.

.

صحيح ... إشمعنى ؟؟!!  

Posted by: فاتيما in


الله
إشمعنى إحنا ... منحتفلشى
ملناش نفس ولا إيييييه
صحيح الفالنتين دا مش تبعنا ... إنما و ماله ميضرش
نتفاءل بالخير .... يمكن نجده



و اصل المدير بتاعى من كام يوم بستأذن منه
- ممكن حضرتك النهاردة بعد إذنك اروح بدرى ساعتين ؟
راح باصصلى بشك و ريبة و قالى
- هوه انتى عندك معاد ؟
طبعا بكل براءة لسه هقول أيوه و بعدين خدت بالى
اصلى كنت لابسة شال أحمرفى احمر و ايشارب كمان أحمر فى احمر
فقولت و بعديييييييين ؟؟
ليفتكرنى لا قدر الله ... عندى رانديفو وياخد عنى فكرة غلط



و صحيح انا مرة حكيتله قصة حياتى والراجل انصدم
لأنى مبتسمة علطول و كان مستغرب إن مفيش حاجة بتزعلنى
فروحت صدماه بقى بالزعل كله
بس توصل لدرجة انه يفتكرنى بحب ... لاااااااا
لا يمكن أعديها دى
روحت معترفة علطول
- لأ حضرتك دا معاد مع مجموعة اصدقاء ليه
و لو تحب اقول لحضرتك المكان فين و الساعة كام
و كمان اقولك اساميهم و اماكن سكنهم و ارقام بطايقهم معنديش مانع
فضحك قوى و قالى
- طب خلاص خلاص قومى امشى
بس نظرة عينه .... مكنتش مريحانى برضو




ووالله كان معاد مع أصدقاء مش حاجة تانية
قصره انى و انا ماشية كنت حريصة انى اشرحله
انى مش لابسة احمر ... عشان أستغفر الله عيد الحب
و ان العيد دا ميخصنيش فى حاجة ... لأنه عيد فئوى
يعنى يخص فئات معينة من الشعب المصرى دون غيرها
زى عيد الفلاح او العيد القومى لمحافظة شمال سينا
فيما معناه إن جزء من العالم ... يعنيه القصة
بينما الباقى ماشى ف طريقه عادى




و إذ إن الفانتين دا عيد الحبيبة و المخطوبين و اللى مكتوب كتابهم
و اللى لسه عرسان جداد ....و كل دول
لم يفيقوا من أثر الصدمة بعد
بينما أيضا هوه عيد المتجوزين بقالهم زمن طويل
وعاوزين يعدوا الليلة دون خسائر ف الأرواح
فلا زال الغالبية العظمى من أبناء هذا البلد برضو لا ينطبق عليهم
المواصفات التى تؤهلهم للاحتفال بالموناسبة الهايلة دى
و انا منهم


طب و بعدييييييييين؟؟



هنقعد زى أزازة الخل كدا ملناش حس ؟
و لا نقعد نكتب فى بوستات مضادة
فيقولوا علينا بنقر عليهم وحاكديييييين ؟!!

مينفعش ... أنقهر أنا كدهون
و مش كويس على صحتى



قولت خلينى أفكر بشكل إيجابى .... لما نشوف آخرتها
فقعدت افتكر آخر هدية جاتلى ف الأبصر ايه الفالنتين
فإكتشفت ان تقريباً أول و آخر هدية جاتلى كانت من يوسف
كنا بنشترى طلبات و بالصدفة كانوا بيبعوا قلوب حمرا بتلمع
و شكلها ملفت
- القلوب دى شكلها حلو يا ماما
- دى عشان عيد الحب يا حبيبى
- هوه الحب له عيد؟
- ايوه .. زى عيد الام كدا
- طب انا عاوز اجيبلك واحد يا ماما
- ملوش لزوم يا يوسف منا عارفة انك بتحبنى من غير حاجة
- لأ برضو عاوز اجيبه
وأشتريناه



صحيح عرض عليا انه يدفع تمنه لما نروح من حصالته
بس انا قصاد جدعنته دى ... مرضتش بالمرة
الليلة دى فى عيد الحب
نفسى اقوله رغم المسافات والبعد ورغم انى عارفة انه مش سامعنى
كل سنة و انت حبيبى و ابنى يا يوسف
يللى معاك الحب مبيخلصش و لا بيبقاله نهاية
و عقبال ما ييجى اليوم اللى تهادى فيه حبيبتك يا حبيبى
و تتهنى يا روح قلب ماما




و من إبنى الصغنن ... هنقل الامنية
لأبنى البكرى عادل
و بنوتى حبيبتى ..بسكوتة
الفالنتين الجاى يا عيال ...تفرحوا و تتهنوا
وقلوبكم يملاها الحب أكتر و أكتر




و كل حد عرفته فى حياتى و لسه ساكن قلبى
عيد حب عليكم نفر نفراية
اللى بيحب ... يا رب يفضل فى ضل و حضن اللى بيحبه
و اللى لسه من حزب المستوحدين عاتشيفياً
زى حالاتى
يا رب قدام يلاقى اللى يشاركه العيد
سواء بكلمة الحب صامتة او منطوقة
و بالاهتمام و السؤال و اللهفة
أو حتى بوروده و قلوبه و دباديبه و شيكولاتاته




و لو انى دايما أرجح ان اللى يجيب هدية تكون مفيدة
و تفضل لوقت طويل



اما اختكو فاتيما بقى
فنظراً لأن المدير بتاعى متوجس منى خيفة
انى اكون .. يا عينى بحب
و انا عاوزة مصدموش و اقوله ... انى يا عينى مش بحب
بس نفسى زى باقى خلق الله ... انى يا عينى أحب
فبناء عليه خرجت النهاردة اشترى هدية للفالنتين التخيلى بتاعى
و صحيح ابن الحلال لسه مجاش



بس الهدية بتاعته سبقاه
و اشتريتها عشان أديهاله... اول ما اقابله
قابلته بقى .... بكرة
الشهر الجاى
بعد سنة ... بعد عشرة
مش مهم التوقيت
المهم ان هديته موجودة
والأهم إن قلبى مستنيه و كفاية



وأظن كدا عدانى العيب و كتر خيرى قوى
و اسمنا احتفلنا برضو



هابى فالنتين داى على الجميع
و حس عين أى نفر يسألنى جبتى أيه؟
وإيه الهدية ؟؟
و متأكدة ان مفيش حد حالياً هياخدها
و الأفلام دى ..... منا عارفكواااااااا
ومتحاولوش معايا




آه ... آخر حاجة
الغنوة دى ... دوس هنا
إهداء منى ليوسف و للحبيب المجهول
و ليكم جميعا ... حبّيبة و لا مش
و أهو من وحى الرومانسية
اللى مغرقة المدونات اليومين دولا
و مش متعلقة بيا و لا حاجة عشان بس الظنون
الشوريرة بتاعتكم
منا قولت عارفكوااااااا

إهييييه ... دحنا عشرة سنتين يا غجر



كل عيد حب
و انتوا بسعادة يا رب


أربع حروف
هما اللى
بينى و بينك


This entry was posted on السبت, فبراير 13, 2010 and is filed under . You can leave a response and follow any responses to this entry through the .

