.

.

خمس خطوات  

Posted by: فاتيما in

بعدى الشارع كالعادة عشان اروح محطة المترو
فى المشوار اليومى للشغل
كل مرة المحها قاعدة على الرصيف عمالة تبرطم
شوية تزعق فى اللى ماشيين
و شوية تسترضيهم
و شوية تكلم ربنا
وشوية تدعى على معرفش مين
بس اكيد بالفكاكة ممكن اخمن
إنها بتدعى على كل اللى كان السبب
و خلاها تتحوج للناس فى أرذل العمر
انا عندى سياسة فى التعامل مع الناس اللى ف الشارع دى بالذات
مبحبش عموما أدى أى حد أى حاجة
لأنى بحس إنهم مش محتاجين فعلا و إنها تجارة منظمة
بس الأطفال و العجائز ... باجى لحدهم و مبقدرش اتجاهلهم مطلقاً
مش لسبب عاطفي و بس .. لكن اول ما اشوف حد فيهم
عقل بيشتغل فورا ف ميت الف اتجاه
الأذى اللى ممكن يطول الطفل الصغير لو مرجعشى بفلوس محددة
و العجائز كمان ..متقدرش تقولهم زى ما بتقول لست او راجل صحته كويسة
متروح يا عم تشتغل و لا امسكى كلينكس بعيه يا ستى
الموقف مع الاطفال
و الكبار مختلف فعلاً
و بيكون السيناريو معاهم فى الغالب كالآتى
اعدى من قصاد الست العجوزة
تلمحنى ببعض من بصيص النظر اللى فاضلها
فتنادى عليا
ساعدينى يا بنتى ... ادينى حاجة
بينى و بين نفسى اقولى ... انا مستعجلة و عاوزة الحق الشغل
فأخطو اربع خمس خطوات للامام
و أعديها
و بداخلى صراع
و مونولوج داخلى لا يهدأ
متاديها أى حاجة ؟
مستعجلة وراكى الديوان يا خى و الكام ثانية دول اللى هيعطلوكى ؟
مش محتاجة دا إيه إن شاء الله ؟؟
هوه فيه اكتر من كبر السن ... سبب للعوز ؟
و لا عشان ربنا مديكى شوية شباب و حبة صحة متحسيش بغيرك ؟
مش يمكن بكرة تبقى مكانها و متلقيش اللى يشيلك ؟
و لو لقيتى ؟... مش تحمدى ربنا بقى من دلوقتى ؟
و تفكرى حبة فى اللى مش لاقى حد يفكر فيه ؟
عصابات منظمة إيه و نيلة إيه اللى دماغك راحت عندهم دلوقتى ؟
طب لو حتى فيه ناس بتشغلها فعلاً و تكسب من وراها
مهم هيدوها نصيبها عشان تاكل و تشرب و تعيش
يعنى اسمك ساعدتيها برضو
مش لازم كل يوم يعنى .. خليها كل كام يوم
و مجراش حاجة
يلا ربنا يهديكى متحجريش قلبك
و بقولك ... قوليلها كلمتين كويسين و راضيها متحسيسهاش إنك بتمنى عليها
آه ... و متطلبيش منها و انتى بتديها الفلوس انها تدعى ليوسف ربنا يحفظه
خلى عندك دم ... ميصحش تعملى الخير و تطلبى مقابل قصاده
و لا ّ تكونيش فاكرة إن الفلوس اللى ربنا باعتهلك رزق دى بتاعتك لوحدك ؟
طب باقى الناس نصيبها فين ؟
اوعى تكونى فاكرة إنك كدا بتعملى خير و احسان ..دا حق الناس و ربنا عليكى يا امى ؟
.يعنى غالباً متنتظريش حاجة من وراه ..و اتصرفى على هذا الأساس
بتقولى مش عاوزة الناس تشوفك ..و بتنكسفى و تخافى يفتكروكى بتتمنظرى؟
إنتى مالك و مال الناس ؟
و ما قولنا بلاش تدورى على الثواب و الا مش هتعملى حاجة
اقولك .. فكرى فى الكام دقيقة رضا اللى هتعدى على الست الغلبانة دى
بعد ما تديها الفلوس و تحس إن حد أستجاب لها من غير ما يذلها اكتر و اكتر
ما هيا حاسة بالذل
و بهوانها على الناس .. دول كفاية قوى
ارجعى لورا الكام خطوة دول يلا ... و اديها اللى فيه القسمة
و مش كل مرة تخلينى ابعترلك كرامتك ع الصبح
أل عصابات منظمة و أل كابونى ... أل
اعود بحماس خمس خطوات للخلف
اديها اللى ربنا كاتبه يطلع من شنطتى
تدعيلى بشوية كلمات لا اتبينها
و امشى فى سكتى طوالى

أقول و قد ناحت بقربى حمامة
أيا جارتا لو تعلمين بحالى

This entry was posted on الأحد, أكتوبر 18, 2009 and is filed under . You can leave a response and follow any responses to this entry through the .

