.

.

تــلات قـــارات  

Posted by: فاتيما in






العواف عليكم

و اتمسوا بالخير و الهنا كله
دخلة حلوة اهو و فرايحى خالص
عشان مبسوطة جداااااا

و اكيد عارفين من غير ما أقول
صح ؟!!


أبو الريش يا بشر
من كام اسبوع و تحديدا من عشرين يوم
قبل عيد الام بشوية كدا
جاءت الدعوة عبر الإيميل من داليا قوس قزح
وش الخير
و الفرح
و ألوان السما السابعة
لأربع تنفار تحديداً عشان يشاركوها حلم
يبدو كبير و بعيد و صعب ت
حقيقه فى ايام معدودات
و هوه كالآتى
مستشفى ابو الريش اليابانى للأطفال
محتاجة جهاز مونيتور
و تمنه حوالى 15 ألف جنيه
المبلغ الموجود خمسة و فاضل الباقى
هل ممكن يتلم و نق
در نجيب الجهاز ؟؟!!



فورا تلقفت داليا الطلب و نقلته لينا
خالد همس الاحبا
ب و خيخة و ضياء
و طلبت نكتب بوستات
دوس
هنا
و الدعوة اتنشرت مع البانر فى مدونات الاحباب
مع دعوات مستمرة للجميع
بالمشاركة و سرعة ارسال الحولات يات جماعة
قبل يوم 9 أبريل
دوس هنا



و قد كان
بدأت
عطور الاحباب تتضوع
و ناس تبعت لناس
و ناس تقابل ناس
و ناس توصى ناس
من كل
حتة
برا مصر ..سعودية ... كويت ..اوربا والدول المتغدمة
جوامصر .. الغردقة .. طنطا .. اسماعيلية.. اكتوبر
و طبعا القاهرة و الجيزة .. اساسى يعنى


النهاردة على حداشر تقريبا
كنت قصاد المستشفى

علشان الاقى ضياء بيتوفل مايند قاعد ف الضلاية
منتظر أى حد يهل



خلوا بالكم
انا اتقر عليا و اتحسدت
مبقتش اروح اول واحدة
و عيب قوى اللى بيحصل

الواد ضياااااا سبقنى .. عاااااااا
الريكورد بتاعى بيتكسر اهو
مينفعش النوظام دا
بوتيتاً بقولكم اهو


المهم
قعدنا نرغى و نحكى
و ننتف ف سيرة الدنيا

لحد ما جه خالد همس الاحباب
و توالى الحضور ..كيارا البنوتات العسولات
شريف باشا ..الباشا بتاعنا
و الأستاذ خالد عونى الأخصائى بالمستشفى
كل شوية يطلع يطمن علينا و يقولنا اتفضلوا جوه
ميصحش تفضلوا ف الشارع

الظاهر كان خايف نطفش بالفلوس و لا حاجة
و بصراااااااااحة
احنا كنا ناوينها ..بس قولنا نستنى
لما نلم بقية الغلة كلها

لسه الباقى ما جاش
عنهرب بألف اتنين بس ؟!!
يصحش ..دا حتى ان سرقت اسرق جمل
و لا انا بتكلم غلط ؟؟!!



دخلنا قعدنا جوا ف المستشفى
فى انتظار الباقى

قوس قزح هلت علينا .. شايفين الصورة
اللى فوق دى

القلب اللى كله الوان دا ..هيا تمام
بعد شوية تتابع الحضور
-------------------------------------
الأستاذ عبده - من طرف wanda
وليد الدوغرى

أبوعلى (سمع هوص )
بت خيخة و اى كلام
صوت من مصر
أبو حميد
غادة بستان افكارى
رانيا اختها

اصدقاء غادة
( رضا - أحمد - رحاب مدونة حياتى مش حرة فيها)

amr...
كيكى عوووو
مصطفى ريان
احمد سكر





فى بداية القعدة اتكلمنا مع الدكتور
مرتضى الشبرواى استاذ طب الأطفال
و امراض الكبد

أسئلة و إجابات متتالية من الحضور
حول اهمية الجهاز
و تمنه و فوايده
و طلبات المستشفى و احتياجاته

و الجهاز منه نوعين
--------------------
واحد ب 15 ألف
و دا كان المستهدف

و واحد ب 17 و يحبذ ان يكون
هذا اللى هنشتريه

لأنه قابل للتحديث و التجديد على مدار الوقت


دا غير جهاز تانى
تمنه 3,600 و ضرورى برضو



طب نلم تمن المونيتور
و بعدين نشوف التانى دا




طب و بعدين ؟؟
كنا عاملين حسابنا على عشرة تلاف
و يا رب بس يتلموا
دا كان الكلام فى البدايات قبل ما ييجى الكل




فتأتى التطمنيات من على الشفاه
طب نجمع اللى معانا و نشوف
دلوقتى داليا جاية
دلوقتى خيخة جاية
و ناس تانين جايين و هنشوف



و بالفعل بعد صلاة الجمعة العدد زاد
و توالت الاظرف و الفلوس تزداد
من الفين و شوية
لأربعتلاف لسبعتلاف و معرفش كام
لتمنتلاف و ستمية
لتسعتلاف و كذا
لعشرة تلاف و كيت
لحداشر الف
لأتناشر و مية
لتلاتشر ألف و ربعماية
13,400



يا بــــركة الله


اتلم المبلغ و الحمدلله
و فاض كمان حاجة
نبتدى بيه تجميعة الفلوس
..للجهاز التانى إن شاء الله
قولوا يا رب





دوس ع الصورة لتكبيرها

دى بيانات المونيتور اللى تم تجميع تمنه
17 أل
ف






دوس ع الصورة لتكبيرها

دى بيانات الجهاز التانى المطلوب شرائه
و المستشفى محتاج منه كذا واحد
بس مبدئياً عاوزين واحد حتى
اتجمع من تمنه 1,200




اللى عاوز يتواصل مع د.مرتضى الشبراوى
دا أيميله
mortada_elshabrawi@yahoo.com



و اللى لسه عاوز يدفع يبعت أى مبالغ
عشان نكمل تمن الجهاز التانى و لعلاج اى حالات أخرى
يتصل
بخالد همس الاحباب
0101345140

و

نوران الشاملى
بت خيخة و اى كلام

0180004374

و التفاصيل عن الحوالات و ارسالها هتلاقيها
هنا



الحمدلله تمت المهمة بنجاح
دخلنا الإستراحة عشان نعد الفلوس بهدوء
و الشيطاااااان شاطر و بيجيب مجموع

لما لقيت الغلة
عدت العشتلاف

قولت لخالد يلا بينا ننصص يا خالود
و نهورب على بلاد برا



مرضيش
الويحيييييش



التبرع الجاااااااى و علينا خير



الخطوة القادمة هى ان نوران عندها حد تعرفه
يقدر يشترى الجهاز بتمن اقل من كدا
بتخفيض بإعتباره بغرض خيرى
و الخطوة دى محاولة لتوفير اى مبلغ
ينضم لمبلغ الجهاز التانى المطلوب

و ان شاء الله بعد اتمام المهمة دى
بحضور خالد همس الاحباب و الاستاذ خالد عونى
يبقى كدا تمام
و ربنا يكرم فى الخطوة التانية ان شاء الله
عشان نكمل المبلغ 3,600 و ربنا يبعت



