.

.

روحــنـا و جـــيــنا  

Posted by: فاتيما in



امبارح كان عندى معاد مهم و جدا
رجعت منه طايرة فوق السحاب
مش عاوزة اى حاجة تنزلنى
مش عارفة اكل و لا انام و لا أصحى


لأ ... لازم تنامى يا فطوم
عندك بكرة سفرية قاعدة بتستنيها
بقالك زمن

كانت عمالة تتأجل لأسباب كتير
لحد ما ربنا أذن و اتحسمت
نامى يلا


طب قبل ما انام اكلم بسكوتة
اشوفها جاية و لا لأ ؟

و ابعت لعادل رسالة هوه راخر
يا خسارة
الأتنين قالوا مش جايين

ظروف عوائلية و مش نافع يفلفصوا
طيب
المرة الجاية



يعنى هسافر من غير عيالى
طب ابعت لخالد عشان تأكيد المعاد
بفتح الايميل لقيته باعتلى
فاتيما عاوز نمرة وليد كنج توت

اصل جهاز الكمبيوتر اللى كان مطلوب
الحمدلله توفر
عاوزين حد معاه عربية يشيله اضمن
رديت ان النمرة مش معايا
انا آخر نفر ينسئل عن نمر الأسخاص التانية
انتا بتتكلم ف ايه يا خالد ؟
طيب يا ستى خلاص متزقيش
بكرة يحلها الحلال
طب بابا ابو خالد جاى يا خالد ؟
ان شاء الله نروحله لو مقدرش ييجى
مش هنسيب بورسعيد من غير ما نشوفه
طب مين اللى أكيد جاااى ؟؟
ضياء و وليد الدوغرى و شريف باشا
طيييييييييب
اشوفكم بكرة الساعة 7:30 صباحاااا




بحضر فى لبس بكرة
و احط راسى ع المخدة.. احاول أنام

نوم متقطع لحد المنبه ما عمل
تررررررررررررن
استعدادات
و تجهيزات
و شرب نسكافيهات

و لبس هدومات و ايشاربات
و رسم خرايط ف وشى
و كام جملة توديعية لماما
و جررررررررى ع موقف الترجمان



على باب الموقف الرئيسى
لقيت خالد و وليد و شريف

صباااااااااح الخير
الناس الرايقة اللى بتشرب شاى
و سجاير و واقفين يتشمسوا

منتظرينى و منتظرين ضياء
اللى اتصل و قال انا قربت

رغى و جر شكل بين خالد و وليد
مخلصشى لحد ساعة المرواح

ضياء وصل بالسلامة شايل و محمل



دخلنا عشان نحجز التذاكر
اتوبيس 8:30 و قبل المعاد بعشر دقايق
فاعلة الخير بترن على موبايل خالد
جهاز الكمبيوتر وصل و تعالوا خدوه
خرج الشباب يجيبوه و يحطوه فى كرتونة
عشان يدخل فى الجزء المخصص
للشنط ف الأتوبيس

ركبنا تمانية و نص بالمللى
و الأتوبيس إتحرك



وليد قبل ركوب الأتوبيس اصلا
كان مطلعلنا باتيه و عصاير
و الشاب بصراحة اخلاق .. فطّرنا و روقنا
و محرمناش من حاجة

و تقريبا طول الطريق مقعدش فى كرسيه


دودو عاشقة الرومانسية بتتصل
تتطمن علينا

و بعدها بسكوتة بتقول انتى فين
يا مامى ( أنا ) دلوقت
حنين القلب ام عمر فى يوم سبوع عمر
و المفروض ملخومة فى سبعتلاف حاجة
بتتصل بينا ع الصبح عشان تقولنا ازيكم
و تتمنلنا رحلة سعيدة و تقضية وقت جميل
ربنا يخليكم لينا يا رب


المشوار مخدش اكتر من تلات ساعات تقريبا
وصلنا الموقف فى بورسعيد
اتقسمنا على تاكسيين
على حديقة التاريخ يا أسطى
اللى قصاد الممشى السياحى
فى دقايق كنا عند الجنينة
الشباب شالوا جهاز الكمبيوتر
و شنط ضياء و فاعلة الخير

و دخلنا



ايناس نهر الحب و العطاء فى استقبالنا
بوشها البشوش الباسم
نورتوا بورسعيد
دى انواركم يا آنوس
تعالوا سلموا
لسه رايحة اقول اهلا
و مين هنا

لقيت شيكو شكشوكة الشهير
بشريف ابن خيخة
جااااااى جرى عليا و معاه شنطة فيها هدية
خيخة وراه بتسلم عليا و تغششه
قولها تفضلى يا طنط
دى هدية ايييييييه؟؟
عيد الامهات
شريف قالها كدا
بوسات و حضونات و ميرسى يا حبيبى
و ميرسى يا نوران



دخلت اسلم على الحضور
عسقلانى فى وشى ..ازيك يا باشمهندس
ماما أمولة فى الواجهة
عرفتها من النقاب و هيا جاية عليا
و بتحضننى بود كبير
ليساندرا وراها طوالى
بنات و ولاد من المدرسة بيسلموا علينا
و ايناس بتشجعهم يتكلموا معانا




مين هنا تانى ؟



رحيل ام عيون زبيدة ثروتية ماشاء الله
سلامات و تحيات و سؤالات

بسأل نهر الحب
فين نسمة اختك ؟

طلعت نسمة قاعدة فى اوضة الكرار
لأ مش محبوسة
دى قاعدة فى أوضه جانبية
بتقسم الحاجات اللى جاية
و توزعها بالتساوى
و كمان بتوزع الفطار و الشاى لأى حد جاى
و تصر بقلب و كرم لازم يفطر يعنى لازم


داليا اهو ده عيبه اخيرا ظهرت بعد غياب
و معاها دعاء ربع ضارب
شفقة مرات سى إحسان جاية تسلم بحب
و محمد ابو عجيلة أبو أبتسامة طفولية


ليدى E طفلة مش عايزة تكبر
و سلام بحرارة و ترحيب رهيييييب
و سلمى يا فاتيما
مين دى ... اختك ؟
لأ ..خالتى
خالتك مين يا بنتى دنا اللى خالتك
دى صغننونة خالص ...ما شاء الله



إيناس بتدينا فكرة عن المكان
اللى احنا فيه
اسمها حديقة التاريخ
و المهندس اللى صممها
استوحى فكرة تصميمها
من مراحل تاريخ مصر

المنحدر منها يمثل النكسة
و المرتفع ..انتصار اكتوبر كدا



قالوا نطلع برج الحمام نتفرج
على المنظر من فوق

مكدبناش خبر و فريق الحريم كله
بمنتهى الحماسة

طلع بتاعة كدا زى الحلزونة
و بقينا فوق فوق فوق
المنظر كان حلو قوى



هبة صديقة إيناس
قعدت تدينا فى معلومات قيمة

الحديقة بتطل على مكان اسمه
الممشى السياحى

الحديقة نفسها اتعملت مكان فندق
قديم اسمه بالاس
كان قبلة الزعماء والشخصيات الكبرى
و فى نهاية الممشى قاعدة تمثال ديليسبس
اللى الشعب البورسعيدى رفض وجوده
و فضلت القاعدة بس و التمثال راح فى الوبا
آخر الممشى نقطة التقاء
قناة السويس

بالبحر الأبيض المتوسط
انا انبهرت بصراحة من القصة دى
احنا واقفين فى بقعة حيوية


مكان نادر
بيلتقى فيه بحر عظيمممممم
بقناة أعظممممممم


وقفنا نتصور سوا احنا نون النسوة
جات نيفين اجدد مدونات بورسعيد
معاها بنتها لارا


الردالة راحت تصلى الجمعة
إسراء the lost princess
بتقولى ماما بتقرالك

و بتسلم عليكى جدا
الله يسلمها و يسلمك يا بنتى



البرنامج الترفيهى هيبتدى خلاص


بعد الشباب ما رجعوا من الصلاة
قعدنا نتكلم مع بعض مدونين و اولاد المدرسة
ناس بتشرب شاى
و وليد و شريف جابولى نسكافيه مخصوص
اتصالات تتوالى من المدونين
بيبعتوا السلامات و التحيات و التمنيات بيوم جميل
و الأعتذرات عشان معروفش ييجوا



قايمة المتصلين
---------
علا صيدلانية طالعة نازلة
كيكى عووووو
داليا قوس قزح
كيــــــارا
Reem
ميرا وومن امراءة بعقل رجل
ساسو كافيه
و اكيد ناس كتير اتصلت

على موبايلات الناس الحلوة التانية



قايمة الحضور
------------
(القاهرة)
خالد همس الاحباب
ضياء بيتوفل مايند
وليد الدوغرى
P A S H A
ام يوسف
شفقة و احسان
بت خيخة و اى كلام
شريف ابن خيخة
ابن حجر العسقلانى
حمادة السواق

