.

.

مش عجيب أبداً  

Posted by: فاتيما in

- هوه حضرتكو تبع جمعية إيه؟؟
- لأ ... مش تبع حاجة
- يعنى لوحدكو كدا و مش مع حد
- أيوه ... إحنا مجموعة أصدقاء و بس
- ربنا يكرمكوا و يجازيكوا خير
عجيب حبك ؟!!
أبداً ... العجيب التعبير عنه من قلوبنا
النهاردة كان صورة من صور التعبير عن الحب
حب البلد دى و حب ناسها و اهلها
وكالعادة متفائلة

و فرحانة
و شايفة الدنيا بالألوان الطبيعية
عندى حق نوعا ما
طب انا راضية ذمتكو
550 وجبة طعام
و أكتر من 7000 جنيه تبرعات نقدية وزعت على المرضى مع الوجبات
ناس حلوة جاية بالمشوار و عمالة تنسق من بدرى بدرى
و ناس حلوة تانية بعتت تبرعها المادى من بلاد الدنيا الواسعة
روح التعاون و التكافل مالية الهوا اللى بتنفسه
ليه مكونش فرحانة و فخورة بإنى إنتمى لهذه العينة الجميلة من البشر
القصة بدأت من عند
داليا قوس قزح وش الخير
و آبى هانم بتنجانى
و خالد همس الاحباب

إحتضنها بكل حب البت خيخة و ميرا ووليد عارفة مش عارف ليه
وكيكى عووو و غيرهم كتيييير

زيارة لمستشفى ابو الريش و افطار صائم
بسرعة تلقف الجميع الدعوة الطيبة و نشرها و استجاب لها
كلا بطريقته و أسلوبه و حماسه امكاناته و مساندته

عن نفسى كنت متصورة إنى لما اروح المستشفى الساعة اتناشر
أبقى كدا رايحة بدرى عن الباقى اللى معاده تلاتة

لكن لقيت داليا قوس قزح و معاها سوما مجنونة فى بلد عاقل
موجودين من عشرة صباحاً و عمالين ينسقوا مع الأستاذ خالد عونى
الاخصائى الإجتماعى بالمستشفى

الأول طلعونا الدور التالت لأن فيه أوضة مخصوص للترفيه عن الاطفال
أشبه بالمكتبة المدرسية

فيها كراسى و ترابيزات صغننة و قصص و إن كانت فقيرة بعض الشىء
فى الألعاب
و خصوصا الالعاب التعليمية
كنا عاملين ورود من الكارتون للاطفال كل واحد يكتب عليها أسمه و فازة كبييييرة
كمان الولاد بدأت فى التوافد علينا مع امهاتهم عشان يقصوا و يلونوا
عملنا تيجان من الكارتون و ورود زينوها بالالوان و الجليتر و خدوها معاهم على اوضهم
مش قادرة اوصف حالاتهم المرضية لأنها صعبة و جداااااا
و ربنا يشيفيهم و يقوى أهاليهم و يقصر مشوار العلاج و ينهيه على خير
الحالات اللى جت درجاتها متقدمة و يكفى حالة التوائم الملتصق
محمد و إبراهيم
بس لفت إنتباهى إن محمد خجول و منزوى بينما إبراهيم متحدث و شخصيته مسيطرة
فكرونى قوى بقصة لنجيب محفوظ إسمها قسمتى و نصيبى
عن تواءم مر بنفس الحالة و كانت لهم نفس الطباع دى

و هالنى جدا إن يا حبايبى عمرهم يتعدى التمن سنين و لم يتم فصلهم للأسف
كان هناك حالة خارجة من الغسيل الكلوى و أطفال عاملين عمليات فى المخ
كان فيه طفلة رقيقة إسمها دنيا ..آيه فى الجمال و البراءة كان نصيبها من المرض
إنها مبتاكلش و عايشة على السوائل فقط و السبب
إخفاقات الاطباء فى تحسين حالتها

الاطفال فى المجمل عندهم خجل و طبعا حزن دفين معروف أسبابه
مش عارفة ليه حسيت إن التسرية عنهم مش صعبة قوى لكن عاوزة مداومة
نوع كدا من شد إنتباهم لأشياء بعيدة عن المرض بتفاصيله اليومية
زى الترفيه و شغلهم بالأعمال الفنية و غيرها

لكن طبعا كل دا عاوز امكانيات بينما يلتهم العلاج أغلب ما يأتى من مال .. دا إذا أتى
لهذا اتمنى الا يكف كل صاحب قدرة عن معاودة الكرة مرة و اتنين وعشرة
لمساعدة هولاء الملائكة على التكيف مع وضعهم الصعب

و ربنا يشفى كل مريض
اليوم ما شاء الله كان مليان بركة و الجدول الزمنى اللى حطته خيخة و داليا
جرى بشكل مذهل و سريع

يا دوب قعدنا مع العيال ساعة و نص تقريباً و بعدين إضطرينا نمشى
عشان هيقفلوا الاوضة ..
و دا غريب بصراحة ..لأن المفروض تكون مفتوحة طول النهار
المهم .... نزلنا تانى عند الاخصائى الأستاذ خالد
( الراجل دا شخصية محترمة و مجتهدة و ربنا يكثر من امثاله )
وصلت آبى هانم بتنجانى

و البونية بس قعدت على كرسى المكتب .. و ماشاء الله
و كانه متفصل عليها ....
إيه دا ؟
تقولوش الست الضاكتورة مديرة المستشفى .. ليها هيبة و سخصية برضو

و قعدت تجمع ف الفلوس و توزع ف الاظرف و تحسب الحسابات
و تنظم الطلعات مش الجوية

قصدى يعنى طلوع الادوار و توزيع الوجبات مع المبالغ المخصصة
ناس كتير حلوة جت و نورت اليوم بوجودها
بحفظ الألقاب و المقامات و دون ترتيب الحضور
و بالبركة كدا

وليد .. عارفة مش عارف ليه - مصطفى ريان - شيماء فضفضة اونلى سبوت
أ. محمد شوية كلام و باقى المدونات بتاعته - أحمد كمال رحايا العمر - أسامة عبدالعال
أم بتول تعالوا نحلم ببكرة - شاهى مفيش حاجة و محمود الشنيور أبنها العزيز
أحمد سكر -
ميرا وومن أمراءة بعقل رجل - كيكى عووو فكك منى - محمود الدوح
ساجى -
مهاميو أحسن تستاهل و ميرو النيرو كراكيب اختها
- دعاء مواجهات - ضياء بيتوفل مايند -
كيارا عالم مولان - نور الدين محمود
- عمرو أن نوون - خواطر خاطر - الأستاذ شريف

عسقول عسقلانى الاخلاق - دريم فضفضة ع السريع و بناتها الحلوين
علا صيدلانية طالعة نازلة و جوزها و ولادها سيف و شادن - داليا صديقتى العزيزة
و طبعا خوخة خيخة و شكشوكة جه معاها - و الواد عادل إبنى البلد دى فيها حكومة
صاحبة مدونة هلفطة Am fOpa'D و كان معها اصحابها
وخال المخاليل أحمد الصباغ و صاحبة مدونة رنون و اختها
و مدونة كمان و اختها استاذة سهام الصحفية
صاحب مدونة ابو على و عبد الرحمن ونضال
من بورسعيد
جت إيناس نهر الحب - و اختها نسمة هيا فوضى

الوجبات وصلت بدرى عن المعاد و بالتالى بدأ توزيعها على الفور
كل مجموعة مكونة تقريباً من ست أشخاص

معاهم الأظرف و الوجبات و بتتوزع على الادوار حسب ترتيب متفق عليه
مع الاخصائى الإجتماعى
اللى عارف كل حالة و مدى إحتياجها
طبعا كان فيه مظهر غريب و إن كان بقى إعتيادى
و هو إنك تلاقى امهات شايلين الاطفال

و بيلحوا فى طلب مساعدات مادية بكافة الطرق
فيه توصيف غريب و أظنه صحيح و صادق سمعناه من نائب مدير المستشفى
و هوه بيتكلم مع ناس جاية تتبرع فى الخير دون ترتيب مسبق
نصحهم بانهم يسترشدوا بالاطباء و الاخصائى الإجتماعى اللى عنده صورة شاملة
عن الحالات الحرجة
و التى تستحق الاهتمام اسرع من غيرها
قالهم الحالات و كمان العمال هنا عاملين زى الدول العربية ...كويت امارات سعودية
دول اللى بيجمعوا حصيلة محترمة و اغلبهم بيحترف الوقوف
على باب المستشفى و فى الطرقات

و فيه مرضى و عمال زى اليمن و الصومال لا يطالوا أى شىء
و هم أحوج الناس بالرعاية لكن حرج السؤال يمنعهم

توزيع الوجبات و الفلوس مخدش وقت كتير و جزء تانى
توجه لمستشفى المنيرة العام

اللى كان على بعد خطوات من مستشفى أبو الريش
على خمسة الا ربع كنا بنتوزع على العربيات الموجودة
و خمسة تمام كنا فى تسيباس

الحمدلله ربنا سهلها و البركة حلت على الوقت
و متهيألى المعاد اللى تم إختياره
كان مناسب فعلا عن أى يوم تانى

روحنا المطعم لقينا الماتش بتاع مصر و روندا على اخره و غلبنا واحد صفر
طيب ماشى و لو إن النتيجة هزيلة برضو .. لكن شغال مش هنقول لأ
قعدنا نرغى و نحكىّ لحد معاد الفطار و بدأت قصة المعاناة الحقيقة
الناس ف المطعم ..الإستاف يعنى متعرفوش مش قابضين بقالهم سنة
و لا عاملين إعتصام

