.

.

درجــــات  

Posted by: فاتيما in





بتفكر فيه على طول الخط
بتنشغل دايماً و أبداً بكل تفاصيله
بتتمنى يفتكرها و لو صدفة
بتخاف عليه من نسمة الهوا
اللى تعدى جنبه
بتستنى مكالماته
عشان تحس بالامان ف نبرة صوته
بتحلم بالوقت اللى هييجى فيه و تشوفه
بتدعيله ف اليوم عشر مرات ع الأقل
بتحس انه أصبح تحت الجلد و المسام
و إنه بقى تقريباً الراجل الوحيد
ف هذا الكون الشاسع
بتتعب لما تفتكر بكرة بكل مستحيلاته

و بترتبك لما تضبط روحها متلبسة
بالحنين للمسة ايده
بتترجى عطف قلبه
م الدنيا 

اللى بجد بخيلة
و بتقول لنفسها كل ساعة طب وبعدين ؟!
بتحبه ؟

أيوه ...بتحبه
فوق الوصف و التصور و ابعد م الخيال

و عارفة ان مفيش فايدة
لكن
كل ما تلاقى البيبان بتترزع
فى وش حلمها

تمسح بسرعة الدموع
 اللى هتغرق مخدتها
و تفتكر 
إن الأمر لله من قبل و من بعد

و إن القلوب سرها عند اللى خلقها
مش عند اصحابها
زى ما احيان .. يبدو ذلك ويبان

و ترجع تبتسم و تطمن نفسها
ان أوان الفراق لم يحن بعد
ومهما حد حاول يزحزح ف عنادها الغبى

الا ان شىء جواها علطول بيقولها
ان اللى ف قلبها
يبقى حب حقيقى
كانت يائسة تماماً من إمكانيه حدوثه
فى هذه الحياة
و لو عاشت فيها ألف عام و عام
و إن أعلى مراتب و درجات الحب

ان يمرغ المرء قلبه
ف تراب رجلين
الشخص

اللى هيقابل كل هذا الطوفان
من الحب
بكلمة واحدة لا تتبدل
هى
كلمة

لأ


---------------------------------------------


ينتهى هكذا دعاء العاشق
اللهم اننى أسألك
أن تقذف فى قلبى نور منك .. يطفىء نور
........................
..........................
قال الملاك الاول للملاك الثانى : ماهذا ليس هذا دعاء
قال الملاك الثانى : شىء محير جدا لم أفهم كل ما قرأته
قال الملاك الاول : لن ناخذ الدعاء معنا
قال الملاك الثانى: أنظر فيه لعل هناك حاشية أو بقية
قال الملاك الاول :أنظر أنت بنفسك
قال الملاك الثانى : أميل لأخذ الدعاء ..يبدو أن صاحبه يتعذب 
قال الملاك الاول و هو يكرمش ورقة الدعاء : هذا هذيان رجل مريض
قال الملاك الثانى : لا تكرمش الورقة ..حرام ..إنه يقول أنه يريد أن يصير مثلنا ملاكاً .
أحمد بهجت "مذكرات صائم"


This entry was posted on الثلاثاء, مارس 30, 2010 and is filed under . You can leave a response and follow any responses to this entry through the .

44 كــــلام بيطــبطـــب عـــلى قــــلبى و روحــــى

إن أعلى مراتب و درجات الحب
ان يمرغ المرء قلبه
ف تراب رجلين الشخص
اللى هيقابل كل هذا الطوفان
من الحب
بكلمة واحدة لا تتبدل
هى
كلمة



لأ
----------------------
يعني ايه لأ

لأ وبيحب؟
لأ اصل الظروف
لأ مقدرش
لأ مش فاهم

يبقى ألف لأ على الأ الأولانية

---------------------

ربما عشقتك حتى تغلغلت بكل خلية من خلايا جسدي
ربما سيطرت على كل فكرة وخاطرة بعقلي
ربما تنفست ياسمين كلماتك التي أحيت الروح بعد طول الثبات

ولكن حبيبي
إن لم تقدر غير على لأ

فأعترف بملأ إرادتي الحرة
أني اعشقك ولن أعشق سواك
وأنه ربما ماتت فيا الروح قبل أن أموت فعلا
ولكني لن أتنازل
ابدا
عن نعم


انتي عارفاني
رغم ان الخاطرة تحفة
وخدتني لدنيا تانية

بس انا مليش في عشق الروح اللي ملوش أخر
يخرب بيت العلوم يااوختشي

ازيييك وحشتينى اوى وانا وحشة اوى عشان بقالى كتير مجيتش
بس عاوزة اقولك
ان كل الحب دة اكيد بيتبادل باضعاف اضعافه
واكيد هييجى يوم وربنا يدينا اللى بنحلم بيه بس كل شىء وليه وقت يمكن وقته لسة مجاش او يمكن قرب او يمكن لازم تصبرى شوية كمان
صحيح الواحد مبيحسش بالحب الا لما بيكون بينه وبينه حبه الف حاجز عشان يحبه اكتر ويتمسك بيه اكتر ويعرف قيمته اكتر واكتر
وانا بدعيلك ربنا يردلك حبك الكبير دة
وتلاقى منه حب اكبر ليكى

