.

.

مغامرات البطل يوسف  

Posted by: فاتيما in


هنعمل مسرحية .... بالعرايس
إيه رأيك؟
فاكر لما كنا نحط مخدة
و نحرك الدباديب و العرايس من وراها
لااااااااااا...دا كان زماااااااااان
دلوقتى بقى عندك مسرح مجهز و مخصوص و عليه إسمك
مسرح يوسف للعرايس
انا عملته عشان تبقى تحكيلى فيه الحواديت
و انا كمان احكيلك
و نلعب سوا زى زمان
عارفة إنك هتبهرنى بقصصك
و حكاياتك
و دمك الخفيف
انا كمان هشارك بأول حدوتة من عندى
تحب تسمعها ؟؟
طييييييييب
كان يا ما كان
ولد صغير و لطيف إسمه يوسف يسوفة حبيبى
كان طفل جميل و طيب
و بيحب مامته
و كل عيلته
و قطته و لعبه
كان بيسمع الكلام و بيخاف على ماما قوى
و يحبها
حصلت ظروف و كان لازم يبعد عنها
و يروح فى رحلة طوييييييلة بعييييييدة مليانة مغامرات
عشان يرجعلها من تانى
كان بيفكر دايما إنه هيرجعلها بعد البعاد
مامت يسوفة كمان فضلت مستنياه
و هيا طول الوقت بتقول يا رب
يكون كويس
و سعيد
و يرجع من رحلته أحسن من الاول
إيه رأيك اسمى الحكاية مغامرات البطل يوسف
أيوه بطل ...عارف ليه ؟
لأن اللى يقدر يتحمل البعد عن مامته
و بيته و لعبه و قططه و كل حاجة كان بيحبها
و يروح فى مكان تانى جديد ميعرفوش
و يتعود عليه و يعيش فيه
و يبقى شاطر ف مدرسته
يبقى شجاع و قوى كمان
و لازم يتقال عليه بطل
اكمل ؟!!
لأ ...كمل إنت
بقية تفاصيل الحكاية عندك ...قول و سمعنى
يسوفة عمل إيه فى رحلته العجيبة ؟
كان عايش ازاى و بياكل إيه ؟
بينام فين و بيتكلم مع مين ؟
صاحبه اللى قاعد جنبه فى التختة إسمه إيه؟
و بيحب مّدرسته و المدرسات بتوعه و لا دمهم كان تقيل ؟
شاف إيه ؟
و خاف من مين ؟
و كان فاكر ماما و لا ناسيها ؟
زعلان منها و لا مش زعلان؟
مين ضايقه قوى ؟ و مين فرحه؟
و اتعلم إيه طول المدة اللى فاتت دى ؟
انا هقعد على الأرض
قصاد المسرح
و معايا القطة و الدباديب كلها
عشان نتفرج على الحدوتة
حدوتة و مغامرات البطل يوسف
و من فضلكم كله يسكت و محدش يطلع حس خاااالص
عشان نسمع و نشوف و نتفرج
سكوووووت
يلا يا حبيبى
إبتدى الحكاية

This entry was posted on الاثنين, أكتوبر 05, 2009 and is filed under . You can leave a response and follow any responses to this entry through the .

52 كــــلام بيطــبطـــب عـــلى قــــلبى و روحــــى

جميل جدا جدا جدا مسرح يوسف
ربنا يخليك يا يوسف ويفاديك ويردك لحضن ماما
طيب انا هاأقعد جنبك كده واحضنك مع اني بخاف من القطط
واسمع معاك حكايات يوسف كلها
بس الحكايات ها تاخد كتير قوي يا فافي؟
مش مهم
المهم عندنا ربنا يكتب لنا نسمعها كلها وانت مبسوطة وسعيدة وهو في حضنك وحضن قلوبنا كلنا
عارفة يا فاتيما
انا مريت بحاجات عجيبة وكتيرة في حياتي
بس يقيني بالله دائما وقاني السوء
وانت عندك يقين
يبقى المسرح ها يتفتح بحكايات البطل يوسف قريب ان شاء الله

وكمان انا أول تعليق على اليوسيفيات التي اعشقها
اقيموا الإحتفالات يا رجال
طيب خلاص سكتت
هسسسسسسسسسسسسسسس
علشان نسمع

وانا فين في المسرح ده :(
ده انا كنت ناوي احكيلكم كل افلام الكارتون و قصص الاطفال اللي قريتها

