.

.

باب الروح + تحديث  

Posted by: فاتيما in



تحديث آخر البوست
-----------

مشهد (1) نهار خارجى

على مدخل السوبر ماركت فى يوم


21/3/2007


- صباح الخير يا فندم

- صباح النور .. تعالى هنا جنبى يا يوسف

متبعدش عشان بكلم طنط

تسأله برقة

- انتا اسمك يوسف؟

يرد

- ايوه

- طب جبت ايه لماما يا يوسف بقى

فى النهاردة ف عيد الام ؟

- جبتلها توكة للشعر

- ايه رأيك تديها وردة بيضا .. من دوف

بصة حيرة و نظرة معناها

اوافق يا ماما و لا لأ ؟؟

ألحقه بسرعة فى اتخاذ القرار و اقوله بإبتسامة

-
خدها يا حبيبى و قول لطنط شكرا جدا

تديله وردة بيضا وكرت معاها

ونمشى


مشهد (2) البيت داخلى

- ماما

- نعممم

- مش هتاخدى الكرت دا

- لأ ..لما تكتبلى فيه الاول أى حاجة

- مش بعرف اكتب غير اسمى و اسمك بس

- ودول شوية ؟؟ كمان ارسملى أى حاجة حلوة

من رسوماتك لو سمحت

- طييييييييب هرسملك وردة و فراشة

- انا بحبك قوى يا يسوفة و انتا هديتى يا حبيبى

اللى مفيش أغلى منها ف الدنيا كلها

- كل سنة و انتى طيبة يا ماما

- و انتا طيب يا حبيب ماما


مشهد (3) قصاد المرايا بتاعتى

بعلق صور ليوسف عشان اشوفها كل مرة

ابص فيها ع وشى

الاقى وشه هوه كمان باصصللى

بعلق كمان الكرت .. عشان افتكر هديته

و رنة جملة كل سنة و انتى طيبة يا ماما

فى ودانى و قلبى

و كمان عينى


يا ترى عيد الام عدى علي يوسف

السنتين اللى فاتوا ازاى

و هيعدى السنة دى ازاى ؟

اكيد هيفكر فيا زى ما بفكر فيه

واكيد هيكون نفسه يجبلى هدية و يبقى زى باقى العيال

فى فصله او من جيرانه


باقى العيال ؟!!

