.

.

برج الحظ  

Posted by: فاتيما in ,




الاول

العواف عليكم


و ايوه ... هنلعب ابراج


اومال بسألكو عن تاريخ ميلادكم ليه ؟
و لا فاكرين فيها هدايا و جوايز ..
لاااااااا


لست انا هذوها السخص
أنتوا مخمومين فيا


اللى مش عاوز يلعبها معايا ... هوه حر
و اللى عاوز يكمل ... يخليه معايا لآخر البوست
قهراً بقى و محض افتراء


آه .. حاجة كمان
السيدة فى ضهركو
ما حد ييجى يقولى
ان الكتابة و الأعتقاد فى الحاجات دى حرام و مكفرة و كدا
عشان انا بقول من الاول أهو
إنها لعبة و تسالى
ماشى ؟


ومعلش البوست طويل وانا رغاية
ف محدش يقول ايه
و يا ساتر
و متقولى من الاول و احنا نقولك ابراجنا


اومال اقرركم أزاى و تبقى مفاجعة ؟؟!!


وبلاش البصة دى

عشان الفلكة ورا عداد المدونة أهى
و انا بقول يا شر
أشتر


استبينا ؟


نبتدى


طييييييييب


زمااااان و انا ف اولى اعدادى
يعنى من ييجى حوالى ربع قرن كدا

آه منا ست كبيرة
و اقعدوا ساكتين خااااااالص مسمعش حس
لأنه ... تواريخ ميلادكو عندى
و مفيش معايا ع الخط
غير اتنين تلاتة فوق السن
و الباقى كله طلع
من دور عيالى و احفادى كمان


كل شىء أنكشفن
و بان


المهم


كنت قاعدة فى ليلة من ذات الليالى عادى
جنب بابا الله يرحمه .... على ترابيزة السفرة


مكنش لسه الله يرحمه ساعتها طبعا
و بلاش خفافة
متضيقوش خلقى
لأن دا موقف تاريخى من عمر الزمن لا يتكرر كثيرا
لو تعلمون
انه اقعد مع بابا ف هدوء و عادى كدا


ليييه ... مش دى المهم دلوقتى
المهم إن بابا
كان بيشتغل صحفى


عارفين المعلومة دى
وزهقتينا منها


هقولكم معلش اقولها للى مش عارف برضو
و دى ليها سبب فى الحوار كله


و مش كل شوية
هتقاطعونى بقى
يا ختشى!!


المهم انا خلصت الواجب
وهوه الله يرحمه كان بيشتغل فى ماكيت المجلة
بتاعة الشركة اللى كان شغال فيها
عمال يقص و يلزق و يرتب المواضيع فى الصفحات
قوم انا بفضول رهيب ... أرخم عليه واقعد اتفرج


لقيته بيرتب الأبراج
و بيسألنى ببراءة متناهية
عاوزة برج التور يبقى حظه إيه؟؟


طبعا انا تنحت ف الاول شوية
و كعادة كل المراهقين (أياميها مش الأيام دى )
كنت واخدة كل حاجة ف الكون بمثالية
شجبت و نددت و رسمت مية و حداشر على جبينى
مستنكرة إن الموضوع يبقى كوسة و بتنجان


و اذا بى ادخل فى نقاش هادىء مع بابا
مبيحصلش كتير ف التاريخ الموضوع دا على فكرة
على اثره
أفوجأ سعادتكم بشوية حكائك عجيبة


اهمها ان 99% الجرايد و المجلات بتحط باب حظك اليوم
بالبركة و الهجايص
و فئة نادرة لا ترى بالعين المجردة اللى بيقرروا يدفعوا فلوس
و يعينوا حد متخصص هوه اللى يكتبها


و ان الفكرة الأساسية من وجودها فى أى صفحة جرنال
هى ملى فراغ فى الصفحات الفاضية و التسلية مش اكتر
و ان سبب تواجدها برغم عدم مصداقيتها

أن أى واحد لما يقرى حظه ع الصبح ..
ينبسط و يتفاءل .... دا لو بيصدق شوية ف الأبراج
و يضحك و يتريقأ .. لو مبيصدقش فيها خالص


نظرتى ساعتها اتغيرت كلية
لأنى كنت فاكرة الحكاية بتنكتب بجد
زى ما كنت فاكرة كل حاجة فى الدنيا بتتاخد جد
ومن يوميها بقيت اقرى حظك اليوم فى اى مطبوعة
و انا متوجسة خيفة


بعدين لما طلعت ثانوى و جامعة
قلبت معايا بهزارع الآخر
يعنى ابقى قاعدة وسط زمايلى فى الكلية
وواحد فيهم مثلا مضايقنى بحركة غلاسة
اروح ماسكة الجرنال و قرياله
برج الثور : اللهم احمنى من اصدقائى اما اعدائى فأنا كفيل بهم
و أبصله و يبصلى ... وتقلب معانا بضحك


الهزار دا اتنقل معايا بعد ما تخرجت واشتغلت
لما يصدف برضوو حد من الزملاء يكون معاه جريدة او مجلة
بتبقى القراية برضو على نفس المنوال
و فيها صدف لطيفة احياناً و تأليفات من عندى احياناً


بس عمرى ما كنت بقتنع ان أى حد و لو متخصص
ممكن يقولك عمرك اللى جاى فيه إيه
مهما كان شاطر و ربنا مديله فراسة

ما زلت عند قناعتى دى
لكن مع التقدم فى العمر
بقيت اشوف القصة بشكل مختلف شوية
اكثر تفتحاَ و هدوء

يعنى ما المانع إن الواحد يكون منفتح على أى شىء و كل شىء
و ايه يعنى لما يكون فكرة ان حكاية الكواكب و تأثيرها
على حياة البنى آدم دىرغم غرابتها .. تبقى ممكنة

ليه مصدقش ان الطبيعة ممكن تأثر على البنى آدم بشكل او بآخر
دا درجة الحراة عالية او منخفضة حتى بتغير للواحد مزاجه
يبقى حركة الكون و الكواكب مش هتغيرله حياته
و ما كلها مخلوقات الله و بتأتمر بامره
يبقى مبعدناش كتير

و ما دام كل شىء بأمر الله .. فليه كمان الكلام
و الأعتناق فى الفلك و الأبراج
ميكونش بامره ؟


متنكروش ان فيه ناس عندهم فراسة
و حاسة سادسة و تبصر ..
يقروا فنجان او خطوط الكفوف او يراقبوا النجوم و الكواكب
انا قابلت منهم ناس ف الواقع فعلا عندها موهبة بجد
و متهيألى كلنا شوفنا او سمعنا حكايات كتير كدا


و أى كان الوسيلة و الطريقة و الفكرة و الشخص
ايه المانع انى اسمع
و اخد اللى يعجبنى


و ايه المانع انى لما اشرب قهوة اقلب فنجانى
و اتفرج ع الأشكال اللى فيه
و اشغل خيالى و لو على سبيل الهزار و التفاؤل؟!


انا مؤمنة بقدرة ربنا و الموهبة اللى أداها لبعض عباده


واصدمكم بقى فيا و اقولكم
انى مؤمنة بوجود المخلوقات الفضائية
و مش هرش نافوخ من كتر الفرجة على افلام السيما
اصله ... ليه لأ ؟؟
مش مستبعد يكون فيه مخلوقات غيرنا ف ملكوت الله
هوه احنا كنا جبنا آخر الدنيا لما هنجيب آخر الكون و نتأكد ؟!!


ما نعلمه من المعرفة قليل
و ما دام كل شىء فى علم الله و لم يصلنا منه غير القليل
فليه كمان ميكونش الفلك و الأبراج جزء من هذا العلم
الذى لا نعرفه و الله اعلم


انا ما زلت
لا اؤمن بواحد يقولى
متخرجيش النهاردة من بيتك
او احذرى يوم الخميس الجاى من المقربين
عشان دا عبط حيثيى


لكن اقتنع جدااا إن ابناء البرج الواحد لهم صفات مشتركة تجمعهم
فيما عدا الإستثناءات
دا واقع بشوفه حواليا ... لما بركز فيه


يعنى مثلاً
بلاقى اغلب ابناء برجى اللى هوه الثورعنيدين و دماغهم حجر
اغلب برج العقرب اذكياء و لدغتهم و القبر
اغلب الحوت عاطفيين لكن مخهم تجارى
و اغلب القوس كرماء
اغلب الأسد قوى و واثق ف روحه لدرجة الغرور
و اغلب الميزان اجتماعى جدا وبتاع مصلحته


حتى الستات و الرجالة فى كل برج
ليه طبع معين
و ساعات كنت اقعد اتسلى بالفرجة على اللى اعرفهم
واقارن مواصفاتهم الشخصية و طباعهم قياساً بأبراجهم
و اقعد اقول .. دا مش دلو خالص
و لا دى سرطان البتة
و فيه ناس لايق عليهم برجهم جداااا
و بيتعرفوا لوحدهم من غير مجهود كبير


الملخص انى النهاردة هلعب معاكم لعبة
كنت بلعبها لوحدى ف كل شهر يناير يعدى عليا


بقعد اتتبع التنبؤات بتاعة السنة الجديدة
للأبراج و اولهم برجى طبعا
و اشوف السنة دى هيبقى لونها إيه
و على آخر السنة اشوف حصل إيه
و ايه محصلشى


منكرشى انى ساعات بقرى حاجات
و اتمناها تحصل بجد
و اقرى حاجات تانية و اقول الحمدلله
ان المنجمون كاذبين مهما صدقوا


اللعبة مش وحشة
و مسلية
و ممكن تندهشلها جدا و من الصدف اللى فيها


يعنى من سنتين
الست ماجى فرح
تنبأتلى انى فى شهر سبتمبر2008 هتجوز !!
قوم روحت حكيت لماما من باب الفكاهة
و الحاجة أستبشرت خير
انها هتتخلص منى فى ظروف غير غامضة


و عدى سبتمبر 2008
أحم

و سبتمبر 2009
أحم احم

و متجوزتش انا


و الغريبة ان حظى السنة دى
فى توقعات برج التور 2010 بيقولى هتتجوزى برضو
و مش عارفة هيا متوصية من امى و لا إيه!!

