.

.

البحر بيخطفنى  

Posted by: فاتيما in


انا قولت مش عاوزة اكتب بوست
مصّرين يعنى ..... ؟؟
طييييييييييب ماشى
بسم الله الرحمن الرحيم
روحنا اسكندرية
قابلنا بعض
إنبسطنا من الخروجة
رجعنا بيوتنا
بس كدا
...............
مالكم ..مسنتحين قصاد الشاشة كدا ؟
البوست خولص
حد مستنى حاجة؟
يلا شوفوا حالكم و روحّوا
حودوا على مدونة من المدونات الشكيكة
و بلاش البصة اللى كلها شزراً دى
و بطلوا تجزوا على سنانكم
هوه كل مرة تقررونى ؟!!!
طيب طيب خلاص ههقول
منتوا عارفينى مقدرش على زعلكم
و بعترف من أول قلم
إستعنا على الشقا ... بالذى لا يغفل و لا ينام
.............
كان يا ما كان
فى سالف العصر و الاوان
و محدش ينام منى
كان فيه عروسة بحور جميلة إسمها دودو عاشقة الرومانسية
قررت فى ساعة روقان خلال قعدتها على صخرة على كورنيش بحرى
مع جنية اسكندرانية جميلة اللى اسمها حنين القلب
إنهم يعملوا لقاء تدوينى يضم مدونين اسكندرية و القاهرة
قوم إحنا كل حبايب دودو و حنين مكدبناش خبر
وقررنا أن نشد الرحال على بلد المحبوب
الفكرة مكنتش مقتصرة على التجمع و المقابلة بين المدونين فقط
كانت كمان يسبقها عمل خير و زيارة لدار أيتام
عنها يا سادة يا كرام و كتبت دودو
البوست المتين
هنا
هيا و حنين ...و قراه كل المدونين
ف اليوم الموعود 10/10/2009 كانت الرحلة
الأستاذ خالد همس الاحباب الملقب حديثاً بأبو شابى
( ببّش ..قررت أدلعها كدا )
و بما إنه كاتبنى على البطاقة فى خانة الاخوة و الجدعنة
تطوع كعادته فى السفر معايا عشان ياخد بالى منى
الأ أتعاكس من الشباب البايظ اللى عنده عشى ليلى و نهارى كمان
و فى تمام الساعة السادسة صباحا كنا راكبين انا و هوه
الأتوبيس فى طريقنا للماريا
خلاص كويس لحد كدا ؟
لا مش كويس
عشان انا لازم اعمل فيه حركة نص كم تبين المعيلة برضو
طبيعى كل خلق الله فى اوربا و الدول المتقدمة تفطر قبل ما تنزل
دا ف اوربا بقى ...لكن هنا لاااااا نيسكافيه و مشيها .. دا زائد الريجيم اللى حبك اعمله
على نص السكة كنت مدروخة و بسخسخ و معدتى غمة عليا و نفسى ف الحرنكش
لأ ..بلاش آخر جملة دى ..مكنش نفسى فى الحرنكش و لا حاجة
كان نفسى مقومش من مكانى من الصداع و الدوخة و العرق و الحر
مع ان الاتوبيس كان مكيف
خالد كتر خيره قالى غمضى عينك و ريحى لحد ما نوصل
و لما وصلنا الموقف ..جابلى عصير و مية و قعد يهدى فيا
و يسألنى عنوان بيتنا فين و انا امليت عليه وصيتى
فين و فين لما ربنا سترها و فوقت و صحصحت
و بقيت زى القردة و روحنا على الدار طوالى
مقدمة ملهاش لازمة ؟
مش قولتوا أرغى ..أنا هزهقكم بقى
قولوا وصلنا الدار ..تسعة و نص .... منتهى الأنضباط مننا و الله
المهم ...احمد اسير الجراح كان اول القادمين
و بعده هنودة القمراية
و بعيييين حنين و دودو و دخلنا جوه الدار فى انتظار البقية من الحاضرين
المكان إسمه دار الامل ..احد الدور التابعة لمؤسسات شركات طلعت مصطفى الخيرية
مش دعاية و لا اعلان ..بس دى حقيقة الشركة بتاعة الراجل دا عاملة كم لا يستهان بيه
من المشاريع الخيرية فى إسكندرية و على لسان اهلها بتنفع الناس
و سبحان الله يعنى له فى خلقه و مألهم شئون و شجون
مطولشى عليكم قولى طولى ّ ...العيال يا جماعة ما شاء الله
شعلة نشاط و إقبال على الزوار
تقريبا كلهم إنسجموا معانا فوراً و بقم بيلعبوا و يجروا
و يشاركونا فى الأعمال الفنية و يتلموا حوالينا و يتكلموا
فيه بعض الشقاوة المفرطة بس مبررة طبعا و مقبولة
مفيش صور حاليا عندى لما تتبعتلى من العالم الحلوة تبقوا تشوفوها
بس عملت تاج من الكارتون
و لبسته و قولت اوريهم شكله و بعدين ياخدوا يعملوا زيه
بسلامة نية و كل ثقة بسالهم .. براءة بقى و مش واخدة خوانة
- شوفتوا التاج دا يا عيال ؟
- ( بصوت واحد ) أييييوه
- حلو ؟
- ( بصوت واحد ) أأأأأأه
- تحبوا تعملوا واحد زيه و تلبسوه؟
- ( بصوت واحد) لأاااا
يا ولاد الأيييييييييه .. و إكن انا شكلى لا بقى وحش و لا حاجة !!!
فى الآخر ... رفقوا بحالى و قرروا يعملو التيجان معايا
و كان شكلهم حلو و الله هتشوفوهم ف الصور
مش عارفة ليه كبسونى معنويا و عاتشيفاً ... إهىء إهىء
بس الوقت عدى بسرعة
فيه ناس كانت جايبة حاجات حلوة و عصاير
و ناس كانت جايبة العاب و بالونات
و ناس بعتت فلوس و ناس جت و إتبرعت بنفسها
الحصيلة عدت ال750 جنيه غير التبرعات العينية من ادوية و منظفات و لعب
المكان الحقيقة نضيف و وواسع ... مقارنة بعدد الاطفال الموجودين فيه
و إن شاء الله الزيارات تتكرر و العدد المشارك يكون أكتر بإذن الله
روحنا فين بعد كدا .... أقلوكم انا ورايا حاجة ؟
روحنا نادى المهندسين زى ما اتفقنا
قعدنا هناك فى انتظار توافد المدونين و المدونات تباعاً
طب تفتكروا خلاص ... لسسسسسه
فضلنا كدا لحد ما سووو و الواد عادل إبنى ما جم
و عصافير بطوننا توحشت و طلبت معانا اكل
روحنا عند الزعيم فى بحرى و قعدنا برا على الرصيف
و بينا و بين البحر كام متر و الهوا مقولكوش بقى
الردالة راحوا على القهوة اللى جنب المطعم
عشان يشوفوا آخر اخبار المنتخب الموكوس إيه
و رغم توقعى لهزيمتنا ..انما حسن شحاتة نفد منها المرة دى
و كسبنا واحد صفر
بعد الغدا المتين ... خلاص كدا خلصّنا .... لسسسسسه
دودو عملت حركة تحريضية امبرالية اسكندرانية جدعانية
و اقترحت ناكل ايس كريم برز بلبن بالمكسرات فى محل مشهور
فى راس التين إسمه .. الشيخ وفيق
خدناها مشى لحد هناك ..هضمنا الغدا على رأى سوووو عشان نجوع تانى
.. و روحنا واكلين ألذ أيس كريم و رز بلبن يؤكل فى الحياة الصراحة
متفهموش الاكل فى اسكندرية بيتعمل بذمة كدا ليه
على رأى محمد صبحى فى مسرحية تخاريف
الأكن بفتنا
خلاص بقى كدا ...لسسسسسه
طلعنا من المحل عدينا الناحية التانية
و قعدنا قصاد البحر شوية
ناس مسالمة اكتفت بالفرجة
و ناس تعبت من المشى قعدت على الرملة
و ناس قلعت الشوز و غرقوا رجلهم بالمية
قعدنا على الحال دا شوية و فى الآخر إتفرقنا
عشان يذهب كل من مونا فى طريق
اللى راجع مصر و اللى مروح بيته فى أسكندرية الماريا
و اللى على 6 اكتوبر
و اللى على مارينا و اللى فضل قاعد عشان يستمتع بإسكندرية شوية
قبل ما يرجع القاهرة
لسسسسسسسه تانى ؟....لأ خلاص كفاية عليكو رغى
حراااااام
كشف الحضور و الانصراف
حنين القلب - دودو عاشقة الرومانسية
داليا ماى كورنر - Hannooda
خالد همس الاحباب - عادل البلد دى فيها حكومة و بحب السيما
سووو عجوز و عندى 30
ضياء بيتوفل مايند - م. رانيا على القدر و انا و بنتها و ابنها
احمد اسير الجراح
سالى حروووف و صديقتها فاطمة - اسلام مواطن مصرى نايم
احمد سعيد عنبر العقلاء - نهر الحب خواطرى و اشعارى
محمد اعشق فى الليل ضوء القمر و اخته فاطمة بحر الحياة
بدراوى طعم البيوت - حنان الشافعى رياح الحنين - احمد اسكندرانى فى الغربة
- اسماء نبض اسكندرية - انجى المهم هات من الآخر
- ريم بين ضفتى عقلى - مروة عامر لماضة

