.

.

الليلة دى  

Posted by: فاتيما in



هوه الليلة دى الجو سقعة
ولا أنا متهيألى ؟
لا برد و لا حاجة
و بعدين انتى اللى لابسالى نص كم
عاوزة ايه!!
الساعة اتناشر و بكرة شغل
المفروض ادخل انام


لما ابص على الأيميل
عادل و بسكوتة زى كل ليلة
سايبين رسايل كلها حب و سلامات و حواديت
و توصيات انى اخلى بالى من نفسى
بيقولوا انى وحشتهم
و بيطمنوا عليا ... عيالى حبايبى
دودو كمان ... زى كل يوم بتسأل عليا
و بتقولى حنين بتسلم عليكى قوى


علا بتسلم كعادتها و رسايل تانية من ناس تانية
انا مكملتش كلام مع عبير فى آخر مكالمة
انشغلت بحاجة ضرورى و قفلنا
بقالى كتير مكلمتش توتو صديقتى من ايام الجامعة
اكيد زعلانة منى بس مش عاوزة تقول
و انا خايفة حتى أتصل .. عشان العتاب مش قده
مش عاوزة اسمع كلمة تزعلنى من نفسى
اكتر من كدا
هيا مالها الناس بتحبنى و انا بقيت مش قادرة
احب نفسى كدا ليه؟



مالى الليلة دى ؟
مش عاوزة ادخل انام
و لا اتفرج على أى حاجة ف الدش
و لا عاوزة حتى اقعد مع نفسى
ومش هشغل فيروز
اصلها بتصحى همومى على رأى الواد عادل ابنى
انا بقالى زمن طويل مسمعتش ام كلثوم
و الجو النهاردة مشجع



اسمع ايه؟
دارت الأيام
و لا حيرت قلبى معاك يا جدع انتا ؟؟
بلاش للصبر حدود و لا إسأل روحك
هوه صحيح الجو فيه رشة كآبة
بس مش طالبة نكد للدرجة دى
عاوزة حاجة فرايحى
أيييييوه .... سيرة الحب



لما اقوم اقفل البلكونة عشان جايبة هوا
طب اطلع أبص بصة سريعة ع الدنيا
معرفش ليه مبقفش فى بلكونتنا كتير
مع ان القعدة فيها جميلة قوى
القاهرة بتكون حواليا من كل جنب والمنظر تحفة
يمكن لأنى علمت نفسى معلقش روحى بحاجة وأحبها
لأنها هتختفى من قصادى بعد وقت ؟
اكيد
القمر صحيح مش بدربس نوره الفضى
مغطى أرضية البلكونة بلون نيون خافت
ضى ربنا ... مش حاجة صناعى


آه لو الاقى اللى اقعد احكيله تحت النور

و يروح منى ساعتها كل الخوف
يلا
ف الجنة بقى إن شاء الله



لما ابص على الميدان تحتينا
الدنيا ساكتة والشارع تقريبا فاضى
وسط البلد جنة فى عز الليل
آه .. بس جنة من غير ناس يا قلبى


نفسى لو الاقى حد امشى معاه
فى شوارعها طول الليل
لحد الفجر ما يطلع
و مخفش من تاخير و لا من حد ماشى
و لا احس بأى حاجة تخنقنى
بس هوه مين و لا فين؟
يا ستى ما قولنا فى الجنة
اسكتى بقى


فردت ضهرى أتنفس شوية هوا منعش
مش موجودين بالنهار ... ميجوش غير بليل و بس
على شمالى القاهرة الفاطمية وعلى يمينى القاهرة الخديوية
و انا فى النص ها هنا واقفة
ياه لو الواحد عنده جناحات
كان ياخدله لفة معتبرة كدا
كنت هروح لحد بيت يوسف امسى عليه
وابوسه فى جبينه و ارجع تانى ... ياه
كانت تبقى ليلة !!
لما أدخل المقدمة الموسيقية خلصت
و الغنا هيبتدى



آه على سيرة الحب و سنينه
طول عمرى بخاف
طول عمرى
عاوزة ايه يا ست انتى بس ؟


مش للست ام كلثوم السؤال دا
الست اللى بتنسئل
دى أنا
زعلانة ليه من الوحدة و بتشتكى ؟
مش اختيارك ؟
مش انتى اللى بتبعدى عن الناس بمزاجك
يعملولك ايه تانى اكتر من حبهم و اهتمامهم
و سؤالهم ... وانتى اللى بتهربى ؟


طب انا بهرب عشان يفضلوا يحبونى
و ميحصلش مشاكل
مشاكل ايه هوه انتى لسه صغيرة
عشان توقعى فى مشاكل ؟
هيا ليها دعوة بالسن ؟
اصلك مش فاهمة يا بنتى


تعالى بس افهمك



من قعدتى فى الدنيا
اكتشفت ان الناس تلات انواع
نوع محدش يحس بيه و بيقضى حياته مللاً
و نوع بيعرف يواجه المشاكل و يحلها و يعيش
و نوع المشاكل بتجرى وراه بالمشوار
بمجرد تماسه مع الناس التانية على أى مستوى
و انا من النوع الأخير
و للأسف
مقربتش من حد فى عمرى قوى
الا و قلبت غم


المسافات بتعمللى زى نوع من السكينة و تخفف التوتر
و أصل انا كمان تعبت قوى
بقالى زمن طويل بخد على دماغى و قلبى
و محتاجة لحظة سكون
معنديش استعداد اتعرض لأى صدمات تانى


خلاص بقى


حياة ايه اللى نفسى اعيشها دى ؟؟
ما دمت مش عايزة انغمس فيها
يبقى مزعلش انى على هامشها
طب يا رب لحد امتى بس ؟



يا ترى كل واحدة متجوزة وعندها عيال
بتقدر قيمة حياتها كما يجب ؟
بتحس فعلا بطعم كلمة ماما اللى ممكن تسمعها
خمسين مرة ف اليوم وممكن تكون بتزهق منها ؟
بتحس بنعمة وجود راجل فى حياتها
بكل تفاصيله ...حتى اللى يخنق منها ؟

