.

.

خـضـنـى ... شـــكراً  

Posted by: فاتيما in ,






قولنا مليش انا ف الموبايلات !!

و مبحبهااااش يا ناس
و مع ذلك تحت ضغط عائلى و بلوجرى

اشتريت عدة و خط
و فتحته

عشان مسمعش الكلمتين اياهم
كل شوية بتوع
افتحى موبايلك عشان
لو جرالك مصيبة ف الشارع نعرف نلاقيكى

لو يوسف جه نتصل بيكى فين ؟يا فاتيما بتوحشينا
مش عاوزة تسمعى صوتنا يا رخمة !
ايه البرود بتاعك دا
(محدش بيقولها بس انا فاهمة ضمنياً)
طيب
حاضر
جبنا النيلة النوبايل
و فتحناه
و الأتصالات حايرة طايرة ف الهواء الأثيرى

و دقايق شحن كل شويةمعلشى ى ى .. عشان خاطر
الحبايب نوضحى

يلا مش خوسارة فيهم
و بكرة اصلاً يندموا


المهم
اختكوا بقالها يومين
مبتتصلش بحد

اكمن رصيدها زيرو
عاتى يعنى
انبارح الصبح شحنت بعشة جنيهات
و قولت اتصل بصيدلانية طالعة نازلة
أعزى دكتور اشرف جوزها
عشان عنده حالة وفاة



الموبايل مرضيش يجرى الإتصال

عاتى برضو مخدتش ف بالى
قولت ابعت رسالة ... فشلت تماماً
روحت الشغل و لما بروحه اصلا
بنقطع عن اى حاجة
فات الوقت و خلصت و روحت

و بتصل تانى
لقيت برضو نفس القصة
الله!!
طب ما يمكن لولاّ نمرتها محجرة معايا
طب اكلم محمد فوزى كدا
و فرصة اتلكك و اسمع صوته

أصوات خبيثة و همهمات من آخر البلوجر
(يعنى فيه محمد فوزى أهوووو )
أيوه .... فيه

بس انا بجيبهالكم
واحدة واحدة
عشان الحاجات دى متتقلش غير كدا
ام هند
فتحت قايمة الأسامى
و بدوس على نمرته

تررررررررررررررن
هيرد أهو
و إذ فجأتننننننن

الاقي واحدة هيا اللى بترد عليا


الله
مين دى ؟!!!!
لا .... دى لازم نمرة غلط
طبعا التصرف الطبيعى لواحدة
محدثة موبايلات
زى حالاتى اييييه؟؟
قفلت ف وشها طبعاااااا
دون ان يرف لى جفن


و بعدين اذبهليت شوية
ايه دا؟؟
هوه تليفون ارضى يا عبيطة عشان تدوسى
على رقم غلط

ايه الهبل دا
دى نمرة و متسجلة

طب اتصل تانى
و اقول بسم الله الرحمن الرحيم
المرة دى عشان النية

جبت النمرة تانى و بصيت كويس
ايون ... نمرة محمد فوزى اهو
دوست
ترررررررررن

لقيت نفس البنت بترد عليا


الوووووووو

لأ بقى
ايه النوظام
- أى خدمة حضرتك ؟؟
دى هيا اللى بتقول

انا ساكتة و الف حاجة ف دماغى
مين دى ان شاء الله ؟
يكونشى محمد فوزى خاطب
و لا متجوز عليا
و انا متقرطسة
و نايمة ف العسل بطحينة



آه ..مش بعيد

ما المراكبى بصلى فيها
البوست اللى فات

و رزع تعليق شورير كله حكد


و كام حد تانى كدا
قعد ينق ع الراجل

و شكلهم كانوا بيحسدوا بذمة



دى توابع البوست الأخير
و العين تفلق الحجر
مش هتفلق مكالمة موبايل ؟؟؟!!


لأ لأ حراااااااام
دول فرحانينلى قوى
و يمكن اكتر منى كمان
كفاية انهم متصورين ان اخيراااااا هييجى حد
يخلصهم من نكدى
هيا دى شوية ..دول ما هيصدقوا ؟!!
لأ مش هما السبب


بس يا لهوتينى
ليطلع كلام المراكبى
صح
.... لالالا
التعليق بتاعه كان قلة مندسة


طب يبقى اسمه ايه دا بقى ؟؟؟
هينضوحك عليا بعد هذا العمر
و لا إييييه؟؟

طب ما نحاول نستمع سويا
لصوت العكل

لتكون أخته مثلاً ؟

لأ دا مقليش ان عنده اخوات بنات

طب مامته ؟
مامته صوتها عاتشفى صغنن كدا
لأ مش معقول طبعا


طب زميلته ف الشغل ؟

بس زميلته 

لدرجة انها ترد على موبايله يعنى!

يبقى اكيد حصله حادثة ف الشارع
و دى واحدة واقفة جنبه لحدما تيجى عربية الأسعاف

يا خراشى بعد الشر عليه
إنشالله اللى يكرهه

يبقى لازم الموبايل انسرق منه
طب و اللى سرقه بيرد عادى كدا ع الناس
دا ايه البجاحة دى ؟؟

على فكرة
كل الافكار دى
ماجت - حلوة ماجت دى - بنهر خيالى
فى خمس ست ثوانى يا دوب
و البت اياها لسه عالخط

و بتقولى متنحنحة

- أيوه مع حضرتك

طب خلاص اتريث كدا
و احاول ابقى شيك و اخلاق

و أعرف ايه الحكاية الاول

و بعدين بعد ما اعرف كل حاجة و أتاكد
ابقى اجيبها بقى من شعرها

و اطبق فى زمارة رقابة صاحب النمرة
اخليه يغنى شحااااااااات
و مد ايديه

بس غالباااااااا
مش هيعرف يمد ايديه
عشان هتكون مكسورة و مجبسة

ان شاء الله بعد ما اخلص عليهم
هما الجوز ف نفس واحد

بكل وداعة و براءة الاطفال
فى صوتى قلت



هوه انا دلوقتى اتصلت على نمرة حد

لقيتك بتردى
فانتى مين
لو مفيهاش رزالة ؟؟

بعد كام جملة مسمعتش نصهم
لأن صوتها كان مسرسع

و منحنح و فيه كل العبر
اكتشفت ان الهانم
من خدمة العملا فى شركة ام نبيل

و آل خطى متوقف عن العمل من امبارح آل
و انى مش واخدة بالى

و هما مش هيشغلوه 

غير لما استكمل بياناتى
عندهم الاول

طب بعد ما استوعبت الموقف
خلاص كدا
محمد فوزى ف قلبى مكانه لم يتزحزح
و الزمارة ثابتة خلاص ف رقبته
و ايده مش هتنكسر و الحمدلله
وحصل خييييييير
و كفى الله المؤمنين شر القتال


