.

.

صباح الخير أيها الملل  

Posted by: فاتيما in


مبدئياً و على بلاطة

من اولها كدا


البوست دا تهييسى بحت

يعنى محدش ييجى فى آخره يقولى


إنتى عاوزة تتهببى تقولى إيه؟


تتهببى دى مش من قاموس الفاظى المعتاد

بس إحنا متفقين أعلاه إنه تهييس ماشى ؟

طييييييب


الاول نجر رجلكم و نقول

كل سنة و إنتوا طيييبين بمناسبة راس السنة الهجرية


اللى طلعت يوم جمعة

و مخدناش اجازة على حسها


بس يعنى اللى كانوا خدوا اجازات كانوا عملوا بيها إيه؟؟

يلا ..أدينا عيدنا عليكم و اهو كله بخسارة

نبتدى بقى البوست

بسؤال تمهيدى


ركزوا معايا و مش عاوزة ناس

تفتحلى بوقها قد كداااا


أجب سيادتك يا بيه

و سعادتك يا هانم عن السؤال الآتى


إيه هيا العلاقة يا شطار

ما بين كلاً من


كسر النحس


خطف العيال


و صلاح جاهين


؟؟؟؟؟؟؟؟؟؟؟؟؟؟؟؟؟؟؟؟


سكوت رهيبى و حالة إذبهلال عام


ليييييه؟؟


مش كله واخد اجازة و صاحى على مهله

إيه مالكم؟؟


صعب السؤال ؟
و لا صعب و لا حاجة

انتوا اللى كسلانين تفكروا


طب اجاوب انا

عشان النهاردة موسم و كفاية عليكم الفرجة على الكفار

الأفلام الدينية النهاردة



الحكاية بمنتهى البساطة إنه اختكم عندها دور كآبة و سدة نفس

الكل يستعبط و يعمل نفسه مش عارف ليه


و متحرجونيييييش

ما احرجتونيش !!.. طب كويس دا العشم برضو


المممممهم قوم كونى من عشاق صلاح جاهين الجميل

و كمان سعاد حسنى سيدة الاحزان


فبحب جدااااا غنوة شيكا بيكا

مش بس عشان هيا غنوة حلوة


عشان كمان كلها عبر و حكم


و صلاح جاهين قالنا فيها إيه؟؟


فبدال ما نطق يا ولا ... نضحك

(الله يصبحك بالخير يا هدى رينبو)


الراجل يا جماعة ادانا روشتة علاج أهو

قالك بدل ما يجرالك حاجة من النكد .. تعمل إيه ؟؟


تضحك... برضو يا ويكااااا


و الصراحة هوه نصحنا

و مقدرش يا حبيبى يعمل بالنصيحة


لا هوه و لا سعاد حسنى كمان


يمكن ... عشان باب النجار مخلع


و الاتنين مقدروش .. يطبقوا القاعدة


و لا نفع يضحكوا ..

فطقوا ماتوا
فى ظروف أقل ما توصف به

هو المأساوية


و لهذا بقى لزاماً عليا

بعد ما وصلت لهذه الحقيقة


إنى إكراما لخاطر سعاد و لعيون عم صلاح


إنى بدل ما اطق ..لازم أضحك

لحسن يجرالى حاجة


فكرت ..أعمل إيه؟


أعمل إيه؟؟


تعملى إيه يا طماطم؟

تسوى إيه يا فطوم ؟


هاه يا فطمطم خلصينا


مخمخى يا أبو الفطاطيم

زى ما نيجرو ندهلك آخر مرة


قوم تفتق ذهنى

(ختدوش بالكوا من تفتق دى )


عن حاجة بقالى مدة بعملها ..إسمها

محاولة كسر النحس


أصلى كنت عاملة قايمة بالأماكن و الحاجات

اللى مش ناوية أعملها الا لما يرجع يوسف


و بعدين الوقت عدى .. و الواد مرجعش


قوم انا فكرت .. ما يمكن الحكاية لازم تمشى بالعكس


يعنى اعمل الحاجات دى .. يمكن إذ ربما ساعتها النحس يتفك


دا كلام علمى على فكرة

بس انتوا متخدوش بالكوا

و بناء عليه بقيت اروح ماكدونالدز عادى

و دخلت سينما


و الليلة دى

عملت الزغلولة الكبيرة بقى


قررت أروح مسرح العرايس ....تصوروا؟؟


كنت بقول لااااا يمكن ... بس استبيعت


كان المفروض اروح مع شخصية عزيرة علي قلبى


لكن رغم إعتذارها .. إلأ إنى صممت على إنى اتبع الوصفة


قررت أروح و لو لوحدى أهو اقعد وسط العيال


أصل اختكو عاشقة للعرايس و لمسرح العرايس

و لأى حاجة ليها علاقة بيه


و زمااااان ف عصور ما قبل التاريخ

لما كنت عيلة ف إبتدائى


اول مرة روحت المسرح دا كان مع المدرسة

و العالم اللى من جيلى
و ما يقاربه يمكن يكونوا

راحوا نفس المسرحية دى و يفتكروها معايا


كانت مسرحية من اروع ما شافت عينى


إسمها


صحصح لما ينجح
(النص مكتوب هنا )

تأليف مييييين ؟

صلاح جاهين (صاحب النصيحة العبقرية)


ألحان مييييين ؟؟

محمد فوزى (خطيبى و إنتوا عارفين)