71 كــــلام بيطــبطـــب عـــلى قــــلبى و روحــــى

هو مممكن اطلع اول تعليق؟؟؟؟؟؟؟؟؟؟

في اشراف ومش هعرف بقي :(

طمطم
كل عيد حب وانتي طيبه وحبوبه كده علطول
وانا بحبك اهو ... منفعش يعني (وش مكسوووووووووووف)
اقولك حاجه
عمري في حياااااتي ما حسيت ان عيد الحب ده موجود او ليه لازمه عالاقل ليا
بس السنه دي حساه قوي
اي نعم احساس غريب بس حساه
اه غريب مش عارفه اترجمه بصراحه علي فكره رديت علي تعليقك عندي رد طوييييييييل قوي
(شفتي التحويره دي )

ربنا يسعد قلبك ويطمنك يا طمطم ويسعدلك يوسف ويحميه يا رب
وعلي فكره علي فكره
هيسمعك
ماهو لازم يسمع قلب ماما ده روحها يعني
كل عيد حب وانتي سعيده
واسمعي كلام دكتوره ستيته بجد والله عندها حق
وانا من هذاالمكان اعلنها صريحه
بحبك ياطمطم
علي فكره اختي الصغنونه اسمها فاطمه برده
وانتي بقي طمطم الكبيره
قولي انتي بقي تبقي ايه
ربنا يحميكي يارب
مش عارفه ليه عندي احساس اني عاليوه ادعيلك كتييييير قوي

خيانة
سبتنى يعنى وروحتى المولد
طيب مش مسامحاكى يا فطوم
الا بحتة ملبن :-))))))))كبيرة قوى

ماشى ماشى
علشان كده انا قررت بكرة انى اعمل فيكم عملة لكل الى حيروح المولد :-)

دى بتاعت الصبح مقدما
عارفة مفيش اصطبحات
بس برضه غلاسه
:-************************************
:-XXXXXXXXXXXXXXXXXXXXXXXXXXXXXXXXXXXXXX

و اروح احضر للحملة البحرية التاريخية
للاستيلاء على المنصورة الفطيرية
معندكيش خريطة يا اختى

صحيح حتجوزى ابويا منغير ماتخذى راى كده؟؟ برضه:-(((
طيب عمتو و ماشى بنتك و تمشى رايك متروحش جبل عتاقة :-) انما ابويا مش احضرله المهر المصاصى؟

الله انا اول تحلييق
فووووووووووووووووووووووووو


علي راي عدول واغيظه بقي
هييييييييييييييييييييييييييه

كل يوم مش سنة وانتى طيبة ومبسوطة ومرتاحة ومتهنية مع كل اللى بتحبيهم
يااااااا رب دايما

كل عيد حب وانتى طيبة وبكل خير يا قمرة

وان شاء الله قبل العيد الجاى تكونى مع نصك التانى وتديلة الهدية بقى

:))

كل عيد حب و حضرتك بخير و سعادة
---
على فكرة انا زعلان منك
لأ بتسألى و لا حاجة
رغم انى بعز حضرتك و بحترمك
بس زعلان و خلاص
مش يمكن مت و لا جت مصيبة خدتنى
:-(((((((

عموماً عادى
مش فارقة

كل سنة و حضرتك طيبة يا امي :)
ولا انا كده كويس :)
انا كفاية عليا نفسي و خلاص :):)

انا عن نفسي بحاول احب نفسي و كده كفاية عليا و يارب بس انجح ف ده

كل سنة وانتى طيبه ياام يوسف والسنه الجايه زى النهارده يكون صاحب الهديه جه اخدها ويوسف جابلك حاجه غير القلب اللى شكله حلو ويديهالك وهو فى حضنك
يارب
:)

كل سنه وانا بحبك يافاتيما ياطماطم.

احم احم خدينى معاكى فى حزب المستوحدين ده:)
تحسى اننا هنتحول كمان شويه عند القمر:)

مش بيفرق معايا انا اليوم ده من اى يوم تانى عاااااااااااتى

كل عيد حب و انتى احن و ارق و اجمل

كل سنه و انتي طيبه يا قمر
وربنا يرجعلك يوسف بالسلامه و بسرعه بقا :]

لسه كنتي على بالي يا طمطم الاقيكي كاتبة بوست جديد كدة؟ بنبسط اوي لما الاقي الريدر مبين حاجة جديدة عندك.. عيد الحب ليكي برضه يا طمطم لاننا بنحبك اوي وبنفكر فيكي كتير اوي وبندعيلك بالخير كتييييييييييير انتي ويوسف.. وبكرة اللي مش بعيد ابدا هيكون ليكي حبيب مش مجهول وهنقرفه ف حياته لانه مش هيخلص مننا وكلنا هنشاركه فيكي.. واذا كان عاجبه يعني.. عارفة يا طمطم؟ زمان قبل ما اقابل وليد كانت حياتي ماساة اغريقية بجد وكنت طالعة من ظروف زي الزفت ومصدومة في اعز الناس ليا.. لكن رغم كدة كنت دايما بفكر نفسي بجوائز الله للصابرين واغني مع علي الحجار : " جاية لحظة ممكنة ".. والحمدلله اللحظة الممكنة جت بجد وربنا بعتلي احسن جايزة.. انتي كمان اللحظة الممكنة بتاعتك اكيد جاية.. بكرة تقولي بوبو قالت
اقولك على جملة حلوة من اغنية حلوة بحبها اوي وكنت دايما اقولها لنفسي؟
" دائمُ الخضرةِ يا قلبي وإن بانَ بعينيَّ الأسى.. دائمُ الثورةِ يا قلبي وإن صارت صباحاتي مسا "
ربنا يجعل كل صباحاتك فل وياسمين

كل عيد حب و انت ملياه حب يا فاتيما..حب يوسف و حب صحابك و حب كل اللي بيحبوكي..و يا رب السنة الجاية يزيد عليهم ابن الحلال اللي يستاهلك و يفرح قلبك..و كمان يكون يوسف موجود.وفي هذة المناسبة أحب أقولك بأعلى صوت..بحبييييييييييييييييييييك

طمطم وحشتينى متزعليش منى انا عارفة انى مقصرة بس بجد غصب عنى هبقى احكيلك يابطة

كل سنة وانتى ويوسف بالف خير وسعادة
والسنة الجاية يكون فى حضنك

بحببك يا طمطم
بوسة كبيرة اوى ليكىىىىىىى

كل عيد حب ونبع الحب ف قلبك ملين كمان وكمان يااحلى واق قلب ف الدنيا
بتعرفى تدوسى على مناطق جوانا جميلة اولا بكون خلاص نسيناها

بحبك..

منى ليكى وردة حمرا بمناسبة عيد الحب مش انا بحبك كدة لله يبقى هديكى وردى حمرا


يارب ايامك تبقى كلها حب وسعادة

مواااااااااااااه

انا ايضا لم أٍرى داعي لمن يقول بحرمانية الاحتفال مادام ليس هناك مايضر ومادام الاحتفال في اطار كل ماهو مشروع فما المانع وايضا لاأعرف لما حصرنا الحب كله في ذكر وانثى فيما هو في رأيي أشمل وأعم
كل عيد حب وانت طيبة وبخير
كل عيد حب ويوسف طيب وبخير
عقبال ما يجمعكم ربي ان شاء الله ويكون عيد حب كبير لك ولكل من يحبك وماذلك على الله ببعيد
تحياتي لك

