.

.

بتحصلى ساعات  

Posted by: فاتيما in


المشهد
ليل داخلى
اوضة نوم اخويا اللى قاعد
بيشتغل ع الكمبيوتر بتاعه

افرد نفسى على سريره
و استغطى و انادى

- يووووووووسييييف
تعالى فى حضن ماما ننام شوية
ياتى متلكئأ من الغرفة الآخرى و ببطء تخرج الكلمات

- طب ... اصل موش .. عاوز أنام دلوقتى .. يعنى
بيتهرب بشكل مهذب
- طيب عشان خاطرى تعالى نيمنى وقوم بعد كده
التكتيك المتبع دوماً لسحب العيال للنوم بالحيلة
وفى الغالب بينيمونا احنا ويفضلوا صاحيين

- لأ يا ماما ... كدا هنام من غير ما أحس
إستنتاج ذكى مبنى على خبرات سابقة فى هذه المجال

- طيب تعال فى حضنى دفينى مالبرد !
مناورة و خطة أستدراجية بديلة مضمونة النتائج
تنتهى بصعبانى عليه
و تكوره فى حضنى عشان يعدى الليلة و يسكتنى

- هاتناموا من دلوقتى ؟؟!
سوأل عابر من أخويا و اللى قاعد شغال قصاد النت
- أيوه ... هنام شوية وبعدين ابقوا صحونى
صمت و سكون لمدة ثوانى

و بعدين صوت عياط مكتوم و نهنهة
وتنبه مفاجىء و خروج سريع مذعور من الحضن
جلوس
و محاولة الامساك براسى لرفعها و التيقن
ثم السؤال الأستنكارى

- ماما أنتى بتعيطى ؟!!!؟
فى محاولة فاشلة للإنكار
- لأ يا حبيبيى

بثقة لا يزحزحها شك
- لأ بتعيطى

- مالك يا حاجة؟؟
الصوت هذه المرة من الجالس امام شاشة الكمبيوتر
- مفيش حاجة
بصوت مختنق يتخلله بكاء يحاول التوقف بلا جدوى
- بس يعنى .... يا يوسف
اصل ساعات .... الواحد
بيبقى مخنوق .... و مضايق شوية
م الدنيا
صمت لثانيتين ثم بثقة و تاكيد

- آه ... بتحصلى ساعات
- نعم يا أخويا ؟!؟
اخويا يستدير من خلف المكتب تاركا النت
- بيحصلك ايه كده سمعنى ؟
- ايوه.. ساعات انا كمان الدنيا بتعمل حاجات تخلينى زعلان
البراءة تجعلنى فى حالة وسط
بين البكاء و الضحك فيستكمل اخويا ساخراً

- انتى ياحاجة انتى ... عاجبك كده ؟!!!؟
بهتى ع الواد
هو أنتى كل يوم ليكى ساعة نكد
دنيا ايه الى
خانأكى
منك
لوه
ليها
.. دانتو تخنقوا
المجموعة الشمسية كوكب ..كوكب
استهدى بالله كدا و روقى
هز الراس بالموافقة و محاولة ايقاف حنفية الدموع

- خلاص ... خلاص موش زعلانة ولا حاجة
سؤال متحفز لأذى شخص ما مجهول الهوية
- متزعليش ياماما مين اللى مزعلك و أنا أكسرهّولك

- مفيش حد يا حبيبى يعنى هوه معقولة أزعل وانت معايا
و نايم فى حضنى

- مانا بقول برضو ..
تفكير مفاجىء و اقتناص لحكاية و كانت تايهة
- ماما
- نعم يا حبيبى
- تصورى ان البعوضة عندها تلاتلف عين فى دماغها

محاولة بريئة لألهائى وتغيير الموضوع عشان اسكت
استجيب على الفور و إبدى انبهارى و اندهاشى التام بالمعلومة

- ياااااااااه مش ممكن ؟؟ّّ
بتعمل ايه بيهم دول كلهم ؟؟!!

يتفاجىء بسؤال لم يكن فى الحسبان فيرد
- موش عارف ...!! بس طب عشان خاطرى
متعيطش بقى

- حاضر ... خلاص بطلت أهوه
يطبطب على كتفى بإنتظام كعقرب الثوانى
حتى اصمت

و ضحكة مستنكرة مصحوبة بتعليق من بعيد
- لا حول و لا قوة الا بالله
ما مل الأول
.. اما انتو عالم غريبة

اخويا يلتفت للنت تانى ويكمل النقرعلى مفاتيحه
يوسف يحتضنى بقوة
ويقبلنى فى عيونى المغمضة
و يطبطب علي شعرى

لحد ما أطمن و اهدى
و اروح فى النوم
ختام
------------------------------------
كان أول بوست
فى اليوسفيات

و حسيت انى عاوزة اكتبه .. تانى
لأن اللى كان بيحصله ... ساعات
بقى بيحصلى كل ساعة
يا روح قلب ماما
يا يوسف

حضنك وحشنى قوى
و محتاجة تطبطب على ماما
زى زمان ..و أكتر

يا حبيب قلبى
لأ ... يا قلبى نفسه
لأ ... يا نفسى ذاتها
لأ .. يا ذات الأشياء كلها

يا اصل
و مرد كل حاجة
فيا
وحشنى حضنك
مهما بيحصل
و ف كل الساعات

This entry was posted on الثلاثاء, أكتوبر 27, 2009 and is filed under . You can leave a response and follow any responses to this entry through the .

67 كــــلام بيطــبطـــب عـــلى قــــلبى و روحــــى

وبتحصل لنا ساعات
وحياتك ياطمطم
مش انتى بس.