زى ما شوفتوا العدد ما شاء الله كان حلو
صحيح مش كلهم جم الدار الصبح
بس حرصهم على الحضور و المشاركة فى اللقاء عموما
كان شىء مفرح و مشجع
الكل كان بيسال عن نمرة أم مالك الغالية عشان يطمنوا عليها
عاوزة اقولك إنك كنتى محل اهتمام و قلق و حب الجميع يا حبيبتى
و ربنا يزيح عنك و يعافيكى يا رب
داليا ماى كورنر خست قوى بس فرحانة جدا عشانها و محدش يسالنى ليه
خالد و البنوتة الجديدة كانوا محور الحديث .. يعنى ايه شابى يا بن الحلال ؟
هوه و حنين و دودو قعدوا يغلسوا على بعض طول الوقت
لحد ما البطاريات خلصت
نهر الحب شخصية جميلة قوى و حبوبة و تحس بألفة شديدة معاها
هنودة كالعادة قمة الحنان و اللطف الانسانى و كل ما اشوفها
اعاكسها بعيونها الحلوة
بدراوى بنى آدم طيب قوى ..قوى
احمد اسير الجراح ..خجول و صامت كالعادة لكنه حضوره كفاية
حنان الشافعى آية فى الرقة و الشياكة و الضيافة
انجى هات من الآخر شقاوة و لماضة و براءة طفلة عندها 8 سنين و لا حاجة
اشكريلى مامتك جدااااااا يا إنجى
اسلام معرفنيش و لا نا عرفته ف الأول و قعدنا ييجى ساعتين
لحد ما إكتشفنا الحقيقة دى
احمد سعيد شخصية مميزة تشجعك على زيارته ف عنبر عقلائه إن شاء الله
حروف بسيطة و لطيفة كعادتها ..و صديقتها فاطمة خطفت قلبى
اسماء نبض اسكندرية هادية لكن تبقى عاوزها تتكلم و متسكتش
مدام رانيا القدر و انا شخصية محترمة و مضيافة بس ملحقناش نقعد معاها
لماضة مرمر الطعامة حبيبة ماما كان عندها برد رهيب
و مع ذلك جت على نفسها
و نزلت عشان تجيلنا فى راس التين على البحر و قعدت معانا شوية
منتحرمشى منك يا حبيبتى و سلامتك الف سلامة
كمان الوقت و الزحمة و التنقل من مكان لمكان خلتنى ملحقتش اتعرف كفاية
بمهندس محمد اعشق فى الليل ضوء القمر و اخته و لا ريم بين ضفتى عقل
و لا كمان اسكندارنى فى الغربة و فرصة تانية إن شاء الله
الوقت يكون فيها اكبر او تجولنا القاهرة بقى
سوووو دايما نوراة أى قعدة و آخر عنقود الظرفاء بتوع الزمن دا
مرجعش معانا عشان يروح محل اسمه غريب كدا باولو ابصر إيه
عشان يشرب الأصطباحة بتاعته بليل
الفيسكافيه يعنى ..و خد معاه عادل البلد فيها حكومة
على اساسي إنهم يرجعوا براحتهم و انا من مقعدى فى الميكروباص حذرت عادل
إن براحتهم دى شكلها يومين تلاتة اربعة اسبوع
و اقعدوا زى ما تقعدوا ..المهم يا سووو ترجعلى إبنى صاغ سليم
و هعد قبل ما امضى بالإستلام انا بقولك أهو
ضياء بيتوفل مايند ..الخير فى ركابه ..الجملة دى تنطبق عليه
و العيال كانت فرحانة باللعب معاه جدا
كانوا ملموين كمان حوالين داليا ماى كورنر و انسجموا معاها
حنين القلب بطنها كبرت قوووووووى بقت قد الزتونة ...و شكلها هتجيب ولد
مشيت النهاردة لما قالت يا بس ..تعبناكى يا حنونتى
و عقبال ما نجيلك يوم سبوع البيبى
دودو عاشقة الرومانسية حبيبتى ..بت بميت الف راجل و شعلة نشاط
و حنان و حب و إهتمام .. انا بحبك يا عروسة بحورى
النوبة الجاية تقعدونا يوم بحاله قصاد البحر اللى بيوحشنى و انا قصاده
ماشى ؟
خالد ...ماذا اقول يا أبو شابى بس ؟؟...إنت فوق الوصف و الكلام
شكر كبير و عميق و خالص من قلب القلب لك حد اتصل بينا النهاردة
اولهم وش الخير كله داليا قوس قزح ( بحبك قووووى ) اللى كان نفسها تيجى قوى
بس حصلت ظروف و كلمتنا صباح و مسا عشان تطمن علينا
س س ست الكل ستيتة حسب الله الحمش و بعتت سلامها للحاضرين جميعا
سمر الشافعى و آيوشة و مونى الشريف و Lady E و المصرية
كيار البنوتات العسولات و محاسن صابر بنت ابيها الغالى
و ميرا الاميرة امراءة بعقل رجل
صبصوبتى حبييبتى صبرنى يا رب و REEM الطيوبة الرقيقة
و ايناس الأحزان و شكر كبير من قلبى لأحمد العزيزلا تشتاق
و عميق إحترامى لكل الأسامى دى
و اللى لم تسعفنى الذاكرة و مكتبتش اساميهم يسامحونى
بشكرهم بجد على حرصهم على السؤال عنا و المشاركة فى اليوم و لو بمكالمة
و الناس اللى كان متوقع مجييهم و حرمونا من صحبتهم لأسباب غامضة لحد دلوقتى
زى هانى مصرى جدا و مروة ست البيت و mimi ميمايا البسكوتايا
و البت خوخة خيخة نوران ام شيكو
يوم من ايام الفرح المعتادة و البركة فيكم و بيكم
مكنتش عايزة اكتب بوست .. لكن مقدرتش مكتبشى
اسكندرية و اهلها فوق الخيال و الوصف و كمان الشكر
متنسوش تحطوا الصور فى بوستاتكم عشان الناس الحلوة تشوف عملنا إيه
و كل لقاء تدوينى سكندرى و إنتوا بالف خير
يا أحلى ناس و صحبة و عالم