ربنا يجعل أيامك كلها حب فى حب

ويجمعك بكل إللى بتحبيهم وهتحبيهم يارب

وينولك كل إللى فى بالك

ويسعد قلبك ويسعد أيام

وتنامى وتقومى وتقومى وتناااااااامى

على حب فى حب

إيه رأيك أدينى غنيتلك أهو

بنت خالي العزيزه

شوفيلي كرسي جمبك
في هذا الحزب الذي يضم

خير شباب الوطن
من راغبي العزله
سواء اجباريا
او غصب عنهم

عشان اخوكي مجبش هديه
ومش هيجيب هديه
لان مبقاش في حد
اجيبله هديه

هو صحيح احساس
ان اليوم يعدي
من غير مش حلو

بس اديها وفرت حق الهديه

ولحين الخطوبه القادمه
او الارتباط القادم

ارجو منك ان محدش
ياخد الكرسي بتاعي
الا مع حدوث جديد

كل لحظه وانتي مطمنه
علي جو وكل لحظه وهو بيكبر
والسنه الجايه يكون
معانا باذن الله

كل سنه وانتي طيبه وهابي فلانتين داي
يارب اشوفك سعيده ديما
انا بقي سعيده ومبسوطه بأول مشاركه ليا فعالم التدوين عندك وباذن الله متكونش الاخيره
وياااااااارب نسمع عنك اخبار حلوه ديما
تقبلي مروري وتحياتي

كل سنة وانتى امورة يافاتيما
ربنا يسعدك يارب وميجيش الفالانتاين الجاى غير وكل حاجة نفسك فيها تحصل
:)

ربنا يحبب فيكى خلقه ياااااااااارب

ايمان مصرى

ااااااااااااه
مادام فى اشراف يبقى ان تاكد انى اكيد التعليق 70
يلا مش موشكل
اسجل حضورى هنا وخلاص
كلامك صح يفتكرونا حاكدين ولا حاجة
بس بقى كل الناس اللى فى الشارع والبيت والاصحاب نفسهم عاملين زى المدير لو حسوا انك بتعملى حاجة كده ولا كده من ناحية الهدايا يعنى ولا يوم ماتكونى لابسة حاجة حمرا وانتى اشاسا ماتعرفيش
ان النهاردة الزفتلاين
انا بقول بكرة هالبس اسود عشان محدش يمسك عليا حاجة

ويارب يخليلك يوسف ويكبر بسرعة وياخدك فى حضنه وينسيكى اى حاجة وحشة شوفتيها وتشوفيه مع احلى عروسة فى الكون ايون اكيد انا طبعا بتدورى فين
هو انتى هتلاقى احسن من البيطرية يعنى اجدع ناس ولا لأ معروف عنهم انهم اما بيزعلوا بيرفصوا اى حد وخلاص
شوفتى طيبين ازاى :)))

كل عام وانتى الحب وايامك كلها حب وخير

وبادعيلك من كل قلبى

الله يحبك ياااااااااارب
ويعزك ويكرمك دنيا واخرة

اللهم آآآآآآآآآآآآآآمين
كفاية عليكى رغى بقى

روح قلب بنوتك
مامتي حبيبتي
وحشاني موووووووت
كل عيد حب وانتى حبيبتي
يارب تكون معايدتي ليكي اول معايدة هزعل لو مش اول واحدة
مليش دعوة

ميرسي على الدعوة الجميلة ويارب انتى كمان متهنية في كل وقت
وعيد حب سعيد على كل الناس
على فكرة حكاية انك تجيبي هدية وتخليها للحبيب المنتظر دي انا عملتها من فترة من قبل حتى ما ادرك معنى الحب بجد
مرة كان كلوس اب عامل هدايا شموع على شكل قلوب حمرا
انا لما اشترتيه اخدت القلب الاحمر الصغنتوت وحطيته في علبه وروحت جري احطه في دولابي
ماما قالتلي بتعملي ايه قولتلها علشان لما اكبر واقابل حبيبي اول سنة تعدي علينا احط القلب ده في التورتة واقوله بحبك اوي
صحيح القلب لسة في العلبة في الدولاب
بس انا فرحانة انى حسيت الاحساس ده
انى محتفظاله بحاجة معايا

Happy Valentine's Day Mummy
May Love Surrounds you wherever you go
Your Baskouta

هابي فالنتين
ياتوما

كل عيد حب وانتى بخير و على عائلتك بكل سعادة وصحة. تحياتى

صدقيني الحب موجود
بس احنا اللي بنحاول ندوس عليه

إن شاء الله على مايجى الزلانطين الجاى تكونى قابلتى إبن الحلال
أخر هدايا الزلانطين شوفتها إمبارح فى كارفور المعادى تخيلى إييييييه؟

حمار أحمر !!!!!

وطبعا دى أكيد هدايا الناس المتجوزين بقالهم كتير

اربع حروف
بحبك
يارب كل واحد يلاقى النص التانى بتاعه يارب الكل يحي ويعيش فى حب يارب يارب يارب
وكل سنه وانتى طيبه يا فاتيما

كل عيد حب وانتى سعيده وجميله
وحشتينى اوى يا ست الكل
ويارب كده تفضلى على طول مبسوطه وبرجوع يوسف ليكى اكتر كان نفسى اطول معاكى بس صب عنى مكتفيه بانى اطمن عليكى
بـــــــــــــــحبك

كل سنة وانتى طيبة وسعيدةومبسوطة وفرحانة وراضية يا أم يوسف ...وتكون طبعا أولى الفرحات رجوع يوسف وبعدين العريس اللى يستاهلك
ويارب ال 365 يوم يبقوا عيد حب كلهم

ده انا اتاخرت كتير المره دى
اولا انتى اللى جايبه الكلام لنفسك
لابسه احمر من قبل الهنا بسنه
ليه حق الراجل يشك يا امى
هههههههههههههههههه
كل عيد حب و انتى حبيبتى و حبيبتنا كلنا و حبيبه اللى فى الغيب ان شاء الله
و يكون الغيب ده قريب و تتهنى معاه و تنسى التاريخ القديم كله

و تفرحى مع يوسف و بيه

كل سنة وانت طيبه
كل سنه ويوسف طيب

مش كنت غيرتى لون المدونه كمان احمر

انا لو منك تيجى عندنا وتجيبى لنا الكت كات اللى الخناقه قايمه عليه

وبعدين احنا شوفنا التركيواز والاخضر -الاحمر ما عداش علينا- اشمعنى

ربنا يجمعك مع يوسف على خير -قريبا ان شاء الله

مين قال انه عيد فئوي

ابداااااااااااااااااااا
لا تصدق أنك تبع حزب المستوحدين
إنت الحاج فلانطين بس مش واخد بالك
ده قلبك أوضه مش سايعة حبايبه من كترهم
وبيفكر يأجر جنبه شقة تساع الباقي
يويو حبيب ماما
في يوم ها تقرأ تعليقاتنا كلنا
إفتكر ان طنط ستيتة قالت لماما انك راجع راجع
وان ربنا ها يجبر خاطرها ويخلي روحها ترد ليها

كل يوم وانتي سعيدة يا حبيبتي
كل يوم وربنا يسبب لك افراح نونو كده جنب بعض لحد الفرح الكبير برجوع يوسفك

بحبك

حنان الشافعى
------------

ايوه يا نونا انتى اول تعليق
بس من غير ما تغبظى فى عادل انا محبش حد يزعله لو سمحتوا دا البكرى بتاعى

و كلمة بحبك منك غالية عندى يا حبيبتى انتى كمان شخصية جميلة و تستاهلى كل الخير

و الحب اصله حولينا من كل ناحية
و فيه ناس هيمانة بيه
و ناس تعبانة منه
و ناس مستنياه و بقول
و ناس بتستناه و تعمل روحها مش واخدة بالها
و كل واحد بيغنى على ليلاه

هروح اشوف ردك أكيد
و عاوزاكى تخلى بالك من نفسك و ترجعيلنا بالكاس فشر حسن شحاتة


يشرفنى طبعا انى على غسم اختك
على فكرة بمناسبة الأسم انا تقريبا فى حياتى كلها مقبلتش حد الا و كان عنده حد من الدرجة الاولى فى عيلته شايل إسمى و كنت بفكر اكتب بوست عن حكاية الأسامى دى بس قدام شوية ...

