.

.

حين الفشل  

Posted by: فاتيما in




البنى آدم مخلوق كامل
يعنى دوناً عن سائر المخلوقات الأخرى
ربنا إداله قلب و عقل و روح و جسد
يفترض فينا نعيش بكل هذه النعم
و نستغلها الإستغلال الامثل
و نبعد بيها عن الحضيض عشان الحسنات تزيد و السيئات تقل
البنى آدم دا ممكن يكون راجل و ممكن يكون ست
مش هتكلم عن الرجالة .. و هتكلم عن نفسى
و اعتقد ان من حقى|.. ولاّ دى كمان هتبقى عيبة؟!!!
أصل الواحدة طالما بنى آدمة ... تبقى بقواعد المنطق كدا
و بناء على اول سطرين ف البوست
تبقى عندها قلب و عقل و روح و جسد


و بالتالى عندى أدوار ف الحياة ألعبها
و مقدر عليا أعيشها


إبتدت اولها بدور الأبنة .. لما امى و ابويا خلفونى


و ندموا بعدين بس مقالوش طبعا إنما دا امر بديهى .. ما عليناااا


تانى دور كان الاخوة ... بقيت اخت لأتنين واحد فيهم اكبر منى


الأخ الأصغر ..لعبت معاه دور مختلف كل اخت كبيرة تعرفه كويس

و هو الامومة المبكرة


جنب عيلتى الصغيرة عندى عيلة كبيرة


لعبت دور الحفيدة لستى الله يرحمها و كان من اجمل أدوار عمرى


لعبت و ما زلت دور بنت الاخت لخالتى اللى مربيانى و بتعتبرنى بنتها

لأنها مخلفتش غير ولاد


عشت طول حياتى ف دور الطالبة من حضانة لحد ما خلصت جامعتى


بعدها عشت دور الفتاة العاملة ... لما إشتغلت فى اكتر من مكان


و بقالى زملاء و مديرين من كل طبقة و صنف و لون


و لعبت دور الصداقة مع ناس كتير كويسة


و لغاية ما ربنا أذن و اتجوزت .. فلعبت دور الزوجة لبعض الوقت


و بقيت حامل و خلفت يوسف .. فبقيت ام منذ هذا الحين

و لحد كتابة هذه السطور




ادوار كتير قوى زى منتوا شايفين
و الواحدة متقدرش تعيش بوجه واحد و بس
و إلا تبقى مش طبيعية أو محطوطة ف سجن مثلاً
او مقعدة او أى وضع مش عادى
انا بتكلم عن الإنسانة العادية التى يفترض تكون ... انا
الادوار دى هيا اللى بتخلينى كل يوم أصحى من النوم و اخرج من سريرى
عشان أؤديها و بحماسة غالباً... و فتور قليلاً
فيه أدوار ما زالت موجودة و حاضرة
اما البعض الآخر ..فتلاشى ف الهواء و إختفى
إما بسبب سوء تصرفى أو بسبب القدر و النصيب و امر ربنا
و لإن كتر النواح بيعلم البكى
فكتر الحاجات اللطيفة اللى مريت بيها علمتنى
إنى مزعلش على اللى فات و أبص لقدام
و اعتبر ما ينقصنى حاجة كدا
زى ما يخطئك لم يكن ليصيبك
و ما أصابك لم يكن ليخطئك
و اذا كان فيه أدوار انحرمت منها ف الكام سنة اللى فاتوا
فدا له أسبابه و مبرارته و ربنا مقدرها
فمجيش انا و أندب حظى بقى بغباء منقطع التفكير
و لازم احمد ربنا و أصبر عشان
إن صبرتم أوجرتم و امر الله نافذ
و إن ما صبرتم كفرتم و برضو امر الله نافذ
فنصبر و اجرنا على الله و خلاص



لكن الصبر يا جماعة .. مش معناه الموافقة على هذا النقصان للأبد

يعنى انا حالياً ابنة و اخت و امراءة عاملة

و صديقة و قريبة و زميلة و جارة


و الحمدلله على كل هذا .. لكن أهم دورين ف حياتى

و حياة أى إنسانة طبيعية و ست طبيعية و ربنا خالقهم فيها


للأسف ناقصين نوعا ما .. و اللى اقصد بيهم الام و الزوجة


انا ام مع وقف التنفيذ مهما إنقال العكس

لأنى لا امارس هذا الدور ف الواقع



لكن بعيشه ... هنا ف المدونة و ف قلبى و عقلى و خيالى

و حتى ف كلامى


كمان دور الزوجة .. اللى أنا مأجلاه للآن بمزاجى

لأنى معنديش قدرة و لا إستعداد
اعيشه حالياً و ابنى مش موجود ف حضنى

او على الأقل مهواش معايا و لو لنص الوقت
و النص التانى مع أبوه

عشان يبقى عندى احساس بالتوازن و لو لبعض الوقت

زائد أنى ملقتش الشخص المناسب

و بناء علي ما سبق ...هذين الدورين مؤجلين لحين إشعار آخر


لكن و لا واحد فيهم مرفوض و منتهى تماماً

و الا أبقى بهرج






انا بقول الكلام دا كله ليه ؟؟
عارفة إن دا هيكون سؤالكم .. ؟؟
لأن جالى أكتر من تعليق غريب عجيب بعد ما قلت انى بمر بحالة حب
سببولى حالة دهشة و سدة نفس على سدة النفس اللى عندى أصلاً
حد تعليقه كان رايح ف سكة .. أنك ام و فكرى فى كدا و بس
دول عادى متفهمة وجهة نظرهم
بس فيه واحد انونيمس رزييييل قارفنى بقاله شهر و زيادة
تعليقاته منصبة كلها على انى ام هفأ و بجرى ورا غرايزى
و بصطاد عريس و حاجات كدا
و انا اللى قبل كدا قولت لا اريد عريساً و مبفكرش وليه دلوقتى بتراجع
طبعا هوه واضح إنه بيقرالى من مدة و تقريباً إنصدم فيا
بس يا نضرى صدمة وصلت لدرجة الشتيمة و الإهانة
و عاوزة أقوله و اقول لأى حد عموماً
يا جماعة الادوار اللى الواحدة بتعيشها دى
عبارة عن قطع بازل
بتتجمع سوا و ف مكانها الصح عشان تبقى صورة
الصورة دى المفروض صح و مكتملة
و عينك لما تقع عليها تحس انها كدا تمام ..و مضبوطة
انا بنى آدم طبيعى ... عاوزة اكون مضبوطة انا كمان
من حقى العب كل الادوار لو ربنا كاتبهالى
من حقى اكون زوجة و حبيبة




طب دنا عاوزة أقول إنى أصلا اصلاً طول عمرى


و من أولى جامعة و انا ف المنظر دا


اللى يحبنى ..محبوش


و اللى أحبه ..ميحبنيش


او يحبنى بس مش لدرجة إنه يحاول يكون معايا


حظ مدوحوس ... عارفة

أعملولكو إيه يعنى ؟؟


و بعد كل اللى شوفته و البهدلة اللى كنت فيها


و فقدانى الثقة فى انى الاقى أى راجل خلاص .. ممكن اكونله


و قولت خلينى بقى لوحدى و ف حالى وقلت انى لا أريد عريساً

عشان الناس الطيبة اللى كتر خيرها وبتتطوع تجيبلى عرسان

و مش عاوزة افضل اقول لأ و احرجهم معايا

فرفضت الفكرة شكلا و موضوعاً لأنى مبدورش على جواز و بس

انا بدور على بنى أدم يكملنى ... واكون بحبه

و دا مبيجيش بجواز الصالونات

طب تصوروا لو كل دا إتنسف ف توقيت ما

و حصلت لحظة سحرية و جه الشخص دا


بغض النظر عن أى حاجة و عن أى ظروف عندى و لا عنده


تمنعنا أو تشجعنا تكمل القصة اللى مبصوص فيها دى
المصادفة دى مبتحصلش على رأى د.ستيتة ف العمر كتير

لحظة نادرة ..لا تتكرر


لما تيجى اللحظة دى .. و الشخص دا

مش من حقى أتمسك بيها ... و بيه و لو شوية ؟؟


ليه مستكترين عليا الإحساس بالحب و الرغبة فى لعب الدور دا ؟


هوه انا مش بنى آدم و بشر زى باقى الناس ؟

و ليه أصلاً متصورين إنه بيأثر على دورى كأم و ينتقص منه؟؟


احد التعليقات قالت إنها مرت بتجربة شبيهة و انصدمت

و بعد ما فاقت من الصدمة


اللى استغرقت تلات سنين لقت حبها لاولادها هو الوحيد اللى زاد


طب يا جماعة ماهو حب الواحدة لأبنها لازم بيزيد

و عمره ما بينقص


بغض النظر عن وجود حد ف حياتها و لا لأ ؟


ليه دور يطغى على دور؟

و دور يقلل من قدر دور ؟


وليه عاوزين تحرمونى من حق اصيل ليا ؟

و تحسسونى انى فجأة تحولت


لواحدة انانية و بتجرى ورا غرايزها

و بترمى الحب الحقيقى ف حياتها (اللى هوه يوسف) بحثاً عن سراب ؟


ليه محدش متخيل انى عاقل و رشيد بما يكفى

إنى ارتب حياتى
بشكل لا يظلم احدا .. ابنى و حبيبى و أنا ؟

و ليه محدش متصور انى ممكن انجح فى

خلق معادلة متوزانة لحياتى اللى اتلخبطت دى


من غير ما اكسر قلب... إبنى وحبيبى و أنا ؟


و ليه محدش متخيل انى بشر و بنى آدم

ليها قلب و عقل و روح و جسد


و من حقى أتمسك بكل أحلامى لحد ما تعيينى الحيل


و أوصل و بنفسى لقناعة اكيدة انى عملت ما ف وسعى لإنجاح حياتى

و ما لم يتم لنهايته سببه فعلاً إن ربنا قاسملى حاجات


و حاجب عنى حاجات و السعى وصل لحد كدا و وقف
ويا ناااااس .. دى حياتى و من حقى أمشيها زى ما انا شايفة

طالما لا بعمل حاجة غلط .. و لا حرام



من فضلكم ترفقوا .. وانت خصوصاً يا اخ أنونيمس
انا زهقت شكوى منك و يا ريت تقرى البوست دا
و تتقى الله فيا شوية
انا مش ام سيئة زى ما بتقول
انا حرمت من هذا الدور رغماً عنى و مش بمزاجى
و لما قولت انى مبفكرش ف الجواز .. كنت بتكلم بمنتهى الصدق
و حتى الآن ..التفكير فى الزواج مؤجل لغاية ما الاقى حل
يرضى جميع أطراف الحكاية اللى يوسف اول واحد فيهم
فأرجوك تسيبك منى و تشوف حد تانى غيرى
اما الاخت صاحبة التعليق التانى
فأرجوكى .. انا مش هقول عليكى معقدة
بس انا تجربتى لا تقل سوءاُ عن تجربتك ف الزواج
و مع ذلك انا مبسقطش فشلى ف التجربة على كل حاجة حواليا
لكن برجعه على البنى آدم اللى شاركنى في التجربة الزفت دى
لأن دا الصح ... كان العيب ف الإختيار
لكن الجواز ف حد ذاته ... مش غلطة الواحد يخاف منها و يحجم عنها
يعنى لما اخويا الصغير كل ما اقوله عقبال ما اشوفك عريس يا حبيبى
و يبصلى مستغرب
نظام انتى آخر واحدة تتكلم عن الجواز و تشجع عليه
اقوله ... انا مش مقياس .. انا اخترت غلط و بس
لو كان واحد تانى غير اللى اتجوزته .. كان شال جميل أبويا على راسه
و حمد ربنا على زوجة بتحبه و ابن سليم و معافى و اسرة بتحتضنه
لكن هوه مكنش يستاهل .. و كان حتة بازل اتحطت ف مكان غلط
و الحمدلله إنشالت






ارجوكم ... متستخسروش فى أى واحدة ف ظروفى او شبهى


إنها تكمل الصورة

و تكون قلب و عقل و روح و جسد


و لا تنكروا عليا إنسانيتى و آدميتى

اللى بتمنى أعيشها كاملة زى باقى خلق الله

و يكفينى حين الفشل .... إنى حتى نلت

شرف المحاولة

بس خلاص




لو جالى فلوس
قبل يوم الجمعة
إحتمال أروح لقاء المنصورة
لسه معرفش
اللى رايح كيد ؟؟

يدينى فكرة

و بدل ما أروح لوحدى

نبقى صحبة أحسن
بس من دلوقتى ..انا مودى نيلة
عشان محدش يفتكر أنى هكون صحبة ممتعة
و يتشجع على هذا الأساس إنه ييجى معايا
انا حذرتكو أهو


This entry was posted on الاثنين, ديسمبر 21, 2009 and is filed under . You can leave a response and follow any responses to this entry through the .