بعد المستشفى خرجنا ع الباب



قوس قزح وش الخير
روحت
و اتفرقنا ع العربيات
عشان نروح نادى المحامين اللى ف المعادى
و هناك انضم الينا رقيقة الرقيقات
reem
و آخر عنقود الظرفاء سوووو
العجوز اللى عنده 30


طبعااااا انا مكنتش جعانة بالمرة
و لا نفسى مفتوحة خاااااالث
و لا كلت حاجة متلقاً
غير سنكوتيشين شاورمة و فراخ و معاهم
طبق بطاطس و بيبسى و نسكافيه
فى أقل من ساعتين اصلى عاملة ريجيم
و مبحبش ابوظه


بعد شوية لمينا نفسيتنا و روحنا ع البورصة
عشان الباشمهندس عسقلانى
جالنا على هناك

و انتهت القعدة على تمانية و نص تقريبا
و كله بيتك بيتك خلاص
و رشينا مية



اليوم كان لطيف
صحيح مفيش عدد كبير حضر
بس اللى بعت كان حاضر معانا و الله


ضياء بيتوفل مايند و خالد همس الاحباب
و سوووو و وليد الدوغرى و عمرو
اخلاق رهيبة يا جماعة

..اخواتى بجد و يحسسوك ان الدنيا بخير
طول ما هما فيها


مصطفى ريان و شريف لا يقلوا شياكة
عن المذكورين اعلاه


معرفش ليه ملحقتش برضو اقعد مع أبو حميد
حد معزم علينا يا باشمهندس و لا إيه؟؟


غادة بستان افكارى و اختها رانيا و باقى اصدقائها
شخصيات لطيفة و اتمنى ميكونش دمنا
كان تقيل عليهم و لا حاجة

و يا رحاب بطلى ريجيم لحسن هتختفى
البنت رفع الخساية اصلااااا.. و بتقول عاوزة اخس
اولع انا ف نفسى و لا ايه عشان المنظر ؟!!!

شششش .. الشورير اللى حدف علبة الكبريت
ياخدها تانى من سكااااات



البت كيكى جت مع انها تعبانة بس و الله عملت جو
و جالها كوباية جوافة شبه حمضانة
و طبعااااا كان نهار فحقلى و مرضتيش تكملها
و جابولها بدالها منجة
و شربتها و الحمدلله بلا مشاكل
خسيتى شوية يا كيكى ..و عسولة كالعادة


وليد الدوغرى خس هوه راخر
مع انه كان جاى و ملغم بكام سنكوتش كبدة
ريحتهم فحفحت كدا اول ما طلعوا م الشنطة
و قعد يعزم علينا ..جدع الواد قوى
صوعب علينا و قولناله كلهم لوحدك
عشان الإنسانية المعذبة



كيارا خست قوووووى برضو



سامعة ناس من آخر البلوجر بتسأل و بتقولى
يا كابتن لطيف ..هوه النهاردة
يوم الخسسان العالمى و لا إيه؟؟؟


أقولهم .... هااااااا


و بعتييييين بأأأأأأأأه
مش اديكو التقرير المتين و لا اكروت أنا ؟!!!



بت خيخة و اى كلام كانت شعلة نشاط كالعادة
و عسقول نجح يا جماعة بس معاه مادة
عشان يخزى بيها العين
مبرووووووك يا أبو العساقيل



مصطفى ريان كان عيد ميلاده النهاردة
و البنى زعلان معرفش ليه ... اذ حضرته
بيعتبر ان اى سنة عدت متستاهلش نفرح بيها
المفروض عادى و مبيحتلفش خالص
بس غلاسة من اختك الكبيرة هقولك
مبسوطة جدااااا
ان اليوم دا كنت معانا
كل سنة و انتا طيب يا مصطفى


حد كنت عاوزة اتقدمله بإعتذار
و ارجو يقبله منى

الاستاذ أبو على (سمع هوص) ... و هقول ليه
انى كنت متصورة ان حضرتك
ذاك السخص اللى كان بيدخل فى التعليقات
عند ناس كتير و منهم اختك فاتيما

و يكتب كلام مش لطيشف بالمرة
و توجست منك خيفة فى البدايات
و قولت فى بالى انى لن أطمئن
غير لما اشوفك بنفسى
فى أى لقاء تدوينى
و كنت برد بتحفظ شديد
و حذفت اول تعليقين ليك عندى

و لما شوفت حضرتك النهاردة تأكدلى
انك شخص محترم و ذوق

و بالتالى بعتذرلك عن سوء الظن المبدئى بتاعى
و حضرتك شرفتنا النهاردة
و ان كنت مقعدتش كتير

و المرات القادمة تتعوض ان شاء الله


الاستاذ عبده اللى جه من ريحة الحبايب
ون ون .. ونداتى اللى بعتت سفير عنها
شخص مهذب و محترم
الحلو ميجيش من وراه غير الحلو
كنتى معانا ف اليوم دا يا ونداتى
ومتتصورييش فرحتى كانت أد ايه ان قاعد
معانا حد تبعك ...هترجعى امتى بقى ؟!!!



فرحت لما سمعت صوت حنين القلب
و زعلت لما سمعت مكالمة
من حد غالى عليا كان بيعيط للأسف




خالد همس بيقول ان اللقاء التدوينى القادم
هيكون بؤجة الخير الصيفية
و حضروا نفسكوا بقى من دلوقتى
هتكون فى مايو إن شاء الله


أحمد سكر اخيرا جه
و الجدع دا مبيظهرش غير فى ايام زى دى
فيها خير و تبرعات تلاقيه فورا موجود
كنت عارفة انك جاى يا سكر
الخير انتا متتأخرش عنه
دى مش شيمك



إيناس نهر الحب بعتت السلامات
وصلت يا نهر الخير و الحب
سلاماتك انتى و ماما امولة
و كل اهل بورسعيد الجميلة




ميرا وومن اعتذرت عن الحضور
عشان عندهاحالة وفاة ..البقاء لله يا ست البنات
و كأنك معانا يا حبيبتى


سألت داليا قوس قزح عن آبى
اصلنا قعدنا فى نفس المكتب بتاع المرة اللى فاتت
و افتكرتها لما كانت قاعدة مالية الكرسى
ربنا يسعد كل ايامك يا بيبى
و المرة الجاية تكونى معانا ان شاء الله


كيمو صوت من مصر
ظهر رغم الظروف زى ما وعد
و كان معانا من اول اليوم تقريبا
كان لحضوره معنى كبير
ربنا يثبت قلبك يا كيمو
انتا راجل جدع بجد

شكر كبير بجد لأستاذ خالد عونى
و دكتور مرتضى
و للدكتورة نيفان لطفى
اللى أخدت على عاتقها

فكرة البحث عن متبرعين للجهاز
دون انتظار روتين الحكومة

لحد ما العيال تروح مننا و محدش يلحقها
لمجرد انتظار الامضا م البيه المسئول



و المؤلم ف الأمر ان حسب ما سمعناه
الدولة رافضة تدخل قرار علاج الاطفال
المرضى بفيروس سى