(بورسعيد)
بابا ابو خالد إيناس نهر الحب
نسمة
داليا اهو ده عيبه
دعاء ربع ضارب
محمد ابو عجيلة
Neven
ابو العربى
د.محمد
هبة
شيرين
إسراء the lost princess
ماما أمولة
رحيل

(دمياط )
ليساندرا
Lady E
سوما خالة ليدى إى


أ.أحمد عبد المنعم
إبنه
ضيف



الحفلة إبتدت
الدى جى رتب حاله
و الاطفال و الكبار بيتلموا
و يقعدوا فى المدرج الدائرى

اللى ف الصورة دا
الاغانى ابتدت و الولاد اتجمعوا ف النص يرقصوا
و يغنوا و يفرحوا



كان وقتها استاذ محمد عبد المنعم و ابنه جم
شيرين زميلة وليد الدوغرى جت كمان
ابو العربى كذلك و دكتور محمد



بابا أبو خالد يظهر من بعيد
عشان يكون اجمل ما فى اليوم كله بصراحة

قعد مدة يتكلم معانا
كان تعبان لكن فرحان بينا
و احنا فرحانين اكتر منه
قعد على قد ما قدر و بعدين رجع الشغل تانى



مجموعة مننا اختفت شوية



واحد من المجموعة اللى جاية ترفه عن الاطفال
اسمه محمد الشناوى
وفنان عرايس ... عمل عرض قصير
لعروسة بترقص رقص شرقى
كان تحفففففففففة
انا مقدرتش بعد ما خلص
غير انى اروحله مخصوص

عشان اقوله جملتين
انا بقالى تلاتين سنة بتفرج
على مسرح عرايس

لمحترفين بيسافروا برا و ياخدوا جوايز
فيهم ناس ميجوش واحد على عشرة
من موهبتك

من اول تلات ثوانى حرك فيهم العروسة
قولت عليه استااااااذ بجد
كان لازم اشكره ... المهارة اللى عنده
تستحق كل تقدير بجد



الساعة قربت على اربعة
و العيال كلها جاعت ..بس ساكتين
و انابوا عنهم وليد الدوغرى
اللى كان عاااااااادى خالص
و ساااااااكت خالص
و مطنش خااااااالص

لا قال انا جعان و لا اكلونا و لا عاوزين سمك
و لا حاجة بوتيتاااااا



كالعادة قعدنا نلم فى بعضينا و نتفرق
و نقول هناكل فييييين؟؟



المجموعة المختفية ظهرت



كانوا بيشتروا التليفزيون المطلوب
ضمن قايمة الطلبات

كمان كمية بامبرز للكبار لا بأس بها
إيناس جت تقولنا إن الفلوس
كفت الحمدلله و فاضت

و اتوزع على أسر الاطفال مبالغ بالتساوى
و فاض منها تانى
و هيتجاب بيه حاجات تانية لو حابين
قولنا طبعا نحب و جدا

تاجر رخام رفض ذكر اسمه
قرر لما سمع و شاف الحفلة مصادفة

انه يتبرع بفلوس لكل طالب فى المدرسة
مشينا الحمدلله
و احنا فى قمة السعادة و الرضا

الخير جاب خير و فرحة



ف مطعم اسمه سيتى ستارز
اتلمينا تانى
بعد ما كنا اتقسمنا على العربيات
و التاكسيات

فى المطعم الشيك قعدنا و طلبنا
و كالعااااااادة انتظرنا الاكل على ما جالنا
على دفعات
فيه ناس قعدت منتظرة الاكل للآخر زى ليدى
البونية صمدت كتير الصراحة و اول ما جالها الطبق
كلنا صقفنا و الدمعة كانت هتفر من عينينا
واضح إن العيب فينا احنا
مش فى الاماكن اللى بنروحها ..
شكلنا بيقول سيبوهم يتكلموا براحتهم
و الاكل دا آخر حاجة نفكر فيها



عقبال ما كلنا و خلصنا
كانت ستة و نص

سلمنا على بعض و وداعات كتير


ثم خرجنا
مع اقتراح من زميلة وليد
شيرين اننا نشوف البحر

ربع ساعة كدا قبل المرواح
اتمشينا احنا فريق القاهرة ع البحر فعلا
شوية صغننة
و بعدين سلمنا على شيرين
و ركبنا تاكسى على الموقف



فوجئنا ان السوبر جيت الساعة تسعة
لأ مينفعش يا جماعة
دنا اللى بقول
كدا الحاجة ام فاتيما

تعمل ازمة دولية و تحولنى للاجئة
و اروح افرش ف جامعة الدول

شوفلنا حاجة تانية ..البيجو او ميكروباص
لقينا بيجو عاوزة اربع تنفار
يا دوب احنا تمام
خالد و شريف و وليد و أختكم
نسيت اقولكم ان ضياء ركب مع خيخة
و عسقول مع حمادة السواق على اكتوبر
عشرة و نص كنا قربنا نوصل القاهرة


وصلنا القاهرة
وليد اولنا فى النزول

و بعدين التلاتة الباقيين كملنا على رمسيس
كنت هروح لوحدى بس حركات
الجدعنة الخالدية الشريفية

ابت الا انهم يوصلونى .. لحد شارعنا
يا جماعة وسط البلد ونس ومتقلقوش
مفيش فايدة
يا جماعة متخافوش
أنتى معاكى رجالة .. عييييييييب



قبل حداشر كنت بحط المفتاح فى الباب
و ماما صاحية منتظرانى و بتقولى
اتأخرتى ليييييييييه؟

مش بتزعق
كانت قلقانة بس



طب و الله الست دى بتصعب عليا

كل مرة تقول هتخلص منى
هتخلص منى
و برجعلها زى القرش البرانى
هيييييه ..نصيبها بقى



اليوم كان حلو قوى بجد
بتصدقونى لما بقول الكلمات
دى يا عيال ؟؟؟

و لا بتقولوا خيالية و رومانتيكية
عايشة فى احلام وردية

بس فعلا البلد جميلة جدااااا
هواها نقى كدا و نضيف
و فيه بلاد تلاقى روحها خفيفة على قلبك
صحيح ملفنياش كتير ..بس دا انطباعى
و عادة انطباعاتى الاولى
زى إمبالس ...تدوووم




رحيل غاية فى التهذيب و الذوق

ليدى جابتلى ورد جميييييل زيها
خالتها شخصية جدعة و ذوق
و نظرات عيونها معبرة جدا
فيه ناس كدا بتقرى عيونهم تفهم كل حاجة

انا إتشرفت يا فندم بيكى
ويا ليدى انتى حد جميل قوى يا حبيبتى
و ضربت على القلم عواف معلشى ى ى




ميرسى يا خيخة على الهدية
تعرفى انك اول واحدة تقريبا بتقولى
كل سنة و انتى طيبة عشان عيد الام
وقبل أى حد تانى

ربنا يحرسلك شريف من كل شر يا رب
و شكرا إنك جيتى


عسقول كان ناوى يعمل مجسم لسفينة
قعدنا نقول نسميها نورماندى تو
و نشيناه عين
زهق و مكملش
كنا هنغرقها فى المالح
يلا

ملهاش نصيييييب
عسقول كان من الناس اللى راحت تشيل
الحاجات المطلوبة و منها التليفزيون

ربنا يبارك لك يا باشمهندس



نيفين ام لارا شخصية لطيفة و عسولة
هيا و بنتها احلى و الطف من بعض
لارا وقعت فى غرام ضياء
الواد دا بيعمل للعيال عمل

ملهاش تفسير علمى غير ذلك
لأ .. استنوا فيه تفسير
انهم عارفين ان قلبه قلب طفل برىء
و الخير فى ركابك يا بيتوفل مايند إن هارت



هبة صديقة إيناس مضيفة هايلة
و شخصية لبقة

و شبه ليلى علوى فى شبابها المبكر
دى ملحوظة عابرة
من شاب من الشوباب اللى مش
هسيحله جدعنة منى
و يعد الجمايل بقى



دعاء ربع ضارب و داليا اهو ده عيبه
كأنهم تؤام .. كانوا هاديين و حاجة شياكة
يا ريت ترجعوا تكتبوا تانى يا بنات


ماما أمولة غاية فى الرقة و الذوق
و حسن المقابلة

يكفى تعدى جنبى
و تطبطب على كتفى بس

ابو العربى ملحقاش نقعد معاه خالص
بس الكل بيشكر فيه

استاذ احمد عبد المنعم كالعادة بشوش و ذوق

ليساندرا الرقة متجسدة يا نااااااااس

نسمة فراشة خفيفة جميلة بتنشر عبيرها
قمة الذوق و الضيافة

مدير الحديقة و الناس اللى رفهت عن الاطفال
كانوا ناس مريحين فى التعامل و ودودين
و فرحوا العيال
و فرحونى انا شخصيا