استجمعت رباطة جأشى بقى
و قولتلها فيما معناه

- طب ياللى تنوكسى
مش تكلمونى تقولولى عاوزين بيانات حدرتك
و لا انا اضرب الودع و اخمن لوحدى
- معلش يا فندم ما حنا بعتنا لحضرتك رسالة
- طب ممكن تخلصينى ... عشان انا كنت
بتصل بسبع الرجال بتاعى

و انتى كنتى هتتسببى فى ازمة عوائلية
من شويةلما رديتى عليا بداله
و احتمال كنت هاطلق بسببك
قعدت تضحك الموكوسة
و مع مزيد من النحنحة قالت
- انا اسفة لحضرتك

- طيب يا ختى كسبنا اسفك
ممكن بسرعة
بقى عشان رصيدى هيخلص عليكى


- اصل حضرتك على خط المصرى
و الدقيقة مش عارفة بكام ... الخ الرصة دى




يوووه

و بعتييييين بأأأأأه


يا بت انجزى و لخصى
لسه هاعزى ناس و اطمن على ناس

متخلينش آجى اولع فيكى و ف خدمة العملا
و فى مكاتب الشركة ف مصر و الجزاير
و ف مكتب الحاج ساويرس سخصياً
الكل كليلة

بعد دقيقتين تلاتة و كام بيان ناقص و المفروض خلاص هنقفل
و اتصل باللى عاوزة اكلمهم بقى
لقيتها
بتقولى
- خط حضرتك هيرجع كمان ساعتين
تلاتة بالكتيييير

و شكرا لأستخدامك خط ام نبيل
و راحت قافلة بكل برود



متخليين احساسى دلوقتى و لا أقولكم انا ؟
اعصابى هادية اهو
و لا موتنرفزة
و لا موتضايقة

و لا موتغاظة
و لا حاااااجة خالص
كل ما هنالك
ان الفيلم الهندى - حسن الامامى
المشترك اللى فوق دا

خلانى اتاكد انى كرهى للموبايلات
مش جاى من فراغ

و انى مليش ف الحكاية دى من أشاسو
على رأى عادل ابنى

و بناء عليه
قرار فاتيمى رقم واحد
النوبايل مقفول لحين اشعار آخر
و اللى يتصل و يلاقيه مغلق ميقلقش عليا
و ايميلات و تعليقات فيما بيننا
لحد ما افوق م الخضة دى على مهلى


حاجة تانية
مزاجى اتعكر من امبارح
و مفيش صباحات النهاردة

حاجة تالتة
اياك حد من بنات المدونات
تطلع شغالة فى الشركة دى و لا غيرها
و تيجى تقولى ميصحش اللى حضرتك قولتيه
الا و حياة يوسف عندى لدفعها تمن الدقايق
اللى خلص نصهم على النحنوحة اياها



و حاجة أخيرة
الله يكرمكم

القلة المندسة تخف عليا شوية
جرى ايه يا عيال
مالكم وحشين كدا؟

بتحسدوا الغجر على ضل الشجر
عيب دنا اختكو برضو

ايش حال ما كنت مفسحاكوا
و موديكو بورسعيد

و بسطاكو بخبر مكالمة يوسف
و مالية اجندتكو بمعاد ف الخير يوم 9 ابريل
و كل يوم بروقكوا بالأغانى و الصباحات
و بقالى فترة مدياها بوستات بتشر رومانسية
و مش منكدة عليكم اديلنا مدة
و لو انه على نن عينى و الله منكدش عليكو

تبقى دى آخرتها يا وحشين
تنشونى عين انا و فوزى
و عايزين تحطموا كصة حبى

على شاطىء ام نبيل
كدا ابقى فى مهب الريح
و مكالمة موبايل غلط

 كانت هتجيب الحدوتة
الأرض لمس اكتاف 

و احنا لسه بنقول يا هادى
اخص عليكم
مخمصاكم
و مش هكلمكم
مش زعل لأ.. أصل عشان النوبايل

انقفل خلاص هكلم ازاى يعنى ؟!

-------------------------------

اللى عنده قصص مماثلة
يقول و يتحفنا


-----------------------------------------

بوستات صديقة

المصرية للإتصالات شركة واحدة هتخرب بيتنا كلنا ..البت الخيخة

This entry was posted on الأربعاء, مارس 24, 2010 and is filed under , . You can leave a response and follow any responses to this entry through the .

44 كــــلام بيطــبطـــب عـــلى قــــلبى و روحــــى

هههههههه
احب اطمنك الاول على الرصيد
مكالمه خدمه العملاء تمنها 50 قرش مهما طالت مدتها
بس انتى طمنتينى كده اصل كل شويه كانو يتصلوا بيا ومتصلوش باى حد اعرفه بس موقفوش الخط وبعدين بقى انا غيرته خالص
عموما كده افتحى الموبايل خلاص مفيش مشاكل

:-(((((
لا بقى انا بقى الى مخصماكى

يعنى انا مليش فى النوبيل برضه
و اسمى و بياناتى فى الثلاث شركات و ما اسخم من .. الا ...
و الموبيلات اهى فى ايدين العيلة كلها فى مصر و انا نرمتى سحبوها ومخذتش الا الصداع

و قولتلك حوديكى المأذون و مباركه الجوازة و حلبسلك شنب
اكثر من كده اعمل ايه
اقطع فى نفسى نفسى :-(((

مخصماكى و مش مصالحاكى
الا باصطباحات
معتبرة كده على مقاسى و مقامى

صحيح كنت عايزة رايك فى بوست ......
امممممممم
طيب اقولك ازى وعلانا كده و انت مطنشة اميلاتى و قافلة النوبيل الى معرفش نمرته :-))) و بعد ما عملت كل الاحتياطات التخفية تطلع جزمتى بتزيق و اقول عند فطوم انا بخبى ايه :-)))))

اه صحيح مش حاصالحك الا لما تقوليلى كمان فوق الاصطباحات
كنت حتقولى لمحمد فوزى ايه ؟؟؟؟
:-)) وش بيغمز
--------------------------------

اه بمناسبة الموبيل
يوهههههه
حواديت كثير
اكثرهم فى عقلى
الحدوتة ديه خذى عندك ......