يا ترى كل واحدة مخطوبة و لا بتحب
حاسة بقيمة ما عندها من مشاعر و حياة مشحونة؟

و يا ترى اى واحدة مطلقة او ارملة و ولادها حواليها
مستشعرة غلاوتهم و بتحمد ربنا على وجودهم
قصاد عينها كل ليلة و لا مش حاسة بكدا خالص ؟



انا مالى بقيت وحشة كدا فى تفكيرى
ما كل حد فى دول عنده متاعبه و همومه
هوه فيه حد خالى ؟؟
واكيد كلهم حاسين بالنعم دى
بس الدنيا مغلوشة على تفكيرهم بحاجات تانية
زيى تمام



ايوه زيى ... طب مبص لروحى الأول
انا بقى يا ترى حاسة بنعمة انى ام
حتى لو مشوفتش يوسف بعينيا تانى ؟

حاسة بنعمة انى اتحبيت و حبيت ؟
و إن فيه بنات فى سنى و اصغر
لا أتجوزوا
و لا خلفوا
و لا اتحبوا و لا حبوا و لا شافوا فى الدنيا أى خير؟؟


ليه مفكرش فيهم و احمد ربنا
انا كمان على اللى خدته ؟؟


الحمدلله مليون مرة
الحمدلله يا رب
مالى بس الليلة دى بقيت وحشة قوى كدا



هيا الغنوة وقفت ليه؟
متسجلة لنصها بس ؟
احسن
انا هشيلها و احط حاجة تانية
نقلبها غم شوية ؟
و ماله .... ميضرش



انا هكتب البوست الجديد أمتى ؟؟
التعليقات موصلتش للرقم اللى انا عاوزاه
وشكلى مش هكتبه دلوقتى

مليش نفس بصراحة
خليه بعدين لما مزاجى يروق



ايوه غنى يا ست وأنا اجاوبك
هوه صحيح الهوى غلاب ؟؟؟
متقوليش معرفش أنا و تسكتى
طب كنتى تعاليلى
و أنا أعرفك اللى متعرفيهوش


ايوه غلاب و حاجة نيلة



الواحد يعمل ايه فى قلبه بس يا رب ؟
اوديه فين
عشان يبطل يستنى حاجة من الدنيا دى
على رأى نزار لو كنت أعرف خاتمتى
ما كنت بدأت


طب المرة دى انا عارفة نهايتها
ببتدى ليه ؟



ما هو ثومة قالت أهو
ان الهوى غلاب

هعمل ايه انا يعنى ؟؟
و اروح منه فين؟؟



وبعدين انا خايفة من ايه؟
لحسن قلبى ينكسر ؟


ما ينكسر
و لاّ يتفشفش مليون حتة
جديدة و لا اول مرة هتحصل ؟
و بعدين منا بقيت اخاف اطلب وانتظر شىء عموما


الدنيا خلاص مقاييسها اختلفت عندى
و مبقتش زى زمان
منيش الشابة الصغننة
اللى عاوزة تفرح ببيت وعيال
و برستيج اجتماعى
عديت خلاص الحياة دى و مبقتش ببصلها كدا
و لا بتمناها لأنها مش كل حاجة
و مش كل الفرحة
ولأنى مقدرش عليها من أساسه



صحيح بفكر لما ابقى لوحدى هعمل ايه؟
و بخاف


بس عادى
هعيش لوحدى ... مش جديدة عليا
منا مش هكون عبء على اخواتى و لا كمان إبنى
مش يمكن بعاد يوسف عنى دلوقتى
تدريب ربانى خافت لعدم وجوده قدام؟؟
عشان اتعود على انى اكون وحيدة
و من غير ما اكون حمل على أى شخص


دنا مستحملانى بالعافية !!
إيش حال حد غيرى يستحملنى




الله
بس ليه يعنى ؟!
هوه كتير عليا يا رب
الاقى حد واحد بس فى وسط السبعة مليار بنى آدم
على هذوها الكوكب
عاوزنى زى ما بتمناه
و بنفس القدر مش أقل ؟
حد عاوز يسمعنى لأنه حابب يسمعنى
حد عاوز يقرب منى لأنه محتاجنى زى ما محتاجله
حد عاوز يشيل كل حواجز واعتبارات بينى و بينه
حد عاوز يقسم همومه و افراحه معايا
من غير خوف و لاتردد
و لا يخفش على جاكتة قلبه لحسن تتكرمش
حد ميحسسنيش انى بشحت حبه
و اهتمامه و من غير ما أضطرنى حتى اطلب
و خصوصا فى ليلة زى دى



طب خليكى عادلة
فى طلباتك
ماهو كمان الحد دا هياخد منك ايه ؟



هياخد قلب مزحوم بذكريات قديمة و ناس و خوف
و قلق و حنين ليوسف ؟


هياخد واحدة عمرها و شبابها بقى وراها
اكتر ما فاضل فيه كتير قدام ؟

هياخد واحدة قلبها مقسوم نصين
و ملوش فيه غير يا دوب نص
و لو قدر حتى يملى النص و يسعد بيه
و مزهقش بدرى و طفش من برا برا


هياخد واحدة غريبة عايشة بطريقة اغرب
ومش عارفة حتى تتكلم فى موبايل زى باقى خلق الله


انتى يا بنتى عايشة برا حدود الزمن زى مديرك ما قالك
انتى مبتعرفيش تبقى عادية زى باقى الناس