و ماجى ناويها الليلة يعنى ناويها



اللى استعجبتله فعلا لما توقعات برج العقرب
انه على نهاية 2008 هيسيب شغله
و يقضى فترة متعسرة مالياً


و دا اللى و انا بقوله لماجد اخويا فى اول يناير هزار
اتحقق فعلا و فى آخر ديسمبر ... و مش هزار


من غير مقدمات منطقية
الواد ساب الشغل بعد الازمة الأقتصادية
و قعد سنة ف البيت تقريباً


العالم بتوع الفلك
قالولى من نص 2008 هتدخلى مجال جديد
و تكونى منه مكاسب و صداقات لا تتخيلها
و قد كان ... لما ابتديت انخرط ف التدوين بذمة
و احضر لقاءات و ادوام على ذلك لا شعوريا
طبعا دايرة معارفى اتسعت و خرجت للحياة تانى بعد انزواء


يعنى مصادفات لطيفة
و متخسرشى



وبما اننا دخلنا فى 2010 خلاص
يبقى لازم تعرفوا معايا السنة دى مخبيلكم إيه


برج الحمل
--------
السنة دى هتتخضوا جامد من كام حركة مش لطيشفة و هتتحملوا
مسئوليات جسام
و هتاخدوا بالكم من اشخاص هيتعلقوا فى رقبتكم
فشدوا حيلكم



مشاهير هذا البرج
وليد هى وظروفها - mano -ليس فقيرا من يحب - amr...
- مى -
حلم كان - بنت القمر - يا مراكبى - بطوط حبوب - موناليزا
- نـــور - ana keda - مصطفى ريان - غادة محسن


برج الثور
-------
السنة دى كلها نجاحات و برجى اكتر الأبراج حظاً و تفوقاً
يلا .. سنة من نفسى مش كل سنة ضرب ضرب عاوزين شتيمة

همضى عقد مربح فى مايو ... لأ و هتجوز كمان حد ولا ع البال!!

مشاهير هذا البرج
داليا قوس قزح - فاوست - reem - سوما - تغريد صديقتى العزيزة
أحمد talk

برج الجوزاء
----------
سنة تحولات جذرية و تقلبات و خلوا بالكو قوى من نفسكم .. اللى وحيد
هيفضل خلى القلب
و اللى مرتبط هينصدم عاتشيفياً شوية

مشاهير هذا البرج
مها زين - Bobo - المعتصم - nigro - كاميليا - صيدلانية طالعة نازلة
- يا سمين فنانة مفروسة جدا عبير صديقتى العزيزة - اخويا الكبير
- im the crazy one


برج السرطان
----------
السنة دى قدامك سكة سفر مهمة و هتغير حياتك و هيحصلك تغييرات
على كافة الأصعدة
عاطفيا و اسريا و اجتماعيا
و هتلاقى الحب ف سكتك لو مش متجوز


مشاهير هذا البرج
خالد همس الاحباب - Doba- شيماء على قهوة بالفانيليا - A.SAMIER
مسدس صغير - حفصة الناس و العالم - الباشمهندس إسكندرية


برج الأسد
-------------
برج يسوفة يا بشر سنة يحصل فيها تطورات كتير تتخلص فيها من اثار الماضى
(يا رب ) و هتعيش مغامرات عاطفية و هتلاقى الحب لو كنت وحيد


مشاهير هذا البرج
يوسف روح قلب ماما - رنا بنت قلبى - محمد الغرباوى - لماضة - سوووو
شاب شنكوتى - ميادة أيامنا الحلوة - أميرة على كوكب مهجور - مهندس مصرى
خايف من الحقيقة - أحمد سكر - شريف PACHA - سبايدرمان - d.chandra
أحمد - k


برج العذراء
---------
السنة دى هتنتهى مع بدايتها كل متاعب السنة اللى فاتت
و على صعيد العلاقات الشخصية

هتعيش فى سلام مع اللى كانوا تاعبينك و لو عندك اولاد
خلى بالك لأن هتعانى من مشكلة متعلقة
بحد فيهم على اول الربيع و لحد الصيف

مشاهير هذا البرج
بسمة bosbos - وليد كنج توت - رحيل محاولات للبحث عنى - داليا ماى كورنر
مايكليتووو - إنجى هات من الآخر - أحمد عبدالعدل - احمد الصباغ - wanda
سالى حاجات جوايا - حفيدة عرابى


برج الميزان
-----------
سنة كلها قلق لازم تاخدوا بالكم معرفش ازاى
بس القرارات بتاعتها هتأثر على السنين الجاية و الصيف كله لخابيط
اللى كان بيحب و مطلشى .. هينسف حمامه القديم و يحب تانى

مشاهير هذا البرج
كيكى عوووو - سنوهى - محمد هاى فولتا - نبضات - Joudy- شيماء جمال - كيارا
ابراهيم العدوى - هانى مصرى جدا - ... I wish i were a butterfly
أحمد سعيد - بنت من بنات حواء


برج العقرب
-----------
السنة دى فلوسه كتير و سفرياته كمان وعاطفياً مشاعره هتفيض
و يعيش قصص عاصفة خصوصا انثى برج العقرب اللى هتتلقى اكتر من عرض جواز
و على آخر السنة العقرب هياخد قرار سريع يا جواز يا فراق

مشاهير هذا البرج
ميرا الاميرة ست البنات - مى - واحدة مفروسة - شاهى مفيش حاجة - ماجد اخويا
خواطر خاطر سامح عزت - محمد عبدالرحمن شحاتة - دعاء مواجهات
أم بتـول - شمس الدين



برج القوس
----------
سنة فيها انفراجات على المستوى العائلى لكن على مستوى التعامل مع السلطات
فيه مشاكل
و محاكم و قضايا و كدا و كمان فيه سفر و فلوس جاية
و شفاء من مرض و وظيفة مهمة فى الصيف


مشاهير هذا البرج
دودو عاشقة الرومانسية - غادة عبدالعال عايزة اتجوز - آبى هانم بتنجانى
اسلام مواطن مصرى نايم - asafo anaroze -احمد شقير- shimaa
رنيم مبتسمة دائما - محمد عبدالعاطى جست هيومن - Ahmed Mubarak


برج الجدى
----------
الحظ السنة دى حليفه و لو بيشتغل فى مجال عام هيكسب مؤيدين و شعبيته تكتر
عاطفياً هيتخلص من كل الضغوط اللى كانت خنقاه سابقاً و هيبدأ فترة جديدة
حساسة شوية لكن هتنتهى آخر السنة

مشاهير هذا البرج
ستيتة حسب الله الحمش - بت خيخة واى كلام - عسقول - عمر بيكا ابن وليد و هبة
بدراوى - نسرين بسيونى - لجين ابو الدهب - أبو حميد - طارق الغنام

برج الدلو
---------
سنة مزدحمة جدا و ف اول السنة يا جواز يا طلاق يا عيال
و نتايج السنين السابقة
هتهل بشايرها السنة دى و فرص فى العمل لازم تغتنم
و عاطفياً فيه تقلبات اول اسنة و أواخرها


مشاهير هذا البرج
صبرنى يا رب - حرروف - خواطر شابة - سكرة - ياسمين انسانة - اسامة عبدالعال
شيماء سمير - إيمان بنات افكارى - angel love


برج الحوت
----------
محظوظ السنة دى جدا وهيلاقى مكاسب مالية كويسة للناس اللى شغالة فى التجارة
بس يغتنم الفرص اللى بتجيله و يكون برضو حذر و فيه انتعاشة عاطفية كبيرة
و الحب بيندهله و يقوله انا أهو

مشاهير هذا البرج
الواد عادل ابنى - bascouta بساكيتو - ابويا الله يرحمه - الحاجة ام فاتيما
بنت مصرية - رندا حياتى فى كلمة
- القدر و انا - Heba- بيطرية و مش بإيدى

بس خلاص



لأ مش خلاص ... لسه
بناء على الكلام الكبير اللى انكتب فوق دا
هبتدى معاكوا اللعبة

و احط تنبؤاتى الخاصة بيا و بكل اللى بحبهم


عمرو هينطحن ف شغله و هيخطب على نص السنة كدا
المراكبى هيعزمنا على حفل توقيع لكتاب جديد
البت سوما هتنخطب و تتجوز و تسافرمع جوزها
داليا قوس قزح هيجيلها فلوس كتير هيا و احمد جوزها وتشوفنى بحاجة
نيجرو لسه مش هيلاقى بنت الحلال و هيفضل يا قلبى يا متغرب
تغريد صاحبتى و جوزها هيشتروا شقة جديدة اوسع شوية
احمد سمير هيسافر برا مصر مع مراته
صاصا مسدس صغير هيخطب

يوسف هيرجعلى
اميرة على كوكب مهجور قلبها هيدق باللى يستاهلها
وليد و هبة هيعملوا عملية اللحمية لعمر فى الصيف و يبقى زى الفل
وندا هيبطلوا الناس اللى بيضيقوها عموماً .. يضيقوها
نبضات نبوضتى هتلاقى حب حياتها
هانى هينط ف الكوز و يتجوز

ميرا هتلبس الطرحة على آخر السنة كدا
و كنت هقول ماجد اخويا هيشتغل .. بس هوه فعلا اشتغل
دودو عروسة البحور هتشتغل فى مكان تانى احسن و انسب
سكرة روخرا هتتخش بيت العدل
شيماء سمير هينكتب كتابها و تنشر ديوانها التانى
و انسانة هتحمل وهتخلف ولد
آبى هتسافر مع جوزها فين معرفش
ستوتة هتخلص المطلوب منها بخصوص مهامها الوظيفية بنجاح
وعسقول هيجيله شغل برا مصر
البت خيخة هتمر بقصة حب تطلع فيها روحنا
و روحها و روح اللى بتحبه
و ع السنة الجاية ..هيتجوزوا
الواد عادل هيمضى اول عقد لفيلم سينما
بسكوتة هتلبس دبلة خطوبة
اما أنا بقى .. فزى كل سنة ماجى تقول هتجوز و متجوزشى
و زى ما بتقول غدغود حبيبتى غادة عبدالعال
طلعت فوق السطوح و هز الهوا كمى
كل البنات اتجوزت و انا قاعدة عند امى


انا حطيت توقعات حلوة اهو
كلها جوزات
و شغلانات و خطوبات
و ترقيات و سفريات


أياك حد فيكم يا غجر
ييجى يقولى بعدين ... وشك كان
وحش علينا و لا حاجة
و توقعاتك بتخض عشان دى مش بتاعتى
دى بتاعت الست ماجى

