.

.

الهايـــلة  

Posted by: فاتيما in ,


قريت مرة ايميل

بيحكى عن نظرة البنى آدم عموما لأبوه

بتبقى عاملة ازاى على مدار العمر


فى سن 6 سنين

هوه بابا ده ازاى عارف

كل حاجة و شاطر كدا؟


فى سن 12 سنة

هوه بابا ده ماله بيتدخل فى كل حاجة كدا ؟


فى سن 14 سنة

هوه بابا ده ماله منكد عليا عيشتى

ومورهوش غيرى كدا ؟


فى سن 18 سنة

هوه بابا ده مبيسفرش برا ليه عشان يمشى

من وشنا كدا ؟


فى سن العشرين

هوه بابا ده راجل رجعى و ليه

دايما عاوز يسيطر

على كل إختيارتى كدا ؟


فى سن التلاتين

هوه بابا ده ازاى طلع رأيه

فى حاجات كتير صح كدا ؟


سن الأربعين

و الله بابا ده راجل هايل

بس ظروفه معايا جت كدا


فى سن الخمسين

يا ريتنى حتى اعرف اعمل مع ولادى

نص ما بابا عمل كدا


فى سن الستين

هوه بابا ده ازاى كان شاطر

وعارف كل حاجة كدا ؟

!!!!!!!!!!!!!!!


الكلام دا بالملى ينطبق على الأمهات برضو

و رأى بناتهن فيهن

مش كل البنات طبعاااااااا

اقصد البنات المتمردات اللى زى حالاتى

اللى مكنش عاجبهم حاجة و هما بيكبروا

و بيعتبروا اى مصيبة تقابلهم سببها

ان بابا شديد شويتين

و ان ماما مكنتش فاضيلى قوى

و حجج عبيطة كتير

من شأنها التدوير على شماعة

يتعلق عليها الفشل و السلام

دونما النظر لأد ايه الست دى

اللى اسمها امى

كانت شايلة جبال هموم تقلها يكسر ضهر

اتخن تخين و ساكتة



و انى انا شخصيا لما كبرت و بقيت قدها

و اول ما ابتديت بس حياتى

و قابلتنى مشكلة لقتنى بغرق فى شبر مية

و مش عارفة اصلح حياتى

و لا اعدلها ربع ... حتى ما كانت هيا بتعمل



و صحيح الواحد مش لازم يمر بالمآسى

عشان يحس بتعب اصحابها

بس للأسف دى طبيعة انسانية انانية صرفة

محدش بيحس بمعاناة غيره

الا لما يصهره الألم هوه راخر

و اللى ايده فى المية و لا بيحس بحاجة غالبا

و دا كان حالى زمااااااان




كنت فاكرة زمان ان ماما دى انسانة خانعة

ضعيفة مقهورة

و شوفوا بقى الإفترا

كل دا و بمزاجها

مش غصب عنها مثلا و لا حاجة

و لو هيا عاوزة تنتفض و تاخد حقها

و تهد الدنيا

واى نوت ؟؟



وقفت كتير اناطحها و اتعامل معاها

كأننا ضراير مش بنت و امها

خصوصا فترة المراهقة

حملتها كتير من النكد الملازم للفترة دى

بكل تمردها و عنفوانها و انفعالاتها

و كنت بفكر فى نفسى

و بس



لحد ما كبرت شوية و دخلت الجامعة

نظرتى للحياة اتغيرت كتير

لأنها حقيقى كانت من اجمل فترات عمرى

و اقلها ضرراً و مشاكل

ثقتى فى نفسى و خوفى من اللى حواليا قل

فبقيت اكثر هدوءاً و تقبلاً للآخرين

و اولهم اهلى

و طبعا ماما اولهم

و ضربت معاها صحوبية كبيرة فى الفترة دى




لكن تأتى الرياح بقى

لما مريت بتجربة جوازى من اولها

ولحد يوم الفرح

ماما كانت مش موافقة خالص و معترضة

و فجأة الصحوبية اللى كانت ما بينا

تعرضت لمحنة شديدة



لكن سبحان الله قلب الام

اللى قادر يخليك تتفأجى

خلى الست دى بعد كتب كتابى بساعة

بقت حد تانى خالص

بتحب جوزى و تعامله كأنه ابنها

و تقربنى منها اكتر من الاول

و تعتبر الجوازة دى امر مش بس واقع

لأ دى حياة كاملة لازم تدعمها بكل الطرق

و الوسايل عشان تنجح

و حظى يبقى احسن من حظها و افرح




لما بقيت حامل روحت قعدت مع ماما

قربنا من بعض اكتر و اكتر

و نظرتى اتغيرت اكتر و اكتر

و لما اول مرة جابولى يوسف عشان ارضعه

ماما مكنتش معايا

حسيت انى مش عارفة اعمل حاجة

رغم ان الممرضة قعدت تنصحنى و تساعدنى

لكن لقتنى بعيط و بقول زى العيال

انا عاوزة ماما

و كأنى لسه طفلة واقفة لوحدها فى حتة غريبة

ومتعرفش حد خالص



لما جوازى بدأ ياخد منحنى آل كابونى

بابا كان راقد فى السرير مشلول

بسبب جلطة ف المخ

كانت امى بتشيل و تحط و تمرض و تراعى

و تتحمل مسئولية المريض و البيت كله

و مع ذلك لما ابتدت مشاكلى القانونية

كانت ست بألف راجل

و خاضت الحرب معايا

و بالنيابة عنى كمان لما خدت فى وشى

و طفشت انا و يوسف سنين طويلة

كانت هيا قاعدة فى البيت يوميا

تستقبل المحضرين و الناس

اللى جاية من المحاكم و الأقسام و المحامين

و بتوع التنفيذ و امة لا اله الا الله

اللى من شأنها تعذيبنا لوجه الله و خلاص

و فى نفس الوقت تاخد بالها من بابا

و اخويا اللى ف ثانوى و داخل على جامعة

و تواجه تهديدات بأذيته لمجرد انه اخويا و بس


و جنب كل ده

كانت كمان مكتوب عليها

تقلق عليا و على شئونى

و انا قاعدة فى مكان تانى معرضة للخطر

كل يوم انا و ابنى

و مطالبة انها تكون القلب النابض

اللى لو توقف لحظة

كلنا نموت و ندبل و نحتاس ميت حوسة

و نقع فى الف مطب

كنا بنمر بمواقف زفت كتير

و يخذلنا ناس كتير

و نشوفها متماسكة

فإحنا كمان نتماسك و نقول معاها يا رب



كانت دايما تردد مثل كانت بتقوله ستى

الله يرحمها

لما تلاقينى بعيط وحاجة هزتنى جامد

على باب اوضتى ..توقف و تقولى

نامى و بكرة تتعدل

تبات نار

تصبح رماد


لما بقعد ابص على رحلة ماما فى الحياة

بتخض قوى

الست دى من اول ما اتجوزت بابا من 40 سنة

و هيا فى محن متصلة لا تنقطع

سواء عاطفيا او انسانياً

و اقول سبحان من صبرها



ساعات كتير ضميرى يوجعنى قوى لأنى خذلتها

و مكنتش البنت اللى تتمناها

و تتباهى بيها وسط الناس

يمكن لأنى بحس انى مقدرتش ارد على حبها

بالشكل اللى يسعدها و يريحها و يرضيها

انها تحس ان بنتها زوجة و ام عايشة حياة طبيعية

و رغم ان كلمة طبيعية دى

مسألة نسبية

(على الأقل شيفاها كدا حاليا)