59 كــــلام بيطــبطـــب عـــلى قــــلبى و روحــــى

مش عارفة أقولك ايه؟
بس على اد ما البوست ده بيوجع اوى
انا سعيدة
لان كلامك بيأكد
ان رضاك بقضاء ربنا سبحانه وتعالى
مش كلمة بتتقال
لا ماشاء الله
ربنا يديم نعمته عليك
واضح ان الرضا بيتغلغل فى روحك
وكمان
بهدوء
قدرت تبصى لتجربتك بحكمة
وتطلعى بدروس مستفادة
وبتحاولى تطبقيها
وروحك التواقة للحب دى مش غلط ابدا ولا حاجة

فرحت جدا
انك شايفة ان المشكلة
بتتلخص فى اختيار خاطىء
وانك مش فاكرة ان المشكلة هى الجواز نفسه

انت كده ماشاء الله لاقوة الا بالله
فى طريق النجاح
ربنا يبعد عنك الفشل واسبابه
انا مرة حصلت لى مشكلة كبيرة جدا فى الشغل
وواحدة صاحبتى الله يكرمها
فى عز الازمة
قالت لى
بصى ضهرك لسه مااتكسرش
يبقى هتقومى منها
أقوى من الاول
وقد كان
بفضل ربنا سبحانه


انا اسفة على الرغى
ربنا يحقق لك احلامك
ومايحرمكيش من أى دور من أدوارك
ويرجع لك الغالى
ويفرح قلبك
براجل بجد
يستاهلك
اللى هو بتقول عليه دكتورة ستيتة
الكائنات الغريبة دى
اللى اسمها رجالة بجد
ربنا يوفقك
ياارق فاتيما فى الدنيا

بصى يا ام يوسف

اولا بالنسبه لموضوع الردود اللى بتقريها

تخيلى نفسك جيتى فى يوم فى عز الصيف
فى يوم خميس

الساعه اربعه العصر

فى عز الحر
والازمات المروريه
وخروج الموظفين
ونزول اجازات كل سكان الاقاليم
وعساكر الجيش والداخليه وصف ظباطها وظباطها
وكل من جاى يخلص مصلحه فى قاهرة المعز

فى عز دة

جيتى انتى وقفتى على القاعدة بتاع المرحوم التمثال

ومسكتى ميكروفون وقولتى ياايها الناس ..

وخطبتى خطبه بليغه مافيهاش كلنه واحدة غلط

هل متوقعه من الالاف اللى فى الميدان انهم يوافقوكى عليها ؟؟؟

مهما كنتى صح وكان موقفك واضح لابد انك هتلاقى ردود افعال غير متوقعه
وغير منطقيه

لان البشر بيتباينوا فى تفكيرهم اكتر بكتير من تباين اشكالهم

فماتحاوليش تتقمصى عقولهم وتبصى للدنيا بعنيهم وتحاولى تدورى على وجهه النظر فى كلامهم

علشان فى حالات معينه , مش هتقدرى توصلى معاها لحاجه

شرحه

نفس الموضوع فى المدونات
دى اكبر بكتيييييييير من ميدان رمسيس
وهتلاقى فيها تباين اكتر بكتير قوى قوى من اللى فى الميدان

هتلاقى من اول البنت اللى معاها دبلوم وشغاله فى محل بميه جنيه
لغايه اللى ساكنين فى فيلات وقصور

هتلاقى اللى عمرة مطلعش من المدينه اللى فيها
وهتلاقى اللى سافر كل بلاد العالم

هتلاقى الفلاسفه والمرضى النفسيين

هتلاقى كوبايات لبن حليب
وقزايز حبر اسود

فعادى يعنى ياام يوسف
دا اقل واجب يحصل

وبعدين عارفه

لو كل الردود كانت متوقعه

هيبقى التدوين ممل

مش كدة برضه ولا ايه ؟؟؟

عيب يعنى دا انتى سبقتينى فى العالم الافتراضى دة بفترة طويله

مش انا اللى هلفت نظرك لحاجه زى كدة ..

تانى حاجه

مش من حقى
ولا من حق اى فرد بيدخل مدونتك
ولا من حق صديق او قريب
انه يعترض على حاجه
المفروض انها من ادق خصوصياتك
دى حاجه بتاعتك انتى

عارفه مين اللى له حق يعترض ؟؟؟

يوسف

وممكن كمان نقول بابا وماما

غير كدة

فاينعم مدونين
واصدقاء
بس فى الوقت اللى اختار فيه بين طريقين
محدش له حق يقولى انتى بتمشى هنا ليه

اة ممكن ينصح
يعرض وجهه نظر
انما يحاول يفرضها بإلحاح

لأ ....

اول تعليق تقريبا المهم اني هقرأ وهاجي تاني المهم انا مبسوطة من تعليقاتك هقرأ وهاجي تاني ......

عزيزتي انا عن نفسي متى ما كنت مقتنعة بما أفعله ومؤمنة انه ليس حرام فلا يهمني من الغير خصوا لو كانوا قلة رأيهم لايؤثر فيا اطلاقا خصوصا لو لم يقنعوني بالحجة وكان كلامهم مجرد كلام مرسل اتصرف وكأني لم أسمع شيئا
عزيزتي انها حياتك لاحياة الغير ومن حقك ان تعيشيها فنحن لانعيش على هذه الارض الا مرة واحدة استفت قلبك عزيزتي وان أفتوك وكما قالت الدكتورة ستيتة السعادة ارادة فلا تجعلي الغير يقف في طريق سعادتك بغير وجه حق تمسكي بحقك
تحياتي لك

اولا: محدش ليه الحق يصدر احكام واوامر علي تجارب الاخرين انت او انتي متخلقتوش علشان تحاسبوا الناس

ثانيا:كل واحد حر يعمل اللي هو عايزه مدام لا يؤذي احد ولا يتعدي علي حريه الاخرين

ثالثا:كل من يمتلك مدونه من حقه كتابه ما يشاء بعد مراعاه عقيدته الدينيه فيما يكتب غير ذلك هو حر طليق المدونه تعبير شخصي روحي انساني عن الكيان الممتلك للمدونه


رابعا:عزيزي الزائر لو مش عجبك كلامي متجيش تاني محدش بيغصبك تدخل هنا او تعلق و روح شوف مشكلك الاول قبل ما تيجي تنصح


خامسا:انتم بتحرموا ع انسانه اللي ربنا حلله هو انت او انتي علشان عايشين في اسرة ومستقرين يبقا اي حد يخرج ع نطاق تفكيركم المحدود جدا يبقا غلط وبيجري وراء غرائزه طيب ما تحط نفسك في الموقف وتدينا حل يا استاذ او يا استاذه بدل ما تجرح الناس وانت عارف ربنا اوي كده طيب ما تدور ع حل وتقوله


سادسا:انت متعرفش حاجه عن صاحبه المدونه او عن حياتها او عن ما تعرضت له اذن مش من حقك تشتم وتنصح وتحاسب ياريت تحترم بعض اكتر نخاف ع بعض اكتر نحس ببعض اكتر

حسبي الله ونعم الوكيل
كل واحد مفكر نفسه مصلح اجتماعي هيجي يصلحلنا حياتنا روح صلح حياتك انت الاول محدش كامل يا استاذي الفاضل كل واحد من حقه يعيش حياه طبيعيه لا كمان دي من اقل حقوقه
الانسانه اللي هنا من حقها تعيش وتشوف ابنها ويكون معاها شخص يحبها ويحتويها

كنت انت فين اللي بتشم لما الانسانه دي اخدوا ابنها من حضنها كنت فين وهي وحيده مش لاقيه حد يواسيها كنت فين لما حياتها اتقلبت 180 درجه للأسو واحنا لازم نعيط ونموت قدام بعض علشان نحس ببعض ونقدر احاسيس ومشاكل بعض


كلنا نحترم الاراء بشده ولكني انا لا احترم من يعتقد انه قديس بدون اخطاء ويحاسبني ع اساس انني من فئه الساحرات ومصيري هو الحرق


يارب تكوني بخير يا فاتيما بوسه وحضونه

يا بطوووووووووووط
مين المجهول ابن المجهول اللى يضايقك ده
يا بنتى اللى يجيلك من غير اسم ارميه البحر

هو انتى برضه الكي بورد بتاعتك فيها زرار دليت ولا مافيهاش؟؟؟؟
لو مافيهاش اجبلك انا كي بورد كل زرايرها دلييييييييييت

يا بنتى كل انسان ليه دور فى الحياة ديه
من اول لما يتولد
لغاية لما يتجوز
و هنا بقا حضرتك لينا وقفة مهمة جداااا
اصل الحادثة ديه ممكن تخليه يتجنن يقوم يدخل السرايا الصفرا و هنا دخل فى دور مجنون
او يقتل قتيل و يحطة فى اكياس
و هنا يأتي دور المسجون بعيد عنك
ههههههههههههه
او بقا يبقى بين البينين
و ده اللى بنسميه مفروس
اللى هو انا ههههههههههههه
دور الام بلعبه برضه و لو انى مش عندى اطفال
لكن بلعبه شوية مع اولاد اختى
و شوية مع اولاد اصحابي

الرضا و تقبل ما كتبه الله علينا هو الاهم
و الصبر
و اذا جينا على كلمة الصبر انتى بقا تاخدى فيها جايزة نوبل يا اوختى
و النبي سيبك من هلافيط الكلام
اصل اللى ايده فى المية مش زي اللى ايده فى النار
فرفش يا جميل...و لو عاوزاني اسلفك علشان تروحي المنصورة
انا رقبتى سدادة

روح قلبي فاتيما..
أنا بجد قلبي واجعني قوي..ويشهد الله أنني أحبك فيه..بالنسبة للمجهول و تعليقه السخيف ووجهة نظره الأسفخف(أسفة على الغلط)بس للأسف هي دي نظرة معظم الناس في مجتمعنا ده..ان الست المطلقة لازم تتسامى عشان خاطر ولادها!!بس الغريب في موضوعك ان حتى ابنك مش معاكي و بقالك سنييين بتتسامي انتظاراً و احتضاراَ..هو ايه؟؟انكتب على قلبك ان ميدقش خالص..و لو لا قدر الله و حصل بعد كل الصبر و العذاب ده تبقي كذا وكذا وكذا!!! حرام عليك..الواحد قبل مايقول كلمة يحط نفسه مكان البني أدم اللي بيجرح فيه ويشوف حيقدر يستحمل و لو نص اللي استحمله ولا لا قبل ما يرميه بالكلام في وشه..ساعات الكلمات دي بتبقى كل حياتنا..بتلونها و تحليها..أو تخليها أبيض و أسود..أما التعليق التاني فأنا قريته و يمكن تكون صاحبته حباً فيكي بتنصحك بالصح من وجهة نظرها...بس برضه محدش أبدا له الحق انه يفرض عليكي حاجة في حياتك..احنا بنحبك قوي و بنخاف عليكي بس كل اللي نقدر نعمله و دورنا بيقف عنده هو ان احنا نسمعك بقلوبنا..و ندعيلك.بحبك قوي قوي يا فاتيما