وصحيح هاخد الموضوع
بروح رياضية


بس كمان الفلكة موجودة أهى ى ى ى ى
بتقول يا مين ينضرب بيا


والسنة الجاية فى نفس المعاد
إن شاء الله
ابقوا فكرونى نتلم تانى و نلعبها
وكل سنة وانتوا طيبين




آه قبل ما انسى
شوية ملاحيظ ع الماشى


1
الاخ بلوجاتى عامل شغل حلو قوى عن الأبراج
انا سخصياً لقيته واصفنى جدا
خصوصا (العيوب) و بجد مميز

هنا



2
التوقعات بمزيد من االتفاصيل للأبراج 2010 هتلاقوها
هنا



3
يوم الجيمعة انا عند النادى إن شاء الله من عشرة الصبح
يا ريت متخلونيش اقف كتير لوحدى
عشان انتوا خلاص حفظتوا الجملة الحمضانة بتاعة كل مرة
(الشباب البايظ )
و كمان عاوزة اكتر من حد من الرجالة يكون معانا
عشان العالم اللى جاية من سفر نروحلهم المحطة بتاعة المترو
و نسيب ناس تانية عند النادى و لا هقطع نفسى يحنى


4

فيه ناس اكيد هرشت الحكاية طوالى زى عمرو
و ناس قرت اللى ف عقلى بالمللى زى ستيتة
انى اعمل نتيجة بأعياد الميلاد لكل حد عاوز
يفتكر عيد ميلاد احبابه
اهو التواريخ وعندكم .. وعدوا الجمايل




5

البيانات بتاعتكم اوحتلى
بحاجات كتير عاوزة اكتبها
بس فى بوست تانى منفصل
و عليكم خير



6
الغنوة دى تقريباً انسب حاجة جت ف بالى
و انا ناوية اكتب البوست دا
أسمعوها ف الروقان




7

عادة فى المناسبات اللى زى دى
لما حد يحب يختم الكلام ف الحظ
و التنجيم والأبراج
المفروض عميانى كدا
بيقول الجملة المأثورة اياها

" كذب المنجمون و لو صدقوا "
أو
" لو علمتم الغيب لإخترتم الواقع "

انا بصراحة مليش مزاج اقولهم
و يحضرنى فى الموكف اللى انا فيه دلوقتى قول مأثور تانى بيقول

جيت أعدل البخت ... لبّخت


اتمسوا بالخير


ما يعرف الغيب المجهول
غير ربنا
و الرب معين
و لا يفتح
الباب القفول

إلا إيدين البنى آدمين



This entry was posted on الخميس, يناير 28, 2010 and is filed under , . You can leave a response and follow any responses to this entry through the .

73 كــــلام بيطــبطـــب عـــلى قــــلبى و روحــــى

بحجز اول تحليق

فوووووووووووووووووووووووووووووو

ايه السهر و كل الكلام ده ؟؟؟

لما نشوف يافندم توقعاتك لبرج الجدى

1-اكيد 99.9% من الحظ في الصحافة تاليف
اذا كان احمد رجب نفسه اشتغل في كده و اعتقد انيس منصور كمان :):)

2-انا اعتقد برضه في الكائنات الفوضائية :) و يارب اشوفهم قبل ما اموت

3-عقد فيلم :) قولي بس اتخرج :)

4- يوسف يرجعلك ده تنبؤ ليه ولا ليكي :)
يارب يرجع

5-بسمع الاغينة

6-من 10 هاكون هناك ياامي ان شاء الله و صحيت :):)
مش ماماتي صحيني بقي
ههههههههههههههه

7-مستني البوست اللي حاي

8- كل المجهود ده عشان بوست :)
ربنا يخليكي يا امي و تفرح الناس كده حتي لو بمجرد كلام :)

هنركب اهو ان شاء الله من 7 الصبح نعمل ايييييييييييه اكتر من كده يعنى ان شاء الله باذن الله هتلاقينا اول ناس ادام النادى:)

كنت مخمنه انا موضوع هتقولى هيحصل ايه ده قلت بلاااااااااااها :)
كله كويس كله جميل,دعه يعمل دعه يمر:)

لالا ان مش مصدق نفسي انااول تعليق عند
فاتيما يا لهول المفاجأه
طب هروح بقي اشوف البخت بيقولى ايه وارجع اعلق

يا معلم يا معلم مشاهير البرج مره واحده روحي يا شيخه الله يجبر بخاطرك
هو صحيح انا متسيط وافكاري وكتبي يتحدث الجميع عنها ونظرياتي في الحياه تدرس في كبري اللأكاديميات العريقه
ولكن يحضرني التواضع فمن تواضع لله رفعه
وهو الواحد مننا ايه غير شويه تواضع وحبه صفات زي التناكه والأنفه وشويه صفات
انا فعلا داخل علي خطوبه عرفتي منين بقي ان برج الحمل داخل علي مسئوليات .
ربنا يسر عشان لو لقيت الحمل تقيل مش هعرف اشيله
وابيعها واقلب

انا من ساعه البوست اللي فات وانا عمال اقول يا ترى ايه اللعبه دي؟
بس انت بتقولى برج الحمل يخلى باله وهيشيل مهام وناس هتتعلق في رقابته .. ايه اللي هيحصل يعنى هخطب او هتجوز مثلا ؟ مش عارف بس والله تبقى حلوة احسن من العزوبيه دي رغم استمتاعى الشديد والكبير جدا بيها
بس يا فاتيما انت ماذكرتيش اسمى في القائمه الاخيرة .. توقعاتك يعنى الحياه هتمشي ازاي ؟
بالنسبه بقي للحوار بتاع الابراج ده انا شايف اننا ممكن ناخده على سبيل اللعبه او الفكاهة لكن طبعا مش هو اللي يمشي الحياه او نربط عليه امورنا كلها زي ما البعض بيعمل .. كمان اتفق معاكي ان في ناس عندهم الفراسه كمان اعتقد ان في كتب بتدرس العلم ده
تحياتى لك يا فاتيما وان شاء اشوفك بعد بكرة على خير

فاتيما انا قرات البوست تانى
الحمل هيتحمل مسئوليات جسام .. دي مكن بردو يكون لها معنى كويس انك تروحى شغل افضل او يجيلك فرصه افضل او حاجه كنت بتدورى عليها من فترة وهتستدعى تعب وشغل منك اكتر بس ده في حدذاته شيئ كويس جدا بردو قد لا يستدعى القلق .. يعنى نتفائل خير بردو ونقول يارب عام جديد سعيد علينا كلنا

-ملحوظه : على فكرة طريقتك في الكتابه حلوة قوى انا مت على نفسي من الضحك خصوصا في الفقره الاولى .. لما مزاجك بيكون رايق بتتطلعي بدرر ..والله بتكلم جد
ربنا يوفقك دايما يا فاتيما يا جميله

يا حبيبة قلبي ولا جه علي بالي انك هاتعملي كدة خالص


البوست جميل قوي وعجبتني مشاهير كل برج دي

والتنبوءات اللي كلها أمل وفرحة مش عارفة أقولك البوست ده أبهجني قد أيه وجه في وقته

ربنا ما يحرمني منك أبداً

ربنا يسعد قلبك يا فاتيما زي ما حاولتي من خلال البوستين اللى فات ودا تسلينا وتخرجينا من المود وتتفائلي بامنيات بتتمنيها لينا
بجد بدعيلك ربنا يسعد قلبك
وكل حد عنده امنيات ربنا يحققهاله السنة دي ... وكل لعبة وانتي بخير يا احلى فاتيما

تحياتي البسكوتيةالصباحية الشوكولاتية

انا فعلا متوقع ان السنه دى باذن الله هتكون تغير جذرى فى حياتى
اصل انحناقات الطريق عندى حادة جدا
وماشيه بنظام
بمعنى
تقريبا كل 3 او اربع سنين تغيير حاد بيقلب كل حياتى
وجوة ال3 او الاربع سنين نفسهم
مللللللللللللل
وروتين وكل الايام شكل بعضها
بس 2010
حاسس انها فيها لفه جامدة
لفوووووووووووووووووق قوى
لتححححححححححححححححت قوى
الله اعلم
بس حاسس
الاحساس دة حسيته قبل كدة 3 مرات من بدايه الالفيه
ومكدبش معايا

يلا
ربنا يسهل

تعلى هنا بقى
انتى اتكلمتى عن الناس كلها
وطنشتينى
وانا حاسس ان دة متعمد
ولا ايييييييه ؟؟؟

وبعدين نعالى هنا
مين قالك ان برج الميزان اجتماعى
اطلاقا يابنتى
مش اجتماعى خالص
بس هو عندة الموهبه
وبطفرة عاليا جدا
بس مش بيستخدمها
نادرا لما بيستخدمها يعنى
وبعدين عمرة ماكان بتاع مصلحته
مين الدسيسه اللى قال كدة
؟؟؟؟؟؟؟؟
بصى
لو ينفع كل الابراج تتوصف
البرج دة غير قابل للوصف
لانه متناااااااقض جدا
وبيجمع بين حاجات استحاله تتجمع فى مخلوق واحد

اسألينى انا ....