انا ازاى ناسية باقى العيال ؟؟


مش كلهم بيحتفلوا بعيد الأم بفرحة و بهجة

و فيهم اطفال كتير زى يوسف برضو


فيهم اللى فقد امه بالموت

و بقى يتيم

و فيه اللى بيعانى من إعاقات

و مش حاسس بمعنى عيد الام زى باقى الاطفال


و فيهم اللى امه بعيدة عنه زى حالاتى

بفعل ظروف قهرية


و فيه اللى امه نسياه لأنها قاصدة تنساه


و فيه اللى امه رمته و اتخلت عنه من يوم ما اتولد

و عايش يتيم فعلاً و اسماً فى ملأجى الأيتام


و فيه اللى معندوش رفاهية الاحتفال بعيد الام أصلاً

لأنه مش لاقى ياكل و يلبس


و فيه اللى محروم من امه غصباً

لأنه راقد فى سرير المرض لشهور و سنين

و مش قادر يحس بأى حاجة غير انه تعبان

و عاوز يخرج من هنا



إيناس نهر الحب و العطاء

فكرت فى الاطفال المعاقين

و شجعتنا نعمل حاجة

دوس هنا

و داليا قوس قزح و آبى هانم بتنجانى

شجعونا نفتكر الناس المحتاجة

و عملوا بؤجة الخير

آخر بؤجة كانت فى ديسمبر


دوس هنا


و كمان فكرونا بالاطفال اللى محتاجة كل مساعدة

فى مستشفى أبو الريش

و إفطار الصائم


دوس هنا

و الأيام دى ... ما زالت الدعوات الصالحات


بتكمل و تكبر و تزيد


اطفال أبو الريش محتاجين جهاز مونيتور

لدواعى طبية

هيساعد فى اتمام شفاء حالات كتير

بإذن الله و بامره


التفاصيل كلها هتكون عند الاحباب خالد


و داليا و خيخة و ضياء بيتوفل مايند


و من موقعى المتواضع

و ف عيد الام

انا كمان بقولكم بدعوة من وش الخير داليا

عشان الأطفال الجمال دول

و عشان يوسف و ولادكم و ولاد كل الناس

لازم نحاول نساعد باى شىء

صحيح المبلغ مش بسيط لناس كتير مننا

بس القليل على القليل

بيكون فى الآخر

كتير


و يوم افطار الصائم فى ابو الريش ربنا كرمنا

و جمعنا تقريباً مبلغ مشابه لذلك


المرة دى قدامنا وقت

لحد يوم 9 أبريل

اللى يقدر يتبرع بأى مبلغ انشالله خمسة جنيه حتى

ميتأخرش و يستصغر المبلغ او يستقله


اعزموا و توكلوا و كل واحد ينوى لله

انكم هتعملوا الخير

و ربنا هيفتحها عليكم إن شاء الله


و يرزقكم برزقهم



عند خالد همس الاحباب كل التفاصيل


و ارقام الموبايلات


دوس هنا




و لحد يوم تسعة قصادنا وقت كبير

ربنا كريم قوى

و قادر يكرم كمان الاطفال اللى محتاجة حد يفتكرها

فى عز محنتها و ياخد بإيدها

و يا خد بايدنا احنا كمان معاهم

كلنا واحد و لو منعرفش بعض اسماً و شكلاً

كلنا معرضين للمحن بين يوم ليلة

و ساعتها لو أى حد غريب مش قريب افتكرنا

هيكون لدا مفعول السحر على قلوبنا الضعيفة المحتاجة طبطبة

و الحمدلله على نعم الصحة و الستر اللى احنا فيهم

كفاية الواحد فينا يحط راسه ع المخدة ف ليلة

و هو حاسس انه طبطب على حد ميعرفوش

و حلله ازمة او مشكلة

و لو مؤقتاً حتى


فى عيد الام بدعوكم

نفكر فى عيال غيرنا

زى ما بنفكر فى عيالنا و فى نفسنا



نفكر فى الاطفال اللى هما نور عيوننا

و بهجة أيامنا

و فرحة عمرنا

و هما بكرة بتاعنا اللى لازم يبقى حلو

و يكبر فى اقل خساير و معاناة ممكنة

لو احنا ملحقناش نبقى

هما يكونوا

إن شاء الله


يوم 9 ابريل على باب مستشفى ابو الريش

هنتظركم مع كل الاحباب

و اولهم داليا قوس قزح وش الخير و الفرح

و خالد همس الاحباب

و ضيا و كلنا

بدعوكم تحطوا لينك خالد عندكم

عشان يمكن حد


أى حد مش لازم يكون مدون حتى

يقرى الدعوة

و تكونوا سبب فى وصول الخير لمن يستحقه

يمكن و لا تعلموا كلمة تنكتب عندكم

و يكونلها مفعول السحر

تفتح القلب المقفول

و لا تدق على باب الروح المغلق

تسّمع اللى جواه

و يقولك ايوه .. حاضر

انا جاى أهو


الكلمة الطيبة صدقة

و نور

و خير


نفسى زى كل مرة

نكون عزوة

و نتلم زى ما بنتلم دايما فى الخير

و لا شىء غيره

بحبكم يا احلى ناس و صحبة و عالم

فوق الوصف

و بكل الفخر

انى منكم






يا بركة دعواتكم الطيبة يا جماعة

يسوفة لسه مكلمنى

وقعدنا نحكى و نرغى فى احواله


و احوال المدرسة


و ان بقى عنده اصحاب كتير قوى

و حاجات تانية

صوته بيقول انه كويس ... الحمدلله

انا كنت فرحانة قوى و انا بكلمه لدرجة

مسحت أى شىء من دماغى


غير انى اضحك و اهزر معاه


و فكرته بالكرت اللى مع البوست

و قولتله يلا


قولى كل سنة و انتى طيبة يا ماما

و وحشتينى

انكسف شوية كدا وقعد يضحك


يا رب إنت عالم بيا و فضلك غامرنى


الحمدلله

الحمدلله

الحمدلله

دى بركة دعاكم


و بركة الاطفال اللى عاوزين نفكر نساعدهم


لأن دا حقهم علينا

و بركة البوست بتاعك يا دااااااااليا

شفتى انك وش الفرح زى ما قولت ؟


بحبكم يا عيااااال قوى


ربنا يخليكم ليا

كل سنة و انتوا طيبين


أمهات و أبناء


-------------------------------------

----- بحبك -----

يا وش الخير والفرح




بوستات صديقة
---------------

فلسفة اللقاءات و مشروع الصدقة الجارية


صدقة جارية على أرواحنا ... بت خيخة و أى كلام


عشان أعمالنا السودة .... كيكى عوووو


فرصة لصدقة جارية ... ضياء بيتوفل مايند


This entry was posted on الجمعة, مارس 19, 2010 and is filed under . You can leave a response and follow any responses to this entry through the .

70 كــــلام بيطــبطـــب عـــلى قــــلبى و روحــــى

كل سنة وانتي طيبة
سيبك من اللي انتي كاتباه
اللي بيعيطني زي كل مرة
بس برضه انتي احسن ماما
كاتبة عند علا اننا احسن علشان بنتعب
مين قال لك اننا تعبانين؟
علشان بنجعر من وقت للتاني؟
وايه يعني
ما كلنا امهات او حتى بنات تعبانين والتعب الجسدي مش تعب

انا ست مرفهة جدا ومن كتر الرفاهية ونعم الله عليا التي لا تعد ولا تحصى بقيت بتعب من أقل مجهود
ويمكن علشان انا عضمة كبيرة

لكن انتي بقلبك الفارغ ورا يوسف
قلبك اللي مش بينام من خوفك عليه
انتي وأي أم ابنها بعيد عن حضنها

انتوا الأمهات
أنتوا
لا انا ولا غيري

إنتي اللي في أي لقاء بتقعدي تتكلمي وتجاملي شمال ويمين وكأن مفيش هموم عندك
إنتي اللي بتكلمينا بعينيك الحنينة الدافية واللي بيفهم في العيون ها يدخل على قلبك يلاقيه بيعيط حتى وهو بيضحك
إنتي اللي بتجاملي كل فرد في المدونات وتحبيه وتطبطبي عليه
وحتى اللي بيسيء لك بتردي عليه رد مهذب بقمة كظم الغيظ
إنتي

معلش يا فافي
انتي مامة يوسف
انتي مامة المكان ده كله

بس استثنائيا إنتي بنتي علشان فروق السن وحاجات تانية مش ها اقول عليها

قعدت ضحكت ضحك وانتي بتقولي عند علا وحاجات تانية مش ها اقول عليها دي
اقول هي فافي زي امريكا شايفة ايه ومش عاوزة تقول ؟ :)

كل سنة و انتي و كل ام بخير و صحة وسعادة
يارب كل الاطفال يتهنوا دائما بامهاتهم و مايتحرموش منهم

فعلا يا فاتيما جميييييل أوى تفكيركم ياريتنى أقدر أحضر بس للأسف مش هعرف وإحتمال كبير فى يوم أشارك معاكم فى يوم إن شاء الله ويكون قريب

تحياتى لكم جميعا حبيبتى ويارب يجعله فى ميزان حساناتكم وربنا يجازيكم كل خير

دمتى بكل الخير والحب والسعادة

مش عارفه اقول ايه
انا باحس انك شربه الميه اللى بشربها فى صحرا واسعه ناشفه
عارفه ده معناه ايه
معناه كبييييييييييييير قوى عندى و عند ناس كتير
انتى الخير اللى جواكى كبير و كتير و زى ما قلت من حسن حظنا انك معانا ووسطنا
ربنا يخليكى لينا و ليا انا فى الاساس

انا فعلا بحبك قوى

كل سنة ووانتى احلى ماما ليوسف يا حبيبتى

ربنا يارب يجمع شملك بيه ويعوض صبرك خير

ويصبرك على قد مابتحبى يوسف يصبرك

كل سنه وانتى طيبه يااعظم واروع ام فى التدوين كله
واجمل اخت ربنا وهبهالى فى الدنيا كلها

