.

.

انا ف الخليعة  

Posted by: فاتيما in


بأقلامهم أو أدق بكيبورداتهم

تقرير لقاء القاهرة .. بإختصار شديد ..... صبرنى يا رب

على الزراعية فى الزراعيين .... شمس النهار

لقاء المدونين فى نادى الزراعيين .... شاب فقرى

أجمل لقاء للمدونين فى نادى الزراعيين .... ghada mohsenبستان افكارى

جو دافى ....... وليد هى و ظروفها

لقاء السعادة ...غير سعيد ...وليد KING TOOOT

خيخة ............بطوط حبوب

رسائل عشوائية للمدونين ... ستيتة حسب الله الحمش

عن لقاء البتاعة اتحدث ........ بت خيخة و اى كلام

سماد عضوى ..... SHAPE YOUR LIFE - ABOALI

الناس الطيبين ... Eng.SAYAD A.MONEMSAYAD,PMP:

هااااااااام و عااااااااااااااجل ...... Bascouta

لقاء اختلف الكل عليه ...reem رسائل بلا بريد

كلام لازم يتقال(عن اللقاء اتحدث)... شيماء الشعب لابد له من حكومة تشكمه

لقاء و لا أروع ..... رومنسى

لحظة من فضلكوا يا جماعة ... أحمد سعيد عنبر العقلاء

لقاء القاهرة ... o0O Voice Of Mine O0o

خيخة و عضة الكلب ..... شمس النهار

برج الحظ  

Posted by: فاتيما in ,




الاول

العواف عليكم


و ايوه ... هنلعب ابراج


اومال بسألكو عن تاريخ ميلادكم ليه ؟
و لا فاكرين فيها هدايا و جوايز ..
لاااااااا


لست انا هذوها السخص
أنتوا مخمومين فيا


اللى مش عاوز يلعبها معايا ... هوه حر
و اللى عاوز يكمل ... يخليه معايا لآخر البوست
قهراً بقى و محض افتراء


آه .. حاجة كمان
السيدة فى ضهركو
ما حد ييجى يقولى
ان الكتابة و الأعتقاد فى الحاجات دى حرام و مكفرة و كدا
عشان انا بقول من الاول أهو
إنها لعبة و تسالى
ماشى ؟


ومعلش البوست طويل وانا رغاية
ف محدش يقول ايه
و يا ساتر
و متقولى من الاول و احنا نقولك ابراجنا


اومال اقرركم أزاى و تبقى مفاجعة ؟؟!!


وبلاش البصة دى

عشان الفلكة ورا عداد المدونة أهى
و انا بقول يا شر
أشتر


استبينا ؟


نبتدى


طييييييييب


زمااااان و انا ف اولى اعدادى
يعنى من ييجى حوالى ربع قرن كدا

آه منا ست كبيرة
و اقعدوا ساكتين خااااااالص مسمعش حس
لأنه ... تواريخ ميلادكو عندى
و مفيش معايا ع الخط
غير اتنين تلاتة فوق السن
و الباقى كله طلع
من دور عيالى و احفادى كمان


كل شىء أنكشفن
و بان


المهم


كنت قاعدة فى ليلة من ذات الليالى عادى
جنب بابا الله يرحمه .... على ترابيزة السفرة


مكنش لسه الله يرحمه ساعتها طبعا
و بلاش خفافة
متضيقوش خلقى
لأن دا موقف تاريخى من عمر الزمن لا يتكرر كثيرا
لو تعلمون
انه اقعد مع بابا ف هدوء و عادى كدا


ليييه ... مش دى المهم دلوقتى
المهم إن بابا
كان بيشتغل صحفى


عارفين المعلومة دى
وزهقتينا منها


هقولكم معلش اقولها للى مش عارف برضو
و دى ليها سبب فى الحوار كله


و مش كل شوية
هتقاطعونى بقى
يا ختشى!!


المهم انا خلصت الواجب
وهوه الله يرحمه كان بيشتغل فى ماكيت المجلة
بتاعة الشركة اللى كان شغال فيها
عمال يقص و يلزق و يرتب المواضيع فى الصفحات
قوم انا بفضول رهيب ... أرخم عليه واقعد اتفرج


لقيته بيرتب الأبراج
و بيسألنى ببراءة متناهية
عاوزة برج التور يبقى حظه إيه؟؟


طبعا انا تنحت ف الاول شوية
و كعادة كل المراهقين (أياميها مش الأيام دى )
كنت واخدة كل حاجة ف الكون بمثالية
شجبت و نددت و رسمت مية و حداشر على جبينى
مستنكرة إن الموضوع يبقى كوسة و بتنجان


و اذا بى ادخل فى نقاش هادىء مع بابا
مبيحصلش كتير ف التاريخ الموضوع دا على فكرة
على اثره
أفوجأ سعادتكم بشوية حكائك عجيبة


اهمها ان 99% الجرايد و المجلات بتحط باب حظك اليوم
بالبركة و الهجايص
و فئة نادرة لا ترى بالعين المجردة اللى بيقرروا يدفعوا فلوس
و يعينوا حد متخصص هوه اللى يكتبها


و ان الفكرة الأساسية من وجودها فى أى صفحة جرنال
هى ملى فراغ فى الصفحات الفاضية و التسلية مش اكتر
و ان سبب تواجدها برغم عدم مصداقيتها

أن أى واحد لما يقرى حظه ع الصبح ..
ينبسط و يتفاءل .... دا لو بيصدق شوية ف الأبراج
و يضحك و يتريقأ .. لو مبيصدقش فيها خالص


نظرتى ساعتها اتغيرت كلية
لأنى كنت فاكرة الحكاية بتنكتب بجد
زى ما كنت فاكرة كل حاجة فى الدنيا بتتاخد جد
ومن يوميها بقيت اقرى حظك اليوم فى اى مطبوعة
و انا متوجسة خيفة