و من يوميها و انا بعشق مسرح العرايس

و لما كبرت و بقيت شحطة ف العشرينات


كنت بروح لوحدى

و اوقات مع صديقاتى من الجامعة و اخواتهم و ماجد اخويا

و خالتى و حفيدها و كمان زمايلى ف الشغل

و ساعات كنت اروح مع المرحوم والغير مغفور له بإذن الله ابو يوسف


و لحد يوسف نفسه ما كان عنده ست شهور خدته مرة

مع انه مكنش مدرك قوى
لكن كنت عاوزة احببه فى الحكاية

و من ساعت ما روحنا ف الوبا زى منتوا عارفين

لما حبينا نجيب ورقة بوستة و غبنا ست سنين يا دوب


مروحناش من وقتها لا سوا و لا لوحدى

غير الليلة

لما كسرت النحس و الحمدلله

و المسرحية صحيح عبيطة
فى زمن سبيس تون و الإم بى سى فور

و نيكولودين وما شابه

بس انا لسه بفرح زى العيال بالعروسة الخشب

و الروح اللى بتدب فيها ببراعة فنان و بالفرجة ع الألوان الزاعقة


و الاطفال اللى بيحضروا و ضحكهم و البراءة و النقاء الذى لم يلوث بعد فيهم

عدة ملاحظات بقى على الليلة دى


- انا رايحة لوحدى ..على باب المسرح لقيت أورطة عيال

بتوع 7 سنين فيما تحت


واحد فيهم جه وقف جنبى و رمى سؤال على الأفيش و الصور الموجودة فيه


رديت عليه .. بكلمتين ما صدق و راح لازق فيا

لحد ما دخلنا المسرح و قعد ييجى نص ساعة واكل ودانى


إكتشفت إنهم مجموعة أطفال تبع دار أيتام و جايين فسحة


الولد بعد ربع دقيقة ندهنى يا ماما ..لما جالى حالة ذهول مؤقت

هما بيقولوا للمدرسات ماما عادى ...بس انا لما سمعتها مكنش عادى بالنسبالى

الدنيا دى غريبة قوى .. يعنى انا نازلة من بيتنا فى معاد مش مترتب

و فى مكان مكنش مفروض اجيله

عشان ولد صغنن برىء

و يقولى الكلمة دى اللى بقالى زمن مسمعتهاش ..

صحيح بيندهنى بيها عادل و ناس كتير

بس مزيكا الكلمة من بوق طفل صغير بيقولها

و بشكل تلقائى و لا شعورياً كدا و الواحد مش مستنيها

حاجة تانية خالص


- كنت عاوزة أطبطب عليه و ابوسه ف شعره حتى .. بس قولت

مفيش داعى ليفتكرونى

ست مختلة و لا بتحرش بالعيال و لا حاجة


معرفش ليه فجأة إفتكرت بوسى فى فيلم آخر الرجال المحترمين


أصلاً الست ف الشباك و انا بشترى التذكرة بصتلى بإستغراب

و سألتنى
إنتى جاية لوحدك

لا عيل و لا خطيبك و لا جوزك و لا حاجة ؟؟!!