سبحان الله
كلام ستيته متفق مع كلامى ليكى
شفتى بقى اننا عندنا حق؟؟؟
بحبك قوى جدا خالص

كل سنة وانت مامتي
بنتك

ماما فاتيما
ازى حضرتك ،،، كل سنة و انتِ و يوسف بخير و سعادة
يارب دايماً متجمعين فى الخير و بتدعوله فى كل وقت
و متجمعين فى الجنة إن شاء الله
تقديرى

عنوان غامض و ليس له معنى ، باب الروح و هل الروح لها ابواب يا فاطيما

فاتيما

مجرد سؤال صغيووووووور هو كل اللى اسمهم فاطمه عندهم احساس عالى اوى كده ;)
كل لحظه وانتى بخير
يارب الفرح والسعاده والهنا تملى حياتك
ربنا يكرمك ويسعد قلبك

عارفه دعوات الخير بتاعتك دى ربنا يجازيكى عليها كل خير

عارفه يا فاتيما اشعر من بين حروفك انك ام زى ما الكتاب بيقول يعنى ام بجد ام جميله رقيقه يكفى كمية المشاعر التى بين كلماتك
هناك امهات ترمى ابنائها ولاتسال فيهم ياترى دول يعتبروا امهات ؟؟؟
ربنا سبحانه وتعالى هو القادر على ان يرد لكى يوسف ويقر عيونك به ويفرح قلبك
قولى يارب هو القادر على ان يغير اى شئ

ربنا يحفظه فى اى مكان ويبارك فيه

كل ثانيه وانتى ام جميله بمشاعرها النبيله

زهراء

الله مفيش اجمل من عمل الخير مدونتك جميلة اتمنى تزورنى وتقوللى رايكف ى بوست لى فى عالم التدوين

كل سنة و انتي طيبة يا ماما

كل سنة وانتى طيبة
كل سنة وكل الامهات بخير وسعادة
جزاكى الله خيرا وجعله فى ميزان حسناتك
تحياتى

كنت متاكدة انك مش هتتاخرى مهما كان فيكى يا فاتيما
علشان مفيش احن من قلبك

المربع كده كمل
الجدعنة + الحماس + الحنان + الاصرار
خالد و ضياء و انتى و خيخة

انا باحبكم كمان
باحب قلوبكم البيضة
و ده اللى بيهمنى فى الناس اللى بحبها

جزاكم الله كل خير يا مربع الخير
و عيد ام سعيد لنا كلنا بفرحتنا بسعادة اى طفل حتى لو مش ابن لنا

:-*****************************
:-XXXXXXXXXXXXXXXXXXXXXXXXXXXX

كل سنة و انت بتساعدى الخير
و يوسف بتستقبل حصاد الخير ده

كل سنة وانتي طيبة... وربنا يرجعه لحضنك... يارب..

وجزاكي الله خير.. علي الخير البتعملوه..

الحمد لله اتصلح تعالى بقى على مدونتى ليكى أغنية بمناسبة الخبر الحلو الجديد ده لااااااااااازم ولابد تشوووووفيه

يالا بسرعة إنتى لسه عندك

فاتيما
لو قولت لكى ان دموعى نزلت بطريقه غير عاديه على كلامك وعلى المشاعر الى لم تكتب كمان
ربنا يحفظ يوسف ويبارك لكى فيه ويمكن عن قريب يكون فى حضنك ومعاكى مين عارف


ما بين غمضة عين وانتباهتها يغير الله من حال الى حال .....

فاكره الكومنت اللى فات اللى مكتوب من شويه قولت لكى فيه ان دعوات الخير لازم ربنا يردها لكى

ومن يتق الله يرزقه من حيث لا يحتسب
ربنا يفرح قلبك وعيونك

زهراء
ذات الوجه المشرق
انتى السبب فى اشراقة وجهى وفرحانه لفرحك اوى اوى ....

سوري بجد :(
نسيت اكتر كلمة مهمة في البوست
فعملت تحديث و كتبتها بالاحمر

وهي ردي علي كلامك لاني مش لاقي رد بجد :)

امى فاتيما
كل سنه يا حبيبتى وانتى بخير
بتمنى بتمنى بتمنى والله
اتفاجا ببوست ان يوسف فى حضنك
ورغم كلامك دا الا خلانى اعيط جدااااااا بفراقه عنك
بس خلانى مبسوطه لانك مبسوطه علشان كلمك
يااااااااارب تفضل البسمه دايما فيكى يارب
ــــــــــ
وكمان
عن بوست التبرعات
انا وقسما وبالله العظيم
انا قلت للبيت هنا وماما اقتنعت بيه لانى اولا حباه وحبا انى اعمل حاجه كويسه فى حياتى على الاقل
وثانيا علشان اشوفك انتى
بس انا مش عارفه المستشفى دى هتكون فيه
ولا اجيها ازاى
ويارب كده انتم دايما تتجمعوا على كل خيرا
ويجازيكى يارب العالمين على كل خير تعمليه يارب

قاتيما

انتى مش متخيلة انا فرحت اد ايه لفرحتك بمكالمة يوسف
على الرغم من زعلى علشان لارا اليومين دول
حسيت انه ابنى انا وعاوزة اتطمن عليه وربنا ادانى الامنية دى
ربنا يخليهولك ويحميهول من كل شر يارب ويرده لحضنك قريب بأذن الله وميحرمكيش منه
ولا يحرمه من حنيتك و حبك اللى لو اتوزع على الدنيا كلها هيكفى ويفيض

والدعوات لفعل الخير بجد جميلة اوى وبتدينا دافعة اننا نفكر فى اطفال غيرنا ونجمع من بعض قرش على قرش نفدر نسعد بيه ولو طفل محتاج اقل حق من حقوقه فى احياة

بجد اتى بتكبرى فى نظرى اكتر يوم بعد يوم
وانا بأذن الله هحاول اشارك معاكم فى اليوم دة

السلام عليكم

كل سنة وانتي طيبة يا احلى واجمل ام ..