:)

يا صباح الورد على عيونك يا فاتيما

قرأت البوست عالسريع علشان عندي امتحان كمان ساعتين وعجبني بجد

انا برج الدلو والبرج ملخبط السنة دي

دمتي بخير

:-)))))))))))))))))))))))))))))))))))))))))))))))))

:-*************************************************

اخلص الامتحان و ارجعلك يا فطوم
*= بوسة
x= حضن

:-xxxxxxxxxxxxxxxxxxxxxxxxxxxxxxxxxxxxxxxxxxxxxxxxx

حاولت اكتب تاريخ نميلادي ما عرفتش في البوست اللي فات

عموما هوا
31/2/1990

اية فية حاجة؟

طيب جربي دا كدا

28/10/1963

برضو مش نافع

طب اجيب تواريخ منين تاني

أنا برج القوس
سنة فيها انفراجات على المستوى العائلى يارب لكن على مستوى التعامل مع السلطات
فيه مشاكل و محاكم و قضايا و كدا لاحرام عليكي أنا لسه فيه شابي محاكم وقضياء ايه ههههه ربنا يبعدة مشاكل كمان فيه سفر و فلوس جاية يااااااااااااااااااارب انا بحب سفر بس فين سفر مع ابي كويت انا هي فرق بين يوم واحد هي يو 11 وانا يوم 10 هههههههه
و شفاء من مرض و وظيفة مهمة فى الصيف

يارب اللهم شفاء كل مريض

أنا حوت مش ميزان يا طمطم
:(

يعني خلاص اكيد برج العقرب
في فلوس كتير السنه دي
بس اهم حاجه قصة الحب هتنتهي بجواز ولا ولا مش هتنتهي بجواز
تقبلي مروري

هو انا للأسف مش بحب لأبراج ولا بعترف بيها خالص
:(

بس احلي حاجه مشاهير برج الأسد ده
انا بقيت من المشاهير ^_^

نسيتينى ولا مش عارفة تاريخ ميلادى
عموما أنا برج العقرب بس لى ملحوظة حته أن قرصتة و القبر دى والله ابدا مش كل الناس أنا تقريبا عمرى ما قرصت حد اتقرصت آآآآآآآآه و كتير كمان لكن الحمد لله عمرى ما فكرت أنى أأذى حد ، عموما توقعاتك للبرج حلوة ويارب يكون فيها شيئ من الصحة و تكون السنة دى سعيدة علينا كلنا يارب و يفرح قلوبنا و قلبك ان شاء الله ، على فكرة انا كمان حاسة أن يوسف ها يرجع لك السنة دى أو على الأقل ها يزوك مرة كل اسبوع ولا شهر حتى أن شاء الله ان شاء الله ان شاء الله .

رغم الاجواء اللي حواليا
لكني حاسس ان 2010 هي بداية الخير كله
ربنا يسعدك يافاتيما ويهنيكي
وكان نفسي اجي لقاء الجمعة بس مش هاينفع
تحياتي لكل اللي هايحضر اللقاء

اييييييييييه ده هو انا صفحتى ضلمه اوى كده و لا ايه يا ست طمطم

عاااااااااااااااا
اشمعنى انا اللى متوقعتليش
خلاص بقى مش لاعبه
ماس ليها حظ و ناس ليها ترتر
هههههههههههههههههههه
بس برضه معلش
و عموما يا اختشى حظى و انا عارفاه كويس

يا خبر بفلوس بعد سنة يبقى ببلاش احنا نستنى سنة (هه يا صبر أيوب) ونشوف الناس اللي حطيتلهم توقعات حيقولوا ايه وساعتها يا نديلك نيشان وبقى نعمل لك برنامح تلفزيوني ليلة رأس السنة تتوقعي للكل بقه بس لو خابت توقعاتك نعمل فيكي ايه يالله الطيب أحسن ههه وانت متوقعتيش حاجة وحشة لحد فالمسامح كريم
تحياتي لك

دا ولا التوقعات المرئية بتاعة الثانوية العامة :)
ربنا يسعدك ويحقق لك كل خير من حيث لا تحتسبي يارب ويسعد كل من حولك ويحقق كل ما تمنيتيه لك ولغيرك

طيب عايزة أعرف متوقعالي ايه بقى هيتقبض علي آخر السنة ولا ايه :)

إهداء من فاتيما إلى يوسف روح قلبها وقلبي

على فكرة ممكن أعمل النتيجة دي لو تحبي ابعتي لي بس التواريخ وهعمل لك نتيجة حلوة إن شاء الله

صباح الورد يا أمى
إن شاء الله ربنا يحقق لهم حاجات أحلى من كدا كمان
دايما عندى غقتناع إن اللى ربنا شايله للإنسان أحلى من أى توقع
عشان كدا كنت بطلت أقرى الأبراج لانها بتخيب توقعاتى
:D
لانى خيالى وعشمى وظنى فى ربنا كبير أوى أوى أوى
النقطة الأهم :
بالنسبة للقاء المدونين
أنا جاااااااااااى
هنزل من بيتنا الساعة تسعة بعون الله
فهكون هناك على تسعة ونص أو عشرة إلا ربع
وان شاء الله هنعمل جسر جوى من المترو للنادى عشان الناس الطيبة اللى هتيجى تعرف توصل بسرعة :)

خالص التحية إلى أمى الطيبة :)

شاب فقرى

برج الحمل
--------
السنة دى هتتخضوا جامد من كام حركة مش لطيشفة و هتتحملوا
مسئوليات جسام و هتاخدوا بالكم من اشخاص هيتعلقوا فى رقبتكم
فشدوا حيلكم

يا يلهوى ياامه خضه وغير لطيفه ومسؤليات جسام وهيتعلقوا فى رقبتى

مليييييييش دعوة

مش لاااااااااااااااااااااعبه

هه

حرام انا عايزة حاجه تفتح نفسى

ههههههههههههههههههههههههههههه

ربنا يسعدك ياروح قلبى يااااااااااااااااااااااارب

هههههههههه
كذب المنجمون ولو صدقوا
السنة دى قدامك سكة سفر مهمة و هتغير حياتك و هيحصلك تغييرات
على كافة الأصعدة عاطفيا و اسريا و اجتماعيا
و هتلاقى الحب ف سكتك لو مش متجوز
هو بصراحة من اول السنة وانا مطحون سفر من القاهرة للصعيد ومن القاهرة لاسكندرية
وهتلاقى الحب فى سكتك لو مش متجوز ربنا يكرمك يعنى ما فيش حاجة واقعة على جنب كده للمتجوزين ههههههههههه
من الاخر كده ولا يهمنا ابراج حمام ولا زغاليل حتى
الحمد لله على كل حال ولن يصيبنا الا ما كتب الله لنا
تحياتى نشوفك الجمعة ان شاء الله

طمطم
حلوه اللعبه دى بس اقولك انا تخيلت انك هتعملى بوست ترتبى فيه اعياد الميلاد عشان تعملى احتفالات
ههههههههههههه
كنت طمعانه فى شيكولاته
ماليش دعوه هتجبيلى شيكولاته يوم الجمعه برده
ربنا يكرمك يارب ويحققلك حلمك واملك ويجمعك مع يوسف حبيبك يارب
صباحك سكر وشيكولاته بكل الانواع
يلا بقى انشاءالله ماحد حوش

أزال المؤلف هذا التعليق.

السنة دى هتنتهى مع بدايتها كل متاعب السنة اللى فاتت
و على صعيد العلاقات الشخصية
هتعيش فى سلام مع اللى كانوا تاعبينك

أحم أحم

ياسلاااااااام يسمع من بقك ربنا يا فاتيما ويارب تبقى التوقعات صح

وحشاااااااااااانى قوى

برج الجوزاء
----------
سنة تحولات جذرية و تقلبات و خلوا بالكو قوى من نفسكم ..اللى وحيد
هيفضل خلى القلب و اللى مرتبط هينصدم عاتشيفياً شوية

مش هنصدم عاطفيا اكاد اكون متأكدة يمكن صدمات تانية فى الحياة معنوية ربنا يستر منها

اما التحولات الجذرية دى فمن اول السنة وهى ملزمانا ويارب تنتهى على خير

مكنتش مهتمة اعرف خالص عن الابراج بس بجد البوست شجعنى مش لازم نقتنع بس نعرف ونأخدها تسلية ونشوف النتائج

شكرا يا فاتيما
مجهودك باين اوى فى البوست
ربنا يوفقك ويكتبلك كل خير
تقبلى مرورى

أنا مش مؤمن بيها لكن برضه شايفها فرصة للتفاؤل لكن التشاؤم لا طبعا ......... وعلي فكرة أنا خلاص اتجوز ت لكن يمكن ربنا يسمع منك ونوقع عقد جديد

شكرا لك أختي

اللـــــــه ..
انا طلعت من المشاهير اهو ...
تصدقى انا حاسه بكده من زمان
هههههههههههههه

انا فعلا من حوالى شهر بدأت اتدرب فى جريده كمحرره .. هى دى المسئوليه اللى ورايا ده غير دراستى طبعا ..

طيب كنت عايزه اسأل سؤال صغنتوت قد كده ...

هو اللقاء هايظل فى النادى طول الوقت ولا هاتروحوا فى حته تانيه .. وكم ساعه هايقعد اللقاء كده ..
عشان انا يمكن اشجى نفسى بجد اشووفكم

وبما انى شبه جديده عايزه اتعرف عليكم وتتعرفوا عليا ...
هاستنى ردك ...
تحياتى وتسلمى على اللعبه الحلوه
... ;) ,,, ;) ...

فاتيما
بجد بوست طويل بس ممتع ودمه خفبف
ويارب تتحقق كل تنبؤاتك الطيبة لكل المدونين
وتقدرى تعدلى البخت من غير تلبيخ
كان نفسى اتمتع بلقاءكم يوم الجمعة القادم لكن البخت بقى لبخ معايا
باباى تعب ورجعت اسكندرية امس .. وطبعا صعب اسيب اخواتى لحد ما نطمئن عليه
تحياتى ودعواتى لكم بلقاء ممتع وساعات جميلة من الصحبة الممتعة

لولا كل سنه وانتى طيبه لو انها جت متاخر شويه

على راسك كذب المنجمون ولو صدقوا حتى لو كانوا صادقين وكمان
كذب المنجمون ولو صدفوا يعنى حتى لو جت صدفه معاهم

تقبلى ارق الامنيات بعام كله خير وهنا وسعاده لكل الناس

زهراء

أيتها الأم المكلومة ..أم يوسف

قبل الرد علكى أسأل المولى عز وجل أن يرد لك فلذة كبدك ويعينك حتى تقر به عينك

نيجى لهجومك عليا دفاعا عن خيخة

ياستى أنا ما قذفتش المحصنات..أنا اتهمت كتاباتها فقط بالفساد والدعوة اليه ولم أتهمها شخصيا لأنى لا أعرفها شخصيا ولكن كما قال رسول الله أمرت أن أخذ الناس بالظاهر وحسابهم على الله (أو مامعناه)

وبناء على ذلك و بدون التحيز لصداقتك معها قولى لى ما رايك حين تقرأين لامرأة مايلى :

1- ان كان نفسها تسافر مع صديقها الرجل الغريب الى بيته فى الصعيد وتبيت عنده لولا انها نسيت احضار بيجامة للنوم وأعلنت ان بعد كده حاتاخد معاها بيجامة فى التجمعات عشان تبقى "جاهزة"

