.

.

للناس الحلوين  

Posted by: فاتيما in





يا صباح الخير يا مصر
من البلوجر المصرى نحييكم و نقدم لكم
نشرة اخبار التاسعة صباحاً

إيه؟؟
متأخرة عن معادها ؟!!

انا مش بقول صباح الخير يا مصر ؟
مواعيد ايه اللى منضبطة بقى
متدقوش و خلوا البساط احمدى


لأ مش نجاد خليكوا محضر خيييير
و متدوناش فى داهية
دى نشرة اخبار بلوجرية
انا مليش فى السوياسة يا دى النينة


المهم عشان المخرج بيشاور كعادته
و قالى مترغيش كتييييير


ندخل على اول خبر



عوداً حميداً للعصفور الذى أرقه الحنين
الحاج حازم شلبى
صاحب الاحلام الصغيرة

عودة منين؟؟
من عند النبى الغالى عليه افضل الصلاة و السلام
الف حمدلله على سلامتك يا عصفور
و مشكرين على الدعوات الطيبات


على فكرة


(اللهم إنى أسألك أن ترد الى يوسف
كما رددت يوسف إلى يعقوب)


كانت دعوة مكتوبة فى احد التعليقات زمااااان
من دعاء مواجهات حبيبتى

و من يوم ما قريتها لم اكف عن نطقها

و سبحان الله
جه اليوم اللى خلاها اتنقلت و طارت
من قلب دعاء لقلبى لقلب حازم
لحد ما انقالت .... قصاد الكعبة
ربنا يديم الود و المحبة
و
ربنا يبارك فيكم كلكم
و يستجيب لكل حد


الف حمدلله على سلامتك يا حازم
و عقبال كل مرة


-----------------------
فاصل و حطوا غنوة بحبها قوى
القلب يعشق كل جميل
------------------------

بعد الفاصل عدنا
من تانى و على ذكر النبى الغالى
و هدايا رب العالمين
التى لا تنفذ
---------------------------------------

عازوة اوجه خالص و عميق شكرى
و دعاء الحاجة ام فاتيما

للأخ منذر من السعودية عشان عمل عمرة
لخالتى الله يرحمها


الوالدة رغرغت لما قرت تعليقك يا منذر
و اصلها مش من النوع اللى بيعيط أصلا
فالرغرغة دى معناها كبير قوى على فكرة

وبتقولك كتر ألف خيرك يا بنى
ربنا يقدرك على الخير دايما
و انا كمان بقول زيها
كتر الف خيرك يا عزيزى


------------------------------
فاصل و اغنية يا رايحين للنبى الغالى
-----------------------------


من الفاصل نعود



امبارح كان عيد ميلاد بسكوتة حبيبتى
عيون ماما
6/3
و النهاردة عيد ميلاد عادل
الغالى علي ماما
7/3
و احنا اصلا استعبطنا و عملناه يوم 5/3 عشان
كان يوم اجازة

نعرف نلاقى فيه بسكوتة فى القاهرة
كان عيد ميلاد جميل و لطيف كله حكاوى
و تنقية رز و غنا و تورتة و ساليزون
و بالونات و صواريخ بتنطفى ع السيرة
و معرفة ناس جديدة طيبة


ممتنة لكل اللى جم و نوروا القعدة
و لكل اللى كان نفسه ييجى و منفعش
و ممتنة جدا لكل اللى اتصل يهنى

و ممتنة لكل اللى علق عند
البت دودو حبيبتى عاشقة الرومانسية

الى سبقتنى و عملت حفلة جميلة
انا سخصيا منشكحة منها جداااا

و بالتالى اللى عاوز يحتفل معانا
و يقول كلمة لعياااااااالى

يدوس هنا

كل سنة و انتوا طيبين يا ولاد
السنة الجاية نحتفل بيه برضو
و ربنا محققلكم كل ما تتمنوه

و أحسن ان شاء الله


--------------------------------
اطلع يا بنى بغنوة
يا عيون ماما
عشان كل ما اسمع اولها
علطول تفكرنى ببسكوتة

و غنوة
إبدأ من جديد
عشان خاطر عادل لأن كلماتها
هيا بالمللى اللى دايما
عاوزة اقولهالو و بتمناهالو

----------------------------------



الأفراح لسه شغالة
و ابن أختى تدوينياً بقى أب و خلانى جدة
و اقصد طبعا انس صاحب المضيفة
اللى كان زمان أنس ... و دلوقتى بقى

أبو رقية

ألف مليون مبروك يا عزيزى
و ربنا يباركلك فيها

و تخاويها
و تشوفها ست البنات كلهم

الف مبروك يا غالى


---------------------------
إطلع يا بنى بغنوة سعاد حسنى
حالقاتك برجالاتك
----------------------------



الخبر الاخير بقى
فيما يخص
زيارة بورسعيد الجميلة

التفاصيل كلها هتلاقوها عند ريحانة مصر
إيناس نهر الحب

هنا

و بناء على إن المعاد إتحدد

  • 12/3/2010

يعنى الجمعة الجاية دى طوالى

فالى ناوى يسافر يقول
عشان نسافر سوا

بدل ما كل واحد يتشحطط لوحده
فى بلاد الله خلق الله


مبدئياً اللى متاكدة منهم انهم جايين ان شاء ربنا

هما
خالد همس الاحباب و أختكم
و بساكيتو من اسماعيلية
و اميرة على كوكب من دمياط

يقال ضياء بيتوفل مايند و عسقول جايين و الله اعلم
اما هبة و وليد كنج توت و عمر بيكا فجايين
ان شاء الله بس بمواصلاتهم الخاصة


اللى ناوى ييجى يا بشر
يقول فى التعليقات يا ريت
عشان مفيش داعى للمفاجأت


و اللى جاى يستظرف و يستعبط
و فاكر نفسه مرحب بيه
هيتفأجى هوه كمان
مننا بحاجات مش لطيشفة


لو كان حد لأول مرة و مقطوع من بلوج سبوت كدا
و لا حد عارفه خالص
و لا عنده مدونة
و جاى يتنحنح وجوده مرفوض تماما


و اللى شغال شتايم فى التعليقات عند الناس
فى المدونات
برضو وجوده مرفوض تماماً



و اللى عنده فضول يتفرج علينا و يتسلى
بدل ما يروح سينما و لا يتفرج ع ماتش كورة
برضو وجوده مرفوض تماماً



الملخص يا ريت اليوم يكون خير
عشان ميبقاش سفر و مجهود و نوايا كويسة
و بعدين يتحول
لعكننة لأهل البلد اللى عازمينا بكل حب
فبدل ما نيجى بإيدنا فاضية حتى
و نقعد ساكتين
نجيلهم بحاجة تزعلهم و كدا



احنا هنركب سوبر جيت بورسعيد
من
  • موقف الترجمان
اللى ورا جريدة الاهرام و شارع الصحافة
و الحتة دى اللى فى رمسيس



