.

.

حركة تنقلات  

Posted by: فاتيما in ,


- فاطمة ؟
- نعم
- انا عاوزاك كل يوم تيجى متضايقة و زعلانة .. ممكن ؟
إندهاشة و نظرة راسمة ميت علامة تعجب
يعقبها سؤال منطقى

- ليه؟؟
- أصلك لما بتكونى حزينة عيونك بيبقى فيهم لمعة غريبة
وبتبرق زى نجمة
فى قلب العتمة
شكلهم بيكون حلو زيادة عن الأوقات التانية

و ببقى عايز افضل أبصلهم
--------------

اللى فات دا كان فلاش باك
من الزمن الغابر
حاجة نفتتح بيها المناقشة
أصل حلقة اليوم هتكون عن الكلام الحلو
و حيث إن الجمهور بيطالبنى أكون إيجابية
فهكون هكذا ... و احااااول أفتكر الحاجات اللى بتسعدنى
لعلها و عساها تغلوش على اللى بيضايقنى ... ماشى ؟



الكلام هيكون عن احلى كلام الواحد سمعه
و عمره ما بينساه
بس خلوا بالكم ..إنتم مطالبين تشاركونى المحاولة
محاولة التطلع للغد بإيجابية و تفتكروا إنتوا كمان
اجمل كلمات سمعتوها ..و تكتبوها فى التعليقات لو سمحتم
إتفقنا ؟



متهيألى لو سالت أى حد عن اجمل كلام سمعه من الآخرين
تفكير الرجالة هيروح لكلمات التشجيع
و الثناء اللى سمعوها عن تفوقهم فى دراسة
أو عمل او تصرف ما
إما نون النسوة ..فغالبا هيفتكروا كلمات الحب و الحنان
من أى حبيب سواء كان زوج أو أب او اخوات
أو أصدقاء ... أو كمان إبناء




أنا سخصياً بعتبر اجمل كلمة سمعتها ف حياتى
هيا كلمة
ماما
و مش مامى و لا أمى و لا أى مرادف تانى على فكرة
ليه ..... أقولكم
أصل يوسف مكنش بيندهنى غير بماما
زائد إنكم لو فكرتوا
تقروا الكلمة من الشمال لليمين
هتكتشفوا إنها ام مضروبة فى إتنين
ام ام
وبلغة علماء النحو و البلاغة إسمها التوكيد
الكلمة لما تتكرر مرتين تبقى دلالة على أهمية المعنى
و ام ام تبقى بالعكس .... ماما
قوم انا المفروض أعتبرها أحلى كلمة فعلاً
و لا اكون ببالغ ؟





صحيح سمعت كلام حلو كتير ف حياتى
لكن من بداية دخولى الجامعة قعدت مع روحى ف قعدة صفا
و خدت قرار كدا معرفش جبته منين و لا إزاى
بس قررت أصنف كل الكلام اللى بسمعه من أى حد
و أعمل جدول مقسوم عمودين
عامود للكلام الحقيقى و عمود للكلام المزيف
و بناء عليه بقيت لما أسمع أى كلمة خصوصاً الحلوة
احاول احطها ف المكان اللى يناسبها من وجهة نظرى
وحسب ما انا حسيتها




طبعا الأمر مكنش بيسلم من غلوشة بعض المؤثرات الخارجية
زى قرب الشخص اللى قالها منى أو بعده
و الطريقة اللى بتتقال بيها و التصرف المصاحب ليها
لكن فى كل الاحوال كان موقع الكلمة بيتغير تبعاً لما يستجد




يعنى مثلاً ... واحد زميلى فى الجامعة
يقعد يتكلم معايا
إنتى زى أختى و بحترمك جداااا و بخاف عليكى
احط الكلمة طوالى ف خانة الحقيقة
أقابل اخته بعد مدة فى مناسبة ما فتقولى اخويا بينصحنى
لما اخلص ثانوى و أدخل الجامعة مقعدش مع شباب خالص
و تكون شلتى كلها بنات و يا ريت يكونوا مختمرات كمان
بعد الصدمة لثوانى .. فورا أفتكر كلمته
و أنقلها من مكانها القديم ... لخانة الزيف و الكدب



الحكاية ممكن على فكرة تبقى بالعكس و إن كان حالات نادرة
إنى أسمع كلمة وحشة و إكتشف بعديييين
إنها كانت حقيقية و معايا مش ضدى
و غالبا الاهل بيحتكروا الخانة دى لمدة طويلة من العمر
من اول المراهقة لحد ما شوية شوية الواحد يكبر
و يشوف حاجات ف الدنيا تخليه يكتشف ان الكلام دا كان الحقيقة
مشكلة حياتى الأزلية و معتقدش هغيرها بسهولة
إنى أى حاجة بسمعها بفترض صحتها
إلى أن يثبت العكس




و صحيح بحاول احمى نفسى بالبعد قدر الإمكان عن الناس
و كتير قوى أتجنب التداخل فى حياة الآخرين بشدة
عشان منصدمش فيهم و ينصدموا فيا
لأنى عارفة و متاكدة ... إن مش كل واحد بيقول كلمة
بيكون حقيقى قاصداها أو قدها فعلاً
و بتعذب قوى من فكرة إن حد يقولى كلمة حلوة
من باب المجاملة أو التأدب أو لأنه مش عاوز يجرحنى و بس
بينما من جواه .. أنا شخص عادى بالنسباله بيمر عليه مرور الكرام
و هوه عندى .. كلمته قادرة تودى قلبى لأخر الدنيا
و تجيبه ف ثوانى



