.

.

فى عيونهم  

Posted by: فاتيما in ,



زمااااااااااان

وانا فى إعدادى كنت فى مدرسة محترمة
تقيم وزنا معتبراً للفن واهميته فى تهذيب البشر
كانت حصة الفن
(اسمها كان كدا موش حصة رسم زى نظام تعليمنا العقيم)
عبارة عن ساعتين كاملتين من المتعة

التى لا تنتهى بمجرد خروجنا من الحصة
او المدرسة او اليوم كله

كنا مغرمين بكل تفاصيل الحاجة اللى بنتعلمها
و نروح بيوتنا عاوزين نعملها و نتقنها و نبدع فيها
و نطلع تفانين خاصة بينا
أيااااااااام



من ضمن الحاجات اللى فكراها
كان يوم جميل قوى

المدرسة بتاعتنا (ميس سحر) وقفت فيه
فى وسط الأوضة

و قالت : هاتوا ترابيزة هنا جنبى


جرى زقينا ترابيزة فى وسط الاوضة
و سكتنا و بصينا بشغف

بصتلنا وابتسمت وبعدين قالت :
كل واحدة تجيبلى اول شىء نظرها يقع عليه و يعجبها

جرى كانت كل واحدة فينا كانت
جايبة فى إيدها اللى طالته

علبة كلنيكس
بكرة صوف
مزهرية فيها ورد صناعى
مج فيه اقلام كتير
بصتلنا و ابتسمت و
قالت :
حطوهم على الترابيزة بترتيب و شياكة


و فعلا فى ثوانى لما عملنا كدا قالت:
دلوقتى كل واحدة هتجيب الإسكتش بتاعها
و تختار ركن من الاوضة

هتقعد فيه وترسم المنظر دا من زوايتها
و بعدين بنات غيركم هيختاروا اماكن تانية
مختلفة عنكم و يرسموا منها

و فى النهاية فى معرض آخر السنة
هنحط الترابيزة بمحتواها

و نعرض كل الرسومات على لوحة واحدة كبييييرة
و نشوف شكلها هيكون إيه بعد التجميعة دى؟؟


بصراحة كانت تجربة ممتعة
و الفكرة كانت أمتع
و الأمتع و امتع اننا رسمنا اللوحة دى بألوان ال
HB

بكل درجاتها يعنى بالقلم الرصاص بدرجاته
يعنى ظلال و تكة بسن القلم
و تشغيل خيال
رغم انك بترسم واقع فى النهاية قصادك
مفيهوش تصرف كتير من ناحيتك



و كان الاكتر من رائع
لما تكتشف ان غيرك مشارك فى نفس رؤيتك
بس من مكان تانى و زواية تانية
ويتصادف إن انتوا الاتنين صح

رغم اختلاف اماكنكم و طريقتكم و مهارتكم


حاجة كدا تخليك تتعلم فى صمت من غير ما تاخد بالك
معنى انك تختلف مع الآخرين
و تقبلهم و يمكن تصقفلهم
و تتعلم منهم بغيرة صامتة مقبولة و غير مؤذية
ازاى تعبر عن اللى بتشوفه
بفن و حرفنة انتا كمان


انا بقول الكلام دا دلوقتى ليه ؟؟
اصل الليلة دى طالبة فضفضة
مع نفسى


يا ترى لو انا اللى محطوطة على الترابيزة
الناس هتشوفنى و ترسمنى ازاى ؟؟



وصحيح الرسم مهارات و قدرات
بس العيون مش كلها بصيرة
و لو اصلا الموديل اللى هيوه حضرتى
مش اللى هوه قوى يعنى
هيرسمونى ازاى
زى ما بتمنى اكون فى عيونهم؟؟



بس عزائى ان اكيد هيكون
فيهم فنانين بجد
و لو قلة قليلة مندسة


و الفنان فى رأيى هوه الشخص الوحيد
اللى بيشوف حتى فى القبح ... بعض من الجمال

و قادر يرسمه و يظهر جماليته
اللى مفيش عين تانية تلقطها




طب لو انا فى نص ترابيزة حياتى دلوقتى
و الناس حواليا
هيشوفونى من مختلف الزوايا ازاى ؟؟

هيشوفونى مثلا

- شخص طيب بقلب طفل بريئ زى اللى ف الصورة
- شخص ساذج سهل خداعه بكلام معسول ودموع زائفة
- شخص انانى بيتعلق بالإشياء والناس وبيرفض حتى فكرة فقدانهم
- شخص متطلب عاوز حد حاجات مينفعش تتحقق
- شخص الدنيا علمته كتير وبقى عنده خبرة ووعى و حدس
- شخص ضعيف الحيلة
- شخص خبيث وقادر على ابتزاز مشاعر الآخرين بحكاياته و مشاكله
- شخص مثير للشفقة بسبب سوء الحظ
- شخص فاشل ومعرفش يحافظ على حياته لأنه خايب
- شخص اتكالى ومستنى حد يحلله مشاكله
- شخص واضح قوى لأى حد
- شخص مغرور وواخد قلم فى روحه إنه ياما هناك و هناك
- شخص مسكين قوى لأنه مش حاسس انه مكشوف
- شخص متمحور حول ذاته وحاسس الدنيا والناس بيلفوا حواليه
- شخص رزل يقف على عتبة القلب ميدخلهاش
- شخص لطيف مبيحبش يزعل حد حتى لو هوه هيزعل فى الآخر
- شخص كهين يملك من كيد النسا قدر غير يسير
- شخص امومتها محرومة و بتعوضها بإغراق الآخرين بهذه
المشاعر كنوع من التعويض
- شخص عايش فى الدور وبيحب اللى ينافقه وميحبش الصراحة
- شخص بارد قادر يستغنى عن الحياة العادية اللى بيعيشها كل الناس
- شخص بيعانى من الوحدة لدرجة تخليه يبعبع بكلام ميصحش يتقال
- شخص قلبه متهورمجنون لو حب النسيم يطير معاه لأبعد مكان
- شخص عاقل قوى و بيوزن الحياة صح
- شخص مريض نفسياً عاوز يتعالج عند متخصص
- شخص ثقافته ضحلة وبيغطيها بالكلام عن المشاعر
- شخص جامد عايش فى زمان و مش عارف يتخطاه
- شخص بيعرف يكتب ويعبر عن نفسه كويس
- شخص كداب وبيمثل عشان يتخلص من المواقف المحرجة
- شخص جبان بيخاف من أى حاجة لأن امكاناته كدا
- شخص عاطفى وخيالى بكل ما فى الكلمة من معنى
- شخص صحبته مملة و الإقتراب منه يزهق
- شخص صحبته آمنه جدا ولا يؤذى احد الا بالصدفة البحتة
- شخص أخرق بيغلط كتير ويصعب الإعتماد عليه
- شخص يتحب من اول وهلة بدون أى سبب منطقى
- شخص مهذب و مشكلته انه ابن ناس و متربى
- شخص عنيد و دماغه عاوز الكسر لأنه بيؤذى نفسه و للى حواليه
- شخص مرتاح و مرفه ومعمرش فى جوازته عشان متدلع
- شخص شكاى مبيبطلش يستجدى اهتمام الآخرين
- شخص محب للشعر و متذوق للأغانى والادب و الكورة
- شخص غضبه مدمر و بيخسره كتير

- شخص مستمع جيد جدا لهموم الناس و قادر يحس بيهم
- شخص بينافق الآخرين بالإهتمام بتفاصيلهم والإستغراق فيها
- شخص يستاهل كل اللى جراله و اللى هيجراله




مش عارفة ايه تانى ؟؟
بس اللى أعرفه انى لما ببص فى عيون الناس على اختلافهم
ببقى شيفانى كل دول
و كل الناس اللى عرفتهم و عرفونى فى عمرى كله

