلها محل تفكير و دراسة و بعض منه بينفذ بالفعل
كل سنة و إنت طيب و رمضان كريم



FARIDA
أنا كمان شرحو يا فريدة
كان نفسى اشوفك يوم حفل المراكبى قوى
بس بإذن الله تتعوض
واحنا أصدقاء فعلا يا فريدة
المدونة دى هى الجسر اللى بينى و بينكم يا حبيبتى واتمنى تكون كافية ليكم زى ما هى بالنسبالى
كل الود ليكى و رمضان كريم عليكى
إن شاء الله



BOBO
يا حبيبتى أنا كنت بعمل فيها حملة تنفيض قبل رمضان و بغير القالب و كدا
دلوقتى بقت مفتوحة و جاهزة لأستقبال زوارها الكرام خلاص
بوسة لعمر و حضونات ليكى و اطيب تحية لراعى الملك

فاتيما عزيزتي
جيت اطمن عليك يا غالية
اتمنى تكوني بالف خير
رمضان كريم

سلام عليكم
بداية ... دى اول مرة ليه هنا
بس بجد اتاثرت جدا وحبيت مدونتك اوى
وياريت تقبلينى من اصدقاء المدونة
دمتى بخير وياريت تدعى كتير فى رمضان وعند الافطار وان شاء الله ربنا يرجعهولك بالسلامة
كل سنة وانتى طيبة

كل سنة و انتي طيبة ياماما
ورمضان كريم
وان شاء الله الايام الحلوة دي تتديكي اللي بتتمنيه :)

كل سنة وانتى طيبة ياماما
ربنا يكرمك ويسعدك
ورمضان السنة دى يكون أحلى

يعني انا اسافر اسبوع ارجع الاقي الدنيا مقلوبة كده؟

:-)

وبعدين مش احنا كنا متوقعين قبل كده ان هو ده السيناريو اللي هيحصل؟ ايوة كنا متوقعين .. وعشان كده طول البوست انتي بتسألي نفسك: مالك؟ اتفاجئتي ليه؟

لكن ارجع واقوا واعيد واؤكد ان دوام الحال من المحال والحق هيبان ان ما كانش النهاردة يبقى بكرة .. ويمكرون ويمكر الله والله خير الماكرين

هما فاكرين نفسهم كده شاطرين يعني؟ سيبيهم يفتكروا اللي هما عايزينه .. ربنا ما بيساعدش الظالمين أبدا ولا بينصرهم مهما طال الزمن .. بكرة ربنا يظهر الحقيقة ليوسف .. بكرة تقولي المراكبي قال

كل سنة وانتم طيبين

رمضان فرصة للدعاء يا فاتيما والابتهال الى الله ربنا يزيح همك ويردلك يوسف ردا جميلا
معلش حبيبتى كل ده متوقع
المهم انتى اثبتى وادعى ربنا وانتى موقنة من الاجابة بلا ذرة شك انه سبحانه وتعالى هيرجعهولك ليقر عينك به ان شاء الله
الحمد لله حبيبتى على كل شئ كلها ابتلاءات من الله .. اصبرى عليها وان شاء الله الجاى اجمل

كل سنة وانتى طيبة يا قمر
ربنا يعيد عليكى رمضان بكل الخير و الرضا من الله

تعالى استلمى التاج بقى وروقى
ربنا كبير

عزيزى الأستاذ / يوسف بيك

تحيه طيبة وبعد،،

أحببت من موقعى هذا أن أزف إليك بعض من فرحتى وأشواقى إليك بمناسبة عيد ميلادك العاشر، وعقبال المائة عن قريب بإذن الله

أما بعد،،

أحب أن أنوه إليكم بأن شخص والدتكم الكريم قربت تجيلها هسس من كتر شوقها إليك وأحب فى يوم مولدك أن نكون جميعاً يداً واحدة حولها نشاركها فى أكل التورتات والشيوكلاتات وحاول تلحق نفسك يقما هتيجى تلاقى الغيلان أكلت كل الأكل والهدايا كمان

أما بعد تانى،،

الناس كلها بقت بتحبك قوى قوى من كتر حب مامى طمطم ليك وكلنا بنتمى تكون ف حضنها دلوقتى ودايما وهتكون بين أحضاننا.