بوسة وحضونات يا نوناااااا




wanda
-----
انتى غطسانة فين يا ون ون
مفتقداكى النهارة ؟؟

فين رأيك فى الصباحات ؟

و ايوه سعادتك انا روحت المولد
اشمعنى احنا بعدين يطلعوا علينا اوشاعات اننا حاكديين عليهم و لا حاجة مش كويس على نفساويتنا أصله

************************
و ××××××××××××××××××××××××××
يا ونداتى و حبيبتى



star in the sky
---------------
ميرسى يا على نجمة ف السما
و ربنا يهنيكى انتى كمان يا حبيبتى




بسمة عبدالباسطbosbos
---------------------
و انتى كمان شرحو يا بسبوستى
عقبال يا حبيبتى ما أفرحلك و بالك يرتاح عن قريب




بدراوى
-------

مالك بس يا بدراوى ؟؟

بعد الشر عليك يا بنى ليه كدا

دا كلام ينقال ع الصبح ؟

و ليه بس الزعلة دى
احنا مش لسه متقابلين يوم المعرض بعد حفلة توقيع سحر و الصباغ
و مسلمين على بعض و قايلالك ازيك
و عامل ايه و مالك خاسس كدا
و لاّ انت نسيت ؟؟


فيه ايه بس ؟
طب خلاص يا سيدى متزعلش
و حقك على راسى


وكدا تشخط فيا يوم الفالنتين ؟؟

انا اللى زعلانة دلوقتى بقى

ربنا يروقلك الحال
يا بدراوى




adel
-----

و انت طيب يا غالى على ماما

و ايوه انت كويس
و زى الفل
بس انا عاوزاك اسعد الناس يا بابا

و الواحد اصله متهيألى
مينفعش يحب نفسه
الا لما يكون حواليه ناس بتحبه
و روحها متعلقة بروحه و قيمته تنبع من اهميته عندهم ...
ساعتها وجوده عند نفسه
يبقى فارق و يعرف يحب روحه

انما اللى يحب نفسه من غير حاجة دا يبقى داخل على جنون عظمة
و انت لست هذوها السخص مطلقاً يعنى


انا اول مرة قريتلك تعليق
عند ودود قولت الواد دا طيب
من غير أى حاجة
و الحد الطيب اللى زيك لازم يعانى شوية على ما يرضى عن نفسه

و انا بتمنالك كل الخير
يا غالى على قلبى

مبروك ع النضارة
يا ريت تعمل كمان واحدة احتياطى للمواكف اللى زى دى

كل سنة و انتى ابنى الغالى
يا وااااد





نــــور
-------

و انتى طيبة يا نور
ربنا يسمع منك يا حبيبتى
:) أنا كمان




الشعب لابد له من حكومة تشكمه
---------------------------

تعااااااالى يا ماما
انا هقعد جنبك ف الميدان للعصر و تكملى القعدة عندى لحد الليل بقى

و قمر ايه اللى هنتحوله دا ؟؟؟
احنا هنقعد مكاننا و القمر يجيلنا لحد عندنا يا امى

كل سنة و انتى حبيبتى يا مشمش

كالعادة

صمت الأحترام الشديد لمشاعر لا أمتلك الا احترامها

يعني ينفع كدا؟

طايح في الخلق كلها واجي لحد عندك واسكت

شوفي لك حل؟

قوس قزح
-------

يا دوللى
يا حبيبة قلبى
يا قلب و عقل و جدعنة الدنيا
يا وش الخير


انا عاوزة أضيف لقب تانى ...ممكن ؟؟


انتى وش الفرح


عشان انا النهاردة
لما قريت تعليقك وسط التعليقات تنحت كتييييير قوى مش عارفة اقول او اعمل ايه


بس انتى كنتى علطول ف بالى الايام اللى فاتت و مبنسكيش أبدااااا


منحرمشى منك يا داليا
و كل عيد حب يعدى عليكى انتى و احمد و العيال بكل الخير و الهنا و الفرح
يا وش الفرح





انا بحبك

I'm The CraZy One
------------------
هند يا حبيبتى
كل سنة و انتى كمان طيبة
ميرسى يا شقاوة
ع الدعوات الحلوة




bobo
-----

صباح الحب على عيونك و عيون وليد
و عمورة

انتى كمان كنتى فى بالى و انا بكتب البوست و لما نزلت اشترى الهدية فكرت انك يا ترى هتجيبى ايه لوليد
و بعدين شوفت حاجة فكرتنى بيكى و هخليها لوقتها بقى

انا كمان منتظرة اللحظة الممكنة بكل حب و تفاوءل يا هبة
و لما ييجى ابن الحلال انت هتقاسمونى فيه و فى حبه لأنى مش هبطل اتكلم عنه زى يوسف تمام

صباحك انت و وليد و عمرةفل و ياسمين و ورد احمر و شكولاتة يا حبيبتى

الفالنتين الجااااااى
تبقوا أربع تنفار بقى زهقتونا




dahlia...
----------
منحرمشى منك يا ودودى ى ى

كل عيد حب و انتى كمان حبيبتى

و انا كمان بحبك قوووووووووووى
بوسيلى العيااااااااال
و هابى فالنتين يا جميل




مى
---
انتى كمان يا مى وحشتينى
و عارفة لما بتغطسى يبقى فيه حاجة أكيد عطلتك ...ربنا يصلحلك الاحوال يا حبيبتى يا رب
انتى كمان بوسة و حضوناااااااات




دعاء مواجهات
-------------
ليه بس نسيناها يا دعاء؟؟
هيا موجودة يا حبيبتى
بس الواحد ساعات يتسلل اليه اليأس من رجوعها او الإستمتاع حتى بفكرة وجودها و لو مجرد فكرة

انا كمان يا حبيبتى بحبك
و وحشتينى ى ى ى ى ى جدا




wella
------
ميرسى ع الورد يا ورد
و عيد حب سعيد عليكى يا حبيبتى
انتى كمان

خواطر شابة
----------
و الله يا خواطر

الحب مش حرام
و لا تخصيص يوم للأحتفال بيه حرام
فى رأيى المتواضع

زى اى عيد ف الدنيا له اسبابه المقبولة و لو كلنا مش بنمر بيها لكن غيرنا بيمر و فرحان و سعيد و لازم نفرحله

كل سنة و انتى بالف خير يا حبيبتى




أم ...بوبة
----------
يا عينى يا عينى
صفحة التعليقات غرقانة دعوات
و ورود و أغانى كمااااااان

ايه الهنا اللى انا فيه دا ؟؟

منتحرمشى يا فندم
و بوسيلى بوبة لحد ما نشوفها و نهريها بوس بمعرفتنا




هى و ظروفها
-----------

الأول
وش مبتئس جدا


ثانيا
حصل ايه بس يا وليد؟؟؟
مالك بس و راحت صاحبة الهدية؟؟

انت علطول حبك مجنون كدا ؟؟
طب انا هستنى شوية و مش هسألك
لأنى حاسة ان الحكاية لسه فيها بقية
و الهدية هتتجاب بإثر رجعى إن شاء الله ...بس لما انت تهدى
ماشى؟