لكن ماما فى النهاية ست مصرية صميمة

عندها البنات تتجوز و تروح بيوتها

و تخلف و تعيش و تجيى لأمهاتها فى المناسبات

مش النظام اللى انا فيه ده

و يمكن احباطها نابع اكيدمن حبها الشديد ليا

و انها حاسة انى كنت استاهل حياة احسن

بس انا اللى خيبتى كانت تقيلة

بكام كيلو زيادة

عن الوزن المسموح به



ماما طول عمرها كانت بتقوم بالمشواير

نيابة عن بابا

لأن طبيعة شغله كانت بتخليه دايما غايب عن البيت

فهيا اللى كانت بتمشى البيت من الالف للياء

تدبير ميزانية و شرا الطلبات و مشاوير الدكاترة

و رعايتنا طفلين متعلقين فى رقابتها

و كل صغيرة و كبيرة عشان الحياة تمشى

و لا تسمعها يوم بتشتكى

و لا تقول تعبت

و لسه لحد النهاردة بتحاول تشيل عننا الهم

و تفكرلى انا و اخواتى

و تخلص لنا المصالح من غير ما نطلب

و لا بنلحق نفكر اصلاً

لأنها بتكون

فكرت فيها مسبقاً




و قوتها اللى كانت زمان بتضايقنى قوى

و بحسها جفاء و شدة

دلوقتى بشوفها مصدر حنان و صيغة من صيغ الحب

بس الواحد اللى كانت نظرته ضيقة قوى

و مكنش شايف كويس




انا بعترف ان ماما فجأتنى

لما قولت عاوزة اطلق

بعد اصرارى على الجواز من ابو يوسف

كنت فاكرة ان محدش هيقف جنبى وقتها

و هيقولولى دا اختيارك .. و اشربى بقى

لكن فوجئت بماما بتوقف بشجاعة

فى وش طوفان من السفالات و المشاكل

و حاجات متجيش على بالكوا بدءاً

من شتايم فى التليفونات ليل نهار

لحد التهديد بركوب البوكس فى ليلة من ليالى

فسحنا فى الأقسام و النيابات

و ما اكثرها

لما الدنيا غمقت

كان ممكن تتراجع

لكن هيا قالتلى

مش هسيبك لواحد ندل زى دا يخلص عليكى

انتى مش زيى عشان تستحملى

على جثتى يطولك المخلوق دا

و انا عايشة


شقة جوازها ضاعت بسببى

و فلوسنا كلها تقريبا غير استنزاف الأعصاب

و راحة البال و الصحة اللى راحت

على مدار عشر سنين فاتت

و مع ذلك قاعدة بتفكر فى بكرة

و ازاى ترتبلى ورق المعاش

عشان لو جرالها حاجة

(ربنا يطول فى عمرها)

محتجش لأخواتى

و امد إيدى لحد لو سبت شغلى

و بقيت على فيض الكريم لأى سبب




زمان كنت بقول بهبل

مش عاوزة ابقى زيها أبداااااا

مش عاوزة اكون قوية كدا و لا ناشفة

و لا بخبى مشاعرى

مش عاوزة اكون زوجة مقهورة

و لا اضيع عمرى و لا و لا و لا


دلوقتى لما بقارن بينى و بينها

بقول يا ريتنى كنت ربعها

و يا ريتنى كنت عملت ليوسف

نص اللى ماما عملته عشانا

طب على الأقل و احنا اطفال صغيرين

بلاش لما كبرنا حتى

عشان دى قصة اخرى

مليانة فصول كتير اعجز عن وصفها




انا خدت من ماما العند و الدماغ الناشفة

الأصرار على الحاجة او الشخص

و بالتالى الاخلاص ليها و ليه مهما حصل


خدت من ماما

المعاملة الكويسة مع الناس

الحاجة ام فاتيما لو حبت تترشح لمجلس الشعب

تاخد المقعد بإكتساح و اغلبية ساحقة

لأن محدش عرفها و اتعامل معاها

على كافة المستويات الا و حبها و احترمها



خدت من ماما

انى ابقى زوجة صح

يعنى عمرى ما شفتها بتبص على اى واحدة

صاحبتها او قريبتها او جارتها

و تقول عاوزة ابقى زيها و لا عمرى شفتها

بتطلب من بابا اى طلبات ليها

كانت و ما زالت

ست قنوعة و مش متطلبة

و يمكن دا السبب انى لما تجوزت لحد ما انفصلت

عن جوزى مطلبتش منه مليم

لأنى بتكسف اطلب و معرفش أطلب

لأنى مشوفتش ماما بتطلب من بابا اى حاجة

ليها

بتطلب لينا و بس



خدت من ماما انى ارضى بحالى و نصيبى

و مبصش على غيرى و اقول اشمعنى فلانة

كان حظها احسن

و جوزها الطف و ولادها انجح و كدا

عمرى ما شوفتها بتتطفل على حياة الآخرين

و تحسدهم و تقول نفسى ابقى زيهم



خدت من ماما حبى للأكسسورات الفالصو

و الالوان المبهجة فى اللبس و المكياج

و ان الست لازم تاخد بالها من شكلها نوعا ما



خدت من ماما عدم ولعها بالدهب

و شراه بيبقى

عشان يتباع بعد كدا

فى وقت زنقة

غير مأسوف عليه و مش اكتر




خدت من ماما

ان حبى لغيرى يكون

فى تفاصيل خافتة

زى انى اشوف بيحب ايه

و اجيبه من غير ما يطلب

و منتظرش مقابل ذلك



خدت من ماما ثبات الأعصاب فى المواقف الصعبة

يعنى فى حالات الموت و الحوادث

و المصايب و ما شابه

تلاقينى واقفة ببرود و متماسكة جدا

بينما ممكن مواقف عبيطة تانية تلاقي ايدى بتترعش

من الأرتباك و الخضة بينما ماما اعصابها ثابتة

علطول فى كل المواقف



خدت من ماما

ازاى مكونش عبء على حد بحبه

لأنها طول عمرها ست مستقلة

و علمتنا كمان نحاول نكون مستقلين

و منشيلش حد همنا



خدت من ماما بشكل غير مباشر ازاى اكون ام

لما ماجد اخويا اتولد و كان عندى 13 سنة

و اتحملت معاها مسئوليته دون اكراه

و دا اللى خلانى لما قعدت مع يوسف لوحدى

مكنتش حاسة بأى ضغط

و حسيت انى أم للمرة التانية

و الحكاية عادى



خدت من ماما حبى للتغير و نقل قطع الأثاث

من مطرح للتانى كل كام يوم كدا

دون يرف لى جفن

ساعات اقولها احنا عاوزين نركب عجل

للعفش من تحت يا ست انتى

عشان يبقى أسهل فى الحركة

احنا ممكن تطق فى دماغنا الساعة تلاتة الفجر

اننا ننقل نيش السفرة بكل محتوياته من صينى و كوبايات

من الحيطة دى ... للحيطة دى

و بعدين ننام و نصحى نعمل

زى عم ايوب فى الجوكر

نبص لبعض .... و نقو ل

لأااااااا

.... أصل الكرسى دا مش مريحنى

النيش كان شكله الأول كان احسن

طلب يلا نرجعه مكانه

فنروح ناقلينه من الحيطة دى للحيطة دى

عادى خالص و لا كأن فيه حاجة

و ماجد يعدى يلاقى النيش كان امبارح

فى حتة و الصبح ف حتة

يضرب كف بكف و يبصلنا و يبص لفوق

و يقول ... منه له


اللى مخدوتش للأسف

عن ماما


ذكائها و قدرتها على الخروج

من المواقف الصعبة بأقل الخساير

مخدتش من ماما طولة بالها

لأنى لما مريت بنص اللى هيا مرت بيه

قولت جاااااااااى و كنت فكرانى هصبر

و آت بما لم يأت به الاوائل و كدا



مخدتش من ماما نشاطها خالص

انا كسولة جداااا

و هيا ما شاء الله عندها قدرة و امكانية

انها تعمل خمسين مشوار ف اليوم

و لا تقولش حاجة و لا تطلب من حد مساعدة



مخدتش من ماما شطارتها كست بيت

و لأنها شطورة جدا

فمبلحقش اصلا اعمل حاجة

و بصحى من النوم الاقيها عاملة كل شىء

و مخلصة شغل البيت

و السؤال التاريخي وقتها يفرض نفسه

ليه يا ماما كدا ؟

فترد الرد التاريخى

و انا لسه هستناكى ؟؟!!

