.

.

فى الميكروبااااااااااص  

Posted by: فاتيما in

مليش فى ركوب الميكروباظات أنا
ماله المترو ؟.. إبن ناس و كل واحد ف حاله
بس للضرورة أحكام
رايحة أزور صديقة عزيزة و اقعد معاها و مع عيالها
و الوسيلة المباشرة الوحيدة للركوب و توفير الوقت هى الموكوس دا
قومت ركبيته

عادة و انا رايحالها بركب من الموقف و باخد مكانين جنب السواق عشان أكبر دماغى
لكن فى الرجوع مفيش الاوبشن دا ..فبضطر أركب فى أى مطرح و السلام
و جه مطرحى فى الكرسى اللى قبل الكنبة الاخيرة
و اللى كان فيها تلت بنات مجازاً

بقول مجازاً لأنى إتصدمت بالحوار التالى اللى غصب عنى
كان لازم اسمعه
واحدة فيهم بتورى صور فرح أخوها على الموبايل للبنتين التانيين

فتاة 1: إيه دا ؟ عروسة اخوكى وحشة قوى
إيه التعليق السخيف اللى بيتقال دهوه؟!!


فتاة 2: اللى لاقيناها الأيام دى ... كويس إنه اتجوز أصلاً

الأيام دى ؟؟ّ!! ...هوه بيشترى طقم إنتريه و دا اللى لاقتيوه ؟

فتاة 3: اصل أخوكى زى القمر أساساً

ماشى بتجامليها ..كتر خيرك إنك مقولتيش عليه قرد بصديرى

فتاة 2: كل الناس ماشية من الفرح بتقول الكلام دا برضو

يا عينى على التوااااااضع

فتاة 1: يعنى اخوكى مكنش يستنانى ؟

هزاز هزار ..عادى

فتاة 2: أه المفروض كدا .. بس كويس دا مكنش ناوى يتجوز خالص

فتاة 3 : و اشمعنى بقى العروسة دى ؟

يا جماعة إحنا ف ميكروباص و امه لا إله الا الله سمعانا

فتاة 2 : اصلها دكتورة فى جامعة ف السعودية و هوه رايح معاها محرم
فقولنا خلاص وافق يا بنى
إهييه ..وافق يا بنى ؟.. بتضغطوا عليه و لا إيه ؟؟


فتاة 3 : أهو جوازة و خلاص ... هوه حد لاقى ؟

إيه يا بنات الكلام الغريب دا ؟؟

فتاة 1: و معندوش صحاب عاوزين يتجوزوا ؟

هذوها السؤال هيسؤل هنا !!! ؟...إحنا فى الميكروبااااص يا ماما

خدى بالك شوية

فتاة 2 : عنده صاحب وحيد بس متجوز من سن 21
و عنده تلات ولاد دلوقتى
و عاوز يتجوز تانى


يعنى معندوش حد ينفع للجواز من الآخر.. قوليها كدا

فتاة 3 : لأ... مينفعشى

الله ينور عليكى يا بنتى اول جملة عاقلة اسمعها

فتاة 1: لأ ليه ؟؟ بس يا عبيطة إنتى .....انا اشوفه

إنتى بتهرجى ..صح ؟؟!!!


فتاة 2: يعنى إنتى توافقى ؟ .. بس مش هيطلق
دى مراته لطيفة خالص
يعنى هوه بيتجوز دلع و شهوة كدا


يا دى النيلة ..الكلام دا يتقال عيانا بيانا كدا ..إحنا فى الميكروبااااااااص يا إخوانا

فتاة 1: هاتيه هاتيه مش مشكلة عندى خالص يكون متجوز

يللى تتوكسى يا دى البت
بتقولك مراته ست طيبة
و عنده عيال
و بيتجوز فراغة عين ؟!!!
تقوليلها أشوفه و عادى ؟؟؟
و ف الميكروباااااااااااااااص

فتاة 2 : ماشى اقول لأخويا و ابقى أكلمك

إنتى كمان يا موكوسة بتمشى وراها و عاوزة تسعى فى خراب البيوت ؟!!
البنات جرالها إيه الأيام دى ..مخها حادف شمال الخريطة ليييييه؟؟
تأخر سن الجواز و الظروف الإفتصادية و.. و ....معاكوا
بس كلها مش مبررات قوية

تدفع أى شخص لدخول تجربة من هذا النوع
و اللى غايظنى إنهم بنات صعننة يعنى لو عدوا هما التلاتة
ال25 ابقى انا مسمعتش كويس

واضح من ردودهم على الموبايلات إنهم لسه مخلصين كلية قريب
و مستلمين شغل جديد و رايحين السينما مع زمايلهم من ايام الجامعة
عاوزة الف دماغى و أقولهم اللى فيه القسمة و بعدين تراجعت
قولت يا واد طنث خاللللللللللص و سكتت
و أهم روخروين ريحونى و نزلوا
شوية و سواق الميكروباظ إتحك فى عربية ربع نقل فخمة قوىماشية جبنينا
و المراية إتهزت شوية و رجعت مكانها تانى

يعنى حصل خير .. لاااااا محصلش
راح راكن على جنب و نازل شاددها من مكانها و راكب تانى
انا قولت إيه الراجل الغريب دا .. ما المراية كانت كويسة و ف مكانها
المهم شوية و بقينا جنب سواق الربع نقل الفخمة دى و بدأت المناوشات
- إنت كسرت عليا و كسرتلى المراية
- انا مجتيش جنبك و المراية كانت ف مكانها
- انا راجل على باب الله و العربية عليها اقساط
- انا معملتكش حاجة يا عم إنتا
المهم وقفوا عند اول اشارة و راح نازل سواق الربع نقل من عربيته
و دخلوا فى حوار جانبى

و انا متابعة الموقف من بعيد وعاوزة انزل اقول لسواق الربع نقل
متدليوش ربع جنيه حتى لأنه نصاب

بس الراجل طلع ما شاء الله فاهم قوى ..مسك المراية
من أيد سواق الميكروباص

و على صوته عليه و إداله محاضرة فى إنه أى كلام و مبيعرفش يسوق
و إن ..
و إن ...و فى النهاية قاله إنتا عاوز تمن المراية؟؟ ... طييييييييييب
طلع من جيبة ورقة فلوس مكرمشة اظن كانت خمسين جنيه
و راح ماسك المراية راميها على الأرض و دايس عليها مدشدشها خمسميت حتة
و راح راميله الفلوس ع الأرض
وسابيه
و ماشى

سواق الميكروباس وشه جاب الوان و طبعا دمه إتحرق
كان فاكر هياخد تمن المراية و كمان يحتفظ بيها و يروح يركبها من تانى
و التانى منلوش مراده و هزأه قصاد الناس تهزيئة كويسة بأكتر من خمسن جنيه
السواق ركب العربية و هوه عمال يرغى و يزبد
و يحكى للى جنبه على الظلم بتاع العالم
اللى عندها عربيات حلوة
و هما الغلابة اللى عليهم أقساط
و انا متغاظة جدااااا .. يا إبن ستيت فى سبعين
دحنا شايفين القصة من اول فصولها

هتعملهم علينا وعاوزينا نصدقك ؟؟
و المؤلم حقيقى ... إنه ملتحى و مشغل قرآن و نص كلامه
الله يرضى عليك و صلى على النبى

لكن تصرفه و فعله ملوش علاقة خالص بربنا و الرسول
عاوزة اعلن قرفى منه و اقول اللى فيه القسمة و كلام من عينة
حرام عليك و السواق التانى مغلطش و إتقى الله
و لسه هفتح بوقى حسيت بالإكسجين اللى حواليا بيتشفط
و إنى هتخنق
لقتنى بقول كلمة واحدة
- عند محطة المترو يا أسطى
و روحت نازلة
بس


This entry was posted on الجمعة, سبتمبر 25, 2009 and is filed under . You can leave a response and follow any responses to this entry through the .