بس انا احب اسمع برضه بس انا متضامن مع كبيرتنا د/ستيتة ...انا مش بحب القطط
بس عشان يوف بقي نعديها المرة دي

وان شاء الله يحكيلي بجد

الظاهر البوست دا لغير محبى القطط :)
بتعجبى اوى افكارك و الحاجات اللى بتعمليها ليوسف ربنا يرجعهولك بالسلامة وتفرحى بيه
ويفرح بيكى وبأحلى قصص وحكايات وايام تعشوها مع بعض

دام ودمتى بكل خير
تقبلى مرورى

احجزى لنا مكان فى القعده الحلوه دى علشان نسمع معاكى ولا هتطمعى فيها لوحدك

ازيك يا فاتيما يا ام يوسف ياقمر

تسمحى لى كمان اجيب بنوتاتى علشان يسمعو حكايات البطل يوسف

ربنا يرجعه لحضنك ويطمنك ويطمنا عليه يارب لانه مش بئا ابنك لوحدك يا فاتيما دا النى انا كمان وابن كل الناس اللى بيحبوكى

على فكره انتى من فتره وانتى مش بتروحى من تفكيرى 24 ساعة
وحاسه بيكى اوى اوى

بسم الله ماشاء الله
المسرح جميل جدا واسم يوسف منور عليه
واحنا كمان معاكى فى انتظار نسمع حكايات البطل يوسف
وسمع هس كلنا اذان صاغية
قول يا بطل
ربنا يرده ليكى وان شاء الله يحكى كل المغامرات يتاعته
تحياتى لام يوسف

أول حاجة أنا بقى بحب القطط جدا و عندى قطة شيراز و اسمها ميشه كمان ، يعنى المكان ها يكون لى وللقطة كمان نقعد و نتفرج ، عارفة فاتيما ربنا لما ذكر العسر ذكر معاه اليسر ما قال أن بعد العسر يسر لأ قال أن مع العسر يسر ، يعنى دة مع دة ، بس يمكن فى نظرنا أحنا أن اليسر أتأخر شوية ، لكن صدقينى كل ما تشتد خلى عندك يقين أن يسر ربنا قرب قوى ، وكل ما تضيق أكتر أعرفى أن فرج ربنا قرب قوى ، فاتيما أنت ما تعرفى اسم مدرسته ولا مكانها ؟؟؟؟
لو تعرفى روحى زوريه و خدى معاكى الهدايا الى جبتيها له و أسمعيه و أتكلمى معاه و اشبعى منه ، وربنا يهدى كل قلب قاسى قدر يفرق بين أبن و أمه ، مش ها قول بين أم و ابنها لأنه يمكن العلاقة مع الأم أنتهت وما بقى القلب يرق لها لكن مع الأبن لأ دى علاقة دم و قلب و روح . ربنا يهيديه فاتيما للخير .

على فكرة فاتيما أنت فنانة رائعة و حسك جميل ، و قلبك كبير قوى ،

انا يوسف البطل

بعدت عن ماما
لظروف خارجة عن ارادتى وارادتها

ماما علمتنى الاعتماد على النفس
فاعتمدت على نفسى فى كل شئ وانا بعيد عنها

ماما كتير بتوحشنى
وانا كتير كنت بعيط
لكن كنت بعيط بينى وبين نفسى
مخلتش حد يشوف دموعى

انا نجحت فى المدرسة
وكله بفضل ربنا وبعديه ماما
ماما هى اللى علمتنى الحروف والارقام والكلمات
فبالتالى انا داخل المدرسة وانا عارف كل الحاجات دى
ويمكن عارف اكتر منها كمان
اصل ماما علمتنى حاجات كتير اوى

ماما علمتنى احترم بابا وجدتى واعمامى
وانا بسمع كلامها فى غيابها
وعمرى ما نسيت كلمة اتقالت من شفايفها
وعمرى ما نسيت نصيحة قالتهالى فى يوم الرحيل


ماما من فضلك
خلى خالتو خيخة تبطل عياط
انا مش عارف اكمل حكايتى من صوت عياطها
خليها تسكت خالص
مش عايزة اسمه حس
كله هسسسسسسسسسسس


ماما انا بحبك وهارجعلك بإذن الله
علشان نكمل الحكاية سوا

بسم الله ما شاء الله
انتى فنانة يا فاتيما
حلو اوى مسرح العرايس


قولى ليوسف انى خلاص بطلت عياط

خليه يكمل الحكاية بقى

سلام
اختك خيخة

حلو المسرح وحلو يوسف وحلوة ماما يوسف

يارب يوسف يرجع يسرعة لحضن ماما يارب

فين القطة مش في الصورة ليييييييييه؟

خسارة ...