انتى اللى يعتمد عليكى

لا يصبح

و لا يربح

و بناء علي ما سبق

ابتكرت مثل من اختراعى

يتقال فى هذوها المواقف


  • الهايلة .. تخلف مايلة


طبعا معروف مين المايلة

و نلم نفسينا و نمنع الضحك



مخدتش من ماما عادة الصحيان بدرى

و فى نومى معرفش ابويا

طول عمرها تقولى

انتى ممكن ينقتل جنبك قتيل و لا تحسى

و نروح بعيد ليه ما هى ساعات بتنقل عفش

و تعدى بيه من فوقى و انا نايمة و لا الهوااااااااا

اصحى من النوم اتمطع فى وداعة

و اضرب بعينى كدا

الاقى الدولاب البلاكار

مش موجود

و السرير اللى جنبى مفكوك

و لا حسيت اصلا بحاجة

عادى قولنا



مخدتش من ماما دقة الملاحظة و الوعاية

لأنها ما شاء الله عينها فاحصة و تلقط العيوب

بينما انا ف التوهان

و لسه من يومين بسألها بكل براءة

يا مامااااا فين حتة الموكيت اللى لونها بمبى

فقالتلى مانتى واقفة عليها أهو

!!!!


ما قلت امنعو الضحك ..هخرجكوا برا

هنقلبها كوميدى و لا إيه؟؟

لااااااا

دنتوا خدتوا عليا قوى




الخلاصة انى خدت من ماما

احسن ما فيا


و مخدتش للأسف حاجات تانية حلوة


و عاوزة اقول انى من و انا عيلة

كنت فاكرة ان ربنا مش بيحبنى

لأنى مريت بشوية مقالب فى حياتى

على فترات متقطعة كانت كفيلة بإفقادى الثقة

فى أى حاجة فى كل حاجة

و منكرش انى مريت بلحظات رهيبة

الشيطان لعب فى دماغى و قلبى

و اقنعنى جدا

ان ربنا طردنى من رحمته من بدرى بدرى

و انه مبيحبنيش


لكن بصراحة اللى عنده أم زى أمى

يبقى غبى قوووووووى و بيستهببببببل

لو مخدش باله و فهم

ان ربنا بيحبه فوق ما يتخيل



ساعات بتخلينى بأم تانية غير ماما

يا لهوتينى

كان زمانى حد ما يعلم بيه الا ربنا

و هوه صحيح ما يعلم بيا الا ربنا برضو

بس الحمدلله انا فى نعم كتيييييييير قوى

لا احصيها

و اولهم ان الست دى تبقى ماماتى


و لما زمان فى المجلس الحسبى

اتقدمت شكوى ضد ماما

انها مبتاخدش بالها من بابا و بتاع

و روحنا كلنا نشهد فى موقف اقل ما يوصف بيه

انه مهين جداااااا لماما و لينا

إننا نكون محل مساءلة و قانونية

بسبب شكوى

من حد غريب ناقم و غرضه مكشوف

لكن خلاص الشكوى حصلت و لازم تنظر

وكيل النيابة و هوه بيسألنى

والدتك يا ترى يا هل ترى

كويسة مع باباكى

و لا عندك اى ملاحظات ؟؟



بصيتله بإبتسامة معرفش جت منين ساعتها

و الواحد مكنلوش نفس بيتسم

و قولتله



يا فندم ابويا اكتر حاجة عملها صح

فى حياااااته

و هنفضل نشكره عليها

و ندعيله بسببها حتى بعد ما يموت

هيا

انه اختار الست دى و اتجوزها

و خلاها امنا

--------------------------------------------

كل سنة و انتى طيبة يا ماما

و بحبك فوق الوصف و الكلام

بنتك اللى اتوكستى بيهاااااااااااااا

و برضو بتحبيها

و هيا عايشة ف الدنيا دى بلطجة عشان

بتتدلع على حسك

------------- امل -------------



الدور عليكم

كل واحد فيكم يعترف و يقر

خد ايه من ست الحبايب

و مخدشى ايه و كان نفسه



كل سنة و انا أمك يا حبيبى

كل سنة و عيالى حبايبى بخير

بسكوتة و عادل

كل سنة و امهات التدوين بخير

و كل امهاتنا كلنا بخير

و يعوض كل محروم من الأم

بمن تغدق عليه بحنانها

حماة و لا خالة و لا عمة

و لا جارة و لا مدرسة

و لا مديرة

و لا اخت كبيرة

و لا زوجة

و لا خطيبة و لا حبيبة




بوستات امومية صديقة

-----------------------------

حاسبوا و انتوا بتحضنوهم .. ستيتة حسب الله الحمش

كل سنة وانا وانتوا هما طيبين ... صيدلانية طالعة نازلة

This entry was posted on الثلاثاء, مارس 16, 2010 and is filed under , . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

كل سنة
و انتى طيبة
يا ماماااااااااا


كل سنة
و انا بنتك امل
او ميمى
زى ما كنتى بتدلعينى زمااااااان
فاكرة ؟


ربنا يخليكى ليا
و لماجد
و لهانى
و لأحفادك التلاتة



و الأحفاد اللى جايين ف السكة
ان شاء الله

آه
محنا لازم نجوز الواد دا
يعنى لازم نجوزه


كله لازم يشرب من الكاس
محدش يفلفص
عقبال ما تشيلى عياله
عن قريب
و احفادك يكتروا
و يكبروا
و تشوفى معانا
كل افراحهم
يا رب



و عقبال ما تجوزى يوسف
و تحضرى فرحه
نفسى انا و انتى
نشوف اليوم دا سوا

و تقعدى جنبى على اقرب ترابيزة للكوشة و نقعد ننم سوا
ع المعازيم نفر نفر بقى
و ننقى رز على رأى سوتيتة
و نضحك ضوحك للصبح


ربنا يديكى الصحة يا رب
و تفضلى مستحملانى


فاكرة لما قولنا
هنرفع قضية الطلاق
ساعتها بصتيلى
و عينك دمعت كدا و صوعب عليكى بنتك
قولتلك جرى ايه يا لالا
انا مش قولتلك
مش هتأخر يا حورية
و بعدين انا اول واحدة ف العيلة
يعنى هبقى من الرواد والطلائع
و عليا الطلائع لأتطلق بقى
و قعدنا نضحك
هههههههه



ياااااااه يا ماما
دحنا شوفنا كتير قوى
ايه اللى كنا فيه
و بقينا فيه دا ؟!!

الف مليون حمد و شكر على كل حاجة
و على وجودك معايا
و حياة يوسف عندى ما كنت هصمد فى العشر سنين دول يوم واحد لولاكى جنبى
ربنا يحفظك و يديكى الصحة


يا ماما ربنا يخليكى ليا
و مش متخيلة
حياتى من غيرك



و صحيح انتى طول الوقت
تعلمينا
نشد حيلنا
و نرتب امورنا كدا
و نبقى اقويا زيك



بس انتى
يا ماما


مفيش زيك




مهما حاولت
و يا ريت ابقى نصك
و لا ربعك حتى

و لو انا ام كويسة
يبقى انتى السبب
اول و آخر واحدة



كل سنة و انا بنتك
اللى بتحبك قوى
قوى
قوى

كل سنة و تيتة طيبة :)
وكل سنة و انتي طيبة مقدما

بس انت برضه بيني و بينك هاقولهالك بقي :)

انا بقي خدت ايه من امي ؟؟
العصبية و نشفان الجماغ
و من ابويا برضه لانهم الاتنين كده فاكديد مش هاطلع بارد للتلاجة

وبس
كده كفاية بتدمير مستقبل اي فرد :)

:-))
كل سنة و ام فاتيما و هانى و ماجد و يوسف كمان
طيبة :-)

و سعى كده ده ليها مش ليكى

:-**********************************

:-XXXXXXXXXXXXXXXXXXXXXXXXXXXXXXXXXX

رجعالك ثانى
دا انا مش سايبك الليلة ديه :-))

اه ديه ليكى
:-))))))))))))))))))))))))))))))))))))))))))))))))))))))))

قال امنعوا الضحك

اولا

ده بمناسبة عيد ميلادها و بتسبقى بعيد الام؟؟
لو عيد ميلادها
يبقى فى عيد الام عايزن بوست منها هى تحكلنا عنك :-))))))

تعرفى اصعب حاجة اتكلم عن الست الوالدة
دا يوم عيد ميلادها معرفتش اقول ايه
فنزلتلها الاغنية و سمعتهالها
و ضحكت لما عرفتها

الست الوالدة ديه صعب احطها فى كلمات
فى بوست واحد ديه عايزة 100 و انت عارفى ده يعنى شهر امى و بس :-))

ربنا يخليهالكم و ميحرمكيش منها ابدا

بس الجملة الى كتبتيها جامدة قوى
"انتى مش زيى عشان تستحملى"