74 كــــلام بيطــبطـــب عـــلى قــــلبى و روحــــى

اول مره اعلق في مدونه التعليق الاول

عادي جدا جدا

بنات متربيه صحيح .. نفس الحوارات تقريبا اللي كنت سمعت زيها مره وانا راكب القطار

احجز تعليق بقي
واجي

فووووووووووووو

هو ده تأثير عدم التربية
البنات الصغيرة لما أهلهم ما بيربوهمش التلفزيون و الأفلام و أصدقاء أو صديقات السوء هما اللي بيربوهم و تكون النتيجة الحوار اللي سمعتيه ده
دا الحياء شعبة من الإيمان
بينما حوارهم لا يدل على حياء بالمرة

بالنسبة للسواق النصاب
فللأسف القاهرة فيها أكبر كمية من مدعي التدين بينما هما عكس ذلك تماماً
يعني عندنا في الأقاليم الملتحي ممكن يكون متدين حقيقي بنسبة 80 % أو أكثر و ممكن يكون هجاص و مدعي تدين بنسبة أقل من 20 %
إنما عندكم في القاهرة الأمور معكوسة بشكل يحير و يربك و يقرف

دا عقابه عند ربنا أكبر لإنه غير إنه بيكذب و ينصب فهو بسلوكياته السودا دي بينفر الناس من المتدينين الملتزمين و ده ذنب تاني

ربنا يهدي الجميع

لا لا لا لا لا
ده عادي قوي

بصي يا امي

البنات دلوقتي بنسبة كبيرة بقيت دماغهم بايظة و بقول نسبة اهون .... زيهم زي الولاد
يعني الولاد الطبيعي انك تكون حشاش و بتشتم علي الفاضية و الملاينة
البنات كده .... معظمهم مظهر و منظر و بس و دماغ مفيش و في الجواز ممكن تتجوز اول حمار يتقدم لها ده لو هي مرحتش تتحايل عليه يتجوزها
والكلام ده للاسف انا شفت بعيني عشان محدش يفترض اني بقول نظريات

بالنسبة للميكروباص ... انا شايف ان ده طبيعي
بس حكاية التدين الظاهري دي منتشرة قوي ....نسبة كبيرة من المسلمين و المسيحين عندهم تدين ظاهري جامد قوي
وهما هما المتدنين الظاهرين دول اللي في اي مصلحة حكومية بقولك عاوز الشاي بتاعي عشان اخلصلك ورقك ...يعني رشوة و هما هما اللي طول النهار يتخانقوا و يشتموا في كل حاجة و هما هما اللي بينزلوا شغلهم و مبيشتغلوش و هما هما اللي لو بعلك حاجة بينصب عليكي و ممكن يبعلك حاجة قديمة علي انها جديدة

للاسف احنا بقينا نتعامل مع الدين انه لحية و حجاب و سلسلة فيها صليب
...الدين مش كده

بس علي فكرة الشواق غلطان بس الغلط الاكبر علي اللي خلاه كده و دووول للاسف كتير و برضه من الجانبين

ههههه
الميكروباظ حته واحده
اللي شفتيه ده حلقه من مسلسل مستمر على طول
مسلسل دماغ بايظه وكلام بيوت بيتنطور في الشارع ومفي حرمه وسرقه ونصب

خلينا نعيش ونقول المترو هو الحل
امجاد يامصر امجاد

اصحاب العقول فى راحه والله يافاتيما
البنات اتهبلت
يالهوى !!!
ده انا واصحابى غفرررر
عساكر لابسه جيبات
والمصيبه ان لما حد يتكلم عن النوعيه دى بيعمم ويقول البنات كلهم بعملوا كده

انتى هتقوليلى على المكروبصات وقرفها

بجد والله بنات دماغها فى حزمة جرجير

ربنا يشفيهم فى عقلهم

الى بيدئنى فى الموضوع انو صوتهم بيكون عالى يعنى الكل بيكون سامعهم يعنى مش بيتكسفوا طب وطى صوتك انتى وهية العالم سامع هبلكم


معلش حبيبتى شكللك اتبهدلتى فى الزيارة بتاعة صحبتك دى


ويلا

حنقول ايه بس ..
حسبنا الله و نعم الوكيل.. !!

عااااااادي خالص
انتي زهقتي من الميكروباص من مره ركبتي فيها اومال انا اللي بركبه بتاع 5 مرات فياليوم
بسمع العجب والصيام في رجب
والهانم اللي توافق تتجوز راجل في الحاله اللي انتي قولتي عليها دي تبقي قليله الادب وبجحه وعامله زي بنات الليل بس بصوره حلال شويه
ماتستبعديش ع الاشكال دي الجواز العرفي
ربنا يهدينا ويهديهم

اه يابلدى
هو خلاص بقى كدا البنوتات بيتكلموا بدون حياء فى المكروبصات والملتحى عايز يسرق ويقل ادبة واللى بيأخد حقه ظالم
مشاء الله مشاء الله يعنى
الشارع المصرى بقى يفرح وقربت يجيلى الضغط من اللى بسمعة لانه مبقاش كلام جرايد دا بقى كلام الشعب نفسة وعن تجارب يعنى يا فرحتى بحبى لبلدى احتفظ بيه وابعد احسن واسمع كلام الناس العقلة اللى بتقولى كدا

الم غريب وحسرة بجد عن كل حاجة بسمعها واشوفها سواء كلامكم او اخبار او فديوهات بتتكلم عن مصر مع كم هائل من الدعوات لبلدى ربنا يصلح حالها بس مع يقين ان دا مش هيحصل من غير ما الشعب يصلح حاله بأيدة

تقبلى مرورى

تاج البنات أيام زمان كان الخجل
البنت كانت تتكسف تسمع غزل
تاج البنات يا خلق ماتت بهجته
دلوقتي خجله و كسفته من غير أمل
و عجبي
KING TOOOT
_____________________________

فاتيما حبيبة قلبي

انا جايه اقولك وحشتينى جدا

بالنسبة لحوارات البنات فللاسف كتير من البنات داماغهم اصبحت كدا ومش في احترام للزمان ولا المكان ولا الناس اللى موجودة حتى
السواق لا تعليق على تصرفه بس يستاهل بجد

والف سلامة عليكة من الخنقة والميكروباصات ياقمر

لا لا لا
خلي البنات تاكل عيش يا فاتيما
مش رايحين السينما
يمكن بيحكوا علي الفيلم الجديد
ربنا يهدي
و بخصوص الميكروباص مهو حلو اهه و عامل ذي السيما اهه
اتفرجتي علي كام فيلم ببلاش اهه

و علي فكرة ممكن المراية تكون اتكسرت فعلا او اتشرخت او اي حاجة
الله اعلم بالعباد بردو
سيبك سيبك مجرتيش انتي ليه و هبشتي الخمسين جنيه و جريتي

كنتي ظبطي حالك وجيتي زورتيني و اديتهوملي هدية

في مصر ياناس قليل الأصل يتعلم
نعمل قفاه كرّاس ، و بكفنّا نعلّم
سواق حمار قرطاس حايقلّب الأستاذ
أستاذنا قال له "فشر" يا خفيف داأنا معلم
و عجبي
KING TOOOT

السلام عليكم
في النمسا خدمات النقل اللي بتخضع للقطاع الخاص دي النظام يحتم عليها انها انها تلتزم بمواعيد كل فرد له مقعده من حقك انك تقاضي شخص لو مش موجود في مكانه في معاده
say
زي الميكروباص دا مواعيد العمل عندنا الساعة 8
لو رحتي الساعة 8 ومش لاقيتي صاحب البتاع دا موجود من حقك تقاضيه

يمكن بس فيه احترام للأنسان جدا

فرق بين التحضر والغوغائية


تامر وهبه

عارفه يا فاتيما

انا كنت كل ما اركب ميكروباص اتخانق مع السواق غالبا يعنى
ههههههههههههههه

حاليا انا بطلت اركب ميكروباصات الحمد لله

فى المنصوره عندنا الوضع مختلف

بس برضه تقدري تقولي انى علمت على بتوع التكسيات كلهم حاليا
هههههههههههههههه

برضه باتخانق معاهم فى الغالب

وحكاية المرايه دي عملتها فيا انا واحده بقى

بس وقعت قدام العربيه هى مسكينه واتخضت
بس كان معاها ابنها وجارتها الى عارفين اللعبه كويس واصروا يعملوا محضر رغم انى ما لمستش الست اصلا

والحمد لله قضيت شم النسيم يومها فى قسم البوليس
هههههههههههههههههههه

حمدا لله على سلامتك يا طمطم
وكويس انك نزلت من الميكروباص بدون خسائر تذكر
لان دة غاليا اللى بيحصل
ولعملك حلك الوحيد
انك تبطلى تزورى صاحبتك دى خالص

حبيبتى دنيا
الميكروباص دى
بقت صورة مصغرة
لبلدنا ولناس فيها
تستغربى! تستعجبى !
لكنهم فيها

ربنا يخلى المسلسلات
والافلام والحوارات
بتاعتهم(المميزة)

مامتى حبيبتى
روح قلبى
وحشتنى جدا والله



هو كدة حوار بنات
والله العظيم
انا بسمع اللى اكتر من كدة وبشووف اللى اكتر
من كدة
طب جربتى تسمعى حوار بنت مع ولد صاحبها فى التليفون وفى المكروباص وفى وسط الناس
اسألأينى انا
انا فى الجامعه وبشوف من كل صنف ولون