شافونى من كل الزوايا دى
قالوا و لا مقالوش


طب دول البشر التانية
انا بقى شيفانى ازاى ؟؟


لو حبيت ادى نفسى درجات زى شهادات المدارس
بتاعة زمان

عشان معرفش الصراحة بتاعة دلوقتى شكلها إيه

اتصور درجاتى هتكون كالآتى

  • إبنة ..... 5 من 10
  • أخت ..... 7 من 10
  • حفيدة .... 9 من 10
  • زوجة .... 6 من 10
  • ست بيت .. 1 من 10
  • ست بس ... 7 من 10
  • حبيبة .... 0 من 10
  • أم ليوسف 12 من 10
  • زميلة دراسة 8 من 10
  • امينة مكتبة.. 8 من 10
  • سكرتيرة ... 4 من 10
  • قريبة .... 5 من 10
  • جارة .... 9 من 10
  • صديقة ... 7 من 10
  • زميلة عمل..6 من 10
  • مدونة ... 8 من 10
  • مواطنة ... 3 من 10
  • مصرية ... 10 من 10
  • إنسانة ... 6 من 10
  • عبدة ..... -30 من 10
__________________

المجموع الكلى للدرجات : 91 من 200



يا لهوتينى ؟؟

دنا حتى مجبتش درجة النجاح
يعنى ال50 % حتى
هورى الشهادة لأبويا ازاى يمضيها ؟؟

ههههههه
يااااااه دنا رجعت فى الزمن فجأة
و خفت بجد و نسيت انى كبرت
و بابا راح للى خلقه


الله يرحمه
الحمدلله إرتاح من الموقف الزفت
اللى كان متكرر شهرياً بنجاح عظيم
و انا كمان

و حرام بقى
مش كل شهر كحك كحك
عاوزين بيتى فور أو ساليزون


يادى الخيبة و الوكسة الفحقلى كاروهات
اسود فى بنى
بنقط زرقا و نجوم بنفسجى
انا هبطل ابقى فاشلة امتى ؟؟


إييييييييييه
يلا
معلش
عادى بتحصل فى أحسن العائلات


ويمكن يبقالى درجات رآفة عند الناس
اللى بحبهم و يحبونى

فيرفعوا درجاتى و أعدى


او يقبلونى بفشلى
و يقولوا ملهاش فى العلام
و امكانياتها مش اكتر من كدا



او يبعدوا عنى خالص و يرتاحوا
عشان ميتعدوش من فشلى
و ينكوا بنار الحداد


م الآخر
أنا بقيمنى كدا
و الدرجات دى طبعا قابلة للتغيير
و التحسن او التدهور
الله أعلم ببكرة بقى ... لو عشناه


كل ما أرجوه بس
انى لو وقفت فى نص ترابيزة حياتى
و الناس العزاز عليا حبوا يرسمونى بعيونهم

يا ريت
رغم كل شىء
يفضلوا بكل مميزاتى و عيوبى

يحبونى


أصل الحب يا جماعة
مش بالمواصفات و المزايا
و لا بحسب العيوب ايه فيها يحتمل من عدمه
الحب بدرجة القرب
و الونس بوجود الشخص دا فى حياتك
رغم اى عيب او ميزة او استفادة
او أى شىء تانى فات او يستجد


بس خلاص



الدور عليكو يا بشر
مين ناوى يفضفض معايا
ويقول على درجاته
هوه كمان؟؟؟


This entry was posted on الخميس, مارس 04, 2010 and is filed under , . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

افضفض بكرة اصلى بعد 5 دقايق حبتدى اعك فى الكلام من التعب
:-) وقبل ما اقول تصبحى على خير
خذى عندك


* إبنة ..... 8 من 10
* أخت ..... 7 من 10
* حفيدة .... 7 من 10 ملحقتش غير جده واحدة :-( و على البعاد
* زوجة .... 0 من 10
* ست بيت .. 5 من 10
* ست بس ... اممم 3 من 10
* حبيبة .... 0 من 10
* أم 0 من 10
* زميلة دراسة 7 من 10
* امينة مكتبة.. :-)) 0 من 10
* صيدلانية ... 6 من 10
* شغلى الحالى 8 من 10
* قريبة .... 6 من 10
* جارة .... 6 من 10
* صديقة ... 9 من 10
* زميلة عمل..7 من 10
* مدونة ... 3 من 10
* مواطنة ... 6 من 10
* مصرية ... 5 من 10
* إنسانة ... 6 من 10
* عبدة ..... 3 من 10

__________________

المجموع الكلى للدرجات : احسبيها انت بقى انا ورايا قد كده حسابات :-))

الصورة عسل بالضحكة الصافية :-)
يارب تفضل تضحك على طول

تصبحى على خير :-*************************************
:-XXXXXXXXXXXXXXXXXXXXXXXXXXXXXXX

الاول تعالى امسى عليكى
واقولك مودى زى مودك الليله
ههههههههههههه
الا ماتعرفيش مين مودى دا ياتوما
ماعلينا
انا ياستى شايفانى من مرايا سودا
موش شايفه غير لون اسود غامق اوى
كل ماحاول انور المرايه الاقي الاسود فيها يزيد
دا انا حتى كمان غيرت لون البلوج للبينك ومجوهرات وبتاع وع ذلك موش قادره احبه او احسه
حاسانى موش حاساه ولاحاسه بيا ولابحاجه خالص
توما ربنا يسامحك موش عاوزه اعكننك
سيبك انتى
اقولك درجاتى

إبنة ..... 5 من 10
أخت ..... 7 من 10
حفيدة .... 8 من 10
زوجة .... 2 من 10
ست بيت .. 7 من 10
ست بس ... 3 من 10
حبيبة .... 0 من 10
أم ....... 0 من 10
زميلة دراسة6 من 10
مدرسه انجليزى.. 7 من 10
عبيطه ... 50 من 10
قريبة .... 5 من 10
جارة .... 1 من 10
صديقة ... 9 من 10
زميلة عمل..6 من 10
مدونة ... 5 من 10
مواطنة ... 5 من 10
مصرية ... 10 من 10
إنسانة ... 5 من 10
عبدة ..... -60من 10

اجمعى انتى وقوليلى النتيجه

انا مليش نفس ارد على نفس الأسئلة

انا بقمة الغتاتة والعشم ها أرد على أسئلة تانية خالص

يعني إيه إنسان سعيد؟
ممكن حد يعرف الإنسان السعيد؟


هل هو الإنسان الأول على فصله
هل هو الإنسان المطيع للأوامر
هل هو الإنسان الذي يتبع نموذج وضع له
هل هو الإنسان الشاطر .. الغني .. المتجوز .. المخلف

لو نظرنا بعين قاصر لجار مثلا ووجدناه
زوج
اب
ابن
مهندس
طبيب
عنده عربية
شقته حلوة
مراته شيك

هل ده هو الإنسان السعيد؟

في مسلسل يسرا الأخير مش فاكرة تقريبا اسمة حالة خاصة
الراجل اللي حبها واتجوزها في الأخر قال كلام اجرى الدمع في عيوني

قال انا زهقان
ولكني اخر انسان من حقه يقول انه زهقان
اخر انسان من حقه يقول انه مل

انا زوج
ولي بنات ونجحوا واتخرجوا واتجوزوا
اتجوزت مراتي لأني كان لازم اتجوز
اتجوزتها علشان كانت بتحبني فقلت ليه لأ
اشتغلت وتعبت وعرقت وحققت ثروة طائلة
مش علشان بحب شغلي
علشان انا اتحطيت هنا ولازم انجح

الراجل في الأخر طلق مراته لأنه كان عايش
لكن مكنش سعيد ولا بيسعدها
وساب شركته وراح جاب تاكسي
طول عمره نفسه يسوق تاكسي في القاهرة بليل


