.

.

طــلقـنى شــكـــراً  

Posted by: فاتيما in




 

يعنى
 راجعة م الشغل فى امان الله
بعد حركتين بايخيين حصلولى 
وقولت ماشى
عادى ماهو كل شغل و فيه سخافاته
و متركزيش يا بنتى


داخلة البيت 
و بقول للحاجة أم فاتيما سلامو عليكو
زى كل يوم
راحت بصالى و ساكتة .. و مردتش
مالك يا حاجة ؟؟
فترة صمت قصيرة يتبعها الجملة دى
أصل جالك جواب م المحكمة

طرااااااااااخ

و طراخ دا يبقى صوت قلبى اللى ساب مطرحه
على أثر دربكة
و مخمضة و بلاوى زرقة متتعدش
خبطته و هبدته بعد سماع الخبر
خلته ينزل لتحت ... إلى ما بعد القولون بشوية
 
و يستقر ... مع حالة تتنيح مفاجئة إنتابتنى
يعقبها ميت فكرة ف دماغى راحت و جت



الله ؟!!!

مش كنا خلصنا م المحاكم و قرفها و وجع القلب ؟!
أوعى تكون قضية جديدة مرفوعة عليا !!
يا دى النيلة

هو صحيح دايما اعمل فيها جدعة
و اقول مفيش مشاكل خلاص و إنى بقيت وش محاكم

بس بينى و بينكم ... الموقف جلل جلل يعنى
دنا بقالى سنين ماشية جوا الحيطة
مش جنبها حتى
هيترفع عليا قضايا تانى ليييييه؟؟

خيييييير اللهم أجعله خير
قلبى مرفرف بس زى فار مذعور .. مش طير



بعد فترة صمت و ذهول لدقيقة سالت الحاجة
هوه فين يا ماما الجواب دا ؟؟

الست بصتلى بهدوء و قالتلى متخافيش
انا فتحته و كلمت المحامى و مفيش حاجة متقلقيش
أنا بس بقولك من باب العلم بالشىء
هاه ..الحمدلله طيب مش هقلق
بس إيه دا بقى إن شاء الله الشىء اللى ميقلقش ؟؟

جايلكم ف الكلام أهو و يا طولة البال اللى تنّول الامل




أل كان يا ما كان
يا سعد يا إكرام

فى يوم أغبر من حوالى عشر سنين تكربياً
أختلفت فكرياً و إنسانياً و عاتشفياً و كل حاجة
مع أبو إبنى
و قولت بسلامة نية كدا .. إنى عاوزة أطلق
الكلام دا كان فى شهر 12 سنة 2000 و خدوا بالكوا معايا
من التاريخ دا كويس لأنى وقتها مكنتش متخيلة
إنى هبقى صورة تبق الأصل
من فاتن حمامة ف فيلم أريد حلة
لأنى الصراحة إنضحك عليا و محدش وقتها نصحنى
و قال بلاش تجيبها تيفال لأن الاحكام مش هتلزق فيها
و انا بعبطى اللى أصريت إنى ... أريدها تيفال آل
عشان الغالى تمنه فيه



المهم قررت بعنترية غير عادية إنى أرفع قضية طلاق
لإستحالة العشرة
قوم أبو أبنى كان راجل اخلاق و قرر يحبسنى
ف عصمته
حبا و كرامة
و عدم تسريح عشان الاحسان كان مدلدق قوى
مكنش عارف يوديه فين الصراحة

فقرر أمعانا ف التمسك بيا إنه يرفع قضية طاعة ف نفس الشهر
عشان التسريح اللى قولنا عليه يبقى
بمستندات رسمية و مش أى كلام
ف ديسمبر 2000 كان رافع القضية و باعتلى الإنذار



و روح يا زمااااان
و تعالى يا زماااان
و ييجى أكتر من عشرين قضية بين الطرفين
ما بين احوال شخصية و جنح و الذى منه

مطولش عليكو ... عشان متناموش منى
المهم القاضى حكمله بالطاعة
دا على أساس إنى ست وحشة

مش عاوزة أرجع لجوزى و أقيم حدود الله و بتبطر و كدا
ومش مشكلة انه مبدد عفشى و مستولى على شقتى و مبيدفعش نفقة للولد
و متهمنى بالسرقة و مبهدلنى انا و اهلى ف الأقسام و لا حاجة من دول
دى كلها أصلها شكليات و المهم تكون الزوجة مطيعة لجوزها
و الحاجات دى تتحل على رواقة بعدييييين و احنا قاعدين
بنشرب شاى ف البلكونة



فإنحكمله بالطاعة ... طبعاااااا

الحكم الإبتدائى بقيت على أثره و بلا فخر .. ناشز
لأنى غتتت و غلست و حرنت منا منفذة الحكم دا
راح للإستئناف طوالى
و رغم تقديمى لميت ورقة بالإنتهاكات
اللى مينفعش معاها أفضل مراته
إلا إن القاضى برضو أيد الحكم
و بقيت ناشز ناشز مفيهاش قولان

لأنى برضو غتتت غتاتة اكتر م الغتاتة الاولانية
و قولت مش هنفذ حكم الطاعة دا و اللى يحصل يحصل


و المحامى بتاعى عمل نقض للحكم
من باب التعلق بالامل
لحد ما نشوف الطلاق هيرسى على ايه رآخر

كل هذوها الاحداث عمالة تحصل و روحت ف تغريبة
كلكلم عارفين تفاصيلها
و قضية الطلاق شغالة يونيفرسل



و بع سبع سنين مرمطة القاضى رمى طوبتى
و قال الست دى مصرة تتطلق خلاص
فكتر خيره أتقى الله فيا
وحكملى بالطلاق 2005
و الحكم أصبح نهائى ف 2007

و بالتالى حكم النشوز بناء على ذلك ... بقى غير ذى قيمة
لأنه لا طاعة لمطلقة
و كل المحامين قالولنا كدا


حلو الكلام ؟


لأ مش حلو
ليييييه؟
عشان امبارح فوجئت
آل إيييييه
إن النقض إتقبل فى قضية النشوز
و سبحان الله الحى الذى لا يموت !!!


إهيه ؟!!!
دنا يا جماعة متطلقة
بقالى كام سنة اهو و خلصنا
نقض إيه بقى
و نيلة إيه؟


طبعا بعد سؤال المحامى .. قال إن الحكاية مقتصرة
على إنه يروح يحضرالجلسة
و يقدم صورة من حكم الطلاق و دمتم
و اصلا إحنا اللى مقدمين النقض مش هما
فلا داعى للكلك ... و نبدأ الحياة يا عم كارنيجى و لا يهمنا


إنما أنا مستغربة جدا الصراحة
و عندى حالة إذبهلال تام
بقى قضية طاعة تقعد ف المحكمة
عشر سنين تقريباً لحد ما يبانلها آخر !!!
مش المفروض الطاعة دى مفيهاش نقض يا إخوانا زى الطلاق
و لا دا محدش جاب سيرة الجزئية دىف قانون الاحوال السخصية الجديد ؟!!



و بعدين مش عيب قوى لحد النهاردة
يبقى فيه قانون بالبشاعة دى
يجبر الست إنها يا تبقى تحت رحمة جوزها
يبيع و يشترى فيها
يا اما تبقى ناشر و زى البيت الوقف


قضية تقعد ف المحاكم ... عشر سنين
عشر سنوات
عشر سنون
عقد كامل يا ظلمة
الست توقف فيه حياتها و أجمل أيام شبابها
عشان جرة قلم من قاضى
و شوية تلاعب من محامي يسوف ف عمرها
و يلخبط ظروفها و نفسيتها و عيالها كمان لو معاها أطفال


طب لنفرض واحدة ف ظروفى مثلاً
الحمدلله إتطلقت ف 2007
لنفرض إنى كنت إتجوزت ف 2009
يقوم يجيلى انا وجوزى جواب زى دا ف 2010
إنتوا متخيلين المشهد معايا هيكون عامل إزاى ؟!!!