بعرض العروسة و الأرجواز
ينفع اسم فيلم حلو اهو



يا ولييييييد ...انتا يا واد حد كدا
معجون طيبة و حنية

و يا شريف باشا يا اخلاق الباشوات
انتا انسان جميل بجد

و يا خالد يا همس الاحباب
يا اخى الغالى

انتا خلاص بقى عديت معايا
مرحلة الكلام و الشكر


و السفر النهاردة معاكوا يا جماعة
مش بس كان مصدر طمأنينة ليا
لأ ...دا مصدر فخر و فرحة
و بتدلع دلع انا على حسكوا

مفيش بعد كدا
ربنا يخليكم

لأخواتكن المدونات و اولهم أنااااااا



بابا أبو خالد
كلمنا اكتر من مرة وقت المرواح
و بيقول انه ملحقش يعمل معانا واجب

بقى يا بابا حضرتك اللى بتقول كدا برضو ؟؟
دحنا اللى مقصرين معاك
و حضرتك متتخيلش مجييك النهاردة
حسسنا بقيمتنا قد ايه عندك

و اننا ولادك فعلا و ان حضرتك نعم الاب
و ربنا يتمم شفاك يا رب
و ميحرمناش منك و لا من سؤالك
و وجودك وسطنا

و من البوست دا بوجه نداء ل
هدى رينبو
بدال ما نطق يا ولا نضحك

بابا ابو خالد سأل عليكى يا هدى كتيييير
يا ريت تطمنيه و لو بتعليق صغير هنا
لأنه قلقان عليكى يا حبيبتى



الناس اللى اليوم كان عاوزهم قووووووى
عيالى
بسكوتة و عادل

و وليد كنج توت و هبة و عمر
و لعل المانع خير

الباشمهندس سيد الكل سأل عنه
و سألت أنا عن طارق الغنام
حد بقى من خارج القطر المصرى أصلأ
كان نفسى ييجى قوى و ليه
بهدى الموسيقى المصاحبة

wanda
ون ون
يا رب تعجبك
دوس هنا

و عقبال ما نغنيهالك
لما ترجعى مصر بالسلامة انتى كمان

الناس كلها اللى كان نفسى ييجوا و مجوش
لعل حالة القلق من اللقاءات دى تنتهى بقى
عشان مننحرمشى منكم وسطنا
سامعنى يا ستوتة
و يا كل حد
كنت اتمنى ييجى و بيتردد


آخر حد و أهم حد
و الزغلولة الكبيرة بقى
إيناس نهر الحب و العطاء
انا عاجزة يا آنوس عن شكرك
انتى النهاردة فكرتينى بداليا
قوس قزح وش الخير فى نشاطها و تفانيها
انتى عمدة مدونى بورسعيد
بعد بابا ابو خالد
فى عمل الخير و اللمة الحلوة
و لولاكى ما كنا اتحركنا
و لا روحنا و لا جينا من مكاننا
و لا أى حاجة اتعملت خالص
فى اليوم الحلو دا

اللى إنتهى ناجح و مهما تواضعتى
و قولتى انا معملتش حاجة و بتاع

الحمدلله كل ما طلب من الناس
فى البوست بتاعك كله اتحقق
و الكل روح مرتاح مبسوط
وحاسس انه عمل حاجة يسعد بيها اطفال
وجودهم فى حياتنا نعمة لا نقدرها كثيراً
الطف شىء النهاردة حسيته
ان كان فيه انسجام كبير
و كلنا اتجمعنا و فرحنا
واتكلمنا سوا و حضرنا الحفلة سوا
محدش كان حاسس ان الاطفال عبء
علينا نفسياً او اننا مش عارفين نتعامل
معاهم و لا حاجة
اتمنى يعنى منكونش ضايقنا حد هناك
و اللى اسعدنى كمان جدا
إن حد تانى غربب عننا
شاف الخير حاصل
فإتشجع و اتبرع
و الخير اصله معدى زى الضحك
و اى شىء حلو .. بس نفتح له
قلوبنا و عيوننا

البركة فى ربنا اولا
و فيكى يا إيناس
و فى كل الناس الحلوة

متجمعين دايما على الخير
يا أحلى ناس
و صحبة
و عالم

و سالمة يا سلااااااامة



بوستات ما قبل السفر
-----------------------------
لقاء بورسعيد 12/3 ... نهر الحب
الدعوة عامة لله ...نهر الحب
للناس الحلوين ... روح قلب ماما
مين اللى جاى .. هى و ظروفها
اللقاء 12/3 ... الزمن الجميل
اللقاء البورسعيدى ...بت خيخة و أى كلام


بوستات ما بعد اللقاء
-------------------------
يوم إستمتعت بيه ..... هى و ظروفها
لقاء الخير ... روح طفلة مش عايزة تكبر
تم بحمدلله ... إيناس نهر الحب
اللقا نصيب وده كان احلى لقاء ... نيفين صباح و مسا
لقاء بورسعيد : حديث الصور ... خالد همس الاحباب
على الهامش :لقاء بورسعيد ... Lyssandra
اللقاء و ما اجمله .... ماما امولة


لو نسيت اسامى
و تفاصيل يعنى

يا ريت تسامحونى

This entry was posted on السبت, مارس 13, 2010 and is filed under . You can leave a response and follow any responses to this entry through the .

64 كــــلام بيطــبطـــب عـــلى قــــلبى و روحــــى

حمدالله علي سلامتك و كان نفسي اجي
هابقي ااقولك السبب في ميل بقي :)

عاااااااااااااااااااااااا
ماليش دعوة بجد كنت اتمنى اكون موجودة
يابختكم ( دا مش حسد ولا آر دا حقد عليكم بس ) (طبعا بهزر اوعو حد يصدق )
الحفلات دي بتكون حلوة قوي
اي شعور ان الواحد بيعمل خير لمجرد انه يفرح قلب حد لوجه الله دي في حد ذاتها متعه خاصه
ربنا يسعدكم ويفرحكم يارب زي مافرحتم الاطفال دي

ربنا يقدركم دايما يارب على فعل الخير ويجمعك فى الخير دايما يارب

دا انا اللى متشكرة
لكِ يافطوم على الوصف
الجميل دا اللى بيخلينى
كل مرة أقرأ لك وصف زيارة
أو رحلة او تجمع بيخلينى أحس
كأنى معاكم.ربنا يديكم الصحة
والقوة ويبارك لكم كلكم ويجمعكم
فى الخير والحب دايماً يارب.
صباح الفل ونهارك ابيض.

يارب كل ايامك حلوة يا مامي
انا مبسوطة انك اتبسطي وعاوزاكي فوق السحاب كدة على طول
ربنا يخليكي ليا
تحياتي البسكوتية الصباحية المبكرة
وحمدالله على سلامتك يا روح قلب بنوتك

فاتيما
جزاك الله خيرا ورد اليك يوسف يارب
بس والله انا فعلا معملتيش شئ خالص لان ببساطة لوحدى مقدريش اعمل حاجة اطلاقا بس لمتنا ومساهمات الكل وقبلهم فضل ربنا وتوفيقهة والنية الخالصة لله هى اللى خلتك تقولى ان فى شئ حلو
كمان تواجدكم وتشاجعكم واصرارنا على اننا نحاول نشكر ربنا بشكل فعلى
بس ياستى ربنا يتقبل مننا

فاتيما ميرسى لكى جدا ولكل الناس اللى جت واللى مجتيش
لكل الناس اللى حاولوا يسعدوا الاطفال ويكونوا معاهم
ومخفوش منهم ولا نفروا منهم
ميرسى لخالد ووليد وشريف وضياء وعسقول وخيخة وحمادة وشريف وليدى وليساندرا وأ احمد عبد المنعم وسارة طوبار وثومة
وكل الناس اللى جت عشان تعمل خير
او تسعد طفل برئ
وبطلى شكر والله فعلا انا معملتيش حاجة خالص دا مجهودكم ومساعدتكم
وشكرا جدا لماما امولة لانها دايما بتشجع وتساهم وتخطط للقاءات الخيرية

شكرا فاتيما ويارب تنورينا تانى وعاشر

الف فرحة و سلامة دائما
:-**********************************
و تسلمى ديا و تسلم اغانيكى

الصباح بقى خليه بعدين على الغذاء عقبال ما تكونى صحيتى :-)