بعدين لما طلعت ثانوى و جامعة
قلبت معايا بهزارع الآخر
يعنى ابقى قاعدة وسط زمايلى فى الكلية
وواحد فيهم مثلا مضايقنى بحركة غلاسة
اروح ماسكة الجرنال و قرياله
برج الثور : اللهم احمنى من اصدقائى اما اعدائى فأنا كفيل بهم
و أبصله و يبصلى ... وتقلب معانا بضحك


الهزار دا اتنقل معايا بعد ما تخرجت واشتغلت
لما يصدف برضوو حد من الزملاء يكون معاه جريدة او مجلة
بتبقى القراية برضو على نفس المنوال
و فيها صدف لطيفة احياناً و تأليفات من عندى احياناً


بس عمرى ما كنت بقتنع ان أى حد و لو متخصص
ممكن يقولك عمرك اللى جاى فيه إيه
مهما كان شاطر و ربنا مديله فراسة

ما زلت عند قناعتى دى
لكن مع التقدم فى العمر
بقيت اشوف القصة بشكل مختلف شوية
اكثر تفتحاَ و هدوء

يعنى ما المانع إن الواحد يكون منفتح على أى شىء و كل شىء
و ايه يعنى لما يكون فكرة ان حكاية الكواكب و تأثيرها
على حياة البنى آدم دىرغم غرابتها .. تبقى ممكنة

ليه مصدقش ان الطبيعة ممكن تأثر على البنى آدم بشكل او بآخر
دا درجة الحراة عالية او منخفضة حتى بتغير للواحد مزاجه
يبقى حركة الكون و الكواكب مش هتغيرله حياته
و ما كلها مخلوقات الله و بتأتمر بامره
يبقى مبعدناش كتير

و ما دام كل شىء بأمر الله .. فليه كمان الكلام
و الأعتناق فى الفلك و الأبراج
ميكونش بامره ؟


متنكروش ان فيه ناس عندهم فراسة
و حاسة سادسة و تبصر ..
يقروا فنجان او خطوط الكفوف او يراقبوا النجوم و الكواكب
انا قابلت منهم ناس ف الواقع فعلا عندها موهبة بجد
و متهيألى كلنا شوفنا او سمعنا حكايات كتير كدا


و أى كان الوسيلة و الطريقة و الفكرة و الشخص
ايه المانع انى اسمع
و اخد اللى يعجبنى


و ايه المانع انى لما اشرب قهوة اقلب فنجانى
و اتفرج ع الأشكال اللى فيه
و اشغل خيالى و لو على سبيل الهزار و التفاؤل؟!


انا مؤمنة بقدرة ربنا و الموهبة اللى أداها لبعض عباده


واصدمكم بقى فيا و اقولكم
انى مؤمنة بوجود المخلوقات الفضائية
و مش هرش نافوخ من كتر الفرجة على افلام السيما
اصله ... ليه لأ ؟؟
مش مستبعد يكون فيه مخلوقات غيرنا ف ملكوت الله
هوه احنا كنا جبنا آخر الدنيا لما هنجيب آخر الكون و نتأكد ؟!!


ما نعلمه من المعرفة قليل
و ما دام كل شىء فى علم الله و لم يصلنا منه غير القليل
فليه كمان ميكونش الفلك و الأبراج جزء من هذا العلم
الذى لا نعرفه و الله اعلم


انا ما زلت
لا اؤمن بواحد يقولى
متخرجيش النهاردة من بيتك
او احذرى يوم الخميس الجاى من المقربين
عشان دا عبط حيثيى


لكن اقتنع جدااا إن ابناء البرج الواحد لهم صفات مشتركة تجمعهم
فيما عدا الإستثناءات
دا واقع بشوفه حواليا ... لما بركز فيه


يعنى مثلاً
بلاقى اغلب ابناء برجى اللى هوه الثورعنيدين و دماغهم حجر
اغلب برج العقرب اذكياء و لدغتهم و القبر
اغلب الحوت عاطفيين لكن مخهم تجارى
و اغلب القوس كرماء
اغلب الأسد قوى و واثق ف روحه لدرجة الغرور
و اغلب الميزان اجتماعى جدا وبتاع مصلحته


حتى الستات و الرجالة فى كل برج
ليه طبع معين
و ساعات كنت اقعد اتسلى بالفرجة على اللى اعرفهم
واقارن مواصفاتهم الشخصية و طباعهم قياساً بأبراجهم
و اقعد اقول .. دا مش دلو خالص
و لا دى سرطان البتة
و فيه ناس لايق عليهم برجهم جداااا
و بيتعرفوا لوحدهم من غير مجهود كبير


الملخص انى النهاردة هلعب معاكم لعبة
كنت بلعبها لوحدى ف كل شهر يناير يعدى عليا


بقعد اتتبع التنبؤات بتاعة السنة الجديدة
للأبراج و اولهم برجى طبعا
و اشوف السنة دى هيبقى لونها إيه
و على آخر السنة اشوف حصل إيه
و ايه محصلشى


منكرشى انى ساعات بقرى حاجات
و اتمناها تحصل بجد
و اقرى حاجات تانية و اقول الحمدلله
ان المنجمون كاذبين مهما صدقوا


اللعبة مش وحشة
و مسلية
و ممكن تندهشلها جدا و من الصدف اللى فيها


يعنى من سنتين
الست ماجى فرح
تنبأتلى انى فى شهر سبتمبر2008 هتجوز !!
قوم روحت حكيت لماما من باب الفكاهة
و الحاجة أستبشرت خير
انها هتتخلص منى فى ظروف غير غامضة


و عدى سبتمبر 2008
أحم

و سبتمبر 2009
أحم احم

و متجوزتش انا


و الغريبة ان حظى السنة دى
فى توقعات برج التور 2010 بيقولى هتتجوزى برضو
و مش عارفة هيا متوصية من امى و لا إيه!!