اللى فطسنى من الضوحك بقى إنى فى قعدة صفا برضو
تأملت القايمة بتاعتى دى ... و ركزت ف الخانتين إياهم
إكتشفت مهازل يشيب لها الجنين فى بطن امه




يعنى أول مهزلة
إكتشفت إنى عمرى ما إتقالى كلمة بحبك من أى راجل
و متنقلتش بعد كدا من مكانها ف الآخر !!
اما اللى بينطقها
يا اما كان بيقولها تأدباً و هوه مش حاسسها
و إما كان بيستخدمها كطعم لهدف مستقبلى و رسم و تكتيك
ومنكرش إنى سمعت كلمات إعجاب من آخرين
لكن الكلمة دايما كانت توقف ف زورهم و متطلعش
عشان الظروف و عشان بيخافوا منى و كمان عشان ميتحملوش
مسئوليتها و بالتالى تدفعهم للأرتباط بيا
و دى طبعا كانت كارثة قومية
تفاداها الجميع بلا إستثناء بالباءات التلات
بحنكة
و ببراعة
و ببركة دعا الوالدين





امثلة تانية كتير بقى على هذا المنوال
على مستوى الصداقة و الزمالة و العيلة و الشغل
و يووووووه ...هقول إيه و لا إيه ؟؟




فبعد نظرة متفحصة على القايمة اللى داخلة
على ييجى 20 سنة أهو
خدت قرار تاريخى لا رجعة فيه
إنى اقطعها و أرميها و أمسحها خالص
و مفكرش فيها تانى
لأن تأثيرها سلبى جدا و مش إيجابى
و جنب الكلام الحلو و اللى متنفذش ...فيه برضو كلام كويس
و حقيقى و إن كان قليل و مش كتير
بس دا حال الدنيا
و قليل جنب قليل يبقى كتير و بلاش إفترا عشان
الطمع يقل ما جمع




هلغى القايمة دى نهائياً لأنها تبدو فى غاية القسوة
عليا و على اللى حواليا كمان
عليا لأنها بتسببلى أحباط كل ما الاقى عمود الزيف طويييييييييل
و عمود الحقيقة قصير و يتيم
و على غيرى لأنى إكتشف إن مش كل الناس الى حواليا
بتبالغ ف الكلام ... بغرض الخداع أو الكدب
فيهم قليل الخبرة و اللى مش عارف عن غشومية ينقى كلامه
و منهم اللى متسربع و اللى مش فاهم حقيقة مشاعره و اللى مخدوع فيا
و مش لازم كل كلمة هقف عندها بقى و احطها محل إختبار
لأنى أنا شخصياً ... بقول كلام ساعات و إكتشف قدام
إنى أقل منه أو إنى أذيت صاحبه
و مكنتش اتمنى أعمل كدا



طب زى ما بعذر نفسى .. لازم لأتمس الأعذار لغيرى
و الدنيا مش مستاهلة جداول و عواميد
و حركة تنقلات طول الوقت
و عمر الواحد مبقاش فيه كتير للفذلكات دى


و صحيح عبدالرحمن الشرقاوى بيقول
الكلمة نور
و بعض الكلمات قبور
دا واقع فعلى ومش مجرد كلام منثور
ساعات البنى آدم روحه تكون معلقة على كلمة
و سعادته متمثلة فى كلمة
و براءاته من الظلم تكون محبوسة على كلمة
لكن رغم ذلك مش دايما الكلمة بتبقى سيف على الرقبة
هيدبح صاحبها أو اللى قصاده
الكلمة ليها جانب تانى غير الأذى
و السحراللى ف الكلمة
تعويذته لو إتنطقت .. زى ما بتموت
زى ما ممكن كمان تحيى
يعنى اوقات كتير بيكون طوق نجاة من غير قصد



و الكلمة الطيبة ... صدقة
و احيانا كلمة بسيطة يمتد أثرها طول العمر و تكبر و تزيد
و تطرح بساتين فرحة ف قلب اللى سمعها
و ساعات كمان اللى قالها



و الحوار اللى بدأت بيه البوست مجرد نموذج بسيط
لكلمات إنقالت من غير أى غرض و لا قصد
من حد جواه مشاعر و مش قادر يقول لحبيبه
و بيكتفى ببضع كلمات توصل إحساسه من غير ما يقول
الأربع حروف بتوع كلمة ب ح ب ك
و صحيح صاحب الحدوتة راح و راحت أيامه
لكن الكلمة فضلت تنور ف قلبى كل ما أفتكرها
لأنها كانت حقيقة و مش زيف



فيا كل من أحببت
و تبخل على حبيبك بنعمة الكلام
متترددش و تقول الكلمة لوحدها ملهاش معنى و لا قيمة
لأنه مش صح




الكلمة ليها قيمتها ما دامت صادقة
و مش بتتقال كدب و خداع
وبقولك إنطق
إتكلم
قول


و إذا كانت الست إليسا عاوزة تطفى نور القمر عشان حبيبها
يبطل خجل و يقولها ... بحبك
ف انا معنديش مانع اطفى نور الشمس
عشان اسمع كلمة ... ماما و بحبك

---------------------------

كم مرة جاشت بى الكلمة
و بدت لعينى
و هيا تستأنى

فوق الشفاة رقيقة تحنى
جيداً و تستدنى
خدين مضمومين فى بسمة
و تكاد تغلبنى على قصدى
لأقول ما أعنى
و أفك طلسمى
و أجمع من حلقى الشباك
لتفلت الكلمة
و أعود أذكر مرة سلفت
عامين من بأسائها أغترفت
روحى الكتوم لأنها إعترفت
و سقطت تحت سنابك الكلمة
...............
ما اجمل الكلمة
ها قد نسيت حياتك الأولى
و الجرح و الذلة
ها قد جمعت الحرف جنب الحرف
و الحرفين
فلمعت بشى دافىء مقله
و تمدد الأعياء فى الشفتين
و غدا جسوراً كان مغلولا
و سقطت تحت سنابك الكلمة
صلاح عبد الصبور


This entry was posted on الجمعة, يناير 08, 2010 and is filed under , . You can leave a response and follow any responses to this entry through the .