يا لهوى على قوانينك يا محاكم
و يا لهوى على ظلمك يا أحوال يا شخصية
و يا لهوى على الإفترا بتاع الرجالة
و يا لهوى على الزمن الازرق اللى بيخلى البنى آدم
عمره موقوف على كام قرار ف شوية ورق
كلمة تجيبه و كلمة توديه



لكن رغم كل شىء ... بقول الحمدلله
ألف مليار مرة .. إنه مّن عليا بالطلاق
لأن الطلاق دا نعمة لا تدركها سوى المحكومات عليهن
بالطاعة ثم النشوز من أمثالى
و ربنا يستر عليا و عالله ملاقيش بعد كام شهر جواب تانى بيقولى
إن النقض أترفض شكلا و موضوعا
و المفروض ارجع لعصمة طليقى
الله يصبحه بالخيييييييير و لا حاجة
عشان تكمل


محنا ف قمة المهازل و القضاء النزيه بتاعنا
بصراحة بييجى لحد عندى
و يعمل حاجات غريبة
و بقالى عشر سنين ف الموال الأقرع الحزين
اللى موش عاوز يخلص و الستر من عندك يا رب

دوشتكم .. صح ؟

بس معلش ادينا بنحكى و ندردش و بنتسلي
و نضوحك شوية
بمناسبة الهابى نيو يير



هتقولولى تعالى هنا وفهمينا
إيه علاقة كل اللى حكيتيه بالصورة اللى فوق دى؟


أقولكم


أصلى بعشق محمد فوزى جدااااا
والمفروض متكلمة عليه و مخطوبين لحين ميسرة
و يوسف عارف و موافق ...هنا



سمعت مديحة يسرى أحدى زوجاته بتتكلم عنه مرة
إزاى كان شخص لطيف و مش عُقد و كلاكيع
و يبقوا مثلا متخانقين الضهر على حاجة
و ييجى بليل يعزمها على سينما
و ينسى إنهم كانوا زعلانين أصلا
حتى لما إتطلقوا فضلت علاقتهم حلوة لحد ما ربنا أفتكره
شفتوا الشياكة ؟؟


قوم أنا لما أسمع الكلام دا
و أقول بحبه يا ناس و نفسى اتجوزه
مش يبقى أكيد عندى حق ؟
طب دا كفاية وقتها انى هبقى ضامنة
إنى لو إتطلقت منه
فعلى الأقل مش هرجع ف يوم م الشغل
ألاقى جواب مشابه جايلى م المحكمة و اتخرع


زائد إنه موسيقار عظيم
و عمرى معاه ما هسمع أى نغمة نشاز و لا نشوز
و لا أى كلمة فيها التلت حروف دول خاااااااالص

مش كدا و النبى ؟!!!



أعطنى حريتى
أطلق يديا

This entry was posted on الثلاثاء, يناير 05, 2010 and is filed under . You can leave a response and follow any responses to this entry through the .

66 كــــلام بيطــبطـــب عـــلى قــــلبى و روحــــى

احجز اول تحليق

فوووووووووووووووووووو

مممممممم

انت اكيد اكيد اكيد في اخر فيصل
هههههههههههههه

سميها القضية الضاحكة بقي :):)

بوست موافقة يوسف علي محمد فوزي هاقرا لما ارجع و اكتب تعليق تاني

بس مين قال اني هاوافق انا كمان ؟؟؟؟ :):):):):)

طمطم
.021
دا عك حنون سيبك منه
كانت بتتخانق معايا وعاوزه تكتب ع الكي بورد
المهم
حياتنا كلها بتتحرك بجره قلم
من قاضى بقى من مدير من غفير
المهم جره قلم تطلعنا فوق وجره تانيا تنزلنا تحت
سيبك انتى اكيد الموضوع انشاء الله هينتهى على خير
اطمنى ياحبيبتى
وحشانى اوى ياطمطومه

قصتك تنفع فيلم من غرابتها بس انا حأقول لك ادعي لربنا وانت مخلصة في دعائك انه يجعل كل اللي بيحصل لك ده غفران لاي ذنوب تكون عمليتها وبكده والله العظيم تضمني الجنة من كثر اللي شوفتيه
حبال المحاكم طويلة ودرجات التقاضي طويلة ومعقدة والمحامون يقلبون الحق باطل والباطل حق غير بلوى الرشوة وشراء الذمم التي ابتلينا بها مؤخرا كل هذا وغيره هو الذي جعل الكثير من الناس يفقدون الثقة في اي قضاء ارضي ويكتفون بالقول حسبي الله ونعم الوكيل

ايه دا انا تانى تعليق بعد دوله ابنك
هههههههههههه
وانا كمان لازمن وحتمن وبدنا من اى بد انك تاخدى رأيى فى محمد فوزى
اشوف هااوافق ولا لا
ماشى

طبعا لأني
انا م البلد دييييييييي
ان م البلد دييييييييييييييييييي
فطبعا عارفة
وحاسة
وفاهمة
حسبي الله ونعم الوكيل
القانون ده منين يا جودعان؟
ده حسب الشريعة يا ولية منك ليها
ده ملوش علاقة بشريعة الغاب حتى يا جودعان؟
اصلنا طعمناه بالقانون الفرنساوي يا وليه
بقى الفرنساوي فيه بيت طاعة يا جودعان؟
وفيه طلاق للضرر ميتحكمش فيه لحد ما والولية تخلع وتسيب حقوقها
وفيه قلة ادب ومرمطة محاكم عمر بحاله او اقل تقدير عقد كامل من العمر؟
اصل دي بلدنا يا ولية
بلد رجالة لو عاجبك
لأ ياروح امك مش عاجبني
وتعيش امريكا واللي جاي منها
ولو ها اخد جزء من حقي من ايد امريكي اخد وابوس الأيادي
طالما ابن بلدي
ابن ديني
ابن أمي
طلع ظالم وحقوقه اللي اكتسبها من قهري لازماه قوي
يبقى هالو مستر المؤتمر القومي للمرأة

نسيب اقول ميرسي ع الصباحات والأعياد ميلادات
وكفارة يا ماما
كفااااااااااااااااااااااارة

اه لما شيما اللي عاوزة حد يشكمها حكت عن فرح العريس نزل على ركابينه وباس ايد المزة وثبتها وبعدين شالها ولف بيها
اهو ده بالضبط الشرح اللازم لمحمد فوزي
راجل يستاهل يبقى خطيبك
ويتشرف
خليه ينسيكي الأشكال الحلوة "المخلصة" الضااااااااااااااااالة

هههههههههه لا بجد احبال وروتين غريب انا كان زمانى قتلته وحطيت فى اكياس اسهل ليه بدل ما كنت اقعد كده
عارفه مشكله القضاء عندنا انه المفروض محكمه الاسره والحاجات دى بتمشى بالقران بس هما ماشين بقفاهم تقريبا معلش بقى يا ناشز ههههه سورى يا طمطم

انا بقى بعتذر بجد عن عدم حضور اجتماع نونو النسوه انا كنت نايمه على ودانى اصلا ومعرفش السبب وكنت معزومه بره والله وكان عندى حاجات ملخبطه كتير
متزعليش منى ده مش تقصير فى حقك قد ما هو لخبطه فى حياتى شخصيا
وبعدين عيب عليكى تسالى معقول رحاب اتخطبت انا هعمل كده من وراكم اكيد هعمله قدامكم يعنى حتى لو مقولتش على المدونة هقول فى ودن كل واحد فيكم
متزعليش منى يا طمطم والله علشان اليوم ده

ههههههههه

ناشز ناشز الكلمةدى مستفزة جدا على فكرة والله احنا بلد متخلفة فى كل حاجة يعنى قضية تقعد 10 سنين وهم مش واخدين بالهم انك اطلقتى اصلا
عمار يا مصر
المهم انت ففرفشى وبى ايزى خالص ان شاء الله مفيش قلق ولا حاجة

عارفة المثل الى بيقول شر البلية ما يضحك ،
فعلا صحكت لحد دموعى ما نزلت
ضحكت من القهر و الظلم
و الناس الى فاكرة ان الست دى مش بنى أدم و تدوس عليها ، نسيت ربنا و نسيت وصايا الرسول علية الصلاة و السلام بخصوصها ، مش ها قول غير حسبنا الله و نعم الوكيل .
عارفة روحى للقاضى بالورقة دى و ورقة الطلاق و أرميهم فى وشة وقولى له حرام عليك و اتقى الله فى بنات الناس .