كلامك ده أثر فيه اوى والله
بصى اللى انتى شايفاه صح اعمليه
طالما الانسان مش بيعمل حاجة غلط متخافيش من كلام الناس ولا تتأثرى بيه
عيشى حياتك زى منتى عايزة
محدش يقدر يتدخلفى حياتك الخاصة
مهما كان الا بإذنك
حبى زى منتى عايزةواتمنى يوسف يرجع زى منتى عايزة وربنا يجمعكو على الخير يارب
اعملى اللى انتى عايزاه وياريت تقفلى الغير معرف
اللى يقول حاجة يقولها كده
ربنا يكرمك ويبارك فيكى

ان شاء الله انا رايح لقاء المنصورة بإذن الله وهنشوفك ان شاء الله

سؤال واحد بس
في عصر النبوة
عصر معرفة الله الحقة
خير العصور

كان فيه أرملة أو مطلقة بتقعد من غير زوج؟
كان فيه بنت أو ست عايشة بحب الروح اللي ملوش آخر؟فيه فزلوك طلع عليهم وقال لواحدة قد أديتي دورك يا أمرأة فتفرغي للعيال
مع إنهم ربوا أحسن عيال
عيال كبروا بقوا آخر جيل الصحابة وبداية جيل التابعين


أم سليم أم أنس بن مالك خطبها أبو طلحة رضوان الله عليهم أجمعين
فزوجها أنس
إبنها


انتي بتعملي ايه في البوست ده؟
لو بتشرحي للناس علشان تاخدي ثواب انهم يفهموا يبقى كتر خيرك
وكفيتي ووفيتي

لكن لو بتشرحي علشان اللي ايده في المية يفهم إنسي .. ومش مضطرة تشرحي اصلا

الحب حقك
والجواز حقك
والسعادة ان شاء الله قدرك ولا نتأله على الله

حبك لأبنك مش بالدليل
ياريته كان بالدليل
ده شيء في القلب والكبد والحشا
متحسوش الا أم

بس هل يا هل ترى الغير معرف ده فعلا مش عارف
والا هو عارف بس عاوز نقطة "وصل" يا دميل إنت ياللي يعرفك لازم يطلب الوصال :)
هههههههههههههههههههههههههههههههه

إشتغلي يا بنتي يا فافي
إغسلي روحك وقلبك بالحب
وطالما لقيتي راجل
ربنا يحلها من عنده هو المنان ذو الفضل
يعني ها يعترك في الصنف النادر وبعدين يسيبك
إن شاء الله ها ييسرها

يارب تكون سعادة فاتيما عاجلة غير آجلة
نفسنا يارب نشوف بعيوننا جوايز الصبر
مش قنوط في رحمتك
ولكن تثبيت للقلوب يارب


أم أيمن لما تقدم لخطبتها

فاتيما بجد أنا دمي اتحرق

وزعلانة منك أنت

لانك بتبرري حاجات ملكك لوحدك

مافيش مخلوق في الدنيا يقدر يحاسبك عليها

كلنا في مسرح واحد وبتتبادل الادوار

والأيام دول

ويا ويل الظالم

في كلام كتير عايزة اقوله لكن مش قادرة اكتب

ادع

لا اله الا انت سبحانك اني كنت من الظالمين

سينفرج الهم ان شاء الله

ربنا معاك

يا عبيطه بتبررى لمين و بتتبررى ايه
دى حياتك انتى و محدش غلط فى اختيارك لجوزك غيرك و محدش دفع التمن الغالى للغلط ده غيرك انتى و محدش اتحرم غيرك اما ابنك اتاخد منك لوى دراع
يبقى مفيش حد يستجرى يتدخل فى حياتك انتى بس اللى تقررى امتى و ليه و ازاى و احنا كل اللى علينا اننا نبارك و نهنى لو الاختيار صح
او نديكى خبطه فى دماغك تفوقك لو غلطتى تانى لان المشرحه مش ناقصه قتلى
و اللى عايز يعمل ابو العريف يورينا فلاحته و يقول انا اهو مش يدخل متخفى و يقرفنا و يمشى متخفى برضه ده اسلوب الحراميه و عيب ان حد بيننا يبقى بالسلوك ده
كلنا بنحبك يا طماطم و خايفين عليكى زى ما تكونى بنتنا الصغيره بس مش معنى كده اننا نخنقكو نفرض نفسنا اوصياء عليكى
ياريت الرساله تكون وصلت للكل و طبعا الاغبياء يمتنعون

عارفة يا فاتيما بجد دمي اتحرق

أيها الأنينوميس أنت حافظ مش فاهم

ودي مأساه انك تكون شخصية مطلعه بدليل أنك بتتابع المدونات

وتفكيرك محشور في أزمنه الجاهليه الاولي

جاهليه ايه حتي اياميها الستات المطلقة كانت ببتجوز محدش كان بيقولها انكبي علي العيلين ربيهم

مش عيب لما تربي العيال دي أهم مهمة في حياه أي ست بس ده مش معناه تنسي روحها

يعني لو حضرتك بصيت لقيت نفسك مطلق لأي سبب مش هاتروح تدور علي واحدة غيرها وتطلع في طليقتك القطط الفاطسة واللي مش فاطسة كمان

يالهوي علي الأمخاخ قال بتجري ولا غرايزها
يخرب بيت كدة بجد هو الجواز كدة وبس فين الباقي فين السكن والمودة والرحمة

معلش ناس فهمها علي قدها وكمان بتنصحها علي اساس ايه ؟

رجاله ايه دي مش قادره تفهم لحد دلوقتي الست دي بني أدم برضة والله بتحس وعندها شعور

كفاية بقي كدة احسن هالبخ

لقد خلقنا الله أحرارا
--------------------
إرغى زى ما تحبى يا عزيزتى
و شكراً على نظرتك الطيبة دى ليا
و القناعات بتاعتى دى
وصلتلها بعد فترة طويلة من الرفض
و السخط و الخنقة و التشكى و تزهيق بعض الناس الغاليين
و لحسن حظى نفسهم كان طويل معايا
و دا لأنهم بحبونى بجد و الحمدلله
بس ليه لما موقفتش مكانى ..و ابتديت أخطى لقدام خطوات
ناس تيجى و ترفض إنك تتحركى من مكانك و توصفك بصفات عكس ما تكونى انتى بتتمنى تكونى
دا المؤلم ف الحكاية
نورتينى




احمد سعيد
--------
أزيك يا احزن نزلاء العنبر
يا فندم انا سبقتك ف العالم الإفتراضى صحيح و بناء عليه بقولك إن رفض الىخر لرأيك و تصرفاتك أمر مقبول و جدا
بس مش بالشكل الجارح دا يا احمد
انا بقالى شهر و شوية ف القصة دى و كل يوم و بلا كلل و كلام يبدو مرتب و عن قناعة حقيقية و الكلام دا مش اول مرة أسمعه انا بسمعه على إستحياء من ناس تانية بس أسلوبهم مش جارح ابداً
و انما اشبه بجرس يرن جنب ودنى
كل ما أكتب بوست
من النوع العاطفى
الاقى تعليق محبط شوية
يفترض فيا إنى ناسية
و لازم ارجع بسرعة افتكر يوسف
و كأنى نسيته
بس عادى انا متعودة على كدا
عارفة إنى ف نظر ناس كتير مجرد ام
و لا يجب أن يكون لها دور تانى
حابين يشوفونى كدا
مجراش حاجة مش هحجر على رأيهم
كل واحد حر
بس شتيمة و كلام بشع كدا ؟!!
دا الغير مقبول خالص يا احمد
و لو انا ف العالم دا ميت سنة جاية
نورتنى



ranim
-----
مستنياكى يا قطة
و لو إن الموضوع مكلكع قوى
بس رأيك يهمنى جدا ..هتسناكى بجد

خواطر شابة
----------
يا خواطر يا حبيبتى
انا متمسكة
بأرداة السعادة
زى ما ستوتة بتقول
لكن يصعب عليا أن كل واحدة
ف ظروفى يبقى نظرة البعض ليها بالشكل البشع دا
بس




أميرة على كوكب مهجور
--------------------
انا بخير يا اميرتى
ينفع أقرى تعليقك دا و مكونش بخير؟!!
منحرمشى منك يا حبيبة قلبى
ألف بوسة و حضن لحد ما أشوفك
إن شاء الله






واحدة مفروسة
------------
و النبى يا فروستى ما أعرفه
و كل يوم يومين أمسحله تعليق
ببقى عاوزة اسيبهم ..بس فيهم شتيمة تدخل تحت بند قذف المحصنات و مستفزة لدرجة بشعة و اوقات كنت ارد عليه و اوقات تانية أطنش
بس ارجو بقى لما هوه يقرا البوست دا يا يتفهمنى و يبطل قسوة ف احكامه
يا يرحمنى و يحل عنى خالص
انا زى حالاتك يا فروستى
بمارس بعض من أمومتى مع ولاد اخويا و ولاد صديقاتى و شريف ابن خيخة و يسوفة و عمر و ماجد أخويا و الواد عادل البلد دى فيها حكومة أبنى على كبر أهو و مفيش أى مشكلة
و الحمدلله راضية
بس الناس فيها من لا يريدك أن ترضى
و سلملى رقبتك يا ست الستات
بس أختك فاتيما ممكن تاخدها مشى لحد المنصورة و لا إنها تستلف ..
بتعب نفسياً أصلى من حكاية السلف دى ..إن شاء الله هيجينى فلوس و أروح و هسلملك على العالم اللى هناك كلهااااااا
بوسة و حضوناااات

ربنا يسعد قلبك

وعملك الخير دايما

يارب فاتيما

يالا ابتسمى
وخدى حضونات وبسات من بتوعك

طب ممكن تفتكرى المترو
ولحظة ما كنتى قاعدة وانا واقفة وراكى مستنياكى

ابتسمى بقا

وتعالى ززورينى

وحشانى
وهبقا مبسوطة لو اصحبتك للمنصورة
لو كان ينفعنى

بحبك

اةةةةةةةةةةةةةة

لا

انا كنت فاكر انها تعليقات عاديه

ومجرد نقاش

معرفش ان الموضوع كان بالشكل دة ابدا

اصلى مقريتش تعليقات الاخ اللى بتقولى عليه دا

فاتيما

أنا مش هازوّد حرف عن اللي اتقال ده
بس مش هاتلاقي كل الناس في صفك
ولو فكرتي في كل كلمة حد بيقولها هاتتعبي
اللي قال مش من حقك والكلام الـ... مش هاقول فارغ .. بس هاقولك مالوش لازمة
حياتك وانتي حرة طالما مفيش حاجه فيها تغضب ربنا

يوم مابتبقي لوحدك .. محدش من اللي قال خليكي قديسة دول هاينفعك ولا يشاركك همومك ولا يمسح دمعتك ولا يضحك معاكي ولا يعطيكي من وقته وهمومه وأفراحه زي ما هايعطيكي شريك

الكلام ده يتقال لما يكون ربنا حرّم علي الزوجه ترتبط تاني بعد وفاة زوجها أو طلاقها
أو حتي اتقال انه مكروه