كل سنة وانت طيب بمناسبة رمضان وهديتى ليك فانوس جميل بيقول وحوى يا وحوى وهنقعد نلعب ف الشارع براحتنا ولو مامتك زعقتلنا هننفضلها

وفى النهاية أحب أن أتمنى لك سنوات وسنوات من السعادة المطلقة وحفظك الله دوما لوالدتك وحفظك الله عن عيون الآخرين وكيدهم

مع أطيب تحياتى وقبلاتى لشخصكم الكريم
هبة دوبه

معرفتش انشر تعليقى هناك
ابقى خديه وانشريه بقى علشان ينشف
============

كلمة لماما فاتيما على جنب
اولا بوسات كتيرة
ثانيا مش هفكرك بأمل بكرة
ثالثا فرجه قريب
رابعا ربك هو الحافظ

وعلى رأى عادل إمام
إمسك أعصابك ومتتهورشى
مش بعد كل الثقة بالنفس دى كلها تيجى حبة كلمات متوقعة وتهزك من جوه يا جميل واتقلى وكله باوانه ف الآخر

تفائلى بالخير تجديه يا قطتى
والفترة الجاية كلها خير

انا متابعة والله من اول يوم بس مكنتش حابه اكتب حاجة وانا قلبى واجعنى على وجع قلبك وبتمنى تكونى أفضل وانا واثقة انك أفضل والحمد لله بثقتك وإيمانك الكبير بربنا

هبة

نسيت اقولك كمان
انتى كمان ليكى فانوس بس صغنن وليوسف الفانوس الكبير

كل سنة وانتى طيبة كده زى مانتى
ومليانة حب وخير للكل
يا أم المدونيين كلهم والمدونات كمان

كلنا من هنا ورايح المفروض نقولك ماما فاتيما لانك فعلا محاوطه الكل بحبك وبخيرك وبخوفك ورعايتك

كل سنه ويوسف طيب
يااجمل فاتيما فى الكون
وكل سنه وانتى بخير يارب
ورمضان كريم

كل سنه وانتي طيبه يا مامتي
والسنه دي يا رب يرجعلك يوسف ومش يفارق حضنك تاني
بوسه وخضون كتييييييييييير اوي

بجد مش عارفة اقولك ايه
انا ادايقت اوي اما قريت البوست مش متخيلة ان عيلة باباه بالبشاعة دي
بس يوسف اكيد هيعرف الصح و الحقيقة معلش هوا لسة صغير
ربنا يوفقك و يرجعلك بسرعة قبل ما يبقى زيهم
ادعي انتي بس و ربنا يكرمك
و توكلي على ربنا و حاولي تقابليه و تفهميه من بعيد او تحسسيه بحبك عشان حرام يكون عنده ام بالطيبة دي كلها و بقول كدا

لا اله الا الله

انتى مش فى ايديكى حاجة غير انك تدعى ربنا انو يرجعهوللك


مش عارفة اقولللك اية تانى بس لازم تفضلى تحاولى انك تكلمية عشان اكيد هما بيعملوله غسيل دماغ




بس اكيد هيجى يوم حتى لو انتى مش عرفتى تاثرى علية ويقرى مدونتك اكيد اكيد هيبقى فى صفك انتى امه برضه


كتير اوى بنقى عارفين الحقيقة بس لما بتحصل بنصدم برضة

السلام عليكم ورحمة
الله تعالى وبركاته
قلبى معاكى وعليكى
قافلة التعليقات
على التدونتين الجداد
ليه؟نفضل نلف كدا لما
نلاقى باب مفتوح:)
صحتنا ما تساعدناش
على اللف دا أحنا
بقينا كبار:)
ازيك عاملة ايه؟
عارفة اكيد اللى
ممكن اقوله ومهما اقول
مش حأقدر اشيل شىء من الالم
اللى فيكى لكن اصبرى معلش
ولابد انه كان يقول كده :سنتين
معاهم لابد انه يقول كده مش بأيده
غسيل مخ عمال على بطال لمدة سنتين
دون خوف من وازع ولا ضمير لابد انه
يقول كده ماتزعليش من كلامى لكنه
بعد طفل ما يدرى ما خلف الكلمات
كلمة اخيرة يافاطما :شوفى حياتك
بالله عليكى ما تعطلى نفسك وحياتك
لأحد حتى لو كان يوسف مش حتنسيه
ولا حتسيبيه لكن حتعيشى له ولحياتك
فاطة استخيرى الله واخرجى من احزانك
شاركى من حولك بالفعل والفكر مش بالجسم فقط!اسفة للكلام ده لكن يوسف
حتى ول كان معك فلابد منه كا حيكبر
ويتزوج ويخلف وينشغل بعض الشىء عنك
وساعتها ما سيبقى لك؟الذكريات.
انا طولت اوىانا عارفة لكن اعتبريها نصيحة لوجه الله ممن شاهدت كثيراً
فى الحياة .

نسيتنى ياشيخة كده!؟
كل لحظة ويوسف وانتى
بألف خير .رمضان كريم
والله اعز واعلى واكرم.