و ماجى ناويها الليلة يعنى ناويها



اللى استعجبتله فعلا لما توقعات برج العقرب
انه على نهاية 2008 هيسيب شغله
و يقضى فترة متعسرة مالياً


و دا اللى و انا بقوله لماجد اخويا فى اول يناير هزار
اتحقق فعلا و فى آخر ديسمبر ... و مش هزار


من غير مقدمات منطقية
الواد ساب الشغل بعد الازمة الأقتصادية
و قعد سنة ف البيت تقريباً


العالم بتوع الفلك
قالولى من نص 2008 هتدخلى مجال جديد
و تكونى منه مكاسب و صداقات لا تتخيلها
و قد كان ... لما ابتديت انخرط ف التدوين بذمة
و احضر لقاءات و ادوام على ذلك لا شعوريا
طبعا دايرة معارفى اتسعت و خرجت للحياة تانى بعد انزواء


يعنى مصادفات لطيفة
و متخسرشى



وبما اننا دخلنا فى 2010 خلاص
يبقى لازم تعرفوا معايا السنة دى مخبيلكم إيه


برج الحمل
--------
السنة دى هتتخضوا جامد من كام حركة مش لطيشفة و هتتحملوا
مسئوليات جسام
و هتاخدوا بالكم من اشخاص هيتعلقوا فى رقبتكم
فشدوا حيلكم



مشاهير هذا البرج
وليد هى وظروفها - mano -ليس فقيرا من يحب - amr...
- مى -
حلم كان - بنت القمر - يا مراكبى - بطوط حبوب - موناليزا
- نـــور - ana keda - مصطفى ريان - غادة محسن


برج الثور
-------
السنة دى كلها نجاحات و برجى اكتر الأبراج حظاً و تفوقاً
يلا .. سنة من نفسى مش كل سنة ضرب ضرب عاوزين شتيمة

همضى عقد مربح فى مايو ... لأ و هتجوز كمان حد ولا ع البال!!

مشاهير هذا البرج
داليا قوس قزح - فاوست - reem - سوما - تغريد صديقتى العزيزة
أحمد talk

برج الجوزاء
----------
سنة تحولات جذرية و تقلبات و خلوا بالكو قوى من نفسكم .. اللى وحيد
هيفضل خلى القلب
و اللى مرتبط هينصدم عاتشيفياً شوية

مشاهير هذا البرج
مها زين - Bobo - المعتصم - nigro - كاميليا - صيدلانية طالعة نازلة
- يا سمين فنانة مفروسة جدا عبير صديقتى العزيزة - اخويا الكبير
- im the crazy one


برج السرطان
----------
السنة دى قدامك سكة سفر مهمة و هتغير حياتك و هيحصلك تغييرات
على كافة الأصعدة
عاطفيا و اسريا و اجتماعيا
و هتلاقى الحب ف سكتك لو مش متجوز


مشاهير هذا البرج
خالد همس الاحباب - Doba- شيماء على قهوة بالفانيليا - A.SAMIER
مسدس صغير - حفصة الناس و العالم - الباشمهندس إسكندرية


برج الأسد
-------------
برج يسوفة يا بشر سنة يحصل فيها تطورات كتير تتخلص فيها من اثار الماضى
(يا رب ) و هتعيش مغامرات عاطفية و هتلاقى الحب لو كنت وحيد


مشاهير هذا البرج
يوسف روح قلب ماما - رنا بنت قلبى - محمد الغرباوى - لماضة - سوووو
شاب شنكوتى - ميادة أيامنا الحلوة - أميرة على كوكب مهجور - مهندس مصرى
خايف من الحقيقة - أحمد سكر - شريف PACHA - سبايدرمان - d.chandra
أحمد - k


برج العذراء
---------
السنة دى هتنتهى مع بدايتها كل متاعب السنة اللى فاتت
و على صعيد العلاقات الشخصية

هتعيش فى سلام مع اللى كانوا تاعبينك و لو عندك اولاد
خلى بالك لأن هتعانى من مشكلة متعلقة
بحد فيهم على اول الربيع و لحد الصيف

مشاهير هذا البرج
بسمة bosbos - وليد كنج توت - رحيل محاولات للبحث عنى - داليا ماى كورنر
مايكليتووو - إنجى هات من الآخر - أحمد عبدالعدل - احمد الصباغ - wanda
سالى حاجات جوايا - حفيدة عرابى


برج الميزان
-----------
سنة كلها قلق لازم تاخدوا بالكم معرفش ازاى
بس القرارات بتاعتها هتأثر على السنين الجاية و الصيف كله لخابيط
اللى كان بيحب و مطلشى .. هينسف حمامه القديم و يحب تانى

مشاهير هذا البرج
كيكى عوووو - سنوهى - محمد هاى فولتا - نبضات - Joudy- شيماء جمال - كيارا
ابراهيم العدوى - هانى مصرى جدا - ... I wish i were a butterfly
أحمد سعيد - بنت من بنات حواء


برج العقرب
-----------
السنة دى فلوسه كتير و سفرياته كمان وعاطفياً مشاعره هتفيض
و يعيش قصص عاصفة خصوصا انثى برج العقرب اللى هتتلقى اكتر من عرض جواز
و على آخر السنة العقرب هياخد قرار سريع يا جواز يا فراق

مشاهير هذا البرج
ميرا الاميرة ست البنات - مى - واحدة مفروسة - شاهى مفيش حاجة - ماجد اخويا
خواطر خاطر سامح عزت - محمد عبدالرحمن شحاتة - دعاء مواجهات
أم بتـول - شمس الدين



برج القوس
----------
سنة فيها انفراجات على المستوى العائلى لكن على مستوى التعامل مع السلطات
فيه مشاكل
و محاكم و قضايا و كدا و كمان فيه سفر و فلوس جاية
و شفاء من مرض و وظيفة مهمة فى الصيف