أولا زوري اللينك ده

http://a7walnaaa.blogspot.com/2010/01/blog-post.html

ثانيا ..

بجد بجد أدعيلك ربنا يريح بالك ويطمن قلبك ويبعد عنك كل البلاوي دي

إيه ده يا أوختيش ،، ده إحنا متأخرين أوي أوي .. امتي البلد دي هتفوق؟؟؟

حقيقي بلد غريبة
زي بالظبط ما يكون واحد رافع قضية بيطالب فيها بحقه في مبلغ معين ويكون يا عيني دفع في طريق المحاكم قد حقه ده وتعب واتذل وفي الاخر يأس وبعد سنين يجي جواب من المحكمة لبيته تستلمه المدام وتفتحه تلاقيه مبروك الاستاذ الفلاني كسب القضية ... تستعجب وتقول اه كان قصدهم المرحوم ........ المواقف دي بتتكرر كتييييييير في بلادنا وياريت حد بيفهم ياريت حد عنده ضمير يعرف ان الانسان وقت ضيقته بيبقا محتاج ايد قوية وعفية وفاهمة وواعية وحقانية تنشله من ضلمة الظلم الواقع عليه

اضحكي يا فاتيما من قلبك على هبل القضاء بتاعنا اللى بيضربوا بيه المثل في النزاهة ... فين النزاهة لما يتسبب في ان واحدة تذل في عيشة مع راجل غصب عنها
هي دي النزاهة

الحمد لله يا فاتيما انك بخير
بسكوتك

شر البليه ما يضحك!

والله بجد مهزلة..

الحكومة بتاعتنا الميت يموت ولسه القضايا بتاعته شغالة ..

لاااااا تعليق ..

أراك عصي الدمع شيمتك الصبر
أما للهوى نهي عليك ولا أمر

أبو رياض

هى دى مصر يا فاتيما ..وكم فى المحاكم من مآسى عجيبة .. ذكرتنى حكايتك ببريد الجمعة للراحل عبد الوهاب مطاوع .. تحياتى لك وليوسف وخطيبك الجميل ..

مش لاقية كلام أقولهولك غير إنى أتنح ايه الهنا اللى احنا فيه ده منتهى الاستهتار بالانسان حاجة تطلع الروح هو إيه ولا إحنا ايه مجرد ورق وأرقام وبس يعنى مش بنى أدمين

سيبك من كل ده مبروك عليكى محمد فوزى ده كفاية موافقة يوسف عليه


دمتى بكل الخير والسعادة

يا فاتيما

أنا موافقك على إن المحكمة عندنا ظلم في ظلم و إن قضايا الأحوال الشخصية متلتله و زي الهم على القلب ، و معاكي إن المفروض إن مافيش عيشة بالعافية ولا طلاق بالعافية ، ( إمسكوهن بمعروف أو سرحوهن بإحسان )
إنتي عارفة المشكلة إيه ؟
المشكلة إن صعب حد من الزوجين دلوقتي يحب بجد ، آه و الله ، أصل الحب بقى سهل قوي فإختلط بالإعجاب و الشهوة والنقص ، وأصبح مدلوله مش واضح ومش هو نفسه عند الطرفين
لو الطرفين بيحبوا بجد ، حب حقيقي ، حتى لو وصلوا لمرحلة الطلاق حاينفصلوا بحب ، لأن الإنفصال مش حايكون بسبب الكره ، إنما حايكون بسبب عدم التفاهم في مشاعر تانية غير الحب أو أفكار تانية غير العشق
آه ، ماهو أصل العشق ده مش شعور ، ده فكرة ( بس ده موضوع تاني )
ربنا معاكي و يوفقك في إنهاء مشاكل حياتك دي على خير ، و ماتقلقيش كلنا موجودين وقت اللزوم ، إخواتك حقيقي مش أي كلام
ماهو بردو الرجالة مش زي بعضها ، وفيه رجالة لسه عندها جدعنه و أصل
تحياتي و إحترامي
وخالص دعواتي برجوع يوسف عن قريب إن شاء الله
KING TOOOT

ايه دة ؟؟
هو انتوا اطلقتوا عليه فى المؤتمر النسوى بتاعكم ( محمد فوزى ) ؟؟

مااااااااااااشى

_____________________

عارفه
اول لما بدات البوست اتعكننت
بس بعد شويه لقيت نفسى بضحك
بضحك من غير ما احس

يالهوى يافاتيما
انتى بتستهونى بجرة القلم فى مصرنا العزيزة ؟!!!

دى بتعمل بلاوى ياماما
واسالينى انا على جرة القلم واللى بتعمله

عارفة
كنت قريت على واحد فى الجورنال
اتمسك بالصدفه فى لجنه مروريه
طلع عليه حكم بالاعدام
اة والله اعدام
الراجل مروح بيته فى امان اللى
شايل جورنال وبطيخه يفرح بيها عياله
بات لابس البدله الحمرا

تخيلى بقى مراته لما باب بيتها يخبط بالليل
مبروك يامدام
جوزك فى سجن الاستئناف

وفييييييييييييييين
فى اللحظات الاخيرة
وقبل تنفيذ الحكم
وبالصدفه البحته
اكتشفوا انه تشابه اسماء
ومعلش يااستاذ
اسمك جه معانا غلط

:)))
:
:
:

هى الكاميرا فين بقى ؟؟؟

كان الله في عونك
بس ما تقلقيش
المحامي حيخلصها بورقة الطلاق بسهولة إن شاء الله
بس اصل ضغط القضايا على المحاكم رهيب
أنا واحد صاحبي محامي قال لي إن الجلسة الواحدة في الجنح بيكون فيها 700 قضية في الرول في اليوم الواحد على نفس القاضي
و بتكون 300 قضية في رول الجنايات في اليوم
يعني لو القاضي عرف اسماء الخصوم بس يبقى كتر ألف خيره فما بالك إنه يعرف تفاصيل كل قضية و يحكم فيها كمان
نظامنا القضائي بشكله الحالي مسخرة

adel
-----
حلق دايما ف الأعالى
يا غالى على ماما

فيصل إيه دنا ف الدويقة
و الصخرة وقعت عليا يا بنى

لأ هتوافق يا عادل
دا محمد فوزى


بحبه يا بابا
آآآآآآ ه ه ه ه




sokara
------
و إنتى كمان يا حبيبتى
و بوسيلى حنين قوى

معاكى فى حكاية جرة الأقلام دى
نعمل إيه طيب ؟؟

عاوزين حلول عقلانية للمعضلة دى
يعنى نروح نولع ف المصنع
اللى بيعملهم مثلاً ؟!!



خواطر شابة
----------

هندى يا خواطر
عاوزاه فيلم هندى

عشان يبقى غنائى
كوميدى
ميلودرامى
و يتكلم بالمرة عن الامومة
و يبقى فيه ضرب و خناقات

نورتينى يا حبيبتى
و حسبى الله ..معنديش غيره





ستيتة حسب الله الحمش
-----------------
نهاجر يعنى يا ستوتى ؟
منا طفشت من قبل سابق
نعملوها تانى ؟!!!