بصراحة يا تيما كأول مرة تركبى فيها الميكروباص فده متوقع ابقى اركبى تانى وانتى هتلاقى اللى أكتر من كده ربنا ما يوريكى وهنروح بعيد ليه ده الكلام ده فى حرم الجامعة نفسة عاااادى مووت يالا مش مهم
مش تقوليلى حمد الله على السلامة مش كنت غايبة ههههههههه بس وحشانى موووت

دمتى بكل الخير والسعادة

يعني أنا كنت لسه هاكتب حكم و مواعظ من خلال الموقفين دول و عمّال اسخن نفسي و انا باقرأ لحد ما هووووووب
عند محطة المترو يا اسطى
محطة مترو
يا لهوي
يعني صاحبتك بيتها جنب محطة المترو
طيب و اللي تبقى قدامه فرصة ركوب المترو بتقوله : هيت لك
يسيبها و يروح يركب مكروباظ
مكروباظ يا فاتيما
____________________________

على فكرة قمة متعتي في الحياة هي ركوب الميكروباصات
علشان المشاهد العجيبة اللي الواحد بيشوفها دي
أنا اكاد أجزم إني قضيت فترة لأ باس بها من حياتي في المكروباصات


سلام يا طمطم

كل عام وأنته يخير.
icdl - امتحانات حقيقية فى الرخصة الدولية لقيادة الحاسب
امتحانات الرخصة الدولية لقيادة الحاسب الآلي,#الخوجة, icdl, اختبار حقيقى فى اى سى دى ال, اختبارات ICDL, الاوتوتست الحقيقى بالكامل, امتحانات icdl,الخوجة,مدونة الخوجة,- امتحانات حقيقية فى الرخصة الدولية لقيادة الحاسب, EXCEL, icdl, icdl auto test, WINDOWS, الأكسل, الورد, الوندوز, برنامج word portable,icdl - امتحانات حقيقية فى الرخصة الدولية لقيادة الحاسب

الاوتوتست الحقيقى بالكامل فى اختبارات ICDL
alkoga,الخوجة,مدونة الخوجة,امتحانات icdl

نتيجة الثانوية العامة 2009
alkoga,الخوجة,مدونة الخوجة,نتيجة الثانوية العامة2009

حملة الدبلومات الفنية وتأثيرهم السلبى على تصحيح مادة الرسم والحاسب الالى بالشهادة الاعدادية

#الخوجة, alkoga, ministry of education, التربية والتعليم, التغذية الرجعية, الحاسب الالى, الخوجة, الدبلومات الفنية,الخوجة,مدونة الخوجة,نرفض أن يعلم اولادنا حملة الدبلومات الفنيه,التعليم فى مصر,وزارة التربية والتعليم,ministry of education

امتحانات icdl
الخوجة, ICDL, الخوجة .مدونة تهتم بشئؤن التعليم والمعلمين من جميع النواحى, # الخوجة ,الخوجة ., # الخوجة , الخوجة .#alkoga., كادر المعلم, التربية والتعليم, التعليم فى مصر, ICDL شرح دورة الرخصة الدولية لقيادة الكمبيوتر, وزارة التربية والتعليم, Ministry Of Education, education in egypt, icdl exams

اعراض انفلونزا الخنازير - H1N1 Cure - علاج انفلونزا الخنازير

اعراض انفلونزا الخنازير , H1N1 Cure , علاج انفلونزا الخنازير ,alkoga,education,الخوجة,مدونة الخوجة
التغذية المدرسية والتعليم الكداب
التغذية المدرسية والتعليم الكداب,الخوجة,تطوير التعليم,التربية والتعليم ,التعليم فى مصر,مدونة الخوجة,وزارة التربية والتعليم,صور

قل الدمار الشامل ولاتقل التقويم الشامل
قل الدمار الشامل ولاتقل التقويم الشامل,التقويم الشامل,الخوجة,مدونة الخوجة,التربية والتعليم,التعليم فى مصر,تطوير التعليم,التعليم الكداب,alkoga


جميع امتحانات الرخصة الدولية لقيادة الحاسب الآلي icdl كاملة | الخوجة
جميع امتحانات الرخصة الدولية لقيادة الحاسب الآلي icdl كاملة | الخوجة

الميكروباصات دي مشكله بجد من سواقين لركاب ناس عجيبه والله ياما عنيت منهم
وحشاني بجد جداً ياماما فاتيما :)

الميكروباصات ديه
مصر بس على صغير
انا ركيب ميكروباصات
و بالنسبة لى بتدينى مادة اكتبها
و بتدينى حياة اكثر من التاكسيات
اللى بركبها لما اكون مستعجل
غير كدة بقى ميكروباصات و بس

و بالنسبة لحوار البنات
متوقع
ده العادى من بعض البنات

اما بخصوص السواق فده
سواق نصاب حقيقى
و سواق الربع نقل جدع بجدع
عيب عليك على ذقنك اللى مربيها يا شيخ
!!!

فاتيما

ازيك وازى قلبك

انا رديت عليكى عندى يارب تكونى شفتى الرد

وحشانى اوى اوى

يارب اشوفك يارب

ادعيلى

شيماء سمير

ازيك يا فطوم ياااه افتقدتك اوي والله
وكده ارجع الاقي كلام البنات ده

اخص عليهم وحشين
ان كيدهن عظيم

تحياتي
:)

ظريفة جدا جدا حكاية سواق الميكروباص النصاب دي .. هههه .. تنفع حلقة في مسلسل كوميدي

أما بقى حكاية التلات بنات فدي بقى من الكوميديا السوداء بجد .. أنا الموضوع ده لاحظته لما كنت في مصر واتكلمت فيه مع اكتر من حد والكل قال ان ما خفي كان اعظم .. وان المشكلة اكبر من اللي انتي حكيتيه كمان

ربنا يسترها على شعبنا .. الشباب على وشك الانفجار خلاص .. والمسؤولين سايبينهم يولعوا

دول الطف الكائنات دول ...ده يا ربى كلام بنات عاقله ومحترمه
يا ساتر يا رب

والغبيه العميا الجشعه عايزه تسرق راجل من مراته واولاده هيا عارفه يعنى ايه خراب بيت
جاتهم جاتهم كارثه بنات مخها ضارب قالب

والسواق الحرامى ده كمان اهه ربنا خذله بس يا ريت يتعلم الامانه والاحترام ويبطل افترا على البشر


عارفه يا طمطم لو مكنتيش نزلتى من الميكروباص ده كنت هاجى انا انزلك منه


حمدالله على السلامه من براثنه يا ام يوسف الغالى

طبعا بنات هايفة
عقلها تافه
وايه متكلمى اخوكى وواحد متجوز
ومعنديش مشكلة؟
فعلا عالم تاهه
ربنا يهدينا
اما السواق انا مبسوط فيه بشكل
الراجل ده بيفهم انه كسرله المراية
بس الغلطة مش غلطتهم
الغلطة غلطتك
هههههههههه
طالما صحبتك المترو مش بيروح عندها متروحيلهاش
هههههههههه
ربنا يديم الود بينكو
ربنا يكرمك
سلاموز

ياعينى البنات شكلها هيست والأولاد كمان
يلا حصل خير إن شاء الله
المهم إنك وصلتى للمترو

ازييييييييك وحشتيييييييييييييييني اوووي
عامل ايه واخبارك ازيها؟؟
يارب بخييير
كل عام وانت بخير وصفاء ورضا

انت اللي جبتيه لنفسك
منتيش اد ركوب الحاجات دي تركبيها لييه

خلاص انا هجيبلك توك توك
وتريحي نفسك
------------
عارفه اللي يعيش ياما يشوف بجد
وفي اكتر من كده كمان

بنات مخها لاسع فعلا بس يا ترى ايه اللي خلاهم يفكروا بالطريقة دي ؟!

اما عن سواقين الميكروباظات فأغلبهم في الضياع واكتر ناس بيبوظوا المرور في الشارع

واضح جداا انك مش عايشة فى بلدنا ولا ايية دة كدة الموضوع عادى وطبيعى دة فى العن من كدة, ماتفركيش ولا تتعبى نفسك علشان كدة الواحد فى المواصلات العامة يحط السماعات فى ودنة ويسمع اى حاجة احسن,تحياتى

ازيك يافاتيما ياقمر :)

كل سنه وانتي طيبه وبخير :)

واضح انه اللي بيحصل ده في زمانا بأه عااااادي جدا البنات بجد بقيت غريبه !!