مشاهير هذا البرج
دودو عاشقة الرومانسية - غادة عبدالعال عايزة اتجوز - آبى هانم بتنجانى
اسلام مواطن مصرى نايم - asafo anaroze -احمد شقير- shimaa
رنيم مبتسمة دائما - محمد عبدالعاطى جست هيومن - Ahmed Mubarak


برج الجدى
----------
الحظ السنة دى حليفه و لو بيشتغل فى مجال عام هيكسب مؤيدين و شعبيته تكتر
عاطفياً هيتخلص من كل الضغوط اللى كانت خنقاه سابقاً و هيبدأ فترة جديدة
حساسة شوية لكن هتنتهى آخر السنة

مشاهير هذا البرج
ستيتة حسب الله الحمش - بت خيخة واى كلام - عسقول - عمر بيكا ابن وليد و هبة
بدراوى - نسرين بسيونى - لجين ابو الدهب - أبو حميد - طارق الغنام

برج الدلو
---------
سنة مزدحمة جدا و ف اول السنة يا جواز يا طلاق يا عيال
و نتايج السنين السابقة
هتهل بشايرها السنة دى و فرص فى العمل لازم تغتنم
و عاطفياً فيه تقلبات اول اسنة و أواخرها


مشاهير هذا البرج
صبرنى يا رب - حرروف - خواطر شابة - سكرة - ياسمين انسانة - اسامة عبدالعال
شيماء سمير - إيمان بنات افكارى - angel love


برج الحوت
----------
محظوظ السنة دى جدا وهيلاقى مكاسب مالية كويسة للناس اللى شغالة فى التجارة
بس يغتنم الفرص اللى بتجيله و يكون برضو حذر و فيه انتعاشة عاطفية كبيرة
و الحب بيندهله و يقوله انا أهو

مشاهير هذا البرج
الواد عادل ابنى - bascouta بساكيتو - ابويا الله يرحمه - الحاجة ام فاتيما
بنت مصرية - رندا حياتى فى كلمة
- القدر و انا - Heba- بيطرية و مش بإيدى

بس خلاص



لأ مش خلاص ... لسه
بناء على الكلام الكبير اللى انكتب فوق دا
هبتدى معاكوا اللعبة

و احط تنبؤاتى الخاصة بيا و بكل اللى بحبهم


عمرو هينطحن ف شغله و هيخطب على نص السنة كدا
المراكبى هيعزمنا على حفل توقيع لكتاب جديد
البت سوما هتنخطب و تتجوز و تسافرمع جوزها
داليا قوس قزح هيجيلها فلوس كتير هيا و احمد جوزها وتشوفنى بحاجة
نيجرو لسه مش هيلاقى بنت الحلال و هيفضل يا قلبى يا متغرب
تغريد صاحبتى و جوزها هيشتروا شقة جديدة اوسع شوية
احمد سمير هيسافر برا مصر مع مراته
صاصا مسدس صغير هيخطب

يوسف هيرجعلى
اميرة على كوكب مهجور قلبها هيدق باللى يستاهلها
وليد و هبة هيعملوا عملية اللحمية لعمر فى الصيف و يبقى زى الفل
وندا هيبطلوا الناس اللى بيضيقوها عموماً .. يضيقوها
نبضات نبوضتى هتلاقى حب حياتها
هانى هينط ف الكوز و يتجوز

ميرا هتلبس الطرحة على آخر السنة كدا
و كنت هقول ماجد اخويا هيشتغل .. بس هوه فعلا اشتغل
دودو عروسة البحور هتشتغل فى مكان تانى احسن و انسب
سكرة روخرا هتتخش بيت العدل
شيماء سمير هينكتب كتابها و تنشر ديوانها التانى
و انسانة هتحمل وهتخلف ولد
آبى هتسافر مع جوزها فين معرفش
ستوتة هتخلص المطلوب منها بخصوص مهامها الوظيفية بنجاح
وعسقول هيجيله شغل برا مصر
البت خيخة هتمر بقصة حب تطلع فيها روحنا
و روحها و روح اللى بتحبه
و ع السنة الجاية ..هيتجوزوا
الواد عادل هيمضى اول عقد لفيلم سينما
بسكوتة هتلبس دبلة خطوبة
اما أنا بقى .. فزى كل سنة ماجى تقول هتجوز و متجوزشى
و زى ما بتقول غدغود حبيبتى غادة عبدالعال
طلعت فوق السطوح و هز الهوا كمى
كل البنات اتجوزت و انا قاعدة عند امى


انا حطيت توقعات حلوة اهو
كلها جوزات
و شغلانات و خطوبات
و ترقيات و سفريات


أياك حد فيكم يا غجر
ييجى يقولى بعدين ... وشك كان
وحش علينا و لا حاجة
و توقعاتك بتخض عشان دى مش بتاعتى
دى بتاعت الست ماجى

وصحيح هاخد الموضوع
بروح رياضية


بس كمان الفلكة موجودة أهى ى ى ى ى
بتقول يا مين ينضرب بيا


والسنة الجاية فى نفس المعاد
إن شاء الله
ابقوا فكرونى نتلم تانى و نلعبها
وكل سنة وانتوا طيبين




آه قبل ما انسى
شوية ملاحيظ ع الماشى


1
الاخ بلوجاتى عامل شغل حلو قوى عن الأبراج
انا سخصياً لقيته واصفنى جدا
خصوصا (العيوب) و بجد مميز

هنا



2
التوقعات بمزيد من االتفاصيل للأبراج 2010 هتلاقوها
هنا



3
يوم الجيمعة انا عند النادى إن شاء الله من عشرة الصبح
يا ريت متخلونيش اقف كتير لوحدى
عشان انتوا خلاص حفظتوا الجملة الحمضانة بتاعة كل مرة
(الشباب البايظ )
و كمان عاوزة اكتر من حد من الرجالة يكون معانا
عشان العالم اللى جاية من سفر نروحلهم المحطة بتاعة المترو
و نسيب ناس تانية عند النادى و لا هقطع نفسى يحنى