2- انها تقول لرجل من المعلقين غريب عليها : تعالى فى حضنى واعتبرنى ماما

3- انها تكتب موضوعا تقول فيه وهى المرأة المحصنة الملزمة بعفة اللسان كلمات قذرة يعف لسانى عن النطق بها (موضوع ياجمال .. ايش عرفك انت)

4- انها تكتب ع الملأ انها مش حاتعمل كذا غير لما تنتف حواجبها

وياما نصحها ناس بالحسنى وباللين وكان جزاؤهم اما السخرية والعناد واما عدم نشر تعليقاتهم من الأساس

ياريت تكونى عادلة وتقولى رأيك

طب انا فين بقا وش زعلان

التوقعات بتاعتك انا مش فيهااا اهيء اهيء اهيء

:)
:(

اصلى مش عارفه افرح لان اللعبه حلوه ولا ازعل لان اول برج اتذاع هو برجى وبتنبؤات صادمه الى حد ما

انا لاحظت فعلا ان الصفات بتبقى الابراج بتبقى صحيحه لانى اول مره قريت فى صفات برجى دهشت من التشابه
وكمان قريب عند بلوجاتى صفات انثى الحمل اندهشت!! التشابه نسبته عاليه جدا

اهم حاجه نفسى تتحقق تنبؤك برجوع يوسف لحضنك
ربنا يفرح قلبك بيه ياام يوسف يارب :)

الميزان
-----------
سنة كلها قلق لازم تاخدوا بالكم معرفش ازاى
بس القرارات بتاعتها هتأثر على السنين الجاية و الصيف كله لخابيط
اللى كان بيحب و مطلشى .. هينسف حمامه القديم و يحب تانى!!!!
يااااااااااااااااااه ماشاء الله توقعات البرج زى الفل الله ينور الواحد مكنش عارف هيعمل فى حياته غير لمة قراء الكلمتان دول
منه له
منه له
توقعاتك انتى فى حبه تفأل ادينى حبه

انا واحده من الناس لو شفت بالصدفه البرج فى الجرنال بيكون من باب حب الاستطلاع ليس اكثر
وبصراحه باحب اعرف الشخصيات من تاريخ ميلادهم وباميل قوى لمعرفه الشخصيه من برجها
اما عن توقعاتك لبرجى بصراحه هى صادمه


على مستوى التعامل مع السلطات
فيه مشاكل و محاكم و قضايا
************************
ياسااااااااتر يارب

كمان فيه سفر
****************
اه جايه عندكم


و فلوس جاية
*************
اه يااوختشى فى فلوس جت وانصرفت وفى فلوس لسه هتيجى
(:


و شفاء من مرض
***************
اللهم اميييييييييين
اسمع منها يارب


و وظيفة مهمة فى الصيف
**************
ياعاااااااالم مين يعيش



دودو عروسة البحور هتشتغل فى مكان تانى احسن و انسب
***************
وعسى ان تكرهوا شئ وهو خير لكم
بقيت بقولها لنفسى كتير
ربنا يدبرها

بحبك يابطه قوووووى

adel
-----
ينفع التحليق فى عز البرد دا ؟!!
سقعة عليك يا بابا

1) مكنتش اعرف الحكاية دى يا عادل كنت فاكرة الكلام بينكتب بجد

2) انا معتقدة زيك بس مش عاوزة اشوفهم بقى .... الناس اعداء ما جهلوا و انا بخاف من اللى معرفوش

3) ان شاء الله يا غالى على ماما

4)يا ترى عجبتك؟!
فرقة الأصدقاء جزء من تاريخى انا كنت بسمعهم ايام المراهقة هما و الفور ام و غيرهم .. يعنى بيفكرونى بالماضى معرفش شباب الايام دى زى سيادتك كدا يحبوهم و لا لأ ؟؟

6) أصحيك ؟!!هطب أصحى انا الاول !!!

7) إن شاء الله يكون عن اللقاء

8) ميجنيش أعز منكم يا بابا

9) خلى بالك من نفسك و اشوفك بعبكرة بقى على الف خير






أبوحميد
------
لأ خير أن شاء الله
الجدى السنة دى حظه عالى



الشعب لابد له من حكومة تشكمه
---------------------------
تيجوا بألف سلامة يا مشمش
إن شاء الله
انا كمان هروح من بدرى قدر الأمكان عشان لما تيجوا تلاقونا يا حبيبتى

خلوا بالكو من روحكوا بقى
اشوفك على الف خير يا حبيبتى



mostafa rayan
--------------
طبعا يا مصطفى
انتوا مشاهير بالنسبالى
و انتوا نجوم بتنور سمايا
و سما التدوين

و إن شاء الله ربنا هيكرمك السنة دى
و كل العمر اللى جاى


انا متوقعتش لكل الأسامى
عشان بالمنظر دا هبقى عاوزة
مدونتى و المدونات المجاورة كمان

بس انا متوقعالك كل الخير يا صفصف
و اى مسئولية هتلقى على عاتقك
انا عارفة انك قدها و قدود

اشوفك على الف خير
إن شاء الله




هى و ظروفها
-----------
طبعا يا وليد
انتوا يعنى اقل منها
انتم مشاهير عندى انا يا فندم

و انا معرفش حكاية الخطوبة دى
بس كدا تبقى الست ماجى
بتقول كلام كويس اهو

الف مبروك مقدما
و ربنا يسعدك يا رب




وومن
----
انا فعدت أضحاااااااااك
و انا بقرى تنبؤات برج العقرب
قولت البت ميرا دى لازم افرح بيها بقى

لقيت الست ماجى ربنا يكرمها
تنبأت لوحدها أهو

ربنا يا حبيبتى يحققلك كل الفرح
و السعادة و نشوفك بالطرحة التلى
و تقولى فاتيما قالت
و ندى ماجى صابونة

اشوفك يوم الجمعة
يا ست البنات

Bascouta
--------

ربنا يسمع منك يا بسكوتى
و كل حد يلاقى الخير السنة دى
و اللى بعدها
و اللى بعدها
و ....

شكلك مش جاية الجمعة ...صح ؟

ميرسى على الصباح المشكلت بالشكولاتة
و عليها فرولاية مل البسكوتاية




أحمد سعيد
--------

بلاش البارانويا دى
الله يكرمك


مش انت لوحدك
انا متوقعتش لناس تانية برضو
ولا تعمد و لا حاجة

و الميزان اجتماعى فعلا
يعنى لو اتحط وسط ناس
أى كانوا مين
قادر يكسب ودهم
و اهتمامهم بسلاسة لو هوه عاوز
زى انت ما قولت

بس الدسيسة اللى هما أنا
بقولك
ان الميزان بيتنازل عن الموهبة دى
لما يلاقى وجوده وسط الناس
هيتعارض مع مصلحته هوه الحالية
فبيخلع و يزوغ و ينزوى
و يرجع وقت ما يحب
معتمدا على تأثيره ع الناس
و انه هيعرف يغلوش عليهم
و ينسيهم الحكاية دى

انما دا بعينه
عشان فيه ناس قلبها اسود
و مبتنساش
و مش الكل بينفع
معاهم حكاية المراجيح دى


و معاك انه برج متناقض
بس كمان بيعرف يتوزان
و يساوى الكفتين
اومال سموه ميزان لييييييه ؟؟


م الآخر
ربنا يكرمك يا احمد
و السنة تبقى كلها خير عليك
يا رب
خالص ودى يا اروق نزلاء العنبر




Lady E
------
صباح الرضا و النجاح
إن شاء الله يا لولو

ربنا يوفقك يا حبيبتى

و الدلو اصلا ملخبط خلقة
فى تركيبة شخصيته و علاقاته
و نظرته للدنيا اللى عنده ماشية غلط و طول الوقتى عاوز يصلحها

لو الحياة مشيت عادى
المفروض تقلقى

ان شاء الله
سنة خير عليكى يا حبيبتى

ربنا يوفقك
و ناجحة و بتفوق
يا رب



WANDA
-----
ميرسى يا ون ون ع البوسة و الحضونات

عملتى ايه ف الأمتحان

هروحلك اطمن حالا بعد ما اخلص رد ع التعليقات ان شاء الله

سلام مؤقتا يا حبيبتى
و واندتى





مصرى جدا
--------

تجيب تواريخ منين تانى ؟!!!


م السجل المدنى حضرتك


و لا تفتح المحفظة و تجيب ....


لأ مش فلوس
يا ساااااااااتر
خلاص ... مش عاوزين منك حاجة


دنا كنت هقولك طلع التاريخ
م الركم الكومى


و بعدييييين
دنا بقول انت و سوتيتة
و نفر قليل من الشعب البلوجرى
تقريبا اللى معايا ع الخط و المرحلة الزمنية

احنا الكوتشات
يعنى من دور احمد حسن و الحضرى بتوع المنتخب اللى شكله هيتلب من الجزاير و ربنا يستررررر ...
تقوم تيجى تقولى 1990 !!



عاشقة القمر
-----------
إن شاء الله خير يا عاشقة

خدى الحاجات الحلوة
و سيبك من المشاكل
إن شاء الله يحصلك كل الخير يا حبيبتى

خالص ودى ليكى

Heba
----
صلحته يا هبة خلاص



محمد عبدالرحمن شحاتة
------------------

إن شاء الله خير يا محمد

و قصة الحب هتنتهى حسب النصيب
و المكتوبلك انت و بنت الحلال

ربنا يفرحك و يسعد قلبك
دايما ... نورتنى




سبايدر مان spiderman
--------------------

و مش أى مشاهير
يا سبايدر

دنت برج الأسد

برج يوسف ابنى

أم بتول
------

بصى يا ست الستات

انا لفيت على كل المدونات اللى بحبها
و فيه ناس مش كاتبة برجها فى البروفايل بتاعه و كمان مبفتكرش تواريخ الميلاد عشان الزهايمر انتى عارفة


حكاية قرصته و القبر دى
انا مجرباها أصلى
من كذا عقرب صادفتهم

مش قصدى انهم انتقاميين
و فيهم عنف

انا قصدى ان غضبهم عاصف و شديد لدرجة قاتلة لناس تانية زى حالاتى
و بناء عليه قولت كدا

اشوفك على خير يا حبيببتى
أن شاء الله بعد بكرة
هاتى بتول معاكى القعدة غالبا هتكون زى يوم الفطار و اظنها هتنبسط


Mano
----

ان شاء الله خير يا مانو

و مالك بس يا بنى مكتئب كدا

وحاول تيجى فى أى وقت
اليوم طويل
بس عالله ميطلعش زى يوم البؤجة
و تروح ف خمسميت حتة برضو !!!




