.

.

البؤجة بؤجتنا  

Posted by: فاتيما in


تحديييييييييييييييث

-------------------------
جامع زهراء مصر القديمة


من عشرة و نص حداشر ... لحد إتنين


نمر الموبايلات أهى يا جماعة


خالد همس الاحباب

0101345140
داليا قوس قزح وش الخير

0117742287

و المكان فى الصورة فوق


المحطة متحددة بالأزرق


و الجامع باللون الأحمر


اظن كدا .... عدانا العيب عنوان و قولنا


مكان بالضبط و حطينا خريطة


و موبايلات و كتبنا الأرقام


و معاد بالتمام و حددنا


إياااااااك متجوش بقى

بوستات صديقة

فى آخر التدوينة


------------------------------------------


أصل البؤجة بؤجتنا

واللى يحبنا .... ميضربش نار


و يعمل حسابه ع الجمعة الجاية

11/ 12 /2009

إشمعنى ؟؟

دا سؤال !!!


عشان البؤجة الشتوية
طبعااااا

أظن الكل عارفاها

و حس عين حد يزنقنى

و يقول عاوز نبذة تاريخية و لا حاجة

أصل الحكاية إبتدت بفكرة خيخية لولبية

دوس هنا

تلفقتها قلوب محبة و كلها خير و إيجابية


و اقصد بالخير

وش الخير
داليا قوس قزح

و بالإيجابية

آبى هانم بتنجانى كوكب آبى


دوس هنا

اللى ميعرفش حاجة و لسه مستجد .. ي
روح يقرى

و اللى عارف ...يبقى عامل حسابه و إن شاء الله جاى


مش عاوزة أوصيكم بقى


أى حاجة مستغنيين عنها ممكن تنفع لحد تانى

و تفكله زنقة ... هاتوها ف إيدكو و تعالوا


و صدقونى عن تجربة الواحد بيروح الفرحة سبقاه


و كأنه هياخد ..مش رايح يدى


دى نعمة .. متفوتوش الإحساس بيها على روحكم


ناس حلوة قالت هتيجى .. لما أفتح نفسكم

خد عندك

ستيتة حسب الله الحمش ..اخيراااا يا س س

واد يا عاااادل ..هتيجى مليش دعوة إتصرف


شيماء سمير بتسأل بقلب .. و هستناكى يا حبيبتى


بت يا خيخة .. أياك متجيش أنا بقولك أهو


شاهى و النبى تحاولى اليوم بيفرق بوجودك


خالد همس الاحباب انا بتكلم فى إيه

جاى دا يبقى أبو العروسة
... قصدى البؤجة

عسقول متهرجش و تعالى

الشنكوتى طبعا و لا يعرفنا خالص


ربنا يسعده يا رب


بنوتة مصرية ..هتيجى يا رودى انتى و نور

فيه ناس البؤجة متنفعش من غيرهم .. زى احمد كمال

و ساجى .. يا ريت لو تيجى؟؟


ميرا يا اميرة يا ست البنات جاية مبسألش انا بقر حقائق

و شيمااااء يا أونلى سبوت

سوووو ...انت و الصباغ لازم هتيجوا

مايكيليتوووو ..انت أساسى فى اليوم دا

ضياء يا اجمل عقل متهيألى جاى ايام الخير

هو ماركتها المسجلة

دريم يا فضفة عالسريع هاتى البنات و تعاااالى

و وليد كنج توت و هبة و عمر يا بيكاااا .. نورونا

هانى يا مصرى جدا ..لن تندم و الله

الناس الحلوة اللى جاية من المحافظات

بسكوتة من إسماعيلية .. هستناكى يا حبيبتى

ahmed - k تنور القاهرة و قلوبنا يا احمد

فريق بورسعيد الغالى ..بابا أبو خالد و إيناس نهر الحب

و نسمة الرقيقة


صبرنى يا رب
... يا أم مريم نفسى تحضرى معانا


هاتى معاكى الحبايب اللى يقدروا

ييجوا من المنصورة


كل الاحباب سكرة و شيماء الشعب و رحيل

و كل الأسامى مش عاوزة أنسى حد

bos bos

حاولى تيجى و بدرية كماااان


دول الناس اللى برا القاهرة

و نفسهم ييجوا و مش نافع


بس هما معانا برضو

و فى قلوبنا من غير حاجة


سامعة يا دودو و يا حنين يا ام عمر

و يا أم مالك الغالية و داليا ماى كورنر

و كل اهل أسكندرية الماريا

و كمان قبل ما انسى

أستاذ عبدالجليل اللى مش هيقدر ييجى

و ربنا يشفيه

هوه و أستاذ فشكوووول

كل الجمع الجميل اللى جه

لقاء الازهر بارك

اللى يقدر ييجى يا عيال ميتاخرش

كيكى يا قمر و ميمى يا بسكوتايا

و محمد غالية و يا أبو العيلاااا

د. ياسر و الكل ..انتوا عارفين نفسكو ا

مش هعقد أنده واحد واحد

و اللى برا البلد كلها

يا مراكبى و يا وليد و يا هنودتى و يا نيجروووو

و يا مهندس مصرى و يا سبهللة و يا زيانور

و يا
إيما ام البنين و فريق الزعر و الدكتور العزيز الحافى

كأنكم معانا و البؤجة الصيفى

تكونوا رجعتوا بالسلامة


و يا كل الاحباب ..مش عاوزة انسى حد

و محدش يزعل منى لو سقط سهوا أى إسم

و فيه شخصية كانت موجودة البؤجة اللى فاتت

و مش جاية المرة دى ... بس انا قلبى فاكرها

و بغض النظر عن أى حاجة يعنى .... فإنتى وحشتينى

قلبى بيقولى إن اليوم هيكون رائع


و كفاية الناس اللى وعدت بالحضور


وش الخير كتبت ...
هنا

وآبى هانم بتنجانى كتبت بوست يعتبر

آخر حاجة تقريباً


هنا


لكن محدش قال الساعة كام ؟؟؟

طب اقول انا ؟!!