معادنا سبعة صباحاً بتوقيت الكاااااهرة

يعنى اللى ناوى مجييى
يبقى هناك آخر حاجة

  • سبعة الا ربع

عشان نحجز و نبقى مع بعض ف اتوبيس واحد


دا نوبايل خالد همس الأحباب
عشان أى إستفسار

من قبلها و كمان يوم السفر

  • 0101345140

إيناس كاتبة طلبات معينة
اللى يقدر يجيب منها أى أى حاجة

يبقى كتر خيره

اللى ميعرفش يشترى ممكن متهيألى
يجيب فلوس و المدرسة تشترى

و اللى لا هيجيب أى حاجة و لا هيجيب فلوس
ييجى برضو و لا ينكسفشى
عشان احنا هنلعب مع الولاد و نفرحهم على قد ما نقدر
و نفرح معاهم كمان
و نخليهم يقضوا يوم جميل

و الفرحة لوحدها لا تقدر بأى تمن


و كمان عشان نرد الزيارات لأهل بورسعيد الكرام
اللى ياما شاركونا لقاءات الخير فى القاهرة
و مرة نعمل معاهم واجب


اتمنى اشوف يوميها كل الناس الحلوة
من مدونى بورسعيد

بابا ابو خالد لو ظروفه سمحت - داليا أهو ده عيبه
شيماء عيلة مش عايزة تكبر - طارق الغنام
و طبعاااا ماما امولة

و انوس و نسمة و محمد ابو ابتسامة بشوشة
و اكيد الباشمهندس سيد بعد عودته للبلوجر من تانى
و الحمدلله سالما
و كل حد نسيت اسمه اكيد غصب عنى
يسامحنى و يفكرنى


اشوفكم على خير يا جماعة
و البوست شغال
لحد الجمعة فجرااااااا



---------------------------------

و إطلع يا بنى بغنوة
ببتغنى لمين يا حمام
بتاعة فردوس عبحميد
أيوووووووه
من ليلة القبض على سعادتى
فيها حاجة دى ؟
حلاوة بالشكولاتة بقى و إسالوا عليا
دحنا عشرة مدونات و تعليقات
و لقاءات و اعياد ميلادات
و كمان ... موجزات اخبارات اهو
و كل الخير دايما
يا رب
بحبكم يا احلى ناس
و صحبة
و عالم
----------------------------

إنتهى الموجز



الصورة المصاحبة للبوست
بعدسة سى الأستاذ

إحسان بيه
فى زيارة سابقة لبورسعيد
و عجبانى جداااا الصراحة
فقولت احطها لأنها بعيون حد منا
تسلم عدساتك يا فندم


This entry was posted on الأحد, مارس 07, 2010 and is filed under . You can leave a response and follow any responses to this entry through the .

52 كــــلام بيطــبطـــب عـــلى قــــلبى و روحــــى

فاتيما

كل مره ادخل هنا بجد بيشرفنى انى اتعرفت على المدونه هنا
كان نفسى اكون معاكم بجد معلش بقى انا فى اليكس
المره الجايه اضبطها ان شاء الله
مليون كلمة مببببببببببببررررررروك لكل واحد عنده مناسبه حلوه
ياااااااااااارب يكتر المناسبات الحلوه لكل الناس

ووعد منى يا فاتيما ربنا يكرمنى بالعمره قريب ان شاء الله لكى دعوه امام الكعبه ودعوه اخرى امام المسجد النبوى
ربنا يرد لكى يوسف ويفرح قلبك ويسعد عيونك ويرضيكى ويرضى عنك


زهراء

1-ميرسي جدا علي اليوم و الاغنية دي
وبحاول اهون ابدأ
وميرسي لكل حد سال و اتصل و ساب تعليق بالتهنئة ليا و لبسكيتوووو

2-ايه كل الخبار دي
يبقي مروك حمدالله علاي السلامة كل سنة و انتم طيبين و عيد سعيد و كل التهانئ اللي بتتقال عموما

3-بورسعيد صدقيني بحاول اجي و يااااارب

مامتى حبيبت هارتي
ميرسي يا ماما على الاهداء الجميل
وعلى كل حاجة عملتيها ليا
اصلا عاوزة اقولك ان كل دقيقة في اليوم ده كانت تحفة
واللى بقا بفتكره وبستمتع بيه جدا
لما انا وانتى روحنا نجيب التورتة
وكلامنا في التاكسي وكل ما افتكر انطباعك وانا بتكلم بحماس
ووانا بقول للولد يلا بقا علشان ناخد الساليزون ...اضحك اوي ...علشان انتي يا مامتي شوفتي مني بسكوتاية متحمسة زي العيال الصغيرين لما يشبطوا في حاجة
انا عمري ما هنسا متعة اننا مشينا سوا واشترينا سوا ...صحيح مش وقت كتير
بس اكيد في مرات تانية هنمشي في شوارع وسط البلد اللى بجد بموت فيها

بحبك يا مامتي
بسكوتك

ايه ده من غيري يابسكو ؟؟؟
محتش يروح وسط البلد من غيري :(
وكمان ....
ولا بعدين

تسلم ايدك يا خالتي يا غالية يا مسيطاني

مش عارف اعمل ايه من غيرك

ادعي لي رقية لانها عندها شوية صفرا ولسه موديها للدكتور

سلام كبير يا خالتي

صباحكـ سكر زيادة

أشرقت الأنوار بطلتكـ البهية من علي تلفزيون البلوج سبوت

ما ننحرمش من طلتكـ أبداً!

/

طب طالما فيه أعياد ميلاد ليه ما شفناش لا تورت ولا جاتوهات ولا حتي شاي بالنعناع .


وميعاد عقيقة رقية إمتي بقي ؟

لا كدا المخرج مش شايف شغله صح !


////

ازيك ياتوما
وكل سنة وولادك طيبين
وعقبال مليون سنة يارب
اما عن اللقاء فبجد نفسي اكون معاكوا
وان اشاء الرحمن
هاحاول اجي
لأن بجد وحشاني اللمة الجميلة
تحياتي ليكي

مااااااشى الله يسهلوا بقى
ام هند يسعدك كمان وكماااااااان
ياااااااااااااارب

كل سنة وبسكوته وعادل بخير وعقبال مليون سنة
والف مليون مبروك لانس وتتربى فى عزه
وشكرا على التدبيسةيا ام يوسف
هههههههههههه
تحياتى

جزاكى الله كل خير يا طمطم
انتى علطول سباقة بالخير والدعوة ليه
احنا ان شاء الله رايحين بورسعيد بس هنسبقكم بيوم
ان شاء الله نتقابل على خير
دمتى بكل حب

عمتنا فاتيما

والله الواحد افتقدكم كتير

لكن فعلا حسيت بروح العيلة هنا

دعواتكم احسن اخوكم مزنوق

وربنا يقدر لك الخير في كل حال

للللللللللللللللللوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

فطوم
و بعدين بقى حنقعد نزغرت كثير كده بالراحة علينا الصحة خلاص باقاش فيها كثير :-)))

اصطباحات مطنشة ماشى
بس ايد سرعة تغير الاشعار ديه
بس كل واحدة احلى من الى قبلها

اه تعالى على جنب كده
نقوم بالواجب و نفضالك

اولا حمد على سلامة الحاج حازم

ثانيا تقبل الله منك يا اخ منذر

ثالثا كل سنة و عمتو بسكوتة و بابا عادل طيبين :-)
بس ايه الاغنية بتاعت هيفاء المسخرة ديه :-))) اتارى الواد بيجيلوا كوابيس :-)))

رابعا ربنا يباركلك فى رقيه يا ابو رقية و حمد الله على سلامة ام رقية

خامسا بخصوص بورسعيد
اطمنى لو اتقبض عليكى حنبعتلك لابتوب بانترنت محمول :-))) علشان تفضلى مونسانا من مستشفى العقلاء:-)))
و حنقعد نعمل احتجاجات و اضربات و نطالب مش بالافراج عنك لا بضمن لعنبرك :-))))))

انشاء الله يكون يوم جميل علي الكل

و السلام ختام
و اه
صحيح موصلتيش المعلوم من الاصطباحات بس خلينا احنا الكرماء برضه
:-********************************
:-XXXXXXXXXXXXXXXXXXXXXXXXXXXXXXX

ربنا يوفقكم ديما لفعل الخير ..