يا الأرض التى ضمت روحى
و سكنت بين الضلوع
كلما عدت اليك
اعود طفلة غفت باكية
ثم صحت من نومها
لتجد قطعاً من الحلوى
رابضة على وسادتها
(.....)

This entry was posted on السبت, أكتوبر 10, 2009 and is filed under . You can leave a response and follow any responses to this entry through the .

52 كــــلام بيطــبطـــب عـــلى قــــلبى و روحــــى

اول تحليق يمكن ؟؟

يالهوووووووووووووووي

ارجع من اسكندرية الساعة 1:30 بالليل
والحق اول تعليق كمان :)

هاقرا و اجي

ياريتنى كنت معاهم



الخلاصة احنا بقى -مش عارف مين احنا دول-هنعمل لقاء ومش هنجيبكم فيه

يلا بقى

نياهاهاهاهااه

كان يوم حلو قوي قوي و انبسط قوي

و متخافيش انا وصلت الساعة 1:30 تحديدا بتوقيت بيتنا
مش عارف يمكن يكون فيه فرق توقيت بين الاوضة و الصالة يجي كده 3 او 4 ايام تقريبا

ومتاخرناش قوي روحنا شربنا قهوة من مكان وهمي بجد و بعدين دورنا علي قهوة تاني نقعد عليها علي البحر
طبعا ده كان حوار :):)
وبعد لف كتير روحنا ركبنا
بس لفينا اسكنكرية شوية بقي :):)

بحبك بحبك بحبك
جدا جدا جدا
وربنا العالم بحترمك اد ايه
ونفسي اعرفك اد ايه وشكرا ليكى بجد لانك اتحتى الفرصه وطمنتينا عليكى
وربنا يديم عليكى السعاده

رغم كل حكدي الدفين
والجز على سناني
ولكن انا سعيدة بجد لما بحس انك انبسطتي

على كده انا كنت بكلمك الصبح وانت مفيصة وبتقولي انا فين انا مين انا مييييييييييييييييييييييييين

يعني رجيم ايه بس مع السفر؟
حكمتك يارب

الحمد لله انك بخير
ومونتي سمك :)
مجبتليش معاك بربوني؟
خياااااااااااااااااااااااااانة

كل لقاء وانتم طيبين
وعلى مستر بلوج سبوت منورين

لولا بس انكم كنتم بتلعبوا في الرمله
يلا ملحوقه ان شا ءالله
نورتوا اسكندريه كلها من شرقها لغربها

ما شاء الله حاجة تفرح بجد

ربنا يحفظكم كلكم ويزيد سعادتكم ويخلد الذكرى ويارب تتكرر والمرة الجايه نكون معاكم

تحياتى

شاب فقرى

حبيت ابدى اعجباى بطريقة السرد والحكى فى البوست والترتيب

وعلى طول كدا يا عادل عايز تشرب نسكافيه

حسابنا بعدين يا دوله يا حبيبى

وبجد البوست فرحنى أوى اوى اوى اوى اوى اوى

تحياتى واحترامى

شاب فقرى

فاتيما حبيبة قلبي

انا مش قادرة اوصف لك اد ايه فرحانة انى سمعت صوتك النهاردة

مع انى بصراحة كنت هاتجنن واكون موجودة معاكم واشوفكم كلكم

وزى ما وعدتك ان شاء الله المره الجاية اكون معاكم

بجد بفرح اوى بالروح الحلوة دى وبالمحبة اللى في الله

ربنا يديمها يارب

ويااااااااااارب اكون معاكم اللقاء القادم باذن الله

عاااااااااااااااااااااا انا كنت عايزة اكلمكم كلكم بس دودو قالتلى لما نوصل هرن عليكى تانى علشان تكلميهم كلهم بس فضلت مستنية لغاية ما نمت على السرير من التعب وقرف الجامعة :( ومصحتش الا على المغرب
يلا تتعوض مرة تاني باذن الله :)
ويارب كده دايما متجمعين فى الخير يارب

ربنا يخليكم ليعض يارب ودايما تعملوا لقائات جميله كده وياريت في يوم ابقى معاكم نفسي بجد يارب

عاااااااااااااااا
كالعاده الزهايمر طفح و نسيت لميعاد
رغم انى اما كلمت لماضه فى العيد اكدت عليها انى حاتصل بس كان فيه شويه مشاكل بقالها فتره و لسه عامله وش فى دماغى لغايه دلوقتى
وحشتينى قوى يا طماطم و اسفه على تقصيرى معاكى
كان نفسى ابقى معاكم قوى لان اللمه حلوه قوى و انا من عشاق الشيخ وفيق

كان لقاء رائع جدا اسعدني جدا اني اشارك معاكم في عمل من الاعمال الخيرية اللي متعودين عليها و اللي دايما قلبي بيتعلق بيها و أنا في الغربة وكنت دايما بوعد نفسي بمشاركة معاكم لما انزل مصر

ده غير ان كل الناس ماشاء الله غالب عليهم الاحترام و الود وكاني اعرفهم من زمان و قعدت القاعدة دي معاهم ميت مرة قبل كده

تنوع كبير جدا في الناس.. اللي أحس تجاههم بالاخوة و نوع من المسئولية و اللي زي صحاب الثانوي و زمايل الكلية
اهتمام ومرح و خفة دم وود

مبهورة جدا بكم المشاعر اللي عشتها بينكم امبارح و حاسة بامتنان كبير جدا

تصحيح بسيط و على استحياء

حسن شحاته مش هو مدرب منتخب الشباب
معلش بقى يا أم يوسف

ربنا يفرحك يارب كمان
وكمان

وانا مبسوطه علشان كلكم مبسوطين
وشكله كان لقاء حلو بيكم
وجزاكم الله خيرا يارب
ويجعله فى ميزان حسناتكم