انا سخصياً بروح بدرى ف العادة

و هكون هناك من الساعة 10.30 الصبح


محدش يلطعنى لوحدى كتير

لحسن الشباب البايظ يعاكسنى


قصاد السينما ... يووووه قصدى قصاد الجامع


و هذا ينقلنا للمكان .. هوه الجامع

خريطته عند قوس قزح عموماً


و المواصلة ليه افضلها ... ركوب المترو

لحد محطة الزهراء


تنزلوا منها وتسألوا عن مسجد زهراء مصر القديمة


الجامع تابع ليه

جمعية صحبة خير


اللى هنسلمها البؤج و لو حد حابب يتبرع بفلوس

مفيش مشكلة و جزاه الله خيراً


الحاجات دى كلها بتروح لتطوير عشوائيات مصر القديمة


و بيستفيد منها عدد لا يستهان بيه من الأسر

اللى عايشة مش تحت خط الفقر


هى عايشة و بس لا فوق و لا تحت

لأن الخط نفسه مش موجود أساساً

و طبعا كل حد عنده أسئلة


يقدر يستفسر من رئيسة الجمعية الأستاذة صبرية

و هتكون متواجدة اكيد يوم الجمعة


بعد التجمع و السلامات و الاحضان

و الكلام و الرغى

و تسليم البؤج و صلاة الجمعة


هنتحرك من المكان عشان نقعد فى حتة تانية

معرفهاش لحد دلوقتى


و محدش قال ... بس نبقى نشوف يوميها


جدول الأعمال يشمل

الأحتفال بعيد ميلاد قمر التدوين كله


آبى هانم بتنجانى كعب الغزال


و ما يستجد ....نبقى نشوف إيه


كله يحضر روحه بقى


واللى طلع الشتوى اكيد فرزه خلاص و عرف إيه

اللى هيملى بيه البؤجة بتاعته


نداء هاااااام

اللى معندوش حاجة يا جماعة

و عاوز ييجى... لا يتردد مطلقاً


حضوره فى حد ذاته شىء جميل


هيزودنا و يكترنا و المرة دى معندوش حاجة

المرة الجاية يكون فيه


محدش ينكسف يعنى و بعدين اليوم

للخير و للأحتفال بآبى
و كمان للتعارف

فبلاش حساسيات و قلق و كسوف و الحاجات دى


و مش أتاوة و فردة و اللى مش جايب معاه بؤجة

هنجرسه مثلاً

و نقول إيه دا اخص ..مجبتش بؤجة ليه

و نقيم عليه الحد و نعلقه على باب الجامع

ماشى؟؟


ييجى يشيل و يساعدنا و يساندنا معنوياً


صدقونى منظرنا و إحنا كتير

بيبقى حلو قوى و يرفع المعنويات


باقى جزئية مهمة جداااااا


اللى هيا نمر الموبايلات


طبعا إنتوا عارفينى .. خارج نطاق الخدمة

و الحكاية دى مزعلة ناس شيك جدااا منى


بس معلش و انا بعتذرلهم علناً أهو


وش الخير كاتبة ارقام فى البوست القديم

بس معرفش الأرقام دى شغالة و لا لأ


بس يا ريت يا دوللى و يا آبى

لما تقروا البوست تبقوا تحطولنا ارقام فى التعليقات


عشان أنشرها للناس الحلوة اللى جاية

عشان ممكن ناس تتاخر علينا و تيجى بعد مشوار الصبح

فيعرفوا احنا فين و منتوهش من بعضيشنا

منحرمشى منكو مقدماً

يا داليا و يا رحاب


و يا خيخة

و يا كل اللى ناوى ييجى

و اللى مش هييجى غصب عنه لظروف قهرية

منحرمشى منه برضو

اما بقى اللى مش جاى بمزاجه

ميكلمنيش أصلاً


خلاص كدا ...إتفقنا ؟


الجمعة الجاية


عشرة و نص


قصاد جامع زهراء مصر القديمة


اشوفكم يوميهاعلى ألف خير


يا احلى صحبة

و ناس

و عالم

-------------------------------------------------------

بوستات صديقة
---------------
داليا قوس قزح ...لقاء الخير
آبى هانم بتنجانى ...بؤجه الخير

بت خيخة و أى كلام ...البؤجة بؤجتنا و البتنجانة حبيبتنا
ستيتة حسب الله الحمش ..و بتسأل يا حبيبى البؤجة هتبقى فين ؟تيييييى رررااا

This entry was posted on السبت, ديسمبر 05, 2009 and is filed under . You can leave a response and follow any responses to this entry through the .

70 كــــلام بيطــبطـــب عـــلى قــــلبى و روحــــى

انا لسه مش عارف ظروفي الصبح بس اكيد هاجيلكم اول ما ااقدر و هابقي ابعتلك التفاصيل علي الميل الامومي (بتاع ماما يعني) و اعرف التفاصيل و اجي ان شاء الله

يانهارى كل اللى بحبهم هيكونوا موجودين:(
كلللللللللللللللهم,هموووووووووت واجى واشوفكو...

بس للاسف فى اليوم ده فرح بنت عمى ولو قلت لعمى مش هحضر االفرح علشان راحه البؤجه,هيحطنى هو فى بؤجه ويرمينى فى النيل..

نفسى اشوفك بجد والله وسنيور هانى ودكتوره ستيته وكل اللناس الجميله اللى بحبها..

خساااااااااره متعوضه ان شاء الله:(

adel
ماشى يا غالى على ماما
تعالى براحتك و على مهلك
بس على مهلك دى مش الساعة خمسة المغرب مثلاً ...يعنى وقت ما تقدر تفلفص
تيجى علينا طوااااالى
النمر هتكون مكتوبة إن شاء الله
الأيام الجاية
عشان تتصل عليها
و تعرف روحناو قاعدين فين و كدا
خلى بالك من نفسك
انا جيبالك معايا حاجة ..من وحى التعليقات اللى شغالة رايح جاى بينى و بينك ...يعنى لازم تيجى تاخدها لتتشال امانات و تدوخ وراها بعدين
سلام عشان رايحة انااااام
تصبح على خير يا ولدى العزيز

هى كلمه واحده بس اللى نفسى اقولها
ممكن؟
اوك


ربنا يجعلك دايما مصدر سعاده لقلبى





فرحتينى بذكرك ليا فى البوست انا وحنين
وفرحتينى اكتر باهتمامك بيا وبارسال الميل
قلبى بيرقص والله يابطه

ربنا يجعل اليوم فى ميزان حسناتكم

اجمل شئ انى اختم يومى بكلامك الجميل
انا كمان هاروح انام
احلام سعيده ياقمرى انا
اموووووووووووووه

الشعب لابد له من حكومة تشكمه
إيه يا مشمش دا ؟؟
إيه الأعذار اللى محدش ينفع يتكلم فيها دى!!!
طب اقولك إيه انا دلوقتى ؟؟
عاااااااااااا
ميصحش طبعا متحضريش فرح بنت عمك (عقباااااالك يا رب ) و اصلاً احنا ميرضيناش متقوميش بالواجب
و كمان لا نوافق انك تنحطى فى بؤجة
تجيبها فى أيدك و تيجى معلش ..
لكن تنصرى فيها؟!!!
قلبى ميستحملش خالث
عموماً يا حبيبتى تتعوض إن شاء الله
عندنا أيام جايةو كلها خير بإذن الله
و الناس الحلوة تيجى و تشوفيها
بوسة و حضونة يا مشمش

كل سنه وابى هانم طيبه وبخير
كان نفسى اكون معاكم
انا بعد ابى ب 4 ايام عيد ميلادى
اكيد كان هيبقى طعمه مختلف بينكم
بحبك يابطه وبحب عيلتى الكبيره دى كلها(المدونين)

السلام عليكم

ازيك يا فاتيما عاملة ايه

معلش اني متأخرة عليكي و انت السباقة
كل سنة و انت طيبة و لو انها متأخرة شوية

انا فعلا عايزة اشترك معاكم و بالصدفة لسة مطلعين هدوم مش عايزينها بس للاسف انا الجمعة استحالة اقدر اجي

شوفي نبقي نتواصل ميل و نظبت الموضوع دا
فعلا واحشاني اوي :)

تممام يا فندم

بس التفاصيل
امتي فين الساعة كام

والذي منه ... والبسكوت يا سكرة
ههههههه ياريت بالملح المرة دي


وحشتيني جدااااااااااا

جزاكم الله خيرا
وجعل اعمالكم فى موازين حسناتك
ربنا يسهل ان شاء الله
بس قولى يارب

انا كتبت من دقايق تعليق كبير بس النت لعب معايا الدنيئه
عموما هاقولك باختصار
طمطم كان نفسى اجى والله
لكن عندى شويه مشاكل فى البيت مع ماما وبابا وكمان محمد
وعشان كدا تم فرض الاحكام العرفيه عليا
هاكون معاكم بقلبى
ويارب من هنا للجمعه اعرف اتصرف واغير الاحكام دى
بس لو ماكانش يوم جمعه كنت اتصرفت
بس وربنا نفسى احضر
كل حبايبى جايين
وانتى وحشانى اوى لكن تتعوض يارب
مساكى شيكولاته

تعيشي و تعملي بؤجة يا أم يوسف :)

جزاك الله خيرا على التذكرة ، و ربنا يتقبل من الجميع

ماتدينى حضن عايزة يحضنى
مممممممممممممممممم
المهم لو جيت ان شاء الله هجبلك الملايه عشان نقعد سوا عليها لا تقلقى

عمالة اتفاوض انا وأميرة على كوكو بس هي مش هتقدر تيجي

وبتفاوض مع بابا علشان يسمح لي انزل القاهرة ربنا يسهل وان شاء الله اقنعه مع اني بيني وبينك خايفه من موضوع السفر لوحدي ده ولسه ما بين أيوة ولأ

بس بجد بجد نفسي اكون معاكم ان شاء الله

انا عاوزة اجي

وعندنا هدوم بالهبل

سؤال

هل لازم اغسل الهدوم
واكويها
ولا اية النظام في الهدوم المطلوبة؟؟؟

والدتي مش موافقة
بس سنحاول في هذا الامر

يا رب ييسر واعرف آجي

ربنا يجازيكم خير يا رب

سلام عليكِ

بكل الوقاحة وقلة الأدب والتصديغ والعشم الزائد عن حده عاوزة اعرف التفاصيل ومعنديش وقت اروح كل المدونات المذكورة
مونكن فضلا يا فافي لا أمرا تحطي الساعة والمكان والموبيل المسموح وكلو كلو كلو
لله يا محسنين لله
ساعدوا عاجزة الوقت
حسنة قليلة تمنع بلاوي كتيرة