و لا اقولك
انا حستنى لما تجيبى الجاتو و الحاجة الساقعة و تصالحينى و تحيلينى شويتن
:-)))))))))))))))))))))))))

و مفيش بوسات و لا حضونات
و لا توصيلات و لا عربيات و لا زفات
:-((((((((

:)

أحلى حاجه ان الواحد بيجر جراً لنهاية البوست وهو سعيد

والأحلى
انه ببلاش

ربنا يخلينا ليكي يا رب

الووووو
مساء الخير يا فندم
معاكي بسكوتة
من خدمة سكتني شكرا
نظرا لان حضرتك تسببتي في ازمة ضحك قوية ... حاسة اني هاخد استمارة ستة على اثرها ... ودقات قلبي المتسارعة بتستنجد بحضرتك زي ما ضحكتيني سكتيني لحسن هموت منك
ومش الخط اللى هيتوقف ده القلب بتاع الانا هو اللى هيبقا خارج نطاق الخدمة

وهنا احب اقول لحضرتك اننا محتاجين نستكمل بيناتك علشان لما قلب الانا يصبح في خبر كان من اثر الضحك المتواصل نعرف نتصل بحضرتك ونقولك
عفوا لقد نفذ بسكوتكم

ونود ان نخطر سيادتكم بان سعر المكالمة خمسين بسكوتة مهما زاد سعر الدقيق

الا انه في حالة توقف قلب الانا عن العمل بسبب حضرتك فنحب نوجه عناية سيادتكم بان توقف الخدمة البسكوتية البلوجرية يعرضك للمسالة القانونية
التي قد يتم اعفائك منها في حالة دفع الغرامة.
( وش بيغمز )
شكرا لاستخدامكم الخدمة البسكوتية

روح قلب ماما شبكة واحدة بتضحكنا كلنا
هههههههههههههههه
بنوتك الفطسانة من الضحك

فاتيماااااااا
صباح الورد والفل والياسمين على احلى فاتيما .....

بصى يا ستى كلام جد والله لانى تبع لهذه الشركه التى يقال عنها انها اسوأ شبكة محمول فى مصر سورى اقصد اول شبكة محمول فى مصر
المهم تقريبا السنه اللى فاتت اعلنت كل برامج التوك شو على هذا الموضوع وانه هيتم ايقاف كل الخطوط التى لم تستكمل بيانتها , مش فى موبينيل وبس لا فى كل الشركات ولانى يقال عليا انى حد ذوق شويه ولما اتعامل مع اى جهه باكون فى قمة الاخلاق اتصلت بنفسى بخدمة العملاء ورد عليا صوت واحد شبه صوت محمد فوزى كده :-P
قولت له انا اتصل علشان اكمل بيانتى قال لى نعم قولت له عاوزه اكمل بيانتى قال حضرتك نتعرف بيكى المهم كلمته وضبطت البيانات وفى الاخر قال لى حضرتك ذوق اوى احنا ماحدش بيتصل بنا يحدث البيانات احنا اللى نجرى وراء العملاء شوفتى الذوق اللى انا فيه ...

وزى ما ماجى قالت ان مكالمة خدمة العملاء ب 50 قرش
وياستى اللى يجى فى الريش يقشيش واحنا عارفين انك كريمه يوووه اقصد فاتيما

يلا افتحى الموبايل علشان الناس تتطمن على احلى فاتيماااااااا فى الدنيا كلها

زهراء

ههههههههههههههههههههههههههههههه
إلاهي ربنا يخلي سي محمد فوزي يارب
اللي خلى مزاجك عنب كده
يارب دايما
ومن منبري هذا احب اقول ان مفيش مانع تطلقي حملة بخور في المدونة
وتقفي تبخري سي محمد فوزي وتقولي له
ومن شر النفاثات في العقد يا سي محمد
او تحطي على البانر فوق عين زرقا وتقولي الحلوة نوسة عليها اقساط
وممكن برضك تنفع فردة شبشب تحت خالص بعد المكس بود
ونكتب العين صابتني ورب العرش نجاني :)
صباح الفل والعثل والثكر على عيون الحلوين
اللي كانوا ها يدخلوا محمد فوزي التأهيل المهني من الغيرة بدل ما يدخل دنيا :)
لأ متوحشة متوحشة مفيش كلام
ونعم النساء بتوع الجمعيات :)

الف سلامة عليكي من الخضة يا بطوطي

إن جيتي للحق هنا بايخين قوي انا اعرف انهم بيتصلوا يكملوا البيانات

والمكالمة دي مجاناً هما بقوا بيتقشفوا ولا ايه ؟

الفلوس غيرتهم بس كدة يا بطوط تجيبي نحنول ومش تقوليلي :((

زحلان بجد يعني وكمان مش رديتي ع الميل بتاعي

خلاص معدش فاضلي غير المدونة

عزيزتي قرأت خبر مكالمة يوسف في مدونة ام مالك ووالله العظيم أحسست بفرح غامر وتصورت فرحتك كيف ستكون فجئت هنا لأهنئك وأقول لك مبروك المكالمة وان شاء الله قريبا تفرحي بشوفته يارب
مبروووووووووووووووك يا فاتيما والله العظيم فرحانة لك من أعماق أعماق قلبي
دمت بكل الود

هههههههههههههههه

والله انتى زى العسل

وبعدين ياتوتة مش نقدر خالص نحسدك

تفتكرى البراءة اللى فينا دى كلها ونحسد ؟
هههههههههههههههههههههه

هما اصلا في شركات الموبايل كلها بيحاولو تكون كل البيانات موجودة دلوقتى لان الخطوط اللى كانت بتتباع من غير اى بيانات دى عملت مشاكل كتير

ومش تخلى اى حاجة تزعلك ياقمر

سلام وبوسات كتير منى ومن مامتى اللى بجد نفسها تشوفك اوى اوى اوى

هههههههههههه

مبررررررررروك ع الأرض قصدي ع الموبايل

///

في أغنية لفيروز إسمها
قمرة يا قمرة لا تطلعي ع الشجرة

مش عارف كل أما أدخل المدونة هنا أفتكرها !