يارب اول تحليق

فووووووووووووو

بوست جميل
ربنا يطمنك عليه
و تشوفيه تانى
و يرجع لحضنك
من ثانى

ايه ده خيانة بقى انا فاكر نفسى اول تعليق ، طلع حضرتك عملتى اشراف على التعليقات
ايه الحكاية كل واحد عامل رقابة كدة ليه
!!!!

مش عارف يا امي ااقولك ايه

بس والله ساعات كده الواحد بيحتاج ده و المشكلة بتبقي اكتر لما ميلقيش اللي يحضنه ده
او بالاصح ميلقش رد الفعل من الشخص ده بعينه في حين انه بيلقيه من ناس كتير قوي تانين

ربنا يرجعلك يوسف يارب و ابقي خليه يحضنك براحتك

بس انا كده هاغير بقي :(:(
مش انا ابنك برضه يعني
مش مهم بقي اني كبير و طويــــــــل شسوية او سويتين :):$:$

طمنيني عليكي يا امي

ايه دا!!!
اول تعليق !!
طيب:):):):):)
مش حأزغرط حأخليها
لما تجتمعى مع يوسف
فى بيتكم بأذن الله
وعن قريب
إن شــاء الله
العشاء بيأذن ياطمطم
بأذن الله دعاؤنا لك مستجاب.
أميــــــــــــــــــــــــــن

ان شاء الله يرجع لحضنك وتفرحي به فما ضاق هم الا وفرجه الله
كما يقول الشاعر في قصيدة المنفرجة

اشتدي ازمه تنفرجي قد ادن ليلك بالبلج
وظلام الليل له سرج حتى يغشاه أبو السرج
و سحاب الخير له مطر فإذا جاء الإبان تجي
انشاء الله أزمتك تنفرج قريبا

ان شاء الله يرجع يوسف لنفس الحضن تاني
يوسف نفسه هوا كمان مفتقد الحضن ده ومش ممكن ينساه

محدش يقدر ينسى أرق قلب عليه في الدنيا

كلامك خلق الدموع في عينيا

ربنا يخليه ليكي و يخليكي ليه

و يرجعلكك عن قريب و يجعله خير إبن لخير أم

و يسعدكوا ببعض و مايفرقكوش تاني أبداً

اللهم أمين


أخوكي
أحمد حسني

اصل ساعات .... الواحد
بيبقى مخنوق .... و مضايق شوية
م الدنيا
صمت لثانيتين ثم بثقة و تاكيد
- آه ... بتحصلى ساعات

- ايوه.. ساعات انا كمان الدنيا بتعمل حاجات تخلينى زعلان
********************************
براءه يوسف عبرت عن حالتى
براءه يوسف خلتنى اكتب التعليق ده
بس انا الدنيا بقت بتزعلنى كل ساعه يافاطمه :(
ادعى لى وحياه يوسف ان ربنا يفرج عنى
محتاجه ده منك قوى لانى واثقه انك بتحبينى

يا حبيبة قلبي يا فاتيما

باذن الله يرجع لحضنك تانى وينيمك ويطبطب عليكى

بس ان شاء الله مش هايكون في عياط ولا دموع

فرجه قريب باذن الله

ربنا يطمنك عليه ويخليه ليكى يارب ويرجعه لحضنك ونعمله لقاء مخصوص للاحتفال بيه ونسميه اللقاء اليوسفي

ربنا يحميه يارب

ضلقت فلما استحكمت حلقاتها فرجت وكنت اظنها لاتفرج
ربنا يجمعك باابنك يارب

:(

انا قولت هرجع بسرعة سريعة مريعة على باقي البوستات اشوف امتى رجع

........

ان شاء الله سيعود باذن ربي
و تقلل كمية الحاجات اللى بتحصلكوا ساعات

..............

انا بقت تحصلي كتير
اة خالص

يلا خير

ربنا يخليكوا لبعض ياااااااااا رب دايماً

سلام عليكما

ياااااااااااااااااااااااارب
بكل ذرة في كياني
ادعو الله تاخديه في حضنك وتنسي ساعتها كل ذرة ألم ودمع
يااااااااااااااااااااارب
يااااااااااااااااااااارب تقبل
وصلى الله على سيدنا محمد وعلى آله وصحبه وسلم

يارب رجع يوسف لحضن فاتيما يارب

يارب قر عنيها بيوسف يارب

يارب رده ليها وطمن قلبها وريح بالها

ان شاء الله يكون فى حضنك قريب اوى

باذن الله

norahaty
ربنا يستجيب لدعائك يا رب
يا نورهانتى
يا حبيبتى
عاملة ايه فى البعتة بتاعتك با ترى ؟؟
ياللى ما يوعوا يتهنوا بفلوسها
و يقصر الأيام عليكى
انا بشجع جدا حكاية الزغروطة دى
لما يسوفة يرجع ان شاء الله
هفكرك بيها تترقع على باب صفحة التعليقات اول ما تدخلى علطول
خالص حبى ليكى يا حبيبتى




adel
يا واد يا عادل انتا تحلق فى صفحة التعليقات زى مانتا عاوز
اول واحد و آخر واحد انت ليك تذكرة دهبية لمدى الحياة زى بتاعة شركات الطيران كداف
و بعيييين من ناحية الطول
لأ بقى انتى طويل سويتين تلاتة اربعة
يا بنى انت عامل زى ماجد اخويا بالضبط اللى بيطول وانا بكلمه اشاساً
انا بخير يا بابا متقلقش عليا
بس اصلى بحب البوست دا قوى و حبيت استحضره لأن يوسف وحشنى
و كلامك صح ...الواحد بيحتاج لمشاعر معينة من شخص بعينه و مينفعش يبدله بحد تانى عشان كدا لما صديقة عزيزة عليا تقولى اتجوزى و خلفى ولد تانى غير يوسف و هتحبيه زيه و يعوضك ..يجيلى حالة ذعر و اقولها لأ
مينفعش احب حد مكان يوسف و لا يعوضنى عنه شخص تانى و لو كان ابنى برضو
يا واد انت جايب الحكمة دى منين
اقولك ..لأنك موهوب فعلاً
و عندك قدرة على استيعاب حاجات ممكن متكونش تجارب تمسك لكن بتشوفها حواليك و توصلك برضو
ربنا يحقللك كل اللى تتمناه و اللى انا بتمنهولك و زيادة
يا رب