جاين
جاين
جاين في ايدنا سلاح

رايحين
رايحين
رايحين معانا بؤج

وبحبك يا حبيبة الملايين يا ام يوسف الشرباتات

بعد يوم عينيف .. و صراع مع النوم و الأرق .. قلت آخد هدنة و آجى الفرح بتاعكم أضرب خرطوشين و أنزل بالنقطة

النقطة الجاية دى من عسقول

عسقول .. يعنى .. الفنجرة و الكرم

عسقول .. يعنى .. الفلوس آخر حاجة نفكر فيها

عسقول .. يعنى .. البنك المركزى

عسقول .. يعنى .. دار سك العملة

عسقول .. يعنى .. بيت المال

عسقول .. يعنى .. البنك الدولى

عسقول .. يعنى .. أى بنك فيكى يا كرة يا أرضية

البنوك التقيلة .. آه

البنوك اللى فلست .. لأ

و الأزمة العالمية .. لأ

و بورصة دبى اللى ولعت .. لأ

و سمعنى سلام "بؤجة بؤجتين تلات بؤجات .. اللى جاى أحلى من اللى فات"ا

و يالا با جماعة
أشوفكم أمس

أنا داخل معركة النوم و الأرق تانى عشان ورايا بكرة - أو النهاردة بقى - شغل إن شاء الله

جزاكم الله كل خير :)

جزاكم الله كل خير

انا الحقيقه طمعانه موووووت فى بوسه وحضونه على الطبيعى زي البت المشكوكه مشمش رقم واحد


لا لا هى رقم اثنين انا رقم واحد


نفسي اجي يا فاتيما باقطع فى هدومي عشان اجي على فكره

ومن دلوقتي شغاله طقم قرع من المعتبر بس شكله مش هاجيب نتيجه باين
اصله لسه جاي من القاهره من شويه

عااااااااااا ليه كده ياربي ليه

والعيال عندهم امتحانات وحاجه فله اوي

شوفي لو ما جيتش ابقوا اتصلوا اتطمنوا عليا عشان هاقعد اعيط وادبدب فى الارض بقى واصرخ لهم وكده يعنى

بس هحااااااااول طبعا ويمكن انحرف واجي لوحدي انا والبت ايمان سول

يارب اجي يارب

وانا مندمجة اوى فى قرأة البوست
واذ فجأتن اكركع من الضحك
لما لاقيتك كاتبة

والشنكوتى طبعا ولا يعرفنا خالص

هههههههههههههههههههههههههه
هههههههههههههههههههههه
هههههههههههههههههههه


دى اول مرة


تانى مرة بقى افطس على روحى من الضحك رغم ان الموقف صعب

وانتى كاتبة
عن خط الفقر

وبتقولى الناس دول عايشين وبس
ولا تحت خط الفقر ولا فوق خط الفقر

لان الخط مش موجود اساسا

انا بصراحة ماقدرتش امسك نفسى من الضحك لما قريت التعبير ده
هههههههههههههههه
هههههههههههههههههههههه
انا عايزة اعرف بقى مين اللى سرق الخط

ههههههههههههههههههههههههه



اه صحيح انا عاجبنى عنوان البوست اوى

البؤجة بؤجتنا

جميل خالص الموسيقى اللى فيه



ربنا يسعدك يارب يا طمطومة

واشوفك على خير دايما يارب

والقاكى يوم الجمعة ان شاء الله


سلام يا حبيبتى
اختك خيخة

ان شاء الله جاية يا فاتومتي
انا اخدت الاذن من السلطة التانية اللى هي ماما لسة بس السلطة العليالم تمنحني التأكيد لكن الاجواء بتوحي بموافقة جماعية

ان شاء الله اجي واشارك في يوم جميل زي ده , والله ربنا عالم انا من قلبي مبسوطة باليوم من قبل ما ييجي

كمان فرحتي متتوصفش انى هاجي واشوفك واتعرف عليكي اكتر
واتعرف على كل الناس الحلوة اللى هاتيجي
ياااااااااارب دايما متجمعين في الخير
انا بقا ان شاء الله هحاول اجي بدري زيك يعني هتحرك من بدري كمان علشان اعمل حساب التوهان ولو ان اللى انتي قولتيه ميتوهش
اول ما اوصل كايرو هاخد المترو وانزل في محطة الزهراء واسأل على مسجد زهراء مصر القديمة
تمام كدة يا فاتومتي؟؟؟؟

يلا بوسة وحضن لحد ما اشوفك

انا حسه انى دخلت فرح وموت من الضحك بالصدفه على تعليق عسقول
ربنا يكرمك يا طمطم يا رب واشوفك على خير يا قمر

عاشقة الرومانسية
يا حبيبتى احلام سعيدة كل يوم مش امبارح بس
و انتى عارفة اللى ف قلبى
و عارفة انك ف بالى علطول
يا عيال انا بحبكو بجد
و محظوظة بيكو
و لازم كل شوية افكر نفسى بحظى اللى انعدل دا من بعد ميلة طويييييلة
كان نفسى تيجوا قوى
مسيرها تحصل إن شاء الله
انا كمان بحبك
و فاكرة كويس إنه 14 و كنت ناوية احتفل بيكى على طريقتى يوم البؤجة و هوزع حاجة حلوة بإسمك إنتى مش بإسم يوسف المرة دى بس كدا المفأجاة اتحرقت خلاص ..بس هعملها برضو
كل سنة و إنتى طيبة يا حبيبتى
و عروسة البحور الجميلة



شمس الدين
فين بقى يا شموستى دنتى اللى جيتى و نورتينى أهو
كل سنة و انتى بألف خير يا حبيبتى
و مفيش امل خالص تيجى؟؟؟
طب نشوف ف الإيميلات الحكاية دى
مستنياكى يا شموستى



مسدس صغير
صاصاااااا
طب يا ريت يا بنى لو تقدر
و تبقى فرصة بدل ما البناتيت يسافروا لوحدهم تيجوا سوا بربطة المعلم بس مش حسن شحاتة خليه قاعد فى بيتهم مش عاوزة اشوف وشه ...
إقرى باقى التعليقات و اول باول عشان تتابع تطورات الموكف
القاهرة هتنور بيكو
و يا رب يا صاصا يا رب




mimi
يا بسكوتايا يا ميمايا
يوم الجمعة 11/12/2009
تركبى المترو لحد محطة الزهراء
تنزلى منه تسألى على جامع زهراء مصر القديمة
هتلاقينى واقفة مستنية هناك من عشرة و نص الصبح
نمر الموبايلات جاى إنتظارها و حططانها ف البوست اول ما توصلنى
انتى كمان وحشتينى
و حاضر
واحد بالشكولاتة
و واحد بالملح
عينياااااا





sookara
يعنى مفيش امل خالص ؟
و لا عمر
كان نفسى تيجى قوى و يا مسهل و تعرفى تحليها ربنا يحنن قلوبهم يا رب
صباحك شكولاااااتة




احمد كمال
يا لهوووووى
ازيك يا احمد
طب اعيش ماشى ..ربنا يسمع منك لكن اعمل بؤجة ازاى و انتو السبب فيها و الاصل ؟؟
من غيركم متبقاش و لا تكون
اتعشم اشوفك إن شاء الله يوميها
يا أبو مصطفى ى ى

كيكى عووووو
يا ستى تعالى و من غير ملاية
نقعد و نحضن و كل حاجة
بس تعالى
إن شاء الله تقدرى
و طمنينا على مايسة




ladyE
لولوووو
إتفاوضى تانى انا عارفكى عندك حجج قوية و اميرة أصلا محتاجة اليوم دا عشان تخرج شوية من الهموم
اما اروحلها فى مدونتهااشوف إيه النظام
و بعدين يا توتا ..الواد صاصا بيقول احتمال ييجى و صبصب كمان
نسقوا يا جماعة و تعالوا سوا
عن خبرة السفر صحبة ممتع خصوصا مع ناس محترمة و بتعزيهم
و اهو تاخدوا بحس بعض
و يبقى معاكوا راجل
لأ و صاصا محامى كمااان يعنى يسد فى اى خناقة تخلص ف القسم و كدا
و تبقوا تسيبوه ينضرب هناك و تيجوا إنتوا
هههه
فى إنتظاركم يا حبيبتى