لأن علاجهم هيتكلف جامد بسبب الأعداد
و دا بيلقى عبء على المستشفيات اللى ملزمة
توفر مصادر انفاق
و مفيش استمراية
و العلاج بيكون اسبوعى و شهرى

لحقن بتتكلف الاف ...طب أزاى ؟؟؟


يوم 25 أبريل فيه حفلة بمستشفى أبو الريش
للتسرية عن الاطفال ..للى عاوز يجيب لعب و حلويات
و يفضل يا جماعة ..اللى ناوى يتبرع
يخليها مادياً احسن ..لأن العلاج مكلف
و الاولى بالصرف هو الحقن و العلاجات
اكتر من أى شىء تانى



فيه جروب ع الفيسبوك اسمه
كيف نحمى أطفالنا
يا ريت يا وش الخير تبعتى اللينك عشان أحطه
فى البوست هنا ..لأنى مخلوقة
غير فيسبوكية كما تعلمين
داليا مديرة الموقع على فكرة
يعنى تدخلوا بقلب جامد و تشوفوا ايه الحكاية


كان نفسى عادل يكون موجود النهاردة
بس فرح اخته عقبال عندكو بقى و طبعا
مش هيبص ف وشنا ف يوم زى دا

دنا ممكن أضربه يعنى..الكل سأل عنك يا بابا

و بسكوتة بساكيتو كمان تعبانة شوية و مقريفة
فمنفعش تيجى و يا ريت تطمنينى عليكى
انا ببعت نوداء اهو من مدونتى الغلبانة
ماشى ؟؟

كان نفسى ناس تانية حلوة كتير تيجى
متعودة على وجودهم .. زى وليد كنج توت و هبة و عمر
و ام بتول و مش هقول اسامى لأنى اكيد هنسى
بس هما عارفين روحهم
و عارفين أد ايه هما مهمين وسطنا





reem
آه يا ريم .... ماذا اقول يا بنتى
انتى اكتشافى النهاردة ..بجد انتى رقيقة الرقيقات
وحد جمييييييل قوى

و اظنك شوفتى دا فى عيون كل الحاضرين


و الست هااااااانم
موبايلها وقع فى قعر الشنطة

و كانت ليلة


قعدت تدور عليه


و اسمعوا تريقا بقى من امة البلوجر
اللى قاعدين


فين الموبايل يا ست ؟؟

أصله

كان معايا
كان معايا ف الشنطة
كان معاياااااا
دا عسقول اللى بيقول

طب رنوا عليا كدا
انا سمعاه بس مش شايفة
دا ريم اللى بتقول

وهتشوفيه ازاى ف الضلمة كدا
سوووو اللى بيقول
و طلعلها بطارية عشان تشوف كويس

رحلة بحث رهيبة
انتهت بعد يأس شديد

بالإستعانة بخبراء من الخارج


هاتى الشنطة دى لما اجيبهولك انا
اختكو فاتيما اللى بتقول


و و حياتكو طلعته
عييييييييب


دنا على رأى امى ..لما توصف حد
واعى (اخدين بالكوا ) بيلاقى الحاجة
و شاطررررررر ..(آل أنا آل) مثلاً


انه بيعرف النملة مخبية عيالها فين

النويايل اخيرا سلم نفسه و طلع
وسط تصفيق حااااااد

من جمنهور البورصة



انا زعلانة قوى
أصل نفسى كانت مصدودة النهاردة

مكلتش كتير ف النادى غير اللى قولتلكم عليه فوق
و حتى ع البورصة شربت سحلب بس

و دلوقتى قاعدة بكتب البوست بعد يا دوب
ما أكلت سنكوتشيتن جبنة و كام شيبسياية كدا
و بحلى بشكولاتة من القطع الكبير
و هقوم اعمل شاى اخضر ..عشان أحبس بيه
بس معرفش ليه
اكلتى ضعيفة النهاردة
انتصيت عين شكلى و لا إيه ؟؟؟!!
حاجة غريبة



الناس الحلوين اللى كانوا بيسألوا عن المواعيد
يا جماعة الباب مفتوح فى أى وقت للتبرع
و خالد موجود يستقبل التبرعات دى


و متقلقوش

و انا و هوه هننصص

و اطفش على السلوم
و هوه على حلايب ... فركة كعب يعنى


قولتله لما الظرف كلبظ و بقت الميات و المتينات
طالعة منه حلوة كدا بتقول خدونى
يا بنى .... انا بعمل لمصلحتك
نطفش بالفلوس و خلى الناس برا تنضرب بدالنا ؟

مسمعش كلاااااامى .. الصعايدة اصلهم اخلاق
نعمل ايه فيه بس ؟!!
يا خالد انتا نعم الاخ
و رجل و الرجال قليل و الله



داليا انتى خلصتى الكلام
معنديش حاجة توفيكى حقك
بحبك يا وش الخير و الفرح
و لو الكلام بيخلص معاكى
فقلبى بسببك بقى مليان الوان مبتخلصشى أبدا


قبل ما أنسى
التبرع بالدم منفعشى فى أبو الريش
نصحونا بالتبرع فى القصر العينى الفرنساوى
قالوا انهم بياخدو الدم من هناك بعد فحصه
و مش بيتباع و لا حاجة
و ان شاء الله اروح اتبرع فى اى يوم
و اللى عاوز يتبرع
يا جماعة يروح هناك
لأن الاكياس
بتروح على ابو الريش طوالى


أخيراااااااااااااا


كل زيارة لأبو الريش
و انتوا طيبين


انا فرحانة جدااااااا
لأن اليوم ابتدى و انتهى بنجاح

ادينا المهمة كما يجب و اتجمع المبلغ
الحمدلله


و ان شاء الله الجهاز يتجاب فى أسرع وقت
و الاطفال تستفيد بيه


كل طفل ...حالته تتحسن بسبب الجهاز
هيكون ليكم يد فى ذلك يا عيال

ربنا يبارك فى كل حد شارك
بالمال او المجهود او الكلمة حتى


ربنا دايما يجعلنا سبب ف الخير
و لا نتجمع غير ف الخير

حاجة اكتر من رائعة ان تواصلنا
على النت و عبر التدوين
يكونله صدى نافع فى الواقع
تتحول الكلمات و الدعوات و الامنيات
لحقيقة بتفيد حد و تشارك
و تساعد حد محتاج
و ياه لو كان طفل

ربنا يعافى كل اطفالنا ومن كل شر


النهاردة
من تلات قارات
اوربا و افريقيا و اسيا


اتجمعت القلوب
مع فروق التوقيت
ف مكان واحد
و زمن واحد
و هدف واحد


بحببببببببكم قوى
يا احلى صحبة و ناس و عالم
تستاهلوا كل الحب
و التقدير
و الشكر

--------------------------------------------


This entry was posted on الأربعاء, أبريل 14, 2010 and is filed under . You can leave a response and follow any responses to this entry through the .