عاااااااااااااااااااااا

يعنى نفذتى تهديدك و قفلتيه

طب انا بقى حتصل بام نبيل و اقولهم لبت دى سرقت الخط

و حتصل بمحمد فوزى و اقوله روح منك لله

هههههههههههههههههه

بقالى ساعه امبارح اقوللك بلاش تقفلى النيله النوبايل

و انتى اللى فى دماغك فى دماغك

و الله لاجى اضربك

و حلال فيكى اللى عملوه

هه

بس

و انا كماااااااااااان مخصماااااااااكى

فكرتينى اول مرة جبت موبايل

وهو تقريبا اول موبايل ظهر على وجة الكرة الارضية دى

يدوبك بيرن بس وكمان بطل دلوقتى يرن لامش باظ محدش بيتصل هع هع هع هع هع هع

على رايك ام هند بقى اتصلت برقم وفاكرة نفسى هعمل مجعزة واخليه يتكلم لم احط نغمة من اللى بتتكلم وبتغنى

والاخر اكتششششششششششششفت

انها كول تون من اللى الواحد بيسمعها لما بيتصل بحد

ومن وقتها وبطلت ما العب فى حاجة مش فهماها ههههههههههههههههههههه


يلا معلش اهم حاجة ان الامن مستتب والموبايلات شغالة وانك رحمتى الشركة ومرفعتيش قضية عليها

هههههههههههههههههههه
طب تصدقي
وانا كماني منضمنه لنفس هذه الشركه
بس متعوووووووووداااااااااا دييييمن
بس اتعاملي عاااااادي جدا
وخليكي كووووول جدا
وتعايشي مع الواقع
ولا تقلقي هما كدا عملوا اللي عليهم
المهم بس افتحي وطمني الحبايب عليكي:)

هههههههههه
اول حاجة مبروك ع الموبايل يا فاتموتى
ههههههههه
فكرتينى بالاحداث بتاعة الشركة دى عملوها معايا مرة برضه وكانت موبينيل بس كانوا هم الى متصلين وقالولى كملوا البيانات وبتاع
وبرضه اجمد حاجة لما تشحنى وياخدوا الفلوس من غير مبرر
شركة حرامية اصلا
ههههههههههههههه
سيبك انتى بس جامدة اوى تحسدوا الغجر ع ضل الشجر ده
ههههههه ومحمد فوزى مخلص يا اوختى اوعى بس تفكرى فيه كده تانى لاحسن الوساوس دى هى الى هتخرب عليكوا
اموووووواه
ربنا يخليكى لينا

مبروك يا فاتيما ع الموبايل وبما ان فى نوبايل فانا راشقه فى النمر ها متنسيش
اما عن القصه المماثله فانا برضو ذات مره كانت حتحصل ازمه عوائليه بسببه بس الحمد لله عدت على خير لان الخطوط باين كانت داخله فى بعضها :))

السلام عليكم
دمك خفيف يافاتيما وكلامك حلو وجميل
مع خالص تحياتى

1-سيبك من كل التعليقات النسائية دي بزعامة الكبيرة و البت بساكتيو
ياجماعة بتفتحوا عنين الست كده :@:@
قال محمد فوزي قال
قالنا هنفكر و بلاش الضغط ده عشان هارفض

2-ياسلام تقفلي الموبايل
عليا الطلاق في ااااانه
اديني هطلق اهو مع اني عمري ما هاتجوز بس يلا
العلبه فيها فيل علي فكرة
يعني الحكاية فيها اااانه

السلام عليكم ورحمة الله وبركاته
ازي حضرتك يا ماما ام يوسف؟ يارب تكوني بخير وسعادة ...كالعادة استمتعت بحوار حضرتك كتييييييييييييييير ..الا هي مين ام نبيل دي جارتكوا :d... قريبة ام فردوس كدة :d تسلم ايدك

لـــولا

ينفع كده يا فاتيما يعني قافلة موبايلك ليه ؟ طب اطمن عليكي ازاي بقى وموبايلك مقفول وانا معرفش رقمه اساسا ههههههه

اكتر حاجة بتضايق في موضوع الموبايلات ده لما فأجه تلاقي رصيدك راح فين الله اعلم لكنه ذهب ولم يعد

ولما تلاقي حد بيرن عليكي ويفزعك وانتي في سابع نومه أو جايلك مسجات كتير في نفس ذات الوقت وانتي مشغولة

ده غير المعاكسات الغريبة

مرة رقم اتصل بيا كتير جدا فزهقت ورديت وبعدين لقيت اغنية لإليسا شغالة
وبعدين ردت عليا بنت وقالتلي بزعيق مش هتبطلي تتصلي بالرقم ده بقى كل شوية كل شوية بتتصلي ومكنتش مدياني فرصة للكلام اصلا المهم قولتلها انا متصلتش بيكي خالص وانتي اللي بتتصلي وقفلت الخط في وشها بس بعد كده ضحكت جدا على الموقف

بجد بصحيح !
طب استنى بقى
الحكاية دى محتاجة
لولولوىىىىىىىىىىى

ايه دا؟؟؟!!
لأ مش مصدقة نفسى
الكومنت بيفتح من اول
تكة تكة تكة تكة تكتوكة!