بدراوى
معلش يا فندم
اصلى انضطريت لأسباب كهرية
و و مشكرين على التمنيات الطيبة
انا سعيدة جدا بتعليقاتك متتصورش قد أيه
بجد

و الله يا طماطمربنا عمره ما بيسبب لنا حاجه وحشه
شوفى انتى لولا غياب يوسف مكونتيش عملتى المدونه و لا عرفتينا و لا الناس اللى بتحبك دىىىىىىىىى كلها عرفتك و هما هما الناس دول اللى واقفين جنبك هما اللى حيعملوا مهرجان اما يوسف يرجعلك باذن الله
الدعاء لوحده مينفعش لازم نحارب و نعافر شويه و بلاش الاستسلام و الضعف ده
فكرى كده حتعملى ايه فى المرحله الجايه و ازاى تخطفى ابنك من وسط الناس دى و ترجعيه لحضنك تانى

خواطر شابة
ان شاء الله تنفرج يا خواطر
بس زى ما قولتلك فى البوست الجميل اللى حتبتيه عن والدك الغالى
غياب الاحباب بيكثف حضورهم
نورتينى جداااا




أحـــمد ابو العلا
يا احمد دايما رافع معنوياتى
اقولك على سر بينى و بينك محدش هيسمعه خااااااالص
انا بطمن على ان امومتى مازالت بخير لما اقرى تعليقات شبيهة بتعليقك
بحس ان فيه عيون و قلوب شيفانى
بمودة و حنان و احترام كمان
منحرمشى منك يا عزيزى
على فكرة ..هتكون أب حنون جدا يا احمد





ahmed hosny
لا انت تعمل حسابك و تجيب علبة كلينكس من الحجم العائلى
اصلك هتعيط كتير يا احمد كل ما تقرى بوست من اليوسفيات
انا و انا بكتب بوست مرح عن يوسف برضو الناس بتعيط ...
دعاوتك غالية و اشكرك من قلبى



عاشقة الرومانسية
يا قطتى
يظهر إن كلنا بيحصلنا ساعات كتير الأيام دى
انا عدت البوست مخصوص عشان اقول اللى مخنوقة و مش عاووة اقوله
انا قولا جايز اكون ساكتة
بس و الله قلبى بيدعيلك
بيدعى لكل حد بحبه
و ربنا يفرج همك
و يزيك كربك
قادر و كريم قوى
قوى
قوى




reem
يا حبيبتى ى ى ى
حلو قوى اللقاء اليوسفى دا
مصطلح لطيف قوى
و مين قالك مش هيبقى فيه عياط ؟؟
طب دنا مستنياه عشان اخده فى حضنى
و اعيط للصبح ..
بس يرجع يا رب
بوسيلى الناتيت الطعامات
زى مامتهم

saso
اشكرك يا ساسو
انتى نورتينى




نعكوشتى
يا حبيبتى
انتى بتحصلك كتير؟؟!!!
دانتى الحاصل بذاته يا ماما
انتى مخلوقة استثنائية يا نعكوشتى
و ساعات يتهيألى ان الحاجات اللى بتحصلك ساعات كتير دى رغم سخافاتها التى لا تنتهى إلا انها السبب فى كونك شخصية متفردة و مختلفة
و صدقينى عن تجربة و فرجة على الناس لأكثر من تلاتين سنة اقدر اقولك
جنانك و لخبطاتك و مشكاكل و صعوبات التعامل مع الىى حوالكيى كلها لما تجمعيها هتكتشفى بعد زمن إنها اللى هتخليكى مميزة اكتر و بتتحبى اكتر من أى بنت كانت عادية و معملتش جدل طول حياتها .... كل القرف و التعب اللى بيحصلك ساعات كتير هوه اللى هيخلى للدنيا طعم و معنى مختلف
بس بمرور الوقت
يا الناس تتهد من حوالكى و يتغيروا
ياانتى اللى هتتعلمى تتأقلمى و تسايسى الأمور و تتعايشى
انا بحبك قوى و كل مرة اقعد اعمل واعظة مع انى اخيب مل الخيابة
بس ادينى بفضفض معاكى
بوسة و حضونات بس مش ياعات
دا علطول ......





لقد خلقنا الله احرارا
يا رب
ميحرمنى من اجمل استاذة تاريخ فى مصر
يا رب

انا تعلقيقى ما ظهرشى لييييييييييييه

بصى يا ستى الكل ولا تزعلى نفسك
انا اصلا اصغر بنوته معاكم هنا
وكده كده مافيش فرق كبير فى السن ما بينى ومابينه خالص
فا انا موافقه انى اكون زى البنت
انا مش هستنا استاذن منك يعنى لا انا بقا عاوزه اكون بنتك ها
يلا بقا
وبلاش احضان دى لانى بتكسف
هنخليها اكل بس وسلامات

ــــــــــــ
ويارب ويارب ويارب
يا خالق السما والارض
ترجع حياتها ونور عنيها لحضنها علشان انا نفسى اشوف ضحكها فى وشها
واحس انها مبسوطه كده من اسوبها فى الكلام
والله العظيم بدعيلك بجد

