.

.

الليلة دى  

Posted by: فاتيما in



هوه الليلة دى الجو سقعة
ولا أنا متهيألى ؟
لا برد و لا حاجة
و بعدين انتى اللى لابسالى نص كم
عاوزة ايه!!
الساعة اتناشر و بكرة شغل
المفروض ادخل انام


لما ابص على الأيميل
عادل و بسكوتة زى كل ليلة
سايبين رسايل كلها حب و سلامات و حواديت
و توصيات انى اخلى بالى من نفسى
بيقولوا انى وحشتهم
و بيطمنوا عليا ... عيالى حبايبى
دودو كمان ... زى كل يوم بتسأل عليا
و بتقولى حنين بتسلم عليكى قوى


علا بتسلم كعادتها و رسايل تانية من ناس تانية
انا مكملتش كلام مع عبير فى آخر مكالمة
انشغلت بحاجة ضرورى و قفلنا
بقالى كتير مكلمتش توتو صديقتى من ايام الجامعة
اكيد زعلانة منى بس مش عاوزة تقول
و انا خايفة حتى أتصل .. عشان العتاب مش قده
مش عاوزة اسمع كلمة تزعلنى من نفسى
اكتر من كدا
هيا مالها الناس بتحبنى و انا بقيت مش قادرة
احب نفسى كدا ليه؟



مالى الليلة دى ؟
مش عاوزة ادخل انام
و لا اتفرج على أى حاجة ف الدش
و لا عاوزة حتى اقعد مع نفسى
ومش هشغل فيروز
اصلها بتصحى همومى على رأى الواد عادل ابنى
انا بقالى زمن طويل مسمعتش ام كلثوم
و الجو النهاردة مشجع



اسمع ايه؟
دارت الأيام
و لا حيرت قلبى معاك يا جدع انتا ؟؟
بلاش للصبر حدود و لا إسأل روحك
هوه صحيح الجو فيه رشة كآبة
بس مش طالبة نكد للدرجة دى
عاوزة حاجة فرايحى
أيييييوه .... سيرة الحب



لما اقوم اقفل البلكونة عشان جايبة هوا
طب اطلع أبص بصة سريعة ع الدنيا
معرفش ليه مبقفش فى بلكونتنا كتير
مع ان القعدة فيها جميلة قوى
القاهرة بتكون حواليا من كل جنب والمنظر تحفة
يمكن لأنى علمت نفسى معلقش روحى بحاجة وأحبها
لأنها هتختفى من قصادى بعد وقت ؟
اكيد
القمر صحيح مش بدربس نوره الفضى
مغطى أرضية البلكونة بلون نيون خافت
ضى ربنا ... مش حاجة صناعى


آه لو الاقى اللى اقعد احكيله تحت النور

و يروح منى ساعتها كل الخوف
يلا
ف الجنة بقى إن شاء الله



لما ابص على الميدان تحتينا
الدنيا ساكتة والشارع تقريبا فاضى
وسط البلد جنة فى عز الليل
آه .. بس جنة من غير ناس يا قلبى


نفسى لو الاقى حد امشى معاه
فى شوارعها طول الليل
لحد الفجر ما يطلع
و مخفش من تاخير و لا من حد ماشى
و لا احس بأى حاجة تخنقنى
بس هوه مين و لا فين؟
يا ستى ما قولنا فى الجنة
اسكتى بقى


فردت ضهرى أتنفس شوية هوا منعش
مش موجودين بالنهار ... ميجوش غير بليل و بس
على شمالى القاهرة الفاطمية وعلى يمينى القاهرة الخديوية
و انا فى النص ها هنا واقفة
ياه لو الواحد عنده جناحات
كان ياخدله لفة معتبرة كدا
كنت هروح لحد بيت يوسف امسى عليه
وابوسه فى جبينه و ارجع تانى ... ياه
كانت تبقى ليلة !!
لما أدخل المقدمة الموسيقية خلصت
و الغنا هيبتدى



آه على سيرة الحب و سنينه
طول عمرى بخاف
طول عمرى
عاوزة ايه يا ست انتى بس ؟


مش للست ام كلثوم السؤال دا
الست اللى بتنسئل
دى أنا
زعلانة ليه من الوحدة و بتشتكى ؟
مش اختيارك ؟
مش انتى اللى بتبعدى عن الناس بمزاجك
يعملولك ايه تانى اكتر من حبهم و اهتمامهم
و سؤالهم ... وانتى اللى بتهربى ؟


طب انا بهرب عشان يفضلوا يحبونى
و ميحصلش مشاكل
مشاكل ايه هوه انتى لسه صغيرة
عشان توقعى فى مشاكل ؟
هيا ليها دعوة بالسن ؟
اصلك مش فاهمة يا بنتى


تعالى بس افهمك



من قعدتى فى الدنيا
اكتشفت ان الناس تلات انواع
نوع محدش يحس بيه و بيقضى حياته مللاً
و نوع بيعرف يواجه المشاكل و يحلها و يعيش
و نوع المشاكل بتجرى وراه بالمشوار
بمجرد تماسه مع الناس التانية على أى مستوى
و انا من النوع الأخير
و للأسف
مقربتش من حد فى عمرى قوى
الا و قلبت غم


المسافات بتعمللى زى نوع من السكينة و تخفف التوتر
و أصل انا كمان تعبت قوى
بقالى زمن طويل بخد على دماغى و قلبى
و محتاجة لحظة سكون
معنديش استعداد اتعرض لأى صدمات تانى


خلاص بقى


حياة ايه اللى نفسى اعيشها دى ؟؟
ما دمت مش عايزة انغمس فيها
يبقى مزعلش انى على هامشها
طب يا رب لحد امتى بس ؟



يا ترى كل واحدة متجوزة وعندها عيال
بتقدر قيمة حياتها كما يجب ؟
بتحس فعلا بطعم كلمة ماما اللى ممكن تسمعها
خمسين مرة ف اليوم وممكن تكون بتزهق منها ؟
بتحس بنعمة وجود راجل فى حياتها
بكل تفاصيله ...حتى اللى يخنق منها ؟

يا ترى كل واحدة مخطوبة و لا بتحب
حاسة بقيمة ما عندها من مشاعر و حياة مشحونة؟

و يا ترى اى واحدة مطلقة او ارملة و ولادها حواليها
مستشعرة غلاوتهم و بتحمد ربنا على وجودهم
قصاد عينها كل ليلة و لا مش حاسة بكدا خالص ؟



انا مالى بقيت وحشة كدا فى تفكيرى
ما كل حد فى دول عنده متاعبه و همومه
هوه فيه حد خالى ؟؟
واكيد كلهم حاسين بالنعم دى
بس الدنيا مغلوشة على تفكيرهم بحاجات تانية
زيى تمام



ايوه زيى ... طب مبص لروحى الأول
انا بقى يا ترى حاسة بنعمة انى ام
حتى لو مشوفتش يوسف بعينيا تانى ؟

حاسة بنعمة انى اتحبيت و حبيت ؟
و إن فيه بنات فى سنى و اصغر
لا أتجوزوا
و لا خلفوا
و لا اتحبوا و لا حبوا و لا شافوا فى الدنيا أى خير؟؟


ليه مفكرش فيهم و احمد ربنا
انا كمان على اللى خدته ؟؟


الحمدلله مليون مرة
الحمدلله يا رب
مالى بس الليلة دى بقيت وحشة قوى كدا



هيا الغنوة وقفت ليه؟
متسجلة لنصها بس ؟
احسن
انا هشيلها و احط حاجة تانية
نقلبها غم شوية ؟
و ماله .... ميضرش



انا هكتب البوست الجديد أمتى ؟؟
التعليقات موصلتش للرقم اللى انا عاوزاه
وشكلى مش هكتبه دلوقتى

مليش نفس بصراحة
خليه بعدين لما مزاجى يروق



ايوه غنى يا ست وأنا اجاوبك
هوه صحيح الهوى غلاب ؟؟؟
متقوليش معرفش أنا و تسكتى
طب كنتى تعاليلى
و أنا أعرفك اللى متعرفيهوش


ايوه غلاب و حاجة نيلة



الواحد يعمل ايه فى قلبه بس يا رب ؟
اوديه فين
عشان يبطل يستنى حاجة من الدنيا دى
على رأى نزار لو كنت أعرف خاتمتى
ما كنت بدأت