و لا على قلبهم تكييفات كارير خمسميت حصان
و لا إيه النظام ؟

بطء رهييييييييييييب و عقبال ما ربنا ما نفخ ف صورتهم و جابولنا الشوربة
كان فات ييجى اكتر من نص ساعة
على الادان .. قولنا ماشى
يمكن العيب ف الشوربة
و بعدين ربنا هيسهلها ف الباقى

لكن هيهات ... السلطة و العيش و الوجبة الرئيسية
طبق الأصل من العلقة الاولانية
لا ناقصة قلم و لا زايدة قلم

طبعا روح التمرد سرت على ظهر السفينة بقيادة الكابتن ساجى
و قعدنا نقول

عاوزين ناكل .. هم هم هم ... دا على انغام الشوك و السكاكين
بس تفتكروا جاب نتيجة ؟!!!
و لا الهوااااا ... متعرفووش الناس دى كارهينا ليه ؟
المهم
الاكل جه بعد صراع طويل مع المرض .. قصدى الجوع

بصراحة الوجبة حلوة و كميتها مش قليلة
بس حد بياكل بالتقسيط يا إخوانا
و كمان ف رمضان ؟

دا حتى رمضان كريم يا ناااااااس
طب إلهى و انت جاهى ..... و لاّ بلاش بقى
هادعى عليهم بإيه بس ... و هما فيهم كل العبر

المهم إن الاكل كان ناقص شوية حاجات من المتفق عليها و مجابوش العصير خالص
و الحلو كمان بطلوع الروح .. و الادهى و الامر
إن داليا قوس و قزح و خالد همس الاحباب

تقريباً اشتغلوا بدالهم و قعدوا يشرفوا على وصول كل وجبة لصاحبها
و بإيديهم .. و تقريباً مكالوش حاجة و لا قعدوا ربع ساعة حتى يرتاحوا

المشكلة الأنكى كانت وقت دفع الحساب و حالة الإستكراد الرهيبة من العالم هناك
بس خالد و داليا ما شاء الله .. مسكتوش و رفضوا الإذعان للحركات دى
بس طبعا بعد حرقة دم و تضييع وقت و وقفة على الرجلين من صباحية ربنا
و بدل ما يقعدوا يرتاحوا ساعة فى آخر اليوم الحافل
كان فيها دوشة و وجع دماغ

يا جماعة الناس دى شرف للواحد انه مش بيعرفهم
لأ أنه قابلهم و لو لمرة حتى

حالة العطاء و الرغبة فى تحمل المسئولية و الإنشغال بكل التفاصيل
عشان المهمة تكتمل و الكل يكون مرتاح و حاصل على ما يطلبه و يرضيه
دا شىء لا يقدر على حمله اى شخص ..لازم يكون حد بمواصفات معينة
لا تجدها هذه الأيام

بصراحة داليا و خالد ... أكبر من أى كلمات توصفهم
آبى شكلها معكننة و مع ذلك نورت الدنيا و أدت المهمة كما يجب
وليد عارفة مش عارف ليه ...شخصية محترمة و مبتسمة و من الناس اللى علطول
اول ما تبص ف وشهم
تطلق عليهم وصف .. بنى آدم طيب
الاستاذ محمد شوية كلام شخص لطيف و متحدث و ما شاء الله شباب أكتر مننا
لا يختلف كثيراً عن كتاباته و طبطاباته فى تعليقاته ... تشرفت بلقاءك يا أستاذنا
فرحت قوى لما شوفت أحمد كمال صاحب الرحايا و المرايا .. إفتقدناه
و فرحت اكتر لما جت شيماء فضفضة و أسفة يا مشمشة لأنى مشيت
و من غير ما أسلم عليكى

نفس الكلام ينطبق على مهاميهو و ميرو النيرو اللى ملحقتش أقعد معاهم
و لا نقول جملة مفيدة

ضياء بيتوفل مايند لا يأتى ألا ف ركاب الخير
عسقول عسقلانى بحس إنه أخويا الصغير و فرحت قوى لما قالى على حفلة وجيه عزيز
بتاعة ساقية الصاوى
صحيح العزومة كانت للجميع بس معرفش ليه فرحت
شاهى يا حبيبتى قربت تختفى و خست قووووى يقطع السنان و وجع السنان
شريف إبن خيخة شكشوكة حبيبى قعد يدينى ف حضونات و بوس قد كداااااااااا
و جاب هدية ليسوفة روح قلب ماما ..بموت فيك يا شيكوووووو
مش عشان الهدية ...
لأ ... عشان إنتا حبيبى
دعاء مواجهات ملحقتش المستشفى بس جت على المطعم كنتى وحشانى يا دودى
إيناس نهر الحب و نسمة اختها حضورهم كان لفتة جميلة و كريمة من اهل بورسعيد
ساجى شخصية لطيفة و تلقائية جدا .. ترتاحلها و تتونس بيها من اول عشر دقايق
الاستاذ شريف كالعادة يعطى دروس ف الشياكة من غير ما يفتح حتى بوقه بربع كلمة
و اسفة لو كنت ضايقت حضرتك يعنى و وقفت دقيقة نكد

عمرو جه و حضوره بصراحة بيطمنى .. أصله طيب قوى يا جماعة
كيكى عوووو ..كسرنا حالة الكسوف يا حبيبى أهو .. و زى ما قولتلك
إنتى اديبة ساخرة من الطراز الاول و لا ينقصك شىء مطلقاً
محمود الدوح عيد ميدانه الأسبوع الجاى و محدش يهنيه حاف
خليكوا عمليين الواد عاوز إيجابية

كيارا البنوتات العسولات يا ناااااااس ....و محاسن صابر سلاماتها حصلت و وصلت
أسامة عبدالعال كان ساكت شوية النهاردة و لا انا متهيألى ؟

الناس اللى لسه بقابلهم لأول مرة بصراحة سابوا عندى انطباع طيب جدا
زى خواطر خاطر و نور الدين و مصطفى ريان
و ميروا النيرو و حتى لو لم نتحدث سوى باقل القليل من الكلمات
أم بتول ..إنسانة جميلة قوى و محترمة قوى و سعدت برويتها قوى
بس كمان فيه واحدة لسه بشوفها النهاردة لأول مرة
و كنا بنتكلم دايما عبر المدونات و الإيميل

و هى علا ..صيدلانية طالعة نازلة
و لنا
هنا
وقفة

الست دى جت قعدتها جنبى ف المجلس ... إيه يا علا دا
إنتى يا بنتى خلاصة الشخصية النسائية المصرية الساخرة بكل ما فيها
من امومة و حنان و خفة دم

يا لهوى على التعليقات و الإفيهات اللى إترمت على مسامعى
( حلوة مسامعى دى ) منك

إنتى لازم تكتبى بوستات ساخرة يا ماما .. وجوزك شخصية محترمة و هادىء الطباع
هوه لسه فيه ازواج كدا الزمن دا ؟!!!

و إيه العيال القمرات دول .. سيف ما شاء الله
و شادن البنوتة و اسم شادن يعنى غزال معناه كدا
و هيا فعلاً غزالون يهبولن

انا و قوس قزح دخلنا فى مناقصة على خطوبتها للولدين بتوعنا
و كلنا بنحب القمر

أنتا سعيدة قوى برؤيتك عن قرب يا علا .. بجد
فيه حد انا النهاردة برضو قربت منه بشكل كبير
سوما

شخصية إيجابية و فنانة لابعد حد .. بهرتنى بتعاملها مع الاطفال

و دا شىء متهيالى ميحصلش غير من قلب صافى مليان خير
و مفيهوش أى نقطة سودا

انا سعيدة بيكى قوى يا سوما يا أعقل مجنونة
مش عايزة انسى الاحباب اللى بعتوا السلامات و التحيات
و الأمنيات الطيبات عبر الموبايلات

دودو حبيبتى عاشقة الرومانسية عروسة البحور
حنين القلب حنونة و النونة

محمد مهندس مصرى العزيز
و أحمد أسير الجراح من إسكندرية
دوبا دوبى حبيبتى و يسوفها و عمر الشقاوة اللى قرب يشرف للدنيا
مى فتاة حالمة الرقيقة

دكتورة نورهانتى صعبان علي حالنا - جنة يوم جديد - و بابا الغالى ابو خالد من بورسعيد

و مجتيش ليه يا ستيتة هاااااااااانم ؟!! لعل المانع خير إن شاء الله
و شخصية جميلة دايما معانا بقلبها و حسها الحلو إيمان مصرى
اللى كانت عاوزة تسلم علينا لكن موبايل سكر كان مقفول
البوست طويييييييييييل قوى معلش
بس لازم أقول اللى حصل و كأنكم كنتم معانا
لأنكم شركاء فى كل دقيقة فيه و بالتالى لازم أكون صادقة قدر الامكان

اليوم كان جميل و حافل و ما شاء الله فيه خير كتير
و عدد الوجبات و المبالغ النقدية خير شاهد

لكن هذا لا يمنع إن كان فيه بعض الاخطاء الغير مقصودة
زى بعض الوجبات كان فيها شوية مخلل بايظ و دا طبعا
عيب من القائمين على إعداد الوجبات دى