40 كــــلام بيطــبطـــب عـــلى قــــلبى و روحــــى

اول تعليق رغم المرض ؟؟

ممممممم

لو حضرتك مفكرتيش كده مين هيفكر

بس انا فعليا واخد قرار مديش حاجة للناس دي لانهم فعلا منظمين جدا و لو مدتهوش مش هيموت من الجوع لان اللي مشغلنهم بياكلوهم اللي يخليهم عايشين عشان يفضلوا يجيبوا فلوس
و كذلك الاطفال

شوفي انتى عندك حق على فكره

انا باعمل زيك كده برضه

بالنسبه للاطفال والكبار فى السن
باكون مش قادره اتجاهلهم ابدا

بس فكرتينى بواحده ست كبيره كانت بتقعد فى الطريق وانا راحه المدرسه الثانوي

كانت الى ما يديهاش حاجه تقعد تدعي عليه لما تقول بس
هههههههههههههههههههه

اه والله وبعد كده عرفنا انها عندها عماره وولادها محترمين جدا
بس هى الى عقلها مقضيها على كده

الاغنيه حلوه حلوه يا فاتيما

عادي احنا اساسا وش اكتئاب ما انتى عارفه

هههههههههههه







سلامتك يا عااااااادل مالك

انا زيك كده تمام , لأول وهله أمشي أو أرفض وبعد ما امشي يفضل ضميري يأنبني وأقول لنفسي مش يمكن محتاج فعلا مش يمكن ربنا باعتهولي عشان اساعده وربنا يكرمني بسببه أو يغفرلي ذلات وأخطاء بالصدقه دي , وأقعد أفتكر إن المرء يحشر في ظل صدقته يوم القيامه وإن من الصحابه اللي كان إذا لم يمر بيه سائل أو محتاج في يومه يقلق ويشعر إن ربنا مش راضي عنه , أروح جايب لورا وراجع تاني ومديله
وأقول لنفسي نفسي مره توافق على طول وتدي من غير ما تفكر
وكتير بحس إني فعلا إديت حد مش محتاج ويمكن إستغلني أو ضحك عليا , أروح مبتسم وقايل انا كنت قاصد بيها وجه ربنا وهي قد وقعت في يد الله قبل ما تقع في إيده , فمش مهم بقى

يعني الخلاصه إنه حتى لو قناعات عقلي رفضت , فإن قلبي ( العبيط غالبا) بينتصر هههههه

تحياتي الخالصه

انا كدا بالظبط يا فاتيما مهما يكونو بردو بيصعبو عليا

وفي الاخر بقول انا بعمل اللى عليا ولو هما مش محتاجين دا ذنبهم هما مش انا

طريقتك حلوة اوى اوى بيعجبنى ازاى بتقدرى توصفي حوارك مع نفسك

بستمتع بيه جدا

بحب اوى احساسك بالناس وقلبك الحنون

ووحشانى كالعادة طبعا

ريحتينى يا فتيما كنت فاكرة الصراع ده عندى لوحدى وخلتينى افكر فى حل كنت فاكرة انى أكبر دماغى هو أفضل حل بس بجد جزاكى الله كل الخير صلحتى عندى حاجات كتيير كان لازم أخد بالى منها ميرسيييي كتييير

دمتى بكل الخير والسعادة

adel
سلامتك يا بابا الف سلامة عليك
و على فكرة كنت بفكر زيك
لوقت قريب
يا عادل
بس الواحد دلوقتى بيحط نفسه مكانهم
يعنى لو انت كبير ف السن
تفتكر هيكون بمزاجك قوى انك تسيب واحد بلطجى يجبرك على هذه المهانة ؟؟
و تقدر تهرب منه
و متعملهاش
و قيس كدا على الاطفال
بتلاقى قلبك يتعصر اكتر و اكتر
لأننا المفروض نخلصهم من العالم الزبالة دى
بس مبنعملش كدا
إحنا مين ؟؟؟؟
البوليس
و الشئون الإجتماعية
و المجتمع المدنى متمثل فى الناس الموسرة كلهم مجتمعين لأن بإيدهم الحل و السلطة
و الرحمة الإختيارية مش الواجب المفروض طب البوليس
و بيطنش
و الشئون الأجتماعية
بيروقراطية و قلة امكانات
و الناس الموسرة
بتفقد الثقة فى انها تساعدهم
يبقى الحل ايه طيب ؟؟
نسيب راجل و لا ست
فى شيبتهم يتبهدلوا اكتر و اكتر ؟؟
و لا نسيب طفل يتهان و يستغل اكتر و اكتر عشان مرجعشى بالحصيلة بتاعته
كما هو مفترض ..
و طبعا انتى عارف اسلوب الأستغلال هيكون ابسطه الضرب
و ابشعه إيه
و لما دماغى تمشى ورا الاحتمالات دى بالتدريج بغير رأيى
و ارجع خمس خطوات لورا من تانى
لأنه الحل الوحيد اللى ممكن اعمله
و اهو احسن من مفيش
خلى بالك من صحتك بقى
عشان تخف بسرعة و النبى