ستيتة حسب الله الحمش
منحرمشى يا ستوتى
و فرحانة انك جاية لقاء المنصورة بس اوعى يبقى زى المرات اللى فاتت الا يجيلى عقدة
و بشنيطة كمان
وحشتينى قوى





ليس فقيرا من يحب
الف شكر يا فندم
اخبار الوالاد أيه و صحتك دلوقتى
برضو قصرت و مسألتش عليكى
اتمنى تكونى باتم حال إن شاء الله
خالص ودى ليكى



صيدلانية طالعة نازلة
يا علا متفقة معاكى ان الدعاء وحده مش كفاية
لكن فى احيان كتير التصرف بيسبب مشكلة اكتر ما بيحلها و دا الوضع الراهن و اوعى تفتكرى ان فيه حلول ممكنة و انا اللى متخاذلة ...انا اللى اعرفه عن خصومى فى الحكاية اكتر من اللى انتى تعرفيه و الأذى اللى اصابنى انا و اهلى اكتر من اللى تتخيليه و بالتالى حكمى على الموقف لو انا اتخذت اجراء من اللى بتقترحى اعمله هيكون ان النار هتنفتح تانى عليا و على اهلى
لو عليا ممكن اتحمل
لكن اهلى ..تفتكرى من العدل بعد كل ما جرى انى ابهدلهم تانى ؟!!
مش عايشة فى دور المضحية و لا نيلة
بس اصل الأشخاص لم تتغير
و لا سلوكهم اختلف
ساعات احس ان وجود يوسف منقطع عنى رحمة بيه
ايوه رحمة
لو بيشوفنى كل اسبوع و قلبه ينخلع انه ماشى و مش هيروح معايا
ممكن يكسر قلبه الف مرة
كلام عبيط انا عارفة
بس انا سايبة الأمر لصاحب الامر
لأنى لا اقوى عليه وحدى
بوسيلى سيف و الغزالون يهبلون و النبى

بنت قلبى
يا حبيبتى ى ى ى ى
أنا أسفة جداااااا
مش عارفة ليه تعلقك اتمسح منى
انا اسفة جدا يا حبيبتى
خطا غير مقصود و الله
معلش بقى محدثة موديريشن و لسه بتعلم
منحرمشى منك يا حبيبتى
و صحيبح انتى صغنونة سناً
بس كبيرة عقلا
و كبيرة كمان قلباً
يا بنت قلب قلبى

اشهد ان لا اله الا الله

مهوا لوكان معاكى بس كنت سكت لكن دا معاكى وحصل كتير مع الدكتوره ستيه وفى 3 كمان غيركم
ليييييييييييييه دنا غلبانه يا ناس والله
هبله اه بس غلبانه ما اسهلشى كده يعنى
ـــــــــــ
مش مهم المهم انى بعت الرد دا 5 مرات بس الحمد لله ظهر
وبس خلاص يا ستى بقا
انا قلت تلقيه ما ظهرشى علشان قلت فيه اكل
مش هجيبه سيرته تانى خالص
بس المهم تتضحكى

ياااااااااااه يافتيما أنا فاكرة لما قرأت البوست ده أد ايه قلبى وجعنى حسيت بيكى بجد يارب يرجعهولك يارب وما يحرمه منك ويعرف أد ايه بتحبيه ياريت بايدى كنت جبته لحد عندك

يعنى اعمل فيكى اييييييييييه
مضطره استنى لما تيجى وابوسك بقى وامري لله

كل شويه تعيطينى كده

بنت قلبى
لأ يا حبيبتى انا فهمت ليه اتمسح
و هقولك
شوفى انتى بتبعتى التعليق اكتر من مرة
بيطلع عندى فى القايمة مكرر
اروح ماسحة اتنين و اخلى واحد للنشر
بس فى الواقه البلوجر بيحذفهم كلهم
الحل إيه؟؟
انشرهم كلهم و بعدين احذف المتكرر و اسيب واحد
بس خلاويص
و بالهنا و الشفا يا ماما

اوعى تكونى زعلتى منى انا كان قصدى استفزك و استفز طاقتك الداخليه بس فعلا كل واحد ادرى بظروفه من اللى حواليه
انتى كلامك منطقى جدا و الله بس الام هيا فعلا اللى بتحس بالام اللى زيهاو بتقدر حرقه الفراق
متزعليش منى تانى مره
بوسه كبيره بقى
و البوسات بتاعتك وصلوا لمستحقيهم

(joudy)
متحرمشى منك يا جودى
يا حبيبتى
قلبك فيه الخير دايما




صبرنى يا رب
اعملك أييييييه ما انتى اللى حنينة و عندك حنينة جامدة فى الحتة اللى ف الشمال دى ؟!!!!
حددتوا المعاد و لا لسه ؟؟؟
هاجى اشوف آخر الاخبار عشان احط تنويه عندى إن شاء الله
بوسيلى القمرات




صيدلانية طالعة نازلة
يا لهوتينى يا علا
مين قال انى زعلانة و لا مستفزة و لا حاجة من الكلام دا
يا حبيبتى انا فاهمة وجهة نظرك
و متاكدة انك محموقالى .. و عاوزة المصلحة و بتتكلمى من هذا المنطق
يا بنتى انا شوفتك و سلمت عليكى و خطفتى قلبى خلاص يعنى اى حاجة هتقوليها بعد كدا هبقى حاطة قصاد عينى انك بتقوليها ازى و عشان أيه ...
خلاص خلصت
انا اللى أرجو انك متتصوريش ان ردى عليكى فيه غضب او نرفزة او استهانة بكلامك لأنه مش كدا خالص انا اللى لاوحة شمال الايام دى معرفش ليه و مفيناش من زعل خالص يا حبيبتى
و بعدين البوس دا ببلاش يعنى
هفضل ابعت ابعت و محدش فيهم يرد عليا خالص ؟؟
لما يشوفونى هيدونى حقى ناشف ؟!!
طييييييييييب