حد يقدر و لا يعرف
يحب مخلوق جاى من كوكب تانى زيك


طب ازاااااااى ؟




انتى عارفه دا كله
و مع ذلك
حبيتى و بتحبى ولسه عاوزة تحبى ؟
طب ازاى يا ترى ؟



أهو دا اللى جرى


آه يا ثومة
جاوبى إنتى بدالى النوبة دى
و قولى اللى حصل بالمللى


قولى انى بشر و لسه عندى قلب بيدق
رغم القلق اللى ماليه ومن كل حاجة حواليه



بس أقولك ؟؟
ولا يهمك
هى عيشة و لا اكتر
حبى وامشى السكة لنهايتها
ميهمكيش بكرة
و لا الناس
و لا المأسوف عليه شخصياً
اللى ربنا بلاه وبلاكى بحبه

بطلى تخافى من نفسك و منه
و من أى حاجة



انتى مبتعمليش حاجة غلط
و لا حرام
خلاص بقى
دوسى بنزين
و لا تخافيش


و لو فى يوم عملتى حادثة و إتدشدشتى
يبقى نصيبك
و كفاية عليكى حاولتى


أصل محدش هيعيشلك حياتك
و لا حد هينفع يكون جنبك
فى ليالى الوحدة


محدش كمان ملزم يونسك
و يشغلك وقتك ومشاعرك


تبقى منتهى الانانية منك
لو فكرتى تحملى أحبابك عبئك


مش شغلتهم و لا مشكلتهم مهما قالوا
كلهم عندهم حياتهم و مشاغلهم
و هتكرهى نفسك قوى لو فكرتى
تحمليهم همك بالجامد


انتى فى بعادك صح جدا
وبتعملى اللى المفروض يتعمل
خليكى بعيدة و يشتاقولك
احسن يا بنتى
ما يزهقوا من وجودك
كفاية سؤالهم عليكى
دنتى فى نعمة


سيبى الكل يعيش و يتنفس
ويمضى فى طريقه
خليه يركب الجناحات بتاعته و يطير
يرجعلك وقت ما يعوز
و يبعد وقت ما يزهق


انتى خلاص خدتى على انك تكونى لوحدك
متغيريش نظامك
عشان شوية شجن ونغبشات فى قلبك
يمكن تروح لحالها لما صاحبها يروح لحاله


و أصله هيروح أكيد


قلبى عمره ما كدب عليا خصوصا
فيما يختص بالفراق
علطول بصدقه
وعارفة انى قلبى لابد وإنه مفارق حبيبه
ونفسى فى يوم قلبى
يطلع كداااااب
نفسى



هيا الليلة دى مش عاوزة تخلص ليه ؟



يا قلبى آه
الحب وراه اشجان و ألم
و أندم و أتوب وعلى المكتوب ميفدش ندم
انا اصلى مبندمش
و مبتعلمش
مهما الزمن عدى



يا رب انت عالم
انى تعبت قوى
و زهقت قوى
العمر بيعدى من جنبى بسرعة
من غير ما الحق انطق بكلمة


بكرة شكله هيبقى بايخ قوى
صباحه باين من دلوقتى
يوووه
انا هشيل همه
لما يبقى ييجى بكرة يحلها ربنا
ما كفاية الليلة دى


انتى كدا جبتى آخرها
وخليتها اكثر سوادا
مبسوطة يا ختى ؟؟


طييييييب


طفى الجهاز يا فاطمة
و قومى نامى احسن


و تصبحى على خير
يا ريت يعنى

------------------------------------------------
___ الأربعاء 24/2/2010___



عارفة
أنا نفسى أحضن حد
هى الدنيا برد
و لا انا اللى
مش واخد بالى

على سلامة

احب من الإسماء  

Posted by: فاتيما in ,



ازيييييكم يا غجر
وحشتونى
يلا
كله يطلع ورقة و قلم ويقطع ورقة من نص الكوراسة و يسطرها
فى اقل من تمن دقيقة
و يكتب ورايا اللى هقوله من غير ما اسمع حس و لا نفس

فى نص الصفحة
اختبااااااااار الشهر
تحت منه ع اليمين ...من اول السطر
أجب عن السؤال الآتى



اللى لقى دلع و متدلعشى ... يبقى إيه؟؟


1- يبقى حرام عليه و ع النار حدف

2- يبقى عاوز ينضرب بالفلكة

3- يبقى سماوى و عنده جينات نكد متاصلة




ملهاش سبب رابع أصله
عشان الحنية دى محدش بيشتريها
و لا يلاقيها بسهولة فى سكته

قوم لما تنوجد ... يهرب منها ليه
إلا لو كان واحد من التلاتة اللى فوق دول ؟؟؟


و اختكو فاتيما من ساعة ما عملت المدونة دى الصراحة
و هيا غرقانة دلع مشافتوش طول عمرها
سواء لفظا او فعلا
و النهاردة تحديدا ً هتكلم عن لفظاً دى على وجه الخصوص

لأنى طول عمرى لحد سنتين فاتوا
كان اسمى وقت الروقان بيتغير لفطمطم و طماطم .. بس
بينما الأسم التانى أمل ... كان اقصى حدوده امولة و ميمى
و غالبا مبيتقالوش غير ف المناسبات

ومحدش دلعنى غير صديقات العمر و كان ذلك منتهى املى

لحد ما عملت المدونة دى
و ربنا بصراحة عوضنى عن كل ال37 سنة اللى فاتوا
نوبة واحدة

مبدئياً ظهرلى اسم جديد نوووفى ... فاتيما
اللى فى حد ذاته دلع لوحده

و اكتشفت ان اسمى له ألف تصريف و تصريف لغوى
مكنتش متخيلهم


بدءاَ من بطة
لبطوطة
لفطماطيمو لفطومى
لفطومة لفطوطى لتيما
لتوما لفافى لأبو الطماطيم لطمطماية
لبطبط لبطوطى لفاتى لفتفوتة

لتوتة لتمتم لتمتومة
و بالبورسعيدى ..أطم
و أخيراااا طمطوم وطمطومى


يا خراااااااااااشى


مش بس التصاريف ... دنا كمان حصلت على صلات قربى
بتنادى بيها بناء على ان اصحابها شافونى كدا
بالنسبالهم
لأنى ف قلوبهم كدا و اتشرف إن بقى
بيتقالى