فى جمعية صحبة خير لذا فرمان تدوينى رقم واحد
أن دا هيتعالج السنة الجاية و علينا خير
حتى لا يتكرر
المطعم اللى روحناه رغم جودة اكله و مكانه و نضافته و كراسيه المريحة
لكن الخدمة فيه سيئة للغاية و لهذا قرار تدوينى رقم إتنين
مش هنخطى عتبة المكان دا تانى
و متهيألى كلنا متفقين على ذلك
و رجاء تدوينى رقم تلاتة و النبى يا جماعة
الغاليين اللى عاوزين يعملوا تجمع تدوينى تانى

فى إسكندرية و لا بورسعيد .. يزحزحوا المعاد لقدام شويتين تلاتة
عشان نكون رتبنا امورنا و ظروفنا ... خصوصا الوقتية و المادية

يعنى يا ريت يدونا فرصة نلتقط الانفاس عشان لما ييتحدد المعاد
نكون قادرين نيجى لأننا عاوزين نشوفكم بجد و مش عزومة مراكبية

إحنا دعينا وقت أذآن المغرب لناس كتير ..و الكل دعا ليوسف حبيبى
و قلبى رفرف جوايا بس قولت مش هعيط بقى

ربنا ما يحرمنى انا و يوسف منكم
وقت المراوح تلت ردالة زى الورد روحونى وصلونى
لحد ما خرجت من محطة المترو

محمود و خاطر و عادل إبنى العزيز ... و وصيتهم ميخلوش البنات تعاكسه
يا عادل يا بنى إنتا حاجة تفرح ... صدقنى
و اخيرااااااا كلمة حق

يا خالد يا همس الاحباب ..إنتا راجل بألف راجل
و بتحسسنى إن الرجالة ما ماتوش كلهم ف الحرب خلاص

و يا داليا يا قوس قزح يا وش الخير أنا فخورة بيكى
و بحباااااااااااااااك
يا أحلى صحبة و ناس و عالم
سعيدة بإنتمائى لعالمكم النبيل
الجميل


------------------------------------
بت خيخة و أى كلام ... اكبر من كل الكلمات

This entry was posted on السبت, سبتمبر 05, 2009 and is filed under . You can leave a response and follow any responses to this entry through the .

73 كــــلام بيطــبطـــب عـــلى قــــلبى و روحــــى

والله كان يوم في منتهى الجماااااااااال

وانتي اللي حثل خالث مالث

امممممممممممموه بوثه كبيره خالث

والصراحه استاذ خالد عمل مجهود جبااااااااااااااااااااار

فعلا كان يوم فى منتهى الجمال واجمل ما فيه انتوا
ربنا يكرم داليا وهمس فعلا
وشكرا على كلامك الجميل فى حقى يا بطه
انتى كمان قلبك طيب وجميله قوى مع الاطفال ومع كل الناس
وبلاش امدح اكتر من كدا بقى لاقر عليكى:)

احجز تالت تعليق واروح اقرا وارجع
انا هنا بقالى ساعه مستنيه البوست ده
انتى جايبه البوست بتعليقاته يافاتيما الناس دى جت امتى؟؟؟؟؟؟؟

انا بحجز و هارجع تاني :):)
دي مدونة ماما

ربنا يتقبل منكم كل الخير ده
وانا خلاص مش ها اقول جاية تاني اي لقاء تدويني لأن واضح ان قولتي بتنحس اليوم
اطحنت النهاردة ولو قلت لك ان يومي ومتاعبه ومشاغله لسه خلصان من ربع ساعة اكون صادقة
يا بختكم وربنا يديم على المدونين الفرح وروح التعاون دايما يارب
وحشتيني يا فافي وكان نفسي اشوفك انت وصبرني وعادل بشكل خاص وطبعا كل اللي حضر بشكل عام
تحياتي وخالص دعواتي

ايه الكلام الجامد ده :):)

انا مش هاقول اي حاجة غير شكرا للناس اللي نظمت
و اني كنت عاوز اسلم علي ابي بس ملحقتش للاسف

وانبسط قوي لاني قابلت الناس دول كلهم :)

واليوم خطير و خصوصا في اتنين كنت هاموت و اشوفهم
طب مش هاقول انهم كيارا و كمان قبلت سووووو اخر اليوم علي القهوة
هههههههههههههه

و بجد كان يوم ملووووووووووووش حل
هااااااااااي بقولكم انتم
شكرا ياجماعة

مين بيفكر في وجية عزيز :):)؟؟
ابقول قولولي بقي :)

ماما : مقلكيش ....ولا بنت عاكسيتني
تفتكري فقدت معجابيني
ههههههههههههه

-----------
شكرا علي الاغنية في المدونة
و ....
بعدين بقي

ونطلع من البوست ده بحاجتين
"على راى خيخه"
اولا : ماكان لله دام واتصل وما كان لغير الله انقطع وانفصل
ثانيا: لو اراد ربنا ومد فى عمرى ورحت القاهره عمرى ما هادخل تسيباس ده ابدااااااااااا
كلامك عن خالد وداليا
خلانى فخوره مرتين
مره لانى اعرف شخصيه زى خالد
ومره لانى كلمت داليا النهارده فى التليفون وسمعت صوتها
والحالات اللى ذكرتيها زى التوأم الملتصق يافاتيما خلتنى بجد بكيت
ربنا يعافيهم ويعفى عنهم يارب
ويجعل اليوم ده فى ميزان حسناتكم كوووووووولكم يارب

اه صحيح
بجد انا النهاردة اتعرفت علي ناس جامدين قوي
و انبسط اني قبلن دعاوي مواجهات :)
ده اسمها الجديد
وكمان سامح و محمود و استاذ وليد و استاذ خالد و استاذة داليا و ميرا (مدونة مخ الرجالة) ههههههههه
والصباغ طبعا بس انا قبلته قبل كده مرة


و انا نسيت ولا ايه
هارجع لما افتكر

عااااااااادل
انت هتصدق ياابنى
امك بتجاملك
هو انت فيه حد يبص لك
انت هتعملى فيها الواد اللى مدوب قلوب العذارى؟
هاااااااااى
ايوه بقولك انت
فوق ياابنى فووق
P:

والله الواحد حزين انه مجاش معاكو يوم جميل زى ده
بس بجد كان صعب جدا انى اجى
ليس المهم من يرفع الراية ولكن المهم أن ترفع الراية
جميل جدا انكو كنتو سبب فى ان الخير ده يصل للفقراء والمحتاجين
بجد انتو حاجة مشرفة جدا
الواحد فخور انه ينتمى لهذا العالم
وفخور جدا بكل الناس اللى انتى قلتيهم دول
وفخور بيكى جدا
ربنا يتقبل منكم
ربنا يرجع يوسف لحضنك بالسلامة
عاجلا وليس اجلا يارب
كل سنة وانتو كلكو طيبين
وخاصة انتى يا فاتيما
ربنا يكرمك
ويتقبل منك
ويعطيكى اكثر مما تسألى اضعافا مضاعفة
احييكى على البوست المفصل

اليوم ده من امتع ايام حياتي كلها علي الاطلاق .. يا جماعه ما اجمل وما اروع فعل الخير ورؤية السعاده علي وجوه ناس محتاجه فعلا لمن ياخد بأديهم في مصايبهم واطفالهم المرضي .. بس الحمد لله زيما بيقولو احنا النهارده يا شباب المدونين ضربنا 3 عصافير بحجر واحد
1- حجر اننا فطارنا صايمن واخذنا الثواب بأذن الله
2- ان كان المبلغ المتبرع بيه كبير والحمد لله واتوزع علي ناس فعلا محتاجين ايد مساعده وسبحان الله ربنا فعلا مبينساش حد
3- اننا اتقابلنافي اول لقاء تدويني بالنسبه لي وفطرنا سوا كلنا" مع ان المطعم رغم جماله ونظافته وشغل الرخام اللي لفت نظري وقوة التكيف الا انه تقريبا اثر علي الاسطاف و يمد الصوم في هذا اليوم لغايه الساعه 7:30 " :)

بس المهم اننا شوفنا بعض واتكلمنا مع بعض وحكانا مع بعض واحلي حاجه اننا اتعرفنا علي شخصيات بعض علي قرب ودردشنا في حاجات كتير اوي

سامح عزت
خواطر خاطر

الحبيبة فاتيما
ربنا يجعله فى ميزان حسناتكم
واكيدفعلا انه كان يوم جميل بنواياكم
الطيبة وربنا يبارك فيكم جميعا
واجمل حاجة وصفك الممتع للاشخاص ولليوم
فعلا كأننى كنت فى وسطكم
وربنا يبارك فى اللى دعا ليوسف
وربنا يتقبل دعائهم ودايما مجمعين فى
الخير
تحياتى

الحبيبة فاتيما
ربنا يجعله فى ميزان حسناتكم
واكيدفعلا انه كان يوم جميل بنواياكم
الطيبة وربنا يبارك فيكم جميعا
واجمل حاجة وصفك الممتع للاشخاص ولليوم
فعلا كأننى كنت فى وسطكم
وربنا يبارك فى اللى دعا ليوسف
وربنا يتقبل دعائهم ودايما مجمعين فى
الخير
تحياتى

طمطم حبيبى
انا عارفة انك اول حد هيرجع يكتب عن اليوم
انتى نسيتى صاحبة مدونة ♥ Am fOpa'D ♥
و كان معها بنوتات اصحابها وزعوا معنا فى المستشفى
و فى كمان الصباغ وصل قبل ما نمشى من المستشفى و معاه صلحبة مدونة رنون و اختها و مدونة كمان و اختها
استاذة سهام الصحفية
صاحب مدونة ابو على
و عبد الرحمن
ونضال