قولتلها انا بجيلكوا من زماااان

و اللى بييجى لوحده بتمشوه و لا إيه؟؟


ضحكت و قعدتنى فى مكان حلو و زى ما بحب أقعد دايماً


- العرض الساعة سبعة و الجمهور بدأ دخول القاعة من ستة

طبعاااااا
انا من الناس دول منتو عارفينى بروح بدرى أى حتة

الولاد بتوع دار الإيتام قعدوا يمين المسرح و انا ف الشمال


بقينا نشاور لبعض انا و العيال من بعيد ... و خلاص


كنت جايبة معايا بالونات عشان أنفخها و ارميها للعيال يلعبوا


بس افتكرت بوسى فى آخر الرجال المحترمين تاااانى

و قولت بلااااش ليقولوا عاوزة اخطف عيل و اخده ف إيدى

و انا ماشية و لا حاجة؟


و كمان عدد الاطفال كان اكبر من عدد البالونات

فقولت مفيش داعى يتخانقوا عليها و القعدة تقلب بغم


- بعد شوية جه اب و ام وعيلين و قعدوا قصادى علطول


بنتهم جت تتكلم مع عيل من دار الأيتام .. راحت الأم مزعقة فيها


ملكيش دعوة بيهم ...كنت عاوزة أقوم أتخانق معاها ..بس قولت مفيش داعى

اصل شكلها لبط و
وش خناق ومش عاوزة أغمق الليلة

بس صعب عليا جدا ااا إنها تربى بنتها على إن التعامل مع الطفل اليتيم

يكون بالشكل البشع دا
و على إنه منبوذ ..حاجة تقطع القلب

المهم إن جوزها شكله راجل لطيف و قاعد ساكت و هادى

و واضح إنها الطرف المسيطر فى الجوازة دى


النوعية دى من الستات بتخلينى احمد ربنا جداااا

إن امى مربتنيش أبقى مفترية


مش عاوزة اكون كدا ..حتى لو هاخد حقى


- خلص الفصل الاول و جت الإستراحة ..الهاااانم

اللى قاعدة قدامى ( اللبط ) قامت تروح الحمام


بس و هيا بتقوم .. راحت زغرالى بنظرة

كلها معانى .... نظام انا قايمة و هغيب خمس دقايق


ارجع الاقى جوزى ف مطرحه و ملكيش دعوة بيه...فهمتى؟


فهمتى دى

موجهة ليا ...على اساس إنها من اول ما قعدت اصلاً

و هيا بتحود برقبتها على ورا كل شوية تشوفنى قاعدة لوحدى


و معييش حد لييييه؟؟... يبقى أكيد فيه غرض فى نفسى وطبعا وحش


جاية اخطفلى عيل ..و لا اخطفلى راجل ..الله أعلم بنوايايا بقى

المهم أن حظها المدوحوس قعدها هيا و سبع الرجال جوزها قصادى


قوم كدا منكن أنا أعمل فيلم فى الخمس دقايق دول

و أشبك معاه و لا حاجة و أهدد أمنها


هتقولولى كل دا إستشفتيه من بصة واحدة ..هقولكم

إحنا ستات و نفهم بعضيشنا


و هيا قارشة ملحتى من ساعة ما قعدت


و بعدين اثناء المسرحية قعدت أضحك ملء قلبى الصراحة

و ارد على الممثل اللى بيرتجل مع الاطفال ..كأنى عيلة وسط العيال


بضحك و برد عليه ..قام جوزها هوه كمان ضحك بصوت عالى

عادى يا جماعة الضحك معدى ..بصتله حتة بصة كتمته
صعب عليا بصراحة ؟


و بعدين انا جاية هنا ليه؟؟

مش عشان ابقى على راحتى و اعيش طفولتى ؟


كونها ست سماوية و عاملة حالة حصار على بعلها .


هيا حرة .... مالى انا هتكتمنى انا روخرا و لا إيه؟؟

بعد ما بصلتى ..روحت بصالها بإبتسامتى

اللى إنتوا عارفينها

مع بعض البرود و كأنى ولا الهوا ... إتغاظت اكتر

وراحت الحمام و جت فى دقيقة و نص بالعدد ..

يا ساتر على الستات لما تبقى هايفة ؟!!!


- بشكل عام المسرح زمااان كنت بحسه كبيييييير قوى

معرفش النهاردة لقيته صغر قوى يمكن

اكون اللى لما كبرت قوى
حساه صغر ف الحجم و الإرتفاع ؟

لونوا حيطانه بألوان حلوة والكراسى بقت أشيك

انا اصلى مروحتش من
سنة 2000 يعنى زمن طويييل

- المسرحية بسيطة و قصيرة ..بس الموسيقى مبهجة قوى

و اصلا لو عملوا إيه


انا هنبسط و هيعجبنى العرض بغض النظر


- طول العرض كنت بفكر فى إتنين كان نفسى قوى يكونوا موجودين


حد منفعش ييجى


و حد إستحالة ييجى


وإفتكرت كمان ولاد هانى أخويا و كل عيال صديقاتى عبير و تغريد

و كل عيال المدونات على رأسهم شريف و ولاد دوبا


و ولاد شاهى و ولاد قوس قزح و ولاد صيدلانية ....و ...

و مش هعقد اقول كل الأسامى انتى عارفين لوحدكو


- الفرجة لوحدى ممتعة و الله و مش وحشة

عشان محدش يقولى
روحتى لوحدك ليه .....كنتى تعالى معانا

و قوليلنا و نروح كلنا و تقعدوا تشيلوا همى و الجو دا

انا بعرف أفسحنى كويس اهو متقلقوش

و ساعات الواحد يبقى عاوز يكون لوحده


- يا ريت اللى يقدر يحضر العروض دى يروح


لأنها مبهجة فعلاً بغض النظر عن بساطتها

متعة القعدة ف المسرح و لا ميت سينما تغنى عنها


و التذكرة ب 10 جنيه مش معضلة و العرض من 7-9

و فيه عروض صباحية بس معنديش فكرة عنها قوى حالياً

و دى بتبقى للمدارس متهيألى بس ممكن جمهور عادى يدخل

زمان كنت بعمل كدا

العروض عموماً يومين الخميس و الجمعة

من كل اسبوع و المواصلات ليها أسهلها المترو - محطة العتبة

و المسرح ف قلب ميدان العتبة ورا المسرح القومى


- دار الإيتام اسمها دار الهنا بالفسطاط

حرصت أسالهم عن إسم الدار و شكرتهم جدا


لأن العيال باين عليها مرتاحة نفسياً و فيه اهتمام بيهم

و باين من كلامهم معايا و شقاوتهم إنهم مش متربيين على خوف و لا حاجة


بصراحة ربنا يبارك لهم ..عاوزين نبقى نروح نزورهم يا داليا

فى يوم من أيام الخير بتاعتك


- انا من مهاوييس العرايس و مسرح العرايس

و اللى يعرف حد هناك
يقوله فاتيما بتقولكوا

متخدونيش حداكو إنشالله ألملكو قصاقيص القماش ؟


- انا مردتيش على تعليقات بوست قبض الريح

مش قلة إحترام و تجاهل ليكم ...ابداً خالص


بس الحقيقة إن من كتر ما عندى كلام كتير ارد بيه

نفسى اتسدت عن أى حاجة تنقال


فسامحونى

و بجملة التسامح

انا اجازة حبتين بقى الكام يوم الجايين و محدش يستعوقنى و يقلق و كدا


و بالتالى .. مش هرد كمان على التعليقات ف البوست دا كمان

لو حد بعد الصداع دا كله

لسه ليه نفس أو إستعداد... يعلق
أصلاً

- أخيراً بسكوتة عاملة إستفتاء ... شعبى

عن التدوين و المدونات

دوس هنا

حاجة زى المحاكمات الشعبية كدا

منا فينا من غير كلاكيع و تنشنة

يا ريت نشارك فيه.. و أهو نشوف بعض

بعيون بعض

مش عيون غريبة عجيبة

زى المزغودة مسابقة أرابيسك الله يمسيها بالخيييييير

هاه

عرفتوا دلوقتى العلاقة بين صلاح جاهين

و خطف العيال و فك النحس ؟


يوه ... يا دى النيلة

اومال انا بقول إيه من الصبح؟؟


إقروا البوست تانى

و من الاوووووول


-------------------------


انا راح منى كمان حاجة كبيرة
أكبر من إنى اجيبلها سيرة
قلبى بيزغزغ روحه بروحه
عشان يمسح منه
التكشيرة

This entry was posted on الخميس, ديسمبر 17, 2009 and is filed under . You can leave a response and follow any responses to this entry through the .