مش ها قول أنى زعلانة أنى ما جيت لأن دة حقيقى ، لكن ظروفى كانت صعبة جدا ، وكان نفسى اشارك بأى حاجة بس الظروف لم تتيح لى الفرصة ، مش عارفة ربنا مش كان مقدر لى و لا ايه ، عموما خير ، مبسوطة قوى أن ربنا قدركم على عمل الخير و دخول الفرحة لقلوب اليتام ، و ألهم دخول الفرحة لقلبك الجميل ، خالد مش عارفة أقول له أيه غير ربنا يجعله كله فى ميزان حسناته و يبارك له فى أولاده إن شاء الله ، كل الخير الى بيعمله مش بيروح و ربنا مدخره له و ها يرده له بأضعاف إن شاء الله ، ربنا يبارك لكم كلكم و يجازيكم كل خير ، و إلى لقاء خير تانى و ثالث و رابع كمان ولا ينتهى الخير فى الدنيا طول ما فيها ناس زيكم ليهم قلوب بتحب غيرهم و تفكر فيهم و تشيل همهم ، ربنا ما يحرمنا منكم أبدا ، و ربنا يجازيكى كل خير فاتيما و يعوضك كل خير إن شاء الله .

انا كتبت البوست من غير تركيز
وعلى الساعه 12ونص كنت باحلم بالرز باللبن تانى
خخخخخ
نووووووووووم
مهدوووووده
وكلام فى سرك
عملت غياب من الشغل تااااااانى النهارده
مش قادره يابطه والله
بس كفايا عليا انى استمتعت بصحبتكم الحلوه واليوم فعلا كان تحفه
وفرحت قووووووى باللعب مع الموج رغم انه هزاره غلس والبنطلون اتغرق
(:
لما فقت من الغيبوبه اكتشفت انى نسيت ارن على ايوشه علشان تكلمكم
وهو حد يبقى معاكم ويفتكر اسمه حتى؟
اخدتونى من نفسى فعلا والله
وزعلت كمان انى مش اهتميت شويه بهنوده
بس حسيت بده متاخر وهى ماشيه وانا بسلم عليها مش كنت عايزاها تسيبنا وتمشى
وان ستيته روح قلبى مش حضرت وكنت هاعيط وانا باكلمها من شوقى ليها ولانها كانت نفسها تيجى بس ظروفها جت كده

دى سلبيات اليوم بالنسبه لى
اما عن الحاجات الحلوه فهى كتييييييييير جداااااااا

كفايا عليا عروسه البحر اللى عملتيها بايدك و اللى اتكتب عليا اسمى واتعلقت على اللوحه
- عارفين دى ايه ياولاد
- عروسه البحور
- عارفين اسمها ايه؟
- ........
- اسمها دودو وهانقولها كلنا بنحبك يادودو
- بنحبك يادودوووو
_ بنحبك يادودو
- بنحبك يادودووووووووو
كلمات بترن فى ودنى لحد دلوقتى ومسببه لى سعاده فوق الوصف
ماتعرفيش احساسى كان ايه ساعتها
يااااااااااه
للدرجه دى انا شاغله تفكيرك؟
بجد دى كبيره عندى قووووى
والعروسه اللى فرحت بيها قووووى
والهديه القيمه جدا اللى جبتيها لى ياحبيبتى وانا عارفه انها غاليه وبرضه كلفتى نفسك
وانك تختارينى انا بالذات من الحاضرين علشان اختار ورده واكتب عليها اسم يوسف وتتحط فى الفازه مع اسماء العيال
بصراحه ليكى لفتات تجنن
والكرسى اللى دايما محجوز جنبك ليا فى اى قعده محدش يجروء يقرب له
انتى كمية حنان وطيبه مش قابلتها فى حياتى ابدااااااا
ربنا ما يحرمنى منك ابدااااا
وعايزاكى تنزلى اسكندريه فى الشتا وافرجك على جمالها بحق الله
من غير زحمه ولا دوشه مصيفين
ونبقى انا وانتى وحنين بسسسسس
اه عايزين نستفرد بيكى
رغم انى كده كده مستفرده بيكى ومحدش بيعرف يكلمك كلمتين على بعض وانا جنبك
بس ده كله علشان بحبك جدااااا
اه صحيح
انتى عارفه انى بحبك ولا لأ؟

بمووووت فيكى
بوسه وحضونه كبيره جداااااااا
انا هامشى كفايا رغى بقى
سلام

يالهووووى كل ده تعليق؟
ده كبير قوووووووى
هههههههههه
انا فعلا رغايه

فاتيما
نورتينا ونورت اسكندرية كلها
حقيقى ما لحقناش نقعد وقت طويل وذلك بسبب التهاب حاد فى الاذن الوسطى لأعانى منه حرمنى من تكملة اليوم
ولكن سعيدة جدا بمعرفتكم
وان شاء الله نتقابل مرات كثيرة قادمة يا اطيب قلب

بجد مبسوطة كتييييير إنك اتبسطى ربنا يفرحك ويجزيكى كل الخير وإنتى والمجموعة الجميلة على اللى انت عملتوه ومبروك عليكى الأيس كريم مش كنت تفتكرينى فى واحدة

ههههههههه

دمتى بكل الخير والسعادة

بجد كان نفسى اكون موجود لكن ظروف الشغل حالت دون ذلك . انا كنت موجود يوم الجمعه يعنى قبلها بيوم واحد بس للاسف
بعد كده ابقو اعملو التجمعات دى يوم الجمعه يرحمكم الله:)

عزائى انى كنت معاكم بروحى:)

وابقى زورينى فى مدونتى بقا

حمدلله على سلامتك يا ام يوسف
بسم الله ما شاء الله اليوم كان رائع جدا
وفرحة الاطفال كبيرة جدا
باعمالك الفنية وشغلك الجبار معاهم
ربنا يجعله فى ميزان حسناتك
وطبعا خليتى اليوم ليه طعم ولون بوجودك
وربنا يكرم اصحاب الدعوة وكل المشاركين خيرا ويجعله فى ميزان حسناتهم
ومزيد من الايام الجميلة بصحبة اطيب واحن قلب فى الدنيا ام يوسف

ياااااااااه
يا ماما فاتيما
ايه الغيبة الطويلة دى
بجد ماتتخيليش انتى كنتى وحشانى بشكل رهيب مع انك متعرفنيش اوى بس الحكاوى اللى انتى بتحكيها انتى واللى انا بسمعه عنك من لقد خلقنا الله احرارا
خلانى احبك اوى وبحسك مامة المدونين كلهم
ربنا يكرمك يارب

كان نفسى اكون معاكم بس هاكون عاملة زى البرص
ماعلينا انا ودموع القمر عملنا لقاء ع السريع كده جاتلى الكلية بتاعتى سلمنا على بعض وروحت بعدها ع المحاضرة ع طوول
ايه رايك ف اللقاء السريع ده
خفيف حفيف صح :)))))))))))
امووووووووووووووووووووووءة
بوسة كبيرة اوى ليكى يا قمراية انتى