والله والله والله انا ماعملت اي حاجةولا قريت ولا حسدت
انا قلت اتخطف منك على محمد فوزي الاصلي الابيض واسود مش الالوان والله
معرفش ان فيه فيلم الوان لشحات الغرام ويارب يارب النهاية تبقى جميلة ونفرح كللللنا لاجمل فاتيما

اما شبكة ام نبيل وام فوفو
فمتزعليش نفسك والله هما وحشين اوي كل همهم مصلحتهم
اه اشمعنى هما يعني
لكن ارجع واقول احنا اللي مرعناهم وخليناهم ياخدو علينا
بنبقى في اوضة ومكسلين نروح لحد الاوضة التانية بنتصل بيه نقوله تعالى
وافتحي النوبايل بقى
وانا ابلغلك عنهم حماية المستهلك

بالنسبة للموبايل
والموبيلات انا مليش
فيها اوى الصراحة ياطمطم:)
معظم الوقت عاملاة سيلنط أو مقفول:)

ههههههههههههههههههههههه

أنا مش قادرة أبطل ضحك بجد

وعندى فعلا حكايات كتيرة مماثلة وهحكيها لما أرجع بقى

وبعدين تعالى هنا تبقى تجيبى موبايل من ورايااااااااااا

عاااااااااااااااا لما أشوفك بس

لن أنسى لكى هذا الموقف

أمووووووووووواه لحد ما أجيلك تانى وبعدين أنتى مخمصانى ولا إيه مش تيجى تشوفى الحوسة اللى انا فيها

لما هرجع بالسلامة هحكى بقى كل حاجة

سلااااااااااامات كتير
وأمووووووووووواه

ما تخافي على محمد فوزي
رجل تمام وما عنده لف ودوران
مش زي احمد عز اللي سابني :(
وسمعت انه راح اتزوج انغام :(

كده برضه تظني اني قريت عليكي وحسدتك وحقدت عليكي وبصيتبك في الموضوع؟
:-)

أهو انتي اللي كشفتي كل حاجة من نفسك وأقريتي بكل حاجة على طول
:-)))

عموما تعيشي وتتخضي .. وسيبك من ده كله .. المهم انه ألف مبروك مقدما وربنا يتمم الموضوع على خير وسعادة

ههههههههههههههههههههه
تصدقي انا كمان بكره ام نبيل دي
بصي هما تلت شركات زي بعض مافيش فرق
بس مش هقولك السر اللي في بير مخروم
انا كان نفسي لما اتخرج اشتغل في خدمة العملا بس بتاعت فودافون
عشان لما حد يتصل ارد عليه وباعتراف من اصحابي ان صوتي مايص هرد عليهم واقولهم صباح الخير خدمة العملا فودافون نهى مع حضرتك يا فندم
يوقلي صباح النور اقوله حضرتك بتتصل بخصوص الرقم داولا بخصوص رقم تاني
ماعلينا بس احمدي ربنا وافتحي نوبايلك بقى

انا مقدرش اعيش ساعتين بدون نوبايلي حبيبي
موبايلي حبيبي موبايلي الاجمل يوم ورا يوم ميزداته بتكتر ومسجاته ماليه حياته موبايلي بيصغر وبيطور :):)

معلش يا تيما كلنا لها إنت حظك جه فى نحنونحة أنا بقى لقيت واحد بيكلمنى من رقم بريفت حسيت إيه ده إيه الأهمية دى وأخيرا إكتشفت إنه عايز بيناتى ومش رضى يدينى بيناته ههههههههه

أنا بقى مشكلتى مع الموبيل إنى اتفاجئت إن مكالماتى كلها متحولة على رقم أرضى لكى أن تتخيلى كل مكالماتك وكل أصحابك بقى اللى داخله بزعابيبها واللى دخلها بتهرج واللى دخلتها فى التليفون بصويت الحقينى أنا فى مصيبة وحاجة تفرح يعنى بمعنى أصح اتفضحنا ههههههههههههه

متقلقيش من ده كتييييير

دمتى بكل الخير والحب والسعادة

طيب م اخدتيش رقم البت النحنوحة ؟؟
اصلي بحب النحانيح.. احم احم.. ههههههههه...
المهم يستي ربنا يبركلك ب فوزي.. هوا يستاهل...

هههههههههه
ظلمتى الراجل يابطه
حرام عليكى
والله شكلها كده عينينا رشقت على راى علا
هههههههههه

اما ام نبيل الله يخرب بيت ساويرس ونبيل والعائله جمعاء
فانا لسه ملدوعه منهم وضاع رصيدك ياعويس
حوار طويل عريض تطلعى منه بانهم حراميه
مالها فودافون؟؟؟ برقابتهم
نص ساعه مجانا

اقولك سر؟
انا ندمت على اليوم اللى فكرت اشترى فيه موبيل
ههههههههههههه
والنبى يااوختشى كان زمانى معايا فلوس على قلبى اد كده وكنت لقيت ابن الحلال وفتحت بيت بقى
اه ماانا اللى هاتقدم له
مش بقى في قانون خلع؟
يبقى لنا نفس الصلاحيات ولامؤاخده
ههههههههههههههه

ربنا يسعدك ويسمعك كل خير يارب

بوست زى العسل زيك ماشاء الله

ايمان مصرى

بنت خالي العزيزه

ازيك يا بطوط

الف مبروك علي الموباي وربنا فرحتلك من كل قلبي

بس ايه اللي خلاكي تجيبي موبينل كده

تنفعي ساويرس ولا تكونيش بتراضي الراجل بعد ماخسر نص هدومه اقصد فلوسه في الجزاير

انا بصراحه محلصيش حاجه بس انا كان ليه واحد

صاحبي مغرم يتصل بخدمه العملا عشان يسمع صوت بنات خدمه العملا

كان له منطق غريب بحكم السن من تمن تسع سنين

يقولي صوت البنت الحلو يخللي الواحد نفسه تتفتح علي الدنيا

كنت علي طول اقوله ياريتها جابت دكر بط

ده انا اروح اكلمها جهرا ومباشره في الشركه ارخص

مبروك يا غاليه وبجد والله نفسي ييجي يوم تسعه بسرعه عشان نشوفك لانك بجد من اغلي المدونين علي لبي وقلب ناس كتير

وربنا يبارك في يوسف ويشتري خط مفتوح وباسمه كمان ويرودو علي خير وفي اسرع وقت لاجمل بنت خال في الدنيا

السلام عليكم

ايون قولي كدا .. شعر واغاني ومود في السما .. ما شاء الله لا قوة الا بالله ..

