........................................................

........................................................

الخميس، 10 سبتمبر 2009

من غير دموع

لو تسأل النن الحزين
جوه العينين
عن سر حزنه وانكساره
عن ســر إحساس الضيـــاع
عن لهفته وساعات مراره
لو تسأل القلب الحزين
هو الصدى ينفع يعيش
من غير كلام بنردده ؟!!
هو اللي ساكن وسطنا
ينفع نخونه ونحسده ؟!!
ولا اللي حته مننا
ينفع نسيبه ونبعده ؟!!
ولا الدمــوع تفضل دموع
ولا الشجن يفضل شجن
ولا اللي راح ننساه أوام !!
ليه دايماً الشئ اللي يوجع قلبنا بنجدده
...
ليه تحزني ؟
ليه تبكى بدموعك سنين على دمعته
مـــين قال بإن الدمع هيزود حنانه ويسعده !!!
أو يخلق الجسر اللي مقطوع من سنين
مين قال بإن العشق لازمه معشوقين ؟
هو اللي يعشق فرحته
هــتحس يعنى الفرحة بيه ؟
ولا اللي يعشق سبحته
او دبلته أو بدلته
ولا اللى يعشق دمعته

إيه لازمة الحزن المسافر وسطنا

لو قلتلك يعنى
إن الحنين واصل ما بين قلبك وبينه
راح تضحكي ؟
لو قلتلك إن الزمن من غير دموع
هو الطريق اللي هينور سنينه
راح تضحكى ؟
لو قلتلك إن اللى فات بينكم أكيد
عايش ما بين عقله وحنينه
راح تضحكى ؟
وهتصدقينى ولا هتبكى تانى للزمن
...
يوسف تملى بيعشقك .. بس اضحكي
يوسف بيعشق لون عيونك لما تضوي لبسمته
يوسف بيعشق صورة ليكى بضحكتك وبضحكته
يوسف بيعشق كل إحساس بالحنان
وكمـــان بيعشق جدته
فبلاش الم
وبلاش دموع
خلى الكلام بينك وبينه
ابتسامه
وضحكه عاليه
وذكـــريات
هو المدى ينفع يخون الشوف فى عمر الامنيات
فبلاش تعيدى الذكريات المؤلمة
وامسحى كل اللى فات
----------------------------
الجميل صاحب المزاج الحزين
احمد
مهنى
هنا و هنا
يا كل شفافية و براءة
الطفل الصغير
شكرااااااااااااااااااااااا

هناك 35 تعليقًا:

فاتيما يقول...

يا احمد
يا مهنى
يا حزين و بتنشر البهجة
أنا عاجزة عن شكرك فوق الوصف
إنتا وصفت حالة مريت
و بمر بيها مل لحظة
بس معرفتش اعبر عنها ببلاغتك و رقتك و شفافيتك دى و لا عن واحد من عشرة من جمال و روعة أشعارك ...
أنا فخورة بإن يوسف إستنفر فى ناس جميلة زيك و زى باقى احبابى حالات مختلفة و متميزة كدا من المشاعر و خلاهم يكتبوا حاجة حلوة
قوى
قوى
قوى
كدا
ربنا ما يحرمنى منكم و لا من مشاعركم الحلوة دى
و ربنا كريم و قادر يردلى يوسف عشان يشكركم واحد واحد
و يقولك متشكر يا حضرتك على اللى قولته عنى و فرحت بيه ماما
ربنا يحرسك يا احمد و اشوفك احسن ما تتمنى و اكتر
يا رب

غير معرف يقول...

هنئة من القلب بعيدالفطر وكل عام وانتم في احسن حال

عبد الجليل

فاتيما يقول...

أستاذ عبدالجليل
و حضرتك طيب يا أستاذنا
متشكرة قوى لأنى لسه فاكرنا
و بتحرص تعيد علينا انا و يوسف
خالص ودى و سلامى للعائلة الكريمة و كل اهل المنصورة على رأسهم احسن واحد فيهم
و اللى هوه حضرتك

Appy يقول...

حلوة اوى الواد ده بيقول الكلام ده منين هبقى اقفش فيه بقى واعرف

adel يقول...

بجد اكثر من رائعة
حلوة يابو حميد
وكلامك صح جدا

و ....
مممممم

بعدين بقي :)

Manamino يقول...

مشاعر حلوة قوووووووي وصادقة بجد
تسلم ايدين اللي كتبها
وربنا يرجعلك يوسف بالفرحة والضحكة والسلامة

ابتسامة حزن يقول...

جميله جدا
بس انتو عارفين انا مشاعرنا مش بأدينا
لجظات الحزن كتيره
لحظات الفرح قليله
ربنا يجعل كل لحظاتك فرح يافطيمه
ويرضى قلبك باللى تتمنيه ويجمعك مع من تحبى
دعوه من قلبى بظهر الغيب لا اعرفك ولا تعرفينى
يمكن ربنا يقبلها منى

فشكووول يقول...