ممممممم
الخبرة جت حتي بالتجارب :):)
مش بقول لحضرتك انا السن ده مش حقيقي و قده عشر مرات :)

بالنسبة للخلفة تاني ...حتي لو حصل و كل شئ بايد ربنا
هتحبيه برضه و ممكن اكتر من يوسف او ااقل بس مش نفس درجة يوسف ابدا
الام بتخلف ولاد كتير و بتحبهم كلهم بس بدرجات مختلفة و متفوتة مفيش ام بتحب ولادها كلهم بنفس الاسلوب ابدا

بالنوسبة لتيمي و واندا :)
هابقي اجيبه مخصوص ليوسف :) عشان برضه من الكارتونات اللي بحبها قوي و بحس بطفولتي قدامها :)
وكنت بحب شخصية المدرس جدا :)

وسععععععععععععععععع انا جيييييييييييييت
سممممممممع هسسسسسسسسسسسسسسسسسسس
جيت للقمر امنا كلنا ام يوسف فاتيما اختى العسولة
ربنا يخليكى ليا يا فاتيما
ويرجع الواد العسل يوسف لحضنك
بس انا هبوسوه بقى وداخلة على طمع عندك مانع؟ ولا هتعملى حماتى
اشوفك على خير حبيبتى

ايه الجمال ده والرقة والحنيه دي ربنا يحفظوا ويخلهولك امين يارب

وانا من هنا اوعي تعيطي تاني او حاجة تزعلك بجد يا فاتيما انا معرفكيش ومش اتعملت معاكي غير مرة واحدة بس بجد انسانه فوق الوصف مش هقولك اكتر من كده

ينفع يتعمل مشهد مؤثر اوى فى مسرحية
هههه
ربنا يكرمك
ويقر عينك بيوسف
ويعيده الى احضانك
لا يفارقها ولا تفارقه ابدا

مش عارفه ليه افتكرت الايه الكريمه {واصبر لحكم ربك فإنك بأعيننا*وسبح بحمد ربك حين تقوم ومن الليل فسبحه وإدبار النجوم}.. توكلى على الحى الذى لا يموت و ان شاء الله و بعزته هايقر عينك بيه مره تانيه و يرجعه لحضنك ،ان الله لا يخلف الميعاد

ربنا يسعدك دايما يايوسف

ربنا يخليهولييك اجمل شىء الحنان وربنا يباركلك فيية

يا سلام يا ختي أنت مش قولتي حتبطلي تعيطيني تاني وقلت كمان انك حتحطيلي عنوان يوسفيات عشان ما اقربش
كده برضه اعيط ع الصبح
انت مش عارفة اني بقرا البوست في الشغل
طب لما اعيط الناس تقول عليا ايه ؟
سلامي لقلبك وربنا يردوا عليكي بالسلامة يا اشجع ام

أن شاء الله ها يرجع يوسف لحضنك تانى ، و قتها مش ها يكون فى عينك دموع أبدا ، ها يكون فى العيون فرحة و فى القلب ضحكة مش ها تروح أبدا ، ربنا يرجعه لك بألف سلامة لحضنك ، ما تزعليش فاتيما ربنا لما جاب لنا العسر جاب معاه اليسر ، و اليسر آتى إن شاء الله و قريب جدا أستبشرى خير ، ربنا يطمنك علية يارب .

حوار إنساني من أروع ما يكون بين أم وإبن من أروع ما يكون

مش عارف أقول غير يارب يرجعلك يوسف يا فاتيما يارب

بوست جميل ورقيق

دمت له يا ام يوسف

فاتيما سؤال بيلح عليا من زمان اوي بس للاسف مقدرتش اساله

الطبيعي ان الطفل بيكون في حضانه امه و ليه ده مش حاصل معاكي؟؟؟؟؟؟

السلام عليكم ام يوسف

ربنا قادر على كل شيئ
وما عنديش كلام تانى

ربنا يكرمك ويرجع لحضنك مرة اخرى
وبشر الصابرين
تحياتى

adel
معاك يا ولدى العزيز
العمر مش بحساب السنين
العمر باللى حصل فيها
عارفة ان قلبى هيحب بنفس القدر و لو عندى عشر عيال مش واحد
بس فكرة انى احب ابن و ابن تانى محروم من حبى دى مش قادرة اتخيلها و كأنى هفرق ما بينهم و بظلم و باختيارى مش غصب عنى لأن انجاب أى طفل بعد يوسف ( لو ربنا رايد ) هيكون اختيارى انا و مش فرض عليا
و بالتالى هبقى عارفة مقدما انى هخلف طفل و لازم اديله حقه من الحب و الرعاية ...ارجع لنفس السؤال الذى لا يكف عن التواجد فى ذهنى و عقلى
طب و يوسف ؟؟
نصيبه فين ؟
متشال لحد ما يرجع
هعرف اضحك و العب و افرح ازاى مع حد غيره و هوه لأ ؟؟؟
جنان انا عارفة بس ربنا ما يحكم على حد بيه ....و بعدين كل شوية اكتشف انك ابنى بجد
بتحب تيمى و الوالدان السحريان
مكنتش بحب شخصية المدرس خالص يا عادل ..اصله علاوى قوى ؟؟ بتحبه اواى دا !!!
و اوعى تقولى كمان انك
بتحب تيمون و بومبة كمان ؟!!!
انا كنت حافظة تعليقات لمحمد هنيدى كنت بقولها ليوسف فى مواقف مختلفة و كانت زى السيم بينى و بينه
ايااااااام
عقبال ما يرجع و يبقى بينك و بينه سيم برضو انا ابقى قاعدة وسطيكو ابيض يا ورد
بس ابقى باصيلى الشفرة
فى السوكتيم
عشان منظرى ميبقاش وحش
انا امكوا برضو
ماشى ؟
طيييييييب