صيدلانية طالعة نازلة
------------------
مش انا اللى بقول

دى ماجى فرح

انا مليش دعوة يا ست

و مش انتى لوحدك يا لولاّ
اصلى لقيت البوست هيطول اكتر ماهو طويل خلقة و هكرر التنبؤات

بس مبدئياً كدا
ان شاء الله سنتك هتكون خير
بس انتى تطلعى النفر التانى من جواكى
انا دايما اقول لهانى اخويا الكبير كدا
اصله جوزائى يا نضرى برضو
و دايما لما اتكلم معاه اقوله انهين هانى فيهم اللى بيتكلم معايا دلوقتى عشان انا بتلخبط فيكو

حظك م السما إن شاء الله




خواطر شابة
----------
مش كدا و النبى ؟!!

دول حسبة 11 شهر يفوتوا هوا

حلوة فكرة البورنامج التلافزيونى دى

هنطلع منه بسبوبة كويسة

تحياتى انا كمان يا حبيبتى




يوم جديد
--------
الله يخليكى يا يم يم

ميرسى ع البوست بس للأسف مفيش وقت الليلة دى و لا بكرة ف الشغل اقراه لأنى مطحونة بقالى يومين و عندى اجتماعات منعقدة و مش لاقية وقت اهمس
انا قولت ارد ع التعليقات
عشان محدش يقلق بس

و هروح اقرى البوست براحتى
و شكرا مقدما يا حبيبتى
فكرة النتيجة حلوة نبقى نشوف ايه حكايتها على رواقة
خالص حبى ليكى

شاب فقرى
--------

أهلاااااا ازيك يا عزيزى

ان شاء الله ربنا يسعد الكل
و يحققله امنياته

و نشوفك على خير يوم الجمعة

ايوه كدا الشباب الحلو
انا عارفة انى اول ما اقول الحقونى هلاقى الجدعنة بتقول
أنا هو مين بينده

عادل و انت و وليد
ربنا يبارك فيكم يا رب



ليس فقيرا من يحب
--------------

معلش معلش
الست بتقولكم خدوا بالكم من روحكم
و أثبتوا كدا وقت الأزمات

إن شاء الله خير يا حبيبتى

لا تكلكى



همس الاحباب
---------

لأ مفيش

التوقعات العاتشيفية
للعزاب فقط


انتوا عاوزين تتجوزوا
و تحبوا كماااااان


إيه الإفترا بتاعكو دا


سيبوا حاجة للعالم الفاضية
تطمح لها و تنتظرها

لحد ما تحصل
و يقعوا ف الخية
و يقولوا
يا ريت اللى جرى
ما كان


اشوفك على الف خير يا خالود



sookara
-------

طب يعنى مبعدتش قوى عن توقعاتك

شكولاتة ؟!!!
دنتى داخلة على طمع بقى

دنا اللى كان بيتجابلى الشكولاتة ييجى على الوقت
وانا اللى يتقالى هاتى شكولاتة ؟؟!


لا لا لا
دنا مركزى التدوينى اتلخبط خالص
و بقى فيا الطمع

دنتوا خدتوا عليا قوى

طب مش جاية بقى

و لا اقولك

هاجى

و عندا فيكى

هجيبلك شكولاتة

يلا

بسمة عبدالباسط bosbos
---------------------
إحمين يا فندم

أن شاء الله كل المتاعب تنتهى
و تبقى الدنيا زى الفل

الناس اللى زعلوكى ..هيسكتوا

و هتلاقى الخير كله يا بسبوستى

انتى كمان وحشانى يا حبيبتى





إحساس طفلة محبة للرومانسية بس واقعية
-----------------------------------

اهو تسالى يا عزيزتى

و قراية سمات كل برج بتبقى لطيفة
و متخسرشى

بصراحة البوست طويل و معلش بس مكنش ينفع اختصر و المهم انه عجبكم




ahmed talk
----------

ايه يا احمد
قصدك ايه تمضى عقد جديد
بعد ما خلاص اتجوزت ؟!!!

قصدك تتجوز تانى ... ازعل انا كدا
الله
إنت ما صدقت ؟!!


لا لا لا


ان شاء الله تمضى عقد شقة جديدة
عقد عربية
عقد عمل جديد
عقد شرا ارض
أى عقد تانى خير عليك
هوه مفيش غير عقد الجواز ؟؟


متتلككش بقى

نورتنى



ghada mohsen
------------
و ليه لأ ؟؟

إن شاء الله ربنا يكرمك و تبقى م مشاهير الصحافة و الأعلام يا ستى

بخصوص النادى و اللقاء

انا معرفش الحكاية هتمشى ازاى

ممكن القعدة تعجبنا و نفضل فيه لآخر اليوم و ممكن نمشى عشان نروح ناكل
معرفش الصراحة

بس مبدئياً كدا
انتى عندك نمرة وليد و خالد همس الأحباب
اتصلى على أى موبايل فيهم شوفينا احنا فين و تعالى ف المعاد المناسب ليكى

و هتنورينا إن شاء الله
و اتشجعى متخافيش
كل حاجة عاوزة يبقى ليها
اول مرة
هما اول نص ساعة و بعد كدا هتحسى انك تعرفينا من زمان ..متقلقيش




القدر و انا
------------

سلامة بابا
الف سلامة

هوه احنا كل مرة كدا
حظنا وحش معاكى ؟؟

فين ماجى فرح تعدلنا البخت بقى

مقدرش اقولك حاجة غير تتعوض
و سلامة الوالد
ربنا ياخد بيده

لولا و زهراء
-----------

و انتم طيبين
و شرفتما المدونة بالزيارة

الف شكر ليكما





حرروف
-----

متزعلش يا فوفى

مش انتى لوحدك يا ستى انا متوقعتش لناس تانية برضو عشان البوست كان هيطول قوى و هعيد فى التوقعات

انتوا عارفين

البناتيت و الشباب

هتمنالهم ربنا يكرمهم بالحب و الخطوبة و
الجواز

المتجوزين و المتجوزات
ربنا يكرمهم بالعيال و الاستقرار
و العيشة الكويسة


الكل عموما
اللى لسه مخلصوش كليتهم
ربنا يكرمهم بالنجاح و التخرج

اللى خلص
و بيدور على شغل
يلاقى حاجة كويسة

و اللى بيشتغل
و عاوز فرصة احسن ربنا يكرمه
و بلاقيها


انتى ربنا هيكرمك ان شاء الله بكل اللى تتمنيه و احسن يا فوفى

بلاش زعل بقى يا شقاوة




نـــور
-------

بصراحى بلوجاتى متميز جدا
و جهده واضح و اسلوبه حلو فالقراءة ممتعة كمان

و متزعليش و لا تنصدمى
لو حصل أى حاجة
إنتى قدها و قدود
ليه متقريش التوقعات على انها
بتقولك كدا ؟




كيكى عوووو
----------

اعمل ايه بس يا كيكى
دى الست ماجى ... مش أنا

وحشتينى قوى يا بت انتى
و وحشتنى تعليقاتك
و بوستاتك اللطيفة
و دمك الخفيف
و ابتسامتك الحلوة
و ما تيجى يوم الجمعة يا شيخة بقى




عاشقة الرومانسية
----------------

ليه بس الصدمات يا دودو ؟؟؟


يا حبيبتى خدى الحلو اللى فيها و بس

انا سخصيا لما جيت اتوقعلك خدت الحلو و بس

و بعدين معلش يعنى
مين هيجراله كل الحاجات دى ورا بعض ف سنة واحدة ؟؟


حاجة واحدة و لا اتنين بالكتير

و انا نقيتلك الفلوس و الشغل


واحدة فيهم حصلت اهو
عقبال الباقى


و حاجة كمان انك هتسافرى حدانا فعلا أهو .... طب الست دى كويسة و بتقول كلام زى الفل !!!


انا كمان بحبك يا قطتى
جدااااااااااا

بوست جميل
وطبعا اسلوبك الساخر المرح في الحديث مع الشباب البايظ
انا معاكي في حاجتين
الاولانيه ان كله في الهجايص هايص
راجعي فيلم البيضه والحجر

اما المخلوقات الفضائيه فانا اعتبر الانسان اناااااني اوي اذا فكر انه لوحده في هذا الكون السحيق المترامي الاطراف

برج السرطان
----------
السنة دى قدامك سكة سفر مهمة و هتغير حياتك و هيحصلك تغييرات
على كافة الأصعدة عاطفيا و اسريا و اجتماعيا
و هتلاقى الحب ف سكتك لو مش متجوز