وزي مابيقولو واضح اني اللي اختشو ماتو
بالنوسبه بأه للسواق فادول طبيعي استغلالين جدا واي قرش بيجلهم زياده مش ليهم فيه هو حرام ولا حلال المهم انه جه :))

تحياتي:)

بصي يا ست الكل

انتي اثرتي موضوعين منفصلين ظاهريا مرتبطين جدا فعليا

السواق اللي واخد من الدين المظهر بس وسايب الجوهر

والبنت اللي ما عندهاش مانع تتجوز راجل متجوز


العبادات في الاسلام صلا وصوم وحج وصيام كلها في القران جزء واحد وباقي التلاتة وستين جزء معاملات ( تقسيم على اساس عدد الايات مش السور)

يعني العلاقة بين الانسان وربنا واحد

وتنظيم العلاقة بين الناس وبعضها تلاتة وستين

الغالبية العظمي
استهالا
او خيبة
او غباوة
او فهلوة

مسكت في الجزء الواحد
وسابت التلاتة وستين

اة احنا في امتحان
الدنيا امتحان
فيها سؤال اجباري علية نص الدرجة في الواحد دة

وباقي الاسئلة وعليها نص الدرجة الباقي في التلاتة وستين جزء

بس استني

ربنا قال وهو بيصحح الاجابات يوم القيامة

قال لنا على طريقة التصحيح

لو جايب النمرة النهائية في الاجباري
هيتشال منها اللي خسرتة في باقي الامتحان_طريقة الماينس_

فاهماني

لازم تحاول تجاوب على كلة وما تفقدش اي حاجة لان الفقدان بيأثر على الكل وغالبا هيسقط

اما عن البنت بتاعة الميكروباس

اية المشكلة

ما تتجوزة

مش يمكن مش لاقية غير كدة ونفسها تتجوز

ودة الاختيار الوحيد قدامها

راي صادم انا عارف

بس هيا موافة وهو هيتجوز هيتجوز

اية المشكلة

ما يتنيل

ربنا يهني سعيد بسعيدة

مالك يافاتيما كل شوية فى البوست تقولى دة احنا فى ميكروبااااااااااااااااااص؟؟!!
اية المشكلة يعنى ناقص عجلة ولا ناقص عجلة ماله زى الفل انا شخصيا لمة بسمع حكاوى زى دى والله مبحبش انزل محطتى واستنى لمة اكمل بقيت الحكايه!! لسة بقى هقعد افكر واستنتج عملوا اية؟؟
*** وع فكرة بقى انتى غلطانة ملكيش فى جو المكروباصات اركبى توك تك ع طول
!!!!!!
***وحشتينى مووووووت**

هههههههههههههههههه عاتى عاتى

ده العادى فى الميكروباصات

لا بس مش كل البنات كدة دول فئة معينة ربنا يهديهم

طبعا انا مش هكلم عن نفسى لانى مش تبع البنات ههههههههههههه

بالنسبة لخناقات السواقين ده الطبيعى والالفاظ السوقية والشتايم عادى جدا

ربنا يهدى

تحياتى

ايمى

فاطيماتااااا
وحشاني واللهي بجد
مفيش فايدة فيكي مابتفوتيش حاجه أبداً
حتى عالم الميكروباظات أقتحمتية بطريقتك الخاصة العميقة جداً
ده كان ميكروباظ أحسن من السوبر جيت والأفلام السمجة اللي بيشغلوها
تحياتي دايماً ليكي
وليوسف الجميل
تحياتي
حسن أرابيسك

في بنات تفكيرها كده ف متفرقش معاهم لا كمان في بنات ممكن تبين لشخص انها بتحبه علشان يصرف عليها!!!



بنسبة للسواقين بموضوع الضمير مش متوقف عليهم بس ده انعدم من عند ناس كتير يعني هتيجي علي السواقين:)




انا مبسوطة اوي اني اتعرفت عليكي بجد حبيبتك اوي وبجد انتي انسانة تتحبي بسرعة وتدخلي القلب وكلكم ناس بسيطة كده و مرحه

الحمد لله يا فافي
الحمد لله اني مش انا اللي في البؤروباظ
كان زماني في القسم
اه والله كان زماني بطحت نفسي عليهم
انا اتميز بإن لساني مش بيسكت
حتى لو عاوزة اسكته ابن اللزينة

اما عن النصاب فده منه كتير قوي قوي قوي
انا بقى المظهر يعمل معايا شغل عكسي
يعني اشك في ذو المظهر الوقور اكتر من الشاب الروش طحن

تحياتي يا حبي

شفتي ميمي و احمد
عملين زيطة
واعياد ميلاد

و ...

ابقي اتفرجي بقي :)
http://a7walnaaa.blogspot.com/2009/09/blog-post_24.html

وكانت دي يا ولاد حكايه فاطيما لما ركبت الميكروباظ
والدرس المستفاد من القصه دي ايه بقى
؟ ان فاطيما ماتركبش ميكروباظ تانى
ويكون احسن يعنى انها تنفض لصاحبتها دي نوهائي
ههههههههه
كل سنه وانت طيبه

مش بنات ناس بنات شوارع
السواق فى مصر بعد خمس سنين انا بسوق احب اقولك انها فى تدهور لسه امبارح واحنا فى النادي بقول لدوبا
كل ميكروباص وناتى طيبه علشان تعرفوا ان حلال فيهم اللى بيعمله ظباط الشرطه

وحشااااااااااااااااانى موووووووووووووت ياماما
بجد بجد لولا انى بحبك اوى كنت قولتلك انا زعلان منك
كده متجيش تزورينى الايام الى فاتت دى
بجد زعلان
بس من حبي ليكى سامحتك خلاص
وحشانى بجد

السلام عليكم ورحمة الله وبركاته
ازيك يافاتيما
يارب تكونى بخير
معلش مقصر انا بس ماعنديش نت اليومين دول
سماااااح
(ولو مانفعتش سماح خدى معاها شيماء وصفاء اخواتها يونسوها)
وبعدين يعنى الحوار اللى انتِ سمعتيه ده للاسف بقى عادى خالص اليومين دول ومش مرتبط بالميكروباظ
انا شخصيا كنت بسمع حاجات من النوعيه دى فى المترو
ده غير التحرش(التحرش البناتى)ربنا يكفينا شره
مش هقول غير حسبنا الله ونعم الوكيل وربنا يرحمنا برحمته
سـلام وماتبقيش تركبى ميكروباظات تانى

ههههههههههههههههه..طبيعي جدا أن نسب الطلاق ترتفع طالما فيه ناس بتفكر في الجواز كده
بالنسبة بقي لحادثة السواق مع الراجل بتاع العربية الربع نقل فدي نماذج للأسف بتزيد في الفترة الأخيرة بشكل رهييييييب
وكأنهم بيأخدوا من هذه المظاهر ستار بس ربنا أعلم باللي في القلوب
تحياتي

انتى اللى غلطانه

حد يركب ميكروباص
والله طيبه يا طمطم

دحنا رايحين جايين فى المشاريع اللى هو الميكروباس بتاعكم ولا اشتكينا
ههههههههههههههههههههههههههه

وحشتينى اوووووووووووووى

فاتيما ..
ايه يعني انتي ملقتيش غير الميكروباص حبيب قلب سامح وتتكلمي عليه بكل قسوه كده
بس تعرفي هوا صحيح وسيلة انتقالي المفضله بعيد عن الاتوبيسات وزحمتها والتكسيات اللي بركبها في الاعياد .. بس هوا فعلا قصة كفاح من اول ما بنركبه لغايه ما بنوصل لهدفنا المنشود
وعلي الرغم اني كل تعاملي مع المكروباص قائم علي التوصيله من البيت لغايه المترو وبتبدأ قصة كفاح اخري

بخصوص الحكيات التافه اللي بنسمعها واحنا جوه هذا الشئ فده اصبح معتاد وانا حساس ان بتاوع الدراما بتاعتنا بيجيبو قصصهم من حكاوي المواصلات .. ما اروع تفاصيلها التي ما ان تأخذك حتي ترميك في موويل و تفاصيل

وبالنسبة للبلطجه اللي بيستخدمها السائقين فده مش محتاج كلام ..دي من اهم سيماته يعني ولو مبقاش كده مش هيسلك وسط الناس " نظريه بردوو"

------------
ومن الاخر الميكروباص والذي يتبرأ منه البعض جزئ اساسي في حياة كل حد فينا
فهو همزة الوصل بين الهنا وهناك

أنا كنت راكبة في الميكروباظ ده علي فكرة

مش مصدقاني؟


أنا اللي قلت للسواق ... علي جنب يا أسطي

للاسف يا طمطم هو ده تفكير شريحه كبيره من بنات اليومين دول ودى يظهر طريقه تربيتهم نظام اخطف و اجرى و مش مهم اللى يحصل للناس التانيه
كل ميكروباص و انتى طيبه يا قمر
وحشتينى بجد

خالد فودة
اهلا يا خالد و شرف لمدونتى إنها تكون اول واحدة ف اول تعليق
القطر برضو فيه النظام دا ؟!!!