39 كــــلام بيطــبطـــب عـــلى قــــلبى و روحــــى

احجز اول تعليق ااقرا و اجي

مممممممممم

بحبك يا امي :):):)

------
انا بحب اغنية اليسا دي بشكل غريب

ياترى كلامى معاكى فى انهى عمود فيهم يابطه؟


تعرفى انى انا كمان باعمل كده لا اراديا
مش مقصود انى اصنف كلام الناس
بس بحسه قوى
وباحس بالكلمه الحقيقيه اللى من القلب وبحس برضه بالانسان المزيف

اما لو على احلى الكلام اللى سمعته فمفيش فى قلبى وعقلى غير كلام بابا الله يرحمه لانه كان منتهى الصدق
وهو اللى منور لى طريقى لحد دلوقتى

يا ماما
وبحبك :)
شفتي ازاي من غير ما تطفي أي أنوار
مش بس الكلمة اللي بتفرق ، بيفرق جدا حد معين يقولها تكوني نفسك تسمعيها منه
دا ما يمنعش إن وقت الاكتوءابات النفساوية والإحباطات اليومية الواحد بيبقى نفسه في أي كلمة تبل الريق حتى لو من حد معدي في الشارع منعرفوش

طلباتك أوامر يا ست الحلوين
أحلى كلمات سمعتها على طريقة حمدي قنديل:

"انت قد المسئولية ويعتمد عليك فعلا" ... أعز صديقاتي في المصري اليوم :)

" بعد ما مشيتي من الشغل الناس بان جدا الفرق الرهيب ما شاء الله "... زميلتي في العمل

"دايما إجاباتك نموذجية " واحد كان متقدم لي :) ما تاخديش في بالك

"انت ذكية يا بنت انت " ... د. صبري عبد الرؤوف

دا الواحد اتقال له كلام حلو في حياته أهو
أمال أنا مكنتش واخدة بالي ليه ؟
لما أروح أتغر شوية بقى :)

بوست جميل كبير خطه صغير وانا عضمة كبيرة
بس مليان حقائق لدرجة مزهلة
انتي عاوزة اللي بيحب يقول على طول
بس بتقري في مكان اخر انه – رغم انه بيحب حقيقي - ساعات ميكونش قدها
وعليه
الى كل من سيقول بناء على البوست ده لأي حد بحبك
لازم تكون قدها
يا إما أحشرها في زورك واشرق بيها واخلص وخلصنا
لأنك لو مش قدها حتى لو صادق
فيه انسان ها يتكسر قوي بعد ما يسمعها
وتقف حياته ومسيرته عند سماعها
يا تقول بحبك وتكون قاصدها وقدها
سواء راجل او ست
يا إما روح يا جبيصي يا ولدي علشان بنرش ميه

ايه اجمل كلمة أنا سمعتها
مش ها أقولها لأنها سري انا وجوزي
بس كلمة نقلت حبنا لمرحلة تانية خالص والله
نادر ما حد يعرف يفهمها
وطبعا كلمة وزيزة من احمد
أه اصل انا اسمي وزيزة وبازوليني
واوعي تقولي لي معناهم ايه
دي لغة خاصة بين الوزيز احمد والوزيزة ستيتة :)

اه بالمناسبة تصدقي انك ست صح قوي قوي قوي
اكتشفت بعد كتير جدااااااااااااااااااااااااا
ان عالم التدوين بالنسبة لي افضله عالم افتراضي بلا اي علاقات بشرية
الا علاقات نادرة جدا ومنتقاة بشكل انا اللي احدده
علشان افضل مرتاحة ومريحة غيري وسعيدة بالتدوين زي يوم ما ابتديته
تحياتي وبوسة ويارب يارب تسمعي ماما وبحبك الإتنين

مبروك على اختيار مدونتك احسن مدونه.
فى الحقيقه الناس اشكال والوان وكذلك نواياهم ودرجة صدقهم
ولايعلم بذات الصدور الا الله سبحانه وتعالى
انا عديت الاربعين من عمرى ولسه حتى الان بتعلم كل يوم وبشوف العجب العجاب حتى من اقرب الناس ليه سواء من الاهل او الزملاء.
ولكى ننظر ونتكلم بايجابيه الخير كتير ومازال موجود
انا بدات فى مشوار خير ولقيت اهل الخير ليس لهم حصر سواء عطاء مادى او معنوى او رجوله فى المواقف والخدمات (مش هحكى عليه الا لما يخلص الموضوع)
اخوكى ابو سيف وشادن

ازيك يا فاطيما
جيت اشوف على فين العزم حتعزلى و تسيبنا
طلع بوست جميل اووووووووووى
عارفة انا اجمل كلمة اتقالتى هى مبروك
اصل انا لحظات النجاح قليلة معايا
و لما بسمع كلمة مبروك بفرح اوووووى بيها
و كلمة الحمد لله اجمل كلمة قولتها لما بقولها من قلبى بجد
و طبعاً الكلمة اللى اولها ب و اخرها ك
هع هع هع
اجمل كلمة سمعتها بس موضوعها عدى و فات خلاص