62 كــــلام بيطــبطـــب عـــلى قــــلبى و روحــــى

انا أسفة يا كيمو

معلش

انا بكتب من ساعتين تلاتة تقريبا
و انا محولة يا بنى من أثر الألوان
و الصحيان لحد دلوقتى
و الاكل اللى كلته طول اليوم


معلش صلحت الدنيا اهو

متزعلشى بقى
و مش هنشر تعليقك عشان ميهونشى عليا اول تعليق تكون عاتب عليا كدا

انتا نورتنا النهاردة و الله

بجد

اختك الكبيرة

يا فاطيما انا مش عقلى صغير عشان ازعل
الفرق اللى ضحكنى انك افتكرتى الشنطة وهى فيها الكبدة
وافتكرتى وانا بصراحة بتريق على ريم فى الموبايل
ونسيتى حتى اسمى
عموما مش زعلان انتى عارفه انا مجنون بطبعى

جميل جدا كل اللى كتبتيه
وصف الناس الحلوه اللى جات
و الناس الحلوه اللى شاركت
يارب دايما متجمعين فى الخير

ههههههههههههههههه... تاني حد يقولي موضوع انه كان شاكك فيا ..!! ههههههههههه....

ويافندم منغير اعتذار انا متفهم الوضع... منا بقولك انتي تاني حد يقولي الموضوع ده...

وشكرا علي كلامك.. وبعتذر اني مقدرتش اقعد كتير معاكم...

وربنا يجازيكم كلكم علي الخير ده...

ربنا يتقبل اللهم أمين

ويجعل عملكم في ميزان حسناتكم

معلش يا فطيما غصب عني والله ما قدرت احضر بسبب تعبي ان شاء الله تتعوض

ربنا يصلح حالك ويبارك في عمرك وعمركم كلكم
وسلامي لداليا الغالية قوس قزح

ربنا يكرمكم يا فاتيما
ويقدركم على فعل الخيرات دوما
وجعل الله سعيكم في موازين صالح أعمالكم

يقدركم على
الخير دايماً
ياأم يوسف
أحلى أسم انتى
بتحبى تتنادى به
صوووووووووووووووح؟:)

كل اللي قولتيه
عن تفاصيل اليوم وبحذافيرها
حسيت والله كأني كنت معاكم
وافتكرت يوم جميل شاركتكم فيه لأول مرة في رمضان اللي فات في أبوالريش

وافتكرت ناس رائعين
وروح أروع من ناس
فعلا بتحب البلد دي

مش مستانية منصب ولا جاه

جزاكم الله خيراً
على مجهوداتكم

وانا بحبك وبموت فيكى يا تيما

انا بجد مش مصدقة انى ربنا بيحبنى اوى كدا وانعم غليا بمعرفة حد جمييييييل اوى زيك كدا

مش ممكن يا بنتى حنانك ورقة قلبك وجمال روحك

ازاى بتعرفي مش تنسى اى حد حتى بنوتاتى عمرك ما نسيتيهم وكل مااشوفك الاقيكى جايبه لهم العاب وهدايا حلوة زى روحك

يبئا مين الرقيق يا تيما ؟

مين اللى اكتشاف مذهل يستاهل انى اشكر ربنا عليه ؟

بس كدا بردو يا تيما تحكى على موضوع الموبايل ؟
هههههههههههههههه

مش كفاية التريأة اللى كانت هناك
ههههههههههههه

بس شفتى انتى عسوله ازاى
حتى الموبايل انى اللى عرفتى تلاقيه
(ما يجيبها الا فاتيما )
اهو بقول امثال يا فاتيماولوحدى

بجد كان يوم حلواوى اوى اوى

فرحت بكل الناس اللى شفتهم وضحكت من قلبي بجد
ومبسوطة اوى لانى كسبت اصدقاء واخوات بجد

ميرسي ميرسي لكى يااحلى طمطم
ميرسي لانك خليتى يومى احلى او بالاصح ايامى احلى بوجودك فيها

بحبك اوى يا فاتيما من زمان بس النهاردة حبي ليكى زاد اضعافا مضاعفة

بوسات كتييييير اوى لكى منى ومن ومامتى وبنوتاتى

هحجز تعليق ولما اجى من الشغل هبقي اكتب التعليق بئا

بحبك يافاااااااااتى

البوست ده لو كان طوّل شوية
كانت عنيا زمانها اغرورقت بالدموع
يا دين النبي ع الحلاوة يا جدعان
ربنا يبارك في البشر دي نفر نفر نفراية نفراية
كان نفسي أكلمكم و الله يا أبو الفطاطيم
و خيخة فعلا اتصلت بيا
بس للأفس
كنت نايم
:(
و بين بينك كده
الأبلتين عندي لادع في دهاليز الحياة
و ماكنش معايا و لو حتى دهليز صغير كده أكلمكم بيه
يلا
حصل خير إن شاء الله
المرة الجاية بقى
نقول سلام



يللللا سلام

ربنا يقرح قلب كل انسان
شارك فى مساعده اطفال ضعيفه لا حول لها و لا قوه

ربنا يبارك فيكوا

صباحك سكر

انتى مش متخيلة انا فرحااااانة اد ايه
ايام الخير دى من احلى الايام فى حياتى
تخيلى كده لما الجهاز ده ينقذ حياة طفل ..تخيلى فرحة امه به ..متخيلة يا فاتيما احنا ممكن نكون سبب فى فرحة عاملة ازاى ؟؟ بذمتك قلب الواحد ممكن يفرح بحاجة اكتر من كده ؟

عارفة ايه كمان كان بيفرح قلبى كده
لما ببص فى عيونكم و انتم بتعدوا الفلوس و شايفين انها كملت المبلغ و زادت ..الفرحة فى عيونكم و عدم التصديق هى دى فرحتى علشان دى السبب اللى هتشجعنا اننا نكمل و نثق فى نفسنا اننا نقدر نعمل المستحيل بتوفيق من ربنا

الفرحة جوايا للاطفال اللى هنساعدهم و لثقتنا ان الدنيا لسه بخير و اننا لو اجتمعنا على حاجة هنقدر ننفذها

فين بقى الناس اللى بتقول المصريين شبابهم مهييس و اخره يلبس و يتفسح و يضرب بانجو ؟؟

احنا كويسين من جوانا بس محتاجين حد يزقنا و يوعينا

عارفة .. انا هنزل بوست عندى علشان قلوبكم دى تستحق الشكر قدام الناس كلها

باحبك يا طمطم
و شوفى لك حل بقى فى بنتى اللى هتتجنن عليكى دى و تشوفك

الحمد لله

ربنا يقدركم علي فعل الخير ويارب في ميزان حسناتكم

انا فرحانة جداً لأن كلامك نقلي فرحتكم بتجميع المبلغ

ربنا يكرمكم يا فاتيما و يبارك فيكم و يفرح قلوبكم زي مابتفرحوا قلوب المرضى و اليتامى و المحتاجين.أنا بجد كان نفسي أكون معاكم و كنت محتاجة أقعد معاكي و أتكلم معاكي كتير قوي.بس معلش الدنيا ملغبطة عندي قوي..سواء ماديا او معنويا او عاطفيا..ادعيلي يا فاتيما.بحبك قوي قوي.أنا بعت كومنت على البوست اللي فات بس ملقتهوش..حتى البلوجر عليا يا ربي!!