لو النموذج ده عندنا حقيقي
بناته ها ترفع عليه قضية حجر
وكل واحد فينا ها يحكم عليه انه مجنون

لأن ببساطة مفهوم السعادة عندنا مشوه

السعادة مش قمة النجاح في الدراسة
ده ممكن يكون احد مقومات السعادة بس مش هو السعادة

السعادة اتزان نفسي
نتيجة لبيئة اسرية سوية محسسة الإنسان بالأمان

ابني يذاكر شوية
مش بينجح؟
يبقى حلو قوي
يلعب شويتين
مش بصحة وبيضحك؟
يبقى حلو جدا
يتعلم اي هواية بيحبها
يتفرج على التلفزيون
ياخد شوية من وقتي نتكلم ونحضن بعض
يكون له اصدقاء
في النادي
في الشارع
من اسرته

يعرف الكويس
وبرضه يعرف الوحش ويعرف يحكم عليه ويسيبه بمزاجه


السعادة منظومة متكاملة
سعادة الدنيا ببهجة النفس
وسعادة الأخرة برضا ربنا

السعادة مش المعيار الأهبل القديم الموروث

السعادة .. حلم يشارك في صنعه لإنسان واحد عشرات الأشخاص
وأولهم أبوه وأمه




انتي في نظري
انسانة ذكية جدا
تتحدثي ببهجة وحب واقبال على الناس ولكن جواك صامت
خايفة والخوف مسلسل اقبالك واندفاعك نحو اي شيء بتحبيه
الخوف مع الذكاء بيخبوا كتير كتير من نفسك الحقيقية
فنانة .. حتى في الحركة برضه فنانة
انتي في نظري محتاجة بس اول بشارة بفرج ما وها يطلع منك حد
كووووووووولنا مشفناهوش
هو موجود هناك جواكي بس مستخبي

يا مودمواذيل فافي انت جبل تلج مش باين لحد عشره والتسعة اعشار مستخبية بفعل ضربات قدرية قاصمة

حضرتك
انسانة 10 من 10
و ده احساس جانى من اللى اعرفهم ويعرفوا حضرتك والحمد لله احساسى دايما بيكون صح ،،

( ام ) بكل معنى للكلمة وحضرتك ظلمتى نفسك لما قيمتى نفسك برقم له حدود
حضرتك مش ام ليوسف وبس
عارفة لما باقرا كلام عادل عنك باصدق انه ابنك بجد ربنا يخليكى بكل الحب ده يارب


احمد
اسماء واحلام فى وجدانى

ايه ده انا اعترض

ما اعرفش اعمل كده طبعا

بلاش فضايح يا بطوط خلي الطابق مستور

هقولك علىحاجه انا ممكن اجيبلك كل حد يعرفنى فى الدنيا وكل واحد يديكى الدرجه الى تخصه

او ممكن تنجحينى بالرافه وخلاص يا بطوط


انا عن نفسي

شايفاكي ست جدعه ومحترمه وروحك حلوه وقلب ابيض ووشك سمح وابتسامتك تلقائيه وجميله
وجايز غلطي وبتغلطي فى قرارتك الشخصيه لكن اعتقد ان من الناس القليلين جداااا الى بيعرفوا اسباب الخطأ الحقيقى ويتعملوا من غلطهم فعلا مش كلام بس
اممممممم
وايه كمان وبما انك من احلى الامهات الى فى الدنيا
باقترح عليكى تتبنينى مش مشكله كبيره عنك بس ابتنينى برضه عشان انا امي مخصماني دلوقتي
هههههههههههههه

وست بيت واقعه كده لا لا لا ما ينفعش الكلام ده انتى اتبنينى وانا اظبطك بقى
ههههههههههههه

انا باحبك يا بطوط والله

فاتيما

----------

عنوان البوست تحفه بشكل غير طبيعى
فكريتنى بحاجه غريبه اوى ماما ربنا يبارك فى عمرها بتقولها لو الواحد بعد ما يموت يرجع تانى بعد سنه كده يشوف الناس ليه فاكره وبتقول عليه ايه ........


صعب اوى انى اعمل تقييم لنفسى
بس يمكن اقدر اقولك انى الحمد لله
ابنه كويسه ولسه مش جه النصيب علشان اقول زوجه وام والحاجات دى
هو انا ممكن ارسمك من خيالى رغم اننا مش اتقابلنا قبل كده خالص مالص وكمان لسه متعرفه على المدونه عندك من فتره قريبه
ممكن ارسمك زهرة بنفسج فى فازه كريستال مكسور من الفازه جزء صغير بس مش بيقلل من قيمتها لانها كريستال نقى اوى اوى اوى
الفازه فيها مياه نقيه جدا جدا بس واقع من الزهره ورقه او اكتر بس مش وقعت بعيد وقعت جوه المايه اللى فى الفازه .....
فهمتى حاجه من رسمى رغم انى مش فنانه
اتمنى لكى حياه كلها سعاده وحب

زهراء

ازيييييييك وحشانى اوى اوى بجد ربنا يكرمك و يفرح قلبك :) عجبتنى فكرة المدرسة اوى بجد ودا ردى على الاسئلة
ـــــــــــــــــــــــــــ
إبنة ..... 5 من 10
* أخت ..... 7 من 10
* حفيدة .... 8 من 10
* زوجة .... 0 من 10 لانى لسه مش اتجوزت :)
* ست بيت .. 5 من 10
* ست بس ... من 10 مش فاهمة :(
* حبيبة .... 10 من 10
* أم 0 من 10 لانى لسه مش بقيت أم
* زميلة دراسة 4من 10
* امينة مكتبة.. 8 من 10
* صيدلانية ... 0 من 10
* شغلى الحالى 8 من 10
* قريبة .... 6 من 10
* جارة .... 5 من 10
* صديقة ... 10 من 10
* زميلة عمل..7 من 10
* مدونة ... 2 من 10
* مواطنة ... 4 من 10
* مصرية ... 10 من 10
* إنسانة ... 9من 10
* عبدة ..... 3 من 10

اممممممممممم

مش عارفة اقيم نفسى بس ممكن اجرب

ابنة 5 من 10

اخت 4 من 10

حفيدة 6 من 10

قريبة 7 من 10

زوجة لسة

ام لسة

زميلة عمل لسة

زميلة دراسة 7 من 10

ست بيت لسة

جارة لسة

صديقة 6 من 10

مدونة 3 من 10

انسانة 8 من 10

مواطنة 4 من 10

امينة مكتبة مبقيتش قبل كده

ست بس 2 من 10

مصرية 5 من 10

عبده 5 من 10


شكلى مش هنجح السنة دى على الدرجات دى

فى حاجات كتير اديت نفسى فيها درجات قليلة لان مش عاوزة ادي نفسى اكتر ويمكن اكون مستحقش

البوست ده خلانى افكر فى شوية حاجات كده

د/ستيتة قامت بالرد

انتي عندي مش بدرجات
انتي بالدنيا كلها و ده كفاية و اني انسان لو الدرجات 200 هحصل بالاقل علي -200 بس انت برضه عندي بالدنيا طلها يا اجمل ام في الدنيا

السلام عليكم

كيفك فاتيما

بصراحة زاد قدرك في نظري بسبب هذه الدرجات .. بمعنى انك لو اعطيتي نفسك مثلا 190 من 200 كانت الصورة ستنعكس .. ودرجاتك نابعة من التواضع وليس من جلد الذات ..

التقدير الذاتي صعب ان اقوم به ..

ولكن درجتك قبل الاخيرة فمن البوست السابق وادخالك السرور والفرح على زملاء وزميلات مدونين يجعلني اعطيكي انسانة 10 من 10 .. احسبك كذلك والله حسيبك ..