إبقى إفتكري تتكلمى
عن حكاية الطاعة دى
فى اجتماع من بتوعنا


يمكن القربة
متطلعش مقطوعة ف الآخر
و الكلام مش ع الفاضى

و ميرسى على إيه
دا غيض
من فيض يا ستوتى
يا حبيبتى



appy
----
ما قولنا بلاش الكلمة دى بقى
بتعصبونا ليه ع المسا ؟؟

يا حبيبتى و لا يهمك
طبعا كنت اتمنى تيجى
بس انا ملاحظة أنك فعلاً مشغولة
و ربنا معاكى

و بعدين يا بيبى فيها إيه
لما تنخطبى و متلحقيش تقولى
ساعات الظروف تحكم
و الوقت يبقى مزنوق ...عادى
انا سخصياً لا يمكن ازعل منك
حتى لو دا حصل

هفرحلك و بس
و مش مهم أى حاجة تانية

مش عارف والله يا فايتما
فعلا هم يضحك وهم يبكى

قولت لازم اكتبلك
على الرغم من انى متعفرة ببودرة طفاية الحريق
و كنت ناوية اتقمصلى منك يومين كده على تهديدك بوقف الاخباريات
و على الغيبة
بس
قولت لازم و لابد اقولك
حمد الله على السلامة

بجد لما فضفضتى
مستريحتيش كده
و فكيتى عن نفسك
بالكلمتين دول

امال عملين مدونات ليه مش علشان نفضفض
و نكيدى علينا ياستى و ماله
اصحاب فىالفرح بس لا اصحاب فى الحزن كمان

المهم
عارفة البوست ده تعليمى مهم
بلدنا بجد الموضيع فيها مضعيش الا لو ليكى فيها خير انما لو شر قعدالنا فى مكاتب الموظفيين حتى حين ميسرة
فاكرة لما اشتكت من الاجازة الى ضايعوا طلبى بمدها
قولتها لو حبوا يرفدونى حيطلعوالى ورق كنت ناسية

اقولك حاجة بجد
راجعى ورقك يا فطوم و اتاكدى من كل الذيول ده انها ماتت و ادفنت و اتحللت بجد

مش حكلمك فى الطلاق زى الباقيين
الى عاش مش زى الى قرأ
بس حقولك
انى موافقة على محمد فوزى بالثلث
و انا معاكى اتجوز صلاح ذو الفقار :-))
امتى فى الاحلام :-)))
جايزيطلعلنا زيهم

ابقى احكيلكى على الحريقة بتاعت النهاردة بعدين
ده كان يوم:-) الحمد لله جت سليمة

ana keda
--------
تعرفى المشكلة الحقيقية
فين يا كدا

إن المفروض بالنظام الجديد
بتاع المحاكم
ان كل قضايا الاحوال الشخصية
المتعلقة بالبنى آدم
بتبقى موجودة فى ملف واحد
و مكان واحد

يعنى لو تعبوا روحهم
و بصوا ف الملف
هيعرفوا إنى اتطلقت
و شبعت موت من سنتين تلاتة ...

لكن متفهميش
أهو عكننة و خلاص



أم بتول
-------
طب الحمدلله إنك ضحوكتى
يا حبيبتى
فعلا شر البلية

و انا لا هروح و لا هاجى
المحامى هوه اللى رايح

انا بكره المحاكم و الأقسام
دنا لما بعدى بس جنب المحكمة اللى جنبنا بشارعين ..
بفتكر الذكريات اللطيشفة كلها و بيجيلى إكتئاب مؤقت




mimi
-----
فيكى الخير يا ميمى
و ستيتة تستحق كل الخير و الفرحة

وميرسى ع الدعوة يا حبيبتى




عاشقة الرومانسية
----------------

طب ليه يا دودو
مش حاسة إنك بتضحكى ؟؟



Baskouta
--------
لأ هيا من ناحية غريبة
فهيا مفيش أغرب منها

و الحمدلله يا حبيبتى
انا بخير أهو
و بضحك عشان تعبت
و مبقتش قادرة
أزعل اكتر من كدا




أقصوصة
------
فعلا يا أقصوصة
ناس كتير متفقة معاكى
و انا شرحه




لجين أبو الدهب
------------
يعنى مش كتر خيرها يا لجين
أن عندها اخلاص ناحية الناس

مش عاوزة تفارقهم ببساطة كدا
و باقية ع العشرة ؟!!



Abu Riyad
---------
أهلاً بيك
و البيت دا تعليقاً
على أعطنى حريتى أطلق يديا
و لا دا ف المطلق ؟
عشان التعليق الجاى بس
منظرى ميبقاش وحش
وأعرف أرد صح



إيهاب راضوان
------------
منا عارفة يا إيهاب

دنا عندى ملفات
لحاجة و عشرين قضية
بتؤيد وجهة النظر دى و الله

نورتنى و مفتقدة
زياراتك و تعليقاتك




KING TOOOT
----------
متفقة معاك فى كام حاجة
يا ابو عمر
و حبيب هبة


معاك إن الحب بقى بارافان
يستخبى وراه أى حاجة
و كل حاجة
و قليل لما تنقال الكلمة
و تتنفذ لما ييجى وقت الجد


و معاك إن الناس
يا تعيش بالمعروف
يا تفترق
و كل من الاحباب ف طريق



و معاك إن العشق دا
قصة تانية خالص



و معاك إنكم أخواتى
و دى مفيهاش جدال
و لا نقاش


بس اللى مش معاك فيه
إنك تحط نفسك وسط العالم
كدا بلا تصنيف


بص يا وليد


الدنيا دى أصلها فيها ستات
و رجالة ..نجيب الستات دلوقتى على جنب و خلينا ف الصنف الاولانى

و الرجالة نوعين

رجالة ذكور
فسيولوجياً و تشريحياً

و رجالة حقيقين
زى ما ربنا خلقهم
عشان يكونوا
و كما يجب و يصح


إنت من النوع التانى
و ناس حلوة برضو صادفتهم
ف التدوين كذلك
مع قلة مندسة ف حياتى
الماضية و كمان الحالية
زى اخواتى و زمايل الجامعة
و كام نفر ف العيلة بتاعتى



الملخص
إنت راجل حقيقى
مش منظر زى باقى الدنيا


ربنا يخليك لبوبو و عمر
و منحرمشى منكو أبدااااا





أحمد سعيد
--------
ماله يا احمد
لأ بقى دا إلا فوزى

دى فيها ضرب نار


دا الشياكة
و العظمة الموسيقية
و التواضع و الطيبة


و كان راجل صناعة حقيقى
حط فلوسه فى اول مصنع
أسطونات ف مصر
بدل ما يحطهم ف البنك
و يريح دماغه


أنتج أفلام
و عمل تاريخ غنائى كبير


و بعدين علاقاته بزوجاته
بقى دى حاجة تانية


أصلك عاوز تعرف الراجل بجد
إسأل عليه طليقته


الطبيعى أن أى واحدة تذم
في الزوج السابق
بحكم الخلافات اللى إنفصلوا
على أثرها


قوم لما كلهن يشكرن فيه
يبقى أكيد فعلا
كان شخص طيب
و راجل حقيقى زى ما قولت
ف ردى على كنج توت ...