ربنا يطمن قلبك يارب

ازيك يافاتيما
يارب تكونى بخير
الله عليكى وعلى مشاعرك
ربنا يارب يردلك يوسف ويفرح قلبك بيه دايما ومايبعدوش تانى عنك ابدا

ايه الدلع دا كله مسرح عرايس مرة واحده
يابختك ياعم يوسف
يعنى انتِ كده عاوزانى اتخانق مع ماما تيجى تشوف الدلع

وعلى فكرة الواد ده طالما انه بيحب القطط يبقى هيطلع عبقرى
ماهو كل العباقرة بيحبوا القطط
والدليل قدامك اهه
انـــا
بس ماقولتيش القطه دى نوعها ايه
سيامى ولا شيرازى ولا ايه ؟؟
وخلى الجماعه اللى مش بيحبوا القطط دول يقعدوا صف تانى
(اه انا معايا واسطه)
هههههههههههه
وبعدين ستوته عامله الهيصه دى كلها ليه ؟؟ هو مش احنا قلنا سكوت هنسمع
ايه ده
خلونا بقى نركز فى المغامرات
وبعدين ايه ده ؟؟
انا بقيت رغاى قوى كده ليه؟؟
اسكت بقى علشان نسمع
يلا سلام

لا اله الا الله
هو احنا رجعنا لحكاية التعليق الـ 13 دى تانى
ماكان ربنا تاب عليا منها
بس بس انا عرفت
محدش عامل دا كله غير الواد عادل
بسبب القطط
طييييييييييييب ياعادل
ان ماجبتلك شباطه ونعناعه معايا
مابقاش انا
(دول القطط بتوعى وبلدى مش سيامى يعنى حاجه كده مخربشه وعلى كيفك)

الزهراء أم يوسف
ممكن أجطع تذكرتين
و لو محتاجين ممثلين أبعتلكو بيدو
بس بشرط تيوسفيه جبل ما ترجعهولي

تحياتي
أبو شوشو

الله
حلو اوى المسرح ده
و الاحلى منه مشاعر الحب بين اصحابه
انا مش هعمل دوشة و اقعد ساكتة خالص و اسمع
بس انتى عارفة مقدرش اضمن الولاد انهم يسكتوا

عندى احساس ان يوسف و كريم هيبقوا اصحاب اوى لما يتقابلوا ان شاء الله

ربنا يرده
لك هو وكل غايب
الى أهله وبلده بالف
ملـــــــــــيون ســـــــلامة

الله عليك يايوسف ياجميل
ربنا يهنيك بقلب ماما بتحبك بجد

حلو قوووووووى المسرح يافاتيما
وبدايه الحكايه جميله والباقى هيكون اجمل واجمل
بالذات لما نسمعه من يسوفه وبصوته وبطريقته
ايه ده؟
انتى مش عملتى حسابى ولا ايه ؟
يلا اجرى هاتى كرسى علشان نقعد نسمع
بس من غير دوشه علشان يسوفه مش يزعل مننا

اقولك كلمه سر؟
انا اول ما شفت المسرح وقريت البوست اتمنيت فعلا انى اقعد معاكى واتفرج على حكايات يوسف
انا فعلا باعيش معاكى بكل كيانى
فى كل حرف بتكتبيه وكل احساس بيخرج منك

ادعى ربنا كتير
هو عايز يسمع صوتك
وان شاء الله مش هيخزلك ابدااااااا
انا واثقه من كده

يا رب تفرح قلب امك يا يوسف وترجعلها

بالسلامه العالم ده كله فى كفه

وحب ماما الغير عادى ده فى كفه تانيه

وكفه ماما هيا اللى تطب

وكلنا مستنيين الحكاية اللي هيحكيها يوسف .. كلنا بقينا مستنيين معاكي وزيك بالظبط .. وهييجي قريب اليوم اللي نسمع فيه الحكاية دي