توقعاتك للبرج ده
ممكن تنطبق عاى كثيييييييييريييييييين
باذن الله

تحياتي لكي
واظل الح في الدعاء ان يعيد الله لكي جو( بتعطيش الجيم ) الجميل

الأخ خالد
------
اولا
شكرا
على دعوتك الطيبة
و ثانياً
نيجى لتعليق حضرتك
انا مختلفة معاك تماما
فى حكاية الدعوة للفساد
دى شكلاً و موضوعاً
انا من المتابعين الدائمين
لخيخة
و بشكل موضوعى
و مع تنحية محبتى ليها
على جنب دلوقتى
انا هتكلم كقارئة عادية تماماَ ...
و اجاوبك على سؤالك
انا كقارئة عادية
معرفش خيخة
اكيد هنصدم شوية مش قوى اول مرة
مرتين اقرلها بوست من دول
بس بعد كدا
رد فعلى هيهدى
و هيبقى عادى
(دا اللى حصل فعلا)
لما ابتدى اقرلها اكتر
و اعرف البنى آدمة دى
بتفكر ازاى
و نظامها أيه ؟؟
مش هاحكم بشكل متسرع
و اخد من الكلام فقرات
و اسيب الباقى
على نظام ولا تقربوا الصلاة ؟؟
هاديها فرصة قبل ما احكم عليها
و ارميها بتهم قاسية
زى بتاعتك
انا عندى 37 سنة
و الحمدلله قريت بما يكفى
ف حياتى لانى احكم على اللى بقراه
و لما دخلت عند خيخة لأول مرة
و لحد النهاردة
خلاص عرفتها ..
حتى لو مكنتش شوفتها خالص
رأيى فيها مكنش هيتغير
و ممكن اقولك انى
كنت هفهم انى أى تعبير غريب
و خارج فى كلامها مش مقصود بيه
الأباحة و قلة الادب
و تعليم الناس يقولوها ...
لأ
بالعكس ..
كنت هفهم ان مقصود بيه
معنى وسط الكلام عاوز توصله
و ميوصلش غير بمصطلح صادم زى دا
انا قعدت شهور لحد ما قابلت خيخة
ف الواقع على فكرة
و بالتالى انا بكلمك عن فترة ما قبل علاقتى بيها ما تبقى قوية
و وطيدة
و بناء عليه
هحط نفسى مكانك
1 و 2 و 3 و 4 اللى انت ذكرتهم مينفعوش من غير ما تحطهم
فى السياق بتاعهم الاول
و انا كنت وسط هذا السياق
من قريب او من بعيد
عارفة انها جابت سيرة الحواجب دى
تريقة و غلوشة كسبب
عشان متجيش بيه
(تخمينى الخاص)
و عارفة انها كانت بتهزر
مع محمود اللى هوه اخونا الغالى
اللى بينكسف من خياله اصلا
مع انه محامى معرفش ازاى
بس كل الصعايدة كدا الظاهر
وعارفة انها لما بتكتب
عن تجربة مؤلمة فى حياتها بتنفعل
و تتكلم معاناكأنها بتتكلم مع روحها
من غير رتوش و لا تزويق
و المفروض احنا نبقى فاهمين دا ضمنياً من غير هيا ماتطلبه
(يفترض اننا اصدقائها واصحابها
و قرائها كمان )
و عارفة انها لما كتبت التعليق دا
لحد غريب تقصد بيه الحضن المعنوى
و اللفظى مش اللى ف دماغك
و انا شخصياً ساعات لما بكلم عادل بقوله فى وسط كلامى يا حبيبى
عشان انا بحسه ابنى فعلا
رغم انه مش ابنى
بس معنويا دا احساسى
بكله وكأنى بكلم يوسف
و هوه كمان حسب وصفك ينطبق عليه كلمة غريب
صحيح مبكتبهاش هنا فى المدونة
لكن بقولها فى حياتى عادى
و الفرق بينى و بين خيخة
انها اكثر صراحة مع الناس
و مبتخفش غير من اللى خلقها
و شجاعتها بتتوصف تهور
و دا اللى بيخوفنا كلنا
عليها(مش منها )وبيدفعنا ننصحها بالنصايح اللى انت قولت عليها
لكن محدش فينا شايفها مارقة
و بتدعو للفساد بكلامها ولا حاجة
معرفش انت ليه شايفه كدا

...........

الأخ خالد
------
......... هكمل

انا عاوزة انصحك
نصيحة لله
بما انى زى اختك الكبيرة
و بما انى قارئة جيدة برضو
و استحملنى يا ريت


انت كمان نظرتك لخيخة
فيها ظلم
و تحيز شديد معرفش سببه

بس كلامك عنها و عن المطلقات عموما
و انا منهم (و بالتالى انجرحت ضمنياً ) خلانى احس انك واخد موقف غريب
و هجومى غير مبرر ناحيتها
و بترمى كلمات صادمة بغض النظر عن هتوجع مين و ازاى
انت متوقع انك تتكلم بالطريقة دى معاها و مع اى حد و يبقى عادى ؟؟


طيب حقك فى التعبير و ابداء الرأى
انت شايف كدا ..ماشى

طب ليه بتنكر عليها حقها هيا كمان
فى الحرية والتعبير زى ما تشوف


لو انت شايف اسلوب و طريقة كتابة خيخة تدعو للفساد

فانا شخصياً شايفة اسلوبك و طريقة كتابتك فيها تجريح و اساءة لمشاعر الآخرين


كان ممكن معلشق عند خيخة على فكرة
و اقول عادى
هيا متعودة على الهجوم

لكن انا حبيت اعلق و اخليك تشوف الناس لما تتهمك بشىء مش فيك
يبقى احساسك ايه ؟؟


هيا طلعت كريمة و نشرت تعليقك
خليك انت كمان كريم
و اقرلها بعين تانية مفيهاش تحفز
و استنكار مسبق و رمى بالشبهات


أو متروحش تانى يا سيدى
و محدش له دعوة بحد

المدونات شخصية و ذاتية
فى المقام الاول
و خيخة مبتقولش انها عاوزة تبقى محاضرة فى الشأن العام و تنصح الدنيا و الناس و لا نيلة


دى ست طيبة و دماغها مزحومة افكار
و اسلوبها حلو و ربنا محبب فيها خلقه

بتفتح كل يوم شباكها ع الدنيا
تتكلم مع جيرانها و حبايبها
و اصحابها
تتطمن عليهم
و يتونسوا بيها
و دمتم ....
مش ملزمة ترضى كل حد يسمعها
و لا مسئولة عن اى كلام حد
يفهمه غلط


بس ارجع و اقول
هيا حرة

وانت كمان حر


وانا بدعوك للمرة التانية
ان طالما خيخة لا تعنيك كدا
يا متضايقهاش تانى لو سمحت


و انا واثقة و متأكدة
انك لو ف يوم صادفت خيخة
و شوفتها فى الواقع

هيجيلك دهشة
من مدى احترام الست دى
لروحها و للى معاها


و مجربتش انا معاها الحكاية دى
بس انا متأكد ان لو أى واحد فكر
بس مجرد تفكير انه يتجاوز
حدوده معاها
بأى كلمة و لا تصرف
مش اللى هوه
يتهيألى انها هتوريه مقامه كويس
و انه هيتمنى الأرض تنشق
و تبلعه


شكرا ليك ف كل الاحوال

فاتيما

ليه كده يا اوختشى

اهون عليكى برضه


برج العذراء
---------
السنة دى هتنتهى مع بدايتها كل متاعب السنة اللى فاتت
و على صعيد العلاقات الشخصية
هتعيش فى سلام مع اللى كانوا تاعبينك و لو عندك اولاد
خلى بالك لأن هتعانى من مشكلة متعلقة بحد فيهم على اول الربيع و لحد الصيف


مش مهم يا ستى تنتهى المتاعب اهى شغالة وخدنا عليها وخدت علينا .. ولفنا على بعض يعنى ههههه

لكن ابنى بعد الشر عنه ربنا يبعد عنه المشاكل يارب ويحفظه هو وولاد المسلمين


عارفة ممكن دى تمشى مع اللى ولادهم ف مدارس مذاكرة وامتحانات وكده


جيت اعدل البخت لبخت صحيح
ههههههههههههه


انا بهزر عموما مش مؤمنة بالابراج ولا حتى بقراهم فى الجرايد عشان كنت عرفت زمان ان اللى يقراهم ويصدقهم ميتقبلش عمله 40 يوم والواحد يعنى ميضمنش يمكن الاربعين يوم دول يكونوا احسن 40 يوم فى العمر كله فى العمل تبقى باظت يا معلم هههههههه

أسأل الله ان يرزقنا جميعا بالخير كله عاجله وآجله ما علمنا منه ومالم نعلم
ويحفظنا من الشر كله عاجله وآجله ما علمنا منه ومالم نعلم
اللهم آمين يارب


سلام يا قمر

"و الدلو اصلا ملخبط خلقة
فى تركيبة شخصيته و علاقاته
و نظرته للدنيا اللى عنده ماشية غلط و طول الوقتى عاوز يصلحها "

عااااااااا مش كل الدنيا ملخبطة كده في حبة ترتيب برضه

هو اي انسان في الدنيا لازم يبقى عنده شوية لخبطة صغننين في اي حاجة في حياته مش برج الدلو بس

والحمد لله مع ان ده برجي بس مش شايفة الدنيا ماشية غلط اطلاقا ومش بحاول اصلحها :)

أيون برجي حبيبي وبدافع عنه :)

تسلميلي يا فاتيما

ربنا يسعدك دائما

ههههههههههههههههههه
يعنى انا هربت و قلت مش ههاون على فاتيما و تستخدم معايا الفلكة ..بردو لاقيت اسمى مكتوب !!

و الله فكرة جميلة جدا
اما عن انها حرام و حلال ..اعتقد ان الحرام هو التنبوء بالغيب ..لكن دراسة الفلك و الابراج و ربط صفات مواليد البرج الواحد بتأثرات معينة اعتقد مش حرام


برج الثور
-------
السنة دى كلها نجاحات و برجى اكتر الأبراج حظاً و تفوقاً
يلا .. سنة من نفسى مش كل سنة ضرب ضرب عاوزين شتيمة
همضى عقد مربح فى مايو ... لأ و هتجوز كمان حد ولا ع البال!!

طيب و المتجوز ..هيحصل فيه ايه !!!


يارب امنيتك لى تتحقق و ساعتها لكى عزومة عندى يا ستى :))

:-XXXXXXXXXXXXXXXXX
صباح التنمية :-)))
صباح الإستشارات :-(((
صباح الماتشات me tooooooo :-(
صباح المحن :-((((((((
صباح العبر و التأملات آه ه ه ه :...-(
صباح الإعترافات :-)))?????

:-******************

اسكندرانى أوى
------------

ازيك يا باشمهندس
لعلك بخير دايما يا رب

و يا فندم ما هو كدا زى الغنوة ما بتقول

يا فلكى طول عمرك بتقول
كلام بيمشى على الوشين


و طبيعى ينكتب اكتر من حاجة و كل واحد ينقى بقى
اكيد حاجة هتضبط معاه حسب قانون المصادفات بقى ...

اما حكاية المخلوقات ع الكواكب الاخرى
فكتر خيرك انك قولت رأيك

احسن كنت ابتديت احس ان انا و عادل و يسوفة بس اللى خيالنا جانح

شكرا ع الدعوة الطيبة
كان نفسى تكون فى قايمة الحضور بكرة
بس معلش ..تتعوض
لما ترجع بألف سلامة
إن شاء الله




حاجات جوايا
----------

مش أنا يا سالى
دى الست ماجى !!!

و بعدين مش كله بيجى مع بعضه يعنى

طب منا متجوزتش أهو و بقالى سنتين !!