4

فيه ناس اكيد هرشت الحكاية طوالى زى عمرو
و ناس قرت اللى ف عقلى بالمللى زى ستيتة
انى اعمل نتيجة بأعياد الميلاد لكل حد عاوز
يفتكر عيد ميلاد احبابه
اهو التواريخ وعندكم .. وعدوا الجمايل




5

البيانات بتاعتكم اوحتلى
بحاجات كتير عاوزة اكتبها
بس فى بوست تانى منفصل
و عليكم خير



6
الغنوة دى تقريباً انسب حاجة جت ف بالى
و انا ناوية اكتب البوست دا
أسمعوها ف الروقان




7

عادة فى المناسبات اللى زى دى
لما حد يحب يختم الكلام ف الحظ
و التنجيم والأبراج
المفروض عميانى كدا
بيقول الجملة المأثورة اياها

" كذب المنجمون و لو صدقوا "
أو
" لو علمتم الغيب لإخترتم الواقع "

انا بصراحة مليش مزاج اقولهم
و يحضرنى فى الموكف اللى انا فيه دلوقتى قول مأثور تانى بيقول

جيت أعدل البخت ... لبّخت


اتمسوا بالخير


ما يعرف الغيب المجهول
غير ربنا
و الرب معين
و لا يفتح
الباب القفول

إلا إيدين البنى آدمين



حركة تنقلات  

Posted by: فاتيما in ,


- فاطمة ؟
- نعم
- انا عاوزاك كل يوم تيجى متضايقة و زعلانة .. ممكن ؟
إندهاشة و نظرة راسمة ميت علامة تعجب
يعقبها سؤال منطقى

- ليه؟؟
- أصلك لما بتكونى حزينة عيونك بيبقى فيهم لمعة غريبة
وبتبرق زى نجمة
فى قلب العتمة
شكلهم بيكون حلو زيادة عن الأوقات التانية

و ببقى عايز افضل أبصلهم
--------------

اللى فات دا كان فلاش باك
من الزمن الغابر
حاجة نفتتح بيها المناقشة
أصل حلقة اليوم هتكون عن الكلام الحلو
و حيث إن الجمهور بيطالبنى أكون إيجابية
فهكون هكذا ... و احااااول أفتكر الحاجات اللى بتسعدنى
لعلها و عساها تغلوش على اللى بيضايقنى ... ماشى ؟



الكلام هيكون عن احلى كلام الواحد سمعه
و عمره ما بينساه
بس خلوا بالكم ..إنتم مطالبين تشاركونى المحاولة
محاولة التطلع للغد بإيجابية و تفتكروا إنتوا كمان
اجمل كلمات سمعتوها ..و تكتبوها فى التعليقات لو سمحتم
إتفقنا ؟



متهيألى لو سالت أى حد عن اجمل كلام سمعه من الآخرين
تفكير الرجالة هيروح لكلمات التشجيع
و الثناء اللى سمعوها عن تفوقهم فى دراسة
أو عمل او تصرف ما
إما نون النسوة ..فغالبا هيفتكروا كلمات الحب و الحنان
من أى حبيب سواء كان زوج أو أب او اخوات
أو أصدقاء ... أو كمان إبناء




أنا سخصياً بعتبر اجمل كلمة سمعتها ف حياتى
هيا كلمة
ماما
و مش مامى و لا أمى و لا أى مرادف تانى على فكرة
ليه ..... أقولكم
أصل يوسف مكنش بيندهنى غير بماما
زائد إنكم لو فكرتوا
تقروا الكلمة من الشمال لليمين
هتكتشفوا إنها ام مضروبة فى إتنين
ام ام
وبلغة علماء النحو و البلاغة إسمها التوكيد
الكلمة لما تتكرر مرتين تبقى دلالة على أهمية المعنى
و ام ام تبقى بالعكس .... ماما
قوم انا المفروض أعتبرها أحلى كلمة فعلاً
و لا اكون ببالغ ؟





صحيح سمعت كلام حلو كتير ف حياتى
لكن من بداية دخولى الجامعة قعدت مع روحى ف قعدة صفا
و خدت قرار كدا معرفش جبته منين و لا إزاى
بس قررت أصنف كل الكلام اللى بسمعه من أى حد
و أعمل جدول مقسوم عمودين
عامود للكلام الحقيقى و عمود للكلام المزيف
و بناء عليه بقيت لما أسمع أى كلمة خصوصاً الحلوة
احاول احطها ف المكان اللى يناسبها من وجهة نظرى
وحسب ما انا حسيتها




طبعا الأمر مكنش بيسلم من غلوشة بعض المؤثرات الخارجية
زى قرب الشخص اللى قالها منى أو بعده
و الطريقة اللى بتتقال بيها و التصرف المصاحب ليها
لكن فى كل الاحوال كان موقع الكلمة بيتغير تبعاً لما يستجد




يعنى مثلاً ... واحد زميلى فى الجامعة
يقعد يتكلم معايا
إنتى زى أختى و بحترمك جداااا و بخاف عليكى
احط الكلمة طوالى ف خانة الحقيقة
أقابل اخته بعد مدة فى مناسبة ما فتقولى اخويا بينصحنى
لما اخلص ثانوى و أدخل الجامعة مقعدش مع شباب خالص
و تكون شلتى كلها بنات و يا ريت يكونوا مختمرات كمان
بعد الصدمة لثوانى .. فورا أفتكر كلمته
و أنقلها من مكانها القديم ... لخانة الزيف و الكدب



الحكاية ممكن على فكرة تبقى بالعكس و إن كان حالات نادرة
إنى أسمع كلمة وحشة و إكتشف بعديييين
إنها كانت حقيقية و معايا مش ضدى
و غالبا الاهل بيحتكروا الخانة دى لمدة طويلة من العمر
من اول المراهقة لحد ما شوية شوية الواحد يكبر
و يشوف حاجات ف الدنيا تخليه يكتشف ان الكلام دا كان الحقيقة
مشكلة حياتى الأزلية و معتقدش هغيرها بسهولة
إنى أى حاجة بسمعها بفترض صحتها
إلى أن يثبت العكس