اوعى تغيبى عننا

تانى ابدا ابدا

ربنا يخليكى لينا ومايحرمناش منك ابدا

كان يوم جميييييييييل بجد
فعلا عمري ما هنساه
وانا معملتش حاجه بجد المفروض كان في برنامج كده بس منفعش بقي
المره الجايه ان ئاء الله
وانتي قمر وسكر وانا بحبك جدا كمان
من اللقاء اللي فات وانا حسيت فيكي حاجه كده كانك من حبايب البحر :)

هستني اللقاء الجاي بفارغ الصبرويارب يكون قريب

بحبك في الله يا ارق ام شفتها

السلام عليكم اسمحليى بأول مرور عندك ان احييكى على الروح الجميلة الموجودة بينكم وشئ جميل انكم تتعارفو وتتقابلو وصدقينى احساس صادق وجميل ولو ككررتوها قبل عشرة ايام ياريت تدعونى لانى فى مصر اجازة وراجع بعد عشرة ايام واكسبكم اصدقاءوشكرا ليك ودمتم

ههههههههه واضح انه كان يوم جميل ماشاء الله
ربنا يسعدكم يا رب

أكيد هيجى يوم ونقعد تانى و اتعرف عليكى أكثر معلش تتعود فى غيرها انت عارفه انى كنت فى شغل وجيت عليكم وسفر كمان معلش سماح النوبه دى



اعشق فى الليل ضوء القمر

ازيك ياام يوسف
بقى كده
مش كفايه ماروحناش
كمان جايه تغيظينا
ماشى ماشى
مسيرها تتعوض وتتردلكم
جاتنا نيلة فى حظنا الهباب
فسحه على البحر وايس كريم ورز بلبن
لأ حرام مش قادر اتحمل
ربنا يسامحكم
سلام

عملوها الوحوش
عملوها الابطال
ياريتنى كنت معاهم

بجد انا حزين انى مجيتش خاصة بعد البوست ده
بس الحمد لله انكو اتبسطو
ورحلة سعيده يا فاتيما
وربنا يسعدك دايما ويقر عينك
متشكرين على الشحن المعنوى ده
ان شاء الله نعملكو لقاء فى المنصورة ونشوف همتكم بقى؟؟
ههههههه
تنورونا والله
احييكى على البوست

الحمد لله ان اليوم عجبك يا فطوم

والله بجد كان روعه
واخر نص ساعه فيه على البحر كانت جميله اوى ومش كنت عايزاها تعدى

انا بطنى بقت زى الزتونه
لالالالالالالالالالالالالالالا انا اعترض اكبر شويه قد البرتقانه الصغننه
ههههههههههههههههههههه

ربنا يتقبل مننا اليوم ده ويجعله فى ميزان حسناتنا يا رب

فطوووووووووووم

عايزة اقولك سررررررررر

انا من اول امبارح نايمه وواخده الهديه بتاعتك فى حضنى واشرف شافها وعجبه اوى الشوز بتاع النونو والبفتات والورد يا ستى مصمم يحطه على التلاجه اقوله مش ينفع مصمم على كده بس انا نفذت كلامى واحتفظت بيه

ربنا يخليكى ليه يا حبيبه قلبى ولا يحرمنى من حنيتك ابدا
يا اكبر واصفى قلب
بحبككككككككككككككككككككك

الف سلامة عليكى يا طمطم
يارب تكونى بخير دلوقتى

هى ايه حكاية شابي دى؟

هو خالد جاب بنوتة سماها شابي ولا انا فهمت غلط؟

وجابها امتى الواد ده؟
ماقلناش يعنى
ولا هو كان قال وانا اللى مش متابعة ولا ايه النظام؟

بوست رائع جداً

تقبل زيارتي

تشرفني زيارتك

خالص تحياتي

مجرد موجة

adel
الف حمدلله على سلامتك يا واد
دنا قولت سوووو هيفرجك اسكندرية شارع شارع و مش هترجعوا إلا بعد أسبوع و لا حاجة
طب كويس بركة إنكم بخير
و النوبة الجاية نبقى اول ما نروح نشرب القهوة بتاعتكم دى و نطلع نقضى اليوم كله على البحر بعدها
يعنى يبقى اللقاء الجاى قهوة و بحر و مدونين و بس
انا فرحانة قوى إنك جيت
و ببقى فرحانة اكتر لما بتقف جنبى و اقول إبنى ..احساس حلو قوى ربنا ينولهولك لما يبقى عندك عيال
بحس كأن الزمن طلع لقدام و يوسف هوه اللى واقف جنبى ...هيبقى اطول منى برضو إن شاء الله
و مسمسم زيك
على فكرة نسيت اقولك النضارة لطيفة عليك و عاملة شغل حلو
و البنات هتعاكسك برضو و انا اعمل زعلانة بس فرحانة ....
عقبال كل مرة
خلى بالك من نفسياتك و اكتب فى المدونة عشان وحشنى أقرالك بلاش كسل




mo7ammed
ماشى يا محمد و احنا هنسيب تعليقات عندكم نحقدكم عليها و نقول يا ريتنى كنت معاهم
المرة الجاية تعالى اهلا و سهلا
نورت



لا تشتاق
مقولنا بلاش بحبك دى يا احمد لتنضرب بالنار من الاتنين الصعايدة بتوعى
يوسف و عادل ...كتر خيرك يا بنى على مشاعرك الطيبة دى
انبسطت قوى لما سمعت صوتك
و اللقاء الجاى لازم تيجى مفيهاش مناقشة ...ماشى ؟
طييييييييب


ستيتة حسب الله الحمش
لا يا حبيبتى لما كلمتينى كنت خلاص بقيت زى الفل و فعلا زى ما قولتى يعنى هيا حبكت ريجيم يوم السفر اما انا شخصية غريبة صحيح ؟؟
كان عاوزك اليوم دا يا ريسة و الله
المرة الجاية تتعوض بقى
لما نرسى على الحوار اللى قولتلك عليه فى المكالمة هبقى ابعتلك إيميل فى الخباثة و اقولك العملية هتبقى فى النملية غمتى ...مكلناش سمك لأ ..مليش فيه على فكرة رغم إن سوووو كان هيضربنا نظام جاى اسكندرية عشان اكل كشرى و مكرونة و بيتزا و ابصر إيه بس هوه راجل ديموقراطى و رضخ لرأى الأغلبية و كلنا عند الزعيم فى الآخر
المرة الجاية هنعقد على البحر طول اليوم و ممكن ساعتها نمشيها سمك عشان خاطرك إنتى و سوووو
بحبك قوى يا ستوتى



لماضة
أزيك دلوقتى يا مرمر
يا رب تكونى بخير يا حبيبتى
انا ممتنة ليكى جداااااااااا لأنك نزلتى مخصوص عشان تجيلنا و معلش ملحقناش نقعد عشان إنتى عارفة فرمانات الحاجة امى لو إتاخرت ممكن مجلسش الامن يتدخل عشان تفتحلى الباب و كدا ...
إسكندرية منورة باهلها يا حبيبة ماما