نعكشة
بتهرجى
تعالى يا ماما
و إنتى بتسألى فى إيه يا نعكوشتى يا حبيبتى بصى
طبعا لازم ينغسلوا عشان الكمكمة و الريحة و كدا
لكن حكاية المكوة دى مش لازم قوى
بس انا قريت عند قوس قزح زمان تعبير عجبنى قوى قوى أقولهولك
إن الحاجات المتبرع بيها دى احنا رايحين نوديها لربنا اولاً و يعنى تخيلى لما تهادى ربنا لازم تكون الحاجة متقدمة باحسن شكل ممكن على قدر ما تقدرى
لو ملحقتيش تكويهم مجراش حاجة
بس الغسيل ضرورى يا نعكوشة
كله ثواب يا حبيبتى
كله ثواب و الواحد واقف غرقان ميه و كدا بيكون حاسس بالسعادة
هستناكى بقى اوعى يبقى فيه فرصة تيجى و متجيش
سلام عليكى انتى كمان يا نعكوشتى





ستيتة حيب الله الحمش
حااااااضر يا حبيبتى
إنتى تؤمرى
الساعة من عشرة و نص صباحاً
قصاد جامع زهراء مصر القديمة
موازى للشارع اللى فيه مترو اأنفاق محظة الزهراء ..لو سالتى عن الجامع هيدلوكى علطول ميتوهش
النمرة بتاعة الموبايل اول ما أعرفها هكتهبالك فى تعليق عندك لو مفضيتيش تيجى هنا تانى
معاك يا دفعة
لأ .زدنتى قائد الكتيبة بتاعتنا
هتوحشينى من دلوقتى للجمعة الجاية
يا س س





إبن حجر العسقلانى
ههههههه
تعليقك تحفة يا عسقول
مش بقولك يا بنى إنت لازم متبطلش كتابة
إقرى تعليق آبى و انت تعرف مدى البهجة اللى بتسببها دون قصد لمجرد انك دخلت و علقت عند أى حد مش انا بس ...أفهم من كدا إن النقوط دا هيوصلنا يوم الجمعة رسمى فهمى نظمى
و لا دى حركات كرم و فنجرة بوء إفتراضية
تخيلية
نتيه
مدوناتية بس !!!
فى إنتظارك الجمعة إن شاء الله
احم احم ..معايا يا بنى
وسلام كبيييير شحط محط للناس الحلوة اللى جاى تحيينا و تحييى البؤج
و بؤجة
بؤجتين
تلات بؤجات
و اللى جاى احلى من اللى فات يا عم المهدنزييين و جامعة الدول

اقصوصة
كتر الف خيرك
شكراً على تشجيعك
و دعوتك الحلوة




مى
شكراً يا مى
بس ليه حاسة إنك زعلانة منى ؟
يا ريت ميكونش كدا
و يا ريت لو تقدرى تيجى





صبرنى يا رب
صبصب
غنتى بتهرجى
دا قوس قزح قالت جاااااى منك
لازم تيجى و قرع إيه جربى المسقعة
و بعدين تانى يوم السبت اجازة و تلحقى تذاكريلهم و كدا
كثفى المحاولات يا صبصوبتى
و غن شاء الله تقدرى
لو جاية غنتى و سولاية تعالوا مع صاصا بدل ما تبقوا لوحدكو و ليدى كمان هتحاول و اميرة إن شاء الله
لما ترسوا على قرارات نوهائية
تعالوا سوا احسن
بحبك قوى
و يا رب تيجى يا رب
الحضونة موجودة و مستنياكى
لا تكلكلى




بت خيخة و أى كلام
ايوه يا خوخة
بقى الراجل هيسيب العسل و ييجى يبص فى خلقنا ؟!!!
دنا اللى لو شوفته هكرشه و اقوله أرجع يا واد على عروستك
غلا لو جابها فى إيده و جه دا يبقى يوم يجنن ..ربنا يسعده يفرحله شوية قبل النكد و انتى عارفة و ست العارفين انا للى هقولك !!!
صحيح العنوان عجبك ؟
بتحرجونا خالث ..أتفضليه
و لو إن البؤجة بؤجتكم إنتوا و انا بلحق جتتى عليكو رزالة
اشوفك على ألف خير يا حبيبتى
فيه امل شيكو ييجى؟!!!!




APPY
ماهو فرح يا حبيبتى و انتى بتقولى فيها ؟؟
انا حاسة إنه يوم جميل و الواحد واقف ييحى فى كل الناس الحلوة اللى بيحبها و البركة فيكى إنتى و داليا وش الخير ...عسقول شخصية جميلة و انا كل ما أشوفه اقوله لازم ترجع تكتب تانى و لو حتى تعليقات بلاش بوستات لأن إسلوبه مميز فعلاً
بس صحيح مفيش أرقام موبايل يا جماعة و لاّ الارقام اللى ف البوست القديم شغالة؟؟
أفيدونا عشان الناس بتسأل
خالص حبى يا بيبى
و كل سنة و إنتى طيبة يا قمر التدوين كله

هحااااااااااااااول والله وجهزت الحاجات أمبارح خلاص وكلمت بدرية وأتفقنا وكله تمام
بس يارب ما يجيش أى أستدعاء رسمى كالعادة ونضطر نسافر
عاااااااااااا
يارب

بس بقولك مش هينفع أجى من بدرى قوى كده
أنا علشان ابقى فى المكان اللى قولتى عليه الساعة 11 لازم أطلع من هنا على 8 ونص كده فيادوب ممكن أجيلكم على 11 أو 12

قوليلى المكان بالظبط هنا أو فى كومنت عندى فى المدونة وياريت لو فيه أى رقم أعرف أكلمكم عليه بدل ما أتوه منكم
ههههههههههههه

وعلى فكرة بدرية من حلوان
وأنا متفقة معاها تيجى

يارب بقى
:)))))))

ربنا يكرمكم
حلوة النية و الفعل

تصدقى لو كنت عارفة بموضوعكم ده كنت اشتركت قبل رمضان الى فات ، اصلى نزلت 5 كيلو فاضطرت اتخلص من ثلاث اكياس هدوم و راحوا لاصحاب النصيب عن طريق المعارف و الاقرباء
بس وعد لو نزلت ثانى او زدت و عندى الى ينفعكم حشترك طبعا بس ارجع مصر بس و ربنا يسهل
بس افتحوها حاجات مختلفة مش هدوم و بس
اجهزة ، كتب مدرسية ، اجندات تنفع كراريس

ام يوسف
كل سنة وانتى طيبة
بمناسبة البؤجة مش العيد
وكل بؤجة وانتى منورة البؤج هههههههه
المهم يا ست الكل
قوس قزح هتنزل تحديث بكل التفاصيل الخاصة باليوم
من ميعاد وارقام تليفونات
ممكن تنزليها عندك تيسيرا على الاخوة والاخوات
ومبدايا رقم تليفونى متاح للجميع
وفى انتظار تشريف الجميع
تحياتى

رغم اني اتنسيت كالعاده الا اني اوعدك لو في مصر اكيد حاجي انشاء الله

طمطم احن ام
انا عملت تحديث
علشان الناس اللى بتسال
ياريت تنزليه عندك
و انا هحاول ابلغ اكبر قدر ممكن

مووووووووووه لحد ما اخدها بنفسى

bos bos
بسبس بسبوسة
تيجى بألف سلامة يا حبيبتى
على مهلك خالص
انا بقول هبقى واقفة من بدرى و كل واحد ييجى على مهله خصوصا اللى جاى من سفر يعنى ...قوس قزح نزلت تحديث و هتلاقيه عندها و فوق عندى فى البوست
خلى بالك من نفسك و انتى جاية
سلام يا حبيبتى مؤقتاً و يا رب تقدرى تيجى