صبرنى يا رب
ازيك يا صبصوتى
انا كمان ايام المدرسة الثانوى و الجامعة كنت اكيد همشى من جنبها و ميهمنيش ...
دلوقتى هشوف إن عصبيتها و رد فعلها صحيح ينم عن خباثة
بس كمان ناتج عن كبر السن و الضغوط و قلة الأهتمام اللى تستحقه من حد قريب زى الأبناء و الجيران و كدا
و ممكن فعلا يكون علة فى العقل زى الحكاية الى قولتى عليها
الواد عادولة عنده برد شديد و الدكتور قايله يقعد ف السرير و يرتاح و يا ريت يكون بيعمل كدا عشان يبقى تمام إن شاء الله



محمد فوزى
قلبك مش عبيط يا محمد خالص
قلبك فيه الخير يا عزيزى
و بعدين كويس و الله انا كنت فاكرة إنى لوحدى اللى بتبقى مترددة كدا طلعت الحالة عامة
تحياتى ليك يا محمد و خالصة من القلب




reem
انتى كمان يا حبيبتى وحشتينى
و يظهر كلنا بنعنل كدا
بنيبها لضمير اللى قصادنا
بس نحاول نعمل جزء من اللى علينا
بوسيلى البناتيت

(joudy)
يا حبيبتى لو قريتى التعليقات لحد لوقتى هتلاقى اغلبنا بيصارع قناعاته
بيخاف تكون مبادرتهتشجيع للبلطجة
و يخاف تقاعسه يكون فيه ظلم للغير
فيبحاول يمسك العصايا من النص
لما كنت فى سنك و سن الواد عادل ابنى البلد دى فيها حكومة كنت متبنية وجهة النظر الاولى عشان عاوزة الدنيا تمشى صح
و صح قوى
لكن بانقضاء الوقت و الزمن مش كل حد بيعمل حاجة بيكون راضى و فرحان و مبسوط و يمكن مساعدتك ليه تعدى يوم اسود هيمر عليه بينما انتى هتمرى جنبه عادى ...
خالص حبى ليكى يا حبيبتى

والله انا ماليش دعوه هياخدوهم هيعملوا بيهم ايه
دى ذكاه وانا باخد ثوابها وخلاص وربنا هو المطلع

جزاكى الله خيرا
غالبا بنفكر نفس التفكير
بس فعلا كبار السن وخصوصا السيدات بيخلوا الواحد صغير قوى قدام نفسه وبيحس بتانيب الضمير لو ما ساعدهمش
وبيفكر يا ترى فين اولادهم او اخوتهم او اى حد مسئول عنهم ليه يعملوا فيهم كده
وغالبا نفاجىء بانهم بيصرفوا على اولادهم وابنائهم ولا حاسين بيهم اساسا
تحياتى

والذين في اموالهم حق معلوم
للسائل والمحروم
الشيخ الشعراوي عليه رحمة الله يقول لك للسائل
اللي يمد ايده لك
فما بالك بشيخ عجوز
ربنا يتقبل منك

السائل اديه إلا لو نطع
مع اني حتى لو نطع ها اديه برضه .. بلدنا مليانة امراض مزمنة عجزت الناس بدري
ممكن يكون شحط قدامي وعنده اللي ربنا يعلمه من كبد او فشل كلوي او اي بلوة مسيحة

ربنا يغنينا كلنا عن السؤال ويجعل رزقنا من يد الكريم ليدنا دون ذل او وساطة بشر
يارب

بحبك

ملحوسة: قولي لأبنك سمعتك انضربت قوم يا مصري
اخر كلمة
قوم ياض يا مصري يالا شمتت فينا الموزمبيقين
فين الشوباب؟ والكالسيوم؟ والحديد؟ طب ان شا الله بوتاسيوم يا عدولة
يا كسول فين بوستاتك المتكلفة؟

الحق
التعليق الحادشر قبل الخمناشر
والتربنتاشر

انا اول مرة اجاى قبل الزحمة

هاروح اقرا وارجع تانى
ادعيلى يا ماما فاتيما

يابخت يوسف الامور بيكى
بجد ام مثالية كفاية انها عارفة ربنا دى ف حد ذاتها بكنوز الدنيا
ربنا يبارك فيك ويرزقك من حيث لاتحتسبى
وشوفى بقى جزاء من ادخل سرور على قلب مسلم وان شاء الله هاعمل زيك
والله انا كنت بفكر زيك كده بس مشكلتى انى مابرجعش الخمس خطوات دول بفضل ماشية واقعد اقول يعنى هيبقى باين اوى انى رجعت والناس بقى تشوفنى وانا بديلها واتردد وف الاخر بمشى
بس طظ بقى ف الناس ويقولوا اللى يقولوله وان شاء الله هاعمل زيك وافتكرك ساعتها وادعى ربنا انك تاخدى ثواب زى واكتر منى كمان

ربنا يجازيكى كل خيييييييير
هامشى انا بقى
سلام

طبعا لازم نحكم على الناس قبل مانديهم عشان اللي بياخدها صنعه بيستحلى اللصنعه وبيتمادى فيها

بس اللي اعرفه ان الرسول صلى الله عليه وسلم عمره ما رد سائل

وفي كل الأحوال طبعا ممنوع منعا باتا نهر السائل

كتابة جيدة ومشاعر رقيقة

ربنا يكرمك يارب يا ام يوسف بجد عجبتنى مشاعرك واحساسك تجاه الاخرين هى دى الافعال والا فلا
تعرفى كل اللى بيدور فى دماغك ده كتير اوى بفكر فيه بس فى الاخر بلاقى نفسى تلقائيا رايحة لحد عندهم واحاول اساعدهم وساعتها بنسى المنظمات والتجارة وانهم ممكن يكونوا اغنى مننا
نعمل ايه هو الستات كده قلبها رهيف
شفقة