45 كــــلام بيطــبطـــب عـــلى قــــلبى و روحــــى

1-انا بحب سعاد حسني اكتر ما بحب نفسي
بجد صوتها بيبهدلني
البنت او الست الوحيدة اللي كان نفسي اشوفها ان شاء الله دقيقة واحدة

وعمنا صلاح الحقيقة لا تعليق

انا عامل لستة اغاني لسعاد حسني و منهم الاغنية دي و اغنتية بابا زمانه جاي (بتعت مسلسل هو هي) اكتر اغنيتين بحبهم ليها
كمان استعراض الاغنية دي وهمي بجد
عمري ما شفت حد كده

2-مسرح عرايس و متقوليلش :(:(
انا كنت اروح معاكي يا امي
امال ابنك ايه بس ...!!!! :(:(
وكمان اجازة و ملل و اكتئاب

انتحر انا يعني ؟؟؟

ازيك يا فاطيما
بوست جميل
و خلطة جميلة و غريبة
ربنا يرجع لك ابنك و تشوفيه على خير
تصدقى انا مفروس اوووى
من اللى قالت لإبنها متلعبيش معاه
ربنا يرحمنا من الأشكال الضالة ديه
و اجازة سعيدة ان شاء الله

انا موافقة نروح دار الهنا ده
يالا انوو وخليكوا رجالة
وكمان بالمرة اشوفك عدل
بدل شوفة السرعة بتاعة المرة اللي فاتت
وبعدين عيب عليكي جدا صراحة
عمري ما رحت مسرح عرايس عمري
طب قولي تعالي يا ولية يا ستيتة يا مسحولة يا مهيضة الجناح افرجك على مسرح العرائس

كان مفروض واحد صاحبي طلبت منه اروح ساقية الصاوي اللي ها تعرض النهاردة الجمعة عمر خيرت
حبيب هارتي بكل معنى الكلمة

صاحبي ظروفه سيئة ومشاغله نسيته حبيبته

قوم انا كمان هيست زيك

قمت عملت محشي ولحمة ضاني وقعدت افش غلي في الكمبيوتر المنيل ده

وانا لما اتخنق بقى لا تقولي صلاح جاهين ولا سعاد حسني ولا اشرف مروان

اه نسيت اقول لك
اهي الحيزبون اللي كانت قاعدة في المسرح قدامك دي هي اللي انا ها أجوز جوزها لحبيبة زوج ان شاء الله
على ايدي بعون المولى
يخرب بيت الغباء المسلح

رجعت في كلامي
مش ها اجوز المتعوس ده لحد
ده دلدول وبيضحك بالأوامر وبيؤثر السلامة مع صنف الحيزبون

خليه مع أم أويء

هي دواه :)

اضحكي بقى
إحياة النبي يا شيخة تضحكي
اجي ازغزغك؟

بمناسبة الملل ها احط شعر بحبه جدا
قلت اقول لك علشان بيعيط
بس لي مزاج ليه دلوقت
لا تدخلي مدونتي
انها قابلة للانفجار الآن
هع هع هع
لسه مضحكتيش

تصدقى أنا كمان فكرت زيك أنى أمشى عكس الاتجاه
جايز حاجات كتيرة تتغير
وقد كان وبدأت فى شوية حاجات وربنا يسهل فى الباقى

خدى بالك من نفسك قووووووووووووووووى

بغض النظر على انى عاوزة اعرف مين الشخص اللى مانفعش ييجى:)
(فضول ستات عادى يعنى):)
بس عجبتنى اوى انك قدرتى اخيرا تفسحى طماطم وتخرجيها
وعجبنى تفهمك لنظرة الست الصعبة اللى كانت قاعدة قدامك
تحسى بجد ان الستات عندهم قدرة فظيعة انهم يفهموا بعض من غير اى كلام:)
سبحان الله بجد

وكمان انك مطلعتيش البالونات مش عشان فيلم بوسى ونور الشريف لا وكمان عشان العيال ماتتخانقش
عجبنى تفكيرك وقتها جداااااا
والطفل اللى جه وقالك يا ماما فكرنى بيوم كنت لسه فى الجامعة وقضيت يوم اليتيم مع اطفال ايتام ومعاقين فى نفس الوقت ولقيت بنوتة منهم جت حضنتنى وضحكتلى ومشت
كده من غير اى مقدمات ولا حتى نهايات:)

وفعلا ياحبيبتى الدنيا علمتنى فى الفترة الاخيرة ان الشئ المنتظر لا يأتى
تناسى وهتلاقي اللى نفسك فيه جه لوحده ومن غير ماتكونى حتى عامله حسابه

بحبك اوى ياطماطم
ربنا يسعدك ياحبيبتى ويرزقك بكل الخير
ويارب يكون عام جديد سعيد علينا جميعا

كده حضرتك تكسرى بخاطرى وتقولى مسمعتيش كلمة ماما من أطفال بقالك فترة ،، طيب أنا مش قايل لحضرتك ماما فاتيما مرتين الأسبوع اللى فات :))))