ربنا يتقبل يارب ويجعله فى ميزان حسناتكم ياااااااارب

ايمان مصرى

صباح الفل والعسل
جعل الله كل الأيام فرحة وهنا وسرور
وتقبل منكم يارب
ربنا يفرح قلبك ويجعل ايامك كلها بطعم الألوان والربيع و وروده :)
ممممممممممممممممممممؤ

فاتيما
ربنا يبارك فيكم جميعا
ويفرح قلوبكم
الجزاء من صنف العمل

انتظروا الخير القادم لكم عن قريب ان شاء الله

زهراء

فى الخير دوما مجتمعين
جعله الله فى ميزان حسناتكم وزخرا لكم

اهم حاجه انكو اتبسطو وعملتو حاجه بجد كويسه وفيها الخير
يارب تتجمعو علي الخير ديما
اللهم امين:)

لاااااااااااااا
لااااااااااااااااااااا
لااااااااااااااااااااااااا

بتروحوا لقاءات من غيري اهيء اهيء اهيء

ولا عمري حضرت لقاء للبلوجريين..ونفسي بجد احضر لولا الظروف واني بسبس وومن

على فكرة كنت فخورة قوي باللي قريته..بيديني امل ان لسه فيه خير وانا واثقة ان فيه طبعا

كالن نفسي اساهم معاكوا واكون موجودة بس مفيش نصيب المرة ديه

ان شاء الله لو فيه اي حاجة زي ديه تاني هكون موجودة وهسأل كل اللي ممكن يتبرعوا عشان الجهاز..وربنا يسهل

انا في اي حاجة جاية إلااااااااا تبرع الدم
لان تبرع بالدم معناه ان فيه دم هيتاخد
وهيتاخد بايه مش بقطرة عيون
اكيد بحقنة
وحقنة ورضوى ميركبوش ابتاااااااااً بتاتاً البتة

سلاماتوز بقى وربنا يكرمكوا كلكوووووا يارب اللي رحتوا

رضوى

اولا اللقاء كان كله جميل وهادى ولطيف خالص والصحبة ماشاء الله كانت كلها جميلة والحمد لله اننا اتجمعنا علي الخير يارب نفضل كدا دايما وقلوبنا صافيه وجميله زي امبارح اللي اداني باور اكمل بيه الفتره الجاية

ثانيا بجد بجد في ناس كتييييييييير محتاجه الخير دا يارب ارزقنا فعل الخير دايما

ثالثا انتي شفتيني من كام اسبوع مش خسيت كتيير زي مابتقولي فوتيها بقي علا بهدلتني في الفون هي وحنين كلموني ورا بعض عااااااااااااااااااااا

رابعا بالنسبه للتبرع بالدم

احنا عندنا في مكان مناسب والدم الخاص بمستشفي ابوالريش مش بيتباع بس بشرط واحد تكونو مركزين وانتو بتكتبو علي الريكوست لصالح ابوالرييييش

وعامة انا شغاله هناك في بنك الدم اللي جاي يتبرع لابوريش يبعتلي ميل مثلا علي ميل بلوجر وهتلاقوه في البورفايل بتاعي او لو يعرف تليفوني يكلمنى وانا هظبط موضوع الريكوست

لازم يتكتب فوق ابوالريييش وبجد اطفال كتير اوي استفادت من النقطة دي :)

وكان نفسي اكمل اليوم معاكم بس اعمل ايه ماما شغاله ترن عليا قلت اقوم امشي بدل اما تزعل مني وزعلها غالي عليا

في الاخر بحببببببببببببكم والله جدا جدا

اولا : الحمد لله الذى بنعمته تتم الصالحات
ثانيا : يا ست الكل هنهرب بمبلغ 13400 جم بس مش لو سرقت اسرق جمل احنا كده هنسرق معزة هههههههههههه
لا بجد انا كنت متفائل جدا باليوم بقدر ما كنت قلق جدا من اشياء كتير
بس الحمد لله اليوم كان رائع جدا جدا
وشكرا جزيلا لكل من شارك بماله او وقته او جهده فى نجاح اليوم
سواء خارج مصر او داخلها
وفعلا لسه مصر بخير
تحياتى

فاتيما
بجد ماتعرفيش قد ايه انا فرحت باليوم ده وانى كنت معاكو وشوفتك وشوفت كل الناس الحلوة اللي جت
وبجد كان نفسي اروح معاكو البورصة بس انت عارفة كان لازم اروح علشان الامر اللي قلتلك عليه
ربنا يتقبل مناعملنا الصالح وان شاء الله دايما نتجمع في الخير واكون معاكو
لك كل التحية والمحبة يا فاتيما الجميلة

فاتيما ...

بجد أنا مبسوطه إن إحنا أنجزنا المهمه .. وعقبال الباقي على خير يارب ..

بجد مبسوطه كتير إني شوفتك بجد بحبك أووووي

ويارب تجمعونا على خير دايما ...

وزمايلي إتشجعوا وراح يعملوا مدونات :) ...

إن شاء الله أشوفك على خير دايما وربنا يسعد قلبك يااااارب
... ;) ,,, ;) ...

بسم الله ماشاء الله
الله هو اكبر عليكم ربنا يقدركم ويحميكم

والله ماتعرفيش انا حاسه بسعاده عامله الزاى واناشيفاكم قدامى ربنا يزيد ويبارك يام يوسف فيكى وفى خالد وبنت خيخه كلكم والله كلكم
فرحانه اوى ان ربنا قدركم على الجهاز الاول وهايكرم فى فى التانى ولسه الخير كتير وابوابه اكتر
المهم ربنا يقويكم ويكتر منكم ويجعله فى مزنكم ان شاء الله
تقبلى مرورى وكامل احترامى

صوت من مصر
----------

معلش يا كيمو الزهايمر بعيد عنك
و انتا مجنون ؟؟!!

ليه بس يا بنى كدا ؟!!
دنا عمالة بقول ربنا مكملك بعقلك و مثبتك هتخلينى اغير رأيى و لا إيييييييه؟؟

انتا نورتنا بجد
و عقبال كل مرة ان شاء الله







الجواز و سنينه
-------------
ميرسى يا فندم
النوبة الجاية تكونى معانا
و سيبك من جوزك و الجواز و سنينه
بلا خوتة





أبوعلى (سمع هوص)
---------------

تانى حد بس ؟!!!!