تحيتي

نصبح و نفصفص كلامك حتة حتة بقى :-)
مدام مفيش اصطباحات نفصفصها :-)))
انا اصلى بحب افصفص بسلة
الرز بطلته من ثلاث سنين :-))
:-*****************************************************************

المدارس زمان :-)
بصى مكنش عندى مدرسة كده فى الفن
بس فاكرة انى لما كنت فى الروضه :-)) كنا بنفن بالرسم و الالوان و الصلصال
مكناش بنذاكر حاجة كنا بحفظ قران بس سماعيا كمان :-))
بس كانت ايام حلوة بدون ستريس
(قلق يعنى :-)) اصل المصريين بطلوا يقولوا قلق :-))

تعرفى سمعت ان المدارس الانترناشونال بتتبع نفس النظام ده فى الحضانة بس بتاخذ عليه الوف موالفة كل سنة علشان العيال يستمتعوا بطفولتهم :-))))))))))))))))))))))))))))))))))

زمن عجيب غريب

اه فى الابتدائى كنا لما نرسم حاجة حلوة
كل شهر المدرسة تلم احلى تفاننا و تعمل معرض لاولياء الامور يجوا يتفرجوا
و افتكر اتعرضلى اربع رسومات فى خلال السنة :-) و كنت باخذ ايد ابويا افرجه و اتفشخر قصاده :-)))
يعنى استدعاء حلو لاولياء الامور

كانت ايام :-)

اعدادى و ثانوى مفيش وقت للكلام الفارغ على رايهم و عليه مفتكرش اى فنون نطت منى ساعتها :-)))
بس كراسة الرسم عندى لسه

-----------------------------------

النظرة المختلفة لنفس الواقع
انا بتبعها بشكل ثانى
جايز لانى من نوعيه بتتوجع من كلام و تصرفات الناس معايا (حتى لو مبينتش)

فبقيت بحط نفسى فى الجانب الاخر
اتخيل انى اتولد فى
وسط ثانى
بيئة ثانية
عيلة ثانية
بلد ثانية
ديانة ثانية

(كده يعنى و احاول قبل ما اتكلم اتخيل كلامى بالمعاكس حيوجعنى ؟؟؟ و عليه كثير قوى :-)) بعد التفكير الكثير ده مبتكلمش اساسا:-))))))))

كل الى اقدر اقولهولك
حاولى تاخذى من كل شخصية قابلتيها الحلو فيها و تعملى زيها (هو صعب و ساعات مستحيل:-)
بس هو ده الى بنتحاسب عليه فى الاخر
على ما اعتقد :-؟؟

و صباح الخير
:-XXXXXXXXXXXXXXXXXXXXXXXXXXXXXXXXXXXXXXXXXXXX

دلوقت فى درجات ملف انجاز
حوالى 50% من الدرجةالنهائية
وانت فنانة وشاطرةجدا فى الرسم
هتعرفى تعملى نشاط كويس وتاخدى الدرجات دى
مطلوب منك بس فى اخر امتحان
درجاتك ماتقلش عن 30%
وبعدين فى أدوار كتير لك ممكن تزودى درجاتك فيها لما تستغلى نضجك
يعنى لوحاسةانك ابنة بنسبة5 من 10
لسه قدامك فرصةتبقى احسن كتير
الراحل
الدعاء ليه هيفرق كتير فى درجاتك ودرجاته
وهو أب لو هيقيمك وخصوصا لما أصبح فى دار الحق هيكون تقييمه اكتر كتير من 5
فى اداءات بتتنفذ كل فترة
مش لازم نستنى امتحان كبير علشان نثبت نفسنا
الامتحان معاه رهبة وتوتر
ممكن تضيعه مننا
يبقى على طول الحياة
نرتب ملف انجازنا
ونعمل نشاطنا
ونزيل الانشطة غير الملائمة
ونستنى رحمة ربنا
ومش لازم نفكر فى الدرجات اللى بيديها لنا البشر
وبعدين فى أدوار تانية مفروض علينا درجتنا فيها
ماينفعش نحاسب نفسنا عليها

مع انى متأكدة من شوية حاجات
انك اديتى نفسك درجات قليلة فى بعض الجوانب
وانى معرفش أصلا ادى نفسى درجات كده
واننا منقدرش نقيم نفسنا بالطريقة دى

عجبتنى جدا مدرستك
دى انسانة وفنانة بجد

معترضه على كل كلمه قلتيها عن نفسك تكون وحشه
وموافقاكى فى كل وصف جميل
مش بس لانى بحبك
لكن لانك تستحقى ده فعلا
بطلى تبصى لنفسك على انها اقل مما يجب لانك كده بتظلميها وانا مااعرفش عن فاتيما انها ظالمه
درجاتك اللى ادتيها لنفسك كمان لازم تتعدل مثلا
حبيبه 20 من 10 لان سعيد الحظ امه دعياله فكميه حنان لايمكن يلاقيها فى حد تانى
سكرتيره 8 من 10 لانك على الاقل ناجحه فى شغلك بدليل احترام رؤسائك ليكى واستمرارك وانك اتعلمتى بسرعه
صديقه 50 من 10 ودى انا احكم عليها لانك صديقتى(:
مدونه 10 من 10 لانك بتكتبى من قلبك واللى بيطلع من القلب بيوصل للقلب
انسانه 50 من 10 لانك بتهتمى بالناس وبتحبيهم بدون تكلف وبتلقائيه




انا كمان هاشوف درجاتى هتكون ايه؟
واهو نتسلى بس يارب تنجح ياتتح
ههههههههه


* إبنة ..... 3 من 10
* أخت ..... 8 من 10
* حفيدة .... 5من 10 (ماتوا وانا صغيره)
* زوجة .... 0 من 10( تتوقف على شريك حياتى مستقبلا)
* ست بيت .. 3 من 10
* ست بس ...5من 10
* حبيبة .... 10 من 10( فى اعتقادى انى باعرف احب )
* أم 0 من 10(لسه فى علم الله)
* زميلة دراسة 7 من 10
* زائره مكتبة.. 10 من 10(وقت البريك دايما كان فى المكتبه)

* شغلى 8 من 10
* قريبة .... 3 من 10
* جارة ....8 من 10
* صديقة ... 20 من 10 ( دى اهم شئ فى حياتى )
* زميلة عمل..10 من 10(باهتم براحة زملائى قوى)
* مدونة ... 0 من 10( هاسيب تقيم الدرجه دى ليكى)
* مواطنة ... 5 من 10
* مصرية ... 9 من 10
* إنسانة ... 9 من 10
* عبدة ..... 0 من 10

كده المجموع 123 من 200
هيييييييه تتح نجح
هههههههههههههه

من السهل تقييم النفس لما تكون هناك صراحة مع النفس
اما تقييم الاخرين فاحنا مع الاسف عاطفيين فى التقييم يعنى انا بحب انسان يبقى ملاك باختلف مع شخص يبقى شيطان
لكن تقييمى لنفسى يتلخص فى حاجة بسيطة جدا انى بشر يعنى جوايا كل المتناقضات جوايا الخير مع الشر
بداخلى الحب مع الكراهية
اما تقييمى ليكى فانك انسانة تحملى الكثير من المزايا وربنا وهبك القبول وحب الناس ليكى اما العيوب فده محتاج بوست او بوستين هههههههه
وانا الليلة مشغول
تحياتى

انا لو رسمتك هرسمك
ورده بلدي حمرا في الربيع

انا بجد مش اعرفك
ويمكن ماكونش دخلت عندك غير مرتين او حاجة
بس بجد والله العظيم والله العظيم مش مجاملة حسيت اني حبيتك
حبيت كلامك حسيت انك انسانه رائعه
واعتقد انك ظلمتي نفسك كتير بتقيمك دا
ياريت تقبليني بنت ليكي انا كمان :)
ولو مش هتقبلي هكون بنتك غصب واقتدار :)