طب المرة دى انا عارفة نهايتها
ببتدى ليه ؟



ما هو ثومة قالت أهو
ان الهوى غلاب

هعمل ايه انا يعنى ؟؟
و اروح منه فين؟؟



وبعدين انا خايفة من ايه؟
لحسن قلبى ينكسر ؟


ما ينكسر
و لاّ يتفشفش مليون حتة
جديدة و لا اول مرة هتحصل ؟
و بعدين منا بقيت اخاف اطلب وانتظر شىء عموما


الدنيا خلاص مقاييسها اختلفت عندى
و مبقتش زى زمان
منيش الشابة الصغننة
اللى عاوزة تفرح ببيت وعيال
و برستيج اجتماعى
عديت خلاص الحياة دى و مبقتش ببصلها كدا
و لا بتمناها لأنها مش كل حاجة
و مش كل الفرحة
ولأنى مقدرش عليها من أساسه



صحيح بفكر لما ابقى لوحدى هعمل ايه؟
و بخاف


بس عادى
هعيش لوحدى ... مش جديدة عليا
منا مش هكون عبء على اخواتى و لا كمان إبنى
مش يمكن بعاد يوسف عنى دلوقتى
تدريب ربانى خافت لعدم وجوده قدام؟؟
عشان اتعود على انى اكون وحيدة
و من غير ما اكون حمل على أى شخص


دنا مستحملانى بالعافية !!
إيش حال حد غيرى يستحملنى




الله
بس ليه يعنى ؟!
هوه كتير عليا يا رب
الاقى حد واحد بس فى وسط السبعة مليار بنى آدم
على هذوها الكوكب
عاوزنى زى ما بتمناه
و بنفس القدر مش أقل ؟
حد عاوز يسمعنى لأنه حابب يسمعنى
حد عاوز يقرب منى لأنه محتاجنى زى ما محتاجله
حد عاوز يشيل كل حواجز واعتبارات بينى و بينه
حد عاوز يقسم همومه و افراحه معايا
من غير خوف و لاتردد
و لا يخفش على جاكتة قلبه لحسن تتكرمش
حد ميحسسنيش انى بشحت حبه
و اهتمامه و من غير ما أضطرنى حتى اطلب
و خصوصا فى ليلة زى دى



طب خليكى عادلة
فى طلباتك
ماهو كمان الحد دا هياخد منك ايه ؟



هياخد قلب مزحوم بذكريات قديمة و ناس و خوف
و قلق و حنين ليوسف ؟


هياخد واحدة عمرها و شبابها بقى وراها
اكتر ما فاضل فيه كتير قدام ؟

هياخد واحدة قلبها مقسوم نصين
و ملوش فيه غير يا دوب نص
و لو قدر حتى يملى النص و يسعد بيه
و مزهقش بدرى و طفش من برا برا


هياخد واحدة غريبة عايشة بطريقة اغرب
ومش عارفة حتى تتكلم فى موبايل زى باقى خلق الله


انتى يا بنتى عايشة برا حدود الزمن زى مديرك ما قالك
انتى مبتعرفيش تبقى عادية زى باقى الناس


حد يقدر و لا يعرف
يحب مخلوق جاى من كوكب تانى زيك


طب ازاااااااى ؟




انتى عارفه دا كله
و مع ذلك
حبيتى و بتحبى ولسه عاوزة تحبى ؟
طب ازاى يا ترى ؟



أهو دا اللى جرى


آه يا ثومة
جاوبى إنتى بدالى النوبة دى
و قولى اللى حصل بالمللى


قولى انى بشر و لسه عندى قلب بيدق
رغم القلق اللى ماليه ومن كل حاجة حواليه



بس أقولك ؟؟
ولا يهمك
هى عيشة و لا اكتر
حبى وامشى السكة لنهايتها
ميهمكيش بكرة
و لا الناس
و لا المأسوف عليه شخصياً
اللى ربنا بلاه وبلاكى بحبه

بطلى تخافى من نفسك و منه
و من أى حاجة



انتى مبتعمليش حاجة غلط
و لا حرام
خلاص بقى
دوسى بنزين
و لا تخافيش


و لو فى يوم عملتى حادثة و إتدشدشتى
يبقى نصيبك
و كفاية عليكى حاولتى


أصل محدش هيعيشلك حياتك
و لا حد هينفع يكون جنبك
فى ليالى الوحدة


محدش كمان ملزم يونسك
و يشغلك وقتك ومشاعرك


تبقى منتهى الانانية منك
لو فكرتى تحملى أحبابك عبئك


مش شغلتهم و لا مشكلتهم مهما قالوا
كلهم عندهم حياتهم و مشاغلهم
و هتكرهى نفسك قوى لو فكرتى
تحمليهم همك بالجامد


انتى فى بعادك صح جدا
وبتعملى اللى المفروض يتعمل
خليكى بعيدة و يشتاقولك
احسن يا بنتى
ما يزهقوا من وجودك
كفاية سؤالهم عليكى
دنتى فى نعمة


سيبى الكل يعيش و يتنفس
ويمضى فى طريقه
خليه يركب الجناحات بتاعته و يطير
يرجعلك وقت ما يعوز
و يبعد وقت ما يزهق


انتى خلاص خدتى على انك تكونى لوحدك
متغيريش نظامك
عشان شوية شجن ونغبشات فى قلبك
يمكن تروح لحالها لما صاحبها يروح لحاله


و أصله هيروح أكيد


قلبى عمره ما كدب عليا خصوصا
فيما يختص بالفراق
علطول بصدقه
وعارفة انى قلبى لابد وإنه مفارق حبيبه
ونفسى فى يوم قلبى
يطلع كداااااب
نفسى



هيا الليلة دى مش عاوزة تخلص ليه ؟



يا قلبى آه
الحب وراه اشجان و ألم
و أندم و أتوب وعلى المكتوب ميفدش ندم
انا اصلى مبندمش
و مبتعلمش
مهما الزمن عدى



يا رب انت عالم
انى تعبت قوى
و زهقت قوى
العمر بيعدى من جنبى بسرعة
من غير ما الحق انطق بكلمة


بكرة شكله هيبقى بايخ قوى
صباحه باين من دلوقتى
يوووه
انا هشيل همه
لما يبقى ييجى بكرة يحلها ربنا
ما كفاية الليلة دى


انتى كدا جبتى آخرها
وخليتها اكثر سوادا
مبسوطة يا ختى ؟؟


طييييييب


طفى الجهاز يا فاطمة
و قومى نامى احسن


و تصبحى على خير
يا ريت يعنى

------------------------------------------------
___ الأربعاء 24/2/2010___



عارفة
أنا نفسى أحضن حد
هى الدنيا برد
و لا انا اللى
مش واخد بالى

على سلامة

This entry was posted on الخميس, فبراير 25, 2010 and is filed under . You can leave a response and follow any responses to this entry through the .

43 كــــلام بيطــبطـــب عـــلى قــــلبى و روحــــى

هو الشتا كده يافاتيما بيقلب المواجع

روقى مسيرها تروق وتحلى
وحاولى تستمتعى باللحظة اللى بتعيشيها اول بأول

الحب على قد ما هو اوقات بيقلب بشجن بس برضه اكتر احساس بيغسل روحنا زى المطر ما بيغسل الدنيا

حبى واتحبي وسيبى بكره لبكرة
:))

اووووقات باحس ان الشتاء ده بتاع نكد
الواحد بيفضل محبوس ولوحده ويااه باقعد اقلب ف المواجع واعيط
واحس بالوحده جدا حتى بتأكد من كده لما ابص للقمر والاقى نوره مخفى
زى مايكون مخنوق بحس نفسى زيى
واوقات اقف وافضل مبلمه كده ومش افكر فى اى حاجه

بس احلى حاجه انك بتعرفى تستمتعى بوقتك وتسمعى اغانى
ربنا يسعدك يااااارب
مع خالص حبى وحبى

ايه بقا يا تيما؟؟؟
مالك؟؟؟
و بسكوتة كمان مزاجها مش حلو
ايه حكايتكم
انتم الجو ده بيأثر عليكم بالسلب ولا ايه؟