ربنا يكفينا شر الأيام

أعطي بنيتك وهي المساعدة وعدم رد سؤال المحتاج

جزاك الله كل الخير يا أم يوسف

وحشتييييييينى يافاتيما جدااااا

انا كمان والله ساعات كتير بافكر كده
والسينما ظهرت لنا الناس دى بشكل بشع
وانهم بيدعوا المرض والحاجه وهم مش كده
بس نرجع نقول ان ربنا اعلم بخفايا الصدور
واحنا لو فعلا فى نوع من التكافل الاجتماعى بينا مش هتلاقى حد محتاج
لكن هنقول ايه؟
حسبى الله ونعم الوكيل
البلد كلها فى كرش الكُبار

ايه ده؟
انتى لغيتى تعليقات المجاهيل امتى؟
(:

جميل البوست ده
فيه حنية و رقة كثيرة
انا برده بيصعب عليا حال العواجيز
دووول بس صراحة بقيت زى عادل
مش بدى بمزاجى
بحسهم نصابين


على فكرة الصورة اللى مع البوست
حلوة و اختيار موفق جداً

يا أحن أمك ربنا يارب يقدرك على فعل الخير ...ويردلك يوسف وتتمتعى بيه وتشوفيه بيكبر قدامك يوم بعد يوم ...ويحقق لك فيه كل إللى تتمنيه يااااااارب
عاملة إيه يافاتيما بجد مفتقدك جدا
يارب تكونى بخير

اولا ازيك
وثانيا بجد انتى عندك حق فى ناس كتيره جدا تستحق وناس لا

وفى ناس غلسه اوى وتتنح كده طول ما ما هيا واقفه بجد بستحقرهم جدا لانهم اصلا مش محتاجين
لان مدت الايد دى كبيره اوى للنحتاج بجد
بس هنقول ايه غير ربنا يدى يارب لكل الا محتاج

عارفة يا فاتيما
أنا تقريبا كده الأفكار اللي روادتك دي دايماً بتراودني
بس مش في وقتها
يعني مش بتروادني لما اكون متعرض فعليا لموقف زي كده
بتيجي على بالي في اوقات تانية خالص ممكن اكون مثلا بأفكر حاجات كتير و تقوم الأفكار دي زانقة نفسها ما بينهم
انما لما باتعرض لموقف من دول فعلياً
بألاقي نفسي بدون تفكير أقوم ضارب إيدي في جيبي و مطلع اللي فيه النصيب من غير عد و مدّيه للي قدامي
اقولك على حاجة

من فترة كده لما كنت شغال في القاهرة كنت نازل من الشغل رايح أصلي المغرب
قابلتني واحدة ست على كتفها طفل صغير تقريبا كده رضيع و اترجتني ان أجيبلها علبة لبن كانت معاها عبوتها و قالتلي حتى انا مش عاوزة فلوس اشتريهالي انت من الصيدلية .. و لسه هتبدأ في لسته دعوات لتليين قلب الزبون
أنا وبلا تفكير قلتلها خلاص خلاص و الله هأديكي و قمت مطلع من جيبي اللي فيه النصيب و اديتهولها بلا تفكير و اللي اكتشفت بعد كده انه كان تقريبا كل اللي معايا و اللي هو ممكن يجيبلها علبتين لبن و سندوتش حجم وسط من عند مؤمن

بعد ما صليت المغرب لقيتها واقفة بالطفل نفسه قدام باب الجامع و بتقوم بنفس الدور

مازعلتش يا فاتيما
بل بالعكس انا كنت راضي تماما عن اللي عملته لأني لما عملته كان كل اللي في نيتي هو عمل الخير لوجه الله تعالي و مساعدة طفل ممكن تكون امه مريضة و مش قادرة ترضعه ولا قادرة تجيبله علبة لبن

دايما في المواقف دي بافتكر قول المولي عز و جل في سورة الإنسان :
بسم الله الرحمن الرحيم

إِنَّمَا نُطْعِمُكُمْ لِوَجْهِ اللَّهِ لَا نُرِيدُ مِنكُمْ جَزَاء وَلَا شُكُورًا {9} إِنَّا نَخَافُ مِن رَّبِّنَا يَوْمًا عَبُوسًا قَمْطَرِيرًا {10} فَوَقَاهُمُ اللَّهُ شَرَّ ذَلِكَ الْيَوْمِ وَلَقَّاهُمْ نَضْرَةً وَسُرُورًا {11}