السلام عليكم

مش لاقى مجال للكلام

مش عارف اعلق

ربنا يخليك لك ويريح قلبكم انتم الاثنين

تحياتى

المعتصم يقول...

السلام عليكم ورحمة الله وبركاته
جميلة قووووى يافاتيما
واحمد ده باين عليه شاعر كبييير
والاحساس فيها عالى قوووى
بس على فكرة الاحساس فى المدونة كلها مش بس فى القصيده دى
ربنا يخليلك يوسف ويفرح قلبك بيه
ســـــــــــلام

عاشقه الرومانسيه يقول...

الله ياابو حميد
جميييييييييله
تسلم ايدك يارب
وفاتيما تستحق اكتر من مجرد كلمات
فاتيما تستحق كل احساس الحب اللى فى الدنيا
ربنا يخلى يوسف ليكى ولينا ياطمطومتى

♥ Am fOpa'D ♥ يقول...

حلووة اووي
تحسيها كلام صاادق فيها
لاء شغل عاالي فعلا

ربنا يبسطك يا ماما فاتيما ويرجعلك يوسف بالسلامة ان شاء الله وتقر عينك بيه ياارب

أحمـــــــــــــد أبو العلا يقول...

الله على الكلام الجميل
جماله في صدقه

ياريت نصدقه

blue-wave يقول...

الله الله بجد

Mohamed Hamdy يقول...

سمعت عن جروب : هعيد وافرفش بدون تحرش؟
ده جروب على الفيس بوك لتوعية الشباب ومناقشتهم وتفهيمهم ان التحرش سلوك خاطىء , وإننا لازم نبطل التبريرات السخيفة لافعالنا زى ان التحرش عقاب للبنت اللى لبسها متبرج ... الخ

الجروب هدفه عمل توعية للشباب قبل عيد الفطر المبارك اللى اتحول لموسم تحرش من ألاف الشباب , اللى كتير منهم –ياللعجب- بيكونو بيصلو ويصومو لحد اخر يوم فى رمضان واول يوم فى العيد بيتحولو لكائنات متحرشه وبتضايق فى خلق الله

كمان الجروب مش بيشتغل على الانترنت وبس , احنا بنخاطب شيوخ الجوامع ينهوا الشباب عن التحرش ويفكروهم بقيم الدين وضرورة غض البصر.. الخ خلال خطبة الجمعة او خطب التراويح وصلاة الليل , وكمان بنكلم معدى برامج التوك شو والجرايد الرسمية والخاصة لعرض حملتنا والتركيز عليها

لو تقدر تشارك معانا ببوست فى البلوج بتاعك تحط فيه لينك الجروب واهدافه تبقا دى خدمه كبيره ممكن تساعد بيها شاب على الهدايه او تحمى بنت من التحرش

ايه رايك ؟

لينك الجروب

http://www.facebook.com/group.php?gid=158203229767

مي يقول...

ماشاء الله جميلة اوى الكلمات
وفينك يا فاتيما وحشتينىىىىىىىى
ربنا كبير وبكره يرجع يوسف لحضنك
تحياتى يا قمر

mimi يقول...

أحمد مهني .. كلنا ... بنقولك من قلبنا .... متشكرين

كلماتك حركت الدموع الساكنة من جوه العينين ..

بس بسرعة طبطبت علي قلب كان مجروح حزين ..

دي مامتي ومش بالسن لأ ... بالحنين

بنوعدك ... نفضل معاها
.. ندعيلها ليلة القدر أبنها يبات أوام في حضنها ..

يرجع ينور حجرته .. بيت جدته ... ومامته .. ويلون سماها

متشكرين

كيكى عوووووو يقول...

ليه دايماً الشئ اللي يوجع قلبنا بنجدده!!!!
دة انت خلتنا ننكش كلنا فى الحاجات الى وجعانا...اه
يمكن عشان احنا بطبعنا احيانا لمة الحزن بيجئ بيكسرنا أوى**

Spider boy يقول...

شكراً على كلام حضرتك في المدونة عندي

و ده واجب كل مسلم


وإنشاء الله هجى أنا وبابا يوم الحد


mohannd

شباك موارب/منار يقول...

كلام جميل اوي من احمد مهنى
واحساس اخوي رائع
الكل هنا بجد بيشكره
ويارب يوسف يكون كويس
وكل سنه وانتي طيبه يارب
ويارب اجمعك بيه من قريب
ويارب تكوني مبسوطه


منار

mahasen saber يقول...

الله الكلمات جميله قوى ومكتوبهه بأحساس عالى قوى
فعلا رائعه عارفه حاسس بكل حرف كاتبه قوى

...ربنا يقر عينك بيوسف يا ام يوسف

د. ياسر عمر عبد الفتاح يقول...

لا بجد جميلة جداً جداً جداً الكلمات
وياريت حضرتك تاخدي بالنصيحة دي
ياريت كلنا ناخد بيها

لا حقيقي عجبتني القصيدة دي أوي
ربنا يكرمك ويسعد قلبك

عاشقه الرومانسيه يقول...