شاب فقرى
متشكرة جدا على ذوقك و تشجيعك
و الله الواحد بيكتب تلقائى من وحى الفرحة فتحس الكلام صادق و لو إنه لغويا و ادبيا مش قوى بس الفرحة بتحلى أى حاجة يا عزيزى
المرة الجاية تشوفنا و تنورنا و تزودنا إن شاء الله
تحياتى و إحتراماتى انا اكتر ليك



reem
يا حبيبتى انا اللى إنبسطت جدا لما سمعت صوتك
المرة الجاية لن أتنازل عن حضورك
عارفة إن كان عندك ظروف بس المرة الجاية الظروف تتاخر على جنب عشان نفسى اشوفك بجد
بوسة و حضونات لحد ما تيجى المرة الجاية تاخديهم رسمى و تمضى بالإستلام




آيوشة
معلش يا آيوشتى حصل خير يا حبيبتى
سلامك وصل للجميع و كفاية بس سؤالك و اهتمامك بالمشاركة فى اليوم



حاسوباتية
إن شاء الله يا حاسوبتى المرة الجاية تنورينا



صيدلانية طالعة نازلة
يا ماما و لا يهمك
يا بنتى إنتى ام لطفلين فى مدارس
و امراءة عاملة دا غير شغل البيت
كتر خير الدنيا إن فيكى دماغ تفتكرى إسمك ..ربنا يعينك
تعرفى كلنا زهايمر برضو ..انا بقيت اكتب فى اجندة صغيرة كل حاجة عشان بنسى كتير قوى التفاصيل و الأيام
دى لوحدها مصيبة ابقى قاعدة فى الشغل على إن النهاردة الأربع يطلع الخميس
منظرى بيبقى زقت قصاد العالم هناك
و لا يهمك يعنى كلنا هذه الشخصية
و مقولتيش ليه يا ست إنتى
كنت كلتلك طبق رزربلبن تانى سلف ؟!!!




Hannoda
صحيح يا هنودتى ..كنا على قدر توقعك
دنتى يا حبيبتى شوفتى جزء من كل
فى القاهرة العدد بيكون اكبر و مسيرك تكونى معانا مرة و تشوفى
عارفة يا قمراية إن حسن شحاتة مش بيدرب منتخب الشباب ..
بس اللى كانوا بيلعبوا مع زامبيا يوميها كانوا المنتخب المزغود الاول اللى حسن شحاتة بيدربه ...
ماتشات كاس العالم للشباب كانت بليل و مفيهاش مصر يا حبيبتى ..
ميرسى لأنك كتبتى تعليق و طمنتينى عليكى يا ام عيون حلوة
عيون حلوة
عيون حلوة
و بتنكسف لما حد يقولها كدا فعنيها تحلو اكتر



بنت قلبى
الله يخليكى يا بنت قلبى
إسمك حلو قوى
المرة الجاية تشرفينا إن شاء الله
و تنورى



ام بتول
كل شىء بمعاد يا حبيبتى
و إنتى معانا بالدعاء و التشجيع برضو
و مرة تانية إن شاء الله ربنا هيسهلها و تيجى أصل اللقا نصيب
ربنا يجازى اصحاب الفكرة دودو و حنين كل خير و يجازى خالد الجدع دا على جدعنته و ضياء و داليا ماى كورنر و كلهم كلهم يا حبيبتى لأن كل حد فيهم بيقوى التانين و يشجعهم
خالص حبى ليكى يا حبيبتى و يا رب تكونى مبسوطة بالقرار اللى خدتيه

عاشقة الرومانسية
يووووه يا دودو
طولى و لا يهمك دى مدونتك هيا مدونة حد غريب ...
غيه كل اللى قولتيه دا ... لهو كنتى عاوزانى معملش كدا و اكتر من كدا ميت مرة ؟
عارفة إنك بتحبينى بس إنتى كمان متعرفيش غنى بحبك ؟؟
انا قاعدة بحضر لليوم من ساعة ما اعلنتوا عنه و كلى فرحة و حماس و لما تكونى بتعملى حاجة لحد بتحبيه لازم يطلع منك حاجاجت تلقائية تعبرعن الحب دا بأى شكل
العروسة بتاعتى اخبارها إيه؟؟؟؟
و عروسة بحورى انا الحلوة كمان عاملة إيه؟؟
يا بختك خدتى اجزة انا قمت مضروبة تلاتين ...... و روحت الشغل بس جيت على ساعتين قبل المرواح و كنت هناك على الكيبورد ...بس لما روحت غديتها نوم متواصل و خلاص صحصحت أهو
عقبال المرة الجاية و ع البحر زى ما إتفقنا
نا كمان حسيت إنى مخدتش بالى من هنودة بما يجب و يليق بيها و عذبنا معانا حنين بالمشى نبقى ناخد بالنا المرة الجاية
انا عاوزة اسجل إعجابى بشطارتك إنتى و حنين و لا كأن اللقاء دا بيحصل اسبوعيا ماشاء الله عليكم
خلوا بالكم من بعضيكم بقى لحد المرة الجاية تكون حنين ولدت و نيجى نشوف النونو
بوسة و حضونااااااااااااااات





القدر و انا
سلامة حضرتك الف سلامة
عشان كدا مقدرتيش ترجعى تانى ...معلش بس زمان اشرف زعل قوى و اوعى يكون عيط
ما شاء الله عليه ...فكرنى بيوسف
كمان بنوتك زى القمر ..الله اكبر
المرة الجاية تتعوض و شكرا على عرض حضرتك الكريم ...مش مستغرب يعنى منك
خالص ودى لحضرتك



(JOUDY)
الله غنتوا جايين تقولوا بعد ما رجعت ؟
مقولتيش ليه كنت كلت واحد على حسك
بس غنتى اللى تدفعى بقى ..هاااه
المرة الجاية تكونى من الحاضرين إن شاء الله يا جودى

MOHAMED HAMDY
معلش حصل خير يا محمد
المرة الجاية تكون معانا
و الله المعاد بيبقى حسب اللى بيرتب المعاد و غالبا يا يوم جمعة يا يوم سبت يا محمد نعمل |يه ما دى ايام الأجازة المتاحة و حسب الترتيب بتحدد
و ممكن اكتب جملة للمجاملة و اقولك حاضر هبقى آجى ..بس انا هكلمك بصراحة و اقولك إنى مش هزورك يا محمد عشان زعلانة منك و واخدة موقف إحتجاجى صامت منك و لغاية ما يتغير هفضل محتجة صمتاً ..
بس خلاص




همس الاحباب
الله يسلمك يا أبو همس و شابى
منحرمشى منك خالص يا رب
معلش قلقلتك ع الصبح و كمان اصريت توصلنى لأقرب مكان عشان تطمن عليا مع انى عارفة ان وراك الف حاجة
بس دى شيم الاخوة و الرجولة و الجدعنة
اللى متجسدة فيك بجد