دنا المفروض اكون العاشرة مثلا
أصل اللى يجعل كلامنا خفيف عليهم كانوا منتشرين و مفرجينا الهنا كله بعيييييييد عنك

كان لازم اعتذرلك علنا لأن ملحقتش اعتذرلك لأنك مشيت بسرعة

المرة الجاية تتعوض و تنورنا

تحياتى ليك و الف شكر على ذوقك




ماما امولة
---------
قالولى يا طيوبة
انك كنتى جاية و بس التعب عطلك
انا عارفة ميأخركيش غير الشديد القوى

ربنا يخفف عنك و تبقى زى الفل و تيجى يوم البؤجة تنورى القاهرة و ضواحيها كمان

ربنا يبارك فيكى انتى يا حبيبتى
يا رب




ahmed- k
--------

مالك يا احمد بس زعلان منى ؟؟
انا نشرت التعليق اللى فات و ملحقتش ارد على اى حد
و لما رجعت امبارح كتبت البوست الجديد و انشغلت ..معلش اسفة لو كنت قولت حاجة و انا مخدتش بالى منها انا بستسمحك تلتمس العذر لأختك فاتيما عشان دماغى مشغولة قوى بقالها مدة

ربنا يبارك فيك
انتا كمان جزء من الخير دا





norahaty
--------

و يقدرك يا نورهانتى يا رب
طبعا
احلى أسم لما تقترن صفتى بأغلى الناس
صووووووووح






عارفة ..مش عارف ليه!!!
----------------------

و الله نفسى ترجع مصر بقى و تحضر معانا الأيام دى يا وليد

ابو الريش قرفته حلوة فعلا
و ايامه طيبة قوى

المرة الجاية تكونى معانا انتا و مهند حبيبى ان شاء الله

جزالك الله خيرا انتا كمان
منتا كنت معانا من ع البعد برضو

reem
------

مين دا اللى يستجرى يتريقأ يا ريمو

دنا بقر حكائك يا ستى عشان اللى مكنش معانا يقرى التفاصيل و يتشجع المرة الجاية انه ييجى
و فعلا الموقف كان لطيف جدا و دمه خفيف و التعليقات دمها أخف بجد

كرما و كنزى دول حبايبى من قبل ما اشوفهم
انا بحب البنات اصلااااا
و لحسن حظى بنات المدونات و المدونين حاجة حلوة قوى تتاكل أكل من صورهم حتى ..اعمل ايه بس ؟؟


و ميرسى على ايه
انتى اللى خلتى اليوم اجمل يا رقيقة الرقيقات و كفاية كدا عشان هنتحسد نتحقد بقى

بوسات و حضونات لكل نون النسوة عندك
ماما و البناتيت و اختك
و انتى قلبهم طبعااااااااا




كيــــارا
----------
يا كوكى


اولا
انشالله يا رب دايما و انتى معانا

ثانياً
فعلا و ربنا يجعلنا سبب دايما فى المساعدة


ثالثاً
لازم اقول ..و انتى فعلا خسيتى عن الاول اغشهم يعنى ؟؟؟


رابعا
خلاص لما انوى اتبرع هبعتلك و اقولك عشان تعرفينى اروح فين و عند مين


خامسا
منقدرش نزعل ماما خالص بس يوم البؤجة تعالى من بدرى برضو عشان نلحق نقعد معاكى و نشبع منك ..ماشى

بوسات و حضونات
يا بنوتات
يا عسولات





nigro
-----

تصدق بالله ؟؟؟

انا نوران كانت واقفة قصادى و كان هيطلع من بوقى السؤال ..نيجرو مجاش ليه ؟؟

و بعدين فى ثوانى جالى هاتف كدا بيقول
يا ابو الفطاطيم ما هو مجاش ..يبقى عنده عذر اكيد ..و لو كدا كان اكيد هيتكلم ف النوبايل يسلم حتى ؟؟

بس طالما متصلش و لا سألش ..يبقى حاجة من الاتنين
يا مش معبرك و لا تفرقى عنده
و نفضيله بقى كبرى دماغك
يا اما نفسوياته نيلة و قافطع مية و نور و فى هذها الحالة متزعليش

فكرت كام ثانية كدا
و اخترت النفسير التانى


عشان كدا لما قريت تعليقك
مستغربتش خالص
تصور !!

و سلامة عيونك من الأغروراق يا ابو قلب دهب

ان شاء الله تلحقنا يوم البؤجة
يا مسهل
و لو ملحقتناش
و لا يهمك
انتا معانا برضو

سلام يا ابو النجاجير


صيدلانية طالعة نازلة
-------------------

يا رب يا لولاّ
دعواتك الحلوة دى مننحرمشى منها
و يبارك فيكى يا حبيبتى

قوس قزح
--------

يا وش الخير
و الفرح

و الوان السما اسابعة

و ام هنا

و كل حاجة حلوة

مصدقاكى يا داليا ..عارفة ليه ؟؟

بعد ما لمينا المبلغ كله و جالى تليفون من حد غالى عليا قوى ..لسه بقول ألو و بقول انا فين و بعمل ايه رحت قايلة اننا لمينا المبلغ كله و انا طايرة م الفرح ..كنت بقوله و انا فخورة و مبسوطة و سعيدة جدااااا و اللى ع الناحية التانية يمكن استغرب بس اكيد حس بفرحتى .زو قالى مبروك ..زى ما يكون بيباركلى على نجاح يوسف او على فرحة كبيرة بتاعتى انا


و زى ما قولتلكم امبارح ..
احساس جميل قوى انك تلمى فلوس و تقعدى تقولى يا رب يزيدوا دلوقتى و يكتروا و تكتبى الرقم و انتى نفسك تزوديه و تقولى فى سرك يا رب
و انتى عارفة انه رايح لحد تانى غيرك
احساس غريب كدا و ممتع
معرفش اوصفه غير انه نعمة من عند ربنا و كرمنا جميعا بيها

مصر بخير يا داليا زى ما قولتى
و الواحد لازم دايما يبص للجانب المشرق و ينميه و يكبره و بكرة عيالنا يبقوا احسن مننا الف مرة ..و كل عيال الناس يا رب

عشان كدا الجهاز دا و التانى و كل حاجة محتاجها اى طفل مريض
او اى مريض عموما
لو بإيدينا نشارك فى توفيرها
منتأخرش اكيد

البركة فى ربنا
و فيكى
و فى كل القلوب الحلوة اللى اتجمعت من تلات قارات امبارح عشان تقول للبلد دى بحبك ..بمنتهى الهدوء


بوسيلى هنا لحد ما اشوفها
هاتيها يوم البؤجة ..ريم هتفكر تجحيب عيالها ..متيجى بعد البؤجة نروح الأزهر بارك و نفسح العيال دى و نهيصهم شوية ..و كل واحد يجيب عياله ..إيه رأيك ؟؟؟


بوسات و حضونات
يا قلب يا فارمسيل ملون انتى
اللى ف الصورة داااااااا
شوفتيه ؟؟

بحبك قوى

ميرا وومن
---------

الحمدلله يا ميرا

و اليقاء لله يا حبيبتى فى جوز عمتك
انا رديت على ايميلك
وي ا ريت متكونيش لسه زعلانة منى فى أى حاجة انا بس مرتبكة شوية الأيام دى

بوسات و حضونات يا ست البنات


dahlia...
---------

المرة الجاية تعالى يا دودى

هيكون فى شهر مايو و البؤجة الصيفية
حاولى المرة الجاية تيجى ونفسى قوى اشوفك انا كمان و نقعد نحكى و نرغى
من الكلام احوالك مش تمام خالص ..هدعيلك و الله من غير حاجة حاضر
خلى بالك من نفسك بس و سيبيها على ربنا و هو هيفرجها عليكى يا حبيبتى
إن شاء الله



إيمان مصرى
---------

ميرسى يا مينو

انا سالت عليكى سكر امبارح
غلاسة يعنى مع انك بتعلقى عندى كتير
بس ما صدقت شوفت حد من ريحتك بقى

منتحرمشى منك يا حبيبتى ابدااااا



ستيتة حسب الله الحمش
-----------------
صباح الياسمين و الورد البلدى
يا ستاتيتو


ربنا يتقبل منا
و منكم يا ستوتة يا حبيبتى

صحيح مجتيش و حضرتى
بس كنتى اولنا .. و يكفى شرف حملى للامانة عشان ابقى فرحانة قوى
و من بدرى كمان
مش امبارح بس

ربنا يخليكى لينا
و تعيشى و تخلى دايما
ايام الاطفال المرضى دول ربيع
دايما يا ست السوتيتات كلهن


انا ملحقتش اخد البوسة
انخطفت ف السكة يا كبيرة
عاااااااااااااااااااااااااا




لولا و زهراء
-------------
و يبارك فيكى يا ذات الوجه المشرق

عارفة يا زهراء
امبارح كنت بقول لقوس قزح و خالد حاجة انا حساها فعلا

البؤجة و ابو الريش
و اى حاجة رايحة فى السكة دى
مش بعتبرها ثواب و حاجة من باب الزكاة و ما شابه ...