بوست جميل جدا على فكرة

مامتى حبيبتى
لاء بقه انا زعلانة جدا
وانا مش هعلب معاكى انتى وسوفة ولا ايه
لاء بقه ماليش دعوة
انا عايزة العب مع خطيبى
وهستنا الحكايه

انا ويوسف وعمر قاعدين سوا ومؤدبين او عاملين مؤدبين ومنتظرين حكايات الفتى الهمام

بس انا مليش دعوة لو حد وأوأ ولا عيط ولا عمل شقاوات انا هقعد اتفرج واسمع حكاوى صديقى الجميل وانتى خلى بالك من الاطفال

حلو تعليق البت خوخة قوى
احساسى بيه زى مهى قالتلك كده

ربنا يحميه ويقيه شر من حوله
بوسات كتير على اعمالك القيمة اللى دايما بتعمليها

اموااااااااااااه
هبة

فاطيما أنا بعلق تانى علشان التعليق مظهرش

أنا ما عنديش مدونه لسه بس أحيانا بتابع المدونات ووصلت عندك
دى أول مره أعلق على مدونه! بس بصراحه لازم اعلق المره دى
أنا دخلت على المدونه دى كتير بس ما كنتش فاهم هوه فى ايه؟وايه اللى حصل ليوسف
بس النهارده تقريبا قريت كل المدونه ! ساعات وساعات وانا ابحر فى عالمك الخاص لأصل الى التغريبه وأفهم ماذا حدث ولكنى لم أستطع أن أعلق قبل أن أكمل الإبحار معك ومع يوسف
ثم أعود هنا مره أخرى للتعليق
صراحه انتى وجعتى قلبى مش حألومك انتى لسه جواكى طفله بريئه بقلب رقيق رغم كل اللى حصل معاها
هروب ووحده وخوف من السجن ناس كتير ما يقدروش يتحملوا اللحظات دى بس انتى طلعتى أقوى من التجربه دى
انتى أم عظيمه وأكيد يوسف حيفهم فى يوم من الأيام الحقيقه
مش عارف هوه فعلا كل الأمهات بيحبوا أولادهم كل الحب ده ولا علشان الظروف اللى انتى فيها
عموما ربنا يرجعه لحضنك تانى
سلام
قلب وحيد

مش بزهق من حكيك عليه ربنا يخليه ويحميه ويسعده وتفرحي بيه سواء قريب او بعيد
متابعاكي دايما
:)

طيب انا عندى حكايه يمكن متكنش مفرحة بس بموووووووووت فيها ممكن اشارك معاكم ولا ممنوع حكايتى اسمها الحب اعمى يقودة الجنون
ان شاء الله هيرجع قريب بس الصبر شويه
تحياتى

ثقافة الهزيمة .. ألوان‏-

وهنا أود أن ألفت نظر السادة القراء والمسئولين أيضا أن الزبالة فى حقيقة الأمر ثروة كبيرة لو أحسن أستغلالها كما تفعل الكثير من الدول المتحضرة و أنتهزهذة الفرصة لأقدم نموذج من أوروبا يجب على مصر أن تحتذى به و هو من العاصمة النمساوية فيينا التى تقدم صورة نموذجية لنظام صديق للبيئة فى مجال جمع وأعادة تدوير النفايات بالأضافة إلى أستغلال النفايات كمصدر رئيسى من مصادر أنتاج الطاقة البديلة النظيفة...

باقى المقال يوجد ضمن مجموعة مقالات ثقافة الهزيمة فى الرابط التالى:

www.ouregypt.us

العزيزه ام يوسف..
السلام عليكم

طب ممكن الاقى كرسى قدام المسرح عشان اتفاعل مع المسرحيه ويمكن كمان اقوم بالتمثيل والحكى مع يوسف .. وانا عندى مسرحيات كتيره وحكايات الاميره الصغيره مع الشحات وست الحسن والجمال والمعزه سقسق والمعزه مقمق والمعزه غمر الطاحون ..

ربنا يرجع لك يوسف بالسلامه.

تعليق صغير على تعليقك فى فشكول
نحن يابنيتى اعظم العقول فى العالم ونستخدم عقولنا بكفاءه منقطعة النظير سواء فى الجد كحرب اكتوبر او فى الهزل كهذه الايام.. نستخدمها بكفاءه فى النصب والسرقه والفساد وايضا بنفس الكفاءه فى الجد عندنا لا يكون لا مجال الا للجد .. شفتى يا فاتيما التناقضات اللى جوانا .. لكن المهم عقولنا وارادتنا هى ما يخاف منه الاعداء وايضا الاصدقاء قبل الاعداء .