وجزاكي الله خيرا على دعوتك لعمل الخير ومشاركتك فيه ..

وابشري ان شاء الله بفرحك وسعادتك بيوسف قريبا مثلما تسعين لسعادة وفرح الاطفال ..

عندي بوست ها يعجبك

تحيتي

فطومة
كل سنة وانت طيبة يا اجدع وارق ام
ويارب دايما ما تنحرمى من يوسف ولا حبه لك
حبى ودعواتى

كل سنه و انتى طيبه و ربنا يفرحك بيوسف دايما كده كمان و كمان

الف مبروك ياجميل
ربنا يفرحك دايما ويرجعه لحضنك تانى
امبارح انا كنت هتجنن
عايزة اقولك مبروك مش عارفة
ربنا كبير
وعالم بحالك وان مكالمة كده هتفرحك بزيادة
وانت كمان عجبتينى جدا لما اخدت المكالمة ضحك وهزار
مش السعادة ارادة زى ماقالت دكتورة ستيتة
المهم انك تطمنى من صوته انه بخير
ربنا مايحرمكمش من بعض

احم اححم

عشان تعرفى وشى حلو عليكى قد ايه

اى خدعه يا فندم

صوتك و انتى بتحكيلى امبارح ان يوسف كلمك

كان غير اى مره سمعتك فيها

كنتى طايره و بتضحكى و تعيطى و كله

فى وقت واحد

انا كمان كنت باعيط من الفرحه

و ساعه اما قلتى يوسف كلمنى انا زعقت من الفرحه

و الناس اللى عندى فى الصيدليه ضحكوا عليا

بس و لا يهمك يا حبيبتى كله يهون عشان يسوفه القمر

كل سنه و انتى طيبه يا منتى

يعني تفرحينا امبارح وادخل عشر مرات الاقي البلوج تبعك مهيس تهيسة كبيرة ومانعنا نفرح معاكي
مش اخلاق بلوجات خالص دي :)


صباح الفل والعسل الأبيض
اظن ابيض فعلا وزي الفل

بذمتك يا فاتيما مش حب عادل وفرحته وحب باسكيتو ووردها الأبيض
ومكالمة روح قلبك يوسف بذمتك مش جوائز سماء
اعترفي فورمااااااااااااااااااا

ربنا يفرحك كمان وكمان ويجعلها بداية فرج من مجاميعه

كل سنة وانتي وكل ماما في البلوج طيبة

ها اغيب كام يوم كده لظروف بس حبيت اصبح واقول صباحو قشطة قبل الغطس وها اتابع بس مش ها اقدر ارد ولا ادخل الا لو قادرة
واشوفك على خير بعد كام يوم ان شاء الله

بوسة وحضن وكل سنة ومامتك طيبة يارب

الللللللللللللللللللله على الجمال صحيح ليا نشاط هنا على قدى بس بردو كان نفسى ابقى معاكم الكتره فى الخير بتكتره

انت جميله وحبايبك كلهم جمال وعلشان قلبك الجميل دا ربنا هايكرمك فى يوسف
ومش هايغيب عن حضنك كتير باذن الله

ربنا يقدركم يارب ويقدر كل اللى زيكم ويتقبل منكم

والله اكتر حاجه بتسعدنى لما بشوف دا
الحمد لله رب العالمين

تقبلى مرورى يام يوسف

الف مبروك يا طمطم.. شوفي ربنا بيحبنا ازاي؟ مش بيحبك لوحدك.. بيحبنا احنا كمان لاننا بنفرح لفرحك.. ربنا يفرح قلبك كمان وكمان .. ومين عارف.. مش يمكن يبقى يسوفة ف حضنك قريب؟ مش بعيد على ربنا والله.. شوفي كنتي خايفة يكون اتغير من ناحيتك من بعده عنك فربنا حب يقولك: لا.. ابنك عمره ما قلبه يتغير على ام حنينة وطيبة زيك.. ربنا يكرمك يا طمطم
وكل عيد ام يا حبيبتي وانتي طيبة وحنينة .. اوعي يا طمطم لما يوسف يرجعلك تنسينا وتبطلي تهتمي بينا وبكل شؤونا كدة.. ربنا يطمن قلبك عليه ويطمنا دايما عليكي.. ولو انتي مش ام يا فاتيما مين تستاهل تبقى ام؟
بحبك

علشانك النهاردة
الدنيا كارت معايدة
ملا الربيع اركانه
بمليون الف وردة

صباح الخير يا مولاتي
بنتك

كل سنة وانت طيبة وبالف خير يارب
كل سنة وانت اطيب واحن ماما في الدنيا

ربنا فرح قلبك يا فاتيما زى ما بتحاولى تفرحى قلوب غيرك


يارب بقى موودك يبقى احسن .. مالكيش حجة اهو :)

الحمدلله انك اطمنتى عليه و سمعتى صوته و عقبال ما يزورك ان شاء الله

ياحبيبتى ربنا يخلى يوسف ويرجع لحضنك ويخليهولك يارب


فرحتينا معاكى ربنا يخليه وتفرحى بيه

حقيقى كده يبقى عيد ام

كل سنه وانت طيبه

فرحتنا كبيره
وربنا يلم الشمل

الله الموفق

كل سنه وانتي طيبه وسعيده وولادك في حضنك يا احلي ام في الدنيا



بحبك قوووووووي
لسه كنت بقول لعادل ابنك اني فاكراكم سوا بس مقولتلوش كل الكلام
هقولك عليه بيني وبينك بقي

القصيده ان شاء الله هتتكتب واهداء خاااااص لييكي
وحشتييني موت
ربنا يسعدك ويكرمك بيوسف وكل ولادك ياااااااارب

لو باخد فلوس عن كل دمعة بتنزل لما باجى مدونتك..كان زمانى مليونيرة

كل سنة وانتى مامة يوسف

اول الغيث مكالمه ان شاء الله تشوفيه قريب وتاخديه في حضنك يا فاتيما او يا ام يوسف بقي
كل سنه وانت طيبه وكل الامهات بخير وان شاء الله اكون معاك يوم 9-ابريل