لأ

انا بعتبرها واجب اجتماعى
و انسانى
الناس ليها حقوق علينا لازم تؤدى

طالما ربنا فاتحها علينا بقدر
و نصيب اى كان كبير و لا صغير


عارفة
لو كلنا بنساعد بعض
محدش يبات محتاج


و اللى ربنا يرزقه لازم يدى

دا واجب و حق الاخرين علينا
مش منة و عطف و تفضل منا

عشان كدا لما بكتب بوست
و اقول التفاصيل بيجى تعليقات
احيانا تقولى انتوا بتتمنظروا
و تضيعوا الثواب و كدا


انا بعتبر ان المنظرة دى
ممكن تشجع غيرنا يعمل كدا
هوه كمان ..و المهم الفايدة
تروح فين فى الآخر ...

لأصحاب الحقوق علينا
و اللى احنا ممكن نبقى منهم
فى يوم لو مالت بينا الظروف
لأن محدش بعيد عن المرض و الحاجة ...

ربنا يكرم الناس كلها
و منحرمشى منك يا زّوزا

الطائر الحزين
------------

يا رب يا إيهاب

و تكون معانا يا فندم

مرة من نفسنا
و لا عشان محناش المراكبى مثلا
و عندنا حفل توقيع
فمش ناس مهمين
ومينفعش تيجوا تشوفونا مثلاااااا؟؟

البؤجة فى مايو
اعمل حسابك بقى
انا احرجتك اهو

وش عامل برىء و باصص للسما




sony 2000
----------

الحمدلله يا سنسن

ازاى منبقاش مبسوطين و ربنا بكرمه غمرنا كدا ؟؟

ربنا يسمع منك و تكونى معانا يا حبيبتى ان شاء الله المرات الجاية



طالبة مقهورة ..درجة اولى
-----------------------

لاااااااااااا
ايه بس يا مقهورة هانم ؟؟؟

احنا اعلننا عن اللقاء دا بقالنا عشرين يوم و زيادة انتى بس مخدتيش بالك

ان شاء الله تتابعى اخبار البؤجة و تقدرى تيجى و ميكونش وراكى امتحانات و لا حاجة ...و بلاش التبرع بالدم
مش مشكلة
بس تعالى هنا قوليلى

بسبس وومن و بتخافى من الحقن ؟!!

ينفع قلبك يبقى جامد و تخافى من شكة ابرة ؟؟؟
فهمونا و افيدونا افادكم الله
نورتينى يا رضوى و مبسوطة ان البوست و كل ما فيه عجبك و فرحك و شجعك

فرحانة بجد




خالد همس الأحباب
--------------

اولا
يستاهل ألف حمد يا خالد

ثانيا
معزة معزة ..انسالله قطة حتى احنا قولنا لأ ..انتا بس اللى العرق السوهاجى نقح عليك و قولت حرام و خليها المرة الجاية ..اعملك ايه طيب
المعيز مش وحشة احنا لاقيييييين !!!

ثالصاً
ربنا يباركلنا فى عمرك يا ابو ببش و هموسة احنا من غير وجودك وسطنا منعرف نطمن و لا نعمل اى حاجة بثقة و سلاسة كدا ..انتا و داليا ملكوش حل

ربنا يجمعنا فى الخير دايما يا رب
سلامى للبنات و امهم الغالية




mostafa rayan
-------------
انا كمان يا مصطفى
مبسوطة انك جيت بجد
عقبال كل مرة و هنستناك يوم البؤجة ان شاء الله

خلى بالك من نفساويتك بقى
و كل سنة و انتا طيب
يا طيبة الدنيا

دا لقبك عندى خلاص يا صفصف
هندهك بيه دايما عشان شبههك قوى



ghAdA mOhsen
--------------
الحمدلله يا غدغود

اصحابك عسوليين و انتى و رانيا سكر


يلا يشدوا حيلهم و يفرجونا الشطارة
اصلا التدوين هيصقل مهارتهم ف الكتابة و الإبداع ..يعتبروه نوع من التدريب كدا و التعامل مع جمهور متفاعل هيرد عليهو اول باول و يقول رأيه
عقبال كل زيارةفى الخير
يا حبيبتى
و تكونوا معانااااااااااااااا



richardCatheart
----------------
الله يبارك فيكى يا قطقوطة
ان شاء الله هنبلغكم اكيد لو اتلم المبلغ التانى كله

البركة فى كل قلب طيب

منحرمشى منك ابدااااا

الله يجزاكم خير ويعنكم علي فعل الخير دائما .. تمنيت لو كنت بينكم

السلام عليكم

بجد مش عارفه أقول ايه ولا ايه بس انا ساعات باجي هنا ومن كتر ما الكلام بيبقى عاجبني بفضل معلقش

بس النهاردة بجد من اسلوبك حسيت انى كنت معاكم وزي مايكون شايفاكم
ربنا يسعد ايامكم وقلوبكم زي ماعملتوا خير جميل لربنا وللأطفال

ويارب دايما متجمعين ف الخير وتتجمعوا ف الجنة يارب

اسمحيلي أقولك انتي طيوبه قوي وانا بجد بحبك ف الله

فاتيما
فاتيما
فاتيما
أنا عندي تعقيم صغنن كده قد الفرفوتة
أنا لسه مسافر يا طمطم
أنا مازلت في الأراضي الإماراتية الشقيقة يا عزيزتي
بس كده
انتهى التعقيم
و السلام عليكم و رحمة الله و بركاته

فاتيما
اسمعى كلمة منى
انا عمرى ما قولت كلمة واكدت عليها الا وعملتها وبعدين هو انا روحت هناك ليه
اولا بشوف اهلى وناسى واخواتى وجيرانى والكلام بتاع عبد الحليم فى فيلم شارع الحب
وكلمة رجل جدع قوى دى كبيرة مش عارف انا قدها ولا ولكن هحاول ........