صدق الله العظيم

وحشني الرغي هنا يا طمطم
و وحشتيني انت أكتر


يلا سلام

فى اغلب الاحيان بيان الانسان اللى محتاج من النصاب يعنى اللى بتلاقيه كل يوم واقف فى مكان معين مش بيغير نفس الاسطوانة بتاعت كل يوم ده خلاص بيبقى اتحفظ اما الاطفال والكبار عندك حق انهم فعلا لازم نفكر بقلبنا شوية مش بعقلنا بس فى اللحظات دى ومش المبلغ الصغير اللى هندفعه هو اللى هياثر معانا بس اكيد هياثر معاهم
اى نعم الموضوع بقى كتير وانتشر ولازم يكون ليه حل بس والله الناس اصلا بقيت مرتباتها مش بتكفيها ما بالنا بالناس الفقراء دول
ربنا يغنى الجميع يارب ويصلح الاحوال

إسمعي يا فاتيما ، أنا عندي رأي يمكن يكون مختلف شوية عن آراء أغلب الناس إللي شايفين أن الناس دول حرامية و نصابين و مش محتاجين ولا حاجة ، ولذلك لازم مانديهمش أي حاجة ، ورغم إن عندنا شيوخ كتير قالوا إننا لو ماأديناهمش فلوس ، ده حايكون افضل ، بس أنا - و في منتهى التواضع - بأختلف معاهم
ليه ؟
لأن الدين قال إننا ندي السائل من غير مانعمل له تحقيق ، و نبعت وراه مخبر يراقبه و يعرف هو محتاج ولا لا ، و منغير مانحاول نبحث في ضميرة بعدسه مكبرة و نفتّش على عقله بمايكروسكوب علشان نعرف ياترا هو محتاج فعلا ولا لأ ، وده كمان لأن ببساطة ممكن يكون محتاج فعلا ، لأن كتير من الناس بتكون محتاجة فعلا و مافيش قدامها اي طريق تاني غير ده ، ومش عايز بقى حد يقولي ماهو عندنا مؤسسات خيرية و فتحية و سعدية و الكلام الخيالي ده ، لأن المؤسسات دي مش بتغطي غير خمسة أو عشرة في المائة من المحتاجين في مصر - إللي هما بالملايين طبعا - و الحكومة مابتقومش بأي دور في غنها تساعدهم ، ومافيش شغل للمتعلم علشان يبقى في شغل لغير المتعلمين ، وفي الآخر نقول لأ مانديهمش لما يمدوا إيديهم ، طيب ماهما لو الشحاته ماجابتلوهمش فلوس و مافيش شغل و مافيش ماضي ولا حاضر ولا مستقبل طبعا ، يبقى لو سرقوا أو قتلوا أو أصبحوا إرهابيين يبقوا عندهم حق ، أما موضوع العصابات المنظمة و الأفلام دي فهي أفلام ساقطة بس الموضوع جه على مزاج الناس فصدقوه .
و بعدبن الناس زي مايكونوا ماصدقوا ، الحكومة و الشيوخ قالوا بلاش ندي الشحاتين ، كل الشعب قال آمين ، طبعا ، بركة يا جامع ، نوفر الجنية ولا الخمسة جنية إللي حانديها للغلبان ده ، وطبعا مش حانديها لمكان تاني ، وإلا ماكانتش الجمعيات الخيرية قربت تبوس إيد الناس علشان يتبرعوا ، و بعدبن ماالشيوخ و الحكومة بيقولوا على حاجات كتير ، إشمعنى يعني الموضوع ده بالذات إللي كل الناس موافقة عليه ؟
أنا يا فاتيما ما أعرفش غير إن واحد محتاج يبقى واجبي إني أساعده ، سواء هو كويس أو مش كويس ، في كل الأحوال أنا أبقى عملت إللي عليا
آسف على الإطاله
تحياتي و إحترامي
________________________
في بلدنا ناس تكسب فلوسها بالدموع
و ناس بتقضي حياتها تشبع
و ناس تجوع
وناس تموت
و ناس يموّتها السكوت
أو الخنوع
وناس بتشرق زي شمس
و ناس ظلام و ظلال ويأس
وناس بتحلم ييجي بكره
و ناس بتحلم ييجي أمس
_________________________
KING TOOOT

ده المتوقع منك يا طماطم مين حيكون عنده الرحمه و رقه الاحساس غيرك انتى يا اميوسف و امنا كلنا
انا ساعات باساعد الناس دى بس ساعات بالنسبه للكبار دماغى بتعصلج و العرق الصعيدى بيطلع لان ببساطه شكلهم مبيبقاش يدى انهم محتاجين

لا تشتاق
اسلم الحلول يا احمد فعلا
تتعامل بنيتك و كفى




همس الاحباب
لأ ..انت بالذات اكتر واحد يعمل كدا
بفكر زيك كتير يا خالد
الست او الراجل دا ملوش ولاد أو اهل ؟؟
طب لو زهقانين منه او مقطوع من شجرة فعلا و تقيل على اهله
مش كان لازم الدولة و المجتمع
اللى هما الناس اللى هما احنا يجيبولوه مكان يقضى فيه اواخر ايامه بكرامة
يلاقى اكلة كويسة
و ينام فى حتة نضيفة بدل الرصيف و يتعالج بأبسط دوا بلاش الحاجات الغالية يدوله حتى قرص اسبرين
ما دمنا لا نوفر له كل هذا
مش خسارة اى حاجة تطلع و خصوصا إننا بنطلعها بشكل عشوائى و مش منظم بما يكفى
تحياتى انا كمان يا ابو شابى