فعلا هما طول عمرههم يعلموا نقف ازى فى وش الدنيا و نقاتل ازى و يوم ما فعلا الدنيا تقف فى وشنا تلاقيهم سحبوا وراء ظهروهم :-)) و خليك بعيد انت بس و سيبينى انا للدنيا ديه

و بعدين هى هايلة
انت بقى مايلة ليه بس
فكرة نفس برج بيزا المائل :-)
فطوم مفيش انسان مايل ،
الجماد هو الى ممكن يميل
انما الحى هو الى بيعيش فى كل الزوايا و الاسطح و المنحدرات

خليها تقراء البوست ، ده لو فضتلك اصلا من شغل البيت :-))

عقبال ما نقرأ بوست عنك من يوسف
و يقعد يمدحك كده :-))) علنا بلانا

علي فكرة انا كنت اول تعليق :(:(
والبتاع ده ضيع تعليقي :S:S:S

كل سنة و تيتة طيبة :)
وكل سنة و انتي طيبة يا امي
يا اجمل و احلي و اطيب ام في الدنيا كلها اشاسا اشاسا يعني

ربنا يخليكي لعيالك :) (جو و بساكيتو و انا) :):)

اما خدت ايه ؟؟؟
ممممممممممممممممممممممممم
خدت علي قفايا ... جامد يعني :):)
هههههههههه

كل سنة وإنت وكل الأمهات طيبيين
البوست حلو قوى
كلنا بنشوف أمنا أحسن أم وأبونا أحسن أب.. فاكرة فى فيلم مافيا الحوار بين حسين فهمى وأحمد السقا
حسين فهمى: إنت بتحب أمك؟
السقا: أكيد
حسين: بتحبها ليه؟
السقا: عشان.. عشان.. عشان دى أمى
حسين: يعنى مش عشان أجمل ست فى الدنيا ولا عشان أشيك ست فى الدنيا...
المقصود من الحوار إن الواحد بيحب أمه علشان دى أمه وبيحب أبوه علشان ده أبوه وبيحب بلده علشان دى بلده وماينفعش نتخيل نفسنا عندنا أم تانية وأب تانى
نفس الموضوع بينطيق على الأبناء يعنى حضرتك بتحبى يوسف علشان هو يوسف لو كان أبيض من كده شوية وأحلى شوية أو كان أوحش شويتين كنت حتحبيه نفس الحب
إحنا بنحب ولادنا علشان ولادنا مش علشان أذكى ولاد ولا أحسن ولاد ولا أحلى ولاد ولو كانوا طلعوا غير كده كنا حنحبهم نفس الحب.


ربنا يخليلك مامتك ويباركلك فيها ويخليلك يوسف ويرجعهولك بالسلامة

كل سنة وانتى طيبة
ووالدتك ويوسف
وكل الناس الحلوين اللى فى حياتك
دلوقتى بس عرفت انتى جايبة الحنية والطيبة اللى فيكى دى منين

انتى مامتك دى حد جميل اوى
و من حقها بقا انها تخاف عليكى انتى
عارفة الدنيا مبقاش فيها اى امان


انا بقا ياستى اخدت من ماما
انى اقدم الخير وافترض ان الناس اللى بتعامل معاهم بيحبونى بجد
مع ان كتير بيطلع مش صح من برة شئ ومن جوة شئ تانى خاااااااااالص
وانا اللى بتعب فى الاخر

ومخدتش منها بقا انى اتحمل حاجات فوق طاقتى واسكت بردو واستحمل واعدى عشان المركب تمشى زى مبتقول
انا مبستحملش لسانى بيوجعنى لو سكت :)

بس انا استمتعت بالبوست دة وانا بقراه هروح اقراه تانى
انا حبيت مامتك من كلامك عليها اوى

ربنا يخليهالك بقا

ويكتبلك الفرح فى الجاى يارب

وبوسة كابيرة ليكى وزيها لمامتك

كل سنه وحضرتك ام حضرتك وام حضرتى كمان وكل الامهات بصحه وخير وسعات
وراضين عن ولادهم
وولاددهم اكثر برا ورافه بهم


بوست جميل اوى كالعاده


تحياتى

ايه ده انا عملتلك احتلال
:-))

معلش بقى اصلى لقيت عندك دفى فمصدقت :-))
هاتلى مخدة :-))

صباح يعنى ايه راجل
ربنا ينصره :-)) ايوه كده
ويارب الظابط يلحق يعقل و يفكر فى البلاد قبل ما هو يشوف الوش الثانى منها :-( اصلها بتقلب عليهم هما كمان مش احنا بس

صباح قناديل النور
لا بلدنا بقيت الناس تنام من غير عشاء
و يارت منوصلش لمرحلة الموت جوعا :-(

صباح الأسوانيات
القصة بلاغية قوى فى قرصتها :-)

صباح البلاغات
ان الشعب يطالب بالافراج عنه بقى لاننا زهقنا :-(((
فكرتينى بحاجة اكتبها فى بوست عندى
"انا زهقت كل حاجة واندا واندا :-)"

صباح الإستكراد
يسلام على الضحكة :-) حساه بيضحك علينا :-)) و الله فينا الخير شعب بيضحك :-))

صباح السنارات
لا و انت الصادقة دول نفسهم يقولوا و اشمعنا احنا ؟؟ احنا فين ؟؟

صباح الأسئلة الصح و ف مكانها
ابلغ جملة
الوالدة باشا ياما بتقولهالى مفيش حاجة ببلاش فى الكون ده يا واندا
كله ليه ثمن حتدفع حتدفع :-))

صباح رجال مصر اللى بجد
حيطلوعوله دفاتر الذل :-(((
ربنا يعينه و يثبته :-(( ساعتها

صباح الخيابة
:-))))هو مواطن عادى فى جمهورية نفسه :-))) مش جمهورية مصر العربية :-(

صباح الندوات
بكرة يقبضوا عليه او يرفعوا عليه قضية تحريض على سرقة الكتب :-)))))

صباح الرومانتيكية
فاكر فيه امل
وماله انا بضم صوتى و الله لو عملتها و لغيت المادة ديه ححبك و ححكى للى جاين و يسالونى عنك و حقولهم كان راجل طيب و ختمها بمسك و عنبر

صباح الطاهريات
و الله فكرة لو حصلت مصيبة لاطلب سندوتش و اوصى الدليفرى يرمى خبر على شاويش الى واقف على باب القسم قبل ما يجى و يبقى يحاسب المحرامى او المجرم :-((

صباح القوايم اللى تزنق
:-((( مابلاش
ساعتها حنكتشف اننا بنتسرق من اقرب الناس لينا :-( و نموت بالصدمة

صباح الأشعار
:-))))) لو حب حقيقى يبقى درن مش سلا
و ده مبيطلعش بيفضل كامن جوه مستنى لحظة ضعف

صباح الأغانى و الدندنات
لا نسيت النوم :-)
هاتى المخدة انا حنام و اسهرى انت برحتك (اخبار القمر عندك ايه ؟؟ عندى مش باين :-))))

من أجمل وأرق البوستس اللي قريتها في المناسبة الجميلة دي .. كل سنة والوالدة العظيمة دي طيبة وبالف صحة وسلامة وربنا يخليها ليكي دايما

وفي نفس الوقت ما أقدرش أنكر اني ضحكت على كل المواقف بتاعة الغيبوبة اللي انتي حكيتيها عليكي دي .. مش هأخبي عليكي يعني

:-)

ان شاء الله تبقى احسن وساعتها تقولي ان الهايلة تخلف هايلة ان شاء الله

طب اعلق اقول ايه

اقول اني اول مرة ألاحظ ان بيننا بلاوي التشابه ده كله

اول مرة ألاقينا فينا شيء من بعض

1- لسه بقول لماما من شهر
زمان - مش زمان قوي - كنت فاكرة يا ماما اني اجمد منك
كنت فاكراني البت هركيوليز قاهر الظروف
لما كبرت شويتين تلاتة وربنا نور عقلي الضلم
صعقت بأنك يا أمي قوة جبارة تحت غطاء ناعم رقيق اللي يشوفه يفتكره محتاس ومبيعرفش يعمل حاجة