بخصوص الأغنية بتاعت بيستحى شوفت نفسى فيها لما سمعتها هههه
هو بدراوى
وبتحس لما بيرتبك بغير الموضوع
بيغرق بموجة ضحك جوات بحرو دموع

كلمة ماما كلمة جميلة مش العيال السيس
يقول مامى
مامى لما تلهفك يالا
هههههههه
ماما كلمة جميلة اووووى ربنا يكرمك و تسمعيها كثير من يوسف يارب امين

أجمل كلمة أتقالتلي

بحبك

لما كان بيقولها كنت بسمع زقزقة العصافير ، كنت بحس بدفي الشمس ، كنت بشم ريحة الورد

وانا قاعده مكاني

طماطم ياجميلة
بما انى متفقة معاكِ جدا فى كل كلمة قلتيها لدرجة حسستنى انى انا اللى كاتبة الكلام:)
ولانى برضه اكتشفت الموضوع ده من فترة ليست بالقصيرة
مابقولش اى كلمة غير لما بكون اقصد معناها الحرفى مهما كان درجة قرب أو بعد الشخص المستقبل
ولما دورت فى دفتر حياتى برضه لقيت ان اجمل كلمة سمعتها كانت"ماما" برضه:)
بس ماكنتش من ابنى كانت من طفل عندى فى الحضانة يادوب3 سنين وكان بيعتبرنى مامته فى المدرسة
اول ما سمعتها منه كان احساس لايوصف لانه صادق جدا والاحساس عفوى وتلقائى
واتمنيت انى اتجوز بسرعة عشان اخلف ولد شبهه ويقولى يا ماما بجد
لدرجة فى المدرسة كانوا صحباتى يسألونى عليه لو غاب ويقولولى ابنك فين؟:)
(الكلام ده كان اول مااتخرجت يعنى قبل الافلام اللى عشتها بعد كده)

ولذلك ومن موقعى هذا لما بقولك بحبك ببقى قاصادها بجد:)

:))

ربنا يبارك لك يا أم يوسف يا رب
بس هو فعلاً سؤال صعب !!
انا لسه مش عارف أجاوب على السؤال بتاع واندا لحد الوقت ؟؟ إيه أجمل يوم في حياتك ؟؟ .. تقومي سيادتك النهارده تسألي :إيه أجمل كلمة إتقالت ؟.. طب ما أنا ممكن أعمل عبيط وأقول لك إن أنا سمعي تقيييييييل هههههههه

بصي يا ست الكل ومن غير فذلكة .. ردي دلوقتٍ مش أبدي .. مش نهاية الردود .. يعني ممكن أفتكر كلام حلو اتقال لي كتير في كذا مناسبة ومرحلة عمرية ومكان ومن أشخاص مختلفين .. وممكن برضه أنسى كلام أجمل منه وأحلى كتير !
بس بجد اللي أنا مش هاقدر أنساه لما أنتِ اللي تقولي كلمة حلوة لحد .. وتشوفي تأثيرها عليه قد إيه !! .. يااااااااااه .. حتى لو هو بالغ في إحساسه بالكلمة دي .. زي ما يكون بيتلكك مثلاً إنه يسمعها .. أو مثلاً فهمها غلط .. بس في الحالتين أنا عن نفسي بابقى مبسوط أكتر لما أحس إن ربنا سبحانة وتعالى جعلني سبب في إني أفرح حد وأسعده .. ولو بكلمة .. آخر موقف : كنت في ميكروباص وباخد باقي الأجرة من راجل بسيط قوي .. فقلت له شكراً يا فندم .. تصدقي وتأمني بالله .. حسيت إن الروح ردت فيه .. بقى يتلفت حواليه ومش مصدق .. ويقوللي أنا ؟؟ .. وهو ماسك الباقي وزي الطفل الصغير ويضحك ويتكسف .. ههههههه .. ويبص للناس حواليه فيكتم ضحكته .. وشويتين يبتسم ويبص لي تاني ويضحك .. حسيت إنه اتضاعف واتضخم في قلب الهدوم .. قاللي وأنا نازل .. إلهي يا ابني يفرّح قلبك زي ما فرحتني .. والله العظيم خللاني دمعت !!
هو كان محتاج كلمة .. مجرد كلمة .. وأنا ما كنتش محتاج أكتر من دعوة صادقة زي دي !! بس !!

ربنا يا رب يسعدك يا أم يوسف ويجعل أيامك كلها فرحة وراحة بال . آمين

:))

عجبني أوي أوي البوست دة
كله على بعضه :) بتفسيرك وتحليلك المنطنقي جدا للكلام و بهزارك اللي في النص و بأني أساسا وحشني طريقة كلامك العادية اللي من القلب علطول دي

أكتر جزء عجبني ف كلامك هو إن مش كل الناس بتجمل الكلام بغرض الكدب أوالخداع... حسيت الجزء دة جدا لأني يمكن شفته فعلا حواليا جامد

امممم... :)مش عارفة أحلى كلام اتقال:$ بس يمكن أول ماقرأت أول سطور في البوست افتكرت كلام شبهه:))وهو إنه مش بيستحمل إني أعيط أبدا وإن دموعي صعبةأوي والكلام دة.. بس بيبقى نفسه أعيط برده في نفس الوقت!! عشان عينيا بتبقى حلوة بعد مأعيط ولونها بيبان
واااااء :( ينفع الكلام دة يا تمتومة؟
:)