ياخراشتى ياخراشتى دنا بأيت ولا اللى مش عايشه فى الدنيا...

انا اييييييييه اللى حصلى يابشررررررررر..
باه عيد ميلاد بسكوته ودولا وانا معرفش وكمان عملتو بارتى,,
وكمان حددتو ميعاد بورسعيد,,,

عليييييييييييه العوض فيا انا شكلى دخلت الغيبوبه:(

كل سنه وانتى طيبه باسكوته وانت يادولا وجايه اعيد عليكو حااااااااالا فى بيتكو ومعايا لكل واحد فيكو سنيكرز هديه اصلها اللى معايا دلوقتى سامحونى:(

وحشاااااااااااانى ياطمطوم يا قمر انتى ياجميله:)

لولا و زهراء
-----------

ازيك يا زهراء

خلاص يا حبيبتى السفرية الجاية تكون اسكندرية الماريا اللى ترابها زعفران
إن شاء الله نكون دخلنا ع الربيع كدا و نيجى نقعد على شط بحركو اليوم كله
انا نفسى فى يوم اقضيه كله قصاد البحر من اوله لآخره ...

ميرسى على الدعوة المؤجلة و يكفينى انها فى قلبك من دلوقتى و ربنا شاهد و سامعها يا حبيبتى

دايما بتنوى صفحة التعليقات يا ذات الوجه المشرق





Baskouta
--------

يا عيون ماماتك
سلامتك الف سلاااااااااامة

قولتك انتى يوم الجمعة كنتى زى القمر ما شاء الله و اتنشتى عيون بس اكيد مش مننا من كل اللى شافك يا بنتى ولا قالش الله اكبر

انا كنت مبسوطة جدا جداااااااااف المحل على فكرة

اصلك فكرتينى بيوسف لما كان بيبقى حمقى كدا و يستعجل البياع و انا اقوله براااااااحة يا بابا عشان عمو عنده زحمة كتير و نستناه شوية

المرة الجاية لما تنزلى مصر و نروح مسرح العرايس هنتمشى الاول فى شوارع وسط البلد زى منتى عاوزة و بعدين نختمها بالمسرح ...ماشى؟؟

شوربة و سوايل و كدا
ان شاء الله تبقى زى الفل يا بسكوتة البسكوتات
كل سنة و انتى طيبة يا حبيبتى

انا كمان بحبك قوى




adel
-----

1-العفو يا بابا
2- بتشكر على ايه هوه انتا شوية ؟؟
3- الله يبارك فيك الله يسلمك و انت طيب
4- اكيد حاول عشان وجودك ضرورى
5- ابقى طمنا ع النتيجة عاوزة احطها فى البوست بقى و ارقع احلى زغروطة الكترونية فى البلوجر و البلوجرات الصديكة يا وااااااااااد
6- انت ليك فى عزومة مسرح العرايس دى فسماح لبساكيتو المرة دى ..ماشى
7- كل سنة وانتا طيب يا غالى على ماما




صاحب المضيفة
------------

الله اومال ايه؟؟
احنا حدانا كام ابو رقية يعنى
دا هوه واحد بس
و مفيش غيره


ربنا يشفيها و ياخد بيدها
ان شاء الله خير و تكون حاجة بسيطة
ابقى طمنا عليها
لما تطمن انتا كمان و تروق كدا

الف سلامة على رقية
يا ابو رقية





مواطن شووجااع
-------------

ايه دا صباحج سكر زيادة


هننقل على او تو فى يعنى ؟؟؟

لأ بقى دا عم ساويرس يعنى العز و النغننة و خطوط موبايل ببلاش و اقل سعر للدقيقة و احضر حفلات ببلاش و كدا


طب هيدونى كام ؟؟
و المخرج هيزعق برضو
و لا هيبقى كويس ؟

مشكلتك يا ابراهيم يا إبنى ى ى
انك داخل على طمع
و البلوجر كله على فيض الكريم
وكله افتراضى زغاريط و تورت
و ساقع و ورد و خلافه

انتا احسن حاجة
تسمع الأغانى
وكتر خير الدنيا
هوه احنا هنحضر المناسبات
و ناكل كماااااان ؟؟

عقبال افراحك يا مجدى يعقوب الصغير





mano
----
ازيك انتا يا مانو
و انت طيب يا فندم
و حاول يا ريت و داينا اوكيه قبلها و لو بيوم عشان نستناك و نسافر كلنا سوا و يكون يوم جميل عليك و علينا و على مدونى بورسعيد إن شاء الله

تحياتى انا كمان

كيكى عووووو
-----------

ماهو النق دا اللى بخاف منه انا

ربنا يستررررررر

ما تيجى يا بت يا كيكى السفرية دى

اعملى حركة انتحارية كدا و تعالى

انتى مش نص أتخرجتى خلاص؟؟
نص تخرج اونطة يعنى و لا إيه؟؟

متحاولى السفر بيبقى ممتع جدا وسط ناس بتحبيهم رايحين و نيتهم حلوة و خير

فكرى كدا و شوفى
تحياتى يا حبيبتى و بوساتى و حضوناتى




همس الاحباب
---------

و انت طيب يا خالود

و تدبيسة ايه بس يا ابو ببش ؟؟؟؟
مقصديش حاجة خالث انا
(وش باصص فى الأرض و عامل غلبان)


مش انا عيوبى
عاوزة بوست بوستين ؟؟؟
ماااااااشى
يلا اتفضل رد ع الإتصالات براااااااااااااحتك قوى يعنى
هههههههه

لأ أستنى بقى
متعمليش فيها مقموص بقى
انتا نمرتك دى منتشرة فى عشرتشر بوست بؤجة و تبرع و سفرية سابقين يعنى انا عملت تحديث بس مش اكتر

و تدبيسة برضو
هههههههههه


اشوفك يوم الجمعة ان شاء الله على الف خير

بس خاف منى برضووووووووو

ربنا يخليك لينا يا ابو همس





شفقـة و إحســان
---------------

يا شفشوقتى تروحوا قبلها تروحوا معانا المهم نتجمع هناك و منتحرمش من صحبتكم هناك
انتوا من الناس الجميلة اللى وجودها بيعمل فرق و حس و بهجة و ربنا يبارك فيكم يا رب
دمتم انتوا الأتنين بكل الحب يا حبيبتى