الحمد لله ملء السموات والارض ومابينهما
عقبال ما يرجع لحضنك ان شاء الله
كل سنة وانتى طيبة وكل الامهات بخير وصحة وسعادة
والاب ليه رب اسمه الكريم
هههههههههههه
تحياتى

فاتيما
ليه كل الناس داخله تقولك عيطنا في البوست رغم انه بوست مبهج ومفرح انك سمعتى صوت ابنك بعد غياب
يا جماعه الست مبسوطه وفرحانه انتو ليه بقي بتعيطو وقالبنها محزنه كده؟
فاتيما عايز اقولك بحبك قوى .. وفرحان علشانك وعلشان فرحتك قوي قوي قوي .. وبضحك مش بعيط

صبحت على يوسف :-)
امسى عليك
:-*********************************
:-XXXXXXXXXXXXXXXXXXXXXXXXXXXXXXXXX

اكتر حاجه فرحت بيها هي مكالمة يوسف شفتى ربنا ادالك هدية كبيرة ازاي يوم عيد الام

ربنا يسعدك ياقلبي دايما ومش تشوفى اي شر

فرحتك دي من قلبك الابيض الطاهر النقى

كل سنة وانتي بالف خير يامامي يوسف
وان شاء الله يوسف يرجع لحضنك قريب
ومافيش حاجة بعيدة على ربنا
وانت اجمل ام
من قبل ما اشوفك
بحبك لكل اطفال البلد
وكل طفل حطيتي او كنت حتى جزء من سبب لرسم بسمة على شفايفه او دخول فرحة لقلبه اكيد انتي احسن من امهات كتير في اديها تعمل كتير لولادها لكن ربنا مش مديهلها حنية حبة كتير زي اللي في قلبك
انا ليا سؤال
بحق الجموع اللي في عيني ماتزعلي منه
انت مش بتشوفي يوسف ولا مرة؟
يعني سنتين من غير ما تشوفيه ولا في اوقات بتشوفيه
لو سؤالي او اجابته مش مريحة ليكي انسي
يا اجمل ام
تحياتي

بسم الله الرحمن الرحيم

و بشر الصابرين الذين إذا أصابتهم مصيبة قالوا إنا لله و إنا إليه راجعون

صدق الله العظيم

الآيه دى مش مرتبطه بالموت فقط كما هو شائع عندنا لكن بكل ابتلاء و انتى فى ابتلاء ربنا يصبرك دائما و أحسبك كده فعلا

و بكره ضناكى يكبر و يمتلك الاختيار و تأكدى ان ما أن يشتد عوده قلبه هيدله عليكى

و ان شاء الله يكون قريب يفرح قلبك و يرد عليكى نور روحك

------------------------------

انا مستمتع بمدونتك و مستمتع اكتر بكلامك عن يوسف و وصف كل اللى بينكم بيثير فيا شجن غريب تجاه علاقتى بأمى ربنا يديها الصحه

مبسوطه اوي ان يوسف كلمك
يارب يسعدك يارب ويجمعك بيه قريب وعلي طوووووووول

ربنا يقدر على الخير دايما يا احن ماما في الدنيا
ويخليلك يوسف ويرجعه حضنك من تاني يارب

كل سنه وانتى طيبه يااحلى ام يوسف ياااااااااااارب
بجد بجد انتى جميله اوووووووى

ربنا يجازيكى كل خير ...

بجد ربنا بيحبك عشان اتى بتحبى كل اللى حواليكى ...
ربما يعوضك خير دايما يارب

بحبـــــــــــك ...

... ;) ,,, ;) ...

صباح الخير يامامتي
كل سنة و انتي طيبة

بصي انا غير الناس دي في الفيديو غريب معلش
جربته في وندا و حماتي و كبيرتنا
بس طبعا انتي الاصل :)

http://www.youtube.com/watch?v=Ki2LpPuorTA

طماطماااااااااااايتي
بصي بقي مش هقولك فرحت قد ايه بالتعليق بتاعك
اقري الرد وانتي تعرفي بقي
بصي كمان بقي هنزل بوست لازم تقريه بجد عشان فيه مفاجأه جامده قوي قوي هتعجبك
وحشتيني قوي قوي
ميسوطه قوي ان القصيده عجبتك وانك اخدتيها عندك
دي زادت يا طمطم بجد
خلي بالك من نفسك قوي

أنا عارف أني مقصر كتير والله

إنما مكنش ينفع يجي يوم زي النهاردة

ومجيش هنا علشان اقولك

كل سنة وأنت طيبة

والحمد لله فرحت اووي بمكالمة يوسف لك


ربنا يخليه لك ... ويخليكي له

انتى فين يا امى
بقالك يومين مادخلتيش ولا حسا بوودك عند اى حد
لعلى الغايب خير يارب

كل سنة وحضرتك طيبة
كتابة رائعة حقا
سعدت بالتعرف الى مدونتك الجميلة
انا مدون سودانى
اتمنى نكون اصدقاء

كل سنة وانتِ بخير وسعادة وحب وتكوني في حضن يوسف الامور ربنا يباركلك في عمره

لـــولا

كل سنة و انتوا طيبين يا اعز الناس
--------------------------------

ردود مجمعة معلش عشان غالبا هكرر الكلام و هتزهقوا منى خالص بقى



ستوتة
-----

جوائز الصبر مش بس جملة قولتيها ف يوم
دا يقينى يا ست السوتيتات كلهن
اللى بيخلينى اقوم الصبح من سريرى
و يخلينى اعيش يومى بكل ما فيه من سعادة و شجن لأنى عارفة ان ربنا شايلى و شايل ليوسف خير و شايل لكل حد بحبه و مبحبوش حتى خير

انا ام كويسة حتى معاكو
لأنكم بتخرجوا منى احسن ما فيا
و هذه حقيقة مطلقة يا حبيبتى





صيدلانية طالعة نازلة
-------------------
انا بترعب من دلعك دا قوووووى
يا رب اكون بستاهله
و انا كمان بحبك




adel
Baskouta
---------
كل سنة و انتا حتة من قلب ماما
و انتى عيون مامى يا بسكوتى
ربنا يخليكم ليا
يموت فى غنوة سعاد حسنى دى جداااااا
و هاديتنى بأجمل غنوة بحبها عن الام