:-) بدل ما احضن المخدة :-))
:-XXXXXXXXXXXXXXXXXXXXXXXXXXXXXXXXXX

حمد الله علي السلامة يا بطوط

ربنا يجعله في ميزان حسناتكم والله كان نفسي أجي بس ربنا مقسمش والحمد لله

يارب متجمعين في الخير ديماً

فاتيما
حمد لله على السلامه ليكى ولكل الناس اللى معاكى....
حسيت انى معاكم بجد
ان شوفت بورسعيد فى رحلات قبل كده وكان نفسى اكون معاكم بس معلش بقى الظروف العائليه ....
كلامك اللى قولتيه على الناس جميل اوى ولازم يخرج من قلب برئ زى قلبك

فرحانه بكلامك اوى اوى رغم ان فيه ناس لن اتشرف بعد بمعرفتهم لكن حسيت من كلامك انى اعرفهم بجد

يارب كل رحله وانتى طيبه وبخير
ويارب يفرح قلبك وتبقى على طوووووووووووووووووول طايره من الفرح بس وعد منك اول ما قلبك يفرح بجد اوعى تنسى انى دعيت لكى كتير اوى اوى

ربنا يعزك يا احلى والذ واجدع فاتيما فى الدنيا كلها

زهراء

فطومة الجميلة الطيبة

أنا سعدت جدا بك وبمعرفتك أكتر

وكان نفسي أتكلم معاك كتير لكن معلش المرة الجاية ان شاء الله

عايزة اقولك ان اليوم كان حلو بكم وبروحكم الحلوة ونيتكم الصادقة

ربنا يصلح حالكم ويحققلك كل ماتتمني يارب

شكرا لانكم اسعدتونا فعلا

حمد الله على سلامتك يابطتى
انا فرحانه لانك فرحانه
وفرحتك كانت باينه فى صوتك قبل السفر وبعده
بحبك جدااااااااا

انتي نورتى بورسعيد بجد يا فاتيما انا كنت سعيده جدا انى شفتك تانى وان شاء الله دايما نتقابل على خير

بعد هذا البوست الرائع لا أستطيع إلا أن أقوال الحكمة الخالدة من فيلم الطريق إلى إيلات:
ياريتنى كنت معاهم
ياريتنى كنت معاهم
عااااااااااااا

جزاكم الله كل خير

مبسوطه انكم انبسطوا و كمان عملتوا خير
ربنا يخليكم دايما فى طريقه

كل سنه و انتى طيبه يا تيما عشان عيد الام

كل سنه و احنا كلنا متجمعين و بنحب بعض

فاتيمااااااااا
ازيككككككككككككككك
وحشاننىىىىىىىىىى كتييييييرررررررررر كتييييييييررررررررررر
ويارب تكونى في خير واحسن صحه وحال
الاول بس مش هتقوليلينا على المعاد اللي كنت فيه وطايرة من السما عايزين نفرح معاكي
( سؤال على جنب هو المعاد ده له علاقه بالبوست اللي تحت ده؟ )
- كان نفسي اجي معاكو بور سعيد بس ان شاء الله تتعوض في اقرب لقاء تدوينى قادم بس بقى تعملوه هنا فى قاهرتنا العزيزة
ربنا يقدركم دايما على فعل الخير ويسعد ايامك بالفرحه دايما

القمراية ام يوسف اخيرااا عرفت ادون هنا حاجة النت عندي وحش قوي من مدة

كاننفسي اتعرف على شخصية محترمة زيك وعلى كل الشخصيات اللي كانت موجودة ...بحبك
لـــولا

دلوقتى بسسسسسسسسسس وبكل ثقه اقدر اقول انى عايشه فى الغيبوبه :(
روحتوا وجيتو كمان:(

بجد بجد لو تعرفى اللى جوايا دلوقتى كان نفسى حتى اكلمكو فون:(
بس هى الغيبوبه ربنا يسامحها والزهايمر,

ربنا يجعله فى ميزان حسناتكو والحمد لله انكو اتبسطتو ودا ميمنعش انى اقول ياريتنى كنت معاكو..

حمدلا علي سلامه الكل
والله بجد كان نفسي اشوفكو واتعرف بيكو
بأذن الله لو في لقاء فالقاهره ياريت يبقي قريب وانا هروحه بأذن الله
وياارب ديمن كدا مبسوطين ومتجمعين فالخير ديما
تقبلي مروريي وتحياتي

جندى مجند فاتيما المليجى
اسكن الله الفرحه فى قلبك دائماااااااااا
وابدااااااااااااااااااااا
وبس خلاص
وايييييييييييييييييييييييييه

لا كلام بعد كرم ام يوسف ولا وصف بعد وصفها لاى لقاء
بس الغريب فى البوست ان كلماته اى حد ممكن يحس بيها ويحس بالفرحة والسعادة فى كل حرف فيها
اليوم كان رائع جدا من اوله لحد النهاية والحمد لله كنت واثق من لقاءات بورسعيد انها دائما رائعة لكن اجمل مافى هذا اللقاء الفرحة والابتسامة المرسومة على كل الوجوه
واجمل حاجة فيه بالنسبة لى عودة ابو خالد بروحه وحسه الابوى كما عهدناه دائما
اما عن كلامك عن الجميع وعنى خاصة فلكى كل الشكر والتقدير
لكن لانك حلوة وصافية من جواكى فبتشوفينا بعيون اكثر نقاء وطيبة
تحياتى

انا بقى غيرانة :)
معقولة كل الناس دي بتتقابل و انا قاعدة منفية في قارة تانية اصلا !!
:)
اهم حاجة انكم انبسطتم و بسطتوا غيركم :)

مكالمة رقيقة الان من ابتى ابو خالد
جعلتنى افط وانط واجى عندك علاطول

مجتيش ليه امبارح يا شيماء
تتلجلج شيماء شاردة وتحاول ان تستذكى قليلا
فى نفس الوقت يتحدث وقد ادركت ان تجمعا كان بالامس
وكان فى بورسعيد

اعتذارات
ودعوات

وقالى فاتيما كاتبه عن الموضوع

جيت اسلم جدا
وكان نفسى اسلم على الناس كلها
بس انا والله مكنتش اعرف
كنت اتصل حتى:(

عموما
بحبك يا فاتيما
وكان نفسى اشوف ناس كتير
الحمد لله

دعواتك اوى
حبيبتى

تحليل جبار يافاتى

ربنا يسعدك ياقمر كمان وكمان

بجد بجد كان نفسي ابقي موجوده في يوم زي دا

الحمد لله على سلامتكم

جبتي لي ايه بئااااااااااااااااا؟

ممتازة التغطية دي
الله ينور

انتي اللي انسانة جميلة ورائعة يا فاتيما وبجد نبع الحنان

ومن أكتر الناس اللي الواحد يبقى مرتاح وهو قاعد معاهم ومن اكتر الناس اللي بشتاق لبوساتهم وحضوناتهم مع ان غالبا سلامي بيبقى بالإيد بس وساعات بسلم من بعيد لبعيد كمان لكن حضنك بجد فيه حب وحنان مش بحسه الا في حضن ماما وحضنك

الورد للورد يا حبيبتي

وكل اقلام الدنيا متغلاش عليكي هو أصلا يطول يكون معاكي

بجد صحبتك ممتعة جدا وزي ما قالوا عايزين تعرفوا معدن حد عاملوه في السفر وانتي معدنك دهب يا احلى فاتيما وانتي حلوة علشان كده شايفة كل حاجه حلوة

حمد الله على السلامه
اكيد اللقاء كان جميل بحضورك وبحضور كل الموجودين وبعدين بورسعيد ومدونى بورسعيد
فى القلب دايما
معلش بقى تتعوض المره اللى جايه

فاتيما بجد انتى مكسب لاى حد يعرفك
انتى حاجة كدة كلها على بعضها حنينة معجونة بحنية
بجد انا اتشرفت جدا بمعرفتى بيكى و بعتبر نفسى محظوظة لان كان اول معرفتى بيكى وجها لوجهفى لقاء جميل زى دة متتخيليش انا اتبسطت اد ايه وانا معاكم انتوبجد صحبة خير واتشرفت جدا بمعرفة بباقى المدونين وربنا يديم المحبة والود وانتى بقا وصفتى اليوم حلو اوى بس انتى عارفة ان لارا كانت تعبانة وطرنا طيران على الدكتور


و ان شاء الله نتجمع تانى فى الخير باذن الله

مساءك ورد

ازيك يا فافي يا أحلى أم في منتكة الشرق الأوست والأدنى وما بينهما

كل سنة وانتي طيبة يا قمرة يا حبيبة الملايين

انا فرحانة انك انبسطي جدا

فرحانة إنك بتصري تنبسطي
بتصري تحصلي على الغرض المعد سلفا من اي شيء
دي قوة لا يدركها إلا من يعرف البني أدمين كويس

فرحانة جدا جدا جدا انك انبسطتي
ويارب دايما يارب
ويتمم لك فرحتك عاجلا غير آجل بلا سبب يفهمه او يدركه عقل ابن أدم

بحبك

حمد لله على سلامتك يا قمر

كان نفسي اكون معاكم بس كلامك الحلو عن اللقاءحسسنى بنفس الفرحة لانى بجد بفرح اوى لفرحك
ويارب لقاء فوق السحاب دا اللى قبل اللقاء يتكرر كل يوم وترجعى طايرة فوق السحاب كدا كل يوم

بفرح اوى لسماع صوتك يا طمطم وربنا يفرح قلبك كمان وكمان

الف حمدلله على السلامه ياأحلى فاتيما ...