دكتور حر
---------

اهلااااااااااااا يا دوك

وحشتنا جدا يا دكتور

انا قولت انك نسيتنا خلاص
فيك الخير و الله
اصل اللى بيتجوز دا الواحد بيفقد فيه الامل و يقول خليخ فى اللى هوه فيه بقى ربنا يتولاه برحمته و كدا
بهزر طبعا
ربنا يسعدك
و يكرمك ان شاء الله
و يفجر عنك كل هم





wanda
-----

جيت على جنب أهو
اتفضلى هنى و باركى و زغرطى



خلاويص ؟؟

طييييييييب

انا بحب المسلسل دا جداااااااا يا ون ون و بحب المزيكا بتاعته و اغانيه و اصلا بحب فردوس عبحميد فى اغلب مسلسلات الفترة دى بتاعة التمانينات كانت حاجة مميزة لأن اسامة انو عكاشة كان قاسم مشترك فيها مع محمد فاضل و هيا ضلع تالت
و رغم ان المسلسل دا مش لأسامة
لكن لواحد تانى لا يقل روعة فى السيناريو و هوه محسن زايد الله يرحمه

بس انتى إيه رأيك ؟؟

حلاوة بالشكولاتة احسن
و لا بالمكسراااااااات ؟؟؟

بكرة صباحات ان شاء الله لو متزنقتش ف الشغل ع الصبح

*************************
و ××××××××××××××××××××××××××××
انا كمان
اشمعنى انتو يعنى ؟؟؟!!!!!!




sameh ezzat
-----------
الف شكر ليك يا سامح
طب ما تحاول تيجى يا بنى ؟؟





الشعب لابد له من حكومة تشكمه
---------------------------


يا مشمش براحة على نفسك

يا ماما انتى لسه مخطوبة يا بنتى
افرحيلك شوية منتى قاعدة معانا بقالك زمن طويل متنكدة متعفرته عايشة فى حالة ال هه اديلك مدة

عاوزة لما ربنا يبعت فرحة تسيبها و تفضيلنا

دنا آجى أضربك يا ماما

افرحى يا بنتى و اغطسى و لا يهمك
احنا مقدرين و فرحانين و مشجعين كمان
المهم انك بخير و مبسوكة
دى بالدنيا يا حبيبتى

شوفيلنا بقى
يا ترى الدزنانور هيوافق
تيجى بورسعيد و ييجى معاكى
و لا مش هينفع ؟؟

يلا دلع و محايلات و لو منفعش
يبقى وش تانى مبوز و شكم حكومى
من اللى هوه لحد ما يوافق بقى

اشوفك دايما على خير يا حبيبتى
ربنا يسعدك

اية الاخبار الحلوة دي يافاتى

انتي وش الخير وقلبك اصفي من اي لبن


للافس مش عرت وضوع العيد ميلاد خالص لو كنت اعرف كنت جيت عااااااااااااااا

ومبروك لرقية يارب تكون ذرية صالح لباباها

ربنا يرجعلك يوسف يااااااااااااااااااااارب

مامتي غصبا واقتدارا :)
كل سنة واخواتي طيبين :)
وحمدله على سلامة كل الي اعتمرو :)
اما بالنسبه للقاء كنت اتمنى اجي
بس لو فكرت اقول لبابا راحه بورسعيد لوحدي هيقيم عليا الحد رجما بالشباشب وهتوزعو حاجات على روحي بس لو هتيجو المنصورة ان شاء الله هكون اول حد يستقبلكم واكيد هتنوروها

حمد الله على سلامه الحاج حازم وربنا يتقبل منه يارب

والف شكر لمنذر وربنا يجعله فى ميزان حسناته

وكل سنه وعيالك طيبين يابطتى (يوسف وبسكوته و دولا )
وتعيشى وتفرحى بيهم وباولادهم

ومبروك لصاحب المضيفه وصول ولية العهد الاميره رقيه


اغنيه بتغنى لمين ياحمام دى انا باموت فيها
وبحب السمسميه قوى
سلام سواحلى خاص جدا من اهل اسكندريه لاهالى بورسعيد كلهم
ان شاء الله يكون يوم ممتع بعيد عن اى زعل يابطه

ايه ده اسمي هنا في البوست

انا بحلم بجد بجد بحلم :) ومش مصدقة عويناتي :)

فاتيما بحالها بتقول نفسها تشوفني ياااااه والله بجد انا طايرة دلوقتي بكلمتك دي

وأنا وأميرة من أول لما عرفنا بموضوع اللقاء عايزين نيجي علشان نشوفك لأننا بنحبك أوي

قولتيلي مين شيماء :) هو ماشي روح طفلة مش عايزة تكبر لكن مش شيماء ممكن نمشيها ليدي لغاية لما نشوف بعضينا ان شاء الله

كل سنة وانتي وعادل وبسكوتة طيبين وبخير وصحة وسعادة يا أحلى مذيعة ع البلوجر المصري

وبهديلك أغنية وردة أد العيون السود بحبك

انا بسلم وبمسي
أزيك يا بطوط

انا علي طول هنا احسن تفتكريني مقصرة ولا حاجة

كل سنة وبسكوتة وعادل بألف خير انا معرفتش حاجة عن عيد الميلاد

مممممممم بس بطوطي أكيد شايلالي نايبي في الجاتو والساليزون :))

الف مبروك لـ أبو رقية ( خيركم من بكر بالأنثي )

بالنوسبة للقاء بور سعيد انا لسة مش عارفه هاروح ولا لا بس ان شاء الله سأتأكد من الخير اليقين في خلال الآيام الجاية وابعتلك ميل

البوست اللي فات كان حريني خالص على فكرة .. أنا ماعرفتش أجاوب إزاي على الإمتحان اللي كنتي حاطاه ده

:-))

أما البوست ده فكالعادة أحب أكرر إني بقيت آجي هنا عشان أعرف آخر أخبار المدونين .. زي نشرة أخبار التاسعة مساء كده

:-)

وحشتييييييني كتيييير
مبسوطه من البوست ده قوي ومبروك وكل سنه وكلهم طيبين
تعرفي خليتيني نفسي اجي بورسعيد قوي
انا رحتها مره واحده وخلعت قلبي في شط هناك كده جرينا ولعبنا فيه لما قلنا يابس وكانوا احلي يومين شفتهم وقتها
كمان هترووحوا لولاد صغننين يا طمطم وانا نفسي قوي اشوف ولادي بس للاسف مش عارفه وده اللي كمل عليا
عادل الصغير اخر حاجه عرفتها عنه انه كان تعبان ومنه سافرت والباقيين بطلوا يجوا
دول ولادي اللي اشتغلت معاهم في الحضانه شهرين تقريبا بس ولادي قوووي
أما ولادي اللي في الدار ...
كبروا وبقي ممنوع عنهم الزيارات عشان معطلهمش او اعلقهم بيا اكتر من كده
ما علينا
التعليق الي فات معلش اسفه لو قلبتهولك حزن بس هو فعلا انا اللي مودي كده سماح بقي
وبالعكس محستش انك زعلانه انا بس عارفه حدوته ال تقييم دي بتبقي حاله كده بين وبين وقصدت اقولك انك فعلا حلووووووووووه وزي القمر ومزه كمان ويا طماطم ابقي انشري التعليقات ولا يهمك انا كنت بس ولا اقولك ابقي انشريهم علطول
وهستني ردك بفارغ الصبر
ربنا يسعدك في أي وقت وعلي أي حال