مهندس مصرى
تعرف يا محمد اقولك على حاجة غريبة يمكن تستغربلها شوية او متقتنعش بيها
شوف إنتا قولت حاجة فى كلامك إن التلفزيون و الأفلام و الصديقات بيغيروا التفكير و يخربوه عند البنات
انا كنت العكس و انا بكبر ...
الأفلام و الروايات و التلفزيون و كل حاجة حواليا كانت بتعملنى حاجة مختلفة و تبنى ف شخصيتى
صحيح انا مش واوا ..بس اعتقد إنى متوازنة نوعا ما و عندى نسبة تقبل لكل اختلاف بس ميبقاش انحراف
يعنى متقبلة فكرة الزوجى التانية دى ..بس بشروط ربنا مش فراغة العين حتى لو فيه مقدرة مادية
حكاية التدين الحقيقى ف الأرياف و المدن الصغيرة دى انا موافقاك عليها جدا لأن فى بلد صغيرة الناس عارفة بعض تقريباً و محدش هيعرف يضحك ع التانى مدة طويلة
يا رب تكون دايما بخير يا غالى



ADEL
لا مش عادى يا عادل
يا لهوى ..مش للدرجة دى يا بنى
بص انا مقتنعة إن فيه بنات دماغها مضروبة ف خلاط
بس انا مستغربة مدى ابجاحة اللى هما فيها دى ..عينى عينك كدا وسط الناس
و فى الميكروبااااااااااااص ؟
بالنوسبة للسواق بقى ..تقصد إيه باللى خلاه كدا يا عادل ؟؟
قصادك الفقر و لا الجهل و لا بتوع المرور و لا إيه ؟؟؟




احمد ابوالعلا
ما المترو يا احمد فيه حاجات برضو بس انا بصراحة بروح اقف ف حتة مع نفسى مبضطرش اسمع قصراً الكلام اللى يفور الدم دا
و المترو هو الحل فعلا




عاشقة الرومانسية
يا قطتى هوه انتوا بنات ..دنتوا ملايكات يا بنتى
إنتى صح إنتى و صحابتك
إحنا اتربينا على كدا كلنا و دا الحقيقى
عارفة من صغرى يا دودو و ماما تقول
ممنوع كلام فى المواصلات العامة و لو حصل و قولتيلها أى كلمة تروح مبرقالك جامد نظام إسكتى
تحررت شوية من الحكاية دى لما روحت الجامعة و اشتغلت بقيت ممكن اتكلم مع زميلاتى و زمايلى فى المواصلات بس فيه قواعد عامة متنكسرش
محدش ينده بنت بإسمها خااااالص
مفيش كلام عن خصوصيات
و لا تقولى رايحة فين و لا ساكنة فين
كدا ...مش الهبل اللى سمعته دا ؟؟
وحشااااانى جدا و هبعتلك ميل فيه شوية إستفسارات يا عروسة بحروى أنا ب
بوسة و حضوناااااات


WELLA
حلة قوى تعبير حزمة الجرجير دا
و زيارة صاحبتى كانت ممتعة جدا
انا زيك كدا قولت بس ..طب وطى صوتك منك ليها و المشكلة إنهم مش حاسين إنهم بيقولوا حاجة عيب ؟!!!!
نورتينى يا ويلا

قهوة بالفانيليا - شيماء على
بصراحة انا دمى محروق لمرات الراجل ابو عين فارغة دا يا شيماء
و عياله كمان ..
عندهم اب هايف و هما اخر حاجة يفكر فيها للأسف
بقالك كتير و حمدلله على سلامتك يا حبيبتى





عاشقة و غلبانه
يا عييييينى
خمس مرات يومياص ؟!!
اتاريكى غلبانه يا بنتى مش عاشقه بس
ربنا يعينك
و قادة تستوعبى العته اليومى دا أزاى ؟؟
و جوزا عرفى إيه يا ماما ..دى قادرة و مفترية دى فاكرة إنها لما تبقى الزوجة التانية يعنى هتكون عاوزة تتدلع و تاخد حقها تالت و متلت على حساب الاولى ...



إحساس طفلة محبة للرومانسية بس واقعية
ربنا يصلح حال الناس فعلا
المشكلة مش فى تفكير البعض الأعوج
عادى تلاقى ناس حادفة شمال كدا
المشكلة الحقيقية فى مجاهرتهم بالتفكير دا عينى عينك و لا كانهم بيعولوا حاجة
يعنى البنت دى بتقول انا عاوزة اخرب بيت واحدة تانية عادى
و السواق بينصب على واحد تانى و هوه عارف إننا شيفاينه برضو عادى
حاجة غريبة فعلا ..مش تفكيرهم
لأ البجاحة بتاعتهم




KING TOOOT
يا رباعيتك يا وليد
صفحة التعليقات و المدونة كلها وحشتها اشعارك الحلوة
خالص حبى لعمر ولى العهد
و لمامته ست الستات بوبو



REEM
و انتى كمان يا حبيبتى
طب مجتيش اللقاء الحريمى بتاع خيخة ليه ؟؟
كنتى هتنبسطى قوى على فكرة
المرة الجاية ؟؟
طييييييييييب
لا خنقة و لا حاجة بس انا كنت عاوزة ادور وشى و ادخل معاهم فى الحوار و اديها كلمتين ف جنابها بصراحة





MAHA ZIAN
مها يا زينة البنات
أيوه يا ستى كانوا رايحين السينما يشوفوا فيلم إيناس الدغيدى كمان و دا موضوع لوحده كان عاوزله بوست
المراية كانت سليمة لحد ما السواق التانى دشدشها يا مها ..دنا متابعة الموقف من اوله ..
و لو كنت خدت الخمسيناية دى
مكنتش هديهالك
عشان مش حلال
و صاحبها مش مسامح فيها
وحشتنى تعليقاتك قوى

تامر وهبة
عندكو دى فين يا تامر ؟؟
اوروبا و الدول المتقدمة يعنى و لا فين
اكيد مش ف مصر الكلام اللى حضرتك بتقوله دا
يا سيدى لو على المواعيد إحنا راضيين يتاخروا
بس النصب و التفكير الغريب الملتوى ؟؟
و لا فى أى حتة فى الدنيا
نورتنى





صبرنى يا رب
أيووووه و النبى إنتى و ستوتة جيتوا فى بالى و انا قاعدة فى الميكروباظ اللعين دهوه
قولت البنات دى عاوز تتجاب من شعرها بس من تحت الإيشارب و يترنوا علقة محترمة
و بعدين ييجى حد يعقلهم
مين الحد الجميل دا ؟
صبصب حبيبتى
و ستوتة التوتة
قطعوا كلهه سواقين و ركاب





سبهللة
الله ؟
و طب البنية و عيالها ذنبهم إيه بس ؟؟
دنا بروحلهم كل فين و فين
بس المشكلة إن شارعهم دا طويل
و ميتركبش فيه غير المدعوق دا
مجتيش ليه يا هانم اللقاء الخيخى ؟!!!




NORAHATY
صح يا نورهانتى
بس الدنيا بقت بتجاهر بالخطأ بالبجاحة دى ؟؟





البت المشمشية *حلوة بس شقية*
و انتى كمان يا قطقوطة وحشتينى
أه حورات الموبايلات دى برضو عجب
انتى ممكن تكتبى مسلسلات من الحاصل عندك يويماً
لأ .زمتكتبيش
مش عاوزة اعرف احسن دمى يتحرق




( JOUDY)
و الله يا جودى بركبه
بس مش كتير و بصفة يومية
بحب المترو
سريع و تقفى ف حالك و لو اتزنقتى بتبقى ف عربية الستات و بكرامتك
يا غما تاكسى لو المشوار معقول
الف حمدلله على سلامتك يا حبيبتى




NIGRO
لأ يا أبو قلب دهب
صاحبتى مجنبهاش مترو خالص
و اقرب محطة مترو ليها بعد ييجى عشرين عشرين محطة
هيا متعة انا معاك ..بس متعة سمع الحكايات و الفرجة على الناس
لكن المشكلة لما الواحد بيفكر فيما بعد الكلام ..بيكئتب بصراحة من تفكير العالم ..
وحشتنا