افتكرت كمان كلام اتقال لي في تاني انترفيو في حياتي العملية وأنا لسة متخرجة من كليتي:) كانت نصيحة جميلة اوي اوي من مدير المدرسة اللي اشتغلت فيها، و طول عمرها موجودة جوايا جدا ومش بنساها

كفاية كدة عشان مش تزهقي مني:) بس هحاول أفكرلك تاني و آجي
قولي يارب:)). أصلي نفسي أرجع لعالم المدونـات تاني بس مش عارفة

كلمة مش مجاملة وهي بجدبجد من قلبي... بحبك بجد :)و كل فترة لما أخرج بتمنى أقابلك صدفة. يارب ربنا يسعدك ياجميلة

هقسم التعليق بتاعى لتلات حتت
الحته الاولى ... ليها علاقه بانه جه لوقت الواحد يفكر فى بكره ويفرح ببكره ويحلم ببكره ... ومنظنش طريقه انك تفتكرى الكلمات اللى فرحتك زمان طريقه حلوه ... لانها ممكن تشتغل بالعكس .

الحته التانيه ... الولاد لما بيقولوا للبنات انهم زى اخواتهم .. وبيقولوا لاخواتهم متعرفوش ولاد .. دا مش دليل كذب .. دا دليل اذدواجيه موجوده عند كل الولاد تعتبريها ميزه تعتبيرها عيب هى صفه مميزه لذكر الانسان العربى

الحته التالته بقى ... كنا بنجيب فى سيرتك من يومين انا وميرا وفضلنا نقول فاتيما دى حد جميل اوى فهى ترد تقول اه وحساسه اوى .. ويجى ساعه نتكلم كده فقلت اجى افتن لك عليها واقولك انها بتحبك اوى :)
فيا فاتيما هانم بلييييييز عشان كل اللى بيحبوكى خدى قرار انك تفرحى
والله الفرح بيجى بقرار مش اكتر
ويارب يكون البوست دا بدايه القرار دا
يارب

كلامك جميل وتلقائى وحاسس انك بتفكرى معانا على الورق.. حاجة كدة زى الفضفضة بس لغتها حلوة فعلا. حبيت أشارك بكلمة حلوة سمعتها وطلع عندك حق أنا كمان أجمل كلمة حسيتها كلمة قالتهالى بنتى وهى فى حوضنى (بحبك يابابا). ميرسى انك فكرتينى بكلمة حلوه حستها

شرررررررريط ذكريات حياتي كلها مر قدامي دلوقتي وسألت نفسي أنا ليه مش عملت القايمة دي علشان أعرف أقيم الكلام !!
يمكن علشان الكلمات الحلوة نقطة ضعفي ،، والحب ضعفي كله

مش مهتمة بحركة التنقلات بين الخانات ، علشان عارفة إن تقييمي للكلمة لما إتقالت كان بناء علي ظروف خاصة لحظية ..
وساعات بصدق كلام عارفة من داخلي إنه مش حقيقي بس علشان أرضي غروري أو علشان مش أعمل مشاكل
لو حد قاللي " بحبك " ببقي عارفة ليه قالها دلوقتي بالذات وليه إتقالت أصلا .. اللي بيهمني بعد الكلام هوا الأفعال الدالة علي صدق الكلام ده
والموضوع كبير أوي أوي
تسلمي بكل أفكارك ،، وقلبتي المواجع
شكرا ليكي ولإليسا هانم

مووووواه

أول تعلييييييييق هييييييييه

هقرا وأرجع إن شاء الله

شكلى ما كونتش أول تعليق

ياااااااااااااااااااه

مش عارفة أقولك إيييييييييه بجد فتحتى موضوع جميل ومهم قوووووووووووووى

وخلتينى أفكر فعلا فى الكلام اللى بسمعه وسمعته وفيه منه لسة معلق معايا قوووووووووووووووووووى سواء كان صدق أو كذب حلو ولا وحش

منهم مثلا جملة سمعتها من حد ومش مهم مين
إيه الأبتسامة الحلوة قوى دى

و وحشتينى

بس بجد حسيت قوى بصدقهم وقت ما أتقالوا ولحد دلوقتى حاسة بصدقهم ولكن للأسف ........ يالا بقى مش مهم

هو أحنا ورانا حاجة خلينا مستنين شوية
:))
-------------------------------

فيا كل من أحببت و تبخل على حبيبك بنعمة الكلام
متترددش و تقول الكلمة لوحدها ملهاش معنى و لا قيمة
لأنه مش صح
الكلمة ليها قيمتها ما دامت صادقة
و مش بتتقال كدب و خداع
وبقولك إنطق إتكلم قول
و إذا كانت الست إليسا عاوزة تطفى نور القمر عشان حبيبها
يبطل خجل و يقولها ... بحبك
ف انا معنديش مانع اطفى نور الشمس
عشان اسمع كلمة
و بحبك

هههههههههههههههههههه
وأنا كمان معاكى هعمل كده

ههههههههههههههههه

هبقى أجى تانى أكمل

انتى فين
فى بوست كتبته ما يجيبها الا ستاتها
توتوس بتعاكس يوسف :-)))
و انت ساكتها قولت ده فطوم حتطلع حماة عسل :-))) مكبرة دماغك زى امى ما كانت و لسه بتعمل

تعرفى فتحت الصبح اهو اشوف الجديد
لاقيت خيخة و فطوم كتبين بوستات جديدة
بدات بيكى طبعا