و بعيييين صوته حلو
و هيعقد يحب فيا
و يغنيلى بالمرة
عاوز إيه تانى بقى ؟


و انا لا استهين يا عزيزى
منا عارفة اللى فيها
بس قولت أضحكوا معايا شوية
ع الزمن و بلاويه


نورتنى
و كاميرا إيه مساء الخير
إحنا ف الإذاعة دلوقت

ما التعليقات منشورة أهه
إصحي يا أم يوسف كده و ركزي

لا ياماما
مش قصدى على محمد فوزى اللى بيغنى

يالهوى على الستات لما تعمل طنطا
دا انتو مشكله

انتن مشكله

الكاميرا الخفيه قصدى

مش الاستاذ ابراهيم نصر برضه ؟

مهندس مصرى
----------

أزيك يا محمد
و ازى صحتك دلوقتى ؟
يا رب دايما تكون بخير


و معاك إن الدنيا زحمة قوى
و الضغط رهيب

بس هوه إحنا بس ؟
م الدنيا كلها كدا


بس هما عندهم حاجة
إسمها نظام و حسن ادارة



و الاهم من النظام يا محمد
سرعة الفصل ف القضايا


المحامين اللى وقعت ف سكتهم
مكنوش بيرفعوا القضايا
لأن الحق معاهم
لااااااا


كانوا بيرفعوها عشان
يقطعوا نفسى
الهدف القرف
و الإستنزاف المادى و العصبى
مش اكتر
و لو تعبت و قولت حقى برقبتى
ساعتها يقولوا تدفعى كام
و نريحك من القرف


هيا الحكاية ماشسية كدا
عملية إبتزاز واضحة


لكن لو يبقوا عارفين إن القضية هتتنظر ف خلال شهرين و تخلص
تفتكر الوضع هيكون زى ما حصل معايا


يترفع حاجة و عشرين قضية ؟!!
مظنش خالص

العدل البطىء
قمة الظلم


و زى ما قولت ف البوست
تخيل لو كنت متجوزة دلوقتى
يا محمد
و جالى جواب زى دا انا
و الغلبان المأسوف عليه بشدة
اللى هيستبيع و يتجوزنى

المنظر كان يبقى شكله إييييه؟؟؟
إنت جبت الكلمة الصح
مسخرة




بطوط حبوب
---------

المهم إننا بنلاقى
وسط البكى
حاجة تصحك يا محمود

نعمة محدش بيلاقيها كتير

و إنت منور
روح قلب ماما
يا خالو



wanda
------


إيه دا ؟؟
حريقة إيه بعد الشر !!!
هروح أشوف الحكاية أيه؟


و سلامتك ألف سلامة
من كل شر

و م
تزعليش منى و النبى
انا مقدرش على زعلك
يا واندتى
الصباحات موجودة أهى
مش هتروح ف حتة


على فكرة كنت بحب صلاح ذو الفقار جدااااو انا صغننة
عشان أفلامه مع شادية ...
و فيلم رد قلبى كمان
بس إنتى عارفنى عاتشيفية رومانسية
و لازم اللى بحبه يغنيلى
و يقف تحت البلكونة الخيالية
الإفتراضية بتاعتى اللى ف الا محيص دى
و يقعد يقول بقى

فبدل ما يقول كلام عادى
يغنى يا ريت
و مفيش اجمل من فوزى يقف تحت الشبابيك
و يقول شحاااااات و مد إيديه



المفروض الورق كله
متراجع م المحامى
انا اصلى لما ببص ف الملفات دى
يا وندا ... بنقهر
و ممكن أقعد يومين منطقش
و بعدين بقولك أنا مطلقة
يا ناس بقالى سنتين و شوية
و معايا قسيمة الطلاق
أيلها و اشرب ميتها ؟؟

يعنى ادفع الغرامة
لحسن يشيلوا العدة
و انا معنديش تيلفون أشاساً ؟!!!


بوسة و حضونات
و سلامتك

مهندس مصرى
----------
شوفتها خلاص يامحمد


أحمد سعيد
--------
قصدك فوزى بتاع كلنا ليلى ؟!!


لااااااا
ميلزمنيش المناظر دى
دى صينى يا بابا

و من ناحية إننا مشكلة
فتلك حقيقة
لا أنفيها

بس على فكرة
لو احنا مشكلة
فإنتم
السبب فيها

و بلاش ابراهيم نصر دا
عشان يوسف و هوه صغير
كان بيخاف منه جداااا
و اول ما يشوفه ع الشاشة كان بيعييييييط لحد ما أغير القناة

يا عيني عليكي يا مصر!محكمين فيكي ناس عايزة الحرق و لا فاهمة حاجو في مية البطيخ..و لامنه قانون فرنساوي و لا منه دين و لا شرع..سنين وسنين بتمر و الناس دي كأنها ضاربة حاجه و لا خارج نطاق الزمن..ربنا يصبرك على ما بلاكي يا فاتيما و يصبرك و يجعله في ميزان حسناتك..وحشتيني قوي
بحبك

لا برضه مش دة اللى قصدى عليه
ماشى ماشى
هسيبك تنصرفى من سرايا النيابه دلوقت بضمان محل مدونتك

كفايه كدة فى استجواب النهاردة

_________________

بصى
انتوا فعلا دماغكم مشكله
اكثر الاشياء استعصاء على الفهم
والمشكله انها محتاجه منطق مخصوص علشان تتفهم
علشان كدة كل العظماء والعلماء والفلاسفه شدوا شعرهم منكن
لانهم غلطوا غلطه شنيعه
وطبقوا معاكم المنطق العادى

_______________________

بالنسبه لموضوع الرجاله

مصر معادش فيها اصلا رجاله دلوقت
الا قله مندسه
بقى فيها ذكور بس
يمكن دى كمان
برضه فى طريقها للاضمحلال
( الا القله المندسه طبعا )

____________________________

بالنسبه لمحمد فوزى

مسييييييييييييرى اعرف سر شويبس

أول مرة آخد بالي من الصباحات من كلامك عند خيخة
أصل أنا بأتابعك بالجوجل ريدر
و الريدر مش بيتابع غير البوستات الجديدة و ملهوش دعوة خالص بالسايد بار
و بأتابع التعليقات بعد تعليقي على إيميلي
:)
أحلى صباح و مسا يا أم يوسف

ربنا يعينك على ما بلاكى

القضاء المصرى دا العدالة الإلهية أسرع منه مليون مرة

أنا لما بسمع عن واحد بهدل مراته
بلاقى بعدها بشهر حد بيقولى ان اخت الراجل دا جوزها بهدلها بالرغم من انه كان حاجة محترمة وكويس جدا

العدالة الإلهية أسرع من عدالة المحاكم والقضاء المصرى

وفعلا القانون فى مصر فيه حاجات سمك لبن تمر هندى

بالاضافة للروتين اللى عايز يتشد عليه السيفون

بس ربنا يتوب علينا ويخلينا نمر بكل دا وينتهى والحال يتصلح

ربنا يصلح لك الحال قادر يا كريم يارب :)


شاب فقرى

حفلة صغننة ل د / ستيتة ..

قولوا كل سنة وهيا طيبة في البوست ده

مش عارفة أضحك من بلاوى القانون والمحاكم بتاعتنا

ولا أعيط من اللى بيحصل

والله العظيم دى مهزلة على أعتبار أن الناس مش بنى أدمين ومن حقهم يعيشوا فى سلام بعد أنتهاء أى تجربة سواء جواز ولا خطوبة ولا أى زفت

عارفة أكتر حاجة بتخلينى أدخل هنا وأقرأ كل كلامك
أنى بجد بتعلم منك القوة وبستمدها منك

أقولك أنا بقول أن أنا وأنتى عندنا حكايات تنفع فعلا مسلسل عربى وصدقينى هينجح جدااااااااااا

يارب على الظالم
كفاية تقولى يارب وهو اللى هايخدلك حق

وعارفة لو ماخدناش حقوقنا فى الدنيا إن شاء الله هناخدها فى الآخرة

ربنا معاكى ووحشاااااااانى جدااااااا

فاتيما

فعلا هى البلد كلها مفيش غير عكننة ولو كانت بتدل ع حاجة بتدل على كمية العشوائية الى موجودة من اول حاجة لاخر حاجة

اه صحيح والله يا فاتيما لسه فى رجالة حلوة وكويسة وحنينة وطيبة وكل حاجة بس دول بقوا عاملين كده زى الى انقرضوا وبقيتى لما تشوفى حد منهم تتنحى ونفسك تبقى تتصورى معاه ههههههه
محمد فوزى ده جامد جدا اصلا كل رجالة الوقت ده بيعبر عن رجالة محترم فى زمن كان بيحترموا فيه البنى ادم

اما ناو يا نهارى عالجليطة ومد الايد على مراته ووووو ومية الف حاجة تخلى الست الى معاه تقوله روح ف داهية وتبقى مستبيعة حتى عن النفس الى بتتنفسه معاه وهنا بقى يبقى الهدف من الجواز الى اصله مودة ورحمة مبقاش موجود وانا بحترم بجد الى تطلب الطلاق وعاوزة تحافظ على نفسها فى جو تانى لان الجو الى هى فيه بقى لا يصلح
احسن من واحدة ممكن تكمل وهى راسها فى الرملة وهى متاكدة ان الى معاها مش رجل او بيخونها وهى ساكتة او بتطنش مينفعش
الطلاق حلالولو كان ابغض الحلال نفسى الى ماسكين القضايا بجد يفهموا ويجيبوا ناس دماغها عالية مش تيـــــــت