ربنا بجد يسعدكوا دايما ويقدركوا على فعل الخير ..
بجد جزاكم الله كل خير ...

بجد انا عشت واتخيلت كل شى بسبب وصفك وتحليلك الرائع ...

بجد تسلمى
وان شاء الله اشوفك قريب يارب ...
... ;) ,,, ;) ...

يا سلااااااااااام

هو البوست طويييييييييل جدااااااا

تقريبا أخد منى ساعة .. بس كويس وفر عليا 4 ساعات سفر ..

كنت حاسة كأنى معاكم بالظبط حتى أكلت معاكم سمك برده ..

هقوم أغسل إيدى بقى

يارب دايما تتجمعوا على الخير

ألف حمداً لله على السلامة يا فاتيما

:)))

ربنا يا رب يكرمك ويهديكي ويرضى عليكي ويريح بالك ويطمن قلبك ويرد لك يوسف إن شاء الله سالماً إلى حضنك عاجلاً ويفرحك بيه ويحفظه لك من كل سؤ.اللهم آمين




ونعم الأخت بجد

:)))))


سلام

فاكرة فيلم بتاع الطريق الى ايلات
يارتنى كنت معاهم

:)))
البوست ده خالانى مبسوطة بالظبط زى يوم رجوعى من يوم خير معاكم

ربنا ما يقطع خيط الخير اللى بين ايديكم ابدا

يا صباح الخير

فطوم معلش عقبال ما اتغذيت الساعة بقت 10 بليل قولت بلاش اجى اصحيكى على المساء :-))))

روحنا و اتفسحنا و انبسطنا و رجعتلنا بالسلامة :-) يارب دئما
يالله بقى اديها نشاط صباحى
بقالى زمن مقريتش الاخبار خالص من الشغل و التعب :-(

:-********************************
:-XXXXXXXXXXXXXXXXXXXXXXXXXXXXXXXX

:)
كفيتي ووفيتي
وربنا يجازي الناس اللي شاركت كل خير
مش بس لأنهم كانوا رايحين يرسموا فرحة في قلب طفل
ولكننا رسمنا الفرحة في قلوب بعضنا ببعضنا

وربنا يخليكي لماما ومتقلقيهاش تاني :)
معلش بقى حمادة سرح في السواقة ملحقتش
وكل سنة وإنتي طيبة يا أم يوسف :)

:)
ازيك يا فاتيما

فعلا كان يوم ولا أروع

من امبارح وانا عماله اجهز البوست
وأرفع الصور
والنور يقطع
وكله يضيع

واعمل نفسي مش شايفه ومش واخده بالي
النور ييجي
أجهز الحاجه
قوم قطع تاني

دي تالت مرة كله يطير

بس مين ده
انا وراه وراه لغاية ما انشره :))

تحياتي يا طيوبة

Lyssa

البوست بجد يغيظ ويقول للى مراحش مروحتش
بجد كان نفسى ابقى موجودة معاكم
بس انتى عارفة الظروف انا ضياء كان قايلى عليه بس مكنش ينفع ارجع البيت الساعة 11 يا نهار ابيض
دانتى ماما طيبة يا فاتيما
وكان فى ناس كتير اوى نفسى اشوفهم
يلا تتعوض ان شاء الله

ازيك يا طمطم.. وحشتيني جداااااااااااا.. كويس انكم اتبسطتم في بورسعيد.. كان نفسي اكون معاكم.. عاااااااااااااااااااا.. وكنت عاملة ترتيباتي مع وليد على كدة بس عمر جاتله نزلة شعبية وانا عندي التهاب في الاحبال الصوتية مضيع صوتي على الاخر.. مكانش ينفع اجي واشاور او اكتب في ورقة بدل ما اتكلم.. معلش ملناش نصيب ننبسط معاكم.. خيرها ف غيرها باذن الله.. سؤالك وقلقك علينا يا طمطم غاليين اوي وف قلبي من جوة.. تسلميلنا دايما يا رب.. احنا كمان بنحبك اوي على فكرة

السلام عليكم
كنت أتمنى اشوفك تانى وحشانى من يوم لقاء المنصوره
والحقيقه ليدى كانت موفيانى بالتفاصيل بالرسايل وكأنى كنت معكوا وكان نقاصينى رؤياكم فقط
تتجمعوا دايما على الخير

ماشاء الله الله اكبر ولاحول ولاقوة الا بالله

يااارب دايما متجمعين فى الخير
ربنا يسعدكم ويتقبل منكم جميعا يارب
ربنا يطمنا عليكى دايما يافاتيماي يارب

ايمان مصرى

انا زعلالالالالالالالالالالالالالالالانة كان نفسى اجى والله
وهموت واشوفك يا فاتيما
بس يرضيكى نيفين تغيظنى ؟
ومتتصلش بيا غير بعد متمشى ؟
كان هيجرا اية لو كلمتنى وهى معاكم كنت سلمت عليكى
عاااااااااا

بحبك على فكرة انا

وربنا يوفقك يارب

اه الاحضان مكفتش فى التعليق نخليها تعليق لوحده :-))

:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

امبارح بالليل
التعليقات كانت بتعاكسنى معرفش ليه
مع انى مش شايفاكى نزلتى بوست جديد و لا عملتى تحديث

بس نلحق نعلق قبل الاصطباحات الجديدة و قبل ما النت يفصل ثانى :-)

:-******************************
صباح يعنى إيه راجل
و يعنى ايه ست :-))
انا عايزة اعيش
علشان تعيش مصر حرة

الله يعينه على ما بلاه بس يفتكر ان الانتحار حرام قبل فوات الاوان

صباح الخيانة
فكرنى بقصص الاحزاب و الانتخابات زمان قبل الثورة
يعنى الموضوع مش حيتصلح من نفسه عايزله قلبان يكتمه و يردمه؟؟

صباح الإرادة
ايوه كده:-)))

صباح البحث عن مكان تحت الشمس
ده بقى سى عبده المشتاق للحاجة الاكبر

صباح التصريحات
ده اكبر دعاية حكومتنا بتعملها مضادة لنفسها :-)

صباح العبر
ربنا يكرمة و يرزقة و يعلى مقامه بين الناس و باقل المحن

صباح الكسابيات
مشوفتش الفيلم و لا قرأت القصة
بس هو البنى ادم مستنى ديما للى ياخد بايده ؟؟

صباح التخاريف
أعلنت وزرارة البترول
ان سبب أزمة السولار
هو "إشاعة" حب فى بورسعيد :-))
و عليه نسأل الى رجعوا من بورسعيد عن مدى صحة الخبر:-)))

صباح الطاهريات
مبروك انه لقى نصه الثانى و صورته حتكمل و تلاقى القبول الكامل
اما السعودية كلها اتنقلت عندنا من زمان :-((

صباح الكلام الفصل
اكثر حاجة بتعجبنى فى سيرة عمر انه لما يجادل امرأة يستمع ليها و يحاول يحل مشكلتها و يعلن لما يكتشف انه اخطأ و هى اصابت
هى ده الرجالة و الرجولة

صباح الأشعار
اول مرة اقراله حاجة الشاعر ده بس كلامه بيرشق فى الوجدان
عمر نجم

صباح الأغانى و الدندنات
يا ريت فيروز
ده عايزلها بوست لوحدها :-))

بس التطورات فى الاصطباحات ديه
انت بقيتى تجيبى اخبار من المجونات كمان :-)

adel
-----

الله يسلمك يا عادول

حصل خير و المرة الجاية تكون معايا
إن شاء الله با بابا

مفيش أخبار عن النتيجة يا واد؟!




just wating
-----------

بلاش عاااااااا دى و النبى
ان شاء الله النوبة الجاية تيجى
و ادينا اديناكم فكرة اهو و عيشناكو اليوم معانا برضو



أحاسيس آيوشة
------------

ميرسى يا آيوشتى
و يجمعنا معاكى ف الخير يا حبيبتى




norahaty
--------

يا نورهانتى انتى و مهندس مصرى و كام حد كدا بيبقوا فى بالى لما آجى اطنش كتابة تفاصيل و بعدين ارجع و اقول لأ اكتبيها يا بت هما بيحبوا يقروا الكلام دا فبرجع اكتبها تانى