يا امى
و ماما ومامى و ماماتى
و مامتى و ممتى و ام يوسف
و ام يسوفة و ام سوفة
و ابنتى الغالية و أختى
و طنط و خالتى
و بنت خالى


و خلاص مش فاضلى من الالقاب غير تيتة
و ان شاء يحصل عن قريب لما بسكوتة تلاقى ابن الحلال
و تتجوز و اشيل عيالها يا رب

و عادل كمان اللى مضرب عن الجواز ومسيره يفك هذوها الإضراب يوماً ما


مش بس كدا ..انا لقيت ف التدوين
اخوات رجالة و اخوات بنات
و صديقات و اصدقاء لا حصر لهم و لا عدد

لما قعدت افكر كدا مع نفسى ...اكتشفت حاجة
انى من اول ما بقى فيه تواصل بينى و بين اى مدون
بيدخل هنا و يعلق و اروح ازوره

انى لازم بديله لقب من تأليفى و خاص بيا غالبا


لأنى بشوفه كدا وقتها .... و غالبا النظرة دى
مبتتغيرش بمرور الوقت و الحمدلله

مبحبش اندهم و اعلق عندهم غير لما ادلعهم
على طريقتى

و اناديهم بشكل تانى غير المعتاد


العالم الجميل بتاعى ...على وسعه انقسم فى الدلع لشوية تقسيمات


الله !!!
سايبن الأقلام و باصنلى كدا ليه؟؟
سطروا جدوال و اكتبوا ورايا


احباب اساميهم حسب درجة القرابة ... زى
-------------------------------------

بابا ... أبو خالد
ياغالى على ماما ...عادل البلد دى فيها حكومة

عيون ماما ...بسكوتة
مرمر الطعامة حبيبة ماما ....لماضة
اخويا الغااالى ... خالد همس الاحباب
ابن اختى ... أنس صاحب المضيفة
ابن عمتى ...وليد هى و ظروفها
عمى ...عم صلاح فشكووول
أستاذى .... استاذنا عبدالجليل


احباب أساميهم شبههم و بزودله حرف الانتماء لقلبى ...زى
------------------------------------------------

بت خيخة ... خوختى
واحدة مفروسة ...فروستى
سبهللة ...سبهللولتى
راجى عفو الله ...طائرى الحزين
يوسف ... يسوفتى
doba ... دوبى
داليا ماى كورنر... دودى
شفقة و احسان ...شفشوقتى
خمسة فضفضة ...فضفوضتى
آيوشة ..آيوشتى
ابن حجر العسقلانى ...عسقولى(حقوق الملكية لخيخة)
حفصة و العالم ...حفوصتى
نعكشة ...نعكوشتى
لماضة ...لموضتى

سحر المفقوعة مرارتها ...سحورتى
صبرنى يا رب ...صبصوبتى
ستيتة حسب الله الحمش ...ستوتى
كاميليا ... كاميليتى
سمكة واحدة ...سموكتى
منووووش ...منوشتى

حاسوبية ...حاسوبتى
ربة السيف و القلم شمس ... شموستى
بعبعة بلوجرية ...بعبوعتى
wanda...ونداتى


أحباب أساميهم تصريفة من مدوناتهم ... زى
--------------------------------------
يوسف .... روح قلب ماما
وليد كنج توت ...راعى الملك
هبة بوبو .... بوبو بوبى
ستيتة حسب الله الحمش.. ست السوتيتات(حقوق الملكية لرانيا القدر و انا)
wish i were abutterfly... يا من غير ما توشى بترفلاية رقيقة صغننة
رئيس جمهورية نفسى ... يا ريس
حازم شلبى ... عصفور أرقه الحنين
سنوهى ...الآت من عالم بعيد
حسن أرابيسك ... يا فنان يا كبير
أحمد كمال ..صاحب الرحايا و المرايا
amr...لأنك فعلا طيب
ليساندرا ...الرقة متجسدة
المعتصم مش عارف ...زعيم الآبر ايجيبت(حقوق الملكية لستيتة)
داليا قوس قزح ... يا الوان السما السبعة
ضد التيار ...ضدضودة
سكرة ...حتة سكر تحلى المحيطات
محمد مهندس مصرى ...اجدع مهندس مصرى
صعبان عليا حالنا ...نورهانتى أنا
كيكى عووو ..كيكى كيكى انت صديكى
احمد سعيد .. اعقل نزلاء العنبر
دكتور حر ...دوك
مهرة و الحرافيش ...مهورة
آخر العنقود ... سكر معقود
زيانور ..ام الزاد و النور
مكسرات سيد سعد ...صاحب المكسرات
هدى رينبوبدال ما نطق يا ولا نضحك...سيدة الالوان
خواطر شابة ...خواطر حبيبتى
شمس النهار ... شمس نهارى
يوم جديد ... يم يم
احمد الصباغ ... صيابيغووو(حقوق الملكية لسووو)
حكايات فريدة ... يا فريدة فى نوعك
اميرة على كوكب ...اميرة على حق
عصفور المدينة ... صاحب اجمل زقزقات

احمد سلامة مستر كوفى ...اجمد فنجان قهوة ع النت
لجين أبو الدهب ... نهر الفضة الخالص
أحمد شقير ... صاحب الحكاوى



احباب اساميهم حسيتها مرتبطة بيهم و ببوستات كتبوها ... زى
------------------------------------------------