همس الاحباب
و انت طيب يا خالد
كل بؤجة و انت متدبس فيها ...
علم يا فندم و ينفذ
و هحط نمرتك مع التحديث
إحنا يجينا أعز منك ندوشه ؟؟
اشوفك على الف خير الجيمعة بقى



wanda
و يكرمك إن شاء الله يا ستى
و ترجعى بالسلامة
و تحضرى معانا و تجيبى بؤجتك معاكى
و على فكرة الاحتيارات فعلا مفتوحة
و المجال سامح لأى حاجة مادية
و عينية مش هدوم بس
هوه بس يعنى الأسم بتاعها مركز على الهدوم اكتر
إنما إحنا بؤجتنا على كل لون
يا فندم
و بخصوص التعليق فى البوست
اللى فات
يا واندا يا شقاوة
يعنى مود واحد و بيحصل إيه و تلمحيات و حاجات
أيوه يا ستى احنا مودنا متقارب
و بنغش و نبص فى ورق بعض
ههه
طب انتى شايفة اخواتك قاعدين فى لجنة الاستمحان و حالهم حال
متقوليش حاجة !!!
دارى علينا
و اعملى مش واخدة بالك مننا يعنى
لحسن المراقب جاى ناحيتنا
و هنتفقس أهو ...
ميرا معرفش دا التاريخ قديم
و مش قصتها أصلاً
انما خيخة بصراحة شجعتنى اتكلم
و زى ما تقولى شوطة و توارد مشاعر
زى توارد الأفكار كدا
المهم النتيجة
و ربنا ينفخ ف صورتنا
لحسن الواحد زهق من كتر السقوط
و الملاحق و الدور التانى
ربنا
يستررررررر
دعواتك يا واندا




مطلق
انا مش كاتبة كل الأسامى يا كريم
و انت صاحب بيت مش محتاج عزومة
ف إنتظارك




قوس قزح
يا وش الخير
يا حبيبتى
يا كل الوان الطيف
و منورة حياتنا
علم و ينفذ يا حبيبتى و هحطه عندى حالاااااا
انا كمان بوسة و حضونات لحد ما أشوفك
بحبك و بوسيلى العيال
و سلامى لأحمد و يا ريت ييجى
وجوده فى الأيام دى بقى ضرورى و مهم و اتعودنا عليه خلاص
سلام مؤقت لحد الجمعة يا حبيبتى

يا فاتيما يا حبي

انا من دمياط مش من المنصورة ف اذا ربنا اردا هاجي لوحدي ان شاء الله وأميرة مش هتقدر تيجي مش عارفة اقنعها مع ان نفسها تشوفك جدا

عاااااااااااااااااااااااااا
كان نفسى اكون معاكم اوى يلا المهم انكم تنبسطوا
وربنا يتقبل منكم صالح الاعمال

:-)))))
عارفة عايزة اسميكى فاطومة حيص بيص
بس متزعليش لو الاسم مش عاجبك بس اصلك بتخلينى ابتسم و ده شخصية من شخصيات غوار الطوشى (مسلسل لدريد لحام قديم)

فطومة اولا ربنا يوفقكم
فى الخير ديما

ثانيا عن الامتحان ، مش انا بغششكم اه بشوية كلام من القصص الى عايشة عليها مؤخرا :-) بصراحة ده الى اقدر عليه ، مليش قدرة ثانية
و متخافيش من المراقب ، انتم فى امتحان OPEN BOOKو من حقكم الاستعانة بصديق كمان :-)

على راى خيخة تعرفى اخر الحدوتة احسن حتى لو الناس قالت جريئة و ست راجل و كلام من النوعية ده، احسن ماتعيشى فى احلام و وووىىىىى تنزلى على دماغك (:-)) اصلها حصلتلى ، نظام نظارات و احترمات و انا دوبت و بعدين لما عملت خطوة بسيطة للامام ، اتوضحلى انى مش على البال اصلا:-) و ان ده العادى بتاعه :-)، و اكتشفت انى بحب المودبين :-) و ده طبيعى اعتقد:-؟)

شوفتى يعنى انا معديتش فى امتحانى انا و مش مشكلة ماهو ما يعافر الا الشاطر :-) مش كده برضه؟

و اذا كان على الدعاء حاضر ياستى حادعيلكم كلكم ربنا يوفقكم للخير و يقدرلكم الخير ديما فى كل امتحاناته، على الرغم انى مش شيخة واندا، انا الفقيرة الى الله واندا و بس،
جايز ربنا يسمع منى :-؟

ازيك يا قمر
والله انا قلت انكم نسيتونى خلاص :(
بس بجد فيكى الخير
يارب يتقبل مننا ومنك صالح الاعمال ونراك على خير

اما عن البؤجة فااااااااااااااااا

حنين القلب
و احنا كمان يا حنوة
كان نفسنا تكونى معانا
انتى و عمورة و أشرف
بس احنا لا يرضينا تقلبى كيان الواد و تمشوريه المسافة دى كلها
هتتعوض إن شاء الله




wanda
اولا شكراً على الدعوات الخالصات
ثانياً حيص بيص مش وحش خالص دا تقريباً وصف قريب منى
و انتى نقيتى أشيك حاجة للتعبير
عن الكلمة اللى كانت عنوان البوست اللى فات ..
ثالثاً
يا عزيزتى معلومة سخصية عنى طالما هنبقى أصحاب و للزمن برضو
اختك فاتيما مش مستنية حاجة
و لا بتحب عشان تبص
بعد الحب دا للخطوة القادمة
بتتمناها صحيح
لكن تروحلها ..لأ
مش لأنى جبانة و لا أنى مش زى خيخة فى الجدعنة و القوة .. مش كدا خالص
كل الحكاية إن ليا ظروف مختلفة
شوية و أى خطوة أطلع بيها
لقدام فى العلاقة دى
لازم لها حسابات
و أتفاقات
و محاربات
و قناعات
و شغلانات زرقة
ما يعلم بيها إلا ربنا
هتقوليلى انتى سديتها
حتى من قبل ما تبتدى
هقولك أبدا
هيا مسدودة خلقة
مش بقولك شمس و قمر؟؟
هتقوليلى و ابن الناس
ذنبه إيه معاكى ؟
هقولك مذنبوش حاجة
و يمكن أصلاً أساساً لا بيحبنى
و لا نيلة و ربنا يرحمه
هتقوليلى اومال واجعة دماغنا
و فالقنا معاكى ليه لما مش متاكدة من حاجة و أدعولى و بتاع
هقولك يا ستى نرجع للجملة
اللى كتبتها فوق
انا لما بحب مش بستنى حاجة
انا مستمتعة بالحالة
و بصحبة الشخص اللى قلبى راحله
لأنى سعيدة إن مرة من نفسى
أحب واحد يستاهل وجع القلب
و مبسوطة بقلبى اللى بيدق اخيرا
و كنت اظنه لن يدق أبداااا
عبط
مش بقولك عبط
و سقطنا نجحنا
مش فارقة قوى
المهم الشمس بتبعت نورها من بعيد
من غير ما تاخد بالها حتى
إنها بتنور قمرى و خلاص ..
نعمة نقول ع النعمة
لأ
دا حتى يبقى بطر
انا توهتك معايا ؟؟
معلش بقى
نورتينى يا جميلة



نهر الحب
معقول ننساكى يا إيناس
دنتى و نسمة و بابا أبو خالد جزء أصيل من هذا اليوم
وحشتونا و الله
و يا رب تقدرى تيجى
و عاوزين اللقاء التدوينى الجاى خارج القاهرة يكون عندكم لأنكم وحشتونى بجد و نفسى أشوف داليا أهو دا عيبه و باقى مدونى بورسعيد
إن شاء الله يحصل عما قريب
خالص حبى ليكى يا أنوس
سامحينى ع التقصير
انا بقرالك بس مبعلقش
لكن بطمن عليكى يا حبيبتى دايما
و مش فيا الخير و لا حاجة
الخير فيكى إنتى و جاى من عندك دايما
يا حبيبتى

كان عندي تعليق تاني وراح

شكرا على التحديث يا حبيبتي

ربنا يكرمك وفي ميزان حسناتك ان شاء الله

والله نفسي اجي بس الظروف مش هتضبط للأسف يلا خير
لو جيت في نص السنه اكيد هشوفك مش كده ولا ايه
فاتيما ادعيلي والنبي
يارب تكون بخير

- بالنسبة للأماكن القريبة اللي ممكن يتقعد فيها ونقول إنها محترمة وقريبة وكويسه ورخيصة ،، ده ســؤال وجيه !! الفكرة بس إن المكان محكوم بالمترو والتحرك منه بالمواصلات صعب شويه ،، عموما ً نبدأ بالأقرب :
1- نادي المحامين النهري اللي على كورنيش "المعادي" وده أقرب مكان – ممكن نغلس ونكلم حد يقعدنا في المطعم اللي تحت – المسافة تقريباً مشي ربع ساعة . الدخول فيه مع محامي وببلاش – ما لكوش دعوة أنا هابقى ألم جنيه من كل واحد وأدخلكم على الأقل نجيب حق الكارنية ههههههههه

2- فيه كازينو في "المعادي" أمام مستشفى القوات المسلحة في قلب النيل – رسم الدخول بخمسة جنية - ما روحتوش بس أسمع أنه كويس – هاسأل لكم عليه برضه.