سورى طولت

طيب هو بعد ما الجواب دا ما اتبعت وانتي جاتلك الحالة دي وقلب وقع في قولونك محدش طلع لك من أي حتة كده وقالك انتي في الكاميرا الخفية تحبي تذيعي قولي ذيع ماتحبيش قولي ما تذيعش

بس أرجع وأقولك انتي الغلطانة برضه يا فاتيما
في حد يعمل كده برضه مساج ايه اللي حكم لك بيه القاضي
الناس تقول ايه مساج نشاز بلاج مش مشكلة المهم الأخلاق
اه كله إلا الأخلاق

احنا قانوننا يا قلبي بيمشي على سطر شرعي وسطر فرنساوي فبتبقى النتيجة أحكام من نوع (لا تقربوا الصلاة)
لا أحكام شرعية ولا أحكام فرنسية
أهو كل اللي في نفسه حاجة ياخدها

ربنا يجعل كل ما تعرضتي له في ميزان حسناتك ويعلي يه منزلتك ودرجاتك
ويرزقك مع حضن يوسف زواج بأفضل من محمد فوزي :)

وحشتينى يا بطة أأأأأأأأأأأأأأأأأأأأأأأد البحر
الكلام اللى انتى كاتباه ده يا اوختشى
ما يتقالش عليه الا تيييييييييت وبعدين تضحكى
بس وحشتينى برضه جدا
وبما انك بتحبى محمد فوزى فاسمعى اغنية صعبان عليا انا شخصيا بموت فيها وهتعجبك هتعجبك
وش بيغمز
بوسة وحضن ليكى يا مزة
سلامووز

بقى لسه عنده وقت يروح يشوف نقض النشوذ عامل ايه
فيه رجاله كده تستاهل ال ..........
ربنا يعوض عليكى فى عمرك اللى فات
و اكيد ان شاء الله هايجازيكى كل خير

صلي على النبي - صلى الله عليه وسلم - كده يا أم يوسف وروقي وسيبيها على الله .. هاقول إيه بس !!
حسبي الله ونعم الوكيل في كل ظالم .. أنا والله كنت خايف أدخل أعلق أحسن تحدفيني بحاجة زي واندا ههههههه .. وقلت دي أكيد مش طايقه تسمع سيرة أيها محامي ابن تيت .. عشان كده أحب أهديكي أغنية فوزي : ليا عشم وياك يا جميل إن بحت بالسر -إني محامي .. معايا أنتِ ؟؟- تصونة :))

ربنا يا رب يطمننا عليكي وكل سنة وحضرتك طيبة وبألف خير وصحة وسعادة وراحة بال .

سلام

على الباب انا على الباب افتحلى يا بواب :-))

بصى بقى سهرانى و رايقة بعد كل الى حصل
الى عجبنى الناس بدات تلاحظ موضوع الصبحيات و اتزنقت يا حلو
و مش حتقدرى تبطليها :-))
على راى خيخة نيهاههاهاهاه

المهم انا عجب
بجد عجب
عند الباشا تشوفى كلامى و اكلى و الناس قاعدة تتغزل فيه :-))
واندا خلف خلاف المحامى :-))
و عندك مليش مزاج افتى فى الطلاق و القضايا و الهم ده
و كا همى اضحكك
حد واخذ منها حاجة
يافطوم

المهم صلاح ذو الفقار يا جميل
برضه له مواهبه
بيوصل كهرباء
بيزق عربيات
بيرقص بلدى
ميكانيكى مزيت مشحم
و حرامى بنوك كمان
و اموت فى شنبه
:-)))
و لما يشخط فيها كل يوم قلقاس و تقوله ده مكرونة ياحبيبى

فين الرجلة ده
و انا راضية اكون منى فى فيلم اغلى من حياتى

أنا أول مرة أعرف عنك المعلومات دى

أصلى جديدة أعذرينى

هو موقف بايخ بس والله المحكمة بتاعتنا دى دمها خفيف .. دول نايميييييييييين فى العسسسسسسسسسسل

لأ بجد حاجة صاعبة وانتى المفروض تتصلى بأى برنامج من التلاتة المعروفين 90 دقيقة أو 10 مساء أو البيت بيتك وتضحكيهم على المحكمة هيصتديفوكى علىطول

انا قريت بوست محمد فوزي
وبصفتي ابنك البكري
سيبلي وقت افكر بقي و ارد عليكي

لا أعتقد أن هناك كلام يطبطب على قلبك سوى قول الله تعالى في سورة الشرح وقوله الحق:

فَإِنَّ مَعَ الْعُسْرِ يُسْرًا (5)
إِنَّ مَعَ الْعُسْرِ يُسْرًا (6)
...........................

يا سعد يا إكرام
الاصل يا سادة يا كرام

دع القلق وابدأ الحياة
كارنيجى ميعرفش حاجة عن قانون احوالنا السخصية

رد فعل القاضى ايه لما يعرف ان الطلاق حدث بالفعل!!!!!!

ارمى ورا ظهرك وامشى علشان ساعات اللى بيبقى ورا ظهرنا من كثرة ممكن يركب على ظهرنا بعد كدة

فارمى واجرى

فاتيما

كالعادة

ولا عارف انطق من اول ما نزلتي البوست عاوز اقول اي حاجة بس مش عارف

حبيت بس تعرفي اني بأساندك بمنتهى القوة
حتى ولو بصمت

مش عارفه اقولك ايه والله يا ام يوسف

دا اصلا افترا

ربنا يا حبيبتى يعوضك خير

الحمد لله على السلامة يا زهراء
يارب ما يحرمنا من طلتك و يبعد عنك الضيج و النكد و سدة النفس
شكرا على باقة الأمل و مأدبة الحب مع كل ضيوفك الأكارم، ربنا يجعل ما بينكم حبا خالصا فيه و يجزيكم الخير على المثل اللي بتضربوه على أناس تحابوا في الله على غير أرحام اجتمعوا على الكلمة الطيبة و فعل الخير و نشر الأمل.

شكرا لحضرتك و لحضراتهم ألف ألف مرة

كالعاده صمتتتتتتت. بس قلبى معاكى والله.

والله مش عارفه اقول حاجه بس افتكرت فاتن حمامه فى اريد حلا:(
بس العداله البطيئه ظلم بين والله.

على فكره وحشانى جداااااااااااااا جداااااااااااا وكل يوم فى سيرتك واقولهم ان شاء الله القاء الجاى هروح مخصوص علشانها:)

يسلم لى احساسك يابطه
عمره ما خيب معايا انا بالذات
وانا باضحك اهو ياستى
(:

وكم ذا بمصر من المضحكات ولكنه ضحك كالبكا

طالما قبل الإنسان إنه يظلم غيره فلا نلوم على المحاكم

dahlia...
---------
أزيك يا داليااااا

وحشتينى قوى يا ام يحيى
اول مرة أناديكى بيه ..صح ؟

بس حسيت عاوزة أقوله
معرفش ليه

و روقى يا حبيبتى
دنا بإتفك معاكو بكلمتين
و نقعد نوضحك
شويتين
مش اكتر





أحمد سعيد
--------

لأ بقى
انا مش هتكلم بعد كدا إلا ف حضور المحامى بتااااااعى

عندك محمود رئيس جمهورية نفسى
و هانى مصرى جدا
و باشا

أهم على الأقل مش هياخدوا منى فلوس
و يدافعوا عنى ببلاش


و يا سيدى كام مرة أقولكم
يا رداااالة
بطلوا تحاولوا تفهمونا
عشان إحنا سخصياص مش فاهمين روحنا