حبي من جوه قلبي

صباح الاصطباحات :-))
معلش اتاخرت شويتين النت عان بعافية
حد دعى عليه :-)) بس مقدرش للاخر :-))

المهم
قبل ما ينط النت منى ثانى

خذ عندك :-*********
:-XXXXXXXXXX

دفعة اولية

صباح الميستهلوش صباح
اقولك الحق
انا مش معترضة على افتتاح المعبد
انما تصعيب حياة الناس فى المنطقة بالشكل المبالغ فيه ده
هو ده المشكلة
و حايخلى الناس تكره الناس
بس النور احسن
خيلهم يظهروا اليهود و ميستخبوش
على الاقل دا دين سماوى مش
طائفة غريبة و ملتصقة بالاسلام او المسيحية اونطة

ياريت يكملوا الصراحة ديه
بانهم يقولوا الحكومة اخذت ايه فى المقابل؟؟ اصل مفيش حاجة ببلاش :-))

و يتوضح ان ده اثر مصرى
بغض النظر عن الديانة
و ان اليهود عندنا محترمين لانهم دين سماوى مش لانهم بيلوا ذرعنا
و ياريت يعاملوا الاثار الفلسطنية بنفس الاحترام

اكمل قراية الباقى براحة وارد عليكى ثانى

امسكى يا معلمة الدفعة الثانية
:-************
:-xXXXXXXXXXXXX

صباح الهمة و النشاط
هو رجع امتى من السجن؟؟و لحقوا رجعلوا الحصانة علشان يشولوها منه :-))))هو انا كنت نايمة و لا بحلم ؟؟

صباح اللى وشهم مكشوف
بصى بقى نفس نغلب اليهود و نقوله استلفت بقيمة كام جنية ذهب رجعهم جنهات ذهب برضه ثانى
بس للاسف محناش يهود يبقى نكتفى باننا منحطش فلوسنا فى البنوك الى سلفته :-((

صباح الحرية
فيه غلطة فى الخبر
:-) خلانى اقراه عشر مرات
يطالبون بمنع الافراج :-))))
فطوم انا معاكى ماشى مليش دعوة بصيدلالولة ماشى و البنى قولى ما يقرروك قولهم عليا قبل ما هى تنطق :-))

صباح الطاهريات
بقى السدات هو ده السبب الى خلاه يخرج بدون قميص :-(
احنا حاجة صعبة قوى

صباح التخاريف
وانا ايضا بطالب بحق الاداء العلنى :-))))

صباح الصمت
فاكرة بوست مين خلاك تتكلم باسمهم
اهو قرينه اهو :-)
حى على البطانية

صباح الكسابيات
هى سابت حسين فهمى لانه كان دمه ثقيل فى الفيلم
مش موضوع الفلوس:-))

صباح الاشعار
(شاعر مجهول )؟؟؟؟

صباح الإعترافات

يارب ترجع علشان فطوم متعترفش ثانى
:-*****************************************************************
:-xxXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

بجد اخباااارك كلها حلوه وسكر زيك كده بالضبط يااحلى فاتيما ...

كل سنه وعادل طيب وبسكوته كمان ... مع انى معرفهمش بس ان شاء الله اتشرف بيهم لانى حبيتهم من حبك فيهم والله
وبتمنالهم سنه سعيده مليانه حب وخير وسعاده ...

ومبروك للاستاذ انس ...

لو حصلت معجزه وجيت بور سعيد .. للاسف ماراح اقدر اركب معاكم نفس المواصلات ... لان مستحيل اكون موجوده بالقاهره الساعه سبعه ...
فأنا هاخد العنوان بالضبط عشان اعرف اصيه ومااتوهش ... ده فى حاله اذا عرفت اجى اصلا ...

تسلميلنا يافاتيما يااااارب .. ودايما تبقى كده مفرحانا ولا مانا على خير ...

ربنا يسعد ايامك ياااااااااااارب

... ;) ,,, ;) ...

بحبك وانت مش دارى
واخبى فى لوعتى ونارى
واقول يمكن بشوقى تحس
واقول يمكن تكون شارى
واستنيت ايام وايام
ورميت نفسى فى وسط ملام
لكن اخر كل ده ايه؟
حفضل ادارى فى حبك ليه؟؟!!
هو الحب ياناس ده حرام؟!
بطلوا غيره وكتر ملام
ايوه بحبك رغم الناس
ايوه بحبك وبأحساس
واستنيت وهاستنى
وافضل عايشه وباتمنى
انى القاك فى يوم جنه...!!
***********
صباح الاشعار

كل سنة وعادل وبسكوتة طيبين

طيب المدونين الجداد بتوع بورسعيد ميجوش ؟
ولا هتزعلى لو جيت؟؟؟:)


عموما انا اتشرفت بمعرفتى بحضرتك

ياريتني عندي جناحين كنت طرت بيهم وجيت حضرت معاكم واتعرفت عليكم لكن ليس كل ما يتمناه المرء يدركه
ان شاء الله تقضوا يوم جميل وتحكيه لنا بالتفصيل لنشعر كأننا كنا معكم
على الفكرة الصورة المصاحبة للبوست رائعة
دمت بكل الود والمحبة

فاتيما
ياريت تكوني هنا
لان اللي كنت اقصدها انها تشبهك هي دكتورة شريفة ابو الفتوح
وبرنامحعا شغال دلوقتي على قناة المحور
حتى صوتك انا تخيلته كده
وياريت تقوليلي تخيلي غلط ولا صح
ولا في نسبة كام من الصح
تحياتي

نق احنا فينا من كدة
دة انا حته عينى بااااااااردة!!!
دة انا جايه اقولك وحشتينى يالوزة
وانك هافه جامد على دماغى رغم والله عينى بقت توجعنى مووووووووووووت
ام هند بقى
هى فعلا هتبقى عمليه انتحاريه ليه!!
ااااااااااه
ماعلينا
ام هند
ماتبصليش بعين راضية بص للمدفوع فيا!!!

هه
عارفه من كتر قربى ليكى كنت وهما نفسى انك هتحسى بيا لما علقت على البوست الا فات بى انى كان نفسى تكونى قريبتى
بس هيا هتيجى عليكى
مش مهم لانها مش فارقه
المهم انك كويسه ومعانا ومتبعاكى

كيـــارا
--------

الحلوة هيا إنتى يا بنوتات يا عسولات

و قولنا وش الخير تبقى داليا قوس قزح متوقعوناش مع الوان السما السابعة بتاعتنا بقى محدش يليق عليه اللقب دا غيرهااااااااا

معلش احنا مرضيناش نقول على عيد الميلاد عشان لا يتعارض مع التبرع بالدم و يحصل أى مشاكل

الله يبارك فيكى و عقبالك يا ست النوتات العسولات

حاولى تيجى بورسعيد بقى

ياااااااريت



just wating
------------
يا لهوى !!!