3 – حالياً ما فيش في ذهني مكان محدد ،، بس برضه معرفة عدد المشاركين – ولو تقريبياً – بتخللي الواحد يقدر يحدد المكان ،، وكمان برنامج اليوم هايكون إزاي !!

وصدقوني طالماً في الخير هاتلاقوا إن شاء الله ربنا مييسرها وهايبقى يوم زي العسل ، وكفايه تشريفكم لينا بجد ،، هاتنورونا ،، ربنا يبارك فيكم يا رب.


ده الإيميل بتاعي لأي استفسار : sherifpasha78@yahoo.com

ويا ريت حد من اللي منظمين اليوم يتواصل معايا عشان أقدر أنسق معاه .
والسلام عليكم ورحمة الله وبركاته
أخيكم
P A S H A

السلام عليكم ورحمة الله وبركاته

- أولاً : جزاكم الله كل خير ووضع هذا العمل الانساني النبيل في ميزان حسناتكم.

- ثانياً : أنا بجد بجد فخور بعملكم ده واتمنى أشارك معاكم - ولو بمجهودي – وكان نفسي أحضر معاكم لقاء المنصورة بس قدر الله وما شاء كان والحمد لله إنكم قررتم تعملوا الموضوع ده عندنا ، عندنا فين وأنا مين وأقدر أساعدكم إزاي That’s The Question !!
- أنا يا ستي "شريف" أو P A S H A صاحب مدونة "هجايص" سابقاً ومش ده المهم دلوقت، الأهم إن أنا ساكن في "دار السلام" وهي المحطة اللي بعد محطة "الزهراء" على طول ، وبيني وبين المسجد تقريباً 15 دقيقة مشي !
- ثالثاً : أنا تحت أمركم في أي استفسار أو معلومة سواء عن المكان أوالمواصلات بخلاف المترو أو الأماكن القريبة منه ، عرفوني بس خطة عمل اليوم إزاي وأنا إن شاء الله هاحاول أساعدكم على قد ما أقدر ، والله المستعان
- بالنسبة للمشاركين من خارج القاهرة نصيحة مهمة جداً .... المترو ثم المترو ثم المترو لإن دي منطقتنا وأنا عارفها ههههههه ، يعني اللي هاييجي زراعي ينزل محطة كلية الزراعة – قبل موقف عبود – ويركب المترو ويغير الإتجاه في محطة أنور السادات (التحرير) ويركب اتجاه حلوان ويعد على صوابعه 4 محطات وينزل في الخامسة "الزهراء" وهايخرج من المحطة ويمشي يمين تحت كوبري "الزهراء" زي ما هو واضح في الخريطة ، اللي جوه القاهرة بقى إممممم يركب أي أتوبيس أو ميني باص رايح "أثر النبي" وهاينزل برضه محطة مترو "الزهراء" هايلاقي المحطة قدامه هايعدي بس يا دوب السلم العلوي وينزل يمين ويكمل – على فكرة بتاع العصير اللي قدام المحطة مش حلو ما حدش يشرب عنده – أما بقى اللي جاي من الجيزة يركب ميكروباصات "دار السلام - الكوبري" - ده لو لقاها – مش "مطبعة كورنيش" !! من عند بنك القاهرة في "ميدان الجيزة" ،، أو من "السيدة زينب" برضه ميكروباصات "دار السلام – الكوبري " واللي معاه عربيه ويحب ييجي "دائري" طبعا هاينزل نزلة "الزهراء" ويلف من ع الكورنيش ويطلع كوبري "الزهراء" ده لو جي من "مدينة نصر" أما القادم من "أكتوبر" أو "الهرم" ينزل نزله "المعادي" التانيه ويلف من عند البنزينه يمين هايلاقي الكوبري في وشه واللي جاي من "وسط البلد" يمسك الكورنيش على طول لحد ما يلاقي " قسم شرطة مصر القديمة" على الشمال ويبدأ يهدي وعند البنزينه اللي عند الإشارة هايعدي يلاقي الكوبري في وشه وم الآخر هو المترو !! وعلى فكرة اسمها "زهراء مصر القديمة " مش "زهراء المعادي" ولا "زهراء عين شمس" واللي ينسى يقول "الزهراء" اللي قبل "دار السلام" !!

لأ انا للاسف مش جاى البؤجة
لأنى المفروض انزل القاهرة الأيام الجاية
عشان الشغل
و صعب انزل كذا يوووم ورا بعض

كالعاااااااادة ... إتنسيـــنا
وسقطنا سهوا في حفرة غويـــــطة
يارب نطلع منها قبل يوم 11 الجاي
ونغيظك ونحضر مهرجـــان البؤجة
مش بصفتنا متبرعين ... لأ
أبسوللوتلي

أصلي بصراحة ما بلاقيش مقاسي في المحلات
قلت آجي أدور في البؤج عندكووو

إحسـان

الله مدونتك فيها ريحة مصر الجميله اول زيارة ليا هنا

يوم جديد
انتى كمان يا حبيبتى
انا مقصرررررة
معلش





ladyE
العفو يا لولو
ف إنتظارك يا حبيبتى
تيجى بألف سلامة



اميرة على كوكب مهجور
كان نفسى تيجى قوى
بس معلش
إن شاء الله تتعوض
بدعيلك و الله و ربنا عالم





PASHA
و عليكم السلام يا باشا
انت نورت
و شكراً ليك على كل الشروحات دى
عالله حد يتحجج و يقول معرفتش آجى
بخصوص المكان بعد البؤجة فربنا يسهل و عندنا اماكن متعددة و انضافلها اللى قولتهم و الدايرة وسعت زيادة فكتر خيرك
نشوفك يوم الجمعة على كل خير إن شاء الله



بدراوى
معلش يا سيدى
انزل للشغل ماشى
و تيجى الازهر بارك ماشى
انما احنا غلابة يا عم
محدش بيسأل فينا و لا يعبرنا
و لا يحيلنا
ماشى ماشى؟
مردودالك يا بداروى
و الأيام بيننا خلى بالك انا متقمصة روح محمود المليجى دلوقتى ..يعنى تمشى من قدامى الساعة دى احسنلك
...لأ بجد
البؤج جاية كتير إن شاء الله
و تبقى تنورنا




شفقة و إحسان
يا جماااااعة انا مكتبتش الأسماء كلها
دول يعدوا ال200 إسم معقولة ؟؟
و بعدين انتوا عاوزين عزومة مثلاااا
يعنى انتوا سباقين دايما ف الخير
و لما تدوروا و تلاقوا حاجة كويسة
هبقى اعمل روحى مش واخدة بالى
بس نبقى ننصص آخر النهار
فى إنتظاركو يا غاليين





بنت مصرية
الله
الوصف دا
اول مرة اسمعه عن روح قلب ماما !!!
وصف جميل قوى
و زيارتك فرحتنى جدا
و تعليقك أكتر
البؤجة الجاية تبقى معانا إن شاء الله
خالص ودى يا بنت يا مصرية

حتى انتي يا فاتيما

بئا صادرتي البؤج من اولها كدا

مبروك رئاسة لجنة السوياسات

فاتيما

وحشاني وحشاني وحشاني

إن شاء الله معاكم انا لميت بؤجتي من يجي شهر كدة وبعد الأيام

ربنا يجمعنا علي خير يارب

وحشانى موووووووووووووووووووووووووت يا طمطم ان شاء الله هاجى بس احتمال لوحدى لحسن بعد ما قريت تعليق احسان قلت بلاش اجيبه معايا لحسن يجرسنى مش ناقصين فضايح
هههههههههههههههههه
وحشتينى اوى
شفقة

جزاكم الله كل خير و جعله في ميزان حسناتكم جميعاً..أثلج قلبي وجود اسمي مع الناس اللي في قلبك..و كالعادة كان نفسي أجي..بس الولاد بقى و الظروف اللي أنا فيها..بحبك قوي ووحشتيني قوي قوي و نفسي أشوفك قوي قوي قوي