انا بقا الجو ده بيخليني فى نشوة عااارمة

روقى
و على فكرة انا مستعدة آجي اتمشي معاكي للصبح فى شوارع وسط البلد
تحياتي ليكي

فاتيما
-*-*-*
اسمك على اسمى وسعيده بكده ....
لسه عندى امل فى الحياه رغم ان الجو العام كل احباط يمكن لانى عارفه ان الشمس طالعه فى كل يوم رغم ما تحمله الحياه من شجن واحزان اكيد فى لحظات من الفرح والسعاده
رغم ان فى احتمال انك تقابلى حد تتجرحى منه لان الاكيد انك قابلتى ناس حاولوا يفقوا جنبك علشان الجرح يندمل بسرعه
رغم انه احتمال تقابلى الشر فى حياتك لكن بكل تاكيد قابلتى الخير مرات ومرات
رغم انه من المحتمل انك تكونى عايشه وحيده لكن من المؤكد ان قلبك مليان بحب الله وحب الناس
فكرى ان بكره احسن وان الخير جاى جاى لا محاله حتى لو اتاخر شويه لازم يجى ان شاء الله
يمكن اكون باتكلم بتفائل شويه لكن الحياه مش عاوزه اننا نكتئب فيها
بكره ان شاء الله يجى ومعاه الخير والفرحه
احلمى بيوم جميل لم يأت بعد وسوف يأتيك فيه تعويض السماء عن قريب ان شاء الله
ربنا سبحانه جل فى علاه هو القائل ان مع العسرا يسرا
خلى عندك ثقه ان الناس اللى بتحبك عاوزه انها تشوفك مبسوطه وفرحانه قربى منهم ومش تخافى لانه بكل بساطه لو فى ايد اتمدت لكى بالشر فى غيرها مليون ايد ممدوده بكل الخير
معلش انا رغايه شويه
ربنا يسعد قلبك ويقر عيونك

زهراء

كده بردو يا فاتيما .. البلوجر كله بيعيط وأنا كمان :(
انا عارفة ان الاحزان والهموم ملكية خاصة جدا بس مش عارفة ليه حسيت ان جزء من ألمك هو ألمي أنا شخصيا
بدعيلك من قلبي تلاقي السلام
ادعيلي أنا كمان

مساء الفل يا ست الكل
أخبارك إيه ؟ يا رب تكوني بخير .. روقي وسيبيها على الله ... إن شاء الله هاتفرج وهاتحلو

وأنت من أهل الخير

سلام

:))

السلام عليكم

كيف حالك اختنا الكريمة لعلك بخير والحمد لله والمود تمام بعد وصلة قلق الوحدة .. وان شاء الله ربنا يرزقك خير ما تتمنين ..

بلاش بقى سيرة الحب تاني .. امال لو كنتي سمعتي فيروز كان ايه اللي حصل ..

البرد والمطر والبرق والرعد منعني من الخروج وكانت فرصة اجلس على المدونة بس بسمع صورة غنائية قديمة اسمها معروف الاسكافي ما اهو انا مش ناقص انا كمان ثومة ولا فيروز ..

ربنا معاكي ويجمعك بيوسف ان شاء الله قريبا ودائما ..

تحية وسلام

انا اول مرة ادخل عندك
بس ايه دا كله
انتي حبستي نفسك في الخوف والحزن لحد مابقو سجن بلا مفاتيح
حاولي تخرجي من الحاله دي بسرعه كل الناس بتحبك ماتبعديش عنهم واعرفي ان دايما الحبل لما يتشد قوي بيتقطع المشاكل كدا برضو لما بتكتر ربنا بيحلها
ان مع العسر يسر

مش عاوز اعلق بجد
تاني مرة في ااقل من اسبوعين معلقش عندك او معرفش
اللي متفق عليه معاكي بس
ان دي من اطول الليالي اللي عدت عليا !

ممممممممممممم
مش هقول كلام انشا وكدة
بس بوصى لمة بوصل لحاله اكتئاب .أ.
يعنى الحاله خطرة بقوم اقعد البس كل لبسى الخروج واحط مكياج واقعد ابص فى المرايه رايحة جايه رايجه جايه لحد ماجالى جنان رسمى المهم بقى واشغل اغنيه هابطة
وارقص واعيط متفميش كل دة على بعضوا وبعدين استريح
اه والله مش بهزر
انصحك بقى تسمعى
انا مش عارفنى
لاونبى ياعبده
كعبوة كعبوة حبيبى وانا الاعبوا
الدنيا زى المراجيحه
كنت هنسى الكنج شعبولا بيعمل مزاج عالى اوى الساعه واحدة ونص
الخ الخ
الى تلك الاغانى الهادفة المريحة نفسينا
ويارب اكون ساعدتك بجد وهنيلك يافاااااااعل الخير
اموااااااااااااة بوسة سيد ابو حفيظة

ايه يا بنت خالي

الكلام الكبير قوي ده

في بيت شعرللمتتنبي

بيقول والراجل ده معلم بجد

نفسي التي تملك الاشياء ذاهبه

فكيف ابكي علي شيء اذا ذهب

طول منتي فيكي نفس

حبي يا بطه

ايه يا بطه

اقسم بلله يا بنت خالي
حاسس بكل اللي قولتيه
بس فعلا عندك حق
انك احسن من غيرك
ومتيمزه في حاجات كتير

أقله اننا كلنا بنحبك
ودي نعمه كبيره جدا
ان عدد مهول من المدونين
انتي بالنسبالهم اخت
مش اخت كبيره وبس

لأ اخت طيبه وحنينه
اخت بديله لكل مدون

اقسم بلله يا بطه

انا وبفضل الله عندي حاجات لو قولتهالك قليله هتعيطي علي اخوكي

بس بعاند وبضحك ومش هستسلم لا لوحده ولا لخوف ولا لاي شيء
وعشمي في ربنا ملوش حدود

اني اموت واعيش
وانا راضي بقضاء الله
فمبالك بيكي انتي

اللي بنتعلم منك
وبنحبك وبتخلينا

نحس بالطيبه والحنيه

بطه انتي بجد تستاهلي كل خير

وربنا ينولك كل خير في الدنيا
وفي الجنه

حسيت كتير اوي من كلامك وأد ايه الاحساس صعب بس برغم كل ده ففي حاجات كتير حلوة في الحياة

والدنيا على ده وده

بالنسبة للموبايل اول لما طلع كنت فرحانة بيه اوي بكل رنة من رناته وبكل مسج لكن دلوقتي ولا بقى بيفرق معايا

وبرغم اني بحس انك فعلا بتحاولي تكوني بعيدة عن اللي بيحبوكي وانا منهم لكن بجد لما قابلتك شفت فيكي حنية ورومانسية مشوفتهاش عند ناس كتير

ربنا يسعدك وتفضلي جميلة كده على طول

البوست ده عاوز اغنية واحدة
زبما انه فعلا احسن شاعر بحبه و مزيكا لوحد بموت فيه يبقي ده وقتها

في قلب الليل

كلمات : عصام عبدالله (الله يرحمه)
الحان و توزيع : مودي الامام
واكيد اكيد علي الحجار يعني

فاتيما
انت زي ماقلت محتاجه تحبى نفسك اكتر من كده محتاجه تثقي فيها احنا كلنا بنحبك وده مش كلام وبس وقلوبنا مفتوحه ليكي ولو ماعملناش كده مانستحقش اصلا نكون صحابك وحبايبك من حقك تلاقي واحد من ضمن ال7 ملياراللي في هذا الكوكب يشاركك افراحك واحزانك وتمشي معاه تحت المطر بس لحد ما يجي احنا كلنا قلوبنا مفتوحه ليكي كل واحد عنده مشاكل اه بس اكيد اللي بيحبك بجد هيكون عنده وقت طويل قوي ليكي يسمعك وتفضفضي معاه بكل اللي مضايقك بل بالعكس هيزعل قوي منك لو انت ماعملتيش كده ويعدين مين قالك ان عمرك بقي وراكي علىفكرة 36 سنه يعنى لسه شابه صغيره وفي عز عز عزك انت اللي مديه نفسك احساس كاذب بالكبر اقولك على شيئ وماتزعليش منى انا بضايق قوي لما الاقي حد يادوبك اصغر منك ب 8 ولا 10 سنين ويجي يقولك يا ماما وده بشوفه بيحصل من ناس كتير .. ماما ايه يا بنى ده بالكتير اختك الكبيرة يمكن احساسهم بحنانك هو اللي خلاهم يقولو كده بس انت المفروض كمان ماتعيشيش نفسك في مود انك بقي كبيرة وكده لانك لسه شابه صغيره وفي عز نضوجك وشبابك وبعدين مين اللي قال انك من النوع الثالت انتى من النوع التانى اللي يقدر يواجه المشاكل بس انت اللي مش مديه نفسك حقها ولا قدرها ولانظره لها نظره صح انت حد جميل قوي يستحق يحب روحه اكتر من كده
بجد بقي لو في حاجه واحده موافقك علهيا في البوست ده هو كلامك عن النعمه اللي فيهاالستات المتجوزة والبنات المخطوبه واللي بتحب وياريت بقي يفهمو الرساله دي منك ويحافظو على بيوتهم ورجالتهم ويعرفو انهم في نعمه
فاتميا بجد حبي نفسك اكتر من كده لانها بنفس جوهرة غاليه وتستاهل
لك كل محبتى وودي يا صديقتى الجميله