حبونا و بس
زى الأم ما بتحب عيالها
كدا تمام


متضيعوش الوقت و الجهد
ف سكة مش هتودى على حاجة
ف الآخر


محمد فوزى دا سر حربى
و امن كومى ..فمتحاولشى ى ى ى


نورت يا ألمح نزلاء العنبر




مهندس مصرى
----------
طيب يا محمد
اديك عرفت يا عم


ربنا يستررررر
أسعد الله صباحك و مساءوك دايما
يا اجدع و اطيب
مهندس مصرى



شاب فقرى
--------
تعيش يا فندم

مبتحصلش معايا حكاية السرعة دى
الصراحة ...
و دا احيانا كان بيخلينى احس إنى أستاهل اللى بيجرالى كنوع من غسل الذنوب يعنى
ماهو الواحد أكيد
عمل ف حياته حاجات
يتعاقب عليهابس مش فاكر قوى
أو مش حاسس بفداحتها يمكن
أو حاسس و بيستهبل يعنى
كدا


عارف نجيب محفوظ فى أصداء السيرة الذاتية
قال حاجة شبه كدا
و إقتنعت بيها جداااااا

بيقولك إيه يا سيدى
لما المريد سأل شيخه

متى تنتهى المحنة التى نعانيها ؟؟؟

فرد عليه الشيخ قائلاً

لو خرجنا منها سالمين
فهى الرحمة

و لو خرجنا هالكين
فهو العدل


و ربنا كريم مع الكل
دى حاجة أكيدة
سواء هلكنا او سلمنا


و أظننى خرجت سالمة و الحمدلله
رغم كل شىء
كفاية إنى لسه بعقلى يا فقرى

الحمدلله
نورتنى

ميمى و أحمد
----------
روحت يا ميمايا
و فيكى الخير يا حبيبتى
إنتى و تؤامك الجميل
زيك




bos bos بسمة عبدالباسط
----------------------
لأ
إضحكى يا بسبوستى

أنا عاوزة أضحكوا
عشان منطقش نموت ..

مأصلى سبق
وإتفقت على كدا
و وعدت عم صلاح جاهين بذلك
عاوزنى رجع ف كلامى
يرضيكى ؟؟


إنتى كمان يا حبيبتى وحشانى
جدااااا



Ana Keda
---------
و الله البلد مظلومة معانا

المشكلة ف القوانين و اللى حطوها

و اللى مش عاوزين يغيروها
عشان الناس تفضل متبهدلة كدا

و كمان المشكلة ف اللى بيعتبر الست ملكية يتصرف فيها على هواه معتمداً على إن محدش هيراجعه

و طولى زى ما تحبى
إنتى منورانى



يوم جديد
--------
لأ محدش قالى يا يم يم

و بعدين كاميرا خفية إييييه
يا ماما أنا بقالى عشر سنين ف الموال دا لدرجة إنى مبقتش أستعجب من أى حاجة تيجى من ناحية المحاكم و المحامين من كتر ما شفت ألاعيب و مهازل

منحرمشى منك يا حبيبتى



dreem
-----
إنتى كمان يا دريمو
و كان نفسى تيجى يوم اللوكااااء الحريمى يا وحشة
المرة الجاية لا تراجع و لا إستسلام
و هتيجى هتيجى
سلامى للبناتيت القمرات



كلام عيب
-------
دحنا اللى عاملين النقض دا
يا عيوبة

بس ربك يسترها
منحرمشى من الدعوات الحلوة



PACHA
-----
عليه الصلاة و السلام يا باشا

لا يا عم متخفشى

مش كل المحامين وحشين يعنى
طالما مبيرفعوش عليا قضايا
يبقوا ناس كويسين

بحب الغنوة دى جداااا على فكرة
خلاص مسامحينك ع غلطة دخول كلية الحقوق دى
إكراما لإختيارك الغنوة دى

شكرا ليك يا متر
إتنين تلاتة و توب بحاله



WANDA
------
باب إيه اللى نفتحه
م القلب مفتوحلك ع البحرى
أهو يا جميل

على فكرة بحب الفيلم بتاع المشحم المزيت دا قوى و إبقى فكرينى أحكيلك إزاى كان أحد أسباب الجوازة المنيلة اللى أتجوزتها دى ..بس ف الروقان عشان مليش نفس إتنكد دلوقتى ...

صلاح ذو الفقار ؟
هوه زى القمر الصراحة
حد يستجرى يعارض ف كدا

بوسة و حضوناااااات يا ونداتى
و كل سنة و الكل طيبين
يا رب

أم ...بوبه
----------
نورتينى
و يا دى العيبة
أول ما تيجى تلاقى الهوليلة دى


و يا عيب الشوم
عاوزنى أنشرها ع الفضائيات كمان
و أسيح لروحى ف التوك شووووو !!!

لأ يا ستى مشكرين
خلينا ف البلوج سبوت أروق
اصلى مبحبش معتز الدمرداش
و لا بطيق بتوع البيض بيضك

و بموت ف منى الشاذلى صحيح
بس يوم ما أقعد أكلمها هشتكى من الدنيا و اللى فيها ؟؟
مش كاية المرة الوحيدة اللى شوفتها فيها
عيطت ؟؟




ADEL
----
ولاااااا يا عدولة
كل سنة و إنت طيب يا غالى

و بالنوسبة لموضوع فوزى
فإحياة يوسف توافق

انا عموما مش مستعجلة
عندك لحد الدنيا ما تخلص كدا

على راحتك ع الآخر
عيد مجيد عليك يا بابا



كلمات من نور
------------
أجمل كلام يا كلمات

ألف شكر ليكى




الطائر الحزين
------------
إيهاااااااااب
ازيك يا بن الحلال


و مليش دعوة بقى
هما سعد و إكرام
دول إتنين أخوات قاعدين فى اول صف قصاد الارحواز و بيتفرجوا
هيه

و قاضى أيه يا إيهاب بس اللى هيبقاله رد فعل ؟
تفتكر بياخد باله و لا بيهتم
دى مجرد أرواق محطوطة قصاده و خلاص

انا بجرى على ىخر جهدى
أصل الجرى ف رأيى
كل الجدعنة بصراحة

مفتقدة تعليقاتك دى بشدة
متبقاش تغيب علينا يا طائرى الحزين




مصرى جدا
--------
نعممممممممممم

مين دا اللى ميقولش حاجة ؟

دا بدل ما تطمنى خالص
و تقولى متخفيش يا بنتى



إنتى طالق
مش ناشز


و القضية مضمونة
و متقلقيش


تقوم تقولى
بأساندك ؟؟
ليه يا هانى ؟
هوه انا هحتاج المساندة دى
و لا إيييييه؟؟

طمنى الله يكرمك ؟
انا اتوغوشت كدا

صحيح سألت المحامى بتاعى
بس أنا أصلى هارشة المحاكم
و القوانين بتاعتنا و عارفة إن ممكن ييجى منها العجب العجاب ...