تحياتى

ربنا يخليك ويخلي يوسف الجميل الذي منحك هذا الابداع
تحياتي

يا حبيبتى يا ام قلب طيب وموجوع

انا هسمع للصبح يوسف وكلامه اليى كله حب لامه اليى قلبها بينقط حنيه وحب

ربنا يرجعه لحضنك يا طمطم بسرعه عشان كلنا هنفرح لليوم ده فرحتنا بحضننا لاولادنا
ربنا يطمن قلبك دايما عليه

جميلة اوى اليوسيفيات دى
ربنا يرجعهولك بالسلامة
ويقر عينك بيه
ويفرحو بيكى
وتعملو احسن مسرحية ممكن نشوفها او نسمعها فى حياتنا

ام يوسف

يوسف ان شاء اللة هيجيلك

بس كلها كام سنة وتجوزية

هتعملي اية في مراتة

دنتي هتبئي حمى صعب اوي

كل فكرة و كل حاجة بتعمليها بتشع أمومة ملهاش مثيل يا فاتيما...انت ام عظيمة و بني أدمة صبورة لآخر حدود الصبر..صدقيني يوسف راجع و جايب معاه حكايات الدنيا كلها اللي فاتت و اللي جاية و حتحكوا كتير و حتفرحو كتير ان شاء الله..يااا رب أشوفك على خير يا حبيبتي

انا متابعه حضرتك بس موش بقدر اعلق ..... الكلمات موش بتسعفني

بس جيت اقولك كلمي خيخه هي طلبت حد يسيبلك تعليق

ربنا معاكي

ستيتة حسب الله الحمش
تعالى جنبى و ميهمكيش من القطط
هنقعدهم ورا
يا ريتنى فى نصف ايمانك و يقينك و سكينتك دى يا ستوتى
ربنا يسعدك يا رب



adel
إنت فين ؟؟
موجود اول واحد يا بنى
اومال مين اللى هيقعد يحط دماغه فى دماغ يوسف و يحكوا و يرغوا و تبقى تقولى ف الخباثة على الحاجات الننوعة
الممنوعة يعنى و هو هينكسف يقولهالى
مش اخوه الكبير يا بنى ؟
حضر انت كمان قصص عشان تحكيهاله
يا فنان
يا ولدى العزيز الغالى




إحساس طفلة محبة للرومانسية بس واقعية
يا ستى ملكيش دعوة بالقطط
ادبحهم يعنى ؟!!!
المهم تبقى تيجى تسمعى معانا الحكايات يا حبيبتى



appy
ليكى مكان طبعااااا
و فيه مكان للخروف البمبى و النحلة و الدبور
و سيمبا بالمرة ..يعنى ملوش نفس ؟
على فكرة يوسف هيحب اسم عربيتك قوى و مش بعيد يقعد فيها ميرضاش يخرج




reem
القلوب عند بعضها يا حبيبتى
بنوتاتك عندهم كام سنة ؟!!!
يمكن نريحك من واحدة فيهم و نخطفها
قصدى نخطبها




همس الاحباب
متحرمشى منك يا خالد
مبروووووك يا ابو همس
و شابى

ام بتول
أعز انا الناس اللى تربى القطط ...
بحب القطط الشيرازى جدا بس الحاجة ام فاتيما رافضة دخولها عشان شعرها اللى بيقع و يملى السجاد ...
القط اللى عندنا سيامى
ولد و اسمه ميزو
و أبقى هاتى ميشة تتعرف على ميزو يمكن تحصل قصة حب عذرية على هامش المسرحية بتاعت يوسف و لا حاجة
متحرمشى منك يا حبيبتى أبدا
و لا من دعواتك



بت خيخة و أى كلام
انا عاجزة عن التعبير يا نوران
لما قريت تعليقك
عيطت
و تقريبا انفلقت من العياط
و بعدين ابتسمت
و رفعتلك القبعة تلات مرات
مرة على حساسيتك الرائعة كقارئة
و مرة على امومتك المتدفقة
و مرة على ردك الادبى البليغ و المؤثر
ربنا يكرمك بالخير كله يا خوختى
بوسة كبيرة لشيكو وحضونة ليكى
جاتلى رسايل إنك عاوزانى و انا كتبت تعليق ف مدونتك
عالله تلحقى تقريه
سلام يا حبيبتى مؤقتا



mimi
إنتى اللى حلوة يا ميمايا
يا بسكوتيا
جاية إسكنكرية و لا هتنفضلينا ؟!!