بس بلاش دموع عشان صعبة اوى كل مابنشوف دموعنا قلبنا بيوجعنا اكتر

وحشتينى اوى عاملة ايه اخبارك ايه
كلمينى كتير قولى اى كلام عاوزة ارغى معاكى

بوسة كبيرة


مساءك سكر

توقيت متناسق إنتى تنزلى بوست وأنا بعد بدقايق ههههههههه

بجد البوست حلو أووى يا تيما بجد عجبنى جدا بكل تفصيلاته ولقيت حتة كده بتقول

إن الأمر لله من قبل و من بعد
و إن القلوب سرها عند اللى خلقها
مش عند اصحابها

الكلام ده صح أوووى وربنا له حكمة كبيرة فى إنه أخفى الغيوب عنا وإختص نفسه سبحانه وتعالى بيها بجد الحمد لله دى نعمة كبيرة أووى

عجبنى كمان اقتباسك بجد انت جميلة جدا

دمتى بكل الخير والحب والسعادة والتألق الدائم

adel
-----

أسف على إيه يا دولا؟

البوست مش حزين
و لا نكد
كما يبدو

انا رديت على ايميلك خلاص

كل سنة و انتا طيب يا حتة من قلب مامتك

و بعدين تعالى هنا
يعنى انتا مبتحبش حد يقولك أسف

بتقولها انتا لييه ان شاء الله
اشمعنى بقى ؟!!!






NeVeN
-----

انتى وحشة يا نيفى ؟!!!

متقوليش كدا ابدا عيب دنا شوفتك و بصيت ف ملامحك الجميلة الرقيقة و مينفعش الوحاشة يبقالها اى سيرة و لا تهوب ناحيتك خالث ..اوعى تقولى كدا

انا كمان مقصرة معاكى و مع الكل
معلش و انتى لمستى من بين السطور اللى كنت حابة أقوله
ان قصص الحب بيزيدها جمال و قيمة فكرة انها مستحيلة و صعبة و كدا
و على قدر التعب فيها
على قدر غلاوتها و الأحساس بيها

اظن ذلك يعنى على الاقل بالنسبالى
انا لما الاقى الدنيا ماشية حلو فى اى حاجة بتوجس خيفة و اقول خيييييييير
و اتوقع انها هتقلب غم بعدين
فبقول عاوزة الغم ف الاول

و غالبااااا الغم بييجى ف الاول و الآخر و .... ف النص كمان
إنشالله ما عن حد حوش

هههههههه

انتى اللى تاخدى بوسات و حضونات كتير عشانك و عشان لارا حبيبتى
و يا ريت اشوفك يوم 9 ابريل ان شاء الله على ألف خير

سلامى لماما الغالية و لزوجك العزيز

انا رغيت اهو
تمام كدا ؟؟




ستيتة حسب الله الحمش
------------------

الله عليكى يا ستاتيتو

انا كتبت البوست فى كلمة لأ

و انتى كتبتى فى نعم اللى توقفلها و تتشددلها و تجيبها الأرض كمان

لو كل حاجة تنفع تتحارب
بالحب كدا و بالمشاعر اللى عندنا دى
كان زمانى انا و انتى لواءات ف الجيش كدا و نشيل طنطاوى و نقعد مطرحه
بس مفيش حظ يا اوختشى


و سيبلى انا الروح لحد ما تطلع بقى
و خليكى ف العلوم يا ستوتة
مع ان الكيميا غدارة
زى ما قولنا

فاكرة ؟؟!!!





الزهرة البرية
-----------

احنا الأربعة تقريبا الوحيدين اللى سهرانين و كل له اسبابه

عادل سهران دايما و مش بينام دلوقتى عشان دى دماغ الفنانين تقريبا مبتنسجمش ساعتهم البيولوجية مع ساعات النهار

معرفش ستوتة مش جايلها نوم ليه بس تلاقى الدماغ متقدة و فيها الف حاجة بتتزاحم عشان تخرج فمطيرة النوم من عيونها ؟؟

انا عارفة ليه سهرانة و عندى أرق رغم ان عندى بكرة شغل


سيادتك بقى ايه
اللى مصحيكى لحد دلوقت؟؟

ميرسى على رأيك و ذوقك و تشجعيك
و كل حاجة حلوة دايما تيجى منك يا جودى

ميرسى قوى يا حبيبتى
بوسات و حضونات

"إن أعلى مراتب و درجات الحب
ان يمرغ المرء قلبه
ف تراب رجلين الشخص
اللى هيقابل كل هذا الطوفان
من الحب
بكلمة واحدة لا تتبدل
هى
كلمة



لأ"

مش عارفه اقولك ايه
بس فى الاول وصفتى اد ايه الواحد ممكن يوصل لدرجات الحب
وبعدين وصفتى ازاى ده كله بينهار قدام قلب تانى قاسى
مش عيب ان الواحد يحلم ايا كان الحلم حتى لو كان عنده احتمال 90% ان احلامه دى ماتتحقش
العيب ان الواحد يحبط ومايعرفش يحلم تانى
عجبتنى اوى الدعوه اللى فى الاخر
تسلم ايدك يا جميله :)

الحب ده الهبة والنعمة اللى الانسان بترجها من ربنا علشان يقدر يدوق طعم الحياة ويتمنى يكمل حياته واخرته مع انسان بيحبه بجد
بس الخوف من الفراق صعب وبيقتل اى احساس جوانا
بجد بستمتع جدا وانا بقرا بوستاتك :))

ساعات بنحلم ونتمسك بحلمنا ونتمسك بالى حلمنا بيه لمجرد احلام وردية رسمناها لكن الله اعلم ايه الى ممكن يحصل مش كل الى بنرسمه لنفسنا بيطلع صح ولا كل الى بنتمسك بيه بيكون يستاهل ولا كل الى احنا حاسينه بيكون بالضرورة احساس صح
لكن ده ميمنعش ان فى احساس
كلماتك جميلة ومؤثرة
بس الحياة العملية اصعب من كونها تختصر فى لحظات رومانسية