و صحيح بحاول احمى نفسى بالبعد قدر الإمكان عن الناس
و كتير قوى أتجنب التداخل فى حياة الآخرين بشدة
عشان منصدمش فيهم و ينصدموا فيا
لأنى عارفة و متاكدة ... إن مش كل واحد بيقول كلمة
بيكون حقيقى قاصداها أو قدها فعلاً
و بتعذب قوى من فكرة إن حد يقولى كلمة حلوة
من باب المجاملة أو التأدب أو لأنه مش عاوز يجرحنى و بس
بينما من جواه .. أنا شخص عادى بالنسباله بيمر عليه مرور الكرام
و هوه عندى .. كلمته قادرة تودى قلبى لأخر الدنيا
و تجيبه ف ثوانى



اللى فطسنى من الضوحك بقى إنى فى قعدة صفا برضو
تأملت القايمة بتاعتى دى ... و ركزت ف الخانتين إياهم
إكتشفت مهازل يشيب لها الجنين فى بطن امه




يعنى أول مهزلة
إكتشفت إنى عمرى ما إتقالى كلمة بحبك من أى راجل
و متنقلتش بعد كدا من مكانها ف الآخر !!
اما اللى بينطقها
يا اما كان بيقولها تأدباً و هوه مش حاسسها
و إما كان بيستخدمها كطعم لهدف مستقبلى و رسم و تكتيك
ومنكرش إنى سمعت كلمات إعجاب من آخرين
لكن الكلمة دايما كانت توقف ف زورهم و متطلعش
عشان الظروف و عشان بيخافوا منى و كمان عشان ميتحملوش
مسئوليتها و بالتالى تدفعهم للأرتباط بيا
و دى طبعا كانت كارثة قومية
تفاداها الجميع بلا إستثناء بالباءات التلات
بحنكة
و ببراعة
و ببركة دعا الوالدين





امثلة تانية كتير بقى على هذا المنوال
على مستوى الصداقة و الزمالة و العيلة و الشغل
و يووووووه ...هقول إيه و لا إيه ؟؟




فبعد نظرة متفحصة على القايمة اللى داخلة
على ييجى 20 سنة أهو
خدت قرار تاريخى لا رجعة فيه
إنى اقطعها و أرميها و أمسحها خالص
و مفكرش فيها تانى
لأن تأثيرها سلبى جدا و مش إيجابى
و جنب الكلام الحلو و اللى متنفذش ...فيه برضو كلام كويس
و حقيقى و إن كان قليل و مش كتير
بس دا حال الدنيا
و قليل جنب قليل يبقى كتير و بلاش إفترا عشان
الطمع يقل ما جمع




هلغى القايمة دى نهائياً لأنها تبدو فى غاية القسوة
عليا و على اللى حواليا كمان
عليا لأنها بتسببلى أحباط كل ما الاقى عمود الزيف طويييييييييل
و عمود الحقيقة قصير و يتيم
و على غيرى لأنى إكتشف إن مش كل الناس الى حواليا
بتبالغ ف الكلام ... بغرض الخداع أو الكدب
فيهم قليل الخبرة و اللى مش عارف عن غشومية ينقى كلامه
و منهم اللى متسربع و اللى مش فاهم حقيقة مشاعره و اللى مخدوع فيا
و مش لازم كل كلمة هقف عندها بقى و احطها محل إختبار
لأنى أنا شخصياً ... بقول كلام ساعات و إكتشف قدام
إنى أقل منه أو إنى أذيت صاحبه
و مكنتش اتمنى أعمل كدا



طب زى ما بعذر نفسى .. لازم لأتمس الأعذار لغيرى
و الدنيا مش مستاهلة جداول و عواميد
و حركة تنقلات طول الوقت
و عمر الواحد مبقاش فيه كتير للفذلكات دى


و صحيح عبدالرحمن الشرقاوى بيقول
الكلمة نور
و بعض الكلمات قبور
دا واقع فعلى ومش مجرد كلام منثور
ساعات البنى آدم روحه تكون معلقة على كلمة
و سعادته متمثلة فى كلمة
و براءاته من الظلم تكون محبوسة على كلمة
لكن رغم ذلك مش دايما الكلمة بتبقى سيف على الرقبة
هيدبح صاحبها أو اللى قصاده
الكلمة ليها جانب تانى غير الأذى
و السحراللى ف الكلمة
تعويذته لو إتنطقت .. زى ما بتموت
زى ما ممكن كمان تحيى
يعنى اوقات كتير بيكون طوق نجاة من غير قصد



و الكلمة الطيبة ... صدقة
و احيانا كلمة بسيطة يمتد أثرها طول العمر و تكبر و تزيد
و تطرح بساتين فرحة ف قلب اللى سمعها
و ساعات كمان اللى قالها



و الحوار اللى بدأت بيه البوست مجرد نموذج بسيط
لكلمات إنقالت من غير أى غرض و لا قصد
من حد جواه مشاعر و مش قادر يقول لحبيبه
و بيكتفى ببضع كلمات توصل إحساسه من غير ما يقول
الأربع حروف بتوع كلمة ب ح ب ك
و صحيح صاحب الحدوتة راح و راحت أيامه
لكن الكلمة فضلت تنور ف قلبى كل ما أفتكرها
لأنها كانت حقيقة و مش زيف



فيا كل من أحببت
و تبخل على حبيبك بنعمة الكلام
متترددش و تقول الكلمة لوحدها ملهاش معنى و لا قيمة
لأنه مش صح




الكلمة ليها قيمتها ما دامت صادقة
و مش بتتقال كدب و خداع
وبقولك إنطق
إتكلم
قول


و إذا كانت الست إليسا عاوزة تطفى نور القمر عشان حبيبها
يبطل خجل و يقولها ... بحبك
ف انا معنديش مانع اطفى نور الشمس
عشان اسمع كلمة ... ماما و بحبك