بيطرية و مش بإيدى
اهلا يا حبيبتى بيكى و بأى حد ييجى من طرف الأستاذة بتاعتنا
كلها ذوق و إنتى كمان
و إيه دا بقى ما شاء الله
بتعملوا لقاءات كوتيمى على جنب على هامش المؤتمر التدوينى السكندرى و لا إيه؟؟
مينفعشى كدا كنتوا جيتوا نورتونا
المرة الجاية ممنوع الخفيف خفيف دا
و كله من النوع التقيل ...
بوسة و حضونة ليكى يا حبيبتى
و مفيش غياب و لا حاجة انا موجودة أهو

حنان الشافعى
معملتيش !!!!؟
يا بنتى دنتى خسيتى ييجى اتنين كيلو من المشورة لبوابة النادى تجيبى الناس اللى جم على دفعات من الدار و بعدين جوعناكى و إنتى مبتاكليش برا خالص و عذبناكى معانا ...
بس اليوم كان حلو فعلا و البركة فيكم
إن شاء الله يا حبيبتى اشوفك على ألف خير المرة الجاية
و تكون قريب
بوسة و حضونة عشان خاطرك و خاطر البحر



كلمة صدق
نورت يا هاشم
و شكرا ليك على كلماتك الطيبة
و الله لو فيه لقاء قبل الوقت
اللى بتقول عليه
فاكيد هبلغك و اسيبلك تعليق فى مدونتك
و بالمانسبة باحييك على إسمها
تسافر بالسلامة إن شاء الله



سومة ... مجنونة فى بلد عاقل
سمسومة
ازيك يا قمر
عاملة إييييييه
الجو عندك شكله عامل غزاى
و راجعة امتى
وحشتينى
كان عاوزك اليوم دا ..كنتى هتنوريه و تتعرفى بناس حلوة شبههك قوى
المرة الجاية بإذن الله
بوسة و حضونة قد كدااااااااااااااا


أعشق فى الليل ضوء القمر
إن شاء الله يا باشمهندس يحصل
و كتر خيرك بصراحة إنك عرفت تلاقى وقت تيجى تطل علينا و تسلم
المرة الجاية من اول اليوم بقى
و إلا نخطف الشنطة اللى كنت ماسكها دى و نحجزها امانات متاخدش الا وقت المرواح
سلامنا لفاطمة .. بس مدونتها مغلقةليه؟؟
لعل المانع خير إن شاء الله



المعتصم
ماهو لازم نغيظم يا مصطفى
اومال يعنى نجيب منين محفز قوى اكتر من كدا عشان يخليكم تيجو المرة الجاية و تشاركوا معانا ؟؟؟؟
انت مشوارك صعب انا عارفة
بس مسيرك تعوضها و تنورنا إن شاء الله
و يا عم الأيس كريم و الرزبلبن فى كل حتة
بس البحر بقى ملوش حل
خصوصا بحر إسكندرية الماريا دى اجمل بقاع الأرض
و اهلها كمان نجيب زيهم منين ؟
أهى دى ملهاش حل



مسدس صغير
المرة الجاية يا صاصا
يا عم رتبوا انتوا و قولوا المعاد و المكان و احنا فوريرة نيجى على عينيا إنشالله مشى
بس وحياتك زحزح المعاد ييجى شهر
و لا حاجة لحسن الواحد عاوز هدنة شوية و عشان يعرف يضبط الميزانية
المنصورة منورة بيكم يا بنى



حنين القلب
إهى ؟؟؟دا سؤال ينسأل يا حنونتى
طبعا كنا فى عز الفرحة مكنش باين علينا و لا ايه ؟؟
متفقة معاكى جدا و عشان كدا الزيارة الجاية هتكون كلها قصاد البحر
و انتى شكلك و انتى قاعدة اصلا كان حلو قوى
قوى
و انا بقول زتونة عشان الحسد
إنما يا حبيبى يا رب يكبر و يتشاقى و يعمل زى ابن دوبا اللى كان بيدينا بالبوكس لما نحط إيدنا بس نسلم عليه من برا
و عاوزة تسميه عمر برضو
خلى بالك من نفسك و النبى
و اديها رزربلبن و ايس كريم و زبادى بالفواكه او من غيرها و جنبة رومى و اى حاجة من مشتقات الجبنة بشكل يومى
عشان الكالسيوم الله يكرمك
و الحاجات اللى بتقولى عليها و لا حاجة من اللى ف بالى اجيبه بس معلش الميزانية كانت بايظة شوية و المرة الجاية هحاول اجيب اللى يليق بالنونو القمر و سلامى الكبير لأشرف
بس بكرة لما البيبى يلعب بالشخاليل
و يصدعه
هيدعى عليا بالصوت الحيانى
انا كمان بحبك يا حبيبتى


بت خيخة و أى كلام
انا بخير يا نونو و بقيت زى القردة
و الله يا خيخة انا كنت زيك بالضبط
لقيت إذ فجأتن بوست
عند حنين القلب بتبارك لخالد
على شابى
روحت بعتاله إيميل اساله
بجد الكلام دا و لا البناتيت بيعملوا فيه حركة عشان بوست الرمى فى البحر و المناغشات اللى بينهم دى ..
لقيته بيقولى
- أيوه .. جبت شابى
- و مقولتش ليه يا واد ؟
- منا فاكر إنى قولتلك
- يوه .... مقولتش
المهم ألف مبروك
و إنتى متابعة يا ست الستات و لا يفوتكيش فوتة
هوه اللى من كتر ما حبايبه كتير
ممكن يكون افتكر انه قال للناس كلها و عرفوا
المهم إن البنوتة جت بالسلامة
و ورانى صورتها
ما شاء الله طالعة زى القمر
عقبال ما نفرج بولادة سى عمر
مش دوبا تشد حيلها بقى
المفروض الأيام دى ...مش كدا ؟
ربنا يقومها بالسلامة يا رب
بوسس لشيكو يا حبيبتى



موجة
اشكرك يا موجة
و متستهونيش بنفسك كدا
الموجة مش حاجة قليلة
دى حركة و حياة
و جايبة معاها الخير
و لو كنتى شوفتنيا و إحنا فى البحر بنجرى من الموجة لتغرقنا و تغرق الهدوم مكنتيش كتبتى مجرد دى خااااالص
نورتينى و إن شاء الله ارد الزيارة

أجمل وأطيب انسانة قابلتها:
بجد سعيدة جدا لانى تعرفت عليكى والتقيت بك,وكنتى منورانى ومنورة اسكندرية كلها,ويارب دائما نلتقى بإذن الله على خير.
أشكرك جدا على ذوقك ورقتك فى التعامل معنا جميعا.