شكرا على الدعوة الحلوة
و ربنا يسعد قلبك يا إبن عمتى





sony2000
---------
ميرسى يا عزيزتى
و مبروك دخولك التدوين و نورتينى
عيد حب سعيد عليكى انتى كمان
إن شاء الله





كفاية طيبة
----------
أهلاااااااااااااااااا يا طيوبة
وحشتينى قوى
بقالك مدة مجتيش ...فيكى الخير كله
يا حبيبتى و عيد حب سعيد عليكى يا حبيبتى



إيمان مصرى
---------
تسلميلى يا إيمان
كل سنة و انتى طيبة يا حبيبتى
و منحرمشى من طلتك عليا

هابي فلانتين فاتيما

وإن شاء الله السنة الجاية

تكون أجمل وأجمل

وأجمل جميل يكون بين أيديكي وايدينا كلنا
لأن كلنا بقى لنا في يوسف زي ما ليكي بالظبط :)

بيطرية و مش بإيدى
------------------
لأ يا حبيبتى لا السبعين و لا حاجة
و بعدين المهم انك منورانى

انا بقى لابسة النهاردة زتونى و واحد معاكسنى و انا جاية ف السكة و بيقولى انتى وقعتى فى طبق بصارة و لا إيه؟؟؟

الحكيكة الشعب المصرى خلاصة خفة الدم اللى ملهاش حل ...مبقتش عارفة ارد عليه الصراحة و ابتسمت

اصلى بعز البصارة قوى و لو انها بتعملى تلبك و مغص و شبه حالة احتصار بعد ما اكلها ...بس باكلها برضو

انا كمان رغيت اهو معاكى
و كل سنة و انتى طيبة يا حبيبتى
اسود و لا احمر
المهم ان قلبك أبيض و مليان حب





Bascouta
---------

انتى فعلا اول واحدة يا عيون ماما

ايميلك امبارح كان اول تهنئة
و محدش سبقك


و طالعة لماما و بتحوشي الهدايا
و لا اكونش انا اللى طالعلاك؟؟



كل عيد حب و انتى بالف خير
يا سفيرة الحب فى البلوجر كله
و عيون مامتك

بوسة و حضونات يا بسكوتى



mano
----

و انت كمان يا مانو




karim
------
الف شكر لحضرتك
و عيد حب سعيد عليك انتى كمان و على كل أحبابك إن شاء الله




محمد مفيد
--------
معاك يا محمد
الحب حوالينا فى كل مكان
بس تفتكر بندوس عليه بمزاجنا ؟؟
متهيألى اغلبنا عنده قصر نظر مش اكتر

اان فرحانة بتعليقك دا جدااااا على فكرة لأنى عارفة انك مبتعلقش كتير عند حد بقالك مدة
وشى بيحمر دلوقتى على فكرة
هوه بيحمر خجلاً بس هنمشيها عشان الفالنتين برضو



أبو حميد
-------
حمار احمر ؟؟؟؟


جديدة دى قوى ؟؟
و دا مين اللى يستجرى يجيبه لحد دا
الا لو كان عاوز يقطع العلاكات بقى
دا موضوع تانى

كل سنة و انت بألف خير انت و المودام و العياااااال يا رب





محمد فؤاد (صاحب عمود النور)
--------------------------

اهو العالم الشعراء دول الواحد ميعرفش يتفاهم معاهم خالص

عينهم و احساسهم بيلقطها علطول

كدا حليت اللغز ؟؟


و انا كنت عاوزة احيركم شوية ؟؟

كل سنة و انت شخص جميل و طيب يا محمد
زى مانت و تكون أحسن ان شاء الله





بنت قلبى
-------
و انتى طيبة يا رنا
انا فرحاااااااانة جدا برجوعك يا حبيبتى و الف حمدلله على سلامتك
ان شاء المرة دى من غير إختفاء
كنتى وحشانااااااااا جدا
انا كمان بحبك يا حبيبتى




shimaa
------
و انتى طيبة يا شيما
عيد حب سعيد عليكى انتى كمان يا حبيبتى





صديلانية طالعة نازلة
-------------------
لا إتأخرتى و لا حاجة
و بعدين انا بحب الاحمر من زمان و بلبسه علطول
و ذنبى ايه ان الايام دى البلد كلها جالها حصبة على راى شيما الشعب

انا حاولت افهمه انى اهلوية
و بشجع فاللة المنتخب
مقتنعش و بصلىنفس البصة
طب اعمل ايه بس؟؟


كل سنة و انتى طيبة يا لولاّ و يا رب دايما متهنية انتى و دكتور اشرف و العيااااااال القمرين دول





Ashraf
------

و حضرتك طيب يا دكتور
و اشرتك الجميلة والبيت كله
يغمره الحب و يزيد و يكبر
و يفضل عامر بحسك إن شاء الله




ستيتة حسب الله الحمش
-----------------

انشالله منحرم منك يا رافعة نعنويات قلبى للسما انتى

يا ست السوتيتات كلهم على راى رانيا القدر و أنا

بس اصله برضو يا ستوتى الحب اخد و عطا و الواحد مينفعش يكون قلبه مليان حب الا لما يلاقى اللى حواليه يستاهلوه و اكتر و مخلينه دايما حاسس ان الدنيا حلوة و بخير

كل سنة و انتى طيبة و بكل الحب اللى ف الدنيا متهنية و سعيدة

انا كمان بحبك خالث
وش مكسوف للصبح





مصرى جدا
--------

اصل انت اخلاق يا هانى

عارف ان اختك فاتيما غلبانة
و عارف كمان انها بتتكلم جد
و انها بتحبكم جدا

و عشان كدا بيصعب عليك
تكتب حاجة تأكد على غير كدا


و انا عشان قلبى دايما يحدثنى
انكم ناس طيبة و محترمة
فببقى عارفة انى بينكم
متحافظ على مشاعرى
و غرقانة طبطبات مهما قولت كلام قد يبدو عبيط

و انت واحد من هولاء الناس الطيبة
اللى بتعزنى لله فمينفعش بالتالى انك تطيح هنا خاااالص

صح و لا أنا غلطانة؟؟

كل عيد حب و انت طيب يا فندم




عارفة ...مش عارف ليه !!!
-----------------------

عيد حب سعيد عليك انت كمان يا وليد
و على المدام و على العيال خصوصا حبيب قلبى مهند
وحشنى المجرم دا

هتيجوا مصر امتى وحشتونااااا

تعليقك اعدنى جدا
كنت فكراك زعلان منى و لا حاجة
الحمدلله انك بخير

هبى فالنتين يا فندم

مش ها قول لك هابى فلانتين ولا زلنطين على رأى هانى ، الحب مالوش ميعاد ولا وقت للأحتفال ومش محتاج هدية تعبرى فيها عن الى جواك ، لكن بما انك فرحانة و أشتريتى يبقى خلاص ربنا يبعت لك الى تحبيه و تديه الهديه ، و السنة الجاية تكونى فى أسعد حال .
طيب ممكن ممكن ممكن أنهاردة اقول لك بحبك مش بمناسبة الهابى داى دة ولكن بمناسبة أنى بجد بحبك كل يوم و طول السنة و طول العمر إن شاء الله ,