متحرمشى منك يا أسافو
دايما قلبك طيب و حنون
رمضان كريم عليك إنتا
و كل اهل بلدك الجميل



dr.a.s. black armor
انتا نورت المدونة كلها
و اتمنى تزورنى تانى و تالت
رمضان كريم عليك يا رب

adel
يسمع منك ربنا يا عادل يا ولدى العزيز و رمضان الجاى يكون يوسف بيحضر الفطار بتاع رمضان و قاعد على الكرسى اللى جنبك وسط الرجالة بقى و حماية و كدا مش أخو الكبير ؟!!!
و ربنا يعيد الأيام عليك بخير يا بنى



يا مراكبى
إنتا بالذات كنت منتظرة تعليقك قوى يا باشمهندس ...
كالعادة بتطبطب على قلبى و تقولى الكلام الى بتمنى أسمعه و أصدقه
أنا بقوله لنفسى بس مبصدقنيش
لأنى اتعودت على خيبة الامل
فاكر رصيف المينا ؟!!
ادينى وقفت عليه اهو
و يمكن دا احد اسباب حزنى
بجانب أهم سبب أن يوسف معاهم هما
و هيخربوا دماغه و قلبه
بص خلاص ..مش هعقد أفكر بشكل سلبى
ربنا كبير بجد
و بكرة هقول المراكبى قال
بكرة إن شاء الله ميبقاش بعيد
كل سنة و إنت و كل اسرتك الطيبة بألف خير
يا نبع الحكمة

حاجات جوايا
ربنا كريم يا سالى
و كل سنة و إنتى طيبة و جميلة كما إنتى
و عقبال ما نفرح بدودو إن شاء الله
و تاج إيه يا بنتى ما خاص عجزنا على التاجات دى بقى و شعرنا أبيضّ




doba
الرسالة وصلت يا دوبى فورا و إتحطت فى صفحة التعليقات خلاص و متحرمشى منك
كل كلامك أبصم عليه و ماسكة نفسى و هااااااادية خالص لأنى عارفة إنها لعبة أعصاب
بس متعرفيش ليه إتاخدت و قلبى وجعنى قولى مع انى كنت متوقعة كدا و أسؤا
يمكن لأنى حسيت أن يوسف بعد بالمشوار و رجعنا للمربع صفر
يمكن ؟!؟؟
انا جبت فانوس ليوسف يا دوبا
على شكل كرومبو بناء على طلبه فى مكالمة من المكالمات الاولى ...بس خليها ف سرك لاحسن آبى تيجى تبعتر نفسويتى عشان مجبتش فانوس مصرى و شجعت الطين الشعبية ..
بوسيلى يسوفك العسل و دلعيلى النونة القمورة
يووه
القمور سى عمر أفندى حبيبى
خلى بالك من صحتك قوى
و بحبك
قوى



عاشقة الرومانسية
رمضان كريم عليكى يا حبيبتى
و ربنا يعيد عليكى الايام و تكونى احسن و أروق و اهدأ بالاً
خالص حبى يا عروسة البحور



فتاة حالمة
و إنتى طيبة يا مى
و يسمع منك ربنا يا حبيبتى
رمضان كريم عليكى إنتى و كيكى
تعالوا الفطار لو قدرتوا ..هاه



funky girl
متقوليش حاجة يا فانكى
دا كان متوقع ..بس انا حبيت ابعبع معاكو بس لكن كل كلمة كنت متوقعاها
ربنا كريم إن شاء الله
و رمضان كريم عليكى
نورتينى



wella
ما هو المشكلة يا ويلا إن الوصول إليه مش عمليه سهلة و حاليا رجعنا تانى للحال القديم
ربنا كبير و قادر يفكها
خالص ودى ليكى و شكرا على إهتمامك الطيب



norahaty
يا نورهنتى ماهو أصل مش عاوزة الناس تفضل تدخل تسيب تهنئة برمضان و تشغل حالها
و بوست يوسف قولت التعليقات تبقى عنده عشان لما يرجع يعرف أن عيد ميلاده كان ماشاء الله مليان ناس حلوة و بتحبه قوى
و معلش لففتتك منتى لسه صغنونة بقى
و نصيحتك محل إحترام يا حبيبتى لأنها صح ألف ف المية
بس كل حد بيبقى عنده قدرة معينة على تقبل شىء جديد ف حياته أنا من الناس اللى قفلتها على اللى فات
و بصراحة ليس لدى أدنى ذرة شجاعة إنى أبدأ من جديد مع حد جديد و حياتى و حياة يوسف تتعقد تانى كفاية الاولانى
كل الحب ليكى يا حبيبتى و رمضان كريم عليكى
إن شاء الله

إرسال تعليق