هيا وصلت لإقامة الحد كمان ؟؟
لأ احنا ميخلصناش الحكاية دى

بس اوعدينا ان لما يبقى فيه
لقاء فى المنصورة تيجى
و من غير نقاش ... ماشى؟
طيييييييب




عاشقة الرومانسية
----------------

انا كمان يا قطتى بحب الغنوة دى جدااااا و المسلسل عموما و غنا فردوس عبحميد خصوصا صوتها حنون و بيعجبنى

و كل سنة و انتى اللى طيبة و بخير
و عيالى اتنشوا عيييين و عيانين الجوز بالإنفلونزاااااا

و حلو الشعر دا قوى
النت كان فاصل عندى من اربعة عصرا و لسه يا دوب راجع فمعلش و يا رب تكونى فى احسن حال بس طالما اديناها شعر يبقى كله تمام و الغزالة راييييييييقة إن شاء الله

بوسات و حضونات يا عروسة البحور





lady E
------

معلش يا لولو عندى الغلطة دى

هصلحها حالاااااا

المهم تيجى و خلاص

ميرسى ع الغنوة
انا من عشاق وردة و الغنوة دى بحبها
منحرمشى و وشى ف الأرض خجلااااااا






ميرا وومن
---------

يا مساء التماسى و الهنا كله

انا اللى مقصرة يا ست البنات معلش سامحينى و معلش مقولتش على عيد الميلاد لدواعى بلوجرية بحتة عشان التبرع بالدم كان فى نفس اليوم و كدا

مفيش حاجة اسمها هتعرفى و لا لأ

انتى تيجى بورسعيد معانا
و تبقى تعرفى على مهلك بقى بعديييييين

عنهرج احنا و لا إيه ؟؟

اللــــــــه
انا بحب الاغنيه دى قوى
بابا فين
جامده
هاروح اسمعها

يا مراكبى
--------
يا نبع الحكمة
اعملك ايه بس ؟؟؟

و الله ما كنت حزينة وانا بكتبه
بس هيا زى ما تقول
اللى نفسويتى كارفة على نكد
نعمل ايه؟؟

طبع اصيل فى المرأة المصرية الأصيلة
و انا مرأة مصرية اصيلة
و لا إيه يعنى ؟؟؟!!!

انتا هربت من الاجابة
مش معرفتش تجاوبة
قلبى يحدثنى بذلك
انما ماااااااشى نعديها

و يا فندم اهلا و سهلا بيك فى موجزنا
احنا فديك الساعة لما المراكبى يتابعنا من خارج القطر المصرى و يعتبرنا مصدر موثوق منه
منحرمشى يا نبع الحكمة من طلتك



حنان الشافعى
------------
يا للهول
مزة ؟؟؟

انا يتقالى الكلمة دى فى صفحة التعليقات على الملأ كدا ؟!!!
فين الروقابة و المجلس القومى للمرأة
و حقوق الإنسان
و المجتمع الدولى باكلمه

لا لا لا لا
انا ميتقليش الكلمة دى تانى أبداااا

و يا ستى اكتبى التعليق اللى يعجبك حزين و لا سعيد انا مش هحجر على احسا اللى داخل يكتب زى منتوا مش بتحجروا على احساسى و مستحملنى أهو
عادى
ربنا يطمنك على ماما و على ولادك و تقدرى تشوفيهم و لو نفع تيجى بورسعيد يا ريت متتردديش و هيكون يوم جميل إن شاء الله

خلاص هنشر التعليقات من الان فصاعدا ما دامت دى رغبتك و اكتبى اللى يعجبك ما عدا الكلمة اللى ف أول ردى دى الله يخليكى ...ماشى ؟

ربنا يطمنى عليكى دايما يا رب
و سلامة ماما من كل شر يا رب



WANDA
-----
النت عندى انا روخرا بعافية يا ون ون و لا يهمك
المهم انك بخير و نطمن عليكى

و معلش مع احترامى يا ونداتى لرأيك
انتى شايفة الوقت الحالى مناسب للاحتفالات دى و لا هيا رخامة و مسمار جحا و خلاص
هوه استفزاز للناسش صحيح بس الناس واخدة على كدا من ناس مصريين و عرب
و ماشى نعديها لكن عشان دول ؟؟؟
ليه يعنى ؟؟
و على رأيك ...ما هو مقابل ذلك ؟؟
يعنى انا معنديش مانع احط ايدى فى ايد عدوى
بس احصل على مكاسب من جراء ذلك
مش ابقى بتنازل و ببلاش !!
و اصل القصة هنا
مش ديانة خالص للأسف
و لا مكنتش اهتميت خالص بالخبر من اصله

الخبر بتاع المدون مفيهوش غلطة و لا حاجة انا بتريقأ اساسا

عمر طاهر بيتريقأ هوه كمان
اصلنا شعب مزعج بصراحة
مفيش حاجة تعجبه
و بنضايق الزعماء
و نعكنن عليهم

و تعالى هنا
حسين فهمى دمه تقيل ف الفيلم ؟؟؟
و يعنى محمود ياسين اللى كان لطيف يا مفترية ؟؟؟

و بعدين هيا تجوزته عشان فلوسه و عماراته و كدا

و اصلا انا مبحبش ناهد شريف
م الآخر
هه

الفيلم دا كان عاوز ميرفت امين
كانت عملته حلو بنظرة الإنكسار
اللى ف عيونها كانت هتبقى احلى

و ايوه الشعر لواحد مجهول سمعته مرة
فى التليفزيون و علق فى دماغى من مرة واحدة و معرفش مين صاحبه للأسف حد مغمور او انا معرفوش لتقصير منى

اما الإعترافات بقى
فين قالك ان لما يوسف يرجع
مش هعترفله برضو ؟؟؟

******************************
و ××××××××××××××××××××××××××××××××



GHADA MOHSEN
------------
ازيك انتى يا غدغود

عادل و بسكوتة دول حبايب قلبى و لما تقابليهم إن شاء الله فى قعدة رايقة هتعرفى ليه بحبهم كدا
و يا ريت بجد تيجى بورسعيد هيشرفنا جدا مجييك و هاتى معاكى رانيييييييا
بوسات و حضونات يا حبيبتى
لحد ما اشوفك



خواطر شابة
----------
يا ريت يا خواطر بجد
و الله فكرة الجناحات دى فكرة عبقرية بس نلاقى حد ينفذها فعلياً و يريحنا

إن شاء الله الوجوه يجيلها يوم و تتلاقى
زى القلوب ما تلاقت يا حبيبتى
و لا تعلمى
كله خير و متقدر إن شاء الله
و لما ارجع هبقى احكيلكم يا عياااااال
الصورة فعلا تحفة
و انا حبيتها قوى من اول مرة شفتها عند شفقة و احسان و اهو جه معادها تتحط عندى و تشوفوها انتوا كمان و تعجبكم زيى

منحرمشى منك أبداااااااا



NeVeN
-----
و انتى طيبة يا نيفين

ومين قال مدونى بورسعيد الجداد ميجوش؟؟؟

احنا بنقول اللى معندوش مدونة خالص
و لا حد عارفه اصلاً
و متطفل علينا
و مؤذى بتعليقاته الشتامة