و حلو المقطع يا دولا
لازم تكون حاجة غير أى حد
إنتا مميز .. ابنى يا نااااااس

بحبكووووووو يا عيال
فوق ما تتصورا




الغير معرف
---------
التشبيه مقصود بيه
ان الروح عبارة عن بيت
و له باب بينقفل قصاد الناس عموما لأن صاحبه خايف على نفسه او بخيل ف مشاعره او اى سبب كان يعنى

لكن يمكن ف يوم لما حد صدفة
يخبط ع الباب دا
فصاحب البيت يفتح
و يقول نعم عاوز ايه
و يرد حاجة السائل ...
ساعات عشرة تخلف و مرة تصدف
فلو صدفت معانا يبقى كويس

دا كان قصدى

لو التشبيه طلع ركيك
و مش عاجبك
انا اسفة يا سيدى

منا كمان يعنى حضرتك مقولتش انى سيبويه و لا الخليل ابن احمد
و لغتى العربية على قدى
فمتدقش معايا على كل كلمة بقولها

احنا مش كنا قولنا
خليك
شيك
!!!!!!!!!




زهراء
-----
يا ذات الوجه المشرق
و الله يا زهراء طول عمرى اعتقد ان للواحد نصيب من اسمه
عشان كدا بقولك يا ذات الوجه المشرق لأنى بحس حتى ان كلماتك و هيا بتنكتب منورة و فرحانة من غير حاجة
منحرمشى منك






الزهرة البرية
------------

ميرسى جدااااااايا حبيبتى على الغنوة
منحرمشى منك



osama
------
اهلا بيك
يسعدنا يكونلنا
مدون و اخ من السودان الشقيق


شيريهان
-------
مبروك دخولك عالم التدوين
ان شاء الله ارد الزيارة




عارفة ... مش عارفة ليه!!!
-----------------------
وحشتنا تعليقاتك يا وليد
كل سنة و انت طيب يا عزيزى
منحرمشى من سؤالك علينا

فكرة من الزمن ده
----------------

شكرا يا فكورة على مشاعرك الطيبة
و معلش عيطتك انا اسفة

و بخصوص سؤالك دا
فإجابته شرحها يطول
و انا الليلة مش مشغول و لا حاجة
بس مليش نفس أزعل
لأن الإجابة هتزعلنى شوية
و تفكرنى بحاجات مش عايزة افتكرها
فممكن تيجى مناسبة احسن و ابقى اقولك فيها كل حاجة ...ماشى؟
بس شكرا على اهتمامك بجد



mostafa rayan
-------------

ربنا يخليك يا مصطفى و منحرمشى من مشاعرك الحلوة دى انا حساها و الله من غير ما تقول
و دايما كلامك و نظرتك بتؤكدلى ان والدتك ست عظيمة جداااااا عشان تربى ولد باصص للمرأة بإحترام و ود شديد كدا ..اكيد لازم تكون ست عظيمة بجد و امتنى يوسف لما يكبر يحبنى و يحترمنى و يحترم أى ست كدا ...زيك

و الأحباب هنا يا صفصف
بيعيطوا معايا من الفرحة
مش زعل و لا نكد ..


منا عيطت انا روخروا
و لا فاكرنى هعدى مناسبة رهيبة زى دى
من غير ما انهنهلى شوية ؟؟!!

و اهم جم من نصيب علا
صيدلانية طالعة نازلة
هيا اللى خدت العياط كله
اصحاب اونطة احنا يعنى !!

احنا شعب عاطفى يا بنى
نزعل نعيط
نفرح نعيط
انا اللى هقولك يا فنان يا عاطفى برضو؟؟!!!
يشرفنى بس مجرد السءال




enjy
----

متزعليش يا شقاوة ع الآخر
قصاد العياط دا كله
لما اشوفك هديكى بداله
بوسات و حضونات
ماشى ؟




ashraf
------

يا دكتور زيارات حضرتك
و تعليقاتك بجد بتسعدنى جدا

كل سنة و حضرتك طيب
و علا منورة حياتكم علطول
انتا و الولاد
و حياتنا احنا كمان لأننا محظوظين بمعرفتكم انتوا الأربعة




حنان الشافعى
-----------

القصيدة روعة يا حبيبتى
و انا ممتنة ليكى لآخر نفس
على رقتك و جمال روحك
و حبك الكبير اللى باين من سطورها
و يا ريت استاهل نصه حتى
لأنه كتيييييير قوى قوى
و انا معملتش حاجة تستحقه بصراحة

و هروح اشوف البوست الجديد
حاضر

بحبك قوى
و سلامى لماما قوى
و ميحرمكوش من بعض



حفيدة عرابى
----------

قريت تعليقك عند علا يا فيدوووو

انا حاسة يا حبيبتى بفرحتك من غير حاجة و منحرمشى منك أبدااااااا يا رب
فعلا انا مكنتش عاوزة افسد لحظات الكلام مع يوسف بأى شىء

الحمدلله الف مليون مرة





القدر و انا
-----------

الناس الحلوة اللى بتكتب امنيات و تتحقق اهو
منحرمشى منك يا نانو

انا بحبك قوى




بنت قلبى
--------


انا بخير يا رنا
متقلقيش يا حبيبتى خالص

المكان متشيليش همه

احنا لسه قصادنا وقت على 9 ابريل ما ييجى و عموما عشان تطمنى اللى ف البيت قوليلى هتنزلى فين و انا اقولك تركبى ايه و هنروح نبعت حد يجيبك من عند المكان اللى هتنزلى منه و غالبا هيكون محطة مترو سعد زغلول لأنها اقرب حاجة للمستشفى

المستشفى فى اول القصر العينى عشان تقولى للبيت عندك
شارع رئيسى و مكان معروف و متشيليش هم حاجة هنرتب قبلها و كله يبقى تمام ان شاء الله

منحرمشى منك يا حبيبتى و ربنا يقدرك على فعل الخير و فرصة نشوووووووووفك أخيرااااااا