حلوة قوي ياماما
عجبتني قوي اهو دا الحب المستحيل وجع قلب وخلاص

يا حبيبتي يا مامتي
حسيت البوست ده اوي

هو الحب ليه بيوجع القلب اوي كدة
؟؟؟؟؟؟؟؟؟

لأ إيه
يا فاتيما ماتجاوبيش سؤال مش من حقك تجاوبيه
ماتخليه هو يقول آه أو لأ
وماتخليش خوفك من الإجابة يرميكي في قاااع الحقيقة
بس كمان ماتنزليش تحت من نجمك العالي أمامه
إظهري حبك من غير تنازلات
إظهريه من ورا المشربية ، علشان ماحدش غيره يشوفه ، أصل ماحدش غيره من حقه إنه يشوف حبك وهو لسه رضيع ، لما يكبر شوية تبقى الناس كلها تشوفه بعدين
ولو بعد ما شاف حبك من ورا المشربية كانت إجابته لأ
إديه باللوكامية في ذقنه و سيبيه و إمشي
الموضوع مش عشق الروح مالوش آخر زي ما ستيته بتقول
الموضوع إن المشاعر دي إتفصلت على الشخص ده
بتاعته
ليه هو
ريحته
لونه
شكله
مقاسه
معموله على زوقه
ماينفعش ماياخدهاش
إدعي بس من ربنا إنه يكون زكي كفاية إنه يشوف من ورا المشربية
KING TOOOT

أود أن أقول أبدأ يومي عندكماأستمتع بما هو مكتوب وادعو لكم بالتوفيق

ممكن يكون حبهم مستحيل
مقتول فى مهده
صعب تحقيقه و اكتماله

بس تفتكرى بعد الحب ده كله من ناحيتها
يجيله قلب و يقولها
لا

مش قاسيه انتى كده شويه
لا دى شويات

صعب ان الانسان ميضعفش شويه قدام طوفان الحب المحسوس ده كله
حتى لو مش اتقال بالكلام
اكيد حيتحس

و ساعتها يمكن يأجل مواجهته ليها
عشان ميجرحهاش
و ممكن كمان يحبها فعلا

بس تصدقى فيه حالات من الحب
مهماا تطورت
فى الاخر مالهاش حل غير كلمه
لا

:-******************************************************************************

مش عارفة اقولك ايه
بس حقوله هو
لا لما تلقك و ترجج مخك
فكر ثانى و ثالث
و يارب يستاهل صبرك عليه
و صبرنا عليه علشان خاطر الملاك

و بعدين من امتى ملايكة بيقرروا ياخذوا دعاء و لا يطنشوه هما مالهم
كلنا لله هو العليم

ادعيلى يا فطوم :-* ححاول ثانى خليها محاولة خفيفة على القلب حتى لو مكملتش كالعادة على خير


:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

لا متنفعش هنا
النية لوحدها لا تغنى صاحبها عن العمل

مش عارفة ليه متنحة بعد الى انتى كاتباه
مع انى بكره النهايات دى اوى اوى
وقلبى واجعنى على الى لاءا دى هو ازاى فى ناس ممكن ترفض حب كده؟
وفى ناس ممكن حد يعملها كل حاجة ويتمنى بس ابتسامة وتلاقيه يقول لاءا ويحب حد تانى مرمطه
من حقها تسمع كلمة اه لان كلمة لاءا اكيد كسرت فيها كتير
ومينفعش حب بلاءا ولو هو حب مستحيل يبقى افضل حل ليها هو الرحيل :(
وحشتينى والله اوى ربنا يخليكى ليا ويديكى كل حاجة حلوة يا احلى فاتيما

بعيدا عن كم المشاعر والاحاسيس والرقة والرومانسية التى تحويها الككلمات

عندى سؤال

هل ينفع حد يقول لحد
اه
لانه شايف كل هذا الحب؟؟؟

ده سؤال اجابته عشانى ملهاش علاقة بحاجة
:):):)

وهل ساعتها التانى هيكون مبسوط
لانه طلع سلمه معاه
وهيصر انه يكمل لغاية التانى ما يحبه


لخبتيشن

المشاعر دى
شىء بسيط
لدرجة التعقيد

بحبك
وحشنى حضنكمش بحب ابدا ااقولك مامتى
بس بعد ما قولنتك وحشنى حضنك عايزة اكملها كدة يا مامتى


مش بحب ااقولهالك
عشان انتى صغنونة انك تجيبى واحدة شحطة زى

تخيلى شحطة دى اكيد انا مترين مثلا:):)


دعواتك
جدا

فاتيماااااااا

ممكن الاول بس اقولك تحيه على ذوقك فى اختيار الاغنيه التحفه وصور خالد سليم لانى اشعق الاغنيه دى اوى

نبدا بقى على بركة الله فى البوست المشاعر باينه اوى بس احب اقولك ان مافيش رجل يستاهل هذه المشاعر يعنى على اساس انى باقول انى افهم فى الرجال نظرا لانى عندى اخ واحد واولاد خاله وعمات واصدقاء وكل واحد فيهم بيحكى عن مشاعره امامى بدون خجل
بصى يا فطومه كل شئ فى هذه الدنيا اخذ وعطاء
لما بيكون عطاء من غير حساب ده غلط الواحد فعلا فى احيان كتير بيعطى الخير ولا ينتظر المقابل لكن لما تحبى حد لازم يكون هانك مقابل لهذه المشاعر