ربنا يكرمنا فيكى و تيجى فى يوم معانا
يا رب
صباحك و مساكى و كل لحظة فى اليوم بيضا يا رب



Baskouta
--------
يا عيون مامى

الله يسلمك يا حبيبتى و المرة الجاية لن اتنازل عن حضورك و بحبك يا بسكوتايتى البمبى الحلوة



wanda
-----

يا لهوتينى
تحضنى المخدة ..أيخلصنيش كدا ابدااااا

الصباحات الجديدة انكتبت
و بخصوص القديمة
الراجل سمع كلامك اهو و انا كنت متاكدة انه هيتراجع بس يلاقى صدى لعذابه و معاقبة و لو بالفضح

انا كمان لما قريت خبر الاحزاب دا حسيت اننا رجعنا لورا زى ما بقرى خبر التوكيلات و افتكر سعد زغلول
التاريخ زى ما يكون حلقات و بيعيد نفسه و لا إيه ؟؟؟


انا مبطقش ايمن نور دا خالص و بحسه مدعى و مزيف من ساسه لراسه و اصلا مبقلوش دور و زى ما قولتى مشتاق بس بأمارة ايه و هوه ميجيش فى البرادعى حاجة ..كان يا دوب على قده نعمان جمعة و بس

حلوة قوى اشاعة حب دى
كدا جلال عامر يقلق منك يا جميييل

عمر نجم جميل جدا و للأسف طق مات بدرى من شدة الحزن بس سبحان الله الكلام الحلو الصح دايما يعيش مهما راح صاحبه

تطورات ايه بس انتى علطول كدا رافعة نعنوياتى و مصياتنى و محسسنى انى بعمل حاجة حلوة

انا كمان
******************************
و ×××××××××××××××××××××××××××××

سيبك من المخدة بقى

نهر الحب
-------

كدا يا إيناس
قافلة التعليقات عندك ليه بس ؟؟

اوعى يكون فيه حاجة زعلتك ؟!!

لأ

متهيألى انت قافلها تواضعا برضو

عشان محدش يقول شكرا كتير


و لو انك تستحقى تسمعيها يا حبيبتى و الكتابة عن الحاجات دى
قد تكون بتقلل من قدر الثواب
بس بتشجع ناس كتير تانية و تخليها تتحمس فى المرات القادمة تزيد
و تكبر و تتبرع
و كدا يبقى حققتى الهدف و اكتر



انا عاوزة اقولك انى مكنتش متوقعة ان كل الحاجات تتجاب بصراحة
و يفيض كمان ؟؟


متوقعتش العدد دا كله ييجى
و قده مرتين تلاتة
كان نفسهم ييجوا


بس لأنك و ماما امولة و غيركم

فاللى احنا رايحينلهم موثوق فيهم
و مصدر احترامنا جميعا و تقديرنا
كان لازم ربنا يكرمنا فيهم
و يكرم الولاد الجمال دول
بحد يساعدهم
و لو يوم واحد ف السنة



انا من هنا عاوزة اشكر معاكى
كل حد اتبرع بحاجة و لو بسيطة
و لو بضحكه مع الأطفال و كلامه معاهم


و كل ما اتخيل الولاد و هما كل يوم هيقعدوا يتلموا قصاد التليفزيون
او الكمبيوتر يتفرجوا
و يلعبوا
و ينبسطوا و يتعلموا جديد
اقول الحمدلله يا رب
انى جيت و كنت وسط الناس الحلوين اللى زيكم
و فخورة انى منكم


وبشكرك


بشكرك


بشكرك يا أيناس


مهما قولتى متشكريش


ربنا يجعله فى ميزان حسانتك يا رب
و اكيد كل مرة يبقى فيها زيارة
مش هتأخر قدر امكانى


انا حبيت بلدكم قوى بجد
كفاية انكم فيها يا حبيبتى


بوسيلى نسمة كانت قمة الرقة و الضيافة و هبة كمان صاحبتك
و كل حد


الف شكر يا نهر الحب و العطااااااااء

ميرا (وومن)
----------
الله يسلمك يا ميرا
يا اميرة
يا ست البنات

كان نفسى تيجى بس معلش عارفة الظروف
و يا ريت طنط تكون بخير دلوقتى
ابقى طمنينى برضو لما تروقى
انا عارفة اللخبطة دى ربنا يعينكم
بوسات و حضونات يا حبيبتى





لولا و زهراء
-----------

يا ذات الوجه المشرق
مسيرك تيجى معانا يوم و تشوفى كل الاحباب دول وجهاً لوجه و تعيشى معانا متعة انك تعملى حاجة لحد متعرفيهوش و تكونى راضية عن نفسك
عارفة داليا قوس قزح لما بتعمل بؤجة الخير ببقى حاسة و انا شايلة البؤجة و رايحة انى انا اللى هاخد حاجة مش بودى حاجة
احساس عجيب كدا و ممتع يحسسك انك انسانة بجد مهما كان بؤجتك صغننة او على قدك او معكيش حاجة خالص و وجودك بيكتر الناس و يخلى منظركم يفرح و يشجع ناس تانية
عقبال المرة الجاية و تكونى معانا
إن شاء الله
سلامى لولا الجميلة




أمل حمدى
-------

ازيك يا ماما امولة يا طيوبة
انتى اللى جميلة و حنينة قوى و طبطبتك على كتفى ف المطعم خلتنى ابهت كدا و اتنح من كتر ما كنتى طيبة و حنوة بفطرية كدا و بساطة
انا اتشرفت المرة دى بالقعاد معاكى و لو شوية لأنى ملحقتش قبل كدا يحصل ذلك
عقبال المرات الجاية ان شاء الله
انتوا كمان اسعدتونا جدا و استقبالكم كان دافى زى قلوبكم





عاشقة الرومانسية
----------------

الله يسلمك يا قطتى
ينفع اروح لناس حلوة زى دى
و مفرحشى ؟؟؟

انا كمان يا حبيبتى بحبك




رحيل
-----

دا نوركم يا رورو
انتى عسولة قوى يا بنتى
و ان شاء الله نشوف بعض دايما ف الخير كدا




أبو حميد
--------

المرة الجاية تكون معانا يا باشمهندس
و كفاية تشجعيك و تعليقاتك وحماسك
ان شاء الله اللقاء الجاى تكون حاضر اول واحد
بعدى طبعااااااااا
محدش ييجى قبلى أبداااااااااااا
انا بقولكو اهو



صيدلانية طالعة نازلة
-------------------
و انتى طيبة يا لولاّ
و عقبال ما تبقى معانا المرة الجية
منحرمشى منك أبدا
و وحشتينى ى ى ى

mostafa rayan
-------------

ازيك انتا يا صفصف
يا خرااااااابى عليك

الشاعر و الادباء دول بالذات
الواحد ميعرفش يروح منهم فى حتة

نعم يا سيدى عاوز ايه؟؟
ايوه سعادتك زى ما قولت كدا
المعاد له علاقة بالبوست
خلاص ؟؟

طب انا بقولكم خطوط عريضة ف الخباثة
انتوا كمان اعملوا مش واخدين بالكو
ف الخباثة برضو
يا ساتر عليك

منحرمشى منك يا مصطفى و المرة الجاية ان شاء الله تكون معانا
و يكون لقاء قاهرى حاضر
يا مسهل




لولا و زهراء
----------

ميرسى يا لولا
و ان شاء الله ييجى الوقت يا حبيبتى و نتقابل و نتعرف اكتر
ميرسى ليكى جدااااا




الشعب لابد له من حكومة تشكمه
--------------------------

يا ست مشمش متاخديش فى بالك
يا ماما انتى مخطوفة قريب
عاوزة ايه بس من اشكالنا
يا بت يا مشمش افرحى و انبسطى بالخطوفة شوية احنا مش رايحين فى حتة و اللقاءات ان شاء الله جاية كتير
خليك انتا يا جميل غارق فى الرومانسية شوية قبل ما تدخلى فى الجواز و ما بعده و هترجعى تكتبى تانى و تتابعى تانى و تتحفينا ببوستات ما بعد الرومانسية بشارعين تلاتة كدا

ان شاء الله المرة الجاية تكونى معانا
و تجيبى الدزننانور معاكى





sony2000
---------
الله يسلمك يا فندم

ان شاء الله المرة الجاية تكونى حاضرة و يكون قاهرى عشان المسافة
شكرا ليكى على دعواتك الطيبة
و تشجعيك
بيفرق بجد مع اى حد مش معايا انا بس



كيكى عووووو
-----------

تمام يا فنننننننندم

و اسكنها فى قلبك علطول يا كيكى يا صديقى يا حبيبتى انتى

قلبتيها شعبولا ف الجيش ؟؟
طب تيجى ازاى !!!!