ستيتة حسب الله الحمش
اولا يا ستوتى حكاية الامراض الغير واضحة دى عندك حق فيها
بس المشكلة إن فيه ناس بتحترفها فعلا
يعنى فيه ست بتوقف قصاد بنك عندنا ف وسط البلد و معاها روشتة و تقول عاوز دوا
روحت مرة مع ماما البنك و شفتها صعبت عليا
قولت تاخدنى الشهامة و هاتى يا ستى الروشتة اروح اصرفهالك من الصيدلية اللى الناحية التانية دى و ارجعلك
نظرات الحزن و التوجع اختفت و راحت مزعقالى و ادتنى ضهرها و مشيت ...
ماما قعدت تضحك عليا و تقولى منا قولتلك دول نصابين ...
بس الواحد بقى عنده بالمسشاهدة نوع من الفراسة فى معرفة مين نصاب و مين فعلا الحاجة اجبرته على القعدة دى و مد اليد بالسؤال
تانيااااااااااا بقى
عادل دا فخر لشباب مصر يا س س و لا أسمح مطلكاً مطلكأ لأى حد خصوصا الأحباب اللى زى سعادتك
إنهم يعيبوا ف الكالسيوم
و البوتاسيوم و الابصر إيه الى قولتيهم دول ..
إن شاء الله البرد يروح لحاله
بس هوه يخلى باله على صحته
و هيرجع بميت بوست
و منلحقش نعلق فيهم و هفكرك
بوسة و حضونة يا حبيبتى



بيطرية و مش بأيدى
ارجعى يا توتة الخمس خطوات و لا يهمك
بصى اعمليها من باب التكافل الاجتماعى و مش من باب الثواب
انا مثلا لو بفكر فى حكاية الثواب مكنتش كتبت البوست خالص
لأنه يبدو ظاهرياص نوع من المنظرة و مش بس إيدى الشمال اللى عرفت ايدى اليمين بتدى مين ..دا البلوجر كله عرف و الثواب راح خلاص ...
بس انا مبعملش كدا طمعا فى الثواب ...
كل محتاج ربنا غانيه عنى و عن غيرى و مش منتظرنى
انا ببصلها من باب الحقوق
الشريحة دى من الناس محرومة من حقوقها الطبيعية اللى المفروض تكفلها ليها الدولة و الناس
فمبقاش انا و الدنيا عليهم و الحكاية مش هتفرق معايا ماديا لكن هتفرق معاهم ماديا
و معنوياً قبل مادياً
خالص حبى ليكى يا حبيبتى



احـــــمد ابو العلا
معاك يا احمد
بس كبار السن و الاطفال مش مطلوب منهم يحترفوا مهنة عشان يقدروا يعيشوا
كل فئة منهم عاوزة اللى يراعيها
و كونه مش موجود او موجود و مطنش واجباته
نعمل إيه فى الحالة دى ؟؟



نورا الهوارى
اشكرك يا ستى و نورتى

شفقة و احسان
يبدو إن كلنا هذه المرأة يا شفقة
فعلا
ربنا يحنن قلبك دايما
سلامى للأستاذ احسان


ماما امولة
نورتينى يا عزيزتى
و ربنا يسترنا جميعا سائلاً
او مسئولاً




عاشقة الرومانسية
يا بتى يا شطارة انتى جبتى الكلمة اللى ف بالى
التكافل الاجتماعى
المفروض و الواجب بين الناس
حق كل واحد فى ظروف صعبة على الآخرين
و لو كل واحد قام بدوره
و دفع نصيبه
مكنش حد مد إيده و احتاج
ساعتها اللى هيمد أيده هيكون فعلا نصاب و عاوز يكسب و بس
و ساعتها نقوله معلش و روح الحتة الفلانية هتلاقى حقك هناك
قفلت المجاهيل امبارح عشان اعرف اللى داخل مين
بوسة حضونة يا عروسة البحور الحلوة


بدراوى
الله يخليك يا بدراوى
رأيك اسعدنى جدا لأنى عارفة إنك راجل ذواقة و انتقائى قوى فى القراية و مش أى حاجة تعجبك
طب زود مع العجائز ..الأطفال يا بدراوى لأنهم مستغلين ابشع استغلال ممكن و بدل ما يكون فيه بيوت ترعاهم بيتسابوا ف الشوارع يتبهدلوا
فكر تانى فى الحكاية دى
نورت




المنسى
كلنا مفتقدينك يا منسى
الف حمدلله على سلامتك يا استاذ
متغطسشى تانى بقى
و اوعى القطرات تدخل فى بعضيها