انتى كنتى ام رائعة النهارده يا فاتيما
جزاكى الله كل خير
و جعل فرحة قلوب الاطفال اللى اسعدتيهم انتى و سوما النهارده سبب فى فرحة لقلبك قريب يارب
يا احن ام فى الدنيا

بارك الله فيكم دايما وجزاكم كل خير

طمطم

ربنا يجزيكم كل الخير يا رب وعقبال المره الجايه
مين الى يقول لميمن اسف يا جميل و بجد على عينى رحله العذاب الى اتعذبتوها فى تسيباس بس هو كان متوقع بصراحه على قد مالمطعم حلو وفى موقع مش وحش بس الناس هناك دماغ واكيد كانو مخضوضين من العدد لان المطعم انا بلاقيه على طول فاضى

كان نفسى اقعد معاكى كتير بس احمدى ربنا كنت هصدعك معايا

ان شاء الله السنه الجايه نفطر سوى ويكون معاكى يوسف يا رب
اسفه انى خلعت بعد المستشفى ومش رحت معاكم تسيباس واسفه انى وعدك انى هجلكم هناك بعد الفطار ومجتش بس والله خفت تكونو مشيتم
كل سنه وانتى طيبه ودايما الحب والخير جامعنا
بحبك يا طمطم

انا كان بجد نفسى اشاركم اليوم ده واكون معكم فيه بس مش بايدى برده يا اختشى والله
انتو فى القاهرة وانا ف الزقزوقة
بس ربنا يارب يجمعنا على خير فى الجنة فى صحبة الصالحين ولقاء حبيب الملايين
يارب اللهم آآآآآآمين

اه صحيح بس فى استفسار
هو ابو الريش برده حتة عندكم فى القاهرة اصل احنا كمان عندنا ابو الريش ولتلاقيه برده ناسها على قد حالها فبعد اذنك عايزة اعرف التفاصيل

جزاكم الله خيرا جميعا
تقبل الله منكم صالح العمل

فاتيما تخيلتك كتير قبل ما اشوفك ، لكن كل تخيلى راح بعد ما شوفتك لأنك أثبتى لأول مرة أن الحقيقة ممكن تكون أجمل و أحسن من الخيال بكتير ، ربنا يخليك و يبارك لك فى يوسف و يجمعك بيه على خير يارب ، مش عارفة اقول لك ايه على كلامك مش عنى بس لأ عن كل المجموعة الى كانت موجودة بس دة مش شيئ غريب عنك و أنت صاحبة أكبر قلب ، يكفى ما بك من هموم ومع ذلك بتشيلى هموم غيرك و تفرجيها ربنا يفرج كربك انت كمان ، فاتيما الصابرين بخير أوعى تنسى الكلمة دى و أن شاء الله فى الآخر ها تلاقى ربنا مدخر لك خير كتير قوى قوى .
سعدت بتواجدى معاكم ووسطكم و أنى أتعرفت على شباب زى الورد شباب بجد مش شباب البنطلون الساقط و البادى المحزق ، وبنات زى الفل مش بنات النوادى و الباديهات و الكلام الى بالكاف ، أثبتوا لى فعلا أن الدنيا لسة بخير طول ما فى زيهم فى البلد ، مش عارفة أقول أيه عن داليا و خالد بجد مش ممكن مجهود فوق العادة ومع ذلك أبتسامة لا تفارق الوجه ، تقريبا مأكلوش كل الى يهمهم انهم يشرفوا على الأكل لكل الموجودين ، مش قادرة اقول لهم حاجة غير أن جزائهم عند الله أكبر من أى كلمة شكر ممكن نقولها لهم ربنا يجازيكم كل خير و أن شاء الله كل خطوة كل حرف كل بسمة فى ميزان حسناتكم ، خيخة الى دايما بقول أنها مش خيخة لأ بنت جدعة ربنا يحميها و يحفظ لها شريف و كل خير هى عملتة ربنا يرده لها فى أبنها أن شاء الله .
أستاذ شرين فكر و عقل و مناقشات هادئة بعقل واع متفتح كان لى الشرف فى التواجد معه على مائدة واحدة و التعرف علية و سماع بعض مناقشاته الشيقة ،
ساجى أول مرة أتعرف عليها بس هى فعلا كحد السيف لا تعرف يمين ولا شمال إلى الأمام فقط .
سومة ربنا يحفظها بنت تشرف بجد ، صيدلانية أول معرفة لى بيها كانت من برنامج أنت تسأل و الكومبيوتر يجيب وهو السبب الى خلانى أدخل عالم المدونات ربنا يحفظ لها أولادها ، ناس كتير شوفتهم بس يمكن مش عارفة أساميهم عاوزة أقول لهم جميعا ربنا يخليكم و يحفظكم و يجازيكم كل خير .
فعلا أمبارح روحت البيت و أنا بقول أن فعلا الدنيا لسة بخير طول ما فيها ناس زيكم مش بتفكر فى نفسها و بس .
داليا ، خالد ، خيخة ، فاتيما شكرا .

ضاكتورة ايه يا شيخه بس دا انا كنت بنام وكان نفسى فى حقنه جلوكوز وبدين لازم التشريد كانت مضايقه اه يا جبره انا بس كنت مرهقه من السفر وانتم ناس من بدرى صاحيين
ربنا يجاززيكى كل خير يا طمطم عن اليوم كله يا رب ويرد لكى يوسف بالخير

فاتما

كده عيطينى وانا اصلا باعيط من امبارح

والله يا فاتيما كنت مجهزه لبسي وخلاص قايمه البس

بس الظروووووووووووف بقى

حاجه عامله زي العكوسات كده فى كل تجمع بيحصل

كل سنه وانتم طيبين ودايما بالخير اديكم ممدوده

ربنا يجازيكم خير كلكم

وكان نفسي ابقى معاكم

لو عملتوا تجمع تاني والنبى تعملوه فى المنصوره الله يصلح حالكم عشان اشووووووووووفكم بقى وابقى معااااااااكم

كان نفسى اكون معاكم اوى
ربنا يتقبل منكم صالح الاعمال ويجعلها فى ميزان حسناتكم

كنت عايزة اشوفكم كلكم وافطر معاكم كمان بس انا كنت هطلب وجبتين ليه وللنونو كمان

وحشتينى اوى يا فطوم ونفسى اشوفك بجد

بس التليفون صبرنى شويه
لحد ما اشوفك بس
بوووووووووسه كبيرة ليكى وحضن ليوسف

متأكده انه كان يوم حلو اووووووووووووووووي واجمل مافيه الرحمه اللي كانت في قلوبكم

كان نفسي اكون معاكم اوووووووووووي بس انا مش بيردو يخلوني انزل في رمضان وافطر بره لضيق الوقت

كلامك حلو اوي ياام يوسف ربنا يكرمكم ويجعله في ميزان حسناتكم :)

بحبك اوي والله
تحياتي

طبعاً مافيش كلام فوق الى قولتيه

بس عايز أصحح معلومة لو امكن

أنا مش من بورسعيد
أنا من القاهرة

وبجد كان نفسي أشوفك من الى سمعته عنك

الحمد لله الذى بنعمته تتم الصالحات
الحمدلله على كل حال
وانا اسف جدا انى انشغلت عنكم حتى وانتى ماشية ما عرفتش اسلم عليكى
بس معلش خليها عليكى المرة دى
وطبعا مجهودك ومشاركتك ربنا يجعلهم فى ميزان حسناتك
ربنا يكرمك ويرد ليكى يوسف قادر يا كريم
كل سنة وانتى طيبة .
تحياتى وتقديرى

بجد بجد كان نفسي أكون معاكم و لحد أخر وقت كنت بحاول بس للأسف مقدرتش أسيب اسكندرية..جزاكم الله كل خير و جعله في ميزان حسناتكم جميعاً

الف شكر لله سبحانه
وتعالى ولكم جميعاً
ولكِ يافاطمة
لوصفك الحلو ده
اللى خلانى شايفة بعيونى
كل اللى شفتوه وعملتوه هناك
ومتشكرة اوى للاستاذ خالد انه رد
على الموبايل وكمان خلانى اسمع صوتك ما
تتصورى حبك كبر فى قلبى أد ايه بعد
سماعى لصوتك الجميل ياأم يوسف
ربنا يخليه لكِ ويرده اليكِ
رداً جميلاً بأذن الله.
وطمنتينا على
الاستاذ
احمد كمال
الف شكر خاصة للأطمئنان ده.