ميرا وومن امراءة بعقل رجل ... ميرا الاميرة ست البنات
مى بهاء ...ميومة البهية
ستيتة حسب الله الحمش ..س س يعنى ست الكل
دودا امتداد عقلى ...دودا هانم و ست الهوانم
شاهى مفيش حاجة ...قلب و طالعله بنى آدمة
بسمة bosbos ...بسبوسة
بدرية عبد الجواد ...بدرية بدارة بدورة
احمد الصباغ ...خال المخاليل
أم مالك ...يا غاااااالية
أيامنا الحلوة ...ميودة قاف ميم
ضياء بيوتفل مايند ...الخير فى ركابه
أحمد مبارك .. يا حنون و مبتحبش الجبنة
nigro... أبو قلب دهب
رندا ...فنارة القلوب
نبضات ...عرافتى الساحرة
شيماء سمير إحتمال ...يا عصفورتى يا صغيورتى
كيارا ...بنوتات عسولات
يا مراكبى ...يا نبع الحكمة
شيرين الكردى ... الشياكة النادرة فى الزمن دا
كريم بهى ...يا كريم ..يا بهى
انجى هات م الآخر ...شقاوة ع الآخر
ميمايا ... ميمايا البسكوتايا
محمد فؤاد عمود نور ...يا صاحب اجمل ضى
تسابيح .... د.زين الغالى
سهى زكى ... الطيوبة
كوكب آبى ... بيبى قمر التدوين كله



أحباب اساميهم ليها علاقة مباشرة بالشبه بيننا ...زى
------------------------------------------------

داليا أهو ده عيبه... تؤامى
محاسن صابر ...النص التانى لقلبى
reem...رقيقة الرقيقات ( حقوق الملكية لستيتة)
سالى حاجات جوايا .... ام دودو


أحباب اساميهم ليها علاقة باماكنهم اللى بيسكونها ...زى
------------------------------------------------

Hanooda..أحلى قمراية اسكندرانية
دودو عاشقة الرومانسية ...عروسة البحور
حنين القلب ...حنونة الجنية الإسكندرانية


احباب أساميهم مشتقة من حروف اسمهم ...زى
-------------------------------------------

صيدلانية طالعة نازلة علا ....لولاّ
أم بتول ...بوتى
عمر بيكا ...عمورة
سلوى رئيسة حزب الاحلام ...لولى
رانيا القدر و انا ... نانو
موناليزا .... مون مون
wanda ...ون ون
كوشيا...كوشكش
دريم فضفضة عالسريع ...دريمو
مصطفى ريان ...صفصف
دعاء مواجهات ...دودو

ياسمين فنانة مفروسة جدا ...يا سميناااا
شيماء onlyspot... مشمشة
شيما الشعب لابد له من حكومة تشكمه ...مشمش
شيماء سمير إحتمال ...مشموشتى
أحمد سكر ...احمد يا سكررررررررر
إيناس نهر الحب ....آنوس
حنان الشافعى ...نونا
يوسف ...يسوفاااااا
حرووف ...روفى
مى رحيق الورد ... ميوية
رنا بنت قلبى ...رنون
إيمان شخابيط ...إيمو
ابن حجر العسقلانى ...ابو العساقيل( حقوق الملكية لخيخة)
رحيل محاولات للبحث عنى ...رورو
d.r.wkrm...فوفاّ
سوما مجنونة فى بلد عاقل ... سوما سمسومة
حفيدة عرابى .... فيدووو


احباب دلعوا نفسيهم من بدرى و ريحونى الصراحة ... زى
-------------------------------------------------

بنوتة مصرية .... رودى
صلاح مسدس صغير ...صاصا

مها احسن تستاهل ...مهاميهوووو
اميرة كراكيب ..ميرو النيرو
نونو عاشقة النقاب ...نونو
عجوز و عندى 30...سوووو
قلب الحياة ... مادو80
ميمايا .. ميمى

بنجاواتى ... بنجا
wella... ويلا

كيكى عوووووو ...اظن واضح
مانمينو ...اظن واضح
بطوط حبوب ... أظن واضح برضو


فيه أحباب بقى ليهم اكتر من إسم و لقب ...زى
---------------------------------------

داليا قوس قزح
وش الخير - دوللى - عقل و قلب و جدعنة الدنيا
الوان السما السابعة - وش الفرح - ام هنا

دودو عاشقة الرومانسية
دودو - قطتى الحلوة - عروسة البحور - عروسة بحورى أنا


ستيتة حسب الله الحمش
ستوتة - ستوتى - سوتيتة - س س ست الكل - ست السوتيتات


بسكوتة

عيون ماما - بساكيتوووو - بسكوتى حبيبتى - بسكوتة بالفروالة
سفيرة الحب ف المدونات - بسكوتة البسكوتات

عادل
عادولة - دولا - ابنى العزيز الغالى - حبيب ماما - يا غالى على ماما
يا شقاوة - ابنى يا ناااااااااس

بت خيخة و اى كلام
خوخة - نونو - نوران - ام شيكو شريف شكشوكة - البت الخيخة
خوختى حبيبتى

يوسف
دوس هنا


احباب اتحيرت اندهم بأسامى رغم طول المعرفة و محبتى الكبيرة ليهم من قلبى
و معرفش ليه؟... زى

---------------------------------------------------------------

وليد عارفة مش عارف ليه؟- معتز هذه وجهة نظرى ببساطة - هانى نط ف الكوز
أحمد عبدالعدل -اسكندرانى أوى - محمود خايف من الحقيقة - رانيا القدر و انا
محمود الدوح - أحمد كيه - احمد بدراوى - أحمد مهنى - احمد البوهى - استاذ محمد
فاوست - ايناس لطفى - جنة - مروة زهرة الجنة - امانى بنت القمر- هند - جنى
فاروق يوميات طالب - الزهرة الحزينة جودى - احمد سمير و حبيبتى إيمان مصرى
و كل حد اسمه مش مكتوب فوق اكيد