احنا والله بنفرحلك .. بس دا ما يمنعش اننا نحسد سي محمد .. بلاش نحسد بنغبطه .. وكمان بنشكره ..

احكيلك بقى على احدث طرق النصب بالموبايل .. اتصل بي شخص وقالي انه ارسل بالخطا تحويل مبلغ 10 جنيه ( حرامي خايب ) وعايزني احولهم له .. فقلت بحسن نية حاضر .. واعرف ان التحويل يتم بارسال رسالة من فودافون ولم اجد رسالة .. ولكن الرسالة وصلت من نمرة مجهولة وليس من فودافون والنصاب كاتبها تماما مثل رسالة فودافون .. فعرفت انه نصاب خايب فطنشت .. ولكنه اتصل من نفس الرقم الذي ارسل الرسالة ( حرامي غبي ) .. وطبعا شخطت فيه وعرفته انه نصاب عبيط ..

ودي كانت نهاية فرقة فودافون ..

مع السلامة وسلمي لي على سى محمد ..

ربنا معاكي

ههههههههههههههه وربنا ماكان قصدنا ياام يوسف ياختشى اصل الراجل يتحب ولقته ربنا يهنيكم ويكفيكم شر الحساد والمحرومين ياحببتشى

انا فعلا مابحبش ام نبيل قعدنا سنين مع بعبض بس بصراحه كانت وليه مش ولابود

فاقلب بصراحه فوراااااافون ست خوجايه محترمه والخوجات مابتكدبش انت عارفه وحقنين اوى وكلامهم قليل لو تحبى اديكى رقم الداكتور اللى قلبنى وقلبنى انت كمان هارتحى وتكلمى حمو فوزى وانت مطمنه ان مافيش صوت حريمى واحد يجرؤ يهوب نحيتك تانى على رقمه

او روحى افتكسات اللى اتعملو معها مبسوطين وبيقولو مهيصنهم انت عارفه الغربال الجديد له شده

بس بصراحه البنت اللى ردت عليكى امها دعيا عليه ساعه عصريه هههههههههه
هما ساعات بيبقو رخمين فعلا بس مش كلهم قله قليله كويسه

تسلمى على البوست الحلو ابو دم خفيف
يا ام يوسف
تقبلى مرورى

لأ عينيفة عينيفة يعنى... الراجل كان حيعمل أغنية شحات ومد إيديه بجد :)
بس كلكم كده فى الأول وبعدين أول ما سى السيد قصدى سى محمد فوزى يدبح القطة نقلب قطط على طووووووووول

تحياتى ويارب نشوفك مبسوطة كده على طوووووووووووول

magi
-----


انا مش قلقانة ع الرصيد
انا دمى محروق من الغتاتة بتاعتها
انتى نورتينى يا ماجى





wanda
-----

زعلك على راسى يا ون ون
صالحتك ف البوست الجديد
قلبك ابيض يا ونداتى
يا حبيبتى


و كنت هقول لمحد فوزى ايه؟؟
يا خرااااااااشى
دنا كنت هقول قوالة يا ماما
مينفعش اقول خلاص بقى
خليها ف الخباثة بينى و بينك
الا العين وحشة يا اوختشى
و انا حرمت





دكتور حر
--------

ازيك يا دوك
و الله فرحت جدا بتعليقك

انا اتخضيت اكتر من خضة البوست
و دوست ع اليينك عشان اتاكد ان دكتور حر بذات نفسيته اللى مشرفنى و منور صفحة التعليقات

بس ايه ربنا يخلينا ليكى دى
انتوا اللى زاقيين عليا البت بتاعة خدمة العملا دى و لا اييييييه؟؟





Baskouta
--------

يا خراشى يا عيون مامى
على خفة دم تعليقك

انا قعدت اضحححححك انا كمان
و كان هيجيلى سكتة بسكوتية
من جمالك يا حبيبتى
بقى انا يا رب معقول اكون
ام البسكوتة البمبى الجميلة دى

يا خراااااااابى عليا


ربنا ما يحرمنى من خدماتكم البسكوتاية دى أبداااااااااا
يا فندم





لولا و زهراء
-----------

صباح الورد و الفل و الياسمين اللى ف الجناين كلها يا زهراء يا ذات الوجه المشرق

انا لسه محدثة فى حكاية النوبايلات دى يا زوّزا ..معرفش يعنى
و بعدين اول ما ترد عليا تقول انا فلانة من نيلة العملا مش تسبنى كدا متقولش هيا مين و اضرب اخماس فى اسداس فى ناس تانية كانت هتنضرب برضو
مش معقول يعنى انتى يخلصك ؟؟





ستيتة حسب الله الحمش
-----------------
طب و الله يا زعيمة
فكرة هايلة الخمسة خميسة دى

انا بموت فى اى حاجة لونها فيروزىعموما
انتى عارفة
و لما الاقى حاجة هحطها اكيد



ثانيا بقى

الا مرأة متوحشة ؟!!

دنا محسوبتك يا كبيرة


و بعدين انا عاوزة
اشرح الجزئية دى
عشان الاخوة الرجال يفهموا

انا كنت الاول لوحدى و بطوبى
فكنت مهيضة الجناح بقى
و رقيقة و منكسرة وكدا

انما بعد ما بقى الواحدة
عندها حد تبعها و ملكية خاصةلازم لازمن تقلق و تبتدى تدافع عنها
و لا هسيبها كدا نهباً للغزاة ؟

لأ طبعا لازم اتمسك بيها
بكل ما اوتيت من قوة
و اتحول لمرأة متوحشة شرسة خطرة
على رأى البت كيكى عوووو
اومال حريم اونطة احنا و لا ايه ؟؟

منحرمش منك يا زعيمة
انا بعتت ميل بالمعاد يا ريت تتطلعى عليه سعادتك و تشوفيه
بس خلايص