بصى بقى اما هاقولك على حاجه وربنا يستر فى جمله باحبها اوى وشيرين غنتها وقالت

من الغباء انك تعيش زى الملاك بين البشر


اتمنى لكى حياه يملاها الحب والخير والسعاده الدائمه

زهراء

بتفكر فيه على طول الخط
بتنشغل دايماً و أبداً بكل تفاصيله
بتتمنى يفتكرها و لو صدفة
بتخاف عليه من نسمة الهوا اللى تعدى جنبه
بتستنى مكالماته عشان تحس بالامان ف نبرة صوته
بتحلم بالوقت اللى هييجى فيه و تشوفه
بتدعيله ف اليوم عشر مرات ع الأقل
بتحس انه أصبح تحت الجلد و المسام
و إنه بقى تقريباً الراجل الوحيد ف هذا الكون الشاسع
الله علوصف
بجد حلو اوي
بس السوال اللوذعي فجمجمتي
هوليه قالها لا؟؟؟؟؟؟؟؟؟؟؟

ااااااااااه يا قلبي الموجوع واتوجع بزيادة
سبحان من قال ان القلوب بين اصبعي الله يقلبها كيف شاء
حلو قوي قوي قوي البوست ده

وحشتيني جدا وماما بتسلم عليكي كتيرر

فاتيما اللي يقول لشلال الحب الجارف ده لاء يبقي اصلا ما يستحقوش . لكن انا شايف ان كلام ده خوف طبيعي على حلم تتمنى ان يتحقق .. امشى ورا قلبك ومادام بيقولك هو ده يبقي هو ده جمدي قلبك يا فاتيما وماتخافيش

أنا دلوقتى بقولك لأ

عارفة لأ على إيه

على قلبى اللى وجعنى ده وأنتى فاهمة لية

فاتيما الصديقة العزيزة

اكيد الشئ اللي بنتعب في الحصول عليه بيكون ليه غلاوه معينه وتمسك اكبر من الشياءالطبيعية او السهله
بس الحب ليه طبيعه خاص وغريبه يمكن علشان من اوله لأخرة ليه علاقيه قوية جدا بالمشاعر وبالاحساسيس فبيكون اتخاذ قرار بخصوصة صعب جدا علينا وممكن كتير بنا وبين نفسنا او قدام المقربيين نقول لأ لكن قدام اللي بنحبه يحصلنا انهيار في قرارنا وما نعرفش نقول غير وحشتني

قال (فولتير)
هو نسيج الطبيعة الذي زركشه الخيال
وقال العقاد
الحب اتصال شخصيتين لا مجرد ذكر او انثى
تتغلب فيه العادة على الارادة

لأ صعبة على القلب وسهله على اللسان

كوني بخير

مش قادر اوصف شكرى ليكى ازاى
ولكن الحمد لله انا بخير
وهرجع قريب ليكم

Bent Men ElZaman Da !!
----------------------
مبسوطة ان البوست عجبك

و الدعوة دى انا بحبها جداااا

بحسها قمة واعلى درجات الحب

اصل قصة نور دى
مع مؤلف الكتاب ليها فصول كتير
اكثر من رائعة و بفكر اكتب عنها بوست منفصل من كتر ما بحبها

تسلميلى انتى يا حبيبتى





أحاسيس آيوشة
------------

ميرسى يا آيوشتى
دايما كدا رافعة معنوياتى

منورانى






مجرد بنت
--------
كلامك فيه كتير من الحقيقة يا عزيزتى
فيما عدا آخر جملة هختلف معاكى فيها
الحياة العملية ممكن جدا تختصر ف اللحظات الرومانسية دى
و جدا كمان

دا اللحظات دى هيا اللى بتخلينا نحتمل كل الجمود و البواخات اللى بنشوفها طول ايامنا و عمرنا كله

نورتينى





just waiting
-------------

ميرسى يا تيتو
هوه الحب عموما وجع قلب
مش المستحيل منه و فقط





Baskouta
--------

ليه؟؟

السؤال دا عاوز عمر بحاله عشان يتجاوب عليه يا عيون مامى

و برضو الإجابة مش هتريح
فمفيش داعى تشغلى بالك بطرح السؤال من أصله بقى

وحشتينى




KING TOOOT
----------

الموضوع إن المشاعر دي إتفصلت على الشخص ده
بتاعته
ليه هو
ريحته
لونه
شكله
مقاسه
معموله على زوقه
ماينفعش ماياخدهاش


حلو قوى التوصيف دا يا وليد
اكتر من رائع

احييك عليه
باقى الكلام بقى

حاضر ف حاجات
و مش حاضر ف حاجات
مليش ف الللوكميات دى خالص
و كمان مبعرفش ادارى ورا المشربيات
جايز يكون غلط
بس دا شىء انولدت بيه و مبعرفش اغيره

عشان اكون ادق

مبحاولش اغيره

و متحملة النتايج ف كل الاحوال
عشان دا اختيارى


بوسلى هبة و عمر
منحرمشى منك








غير معرف
-------

لو تعرف تعليقك دا كان برد و سلام على قلبى قد إيه

لأن قبلك جالى تعليق
من حد كاتب كلام
اقل ما يوصف بيه
انه ابشع حاجة ممكن تنقرى
ع الصبح و الضهر و العصر و اى وقت