و ساعدونا فى ايجاد اسماء ليهم تكسبوا فيا ثواب


ملحوظة اخيرة
انا عارفة مقدما أن البوست قد يبدو غريب عجيب ملوش مناسبة
بس اصلى رايقة الأيام دى و توابع عيد الحب لسه مستمرة
فقولت قبل ما تقلب بغم .. و بتقلب كالعاااااادة
اقولكم بقى انى بعزكم
بس بشكل غير مباشر و من غير ما تاخدو بالكو... خدتوش بالكو طبعا
و اقولكم كمان انى فرحانة بوجودى وسطيكم و بحبكم قوى
و لما كتبت من سنتين ... كلمة طبطبة فى خانة اترك تعليقك
.... يستهيألى إنى و الله اعلم كنت بشوف الغيب بقلبى
و قلبى مكدبشى عليا

ملحوظة كمان
بعض الأسامى هنا كنش ليا شرف اختيارها
لكن اعجابى بيها خلانى اقولها
و حقوق ملكيتها محفوظة لأصحابها بكل الود


و اخيرا سيبوا الأقلام
و لموا الورق
وكله ساقط
و ادى دقنى .... لو فلحتوا السنة دى يا غجر
و انا كنت عارفة من اول الحصة دى
إنها مش هتعدى على خير
و خليكو فاااااااااااكرين
أن اللى لقى دلع و ميدلعشى ...أنا اول واحدة هتيجى تضربه



أحب من الأسماء
ما شابه اسمها
ووافقه أو كان منه مدانيا

أعد الليالى ليلة بعد ليلة
و قد عشت دهرا
لا أعد الليالى
فيروز

صحيح ... إشمعنى ؟؟!!  

Posted by: فاتيما in


الله
إشمعنى إحنا ... منحتفلشى
ملناش نفس ولا إيييييه
صحيح الفالنتين دا مش تبعنا ... إنما و ماله ميضرش
نتفاءل بالخير .... يمكن نجده



و اصل المدير بتاعى من كام يوم بستأذن منه
- ممكن حضرتك النهاردة بعد إذنك اروح بدرى ساعتين ؟
راح باصصلى بشك و ريبة و قالى
- هوه انتى عندك معاد ؟
طبعا بكل براءة لسه هقول أيوه و بعدين خدت بالى
اصلى كنت لابسة شال أحمرفى احمر و ايشارب كمان أحمر فى احمر
فقولت و بعديييييييين ؟؟
ليفتكرنى لا قدر الله ... عندى رانديفو وياخد عنى فكرة غلط



و صحيح انا مرة حكيتله قصة حياتى والراجل انصدم
لأنى مبتسمة علطول و كان مستغرب إن مفيش حاجة بتزعلنى
فروحت صدماه بقى بالزعل كله
بس توصل لدرجة انه يفتكرنى بحب ... لاااااااا
لا يمكن أعديها دى
روحت معترفة علطول
- لأ حضرتك دا معاد مع مجموعة اصدقاء ليه
و لو تحب اقول لحضرتك المكان فين و الساعة كام
و كمان اقولك اساميهم و اماكن سكنهم و ارقام بطايقهم معنديش مانع
فضحك قوى و قالى
- طب خلاص خلاص قومى امشى
بس نظرة عينه .... مكنتش مريحانى برضو




ووالله كان معاد مع أصدقاء مش حاجة تانية
قصره انى و انا ماشية كنت حريصة انى اشرحله
انى مش لابسة احمر ... عشان أستغفر الله عيد الحب
و ان العيد دا ميخصنيش فى حاجة ... لأنه عيد فئوى
يعنى يخص فئات معينة من الشعب المصرى دون غيرها
زى عيد الفلاح او العيد القومى لمحافظة شمال سينا
فيما معناه إن جزء من العالم ... يعنيه القصة
بينما الباقى ماشى ف طريقه عادى




و إذ إن الفانتين دا عيد الحبيبة و المخطوبين و اللى مكتوب كتابهم
و اللى لسه عرسان جداد ....و كل دول
لم يفيقوا من أثر الصدمة بعد
بينما أيضا هوه عيد المتجوزين بقالهم زمن طويل
وعاوزين يعدوا الليلة دون خسائر ف الأرواح
فلا زال الغالبية العظمى من أبناء هذا البلد برضو لا ينطبق عليهم
المواصفات التى تؤهلهم للاحتفال بالموناسبة الهايلة دى
و انا منهم


طب و بعدييييييييين؟؟



هنقعد زى أزازة الخل كدا ملناش حس ؟
و لا نقعد نكتب فى بوستات مضادة
فيقولوا علينا بنقر عليهم وحاكديييييين ؟!!

مينفعش ... أنقهر أنا كدهون
و مش كويس على صحتى



قولت خلينى أفكر بشكل إيجابى .... لما نشوف آخرتها
فقعدت افتكر آخر هدية جاتلى ف الأبصر ايه الفالنتين
فإكتشفت ان تقريباً أول و آخر هدية جاتلى كانت من يوسف
كنا بنشترى طلبات و بالصدفة كانوا بيبعوا قلوب حمرا بتلمع
و شكلها ملفت
- القلوب دى شكلها حلو يا ماما
- دى عشان عيد الحب يا حبيبى
- هوه الحب له عيد؟
- ايوه .. زى عيد الام كدا
- طب انا عاوز اجيبلك واحد يا ماما
- ملوش لزوم يا يوسف منا عارفة انك بتحبنى من غير حاجة
- لأ برضو عاوز اجيبه
وأشتريناه



صحيح عرض عليا انه يدفع تمنه لما نروح من حصالته
بس انا قصاد جدعنته دى ... مرضتش بالمرة
الليلة دى فى عيد الحب
نفسى اقوله رغم المسافات والبعد ورغم انى عارفة انه مش سامعنى
كل سنة و انت حبيبى و ابنى يا يوسف
يللى معاك الحب مبيخلصش و لا بيبقاله نهاية
و عقبال ما ييجى اليوم اللى تهادى فيه حبيبتك يا حبيبى
و تتهنى يا روح قلب ماما




و من إبنى الصغنن ... هنقل الامنية
لأبنى البكرى عادل
و بنوتى حبيبتى ..بسكوتة
الفالنتين الجاى يا عيال ...تفرحوا و تتهنوا
وقلوبكم يملاها الحب أكتر و أكتر