مش حقول غير ربنا يباركلم وشكرا علي الوصف التفصيلي لليوم يا فاتيما
تحياتي

التعليق رقم 30,,,:(
يلا قبل ما يتزحموا الحق شوية

بجد على الغرم ان لم تتاح الي الفرصة لمعرفة كل النااس والتشرف بالتعرف عليكوا كلكوا,,,

بس بجد,,,, كان من امتع ايام حياتي
وبجد خلال ما جال بخاطري وفكري
حسيت النااس جاامدة و فعلا متوااجدة وان كثرت المسؤلية والانشغالات عليكوا

فخورة اني جيت امبارح والتعامل وان كان قليلا معكم,,,

Pulmicort - 0.5mg/ml
أمبول ولا اقراص ؟؟؟

والله كان نفسى اجى بس كنت هشتغل والله وفى الاخر بتوع المصنع ادونى زومبا بس كنت هموت واجى

الحمدلله إن اليوم كان ناجح و اتبسطتوا فيه
ربنا يتقبل منكو كلكو إن شاء الله :)

طيب ماهو فعلا إذا هم محتاجين دعم نفسي كمان جنب المادي..و محتاجين يلعبوا ويتشغلوا بأي حاجة مهما كانت بسيطة، ليه مش كل فترة نكرر الزيارة دي يا فاتيما حتى لو مش في رمضان؟؟

لو هتروحوا تاني أنا إن شاء الله معاكوا :). المرةدي مش كان ينفع أبدا بس فعلا كنت حابة أوي آجي
يارب دايما مبسوطة وراضية يا تمتوم

ماما يوسف
مبادرة جميلة و التفاتة اجمل لاطفال صغار يحتاجون كل الرعاية
جعل الله هذا العمل في ميزان حسناتكم جميعا
مودتي

فاتيما اسمحيلى اشكر ام بتول وداليا على كلامهم الجميل دا واقولهم ربنا يكرمهم هم اللى فعلا يشرفوا بجد
وانا معملتش حاجه زياده دا اللى كان المفروض يتعمل والمفروض كنت اعمل اكتر من كدا كمان
جزاكم الله كل خير

تسلم إيدك ألف مرة
ألف شوية صح ؟ أنا عارف :)
بس اعتبريهم رمز لحد ما نعرف نلاقي رقم بعد المليون :)
وتعبيرك جميل أوي بالتفصيل
لدرجة إني بفكر أبطل تأنيب لضميري لأني لسه محضرتش حاجة معينة أكتبها عن اليوم ..لا قبل ولا حتي بعد

وجزاكي الله كل خير ويسلمك من كل سوء
والمرة الجاية يكون يوسف موجود بإذن الله

تحياتي لأم يوسف..وداليا طبعاً ست الكل :) والأستاذ الجميل خالد واللي خس النص امبارح ..والمعلمة آبي

وكل عام والكل بخير وربنا يكتر تجمعات الخير بإذن الله

سلامات

رقم بعد التريليون * :D

السلام عليكم

ازيك يا ام يوسف يارب تكونى

بخير

ربنا يكرمكم يارب ويجازيكم خير

وياريت كانت الظروف تسمح وكنت شاركت

معاكم

كل سنه وانتى طيبه ربنا يسعدك

ويرجعلك الغايب بالسلامه

الحمد لله ان اليوم عدى على خير

ربنا يجازى الجميع خير

تشرفت جدا بلقائكم

كل سنه وانت طيبين

فى انسانه اصرت انها توصل ليكى السلام

بس للاسف تليفونى كان فصل شحن

وهى ايمان مصرى

كانت مشاركنا

الحمد لله ان اليوم عدى على خير

ربنا يجازى الجميع خير

تشرفت جدا بلقائكم

كل سنه وانت طيبين

فى انسانه اصرت انها توصل ليكى السلام

بس للاسف تليفونى كان فصل شحن

وهى ايمان مصرى

كانت مشاركنا

ما شاء الله

من وصفك لليوم قلبي ارتاح

ربنا يديم عليكم التجمعات في الخير وربنا يتقبل منكم واحد واحد يارب

ان شاء الله معاكم المرات الجاية

فيلم الطريق الي ايلات

ومقولته الشهيرة

""ياريتني كنت معاهم""

:)

مش هتبطلي مباغة بقى :) ولا انتي اية ؟

طب أقولك على حاجة و متقوليهاش لحد , انتي من اكتر الناس براءة قابلتهم في حياتي :) ... مش بعاكسك و الله لا يطلع لي الواد عادل و يعمللي فيها سبع الرجال
اليوم كان ميتوصفش بصراحة
و فعلا ندمان اني مقدرتش اجي المستشفى
الله يخرب بيت الشغل يوم السبت

المشكلة ان على قد ما كان اليوم جميل
على قد ما الخدمة كانت سيثة جداجدا

انا فعلا فخور اني أعرف ناس زي الفل ( و أحسن من الفل كمان ) زيكوا


ربنا يكتر من امثالكوا :)

ربنا ينير لكم طريق الخيرات
أنتى يا أم يوسف وأبى هانم وداليا وكل بناتنا الرائعات وخالد همس الاحباب
لكم أحترامى وتقديرى

بجد كان نفسى ابقى موجودة و كنت خلاص متفقة مع كيارا انى جاية..بس جه meeting طلعلى فى البخت و معرفتش اروح..بجد شكله كان يوم حلو اوى

:(

الله .. الله عليكم

بجد قلبي مرتاح قوي و فخور قوي و فيه خيط حزن كده على اني ماكنتش موجودة بس عندي امل كبير قوي بيقول ان الخير اللي مستنيني في بلدي كبير قوي و ان بلدي مش وحشة زي ما بيحكوا عنها
عندي أمل كبير في بكرة اللي بيقول ان فيه ناس يمكن ماأخدتش نصيب وافر زي اللي خادوه أماهاتنا و أبهاتنا من التعليم المجاني المحترم والراحة في الأماكن الواسعة في المدارس ولا حتى في المواصلات و البيوت

وانهم ماكنلهوش حظ انهم ينالوا الحظ الوافر من الاخلاق و التعاون و التكفال اللي كان بين الناس زمان

بس قادرين انهم يخلقوا ده من غير خلفية خصبة
وعندهم وعي أكبر و أرقى من اللي حظوا عليه في سنوات تكوينهم

معادلة عجيبة
المعروف ان فاقد الشيء لا يعطيه
والجيل ده فقد كتر
بس اللي شايفاه هنا في البوست و لمتابعتي للأعمال اللي بتتعمل سواء بين المدونين و جهات تانية كتير بتقول ان بلدنا فيها ناس كتير بتعطي
وان الفاقد بيعطي اكتر كمان
وده اللي بلدنا محتاجاه
تعرفي يا فاتيما .. أنا شايفة ان المستقبل شايل لينا أوضاع أخير من اللي بيحكوا عنها آباءنا.. متوقعة بكل واقعية اننا حانشوف أيام بيسأل فيها الجار عن جاره و يبره
نشوف فيها شارع كامل بيشيل مصيبة ساكن فيه و يعدي بيها لبر الامان
عائلات مترابطة
مواطنين مسئولين
مش ببالغ ولا بحلم ولا شايفة الدنيا وردي
بالعكس انا شايفاها زي ماقلتي بالوانها الطبيعية
لان المقدمات اللي قريتها دلوقتي بتدل على النتائج
والخير نتيجته خير
حتى على المستوى الخاص
حياتي انا
اللي قريته هنا عطاني امل كبير فيها
عطاني امل في اني لما أرجع بلدي حلاقي فيها لمة و عشم و دافع على الخير و الحب
مش حاتوحد
مش حاحس اني على هامش البلد
حالاقي الف سكة أحس بيها اني لي دور و اني مفيدة و اني لي ناس تسند ظهري و تحسسني بامان
تعليق طويل قوي .. معلش
بس جسمي كله بيرتجف و قلبي بيدق قوي ونفسي اشكر كل حد فيكوا بعمق جدا
نفسي ابص لعين كل حد فيكم و أحط ايده فايدي و أقوله شكرا بامتنان مالوش حد و مش حايوصل زي أنا خاسة بيه غير لو وجها لوجه
ويااااارب ده يكون قريب
يااااااااااااااااااارب يجازي كل حد فيكم خير عن كل فعل عمله ويارب يصفي العمل ده من اي شائبة رياء او كبر أو أو
ويارب زي مااستفدتوا انتوا بيه و استفاد اللي اسعدتوهم و ساعدتوه يستفاد بيه كل حد بيسمع او يقرا عنه و يتعلم منه

فرحانة قوي

معلش يا طمطم هرد على الطائر الحزين

الدوا يا ايهاب سائل زى كده الميه المقطرة اللى بتنضاف على المضاد الحيوى

جزاك الله خير

ازيك يافاتيما
انا فعلا كنت موجود وسلمت عليكي مرتين
اول لما وصلت المستشفي مع كيارا
وساعة ماكنت ماشي
بس طبعا اكيد علشان الزحمة انت تلاقيكي ما اخدتيش بالك
ايوة هو انا بالظبط زي ماوصفتيني كدة كنت حاظظ وردة صفرا في عروة الجاكتة الموف
هههههههههههههههههههههههه
بجد كان يوم اكتر من رائع بفضل مجهودات كل الناس
كل سنة وانتم طيبين ودايما يارب متجمعين في الخير

ربنا يقدركم دايماً على فعل الخير
و يجمعكم في الخير دايماً
وصف ممتاز يا أم يوسف كأني كنت معاكم
تصدقي أول مرة آخد بالي من تعليقات الناس إني ما اعرفش شكلك إيه لغاية دلوقت
:)
سلامي لكل من حضروا طبعاً
و سلام أكبر لداليا و خالد على مجهوداتهم الجبارة

الذى هو بالفعل عجيب هو تلك المحبة والرحمة الواسعة فى قلبك

وصبرك الجميل على زهور صغيرة بريئة واسعادهم ولو بوردة ملونة .. حقيقة انت ام رائعة .. حصدتى ليس اعجاب الجميع .. ولكن ايضا دعواتهم لك عند المدفع .. تلك هى دعوة الصائم التى لاترد .. جعلها الله من نصيبك لانها من كل قلب شعب كامل تجمع فى تسيباس

ناس .. هم أجمل الناس .. توقعتهم من أول يوم خطت فيها يدى اول صفحة فى المدونة .. وتمنيت ان اعيش معهم ذلك العالم الخيالى الموجود الذى لايجمع فيه الا المحبين الذى يملكون المشاعر النبيلة

والذين وهم هؤلاء .. مثلا راقيا لانسانية خلنا لوهلة انها اندثرت

لكنها موجودة ..