ربنا معاكى يا بنت قلبى

كل سنة وانتى طيبة يا ام المدونين
حلو كدة كبرتك بتاع 60 سنة كمان
ربنا يارب يفرحك برد ضالتك
اما عن الصدقة الجارية والتبرع فدى فكرة جميلة جدا ربنا يبارك فيكم ويجعلها فى ميزان حسناتكم يارب العالمين

الكلمة نور
----------

اهلااااااا يا مالك الاجنحة

انا عارفة ان مجييك هنا مش سهل

انا متشرفة جدااا بالتعليق

و بالمعايدة

كلك ذوق و كلماتك على بساطتها
فيها خير
و نور

يا نور







عاشقة الرومانسية
----------------


الكبيرة بتاعتنا لا ممكن تقول حاجة غلط أكيد
بس هيا برضو دايما شغالة كورسات رفع نعنويات دائما و ابداااااااا

انا كمان بحبك قوى خالص يا قطتى






قوس قزح
-------


يا دوللى انتى متصورة انك تطلبى منى حاجة زى دى و اقول لأ او افكر انى انقى و اختار ؟؟

و المربع اللى قولتى عليه دا
مربع خيمة

و الوتد اللى ف النص
و اللى مرتكز عليه الأربع جوانب


هوه ... يبقى


وش الخير و الفرح
قوس قزح
الوان السما السابعة
و القلب و العقل و الجدعنة
و حبيبة قلبى ام هنا



انا نمت و صحيت قولت هكتبه
من غير حاجة و الله
لأنك قولتى و طلبتى
مكنش ينفع أتاخر ابدا
حتى لو فيه ايه

انتى من الناس اللى ربنا اختصهم بقضاء حوائج الناس يا داليا
انتى و خالد همس الاحباب

انتوا الغتنين اكتر ناس بلاقيهم ينطبق عليهم هذا القول
و كمان ايناس نهر الحب و العطاء
و ساعات خيخة ينطبق عليها هذا الوصف برضو
الملخص عشان مطولشى عليكى

انا م الآخر بحبك قوى
و ربنا يخليكى سبب دايما ف الخير و الفرح و لو فيه اى حاجة مطلوبة منى قبل يوم 9 ابريل قوليلى
لو عاوزة تعملى حاجة للعيال
و كدازى المرة اللى فاتت مثلا

استنى يا داليا


ايه رأيك نجمعلهم كتب تتحط فى المكتبة اللى قعدنا فيها المرة اللى فاتت

فاكرة كانت فاضية ازاى ؟؟

متيجى نعمل حملة زى يوم المكتبة بتاعك و نلم قصص و مجلات و كتب نتبرع بيها جنب الفلوس بالمرة
ايه رأيك؟؟؟

AHMED SAMIR
------------
мαησηα
-----------
أحمد عبدالعدل
-----------
خالد همس الاحباب
-----------
Wanda
-----------
سمع هوص
----------
AbuShoSho
----------
NeVeN
----------
جنى
------
Che
------
richardCatheart
-----------
bobo
-----------
Manamino
----------
GiGi world
----------
كـيــارا
----------
esraa
----------
just waiting
-----------
ghAdA mOhsen
-------------
لــولا
---------
Guevara
----------

منحرمشى منكم يا جماعة
و كل سنة و انتوا طيبين و حواليا
و بيتدعولنا انا و يوسف

بمجرد ما قفلت معاها فتحت تحرير الرسايل و قولت لازم افرحكوا معايا بخبر زى دا و مكنتش بصراحة متخيلة ان فرحتكم هتكون بالشدة دى

الواحد يعمل ايه بس عشان يستاهل حبكم دا و يرد بعض منه ؟؟

مظنش هقدر مهما عملت


كل سنة و انتوا طيبين
و احنا طيبين
و احلى ناس
و صحبة
و عالم عرفته

نهر الحب
------

فيكى الخير كله يا آنوس

دنا لسه جايبة سيرتك
و انا برد على قوس قزح
القلوب عند بعضيها يا حبيبتى

و لو فيه خير
فالبركة فى ربنا
و في داليا
و ف ناس زيك
يا نهر الحب و العطاء

اقرى ردى على داليا
و انتى تعرفى ماذا اقصد

كل سنة و مامتك الجميلة الطيبة بألف خير و صحة يا رب

و بوسيلى نسمة لو سمحتى

يا مساء الحلويات على الامهات الحلوات فى عيد السكر النبات :-))
كل سنة و انت طيبة 1 عقبال الاحضان و القبلات المتجسدة من يوسف :-**
كل سنة و انت طيبة 2 و مبروك عليك الجايزة ام ضحكة جنان :-))

الاصطبحات
صباح الصفقات
و اخرت خدمة السيد ايه ؟؟؟

صباح السخافات
اقولك انا اشمعنا 3
اصل الصين يفكوا الحزان و بدل طفل واحد حيخلوه اثنين :-)) كده حبقى زى الصنيين :-))
المهم الغلابة الى مقصودين حسجلوا الاولاد و يطنشوا البنات و مش حيدخلوهم مدارس :-(( و نرجع نتوكس ثانى يادى النيلة

صباح الناس الحلوة
فكرنى بفكرة بنك الفقراء بتاع الراجل البنجلاديشى الى خذ عليها نوبل للسلام
بس حتة التحيز للسيدات على الرغم من صحة كلامهم بس بيعدل نص مجتمع للاسف
لو راجل جد فى شغله و كلامه ميسعدهوش ليه ؟؟

صباح البكش
:-)) و دول بقى المسقفين بتوع السقافة و لا السخافة؟؟

صباح المانشيتات
طيب ميعملوها اجبارى
فكرها لما حصلت و القاهرة كلها ظلمت لان كان فيه مشكلة فى السد العالى
تصدقى كانت ساعة او اثنين بس حسيت باحساس ثانى للقاهرة

صباح الكسابيات
مستر اكس :-))) ده احلى اكس فى الدنيا
الى بيقتل بالبوس ده مش كده :-)))))))))))))))))))))))

الا محدش رجع لسه ، الواد ده مستعجل ليه ؟؟

صباح الإستهبال
ممكن الكل نلمهم فى شوال واحد يخلصوا على بعض و نستريح
و جورجيت مش عايزة الغول يبوس على راسها :-)) ليها حق لو الراجل شتم حقها تروح النيابة ماالمجلس مظبطتش حاجة اهو :-((((
ده مجلس الشعب و مجلس شرب ال... الشاى ؟؟؟