لا لا لا انا لا اقبل الموقف ده اطلاقا

ايه الحبيبه والى مخطوبين والعرسان قصدك ايه

ان احنا مش بنحب ولا ايه

لا لا لا انا لا اقبل

عموما انا السنه دي احتفلت بعيد الحب بشكل جديد موت

مش هاينفع هنا بقى هاقولك بينى وبينك

هههههههههههههههههههههه

قال فلانتين قال مسخره وربنا الى حاصل بره فى الشوارع

وبعدين يا اختي عيد الحب ده لقيته ناقح على الشوباب جامد على فكره

عاتفيين اوي ا لعيال دي والنبى

كل سنه وانتى طيبه يا جميل ويجعل ايامك كلها حب واعياد

ويجى بقى اسمه ايه ده

ب
ح
ب
ك
يابطه



عرفتينى؟

أم بتول
--------
يا خراشى يا بوتى

دنا متدلعة النهاردة قوى

و من غير كل الممكنات دى أصلاً

انا كمان بحبك يا حبيبتى




صبرنى يا رب
----------
الا بتحبوا دى ؟؟؟
لو مكنتيش انتى تتحبى يا صبصب أومال مين فى البلد دى هينحب ؟؟

دى تبقى هزلت


و خلاص متقوليلش احتفلتوا ازاى
عشان الروقابة و نبقى نتلم مرة
و ننقى الرز و تحكيلى

و آه و النبى منظرهم يشحتف القلب
انا بفرحلهم سلف و الله

خليهم يحبوا شوية من نفسهم
قبل تأثير البنج ما يروح

كل سنة و انتى طيبة يا صبصوبتى





غير المعرفة
المتخفية بنضارة
و المعروفة بدودو
عاشقة الرومانسية
-----------------

محدش بيقولى يا بطة غيرك

انا كمان يا حبيبتى
ب ح ب ك

لا أنا عنيا دمعت من البوست والتعليقات
ربنا يفرح قلبك
وقلوب كل الناس

كل عام وانتى بخير

فاتيما
كل يوم وانت فى حب
وربنا يسعد قلبك ويطمنك ويسعد لك يوسف ويحميه يا رب
وتفرحى بيه وبعروسته جنبه كمان
ويارب يسعدك بالقلب الكبير اللى يستحق اغلى ملاك يعيش على الارض
وعجبتنى جدا كلماتك
والأهم إن قلبى مستنيه و كفاية
ربنا يمتعك بحضن يوسف وحنان الزوج قريبا يا احلى فطووووووومة

طب منا بحبك كمان مينفعش؟؟؟؟

بغض النظر ان فى دمعة نزلت من عينى الشمال كدة وانا بقرا الجملة بتاعة كل سنة وانت حبيبى وابنى يا يوسف بس انا برضو مبسوطة انك كتبتى البوست دة

طلعتيها فى دماغى اشترى هدية واسيبها للحبيب المجهول..بس تعرفى؟؟ هو اكيد طيب وهيقولى لا يا انجى وفرى فلوسك ولذلك هوفر فلوسى منا محبش ازعله

كل سنة وانتى حبوبة يا فاتيما

ممكن اقولك فاتيما كدة من غير القاب؟؟؟؟

كل سنة وانتى ويوسف طيبين يا فاتيما

*البت المشمشية حلوة بس شقية*
----------------------------

و انتى كمان يا قطقوطة
وحشتينى

كل عيد حب و انتى طيبة
آخر مرة شوفت عادل كنا بنقول انتى غطستى فين و بقيتى القطة المشمشية المختفية؟؟

حمدلله على سلامتك
كل عيد حب و انتى طيبة



حفيدة عرابى
----------

سلامة عيونك يا حبيبتى
انا كمان معاكى بدعى و اقول يا رب




راجى
----
أهلا بحضرتك
كلك ذوق و اديما سباق بالخير
الف شكر لحضرتك




القدر و أنا
-----------
و انتى طيبة يا فندم
و عيد حب عليكى انتى كمان و على أسرتك الجميلة و تفضلى نور عيونهم دايما و مينحرموش منك

كل شىء بأوان و الواحد متفائل أهو
منحرمشى منك يا رب



enjy
-----
مينفعشى ؟؟؟

دا ينفع و نص و تلتربع يا حبيبتى


و تعالى هنا متتلككيش بالحبيبى المجهولى انتى اللى مستخسرة تطلعى من تحت البلاطة
طب ما نقسم البلد نصين
هاتى هدية ليه و تاخديها انتى
يعنى هاتى لنفسك شكولاتة و كوليها انتى و تتحسب عليه و ذليه بقى

تقوليلى فاتيما من غير ألقاب ؟!!!

يا للهوووووووووول
طبعاااا ممكن يا حبيبتى طبعا


بت خيخة و أى كلام
----------------
وانتى و شريف طيبين يا خيخة
كلك ذوق
و متوقعتش التعليق ...
عشان كدا مبسوطة بيه جدا

بوسيلى شيكو حبيبى

كل سنة و انتى طيبة

كل سنة وانتى كما انتى تعيشين لحب الناس و بحبهم يملأ قلبك كل الخير لكل البشر

كل سنة و نحن طيبون بكِ و لكِ و معكِ نتعلم منكِ البسمة و التسامح و الحب

دمتى لنا و ربنا يعينك علينا

كل سنة وانتى طيبة يا قمر
وحبيبك الغالي يكون في حضنك اقرب مما تتخيلي




مممممممممممممممممواه

يوم محوطك انت و حبيبك و احبائك بالحب
كلمة من اربع حروف
اممممممم
يوسف:-))) اعتقد احلى كلمة حب فى حياتك ؟
:-****

استنينى رجعالك ثانى
قولت اطمنك (شكرا على السؤال بجد :-**
انا لازلت اعافر الثلوج :-))

صباح اللى وشهم مكشوف
:-)) انت مشوفتيش الناس ديه بتمضى اشاشا ازى
يعتمد فى ظل اللوائح و القوانين
و بكده يرمى المسئولية عنه
و يلزقه فى الشئون القانونية :-))
و ساعات فى امور ميمضيش اشاشا مدام مش مستفيد
فطوم انت اشتغلتى فى الحكومة ؟ قد ايه ؟؟
و ايه حكاية فردوس ديه ؟؟شكلى مش من هنا:-))

صباح المسامير ف النعوش
مش احنا بلد دمقراطى خليهم و ماله
بدل كلام من تحت لتحت

صباح النظرات و العبرات
تعرفى بجد نفسى اكون فى جرئته
من اسبوع كنت بصحى يوميا من قبل الفجر و قلقانة افتح الكومبيوتر و اشغل قران و انام عليه (و ده بيضاينى)
اخر مره فتحت على سورة يوسف و قعدت اقراء و اسمع فى نفس الوقت ، لقت فى دماغى كذا سؤال
ليه يوسف مسمعش كلام سيدنا يعقوب و برضه قال لاخواته؟ و لا هم الى اتصنتوا؟؟
ازى سيدنا يعقوب سامح اولاده على فعلتهم فى اخوهم؟؟
جملة "و انساه الشيطان " لما صاحبه بتاع الخمر خرج و مقلش للفرعون عن يوسف و فضل يوسف سنين فى السجن
يعنى الشيطان ممكن يعطل قدر ؟؟ بس اكيد طول الحبس ده فاد يوسف و خلاه يتعلم الصبر و ازى يحفظ خزائن ، زودت اهميته عن صاحبه ؟ لانه لو كان خرج من بدرى مكنش فضل فى مصر؟؟
و كنت فكرت اكتبها فى البوستات بس قولت اى كلمة تساول فى الدين و خصوصا القران الناس مبترحمش بتدينك قبل متقراء سوالك
لعلمك انا احب سورة عندى ال عمران معرفش ليه ، من صغرى كنت احب افتح عليها و اقراء و ده غريب لانها من الطوال و انا كنت صغيرة قوى على انى اقدر على ختم القران

صباح السلامات
:-))))