ميرا (وومن)
-----------

متزعليش يا ميرا
انتى عارفة ان النوبايل موجود من زمان بس مقفول
و مبينفتحش تقريباً
و غالبا مش هينفتح تانى بقى
انا مبحبش النوبيلاااااااااااااات

اسفة عشان مردتش ع الأيميل بس بطمن عليكى برضو و عارفة انك جدعة و بخير




خواطر شابة
----------

منحرمشى منك يا خواطر
كلك ذوق يا حبيبتى
دى نعمة من ربنا
و بركة دعاكم ليا انتوا و الحاجة ام فاتيما و صديقاتى و كل حد بيحب يوسف و بيدعى له بظهر الغيب
منحرمشى منك ابداااااااا





reem
----

انا بهزر يا ريم
انتوا تحسدونى
دنتوا تتمنلولى احسن و اجمل حاجة
انا بهرج بس يا حبيبتى البوست حكم اصله نقلبها كدا

سلامى لطنط و ليكى لحد ما اشوفك و اديكى البوسات و الحضونات تحريرى





مواطن شووجااع
-------------

الله يبارك فيك يا هيمة

غنوة فيروز دى كنت بعضقها و انا صغيرة جداااا ...معرفش ليه المدونة فكرتك بيها بس دا شىء يسعدنى جدااا بجد و هعتبرها اهداء منك يا مجدى يعقوب يا صغير





صيدلانية طالعة نازلة
-------------------

يا لهوتييييييييييييييييينى

بقى مش كفاية انك مخمصانى سعادتك
و عاوزة تبلغى عنى
عشان يخدونى القسم
ولأ بتقولى حلال فيا
اللى عملوه


كمااااااااااان
بتدعى على محمد فوزى ف وشى
يا مفترية
يا مستبدة
انا هشتكيكى للزعيمة بتاعة الجمعية
انك بتدعى على سى الأفندى بتاعى

و استلقى وعدك بقى

هه

و مخمصانى مخمصانى

و لا يهمنى

هصالحك برضو






star in the sky
----------------

انتى كمان ليكى قصص مع العالم دى ؟!

و مين اللى ترفع قضايا ؟؟
انا!!!!!
لاااااااا دنتى واخدة عنى فكرة غلط خالص يا سمسم
ابعدينى يا بنتى عن السكة دى
انا آخرى لو حد زعلنى قوى منهم
انى اقفل الخط
و اقعد ساكتة خااااااااالص

و الكلام دا ينطبق على البنى آدمين على فكرة كمان
لو حد فيهم زعلنى
بقفل معاه الخط و انهى التعامل
اسهل و اريح بصراحة
نورتينى يا اعلى نجمة ف السما





sony2000
--------

انا كووول اهو
منا بضحك معاكو و نهزر اهو
بس مش هفتحه برضو
انا
مبحبش
النوبايلات





Ana Keda
---------

مبروك ايه بس يا مروة دا
بقاله عندى زمن طويل
كنت بقفله و مطنشة لحد ما اتهزأت جامد م الحاجة ام فاتيما
و اقرب المقربين
ففتحته و ادى اللى بيجرالى منه
قفلناه تانى اهو و ارتحنا


و لا تكلكى على فوزى يا ام بيدو
دا فى عونيا يا ماما
يا خرااااااشى
دا هوه عونيا ذاتها




سومه ..مجنونة فى بلد عاقل
-----------------------

انتوا كمان يا سمسومة ؟؟
ايه النوظام بتاع العالم دى بقى ؟؟
و بعتتتتتتتتين بأأأأأه





فضفضة
------

و عليكم السلام يا فضفضة
انتى نورتينى
ميرسى قوى على ذوقك
و ردك للزيارة بسرعة كدا
احنا زارنا النبى النهاردة

adel
----

1- حاضر هسبنى من التعليقات و مش هفتح عينى غمضتهم أهو

بس تعالى هنا
إسمها
قال اونكل محمد فوزى قال
ماااشى؟
طيب


2- متحلفش بالطلاق يا واد عشان منظرى قدام حماتك لولاّ هيبقى نيلة و هتقولى ابنك بيحلف عالبت قبل ما يتجوزها اومال بعد الجواز هيعمل ايه و انا مش ناقصة دى لسه مسيحالى فوق و داعية على اونكلك فوزى و كانت عاوزة تبلغ عنى كمان فلم التعابين احنا مش قدها بقى

الحكاية مفيهاش حاجة و متقلقش
انا مبحبش الموبايلات و بس







لولا و زهراء
-----------

و عليكم السلام يا لولا
ميرسى يا حبيبتى و يا رب كل ما تيجى هنا تكونى مبسوطة و مستمتعة دايما






LadyE
-----

آه شوفتى يا لولو
كنا مش هنكلم بعض ازاى دلوقتى ؟؟
الحمدلله يا شيخة انى قفلته
هههه

سلامى لخالتك الجميلة
وحشتونى و الله





NORAHATY
--------
يا خراشى يا نورهانتى
بتزغرطى عشان الحكاية دى مخصوص
يعنى للدرجة دى المدونة بتتعبك انا متغاظة جدا انها مسسبة مشاكل كدا للحبايب ... يعنى اتخيلها البت النحنوحة و اولعلك فيها دلوقتى ؟!!

ان معاكى برضو
بعمله سايلنت او مقفول




بسمة عبدالباسط BOSBOS
----------------------

انتى كمان عااااا يا بسبوستى

يا جماعة ملوش لازمة

ترجعى بالسلامة
و متخمنيش لو سمحتى انا معترفة انى مقصرة معاكى
معلش





سارة
----

ههههههههه
منا عارفة يا سارة انه راجل تمام
مينفعش يكون غير كدا اصلاً
انا مبسوطة بيكى قوى قوى على فكرة

يا مراكبى
--------

انتا عارف يا نبع الحكمة
انا مينفعش اخبى عليكو حاجة

بس زى ما تقول كدا
الواحد لازم لما ييجى يبلغ
حد بكارثة
مينفعش يقولهاله
ف وشه مرة واحدة

لازم يجيبها واحدة واحدة
و بالتدريج



وانا بهزر اوعى تكون زعلت منى
اختك فاتيما عارفة انك من اكتر الناس اللى تتمنولى الخير
انت اخ عزيز و عم مراكبى
اللى عدانى من البر للبر التانى
بكلماته الطيبة


و بعدين
بتقول مبروك على ايه
المواقف دى تستدعى كلمات آخرى من نوعية


ربنا يتولاه برحمته
ربنا ياخد بيده
ربنا يطلعه منها على خير

كدا

انما الف مبروك !!!
اشك

خالص ودى يا عم مراكبى




just waiting
------------

ليه يا تيتو كدا هتزعلينى منك بأأأه

عاوزة تشتغلى مع العالم الغجر دى

هوه مرتباتهمكويسة مقولناش حاجة

لأ نقول
و نقر
و نبصلهم فيها كماااااااان

و كويس انك مش معاهم
كان زمانك بطلة البوست دا يا فندم و كل المشاعر اللطيشفة اللى انا كتباها دى عنك ..ينفع كدا؟!!