يارب تستمر ايامنا اعيادا ولقاءات جميلة كهذه وكل عام وانت بخير

أزال المؤلف هذا التعليق.

أهلا فاتيما
.................
بجد كان يوم اكر من رائع وان فاتنى التعرف على شخص كريم زيك لكن اكيد انا شوفتك لكن ذاكرتى كعادتى خانتنى
جزاكم الله كل الخير على مجهودكم الرائع
.....
نورالدين محمود

مامتي حببتي يارتني كنت معاكم وحشاني
ممكن طلب
ممكن نخلي اللقاء علي العيد ان شاء الله رابع يوم كدة عشان هند نازلة اجازة اسبوع العيد
ياريت تقدروا تظبطوا عشان نفسي اشوفكم كلكم
دمتي بالف خير
انا قريت البوست كامل بكومنات هههههههه

يابختكم
متجمعين فى الخير دايما ان شاء الله
وربنا يقدرنا بعد كده ونحاول نكون معاكم

كيـــــارا
يا بنوتات يا عسولات
اليوم فعلا كان جميل بيكو
و إن شاء الله يتكرر





سومة ... مجنونة فى بلد عاقل
يا أعقل مجنونة فى البلد دى
إنتى إكتشاف ليا ..و طيبة قلبك و بساطتك فى التعامل مع الاطفال بتبين دا من غير أى كلام ...
كل ما أفتكر طلق فريال أضحااااك
و ادعيلك ربنا بفرح قلبك
متنسيش سلامنا يوصل لو سمحتى لخالك العزيز و عقبال مل مشوار زى دا لما تكونى منورة و طيوبة زى منتى



عاشقة الرومانسية
يا دودو يا حبيبتى كان نفسى قوى تكونى معانا بس معلش انا عارفة و مقدرة
فرحت جداااااااا لما سمعت صوتك و لو إن الواحد كان عامل زى اللى واقف ف محطة مصر و مش سامع حاجة خالص
بوسات و حضونات كالعادة و اكتر من العادى كمان



ستيتة حسب الله الحمش

هل يجرؤ النحس يقرب من سعادتك
طب يوم الازهر بارك يشهد على إن نيتك دايما يتبعها خير
لو مكنتيش موجودة فيزيائياً يا ستى فإنتى شاركتى برضو فى أطعام الطعام و نشر الفرحة فى قلوب الناس من و انتى عندك يا ستوتى
هنعمل لقاء تعارف عادى و تفاصيله عند قوس قزح وش الخير كله ...روحى شوفى و اعرفى هيناسبك و لا لأ ..و إستنى
متقوليش إنك جاية ..أما نشوف إيه الحكاية إن شاء الله ؟؟؟




adel
قبل كل حاجة ..اخبار المذاكرة إيه؟؟
طيييييييييب
انا عارفة ابنى حبيبى لازم يكون شطارة و بيعمل اللى عليه
يا رب يكرمك و يفتحها عليك و تجاوب احسن من دكتور المادة ذات نفسه

فعلا الوجوه لما تتقابل بيبقى احساس تانى خالص
و بعدين إنتا ختمت اليوم بسوووو يعنى ختامه مسك يا بنى
هنتقابل تانى و هبقى اقولك على المعاد و المكان بس تكون خلصت إن شاء الله
و تعالى هنا ...و لا بنت عاكستك ؟
إيه كله عنده عشى ليلى و لا إيه؟؟
دا من نق و قر من سى محمود عليك
معاجبيناتك مالين الدنيا يا بنى و لا يهمك
إنتا بيخطبوك منى بس انا بقول لما يخلص دراسته الاول و يتخرج و يشتغل نبقى نشوف حكاية الجواز دى
و أى غنوة تعوزها قول لماما علطول يا بنى اومال انا ام اونطة مبعملشى حاجة كدا ؟؟
سلام مؤقتاً يا ولدى العزيز





عاشقة الرومانسية
بت يا دودو ...ملكيييييييييييش دعوة بعادل متبوطيليش نفساوية الولد
دى كورسات ثكة ف النفس
بعدين كمان الولد اصلا مش محتاجها
دا زى القمر و مفيش كلام تانى غير كدا
و أيوه مدوب القلوب
مش ابنى يا ناااااااااااس
يبقى لازم كدا
---------------
محمد و إبراهيم ما شاء الله عليهم
و للأسف الشديد مشاعرك فى محلها يا دودو ...لأن كان المفروض يتم فصلهم أصغر من كدا بس غالبا الظروف وقتها مكنتش سامحة بكدا ماديا اكيد
دلوقتى بقى الخطر اكبر مع التقدم فى العمر
ربنا يكتبلهم الخير و يصبر اهلهم
بوسة و حضونات تااااااانى

مسدس صغير
و لا يهمك يا صاصا
تتعوض إن شاء الله فى مرة جاية
و انا حبيت اقول كل حاجة بالتفصيل الممل عشان تعيشوا معانا اللحظات الجميلة دى و المرة الجاية تكون اولنا يا مسدس صغير و قلب كبير





samhsezz
بلاش شقاوة و ضرب ف العصافير بالطوب يا خاطر ...
كلامك صح طبعا و الحمدلله اليوم كان ناجح على اكتر من مستوى
انا ببقى سعيدة جدا لما الاقى الناس اللى جاية لأول مرة بيعجبها جو اللقاءات و تتحمس و يكون انطباعها خير ..
بينى و بينك بطمن علينا و على اننا ماشيين صح و ربنا مبارك فى لمتنا دى
إنتا نورتنا بجد يا خاطر و إن شاء الله تكون من اول الحاضرين دايما كل مرة


ام مالك
يا حبيبتى ربنا يخليكى لينا
و يخليلنا دعواتك الطيبة الحلوة دى
المرة الجاية تكونى معانا إن شاء الله



وش الخير قوس قزح
يا دودى انا كتبت كل الاسامى أهو و سامحينى لازم انسى حاجات برضو اللى بيشوفكوا بيتوووه و كويس إنه بيفتكر عنوان بيته ...
لما انا رائعة إنتى تبقى إيه؟؟
الروعة نفسها
لاااااا
دا الروعة تتضاءل و تنكسف و تاخد جنب لما تشوفك جاية من بعيد
إنتى فوق الوصف و الكلام يا داليا عشان كدا انا
هسكت
خالث
ب ح ب ك



أحلام حقيقية
و بارك الله فيكى انت كمان
و تكونى معانا إن شاء الله المرات الجاية



only spot
يا ستى صدعينى تانى و تالت و عاشر
بس انا كنت مصدعة من البرد مش منك
و انا كمان بحبك يا حبيبتى



بيطرية و مش بإيدى
أنتى زقزوقية يا بنتى ؟!!!
طب مش تقولى .. دول احسن ناس
أبو الريش دى مستشفى يا حبيبتى للاطفال و متخصصة فى علاج الفئة العمرية دى بس ...متهيألى فيه مكان برضو اسمه ابوالريش بس معنديش معلومات عنه غير إنه فى السيدة زينب برضو ..و غالبا على اد الحال زى عندكم



الطائر الحزين
و يتقبل منك انتا كمان يا إيهاب
انا بعتلك غيميل برقم استاذ خالد الاخصائى الإجتماعى و إن شاء الله يفيدك فى الحكاية دى كويس



ام بتول
يا حبيبتى الشعور ذاته كان عندى فى اول لقاء تدوينى
الناس بهرتنى بجمالها فى الحقيقة اللى طلع أحلى من خيالى ميت مرة
إنطباعاتك فى محلها كلها
هى دى البلد بصفوة ناسها
بنات و ولاد
و رجالة و ستات
دماغهم متغربلة صح و قلوبهم لسه فيها الخير و كل شىء مش عاجبهم بيحاولوا يغيروه بلسانهم و كلماتهم عبر المدونات
و بعدين من وقت للتانى بيحاولوا يطبقوا دا بشكل عملى
موظف فى المستشفى لما سالنى إنتوا تبع إيه و داليا قالته مش تبع حد غحنا مجموعة اصدقاء و بس
كان مبسوط قوى و مش مصدق
بس الحاجة لما بتتعمل بحب منزه عن أى غرض من وراه
بتبقى دى النتيجة النهائية
انتى نورتينا و ربنا يتقبل منك عمرتك إن شاء الله و ترجعى منها مجبورة و راسية على بر الامان و كل لقاء تنورينا بحسك الهادى و إبتسامتك الطيبة الجميلة دى يا حبيبتى




appy
يا ست الضاكتورة
انا مقولتش حاجة غير إن كان ليكى شمخة قوية
و الله كنتى لايقة و مالية مكانك
تخيلى لو فيه منك كام واحدة و ممشين اماكن مشابهة كان زمان الدنيا راقت ازاى ؟!!
بس المشكلة فى الخرفان .. هنوقفهم فين ؟

صبرنى يا رب
لا و النبى بلاش عياط يا صبصب
دنا بكتب حاجة مش حزاينى خالص اهو
معلش مكنش فيه نصيب ليكى المرة دى
هتتعوض و الله احنا هنروح من بعض فين
و ما شاء الله الخير بيلاقيله طريق ما بيننا
روقى إنتى بس يا صبصبوتى
انتى قولتيها بنفسك
العيب على الشلة المتخلفة ..
فمتزعليش