مى
نورتى يا مي يا حبيبتى
يا ستى بوسى و ميهمكيش
و لو عاملة حماة مش هعمل حماة عليكى انتى بقى انتى وصاية و حماية من واحدة صاحبتى بتحبك قوى قوى و موضيانى عليكى و قايلالى أوعى تزعليها
صاحبتى مين ؟؟
واحدة اسمها فاتيما
ام يوسف




اميرة على كوكب مهجور
يا اميرة على حق كل مرة هنقعد نعاكس فى بعض و شكلنا هنتنش عين
منحرمشى من رقتك يا حبيبتى
بوسيى تاليا



مسدس صغير
يسمع منك ربنا يا صاصا
الف شكر ليك
و يا عم ارسولنا على بر فى لقاء المنصورة بقى خلينا نعلن عنه و الناس تلحق تستعد ....

بسنت صلاح الدين
هردد وراكى يا بسبسة
متحرمشى منك يا حبيبتى





mohamed ghalia
و يسعدك انتا كمان يا محمد




karim
يا كريم
انت جبت اكتر حاجة وحشانى الأيام دى
يوسف وحشنى بكل ما فيه
بس حنانه و دلعه ليا
بيوحشنى اكتر
تصور !!!



ست البيت
يا مروة يا حبيبتى اعمل إيه بس
طب ما هو مكتوب فوق اهو اليوسفيات بس بخط صغنون شوية ...
و بعدين يا ستى ما تعيطى ...
عشان الناس فى الشغل تعرف إنك شخصية حساسة و قلبك رهيف يقوموا يلموا نفسيكم و محدش يزعلك الا للشديد القوى
تسلميلى يا حبيبتى



ام بتول
تعرفى بقى انا متهيألى لما يرجع مش هبطل عياط برضو
من الفرحة
و الإحساس بالنعمة
و لما ينجح و لما يتعلم يعزف مزيكا
و لما يشترك فى مسابقة و يفوز
و لما يطلع متفوق فى مدرسته و ناخد شهادة بذلك
و لما اشوفه لابس لبس جديد و شكله حلو عليه
و لما اشوفه فرحان و بيضحك من قلبه
و لما اول مرة يحب
و لما و لما و لما .....هو انا هقولك انتى ام و عارفة كل المواقف دى
متحرمشى منك يا حبيبتى


محمد فوزى
عقبالك يا محمد لما تمر بالحوار دا
بس فى الفرحة و من غير بعاد
إن شاء الله




صاحب المضيفة
ايوه الدعوات الحلوة دى
بستناها يا انس
بس فين يا خالتى ؟؟!!



مطلق
يااااااااه يا كريم ؟
انت مبتدخلش عندى من زمان
على كدا
منا حكيت الحكاية كلها
فى بوست سابق
و بالتفصيل الممل ...
حاجة شبه حكايتك
بس من الضفة الآخرى
من شط نون النسوة يعنى
جايز مجتش فرصة ليك انك تسأل
عشان الواحد ساعات لما بيكون فى عز القرف و المشاكل مبيبقاش عاوز يسمع شكاوى مشابهة لشكوته
لأنه بيكون غرقان فيها
لدرجة انه عاوز يطفش منها
مش يسمع حاجة شبهها
و عشان كدا محبتش انا كمان
لما شفتك مرتين تلاتة
انى اسألك عن أى تفاصيل عن زينة
عشان شيفاك مش ناقص
و على آخرك
بدخل مدونتك
و اطمن عليك
و امشى فى هدوء
و بدعيلك ربنا يسكن غضبك
و يخلى زينة اقربلك من روحك
مهما بعدت عنك
زى يوسف ماهو اقرب البشر ليا
حتى و هو بعيد
هو دا غالبا اللى ممكن يداوى المك و لو مؤقتاً
لأنها راجعالك يا كريم
و دى مفيهاش شك
بس الوقت ..الوقت يا عزيزى هو المشكلة الوحيدة إننا منعرفش
امتى و لو نعرف ممكن نرتاح شوية
خالص ودى ليك
و سعيدة بتعليقك جدا





فشكووول
و كلام حضرتك يا استاذ صلاح
هو كل حاجة فعلاً
و ما يقدر على القدرة غيره



همس الاحباب
منحرمشى يا ابو همس
و شابى الجميلة
خالص ودى يا اخويا الغالى

يعنى ينفع كده يافاتيما
ادخل علشان افرحك انى بكسر كل القيود اللى حواليا وبحاول الا ابعد عنكم
الاقى روحى بعيط كل الدموع ديه
عارفة يابطة وانا فى محنتى هذه لم انساكى لحظة والاقى روحى بدعى لك كما لو كان ربنا يذكرنى بيكى وبيوسف
انا عند يقينى ان الغالى راجع راجع
باذن ربه وساعتها انا حاجى اقعد
عندك اسبوع ايه رايك بقى
عارفكى حتقولى اسبوع بس
راجع يابطة وباذن الله لايترك حضنك بعدها ابدا
مش عارفة اشكرك ازاى على كلماتك ليا
ربنا مايحرمنى منك ولايحرمك من الغالى
تحياتى

بردو دموع يا فتيما ، أنت غاوية بقى ، بس عموما و ثتها ها تكون طعمها حلو أو على ألقل راحت منها مرارة الفراق ، عموما مش مهم يكون فى دموع ولا لأ المهم أنك تفرحى و تتهنى بيه .