دا استنخبار ولا اية؟

انا ماليش في الاستنخبارات

ينفع ادخل بطوة علشان اغش

واللي مش هيعششني هشرحو

هو ازاى الواحد يقدر يدى لنفسه درجة 30|10 فى العبودية؟؟؟
ثقة فى النفس ولا ثقة فى المعبود
سامحينى عشان انا باخبط كرسى فى كلوب مودك

فاتيما
ازيك صباح الخير

حالتي بعد واثناء قارءة البوست
هي مستمتعة جدا جدا حتى النخاع بكل كلمة فيه وبالجو حصة الفن الجميلة
ومستغربة حتى النخاع برضه وهقولك ليه
ومتدايقة جدا
اما الاستمتاع فطبيعي
الاستغراب اني من فترة حوالي اسبوع شاهدت برنامج وكانت الضيفة من اول نظرة تذكرني بيكي وبطريقة كلامك وملامحك كما تخيلتك وقلت في نفسي لابد ان احكي لكي الموقف لاني كنت متخيلاكي كده وبالروح دي والملامح دي كمان

وسبحان الله تقريبا تلاقت الافكار

النت فصل قبل ما اكتب التعليق التاني
وكنت باقولك
اني اللي مضايقني اني نسيت الاسم
لكن وعد اني اول ما افتكره هاجي اقولك على طول

وبالنسبة للتقييم
فصعب اني اقيم نفسي وخصوصا في حاجات لسة ما جربتهاش
لكن لما ارجع اقولك الاسم احاول اقيم
تحياتي

فكرة الأسئلة حلوة جدا
وكمان فكرة التربيزة لأن هي فعلا شبه حياتنا كل واحد الناس بتشوفه من زوايا مختلفة
مدونة حلوة جدا وان شاء الله هتابعها دايما
__________________
إبنة ..... 5 من 10
أخت ..... 4 من 10
حفيدة .... 6 من 10
زوجة .... 6 من 10
ست بيت .. 0 من 10
ست بس ... 5 من 10
حبيبة .... 6 من 10
أم 0 من 10
زميلة دراسة 9 من 10
امينة مكتبة.. 9 من 10
سكرتيرة ... 7 من 10
قريبة .... 9 من 10
جارة .... 6 من 10
صديقة ... 8 من 10
زميلة عمل..8 من 10
مدونة ... 9 من 10
مواطنة ... 0 من 10
مصرية ... 100 من 10
إنسانة ... 5 من 10
عبدة ..... -10 من 10

شوفى يا طماطيمو... قبل ما أديكى التقييم بتاعى.. عايزة أقولك حاجتين

أولا احنا بشر .. فينا حاجات حلوة أوى وحاجات وسط.. وحاجات أو صفات أكيد مش حلوة.. لأننا مش ملايكة ولا رسل احنا بشر... وكل حاجة فى الدنيا فيها الخير والشر.. الحلو والوحش

ثانيا : لو أجهدتى عقلك وتفكيرك وتركيزك ازاى الناس شايفاكى .. صديقينى هتتتعبى.. عارفةليه؟.. لأننا كل واحد فينا مختلف 360درجة عن التانى... سيبك من الأبراج والتشابه والكلام ده... أنا ممكن أشوفك حد جميل أوى .. حنين أوى... طيب أوى.. غيرى ممكن يشوفك بطريقة مختلفة تماما

نخش على التقييم :
ابنة..... 8 من 10
أخت .... 10من 10
حفيدة... 7 على 10
زوجة ... لسة مبقتش
ست بيت... 7 من 10
حبيبة....لسة مبقتش.. بس رومانسية بعبط وهبل
أم..... لسة مبقتش... بس بحب الأطفال أد عمرى ونفسى أبقى أم
زميلة دراسة... 6 من 10
أمينة مكتبة ... 0 من 10
مترجمة .... 9 من 10
شغلى الحالى...... 9 من 10
قريبة ...... 5 من 10
جارة ...... 4 من 10
صديقة ...... 9 من 10
زميلة عمل.... 7 من 10
مدونة ..... 3 من 10
مواطنة ..... 7 من 10
مصرية....... 20من 10
انسانة دى بالذات مقدرش أحكم فيها... أكيد اللى حواليا يقدروا
عبدة ....... 7 من 10

فطوم
شكلك حتكلى علينا الخروجة الاخرانية :-)))
و بعدين حتروح مننا فين انزلى بالتورتات و لا مسك فى البوست علشان تعرفى اننا كلنا فاشلين معاكى :-))
يعنى حتروحى مننا فين
و برضه مش حنسيبك
و حنعلمك الحساب من ثانى
يعنى 6+7 = 13 مش 5 :-)))) بلاش خنصره

بكرة الاصطباحات ماشى :-)

اه بالمناسبة
حد يدخل فصلك بمطوة و ساكتاله
ينفع الكلام ده :-)) لو مش عارفة تردى قوليلى انا اتولى دور المتحدث الرسمى و اقلب التربيزة بالمعروضات على دماغه
معندنا حد يبلطج هنا :-))
و لا اخالى بابا يطلعله المطوة بتاعته و يروح فى كزوزة ؟؟

مساء الخير
:-*********************************
:-XXXXXXXXXXXXXXXXXXXXXXXXXXXXXXXXX

wanda
------

إيه الحركات دى ؟؟

انا كنت أدبى

دنا جمعت اركامى بالعافية؟؟
عااااااااااااا

طيب

101 من 170

طب كيويس أهووو

انا شلت الزوجة و الام و ماينة المكتبة لأنك مش منهن يا بنتى


ليه اديتى نفسك 5 ف مصرية؟؟؟
دنتى مصرية حتى النخاع يا بنتى
انا فصلت المواطنة عن الجنسية
عشان اغلبنا بيحب مصر جدااااااااا
لكن مبيعرفش يحبها صح و يعمل حاجة عشانها كما يجب
انتى مصرية 10 من 10
و عشان متغربة نزودلك خمس درجات
يعنى خمأشر

كمان انتى مش مدونة 3 من 10 !!!!
انتى فى وقت قليل جدااااااا بقيتى معروفة وسط الوسط التدوينى و محبوبة و محترمة جدا و ليكى وجود و اهتمام بمدونتك و التدوين اساسا عبارة عن يوميات و انتى يا بنتى ساعات مش يوميات دا كفاية بوستاتك اللى لابسة باتيناج دى و محدش قادر يحصلها

لأ انتى مدونة 7 من 10 على الأقل

نزود كل دول ع المجموع
يبقى سيادتك تاخدى
118 من 170
الله ينور
كدا تمام

أى خدمة


و حاضر الإصطباحات بكرة ان شاء الله
عونياااااااا


معلش اتزنقنا فى يوم 5/3 عشان بساكيتو ف الكاهرة يوميها و منقدرش نجيبها ف وسط الأسبوع
و ايوه 6+7= 5 مش بقولك كنت ادبى
الله !!!