خالص تحياتى

نهر الحب

السلام عليكم
ماشاء الله على اسلوبك بجد رائع
استمتعت بالبوست واحسست بجمال الاسكندريه وجما الرحله
اتمنى ليكى دائما السعاده
تقبلى تحياتى
ودمتى بود

يااااااه يااطيماتااااا
كل ده ماشاء الله
خسارة كبيرة على إذاعة ال بي بي سي إنه لا يوجد لديها مراسل بعبقريتك وحرفيتك فيي نقل الخبر والتفاصيل والتقارير بتلك الدقة العالية
واضح طبعاً إنه كان يوم جميل ورائع بصحبة باقة جميلة من المدونين والمدونات على أجمل أرض وأروع شط مدينة وشط إسكندرية
شط إسكندرية ياشط الهوا
رحنا إسكندرية ورمانا الهوا

إرجو من الله أن يديم ذلك التواصل الجميل وهو ليس بغريب على شعب مصر الجميل
تحياتي
حسن أرابيسك

hey :)
7amdellah 3alsalama ya sety, we nawrtouna wallahy, m3lesh mknsh nafe3 agy, bas tet3wad elmarra elgaya insha2allah, we kan nfsy ashofik inty we soooo bas 5erha fe 3'erha b2a, we hato 5o5a m3ako hya we shiko ah :D
tab m3entolish taba2 koskosy belmksarat men elshe5 wafee2, ya zalama :'(

t3esho we tetskandro :D

ربنا يجعلها في ميزان حسناتكم
دوم المحبه بينكم

http://elbald-dy.blogspot.com/2009/10/blog-post.html

ده بوست اخيرا عشان خاطرك بس صدقيني

ومليش لسه مزاج بس مقدرش اكسر كلام حضرتك ابدا :):)

فاطيما
كلامك عن اللقاء مشوق جدا وبجد انا كان نفسي اكون معاكو بس الموضوع راح من دماغى خالص
رجاءا لما يكون فى لقاء زي كده ابقو فكرونى بتعليق اوبإيميل لأنى بجد اللقاءات دي مهمه قوي وتأثيرها على الواحد بيكون كبير
تحياتى لك دائما ويارب يقدرلك الخير

حبيبتي طماطم

والله انتي عسل ولو السرد الجميل والتفاصيل اللي عيني طلعت عليها كنت حقدت بقى وفقعتكم عين ارض جو عابرة للقارات ...

اصل اسكندرية دي بقى هي اخر حاجة واجمل حاجة حاسة انها هتفضل رغم اي شىء


انا بس كنت عايزة اجي عشان الرز باللبن ..مدمناه والواد نور كمان

يلا بالهنا والشفا يا ستي

وبوسات وحضونات

السلام عليكم ورحمة الله وبركاتة ..
الله يكرمكوا يارب شاركونى يوم مقاطعة الفيس بوك يوم 24 /10 وياريت تشوفوا موضوع المقاطعة على مدونتى ومعاية بأذن الله

نهر الحب
انا كمان يا نهرورة سعيدة بمعرفتك
إنتى زى ما ناس كتير قالت
بتاخدى على الناس و تقربى منهم قوى و تلغى المسافات بين القلوب بسرعة
و دا بيدل على إنك انسناة صافية و لطيفة و حبوبة و كفاية لحسن كدا شكلى بعاكس
غن شاء الله تتكرر الايام الحلوة دى دايما
خالص حبى يا حبيبتى



tarek alghnam
وعليكم السلام يا بورسعيدى
أزيك يا فندم ؟
المرة الجاية تيجى معانا و تكتب بوست احلى من كدا ميت مرة ما دام هيكون بأسلوبك المميز
إن شاء الله
تقبل إنت كمان تحياتى




حسن أرابيسك
شوف لما اسمك بينكت فى صفحة التعليقات بتنور أزاى ؟؟؟!!!
طب كل التشجيعات دى و مفيش مرة نجر رجلك للقاء من دول ؟
مش يمكن يعجبك وشوش و ترسمها
او منظر على البحر و ترسمه
يعنى إعتبرها رحلة عمل طيب ؟
تحياتى ليك يا فنان يا كبير القلب و المقام



z-diva
بت يا ديفا أنا زعلانة منك
مجتيش لييييييه ؟؟؟
يعنى من غير خوخة ما تكون معانا متجيش ؟!!
طييييييب المرة الجاية تكون اول واحدة يا ستى
حلو قوى المصطلح بتاع
تعيشوا و تستكندرو
حلو بجد




عاشقة القمر
الف شكر ليكى و المرة الجاية تكونى معانا إن شاء الله



adel
روحت فوريرة خلاص يا ولدى العزيز
هوه انا أقدر مروحش ؟



مصطفى ريان
يا لهوى يا مصطفى ؟
دنا سايبة تنويه فى الشريط الجانبى للمدونة بتاعتى بقاله ييجى أسبوعين يا شيخ
قول بقى إن إنت مبتدخلش مدونتى بقالك أسبوعين بقى بقى بقى
إن شاء الله المرة الجاية اسيبلك تعليق عندك عشان ميبقلكشى حجة يا اديبنا يا كبير



zianour
لأ إنتى بالذات ملكيش حل
إنتى فى قارة تانية نعمل إيه فيها دى بقى ؟؟!!!!
كأنك معانا يا حبيبتى
و كفاية قلبك و تشجيعك و المرة الجاية اكولك طبق لوحدك و على حسك أنا مقولش للأيس كريم لأ ابدااااااا
بوسيلى النور و الزاد



طهر فؤادك
أهلا بيك
إنت جيت لأول واحدة هتوقف جنبك فى الحكاية دى لأنى مبدخلش الفيسبوك أصلاً خالص من غير أى أسباب
أعتبرنى مشاركة ... و من غير أى اسباب
نورت

ما تعرفيش فرحتي بالبوست ده قد إيه
خصوصاً إن إسكندرية فركة كعب من دمنهور و كان حيبقى المشوار ساهل لو في مصر
:)
فرحت لمقابلة الناس الجميلة دي كلها خصوصاً إن فيهم كذا واحد نفسي أشوفهم و أقعد معاهم

أيوه كده الله ينور عليكي وافينا بالتفاصيل الدقيقة بتاعة اللقاءات مش شغل التنقيط بتاع بعض المدونين التانيين ده

الكلام بتاعك ده هو اللي بيحسس الواحد بإنه لسه في مصر

ربنا يسعدك دايماً يا أم يوسف

بعيدا عن الحق المعتاد وان كان مضاعف هذة المرة لانها العزيزة الغالية

الا اية حكاية الرز باللبن بالمكسرات بالآيس كريم دة

كل دى حاجات على بعض

تصدقى نفسى اجربة

يارب ديما مجتمعين ف الخير ياحبيبتى ..

مهندس مصرى
انا فرحانة لفرحتك يا محمد
و نفسى ترجع بقى عشان تقضى معانا ايام زى دى من اولها لآخرها
و ساعتها هستنى البوست بتاعك بفارغ صبر و افرح لما اقراه زيك
ترجع بألف سلامة يا غالى




دعاء مواجهات
و الله يا دودى انا قولت كدا لعاشقة الرومانسية لما قالتلى ناكلوكى رزبلبن بالمكسرات
شهقت و اتخيت و قولت
يا لهوى !!!
كل دى حاجات فوق بعضيها ؟
بس بالتجربة العملية
أنصحك تاكليه فى اقرب فرضة
يا دودى هيعجبك بجد
هنا فى القاهرة فيه المالكى ...
بيعمل الحاجات دى حلو قوى
الواد ماجد اخويا بيروح ياكل مع اصحابه الحاجات دى
و كنت لما بشوف المينو و اقرى الأصناف كنت بشهق برضو و اقوله
يا لهوى !!!!!!!
المرة الجاية تكونى معانا يقى

إرسال تعليق