والله يا فاتيما ما ببالغ ولا بتكلم لمجرد الحب

امي قوة جبااااااااااااااااارة بلا صوت
وانا صوت او تقدري تقولي هيش على مفيش

2- قصة ان انا وهي في مراحل كتير كنا ناقر ونقير
وفي مراحل تاني بوزنا طول اليوم والليل في بوز بعض ولوك لوك على اخره

البوست جميل لدرجة انه كفاية عليا اتمتع بالمشاعر الصادقة اللي فيه



ملحوسة على غاااااااااااااااااية من الأهمية

انا كان مفروض ها اتقدم ليكم بطلب من ساعة ما كتبت بوست صافيناز وانتي علقتي

بس نسيت خاااااااااالص

يا ست ميمي :) حلوة ميمي
بس انا واخده على فافي بقى

انا طالبة القرب من الأخ المستقل اللي مكبر دماغه ماجد للولية مانوسة المستقلة اللي مكبرة دماغها

والنبي الاهي يسعدك خلصي لي الصفقة دي

اولا علشان عفرتو عاوز يستقل بالشقة ومانوسة تطلع من دماغه لحسن تعبوني قوي من النقار والشجار

ثانيا لأنها حاطة شرط منيل انها استحالة تتجوز واحد ابن امه او من بتوع والنبي هاتي لي مية وانتي جاية من المطبخ
او انتي طابخة ايه النهاردة يا حبيبتي
نجرسكو
ايه ده كل يوم ملوخية :)

كل سنة وانتي طيبة
وماما طيبة
ويوسف طيب وبحفظ من الرحمن الرحيم
وبساكيتو طيبة
ودولا طيب
وربنا يخلي لك ولادك التلاتة ويزيد ويبارك :))))))))

بحبك

احنا مابنعرفش قيمه اماهتنا إلا لما نتجوز ونخلف ولما كمان بنتحرم منهم انا ماعرفتش قيمه ابويا إلا لما مات وبدأت كل الدنيا تخبط في وشي واقرب الناس ليا يعضو فيا حسيت وقتها انى بجد خسرت خسرت جامد قوي وانى فقدت الحائط القوي اللي كنت مسنود عليه
ربنا يبارك لنا في كل اهلنا امهات واباء وكل سنه وهما طيبين وبخير وربنا يطمنك على ابنك يا فاتيما وتفرحي وتتشرفي بيه

لحد ما اخلص عياط بس لو سمحتى

امل مين لا مؤاخذة؟؟؟؟؟

كل سنة وانتى طيبة يا فاتيما بقلبك الحنون وقبلك طبعا مامة فاتيما وربنا يفرح قلوبكم يارب

نيجى بقى لسؤالك الذيذ

أنا أخدت من ماما الطيبة بس المفرطة أنا وصلت لدرجة طيبة بهبل

أخدت منها الهدؤ بس بردوا بافراط

حسها المرهف بس بزيادة
مزوداها أنا أوى مش عارفة ليه

مش أخدت بقى للأسف الصبر وقوة إيمانها ما شاء الله عليه

ولا أخدت إجتماعيتها مع الناس بخاف موووت من إنى أتعامل مع الناس علشان ممكن مش يحبونى

بس كده

. . . . . . . . . . . . .

مش قولت لك هرجع تانى شوفتى أدينى مقدرتش أبعد رجعت بشكل جديد واسم جديد ومكان جديد وكنت جاية أقولك لقيت أخر بوست مش بيتعلق فيه للأسف

بس المهم إنى رجعت صح

وحشتييييييييييييينى كتيييييييييييييير

بوسة كبيييييييييييرة وحضن


Joudy

كل سنة وأنت طيبة كل سنة وأنت أم

:)))))))

وكل سنة وكل أمهاتنا بخير وصحة وسعادة إن شاء الله


ربنا يا رب يبارك في أمهاتنا جميعاً ويقدرنا على رد جزء من اللي عملوه وبيعملوه عشاننا .. ويرحمهم ويحفظهم من كل سؤ . اللهم آمين

السلام عليكم

ربنا ما يحرمكوش من بعض .. ويبارك لك في امك ويمتعها بالصحة والعافية والعمر المديد .. وكل عام وانتم جميعا بخير ..

بس احنا مش ممكن نكتب اللي كتبتيه وبتقولي مايلة دا احنا الي مايلين ..

فقط ما استطيع ان اقوله هو الترحم على امي التي توفيت في نفس الشهر الذي يحتفلون فيه بعيد الام .. رحمها الله رحمة واسعة واسكنها الجنة ..

تحيتي وسلامي

كل سنة ووالدتك بالف صحة و سلامه ربنا يخليكوا لبعض
فعلا عديتوا بمواقف صعبه كتير مع بعض بس اكيد الذكريات هي الي بتتبقي في الاخر

تحياتي

صباااااااح الخير
وش بيغمز

First : To Your Mom ...I would Say Thanks for giving me this wonderful Fatima...Thanks for supporting her to be that tender friend...that most loving mum and that wonderful personality. Happy Mother's Day to you

Second : For you I would say
Bless you for me Mamma

I love you
Te quiero mucho mamma

As for the post...It is so telling
it touched my heart , provoked my tears and took me away till those old days when I was a little kid...to remember all these things through which mammy went to make the person who I am now. she took so many burdens only to keep us save and happy
Words are not enough to tell how much I love her...How much I appreciate all what she did...How much I want to thank her...All what I would say
Bless you mammy ...Without you here by my side I can't go through this life
..........
Features I took from mammy

Being oversensitive
Tears flow like waterfalls

Being honest in all aspects of life
thinking always about the impact she is leaving on others.

Being independent...She seems to be so fragile and tender , yet she is able to take the responsibilities without a single complaint

-------------------------
Things I love about mammy

Being so elegant...she knows how a lady should take care of herself

Being Strong...When at times of troubles she might cry ... she might feel pain , yet when facing others she pretends to be fine and nothing is going wrong. unlike me ... when I am facing a trouble...I collapse


Being reserved in talking about her life. Events which we as a family go through are always private and we should keep them for ourselves ...never to tell about them.
For me ...I some times need to talk ...Sometimes I am not able to face it all alone

Being generous...she is always thinking about other...she saves no effort to help others...she motivates us all the time to give

Being cheerful...in spite of all the distresses...when at times of fun ...she is able to enjoy her time ...she knows how to be happy ...forgetting about the pain drawing a sweet smile...when I am depressed , she tells me ...do something funny and enjoy your time, distress is always here so lets have a break, let's take few happy moments

And more ...I think this is enough for that comment...I wrote so much & millions of comments will not be enough for describing mammy
or for expressing the love I have for her in my heart.

As for you
Mammy Fatime
I do love you as loving you is the best I can do.
your Baskouta

شكلك نمت فى حضن مامة فاتيما امبارح

طيب :-) مش حنقر
ربنا يخلكم لبعض
و يالله قومى اقلبى الصالون

و خذى دول فرقيهم على البيت كله
:-******************************
:-XXXXXXXXXXXXXXXXXXXXXXXXXXXXXXXXXX

للاسف اول مره اجى هنا مدونه من اجمل مايكون فيها كميه حب وحزن ومشاعر كتير ملخبطه فى بعض بس حلوة اوى
مش لقيه تعليق اكتبه على بوستك الجميل
انا فعلا اتفلقت من العياط مش من المواقف
كلنا بيحصلنا فى الدنيا كتير وديما ربنا بيكون رايد خير يمكن رايد نتعلم او رايد نقرب منه اكتر او رايد يقوينا ويقولنا الدنيا ماتستهلش بس اكيد رايد خير
عياطى كان على صوره لام من اجمل صور الام
اللى مرت عليا فى حياتى صوره جديده لام عظيمه بحق انت اللى حصلك دا نصيب عمره ماهيخليها مش فاخوره بيكى انا متأكده انها فاخوره بيكى وبأخلاقك وبحبك للحوليكى ربنا يبركلك فيها والصحه طول العمر يديها وسنين العمر يمدها ليها ويفرحها باخواتك وتشيل ولاد ولادكم يارب
ويخليلك يوسف يام يوسف وتفرحى انت وماما به ويملى عليكم ان شاء الله البيت عيال ويعوضك عن كل اللى فايت يارب
دوام الحال محال يام يوسف وسبحان ماكان له الملك والدوام
بوسه على جبين ست الكل وباقه ورد ليكى وليها
ويشرفنى لو سمحتى اكون من زباينك هنا بعد اذنك
تقبلى مرورى