خالد همس الاحباب
--------------

البركة فيكم يا خالد

فيه ناس لما تعرفها تطلع منك اسوأ ما فيك

و ناس تانية تطلع منك أحلى ما فيك
و اللى انت متتصورش انه موجود اصلا
و يخلوك احسن

و انا معاكو بحس انى حد حلو قوى بصراحة عشان كدا مش بفوت اى فرصة للتجمعات دى الا و اقتنصها و ببقى عارفة انى هكون كسبانة حاجات كتير قوى قوى و ببقى و الله مقدرة قيمتها لأنها غالية و عزيزة
ربنا يخليك ليا و اروح على حسك كل سفرية و انا مطمنة كدا علطول
متحرمشى منك يا ابو هموسة و ببش
سلامى لمامتهم جدا

قهوة بالفانيليا - شيماء على
---------------------------

معلش يا شيمو

ان شاء الله ربنا يكرمنا بزيارة ليكى لمصر و تصادف لقاء تدوينى و تيجى يا حبيبتى

و كأنك معانا برضو و كفاية تعليقاتك و تشجيعك يا فندم





shimaa samir
------------
معلش يا مشموشتى
اصل ابا سأل عليكى كتيييير قوى انتى و هدى
بس نظرأ لأنه بيكلمك فأخبارك عنده
لكن هدى لأ للأسف

انا مقدرة ظروفك و عارفة انك لو قادرة تيجى مش هتتأخرى اكيد

انا كمان بحبك يا عصفورتى يا صغيورتى
ربنا يكرمك و بجمعك بمن تحبين على خير يا رب





كيـــارا
---------

كان عاوزك اليوم دا
يا بنوتات يا عسولات

ملحوقة ان شاء الله
فى لقاءات تانية
قاهرية على الاقل
ماشى ؟

يا رب تكونى احسن دلوقتى




مصرى جدا
--------

يا خراشى يا هانى


بقولك راجعة البيت حداشر
و كنت هتحول للاجئة
و افترش الرصيف
و ميبنليش صاحب
تقولى جبتلى ايه؟؟؟

يا خرااااشى تانية


مهندس مصرى
---------
اى خدمة يا باشمهندس
انت بس تؤمر يا عريسنا
و احنا نكتب تفاصيل للصبح
انا مقصرة ف السؤال عليك معلش

كنت هبعتلك ايميل عشان اطمن على نفسوياتك بعد كتب الكتاب
لتكون مونقفلة ولا حاجة

اصل انتا مقل فى التعليقات عند الاحباب عموما
و تعليقك الموجز دا وغوشنى عليك خصوصا
يا رب تكون دايما بخير
عادى انا بهزر طبعا
ربنا يسعدك يا رب
و ييسرك احوالك كلها
و نفرج بيك عن قريب الفرحة الكبيرة
يا رب




ladyE
------

يا خراشى
مبتحبيش تسلمى بوس و حضونات و انا دخلت فيكى شمال كدا ..معلشى بقى
اصل انا معرفش اسلم على البناتيت و الجنس الناعم غير كدا بصراحة و خصوصا لما يكونوا غاليين عليا
و عشان تبقى عارفة بقى
كل مرة هشوفك
هتتباس يعنى هتتباس ..ههه
ميرسى يا حبيبتى انك حطتينى مع ماما فى جنب واحد دا شىء يسعدنى و يشرفنى بجد
و الورد للورد بس ميجيبوش غير الورد
و خالتك لطيفة لطيفة لطيفة من هنا لأخر الدنيا و سلميلى عليها جداااا
كلامك حقيقى يا لولو
السفر بيبن قدرة الناس على الصبر و التحمل و معاملة الآخرين بناء على ذلك و الحمدلله صحبتنا دايما بتكون حلوة و فيها مراعاة رهيبة لبعضينا
بربنا يديم الود


انا كل شوية افتح الكرت و اسمع المزيكااااااااا



و تعالى هنا صحيح
مش كنتى تقوليلى على حكاية الغنا دى كنت قعدت انا و انتى داينها فيروز و حنان و ماضى و عشنااااااا
المرة الجاية بقى
الورد بتاعك حطيته ف التلاجة عشان يعيش اكتر
كل ما افتحها ..اشوفه و افتكرك
بوسات و حضونات و كل حاجة حلوة

romansy
-------

الله يسلمك يا رومانسى
كتر الف خيرك
دا بس من ذوقك
المرة الجاية تشرفنا بإذن الله




NeVeN
-----

انتى كمان يا نيفى
عسولة قوى و طيبة قوى و جميلة قوى
انا كمان اتشرفت بيكى و بلارا الجميلة و سلامتها الف سلامة و جمدى قلبك كدا دا لسه ييجى حاجة و عشرين سنة هتعملى ايه سيادتك بقى ؟؟

ان شاء الله ربنا يكرمك و يكرمنا بحضورك اللقاءات الجاية كلها
دنتى ابن بطوطة يا بنتى يعنى هنجيبك هنجيبك ان شاء الله

انتى جميلة
و مدونتك جميلة
و اسمها جميل
و فيروزياتك جميلة
و معرفتك كلها جميلة
جميلة
جميلة

مساءك و صباحك ورد يا حبيبتى





ستيتة حسب الله الحمش
-----------------


يا ست السوتيتات كلهن
الكل سال عليكى
و شريف باشا فى وسط كلامنا استعان بحكمتك الخالدة دى
ان السعادة ارادة و لو احنا عاوزين نفرح و نفرح غيرنا هنعملها و لن يقف امامنا أى شىء

مينفعش اكون وسط كل الناس الجميلة اللى نيتها خير دى و مبقاش سعيدة يا ستوتى دنا ابقى عاوزة انضرب بقى

انا كمان يا حبيبتى بحبك قووووووى
كل سنة و انتى طيبة و ماما طيبة يا رب




reem
----


يا خراااشى على رقتك يا ريم
يا بت انتى شوفيلك حل فى نفسك
مش ممكن كدا

لأ
إستنى متشوفيش

خليكى كدا رقيقة الرقيقات
عشان احنا منشكحين بالحكاية دى و عمالين نتدلع بسببها منك قوى
انا كمان فرحانة انى سمعت صوتك و عاوزين المرة الجاية يبقى صوت و صورة لو سمحتى

بوسيلى العروسات القمرات قوى




ghAdA mOhsen
-----------
الله يسلمك يا غدغود
اتمنى يا حبيبتى مكونش طولت عليكو و زهقتوا وانبسطتوا شوية بالوصف التفصيلى دا

المرة الجاية تبقى انتى اللى تكتبى بوست منافس بقى و نقعد نقطع على بعض ...ههههه

عاملة ايه ف المذاكرة ؟
يا رب خير دايما

سلام ليكى قووووى و لرانيا كمان




أم ...بوبه
----------


لأ ل ل ل
مينفعشى النوظام دا

بقى البوستات دى بتوفر عليكم المشاوير و كدا
ل بقى دا كدا مكتبهاش تانى عشان اخليكى تيجى بالعافية بقى

و كمان كلتى م السمك
لااااا
فين الفلكة يا جااااااااابر

انا اللى بشكرك يا فاتيما انك قبلتى الهدية البسيطة من شريف
انا كنت خايفة انك تحرجينى وتحرجي شريف وترفضى انك تقبليها
شكرا ليكى جدا

سلام
اختك خيخة

P A S H A
---------

الله يسلمك يا شريف

يا اخلاق الباشوات

ميرسى على كل الدعوات الطيبات دى
و ميرسى على انكم اخوات اعزاء الواحدة تسافر معاهم ساعات و تبقى فى عهدتم و هيا مطمنة زى ما يكونوا عشرة عمر مش لسه من مدة قريبة

انا مش عارفة ممكن اقولك ايه يوفيك حقك فى كل اللى عملته معايا ف اليوم دا و كفاية النسكافيه يا جدع عشان دى حركة جدعنة متطلعش غير من حد حنون و طيب قوى

ربنا يديم الود و الاخوة دى
و نسافر دايما صحبة ف الخير




صوت من مصر
----------

ان شاء الله المرة الجاية
تكون معانا يا كيمو
ان شاء الله




قوس قزح
-------

انا افتكرتك قووووى ف السفرية دى يا داليا
لما شوفت ايناس بتتحرك زى شعلة نشاط و تستقبل الناس و وشها عليه ملامح مشوفتهاش غير معاكى و ف وشك

معرفش اوصفها
لكن بحسها

وش حد عاوز يعمل حاجة لغيره و بس
و ناسى نفسه و المهم اللى حواليه

اربنا ما يقطع الخيط اللى بين إيدينا جميعااااااا يا وش الخير
ايديكم دى مش عاجبنى الص
انتى معانا و وسطنا و اولنا كمان
سلامى لآبى يا ريت
قوليلها فاتيما و ايناس و كل البنات دعولك ربنا يسعدك يا رب
علطول ان شاء الله
بوسيلى العيال و اولهم اميرتى الجميلة هنا