وإلا كانت كل مطلقة وأرملة راحت انتحرت عشان مش من حقها تعيش
عشان دورها انتهي من تجربة واحده ومش من حقها تعيد الكرّة تاني

فاتيما
روّقي
وارمي ورا ظهرك
وماتوقفيش عند كل كلمة هاتتقال وتحاسبي نفسك وتفكري ياتري من حقي ولا مش من حقي .. وتدوري علي تبريرات لنفسك ولغيرك
وتتعبي نفسك وتلاقيكي في مزاج مش هو

كبّري دماغك
وزي ما قلتلك مش هاتلاقي حد يتفق معاكي 100% .. هي دي طبيعة البشر
ولو دورتي علي اللي يعجب الناس مش هاتلاقي نفسك ومش هاترضي حد

م الآخر
سيبك من كل ده
وشوفي نفسك .. طالما مش هاتظلمي حد .. وطالما مش هاتغضبي ربنا .. وطالم المرة دي حاسة انك اخترتي صح
يبقي توكلي علي الله

ع البركة يا عم :)

ربنا يكتبلك كل الخير
ويوفقك دايماً يارب
ويارب دايماً أشوف الابتسامة اللي لسه محفورة جوايا من يوم المنصورة اللي فات :)
ربنا يسعدك

Lyssa

____
ع الهامش :
أنا بعد ماراجعت تعليقي ضحكت أوي
عارفة ليه ؟؟

فكري كده وقوليلي :))

dahlia...
---------
و الله يا داليا للاسف انا سمعتها
بشكل و آخر من ناس المفروض قريبن و يعرفونى ..لكن بيحكموا من برا
إنى رميت ابنى

دلوقتى ممكن يقولوا كمان
رمته و راحت إتجوزت
محدش بيقعد و يسمع
و لا يقدر
و لا يفكر
و لا يرحم

الأنونيمس مش هوه سبب سدة النفس
ف حد ذاته
السبب الحقيقى إنه ظهر بمجرد ما بس على رأى وردة ما بتقول

كل دا كله عشان حبيت
و لا قولت ان انا حبيت

انا بس قولت بحب
و مش هتجوز بكرة مثلاً

فما بالك لو الحكاية خدت خطوات جادة ..المنظر هيكون شكله إيه؟

صاحبة التعليق انا مش زعلانة منها
بالعكس انا زعلانة عليها هيا اكتر
لأنها متصورة إن الفشل فى الحب هينتقص من قوتها كأم و بتخوفنى من نفس المصير
بينما حب الام لأولادها لا يمس حتى لو هما بعاد عن عينيها و حضنها

هى بتمثل وجهة نظر سمعتها كتير
ان ركزى فى إبنك و ميصحش تهدرى مشاعرك فى مكان تانى
حاجة شبيهة بكدا

انا كمان بحبك قوى يا داليا و انتى عارفة من غير ما أقول
القلوب عند بعضها يا أجمل الامهات





مسدس صغير
--------
أتمنى و الله يا صاصا يكون فعلا ذو أثر
لأنه حقيقى طالع من قلبى

و بتمنى انت و كل الشباب اللى ف سنك نظرتهم للمرأة و ظروفها تكون مختلفة
و يحكموا بعقلية منفتحة

و قفلى للغير معرف مش حل لأن ممكن يتعمل حساب برضه و مدونة فاضية و يندخل بيه

كمان فيه ناس عزيزة عليا بتدخل بغير معرف زى الاستاذ عبد الجليل و ساعات شيماء سمير و بالتالى مقدرش أقفله
و بمسح التعليقات دى و خلاص

ان شاء الله اقدر آجى
و أشوفك على ألف خير يا أطيب الناس




ستيتة حسب الله الحمش
-----------------
حمدلله ع السلامة يا قلب العصفورة
دودو كنت مفطورة عياط و نكد بسبب القرار المفاجىء دا
و الحمدلله ..عدتى يا ست الكل

بتسألينى بعمل إيه ف البوست دا ؟
بقول للأنونيمس دا و غيره يتقى الله و يفكر كويس قبل ما يرمى الناس بكلام زى الرصاص

و وصل إيه و النبى إنتى رايقة خالص
دا بيشتم و بيقول كلام يعاقب عليه القانون المدنى و الجنائى و حقوق الأنسان لو لزم الامر ...

بقاله اكتر من شهر و مش عارفة انا عملتله إيه بس ؟
بالنوسبة للدعوات الصالحات اللى ف الىخر دى
ربنا
يسمع
منك

و بحبك قوى




ماما امولة
-----------
يا حبيبتى
و متزعليش منى أنا كل يوم ف القصة دى أصلاً و حسيت انى بتجاهلى للانونيمس بكبر فضوله و ازيده اصرار

قولت أريحه
و اجاوب على كل الأسئلة اللى مطيرة ابراج نافوخه دى
مش هوه لوحده
لأ ..كل اللى بيفكروا زيه
و معنهمش شجاعة يواجهونى بدا
شياكةو تادباً
أو لا مبالاة حتى

و اشرح موقفى مش انا بس
أى واحدة ف مكانى
و نظرة بعض الناس ليها اللى غالبا منتهى القسوة
منتهى الظلم

هدعى معاكى يا حبيبتى
و ربنا ما يحرمنى من طيبة قلبك

لعلك بخير دلوقتى و الحمدلله
سلامتك ألف سلامة يا رب دايما
نورتينى ى ى




صيدلانية طالعة نازلة
------------------
إقرى ردى على ماما أمولة يا علا و انتى تعرفى انا كتبت كدا ليه

انتى جبتى مربط الفرس و الله
إن للأسف فيه حد وسطنا و بيقرى علطول و مع ذلك بيفكر بالطريقة دى

الله
أول مرة حد يقولى اننا خايفين عليكى زى بنتنا الصغيرة دى ؟

انا زى الغزالون يهبلون ..يا لهووووى
لأ دنتى تاخدى على الجملة دى خمأشر بوسة و ييجى عشرميت حضن بقى



وومن
-----
يا ميرا شوفى دمك إتحرق من بوست
انا بقالى شهر دمى بيتبخر كل يوم تقريبا معرفش لماذا و ليه !!!
للأسف النظرة للراجل المطلق غير الست
حتى الطبقة المتعلمة و الوسطى نظرتها فيها شىء من التحفظ رغم كل شىء
طب دنا مجبتش سيرة الجواز خالص دلوقتى
دنا قولت بحب
و هوه مبيحبنيش
يا لهوى اومال لو كان طلع بيحبنى ؟!!

انتى وحشتينى على فكرة
و فكرى ف حوار المنصورة دا عشان لو هتروحى نكون سوا يا ست البنات
بوسة و حضونة عشانك

فاتيما ياقلبى انتى بس اللى تقدرى إنك تحددى حياتك وترسميها مش حد تانى انتى فعلا قلب وروح ومشاعر أكتر من مجرد جسد وهيكل إمرأة انهزمت فى مرحلة من حياتها بجد كل اللى يضايقك انسيه ولا حتى تفكرى فيه طالما انتى شايفة اللى بتعمليه مش غلط وإنك واثقة فى إن ربنا مش هيبخل عليكى بالخير فارمى حمولك عليه ولا تشغلى بالك باللى مش فاهمك أنا من ساعة ما دخلت عندك وربنا يعلم أد إيه بحبك واللى لقيته مش أنا بس ده فى ناااااااااااس كتيييييييير ماشاء الله وبصراحة أنا بحسبها كده إن الانسان بقدر الناس اللى بيحبوه وإنتى حبك فى قلوب كتيييييييير واخت لناس كتييييير وأم يكفى إنها بتحب إبنها بإخلاص مش مجرد دور وغريزة بصراحة لمست إن حبك لإبنك مختلف بجد ربنا يحميكى ويحفظه ليكى ويقرب اليوم اللى يعرف فيه قدرك وقدر حبك ويرجع لحضنك وهو مقرر إنك أم بجد تستاهل ده يارب يرزقك بالخير دوما يارب

دمتى بكل الود والخير والحب والسعادة

shimaa samir
------------
منحرمشى منك يا مشموشتى
و انا كويسة أهو

طبعا فاكرة المترو و قلبك الجميل اللى حس بيا و عرفنى علطول و احنا مل منمونا فى ضهر التانى ...

تنورى المنصورة و يا ريت
بس خلى بالك اللقاء عام
مش حريماتى بس و يمكن السفر كمان
يكون كذلك
خدى رأى العصفور و فكرى و قوليلى

انا كمان بحبك يا عصفورتى
يا صغيورتى




أحمد سعيد
--------
ما هى لو تعليقات عادية يا احمد
مكنش يجرى حاجة

بس متفهمش انا فيه إيه
مخليه مركز معايا كدا و بالشتيمة

و عادة بنشر التعليقات اللى فيها تجريح بس دى مينفعش لأن فيها تعبيرات لو نشرتها أبقى مواققة ضمنياً على اللى فيها و لهذا منشرتهاش

و لا يهمك



lyssandra
---------
إيه الأستمحانات الصعبة دى ؟؟
لأ ..دنا اخر واحدة ف الكون
عندها دقة ملاحظة
و خصوصاً لما تسألينى أرتبك فورا
و اغرق ف شبر مية

انا غربلت التعليق ذهاباً و إياباً
و معرفش الاجابة صراحة تبقى إيه؟؟

طب مفيش إختيارات ؟
طب مسموح بالتخمينات ؟!!

طب اقايس و أقول
يمكن قصدك لقاء المنصورة اللى فات
و لقاء المنصورة اللى جاى ؟!!

معرفش بقى قولى إنتى

و مين دا يا ليسا
اللى ع البركة ؟؟
ما قولنا قبض الريح يا جماعة

بوسة و حضونات لحد ما أشوفك
قريباً إن شاء الله

زعلت لما قريت البوست ده:(
اولا انتى مش محتاجه انك تقدمى مبررات ولا تشرحى,,واذا كان فى ام ومرت بتجربه سيئه ربنا مأصدرش حكمه انها تعيش كده بالعكس,,ربنا قال نعف نفسنا..
يباه ايه الكلام ده..

ياطمطم اللى يقولك كده قوليله بكل بساطه هاتلى دليللك من القران والسنه ان اللى فشلت فى زواج ليها تدفن نفسها بالحيا,,,؟
ومش حرام ومش عيب ياطمطم انك تفكرى تتجوزى..مش حرام ولا عيب انك تشوفى حد تتسندى عليه ويطبطب على كتفك..وقولك انا هنا جمبك متخافيش..
مش حرام ولا عيب انك تلاقى حد ماسك ايدك,,...