السلام عليكم

كيف احوالك اسئل الله ان تكوني بخير

سيدتي

في ليالي الشتاء تنفرد بنا لحظات الصمت والوحده

وننفرد بأنفسنا لحظات تجعلنا نفكر كثيرا وكثيرا

اوقاتا نتلذذ هذه الوحده

وسويعات اخري نكرهها ونلعنها وننتظرها أن تمر بسرعه وسلام ونسيان

اما اوجاع القلب فإنها تظل غائره ومتواريه في قلوبنا حتي نحييها

حتي نرويها بتفكيرها بها

وأعلم أننا لا نستطيع أن نمنع انفسنا من التفكير بها أو اننا لما نختار تلك اللحظات حتي نفكر بها

لكن الحب باق ِ
ولكن إعلمي أن من يحب أحدا لا يتعمد أن يتسبب في حزنه

وأن الحب الباقٍ لله أولا واخيرا

فهو الوحيد الذي إذا احببناه لا نندم يوم علي ذلك

والاهل والاصدقاء وغيرهم من المقربين والمحبين عندما نحاول أن نحبهم عن طريق الله فإنه يكون أسمي حب

لأننا سنراعي الله فيهم في كل شيء

وأه لو تعامل الناس كافه كذلك

لكن لو حدث ذلك لم يكن هناك خير وشر وجنه ونار

ولكن قولي لي من يستطيع أن يمنع عن نفسه الجرح او إنكسار نفسه وقلبه

مهما حاولتي الانغلاق والابتعاد وصنع مسافات سيتألم قلبك وستشعر روحك بالانكسار

لكن تحجيم المشاعر يمكن ان يفيد كثير او احيانا

ولما عندما لا تجدين أحدا تتكلمين معه وتشكين له همك وتفتحين له قلبك

لماذا لا تناجي الله وتشكي له همومك

فالله اقرب الينا من حبل الوريد واعلم بنا من انفسنا

فهو العالم بحالنا الغني عن سؤالنا

لكني احترم وجهه نظرك في إختصار الناس بعض الشيء

فهي إبتعاد عن المشكلات وبعد عن الهم والنميمه والشجار وغيرها من الاشياء التي تمرض الروح

ومع ذلك من اصعب الاحاسيس التي تمر بالإنسان ان يستجدي الحب او يترجاه فهو أمر مرير علي النفس

لكن أعتقد أن كل ما رويتيه عن هذه الليله كافي

وأعتقد أن النوم كان اكثر فكره صائبه

وأني اتمني لكي أن يعود اليكي إبنك العزيز

فأبشري
فكما عاد يوسف إلي اباه وإرتد بصره اليه

وكما اعاد الله موسي إلي أمه كي تقر عينها

فإني اقول لكي

لا تخافي ولا تحزني

فالله يشعر بقلبك جيدا ويعلمه أكثر منكي

اعلم مدي شوقك ليه ولهفتك

لكن إعلمي ان الله يقدر دوما الصالح لكي

ولإبنك

وهبكي الله راحه البال والسكينه

تصبحين علي خير

وسلمكي الله من كل مكروه

وتذكري دوما قول النبي صلي الله عليه وسلم لأبي بكر في الغار

" لا تحزن إن الله معنا "

:)

تحياتي

ااااااااه

تنهيدة من جوا بعد كل الكلام ده

ربنا يهونها بجد :)

اممممممممم
احيانا بنحس بكده واحيان بنكون صح واحيان بنكون غلط

بس اكيييييييد انتى مش لوحدك ولا اللى بيحيوكى هيوافقوا تبقى لوحدك وتتالمى وتعذبى نفسك وتفكرى انهم مش هيستحملوكى
اللى بيحب حد مش بيحس انه بيشيل همه بالعكس بيحس بفرحة وبسعادة بقربه ولو كان تعبان هو بيتعب اكتر منه لانه بيحبه اكتر منه الحب عمره ما كان بالعافية يعنى اللى بيحب حد بيحبه بجد
الحياة لو بصينلها على انها حلوة هتبقى حلوة وميت فل ولو بصينا لها على انها وحشة هتبقى نكد وزفت وخنقة ما بعدها خنقة
فى حياتنا حاجات كتير ملهاش لازمة سواء ذكريات وحاجات مادية ومعنوية بتاخد مساحة من تفكيرنا لو فكرنا مرة نرميها هنفضى مساحة اكبر للحاجات اللى بنحبها انها تكبر وتحلى حياتنا

وهتلاقيه ان شاااااااء الله هتلاقيه وهيملى حياتك وهيحبك زى ما انتى من غير ما تتغيرى ولا من غير اى حاجة لانك بيحبك انتى انتى وبس انتى زى ما انتى

يااااااااااارب يا فطمطم تروقى وتبقى كويسة وبخيييير يارب دايما

ولا يهمك البوست ان شاء الله هيوصل للعدد المطلوب واكتر

ابقى طمنينى عليكى دايما

يافاتيما
الصراع ده في الأصل صراع وهمي ، ومش موجود فعلا ، لأن أطراف الصراع و مقاتيحة مش في إيدك ، وبالتالي دورك فيه معدوم
نشرح بقى الكلمتين إللي فوق دول
إنتي واضح إن الصراع جواكي مابين ، أعيش الحياة كما هي أم لا ، ومن أول وهلة يبان سؤال منطقي ، لكن لو حللناها شوية بالعقل حاتلاقي إنها مش سهلة كده ، لأنك مالكيش إختيارات في الموضوع أصلا ، لا ليكي إختيار في إنك تعيشي لأن الحياة مش في إيدك أصلا ، ولا ليكي الإختيار في إنك تحبي ، لأن مشاعرك مس في إيدم هي كمان ، ولا ليكي إختيار في إنك تتحبّي ، لأن ده بردو مش بتاعك خالص ، ده بتاع الناس إللي بيحبوكي ، وفي الآخر حاتلاقي إن إللي وهبك حب الناس هو إللي وهبك مشاعرك ناحية إللي بتحبيه ، وهو إللي وهبك الحياة
طيب كده بسيطة بقى
يبقى الموضوع كله في أيده هو وبس
مش بس كده
ده هو كمان إللي ممكن يخللي الفراق يحصل و ممكن لا ، يعني كمان الفراق و اللقا من عنده هو ، طيب جميل جدا
دا إحنا تقريبا وصلنا أهه
يبقى فاضل إيه بقى ؟
إننا نفهم إنه بيحبنا أكثر ما إحنا بنحب نفسنا ، وبالتالي هو بيخطط لنا حياتنا أفضل بكتير ما أحنا بنخطط لروحنا
آه ما هو كمان إللي وهبنا روحنا دي
طيب يبقى سؤال
حد ربنا وهب له أنه يتحب و إنه يحب ووهب له الحياة و كمان بيخطط له حياته ، و طبعا ربنا مش بيغلط ، يعني تخطيطة مضمون له النجاح ، يبقى لما يخاف من حاجة ، يعمل زي الرسول عليه أفضل الصلاة و السلام ما قال ، يروح يصلي و يطلب من ربنا إللي هو عايزة ، ويدعو وهو موقن بالإجابة
طيب بقى حد معاه كل وسائل الطمأنينه و محاط بكل الرعاية دي ، يبقى يزعل ليه ؟ يكتئب ليه ؟ يخاف ليه ؟
ربنا بيقول
" أنا عند ظن عبدي بي "
وكمان بيقول
" فأدعوني أستجب لكم "
وكمان بيقول
" إذا سألك عبادي عني فإني قريب أجيب دعوة الداعي إذا دعان "
نقول تاني ولا كفاية كده النهاردة ؟
أنا بأقول كفاية
إطمني يا فاتيما ، ونامي و أحلمي و حبي و إتحبي و إرمي روحك وسط الناس إللي بيحبوكي ، و يهمهم أمرك و حياتك وسعادتك
مامتك ربنا يديها الصحة
أخواتك ربنا يخليهم لك
إخواتك و أخواتك المدونين و المدونات إللي ربنا كرمك بإلتفافهم حواليكي
وطبعا و قبل كل دول
إبنك الجميل ، يوسف ، إللي مش موجود معاكي دلوقت لحكمة من ربنا حاتعرفيها بعد شوية وتفرحي بيها على قد ما حزنتي السنين دي كلها
عرفتي بقى إن خوفك وهم وقلقك وهم وصراعك إللي جواكي مش حقيقي
شيلي بقى الغنوة النكد دي و حطي ليلى مراد في الحب جميل
آسف على الإطاله وسلامي لكي ولفارسك الصغير
KING TOOOT