بنت قلبى
لأ اللى بيتنحوا دول انا اصلا بمشى و مديهموش فرصة يتنحولى
بس فعلا فيه ناس تحسى إن الدنيا بعترت كرامتهم بما يكفى
فبلاش نبقى احنا و الدنيا عليهم
ربنا يستحيب لدعائك يا حبيبتى
و إن كنت اظن إن الاحتياج باقى ببقاء الدنيا عشان البنى آدم يفضل شايف النقص ف دنياه و يحاول يكمله و يعدل من نفسه و يبقى ايجابى و يحمد ربنا على النعمة اللى عنده
خلص ودى ليكى

nigro
انت كمان وحشتنا قوى يا ابو قلب دهب
كويس و الله
يعنى انت حتى مبترجعشى خمس خطوات لورا
برافو عليك
القصة اللى حكيتها انا حكيت حاجة زيها لستيتة حسب الله الحمش و اقرى ردى على تعليقها ....
انا بقى بتجنن على العيال اللى الشحاتة الست بتبقى شايلهم و بتلف بيهم و بحس إنه مش ابنها فعلا و سيباه ينفلق من العياط و متوسخ و متبهدل عشان يصعب على الناس
ببقى عاوزة اولع فيها و اخد الولد منها
بيصعب عليا بهدلته و تلاقيها ماجره من مامته و لا ابوه ولا حاجة
ربنا يهد كل ظالم بقى
متغبش عننا يا نيجرو و النبى


آيوشة
دا حقيقى يا آيوشتى
الواحد بالتجربة و الخبرة بيقدر نوعا ما يميز المحتاج من اللى واخدها مهنة
و متهيألى عشان كدا الواحد و هوه صغير شوية مبيبقاش موافق يدى حد منهم حاجة
بس لما بيكبر شوية بيبتى يتعلم يميز
و فيه ناس بيكون ربنا موفر عليهم المسافة و بيعرفوهم من اول لحظة
ربنا يسمع منك يا حبيبتى



KING TOOOT
انا معاك يا راعى الملك
انا معاك قلبا و قالباً
و دا اللى بيخلينى ارجع الخمس خطوات دول تانى ...
لإن دا واجب ..مش عمل خير
و كمان مش واجب
دا حق الناس دى عليا و عليك و على كل واحد ماشى و قادر يطلع أى مبلغ و لو خمسين قرش حتى و يساعد بيها
و فعلا زى ما قولت
كل واحد قادر يعمل اللى عليه و يسيب النوايا لاصحابها و ربنا بين العباد حاكم و مطلع ...
انا زمان كنت قاسية قوى و قلبى بيبقى جامد
دلوقتى بحس إنه لأ
محدش عارف الطفل الصغير دا بيتبهدل آخر اليوم أزاى و المفروض يكون فى مدرسته و اهله يغنوه عن المرمطة
و كمان الناس الكبار اللى حقهم بعد كل العمر دا يرتاحوا و يكرموا
انا معاك يا كنج توت و مليش انا فى كلام الشيوخ انا بستفتى قلبى و عقلى
سلامى و حبى الخاص لبوبو و عمر
كل سنة و إنتوا طيبين
و بتحبوا بعض
و بتنوروا دنيتنا الغامقة



صيدلانية طالعة نازلة
يا حبيبتى مش انا
دا الناس كلها كدا يظهر
اقرى التعليقات تلاقى اغلبنا بيمشى بنفس التفكير و الطريقة
اقرى ردى على ستيتة حسب الله الحمش هتلاقينى برضو صدرت دماغى مع واحدة من الكبار
بس مكنتشى محتاجة فعلاً
بوسيلى سيف
و الغزالون يهبلون الله يكرمك
و سلامنا لزوجك العزيز
وانتى كمان وحشتينى

كلماتك دى فعلا من نور ، و كلام مش ممكن يخرج غير من قلب كبير وهو قلب فاتيما ، ربنا يزيدك حب و حنان ، بس مش عارفة اكتر من كدة ها يروح فيض أكيد ها يفيض على كل من حولك و يكونوا فى منتهى الرقة و الأحساس زيك ، ربنا يزيدك من نعيمة و يزيدك رضا و صبر .

بجد جمييل اووى المدونه والبوست جمييل شدنى اووى
انا بردوا كنت بفكر كدا وكل مره نفسس السيناريو بس مع كذا موقف
ما بقيتيش افكر لو معايا ادى وامشى
اتعلمت حاجه واحده لو ماكانيش الواحد محتاج ما يرضايش الذل ده وبجد احلى لحظه لما تشوفى فرحت حد عشان انتى كنتى السبب بجد بالدنيا كلها
ياريت الناس تحمد ربنا على النعم اللى عندها
الحمد الله رب العالمين

المرضى من كبار السن
هم اللى بيوجعوا أوى
قلبى بشوف فيهم نفسى
لو ربنا حكم عليا فى
يوم من الايام بالاحتاج
البدنى لأى حد بموت من
الخوف كده ساعتها
وبحاول على قدر
الأمكان تنفيذ
طلباتهم.لكن
وبصراحة
شديدة ياطمطم
من يحترفون مهنة التسول
فقلبى لا يميل او لا يتعاطف
لأى منهم :(يمكن تكون قسوة
مش عارفة لكنى لا احن لاحد منهم!