انتا مسحت أثره ف ثوانى

شكرا ليك بجد

صيدلانية طالعة نازلة
-------------------


مقتول ف مهده ؟
جايز


قاسية ؟
جايز جدا


تأجيل المواجهة
جايز جدا كمان



تصدقى فيه حالات من الحب
مهماا تطورت
فى الاخر مالهاش حل غير كلمه
لا


دا الاكيد
و متفقة معا;n جدا
و مفيهوش جايز بالمرة






Wanda
-----

حاضر يا ون ون

هدعيلك يا حبيبتى اكيد

*****************************
و
××××××××××××××××××××××××××××××××
انا كمان





الطائر الحزين
-------------

العمل اوقات بيكون سبب ف تأجيل لأ
مش اكتر يا إيهاب




Ana Keda
--------

التتنيح أقل واجب يا بنتى
ف المواقف اللى زى دى

انتى كمان وحشتينى

و ميرسى ع الغنوة
انا حسيتها أنسب حاجة للبوست
خلى بالك من نفسك
و من سى سيمبا بتاعنا




shimaa samir
------------

انا كمان بحبك يا مشموشتى يا صغيورة

و ايوه قوليها
حتى لو انتى شحطة
و مترين

بس مترين
الا متر تقريباً


و إجابة السؤال العويص

ما قولنا


---
لأ
---



مش لازم
اللى تحبه

هوه كمان يحبك



الحب مش بالعافية
و لا بالإجبار



ينفع حد يشق صدره
و يطلع قلبه
بكف ايده
و ياخده
يحطه تحت رجلين
اللى بيحبه
بلا تردد
و لا ندم
و لا انتظار لمقابل


ينفع كل الخطوات دى تتم
و تحصل بالعافية ؟؟

لأ

مينفعش

طب هذا الشخص
اللى القلب بيترمى
تحت رجليه

يبقى موقفه ايه؟؟


الأول اكيد
بيتفاجىء بالحركة الرهيبة دى


لو كان شخص
اى كلام
هيرد رد زى شكه
ندالة
او استهانة
او استغلال لأخر لحظة


لكن لو شخص محترم
و مش اى كلام
هيعمل ايه؟؟
غير إن مشاعر الامتنان هتغمره جدا
ف البدايات

و بعدين يفوق م الخضة
و يشفق على صاحب القلب
من الصدمة و الرفض
فياخده بالراحة خالص
عشان يترفق بيه

ممكن يكون رقيق قوى
لدرجة ان مشاعر الإنسان جواه
تغلبه مع شوية ضعف خفيف

فيقرر يدى لنفسه فرصه
و يوطى ياخد القلب دا من الأرض
و يضمه و يحضنه
لعل و عسى يحس معاه
بحاجة مختلفة و يقدره



بس فرضنا
بعد المحاولة دى
طلع مفيش حاجة
و الحكاية كلها
مجرد تقدير
و امتنان مش اكتر

يبقى صاحب القلب
يعمل ايه؟؟

و لا حاجة
غير انه هوه كمان
يفوق
و يبتدى يسمع كلمة لأ
و لو متقالتش بصوت عالى


عاوز يفضل فى درجته
هوه حر مع نفسه بقى


لكن ميفرضش دا
على غيره


حتى لو روحه
هتكون فيه

و غيره دا
مقلش انا تعبت
او مش عاوزك


انا جاوبت ع السؤال
الفلسفى العميق بتاعك
و لا خطرفت ؟!!



غالبا خطرفت

بس متاخديش على كلامى
ادينا بندردش


بوسات و حضونات
يا عصفورتى يا صغيورتى




لولا و زهراء
----------


الغنوة اهداء من ana keda
مروة الجميلة ام سيمبا

انا موافقة على كلام الاخت شيرين


بس على فكرة


تحقيقه ف الواقع صعب قوى
ممكن تتنفذ الحكاية دى
ف اوقات مع ناس معينة

بس مع ناس تانية
مبينفعش

اصلا انتى بتقعدى تنتظرى زمن طوييييل
فرصة تواجدهم ف حياتك
عشان يطلعوا منك اجمل
و اصفى ما فيكى ..
الشق الطيب الرقيق
اللى مبيطلعش تقريبا
مع أى نفر تانى


دول كمان مش هتعيشى
ملائكيتك المرجوة معاهم ؟


ايوه
ملائكيتنا


احنا من حقنا
اوقات نحاول كون ملايكة

نحاول يعنى

جرى ايه؟؟!!

ميرسى على دعواتك الجميلة
يا ذات الوجه المشرق

sony 2000
---------

ليه؟؟

طب ما نعكس السؤال

ليه يقول أيوه
و هوه مبيحبهاش ؟!





حنان الشافعى
------------

للأسف مش هينفع التوقيت اللى قولتى عليه يا نونا

انا أسفة جدا و تتعوض ان شاء الله
بس هحاول و اشوف برضو

سلامة قلبك يا حبيبتى
و سلامى لماما و فاتيما الصغننة




mostafa rayan
-------------

رفض الهدية الغالية يا مصطفى
مش معناه انكار كرم صاحبها
و إهانته

مش ساعات تلاقى حد غريب عنك
فجأة يبقى عاوز يهاديك بحاجة غالية قوووى و انتا تحرج جداااا منه

تبقى ممتن لهديته و لأنه فكر فيك عشان يهاديك و تعب نفسه و بيقدمهالك بحب و فرحة ف عيونه و سعادة و تمنى انك تقبلها و تفرح انتا كمان

و بعدين انتا متقدرش تقبلها
رغم كل ذلك
عشان انتا مش هتقدر تردها
و لا انتا ينفع تقبلها برضو حتى لو هتردها عشان متكونش استغلالى
لكرم صاحبها اللى تصادف
انك بتعزه كصديق و كبنى آدم
لكن مكنتش عاوز اصلا تهاديه انتا كمان بحاجة غالية كدا لأنك عاوز تديها مثلا لحد تانى مستقبلاً ..

انا توهتك و لا معرفتش اشرح؟!