:-*************************************

مثل هذا القلب الطيب حتما سينال جزاؤة وعسي أن يكون قريبا فصبرا آل يوسف فإن موعدكم الجنة
عبد الجليل

ربنا يؤنس وحدتك يافاطمة يارب

ياريت تعملى لنفسك وٍرد من الذكر
هيفرق معاكى كتير باذن الله
ألا بذكر الله تطمئن القلوب
وكررى قوله تعالى لا اله الا انت سبحانك انى كنت من الظالمين
ربنا يريح قلبك وبالك يارب
وصلى اللهم وسلم وبارك على سيدنا محمد النبى الامى وعلى آله وصحبه وسلم
ايمان مصرى

:-):-**** :-XXXXX
ياشيخة حرام عليكى كده
محوشة كل تعليقاتى السابقة و نزلتيها وسط تعليقات الكتب
الناس زمنها قالت ايه الهبلة ديه :-)))
اصلها فى النص ملهاش معنى الا لينا احنا الاثنين :-))

المهم بتياسى ليه من انه يوصل للعدد المطلوب ليه؟؟ خلى ليه تنوية على جنب الاصطباحات و الناس لسه ممكن تدخل تعلق

المهم
النهاردة الجمعة
و سماح من الاصطباحات :-))
و سماح كمان على التلميحات :-) الى فى البوست ده ، بس اعتقد الواحد لما يقارن نفسه بناس ثانية بيستريح و يحس بالنعم الى هو فيها و يارب المقارنة تكون حاسيستك شوية انك فى وضع احسن شوية من ناس ثانية :-)

روق يا فطوم
انا عارفة ديه توابع بوست النكد الى زعقتى فيه :-)))) و الله مااسبهالك الا لما هى تقلبها فرفشة :-))
و لا اسيبك انتى كمان:-)))
و شكل العفاريت حتلعب الاسبوع الجاى بس الصداع يروح و اروق كده :-(

اه انا كنت داخلة اقول
صباح الخير

:-))))))))))))))))))))))))))))))
:-XXXXXXXXXXXXXXXXXXXXXXXXXXXXXX

و بعدين مدام انت متبنيه بسكوتة و ععادل و النبى ملصلهم ودانهم شوية
خلوا البوستات تفرفش شوية بقى
هو يوم مطر يعمل فيكم كده
اه يانى امال احنا نعمل ايه :-((

تقريبا امبارح مريت بلحظات طبق الأصل اللى انتى كاتباه
بس اللى كتبتيه يوميات وبتفكرى معانا
انا فاشل
فى الحصول على اى حاجة كويسة من ناحية المشاعر فى الحياة دى
عارفة امبارح والله والله والله كنت عايز اروح انام بدرى مخصوص عشان اقتل التفكير دا واحس بانى مرتاح وانا نفسى جمبى بتونسنى ارحم من الوحدة الجميلة اللى انا فيها لانى مبقتش حاسس بالحياة
بس بقول لنفسى
ان اكيد ربنا شايل للبنى ادم حاجات كويسة
والحاجات دى مش هتيجى غير لما نعرف نختار صح
ونعرف نقرر صح فى حياتنا
ساعتها ربنا هيبعت لنا الحاجات الحلوة دى
انا مكنتش بالقوة دى انى اواجه كل المشكلات واناقشها ولو حتى مع نفسى
انا فكرت دقيقتين بس وانا ماشى فى المطر
وبعدين رميت كل الافكار من دماغى
وطلعت البيت وريحت
خليكى على طبيعتك
وبالتاكيد انا من النوع التالت
عشان كدا بكره انى اقرب من الناس :(
خليكى على طبيعتك
ربنا هوا الكريم
ربنا قادرعلى كل شىء
ربنا قادر يسعدك ويسعدنى ويفك الوحدة دى الى الابد
واعرفى ان المواقف الصعبه بتقويكى اكتر ما بتضعفك
ربنا يسعدك يا امى
شاب فقرى

تسمعي عن قصة يقول لك عن واحد مريض فيجي قريب له يقول هو من فترة حاسس انه ها يحصل له حاجة
يجي اي جاهل ابن ابي جهول ويقول حييييييييييي مدد مدد مدد ويقلع الجزمة ويقعد يتمسح في الحديد

ايه علاقة التهييس ده ببوست في ليلة شتوية مطيرة باردة

علاقات وثيقة جداااااااااااااااااااااااا

مينفعش خالص مالص بالص تقولي انا بحس ان كل ما الاقي حد بحبه اني ها افارقه
لأن ببساطة ربنا عند حسن ظن عبده به

علشان كده في ايام اكون جايبة جاز اخر حاجتين تلاتة
اقوم ضاربة الحتة الإسموكينج والجرافت
"ايه النيلة دي انا مفروض ست" اضرب الحتة القطيفة والموكياج ومع غياب البهجة الحقيقية اقرر والله اعلم ان النهاردة ها اسمع شيء حلو
ها اقابل حد حلو
ها تحصل حاجة حلوة

مع ان المقدمات مفيهاش اي شيء من هاذوه الهطل النسواني

أوم ايه بقى يا أوختشي
سبحان الله
تحصل حاجة تطلع السيلف ستيم فوق خيال كل البشر بما فيهم الأنا

ربنا عند حسن ظن العبد به
استبشري بأنك ها تكملي ومش ها تفارقي وان اي حبيب في علم الغيب ها يرضى بنص قلب
ها يرضى بمخلوق فضائي
ها يعالج قلب مجروح
ها يصبر علشان بيحب

بس وكل عام وانتم بخير
ها يجي ويحب ويصبر ويرضى وساعتها
مش بس ها تفرحي
لأ ها تفرحيه قوي
لأنك ها تديه النص الفاضي وها تدلدقي عليه من النص بتاع يوسفك كمان علشان تعوضي غياب الحبيب الأصلي
يعني الحبيب ده ها ياخد حب وعطاء وعليه بوناص امومة مهمة جدا لكل السادة الرجال

انا هيست؟
عادي فوتي
صباحك رضا من الرحمن وجمعة مباركة مليانة مغفرة وقبول دعوات بالسعادة في الدنيا والأخرة

بحبك

واغنية الاطلال لا ليه


نفسى الاقى حد امشى معاه فى شوارعها طول الليل


ممكن عسكرى حراسةأو عربية دورية بقا



هو البوست طويل بس قرات اجزاء منه باين منها ان الحالة صعبة


ربنا معاكى

هو الجو ده طلع كل الجزن المستخبى عند البشر ما بالك الملايكه الليى زيك يا طمطم
طببعى تحسى بكل الليى حسيتيه دهوطبيعى قلبك وروحك يتصارعوامع ذكرياتك فى انهم يفكروكى بشئ ماضى وخوف من حب آتى

ربنا هيرضيكى وهتشوفى يا طمطم والله ربنا هيرضيكى وهتفرحى فى الدنيا دى يافاطيما كما لم يفرح احدمن قبل

شوفى بس هيا بتفضل تمطر حزن ووجع حزم ووجع وبعدين بتلاقى ربنا امرها تغرق الدنيا كلها فرح

بكرا تلاقى الليى حابب فاطيما كفاطيماوالليى فخور بكونه مرابط بقلب فاطيما
وبكره تلاقى يوسف الليى اتاخد منك بالعافيه جايلك يعيش معاكى بمزاجه وبحبه لامه وبالعافيه برضه عناى حد اخده منك غصب واغتصاب

استغفرى ربنا كتير كتير اصل تصدئى فعلا يا طمطم احنا مالناش فى الدنيا كلها غيره

ربنا يفرح قلبك ويبهج روحك يا طيبه يا جميله يا ملاك انتى

بدور علي حاجة أكتبها مش عارف
كل بوست تكتبيه يا أم يوسف صراحة بحسه قوي وأعيشه كمان ..