تعرفى احنا فعلا متاشبهين
انا برضه كنت بصنف الكلام
و كنت بعباطة باسال اخويا فى كلام زميلى الولاد
طبعا كان بيطلع الكلام معناه حاجات ثانية
و لان اخويا اصلا كان بيجب يفشر عليا بحاجات و لما اصدقه يقولى انت هبلة بتصدقى اى حاجة شغلينى الجمجمة شوية

اخويا ده يا ستى امبارح شدنا فى الكلام الصبح مع بعض حلو و رملى كلمتين ملهمش لزمة
و اخر اليوم اشترالى هدية و ذهب كمان تخيلى
اعمل ايه كنت عايزة افضل مقموصة يومين منه
عارفة مش حيقول انا اسف بس هدية غاليةدا كثير و الكلمة عندى كافية و زيادة

سنين الشغل و الدراسة عودونى مصدقش بالساهل و بالذات الكلام الجميل
مش شكاكة بس احتراس اصدق و بعدين اتلب على قفايا
دلوقتى مبكذبش حد بس برضه مابندلقش صدق
بحب احكم بالافعال و تعبيرات الوجة :-)) الى نادرا ما ببصلها

بس ايه البخل ده خبر واحد و مش خبر

مش عارفة حتصدقنى و لا لا بس بحبك يا فطوم يا فطمطم :-)
و البوسة ده بجد :-*

بصى يا طمطم احلى كلام الواحد سمعه هو الكلام اللى حسيت انه من القلب و عفوى و مش مترتب انه يتقال و ده طبعا بيبقى احلى و اجمل ووقعه فى النفس اقوى
و بعدين هيا كلمه بحبك لو اتقالت مش من راجل متنفعش
اصل انا كنت عايزه اقولك انى بحبببببببببببببببببببببببك جدا قوى خالص
اعتقد انها مش نفاق و انتى حاسه بده فعلا
خدى بالك من نفسك و بلاش حاله الاختفاء اللى انتى فيها دى

صدقتى والله يافاتيما

فعلا ساعات تكونى محتاجة كلمة .. كلمة بس هاتفرقمعاكى جدا

وممكن كلمة تتقالك ترفعك فووووق وكلمة تانيةتنزلك سابع ارض

واظن احسن قرارخدتيه انك قطعتى الورقة لان نتائجه سلبية اكتر من ايجابية

اللى بيتكلموا بصدق الايام دى نادرييين جدا جدا

اما بالنسبة للكلمات الحلوة اللى سمعنها

ففى كتير فعلا سواء من اصحابى او اهلى او بناتى اللى درست لهم على مدار حياتى

بس دايما اللى بتأثر فيا على الاطلاق كلمات زوجى ليا ..

ويمكن اكتر كلمة بتأثر فيها منه اول مرة قالى بحبك فيها مع انه قالها لى بعدها كتير

بس دى بالذات اول مرة ليها وقع تانى جوه قلبى وكأنى لسه بسمعها ..

بوست فكرة حلوة يافاتيما ..

ربنا يرجعلك يوسف ويقولك احلى كلمة سمعتيها وهى ماما ..

وانا حاسة فعلانفس احساسك لما اسمعها ان شاء الله انها هاتكون حلوة جدا وصادقة جدا

دمتِ بخير ..

واللي ما سمع كلام حلو؟

او ما يتذكر انه سمع كلام حلو

شو يسوي؟

تعرفي حاولت افتكر احسن كلام حلو اتقالي معرفتش احدد حاجة بالظبط بس يمكن احلى حاجة بفتكرها كلام والدي الله يرحمه ليا ودلعه بجدده اكثر كلام حلو محفور في ذاكرتي
عزيزتي لست وحدك من على استعداد لاطفاء الشمس لتسمعي الكلمتين
تحياتي لك

بحبك يا أحلى ماما في الدنيا..
و أنا بقرا البوست بتاعك و عند كل تصنيف للناس و للكلمات اللي بتطلع منهم كنت بفتكر كلام اتقالي..كلام حلو لكن مش صادق قوي..وكلام من برة جامد لكن جواه حقيقة..كلام مبنفهموش غير بعديييييين..و كلام تحسيه في عيون حد بيستحي و تتطلع مكانه ابتسامة خجل على رأي إليسا..أنا بحب الأغنية دي قوي قوي.أما أحلى كلام اتقالي لأنه كان أصدق كلام فهو: "ماما..بحبك آآآآآآد السقف و آآآآآد اللمبة":))) مش فاهمة ايه العلاقة!.
وكلام دفى قلبي قوي و خلاني أبدأ أحس اني عايشة"نفسي أخليكي سعيدة على طول و أعوضك عن كل اللي فات..بحبك أكتر من روحي"...مع حضن طوييييييييل و دافي قوي.
انتي انسانة حلوة قوي يا فاتيما و بتعرفي تتطلعي حاجات حلوة قوي من جوا اللي حواليكي حتى في عز مانتي موجوعةمن جوة...ب ح ب ك ..ب ح ب ك.
بقولها و أنا قدها و قد كل حرف فيها..ربنا يسعد أيامك..و عمرك اللي جاي كله يا ست الستات

سؤالك صعب اوى يافاتيما
عارفه
طول عمرى محدش بيقول لى كلمه حلوة
حتى اهلى
ولما كبرت شويه ابتديت افهم
واستغربت قوى
هو محدش بيقولى كلمه حلوة ليه ؟؟
ولا حلوة ولا حتى وحشه
محدش بيدى انطباع عنى قدامى
خاااااااااااالص
مع الزمن اكتشفت شىء غريب جدا
ان .....
الناس بتقول الكلام الحلو عنى من ورايا
وبيتجنبوا يقولوة قدامى
وابتديت اتعلم ازاى ابص بطرف عينى
من تحت النضارة السودا بتاعتى
الاقى اللى قدامى باصص لى ومبتسم
بس بمجرد ما لبف وشى له
يمسح الابتسامه علطول
!!!!!!!!!!!!!!!!!!!!!!!