الخوجة
شكرا لزيارتك و إن شاء الله اللينكات تفيد الجميع

REHAB MOSTAFA
و إنتى كمان يا رحوبة
مفيش مرة ترضى علينا و نشوفك ؟




بدراوى
يعنى توصيفك نوعا ما فى محله يا بدراوى
الميكروباص مصر على صغير
بس عشان يكون بمصداقية اكتر
كان لازم يكون فيه بنات تانية محترمة زى اللى بشوفهم هنا فى المدونات
دماغهم موزونة صح و عمرهم ما يقبلوا حاجة زى دى و لا يفكروا فيها
و لازم كمان يكون فيه ناس متقبلش الحرام و لو هياخدوا الف جنيه عوض عن المرؤاية مش خمسين
و لازم و لازم
يعنى



شيماء سمير
هروح أشوفه يا حبيبتى حاضر
و إنت كمان وحشانى قوووووى
بوسة و حضونة يا مشموشتى



AHMED MUBARAK
يا حنون
يا بتاع الجبنة
وحشتنى يا احمد قوى
حمدلله على سلامتك يا عزيزى
أهو البنات دول ينفع ينطبق عليهم وصف
جلالات الحيا .. بجد
مش كدا ؟؟




يا مراكبى
بذمتك مش بجد ..انا وشى نور و إبتسمت أبتسامة رضا واسعة لما السواق التانى كسر المراية
و البنات ..تفتكر الظروف مبرر قوى للوصول للتفكير دا يا نبع الحكمة ؟؟
اصلهم لسه صغيرين و حلوين و واضح إن تعليمهم كويس و بيشتغلوا و معاهم فلوس مش لسه بياخدوا مصروف
عندهم مميزات ابسطها السن اللى يخلى حواليهم فرص كويسة و يمكن حلوة للجواز
مش قادرة اتخيل إن يبقى التفكير الملتوى دا بسبب الظروف
متهيألى عقدة ممكن
لكن تفكير بسبب ظروف تاخر الزواج و ما شابه ..معرفشى ؟؟
اللع أعلم
بس برضو ميبقاش فى خراب البيوت
خالص ودى يا نبع الحكمة





MAHSEN SABER
آه يا النص التانى لقلبى كنتى تعالى الحقينى مل العالم الغجر دى
الناس جرالها هسس ف دماغها
بوسيلى بيرو قوى




مسدس صغير
إهييه !!!
طلعت الغلطة غلطتى فى الآخر
طيييييييييب
ماشى يا سى صاصا
بس اعمل حسابك بقى
اول ما تيجى اللقاء التدوينى الجاى
إن شاء الله
هنحشرك فى اول ميكروباص يقابلنا
و ملناش دعوة باللى هيجرالك بقى



MOHAMED GHALIA
حصل خير عندى يا محمد
بس بفكر لو البنت دى نفذت الكلام و شافته و شافها و عجبوا بعض و الجوازة دى تمت
تفتكر هيحصل خير ؟؟!!
اشك

زمردة
عاش من قرى تعليقاتك
حمدلله ع السلامة يا هانم
كل سنة و إنتى اللى بألف خير
طب دا مؤشر كويس إننا منكن نشوفك يوم 10/10 ؟؟؟





LADY E
البنت دى زى السواق يا ليدى
الاتنين تصرفهم ناتج عن الطمع
الطمع فيما يملكه الأخرين
حتى لو مش من حقهم أساساً
لكن عاوزينه و بس




KARIM
لا يا فندم عايشة فى بلدنا
و عايشة جدا فوق ما تتصور و شايفة كل البلاوى
بس الجهر بيها دا شىء جديد عليا بصراحة
تحياتى انا كمان



ENO
أزيك إنتى يا إينو يا أرق احساس
أيوووووه
المثل دا اللى كنت بدور عليها
كان المفروض يكون عنوان البوست



مصرى جدا
بص انا تهت فى حكاية تقسيم الدرجات دى عشان اختك كانت أدبى و مليش فى الحسابات
بس عاوزة اقولك إن الدين حقيقى سلوك و تعامل و للأسف بقى حاليا مظاهر و شكليات اكتر من أى حاجة تانية
بالنوسبة لموضوع البنت بقى انا مش مصدومة فى رأيك لأن طبيعة شكلك تخليك تشوف حاجات انيل من كدا ميت مرة
بس لو كان سعيد هيتهنى بسعيدة و بس
مكنتش فتحت بوقى ..إنما المشكلة إن ناس تانية هتبقى تعب\يسة يا هانى
و طبعا مش بتكلم على مراته لأنى لو مكانها إيكش يولع تاخده تشبع بيه
انا بتكلم عن ولاده اللى هيكبروا مع مرات اب مقسمة ابوهم نصين او كومين الكوم الكبير غالبا هيكون عندها و هتكوش على الفلوس و تاخده منهم و تخلف و الاخوات يبقوا اعداء و فيلم سينما كدا متكرر و حاصل ف الحياة و إنت اكيد بتشوفه يا هانى فى شكل قضايا و خناقات و جرايم كمان
صح انا فى تفكيرى و لا شطحت بعيد ؟!!



كيكى عووووو
انا كان قصدى غننا ف مواصلة عامة يا كيكى فيها ناس كتير قاعدة ودانها سمعاكى غصب عنهم
وطى صوتك طيب و لا قولى بالمستخبى و لا اسكتى خالص لحد ما تنزلوا !!!!
فين التكاتك دى هوه احنا لاقينها
بس مش فى خط سير صاحبتى للأسف
وحشتينى إنتى كمان يا كيكى كيكى
انت صديقى
يوسف غالبا كان هيقولك كدا
اول ما يسمع اسمك
عشان كنا بنقولها على مجلة ميكى
ميكى ميكى انتى صديقى
يبقى كيكى كيكى انت صديقى
عوووووووو

EMMY BABY
عاتى ؟!!!
لا يا إيمى مش عاتى
عاتى الناس تتكلم فى ادق الخصوصيات على الملاْ بهذوها الشكل ؟!!!!
و طبعا يا حبيبتى مش كل البنات كدا
و البنات اللى بجد حطى نفسك اولهن لأنك زى الفل و دماغك و تصرفاتك محترمة يبقى مش تبعهم ازاى بقى !!!!

حسن ارابيسك
يا شاطر حسن
احيراااااااا ظهرت و نورت صفحة التعليقات ..
زعلانة منك و من غيابك
لعل المانع خير طيب
خلاص مش زعلانة كفاية إنك جيت و طمنتنى عليك و كان واحشنى كلامك يا فنان يا كبير
الف حمدلله ع السلامة يا شاطر حسن
متغبش تاااااااااانى

اميرة على كوكب مهجور
ما هوه طمع يا اميرة فعلاً
هيا عاوزة تكون الزوجة التانية اللى هتتدلع و تتهنى و جوزها يجيلها ساعتين تلاتة فى اليوم فسح و إنبساط و ام العيال هيا اللى تخدم و تربى و بس
إنتى كمان يا اميرة اسم على مسمى و تتحبى قوى و لمعلوماتك إنتى شوفتى فى اللقاء الحريمى دا ناس جامدة جدا
نتمنى نشوفك كل ما تقدر ظروفك يا حبيبتى و مدونتك مميزة فعلا
بوسة و حضونة على رأى يوسف

ستيتة حسب الله الحمش
و الله كنت عاوزة اتقمص شخصيتك يا ستوتى ..و كنت متابعة موقف السواق دا و بفكر لو كان دفعاله فلوس كنت هنزل من الميكروباس دا و اقول للتانى دا كان بيضحك عليك
بس بصراحة الؤاجل وفر عليا الموقف البطولى و كسرله المراية و حرقله دمه
لأنى اخويا بيقولى كدا هيدفع على الخمسين دى خمسن كمان على الأقل عشان يجيب واحدة جديدة غنما هوه كان عمال حسابه ياخد القديمى يركبها بعشرة جنيه و لا حاجة و يضرب الباقى ف جيبه
انا بقيت بفكر زيك يا ستوتى
و دى علامة نضج كبير
و مبسوطة من نفسى
البنات كنت عاوزة اجيبهم من شعرهم بس نزلوا و ريحونى من هذوها العبء
وحشتينى ى ى ى ى ى ى


مصطفى ريان
هيا كل الدروس المستفادة فوق دماغى انا و لا إيه ؟؟
و العالم دى نسيبها كدا تعيث ف الأرض فساداً يا مصطفى ؟!!!
طيب
كل ميكروباس و إنت طيب يا أستاذ


APPY
قطعوا الإتنين يا بيبى
و الله ساعات بحس ان فعلا زى ما بيقولوا ذنب ناس بتخلصه ناس


لا تشتاق
لأ متزعلش
حاضر جاية
بس بلاش جملة وحشانى بجد دى و النبى
لحسن انا عندى جوز رجالة زى الفل يوسف و عادل
منكن يمسكوا فى خناقك بسببها
انت عارف ولاد و بيغيروا على مامتهم حد يقولها كلمة عاتفية زى دى و يسكتوا !!!؟!!