بصى انا اليومين دول مصدومه فى تفكير البشر بصوره لا تتخيليها,,وخصوصا اللى بيسموا نفسهم مثقفين وفاهمين وواعين,,,
واهو من ضمن الكلام ,الكلام السخيف اللى انا قريته هنا,مش فاهمه يعنى اى ام مكلمتش فى جوازها تروح تموت نفسها يعنى وتدفنها وهى على قيد الحياه..؟؟

يارب ياطماطم يوسع رزقك يااااااااااارب وتيجى اللقاء يارب.
نفسى اشوفك بجد,,ومتقلقيش كلنا تقريبا المود مش متظبط تقريبا فى فيروس فى الجو,اهو نغيره مع بعض:))

(joudy)
-------
يا جودى انتى مديانى أكتر مما أستحق
و بكتير
وأخشى إن كتابتى للبوست تتفهم
منها إنى عاوزة مدح من الاحباب و كدا

كل الحكاية انى حاسة
إن فيه ظلم لناس كتير فى حالتى
وحد متابع قوى مفكرش يقف شوية رغم كل ما قرأه إنه يحط نفسه مكانى
و لا حتى يسمعنى بقلبه و لو مرة
و يعرف حقيقتى قبل ما يلقى بإتهاماته اللى هيا موجودة عند ناس كتير حواليا و إن لم ينطقوها بلسانهم

انا بحاول أشرح لعل اللى قلبه
مقفول .. يحاول يفتحه شوية
و الكلام يوصل
و لو مش دلوقتى و بعدين حتى

انتم كمان بتشاركونى بتعليقاتكم

انتى كمان غالية عليا يا جودى
و منحرمشى منك يا حبيبتى

طظ ومليوووووووووووووووون طظ فى أى حد يفكر يتدخل فى حياتك أو يشوف أنه عليكى تعملى كذا وما تعمليش كذا

وعارفة المشكلة فى إيه
دى مشكلة مجتمع بحاله جواه موروثات غبية جدا ومش راضى يطلعها من عقله

يعنى مثلا لما واحدة تطلق يبقى محكوم عليها تعيش باقى عمرها لوحدها سواء عندها ولاد ولا لا زى ما يكون حرام أنها تفكر ترتبط تانى
مع أن نفس المجتمع ده بيدى الحق للراجل يتجوز مليون مرة وعادى

يا سلام ليه يعنى هو الدين قال كده

بس دى كلها موروثات متخلفة جداااااااااااااااا

هديكى مثال تانى

واحدة زيى كده بقت فى نظر شوية ناس المفروض أنها تفضل قاعدة حاطة إيدها على خدها وما تفكرش فى حاجة غير أنها تشوف لها عريس علشان تتخلص من كلام ونظرات الناس وتلحق نفسها قبل ما تعنس

لكن شغل وطموح وبتاع بالنسبة ليهم كلام فارغ
عايزنى أخرج واروح وأجى مش علشان أشتغل وأثبت نفسى وبتاع لا علشان أوقعلى عريس

عايزنى أحضر مناسبات وحاجات كتيرة لنفس السبب
ومش مهم أى حاجة ولا ان العريس ده هيبقى مناسب ولا لا

تعرفى بقيت بعمل إيه بقول لهم طظ فيكم كلكم
ومش هعمل غير اللى مقتنعة بيه وبس

وربنا يشفيكم ويشفى كل حد عقله لسة فيه الموروثات الغبية دى

عااااااااااااااادى يا فاتيما ولا يهمك وأعملى اللى مقتنعة بيه

وماعاش ولا كان اللى يزعلك ده

واللى مش عاجبه يخبط دماغه فى الحيطة ، يشرب من البحر زى ما يحب


لو هتيجى الجمعة عرفينى علشان أحتمال أقدر أروح

اكيد السخس دة بيعزك قوى
D:

الا صحيح

اللكاء دة امتى ؟؟

جايز اتمكن انى اطب عليكم

وانور لقائكم بطلعتى الم....البهيه

الشعب لابد له من شيما تشكمه
--------------------------
اولاً
أنا مش بقدم مبرارت لشخصى فقط يا مشمش
انا بتكلم بلسان كل واحدة زيى و ف ظروفى و معندهاش القدرة و لا الامكانية إنها تقول و تنسمع
ثانياً
هو و الله أعلم متصور إنى طالما فكرت ف الأرتباط و الجواز يبقى خلاص مرحلة الامومة إنتهت عندى و رميتها ورا ضهرى على أساس إن البنى ادم مراحل متقطعة و اللى تخلص تترمى و هكذا
و الست آخر مراحلها تبقى ام و مينفعش ترجع تانى تفكر تبقى زوجة
و للأسف تفكيره دا شائع و صعب ننكره
رغم عدم رضانا عنه

ثالثاً
انا عارفة إن فيه ناس تفكيرها بشع
و دا متوقع
بس الواحد اوقات بيكون على ىخره و مش ناقص حد يهوب ناحيته بأى حاجة
و اصلا هوه مستلمنى بقاله مدة و ربنا يكرمه بحتة تانية بقى و يبعد عنى

رابعاً
إن شاء الله يا مشمش أحاول قد ما أقدر آجى ..إنتوا وحشتونى يا الطف الكائنات و بلدكو وحشتنى كمان


بسمة عبد الباسط bos bos
-----------------------

منا بكتب يمكن حد يقرى بقلبه يا بسبوسة و للأسف احنا المفروض جيل تانى غير اهلنا و مع ذلك مننا ناس بتفكر كدا

انا معرفش الأنونيمس دا عمره
قد إيه
بس لو كان اكبر سنا منى
يبقى لازم يكون نظرته أكثر تفهماً و رحمة لأنه شاف ف الدنيا و عرف ...متهيألى انه صغير ف السن
و عشان كدا حكمه مطلق و عصبى و مفيهوش أى نوع من المرونة خاااالص

انا مش زعلانة من وجهة نظره اكتر من الطريقة نفسها و الأسلوب

لو جات فلوس هقولكو
هكون فين و الساعة كام ف الموقف
بتاع عبود عشان اللى جاى يروحلى على هناك طوالى و هيلاقينى منتظراه
و لو هتروحى من عندك برضو هتعرفى اكيد من هنا يوم الخميس

بوسة و حضونة ع الماشى





أحمد سعيد
--------

يا عم مش عاوزة المعزة دى
ياخدها ف إيده و يمشى بعيد عنى

اللكاء دا يوم الجيمعة الجاى سعادتك

فى المنصورة الجميلة

تفاصيله عند ستات الستات
صبرنى يا رب
هنا
http://raghy-emraao-gheer-mathona.blogspot.com/2009/12/blog-post_20.html

و صحيح مش انا اللى مليش ف ترتيبات اللقاء بس بالنيابة عن البشر هناك بقولك بما انك مدون شكيك يبقى
اهلا بيك

الناس واخدة شكل عن المطلقة او الارملة الى عندها عيال

انها المفروض انها تقعد باقى حياتها من غير جواز

زى ما يكون عيبة ان الست تفكر فى نفسها وان واحد ابن حلال يجى يكمل معاها باقى الطريق


لو افترضنا ان واحدة مطلقة او ارملة او حتى انسة بتفكر فى الجواز لارضاء غريزة جسدية
ايه المشكلة ولا مؤاخذة؟
هى مش بنى ادم ؟
وطبيعة البنى ادمين ان غريزتهم الجسدية بتنئح عليهم من وقت لتانى

ايه المشكلة ان واحدة تتجوز علشان تعف نفسها من الوقوع فى حاجة حرام؟

انتى بالذات لازم تتجوزى
انتى ماتجوزتيش با فاتيما
انا لما اعرف ان مدة جوازك كلها على بعضها سنة ونص فقط والباقى ده كان وقت انتظارك لورقة خلاصك


بقول فين الجواز
فين الحياة
فين المشاركة
فين الخناق والمصالحة
فين العتاب والدلع
فين الخروج مع بعض فى المناسبات الاجتماعية

انتى ما تجوزتيش انتى ماعشتيش حياة الزوجة الطبيعية
انتى من الدار للنار زى ما بيقولوا

انتى محتاجة شريك متفهم حنون رحيم مخلص
محتاجة انسان تكملى معاه او بمعنى اصح تبداى معاه مرحلة جديدة فى حياتك

ماتستنيش يوسف يا فاتيما
ماتضيعيش عمرك
احنا بنكبر والتجاعيد هتملا وشنا
والشعر الابيض هايطقطق ان اجلا او عاجلا
وجسمنا هايكرمش
وصدورنا هاتتهدل بفعل الزمن
وجلدنا هاينشف ومش هايبقى طرى ومش هانكون مزة فى عيون اجوازتنا

الحقى عمرك

الحقى انك لسة فيكى انوثة

الحقى حبيبك

ماتستنيش يوسف

جوازك مش هياخر ولا هيقدم رجوعه
ربنا وحده الى اعلم بساعة رجوعه

فامتعطليش نفسك
وتخلى العمر يتسرسب من بين ايدك


وكلام المجهول ارميه ورا ضهرك
بلاش وجع دماغ



سلام

اختك خيخة

هههههههههههههههههههههههههههههههههههههههههههههههههههههه

يعمر بيت مصطلحاتك ياخيخه

لازم كل مااقرالك تعليق ولا بوست

الاقى نفسى ببرق كدة

انتى مشكله
ههههههههههههههههههههههههههه

بت خيخة و أى كلام
----------------
هااااااا
انا بضحك دلوقتى على حاجة
غير تعليقك الجميل دا خالص

عارفة إيه؟؟

بضحك لأنى لسه حالا كنت عندك و معلقة على بوستك الجديد التحفة
رغم عنوانه المتعب قوى

طلبت من سعادتك طلب
و اتمنى تقبليه

انا بحرجك قصاد عموم شعب البلوجر
أهو و بقولك يا ريت تقبلى
تنفذيه لأنى حاسة انك أكتر حد هيعرف يتصرف صح فى الموقف دا ...

لما نتقابل هبقى اقولك ع الحاجات
و التخطيطات اللى ف دماغى
و تفكيرى لو نفع انى ف يوم
اتجوز تانى و لو إن الموضوع
دلوقتى متفشكل خلاص
و من قبل ما يبتدى أصلاً

لكن زى ما كتبت كدا
يكفينى حين الفشل
إنى حاولت

بحبك يا نونو و بحب شريف حبيبى

غريزة ايه وكلام فاضى ايه

بلاش قله ادب ومسخرة

احنا شعب مصرى محترم معندناش غرايز ولا الحاجات السافله بتاع الغرب الكافر دى

احنا بنتجوز بس علشان
:
:
:
تاخد ثواب

وانتى عارفه بقى
المصرى يحب الحسنات قوى

مش علشان غرز وابر وخيط وابصر ايه

ايون المطلقه دى المفرود متتجوزش تانى
تتجوز ليه
مش ارتكبت خطيئه التلاك ؟؟

المفروض عليها
تلبس العبايه البيضه
وتطلع على معبد امون
وتترهبن باقى حياتها

بلا مياصه وقله ادب

فاتيما

فيه حد من اللى هيحضروا اللقاء

اكون اعرفه ومعاكى تليفونه ؟؟

لانى مسافر الفجر باذن الله

عاوز حد اظبط معاة

قبلها بيوم كدة

علشان اشوف ان كنت هعرف اجى ولا لأ

واعتبارا من ساعه سفرى مش هيكون ماتح ليا النت

فعاوز حد اتفق معاة على اللفلفون

أحمد سعيد
--------
و الله يا احمد من القاهرة
لسه محدش قال إنه جاى ...