أبقي نفسي أقول أي حاجة بس والله مش بعرف ؟

خلي اللي في القلب في القلب
بس والله بصدق يا أم يوسف لما بفتكركـ بدعيلكـ


كل سنة وإنتي طيبة بمناسبة المولد النبوي

إحنا إشترينا حلاوة المولد
وماما صبعت الكفتة من يوم الأربعاء وطبختها إمبارح ولسه فاضل منها ، إتفضلي معانا ..

ها إنتي عملتي إيه بقي في الموسم؟

:(
No Comment
Me Too Mummy
Same here and even worse
Your daughter

رحـــيل
-------

ازيك يا رورو
معاكى ان الشتا فصل الحزن
و الشجن كله و مع ذلك بحبه اكتر من كل الفصول

و انا برضو بقول زيك
اسيب بكرة لبكرة

كل سنة و انتى طيبة يا حبيبتى
و دايما بألف خير يا رب



emymony
-------

رحيل و نحن متفقون على ذلك
الشتا فصل الوحدة و بالتالى ما يتبعها من انفعالات
بس الحالة النفسية برضو ليها دور
لو فرحانة و بصيتى للقمر هتحسى انه بيعافر عشان يطلع من بين الغيوم
لكن لو حزنانة هتشوفيه مخنوق

ربنا دايما يسعد اوقاتك
ميرسى على دعواتك الحلوة يا حبيبتى




Mo7ammed
--------


ليه بس يا هاى فولتا كدا
دحنا بنفضفض مع بعضينا
بلاش التكشير دا لو سمحت



واحدة مفروسة
------------
انا بخير يا فروستى لا تكلكى
و بسكوتة هتبقى كمان زى الفل
و هتطلع لماماتها متخافيش

انا من عشاق الشتا و الله
بس فيه ليالى كدا بتعدى على الواحد غريبة عجيبة ملهاش سبب و لا هدف فقولت مرة من نفسى اكتبها و أسجلها فى دفتر احوال حياتى
او مدونتى فى قول آخر

تحياتى انا اللى ليكى يا فروستى
يا حبيبتى

لولا و زهراء
----------

تشتبه الأسماء يشرفنى يا فندم

و كلامك كله صح و لا تعليق عندى عليه غير انى مستوعباه جدا و البوست ما هو غير محاولة لكتابة مشاعر معينة بمر بيها انا و غيرى ممن هم فى نفس حالى او قريب منه

ادينا بنفضفض سوا مع بعض

ارغى زى ما تحبى
المدونتة منورة بيكى يا زهراء

على فكرة
زهراء فى المعجم معناها
المرأة المشرقة الوجه

يعنى انا هندهلك بعد كدا با ذات الوجه المشرق ...إيه رأيك؟؟


Unique
------

سلامة البلوج كله من العياط
ليه بس دنا كاتبة كلام حلو اهو
مليان اغانى و شعر و كدا

حلو قوى مصطلح ان الهموم ملكية خاصة دا ...قوى حلو بجد

و احيانا يا عزيزتى الملكيات الخاصة تتشابه برضو و يبقى بينها قواسم مشتركة زمانيا
أو مكانياً
او شكلياً حتى
و تلاقينا حاسين ببعض قوى
و دى نعمة

ربنا يطيب جرحك يا يونيك
انتى نورتينى





P A S H A
---------


مساء الرضا يا شريف باشا
انا بخير يا عزيزى
و رايقة اهو و سيباها على ربنا
متقلقش و ربنا يروقلك
انت كمان الاحوال
إن شاء الله





جنى
---

ازيك يا سعيد

انا فرحانة قوى بتعليقاتك دى

سمعت معروف الأسكافى دى كتير
ايام ادمان الاذاعة
و مسلسلاتها و اغانيها
و برامجها
خصوصا قال الفيلسوف

لو كنت سمعت فيروز مكنتش فتحت بوقى
و لا كتبت حاجة خاااااالص

نورتنى
انا بخير متقلقش
و منحرمشى من سؤالك عنى دايما
و عن يوسف

تحياتى انا و سلامى
و إحترماتى الخالصة





just waiting
------------
اهلا بيك لأول مرة
و لعلها لا تكن الاخيرة
إن شاء الله

و كل منا له سجنه الخاص
شئنا أو أبينا الإعهتراف بذلك
فيه حد سجنه مجتمعه
او ظروفه المادية
او مشاعره
او افكاره و مبادئه
او حالته الصحية
او حالته الإجتماعية
او اى حاجة تانية


محدش بيعيش حر بلا قيود
مهما تصور عكس ذلك

المنطقى ان الأنسان
يحاول يتخفف طول الوقت
من إحساسه بالخنقة
و الحبسة
و الحرمان من تحقيق امنياته كلها
زى ما بيتمنى ...
و الظروف بتمنعه
يحاول يبقى قوى و يتقبل القيود دى و يتعايش معاها عادى

لكن احيانا تفلت منه
... لحظات ضعف
يبقى عاوز يشتكى فيها
من القيود دى
و بعد الشكوى يحس براحة


و البوست دا
لحظة منهم مش اكتر



adel
-----

يا طول الليالى على كل وحيد يا عدولة

انا حطيت فى قلب الليل شوية
و بعدين حطيت غنوة تانية

اهداء ليك مخصوص يا بابا

لفرقة المصريين
اسمها إبدأ من جديد
يا رب تعجبك




كيكى عوووو
-----------

انتى مجرد اسمك فى صفحة التعليقات يفرحنى و يسعدنى يا كيكى يا عوووو انتى

لأ هيا اللحظات دى طالبة نكد
بمزاجى مش غصب عنى أنكد على روحى بدل ما ييجى اللى ينكد عليا

حاجة كدا زى غسيل الهموم
عشان تبقى اصفى و احلى

آه
ما الهموم ممكن تكون حلوة
و الواحد يقدر يحبها
عشان يتحملها


انتى وحشتينى يا كيكى قوى
و ميرسى على البوسة الحفيظية

هى و ظروفها
-----------

يا بن عمتى
من غير وا تقول حاجة
انا عارفة ا وليد انك شايل كتير يا بنى
بس زى ما قولت و هفضل اقول
الواحد لازم مهما شال ييجى عليه وقت و يبقى عاوز ينخ شوية و يقول آه مش قادر بقى و يبرك مكانه شوية
مجراش حاجة يعنى من ليلة نكد
و تروح لحالها
متتخضوش كدا يا عيال
انا كمان بحبكم جدااااااا
و حاسة بالنعمة دى و مقدراها

ربنا يسعد كل ايامك يا وليد
انت كمان تستاهل كل الخير

بس الدنيا اصلها علطول كدا
بترخم قوى
ع الناس الحلوة بالذات
و متفهمش ليه
قبل ما ترجع تراضيهم

و انت من هذوها الناس يا وليد



lady E
------
احساس فعلا صعب يا لولو
بس يحتمل يعنى و بعديه و انسى
و لازم أعديه لأن فيه كمان حاجات حلوة كتير معاه و لازم اشوفها و لا ابقى مستاهلش اعيشها

انا بكره الموبايلات بشكل مرضى ى ى
و عاوزة اتعالج من الحكاية دى

انت كمان يا لولو شخصية جميلة قوى
و وحشتونى يا بنات المنصورة قوى
قوى
قوى





mostafa rayan
--------------

واد يا صفصف

متزعلش من اللى بيقولى يا ماما
دى اجمل كلمة فى الدنيا
دنا اصلا ما بصدق اسمعها

لما بسمعها مبحسش انى كبيرة
و لا حاجة
بالعكس دنا بفتكر اجمل احساس
فى الدنيا و بفتخر قوى
ان ناس محترمة بتادينى بيه
خصوصا حد زى
دكتور احد عبد العدل ...