حلو اوي الكلام دة

فين الشارع أللي بتعدي منة؟

اهو ناخد اي حاجة تنفع اليومين الكوبيا دول

بس هل سأندرج تحت بند العجائز ولا الاطفال؟

انتي وضميرك

ام بتول
وحشتينى قوى
و مشكرين على الكلام الحلو اللى طالع من قلب حلو
بوسة و حضونة كبيرة عشانك



shams
نورتينى يا عزيزتى
و متهيألى إنها نعمة من ربنا إن الواحد لسه بيعقد يفكر و يراجع روحه و يتردد ...يعنى قلبه لسه حى و مجمدش
نورتينى بجد




notahaty
حبيبتى الغالية و العائدة حديثاً من البعتة اياها
زيك برضو يا نورهانتى بفكر التفكير دا
و بقول يا رب ياخدنى بصحتى عان مكونش عبء على حد و لو كان اقرب المقربين و الناس تفتكرنى بغنى كنت خفيفة
ساعات اقول انا لو مكان الست دى
هاخد ركن و ابطل اكل و اشرب لحد ما اموت و اريح الناس من همى
و بعدين اقول ماهو حرام ...
و بعدين اقول اسيبها على ربنا
و ربنا يحسن ختامنا جميعا يا رب
بوسة و حضونااااات كتير عشان انتى غلبانة و مبعوتة



مصرى جدا
يا هانى انت عقل و حكمة الكبار
و خفة دم و سخرية الاطفال
يعنى لما اشوفك إن شاء الله
هتاخد اللى فيه القسيمة
بالدوبل بس ساعتها مش هنكسف اقولك
إدعى ليوسف
ماشى ؟؟؟

:-)

عجبني الحوار اللي بينك وبينك ده وخصوصا إنك كنتي هتزقي نفسك في الآخر

:-)

عموما كل الإحتمالات اللي قلتيها متاحه وممكنه .. ممكن تكون نصابة وممكن تكون محتاجة .. لكن المهم في النهاية هو: إنتي نيتك إيه؟

إنتي بتتصرفي على أساس نيتك إنتي .. مش نية اللي قدامك

وربنا هيديكي على قد نيتك في الآخر

انا بقيت شبه موقنه ان كل الشحاتين دلوقتى مش محتاجين
عصابات او ناس معاها فلوس وعايزه تزودها
مش فارقه النتيجه واحده
ومابقتش افكر ادى حد حاجه صراحه
بس فى كلمه صاحبتى قالتهالى
قالتلى ان شاء الله تكونى بتدنى لواحد تاجر مخدرات
المهم انتى نيتك ايه وبتدى ده ليه
هو نصاب بقى انتى مالكيش دعوه المهم النيه
يمكن احيانا بقتنع بالمبدأ ده
بس اوقات بردو مابقدرش صراحه اديلهم مش بحب حد يستهبلنى وهما بيستهبلوا البلد كلها

تسلم طيبتك وإيدك

ربنا يبارك في قلبك

ويارب قلبك يرتاح في حضن يوسف بحق أفكارك ونيتك يا فاتيما يابنت ...

هيا الحاجة أسمها إيه؟؟؟؟

يا فاتيما يا بنت أم فاتيما قادر يا كريم

ببوسك من هنا ومن هنا

بوسة على اليمين والتانية ع الشمال

ربنا يفرح قلبك ويهدي سرك ويرد ليك ابنك على خير... يا فاطيما يا بنت ام فاطيما


ها

هتديني كام بقى؟؟

لا بادعيلي بجد جدا فعلا "فور فريي"

ببوسك

اللهم ارزقنا حسن الختام وحسن العمل في الدنيا والاخرة يارب

طول عمرك قلبك حنين يا خالتي والله

ربنا يرد لك يوسفك على خير يارب

يا مراكبى
و الله انا نيتى اساعدها يا نبع الحكمة و مش عاوزة ثواب حتى لأنى بحس إنه حقها
و ضريبة لازم ادفعها
عن طيب خاطر لأنى مش فى نفس مكانها
و لازم احمد ربنا بشكل إيجابى على النعمة اللى انا فيها
و فعلا كنت بزق روحى
انت شوفتنى ؟؟؟!!!!
اصل انا ساعات اصدر الدماغ اللى عاوزة كسرها دى و ابقى عاوزة ادينى كلمتين فى جنابى عشان احترمنى شوية و ارجع الخمس خطوات دول
متحرمشى منك يا نبع الحكمة




bent men elzaman da !!
متهيألى يا بنوتة الكل تقريباً متفق معاكى فى حكاية النية دى
و فيه ناس بتفقدك القدرة على التعاطف معاها حتى لو محتاجة فعلا
بس الحالة اللى حكيت عنها مش كدا و الحمدلله
نورتينى يا حبيبتى



mimi
يا عينى على الدعوات الحلوة دى ع الصبح
عاوزانى اقول اسم الحاجة عيانا بيانا جهاراً نهاراً كدا على النت و الفضائيات
انتى عاةزة الحاجة تهدر دمى و لا إيه ؟؟
مشيها ام فاتيما اهىشغالة مش هتقول لأ
متحرمشى منك يا ميمايا
يا بسكوتايااااااااا



zianour
عينياااااااا يا امولة
بس انتى تعالى هنا نواحينا
و انتى تاخدى كل الاحضان و البوسات اللى متحوشينلك عندى
دول لو فى بنك زمانك من اصحاب الالافات يا حبيبتى
و خلى بالك ...
بيزيدواااااااا
بوسيلى النور و الزاد




صاحب المضيفة
وحشتنى دعواتك يا أنس
ازيك يا غالى
يا رب يكون كل اخبارك حلوة
و طيبة
زيك

إرسال تعليق