طب ف كل الاحوال
انا قلبى جامد يا صفصف
متخافش على أختك فاتيما
ان شاء الله اشوفك على ألف خير
يوم ابو الريش يا ابو قلب طيب





SAYAD SAAD
----------

مش لازم تفضل لحد ما تسمع لأ
بودانك يا سيد

كفاية تحسها

من قبل حتى اللى قصادك ما يقولها
عشان تنسحب ف هدوء
و متضايقوش
و انتا كمان تتضايق من نفسك
انك ضايقته

انا بخير
متقلقش يا سيد المكسرات





بسمة عبدالباسط BOS BOS
----------------------

يا بسبوستى متزعليش
و لأ بتاعتك على قلبى زى العسل
انا موافقة عليها بالثلث
سلامة قلبك يا حبيبتى

صوت من مصر
----------

كيمو

متتصورش ممتنة قد ايه
بتعليقك دا

و انك اهتميت تطمنا عليك


بتشكرنا على ايه
يا محمد بس ؟؟!!

تعرف لما ستيتة سمعت الخبر اول حاجة قالتها تعالوا نتلم
و نروح نعزيه
و نقف معاه
و نعمل اى حاجة

بس انا قولتلها
اكيد الدنيا عنده متلخبطة
بما يكفى و كفاية مؤقتا
نروحله مدونته
و لحد ما يرجع بألف سلامة
و يبقى وسطنا

ربنا يطمنا عليك دايما يا كيمو
و اتمنى نشوفك يوم
ابو الريش فى 9 ابريل الجاى


فكر كدا و حاول
و تعالى اتونس بينا
و تبقى وسط اخواتك يا بنى

البركة فيك و ربنا معاك

مدمتى بتردى يبقى روقتى يا جميل
خذى بقى عندى فايض :-)

:-**************************************************************************

اولا استدراك اصطباحات البارحة

صباح الأعياد وحزن لا ينقطع
ربنا ميحزنهم ثانى فى اعيدهم
و بصراحة النفاق الاجتماعى ده دمه ثقيل
الناس لو بطلت الشعب الطيب حيعيد بنفسه

صباح التردد يا عزيزى أيبك
سيبك من المنصب الى شكله ملوش لزمة
العنوان بتا الاصطباحة فى حد ذاته عسل
قلبتى شجرة الدر يا فطوم :-))))))

صباح الطاهريات
يارب يفضل عمر طاهر منغير الالم
بس الواد ده متجوز جديد و بيكتب كده عن المرأة و الزوجة ليههههههههههههههههههههههه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
:-))

صباح الفن الغير مغرض
بصراحة مش مصدقة قوى :-((((
غرضه ايه
منصب سفير نوايا حسنة لليونسكو و دعايو ببلاش كل ما يسافر يمين او شمال
شكاكة انا مش كده :-)))

صباح الخير
يرب الخير يعم عليهم و على كل الغلابة و يحسن حال البلد

صباح قناديل النور
بيلعب كمال اجسام :-)))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))
انا فطيس من الضحك

صباح الألفاظ الدقيقة
الوضع ده يخض بجد
بس مدام مصر من ايام الانبياء و هى مبتليه بسنين عجاف
ربنا يعديها الايام على خير

صباح العامريات
(هيا مش مراقب هيا حاجة تانية )
قصدوا ايه خدام ؟؟؟ و لا ايه ؟؟؟

صباح الأشعار
اعتقد ديه علة لا اتمنى لك الشفاء منها فقط ان تثمر عليكى بالخير

:-xXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

معلش على التاخير فى اصطباحات النهاردة
بس اصلى كنت خلصانة و ملا فوقت فتحت فى الرغى عندى :-))

و منحرمش من دعواتك ابدا
و يارب تستقبلى شم النسيم بابتسامة قلبية كبيرررررررررررررررررررة

صباح الترابية و التكميم
ترابية من انه حيسففهم التراب ؟؟
ايه العقاب المبالغ فيه ده
كده الى حيصلح التعليم ؟؟ و المدرسين ذنبهم ايه :-((((
و ادينا حنشوب المدارس حتعمل ايه فى موسم الامتحانات
حيقولوهم طلعوا ورقة و اتملوا ؟؟؟
هى الدولة تقريبا اتعتبرت الدراسة مصدر من مصادر الدخل القومى :-((((((

صباح المفاتيح
ياسلام و الله خايف عليه :-))
يارب يخاف زى ما عمر بن الخطاب و عمرو عبد العزيز ما خافوا

صباح الكسابيات
نهاية تخوف صحيح
لا الناس تفكر ترد بدل تقبل الامر الواقع و المدشدش فى الارض

صباح العطش القادم
الى اهتم قبله طاااااااار
و ده اعتقد اتعلم من راس الوزير الطائرة :-((( و بعدين ايه الانسب الفلالى ديه يسلام ياسلام

صباح الاستنزاف
خبر مثير فعلا :-)
يخلى الجرئ يكتب بصدق و ميخافش

صباح المقارنات
سبحان الله :-( ولا حول و لا قوة الا بالله

صباح الخيرا
1- الى الخارج
2- لانها انجليزية
3- رفع العلاوة فى مايو كالعادة
4- رئيسى و سيامر بالاستقالة
5- علشان الحديد بالنسبله مبقاش جايب همه
6- :-) الورق موجود بس فى الزبالة اكيد
7- سيوافق لما سوزى تروق لهم
8- وزير الداخلية
9- لا
10- عنده ضمير
11- :-(( معنى الى عمله ان العلاج و بذات فى المستشفى ديه سئئئئئئئئئئئئئئئئئئئئئئئئ
12- اممممم حد ثالث :-) ممكن عز؟
13- احمد عز :-)
14- :-) الحكومة الاثيوبية بتتشرط علينا يا حلاوة و ايه السبب ياترى عايز الى قبله مثلا ؟
15-الشنة و الرنة هناك اقيم
16- جاتنا نيلة فى حظ المصريين الهباب