المعتصم
انا بموت فى القطط البلدى
مخربشة كدا و مجرمة و نغشة
بس براوية قوى يا مصطفى
و لما بيكبروا ف السن بيبقى
شكلهم غريب
ميزو يا سيدى قط سيامى
الحاجة امى مبترضاش بغير السيامى عشان شعره قصير و مبيغرقش السجاجيد
متركزش فى حكاية التعليق ال13 دى
إنت تميمة حظ لأى صفحة تعليقات يا فندم



abou sho sho
اهلا و سهلا يا فندم
حلو قوى مصطلح تيوسفيه دا
لطيف قوى
بجد




قوس قزح
إن شاء الله يا داليا
ربنا يسمع منك و يرجع و يبقوا اصحاب و اصدقاء العمر كله ...
خليهم يعملوا دوشة و يفرحوا
عاتى
عاتى
بوسة و حضونة لحد يوم السبت
يا وش الخير

ننتظر حكاية يوسف
يا بخته بيكي يا فاطيما
ربنا يخليكي له ويخليه ليكي
محبتي

norahaty
ربنا يسمع منك يا نورهانتى
يا غااااااااالية



احمد ابو العلا
مشكرين يا ابوحميد
كله ذوق يا هندسة



عاشقة الرومانسية
أعمل حسابك فى إيه يا بنتى
انتى ليكى فى يوسف نايب
هعزم عليكى و لا إيه
دنتى خالته
يوم السبت
10/10 الساعة 10
يا مسهل




ليس فقيرا من يحب
حلو تشبيهك قوى بتاع الكفة دا
حلو زي قلبك تمام



يا مراكبى
يا نبع الحكمة الخالص
حطتلى نجمة على البوست خلاص
بفرح بتشجيعك و كأنى عيلة صغيرة فى المدرسة و المدرس بيقولها برافو
صحيح الفرق بينى و بين شهور مثلا و انا اللى اكبر أشاساً
بس الكبر فى المقام و القيمة
ليك إنت
عشان كدا بفرح بأى كلمة تشجيع منك و لو جبر خاطر و بكرة نسمع كلنا الحكايات مش عاوزة اسمعها لوحدى لازم تكونوا معايا و جنبى




*البت المشمشية*حلوة بس شقية*
ليه الزعل بس
يا ستى يرجع و إلعبوا للصبح
و اسمعى كل حاجة متنفعش تتسمع الحكايات من غيركم





doba
يا دوبى سيبى عمر يعيط براحته
و يسوفة يجرى و يتنطط براحته
ولاد خالته و براحتهم
تفتكرى بجد يا دوبا اللى كتباه خيخة يكون حقيقى و تنبوء ف محله ظ
يا رب يكون بالفعل كذلك
بوسة و حضونااااااااات
هتولدى امتى ...زهقتونا
العيال بتوع منتخب الشباب طلعوا من كاس العالم خلاص
شى عمر افندى هيطلع امتى هوه راخر؟




قلب وحيد
التعليق الاولانى انكتب فى بوست التغريبة يا قلب وحيد ....
و وصفك ليا يشرفنى و متهيألى كل ام ف الدنيا عندها الحب الكبير دا لأولادها بس اوقات بيحتاج لظروف إستثنائية عشان يطلع أو يبقى ظاهر بشكل مكثف و قوى ...
لكن دى غريزة فطرية شوف حتى القطة بتحب ولادها بشكل خرافى قد أيه؟؟
إنت نورتنى و عقبال ما يبقالك مدونة و نيجى نغلس عليك فيها




بنت القمر
تعليقك يا امانى أسعدنى بشكل لا تتخيليه
ساعات كتير يتهيألى إنى زهقتك منى و من حكاياتى ...
بس الحمدلله ظنونى ف غير محلها
متحرمشى منك و لا من طلتك عليا
مش ناوية تيجى لقاء المدونين يوم السبت ...يا ريت تحاولى ؟!!
التفاصيل هنا
http://mero200528.blogspot.com/2009/09/blog-post_17.html