بعيد عن التفاصيل ،،، أنا مش متفق إطلاقاً مع صلاح جاهين لأن ببساطة العبقرى و المبدع هو اللى يعيش سعيد و ناجح للنهاية مش اللى يموت مكتئب ،، أعتقد انه بنهايته حكم على كل إنتاجه بالإعدام لأنها بهجة ثبت أنها مصطنعة

طبيعة الحياة انها لها مقالبها و على أد ما احنا جامدين على أد ما هنستحملها و نتعايش معاها و نحس بالجانب الإيجابى أكتر من السلبى و تبقى محصلة الحياة ان احنا اللى لينا عندها مش العكس وتبقى هيا اللى مش قادرة تجارينا ،،، السعادة بيننا و بينها واللى يشد اقوى و يتشبث بيها أكتر هو اللى هيحصل عليها
إذا فى سبب أو اتنين أو عشرة بيعكروا صفو الحياة ،،، فمن المؤكد ان فى عشر اضعافهم دعوة للأمل و السعادة و النجاح وفضل فى الاخر احنا هنخلى عنوان حياتنا العشر اسباب و لا العشر اضعافهم

ربنا ييسر أمرك و يرزقك السعادة دايماً ،، كل سنة و حضرتك بخير

آه الحمد لله أخيرا عرفت العلاقة بين صلاح جاهين و خطف العيال و فك النحس ههههه
بس تصدقي فكره حلوه حكاية مسرح العرايس دي
أنا من زمان بسمع عنه بس مكنتش أعرف أنه مسرح بجد ومكان مخصص لعروض أعمال مسرحيه للعرايس فقط
فعلا أفدتينا أفادك الله
بس ممكن سؤال
هو فين المسرح ده بالظبط في العتبه ؟؟
أصل العتبه زحمه ولما بروح بحب أتوجه مباشرة للمكان اللي أريده علشان بسرعه ألحق أخلع وأكت وأعود لحيث الهدوء والروقان

دمتي رقيقه وحنينه دوما

انا عرفت العلاقة من اول ما شفت صورة جاهين والفيديو اللى تحت

=============
فرق كبييييييييييير بين الوحدة الاختيارية والاجبارية

ربنا يسعد ايامك يا فاتيما يا بنت طنط مامت فاتيما


تصدقي لما قريت آخر جملة
قولت يوه دنا نسيت الموضوع كان اية فعلاً

انا كمان بحب اخرج مع نفسيتي

بس نفسي اتعلم اروح بدري دية


سلامٌ عليكِ

هو مش تعليق اد ما هو طلب
ممكن يا فاتيما تعزميني مرة على مسرح العرايس
والله هجيلك مخصوص من اسماعيلية
اولا لاني هستمتع بالخروج معاكي
ثانيا لاني بجد بحب الجو ده
والنهاردة الصبح بالصدفة البحتة كنت بتفرج على اغنية حمادة هلال مش هقول
اللى فيها مسرح عرايس ولقيت نفسي بقول انا نفسي اروح مسرح العرايس

بحبك يا فاتومتي وبحب قلبك العسول ده

هستنى العزومة
تحياتي

حلو تغيير المود ده يا خالتي

ربنا يرد لك يوسفك على خير يارب

كل الود

حلو فطوم فى اجازة هى كمان نستفرد بقى قبل ما نتلاحقنا بالضرب المتحوش :-)))

بصى يا جميل
الاغنية جامدة جدا لدرجة انى باكرها اه والله متزعليش منى
بحب الاثنين بس الاغنية لا
بتخلينى اعيط و بالذات فى تعبيرها و هى بترسم الضحكة بالعافية
كثير كنت بحس انى لازم اعمل كده اضحك بالعافية بلاقينى ابوخ من التكشيرة
فابوجد لروحى سبب لضحك و لو مضحكتش بستخبى زى القطط و اللعق جروحى فى صمت (حلوة صمت و انا رغاية و فضاحية ) بس لما بخرج من المود برجع اضحك و ارغى و احكى عن الى ناكد عليا

حتة اروح لوحدى عملتها سنيما مش مسرح (مسرح العرايس روحتة و انا صغيرة بس المسرحية مشدتنيش بس لما بتفرج على الليلة الكبيرة فى التلفزيون باسمعها معاهم و بحبها موت )
المهم لما رحت لوحدى لقتنى اكتئابت لوحدى حتى لو الفيلم سخسخى ضحك
الضحك من غير شريك بيوجع اكثر من الدموع
علشان كده جيت لعالم البلوجر و قاعدة برغى معاكم اشريكم فى الى بيضحكنى و الى بيبكينى و الى للاسف بيخليى دماغى تيون تفكير :-))

المهم كنت كملتى دور بوسى (متقلقيش المحامين المدونين كثار حيدفعوا عنك و يجيبولك براءة) مش جايز ساعتها تقابلى اخر الرجال المحترمين (و لو مش عايزة زقيه عليا ماشى :-) انا مش حقطع على اختى و حابيبتى فطوم استنها هى تبعت من نفسها :-)))

بس تعرفى اخر مرة فكرت اكسر نحسى قولت اجرب ادور على منط جومناجى و لا ده فيلم ؟؟ المهم قصدى على الحبل الى بيربطوه حوالين رجلك و يرموكى من فوق كوبرى :-))) مجنونة مش كده ، بس حد يدلنى على اقرب كوبرى بيرموه منه الناس اجرب و ماله بدل ما انا جبانة جايز ساعتها اتشجع:-))
فى كل حاجة فى الحياة