Diyaa
------

1- و انت طيب يا ضيا
2- و لا يهمك انا فهمت انك اتسربعت
3- حاضر انا كمان هسربع روحى المرة الجاية عشان التاخير دا لا يتكرر
4- البركة فى ربنا و النية الثافية
5- ربنا يخليكم و اروح معاكم علطول
6- عدوا الجمايل بقى مش حارمكوا من حاجة اهو
7- ابقى اسأل على اختك كل مدة كدا
عشان تطمنها عليك كمان





Lyssandra
---------

ازيك انتى يا الرقة متجسدة

شوفت البوست خلاص و هحطه فى القايمة حالاااااا
و ربنا يجمعنا على الخير دايما يا حبيبتى
تحياتى انا اكتر يا حبيبتى





Ana Keda
--------

مش كدا يا مروة و النبى ؟؟

منا عاوزة اغيظكم عشان تيجو المرة الجاية و ميبقاش فيه حد اغيظ من حد بقى

معلشى المرة الجاية يا حبيبتى تقدرى تيجى و تقضى يوم جميل بس من غير ما نرهقكك معانا و نقلب كيان بودا لو سمحتى
ان شاء الله نتجمع ف الخير دايما





bobo
----
انتى كمان يا بوبووووووو

سلامتك يا حبيبتى الف سلامة

و سلامة عمورى بيكا حبيبى
بطلوا بوس فى بعض بقى و انتوا تخفوا ..هههه

ميرسى يا حبيبتى انك طمنتينى عليكى بسرعة كدا و ربنا يتم شفاكم على خير

المرة الجاية لن نتنازل عن وجودكم و تكونوا فى احسن حال يا رب
بحبكم قوى قوى




حنين الذكريات
------------

و عليكم السلام يا حنين
ان شاء الله تكونى معانا يا فندم المرات الجاية
شكرا على دعواتك الحلوة





إيمان مصرى
-----------
إيماااااااااااااان
وحشتينى قوى قوى
ازيك يا حبيبتى انتى فين ؟؟

ميرسى يا مينو (دلع دا هاه) و عقبال ما ف مرة تكونى معانا و اشوفك بقى
ان شاء الله




ســهــر
--------
معلش يا سهر
المرة الجاية
و الله نيفى جابت سيرتك كتير و بالخير و قالت ان كان نفسك تيجى و مقصرتش و كأنك كنتى معانا برضو كفاية سؤالك

ملحوقة يا ستى
الجايات اكتر بإذن الله

ميرسى قوى ع الجملة قبل الاخيرة
وش مكثوف خالث

بت خيخة و أى كلام
----------------

ليه بس يا خوخة كدا ؟؟
يا ساتر عليكى

اولاً
الهدية مش بسيطة دى غالية فى قيمتها مادياُ و معنوياً كمان
و لونها حلو جدا
و من زمان كنت عاوزة اشترى حاجة تايجر كدا بس كنت بتردد
و انتى انهيتى ترددى
و جبيتهالى و طلعت حلوة قوى
و هستخدمها علطول


بس من قبل ما اشوفها كنت برضو هاخدها و انا ممتنة


ثانياً
معقول كنت هكسف شريف واكسفك ؟؟
يا ست انتى احسنى الظن بيا شوية
بقى تجيلى هدية فى عيد الامهات
و من شريف بالذات
و اقوله لأ ؟؟؟



ثالثاُ
الحمدلله اليوم كان جميل
و اتمنى اى يوم يجمعنا سوا يكون كدا إن شاء الله و ربنا يباركلك فى شريف يا رب و يحرسه

رابعا
احنا خلاص يا خوخة هدينا
والحودايت البايخة كلها خلصت
و عدنا الى نقطة الود من تانى
و ان شاء الله لا نتخطى النقطة دى لحاجة وحشة تانى ابدا
ماشى ؟


العفوا يا خوختى
انا اللى شكراً ليكى جدا
و بوسيلى شريف بوسس كتير قوى

وحشتينى اوى اوى يا امى بجد
وبفرح اوى لما احس من نبرات كلامك انك مبسوطه ياربى تفضلى كده على طووووووووول
ويارب دايما تتجمعى فى كل الخير

اليوم كان حلو بوجودكم
وسعيده اوي اني اتعرفت عليكي
:)

اعجبني قولك ان الخير معدي فعلا هذا حقيقي ربي يهدينا جميع لما يحبه ويرضاه وويوقف في طريقنا اللي يدلنا على الخير ويساعدنا على عمله
تحياتي وودي لك

لا ما تقلقيش بس مشغول في 100 موضوع في الشغل و الدنيا فمش فاضي للنت اليومين دول و بأتابع بالعافية
:)

بنت قلبى
-------

انتى كمان يا رنا يا حبيبتى

عقبال ما مرة نجيلكم و اشوفك بقى
و اخدك فى حضنى يا حبيبتى
منحرمشى من سؤالك أبدا
و ربنا يفرح قلبك يا رب


esraa
-----

إنتى احلى يا إسراء ميت مرة
و انا اتشرفت بيكى يا فندم
و فرحت قوى بكلامك عن ماما
ربنا يباركلك فيها يا رب
قوليلها فاتيما بتقول لحضرتك كل سنة و انتى طيبة و بألف خير
متغبيش عن روح قلب ماما بقى
و تعالى دايماااااا
:)

احم
حاضر لازم اسأل طبعاً من عيني
بس أنا باعت ميل وريفريش ليه ومفيش حس ولا خبر !!
في مشكلة تكنولوجية أحلها ؟
وحلو البوست اللي كتبتيه عن الأم أوي على فكرة ..لدرجة إني مكسوف أعلق أقول فيه إيه ولا إيه
ربنا يديها الصحة ويخليكم لبعض وتعيشوا سوا في الجنة كمان :)

Dyiaa
-------

تسلملى عيونك يا ضيا

و افة الميل عندى بيخطرف و مش عارفة ماله

هوه و المدونة كمان
عادل و مهندس مصرى و خواطر شابة سابوا تعليقات و معرفش اختفت فين ؟؟

معلش

اشوفك دايما على خير
يا من الخير فى ركابه

كل سنة و امهاتنا كلهن بخير
و يعلى مقام كل من رحلن الى جنات نعيمه سبحانه و تعالى

إن شاء الله

ربنا يخليكى يارب يا اطيب واحن واكبر قلب
عاوزه ااقلك على سر
خدى ااقلك فى ودنك
(ماما بقت بتغير منك)
ايووووووووه بتغير منك
كل شويه اتكلم عليكى
ولما رجعت البيت والحمد لله بسلام
كان كل همى ادخل علشان اطمن عليكى انتى
وفى حاجه انا هعملها ليكى وقلت لماما عليها راحت قالت مين دىىىىىىىى
الا صدعتينى بيها
وبرضو مش مريحاها
بعاملها اكنها مراتى ابنى وانا حماتها
والله مطلعا عينها بيكى انتى
س اوعلا تقولى بس كده
انا قلت سر ومش عاوزه حد يعرفه من الناس الا هنا
لانى
بحبك

فاتيما نورتينا بجد انتى وكل اللى شرفونا
معلش تعليقى متاخر بس بجد اتمنى ان اليوم يتكرر اكتر من مرة ونتقابل على خير دايما

بنت قلبى
-------

كل سنة و انتى طيبة يا رنا
و ماما بألف خير يا رب

يا بنتى كلنا مناكفين فى امهاتنا دايما
دى سنة الحياة
نناكف فيهم
و نتعبهم
و هما كمان ميفهمنوش و يوجعونا

بس ف الآخر بنحبهم و يحبونا
و احنا اغلى ناس عندهم
و هما اغلى ناس عندنا
دا الحب اللى ربنا حاطه ف القلوب و محدش يقدر يزحزه مهما حصل
الزعل بيجى و يروح
و الزهق بييجى و يروح
و الغضب
و الألم
و المشاكل
و كله يروح

و يفضل الحب اللى بين الام و عيالها

انا كمان بحبك يا رنونتى
و ربنا يكرمك و يخفف همومك
و يسعد قلبك يا بنت قلبى






أهو ده عيبه
-----------
و لا يهمك يا داليا
انا قولت مش هتعلقى خالص
من اهم نتايج الزيارة الجميلة دى
انى شفتك و اطمنت عليكى
كنت هزعل قوى لو جيت و مشيت
و مشوفتكيش يا حبيبتى

فكرى ترجعى تانى بقى
بوسات و حضونات
يا حبيبتى و تؤامى

إرسال تعليق