و طبعا بسكوتة و عادل أساسى
و ناس تانية فى التعليقات
بتقولهولى عفويا كدا
ساعتها ببقى عاوزة
اختفى خجلا و فرحا و الله


احساسى بكبر سنى مش معناه العجز
يا مصطفى ... خالص

انا بحس انى كبرت نفسيا و حياتياً
من ناحية التجارب و المشاكل
و الالم و الخوف الناتج عنها بس

بلاقينى عاجزة انى ابقى بتصرف طبيعى
و ارجع زى الاول
مش اكتر

ملهاش دعوة بالعمر
اللى ف الرقم القومى خالص

تعرف بقى يا مصطفى
انت من الناس اللى بحس
بحبهم طالل من بين السطور
بشكل عفوى
و برىء
و صاااااافى قوى

منحرمشى منك ابدا






z!zOoOo
--------

تعليق حضرتك مليان كلام كتير
متفقة معاك فيه جدا

بس اسمحلى اختلف شويةفى حاجات تانية

فى ان حبنا لو لم يكن فى الله غالبا ميبقاش حب بجد
يبقى منفعة
و مش دا اللى بتكلم عنه خالص
ف البوست دا

و معرفش هنتفق
و لا هنختلف ...

بس انا بشوف ربنا فى كل حاجة بتحصل
بينا و بين غيرنا

حتى مشاعر الاحتياج اللى اتكلمت عنها
مش بعيدة عن ربنا

لأنه خلقنى لهدف ما
و خلقلى قلب بيحب
و شايل مشاعر ايجابية برضو لهدف ما

و لو اتوجهت لحد يستاهلها
اكيد هتخلق شىء حلو
و تنفع البنى آدم دا
و تنفعنى انا كمان معاه
و ساعتها ربنا يبقى راضى عننا
و مفيش غلط حاصل

نورتنى بجد
علها لا تكون زيارة اخيرة





كفاية طيبة
----------


أيووووووه يا طيوبة

اتنهدى معايا تنهيدة حلوة
من بتوعك دول و إدعيلنا

وحشتينى على فكرة




star in the sky
----------------
ازيك يا أعلى نجمة فى سمايا

بصى يا ستى
المجمل بيقول ان حياتى اغلبها حلو
حتى لو فيها تعاسات متقطعة
و الحمدلله راحت اغلبها لحال سبيلها
فيما عدا بعاد يوسف
انا بخير و الحمدلله

بس ساعات الواحد بيتخنق
و يحس انه عاوز يطلع شحنة مرارة كدا
منغصة قلبه

فضفضة مش اكتر

انا بخير يا نجمة متقلقيش

شكرا ليكى يا حبيبتى




KING TOOOT
----------

انا عاوزة اشترى بتاعة
ومعرفش اسمها ايه كدا
و كل تعليق منك أروح
باصمة عليه بيها ....

مش بقولك انتا عامل زى اخويا الكبير اللى بيقرانى من غير كلام

وكل اللى قولته
على عينى و راسى يا وليد


و المكتوب اعلاه يا عزيزى
مجرد فضفضة فى ليلة صعبة
مكنتش عايزة تمر بسرعة
بس كدا

شيلنا الغنوة و حطينا حاجة
من وحى زمان يمكن تكون عارفها


اشوفك على الف خير انت
و بوبو و عمورى ياغاااالى

خالص ودى يا راعى الملك



أستاذ عبدالجليل
--------------

يا أستاذنا لا حرمنى الله من دعائك

لو فيه قلب طيب هنا
يبقى قلب حضرتك أكيد

ربنا يباركلنا فيك يا رب

عارفه دى تقريبا تانى زيارة ليا لمدونتك
امبارح دخلت المدونة ولقيت البوست ده
بس كنت تعبانه ومقدرتش اقراه
دلوقتى قريته وياريتنى ما قريته
انا والله عنيا دمعت وحسيت ان قلبى وجعنى
شعورك بالذنب وخوفك من المشاكل لما بتقربى من الناس اللى بتحبيهم وانك تبعدى احسن ليهم يشبه احساسى ..
عموماً أعتقد ان الفضفضة بتخفف عننا
ان شاء الله تكونى أحسن دلوقتى..

فاتيما

-******-----
يشرفنى انك تنادى عليا بأى اسم تفضليه
واول مره اعرف معنى اسم زهراء انا باحبه اوى اوى وبعد ما عرفت معناه منك احببت الاسم ده جدا جدا
تقبلى اطيب الامنيات بالسعاده الدائمه


زهراء

حتعمل ايه لو نمت يوم و صحيت و لقيت
اقرب ماليك فى الدنيا مش حواليك
هو انت مين اللى عمل كده فيك مش انت و لا فى حد غمى عينيك

ليه يا حبيبتى بتبعدى عن الناس
كلنا بنحبك و نفسنا نبقى جنبك اطول وقت
بس انتى اللى بتعملى الفاصل و الحاجز و خايفه مننا

استحاله يا حبيبتى حد يمل منك و لا يتخنق من وجودك

يا بنتى ده انا مشيت من القهوه يوم ما كنا مع بعض و انا دموعى نازله عشان حاسيبك تقوليلى نزهق و لا نزعل منك

انسى بقى حزنك و همك القديم و افتحى ايديكى و احضنى الدنيا

و الله لو نسيتى الحزن حتلاقيه نسيكى

انتى مليون مين يتمناكى
لانه حيلاقى ابتسامه جميله و روح حلوه و حضن دافى انا مشفتش زيه حتى مع اقرب الناس

انا باحبك يا بت انتى
و حاسه بالذنب لانى عديتك بالنكد
كنتى فله شمعه منوره لغايه امبارح
اسيبك يوم واحد يحصلك كده

بحبك و بافكر اجى اخطبك دلوقتى لياااااااااااا
هااااااااااااا موافقه؟
اموووووووووووووووه

Wanda
-------

معلش يا ون ون سماح البوست دا

اصله مكتوب فى حالة مش اللى هيا

بس حبيت اقبض على اللحظة و مسيبهاش تمشى من غير ما اسجلها لعلها تنفس عن ما فى صدر غيرى و مش قادر يكتبه



صباحك و مساكى هنا و حلويات مولد يا حبيبتى و متطلعيش العفاريت خليهم مطاريحهم منستجريش نزعلهم احنا


تملصى ودان عادل
ما شاء الله
عشنا و شوفنا بنات بتملص ودان ابوها
و ملكيش دعوة ببساكيتو البونية مش ف المود خالص الأيام دى اتعدت منى و لا غيه الظاهر ...

مش مسالة مطر يا ونداتى
هوه ساعات الحزن يهجم كدا
على حد تعبير نزار قبانى
كعطر إمراءة تدخل مصعد
عارفة الشعور دا لما يغمرك حاجة مش مستعدة ليها و لا مستنياها
بتيجى لوحدها و تروح

انتوا ؟؟

ربنا معاكو يا مامااااااا

كل سنة و انتى طيبة يا حبيبتى
السنة الجاية تبقى بتحتفلى بالمولد معانا فى مصر

************************
و ×××××××××××××××××××××××××
بكرة عشان مفيش صباحات ف الاجازات




شاب فقرى
--------

احساس طبيعى يا كريم

كلنا يا عزيزى مفتقدين الونس
بطريقة أو آخرى

و احيانا الجو بيعمل موسيقى فى الخلفية كدا تعمل شجن و تحضرلك الجو بتاع المشهد و تقولك يلا عيش اللحظة

متفقة معاك فى كل اللى قولته
و تعالى يا عزيزى إنضم للنادى بتاعى
بتاع المشاكل لما بتحب
تجرى ورانا دى

و فرحاااااااااانة جدا
بالجملة ما قبل الاخيرة دى قوى

كل سنة و انت طيب يا كريم





ستيتة حسب الله الحمش
-----------------

ردا على التعليق اللى مش للنشر
اتمنى طبعاااااا ينفع و تقدرى
و ربنا كريم و تعالى يا ستى اومال كتافنا دى اتعملت ليه؟؟؟