اولا رده الله الى حضنك ولدا بارا وربنا يخليهولك
ثانيا احيانا الدموع بتكون متنفس للانسان

اتمنى ان لا تجعلي الدموع عاده فتفقد حرقتها
تحياتي وخالص دعائي


:
:
:
فاتيما ..

لحرفك هيبة وروعة تقبض قلبي
أنفاس الأمومة التي تكتبين بها
فابتعد عن التعليق وابتعد بقلبي المعذب حقاً هذا ما أشعر به بين أحرفك
ولكن لا يسعني الابتعاد وعدم قراءة جديدك

ربنا يحميلك يوسف يارب من كل شر
ويرجعهولك بالسلامة ويحفظهولك

آمين يارب العالمين


لروحك الياسمين



:
:
:


Angel love


فاتيما حبيبتي ممكن تعملي كده من فضلك
ده من أجل عودة الغائب
وإن شاء الله يكون دعاء مستجاب
وإن شاء الله أي حد يقراه يستفاد

قراءة سورة الطارق 3 مرات و تكرار آية ( إنه على رجعه لقادرٌ ) 14 مرة
و الأفضل مع ركعتين لله و قرأتها في السجود
أو

قراءة السورة من غير صلاة 20 مرة و تكرار الآية 99 مرة
وربنا يوفق الجميع

وربنا يريح قلبك يا فاتيما

ربنا يرجعلك يوسف ,,
ويعيش في حضنك

بالنسبة لسؤال حضرتك عتي
شكراً جداً
أنا بس في شوية دوامات ما بعد التخرج
شهادات وورق ومصالح حكومية وجيش وتجنيد

دعوات حضرتك

ربنا يريح بالك وقلبك يا فتفت يا حبيبة قلبي يارب

إن شاء الله يوسف يرجع لمامته بإذن الله

وقريب أوووي نشوفه معاكي وهو مالي الدنيا عليكي

وبصراحه بقيت حاسس إنه بقى إبن كل المدونين

لشوقهم وحبهم له ورغبتهم في إنهم يخدوه في حضنهم


يا رب إن شاء الله المرة الجاية لما نتقابل في لقاء المدونين

تكوني جاية ويوسف في أيدك :)

انا مش جايه ارخم ولا حاجه لاء
انا جايه اطمن عليكى بس واسئل عليكى

ازيك يا فاتيما؟
يارب تكوني بكل ويارب يوسف كمان يكون بخير
انا قريت تقريبا كل بوستاتك وخصوصا اللي عن يوسف
صحيح انا عمري ما علقت عندك قبل كده بس بردو عمري ما فوت بوست ليكي وزي ما قلتلك خصوصا اللي عن يوسف
وبجد المره دي بقي قررت اني اعلق عندك واني اعتبر نفسي اختك وصاحبتك
وبجد مش لاقيه دعوه ادعيلك بيها غير ان ربنا يرجعلك ابنك ف حضنك وميبعدش عنك تاني ابدا ويجعله قره عين ليكي ويجعله بار بيكي عشان انا عارفه انك شم محتاجه دعوه ف الدنيا غير دي
وعارفه اد ايه لو الحاجه دي حصلت كل حاجه تانيه ف حياتك هتبقي حلوه علي اساسها
عشان كده من قبل قلبي بقول يارب ما تحرم فاتيما من ابنها اكتر من كده ويارب يرجع ف حضنك زي الاول
ويارب ما تحرم اي ام من ابنها حبيبها

يارب يرجعلك بالف سلامه
تعرفى ان يمكن معرفتى بيكى من بعيد بس قلبي وجعنى قوى انه بعيد عنك
وزي مااتنى كاتبه وبشر الصابرين



يارب يارب يارب يرجع لحضنك قريب ويعيد معاكى ويخليه ليكى طول العمر ويرضى عنكم

الغالية ام مالك
منتى عارفنى
غاوية عياط و نكد
اعمل إيه الموقف كله من اوله لآخره حكم بذلك
اصل يوميها كان يوم ما اتقالى إنهم عاوزينه و هياخدوه و ف اليوم الفلانى
قلبى غاص و راح ف حتة ملهاش مسمى
و مكنتش عاوزة اتكلم و قولت انام يمكن لما اصحى اكتشف انه كابوس و لا حاجة
و ندهت يوسف
و حصل ما قرأتيه
ربنا يطمنى عليكى دايما
و سعيدة برجوعك جداااا
رغم كل ما تمرى بيه
فرحانة أكتر بحبك الجارف اللى عمال يتوزع على قلوبنا طول ما بتكتبى و لو حرف واحد فى أى مدونة من مدونات الأحباب
الف حمدلله على سلامتك يا غااااالية



أم بتول
معلشى بقى .. اصل العياط دا مش هدف
دا مجرد علامة
علامة فرح
او حزن
او خوف
او حنين
او....
أو.....
كدا يعنى



إسكندرانى أوى
اولاً نورت يا باشمهندس جدا
ثانياً فعلا متنفس و رحمة من عند ربنا
ثالثاً نصيحتك فى محلها
بس لو تقرى ردى على ام بتول قبل منك علطول ممكن يوصلك رأيى ..ان البكاء مش الهدف و كفى
ترجع بألف سلامة



angel
شكرا ليكى يا حبيبتى على نصيحتك
و وصفتك الطيبة ... زيك
و شعورك مش اول مرة اسمعه ..إن احيانا الناس بتتعب لما تدخل و تقرى حاجات عارفة مقدما إنها هتوجعها
لكن مع ذلك بتدخل و تقرى
عشان قلبهم فيه الخير
و عشان يوسف حبيبى يستحق كل هذا الحب
بجد
نورتينى يا ملاك من السما