حنين القلب
يا حنونة يا حبيبتى
طب بس تعالى و انا هاكلك إنتى و النونة بإيدى يا ستى
معلش انا عارفة ..و ربنا يسهل و نجيلكم احنا بقى
انا كمان لما سمعت صوتك فرحت قوى و اطمنت كمان و خلى بالك من نفسك ارجوكى ..ماشى؟
طيب بوسة ليكى و حضونة للبيبى
خلى بالك انا بعدهك عشان جنابه لما يشرف ياخدهم كلهم مرة واحدة
هيه





eno
مجتيش ليه يا ست البنات
كنتى جبتى خطيبك يا بنتى و اهى تبقى خروجة و فسحة و ثواب كمان
طب عند قوس قزح فى مشروع لقاء تانى
روحى شوفى التفاصيل و رتبى مع خطيبك و تعالوا نورونا
انا كمان بحبك يا حبيبتى



NIDAAL.R
انا كنت اقصد نهر الحب و نسمة يا نضال مش سعادتك
و إن شاء الله ملحوقة المرة الجاية بس ابقى تعالى و قولى انا نضال يا فاتيما اهو ..ماشى ؟
و فرصة سعيدة أصلاً
إننا تواجدنا فى يوم جميل دى دا يا أستاذ



همس الاحباب
يا لهوى يا خالد ؟؟
إنتا بتهرج ..صح ؟
كل اللى عملته دا و بتتأسف ؟؟
طب إيه رأيك إن انا مسلمة عليك و احنا واقفين برا بس انتا من كتر الانشغال نسيت ... شوفت الجدعنة بتطلع منك من غير ماتاخد بالك ازاى ؟؟؟
ربنا يعينك على فعل الخير دايما
و يخليك لينا يا خالد
إنت نعم الاخ و السند يا غالى
ربنا يكتبلك الخير بقدر ما اسعدتنا انت و داليا و اسعدتم قلوب اكتر من 250 طفل على الأقل فى المستشفى




DAHLIA
عارفة يا حبيبتى إنك لو تقدرى كنتى جيتى اول واحدة
بس معلش تتعوض إن شاء الله
ربنا يريح قلبك إنتى كمان


NORAHATY
تعرفى إنى افتكرتك لما شوفت احمد كمال ..
سبحان الله كنتى على بالى
معلش سامحينى لو معرفتش اتكلم معاكى كويس لأنى مكنتش سامعة نفسى اصلاً
عقبال ما تكونى معانا المرات الجاية يا حبيبتى و بحبك قوى



MICHEAL
طب مجتش ليه يا مايكيلتو
ناس كتير سألت عليك
منهم الواد عادل ابنى
ممكن تيجى اللقاء الجاى بقى عشان وحشتنا ..ممكن ؟

الحمد لله إن ربنا يسر لي إني أشوف
أم يا ما أتمنيت أشوفها

أم نموذج لكل أم

لما قابلتك كنت حاسس إني واقف قدام هرم قدام حد عظيم أوووي باللي قدمه وبيقدمه لابنه ربنا يخليه ليكي ويرجع لك بالسلامة

أنت تستحقي كل خير يا فاتيما والله

وإن شاء الله الدعاء اللي كان قبل الفطار يكون مستجاب

اللهم أمين

♥ Am fOpa'D ♥
يا عزيزتى انا زعلانة
لأنى مشوفتكيش و ملحقتش اسلم عليكى
بس انتى اكيد كنتى من ضمن البنوتات الجميلات اللى كانوا واقفين و موجودين فى تسيباس بس انا مخدتش فرصة اسلم
المرة الجاية إن شاء الله تتعوض و نسلم على بعض من الاول خالص
جزاكى الله خيرا يا حبيبتى



فاروق عادل
معلش يا فاروق ..المرة الجاية
فيه لقاء بيترتب عند قوس قزح وش الخير
روح شوف التفاصيل و لو يناسبك متترددش و تعالى نورنا




WISH I WERE ABUTTERFLY
و الله يا هبهوبة كنت بفكر فى كدا
زيارات متكررة بس معرفش نظام المستشفى إيه ...بس نعملها تانى و تالت و عاشر المهم تكون ملموسة و تعمل فرق بس
كان
نفسى
تيييييييجى
بس خلاث



ASSAFO ANAROZE
شكرا يا اسافو و يتقبل منكم إنتوا كمان إن شاء الله


DIYAA
ربنا يسمع منك فى كل ما دعوته يا ضياء
إنت أنسان طيب القلب و مبتجيش غير فى المشواير الصعبة اللى عاوزة جهد و تعب و مساعدة و ربنا يكتبلك قدر كل هذا خير الثواب
إنتا حاجة مفرحة يا بنى
و بقينا من أصحاب التريليونات اهو
يعنى غلبت أحمد عز سخصياً
خلاص متكلمنويش تانى و لا أعرفكم
هاااااه


ليس فقيرا من يحب
الف شكر ليكى يا رانيا على كل ما كتبتيه
بس مش عارفة ليه حاسة فى كلامك بنبرة حزن و زعل ؟؟
و لا متهيألى يمكن ؟

( احمد سكر )
يا سكررررررر
ربنا يجازيك انتا كمان ألف خير
و حالااااااا هضيف إسم إيمان مصرى العزيزة فى البوست لأنها جزء مهم منه
يا ريت تبعت سلامى لرودى و تقولها كنا مفتقدينها و خالص دوى ليك و ليها



mimi
مجتيش ليه يا هااااانم ؟؟
المرة الجاية !!
طيييييييب





amr...
يا عمرو عااااكس زى مانت عايز يا بنى
اصل انتا مش واخد بالك من حاجة
الواد ماجد أخويا برج العقرب و ربنا ما يوريك بقى
كتوم و بالقطارة لما يقولى كلمة مشجعة كدا زى اللى قولتها
فأعمل فيا ثواب بصفتى اختك الكبيرة برضو و ارفعلى معنوياتى مش هقولك لأ
بس لو سمحت
لو سمحت يعنى
عادل من غير ما يطلعلك و لا حاجة
سبع الرجال يا فندم ..دا ابنى و مينفعشى يكون غير كدا و هوه عارف إنك مش بتعاكس و انك علشان حد طيب
طيب
طيب
طيب
بتقول كدا
ربنا يكتر من امثالك انتا كمان يا عزيزى



mohamed
يا أستاذى انا طلعت مفاجاة ليا
ما شاء الله عليك
شباب و حيوية و طيبة و كلام حنون
ربنا يبارك فى حضرتك و تنورنا دايما
الاحترام و التقدير كله لحضرتك


انا و دماغى
معلشى
المرة الجاية تشرفينا و تنورى الدنيا كلها





hannoda
كنت منتظرة تعليقك دا
و متوقعاه .. أو متوقعة رد فعلك لأنى عارفة اد إيه بتتأثرى باللقاءات دى
و بتعيشيها معانا من على البعد
انا من الناس اللى ضد مقولة فاقد الشىء لا يعطيه
مش دايما يا هنودتى
ساعات مفتقد الشىء بيدى جامد قوى و يحاول يعوض الآخرين اللى هوه مشافوش فى حياته
الناس بتقول عليا برضو حلمة و خيالية
بس انا بتكلم من اللى بشوفه و بعيشه
ملموس و واقعى و حقيقى
متقلقيش على نفسك لما ترجعى يا هنودة
هتلاقى حضن كبير يضمك
دا كفاية عليكى مدونى إسكندرية يا بنتى
دودو و حنين القلب و لماضة و زمردة و داليا و شيمو و....و ...و ....
و غحنا اهو معاكى و جنبك و فيه كتير زينا بس متفرقين و مبيلقوش فرصة تجمعهم
التدوين كان البوابة الذهبية و الحمدلله عديناها و فاضل نشوف هنعمل إيه بالفرصة دى و اظننا الحمدلله بنعمل حاجة و لو على فترات
أنا فرحانة لفرحك يا اجمل قمراية



manamino
معلش أعذرنى يا مينو اصل ما شاء الله العدد كان كبير و يفرح
المرة الجاية تتعوض




مهندس مصرى
ربنا يخليك يا محمد يا رب
بص بقى إنتا زمانك دلوقتى بتقول عليا فى سرك إيه الست الغريبة دى
أصل نص الكلام كان ملخبط معاك معلشى
بالنوسبة لموضوع الشكل دا فبلااااااش يا محمد والنبى تحطلى تصورات فى ذهنك عشان منكن يجيلك إحباط فزيع مريع لما تشوفنى ف الحقيقة و ربنا يستر
المرة الجاية تكون معانا إن شاء الله
و معاك العروسة يا فندم





sherif
يا استاذى الغالى الذى يحصد حب و إحترام الجميع هوه حضرتك و بشهادة كل التعليقات فى كل البوستات المتعلقة باليوم الجميل دا
لو كان فى قلبى بعض من الرحمة و المحبة فسبب تواجدها و نموها هو انتم
القلوب التى احتضنت و طبطبت و احبت بلا شرط و لا قيد و لا مقابل
لو لم استجب لطوفان المشاعر دا يبقى مستاهلش اعيش فى عالمكم الجميل و الحمدلله انا متمسكة ببقعتى الحصينة وسطكم و هدافع عنها لأخى نفس و بكل حماس و اخلاص عندى
و يا أيها الشعب الكامل فى تسيباس ..أنا ممنونة من قلبى ليكم



نور الدين
عادى يا نور بتحصل فى أحسن اللقاءات
خصوصا لما تكون ما شاء الله بالعدد الكبير الجميل دا
اكيد هنتقابل تانى بإذن الله على خير
نورت المدونة يا فندم