بالنسبه للكلام الوحش
محدش بيقوله عنى
الا فى الشغل
والشارع
والجيران
بسسسسسسسس

D:


وتفسير النقطه دى مفهوم طبعا
عارف ليه بيقولوا كدة
وليه بيقولوة من ورايا

اللى يغيظ بقى
الكلام الحلو
لييييييييه الناس بتتجنب تقوله فى وشى ؟؟؟

كوووووووووول اللى اعرفهم
حتى امى
حتى اعز اصحابى
ولما اتعلمت اقرا بين السطور
استغربت
حرام عليكوا
دا نقطه واحدة بس من البرميل اللى بيندلق من ورايا
كفيله ترفعنى سابع سما
ليه محدش بيدلقه فوق دماغى انا ؟؟؟
ليه بلاقى اللى قدامى مركز معايا قوى
حنى لو انا كنت مشغول عنه
بس لسلنه معقود
مع اننا شعب رغاى يعنى
وبمجرد ما اسيبه
عقدة لسانه تنحل

يمكن الكلام الحلو الوحيد اللى اتقال فى وشى
هو الكلام اللى بيتقال لى فى العالم الافتراضى دة

بس برضه هعتبرة غير مباشر
لانه عبر الكابلات

عندك تفسير للموضوع دة يافاتيما
حد عندة تفسير ؟؟؟

أنا واحدة بتحبك

بصي يا ستي ،، أنا فضلت أسمع كلام حلو لحد ما صدقت الكلام ده ، سواء من حبيب أو من أهل أو من أصدقاء ..

لدرجة إن الكلام ده صدقته وإتصرفت علي أساسه
مثلا " إنتي جميلة أوي " فحتي لو أنا مش جميله .. أنا عندي إحساس داخلي بالجمال وطبيعي بينعكس علي الناس اللي قدامي

كلام المدح بيخليني أثق في نفسي زيادة
حتي لو مجاملة ،، بعتبره نوع من أنواع اللباقة أو الإيتيكيت لرفع الروح المعنوية

عرفتيني؟

ايه السؤال ده والنبى

اممممممممممم احلى كلمة حب سمعتها طبعا

بحبك بس طبعا مش اي بحبك الى هى طالعه من معاميق المشاعر دي الصادقه اوي اوي اوي


بس فى كلام كتير حلو برضه ما اقدرش انساه

رغم انى باصوت احيانا وباقول ما حدش يقول ماما شووووووووووووووووويه

بس طبعا اول مره سمعت كلمة ماما كنت هافرفر من الفرحه والبت مريم ذلتنى على ما قالتها كانت بتقولي يا بابا مش عارفه ليه
هههههههههههههههههههههههه


مش فاكره حاجه يا فاتيما ايه

انا باقول زيك برضه احنا قرايب برضه
هههههههههههههههه

وحشاني يا طمطم ورووووووق يا جميل

معلش يا ام يوسف حأخش على أحمد سعيد الأول

احمد سعيد
=========
أصل انت يا بني ليك هيبة
من صغرك و انت هيبة
فالناس بتهاب تقول لك اي كلمة حلوة في وشك من هيبتك
:))


فاتيما
=======
مش فاكر كلام حلو كتير خصوصاً إني بأنسى كتير قوي
ثم الحزن بيكون اكثر تركيزاً في ذاكرتنا من الفرح
لكن ممكن نقول كل دعاء أمي ليا و كل كلمات الثناء و التقدير من مدرسيني في المدرسة و الدروس الخصوصية
:)

ياماما بحبك لانك اجمل ام فى الدنيا
باذن الله حيرجع ويقولها لك
ويقولك حاجات كثير نفسك يحكيها لك
وانا مش حتنازل عن بحبك ياتيتا
عاملة ايه يافاتيما وحشانى واحمد بين الحين والحين بيدخل يقرا لى علشان
احس انى فى وسطكم ولما قرا لى بوستك
قلت لازم اعلق
اجمل كلمة او كلمات هى اللى بيقولها لى زوجى خصوصا فى ايام مرضى
انا بحاول اكتب بوست عنه وعن مواقفه
وكلماته الحلوة
وكمان كلمة امى لما بيقولها جد من المدونين واحس بيها قوى
وكمان كلمة ياغالية منك ياقمر
ربنا يجعل ايامك كلها كلمات حلوة

انتى حد جميل ياطمطم انتى فعلا بتطبطى على روحنا بكلامك:)
وحسيت اوى البوست:)
وربنا قادر فى يوم وليله ولو الدنيا كلها قالت على شئ مستحيل قادر انه يقوله كن فيكون,قادر انك تسمعى كلمة ماما وبحبك فى وقت واحد..

اجمل كلمه اتقالتلى:
اممممممممممممم اصلى بتكسف اوى من الكلام الحلو:)فبغير الموضوع علطووووووول.
حتى لو حد بيقول مجامله تلاقينى بغيرهاز
بس بيلمسنى التصرفات الصغيره اللى ممكن متفرقش مع حد بس بتفرق معايا.

بس هقولك كلام اتقالى عجبنى:
_ انتى حد من جوه جميل اوى,
_والكلام العادى بتاع الاعجاب ده بس كنت بطنشه هههههههههههه.