صباح حنفية الإعترافات
لسه الواحد بيتعلم بجد
كنت فاكرة انه احسن رئيس وزراء عدى ايامى انا بس يظهر انى طلعت كالعادة غبية :-))
لعلمك كلام الراجل الى كاتب المقال صح كنت سكت يا جنزورى احسن
بس الصراحة الغريبة ديه برضه مش حصدقها دلوقتى ممكن بعد 10 سنين

صباح زى وشهم العكر
صحيح
قال اضربوا العيال ؟؟
مش ممكن انا مش قادرة اصدق ؟ صحيح ؟؟

صباح الإستقالات
الراجل ده مزعلك يا فطوم فى ايه بس :-)))

صباح الأشعار ف عيد الحب
ماشية مع اغنية
I miss you الى مشغلاها عندى :-)
يعنى الرجالة مكتفية بكلمتين و بس و الست مفروض دائما و للابد تكمل من عندها :-))

ياه على الاغنية
اههههه ياقلبى يا فطوم :-(

حازم شلبى
--------

و انت طيب يا عصفور

معرفش ليه حساك حزين و انت بتكتب التعليق دا ؟؟

و دمت لكم ماشى
حلوة قوى
بس ربنا يعيننى عليكم ليه؟؟

دنتوا اجمل حاجة حصلتلى يا حازم
و وجود المدونة دى و استمرارها مكنش هيكون الا بيكم و بطبطباتكم على قلبى

بص كدا على التعليقات فى البوست دا كمجرد مثال عشان تعرف انى محظوظة بيكم جداااااااا و ربنا يعينى انا و اكون عند حسن ظن قلبكم ....

كل سنة و انت طيب يا محلق دائما على حدود المجرة



MaNoOoSh
---------

و انتى طيبة يا منووووش

مشكرين البوسة

كسفتونا خااااااالث



wanda
-----

حمدلله ع السلامة يا ون ون


وحشتينى ى ى ى

اتزنقتى ف التلج ؟؟
خير خير

محمد صاحب عمود النور حلها خلاص
يا فندم و يوسف اصله يا حبيبتى
مش كلمة ...
يوسف كل الكلام يا ونداتى
و مينفعش اختصره


انا اشتغلت ف الحكومة ييجى
سنة كئيبة و الباقى كان اجازة
و اقصد بفردوس عبحميد
مسلسل زماااان اتعرض فى رمضان
اسمه انا و انت و بابا فى المشمش
مع حبيبى ى ى حسن عابدين

و كانت متنكرة فيه ف شكل خدامة عبيطة جدااااا و محدش يشك فيها
عشان تسرق مستندات
تبرأ ابوها المظلوم
فكل ما تعمل حاجة
و تبقى هتنكشف تروح عاملة عبيطة
و تقول
ما هما اللى قالولى

مين يا بنتى اللى قالولك ؟؟

هما

هما مين ؟؟

هما اللى قالولى

لغاية ما تكفرهم فى عيشتهم
و متقولش برضو مين هما ....
على اشاس انها متأخرة عن العادى
ف التفكير و كدا

طب هيا ف المسلسل لضرورة درامية
عملت كدا

لامؤاخذة الوزرا بتوعنا
...بيعملوا فيها فردوس ليه؟؟؟

عندهم تأخر هما روخرين ؟؟
و لا بيمثلوا مسلسلات ؟؟



بالنسبة لقصة سيدنا يوسف
فالقرآن عموما يا وندا
احد اسباب عظمته من وجهة نظرى ان كل مرة الواحد يسمع آية أو يقراها يحس بيها و يفهم منها شىء جديد
و يقراها بشكل فيه حاجات مشفهاش قبل كدا


انا كمان كنت بستغرب ازاى سيدنا يوسف يسامح اخواته
و الاب يخاف عليهم من الحسد
و هوه عارف انهم السبب فى فراقه عن ابنه و نور عينيه

بس احنا بشر و عمرنا ما هنوصل لتسامح الانبياء

انا شخصياً لو يوسف رجعلى
بقول هسامح ابو ابنى
و انا اصلا مسامحه و ربنا عالم
مش محبة ليه
بس فعلا لأنى مش عاوزة أسود قلبى
لأى سبب ...
بس برضو مينفعش اتحمل اعيش معاه فى مكان واحد او شارع واحد ...
مش بيت واحد؟؟؟
بس سيدنا يعقوب كان أب
لازم يسامح ولاده ...
و كمان سيدنا يوسف كان أخ
و الدم بيحن رغم كل شىء



و جوزيه مش مزعلنى
دنا كنت بحبه حتى
و هوه متعصب و خلقه زى خرم الأبرة

بس اصله مفقوس قوى
و باين عليه الندم و متصور ان الناس مش هتهرش الحكاية دى و بتاع

زائد انه عارف ان الاهلى مش هيرجعه
فليه بقى التماحيك دى ؟؟؟


عجبتك الغنوة ؟؟

ما هى ماشية معايا و معاكى فعلااااا

بوسة و حضونات يا ونداتى الحلوة

هى الواحده ماتعرفش تعمل فيها اللهو الخفى شويه؟
اناكنت مراهنه نفسى انك هتعرفينى
لان مفيش حد بيقول بطه غيرى

مش هتقولى الهديه ايه بقى؟
طيب تعالى قولى لى فى ودنى ومش هاقول لحد
سرك فى بيييير

كل سنه وانت طيبه يا فاتيما وانشاء الله الفلانتنين الجاي مانبقاش من حزب المستوحدين ده .
تحياتى ومحبتى ليكي دايما يا جميله

ياه
بلوج مليان بريحه الامومه والعائله
وحشنى الجو ده
انتى اكيد الام الروحيه للمدونين لانهم بيحبوكى جدا
تشرفنا يا مدام فاتيما
مساء الخير عليكى
اسلوبك حلو كمان
ربنا يخليلك يوسف العسل
وكل عيد حب
وهو جايبلك قلب
تشرفنا جدا بزيارتك

عاشقة الرومانسية
----------------

لا متعرفيش
يا بنتى فيه حكمة بتقول
تلاتة لا يمكن يستخبوا

جالس على سنام جمل

و امراءة حامل

و انسان يحب

الحب مبيستخباش أصله
و ربنا يخليكى ليا يا قطتى

و لأ مش هقولك الهدية إيه؟؟؟
مش هينضوحك عليا بالاربع حروف أنا




mostafa rayan
-------------
و انت طيب يا صفصف

و السنة الجاية ليه يا عزيزى ؟؟؟

م الشهر الجاى يا بنى
ربنا يكرمك و تلاقى حب حياتك
و على نص السنة و قبل ما ييجى آخرها حتى

ان شاء الله تكون انفصلت عن الحزب بتاعنا دا
و انضميت لحزب السعادة
يا رب





psycho
------
نورت المدونة
واسمك التدوينى مميز جدا

الف شكر ليك على ذوقك
و رأيك






الغير معرف المهذب
المشهور بخط الصعيد
----------------

شكرا على محاولتك الطيبة
و توسمك فيا خير

و هكون صريحة معاك
و اقولك سيبها لوقتها


لان الوقت بيداوى كل حاجة
دا بناء عن تجربتى الشخصية
المتواضعةو اللى على قدى


لذا فنا هسيب الحكاية لوقتها
و للظروف

لو حسيت خير ... قلبى هينفتح تانى

لو حسيت الحال متغيرش
هفضل مطرحى


وجنب شكرى ليك من قلبى
بعتذرلك لأنى بخذلك

بس ساعات الواحد أصله
غصب عنه لما يتعرض لموقف يهزه
يلاقى نفسه بيقف عند حد معين
فى مشاعره و مينفعش ساعتها
يضغط على روحه اكتر
و الا يكون بيكذب على غيره
قبل ما يكذب على نفسه
و يحاول يعمل طيب و كويس
بينما هوه من جواه
مش كدا حالياً
و انت ميرضكش اكون بوشين
صح ؟