و مين اللى يستجرى يخش بمطوة دا

هاه

دا هنانى نط ف الكوز يا شيخة
لأ لأ لأ
منقدرش نفتح بوقنا معاه يا ست
دا كبيرنا و على رأى عادل الضرب ف الوش مفيهوش معلش
احنا نسيبه يغش براحته خالص
و بعد ما يخرج من اللجنة
نسقطه و يطلع المطواة ع الفراش بقى مش احنا

دول من حساب بكرة
*****************************
و ××××××××××××××××××××××××××××××××



cute kitty** sookara
--------------------

مالك بس يا ست العرايس
انا مودى فاتح و الله
مفيش حاجة
انتى هتتلككى بيا يا بت انتى ؟؟

و ايه بقى انتى كمان هتزنقينى اجمعلك الدرجات زى وندا ؟؟؟
مااااااااشى

هنشيل الزوجة و الأم و العبيطة عشان انتى لسه مبقتيش و لا واحدة فيهم فبتدى درجات على إيه سيادتك؟؟؟

الباقى بقى مجموعه
30 من 170

لأ يا ماما
انتى مش عاوزة درجات رآفة
و لا فصول تقوية
و لا تجيبلى ولى آمرك
انتى عاوزة نظام تعليم من اول و جديد بقى
و حيث ان عريسك فى بلد تانى يبقى هناك تبتدى معاه العلام من اول و جديد
و نشوف الارقام دى بعد الجواز بشوية هيبقوا كام و انا متاكدة انى هندهش من المجموع الممتاز
بكرة تشوفى و تقولى فاتيما الكبيرة قالت ...ماشى؟؟



ستيتة حسب الله الحمش
-----------------

يا خراشى يا ستوتى

دايما ردودك رافعة نعنوياتى
و محسسانى انى حد حلو قوى قوى قوى
ربنا يخليكى يا رب
انا معاك يا زعيمة فى كل كلمة من دول
بس اللى بيختار حياته كدا
بيتعب قوى من ان اللى حواليه بيطالبوه بتمن محبتهم ليه


يعنى لو انا مثلا عاوزة احب و اتجوز حسب قناعتى الشخصية و حريتى و ظروفى اللى تناسبنى انا و المجتمع يبقى آخر همى
هتلاقى ان الحكاية صعبة جدا
مش صعبة فى التنفيذ
او فى قدرتى على احتمال الضغوط و محاربتها و التمسك برغبتى دى

لكن المشكلة هتيجى من مجتمعك متمثلا فى اهلك و اصدقائك و ما شابه اللى رغباتك و احلامك مش هترضيهم و تتعارض مع قناعتهم

لكن انا متفقة و جدا معاكى
و متجاوبيش يا ستى
انا سخصيا هديكى لوحدى كدا
17 من 200
انا حرة بقى البوست بتاعى
و الشهادات بختم مدونتى ..
هه
بوسات و حضونات
يا ست السوتيتات كلهن




اسماء و احلام فى وجدانى
-------------------

يا استاذ احمد كلك ذوق
و انا سعيدة جدااااا بزيارتك دى
و بتعليقك
و بتوسمك فيا خيراً
الناس اللى نعرفهم انا و انتا و مشتركين ما بينا كلهم ناس طيبين و حلوين عشان كدا شايفنى بعيون حلوة انا كمان

و عادل دا ابنى العزيز الغالى
ربنا يحرسه من كل شر
يا رب
نورتنى جدا

ندى الياسمين
-----------

إعترضى يا ست الستات زى ما تحبى
مقدرش افتح بوقى معاكى اصلاً
دنتى صبصوبة الصبصوبات
و انا بعتبرك دايما مثال للمرأة المصرية كما يجب ان تكون ف
الجدعنة
الامومة
الاخلاق
ست بيت ممتازة
صاحبة صاحبتك
و ف الحق ميهمكيش
و ذوق ومراعية للكل
من الآخر هديكى زى ستوتة 170 من 200
على الأقل

و مين مزعلك بس غير الشلة المتخلفة اياها و لو ع التبنى تعالى يا بنتى انا اطول
و بعدين انا استغلالية بقى
و من ناحية واقعة فى شغل البيت دى
فأنا الوقعان نفسه يا ماما

لو ربنا اراد و اتنيلت اتهببت اتجوزت تانى
هبقى آجى اخد عندك كورس مكثف
لعله يجيب فايدة
و لو ان سعد زغلول قالها زماااااان
و مش معقول انا اكسر كلمة زعيم الأمة
حتى تبقى عيبة كبيرة منى

انا كمان بحبك يا صبصب
ربنا يخليلك العيال و ابوهم
و تسلمى يا حبيبتى





لولا و زهراء
-----------
ميرسى يا ذات الوجه المشرق

اصل الموضوع دا فى بالى خصوصا الفترة الاخيرة

الناس بتشوفنى ازاى و انا شيفانى ازاى

حلو قووووووووى تشبيهك دا
انا بموت فى الورد البنفسجى
برا بيقلوا عليه ورد المناسبات الحزينة و انا شيفاه مبهج و رقيق و لون انثوى كدا و شفيف

و التقييم يا حبيبتى مش محرج و لا حاجة
دى نظرة بنى ىدم لنفسه و بالعكس يمكن يكون بيظلم روحه كمان بس هيا مجرد فضفضة مش اكتر

نورتينى بنورك يا ذات الوجه المشرق




جارة القمر
--------
97 من 170
حلوة قوى النمرة دى

انا استبعدت امينة المكتبة لأنها مهتنى انا مش انتى و كمان الزوجة و الام لأنك لسه برضو و ربنا يكرمك و ست دى يعنى احتفاظك بمواصفات الإنثى اللى تختلف عن الراجل يعنى مع حبيبك و اخوكى و اى راجل بتكونى كما يجب و لا ل
صوتك دايما اوطى منه
بتحترمى وجوده
بتديله برستيجه و وضعه
عارفة حقوقك و حقوقه و لا تتعدى عليها بدعوى المساوة و الكلام دا
مهتمة بشكلك و لما بتمشى جنب حبيبك مبيحسش انه ماشى مع واحد صاحبه
حاجات كتير من نوعية كدا
ممكن لما اشوفك مرة ابقى اكملك شرحها عشان الروقابة

المهم ان عجبنى قوى درجة الحبيبة دى
بصراحة انا احترم الناس الواثقة فى قلبها دى

ربنا يسعدك دايما يا رب
تحياتى الخالصة ليكى يا عزيزتى




star in the sky
---------------

هوه انا اللى هجمع كل مرة ؟؟؟
يا وحشيييييييييييين

طيب
68 من 120
طب كويس قوى عدتى درجة النجاح اهو

بس تعالى هنا قوليلى
جارة لسه ليهيا بنتى ؟؟

انتى عايشة فى صحرا من يوم ما تولدتى ؟؟
يووووووه نسيت انتى نجمة فى السما صحيح

بس برضو
اين النجوم و الكواكب الصديقة؟؟؟




adel
----

يا غالى على ماما منحرمشى منك
و انتا قاسى على نفسك دايما بلا مبرارت واضحة ليه بس كدا

انا لو عليا مش هدخلك الاختبار خالص و مش محتاجة شهادة
عشان اعرف درجاتك ايه

انتا شطارة من غير حاجة
و من غير ارقام تقول

كل سنة و انتا طيب يا غالى علياااا

جنى
---

و عليكم السلام يا جنى

كتر الف خيرك يا سعيد
انتا اخلاق دايما و رافع نعنوياتى كدا دايما و انا فعلا بقيم نفسى من غير زعل و لا مضايقة و لا جلد للذات و لا حاجة دى مجرد فضفضة مش معاكو مش اكتر

منحرمشى من تحياتك دى ابدا



wanda
-----

و الله يا ون ون مدرستى بتاعة الأعدادى دى كانت خاصة و فى الامارات يعنى مصاريفها كانت عالية و مكلفة
بس المدرسة كانت مصرية و دا اللى اسعدنى جداااااااا
اغلب المدرسين كانوا من مصر
و المسالة مسألة امكانيات يرافقها فكر و مرونة ادراية