بس من المنصورة صبرنى يا رب
سايبة رقم موبايل ..
ممكن تسيب تعليق عندها
و تديلك رقم حد من الشباب الرجالة تكون نمرته متاحة علطول
و تقدر تكلمه أى يوم من الايام الجاية

او حل تانى
تسيبلها انت رقمك على الإيميل بتاعها و تديه لحد يبقى يكلمك لو مش هتلحق ترد عليك النهاردة

انا يا جماااااعة معييش نمرة أى حد
لا من القاهرة
و لا المنصورة
انا ماشية بنور الله
و التعليقات
و المرواح من بدرى

صبرنى اكيد هتفيدك و تديك نمرة حد تتابع معاه و غالباً
هيكون صاصا مسدس صغير العزيز

تسافر بالسلامة إن شاء الله

يا انا يا انا وياك
بموت في الاغنية دي

بالنوسبة للمنصورة فانا احتمال كبير اطلع اسكنكرية الاربع ده
لو مطلعتش ممكن يبقي فيها كلام تاني

adel
-----
نداااااالة
طالع إسكنكرية ؟؟
دلوقتى مدونى اسكندرية يقطعوك يا واد
و لا أعرف الحقك
دا إلا دودو و حنين و كل الحبايب هناك
مقدرش على زعلهم

لو مرحتش تبقى يوم الجمعة
إن شاء الله
ف المنصورة

دنا لو أنا روحت اشاساً

ربنا يطمنى عليك يا غالى على ماما
حاسة انك مش تمام
و مبتقولش كالعادة
يعنى إحساس عابر كدا جالى
أبقى قول أى حاجة

لو سافرت إسكنكرية
تروح و ترجع بألف سلامة يا رب

و خلى بالك لحسن البنات تعاكسك
عشان مش كل مرة هتخانق أنا

طب مااحود على مسدس علطول

ولا ايه

ايه النظام ياريس ؟؟؟

أحمد سعيد
---------

ماشى يا احمد

صاصا جدع و يسد

طيران على هناك

ايه الكلام ده؟
لالالا
مش ليكى حق تبررى افعالك لحد
انتى تحبى زى ما يعجبك
تتجوزى اللى تشوفيه مناسب
ابنك مش هتنسيه لانك ببساطه ام
كلمه من حرفين وفيها كل المعانى
وكلنا عارفين كده
اللى عايز يسمع فاتيما بقلبه واحساسه هيقدر كل لحظه بتعيشها ويتمنى لها الخير
واللى بيقرا لمجرد انه يدور على عيوب فاتيما -اللى هو بقصر نظره شايفها عيوب - يبقى مع السلامه مش يلزمنا
ولا كلامه يفرق معانا
انا مش فاهمه انتى بتبررى لييييييييه
طظ طظظظظظظظظظظ
اى حد يضايقك طظ فيه
يجى عندنا يشرب من المالح لحد ما يتروى
ولا تحطى حد فى بالك
عيشى انسانه بكل معنى الكلمه
حبى واتحبى واتجوزى وافرحى باى شئ مهماكان صغير
اتلككى للفرحه ياستى
وان شاء الله جوايز الصبر جايه جايه
بس كله بوقته

اتمنى لك سعاده كتير
انونيمس قليل
(:
بحبك يابطتى مووووووووووت

ايه ده طلعت اخر من يعلق بس برضة ملحوقة :-))
انا لاقيت عندك بوست قولت هيهيهيه
بس معرفتش اقراء الا دلوقتى عقبال ما البنات نامت :-)) و اتسحبت علىالكومبيوتر و النت على طراطيف صوابعى

بس بعد ما قرأت قولت برضة هيهيه
:-)
فطوم فشت الى جواها و بحبحت و مكتمتش :-)
و المجهول كان فى بالى ادعيلك عليه بس قولت بلاش ادعيله بربنا ينورله عقله و يبعد عنك اذاه

بس وحشانى
و مستنية اقراء يوم المنصورة :-) و حملة الدم :-)

و جميلة تشكيلة الفيروزيات
ياعينى
ايوه كده :-))
اتمزج عندك شوية

وعدتك لو حسيت فى كلامكم نكد
حفكركم ب ده
http://ro7albmama.blogspot.com/2009/12/blog-post_11.html

اصل المود عندكم اخر السنة بيقلب ليه بس ؟؟

انتِ روحك حلوه قوي يا مامه يوسف
عايزه اقولك انك لو دخلتي قصه حب او اتجوزتي ويا رب يحصل قريب وما تنحرمي من الاحساس ده ابدا
عطائك للاطراف الاخري في حياتك هيزيد
مش هيقل ابدا
لان في دور مهم قوي ناقص
كمان دا اهم عنصر في الصوره
ساعتها هتحبي ابنك اكتر وبشكل مختلف
وهتشتغلي بروح عاليه ويمكن تبدعي في شغلك
هتحبي نفسك اكتر وهتشوفيها بشكل تاني
هتحسي بالناس اكتر واكتر
ويمكن الكل يتعلم منك وتبقي قدوه في التمسك بحقك في الحياه ولاخر وقت فيها
وانه مش يوقف حياته لمجرد انه مر بتجارب فاشله

بالتوفيق يااااارب
ونشوفك عروسه جميله
وتفرحي بجد

ازيك ياتوما
ليه الحزن دا
انتي بني ادمة لحم ودم وروح وجسد
ومفيش فرق بينك وبين اي حد تاني
واكيد تجربتك اللي فاتت اتعلمتي منها الكثير والكثير فكري بتمعن وخدي القرار من دماغك انتي
وسيبك من كلام اي حد تاني
الناس دلوقتي وحشة اوي ومش بتفكر غير في اذي بعض
تحياتي

روح قلبي فاتيما..الكلام اللي انت بتسمعيه ده أنا بسمعه من أمي و من أختي!!من أقرب صحاب ليافي الشغل وفي كل حتة..بس ربنا يا فاتيما الأكبر و الأرحم من الناس كلها كان ممكن يحرم جواز المطلقة اللي عندها ولاد أو حتى يخليه مكروه لو فيه شبهه أذى لولادها..بس الأم أم ولو مر ايه في حياتها..في اللحظات الحلوة بتحب ولادها أكتر و تبقى عايزاهم فرحانين..و في لحظات اليأس بتحبهم أكتر و تبقى عايزاهم ميشوفوش يوم وحش من اللي شافته..ديننا حلو وحنين علينا بس احنا اللي بنقسى على بعض و ساعات كمان على نفسينا..عيشي يا فاتيما لأنه عمر واحد وأحسن 100 مرة انك تحاولي فيه مرة و اتنين و مليون على انك تخرجي من دنيا-بعد عمر طويل- و فيه حاجات كتير مشفتهاش و لا حسيتهاش..تفتكري ربنا ساعتها حيبقى راضي عن شبابك اللي ضيعتيه؟ولا حقوقك و رخصه اللي عطاهالك و انتي مخدتيهاش؟أنا زيك اتجوزت سنة و نصف بس و الجواز ده عمر بحاله..انتي يا فاتيما لازم تعيشي طول مانتي في الدنيا..و زرار ال" pause" اللي انتي دايساه شغال عندك انتي بس و كل اللي حواليكي عايش..حتى يوسف..انتي مفرطيش فيه و اللي ناسي فكريه بسنين طويله هربانة بيه لوحدك..متشوفيش باباك لما مات..ومش قادرة تشوفي مامتك..اللي ناسي قريه التغريبة يا حبيبة..وعيشي بقى..أما يوسف..فله الله و انت..أحن أم في الدنيا

انا قريت البوست
و تابعت بعض التعليقات
انا دايماً فى افكارى منحاز للمرأة
عشان كدة مش عيب ان حضرتك تحبى و تدورى على حد تكملى معاه حياتك
ده حقك الشرعى و القانونى و الإنسانى
بس لو تعليق بسيط
لو حضرتك بتعتبرى المدونة ديه بيتك بجد
يبقى اكتبى اى شىء و لو خاص اووووى بيكى
لو مجرد شىء للفضفضة و بس
يبقى من الأفضل اى شىء خاص بيكى
ممكن تتكلمى فيه مع صديقاتك من المدونين

لأن كثير مش بيبقى فاهم هل البوست شخصى و لا مجرد خواطر
يعنى انا البوست اللى عن الحب امتنعت عن التعليق عليه
لأنى عادة اى شىء بحسه خاص مش بعلق عليه
خاصة انى معرفش حضرتك كويس
عشان اسيب تعليق يفيدك
بس عامة من حقك تحبى و تلاقى انسان ترتبطى بيه من تانى من حقك كل شىء جميل
طالما ده حقك الشرعى و الدينى
و طظ فى اى افكار رجعية مالهاش لزمة

بالمناسبة احب اشيد بتعليقات شيما و بسمة و مسدس و خيخة و احمد سعيد

متفق تماماً مع ستيتة حسب الله الحمش :)
يافندم الحياة عمرها ما كانت استامب وزى ما بنقول ربنا بيقطع من هنا ويوصل من هنا و لو حد ضايقك غالباً هيكون ايده فى الميه الباردة ،،، كل حد عمل حاجة غلط سواء بايده أو حد بوظهاله من حقه يحاول تانى يعملها صح لا عيب و لا حرام ،،، الحرام هو مصادرة حق مشروع ليكى سبقك ليه الكثيرات من من يشهد لهم الدين و التاريخ بالفضل و السبق
عجبنى أوى ان لما حاجة تفسد فى حياتنا نرسم عليها دايرة و نشيلها و نحاول نحافظ على الباقى سليم ،،، عجبنى كمان تصالحك الايجابى مع القدر و كونك قادرة تشوفى الجميل من الحياة رغم تجربتك اللى مع كتير من الناس بتخليهم مش قادرين يكملوا ،، ده لأن أرواحهم مش مشحونة كفاية لاستئناف الحياة من جديد
الكلام يطول لكن أعتقد ان الزملا فى التعليقات غطوه كله
ربنا يكتبلك كل الخير و السعادة و يسدد خطاكِ دايماً

بصى يافاتيما
انا طول عمرى كنت اتغاظ من اللى تمر بتجربة وفشلت مثلا وتقول جواز لالالا جواز ايه انا اتعقدت خلاص
لان حاسة ده ضد الطبيعى شوية

وارد جدا انى امر بتجربة وافشل وانى اكون حاسة ان لا يمكن امر بتجربة تانية لكن تتخلق ظروف واتحط فى مواقف القى نفس بحس بنفس الشعور وبنفس الاحاسيس

احنا بشر زى ما قلتى فينا عقل وقلب ومشاعر بتجرى فينا غصب عنا وبنحس بيها غصب عنا

وده لا ينقص منا ابدا ولا من شعورنا فى ادورانا المختلفى فى الحياة

بوستك جدا عاجبنى جدا ويتلخص فى كلمة واحدة
انا انـــــــســـــــانة

ربنا يكتبلك الخير حيث كان
دمتِ بخير ..

أقولك يا ستي ضحكت ليه

عشان أول التعليق قلتلك مش هازوّد حاجه عن الناس
وبعد ما خلصت لقيتني رغيت أوي :))

كل الحب يا فاتيما :)

هيه هيه هيه فاتيما جايز تيجى

يارب ينزل عليكم من السماء مدرارا فلوس يا فاتيما يا بنت ام فاتيما عشان تيجى

تعالى يا اختي نحط مودك على مودي وهاقولك بعدين نعمل بهم ايه


الحين بقى نقول هالبت ما انا قلتلك طنشي الخلق يا فاتيما ومش بتسمعي كلامي بتيتا

مره مدونه عسوله كده حبيبتى قالتلى يا صبرني اصل ما تعرفيش انا وضعي مختلف انا مطلقه وانتى عارفه بقى الى ممكن يقابل المطلقه

قلتلها وحياتك يا اختي المجتمع بقى اهبل ومش فارق معاهم الحمار بيفضل حمار طول عمره

بالمناسبه يا جميل عارفه قصة جحه وابنه وحماره ؟

ما عجبش حد

فاكره لما قلتي مش هاتجوز ؟

اه لو كنت شوفتك انا ايامها كنت وضبتك انا يا حلوه

ايه مش هاتتجوزي دي هو بمزاجك هنا سايبه ؟

لا طبعا غلطانه

شوفتي ازاي مش هاتعجبي حد

انا خدت قرار من زمان يا فاتيما

طزززززززززززز فى المجتمع الى يخالف الشرع

وطزيييييييين فى الناس الى بيتدخلوا فى حياتنا

وعدد لا نهائي من الطزات فى كل حد يخالف الفطره ويدعي الفضيله وهو ايده فى المايه

يلا بقى بسرعه تعالى

السلام عليكم ...