---------------------------

كم مرة جاشت بى الكلمة
و بدت لعينى
و هيا تستأنى

فوق الشفاة رقيقة تحنى
جيداً و تستدنى
خدين مضمومين فى بسمة
و تكاد تغلبنى على قصدى
لأقول ما أعنى
و أفك طلسمى
و أجمع من حلقى الشباك
لتفلت الكلمة
و أعود أذكر مرة سلفت
عامين من بأسائها أغترفت
روحى الكتوم لأنها إعترفت
و سقطت تحت سنابك الكلمة
...............
ما اجمل الكلمة
ها قد نسيت حياتك الأولى
و الجرح و الذلة
ها قد جمعت الحرف جنب الحرف
و الحرفين
فلمعت بشى دافىء مقله
و تمدد الأعياء فى الشفتين
و غدا جسوراً كان مغلولا
و سقطت تحت سنابك الكلمة
صلاح عبد الصبور


طــلقـنى شــكـــراً  

Posted by: فاتيما in




 

يعنى
 راجعة م الشغل فى امان الله
بعد حركتين بايخيين حصلولى 
وقولت ماشى
عادى ماهو كل شغل و فيه سخافاته
و متركزيش يا بنتى


داخلة البيت 
و بقول للحاجة أم فاتيما سلامو عليكو
زى كل يوم
راحت بصالى و ساكتة .. و مردتش
مالك يا حاجة ؟؟
فترة صمت قصيرة يتبعها الجملة دى
أصل جالك جواب م المحكمة

طرااااااااااخ

و طراخ دا يبقى صوت قلبى اللى ساب مطرحه
على أثر دربكة
و مخمضة و بلاوى زرقة متتعدش
خبطته و هبدته بعد سماع الخبر
خلته ينزل لتحت ... إلى ما بعد القولون بشوية
 
و يستقر ... مع حالة تتنيح مفاجئة إنتابتنى
يعقبها ميت فكرة ف دماغى راحت و جت



الله ؟!!!

مش كنا خلصنا م المحاكم و قرفها و وجع القلب ؟!
أوعى تكون قضية جديدة مرفوعة عليا !!
يا دى النيلة

هو صحيح دايما اعمل فيها جدعة
و اقول مفيش مشاكل خلاص و إنى بقيت وش محاكم

بس بينى و بينكم ... الموقف جلل جلل يعنى
دنا بقالى سنين ماشية جوا الحيطة
مش جنبها حتى
هيترفع عليا قضايا تانى ليييييه؟؟

خيييييير اللهم أجعله خير
قلبى مرفرف بس زى فار مذعور .. مش طير



بعد فترة صمت و ذهول لدقيقة سالت الحاجة
هوه فين يا ماما الجواب دا ؟؟

الست بصتلى بهدوء و قالتلى متخافيش
انا فتحته و كلمت المحامى و مفيش حاجة متقلقيش
أنا بس بقولك من باب العلم بالشىء
هاه ..الحمدلله طيب مش هقلق
بس إيه دا بقى إن شاء الله الشىء اللى ميقلقش ؟؟

جايلكم ف الكلام أهو و يا طولة البال اللى تنّول الامل




أل كان يا ما كان
يا سعد يا إكرام

فى يوم أغبر من حوالى عشر سنين تكربياً
أختلفت فكرياً و إنسانياً و عاتشفياً و كل حاجة
مع أبو إبنى
و قولت بسلامة نية كدا .. إنى عاوزة أطلق
الكلام دا كان فى شهر 12 سنة 2000 و خدوا بالكوا معايا
من التاريخ دا كويس لأنى وقتها مكنتش متخيلة
إنى هبقى صورة تبق الأصل
من فاتن حمامة ف فيلم أريد حلة
لأنى الصراحة إنضحك عليا و محدش وقتها نصحنى
و قال بلاش تجيبها تيفال لأن الاحكام مش هتلزق فيها
و انا بعبطى اللى أصريت إنى ... أريدها تيفال آل
عشان الغالى تمنه فيه



المهم قررت بعنترية غير عادية إنى أرفع قضية طلاق
لإستحالة العشرة
قوم أبو أبنى كان راجل اخلاق و قرر يحبسنى
ف عصمته
حبا و كرامة
و عدم تسريح عشان الاحسان كان مدلدق قوى
مكنش عارف يوديه فين الصراحة

فقرر أمعانا ف التمسك بيا إنه يرفع قضية طاعة ف نفس الشهر
عشان التسريح اللى قولنا عليه يبقى
بمستندات رسمية و مش أى كلام
ف ديسمبر 2000 كان رافع القضية و باعتلى الإنذار



و روح يا زمااااان
و تعالى يا زماااان
و ييجى أكتر من عشرين قضية بين الطرفين
ما بين احوال شخصية و جنح و الذى منه

مطولش عليكو ... عشان متناموش منى
المهم القاضى حكمله بالطاعة
دا على أساس إنى ست وحشة

مش عاوزة أرجع لجوزى و أقيم حدود الله و بتبطر و كدا
ومش مشكلة انه مبدد عفشى و مستولى على شقتى و مبيدفعش نفقة للولد
و متهمنى بالسرقة و مبهدلنى انا و اهلى ف الأقسام و لا حاجة من دول
دى كلها أصلها شكليات و المهم تكون الزوجة مطيعة لجوزها
و الحاجات دى تتحل على رواقة بعدييييين و احنا قاعدين
بنشرب شاى ف البلكونة



فإنحكمله بالطاعة ... طبعاااااا

الحكم الإبتدائى بقيت على أثره و بلا فخر .. ناشز
لأنى غتتت و غلست و حرنت منا منفذة الحكم دا
راح للإستئناف طوالى
و رغم تقديمى لميت ورقة بالإنتهاكات
اللى مينفعش معاها أفضل مراته
إلا إن القاضى برضو أيد الحكم
و بقيت ناشز ناشز مفيهاش قولان