لما اشتغلت امينة مكتبة فى مدرسة ابتدائى من 9 سنين كدا
المدرسة امكاناتها كانت عيضة
بس انا اتصرفت و كنت بجيب من البيت حاجات و العيال كانت تتحمس و تجيب حاجات من غير ما اطلب منه و نقعد نعمل اعمال فنية مع انها مش شغلتى
لكن استغليت مهرجان القراءة للجميع و بقينا نتسلى و نتعلم سوا
كانت ايام حلوة
المسألة عاوزة حد ناوى يشغل دماغه و حابب يسعد العيال بجد
و لا مجرد موظف كئيب عاوز يعدى اليوم و انسشالله العيال ما تعلمت و لا فرحت

اللى ميزعلش من رد فعل الناس و انطباعتهم عنه
يبقى مش عايش
انتى صح لما بتتوجعى
المفروض نكون كدا عندنا احساس
انا كمان زمااااان كنت بهرب من الوجع بأحلام اليقظة و يمكن هيا السبب فى الخيال اللى عند الواحد ساعات

بوسات و حضونات يا ونداتى




حفيدة عرابى
----------
شغل المدارس هيبتدى اهو
يا فيدو مش معترضة

انا بتكلم عن لحظة كتابة البوست
و ما قبلها

لكن قولت فى اخره ان الدرجات دى قابلة للتغيير قدام سلبا او ايجاباً
يا حبيبتى و طول ما الواحد فيه نفس المفروض يتعلم يكون احسن

لو مكنش عشان
الناس اللى بيحبهم
يبقى عشان نفسه
و لو مش عشان نفسه
يبقى عشان ربنا المقصد الاول و الاخير
و ربنا يحسن خواتيمنا جميعا و تكون درجاتنا خير و عكاز نتسند عليه
و رحمة ربنا اكيد فوق كل شىء
نورتينى يا فيدووووو

عاشقة الرومانسية
---------------

و الله يا دودو لو كنتى قاعدة قصادى دلوقتى كنت قومت حضنتك و بوستك و عيطت
عشان انتى الوحييييييييدة اللى جمعتى لروحك المجموع الكلى ...انا ممتنة الصراحة انى مش هتحول التعليق دا

و تتح لو منجحشى فى أى حتة
ييجى لحد عندى و ينجح يا أمى
هوه انا عندى كام عروسة بحور ؟؟

و يا دودو يا رافعة نعنوياتى انتى عشات بتحبينى بس شيفانى كدا
انما انا برضو ليا وجهة نظر لأنى بحسنى مقصرة فى اشياء
اصل يا حبيبتى انا بقالى فى الدنيا 36 سنة اهو فالفترة الزمنية الطويلة دى مليانة اخفاقات و نواقص كتير
لما آجى أحسبها و ادى نفسى درجات بلاقى ان عيب قوى لما ادى نمرة كبيرة
فى حاجات محددة
بس فيا حاجات تانية الحمدلله بعتبرها نقاط قوة عندى


عارفة وليد كنج توت امبارح قالى وجهة نظر حلوة قوى
ان تقييمى و الشهادة دى غلط
لأن المفروض اللى يدى الدرجات دى الناس اللى بتتعامل معايا
يعنى اخويا هوه اللى يدينى نمرة بناء على تعامله معايا و اصدقائى و امى و هكذا ...مش انا
رأيه طبعا على راسى
بس انا قولتله انى بكتب من نظرتى بإتبارى من الناس التانية و بشوفنى ازاى


على فكرة
تتح هياخد 121 من 170
لأنى استبعدت الزوجة و الام و امينة المكتبة لأنك مش منهم لحد دلوقتى (يا رب اول اتنين عن قريب)
اما العشرة درجات بتوع المكتبة فإديت 8 من هم للمدونة لأنك مدون نشيطة و محبوبة و ليك اسلوب مميز

يعنى تتح متفوق أهو مش ناجح بس

عدوا الجمايل بتاعة المصححين بقى

بوسات و حضونات يا حبيبتى
و سلامتك الف سلامة






همس الاحباب
---------
و النبى ايه؟؟

طب يا عم الفيلسوف
عيوبى عاوزة بوست ولا اتنين
ماشى ماشى

انتا مش جاى بورسعيد ؟!!!
خاف منى بقى

تحياتى ليك يا غالى




I'm The CraZy One
-----------------
الله يا هند
انا بحب الورد البلدى الاحمر الغامق بالذات

كان نفسى تيجى يا بنت يا عسولة انتى
اكي معرفتيش لسبب مهم
يا ريت لما نتفق على معاد تانى تيجى بقى و خايفة اقولك تعالى بوسعيد ...يا ترى بابا يوافق؟؟؟

ميرسى على القلب الحلو دا
رقيق زيك يا شقاوة




Just waiting
------------

يا جست لا بظلم نفسى و لا حاجة
دا مجرد تقييم عادى مش مقصود منه حاجة تزعلنى او تزعلكم

ميرسى على ذوقك و رأيك فيا
و كلكم غاليين عليا


بس صحيح تعالى هنا قوليلى
ايه حكاية التبنى اللى بالغصب والإقتدار دا اول مرة اسمع عنه
هههههه

مصرى جدا
-------

ما شاء الله
مطاوى فى المدرسة عينى عينك كدا
و كمان مش هتجاوب ؟؟
و هتشرحلى العيال اللى قاعدة ؟؟
لا لا لا لا
دنا حروه استلف مطوة عادل اللى ف مدونته و احطها عندى

انا قولت
التعديل الوزارى الجديد
هيكرف ع الأساتذة و الطلبة و مش بعيد المفتشين و الفراشين و اولياء الامور كمان
خلاص يا هانى انتا تقعد فى بيتكم و ناجح ان شاء الله
احنا يخلصنا نتعبك برضو؟؟؟





الكلمة نور
----------

كلوب مودى آخر تمام و منور يا نور

و يا عزيزى ارجع للبوست هتلاقينى مديانى سالب 30 من 10 يعنى بالراجع يا مالك الاجنحة
لكن مع ذلك
عندى ثقة فى الله و عشم لا حد له
بس مش حاسة انى استحق ادى نفسى درجات كثير فى النقطة دى بالذات

انا سعيدة جدا بتعليقك
حتى لو فيك تخبيط يا فندم
بجد نورتنى يا نور



فكرة من الزمن ده
----------------

ازيك يا فكورة

انا اللى مبسوطة بإن البوست عجبك
و يا ريت تفتكرى مين عشان اعرف شيفانى ازاى و لو انك لسه مشوفتنيش خالص لحد دلوقتى بس عندى فضول طبعا اعرف

و منتظرة تقييمك لنفسك
متطنشيش عشان هكتب بوست جديد قريب
تحياتى انا كمان يا حبيبتى



مجرد فتاة
--------
منورة يا فندم
نجمع حاضر

يااااااااه
193 من 160

لأنى استبعدت امينة المكتبة و الام و الزوجة و السكريترة لأنك مش دول و لا هتبقى منهم حاليا ....