صباح الورد

وصباح الخير وبؤجة الخير
يا أهل الخير

ربنا يجازي حضرتك كلل خير
وكل اللي معاكم يارب ودايماً متجمعين فيما يرضي الله

ابقي حطيني بقى مع اللي برا مصر ):

ويارب يارب إن شاء الله لما هاجي مصر مش هفوت ولا لقاء خيري (:

بجد بسعد جداً بلقاءاتكم

ربنا يسعدكم دايماً

Angel love

مصرى جدا
جرى إيه يا هانى هتلبسونا تهم ع الصبح ليه
يا عم انا بقول البؤجة بؤجتنا
لحد يوم الجيمعة الصبح بس
بعدها هتركب جناحات من البوست اللى قبل اللى فات و تطير على ناس تانية و تبقى بؤجتهم هما
غنوتك الظاهر كرفت عليا و منمتش من امبارح عاجبك كدا ؟!!
إياك متجيش بقى بعد ما كتبت اسمك ف البوست ..هاه






وومن
و انتى كمان يا ست البنات
اشوفك على خير يا حبيبتى
و معاكى شيماء اونلى سبوت كالعادة الجميلة بتاعتكم






شفقة و إحسان
يا شفشوقتى و هل يصح تيجى من غير سى إحسان أفندى ؟!!
طب دا حتى تبقى عيبة
و احنا ميرضيناش
تعالوا إنتو الجوز ربنا ما يحرمكما من بعض أبداااااا
هتنوروا الفرح .. قصدى البؤجة




dahlia...
عارفة يا حبيبتى ظروفك و مقدرها جدا و فاكراكى حتى لو مش هينفع تيجى
و مسيره ييجى يوم و تنفع
إن شاء الله
إنتى كمان وحشتينى و وحشنى الحضن بتاعك اللى كان عنده أنيميا ..
هههه فاكرة طبعا اقصد إيه
بوسيلى يحيى و فارس و امهم







angel
صباح الورد و الفل و الياسمين على عيونك يا انجل
و إن شاء الله البؤجة الصيفية تكونى معانا و تكتبى اول بوست
و اول واحدة تيجى
و بؤجتك اول بؤجة تتحط فى المخزن بتاع الجمعية ..إن شاء الله
و شكرا بجد لحماسك
و تشجيعك اللى حساه طالع قوى من القلب

كعادتكم دايما .. عمل بدأتوه عشان تحسسوا الناس المحتاجة في بلدنا ان فيه ناس حاسين بيهم وعاوزين يشووفوا في عينهم نظرة فرح

ده من ناحية و من ناحية تانية بتحسسونا إحنا ان بلدنا بخير و فيه أمل في مستقبلها و ان الناس مابقتش وحشة ولا حاجة... ولا الاخلاق راحت ولا هموم الناس خلتها انانية
ولا أي حاجة من دي

وكعادتي .. كنت أتمنى لو موجودة بينكم و بتمنى لو أقدر أكون موجودة في المرات الجاية

شكرا ليكم كلكم. شكرا دي بسمح لنفسي انها تكون باسم كل حد قاعد برة مصر قلبه عليها و مليان هواجس و هموم وحاسس انه متكتف و نفسه يعمل حاجة و مش عارف

فخوووووووووورة جدا اني مدونة انتمي لناس عندها قلوب و فكر و ارادة زيكم

وبجد واحد من أسباب لهفتي الكبير على العوودة النهائية اني انخرط معاكم في كل الفرص اللي أكيد حاتحسسني اني انسان يستحق ان يوصف بالكلمة دي
"انسان"

Hanooda
هنودتى يا حبيبتى
أزيك يا قمراية
كعادتك رقيقة و حنونة
و فخورة بينا عل البعد
حاسة بيكى قوى لأنى كمان حاجات ممكن اكون مش مشاركة فيها وقتياً
لكن متابعاها و حاسة بقلبى منشرح
و كأن الناس دى بتمدنى
بالأمل دون أن تقصد
متهيألى دا سببه الإخلاص ؟؟
إن كل واحد مشارك بجهد و لو بسيط إنشالله حاطط بانر فى مدونته و مش جاى حتى ..لكن الخير فيه قوة رهيبة
بتدفع لقدام متعرفيش ربنا خالقها كلها كدا مليانة نور
و راميها و كل اللى المطلوب من الواحد إنه بس يسيب باب القلب موارب عشان يدخله شوية ضى ...
قلب هنودتى حبيبتى مفتوح على مصراعيه للنور و دا اللى مخليكى فرحانة و فخورة و مع إن الالاف الكيلومترات فاصلانا ...
البؤجة الجاية تكونى معانا يا هنودتى
اسكووووتى مش احنا جبنا قطة سيامى صغنونة ؟؟
بس للاسف ... مشيت من يومين عشان طلعت عيانة
بس تفتكرى ... أسكت انا ؟
لا طبعااااا جبت واحدة تانية علطول و انا برجع الاولانية
شكلها مدى على يابانى
ماما سمتها اوشينا عشان الشىء بالشىء يذكر يعنى
هبقى ابعتلك صورتها عالميل بقى لما ربنا ينفخ ف صورتها لحسن صغننة قوى و عندها كسااااح و عاوزة تتغذى
بوسة و حضونااااااااااات يا حبيبتى

عااااااااااااااااااا
يعنى انا اتضحك عليا و اسمى متكتبش فى صفحه الشاطرييييين
انتى جيتى عندى و عزمتينى فى بيتى اااااااااه بس برضه اسمى مش مكتووووووووووووب بالالوان زى الناس التانيه و انا من هذا المنطلق بالم شوال طوب اهه و حاحدفه على المدونه ادخلى بقى من الشباك لاحسن تتعورى
ههههههههههههههههههههه
ربنا معاكم و دايما سباقين فى الخير
و تحياتى لمجهوداتكم الجميله و رغبتكم الصادقه لخدمه الغير

صيدلانية طالعة نازلة
بقى كدا يا لولاّ
بقى هتزقولونا بالطوب
و تكسرلونا الإزاز ؟؟!!!
طب مش داخلة و تربسة بقى و ادينى واقفة أهو
احدفى طوبة و ورينى يلا
عشان اتعور و ابطح روحى عليكى
و آجى عند الصيدلية بتاعتك اجرسكو و ادفعك حق القطن و الشاش و الماكركروووووم ...
و يا علا انا لو هكتب كل أسامى الاحباب يبقى عاوزة 200 سطر
على الأقل عشان يكفى
و كدا البوست سيادتك هينقرى فى مدة لا تقل عن عشرة تيام
قوم البؤجة معادها ييجى و يعدى
و محدش يلحق ييجى خااالص
البركة ف ربنا
و ف داليا
و آبى
و خيخة
و خالد همس الاحباب كمان معاهم
و كل حد بيشارك بقلب و بينجح اليوم بأقل مجهود يبذله ..
كان بودى تيجى ..بس تتعوض إن شاء الله

حقيقي ربي يوفقوا جميعا لما يحب ويرضى ويكتب لكم بكل عمل صالح تقومون به حسنات كثيرة ..كان نفسي أكون معاكم ببؤجتي بس أنا من إسكندرية بقى و ربي يعلم إني فعلا كان نفسي أكون معاكم . أحب أهديكي هذا الكتيب للشيخ الدكتور : راغب السرجاني بإسم:
من يشتري الجنة؟
ستجديه على هذا الرابط :
http://www.4shared.com/file/164793411/9a0bcdeb/___.html

أسأل الله لكي أن تكوني ممن اشترى الجنة ..و أسأل الله لنا الصحبة في الجنة في مقعد صدق عند مليك مقتدر.