و كل حد عرفته فى حياتى و لسه ساكن قلبى
عيد حب عليكم نفر نفراية
اللى بيحب ... يا رب يفضل فى ضل و حضن اللى بيحبه
و اللى لسه من حزب المستوحدين عاتشيفياً
زى حالاتى
يا رب قدام يلاقى اللى يشاركه العيد
سواء بكلمة الحب صامتة او منطوقة
و بالاهتمام و السؤال و اللهفة
أو حتى بوروده و قلوبه و دباديبه و شيكولاتاته




و لو انى دايما أرجح ان اللى يجيب هدية تكون مفيدة
و تفضل لوقت طويل



اما اختكو فاتيما بقى
فنظراً لأن المدير بتاعى متوجس منى خيفة
انى اكون .. يا عينى بحب
و انا عاوزة مصدموش و اقوله ... انى يا عينى مش بحب
بس نفسى زى باقى خلق الله ... انى يا عينى أحب
فبناء عليه خرجت النهاردة اشترى هدية للفالنتين التخيلى بتاعى
و صحيح ابن الحلال لسه مجاش



بس الهدية بتاعته سبقاه
و اشتريتها عشان أديهاله... اول ما اقابله
قابلته بقى .... بكرة
الشهر الجاى
بعد سنة ... بعد عشرة
مش مهم التوقيت
المهم ان هديته موجودة
والأهم إن قلبى مستنيه و كفاية



وأظن كدا عدانى العيب و كتر خيرى قوى
و اسمنا احتفلنا برضو



هابى فالنتين داى على الجميع
و حس عين أى نفر يسألنى جبتى أيه؟
وإيه الهدية ؟؟
و متأكدة ان مفيش حد حالياً هياخدها
و الأفلام دى ..... منا عارفكواااااااا
ومتحاولوش معايا




آه ... آخر حاجة
الغنوة دى ... دوس هنا
إهداء منى ليوسف و للحبيب المجهول
و ليكم جميعا ... حبّيبة و لا مش
و أهو من وحى الرومانسية
اللى مغرقة المدونات اليومين دولا
و مش متعلقة بيا و لا حاجة عشان بس الظنون
الشوريرة بتاعتكم
منا قولت عارفكوااااااا

إهييييه ... دحنا عشرة سنتين يا غجر



كل عيد حب
و انتوا بسعادة يا رب


أربع حروف
هما اللى
بينى و بينك


كل الأمان  

Posted by: فاتيما in


فى عمر ثمانى سنوات فقط
ومع قلة الفهم التى تصاحب سنها

لم تكن تدرك وقتها تماماً
ما السر فى كراهيتها لهذا الرجل

كان صديقاً لأبيها والأسرة بأكملها
وكان محبوبا و مصدر ثقة الجميع

وجوده يملأ المكان صخباً و ضحكا و حديثاً
و رغم الحلوى التى كان يحملها
فى كل مرة يأتى فيها إليهم

إلا انها كانت تنفر منه و منها
و تصوم طواعية عن اكلها


ولا تعرف لما كانت تشعر بالإشمئزاز من رائحة فمه
عندما كان يقبلها

و كم كرهت رائحة السجائر بعد ذلك طيلة عمرها
بسبب هذا الرجل الذى لا يتوقف عن التدخين


كانت تخشاه رغم الأبتسامات المصطنعة
والمختلطة بالحقيقة أحيانا
والتى كانت تعلو وجهه كلما اختلى بها لدقائق

لم تكن تفهم ما يصنعه ...لكنها كرهته و كفى
لم تكن تملك قاموسا من الكلمات يؤهلها للأفصاح
عما يفعله هذا الشخص بها
و لذا جعلت من خوفها درع تختبىء خلفه صامتة


السكوت هو المكان الوحيد
الذى أستطاعت أن تلوذ به
بعد أى محاولات لاحقة من أى شخص

كانت تخشى البوح لأبيها او امها
فما كان يجب أن يقال ؟

كيف تصف شيئاً لا تعرفه
و تعلن عن رفضها لشىء لا تفهمه


اجبرها الخوف على الانزواء و التعلل بالنوم
كل مرة يدق فيها باب بيتهم

لكنه لم يتركها حتى سافرت مع اهلها
إلى بلد بعيد عادت بعده
اكبر من أن يقترب منها كما كان يفعل سابقاُ





سنوات العمر تمضى بها و تخطو نحو المراهقة

و تحذيرات تأتى من كل حدب و صوب
أن تحترس من الطامعين فى جسدها الذى ينضج رغما عنها

كانت تسمع كالعادة و تلوذ بالصمت


فكيف بها ان تنطق والذعر يملؤها
كيف تقول أن إبن صاحب البناية التى يسكنون بها
لم يتورع عن التحرش بها فى أول مرة انفردا فى المصعد
و خشيت أن تهينه أو ترفع صوتها حتى لا تتسبب فى مشكلة
على أثرها تفضح هى و أسرتها و يرحلون عن البلد كله


مرة أخرى تحتمى بالخوف ... عله يستر ضعفهاوتعلمت ان تضع المسافات بينها و بين الناس
حتى لا تترك مجالا لأحد كى يعاملها كفريسة



لكن هيهات ألا يلتف حولها
الصيادون فى أى لحظة قنص

سألت نفسها لما تتعرض لهذه الأشياء
و هى أبدا لم تكن طفلة جميلة

ليست ملفتة للأنظار كباقى الفتيات على أى حال
لكنها إكتشفت أن الجميلات يجدن من يحميهن غالبا
اما العاديات فلا احد يلتفت لهن
او يتصور إنهن فى مرمى النيران