اما ما كتبتيه فموافقاكى عليه يا ستوتة

او بتمنى والله من قلبى هوه اللى يتحقق و اطلع انا اللى مش فاهمة صح او حاسة صح و اللى متشال يكون احسنلى من أى حاجة متوقعاها

منحرمشى منك يا ست السوتيتات كلهن







العيسوى الصغير
-------------

شكرا يا عيسوى

كلك ذوق
و انا مقولتش حاجة بس الاطلال دى عاوزة روقان رهييييب مكنش متوفر الليلة دى الصراحة

و ربنا مع الكل

عاشقة الرومانسية
----------------

سيدى يا سيدى

ايه القلوب الحلوة دى ؟؟

منحرمشى يا قطتى

بصى بقى

قلب ليا
و قلب ليكى
و قلب لحنونة
و قلب لعمر

ايه رأيك؟؟؟

بوسات و حضونات يا عروسة البحور





mahsen saber
------------

آه
انتى يا النص التانى لقلبى اللى ممكن تحسى بكل حرف مكتوب هنا و من غير ما اضطر اشرحه و لا ابرره و لا ادافع عنه

ربنا يسمع منك
و يكرمك قدى عشرتلاف مرة
بتبوسيلى بيرو و لا بتنسى ؟؟!!

بحبك قوى





مواطن شووجااع
--------------
بالف هنا و شفا يا إبراهيم

انا مبسوطة قوى بتعليقك على فكرة
حسستنى و كأنى معزومة عندكو و قاعدة على ترابيزة السفرة بتاعتكو و همد ايدى أهو ...

احنا الحاجة ام فاتيما مقضيها محشى النهاردة و فراخ فى الفرن

اتفصل معانا انتا


كل سنة و انت طيب
و بالف خير يا مجدى يعقوب الصغير




Bascouta
--------


سلامتك يا عيون ماما من كل زعل و هم

كلنا فى الوحدة يا حبيبتى
درجات و احوال
و حياتى عندك لتروقى
عشان خاطرى




حبيبتى اللى طلبت عدم النشر
---------------------------

طب ليه التعليق موش للنشر
مع انه حلو قوى

بس اكيد عندك اسبابك
و لو انى مش هاين عليا امسحه
بس خلاص ما دام دا طلبك

عموما انا سعيدة بيه جدااااااااا
و بسؤالك يا حبيبتى

منحرمشى منك ابدا




Manar
-----

دا حقيقى يا منار
الفضفضة بتريح كتير
و انا مريت بليالى كتير مشابهة و كنت بتخنق لكن النوبة دى قررت اطلق كل ما بداخلى و ارتحت جدا بعدها

نورتينى و معلش انا مش نكدية علطول كدا يعنى تلتربع الوقت مش كله
هههه




لولا و زهراء
-----------
يا ذات الوجه المشرق

انتى اللى شرفتينى بإهتمامك
و زيارتك
و زودتى احبابى حد جميل
مشرق ... زيك

تقبلى انتى كمان
امنياتى ليكى
بكل الخير يا حبيبتى





صيدلانية طالعة نازلة
-------------------

لأ مش طالبة الغنوة دى خالص

متقلقيش يا علا
لا عديتينى و لا حاجة يا ماما
دى كانت ليلة و راحت لحالها

انا زى القردة
و شمعة منورة اهو

و لا يا ستى مش عاوزة مليون
انا قنوعة و كفاية عليا واحد
بس عشان اجننه
و اطهقه فى عيشته
و اخليه يقول حقى برقبتى


و بطلى القلب الحونين بتاعك دا
اللى عاملك وجع مبيخلصشى


و لا اقولك خليكى كدا حنيتك دى سر جمالك و محبة الناس دليكى
و انا اولهم


ربنا ما يحرمنى منك أبدا

هروح ارد على ميلك عشان عاوزة اقولك حاجة مهمة

باااااااى

فاتيما

أولا كل سنة وإنت طيبة بمناسبة المولد النبوى
ثانيا بالنسية للبوست ده أحب أقول حاجتين
1-عجبنى تعليق مصطفى ريان عن كلمة ماما اللى كتير بيقولوهالك لإنها بتولد عندك من غير ماتقصدى أو تحسى إنك كبرتى
2- لو فضلنا خايفين من الأشياء السيئة اللى ممكن تحصلنا عمرنا ماحنعمل حاجة ولو عملناها مش حنفرح بيها
كان فى جملة جميلة فى فيلم أجنبى معناها (لأن تحب وتفشل فى حبك وينجرح قلبك خير لك وله من عدم إستخدامه خوفا عليه)
تحياتى

بحب الشتاء والمطر

الاختلاف شىء والتخلف شىء اخر

انت فعلا وحشتينا أوي

مش عارفة ليه مش عارفة أقل أي كلمة تانية :( . بس اتأكدي بجد يا فاتيما إن الناس اللي بتحبك دي بتحس بيكي كمان، و نفسها تساعد بجد بأي حاجة لو قدرت

ربنا يفرج همك يا بجد حبيبة لقلبي أوي

أبوحميد
-------

و انت طيب يا باشمهندس

مختلفة معاك يا عزيزى فى الحكاية دى
اصل ماما مش لازم تبقى واحدة كبيرة فى السن يعنى ما ممكن تكون ماما صغيرة
و انا بفرح بيها

عارف ليه؟؟

عشان غالبا او تقريبا بتتقالى من ناس انا مينفعش اكونلهم غير كدا

يعنى الكلمة ممكن تتعبنى لو جيالى من شخص انا بحبه حب واحدة لواحد ...
ممكن انقهر ساعتها لو سمعتها منه

لكن انا بسمعها دايما من ناس زى ولادى فعلا او اخواتى الصغيرين او حتى زى اخواتى الكبار اللى غالبا بيقولوا يا ام يوسف ....
فمبحسش فعلا انى كبيرة و لا حاجة

اما رم اتنين فمتفقة معاك جدااااااااا
تحياتى انا كمان يا فندم




الطائر الحزين
-------------

يا خرابى يا إيهاب عليك
لما تقعد تكتب فى الغاز و اقعد انا فى حيص بيص اقول يا ترى قصده ايه؟؟

انا كمان بحب المطر و الشتا

الجملة التانية دى يعنى ايييييييه؟؟

حاسة انها كلمتين فى جنابى كدا

صح؟؟




Wish i were abutterfly...
--------------------------
هووووووبى

ازيك يا حبيبتى
انتى كمان يا فراشتى الرقيقة وحشتينى قوى و حرمانى من تعليقاتك السكر زيك

انا كمان يا حبيبتى بحبك
يا ترى تقدرى تيجى لقاء بورسعيد و لا بعيد عليكى؟؟؟

فكرى و قوليلنا يا من غير ما توشى
بترفلاية رقيقة صغننة

و بحبهاااااااا

نوناااا
-------

انا حاسة بالويم كدا ان تعليقك مش للنشر و بالتالى منشرتووووش


مختلفة معاكى فى شوية حاجات
و متفقة فى الباقى

مش موافقة على انك تقفليها كدا
لانك لسه صغننة قوى على الهم دا
و انك تسديها فى وش قلبك

دنيتك لسه متعقدتش قوى كدا
يا حبيبتى فليه انتى تقعديها بس؟؟

معرفش ليه لما كتبت البوست اللى فات كان عندى احساس انه هيلمس حد
بس معرفتش مين ؟؟

قولت اكيد واحدة ما فى مكان ما ممكن تقراه و تبقى نفسها تكتبه و تتردد شوية اتنين تلاتة

انتى بصراحة كنتى مفاجأة المفاجأت

آخر حد اتوقع يوافقنى فى كل كلمة
بس مستغربتش حزنك و لا همك
لأنه باين حتى و انتى ساكتة
و انا بخدك فى حضنى و احنا مروحين
و من غير ما تنطقى بحرف

الجرح اصله لسه غاير و مندملش
مفتوح و بيوجعك و انتى بتتألمى
متخديش قرارات و انتى فى عز التعب
استنى شوية

ربنا يطيب جرجك يا حبيبتى
و يطمنك على ماما

لما تشوفك سعيدة
كل همها هيروح

بحبك قوى
يا حبيبتى
قوى

إرسال تعليق