دول اللى ميجوش


لكن انتى يا بنتى عندك مدونة اهو
و لا مقطوعة من البلوجر
و لا حاجة
و لا تنطبق عليكى باقى الموانع
يبقى تعالى طبعا
و مفيش أى زعل
و ان شاء الله تبقى معرفة خير

و احنا اللى هنتشرف بيكى
و بمعرفتك بإذن الله

فكرة من الزمن ده
----------------
يا فكورة يا حبيبتى
انتى بس متحيرة فى شكلى؟؟

شريفة ابو الفتوح
دى بتاعة الريجيم ..صح؟؟

لو هيا
فطبعا مش شبهها
دى ست رقيقة وكلاس خالص
و لا ليا علاقة بيها

يا ماما انتى واخدة عنى فكرة غلط
انا ست مصرية كلاسيكية من بتوع زمااااان و مش حاجة دلع كدا
و مسيرنا نتقابل ف يوم
و تنوصدمى فيا
هههههه

ميرسى لأنك جاوبتى ع البوست
اللى فات و لا طنشتيش



كيكى عووووو
------------
نعمممممممممم
فين العين الباردة دى
ان شاء الله


دا جوز العيال مفيصين من البرد

و طب يا ستى
هافة على بالك كدا
تعالى بورسعيد
و مشيها كوماندوز كيكى عوووى

انتى كمان وحشتينى قوى و الله و ربنا يعلم و يا رب تكونى دايما بخير
و اشوفك دايما على خير
يا حبيبتى


الغير معرفة
---------
طب ينفع كدا بذمتك ؟!!!

اولا انا مكنتش ناوية
انشر التعليق
عشان كنت واخدة قرار
منشرش تعليقات المجهولين خالص

بس عشان كلامك
إضطريت احطه
عشان اعرف ارد عليه
و دى آخر مرة
هنشر تعليق مجهل

ثانيا
طب يعنى انتى عندك فكرة
انا بيجيلى كام تعليق
من كام غير معرف يا بنتى ؟؟

هم كثر لا نعرف عنهم
زى ما بيقول كامل الشناوى كدا

نصهم مؤذى جداااا
و كلامه سخيف يعاقب عليه القانون

و النص التانى كويس و الحمدلله
بس انا بتحير فيهم

لا بيبان مذكر
و لا مؤنث

و لا بيبقى واضح عاوز يقول ايه
اعجاب دا
و لا مجاملة
و لا ايه نظامه

اصل نادرا لما حد بيختم
التعليق بإسم مميز
فيما عدا خط الصعيد
و حتى هيا كمان ممكن حد يسرق اسمها
ببساطة و مقدرش اميز

انا بحس احيانا بالمزيفين
عندى بوصلة جوايا بتقول المكتوب بين السطور نص الوقت
بس النص التانى لأ
انا مش عرافة و عندى بلورة سحرية

و هعملوكوا ايه
اختكو فاتيما مش بالذكاء الرهيب دا عشان تميز ما بين المجاهيل و اسلوبهم
و انتى قايلة بعضمة كيبوردك اهو
انك علقتى عندى البوست اللى فات بس

طب من تعليق واحد المفروض
ابقى خلاص عرفتك ؟؟

و كدا تقوليلى
مش هتيجى عليكى ؟!!

طب قبل ما ترمى كلمة
زى دى
و تجرح كدا

مش تفكرى الاول فى إنك بتدى
لنفسك حقوق عليا ملهاش اساس قوى
بناء عليه تعاتبينى كدا

طب حتى قولى انتى مين
و بتكتبى كدا ليه
و فسرى كلامك بدقة

عشان لما ارد رد بايخ عليكى
تبقى تقوليلى ساعتها
هيا جت عليكى
و لا مجتش

انما تفترضى ضمنيا
إنى عارفة انتى مين
و متأكدة من شخصيتك
و بطنشك غلاسة كدا لله فى لله !!!
دا عدل ؟؟

ثم انا مطنشتش انا رديت عليكى برضو و كان ممكن مقولش حاجة ..صح ؟؟

يا عزيزتى يؤسفنى اقولك
انك انسانة حساسة جدا زيادة عن اللزوم و حساسيتك دى هتتعبك قوى فى حياتك ان لم تكن تاعبكى بالفعل و مخليكى وحيدة جدا

ف كل الاحوال بشكرك
لأنك متبعانى
و لو مش فارقة ولا يهمك
مش هتيجى عليا صحيح

نورتينى

عاشقة الرومانسية
----------------


الناس السهرااااااانة دى
خيييييير


ازيك يا دودوووووووو


و انا كمان بحبها يا حبيبتى

يوسف اصله
كان شقاوة كدا برضو



و لما بسمع اولها بفتكر بسكوتة
عشان بقولها يا عيون ماما علطول


بحبك و وحشتينى قوى

تصبحى على خير يا قطتى

إن شاء الرحمن أكون معاكم بإذن الله .

تحياتي
:))
سلام

انا جاااااااااااااااااي

ان شاء الله

والا ايه

حد عنده اعتراض

حد قال لأ

مش سامع ها؟؟؟؟

صباح التدبيسات :-))))))

حطاه على جنب
ايه المقام الرفيع الى وصله ده :-)))
يا فطوم دا خلاص
استخبى فى الذرة و كتب اعتذار :-))
ايه رايك نسامحه ؟؟ اهنا وراكى يا معلم ياكبير
و رايك يمشى :-))))

المهم
خلينا فىالمهم

عايزين اصطبحات بالحبة البركة النهاردة لو سمحتى

:-******************************
:-xXXXXXXXXXXXXXXXXXXXXXXXXXXXXXXX

اصلنا ورانا اشغال عايلزلها بركة دعا الوالدين النهاردة

ربنا يكرمنا كلنا بزيارة النبى صلى الله عليه وسلم والف مبروك لصاحب المضيفة ابو رقية
ويكرمك برد يوسف لحضنك يارب
وشكرا لك يا فاتيما على الدعوة والتصيت بتاعك لنا
يارب تجوا بالسلامة وتنوروا بورسعيد
هتنورونا بجد

P A S H A
----------

تنورنا يا شريف
إن شاء الله
اشوفك على الف خير





هى و ظروفها
------------

ها مين دا اللى يعترض
حد يقدر
دنتا ابن عمتى يا وليد
يعنى من العيلة

ال حد يعترض ال

فى إنتظارك إن شاء الله
سبعة الاربع متتأخرش علينا




WANDA
-----

نزلنا بالصباحات خلاويص يا ون ون

و مين دا اللى نسامحه
انتى بتصدقى الدرة و الإعتذرات و الأفلامات دى ؟؟

مش هانى نط ف الكوز اللى يعمل كدا
دا لابد فى الدرة بيحضر لبوست جديد يا ماما عادته و لا هيشتريهاااااا

ستوتة كاتبة بوست حلو قوى
شجعنى اكتب حاجة ف دماغى بقاله مدة
اما اشوف

صباح الخير عليكى يا حبيبتى





نهر الحب
--------

ربنا يكتبهالنا جميعا يا آنوس
و بتشكرينى على ايه يا بنتى دحنا اللى عاوزين نجيلكم من بدرى و الله
ان شاء الله يكون يوم جميل
ما دمتم فيه
بوسيلى نسمة
اشوفك على خير يا حبيبتى