وانا وانا وانا وانا وانا
انا جاااااااااااااااااااييييييي
هحاول يا يا حبيبتي اجي والله
وحشتوني كلكوووووو
وحشتيني يا احلي فاتيما في الدنيا
انتي الوحيده اللي سألتي عليا
ربنا يسهل واعرف اجي عشان اشوفكوووو
وربنا يجازيكووو خير يا رب
بحبك اوي اوي يا طماطم

نسال الله سبحانه ان يكل المشروع بالنجاح والتوفيق وان يتحول لمشروع قومى
كل الناس تشارك فيه انشاء الله

ويبقى المدونات ساهمت فيه بشكل ايجابى


تحياتى

مهندس مصرى
انا شوفت الإبتسامة كويس المرة دى يا محمد
و جاية بعد تلات خيرات
البؤجة الجاية
تكون معانا يا حااااج
و معاك المدام إن شاء الله بأعتبار ما سيكون يعنى
:)




كلمات من نور
قريت التعليق الغير قابل للنشر و تاكدى ف أقرب فرصة هقوله و على فكرة الشخصية اللى ذكرتيها عندها ديموقراطية هاااايلة و سعة صدر و هتتقبل منك إنتى مش منى بس ...و قادرة تدهشك بمدى سماحتها فمفيش داعى لوساطة تانى بينك و بينها هى قريبة من كل القلوب ...شكراً على اللينك و شكراً لتشجيعك و البؤجة الجاية تكونى معانا إن شاء الله




يوميات فنانة مفروسة جداا
يا سميناااااا
ازيك يا حبيبتى و عاش من قرى اسمك فى صفحة التعليقات يا توتا
و كنت جاية اسأل و اسيب دعوة للبؤجة و انا منحبطة لحسن متقريهاش او تقرى و تكسلى تيجى و لا فرمانات خطوفية بحتة تمنعك ...بس الحمدلله
و كلنا بنسأل عليكى مش انا بس
وحشتينى
و هستناكى يا حبيبتى





MOMKEN
و الله يا ممكن
فال حلو منك
ليه لأ ..ما يمكن يبقى هدف عام و منظم اكتر عشان الناس تحس ببعضها و بشكل فيه حقوق و واجبات بس بتتعمل بحب و اخلاص حقيقى مش مفروض غصباً و لا حاجة
تحياتى و نتعشم نشوفك دايما
مجيياً ببؤجتك او من غير بؤجة
التعرف عليك يشرفنا ف كل حال و وقت
تحياتى

ازيك يافاتيما
انا مكنتش عاوز اجي هنا تاني
بس انا جيت علشان اقولك اني جاي يوم الجمعه انشاء الله علشان ناخد بتارنا منك
خافي علي نفسك بقي
هههههههه
سلااااااام

mano
إيه يعنى بتهددونا و لا إيه؟!!
لا لا لا لااااا
دنا ورايا رجالة و معندكش فكرة بقى
عموما نشكر البؤجة
اللى خلتك غيرت رأيك و هتنورنا إن شاء الله
و ميبقاش قلبك أسود بقى
قولنالك سورى
و هتيجوا تاخدو بتاركم إحنا كمان هنيجى شايلين كفننا
انتوا مين ؟؟
و إحنا مين؟؟
مش عارفة الصراحة ؟؟!!!

الأنونيمس المهذب
طب دنا قولت هرتاح منك البوست دا
عشان مفيهوش حاجات تزعلك
برضو مفيش فايدة؟؟!!
على فكرة ..
انا حاسة انك بتكتب الحاجات دى غصبن عنك ..حالة نفسية يعنى
و حاسة انك دخلت فيا شمال و مش عارف تحود يمين خلاص
مع إن و الله انا مش زعلانة
انا بس مش عاجبنى اسلوب الحوار بتاعك
ميهمنيش اعرف انت مين ..فعلا
بس يهمنى تكون مهذب ف الفاظك
معايا بس مش اكتر
يعنى اقولك
بدل ما تقولى
إنتى ست عيارك فالت
قولى مثلا يا اخت فاتيما انتى بتتصرفى بشكل مغاير شويتين
للمفروض تكون عليه الست و الام الشرقية المتحفظة ..
و بدل ما تقولى
انتى بتشجعى البنات اللى بتقرالك على الرذيلة و قلة الأادب و الحيا ..ممكن تقولى مثلاً إن حب الناس دى ليا مسئولية لازم اكون قدها و أتانى شوية فيما اكتبه عشان مشلش ذنب حد يفهمنى غلط و يفتكرنى بشجع على الحرية المنفلتة و لا حاجة ...
شوف لما تكتب كدا
هتبقى بتهزئنى بالذوق إزاى؟!!
قوم انا مزعلشى منك
و انشر التعليقات عادى خالص
بس انت مصمم على الألفاظ اللى لو انا نشرتها يبقى موافقاك عليها
انت عاوز تطمن عليا ..انا عارفة
طيب يا سيى كتر خيرك
و احب اطمنك
لأ ...مش هتجوز قريب
و مش هانسى يوسف و كل اللى كنت بكتبه هيطلع فشنك و لا حاجة
انا قولت بحب
مين جاب سيرة الجواز ؟!!!
الحب حاجة و الجواز حاجة
اتجنن اكتر بقى ..هاااا
ومش لازم حاجة هتؤدى لحاجة يعنى
انا مبفكرش فى الجواز خالص دلوقتى
و لا عاملة خطة
و لا بوقع عريس من النت انت بس جايب الكلام العجيب الغريب دا منين ؟؟!!!
و ابن الناس الكويسين
اللى بحبه دا
لا واقع ف غرامى و لا بيحبنى
و لا ناوى يحب من اصله و لو حب مش هتكون أنا واصلا ميعرفش انى بحبه
ولا ناوية إنى أخليه يعرف اساساً
عشان علاقتى بيه متتلخبطش ..
و ايوه ..انا بحبه ع الهوا
و ف الهوا لوحدى كدا و ببعتله اغانى
و اكتبله كلام ف صباحاتى براحتى
يا اخى أنا حرة دى صباحاتى انا
هيا بتاعتك أنتا؟؟
نفسى أعرف بس انت زعلان ليه ؟؟
ما تسيبك منى حكاياتى
و صباحاتى و تتعامل معايا عادى
احسن و بلاها شتايم و خوض ف الأعراض
صدقنى دماغى اصلها انشف من الحجر
و مفيش فايدة من إستفزازتك دى
و أى رد برده عليك بيكون بمزاجى ..
و مبكتبش فيه كلمة انا مش عاوزاها
انا زعلانالك سلف عشان عارفة آخرتها
م ف ي ش ف ا ي د ة

السلام عليكم ام يوسف

مش عارف اشكرك ازاى على سؤالك عنى ودعواتك لى وربنا يحميك من المرض دائما

الحمد لله رجعت والحمد لله على كل حال بس لسه برضه شويه مش اقدر اسافر كتير لكن ان شاء الله ملحوقه فى تجمعات خير قادمه.

مره ثانيه اشكرك على سؤالك عنى وسلامى الى يوسف

سلام عليكم إزي سيادتكـ يا أم يوسف
حبيت بس أشاركـ ولو بحاجة بسيطة
أنا هنا في شرم بس مش ناسيكوا
عملت بس إيفنت ليوم البؤجة ع الفيس بوكـ
معلشي جاي متأخر معذرةً
بالتوفيق يارب
وربنا يجعله في ميزان حسناتكم إن شاء اللهhttp://www.facebook.com/event.php?eid=237598763635#/event.php?eid=237598763635

فشكووول
و عليكم السلام
و الف حمدلله على سلامكت يا عم صلاح
بتشكرنا على إننا بنعمل أقل القليل من الواجب يعنى ؟؟
الف سلامة عليك دايما و حمدلله على رجوع الحاجة و لسوما الجميلة و الحاجة برضو
و معلش البؤجة الجاية تكون منورنا إن شاء الله أكيد




مواطن شووجااع
كتر خيرك يا مواطن
فيك الخير و الله
هحط اللينك مع البوست
و ربنا يجعل الخير يكتر على إيدك
المرة الجاية تكون معانا إن شاء الله
ترجع بالسلامة يا فندم

إن شاء الله جاى بكره مع ان اسمى مش مكتوب وسط كم الاسماء ده كله
اشوفكم كلكم على خير إن شاء الله

ان شاء الله يكون يوم مثمر وجميل
ويكون فى ميزان حسناتكم
ولنا لقاء قريب باذن الله

بسم الله الرحمن الرحيم

الأخت الفاضلة : فاتيما

سعدت جدا بمعرفتكم وأتمنى التواصل الدائم بإذن الله .

فين بوست اللقاء يابطه؟
انا قاعده بالعافيه مش قااااااادره
وفاتحه النت بس علشانك والله
خلاص هاموت من التعب

إرسال تعليق