فاتيما ياحبيبتى انا اعلنت عن اليوم عندى وعند حنين خلاص
ان شاء الله هيكون 10/10 زى ما اتفقنا
باقى 29 يوم
هاعدهم باليوم لحد ما اشوفك
بحبك

Yusuf يقول...

أنا أول مرة أخش مدونتك
وبجد اتألمت لألمك
ربنا يرد لك يوسف علي خير

dahlia.. يقول...

ياااااه قلبي وجعني قوي قوي مع كل كلمة!تسلم ايدك يا أحمد..و يسلم قلبك يا فاتيما

norahaty يقول...

تسلم يااستاذ أحمد
على الكلمات والمعانى
الحلوة (الموجعة)دى
وتسلمى ياطمطم على
النقل والتعريف بها:)

غير معرف يقول...

هيا مش بس حلوة

ممكن تتوصف بأنها مشاعر رائعة

المنسى يقول...

قالو زمان إللى بتقالمن القلب بيخش القلب علطول
ماما فاتيما يأحن ام
عاملة إيه وإيه أخبارك
ربنا يارب بحق الأيام الكريمة دى يردلك يوسف ويدفى بحضنك وحنانك إللى ماشفتولوش زى كل سنة وإنتى طيبة وكل المدونين طيبين
كنت عايز أعلق على البوست إللى فات
ربنا يارب يكرمكم كلكم ويقدركم على فعل الخير ويكتر من أمثالك ويجزيكم عنه كل خير يارب آمين
بجد إنتو ناس حلوين أوى والأيام الجاية أحلى بيكم بإذن الله يأحن وأجمل وأطيب ناس عرفتهم فى حياتى
تحياتى ليكى وليهم كووووووولهم
كل سنة وكلم بخير ومتجمعين على الخير دايما يارب

كراكيب يقول...

ماما فاتيييمااااا
مش قادرة اقولك فرحتي وانبساطي اني شوفتك واني لقيتك عسولة كاميلة حبوبة زي ما تخيلتك
ماما فاتيما انتي جميلة خااالص وتتحبي بسرعه اول ما تتشافي,,
اي نعم ما اتلكمناش كلمتين على بعض وماقعدناش دقيقتين على بعض بس فعلا بجد كان غصب عننا انا ومها وكان نفسي فعلا اكمل معاكوا اليوم واتكلم معاكي زيادة شويتين.. معلش الجايات اكتر.. صح؟؟

miro el niro kwanirooo

بت خيخة وأي كلام يقول...

لا تعليق سوى الصمت
اعجابا بالكلمات
ولصاحب الكلمات
و المهدى اليها الكلمات

عاشقة الأحزان يقول...

السلام عليكم
احم احم
كل سنة وحضرتك طيب وبجد سعيده قووووى بمرورى مدونتك الاكثر من رائعة

وانشاء الله ربنا يكرمك خير يارب ويعوض عليكى

مع مودتى
إيناس

عاشقة الأحزان يقول...

بجد البوست جميل قووى

ربنا يكرمه
وان شاء الله يوسف يرجعلك بألف سلامه ان شاء الله
هايل يا احمد بجد تسلم ايديك

صيدلانيه طالعه نازله يقول...

الكلام تحفه بجد يا طمطم بس انتى خساره فى الحزن
على فكره انا اول مره ادخل المدونه و اكتب النهارده من يوم ما كنا مع بعض
لان سيف تعب نفس يوم العزومه و انا اتعديت منه و كانت اجازه هنا بعيد عنك
وحشتينى جدا و الله و استنى البوست بتاعى عن الافطار

كيكى عوووووو يقول...

عااااااااااااااااا
عااااااااااااااااااااااا
لا انا جايه اعيط وامشى مش لقية حد يجئ معايا بكرة
عاااااااااااااااااااااااااااااا

Hannoda يقول...

عزيزتي و حبيبتي فاتيما

آسفة اني متأخرة كده على طول
و آسفة ان الوقت ماساعنيش لقراءة الكلمات كلها للآخر فمش حاعرف اعلق عنها دلوقتي وحاجي اعلق عليها تاني

أولا كل سنة و انت طيبة ويوسف طيب
ثانيا يهمني جدا رأيك في المضوع ده
http://hannoda.blogspot.com/2009/09/blog-post_13.html


وسامحيني .. مش حاينفع اكتب تعليقي عن البوست غير لما أقراه بطريقتي اللي بقرا بيها بوستاتك

مواطن شووجااع يقول...

جميلة توصل للقلب بسرعة

ربنا يكرمكـ ياأم يوسف
وكل سنة وحضرتكـ طيبة إنتي ويوسف
وربنا يجمعكـ بيه علي خير إن شاء لله

إرسال تعليق

الكلمــة نــور .. وبعض الكلمــات قبــور .... عبدالرحمن الشرقاوى