كل ما افكر أفتكر بعض كلام أبنائي ، أو كلمات لأصدقائي .. و فعلا الكلام اللي يدل على النجاح و التفوق يعلق بالذاكرة ..

شكرا لك يا أم يوسف ..

حلو اوى التقسيم دة عشان بعد كدة مشاعرنا ما تتصدمش وتخش فى صراعات المفاجاة

عافة يا فاتيما الكلام الى بيكون مش من القلب و فيه كذب بتحسى بيه ، بتلاقى رعشة فى الصوت وهو بيتكلم ، بتلاقى لجلجة فى الكلام لأنه بيفكر يقول أيه الكلام مش طالع من القلب ، بتلاقى نفسك مش قادرة تصدقى أنه بيقول الجد ، دة عندى على طول يدخل من الود و يخرج من التانية ، الكلام الى بيكون خارج من القلب و بصدق بتحسى فيه بالدفا و الألفة ، وحركة التنقلات بتكون قليلة جدا ، صحيح فى أوقات بنلاقى نفسنا أنغشينا فى ناس و اديناها ثقتنا وهم لا يستحقونها ، و يمكن بنكون أديناهم أكتر من الثقة أديناهم الأمان و هم خانونا ، لكن صدقينى بقدر أحنا ما بنتألم و نحزن هم بيخسروا أكتر لأنهم خسروا ثقة ناس أدتهم الأمان ، و بيعرفوا كدة و يتأكدوا منه لكن بعد فوات الآوان .

انا جايه اغلس و ارمى بوسة
صباح الصبحيات الراقصة
حلوة الاخباريات و تعليقك عليها

كالعادة طبعا
:-)))

صباح التطنيش
وعدم رمي الصباح في مدونتي
يا عالم عبرونا
د احنا جيران القمر
عموما أنا لم أكمل البوست الحالة ميم خالص
وماليش مزاج لحاجة
بس بجد ساعات الواحد بترحه كلمة
بس عارفة على مدونة ويكا
في كلمتين حلوين
طبطبوا على روحي
حقيقي النهاردة محتاجة حد يطبطب على روحي

وقعة مش والا بد يا تومي
أنا دخلت نكدت فو وقت حلو ولا ايه
كلام بطوط خلاني افكر اني في حاجة حلوة ممكن تحصل
اقولك يا تومي
أحلامك حتأجليها لحد أمتي أنا مش معاكي أبدا أن بسبب الجرح دا تفضلي قافلة الدنيا ع جرحك
يوسف حيفرح لما تفرحي
من حق قلبك يلاقي اللي يداوية

طب وربنا انا بموت فيكي وبحبك وحجات كتير
ممكن تصدقي وممكن متصدقيش
بس ده اللي سمكه بتقوله
وفعلا عندك حق في كلمات نور وتفضل مع صحابها طول العمر
وفي كلمت بعيد عنك قبور
اغنيه اليسا تحفه
يا ام يوسف
ربنا ينورلك بصيرتك

انا عن نفسي لسه متقلش كلام كتير
مستنياه
ماشي ماشي
(وش بيغمز)

موضوع جميل

بس صدقينى مش فاكرة أحسن كلمة سمعتها هى إيه بجد

بس أظن غالبا لما بيكون حد بيمدح فى عقلى مش فى شكلى

وزى ما قولتى أنا بحب المقولة دى أوى

الكلمة لو تعرف حرمة , زاد مزخور , الكلمة نور وبعض الكلمات قبور

فاتيمااااااا
متشكر جداااااااااااااا علي المعايدة الجميلة اللي فرحتني قوووووووي
ربنا يخليكي يارب وكتر خيرك
كل سنة واحنا كلنا طيبين

انت ورطينا بموضوع المشاركه ده
انا عن نفسي احلى كلام حلو اتقالى وفاكره لما حد يقرأ كتابى ويشكر فيه واكتر كلمه فرحتنى لما الاستاذ مكاوي سعيد الكاتب الكبير قرأ وقالى( انت بتكتب حلو قوي يا مصطفي .. كتابك من الكتب القليليه اللي شدتنى انى اقرأها لحد الاخر.. لدرجه انى قرأته مرتين .. لغه الحوار عندك حلوة ولايقه قوى على الشخصيات ولو كتبت دراما هتبقى كاتب درامى كبير ) لماقالى الكلمتين دول كنت طاير من الفرحه وعايز امسك نجم السما بأيدي وعايز ابوس واحضن كل الناس رجاله او ستات مش هتفرق .. يمكن لأن الكتاب كان حلم حياتى اللي فضلت طول عمرى احلم بيه .. انا تقريبا ماحملتش بحاجه في حياتى غير انى اكون كاتب ناجح ومشهور ماكانش ليا احلام تانيه غيره
يمكن لما الاقي البنت اللي قلبى يتشدلها وتقولى بحبك في اللحظه دي اكيد هكون اسعد انسان في الدنيا ويمكن ساعدتى وقتها تكون اكبر من فرحه الكتاب
بس كل اللي اتمناه زي مابتقولى انت هنا انها تكون قالتها من قلبها وبصدق واكون انا الانسان الوحيد اللي شايفه ان حياتها مش هتستمر إلا بيه وماينفعش تكمل إلا معاه ولحد ما ده يحصل هتفضل ساعدتى بالكتاب او اي عمل تانى اقوم بيه .. مش بقولك انت ورطينا بحوار المشاركه ده
تحياتى لك يا فاطيما ولك منى كل الموده

إرسال تعليق