خير
إن شاء الله خير

كسافنى انت خالص
معلش توابع المولد
و عقبال ماكتبت البوست اتاخرت فى الصباح
:-))))

:-********************************
بس ايه النشاط ده كله
بعتانا لمدونتين ثانين
و اصطبحات طازة
عينى عليكى بردة
ايوه انت اكيد كنت فى مولد
احلى من المولد بتاعى
:-XXXXXXXXXXXXXXXXXXXXXXXXXXXXXXXXX

استنينى رجعالك ثانى :-))
اعلق على الاصطبحات :-)))
اصلى فى الشغل و اخذ الكمبرور معايا
و حنشتغل و نعلق و ندون كمان يالله
مش امبارح كان اجازة :-)))

فاتيما القمر

كل سنة وانت طيبة وهابي فالنتين داى

عيد حب سعيد عليكى يارب

وعيد الحب الجاى ان شاء الله يكون يوسف في حضنك بئاله كتير وكمان الحبيب المجهول

وبعدين ازاى عيد الحب للمتجوزين جديد والمخطوبين والمرتبطين بس

واحنا رحنا فين ؟

دا احنا الجيل اللى بيعرف يحب بجد

وبعدين انتى يا فاتيما اول ما الواحد يشوفك لازم يكون يومه عيد حب ايا كان اليوم

دا انا بحسد الجبيب المجهول عليكى ولو حتى لسا مش موجود بس مامته داعيه له اللى يحب فاتيما

عارفه امبارح كنت عاوزه اقولك كل سنة وانتى طيبة اول حد بس مش عارفه اعل في اغلب المدونات حتى المدونة عندى مش عارفه ارد على الكومنتس
مش عارفه في ايه الظاهر في شكلة عندى

وحشانى اوى يا فاتيما وبحبك في الله جدا انا وبنوتاتى اللى بيبوسوكى كتييييييييييير وبيقولو لك كل عيد حب وانتى كل الحب والرقة والطيبة

صباح الأحسن من مفيش
مش قولتلك الموضوع على يقع على المظفين بتوع اللجان و الشئون القانونية (خلوا بالكم يا محامين فيه ناس اشطر منكم :-))

صباح الإيجابية
حلو الموضوع و الفعل
بس افهم يعنى ايه وزارة تتبرع
هى تكية ابوهم مش الموضوع لازمله اساس
و لا ايه ؟ لو بتبرعوا من جيوبهم ماشى بس مش ياخذوا فلوس مشروعات ثانية مهمة بس معليهاش العين و يسدوا بيها حنكنا:-(((

صباح الصياعة السياسية
ياسلام
الا حد يفكرنى هو جيه بعد الكام حكومة الى شالوها بالانتخابات و لا بالجيش؟؟
لازم ادور وراء الرجل ده
اعتقده بتاع جيش و دكتاتورى كمان ، هو ينفع مع اشكلنا غير كده :-))

صباح الإعتصامات
مصدقش
معلش فطوم اكيد ضجة صحفية علشان الناس تاخذ بالها
ما الصيدلة جنبهم بيطالبوا محدش عبر ليه علشان محدش مات ؟؟

صباح العامريات
الراجل ده عليه دماغ عاليه جدا جدا جدا جدا

صباح الناس الذواقة
فى الللمووولوووكككيييةةة
:-))))

صباح توابع عيد الحب
بجد اغنية فى الصميم
اول مرة اسمعها ؟
جديدة لماجدة الرومى
بس حلوة بجد
تخيلنى و انا رافعة صباعى الابهام لفوق :-)))

سلام عليكم ماما فاتيما
ربنا يجعل كل أيامك حب و سعادة إن شاء الله و كل اللى تحبيهم
صحيح و أنا عمّال اقول أن ايه الرومانسية اللى بكتب بيها اليومين دول أتارى عيد الحب ،،، والله رغم انى من الحبيبة الجداد و رغم كمان إن العيد ده تخليداً لذكرى رجل طيب كان بيحترم مشاعر البشر ،، إلا إنى بزعل أوى من طريقة الاحتفال بيه ،،، منظر الدباديب و القلوب و هيا مرصوصة على الرصيف أو متعلقة زى الحاجات اللى عند الجزار ،،، صعب أوى يخلى الواحد يروح يسأل ( بكام القلب ؟!!) و بالتالى أنا بفضل الاحتفال الصامت بيه ،،، و أتحيز أكتر لزمن الورد و الشعر و الحاجات اللى تخنق دى بس بجد كفاية انها بتبقى معمولة لواحد بس مش خط انتاج استامب و احدة يطلع الف دبدوب أحمر فى 24 ساعة ،،،،
صحيح ايه بقى الهدية اللى حضرتك جبتيها ؟ ( وش رخم جداً :)
اسعد الله يومك و كل اوقاتك بالحب و الطاعة

احنا المفروض نعمل حزب السنجله :D
مش اسلوب ده يعنى
بس عجبتنى فكره الهديه اللى جبتيها وشلتيها
الواحد يعملها يمكن تكون فاتحه خير عليه هههههههههه
كل سنه وانتى طيبه يا جميله
وربنا يخليلك يوسف يارب

اممممممممممممممممم
اولا ياتري انتي فاكراني
ولاااااااا
علي العموم حعتبر انك فاكراني
ولو مش فاكراني يبقي تحاولي تفتكريني

علي العموم
يارب دايما حياتك مليانه بكل حب
لانك انسانه رقيقه وتستاهلي كل خير

ويكرمك وتلاقي صاحب الهديه
اللي يستاهلها

reem
-----

و انتى طيوبة و رقيقة الرقيقات زى منتى يا ريم
و يا ستى ربنا يسعد ايامك كلها مش الفالنتين بس دنا ادعيلك من قلبى علطول يحصل انشالله
و الحبيب المجهول دا ماماته داعية عليه يا امى ...ميغركيش منظرى
ههههه

بوسيلى القمرات لحد ما اشوفهم



wanda
-----
صباح الهنا يا ون ون

غنوة ماجدة الرومى تحفة فعلا
منى ليكى يا حبيبة قلبى
خلاص اتحطت صباحات جديدة بقى
************************
و ××××××××××××××××××××××××××××
يا حبيبتى



أحمد عبدالعدل
-------------
لييييه يا دكتور كدا تسالنى ؟؟
مش هقولك طبعا
الهدية لصاحب الهدية يا ناس
متحاولووووووووش

كل سنة و انت و الأسرة بخير يا رب



bent men elzaman da!!
---------------------
لا يا ماما
مينفعش نعمل الحزب دا

محدش هيستنى فيه كتير أصله

هنفول ليه على بعضيشنا بس
دى مرحلة انتقالية بس
و هاتى انتى كمان هدية مش يمكن هيا اللى موقفة الدنيا و احنا مش عارفين؟؟؟
كل سنة و انتى طيبة يا عزيزتى




اميرة الصعيد
-----------
طبعا فاكراكى يا اميرتنا
مش اخت ريسنا محمود؟؟

الف حمدلله على سلامتك
و كتر الف خيرك على انك انتى اللى فاكرانى
سلامنا للريس محمود و عيالك

إرسال تعليق