الشغل النهاردة هنجلى دماغى بجد
بس برضه نلحق نعلق الاصطباحات

صباح الوكسلت الفحقلى
اخلى حاجة العنوان فحلفى يا فطوم :-)))

الباشا عارف الى فيها و بعدين عيب يعنى يتعالج فى مستشفى بتاعته بفلوسه امال حيكسب من نفسه ازى
اهو بيراضى شراكاته و بيخلص مصالح الدولة الخصوصية :-)

صباح التخاريف
الفار بياكل جبنة بيضاء جديدة عليا ديه
و ماله القلقاس ؟؟

صباح الإضربات
اهو دا التطور الطبيعى للدمقراطية الحديثة

صباح التصريحات
:-) فكرونى بفيلم جعلونى مجرما و نظرية احمد حلمى لتقسيم السوق :-)) بشركتين لنفس المالك

صباح الكسابيات
يعنى حنعمل دماغ فى الاخر بالدممقراطية
الا على كده حتبقى حرام و حندخل النار لو تعاطناها :-)))))))))))))))))))))))))))))))))

صباح التكهنات
يا رب

صباح الصبر والإيمان بالله
مقال حلو قوى

صباح التكريمات
كلنا حلوين بس مش واخذين بالنا

صباح الطاهريات
"..إنك تجيب جون في نفسك والحكم يحسبه أوفسايد."
حتى الحكم اعمش :-))))))))))))))

صباح الأشعار
متخيلانى بلمس ضئ القمر القريب البعيد

صباح الأغانى و الدندنات
و عايز ارقص معاك رقصة الفالس :-)

انا قلت برضه مش عادت فاتيما الغياب دة
!!!
وانا كنت عايزة ابعتلك اميل بس انتى جميل
الله حلوة الجمله وتنفع اغنية
انا ياهو والعياذ بالله انا عندى جميل بس تاهة منى
المهم بقى محدش يقدر يقدر يوفى حق امه ابداااااااا عليه مهمها كان شعورنا ايه؟؟
دوله نعمة من حد ربنا
ربنا يدى الصحة لمامتك ومامتى وكل المهماهاااااااااااات يااااااااااارب
انا كنت عايزة اقولك حاجات كتير فى الايميل بس مش لاقية كلام دلوقتى
مممممممممممممممممممممممم
ربنا يخليكى ويحنن عليكى ويرجعلك الغالى بالسلامة انا عارفة انك موجوعه مهما برضة كلنا قولنا كل سنة وانتى طيبة كان نفسك تسمعيها من يوسف
بس اكيد يافاتيما بيقولها وبيسأل عنك وهيقولها فى سره بليل وانتى هتسمعيها
امانه عليكى ماتعيطى
ولاتحزنى
ماضاقت الا مافرجت
والله ربنا يفرحك وما يحزنك ابدا ابد ابدا
انا جبت لماما مكواه اصل احنا مكوتنا القديمة كانت شغاله على 6 بس تصورى
كل ما اكوى كانى بمثل فيلم الذل
اخيراااااااااااا بقى عندنا مكوة بيها كل الدرجات
انتى اشتريتى ايه؟؟
انا اخدت من ماما مناخيرها انا معنديش قصبة والله زيكم ياولاااااد الايه
يلى عندكم قصبة!!
والله ماقدر اوصف امى فى كلمة
تصدقى انى مفهمتش امى يافاتيما غير وانا فى السن دة زماااااااان كان فى مشاكل كتير بينا
ربنا يخليها والله ويعوض صبرها خير فينا انا واخويا
تصدقى انى الى هعيط
المهم انا فى سن ال18
فاهمنى انت ياخطر صح
رغيت كتير صح بس كانوا كلمتين محشورين فى زورى وقلت افضفض معاكى وخلاص
زمانك بتتمنى من طول التعليق انى مكنتش شوفت البوست افضل
كع كع كع
عووووووووووووو

انا اول مرة ادخل مدونتك

ابكيتيني .. واسعدتيني بكلامك

عيشتيني في لحظاتك

كل سنة وانتي طيبة .. ومامتك طيبة

ومامتي طيبة

الام العظيمة

اللى بسبب البوست دا هافكر كتيررر انا خدت ايه منها ومخدتش ايه منها

المرحلة اللى انا فيها متهيألي زي المرحلة اللى انتي عديتي عليها في المراهقة

اني بقول يارب مش اكون زيها

لكن البوست دا خلاني افكر وهيخليني افكر

اد ايه الست دي عظيمة وبحبها اوووووووووي

وياريت ابقي نصها

نص صبرها

نص نشاطها

نص حبها لينا

كل سنة وانتي طيبة يامامتي

والله انتى جيتى على الجرح ربنا يسامحك بقه وبمناسبة عيد الام انا ههديلك اغنية
احم احم
ازى حالك مش لسة برضة زى حالى ازى حالك لسه بضمك شوارع لسه كرهاك البيوت لسه قادر عالسكوت لسه حى الله يعينك عا الى جاى والناس تبيعك وان شارى ازى حالك مش لسة برضه زى حالى
كل سنة وانتى طيبة

ربنايخليهالك يارب وتحبوا بعض اكثر واكثر ويخليلك يوسف وتفرحى بيه يارب

ايمان مصرى

فاتيما
------


إيه؟؟

برد على نفسى فيه حاجة؟!!!!


متركزوش معايا
كل واحد يعمل مش واخد باله


ان شاء الله
ماجد يتجوز و نفرح بيه
و يوسف يتجوز و تفرحى بيه
و ماما ربنا يمد ف عمرها و يديها الصحة و تفرح بقى عشان كفاية عليها حزن و زعل و مشاكل
و خليكى كويسة معاها بقى
متزعليهاش و زى منتوا اصحاب دلوقتى قوى
خليكوا كدا علطول و النبى
و لمى التعابين بقى
العمر مبقاش فيه كتير
عشان تقعدى ترخمى على حاجات عبيطة و تقولى حريتى و استقلالى و ابصر ايه كلام خايب من النوعية دى

و متزعليش عشان يوسف
هيرجع بأمر ربنا
زى ما بعد بأمر ربنا
سيبها على الله

مش الحاجة ام فاتيما بتدعيلك
كل صلاة و بتسمعيها بتقول
يا رب رجعلنا يوسف فى حضننا
و عوضنا عوض الصابرين

خلاص بقى

عاوزة ايه تانى

الحمدلله

و كل سنة و ماماتك طيبة
و كل الأمهات طيبين
و انتى طمان طيبة يا بت
قوليها لروحك و لا يهمك

بكرة يوسف يقولهالك كتيييير
و بأثر رجعى
عن كل اللى فات

بس خلاص





wanda
-----

يا ون ون
كل سنة و الحاجة ام وندا بخير
و عقبال ما نقولهالك السنة الجاية ف نفس المعاد


ماما تكتب بوست عنى ؟؟؟


يا خراااااااااشى

ليه يا بنتى كدا
عاوزة تقطعى العلاقات بينى و بينكم ليه و تخلى منظرى وحش بلوجرياً

ما تخليها ساكتة احسن و كاتمة ف قلبها و المسامح كريييييييم


محدش بيستحمل زى الام و الأب الصراحة
بس متفهميش احنا العيال بنجيب الغشومية دى منين و نفتكر نفسنا
اقويا و احسن و اجمد و بتاع

مايلة مجرد لفظ على وزن هايلة

انما و ماله
ساعات برضو الإنسان نفسويته تميل و تبقى على وشك تنكسر و ربنا ينفخ فيها

خدى دول بقى فبل ماأميل
**********************************
و ×××××××××××××××××××××××××××××××××




adel
----

يا لهوى يا دولا

يا بنى حتى و انتا بتجاوب على سؤال جد بتضحكنى كدا

ما عاش اللى يديك على قفاك
يا بنى انتا حتى اللى شوفته وحش اتحول معاك لحلو و صح
اومال انتا انسان طيب و جميل كدا ازاى ؟؟

كل سنة و انتوا عيالى حبايبى
هبعتلك ميل مهم بعد ما اخلص رد ع التعليقات
و منتظرة الرد يا شقاوة
كل سنة و انت طيب يا بابا