الزهرة البرية
------------

غريبة قوى الحكاية اللى بتحكيها دى يا جودى

و انا مش قلقانة يا ماما
انا قفلته و ارتحت خلاص و يدوروا هما عليا بقى




سمع هوص
------
شكرا ليك على ذوقك






عاشقة الرومانسية
---------------

أيوه يا دودو
لنل كدا ف الحب
قوية و مفترية

و عيونكم زى الفل
البت هيا اللى نحنوحة
و تستاهل الضرب بس قولت الطيب احسن

وحشتينى على فكرة قوى
بوسات و حضونات
يا عروسة البحور
و قطتى الحلوة




إيمان مصرى
---------

ميرسى يا مينو
منحرمش منك يا حبيبتى
دايما رقيقة و جميلة






هى و ظروفها
-----------

ازيك يا بن عمتى


صاحبك دا صوعب عليا طب كان جه رد ع الننوحة دى و خلصنى من رزالتها

انت كمان اخ عزيز يا وليد و ان شاء الله اشوفك على ألف خير و ف الخير
يوم تسعة




جنى
--

انا مبردش على أى نمرة غريبة يا جنى
اطلاااقا

و بعيييين
انا مفتحتش بوقى
انتوا اللى جرجرتونى ف الكلام


عارفة انكم هتفرحولى طبعا
اومال انا بقولكم ليه
غير عشان فرحتى تكبر
و تزيد
و احس بطعمها اكتر


و بعدين متحسدوش سى محمد

بتحسدوه على ايه ؟!!!؟


نقول تانى

بيحسدوا الغجر على ضل الشسجر


دا الراجل انوكس
و ماماته داعية عليا
ف ساعة مغربية


دنا قولت اقولكم برضو
عشان تبقوا تدعوله
ربنا يزيح عنه
و ياخد بيده


مش تقول بنغبطه
على ايه بس دا غلبان
و صعبان عليا


ثم تشكروه
طبعا
لازم تشكروه
ريحكم م النكد الأزلى
صح؟؟

منحرمشى منك يا جنى




richardCatheart
---------------

لأ متقلقيش يا قطقوطة

تعالى انتى على جنب
انتى مرتبشطة
و من عضوات الجمعية يا أوختشى
لا تكلكى

انتى كمان دمك خفيف و شربتاتا



أبو حميد
-------

إيه دا ؟؟
أيش عرفك ؟؟

و بعدين محدناش ردالة تدبح قطط

اصلى بحبهم قوى و مربية اتنين
و لو اندبحت قطة قصادى
ممكن يجيلى اكتئاب مزمن

و سى الأفندى بتاعى
حمش صحيح
بس حنين برضو
و ميخلصوش

ميرسى يا باشمهندس




P a s h a
----------

شكرا لسؤال يا شريف
كلك ذوق

ههههههههه بوست جميل جدا جدا والله انا فضلت افكر صحيح هتكون مين الحاجة اللى بترد دى لحد موصلت للاخر وعرفت انها من خدمة ام نبيل بس مكنتش متوقع بصراحة النهاية دى هههههههههههههه

شكرا على البوست الرائع

بلياتشو
-------
ميرسى يا فندم

و كنت فاكر انها هتقلب بغم
و لا إييييه؟؟

اوعى تكون قلة مندسة ؟!!

نورت المدونة و شكرا ليك

مدام صالحتينى
و لحد ما تخلصى التنفيظ
ياه هى المدونة كبيرة قوى كده ؟؟

احكيلك
بصى يا ستى

كان اخويا بيسافر بورسعيد بالبيجو فى شغل
و مرة اتصلت عليه الصبح اطمن انه وصل بالسلامة لانه نازل الفجر تعبان و البيجو دول مجانين

اتصلت عليه
لاقيت صوته بيرد نايم
بقوله اخبار ايه ؟ يرد كويس
قربت توصل ؟ اه اهو قربت على اسيوط
اسيوط؟؟؟؟؟ انت ايه الى وداك اسيوط؟ القطار طبعا
قطار ايه ؟ انت مش مفروض راكب البيجو و رايح بورسعيد ؟؟
و انا اروح بورسعيد ليه ؟؟؟ (الصوت صحصح ساعتها :-).... لاقتنى اتبرجلت و ركزت و قولت ده مش اخويا
انا اسفة اكيد نمرة غلط :-)) و روحت قافله الموبيل على طول
جبت الاجندة و ركزت انا طلبت نمرة غلطط ازى ؟؟ لاقيت النمرة صح
اتصلت ثانى ؟ الو .. طلع اخويا
ايوه انت عايزة حاجة ؟ انت وصلت ؟
ايوه وصلت و مشغول قوى انت عايزة حاجة ؟

لا بطمن بس
طيب سلام و طرخ

معرفش مين الشخصية الى صحتها من النوم و هى مسافرة اسيوط بس كان موقف برجلنى قوى
و الراجل ماصدق حد يطمن عليه :-))

معلش مشغول قوي اليومين دول و الشغل كتير الأيام دي فأعذريني على التأخير
ده موضوع مشابه حصل لي مع ام نبيل برضه
http://egyptioneng.blogspot.com/2007/09/blog-post_30.html
شركة ام نبيل أكتر شركة خنيقة في مصر

إرسال تعليق