الحق اروح اعلق فى البوست الاخرانى هناك قبل ما فطوم تقطع الاجازة و تجرى ورايا
خلى بالك نفسى قصير :-))))))))))))

و كل راس سنة و انت بخير

طيب هو فين الملل ده ؟
ما رحنا مسرح العرايس و هيصنا اهوه
و سمعتي كلمة ماما
و كبستي الست الخنيقة
و 100 فل و 14 أهوه
ربنا يكمل فرحتك بيوسف يارب

طمطم
صباحك شيكولاته بيضا بلون قلبك الجميل وروحك الاجمل
وحشانى والله بجد جدا
لكن اعمل ايه انتى كائن غير تكنولوجى وادينى بحاول اتحمل وخلاص انى موش اكلمك ولااسمع صوتك
وحشانى ياطمطومه
وطبعا انا سبقتك وكتبت الاغنيه بتاعت شيكا بيكا
وانتى حسيتى باللى عاوزه اقوله
وعشان كدا موش هقول حاجه غير ان يارب
السنه دى تكون خير عليكى وعلى حبيب قلب خالتو سها يوسف
ويارب يرجعهولك بالف سلامه
بوسات وحضونات من هنا لعندك
امووووووووووووووه
وربنا وحشانى
ماتيجى اللقاء الحوائى بتاع المنصوره
وش بيترجاكى

يا جبانة
طيب زمرى لاختك مفروسة بدل ما هيه بتبقى قاعدة لوحدها مفروسة
اول لما قريت سؤالك عن ايه العلاقة
قلت الكآبة على طول

طيب بما انك بتعرفي تفرفشي نفسك و تخرجى نفسك من المود الوحش بقا، عاوزة تاخدى اجازة يومين ليه؟؟؟

فعلا و انتى بتحكى على الست اللى زعقت فى ابنتها اضايقت اوى
بس تعملى ايه فى الناس اللى تفرس يالله

بقولك ايه انتى كآبتيني الصراحة اوى و فرستيني
ابقى ابعتيلي رقم تليفونك
و الاوقات اللى ممكن اتصل بيكي فيها
علشان مش اتفرس
سلام

ياااااااااه تصدقى باية انا بما انى اليومين دول مكتئبة وفى حالة نكد تمام

كنت قريت كلمات اغنية شيكا بيكا عند مدونة سكرة ولسة امبارح منزله الاغنية واعدة اسمع فيها من امبارح
هية واغنية الشكولاتة


يلا دنيا


حلوة فكرة فك النحس دى بجد يمكن تجيب نتيجة

روح قلبى والله بحبك فى الله ربنا يارب يسعدك يارب قولى اميييييييين


انا راح منى كمان حاجة كبيرة
أكبر من إنى اجيبلها سيرة
قلبى بيزغزغ روحه بروحه
عشان يمسح منه التكشيرة

حلوه قوى الفسحه دى
وكويس جدا انك خرجتى او بتحاولى تخرجى من المود الوحش اللى كنتى فيه
اما ام أويء الى كانت فى المسرح فوصفك ليها موتنى من الضحك
ورد فعلك على نظرتها عجبتنى جدااا
ههههههههههه
ربنا يسعد قلبك ياطمطم يارب
بس قوليلى صحيح
هاتغيبى ليه؟
انا كده هازعل منك
وجودك بيفرق معايا قوى يابطتى
مش كفايا انى مش باشوفك؟
كمان المدونه هتغيبى عنها وتقفلى شباك قلبك اللى بيطل علينا؟
مش ده كلامك؟
مش عايزاكى تبعدى الله يكرمك
لو لينا خاطر عندك
بحبك موووووووت

والله احسن حاجة عملتيها
احسن حاجة ان الواحد يعرف يخرج نفسه من اللى هو فيه
وانتى كمان عارفة ايه هى الحاجة اللى تخرجك

وعلى فكرة لوحدك بيبقى لها متعة خاصة فعلا

ربنا يسعد كل اوقاتك وايامك يارب حبيبتى ,,

عارفة انت غيرت المود بتاعي في البوست ده كااااااااااام مرة..؟؟
انا اتلخبطت لدرجة اني كنت ها اسالك سؤال جوهري ومهم وموضوعي في نفس ذات الوقت..
إيه هيا العلاقة بين كلاً من:
كسر النحس
خطف العيال
و صلاح جاهين

:)

ايه يا روح قلبى فين الملل ده بقى

كده تبطر على النعمه يا ام يوسف

هيصتى وروقتى اومال اللى مرزوع 24 ساعه

فى البيت ومفيش اى حاجه يعملها

ازيك يا روح قلبى

يارب تكونى بخير

كل سنه وانتى طيبه يارب

ان شاء الله السنه دى تكون اجمل من

العمر اللى عدى وربنا يحققلك كل اللى

فى بالك

انى احبك فى الله

وحشانى جدا يا فاتيما مووت طبعا

ومبسوطة بالجو اللى انتى عملاه حلو جدا كلنا جوانا الطفل اللى بيحب يجرى ويتنطط ويتفرج على مسرح العرايس

ديما بحس إن جواكى الطفلة البريئة ربنا ما يحرمك منها ولا من طيبتها

دمتى بكل الخير والسعادة والحب

عجبتنى اوى الزغلولة الكبيرة الى عملتهيا دى!!!
والاحلى انك انشكحتى بالولد الى قالك يا ماما
والست الى رمقتك بنظرتها كنتى عملى زى اسماعيل يس وقصيتى الريش من البرنيته انا عارفة ان مفيش برانية بس كنتى شعرها على ما اظن لو كنتى عملتى كدة مكنتيش هترجعى من مسرح العرايس!!!
عمتا افصلى شوية عن الحياه ريحى نفسى اسمعى نفسك
فكىىىىىىىى يعنى من الاخر
والملل**بيقولك مساء الفل ع عيونى الدبلى