بإذن الله لو ليا عمر هكون موجود
بس زي ما اتفقت شكلياً كده مع أستاذ خالد :) فيها إيه لو راعينا الناس اللي جاية من أقاصي القاهرة
ولو في سوبر أو ميكرو طالعين الساعة 8 مثلاً
يبقى الميعاد ميبقاش حنبلي .بدلي 7 إلا ربع شارب تبقى 7 ونص وخلاص :)
لأن في ناس بترجع بيوتها العاشرة مساءاً يوم الخميس
مش سهل الصحيان خمسة والنزول خمسة وربع والعثور على ميكروباظ بحد أقصى الساعة 6 :)) الكلام ده مش مضمون
المهم العريضة دي نستخلص منها
رغبتي في إننا نشوف لو مثلاً تجمعنا يبقى 7 ونص :) ونطير في سوبر جيت 8 أو بيجو أو ميكرو من الموقف اللي جنب الترجمان

لو اتفقنا يبقى ميل صغنن بقى :)
لو مش اتفقنا يبقى ميل صغنن برضه


وبخصوص الدعاء الجميل
من دعاء الجميلة :)
متتخيليش كام حد بيقول آمين
بس كل تأخيرة وفيها خيرة بإذن الله

كوني بخير يا أم يوسف
والسلام ختام

ضياااااا
--------

عاش من قرى تعليقاتك يا ضيااااااا
انتا فين يا من الخير فى ركابه؟؟

موجود

طيييب

بص يا سيدى
مفيش مشاكل فى كل اللى قولته

مجراش حاجة لما نأخر السفر و يبقى تمانية مش سبعة الدنيا مطارتش
خلاص خليها سبعة و نص تمانية الا ربع
كدا كويس


هعمل تنويه حاضر
و براحة علينا يا عم مش كدا
انا بتخرع


اشوفك يوم الجمعة على ألف خير
الساعة سبعة و نص تمانية الاربع
ماشى؟

منحرمش من آمين بتاعتكم أبدا يا رب

فطوم
معلش لو فيها رذاله يعنى
بمناسبة عيد المراة الى فات
او عيد ميلا الحبايب او عيد اى حاجة حلوة
غيرى الموسيقى
اصلى بقشعر منها بجد

المسلسل ده بيخلينى اصح على ان ممكن الدم يبقى خمره يبقى جاز يبقى
فنيك

اديها حاجة ناعمة زى خلى بالك من عقلك مثلا :-))

نرجع للاصطباحات البارحة
بصى موضوع المعبد اكيد لو ثمن
بس هما تلاقيهم مكسوفين منه بس بكرة نعرف الثمن
اصل الشمللة ديه عمرها ماكانت بلوشى و ان كان على انهم يغصبوا علينا مهما بيغصبوا من زمان فى حاجات كثير
و الموضوع بعيد عن مفهوم الديانات
بس هى برضه رد فى وش زاهى حواس :-(
بكرة نعقد على الحيط و نسمع السبب :-))

خبر المدون فيه غلطة جوا الخبر نفسه مش قصدى تعليقك

حسين فهمى يحب ناهد شريف يبقى يستاهل
و محمود ياسين ياباى ينقط بس لو كان اتجوز اخت حسين فهمى يبقى اوقع
زى فيلم نور الشريف و سعاد حسنى اخت الضابط (قال الحب غير يعنى :-))
من الاخر فيلم كله دمه ثقيل


اصطباحات النهاردة (1)

صباح زى وشهم
ثانى
نقص و على اسعار ثانى
يالهوى
تعرفى لو شالوا الدعم حنصوت ايوه بس الاقاليم حيكون اسعارهم ارخص من القاهرة و حيبطلوا تكدس
هنا الاسعار فى كل محطة و مدينة سعر
بس الاسعار عاليه بجد وملهاش تاثير فىالعيش و الاكل و الموصلات للدرجة الرهيبة ديه

:-*******************************
:-xXXXXXXXXXXXXXXXXXXXXXXXXXXXXX


صباح ما خفى
كان أعظم


حد متفاجىء؟!

هي مش كلاس عادية وبتتكلم بذوق وادب
بس لانها على الكاميرا واكيد لما بتهزر وبتتكلم عادي بتبقى زينا زي عامة الشعب المصري وخالته
هههههههه مش كلاس يعني مصريين

حتى لو مش شبههك لكن دي روحك اللي وصلتني وحاسيت بيها
تحياتي

WANDA
------
علم و غيرنا المزيكا و البوست كله
يا ون ون يا حبيبتى


و فعلا الفيلم كان عاوز ابطال تانيين عشان اقتنع بيه بس دا لا يمنع ان فكرته كانت مميزة و سابقة عصرها فى التحذير زى ما خالد كساب قال تمام


و حكاية السولار دا زى الأنابيب زى اى ازمة يلهوا بيها الناس و خلاص من باب القرف و الغتاتة

منحرمشى منك يا مصيتة صباحاتى دايما





فكرة من الزمن ده
----------------

ميرسى يا فكورة انك شيفانى حد لطيف كدا انا بيعجبنى اسلوبها فى الكلام و شياكتها و ميرسى على اهتمامك و ان شاء الله نتقابل مرة و تقوليلى بقى انا شبه مين ...ماشى؟

تحياتى انا كمان يا حبيبتى

سحبتها ولن تتكرر
الكلمه اللي مش عايزاها دي

حنان الشافعى
-------------


ماشى يا حبيبتى
و لا يهمك

ليه حاسة انك زعلانة ؟؟؟

يا ريت متكونيش زعلانة يعنى

بوسات و حضوانت يا حبيبتى

مزعلتش ولا حاجه انا زعلت لما حسيتك زعلتي من الكلمه وانا مش قصدي حاجه والله انا كنت بهزر معاكي بس
وانا مقدرش ازعل منك يا طمطم ده انتي طماااااااااااطم ومفيش حد يزعل من نفسه ابداااااااا
وحشتيني جدا وحمدالله عالسلامه من بورسعيد كنت هموت واجي بس معرفتش خالص للأسف
مبسوطه قووووووووووي انك انبسطي واليوم كان حلو
عقبال يوم اسكندريه بقي يااااااااااارب قريييييييييييب
هبعتلك ميل تاني ان شاء الله ومستنيه ردودك بقي وعذراكي جدا متقلقيش براحتك يعني مش هزعل بجد بس اكيد منتظره
شكلي هفتح المدونه ... قولي يااارب
بوسات وحضونات وبوسات تاني كتييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييير

حنان الشافعى
------------

ربنا ما يجيب زعل يا حبيبتى أبدا إن شاء الله
الله يسلمك يا نونا و يا ريتك فعلا كنتى معانا بجد
المرة الجاية إن شاء الله
هروح اشوف الميل حاضر و ارد عليه يا حبيبتى
خلى بالك من نفسك
و سلامى لماما الغالية
انا كمان بوسات و حضونات كتييييييييير

إرسال تعليق