ربي ان شاء الله يجيبلك الي بتتمنيه و احسن ...
اعتقد ان اهمال الاراء المعاكسة للمنطق امر ربما يكون جيدا .... لان الي بيعارض الطبيعة و المنطق و الحياة ده مش فاهم بالزبط معني ايه انه يكون نفسه ...
انا اؤيد ما قلتي ... نعم ... ان شاء الله ربي يجيبلك الانسان الي ينفع فعلا يكون حبيبي ... و يهتم بيك و بيوسف ... و تكون حياتك سعيدة و تعيشي دورك الي بتحب كل انسانة و انسان انه يعيشه بشكل عادي و طبيعي و حلو الان الانسان يتعلم من كل تجربة هو يمر بيها ... و مافي اي مشكلة في اي شي يحدث الا تصرفاتنا نحن بعد الحدث ... فان تعلمنا فذاك هو الجميل ...
و بصدق اعجبنتني الروح الي بتحمليها داخلك و الي بانت عليك في كل كلمة انقالت في البوست ده ...


اياك ثم اياك .. اديري بال لاي حد مش فاهم معنى الحياة ايه ...



ارجو لك كل خير و ان تجدي من ينفع ان تعيشي معه دورك الحقيقي بكل سعادة



خالص تحياتي

مش ممكن حترضى كل الناس طول الوقت..أكيد إنتى عارفة حكاية جحا و إبنه و الحمار..الحكاية دى دايما بحكيها لأولادى عشان أفكرهم إن الواحد يعمل الصح واللى هو مقتنع بيه و كده كده لازم حيلاقى ناس مش عاجبها و بتنتقده..وفى رأييى إن مفيش داعى تضيعى وقتك ولا مجهودك فى محاولة إقناع الناس بقناعاتك الشخصية..اللى يقوللك حاجة ما تعجبكيش..قوليله إبقى تعالى يوم القيامة حاسبنى بدل ربنا..أستغفر الله العظيم طبعا..بس ده الرد اللى أنا بقوله لما حد رزيل ينتقدنى

بوست من الاخر يعني
بجد جامد وفي الجون
وعلى رأي دكتور ستيتة انتي مش محتاجةتبرري حاجة لحد ولا توضحي صورتك لحد
بس كمان عجبني اوي تشبيه البازل
بصي بقا
انا حكايتي مع البازل ده منيلة خالص
في حتة بازل محيراني ومستنياها تظهر ومدوخاني بس يعني مش قلقانة هي هتظهر في وقتها... سيبك من دي
خلينا في البازل الباقي
قطعة بازل الشغل... وقطعة بازل الاخت ... وقطعة بازل الصديقة.... وقطعة بازل الابنة... والباقي كله
اوقات بحس انه ايه كل قطعة في مكانها مظبوط وكله تمام
واوقات بحس ان القطع متلخبطة وحالتها حالة ولما اجي اظبطها الاقيني بحط قطعة مكان قطعة او بحشر قطعة في حتة مش بتاعتها تقوم تبوظ قطعة تانية والاقي حياتي عبارة عن بازل منعكش
انتى جننتيني بحكاية البازل دي
وخليتيني بجد ابص على حياتي بشكل حقيقي وواقعي موووووووووت
وشكلي اخرة لما ازهق هقطع البازل وارميه واشتري واحد جديد ... تفتكري ينفع ؟؟؟؟؟؟؟؟؟ طيب والله ياريت اعمل بازل جديد يليق ببسكوتة كدة .. ده انا هخليه بازل اخر حاجة بس حد بس يحكمني على حياتي .
ربنا يسعدك ويساعدك ترتبي البازل بتاعك زي ماانتي تتمنى .
تحيات بسكوتية بلوجرية .

طبعا ياحبيبتى حقك تعيشى حياه طبيعيه ذيك ذى كل الناس ومش معنى ان الانسان مر بتجربه سيئه وندم عليها انه يفضل يدفع تمنها العمركله
والا مكنتش الدنيا هتمشى بينا وكل واحد كان فضل محبوس فى دائرة اخطائه وترتيبات القدر السيئه له
لازم نقع ونقوم ونكمل ونكون احسن من الاول
وعمر مااحساس الامومه تعارض مع الحب
انا دايما رأيي كده ان (المراه) لها قلب واحد صحيح بس ممكن تحب بيه الووف
ابوها وامها وابنها واخوها واختها وصاحبتها ,,,,,وطبعا حبيبها
قلبك بيخف خلاص من وجع قديم واول علامه انه بيدور على الحب
حرام نجرحه تانى ونقوله انت هتفضل طول عمرك كده بجرحك القديم ..حرام ندفنه وهو حى بيقول الحقونى
متصعبش عليكى نفسك ابدا عشان خاطرى ...خليكى قويه وخدى الدنيا فى حضنك ودورى على الحبيب اللى فى يوم بكل جراه تكتبيله قدام العالم كله ...(بحبك)
مش حرام وعلى عيب
وبلاش يكون للناس رأى فى قضيه انتى الحاكم والمحكوم عليه فيها
لايمكن ااقبل انك تقومى بدور الدفاع عن نفسك وهو فى الاصل حقك
مين فى يوم لما كل الناس تنشغل هياخدك فى حضنه ويحميكى...مين هتتدارى فيه وتقولى انا مش حامله هم حاجه
مين غير حبيب بجد انسان يستاهل الكلمه اللى مش كتير يستاهلوها
قطر الحياه بيمشى واحنا لازم معاه نمشى ومنقفش مكانا
ومعايزه ااقولك حاجه بالمناسبه

من عرف نفسه لايضيره مايقوله الناس

عاشقة الرومانسية
----------------
روق بس يا جميل إنتا
انا ف البوست دا
مش بتكلم عن روحى بس يا دودو
انا بتكلم بلسان كل واحدة ف ظروفى يا حبيبتى ...و نعمة إن عندى مكان اعرف اقول فيه الكلام دا يمكن غيرى معندوش
و لو عنده ممكن الخجل يمنعه
و بتناقش مع الانونيمس مش عشان أقنعه يحترمنى انا شخصياً يا ستى مستغنية عن ذلك
بس يمكن لما يقرى التعليقات
يستشعر شىء مختلف
و يقرى بشكل تانى الحكاية
يمكن ؟!!
من ناحية التلاكيك فإطمنى بتلكك عل الآخر و حياتك ..بس كل شىء نصيب
و متقدر
بحبك وبوسة و حضوناااااات كتير




wanda
-----
دى إكتئابات المواسم يا واندتى
و انتى فعلا استشعرتى حاجة مهمة كانت سبب من اسباب كتابة البوست
إنى أفضفض لحسن كنت على آخرى من الأنونيمس و ربنا يريحه منى بقى
مش عارفة هروح المنصورة و لا لأ
نفسى قوى الصراحة بس الميزانية ملخبطة معايا شوية ..ربنا يفرجها
التاخير فيه ميزة إن التعليقات اللى سبقتك بتريحك من كتابة حاجات كتير
و ف الاول
ف الآخر و لا يهمك
المهم تطلى علينا
هيا دى شوية ؟!!!




Rora
----
منورانى يا رورا
و مبروك عليكى دخول العالم الجميل
متقلقيش ...مش كله غلاسات
و انونيمسات رزلة كدا
اشكرك على رأيك و تمنياتك الطيبة ليا و نفسها بتمناه ليكى
و اكتر إن شاء الله
نورتينى جدا
و متقطعيش التعليقات
زى متقطعيش الجوابات كدا



Mano
----
الحمدلله يا مانو بخير
و مش حزينة و لا حاجة
بس اصل الموضوع دا بقاله مدة
و حازز ف نفسيتى النظرة المهينة دى
و من حد المفروض عارف حكايتى من اولها لآخرها تقريباً بالتفاصيل ...
اومال لو مكنتش حكيت
كان قال إيه؟
و الناس اللى متعرفينش اساساً هيبقى حكمهم أزاى ؟؟
مش عليا أنا تحديداً عشان مش انا المشكلة انا مش هاممنى و الله و عندى قدرة اواجه اللى مش عاجبه
بس فيه حد تانى و كتير زيى ميقدروش
ليه النظرة ليهم سيئة كدا
دا بس اللى يحزن يا مانو
تحياتى انا كمان يا فندم




dahlia...
---------
للمرة التانية مش قادرة قصاد تعليقك أقول حاجة يا داليا
غير منحرمشى من حنية قلبك دى أبدااااا
بوسيلى العيااااال




بدراوى
------
تعليقاً على تعليقك يا بدراوى
عاوزة اقولك يا عزيزى أن أى حاجة شخصية بكتبها هنا ببقى عاوزة اناقشها معاكم بشكل غير مباشر
يعنى اصيغها ف شكل قصة او نثر او نكش فراخ حتى عشان رأيكم يهمنى و الا كنت خليت المدونة لقراء محدودين و بس
كون تفاصيلى الشخصية بقت على الملأ و أى نفر معدى يتكلم فيها انا موافقة و الله و معنديش مانع خالص
بس بالأدب و الأخلاق
مش قذف ف المحصنات
و بعدين حتى الشتيمة انا تقبلتها لأن عمرى ما هنول الرضا التام
بس الفكرة نفسها هيا اللى سببتلى أنزعاج شديد و هى نظرة الناس للام المطلقة لما تفكر ف أى ارتباط تانى
و لما تلاقى بوست شخصى علق لو سمحت و لا تمتنع لأن نظرتك تهمنى
و بمناسبة النظرة بقى حيث إن الموضوع إنفتح و ضميرى بيأنبى شويتين
يوم البؤجة كنت بتناقش بس مش فاكرة مع مين بالظبط و جبت سيرة سعادتك و رأيك اللى كتبته عند نوران فى تدوينة الألتزام اقصر الطرق للزواج ...
انا معجبنيش رأيك خالص وقتها و قولت غنى أنصدمت جدااا لما قريته لأنى بحسك زى ما قولت ف أول تعليقك هنا إنك منحاز للمرأة و عندك افكار تقدمية .زمش عارفة ليه رأيك عند نوران خلانى احس انك ضد الفكرة العامة اللى واخدها عنك و اعلنت عن رأيى دا مش فاكرة قصاد مين و كدا
بس حبيت اقولك عشان تبقى عارف لأنى مجتش مناسبة اقول الكلام دا
و ادينى قولته أهو
ارجو متكونش متضايق يعنى منى
و انا مش ناسية و بدعيلك من قلبى
ربنا ينولك اللى ف بالك و يسعد ايامك كلها
آمين

أحمد عبدالعدل
------------
انا مضيقانى قوى يا دكتور حكاية المية الباردة دى !!!
هوه الواحد لازم يمرض عشان يحس بأوجاع المرضى ؟؟
نظرتى للحياة لازم تكون إيجابية يا دكتور و الا ابقى فعلا مستاهلش أعيشها لأن ربنا كرمنى بنعم كتيييييير قوى و كل الحكاية إن الواحد ربنا يكون بيحبه
و يخليه يشوف بقلبه اللى كان قصاده و مكنش شايفه رغم إن عيونه مفتحه و نظره ستة على ستة ..بس الحزن كافف بصيرته و بصره
اشكرك من كل قلبى على الدعوة الجميلة دى






لجين ابو الدهب
------------
يا نهر الفضة الصافى
ازيك ...و حمدلله ع السلامة
و فعلا لما كتبت البوست كتبته بغحساس أى إنسانة ف مكانى و نفسها تعيش كبنى آدم كامل و غيرها بيعيب عليها ذلك لأسباب واهية
اشكرك بشدة و نورتينى




lyssa
-----
طب لو قعدت سنة و حياتك ما كنت جبتها برضو ...بلاش تزنقونا تانى و النبى بالحاجات دى منزنا بيبقى وحييييش قوى
كل الحب ليكى يا الرقة متجسدة