المعتصم
و عليكم السلام يا مصطفى
يا عم أنت عذرك معاك و يا رب بس يكون الوالد فى أتم صحة
إيه حكاية التحرش البناتى دى كمان اول مرة أسمعها ؟؟!!
ركوب الميكروباظ شر لابد منه
أقاطع البت يعنى ؟!!
و لا أسرق بنك و اركبلها تاكسيات ؟!!!!

MICHEAL
شوف يا مايكليتوا انا بيعجبنى قوى نظرتك الفاحصة دى
شوف إنت ربطت ما بين جوازة بالشكل دا و ما بين الطلاق
طلاق الزوجة الاولى او طلاق البنت دى نفسها بعد مدة ..
يعنى خراب فى خراب و لا يتعظ احد
انا اللى مزعلنى انها بتتكلم بثقة
يعنى متاكدة إن أهلها مش هيعترضوا على جوازة زى دى ؟؟!!!!!
غريبة قوى

حنين القلب
يا حنونتى وحشنى المشاريع و المينى باص الأزرق و الطفطف و بيقولوا عندكو اتوبيس بدورين لونه احمر بس مركبتوش
هوه فيه زى سواقين إسكندرية الماريا
كل حاجة عندكم اروق و اصفى
حتى سواقين العربيات
و المواصلات عموما نفسهم هادى و نادرا لما يتخانقوا
إنتما كمان وحشتمااااانى
و بعد الأيام على يوم 10


خواطر خاطر- SAMEH EZAAT
يا خاطر مقدرش اعيب ف الميكروباص
دا كان مواصلتى الأولى و الاخيرة ايام الجامعة و على عينى و راسى
بس حكاياته مؤلمة قوى
و صادمة
و الأصعب إنك مش فى موقع يسمحلك تغيرها او حتى تقول رأيك و تعلنه للعالم اللبط دى
و اكتر حاجة ممكن تعملها إنك تنزل المحطة الجاية عشان كفاية اللى سمعته
حكاية البلطجة كوسيلة عشان يسلك بيها وسط الناس فأظن هختلف معاك يا خاطر
هيا وسيلة سهلة و مفيهاش أى مجهود لتهذيب روحه و كمان حرام
حرام يحرف الحقيقة
حرام ياخد فلوس مش من حقه
حرام يكلم الناس بقلة ذوق
حرام يشتم و يسب الدين و يلعن
حرام يحط عينه فى عينا و يقول مظلوم
الواحد يعمل الصح و الأصول فى حياته
و ينتظر الآخرين يبادلونه المعاملة
بس لو محصلشى دا ..يعمل زيهم
يعنى انا مسرقش لأن السرقة حرام و انا محبش اخد حاجة مش بتاعتى
لكن افرض جه حد و سرقنى
أعمل زيه ؟!!!!
نفس القصة على البنت يا خاطر
هيا عاوز تاخد حق مش حقها
البنت دى ممكن تكون واحدة جت سرقت ابوها من امها و بقت الآمرة الناهية
و هيا عاوزة تكون زيها مش عاوزة تبقى غلبانة زى امها
تفتكر دا صح ؟؟
و دا تفكير طبيعى ؟؟
هوه مبرر و مفهوم ..لكن مقبول ؟!!!


mimi
يا سلاااااام
بطلى شقاوة يا بسكوتايا


صيدلانية طالعة نازلة
للأسف يا علا
اصلى اول مرة اشوفهم وجها لوجه كدا فأتخضيت و جالى هلع عاتيشفى بعيد عنك
انتى كمان يا حبيبتى وحشتينى ى ى ى
بوسيلى العياااااااال
سيف و الغزالون يهبولن
و ابوهم و لاّ ملوش نفس ؟!

السلام عليكم
ازيك ياام يوسف
تحياتى
الحمد لله الوالد بيتحسن وربنا الشافى وعنده العفو(وربنا يهديه عليا بقى ويرضى ياكل احسن ده مطلع عنيا معاه ومش راضى ياكل او ياخد العلاج ومش عارف اعمل معاه ايه)
معلش بفك عن نفسى معاكى شويه ماانتى اختى برضو
....
التحرش البناتى اللى بيبقى فى المترو
مش معقوله ماشوفتيهوش ولا مرة
انا كنت ببقى قاعد فى امان الله والاقى بنت(والمصيبه انها حلوة يعنى لو انا ماعنديش نظر ومش هعاكسها فيه نص مليون شاب غيرى على المحطه او فى العربيه بتاعة المترو عندهم نظر وهيقوموا بالواجب) ابص الاقيها بتبسبس
اقول اكيد مش ليا الاقيها ليا ابص عليها الاقيها تقولى عاكسنى
- نعم!!!!!!!!!!!!!!!!!!!!
- عاكسنى ايه ؟؟ انا مش حلوة ولا ايه؟؟
- بلاش قلة حيا واحترمى نفسك(طبعا انا بقول البقين دول وانا وشى احمر من الكسوف
وبعيد عنك هى واصحابها ياخدو بالهم من الموضوع بتاع الكسوف ده وابقى انا ملطشه وتريقة عربية المترو كلها
اروح شاتم وواخد بعضى فى اول محطة ونازل بدل مااعمل معاهم مصيبه
كنت فاكر ان الموضوع حصل معايا مرة ومش هيحصل تانى الا انه اتكرر اكتر من 5 مرات ولما بحكى لاصحابى فى الكليه سمعت حاجات تانيه زى كده كتير وفيه انيل من كده كمان
وحسبنا الله ونعم الوكيل
ســـــــــــــــلام

!!!

هو فيه كدة؟؟
أهي دي أحسن نكتة سمعتها منك يافاتيما!! إيه دة بجد؟؟

اممم...نسيت أقول لك شكرا أي :). انت بجد جميلة ورسمتي على وشي ضحكة كبيــرة وانا بشوف تعليقاتك كل مرة

مصرى جدا
هانى
انا اسفة جدا ..غلطة بلوجرية مطبعية
قصدى طبيعة شغلك
عملك ف المحاماة يعنى
معلش الحرف غير الكلمة و ادى معنى مش صح خالص
أنا بعتذرلك تانى
اسفة

هموم بلد

البوست ده بيتكلم عن هموم بلد بنشوفها كويس جدا في الاماكن دي
مصالح حكومية
ميروباصات
طوابير اي حاجة
قاعة انتظار في اي مكان

أهالي كتر استهترت بتربية أبناءها يا فاتيما

مش بتكلم أبدا عن الجانب المتعلق بالشرف
لان ممكن جددا تكون ولا واحدة منهم بتعمل اي حاجة تمس شرفها ولا تقبل انها تدخل في علاقات مثلا من ورى أهلها

وده اللي يرعب
ان الناس بتكتفي جدا ان التربية تمنع ابناءها من الاخطاء الكبيرة و بس
لكن بنتستهتر جدا بالخلق العام
في الكلام و الاكل و المشي و التعامل مع الآخرين و حتى التفكير اللي بين الانسان و بين نفسه

بشوف امهات كتير بتعتبر ابناءها وصلوا لسن انتهت فيه التربية تماما من سن 17 او 18 سنة

ده بالعكس
بشوف امهات بتستمد معلوماتها عن الحياه و الدنيا و كيفية التعامل مع الآخرين من بناتها اللي في السن ده
رغم ان الام أم حتى لو وصل ابناءها لأي سن

والوضع اللي ماينفعش يتقلب ان الآباء هم مصدر التربية و القيم طول العمر لحد بقى أرذل العمر لما تصاب عقولهم بالوهن و هنا تتقلب الآية زي ماورد في القرآن

اوضاع كتير في بلدنا مقلوبة
ومش قادرة أشوف غير سبب واحد بس واااضح جدا قدام عيني لكل ده
الاستهتاااار بالحياه

ربنا يهدي الجميع


رغيت كتير رغم اني بعيده بقالي زمان

بس أول ما حطيت صورتك قدام عيني واسترجعت روحك لقيتني بتكلم من غير توقف

واحشاني جدددا و عرفت أأجل السفر يعني الحمد لله حاشوفك.. فرحانة قوي بجد

فاتيما أنا ماعرفتش ادخل عند مدونة يوسف مش عارفة ليه هي ايه الحكاية

وحشني يوسف

كل سنه وانت طيبه
انا متابعاك من زمان
ويمكن رديت مرة عندك
بس حقيقى متباعك واسأل الله العظيم ان يرد اليك ابنك ردا" جميلا" ويقر عينك بقربه