صباح العبر
يالهوى الموضوغ كان وراع واحدة ست
يا فضيحتنا بس هى ست فى الحقيقة و لا مدسوسة ؟؟؟؟؟؟

صباح الثقافة
؟؟؟؟؟؟؟؟؟؟؟؟ الله اعلم :-(((

صباح الأشعار
:-***********************************************************************************************************

Wanda
------

انا بخير و رايقة يا وندا


مروقش ليه بس؟


ميرسى يا حبيبتى

و علقى براحتك

الصباحات دى بتاعتك

دنتى جمهورها الوحيد يا بنتى
و على فكرة

دا كفاية عليا

بجد

لو مفيش حد هيقراها غيرك

هكون سعيدة و كفاية عندى انتى بتقريها
و تردى عليا فيها


********************************
و
×××××××××××××××××××××××××××××××××

يا ونداتى











ميرا (وومن)
------------

ليه بس يا ست البنات تقولى كدا ؟!!

و الله أبدا


يا خرااااشى ع ست البنات
لما تبقى رقة و حساسات
و تظلم الفاتيمات
بحاجات مش معقولات

شاعقول يا ميرا
ينفع كدا !!!

افيش حاجة و الله
غير انى مطحونة شغل
و باخده معايا البيت اخلصه
و كمان الدنيا فيها لخبطات
من ناحية يوسف شوية
و من ناحية القلب شوية
كدا ..

مش لازم اقول كل حاجة بقى
لحسن حرام عليا اعذبكم جامد
فبقول أديكم شوية تلمحيات
عشان النكد ميبقاش مكثف
يبقى جرعات متقطعة

ففى وسط كل هذوها الحاجات
بنضطر اسفة اهمل ف حبايبى
و غصب عنى اوقات على سدة نفس اوقات
على انشغال ف الكتابة اوقات .زكدا


لكن زعلانة ؟؟

ابدا و الله

معلش استحملونى شوية

يا رب اشوفك يوم ابو الريش
تعالى من بدرى عشان نقعد نحكى

سلام مؤقتا يا حبيبتى

انا شفت البوست ده من اول ما اتنشر بس صعب انى اعلق عليه
لانه وجعنى قوى

شوفى البوست الاخير عندى
الى رجل
بطلتى بقى سكتت علشان خافت من كلمه لأ
فاثرت الصمت

الحب

قصه لا تنتهي

شعور

لا يوصف

احساس

يطير بنا الي حيث المستحيل

ومهما يقال فيه يبقي لغز حير الجميع


اسعدك الله

:) وليه مش بتزوريني ..

ياسلام
انا اتغر فى نفسويتى ديه شويتن ثلاثة :-))
صباح الخيرات يا فطوم

:-*********************************************************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

و يارب ديما رايقة كده من الدنيا و الى فيها

(و إن أعلى مراتب و درجات الحب
ان يمرغ المرء قلبه ف تراب رجلين الشخص
اللى هيقابل كل هذا الطوفان من الحب
بكلمة واحدة لا تتبدل هى كلمة لأ)
إيه المشاعر الحساسة دى..
أنا خلاص حعيط
عاااااااااااااااااا

أتكلم بجد بقى : أنا مش موافق خالص على الكلام ده.. يعنى إيه حب من غير أمل؟ طيب ليه.. دا عذاب وعلى فكرة أنا بجد حصل معايا كده وكنت شايف إن مافيش أمل فعملت ستووووب للخلف در .. أنا حعذب نفسى ليه هو أنا حعيش مية مرة؟ لا أنا ماياكولش معايا كده .. بس يا ستى وعنها ورحت حاطت إيدى فى بق الأسدو.. سورى سورى مش دى
وعنها ورحت قعدت مع نفسى وأقنعتها بالعقل إن الكلام ده ماينفعش وإقتنعت وإتعذبت شوية صغننين وخلاص
تحياتى

عاشقة الرومانسية
-----------------

قريته و علقت يا عروسة البحور
و يبدو ان الكل مصيره
لأن يؤثر الصمت بقى و لا إيه

و من ناحية الوجع
انا أااااااسفة

اعملوكوا ايه
فى قلبكو الحونين دا ؟؟؟





ghorBty
-------

اسعدك الله انتى اكتر يا غربتى
و الله غيابى عنك غير مقصود
انشغالات ف كذا اتجاه مش اكتر
ربنا يطمنا عليكى دايما




wanda
-----

الاول
********************
و ××××××××××××××××××××××

و ثانياً
شويتين تلاتة بس !!!

خمسة ستة عشرة
و اللى يحاط بكم الحب اللى انتوا محاوطنى بيه دا و ميبقاش رايق يبقى يستاهل الضرب بالفلكة يا جااااابر






أبو حميد
--------

يا خرابى
يا عقلانى
يا هندسة
يا برج الجدى
الكل مجتمعين


انا كل اللى عملته هنا
انى بعرفّ الحب يا ابو حميد
من وجهة نظرى الغلبانة المتواضعة اللى غالبا حزب الاغلبية هيشوفها غلط و عبط و متكلش معاه و كدا


بس دا رأيى
قمة كل شىء
انك تعمل اللى فوق قدرتك
على عمله


و قمة درجات الحب
انك تحب الشخص
اللى قادر على إتعاسك



اما مصير هذا الحب بقى


فذلك
امر
آخر


رد فعل الشخص مننا
بتختلف فيه من حد للتانى


زى سيادتك كدا
لما اتصرفت تصرف مخالف عن اللى هعمله أنا او غيرى


انا ف مرحلة النظريات

يعنى بعرف النظرية
و اقولها
و اشرحها
و افصصها



معرفش بقى
لما النظرية دى
تدخل حيز التطبيق ممكن يجرالها ايه؟!!