إن شاء الله كل متاعبك تنتهى
و ميحصلش غير الخير لدودو

و البخت زى الفل إن شاء الله
لا تكلكى

بوسيلى دودو يا حبيبتى





Lady E
------
البرج هوه اللى ملخبط يا لولو
مش اصحابه

انا بحس ان الدلو عنده نظرة فلسفية للدنيا كدا و انتقادى عاوز يصلح المتلخبط ...فبيتلخبط هوه كمان

و دافعى يا ستى حد فتح بوقه
مقولتيش عملتى ايه ف الالمتحان ؟؟

سبع و لا سبع

يووووه دلو
دنا نسيت


منحرمشى منك يا حبيبتى





قوس قزح
-------

إهييييه

و انا اقدر انساكى يا وش الخير

طب دحنا حتى
برجنا شاحح اليومين دول
و ملقتيش فيه مدونين كتير !!


و بعدين المتجوز خلاص بقى
راحت عليه


بس عموما التنبؤات بتقول هتبقى سنة حلوة و الثور اكثر الأبراج حظاً فيها على كل الأصعدة

اما نشوف بقى

و انا يا ستى لما ربنا يكرمك
و تتنغنغى كدا

مش عاوزة حاجة

غير انك تكونى انتى و احمد و العيال
بخير و صحة
و بس

بحبك قوى ى ى ى ى ى
واشوفك بكرة على ألف خير
يا وش الخير
كله

WANDA
-----

أيه يا ون ون
العلامات الجديدة دى انا مش فاهمها

طب دنا بفهم الابتسامات و التكشيرات بالعافية
إيه ال X دى يعنى ايه؟؟

و كمان ال **** دى روخروا

و بعدين انتى زى حالاتى قلبك حاسس اننا هننام مغلوبين الليلة دى ..صح؟

ربنا يخيب ظننا يا ونداتى
يا رب


و الإعترافات مالها ؟؟

دى مكتوبة لأكتر من شخص على فكرة
بس مش هينفع اقول أساميهم
و لا هما غالبا هيعرفوا روحهم
المهم انى اعترفت و خلاص


ان اسفة عشان روحت مدونتك لقيت كالعادة كام بوست فاتونى

النهاردة عندنا اجتماع
و يا دوب قولت اكتب الصباحات قبل ما أنطحن
طلبات ...
بوسة و حضونة يا ون ون
و هحاول اروح اقرى و اعلق قبل الطحن ما يشتغل

*= بوسة
x= حضن

:-))))))))

WANDA
-----

المحكمة نورت يا ون ون


ميرسى يا حبيبتى قوى

ماخدش بالى من اللعبه بس حبية اضيف مشاهير برج السرطان

محمد فؤاد عيسى...عمود نور
هههههههههه

بوست حلو وفكرة احلى

طب وأنــا يا طمطومة ماليش توقعات فيه 2010؟

:-)
فطوم رجعنا للوحة العربى
ياستى بكلمك بلغة كوكب فينوس
بالاشارة يعنى بدل ماقلبها عنجليزى :-)))

مساء الانوار كمان مرة و الاحضان و القبلات من غير سيم :-))

بس انت فهمتنى اهو :-)))
و ادينى باخذ الناس بالهم من الصبحيات
:-))) شريرة مش كده
اوعى الاعترافات تكون ليا ؟؟ اكيد مليش فيها انا
ياترى مين دول ؟؟

المهم متقريش كل البوستات الى فاتتك حتنهج ورايا زى عادل:-))
خليكى فى البوست الابراج كفاية :-))

معلش كلمة لعادل عندك لو ممكن
بيقول نفسه يشوف كائنات فضائية امال انا ابقى ايه :-))) قاعدة الف الكون و هو مش واخذ باله ؟؟انى منهم :-)))

امي تصدقي كده مينفعش

اكيد بسمع الاصدقاء و الفور ام و بالنسبة لي بجد
افضل عصر غنائي جه علي مصر .... التسعينات بجد
و اواخر التمانينات

عمرو دياب - منير - الاصدقاء - المزيكا نفسها و التوزيعات
ايه ده :):)

و و اندا ...لا انا نفسي اشوف كائنات فضائية بحق و حقيق كده :):)
يالهوي ... انا ممكن اخودهم بالحضن

مامتي ... بكرة هاشوفك :):)
هييييييييييييييا
دي فرحان قوي يعني :$:$ :]:]

عــمود نور
----------

نورت يا محمد

و اهلا بيك فى مشاهير البرج طبعا
شكرا على ذوقك




shimaa
------

هتوقعلك ايه غير كل الخير يا شيماء
سنة حلوة عليكى
ان شاء الله



wanda
-----

إهىء إهىء
عااااااااااااااا

انا كل ما اروح عندك و لا قى اربع خمس عشر بوستات فاتونى

بنقهر

هرد عليهم امتى و ازاى بس يا مفتنيييية ...معلش اخنفيت

انا كدا لما اعيط اخنف


لأ الأعوترفات مش لسعادتك
هوه انتى تعرفى تزعلى حد ؟؟
متهيألى متعرفيش أصلا

الناس بس اللى تزعلك
عشان كدا السنة دى هبطلوا غلاسة بقى
إن شاء الله

انتى مخلوقة فضائية ؟!!!
لأ يا ماما

انا شافة انك من كتر طيبتك
تنفعى تكونى مخلوقة ملائكية
يعنى عديتى حدود السما كمان
تقوليلى فضاء و ابصر ايه !!!


كان نفسى تكونى وسطنا بكرة
بس هتكونى معانا برضو

****************
و
××××××××××××××××
كتير جداااااااااا





adel
----

بجد يا عادل ؟

مش بقولك يا بنى انت مولود فنان

بص ف اواخر السبعينات و اول التمنانينات كانت الموضة الفرق الغنائية تقثليد للغرب و خروج عن المزيكا الشرقى التقليدسة وقتها

طلع الفور ام و الجيتس و الأصدقاء و المصريين و مودى و حسين الامام كانوا عاملين دويتو بس مكملوش


كانوا بيستخدموا الاورج و الجيتارات ف اغانيهم عشان يحركوا الجو الكلاسيك شوية و الشباب و المراهقين وقتها مانوا هما الجمهور الحقيقى ليهم


بس الفرق عادة لا تسمر و تتفشكل

لحد ما جه حميد الشاعرى مصى فى نص التمانينات و عمل ثورة فى الموسيقى

التراكات و التوزيع و خلى اى حد ممكن يغنى حتى لو صوته إيه

أياااااااااام

فكرتنى بالذى مضى يا شقاوة

آه تعالى هنا
مخلوقات ايه اللى تاخدهم بالحضن ؟؟

فكرتنى بمارس اتاك بتاع جاك نيكلسون

بص انا السينما برضو لاعبة فى نافوخى شوية

المخلوقات الفضائية دى يا حاجة من الأتنين

يا مخلوقاتت ارقى مننا و هيخلونا فيران تجارب و عبيد ليهم


يا هيطلعوا متخلفين و فيهم حيوانية و يبقوا زى الأليانز كدا و يرعبونا

فى الحالتين انا متوجسة خيفة

الا لو طلعوا جنس تالت بقى على رأى يوسف ادريس ... و طلعوا حاجة كويسة

الله اعلم

انا كمان سعيييييييييدة جدا يا بابا

خلى بالك من نفسياتك بقى

أنا كمان [:[:$:$ قوى برضو

طمطم
هااشوفك بكره انشاءالله
هيييييييييييييييييييييييييييييييه
وهاخد الشيكولاته بتاعتى كمان
لولللللللللللللللللللللللللللللللللللللللللللللللللللللللللى
وحشانى لحد الصبح

انا انا سرطان يا فاتيما


حزينه

الصباحية الى اخر اليوم دى علشان
طيب :-)))
ربنا يجعله يوم حلو عليكم
زى ماهو بداء بالافراح اكيد عندكم بالامارة سامعه كلاكسات :-)))

المهم
متعيطيش بس
اشيلهملك البوستات كلهم ياستى :-)))
و لا توجعى عنيكى
و انا قولتلك بوست الابراج بس
:-)) الله مبتسمعيش الكلام ليه؟؟:-)))

احبك بالخنفان يا فطوم :-))))

و بعدين خلينى فضائية احسن اقرب للبشر :-))
و بعدين مين قالك انهم مش زينا؟؟
انما ملائكة لا منفعش للاسف :-))
الصنف غير مطابق للموصفات
ساعات ممكن اجرح بالكلام و لا بالسكوت حتى :-(( المهم بحاول اصلح غلطتى و استسمح الناس و استغفر ربنا و اتعلم معملش كدا ثانى

:-**************************

مبروك لمصر يابطه
ومبروك الفرحه علينا كلنااااا

ماما فاتيما :)

برج الجوزاء
----------
سنة تحولات جذرية و تقلبات و خلوا بالكو قوى من نفسكم .. اللى وحيد
هيفضل خلى القلب و اللى مرتبط هينصدم عاتشيفياً شوية

ليييييييه كده بس هو الواحد ناقص؟
بفكر اغير البرج بتاعي.. مش طالباها بصراحة :D

رداً على البوست اللي فات علشان ملحقتش ارد عليه
الاسم التدويني: مجرد حلم صغنتوت
تاريخ الميلاد: 28/5/1987

والله يالوزة وحشاااااااااانى انتى اوى
انا كنت جايه اقرء تفاصيل اللقاء
طيب هتفرج ع مسلسل 7.15
واجئ اشوف
بيبب بيب بيببي
مصرررررررررررررررررررر
لولوولىىىىىىىىىىىىىىىى

سبحان الله وانا فى أول البوست قلت لااااااااازمن ادخولها واقولها انتى ماقولتيش انى من مشاهير برج الدلو ليه .. ولما وصلت للدلو لاقيتك قايلة عليا .. عرفتي منين بقاااااااااا


:D


بصراحة مرة واحدة فى حاجة حصلت فعلا وساعات كتيييييير حاجات مابتحصلش خاااااالص .. واهو أول السنة قرب يعدي اهوه ولا في أطفال ولا حاجة

اتعلمت بقا انى ما أصدقش إلا ربنا لانه عالم الغيب والشهادة سبحانه وتعالى

ويااااااااارب يارب يارب يارب يجمع بينك وبين إبنك على خير يارب واللى له غايب يترد له عن قريب

وكله يبقى فرحان ومبسوط وسعيد يارب اللهم آميييييييين

إرسال تعليق