حروووف
النوبة الجاية إن شاء الله يا حروووف
طلبك على عينى يا حبيبتى بس مظمنش حد فى العيد هيكون فاضى لترتيب لقاء
و خلى بالك بعد العيد علطول المدارس
و المعاد دا هيكون صعب جداااا
معلش يا حبيبتى ربنا يسهلها و نجيلكم إحنا إسكندرية بس قدام شوية
ماشى ؟



المعتصم
الف شكر يا مصطفى و ربنا يسهل
و تكون معانا المرة الجاية إن شاء الله
ألف حمدلله على سلامة الوالد

عارفة ...مش عارف ليه!!!
أنا كمان أتشرفت برؤيتك يا وليد
بص بقى انت حد طيب قوى
و اخلاق و حسك هادى
و تحسس اللى يشوفك من اول وهلة كدا بإنه يعرفك من بدرى بدرى
و بعيييييين بلاش حكاية الهرم دى
طب دنا حتى خسيت خالث خالث
إنتى شايفنى بعين المحبة و عشان كدا بتقول كلام حلو قوى و كتير عليا
ربنا يديم الود و الخير ما بيننا كلنا
و خالص سلامى لسبيدر باشا مان
و مامته العزيزة
و ليك انتا سلامات كتيييييييييير

جزاكم الله خيرا
وجعله في ميزان حسناتكم
واكثر من امثالكم

أنا برضه قلت هألاقي هنا الوصف التفصيلي للأحداث كلها
:-)

بجد بوست جميل جدا ومجهود من أروع ما يمكن .. ربنا يبارك للجميع

مش عجيب أبدا عليكم بجد

ربنا يجازيكم خير بجد
انا عاوز اكون معاكم المرة الجايه ان شاء الله

فاتيما الجميلة
بصي يا ست الكل

انا معنديش مكان تانى ممكن نروحه

انا من وجهة نظرى ان تسيباس مكان احسن من نادى الزراعيين ومن كافتريا سلطانة زمان
هو احسن منهم فى القاعدة وفى الاكل وفى الاسعار وفى المواصلات

موضوع معاملتهم ده
هما ليهم عذرهم برضه
هما مبيقفلوا المكان وقت صلاة الجمعة يبقى احنا مانروحش يوم الجمعة
وده اللى هايحصل فعلا وهانروح ان شاء الله يوم سبت

هما مابيستحملوش اعداد كبيرة
واحنا فى لقاءاتنا الحريمية لا نتجاوز الخمستاشر فرد و ممكن اقل كمان
فبالتالى اعتقد ان يوميها هتبقى اليوم هادى ومافيهوش مشاكل
وانا بطبعى احب ادى فرصة واتنين وتلاتة وعشرة لحد ما اقول على اى حاجة لأ
وانا بصراحة لسة ماجابتش اخر من تسيباس لسة جوايا ممكن اديهم اعذار ان احنا كنا كتييييييييير اوى يوم افطار المدونين
وهما كانوا عاملين حسابهم على عدد اقل من كدة

لكن علشان خاطر عيونك لو كلامى اللى فوق ده ما اقنعكيش ولسة مصممة انك ماتشربيش عندهم مية
ودى حاجة طبعا ما ترضيش اى بنى ادم حتى ولو كان خيخة
فبالتالى عليكى انتى انك تختارلنا مكان فيه كل المواصفات بتاعة تسيباس
يكون مكان يسهل الوصول اليه ومواصلاته سهلة زى المترو
يكون مكان مكيف وقاعدته حلوة
يكون اكلهم كتير وطعمه حلو
واسعاره معقولة



ومستنية ردك عندى هناك فى المدونة

سلام يا كميلة

اختك خيخة

قيس بن الملوح
ألف شكر ليك و إن شاء الله المرة الجاية تكون معانا




يا مراكبى
و مش عجيب ابداً منك التعليق الجميل دا يا نبع الحكمة
كان نفسى تكون معانا و مفتقدينك
يا رب نشوفك قريب
إن شاء الله يحصل



blue-wave
إن شاء الله يا دكتور
تأنسنا
و تشرفنا
و تكترنا


بت خيخة و أى كلام
يا ست خوخة بتزنقينى بأخلاقك الشيك يعنى
طب انا معنديش مكان
غير الزراعيين و المهندسين ..
لكن طالما مينفعوش يبقى خلاص
مش هغلس فى حكاية تسيباس دى و ابقى انا اللى عاملة قلق
انا عارفة إن دوبا حرام تقعد فى الحر و كلنا برضو ...
يبقى خلاص اتفقنا على المكان ...
بس خلى بالك
انا دماغى جزمة قديمة برضو
و مصرة مشربش عندهم بوق مية
و هجيب مايتى و البيبسى بتاعى معايا
و لو جعت هطلع اكل فى أى مكان برا و أبقى ارجعلكم تانى
أو حتى اكل لما اروح و خلاص
بس خلاويص كدا
و نبقى حلينا المشكلة للجميع
سلام يا خوختى الجميلة

صباح شريف افندم

كل سنة وانت اجمل واسعد

وربنا يقدرك على الخير الجميل ده انت ورفقة البركة دي

ويجعله في ميزان حسناتك


العيد قرب اهوه

جبتي فستان العيد ولا لسه؟؟

كل سنة وانت طيبة يا طيبة

يادى عادل وسنين عادل يعنى انا خلتهولك ابو جودة عشان اخلص منه شوفى سبت البوست ومسكت فى عادل ماشى ياعم عادل مانت بطة بيضة بقى!!!! استغفر الله العظيم يااااارب
وكمان عايزة تروحى اسكندرية ماشى ماشى وانا قولتلك انى بعدى سلم بيتنا باعافية!!! طب ياااااااااارب لو روحتة تلاقى فرع تسبياس ليشع هناك وتقعدوا فيا ها
وكمان اية الحلاوة دى انا شوفت الحاجات الى انتى عاملها حلوة اوى بجد
فين الوردة بتاعتى؟؟؟!!

كويسسسسسسسسسسسس جدااااااااااا أنكم أنبسطتممممممممم وإن شاء الله لو في لقاء جيييييييييييييييييييي كل الناس اللي جت تجي تانييييييييييييييييي بجد تمامممممممممم موتتتتتتتتتتتتتتتتتت و كويس أنكم أنبسطمممممممممم

fatima

جزاكم الله كل خير

جعله الله في ميزان حسناتكم يا رب

تحياتي..
حنان من تونس..

السلام عليكم فاتيما هانم

كل عام وانت بخير

يا خساره كان نفسى احضر يوم زى ده ... ما علهش الجايات اكتر من الرايحات ...

بس انا بعت لكم برضه مندوبه من عندى البت سومه المجنونه بنت اختى يارب تكون عملت الواجب بدل خالها فشكول

تحياتى لكل المدونين الذين حضروا هذا اليوم وربنا يجعله فى ميزان حسناتهم

تحياتى

zianour
صباح اشرف و اجمل و اروق جناب حضرتيكم
كل سنة و إنتى بالف خير يا حبيبتى
و السنة الجاية تكونى معانا
..مين يعرف ؟!!
و ييجى نور و معاه زياد يوزعوا الحاجة بنفسهم و يلعبوا مع الولاد هناك ..
و جبت الفستان بس لسه الجزمة و الشنطة و الفيونكة ..
فين العيدية بتاعتى يا ست إنتى بقى ؟!!



كيكى عووووو
بت يا كيكى ...إنتى بتدعى على إبنى قصاد عينى كدا و مش خايفة ؟؟
فكرينى لما أشوفك
ابقى أقطم رقبتك
ملكيش دعوة بالواد الغلبان دا
هوه اكمنه امور و مؤدب و فى حاله
و ملوش فى الشقاوة بتاعتكو يبقى خلاص
اهو شوفى قاعد بيقرى التعليق
و هوه ساكت و مهذب و مربع إيديه ازاى ...
يا وحشة يا مفترية
انا المليجى ؟!!!
طييييييييييب أنا هتقمص روحه معاكى
و انا وراكى و الزمن طويييييل
و الأيام بيننا
مشوار إسكندرية لسه مترتبشى يا بنتى
و ممكن يتفشكل فى أى وقت
أصل متعرفيش ازاى
العين بقى و النق هيشتغل
هتيجى يوم الحد؟؟؟
و لا هبعملولك حظر تجول فى البيت
شوفى التفاصيل عند وش الخير قوس قزح و قوليلى جاى و لا مش جاى يا عبده
و من دلوقتى بقولك
ملكيش دعوة بعااااااااااادل
هيه




ranim
كان عاوزك المشوار دا يا رنومة
المرة الجاية حاولى تيجى
فيه لقاء حريمى قريب هبقى اقول تفاصيله و ربنا يسهل و تقدرى تيجى
سلامى لهند و إسراء و بابا العزيز



حنان
جزاك الله خيرا إنتى كمان يا حنان
و يكفي كلماتك الطيبة المشجعة دى
خالص حبى ليكى يا أطييييييب اهل تونس



فشكووول
كنا نتمنى تشرفنا يا أستاذنا
كل سنة و حضرتك بالف خير
و المبعوث الرسمى عن سعادتك كانت و نعم الجمال و الخلق
بجد بنت تشرف يا استاذ صلاح
و عملت الواجب و زيادة
انا كنت واقفة اتعلم منها و اتفرج عليها و هيا بتتعامل مع الاطفال ببساطة و من غير القلق و التنشنة اللى بتيجى للواحد فى المواقف دى
ما شاء الله عليها حاجة تفرح
ربنا يحرسها و نشوف حضرتك دايما منورنا
خالص ودى للحفيد الجميل احمد و ليس احمق لو سمحت

إرسال تعليق