بخصوص الميكروباص
سلوكيات الناس اختلفت
بس البنات ااقصد نسبه منهم فقدوا الحياء تمام
بل ستجدى شباب الحياء عنده اعلى من البنات

ربنا يستر على الايام الجايه مش عارفه رايحين فين
وزى ما قالوا زمان الزوجة التانيه ست
بس ست قبلت تخرب بيت واحده ست زيها
يعنى لو الراجل ملقاش وحده تتجوزه
هيتجوز ازاى
العين منا فينا
ولا اتكلم عن التعدد لانه شرع الله بمواصفات او بضوابط
ليس الامر على عواهنه

والحقيقه انت شاهدت وسمعتى كثير
وخاصة النصاب الذى جزاه الله من عمله
ولا اظن الامر له علاقه بالذقن ولا بالكلام
سلوك وتربيه
وليس كل ملتزم مهذب ولا كل مهذب ملتزم

كل سنه وانت وحبيب قلبك بالف خير

المعتصم
سلامة بابا و معلش هوه اصل الواحد بعد فترة بيزهق من الدوا و الاكل و كل حاجة محسساه إنه عيان
ربنا يزيح عنه إن شاء الله
انا مصدومة يا مصطفى فى اللى حكيته
معقوله فيه بنات (مجازاً ) بتعمل تصرف منحرف بهذا الشكل ؟!!
طبعا عارفة إن فيه واحدة مش سوية ..عادى
بس فى مكان عام و عينى عينك ؟!!
أين ذهب الحياء ؟!!
غريبة قوى !!!!!




wish i wrer abutterfly...
دى نكتة من فصول الكوميديا السوداء زى ما قال المراكبى يا هبهوبى
للأسف ...طب اقرى تعليق المعتصم اللى قبلك علطول و شوفى ....
بتشكرينى على إيه يا من غير ما توشى
بترفلاية رقيقة صغننة ؟!!!!

hannoda
لأ ..متقوليش ؟!!
يعنى هنشوفك يوم 10/10
يا خرااااااابى ..انا فرحانة قوى للخبر دا ..بجد فرحانة فوق فرحتى غنى هشوف دودو و حنين و هى حامل و داليا و كلكم يا بنات و مدونات و مدونى إسكندرية الماريا
دا احلى خبر ع الصبح ..
الحمدلله
كلامك كله صح يا هنودتى
و ان معاكى فى إن التصرفات دى مردها التربية و الاهل و توجيههم
امى من صغرى معودانى على السكوت فى المواصلات العامة إلا للضرورة و الحفاظ على الخصوصيات حتى لو اتكلمت مقولش اسم حد و لا عنوان و لا تليفون و لا حاجة محرجة ليا و لا للى بيسمع خصوصا الاطفال و الرجالة اللى ممكن يفهموا الكلام غلط ...
لما الواحد كبر بقى عنده قواعد و اصول ماشى عليها عشان كدا جالى ذهوووووا
مدونة يسوفة كانت مغلقة للتحسينات و تغيير القالب و خلاص يا حبيبتى فتحتها تانى ..بوسة و حضونة كبيرة لحد ما أشوفك يا أحلى قمراية إسكندرانية


الفقيرة الى الله ام البنات
و إنتى طيبة يا عزيزتى
و شرف ليا إنك بتتابعينى و من زمان كمان و شكراً ليك بجد على مشاعرك الطيبة
و رأيك على فكرة هو لب الموضوع
انا مش مستغربة على تفكير البنت الملتوى و لا تصرف السواق النصاب
عادى
يا ما ستات بتخرب بيوت
و رجالة بتسرق اللى مش ليها
بس اللى مش عادى و ادهشنى
المجاهرة بالتصرفات دون الإلتفات
الى إن كل اللى قاعد شايفهم و سامعهم
و فاهم
مبقاش فيه حياء خالص للأسف
خالص حبى ليكى يا ام البنات
و نورتينى جداااااا

انا بعد ما نزلت من المبكروباص يووه قصدي بعد ما خلصت قراية البوست وخلصت من البنات و خناقة السواق اقدر اقولك
كل سنة وانت طيبة ويوسف بالف صحة وخير
وان شاء الله السنه الجاية ربنا يحققلك كل اللي ياااااارب
على فكره المفروض مكنتيش نزلتى كنتى ضربتى البنات والسواق وسوقتى انتى العربية
كونى بخير
سيد سعد

هههههههههههههه

ده الكام ده كتير أوي
:)
بس والله في المترو في كده برده على فكرة و في ناس تبقى قعدة قصادهم و يتحشروا في كلامك مع صاحبتك او يركزوا في مكالمتك في الموبايل

يلا كلها محصلة بعضها

-------------

عزيزتي محتاجة رأيك ضروري في البوست الجديد

تحياتي

فاتيما و حشانى و عاملة ايه ، موضوع الميكروباص دة عادى جدا يا بنتى ، ممكن تعرفى الأسرار كلها و أنت قاعدة فيه ، كلام فى أخص الخصوصيات و بصوت عالى ومش مهم مين بيسمع ، أحلى حاجة أنك مش بتحاولى تتصنتى علشان تسمعى ، لأ الكلام بيجى لك لحد عندك ، ولو حاولتى تسدى ودانك ولا تسرحى فى حاجة تخصك علشان ما تسمعى شيئ تلاقيهم هم الى بيشوشروا عليك بصوتهم العالى يعنى لازم و أجبارى تسمعى القصة ، و طبعا بتلاقى أفكار و أراء غريبة ، فين التربية ، فين الحياء مش عارفة بصراحة راحوا فين ، على فكرة دة مش فى الميكروباص و بس لأ حتى فى الشارع ، حاولى تتفرجى على بنتين ثلاثة ماشين مع بعض فى الشارع وشوفى ايه الى بيحصل ضحك بصوت عالى و كأننا فى كازينوا بديعة مصابنى ، زق و خبط لبعض و شتيمة كمان آه و الله العظيم شتيمة زى الأولاد عديمى التربية و الأدب ، كنا ننكرها على الأولاد فما بالك بالبنات لما يقولها لبعض ، أنا مش بقول غير أنها قله تربية من أم و أب ما تربوا اصلا لأنهم لو تربوا لربوا بناتهم صح .
أما بالنسبة لسواق الميكروباس فدول فئة بجد بدعى ربنا أما يهديهم أو يخلصنا منهم لأنهم سبب كل شرور و بلاوى الشارع المصرى .

ومال اللي في الهم ده كل يوم يعمل ايه

الواحد بيشوف كل يوم حاجات تجيب الشلل بجد

كل سنة وانتي طيبة يا خالتي

كل الود

انا نزلت من الميكروباص من زماان
علشان المرارة
كل عام أنت بخير

ازيك يا فاتيما .. بجد وحشانى جداااا
يارب تكونى بخير حال و يوسف حبيب قلبنا كمان يكون فى احسن الاحوال يارب ..
كل سنه و انتى بالف خير و سامحينى لأن النت فى العيد كان قاطع ..
بالنسبه للمكروباص فربنا يرحمنا و ما يحوجنا ابدا يارب لركوبه :)
بجد كلام البنات ده بيأكد اد ايه ثقافه المجتمع و افكاره انحدرت جداا و وصلت لأدنى مستوى ممكن نتخيله ..
ربنا يلطف بينا و يهدينا جميعا و اوعى بجد تركبى ميكروباص تانى ..
خالص مودتى لكى

لا حول ولا قوه الا بالله

فكرتينى باخر ايام الجامعه والمواصلات والارف

واللى كنا بنسمعه فيها من حوارات غريبه

بس بجد البنات دى فعلا قلعت برقع الحيا

ايه ده الكلام ده هما نسيوا انهم مش لوحديهم وايه خراب البيوت ده لا حول ولا قوه الا بالله العلى العظيم

ولا السواق

مش عارفه اقول ايه

ربنا يرحمنا

فاتيما
ازيك وازي يوسف

تصدقي لسه فاتح مع صديق سعودي هنا موضوع الزواج من واحده تانيه بيقلي ان هنا في السعوديه عادي جدا
قلتله لأ عندنا في مصر الموضوع ده مستهجن جدا والراجل اللي بيتجوز واحده تانيه الناس بتبصله بصه مش تمام

تخيلي بقي لما تيجي من واحده بنت عاوزه تتجوز راجل متجوز مصيبه


اكيد يبقي المعايير , كل المعايير اللي كانت بتحكمنا اختلت بشكل لازم يدعو للقلق

طبعا موقف السواق نفس الوضع

ربنا يستر
هي الناس ليه كل يوم بتبقي اسوأ من اليوم اللي قبله

تحياتي ليكي يا فاتيما

إرسال تعليق