بس ماشاء الله
عندك ثقة فى نفسك و مش بس احساسك بمصريتك لكن فى حاجات تانية
اديتى روحك نمر كبيرة
لما عرفت سنك
فهمت و استوعبت السبب
إنك لسه بخيرك يا بنتى
و ثقتك فى نفسك فى محلها
ربنا يوفقك
و نورتينى و تعالى دايما يشرفنى وجودك




shimaa
------
حتى انتى يا شيما مجمعتيش
أخ يااااايانى منكم
اجمع انا و امرى لله
108 من 150
درجاتك عالية
و متوافقة مع جدا رأيك المكتوب

و اسمحيلى أرد عليه
بإنى يا عزيزتى مش مختلفة
اننا كل هولاء بالمتناقضات
اللى فينا
و صدقينى مش بجهد عقلى
بحثا عن اجابة
انا لو بجهد عقلى حتى
فأكيد للحصول على نوع من المتعة
ورغبة فى الفضفضة
والإحساس بفرحة الكلام


أيوه


اصل الكلام ليه فرحة
على اللسان و العقل و القلب
و الورق و الكتب و الصحف و حاليا المدونات

و تقدرى تعتبرى البوستات دى (مجازا)
نوع من الحوارات الفكرية النفسية الممتعة و المتبادلة بينا و بين بعض كاحباب و ناس بتقرى لبعضها

انا يا حبيبتى
مبدورش على اجابة منكم
و لا لنفسى
و بتعب من جراء ذلك

بالعكس خالص

انا بستمتع جدا
و بعيش معاكم المتعة

لكن عارفة اكيد
ان الاختلاف فى الروىء
و الأراء
و النظرة الشخصية سنة الحياة

نوريتنى يا شيما

حنونة
-----

تعليقك جميل و بيصعب عليا ميتنشرش يا بنتى ...ميرسى لعى كل كلمة فيه
و مختلفة معاكى ان ردك حزين
يمكن عشان المود العام بتعاك
بس لما كتبت البوست مكنتش حزينة و لا حاجة و تقييمى حتى لو طلعت درجاته قليلة فنا مش زعلانة خالص
بتمنى بس اصلح فيه و اعدله
لكن كل حاجة تمام متقلقيش
و ابقى طمنينى عليكى
هروح اقرى الأيميل و ارد عليكى برواقة عشان دلوقتى داخلة انااااااااام




الغير معرف
---------

شكرا على شعورك الطيب
بس بلاش لو سمحت الكلام دا
خصوصا إنى معرفش انتا او انتى مين ؟

و لما اسمع كلام كدا
من حد معرفوش

تفتكر سهل اتقبله ؟
و اقول طيب
و يسعدنى ذلك؟؟
مظنش


شكرا على اى حال

ستووووووووووووووتة
-----------------
-----------------

يا لهوتينى

غلطة بلوجرية بحتة


النمرة 170 من 200 يا فندم

معلش اعذرونا يا ست السوتيتات

اصلى عاوزة ادخل انااااااااام
دى تخاريف ما قبل النوم

دمتى بكل الخير يا حبيبتى

حبيبتي..

كيفك يا اميرة القلوب

درجات ايه بس اللي عم تحكيعليها؟؟ معلش اصلها طلبت معايا شامي

عن جد بقى انا نفسي ابقى جارتك بقى عشان درجاتك مرتفعة فيها

انا بقى وباختصار ممكن اجيب درجات حلوة في الامومة والصداقة والانسانية والمصرية
غير كده بقى فبلاش فضايح

بالمناسبة وحشتيني وربنا ما يحرمني منك ابدا ابدا ابدا

بوسات بوسات وحضونات للصبح

صباح الخير
:-*************************************
:-XXXXXXXXXXXXXXXXXXXXXXXXXXX

ايه درجات الرأفة ديه كلها :-)


ادبى صحيح
يبقى حنعملك استجواب فى المواد الادبى الى مكنتش بفهمها و اولهم الفلسفة :-))
بس نخليها بعدين

و بعدين ثبتينى يا معلمة :-)) بالكلام طبعا
كيفية التعامل مع المطوة :-)))
ايوة الكبير كبير برضه :-))

بس معلش انا تلميذة مشاغبه
لو حد يطلعلى مطوة علشان يغش منى و الله لا الويله ايده و ادبهاله فى ظهره
انا يتغش منى بمزاجى و بسكوت و الى يفلح يورنى حيكمل فلاح للاخر ازى

:-)) مشاغبة مش كده
المهم احلى حاجة اخيرا مطلعتش من الاوائل
ياه كنت خايفة
اصلى كنت بكره فصل المتفوقين :-)) بجد

سلام عليكم يا فاتيما
يا جميلة
عارفة انتي مين يا توما
انتي إنسانة
حاسة بكل اللي قولتية جواكي
بس حقولك كلمة حلوة
بطلي تقسي على نفسك كتير
نفسك تستحق حب اكثر وحنية زيادة
وتقدير more than less
لأنك حنينة ومش أنانية
فكرتي التفكير اللي مش ممكن واحدة تفكرة
اسحملتي نظرة على أنك أم مش قد كده
عارفة انتي لوحة زيت مرسومة من زمان
محدش كان عارف قيمتها
بعض الخدوش علمت فيها
بس صدقيني فرشتين من رسام محترف وحنين وبيقدر الفن
حيرجعوكي أحلى لوحة في الدنيا
ومن غير رتوش

دبه اكيد صورتك و انتى بيبي
كمييلة جدااا
و الضحكة هيه هيه ما اتغيرتشي
انا بقى كله 0 من 10
يعنى المجموع 0 فى المية
امتحان يشبه الامتحان بتاع الجغرافية بتاع سنة رابعة اللى اخدت فيه صفر ايون 0
و بابايا الله يرحمة اتفرس منى
و قالى و الله يا بنتى انتى لو كنتى كتبتي اسمك حتى كانوا ادولك درجة
شوفتى يا فاتيما
بفرس من سنة رابعة
هههههههههه
الل يكون فى عون اللى حواليا
ههههههههههههه
انتى نسبتك فى نظري ناجحة
و معاكي المرتبة فى حاجات
و المخدة فى حاجات
هههههههههههههه
تحياتي

* إبنة ..... 9 من 10
* أخت ..... 8 من 10
* حفيدة .... 8 من 10
* زوجة .... يمكن 5 من 10
* ست بيت .. 1 من 10
* ست بس ... 7 من 10
* حبيبة .... 10من 10
* أم يمكن ممممم مش عارفة من 10
* زميلة دراسة 6 من 10
* امينة مكتبة..مش عارفة لكن عموما اعشق الترتيب ولا اتحمل الهرجلة - من 10
* سكرتيرة ... 0 من 10
* قريبة .... 5 من 10
* جارة .... 2 من 10
* صديقة ... 7 من 10
* زميلة عمل..6 من 10
* مدونة ...كسلانة شويتين ومشغولة 4 من 10
* مواطنة ... 2 من 10
* مصرية ... 7 من 10
* إنسانة ... 8 من 10
* عبدة ..... -10 من 10



اهو ما طنشتش
لكن يارب اكون عرفت اقيمبصراحة

ZIANOUR
-------

أمووووووولة
مالك بس قلبتيها شامى ؟؟

يبقى اتنرفزتى !!!

معلش يا أم النور و الزاد
انتى كمان وحشتينى قوى
قوى
قوى





WANDA
-----
لو ملكيش انتى درجات رآفة اومال هديها لمين ؟؟؟



ست البيت
---------

ازيك يا مروة
فينك يا بنتى من زمااااااان

انا مش قاسيبة و لا حاجة دا مجرد تقييم مش اكتر و يا حبيبتى انتى رسمتينى حلو قوى فوق ما استحق
متغبيش علينا تانى لو سمحتى
ممكن؟





واحدة مفروسة
----------

أينعم هذوها أنا و لا فخر
بكل عبط الدنيا اللى لسه موجود لحد النهاردة لما بضحك فعلا انتى قولتى الصح

انتى كنتى فرساهم كدا برضو فى المدرسة ؟؟؟
يا بخت اى حد حواليكى
بيكى يا فروستى
حتى لو هيتعدى من فرساتك


و اخيرااااااا لقيت حد متفق معايا فى درجاتى و مش شايفها مجحفة

منحرمشى يا فروستى
يا حبيبتى




فكرة من الزمن ده
----------------
هجمع برضو؟؟

مممممممم

مجموعك
80 من 170


للأسف معرفكيش كفاية عشان اقاوح فى بعض الدرجات دى
لكن اشكرك على مشاركتك و انك مطنشتيش يا فكورة

إرسال تعليق