صبرنى يا رب
---------
إن شاء الله يا صبصب ربنا يفرجها
و أيوه عاوزين احنا المدراراً دى مفيش مانع خالص و ابعت نص المدرار للبت خوخة عشان تيجى هيا كمان
و احنا كل واحدة فينا ليها حتيتن كيكة مش واحدة بس
أيوه ..محنا بنلعب برا أرضنا يعنى الجون بجونين ..و الحتة بحتيتين
و لا نشتكى للفيفا بقى ؟!!!
إن شاء الله ربنا يكرم
و نيجى يا صبصوتى
قولى يا رب





BUMEDIAN
--------
و عليكم السلام
و شكراً على رايك
و تشجيعك
و مرورك الكريم
نورت




غير معرف
-------
الله
حلو قوى الإحساس دا
غير معرف و لا يشتمشى !!!
و مش لازم أقنع الناس بحكايتى
لكن ممكن على حد تانى
الكلام يجيب تأثير
او يغير ف النفوس
يمكن انا شخصية مستفزة للبنى آدم دا
و واحدة غيرى ميخدش منها هذاالموقف
او لعله بعد النقاش المثمر بالتعليقات بتعاتكو دى يغير رأيه قدام
الله و اعلم
انا كتبت ف المطلق
بالنيابة عنى
و عن أى حد زيى
نورت أو نورتى




Bascouta
--------
سلامتك من الجنان يا بسكوتى
دا دا من كتر اللعب مع يوسف بيه
كنت شاطرة فيه على فكرة
و هوه كمان
كنا بنخلص الاشكال مهما كانت معقدة و بسرعة ..بس كان بيغلبنى
مش بفوتله ..لأ
كان شاطر فعلاً
و كنت بقوله هتطلع مهندس شاطر لأن عينه ما شاء الله كانت بتلقط كويس و عنده دقة ملاحظة و الحمدلله مطلعليش ف القدرات العقلية و إلا كانت تبقى نيلة مدهوسة
بخصوص بازل حياتك بقى
تعرفى اجمل حاجة فيه إيه
برغم كل اللى قولتيه
إن دايما فيه فرصة ..إنك مهما لقيتى فيه لخبطة ..إنك تعيدى تصليحها من تانى ...تخيلى لو الحياة رسمة و نقشة فى كتاب و متصلحش خالص ...يبقى مهما عملتى مينفعش تغيرى غير لما تشطبى ام تقطعى الصفحة خالص لو لزم الامر
انما البازل يا قمر ..قابل دايما للبدء و من اول و جديد
نخلينا إيجابيين فى نظرتنا
لعل و عسى
بوسة و حضونات يا بسكوتى




dr.w.krm
--------
صح يا ولاء
كلامك صح فعلاً
المرأة ربنا خالقها تحب و بشغف و قلبها يساع بلد بحاله مش بس كام نفر فى أسرتها ...و بستغرب قوى لما الاقى ستات بخيلة ف مشاعرها
بحسها مش طبيعية و خارجة عن قانون ربنا و نعمته فى خلقها أنثى
انا مش بدافع عن نفسى من منطق ضعف يا ولاء
انا بدافع من منطق غيمانى بحقوق و لازم اللى مش شايفها
يحاول يشوفها ...
بس مش عاوزة يشوفها بعقله بس ..لأن العقل كتير بيكون عنيف و قاسى
انا عاوزة يشوفها بقلبه كمان
من منطق العدل صحيح
لكن جنبه الرحمة كمان
وحشتنى تعليقاتك قوى
ربنا يكرمك و تخلصى على ألف خير
إن شاء الله

يعنى انتى قلتيها فى الاخر حتى اذا حاول المرء منا وفشل فيكفيه شرف المحاولة وهى الحياة ايه غير مجموعة من المحاولات و التجارب نفشل فى بعضها فنتألم و نتعلم و ننجح غى بعضها فنسعد و تمضى بنا الايام و تستمر الحياة بين ابتسامة و آه فيها اللى تاه فى دجاه و اللى طريقه هداه
لا أحد يستطيع ان ينكر عليك انسانيتك و أدميتك فكونى دائماّ ما ترتضيه لنفسك وثقى أن رضا الناس غاية لا تدرك المهم فى النهاية احترام الانسان لذاته فهو ما يجلب له احترام الاخرين
فاكره أغنية فيروز اللى انتى بتحبيها قوى
قديش كان فى ناس على المفرق تنطر ناس
مش عارف اصلها جت على بالى بعد ما قرأت البوست
كل أمنياتى الطيبة لكِ بالسعادة وياريت تشرفينا على حدود المجرة عشان تقولى رأيك فى اخر ما كتبه العصفور

مش عارفة اقولك حاجة غير ربنا معاكي
محدش حاسس بيكي اد ما انتي حاسة بنفسك
محدش يقدر يطلعك من اي موود وحش غيرك
ومحدش يقدر يقولك رأيه في اي حاجة تخصك ويفيدك برأيه ده غير لو انتي كنتي مقتنعة بالرأي ده
محدش يقدر يحجر على حريتك ولا تفكيرك ولا أحلامك إلا لو انتي ادتيله الفرصة يعمل كده
ربنا يعينك على كل حاجة ويجمعك مع يوسف على خير يا رب

مستنياااااكي يوم الجمعة ان شاء الله
عايزة بوسة وحضن كبير تاني مليش دعوة بقى :)

إلغي خاصية التعليقات المجهولة من عندك يا فاطمة
و اللي عايز يعلق عندك يتعب نفسه شوية و يعمل حساب على جوجل

أنا عامل كده
دا غير الإشراف اللي انتي حاطاه

الشخصيات اللي بتشتم دي بتكون شخصيات غير محترمة
يعني مهما تقنعي فيه مش حيقتنع لإن دماغه متركبة غلط

شرع الله مفيهوش عيب
لو ربنا كرمك بإبن الحلال اللي يسعدك يبقى اتكلي على الله
بس ياريت يكون الفرح في اكبر قاعة في مصر علشان تكفي كل أصدقائك المدونين اللي حيحضروا
:)

حازم شلبى
أزيك يا عصفور
انا مرضى عنى الأيام دى و لا إيه؟؟
منورنى بتعليقاتك بقالك مدة
ارجو إن دا يبقى الحال الدائم و متطفش على حدود المجرة كعادتك
زى ما انت قولت يا حازم ...انا مقتنعة
بس بتمنى غير يقتنع لأن دا حق إنسناى مش نوع من الترف و الرفاهية و دلع ستاتى
تتصور بقى إنى فكرت فعلا احط غنوة فيروز دى ..و حياة يوسف دى كانت نيتى
بس قولت حرام انا حطيتها كتير قبل كدا و كفاية زهقتكم و لو إن محدش يزهق من فيروز
بس حبيت أحط حاجات تانية ليها برضو
بتمنالك اكتر ما تتمنى لى
ربنا يسعدك أيامك





مجرد حلم ..صغنتوت
انا اللى مش عارفة اقولك حاجة خالص
وشى منك فى الأرض و مكسوفة منك جداااا
انا بخير الحمدلله
و إن شاء الله أحاول آجى على قد ما أقدر
انتوا كمان وحشتونى قوى
و طلبك ينفذ بمجرد ما أشوفك
إن شاء الله






مهندس مصرى
مش هينفع اقفل المجهول يا محمد
فيه ناس مبتحبش تدخل غير بيه
و بقول الإشراف احسن حل
و كمان اللى بيعمل حساب ماهو مش صعب
طالما حاططنى ف دماغه و ناوى يقرفنى
شتيتمه مش سب و فقط يا محمد ..دا بيتكلم عن قناعة و شىء من الغيظ كدا ..عارف اللى معتنق فكر ما و بيدافع عنه بضراوة و ما صدق لقى حد عكس رأيه و مستلمه مناقشات و جدل ؟؟
هوه كدا ...و البوست دا مش عشانه مخصوص
دا عشان أى حد باصص للحكاية بنفس النظرة و لعل و عسى كلامنا كلنا ..يغير شوية في النظرة دى
ليه لأ ؟؟
و جواز و فرح و قاعة و معازيم؟؟؟
إيه دا كله
مش لما نفرح بيك يا باشمهندس
مليش دعوة
إنت اللى تتدبس الأول
و نطمن عليك و نوصلك للعروسة و تمضيلنا إستلام
و بعدين نبقى نشوف حالنا
سلامتك ألف سلامة
و تحياتى من قلبى

اكبر غلطة عملتيها انك فكرتى فى الكلام دة اوعى تفكرى فية وتحطية فى دماغك وافتحى قلبك وعقلك وربنا يوفقك بالانسان الصح اللى يعوضك عن صبرك ويديك اخ ليوسف تعوضى معاة الدور دة كمان ودة حقك حقك حقك

فاتيما حبيبتى
انتى تعرفى يعنى انه فى حد بيسيب حد فى حاله؟ ....دى حتى تبقى عيبه
واحنا اتفقنا على ايه ...(من عرف نفسه لا يضيره مايقوله الناس
بعد الشر عليكى ياحبيبتى من الفشل..
انتى طبيعيه ميه فى الميه ومن حقك تعيشى حياتك ذيك ذى اى حد ...ولو كل انسان وقف عند اخطائه وترتيبات القدر السيئه له مش هيعمل حاجه غير انه هيغنى على الاطلال ...وهيفضل يلف حوالين نفسه
مفيش تناقض مابين احساس الست مننا باحتياجها للامومه والحب والاخوه والصداقه فى نفس الوقت
المرأه قلب واحد ولكنه يسع العالم كله
وبعدين مين يعنى ياخدك فى حضنه وميخلكيش تشيلى الهم ابدا؟؟ مين يخليكى تحلفى ان الحياه مش كلها ذى مانتى قلتى زفت؟؟
قلبك بيخف يابطه ...واول علامه هو انه بينادى على حبيب وبيدور عليه فى كل القلوب اللى حواليه
حرام اظلمه واقوله ادفع تمن اختيارك الخاطىء طول العمر
قلبك ذى ماختار غلط تخلص من الاختيار السيىء ده وخف خلاص
وبعدين انا مش موافقه انى احس انك بتدافعى فى قضيه انتى الحاكم والمحكوم عليه فيها
دى مش قضية رأى عام يابطتى
وخليكى( هاااادى هاااادى...وبزياده كمان)
وقوليله ...يارروح قلب ماما ...ملكش دعوة بيه ...اش حشرك انت؟ ههههه
انا مش فغاهمه ايه الهجوم ده هما شايفينك لا سمح الله داخله عليهم المدونه ومعاكى فارس الاحلام
هههههههههههههه
مش اما يجى ...ولونى اشك انك تلاقى... كلهم عينه واحه
بهرج معاكى طبعا ...ربنا قالى الطيبون للطيبات والخبيثين للخبيثات
وانتى مفيش اطيب منك يافاتيما
اجمد ياجميل واحضنى الدنيا من جديد وحبى واتحبى ده الواحد بيعيش مره واحده

قافلة التعليقات هناك في البوست الجديد ليه؟ خايفة عشان البوليس ييجي يحرز صورة المدون الجالس القرفصاء وألا إيه؟؟ أنا مسامح ما تخافيش .. أنا أصلا لاطشها من موقع تاني برضه
:-)

بس بجد أشكرك على ترشيحك ليا .. دي ثقة أعتز بيها جدا

أنا عجبني جدا جدا البوست بتاع مسرح العرايس .. أولا لأنه فيه (أخيرا) محاولة ناجحة للخروج من الحدود اللي كنتي قافلة بيها على نفسك .. وإن شاء الله تكون فاتحة خير وتفك النحس ولو إن ما فيش نحس ولا حاجة .. كلها أقدار ربنا .. وعجبني قوي حكاية الست اللي خافت تلطشي جوزها دي .. قمة الكوميديا

ربنا معاكي

إرسال تعليق