صباح المناصب
مش فاكرة حاجة للراجل ده
الا انه اقنع قرية فى الاقصر انهم يسيبوا بيوتهم لمنطقه ثانية ؟؟ تقريبا بلادياته ؟؟

صباح المقارنات
لا نانسى اتنجرت من جديد علشان تعجبنا
و جمال بنجرنا احنا علشان نعجبه :-))
و باب النجار مخلع ليه ؟؟؟

صباح السلامات
ومتنساش تحوش شوية أصحاب
وافرح أوى لما يدق الباب
وتلاقى حد بيحضنك
لوجه الله

فاكرة الشعر ده لما كتبته فى اول معرفتنا :-))) ياه ده كان من كام سنة؟؟
:-))))

صباح الأغانى و الدندنات
صباح الخير يا مولاتى:-))

فاتيما

ربنا يفرح قلبك داااااااااايما يااااااااااارب

بجد والله فرحتلك حتى وانا بقرا حسيت انك فرحاااااااااااااانة اووووووووووى

ربنا يخلي لك يوسف يااارب

ويكرررررمكم فى كل خير بتعملوه عشان تساعدوا الاطفال والناس اللى حواليكم

وحشتيني قوي يا فاتيما.كل سنة و أنتي أحلى أم و أحن أم و اكتر أم صابرة و متحملة.ياا رب يفرح قلبك بيوسف و يقر عينك.أسفة اني بقالي فترةمش باجي..بس و الله غاصبعني.بحبك قوي قوي

داخلة اقول لك كل سنة وانتي طيبة
لاقيت احلي خبر في الدنيااااااا

انك كلمتي يوسف

فرحانة لك اوي ياحبيبتي

ربنا يسعد قلبك


وافتكري انه ان شاء الله راجع راجع لحضنك بس راجل ملو هدومة

كل سنة وانتي اجمل ام في الدنيا


سلامي

صباح الربيع البارد :-)) حاليا و الدفئ لاحقا انشاء الله

:-*************************************
:-xXXXXXXXXXXXXXXXXXXXXXXXXXXXXXXXXXXXX

موافقة طبعا
اى حد عايز يجيب حاجة تانية للاطفال الا الاكل الباب مفتوح للكل

كتب ..لعب ..لبس ..غطاء..اى شىء مناسب لطفل مرضى

و بعدين تعالى هنا
لو انا كده زى ما بتقولى يبقى انتى ايه ؟
ده الحنان اللى فى قلبك للاطفال بيغطى اى مكان بنروح ..ده انا باقعد و اتفرج عليكى معهم علشان بس احس ان الدنيا لسه بخير ..ولا نسيتى انتى و سومة عملتوا ايه المرة اللى فاتت ؟

ربنا يبارك لكم انتم الاربعة على مجهودكم اللى عمرى ما شوفت زيه
و ده اللى بيخلينى احب اكون معاكم
انتم و كل الناس الحلوة اللى بتساعد بنية خالصة لله

wanda
-----

كل سنة و انتى طيبة يا ون ون و متخانقسن ع المخدات علطووووووولى يا رب


طب و احنا زى الصين يا ون ون
ايش حال ما كان قايل الطبقى الوسطى عادة بتخلف كام
و الفقيرة كام

طب وسطنها يا اخى و خد رأى العالم اللى هما الشعب ؟!!!

مصر مليانة ستات و رجالة زى كدا كتير بس محدش حاسس بيهم
دول ملح الأرض زى ما بينقال
و اللى الدنيا ماشية عشان هما ناس حلوة


فاكرة انا حكاية قطع الكهربا دى
كنا فى رمضان تقريبا و كان بعد الفطار
صح؟؟ سنة 89 تقريبا

هيرجع يا ستى




فاكرة طبعااااا انتى بتحبيه و كنتى حاطة اللينك فى البلاليست بتاعك عشان نسمعه و هوه بيقوله القاء

مش كتير قوى يعنى
انتى لسه مدونة نونو يا ون ون

شوفتى
نونو
عكس ون ون ازاى ؟؟؟

صباح ال
*****************************
و ×××××××××××××××××××××××××××××
عليكى يا ونداتى






star in the sky
---------------

ميرسى يا ستار

انا اللى بستغربله
ازاى النجمة العالية ف السما تشوف الناس ع الأرض حلوين كدا من بعييييييييد ؟!!!!

ميرسى يا حبيبتى





dahlia...
--------

مش مهم التاخير يا داليا
المهم انك بخير و العيال كويسين
و انا بفتكرك علطول
و كنت حطاكى فى طابور الأمهات
حاولى تيجى يوم 9 ابريل بقى
لو قدرتى يعنى

انا كمان بحبك قووووووى
يا حبيبتى





شمس النهار
---------

ازيك يا شمس النهارات كلها

شوفتى يا ستى
كلمنى و كان الحمدلله كويس قوى
افتكرت كلامك لما قولتى ان ممكن يكون معايا و تعبان او بعيد و كويس

متتصوريش كلامك أثر فيا يومها و لحد دلوقتى ازاى ...انتى حد جميل و مليان عطاء بشكل رهيب

على فكرة
اسمك لايق قوى عليكى
سلامى لمنى لو سمحتى ..ممكن ؟
و بوسيلى البنات





قوس قزح
-------

خلاص يا وش الخير إتفقنا
هدور على طريقة ما
اكتب بيها تانى الحكاية و احدثها بإستمرار و اعمل لينك لبوست خالد و نقول ممكن يتجاب ايه ؟؟

انا مبعرفش اتصرف قوى مع العيال على فكرة
سوما كانت ما شاء الله مشجعانى انا بغرق ف شبر مية كتييييير بس بتحامى فيكم و لولاكم و لا روحت و لا جيت

بحبك يا وش الخير و الفرح كله

ربي يفرح قلبك دايما ورد لك يوسف ردا جميلا يا أم يوسف ...ربي يبارك في أعمالك ويجعلها حسنات جارية إلى يوم الدين...تحياتي

إرسال تعليق