د.ياسر عبدالفتاح
حمدلله ع السلامة يا دكتور
المهم إنك بخير
و عودا حميداً إن شاء الله



mimi
متحرمشى منك يا ميمايا
يا بسكوتايا




عارفة ..مش عارف ليه!!!
ياااااااااه يا وليد
اخيرا ظهرت يا أبا المهند
يا جدع حرام عليك الخرعة اللى بتخرعهلنا عليك دى كل شوية
بتروح فين انا مش فاهمة بس
محداكوش كامبيوطرات فى الشغل
و لا البيت
و لا نتات كافيهات
و لا أى منظر
تسيب بيه تعليق عند أى نفر من العالم اللى بتتوغوش عليك دى !!!
ماشى ماشى
ليك إبن ينشكيلوه منك
بخصوص امنياتك للقاء التدوينى الجاى
تفتكر ممكن ؟؟
دا لو حصل ..هنهى بنفس الكلمة اللى بدأت بيها الرد
يااااااااااه يا وليد



بنت قلبى
يا حبيبتى تعالى وقت ما تحبى و اهلا و سهلا بيكى ...
انتظرى منى إيميل قريب و سامحى تأخيرى عليكى لأنى مطحونة ف الشغل و فى الإنفلونزا كمان




eng.muslimah
مش عارفة ليه حاسة إنى أعرفك
إحساس غريب
معرفش
بس انتى منورة المدونة و البلوجر كله
و شكراً على كل كلمة قولتيها
لأنها تقريبا كل الحقيقة
رجوع يوسف هو الدنيا و ما فيها



سمكة واحدة
انتى كمان يا حبيبتى
وحشتينى ى ى


GIGI
انا كمان معرفتى بيكى من بعيد
بس البعيد ممكن قوى
يقرب ف ثانية
و يكون قريب
اشكرك على الدعوات الطيبات
و نورتينى

لم اقرأها اول مره
ولكن اعجبتنى كثيرا اليوم
وبالمناسبه بتحصلى انا كمان ساعات

هو انا ممكن اعلق ؟؟
اوقات كنت باجى هنا و رغم انى كل مرة اقول هعلق و اكتبلك ارجع تانى و اقول بلاش مش عارفة ليه ماعلينا

انا بحبك اوى جدا خالص رغم انى مش اعرفك غير من فترة قريبة اوى بس حاسة انك حنينة اووووى ربنا يكرمك

معرفش حكاية يوسف كل اللى اعرفه انى علقت المرة دى عشان ادعيلك ان ربنا يرجعه يااارب بالف سلامة لحضنك و ياارب يفرحك بيه و تشوفيه ادام عيونك ... خلى عندك امل فى ربنا

ربنا يرجعهولك بالسلامة

mohra
انا بحب التدوينة دى قوى يا مهرة
رغم مرارة مناسبتها عندى
لكن فيها حنان من يوسف بيغمرنى لحد دلوقتى كل ما بفتكره و بفتكر كل همسة
كلنا يا حبيبتى
بتحصلنا ساعات
دى براءة الطفولة الممزوجة بالحكمة
وحشتينى




جارة القمر
طبعا ممكن تعلقى و قوى كمان
اشكرك على ذوقك و رأيك فيا
و المدونة تحت أمرك و سيبى تعليقك اينما و ووقتما شئتى و عاوزة اقولك اسمك حلو لأنه بيفكرنى علطول بمطربتى الأولى و الاخيرة فيروز
نورتينى بشعاعك يا جارة القمر



الكلمة نور
انت مش قايل إسمك
و لا حتى حاطط إسم لمدونتك
مينفعش مندهكشى ... و كمان مقدرش اقولك يا الكلمة نور ؟!!!
هختارلك إسم مختصر و مش بعيد
و ليكن .... نور
إيه رأيك ؟؟
لأ مش هاخد رأيك ..
انا هكون ديكتاتورية بقى
ما دمت انت كمان رافض تقول للعالم كلها على اسم ينادولك بيه
القصد .. عاوزة اقول
زيارتك شرفتنى
و اشكرك على الدعوة الطيبة
يا نور

eng.muslimah
فاتيماانتي يا حبيبتي متعرفنيش شخصيا وانا فعلا اول مره اعلق عندك بس اقسم بالله اني انا كمان حاسه جدا اني اعرفك ومن زمان بس يمكن الاحساس ده يكون ناتج عن اني فعلا عايزه اعرفك وفعلا يشرفني جدا انك تعتبريني اخت ليكي
وبجد بجد مش عارفه اوصفلك احساسي بيكي وانتي بتتكلمي عن يوسف
ودايما ادعيلك لنه يرجعلك من تاني لان دي الحاجه الوحيده فعلا اللي حالك ودنيتك كلهاهتنصلح علي اساها
يعني بدل ما اقول ربنا يصلح حال فاتيما ويكرمها هقول ربنا يرجعلها يوسف ويباركلها فيه ويفرح قلبها بيه ويجعله قره عين ليها ويجعله بار بيها
آمين باذن الله يا حبيبتي وعن قريب

احساسكم ببعض جميل وراقي.. تحياتي لك

عارفة ان الرد متأخر
بس اه انا صايمة و بدعيلك
يارب يرجعلك يوسف و حضنه و ميفرقكمش ابدا عن بعض

البلوج ده قريته مرتي النهاردة
كنت بشوف اول حاجة كتبتيها و اخر حاجة بقلب يعنى و النار الى جواكى لسعتنى مرتين ، يارب يبردها ربنا بيوسف

إرسال تعليق