أبو حميد
-------

و انت طيب يا باشمهندس

انا رديت على حضرتك بإيميل لعله وصل بالسلامة
و لما تقراه يحصل خير برضو


معاك فى كل اللى قولته بالمللى

علاقتنا باهلنا مفيهاش نقاوة و لا اختيارات و لا احسن و اوحش
بس الواحد اوقات ضميره يأنبه على انه اتكعبل كعبلات عملت ازمة و مشكلات للناس اللى بيحبها بس
مش اكتر

كل سة و انت طيب
و لو ان الأب بيحتفى بيه طول السنة يا عم و متدلع خالص
و سيبولنا يوم واحد من نفسنا






NeVen
------


و انتى طيبة يا نيفى ى ى

ميرسى يا حبيبتى على كل الكلام الحلو دا


و بكرة تبقى زى ماما فى خبرتها و معرفتها بالناس انتى اصلك لسه صغنونة يا بنتى و امر طبيعى تثقى ف الناس قوى و كمان تكونى على طبيعتك و متمنعيش نفسك تقولى رأيك بصراحة
كل دى ادبيات الشباب البرىء اللى لسه بيبتدى حياته يا ماما و مش مدى خوانة
و ان شاء الله تتعلمى الحرص دون خساير
و لا تعب كتير
إن شاء الله يا حبيبتى

كل سنة و انتى طيبة يا ماما
بالنيابة عن لارا

momken
-------

ياااااااااه

ازيك يا ممكن
نورتنى قوى فينك يا فندم من زمن ؟؟


كلمة كالعادة دى حلوة قوى
و معناها انك بتيجى كتير
بس صمتاً ...صح؟
طب دا شىء يسعدنى جدااااااااا

كل سنة و انت طيب يا عزيزى





wanda
-----

تعليق على تعليقاتك

كل كلامك متفقة معاكى فيه بخصوص الاخوان و دكتور طه و علاء الأسوانى و التمن المدفوع فى الخيانة و الطاهريات و خلافه

مختلفة بس معاكى
فى ان دكتور غنيم يتذل
مش هيلاقوا حاجة اصلاً لأنه حد محترم جدااااااا
و بلال فضل كذلك
كانوا عملوها من بدرى و مستنوش


ايه حوار المخدات دا بقى
بقى انا اشتكيلك ان النسيان بينسرق تقومى تقوليلى المخدة هاتيها و اقعد على فيض الكريم
ينفع كدا ؟؟؟؟





يا مراكبى
---------

كدا توضحك عليا يا نبع الحكمة

بقى انا بقولكو بينى و بينكو على المهازل اللى بتحصل تقوم توضحك ؟؟

طب الحمدلله هذا كان قصدى يعنى

منحرمشى منك يا رب
كل سنة و الحكومة عندكم بألف خير
و ربنا يعلى مقام الوالدة فى جنات النعيم
يا رب
بدعواتك





ستيتة حسب الله الحمش
-----------------


و الله يا ستوتى بخصوص البوست
و حكاية التشابه دى
فأتصور ان الست المصرية ينطبق عليها قوى المثل بتاع اكفى القدر على فومها دا

احنا بنبتدى تمرد و لخبطة و استقلال و حركات و اختيارات و غلطات
و بعدين نهدى و نكن و نبتدى نستوعب و نصلح و نتحسن
و نكتسف بعد سشويتين اننا هنقلب على امهاتنا فى الشكل و القوة


يغنى احنا لما نوصل لسنهم و ربنا يمد ف عمرهم و عمرنا هنكون بقينا شبههم قوى

اتمنى ذلك

اصل عيب لما يبقى عندنا مثل اعلى كدا هايل و نروح ندور برا

و اتصور اننا الحمدلله مش خيبة بالويبة للدرجة يعنى و الحمدللله

هن بيدعولنا يبقى هنبقى زى الفل
إن شاء الله


بالوسبة لطلب سعادتك بقى

انا و الله اتمنى التراب اللى مانوسة تمشى عليه
بس العيب فى سبع الرجال بتاعنا اللى مضرب عن الجواز يا اوختشى
كل ما اقوله نجوزك يقولى ربى عيالك و ملكيش دعوة بيا و انتى اخر واحدة تتكلمى عن الجواز و حاجات كدا

عموما انا بقول اسيب حبيبى على هواه
لحد ما ييجى ديله على قفاه
و يندلق و يحب و ساعتها ييجى يوقل حوزونى و احنا اللى نقوله مش فاضيين


بس معلومة على جنب
اى راجل مستقل بنفسه و بيعمل لروحه كل حاجة
بعد الجواز متفهميش بيجراله ايه و يقلب و يا خوفى ماجد يطلع من هذوها النوعية و يفضحنا مع العروسة بقى

لأ هوه فعلا عاوز عروسة زى مانوسة
تعرفه ان الله حق من اول يوم

طب نشوف النوظام ايه
وتيجوا تقروا الفاتحة مع امى


كل سنة و انتى طيبة يا ست السوتيتات كلهن و يحرسلك مانوسة
و احمد يا رب

بوست فى منتهى الروعه بجد

ربنا يخليلك أمك و يخليلى أمى و أبويا

عجبنى فيكى جدا انك قادره تعرضى مشاكلك الشخصيه بلا حرج و تعترفى ان اختيارتك كانت غلط و انك ظلمتى أمك و تقولى دا بوضوح لأنك مكنتيش البنت اللى هى تتمناها

بس نصيحه بعد البوست الهايل دا

هاتيها جنبك و خليها تقراه او اقريه انتى ليها

اكيد هيفرق معاها

هايل و الى الامام دائما يا روميل

مصطفى ريان
----------
ازيك يا صفصف

و الله يا بنى دى يبدو انها سنة الحياة

منعرفش قيمة الناس غير لما نفتقدهم
خصوصا الاهل

دا زى ما تقول اوبشن امومى و ابوى بحت

مينفعش العيال تبقى راضية عن اهاليها غير لما يتبهدلوا فعلياً
و يكتشفوا ان الحضن و السكن اللى كان بيحميهم مش موجود

ربنا يباركلك فى الحاجة يا رب
و البركة فيك يا عم انتا اللى بكرة ربنا يكرمك و تبقى أب و هتكون أب هايل يا مصطفى
بس اوعى تخلف مايل يا واد
ههههههههه

كل سنة و انت بالف خير





enjy
----

ليه العياط بس
دنا بقول كلام حلو مش حزين خالث

امل دى تبقى انا يا فندم
دا الاسم الحركى بتاعى ف البيت و عمر ماما ما ندهتنى يا فاطمة او فاتيما

امل و بس
و ميمى ف الروقااااااان


كل سنة و انتى و ماما طيبات
يا شقاوة ع الآخر







الزهرة البرية
------------
حمدلله على سلامتك يا جودى

ايوه كدا
يا بنتى البلوجر دا احسن من غيره
و خليكى معانا

انتى عموما خدتى من ماما حاجات حلوة قوى و اللى مخدتيهوش بكرة يحصل لما يبقالك حياة منفصلة و تضطرى انك تمشيها دون الأعتماد على ماما

اصل كلنا كنا كدا
ماما هيا اللى بتتصل بالقرايب و تتعامل مع الجيران و البوابين و بتوع الخضار و ....و .....

و احنا نصحى نلاقى الدنيا ماشية

هييجى وقت لما تشتغلى و تتجوزى ان يبقال مجتمع منفصل عن ماما فتتعاملى لوحدك معاهم و تبقى اجتماعية لما تقولى يا بس

كل سنة و انتى و ماما طيبات يا حبيبتى

انا كمان بوسااااات و حضوناااااااات







P A S H A
---------


و انت طيب يا شريف

ميرسى على كل دعوة حلوة منك

بس ليه مش عارفة تعليقاتك حاسة انها حزينة قوى

و لا انا متهيألى ؟؟

يمكن

منحرمشى من دعواتك يا اخلاق الباشوات






جنى
---

مين دول اللى مايلين ؟!!!