شكرا يافاتيما على اهتمامك بفكره حملة ابتسم
وده المتوقع منك طبعا
بحبك جدااااااا

انا كمان شوفت صحصح دى
كانت هبلة اوى هههههههههههههه
اصل كان جارنا شغال فى مسرح العرائس و كل جمعة ياخدنى انا و اخويا -باعتبار اننا ايتام بردو - نروح سينما مترو او مسرح العرائس

المهم يعنى
دار الهنا دى فين ؟
و لو حالتهم مش محتاجة زى ما بتقولى .. مش يبقى الافضل نشوف دار تانية محتاجة ؟
عموما ابعتى لى التفاصيل بتاعتها على الايميل و انا هتقس عنها و اعرف الاخبار

انا مش هاحرجك بس هقولك الخيرة فيما اختاره الله و الحمدلله انك لسه فى الاول

خدى بالك من نفسك
مووووووووووه

انا ايضا احب سعاد حسني وخاصة عندما تغني لصلاح جاهين خاصة أغنيات فيلم شفيقة ومتولي
مسرح العرائس يعجبني لكني لم أحضر ابدا في عرض له
الستات المفترية دي انا كمان أكرهها انا لن احتمل ان أعيش مع رجل انا اتحكم فيه لن أحس بالرضا ابدا
ربنا يرجع لك يوسف وتفرحي بيه في القريب ان شاء الله
تحياتي لك

انا راح منى كمان حاجة كبيرة
أكبر من إنى اجيبلها سيرة


------------------


سوري فاتيما مفيش تعليق


يظهر إن حالة الاكتاب انتقلت لي بالعدوى

وليد

حتة فسحة جميلة ومش مكلفة وكمان مسلية

وشفتي فيها مسرح العرائس فوق المسرح ومسرح العرائس تحت المسرح ( ممثلا في أطفال الميتم والست اللي خايفه على جوزها يتلهف في خمس دقائق و أكيد حيتلهف قريب من عمايلها ) ... أنا زيك بحب صلاح جاهين قوي وبحب كلامه و من كام أسبوع كانت بنت أختي عندي وقلت حتشجعني وتشوف معايا الليلة الكبيرة و بعد ما اتفرجنا قالتلي البت ام 3 سنين عندك فلاشة؟ تحطيلي الليلة الكبيرة و أنزلها على كمبيوتر ماما وبابا؟ قلتلها عندي فلاشة يختي ..وفعلا أخدتها ونزلت سعيدة إنها معاها فلاشة عليها داتا قيمة ...كان فيه برنامج على محطة الشرق الأوسط زمان إسمه تسالي كان في التتر المذيعة بتقول كلام من رباعية صلاح جاهين كان بيعجبني قوي :

غمض عينيك وامشى بخفه ودلع الدنيا هى الشابه وانت الجدع تشوف رشاقة خطوتك تعبدك وانت لو بصيت لرجليك تقع .... وعجبى!

يا ترى الفسحة الجاية حتكون لفين؟
ترجعي بالسلامة يارب

ملحوظة صغيرة

طبعا اللي متابع مدونتي حيتسائل مش دي برضه أغاني و أنا لا أستمع إلى الأغاني منذ سنوات ..حاقوله فعلا والأغنية الوحيدة اللي عالهارد ديسك بتاعي هي الليلة الكبيرة علشان إبني الصغير بيحبها قوي بس بدأ يكبر ويبعد عن العرايس ويتجه للأخ عمرو دياب بس الحمدلله باشغلهم دايما عن الأغاني بالألعاب والجيم ووووو

عام هجري سعيد عليكم وعلى الأمة الإسلامية جميعها
عام يحدوه أمل جديد
ونسال الله عز وجل أن يكون عام نصرة للإسلام
تحياتي

السلام عليكم ورحمة الله وبركاته

كل عام وأنت بكل خير يارب

أشكرك من كل قلبي على سؤالك عني جزاك الله كل الخير

اتمنى من الله أن يرفع عنك وعن كل مهموم همه ويرد لك حبيب قلبك ابك ان شاء الله

في انتظارك ان شاء الله

دمتي بكل الخير

حبيبتي ، بجد أنتي سكراية
والله أفكارك حلوة جدا ، ومش لازم نستني حد يكون فاضي علشان يفسحنا
طب ما أنا ممكن أفسحني برده
وبعدين المكان جديد ، واللي عاوز يتفرج يروح

من أول قرايتي للموضوع وأنا طبعا بحاول أجد روابط بين فك النحس وخطف العيال وصلوحة
.. أفكارك أنتي فتومتي

مش تغيبي علينا بأه

طيب تصدقي و تؤمني بالله إنك فسّحتيني بالبوست بتاعك ده
يا لهوووووووي
ده أنا كنت راجع من الشغل نفسيتي ضاد جيم و ماليش نفس لأي حاجة في أي بتاع
يا نهار مش فايت
طمطم
أنا عمّال أضحك و أنا بأكتب هاذوها التعليق و مش عارف ليه بأضحك بعنين مدّمعة .. دَمعة من اللي هي الحلوة دي
يعمر بيتك يا أبو الفطاطيم
قال تهييس قال
روحي يا شيخة كده