إبقى نور المحكمة الله يكرمك
اللى هيا سعادتى لما تروق
و تلاقى وقت ترد
سلاااااام



ليس فقيرا من يحب
--------------
متقوليش حاجة يا ماما

انا و انتى نقول
الحمدلله و بس




غير معرف
-------

الكلام اللى إنكتب دا كبير قوى
و كتر ألف خيرك

ألف ألف شكر



الشعب لابد له من حكومة تشكمه
---------------------------
يا مشمش
إنتى كمان وحشااااااااااانى جدا
و مسيرنا نتقابل أكيد
لو ربنا إدانا عمر
إن شاء الله


و بمناسبة الفيلم دا و كدا

انا من اول ما رفعت القضية بتاعة الطلاق و انا مبشوفش الفيلم دا خااااالص و بمجرد ما ألمحه بغير القناة
من كتر منا مش عاوزة أتفرج عليه
و على القهر اللى فيه
مشاهد المحكمة دى بيحصل اللى ألعن منها بمراحل
و فيه رجالة طبق الاصل ف الإفترا
و محامين طبق الأصل ف البشاعة
و موظفين طبق الأصل ف موت الضمير
و قضاة طبق الأصل ف الإستهتار
و ياااااااااه
بلاش تفتحونى
خلونى ساكتة احسن يا مشمش
بوسة و حضونة يا أحلى حكومة



عاشقة الرومانسية
----------------
إنتى اللى مبتعرفيش تخبى
اللى ف قلبك بيبان حتى فى أسلوب كتابتك
و ربنا يسعد قلبك و تفضلى دايما تضحكى و من قلبك يا قطتى



رضا الكومى
----------
أيوووووه
البيت دا ينطبق على الحدوتة بتاعتى

أصلى ساعات فعلا ألاقى روحى بدل ما بعيط
أقعد أتريق و أضحك
لما الناس تفتكرنى مخى ضرب

و العدل المفروض يكون رادع
لأى ظالم يا رضا
متهيألى يعنى كدا

نورتنى و بقالك زمن
فيك الخير و الله

بصي يا ابو الفطاطيم
أنا من ساعة ما قريت الكلام ده و أنا بتدور في دماغي تلت حاجات
أول حاجة إني عاوز أقولك على حاجة
تاني حاجة ليها علاقة بالحاجة اللي عاوز أقولهالك كأول حاجة
تالت حاجة بقى و دي الأهم إن فعلا صدق اللي قال إن الشاطرة تغزل بشعر بنت أختها
المهم انت كويسة


يلا سلام

روتين غريب وعقليات غبيه

ايييييييييييييييييه ده كل ده يحصل و انا مسافره و قال انا جايه اتخانق انك معيدتيش عليا بمناسبه النيو ير
هههههههههههههه
و الله ضحكتينى يا اخت طماطم بس متستغربيش يا حبيبتى
كده يبقى انتى اكييييييييد اكيد فى مصر
و اسمحيلى ابقى ضرتك فى محمد فوزى
ده اذا ما كانش يضايقك سعادتك

ماما فاتيما ازيك؟
عارفة البوست اللى اتكلمتى فيه عن حقك فى استئناف حياتك الشخصية بشكل عادى كان مبشر أوى لأن الطبيعى ان الماضى يتحول لمعلومات و خبرات و كمان قدرات لكن منستخدمهاش إلا فى بناء و تطوير الواقع اللى بنعيشه بالفعل
أما ان يتحول الماضى لحياة يبقى الواقع مفيش أدامه غير انه يتحول لوهم ،،، فاهمانى أكيد ,,,
اتكلمى كتير أوى عن اللى جاى هتلاقيه بيجى بشكل اسرع و هو كمان بيقرب منك بسرعة زى ماانت بتروحى له بسرعة،، وللاسف لو هنتكلم كتير عن الماضى هنلاقيه باعت لنا جواب كل يوم مش بالبريد لكن هيكون عايش معانا زى ما احنا عايشين معاه
اخرجى من القفص ده لدنيا أكتر براح ،،، و ربنا يبارك لك فى يوسف يارب :)

بالنسبة للبوست متفق تماماً مع كينج توت

تقديرى

ها !!! يعني اية ؟ اية القصور البشع في الاحكام دي ؟ حسبي الله و تعم الوكيل
للأسف الانسان في مصر أقل من انة يقدر ياخد أقل حق من حقوقة ! :S ... بس اعتقد المحامي عارف يخلص الموضوع ازاي
ان شاء الله كلة هيبقى تمام و هتروف و تحلى
... قبل ما انسى .. مقال اسعاد بونس
جمبل جدا ... اعملي بية :)
خلي بالك من نفسك و سامحيني على تقصيري و قلة سؤالي

nigro
-----
الحمدلله
يا أبو قلب دهب
انا بخير
و متقولش حاجة أنا عارفة كل الحاجات
انبسطت جدا بسماع صوتك يا غالى
ربنا يرجعك بالسلامة إن شاء الله

منحرمشى من سؤالك




محمد مفيد
--------
تعرف
تعليقك موجز للحالة
و نورتنى يا محمد
بجد



صيدلانية طالعة نازلة
-------------------
آه شوفتى بقى يا لولاّ
عشان متسبينيش و تسافرى تانى يا ست إنتى و تسيبينى لمحكمة الأسيرة تلطش فيا

محمد فوزى ؟
يا سلام إحنا فديك
الساعة لما نبقى ضراير ؟؟
و بعدين يوسف حللى المشكلة
و قال هنعمل منه شورت كت ع الكمبيوتر
و اللى عاوزة تاخد نسخة ...


بس الأصل تبعى أنا
عشان الإيكستنشن الله يكرمك

بوسيلى العيال خصوصاً
الغزالون يهبلون




أحمد عبدالعدل
------------
اهلا يا دكتور
و الله انا موافقاك على كل كلامك
و متفائلة جدا
و عندى أمل كبير


بس يعنى بكرة دا
ملك يمينى و رهن تصرفى
بشك تام وكامل !!؟؟

يعنى يا دكتور الواحد بيعمل اللى عليه و يتفاءل و ياخد بالأسباب قدر المستطاع
لكن لما يلاقى حاجات بتقطع عليه تفاؤله دا بدون ما يسعى ليها و لا يروحلها و لا يفتكرها حتى
يبقى برضو يقع عليه العبء ؟



تعرف أصعب حاجة إيه يا دكتور احمد

أصعب حاجة إنك تكون فعلا خرجت من القفص
و طرت بعييييد على قد ما تقدر
و مع ذلك
الناس تفضل تشوفك
و كأنك جواه مخرجتش و لا حاجة
وإنك مش لاقى حاجة تنقال
و لا تنعمل تانى
و ضهرك ف الحيطة


نورتنى




amr...
-------
أخيراااااااا يا عمرو

يا عم دحنا زارنا النبى
و مسامحينك بس إبقى تعالى و طمنى عليك
التعليقات بتعمل كدا من غير قصد

و البوست الجديد
محاولة للإيجابية
و مقالة إسعاد يونس
فعلا جميلة

خالص ودى ليك

(يعنى يا دكتور الواحد بيعمل اللى عليه و يتفاءل و ياخد بالأسباب قدر المستطاع
لكن لما يلاقى حاجات بتقطع عليه تفاؤله دا بدون ما يسعى ليها و لا يروحلها و لا يفتكرها حتى
يبقى برضو يقع عليه العبء ؟)


ده بيتوقف يا استاذة على هدفنا واحنا بنعمل اللى علينا ،،،عاوزين نوصل ولا نزهق و نتعب ،، نختار هدف و نشتغل عليه و منوقفش و لا نتعب إلا لما نوصلله

بالنسبة لرؤية الناس لنا الناس دايماً بيشوفونا بعنينا و برؤيتنا لنفسنا لأن الإناء دائماً ينضح بما فيه ،،، تفاؤل هيبان ،،، ضعف هيبان ،، حزن هيبان ،،، حرية هيبان

قفص الماضى و قفص نظرة الناس الاتنين مفتاحهم فى ايدك ،،، على بركة الله :)

ربنا يكتب لحضرتك كل الخير و السعادة

لا حول ولا قوة الا بالله

هي دي مصر يا فاتيما .. اومال أول قاعدة من قواعد الحزب الوطني بتاعة إرساء مبادئ البيروقراطية دي تتطبق ازاى؟ .. سيبوا الناس يشوفوا شغلهم بقا
:D

معلش يا حبيبة قلبى الحمد على كل حال

اما فوزي بقا فانا فعلا معجبة بيه جدا بس لما مديحة فضحته وقالت انها طلبت الطلاق لانه خانها شلت منه جامد وخاصمته كمان .. هه بس
:D

هههههههههههههههه
ياحبيبة قلبى احنا فى عصر السرعة صحيح
او هية دى مصر

ياريتك كنتى متجوزة محمد فوزى ياخالتوا ياريتك

يلا الله يرحمه

ويسعدك ياخالتوا يارب قوللى امين

معلش علقت متاخر

إرسال تعليق