دنتوا احسن صحبة
و ناس
و عالم يا سعيد

ربنا يعلى مقام الوالدة ف الجنة يا رب

انا كتبت ف نهاية البوست امنيتى ان ربنا يعوض كل محروم من امه
و كان ف بالى اربعة اساسيين

يوسف طبعا
داليا قوس قزح
سووووو
و إنتا


ربنا يعوضكم خير
و يعوض كل حد بالسكينة
و السكن يا رب





عبدالله
-----

و انت طيب يا فندم

ميرسى جدااا على معايدتك الطيبة دى

كل سنة و والدتك طيبة و بخير

Baskouta
--------

يا عيون مامى ازييييييك

ميرسى على الى قولتيه لماماتى


و لماماتك الإفتراضية اللى هيا سعادتى

و كمان لماماتك الحقيقية
اللى انا بشكرها عليكى
و على انها خلتك بنوتة و انسانة جميلة كدا
و ان شاء الله هتكونى زوجى اجمل
و ام أجمل و اجمل

لأنك مش بس ذكية عشان تتعلمى
انتى كمان حساسة و بتعرفى تقدرى قيمة اللى بين ايدكى و لما تلاقى المكان و الأنسان اللى يستاهل تديله حبك و حنانك لن تترددى لحظة و تغمريه بيها


كل سنة و مامتك طيبة يا حبيبتى
و انتى كمان طيبة و ربنا يخليكى انتى و يسوفة و عادل ليااااااااا
بوسات و حضونات و بسكوتاااااااات بمبى





richardCatheart
--------------

يا قلب القطة نوريتنى جدااااا

متابعة تعليقاتك عند د.ستيتة
و يشرفنى و يشرف المطر ح كله وجودك

و يبدو يا عويوتى ان الواحد لازم يمر بالمحن عشان يقدر عذابات اصحابها
دى ضرورة لابد منها
المهم بعد ما يخرج من المحنة دى

هيفضل بنى آدم
و لا هيتمسخ

و طول عمرى بشوف ماما بتخرج من مصايب رافعة راسها و بتبدأ تانى من اول و جديد و تعيش و تكمل
فبتفرج عليها و اتمنى اكون زيها

ربنا يخليها ليا
و يخلى كل ام لعيالها
و يعوض من حرموا من حنات امهم خير

نورتينى جدااااااااااااا
و الله






كيكى عووووو
-----------
كيكى ى ى ى

تعليقك مفيش اروع منه يا بنت انتى يا جميلة

مليان حاجات كتيييييييير قوى ما بين السطور حسيتها

انا مش عارفة ارد اصلاً على ايه و لا إيه


الهدية؟؟

لسه
بس عارفة هتكون ايه

حاجة كان بابا بيجيبلها من اول سنة اتخطبوا فيها لحد ما تعب و عييى و بقى يطلب مننا نجيبها احنا و نديهاله يهاديها بيها و نخيبها تحت البطانية بقى و نندهها و هوه يفاجئها و حركات رومانسية كدا

الله يرحمه

هروح اشتريهالها ان شاء الله
برفان من حاجات الشبراويشى بتاعة زمان دى
هيا بتحبها و بتفكرهابالذى مضى
اصلها رومانسية بس مبتحبش تبين
و كدا
انما على ميييييين ؟؟؟



جديدة حكاية القصبة دى

فكرتينى بيوسف برضو كانت مناخيره صغنننننونة قوى و كنت بقعد اعضه فيها عشان اشوف هتستحمل العضة
و لا لأ
مكنش بيرضى خالث

متعرفيش ليه؟؟


كل سنة و انتى و ماما طيبات يا كيكى






A32L MaGNoNa
-------------

اول مرة و نورتينى يا فندم


معلش و النبى بكيتك

يا لهوى
اومال لو جيتى فى بوستات اليوسفيات كنتى عملتى ايه؟؟

كانت هتبقى اول و آخر مرة بقى

هههههه

بصى يا ستى المرحلة التمردية دى بتروح و تيجى

جاتلى وقت المراهقة
و جاتلى قبل جوزاى
و جاتلى مرة من سنة و شوية لما علت مع امى شوية فى موقف كدا و راح لحاله

كلنا بييجى علينا وقت و نكون مضغوطين لأسباب تانية و ساعتها بنطلع ضغطنا دا على اقرب الناس حوالينا و غالبا هما الاهل


ربنا يهدينى لماما و مزعلهاش منى ابدا تانى

و كل سنة و انتى ماماتك زى الفل سوا
يا رب





الأرموطى
--------

بتاعة مين الغنوة دى يا ارموطى
انا اول مرة اسمع كلامها
اوعى تكون من توليفك؟؟؟


كل سنة و انتا طيب





أيمان مصرى
---------

و انتى طيبة يا مينو
وحشتينى و الله
منحرمشى من دعواتك يا حبيبتى أبدااااااااا



guevara
--------

شكراً لحضرتك

ربنا يهدينا عليهم <_<

ومبسوطة اوي اني دخلت مدونة جميلة زي دي

ميرسي جدا جدا جدا ليكي

A32L MaGNoNa
------------

العفو يا حبيبتى
انتى اللى نورتينى جدا

الصورة اللى انتى اخترتيها للبروفايل حلوة جدا على فكرة

تحياتى الخالصة ليكى

هو حضرتك اسمك أمل !!!!!!!!!


مش فاتيما يعني ولا ايه !!!!!!!!!!

كا سنة وانتى طيبة يا طماطيمو... والسنة الجاية .. لأ دلوقتى حالا يكون يوسف معاكى
كل سنة ست الحبايب بألف خير وصحة وسعادة

أمى بقة دى ست مختلفة عن كل البشر... كفاية أقولك انها اتأخرت فى الجواز عشان تربى ولاد أختها اللى اتوفت بعد ما ولدتهم
كفاية أقولك ان والدى اتوفى بعد 3 سنين مرض وأنا عندى 7 سنين وأختى 8 سنوات ورفضت رفض تام انها تتجوز

دايما بتشوف كل حاجة بنظرة أوسع وأشمل منى
وساعات أنا أعمل بت جامدة ومرضاش آخد بنصيحتها... أقوم واقعة على جدور رقبتى ...فأعمل ايه؟؟؟ أقولها لأ مش هعمل كذا.. وأروح أعمله من وراها

شافت حاجات كتييييييييييييير أوى صعبة فى حياتها... ساعات بقول الست دى يا ترى عايشة لحد دلوقتى اذاى... عندها صبر وطولة بال لا شوفت ولا هشوف زيه
أهم حاجة أخدتها منها انى مهما حصل أبقى قوية وواقفة كدة صلبة ومحدش يشوف دموعى.. أخدت منها كمان عزة النفس والقناعة.. مهما حصل لا يمكن أطلب من حد حاجة وكرامتى فوق كل وأى شىء - بحاول أعملها حاجة تسعدها على أد ما أقدر بس برده مش عارفة أسعدها صح أوى ... يااارب ما يحرمنى منها العمر كله
ياااارب نسمع عنك كل خير قريب يا طماطيمو

يا ساتر عليا ده أنا رغاية بشكل

غير معرف
------

لأ

اسمى ف شهادة الميلاد فاطمة

و بيندهونى ف البيت ب امل

وبيعرفونى ف البلوجر ب فاتيما


شفت قولت تلات اسامى ازاى
و معرفش اسم واحد ليك
او ليكى ازاى ؟!!!!






shimaa
------

و انتى طيبة يا شيمااااا

و الدتك ست عظيمة

كانت أم
قبل ما تبقى ام بمراحل
و كمان كانت أب
ياااااااه

اتحملت ازاى كل دا ؟؟

ربنا يعوضها بيكم خير دايما
و يديها الصحة و يفرحها بيكو


الست دى عايشة برعاية ربنا
و بأملها فيكم
و

عارفة مامتك تشبة مامتى و تشبه اغلب الامهات

كل واحدة فيهم كانت مصاعبها و مشاكلها و حياتها صعبة بشكل يختلف عن التانية صحيح
بس ربنا بيدى المحن على قدر احتمال أصحابها و صبرهم و قدراتهم

ارغى زى ما تحبى يا حبيبتى
دا موضوع ينرغى فيه
ليوم القيامة اصلاً

و يومها هنتنادى بأسمائهن
شفتى كرم ربنا علينا
وعليهم

بوسيلى ايد ماما و قوليلها كل سنة و هيا طيبة و كل الامهات يا رب

الغير معرف
----------

حتى بوست عيد الام ؟؟!!


أدعى عليك بإيه بس يا شيخ
و انتا فيك كل العبر


عموما
متشكرة جدا

كلك ذوق

إرسال تعليق