خشيت كثيراً من التفكير فى اليوم
الذى يقترب منها فيه ذكر

و ذبحها كثيراً أن تبدأ حياتها بإنوثة مجروحة
و قررت أن تتعامل و كأنها رجل لا فتاة
حتى يبتعد الآخرون
و لما شاء الله أن يمنحها فى سنوات دراستها الجامعية
زملاء من صنف نادر من الرجال

شعرت لأول مرة أن عليها أن تضمد
هذا الجرح و لو قليلاً

و لا تخشى شيئا و تعود فتاة عادية تبحث عن الحب
و تكوين الأسرة
فرغبتها فى أن تكون أم كانت عارمة
لا يكسرها أى خوف




تمت خطبتها لقريب لها يشهد الجميع له بالتهذيب

ظنت أن بإمكانها أن تطمئن له
و تخرج اخيرا من وراء جدار الخوف

لكنها فزعت أشد الفزع لما أقترب منها
فى أحد الأيام ليقبلها دون إستئذان

لم تشعر او تفكر بشىء حتى إنتهى
سوى تذكرها سريعاً لشخص ذو شارب

قبلها عنوة معتمدا على أنها فى فخ أعده ببراعة
لم تملك منه فكاك
أصابها خطيبها بالغثيان رغما عنها
لأنه هو الآخر يملك شارباً



وها هو الشعور يعادوها
وتصمت
معلله لروحها إن العيب فيها و لا ريب

المسافات تبعد بينها و بين الناس حتى المقربين منها
و تخرج من تجربة إلى آخرى
تترك القريب فى لحظة جنون قائلة
انها لا تريد أن تصبح زوجة لأحد
و قررت أن تبتعد كالعادة دون أن تفصح عن السبب


تعييها الوحدة و الرغبة فى الامومة
و يدخل حياتها شخصاً آخر ... يشغلها بمشاكله
عن التفكير فيما بعد

يستغرقا معا فى الخروج من أزمة للدخول فى آخرى
و لا يقترب منها متعللاً بإنه يخشى حراماً يتمناه حلالاً
ترتاح لهذا التعليل و يطمئن قلبها لأول مرة
و تبذل روحها فى هذا الكيان

فلأول مرة ...لا يراها أحدهم جسداً يرضيه و فقط
و يترك لها مجالا من الوقت حتى تعتاد الفكرة



كان يمسك يدها على إستحياء فتشعر إن الدنيا
و ما فيها قد أتت

و لا تفكر لوهلة فى أى قادم



يوم الزفاف كانت فى سماء عالية ترسم ابتسامة لا تتبدد
لدرجة جعلت الغرباء يقتربون ليقدموا التهانى
لهذه العروس الضاحكة

لمجرد أن شكلها قد أثار أعجابهم و بهجتها قد غمرتهم
مضت حفلة الزفاف على أحسن ما يكون
وبعش الزوجية كانت نهاية المطاف



ولما دخلت مع عريسها و أمها للشقة
لم تنتبه كثيراً لحديثهما فى الغرفة المجاورة

و أخذت تنظر لنفسها فى المرآة
و تعدل من شكل طرحتها البيضاء
متعمدة أن تتجاهل سماع ما كانت امها تتباحث فيه
مع زوج المستقبل

خرجت الام وأحتضنتها مبتسمة و جادة
هامسة بكلمة واحدة


متخافيش


صمتت لبرهة و تذكرت شيئاً جعلها
لا تلتفت لأمها و هى ترحل
انمحت ابتسامتها الواسعة فجأة
و حلت مكانها ابتسامة صديق أبيها ف ثوان


شعرت انها إبنة الثمان سنوات للتو
و ها هى هنا مع غريب فى غرفة مغلقة

تذكرت كل شخص اقترب منها و نهش جزءا و لو ضئيل
رغما عنها
هى الآن وحيدة و خائفة
و لا جدار تحتمى خلفهما ما عساها تفعل الآن؟!



رحلت الام
و أغلق العريس الباب ورائها
تقدم خطوتين نحوها راسماً إبتسامة عريضة
تعرفها جيداً
و رأتها من قبل مراراً و تكراراً
و ما أن أقترب منها
حتى بدأت بالبكاء


كل الامان
كان حضنك

----------------------------------------------------------------

يا ورد من يشتريك  

Posted by: فاتيما in




لستيتة حسب الله الحمش


لعادل


لبابا أبو خالد


لدودو عاشقة الرومانسية وحنين القلب


لخالد همس الاحباب


لقوس قزح


لصيدلانية طالعة نازلة


لضياء بيتوفل مايند


لميرا و ليساندرا


لمهندس مصرى


لأحمد سعيد


لوندا


لكيارا


لبطوط حبوب


لنور قصاقيص حبيبة


لشمس النهار


لأم بتول


لوليد كنج توت و هبة


للقدر و أنا


ل reem


لصبرنى يا رب


لكيكى عوووو


Bascouta


سكرة


ل amr...


للغير معرف فى آخر بوست

الورود دى كلمة شكر بسيطة ليهم على الحاجات
اللى قالوها و اللى عملوها و اللى كمان معملوهاش

ولا قالوهاش ... حرصا منهم عليا و على انى منكسرش
فى ال48 ساعة اللى مرت دى و حقيقى كلماتهم و تعليقاتهم
و تصرفاتهم حتى و لو كانت تلقائية مش مترتبة و لا عن عمد
فرقت معايا جامد
و حسستنى إن ليا ضهر متين اتسند عليه بجد
و إنى اوقات بشوف بقلبى صح و بحس الدنيا صح
و أننا قلوبنا صح و بخير و الدنيا كمان ... لسه بخير

انا باشكركم ... كل اللى بييجى هنا عموما
والمكتوبين دول خصوصا
على نعمة وجودهم اليومين اللى فاتوا و علطول
و تأثيرهم الطيب فى حياة الآخرين
اللى زى حالاتى
بحبكم بجد و لو كنت غالباً مش بتصرف بشكل يوضح ذلك كفاية
لكن ربنا عالم اكتر منى و منكم
و كفى