يلا سلام

فطومه...وحشتينى اوى
ياحبيبة قلبى على عينى احس انك كنتى فى لحظه من اللحظات متضايقه كده
مبحبش احس انك متضايقه
بس جدعه والله انك بتعرفى تخرجة نفسك من الحو الوحش ده ...وهى دى القوة بحد
انا مروحتش مسرح عرائس من زماااااان بس والله حلفت ماروحه الا معاكى وفى اول مرة اشوفك بعد ماخلص هعزمك عليه
اتفقنا
انا بحبك يافطومه وحاسه بيكى اوى وبقلبك وده مش كلام شفقه ولا حنيه زايده ده حب والله بالعكس انا دايما بقول عليكى قويه اوى
انا محتاجه بجد اشوفك ...كل اللى وصفتيه انهارده حصلى بالظبط مع اختلاف المكان ...انا حاسه انك قريبه اوى منى
يوسف اخباره ايه؟؟؟؟
ممكت بعد اذنك تطمنينى ارجوكى
انا قربت اخلص وافضالك ياجميل وبينا كلام كتييييييير يافطومه
انا اول مالقيت فرصه جريت عليكى قصدى على مدونتك
واعذرينى على غيابى هانت فات الكتير
لا اله الا الله

المهم
انك انبسطى

ياريتنى اعرف اتحرك كدة
مش بقر والله
بكره نطيرمع العصفور
دعواتك

بخصوص الدار بقا
دى جمب بيتى
هى جميلة وهادية
بس هما اشقيا مش هادين
:)

هتنورونا لو جيتو يا طمطم

وحشتينى

اهلا استاذة فاتيما
كالعادة البوست عندك مهما يكن طويل فهو يكون مشوقا ولا يستطيع من يقرأه أن يتركه حتى يصل للنهاية
صحيح انت روحتى وجيتى فى البوست واولا الف سلامة عليكى من أى تهييس أو توابعه من الشعور بالملل والزهق والأكتئاب
لكن انت اتكلمتى عن امنية غالية عندى من زمان نفسى احققها بس عاجز عن اتخاذ القرار
وهى ليلة فى مسرح العرائس
دائما مبدعة فاتيما
كل تحية وتقدير

وحشتينى قوى على فكرة
ووحشتنى طلتك فى مدونتى وكلامك الجميل قوووووووووى زيك

اقفش صباحه تهيس انا كمان بحب مسرح العرايس موت امي كانت بتصر انها توديني هناك ممممممممممممممممم تحكمات يااوختي بس مكنتش بستمتع
اصل انا مبحبش افضل قاعده اتفرج علي حاجه كده بحب التنطيط بلاقي نفسي في الملاهي مممممم ماتيجي نروح
المهم انا حبيته وانا شاحطه هافف عليه والله
وايه تاني ياميودة
اها انت وحشناني خالث مالث اللي هي بالجامد دي وكل سنه وانت طيبه والسنه الجايه الراجل بتاعي يبقي في حضنك ايوه يوسفه ممممممم هنخم بقي

وبمناسبه ان الواحد بيفسح نفسه طيب والله اجدع فسحه اللي مع نفسك دي السنه
دي اول مره اجربها ملقتش حد يروح معايا معرض الكتاب قلت عليه النعمه لروح لوحدي ممممم بس كان يوم هايل واتنطط يومها تنطيط في الجون يعني
ومره تانيه كنت في الجامعه رحت اسكندريه في قطر 9 عيط هناك شويه ورجعت في قطر 2 مممممممم مع نفسيتي برضه اطق اموت يعني

ولاتزعل ولاتحزن اضحك برضه ياويكا
ممممم كل سنه وانت طيبه ياتمتومه ياتمتم ياتمتمايه
اموووووواه

بوست غايه في الروعة

تقبلي مروري

انا قولت اسأل اطمن اشوف فاتيما فين وابوسها كمان بوستين وساعتها هنضحك وناكل مصاصتين :)

ايه رائيك لما اجي القاهرة ان شاء الله اجي معاكي مسرح العرائس او نروح سوا اي عرض في الاوبرا؟

يارب تكوني بخير وترجعي بسرعه مفتقده سؤالك عني :(
بوسه كبيرة وحضونه كبيرة وبوز شبرين وربع لحد ماترجعي :(

ههههههههههههههههههههههههههههههه
انا عاجبتنى اوى الحتة بتاعة الست اللبط اللى بصتلك وكلام عنيها قاللك ارجع الاقى جوزى مطرحه


ههههههههههههههههههههههههههههههههه

ياااااااااااااااه
نفسى جدا واحدة توجهلى بعنيها هذا الانذار

كنت رديت عليها بعنيا برضه وقلتلها

تييييييت تيييييت تربتاالتيييييييت



ماعلينا

انتى عاملة ايه؟


وحشتيني يا طمطومة

سلام
اختك خيخة

حلوة اوى الحالة دى
جربتها كتير وبحاول لما تكون حاجه وجعانى اوى انساها او اعمل نسياها فطوم مش كنتى اخدتينى انا وعمر نتفرج معاكى
معلش المرة الجايه نروح انا وانتى ويوسف وعمر باذن الله
فطوم وحشتينى بوسة منى ومن عمر

مساء الفل



ربنا يسعد أوقاتك ويروق بالك ويطمن قلبك . آمين

سلام

انتي جميلة اوي بجد.. خليتيني ابتسم من وسط دموعي.. انا يمكن معرفكيش ولا حتى دورت على المدونة بتاعتك..انا حتى كنت بدور على صور في جوجل و لقيت اللينك ده..
بس بجد كتاباتك جميلة اوي و شدتني من اول سطر قريته فيها.. :)

إرسال تعليق