لأنى برضو غتتت غتاتة اكتر م الغتاتة الاولانية
و قولت مش هنفذ حكم الطاعة دا و اللى يحصل يحصل


و المحامى بتاعى عمل نقض للحكم
من باب التعلق بالامل
لحد ما نشوف الطلاق هيرسى على ايه رآخر

كل هذوها الاحداث عمالة تحصل و روحت ف تغريبة
كلكلم عارفين تفاصيلها
و قضية الطلاق شغالة يونيفرسل



و بع سبع سنين مرمطة القاضى رمى طوبتى
و قال الست دى مصرة تتطلق خلاص
فكتر خيره أتقى الله فيا
وحكملى بالطلاق 2005
و الحكم أصبح نهائى ف 2007

و بالتالى حكم النشوز بناء على ذلك ... بقى غير ذى قيمة
لأنه لا طاعة لمطلقة
و كل المحامين قالولنا كدا


حلو الكلام ؟


لأ مش حلو
ليييييه؟
عشان امبارح فوجئت
آل إيييييه
إن النقض إتقبل فى قضية النشوز
و سبحان الله الحى الذى لا يموت !!!


إهيه ؟!!!
دنا يا جماعة متطلقة
بقالى كام سنة اهو و خلصنا
نقض إيه بقى
و نيلة إيه؟


طبعا بعد سؤال المحامى .. قال إن الحكاية مقتصرة
على إنه يروح يحضرالجلسة
و يقدم صورة من حكم الطلاق و دمتم
و اصلا إحنا اللى مقدمين النقض مش هما
فلا داعى للكلك ... و نبدأ الحياة يا عم كارنيجى و لا يهمنا


إنما أنا مستغربة جدا الصراحة
و عندى حالة إذبهلال تام
بقى قضية طاعة تقعد ف المحكمة
عشر سنين تقريباً لحد ما يبانلها آخر !!!
مش المفروض الطاعة دى مفيهاش نقض يا إخوانا زى الطلاق
و لا دا محدش جاب سيرة الجزئية دىف قانون الاحوال السخصية الجديد ؟!!



و بعدين مش عيب قوى لحد النهاردة
يبقى فيه قانون بالبشاعة دى
يجبر الست إنها يا تبقى تحت رحمة جوزها
يبيع و يشترى فيها
يا اما تبقى ناشر و زى البيت الوقف


قضية تقعد ف المحاكم ... عشر سنين
عشر سنوات
عشر سنون
عقد كامل يا ظلمة
الست توقف فيه حياتها و أجمل أيام شبابها
عشان جرة قلم من قاضى
و شوية تلاعب من محامي يسوف ف عمرها
و يلخبط ظروفها و نفسيتها و عيالها كمان لو معاها أطفال


طب لنفرض واحدة ف ظروفى مثلاً
الحمدلله إتطلقت ف 2007
لنفرض إنى كنت إتجوزت ف 2009
يقوم يجيلى انا وجوزى جواب زى دا ف 2010
إنتوا متخيلين المشهد معايا هيكون عامل إزاى ؟!!!


يا لهوى على قوانينك يا محاكم
و يا لهوى على ظلمك يا أحوال يا شخصية
و يا لهوى على الإفترا بتاع الرجالة
و يا لهوى على الزمن الازرق اللى بيخلى البنى آدم
عمره موقوف على كام قرار ف شوية ورق
كلمة تجيبه و كلمة توديه



لكن رغم كل شىء ... بقول الحمدلله
ألف مليار مرة .. إنه مّن عليا بالطلاق
لأن الطلاق دا نعمة لا تدركها سوى المحكومات عليهن
بالطاعة ثم النشوز من أمثالى
و ربنا يستر عليا و عالله ملاقيش بعد كام شهر جواب تانى بيقولى
إن النقض أترفض شكلا و موضوعا
و المفروض ارجع لعصمة طليقى
الله يصبحه بالخيييييييير و لا حاجة
عشان تكمل


محنا ف قمة المهازل و القضاء النزيه بتاعنا
بصراحة بييجى لحد عندى
و يعمل حاجات غريبة
و بقالى عشر سنين ف الموال الأقرع الحزين
اللى موش عاوز يخلص و الستر من عندك يا رب

دوشتكم .. صح ؟

بس معلش ادينا بنحكى و ندردش و بنتسلي
و نضوحك شوية
بمناسبة الهابى نيو يير



هتقولولى تعالى هنا وفهمينا
إيه علاقة كل اللى حكيتيه بالصورة اللى فوق دى؟


أقولكم


أصلى بعشق محمد فوزى جدااااا
والمفروض متكلمة عليه و مخطوبين لحين ميسرة
و يوسف عارف و موافق ...هنا



سمعت مديحة يسرى أحدى زوجاته بتتكلم عنه مرة
إزاى كان شخص لطيف و مش عُقد و كلاكيع
و يبقوا مثلا متخانقين الضهر على حاجة
و ييجى بليل يعزمها على سينما
و ينسى إنهم كانوا زعلانين أصلا
حتى لما إتطلقوا فضلت علاقتهم حلوة لحد ما ربنا أفتكره
شفتوا الشياكة ؟؟


قوم أنا لما أسمع الكلام دا
و أقول بحبه يا ناس و نفسى اتجوزه
مش يبقى أكيد عندى حق ؟
طب دا كفاية وقتها انى هبقى ضامنة
إنى لو إتطلقت منه
فعلى الأقل مش هرجع ف يوم م الشغل
ألاقى جواب مشابه جايلى م المحكمة و اتخرع


زائد إنه موسيقار عظيم
و عمرى معاه ما هسمع أى نغمة نشاز و لا نشوز
و لا أى كلمة فيها التلت حروف دول خاااااااالص

مش كدا و النبى ؟!!!



أعطنى حريتى
أطلق يديا