قد تنجح
و تتنفذ بالمللى بنجاح


و قد تتنسف من أساسها
و ارجع اقول انا عيلة
و مش قد كلامى



ف كل الاحوال
المرأة نظرتها للحياة و الحب
غير الرجل
و دى نعمة من ربنا
ان حد يبقى ورا عقله دايما
و حد ورا قلبه دايما
عشان يكملوا بعض



مش معنى كدا
ان مفيش ستات عقلانية
و لا رجالة عاتشيفية



بس وقت الحب
ما سهمه بينفذ
كل الحاجات بتيجى على جنب


و لما حب اللى قصادك
يتغلغل جوا كيانك
بيبقى مفيش قدامك
غير انك تطلع قلبك
و ترميه تحت رجليه
بغض النظر عن الكلمة
اللى هتطلع انذاك من بوقه
ايوه كانت
و لا
لأ


تحياتى ليك يا باشمهندس
و اتمنى نشوفك يوم ابو الريش
ان شاء الله هيكون يوم اكتر من جميل

صباح الأحكام القضائية
و لا حاجة
هى المحكمة ديه ملهاش لزمة
بس اوعى تقولى لجدو :-))))

صباح الخيرات
بوست كلامه مهم قوى

صباح الموت المجانى
ياه ناس اختارت تنط و تغرق على ان غفر السواحل يرجعهم
ليه ؟
هما الى بيتمسكوه بيحصلهم ايه ؟؟

صباح الكسابيات
موضوع السوليتير ده صحيح ؟؟؟
قراتها كذا مرة
بدل ما الراجل ينام بيلعب :-))))

صباح المجالس
هو احمد عز احتكر مكانة الراجل الثخين الى كان بيشخط فى النواب بتاع المنوفية (اسمه ايه نسيته :-((( بس كان كبير الحزب الوطنى )
اتارية بيلعب كمال اجسام
بس و النبى حد يغيرله ستايل لبسه
افهم شاهيناز النجار اتجوزته ازى
ست شيك تتجوز ده ازى :-(( هماها الفلوس و السلطة و بس و هى مش محتاجة الاثنين ؟؟؟؟

صباح التفاصيل التى لا تمر
فعلا
الأتراك قادمون
:-))) و حنقلبها عثمانية مرة ثانية
و نخلينا فى المماليلك الى حكمنا

صباح الكرامة
الانسان اهان نفسه و قل على المخلوقات تفتكرى ربنا مش حيحسبنا على كده ؟؟

صباح الفن
انهم يقولوا السبب بصراحة ده يحترم
بس غنوة شيرين؟؟؟ ايه ؟؟؟

صباح التخاريف
بوزن الثلاث اهرمات و بس

صباح الأنوار يا نوارة
هى كده تغاضيت ؟؟

مساء الخيرات
:-**************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

مفروض انى بعتاهم بالمرسال الخصوصى
ابقى لما تستلميهم قوليلى عددهم بالظبط علشان احاسب المرسال و اشوفه خنسر منى قد ايه :-)))

فطوم
مال بابا مقفل معايا ليه ؟؟

لو بيحب سبيه كفاية انى افرح فيه
لو حاجة ثانية ابقى و النبى شديله ودنة شوية :-))

انا بحب البوست ده قوي قوي قوي
وحشتيني
وولايهمك اكيد ان شاء الله تتعوض يا طمطم انا اصلا هاجي اعد اسبوع عندكم من قبل البطوله ب 3 ايام
خميس وجمعه وسبت والبطوله الحد والاتنين والتلات واحتمال اعد الاربع كمان غلاسه كده اكيد هنظبط ونتقابل فيهم ان شاء الله حتي بسكوته كمان تعرف تيجي
يوم 9 ابريل ان شاء الله هكون موجوده بس المشكله اني مش بعرف اروح اي حته في اي حته وفي حاجه كده هحاول اعملها لو نفعت هقولك قبلها وهتعرفي منفعتش يبقي مفيش نصيب بقي
ماما وفاتيما الصغننه بيسلموا عليكي كتيييييييييييييير
ولو تعرفي قد ايه وحشاني ونفسي اشوفك
اكيد ععارفه
صحيحي اانا عملت فحص العمليه بتاعي وطلع كويس وهعملها ان شاء الله بس اجلتها شويه كده
خلي بالك من نفسك قووووي قوي
دعواتي

وحشتينى اوى

مش بنسى ابدا اطيب عينين دايما بتضحك لكل الناس وتطبطب عليم برغم كل الالم

يا رب تبوسيلى يوسف قريب واجى معاكم نطير بالونات من البرج

عرفتى انا مين؟؟؟

حفرح اوى لو عرفتى ولو مش عارفه حبقى اقولك بكره

مع كل بسابيسى وحضوناتك

طبعا للاسف فاتنى البوست دا
يادوب لحقته فى الاخر
جميل كل ماكان الحب مستحيل وحسينا انه بجد
كل ماكان فعلا هو الحب الحقيقى
كل ماكانت فى حواجز وميأسناش كل ماكان هو دا الحب اللى بجد

تسليمى يا تيما يام يوسف
على الكلام الحلو اللى فيه مرار

الحب لايعني عند بعض الناس شي،ولكن بعضهم يعني لهم شي...

لماذا اسف...

ههههههههههههههههههههه

إرسال تعليق