أبو آية
أهلاااااا يا هانى
أخيرا نورت صفحة التعليقات
يا سيدى هوه يرجع و ابقى احكى كل اللى انت عاوز تحكيه ...
و هات آية الجميلة معاك كمان

فشكووول
طب ما حضرتك تحكيلنا فى مدونتك
الحكاوى دى عشان ابقى اغش منها
انا و يوسف
و نقتبس اقتباسات بالجملة و لا عزاء للملكية الفكرية
و مع حضرتك جدااااا إننا بقينا نستخدم عقولنا المتميزة أسوأ الإستخدامات ...
دا واقع فعلى بجد
نورتينى و كل سنة و انت تذكرة لينا بالعزة و الكرامة



م/الحسينى لزومى
الف شكر لحضرتك على ذوقك
تحياتى انا كمان


mahsen saber
إنتى و بيرو معاكى يا نص قلبى التانى
و أيوه كدا دعى ليوسف ..
دعواتك مستجابة بإذن الله يا حبيبتى
و بنت أبيها الغالى



مسدس صغير
الله يخليك يا صاصا
يا واد قلبك الطيب دا ملوش حل يعنى ؟؟
أصله مش راكب مع المسدسات و الكاوبوى و الحركات دى خالص !!!

مصرى جدا
مين دى اللى هتبقى حماة ؟؟
و كمان حماة صعبة ؟!!!
وش راسم تعبيرات بريئة
و نظرة خافتة مطرقة للأرض بخجل
و ترقيق ف الصوت
دنا غلباااااانة خالث
هااااا
لأ بجد
مش بيقولوا إكفى القدر على فمها ...
و انا بصراحة شوفت امى بتعامل مرات اخويا ازاى و خدت درس صامت عبقرى
عن كيفية تسيير الحياة بكل سلاسة ممكنة
امى عمرها ما اتدخلت فى حياة اخويا
و لا بتحاول تسأله عن أى مشاكل
بينه و بين مراته
و لا أى تفاصيل عن البنية
مع اهلها ( قرايبنا على فكرة يعنى السؤال محرموش )
بس هيا (امى ) ست عاقلة و ذكية
و مكبرة دماغها اللى توزن بلد دى ....
منكرش فى البداية إنى كنت بغير غيرة عبيطة ف الخباثة
و كان بيتهيألى إن ماما بتعاملها احسن ما بتعاملنى أنا شخصيا
و مبتتدخلش ف حياة اخويا قد ما بتتدخل فى تفاصيل حياتى ...
بس بعد كام شهر و سنة اتنين
رفعتلها القبعة ....لييييييه؟
لأن اخويا بقاله عشر سنين متجوز أهو
و لحد النهاردة
إضرب عشرة فى 365 يوم شوف يطلعوا كام امى و مرات اخويا عمر ما حصل بينهم أى مشكلة و لو تراشقية بالألفاظ
( الله اكبر امسك الخشب )
و اخويا و مراته و عياله بييجوا كل شهر و ساعات شهرين يزورونا
و الدنيا رايقة و تمام
عمرى ما سمعت امى بتشتكى ان ابنها مبيجيش كل كام يوم يطل عليها
و الأفلام دى ...بتاتااااااااا
و لا بتغلس ف تليفونات عليه
و لا تطارده
و لا بتطلب طلبات منه غلا للضرورة و بالعكس هيا اللى بتنزل تقضيله مصالحه ... مش بقولك ست عاقلة
قوم انا بعد كل هذوها يا هانى
اطلع عبيطة و متعملش منها
و انكد على يوسف عيشته
و اعذبه بحملى ؟!!!
دنا ابقى نييييلة قوى
الحمدلله خلاص بقيت متعودة اعيش لوحدى
و ربنا يا رب ميحوجنيش لأى مخلوق
و لا يتقل همى على اقرب الناس ليا
و خصوصا يوسف حبيبى انا مش مخلفاه عشان ابهدله معايا كفاية اللى شافه و بدعى ربنا ياخدنى و انا فى صحتى ..
إن شاء الله
جاى يوم السبت اسكنكرية معانا خلاص
و لا طناش طناش ؟!!!!


dahlia...
متحرمشى منك يا حبيبتى
هتوحشينى لحد يوم السبت
اوعى متجيش و النبى
هاه



فتاة من الصعيد
و لا يهمك يا ستى
و مدونتكم لسه مروحتهاش
ولا قريت فيها أى حاجة لسه
بس مبدئياًَ عاوزة اهنيك على إسمها
مميز بجد
و شكرا على إهتمامك بتوصيل النودااااء الخيخى
تعالى دايما و مش مشكلة التعليقات و الأسعاف و المطافى و الحاجات دى
نورتى

د.إيمان مكاوى أم البنين
و يخليكى لفريق الزعر يا أيما
و يخلى كل ام لأابنها
و كل ابن لأمه
سلامنا للحافى ..العزيز
و بوس بالهبل للعيااااااال
و امهم

ربنا يرجعه لحضنك بالف سلامة يااااااااارب وقريب جدا ان شاء الله وربنا يحفظه من كل شر اللهم امين يارب العالمين

تدوينة جميلة وفكرة جميلة ممكن تحكي اد اية انتي بتحبية وحتلاقي حدوتة منة هو اد اية بيحبك وانك وحشتية مهما قال حبك محفور في قلبة يمكن زعلان منك شوية صغيرين بس بكرة يفهم وبكرة لية قريب ان شاء الله يفهم ويااارب يااارب يرجع لحضنك قريب

اتمناللك سعادة
وساظل صامتة لاسمع احلي الحواديت
ربنا يفرح قلبك

امي العزيزة ارسل اليك بعض القبلات الحارة الي خديكي
اشتقت اليكي كثيرااا

لقد تاخرت كثيرا اعتذر
كان يجب ان اقول امي العزيزة لست زعلانه منك

لكن طرئت الكثير من الظروف

زيارتك لي اسعدتني

اعتذر مرة اخري علي الصخب الذي احدثتة اثناء القاء يوسف الحدوتة

وساقول هيا بنا نلعب واني اتحدث مثل دبلجة الكرتون هههههههه

يارب يرجع لحضنك
ويارب اشوفك وتخديني في حضنك
دمتي بالف خير

يا حبيبتى يا فاطيما بدعيله وبدعيلك من قلبى يا حبيبتى

وواثقه ان ربنا سبحانه وتعالى هيستجاب الدعاء لانك تستحقى كل الخير

وربنا هيفرجها عليكى وعلى يوسف وهيكون نتيجة صبرك خير ان شاء الله يا حبيبتى

المسرح جمييييييييل موووووووت يا بختك بجد يا يوسف ارجع بقى بسرعة علشان تحكى وتقول وترسم وإحنا نسمع ونشوف

يارب ترجع على طول

يارب يا فتيما يرجع لك بألف سلامة يارب

ربنا يفرح قلبك ويسعد أيامك يارب

دمتى بكل الخير والسعادة

فاتيما
حبيبتى
وحشانى
اوى اوى اوى
المسرح رائع
وان شاء الله يحس بيه يوسف
صدقينى
هيبقى فخور بيكى اوى
بس يكبر شوية
ربنا يخليهولك
وتطمنى عليه
بحبك
وادعيلى كدة بالخير
اوى

إن شاء الله هايجي يوم ويوسف يشوف كل الحاجات الحلوة دي
ةهايزيد يقين على يقين قد ايه عنده أم جميلة وحنونة وهايزعل أكتر منك على السنين اللي راحت منه وهو مش معاكي وف حضنك وقد أيه هايتحاكى بيكي وسط أصحابه وزملاء عمله لما يكبر وقد أيه هايحكي لأولاده عن جدتهم والليكانت بتعمله عشانه وقد أيه أمه أجمل أم
ياريت تحجزي ليا في أول صف عشان يكون لي الشرف أنني تواجدت في مسرح يوسف
تحياتي
حسن أرابيسك

هوا انا كل ما اروح لحد الاقى عنده قطط

وما علينا المهم اعديها وخلاص

وطبعا انا بحبك علشان كل الا بتعمليه ليوسف
وربنا يخلهولك يارب
ويرجع كده لحضنك ويفضل معاكى على طول

وحلو المسرح دا اوى

يا كوكو

ربنا يخليهولك يا رب يا رب يا رب يا رب يارب

ان شاء الله هيجي و يحكيهالك

على وشى ابتسامة كدة شبة المكسوفين وا لمبسوطين

يااااااااااااااااااااااااااااااااااااااااااااااااااا رب

رجعهلولها سالم غانمو اسعد قلبها و قلبه

آمين

سلام عليكِ

إرسال تعليق