لا لا لا
دا حضرتك ماكونتيش عارفانى أصلا ولا فاكرة أنا مين
معلش تتعوض المرة الجاية إن شاء الله
انا يومها ماكانش ينفع أتأخر لأنى كان بقالى كام يوم بايت فى شغل بره القاهرة وكان لازم اقضى يوم الجمعة مع الولاد

ربنا يجازيكم خير ويجعل كل يوم خير فى ميزان حسناتكم

بس سؤال يا فطوم والنبى
هو الرجيم القاسى ده جاب معاكى نتيجه؟؟

اعمله يعنى واخس ولا القى نفسى زايده 20كيلو بس


وحشتينى يا فطوم ومستنيه اليوم اللى اشوفك فيه بفارغ الصبر
ربنا يسعدك يا حبيبتى

بنت خالي العزيزه

تحيه طيبه مباركه

ثم اما بعد

وربنا يا بطه انا بجد وبكل صراحه

بحمد ربنا ومبسوط جدا

اني عملت مدونه

عرفتني علي ناس كتير محترمه وقلبها نضيف زيك وزي ناس كتير

وبما اني لسه داخل من الشغل

وهصحي كمان 4 ساعات لان عندي شغل

احب اقولك اني كل اما اعرفك اكتر

احس اد ايه ان بنت خالي

تستاهل كل خير

ويااااااااااارب نفضل لاخر عمرنا

نعمل او نشارك او نزاحم حتي ناس طيبين زيك وزي خالد وداليا ونوا وشريف وضياء وكيكي وكيارررا وغاده ورانيا وعمرو ومصطفي وابو علي وابو حميد ووانداوكل واحد باسمه لان دماغي مش جايبه من التعب

ولكن قلبي يحمل لكم كلكم ارقي مشاعر الود

الله اكبر علي كلامي اتحسد من الرقه

ربنا يبارك في عمرك ويزرقك جنه الفردوس انتي ويوسف ويجمعكم في القريب العاجل وفي جنه عرضها كعرض السموات والارض

هلا باحلى فاتيما

بتمنى تكوني بأحسن حال ياااااارب

ده لينك مدونة رحاب ..
http://hayatty.blogspot.com/

... ;) ,,, ;) ...

بقى انا حلوة زيه كده ؟
لا و كمان على شكل قلب ؟

كتير عليا و الله يا طمطم


بالنسبة للبؤجة مش عارفة وقتها هيكون فى امتحانات للولاد ولا لا
لكن لو مفيش امتحانات خلاص تعالى نقلبها عائلية و كل اللى عايز يجيب حد من اسرته يتفضل ينورنا
بس نشوف الاول خالد هيرتبها امتى و ناوى على ايه

ما شاء الله
ايه الأخبار الحلوة دي !!
ربنا يفرح قلبك يا فاتيما يا بنت الست أم فاتيما :)
أخبار تفتح النفس
وتبعث الأمل والتفاؤل والفرحة

لي عندك طلب يا تيما
اتصرفي مع داليا لو سمحتي
ما ينفعش كده
خليها تاخدني في ايدها وهي رايحة بقى
تبص م الشباك وتشاور لي

ربنا يتقبل منكم ويفرح قلوبكم ويشفي كل مريض

عاشقة الرومانسية
----------------

بعد البؤجة يا دودو

امتى تحديداً

عليكى و على خالد اطبقى فى زمارة رقابينه ف الموبايل و اساليه عشان تحديد المواعيد تخصصه يا فندم

بوسات و حضونات
يا عروسة البحورات





سارة
---

هييجى يوم و تبقى معانا يا سارة
ان شاء الله يا حبيتى يحصل ف يوم





فراشة
-----
وعليكم السلام يا فراشة

ميرسى على كلامك الطيب و تشجعيك و على زياراتك الحلوة حتى لو محستش بيها
بس اهى جر رجل لحد مرة ما تقولى نحن هنا
و اهو حصل أهو
نورتينى
و احبك الذى احببتنى فيه




ahmed-k
--------

طيب يا احمد بس ربنا يسهل
بس اتمنى ميكونش فيه زعل منى
اتمنى و لو انى حاسة
انها هتكون اضغاث امنيات غالبا





nigro
-----

نيجرووووووووووو

كدا ؟!!

طب تصدق بقى ان دى كدبة ابريل
اللى انا صدقتها من وسط كل التعليقات ف البوست دا

تصورت انك فعلا جاى مصر
و هتحضر معانا ؟؟؟

منزنى ويحييييييش
صح؟؟

اى كان تعقيمك يا ابو قلب دهب
ربنا يروقلك الأحوال يا رب




صوت من مصر
----------
لأ كلمة جدع انتا قدها يا كيمو
و قدود كمان





أبو حميد
-------

انا اسفة و الله يا باشمهندس
معلش
المرة الجاية تتعوض
انا بقولكوا زهايمر دايما
بس المرة دى انا دماغى مع الفلوس و خطة الهروب بيها للسلوم ..معلش بقى
المرة الجاية م هيبقى فيها فلوس
بؤج بس ان شاء الله
و حضرتك تنورنا بإذن الله

الاخ الغير معرف
-----------
النبى على قلبك يا شيخ
تبطل تبعتلى التعليقات دى

على فكرة

متتعبش روحك
برضو مش هنولك اللى ف بالك
ماشى ؟؟

ريح نفسك بقى
لأن اسلوبك مكشوف
حتى فى اختياراك للألفاظ
عيب بقى
و كفاية سخافات


يا ريت تلم تعابينك


او بمعنى ادق

تلمى ى ى ى ى

تعابينك

بس خلاص





حنين القلب
---------

ميرسى يا حنون ربنا يبارك للكل يا حبيبتى

و تعالى هنا
انتى بتسال ع الريجيم ليه سعادتك ؟؟

انا مسمعش الكلمة دى من بوقك لحد عمر ما يتم سنتين يا ماما

و بعدين اسالى اللى شافونى هما يقولوا خسيت بجد و لا دى اوشاعات
لو عليا هقولك شوية مش بطالين يعنى
انتى متفكريش ف الريجيم دلوقتى
و الا هاجى أضرب بقى


انتى كمان وحشتينى يا حبيبتى
بوسيلى عمورة حبيبى




هى و ظروفها
-----------

طيب
صاحى م النوم
و لا منمتش خالص

انتا يا بن عمتى جدع و زى الفل
و احنا اللى كسبنا معرفتك
و ابقى طمنينى لما يبق فيه اخبار جديدة عشان انا قلبى حاسس ان فيه خير
ماشى ؟
طيييييييييييب




ghAdA mOhsen
------------

ميرسى يا غدغود
مننحرمشى





قوس قزح
-------

أيوه يا وش الخير
انتى كدا و احلى من كدا الف مرة

و بخصوص البؤجة
قولوا امتى و فين و انا اجى ادى التمام علطول ..مش هتأخر عنكم

بوسيلى العياااااااال
و امهم .. و الاخت بينلوبى كروززززز
فاكراها ؟؟!!





يوم جديد
--------
حاضر يا يم يم

النوبة الجاية اقولها
داليا متتاخرش عن اى خير
و لا انتى كمان
حاضر من عونيااااا

ميرسى يا حبيبتى على كل الدعوات الحلوة دى

رغم انى كنت معاكم وانتوا بتعدوا الفلوس وعارفة قيمة المبلغ
الا انى وانا بقرا البوست
عينى دمعت من الفرحة لما قريت المبلغ مكتوب قدامى
وحسيت انى اول مرة اعرف الخبر ده


احييكى على رابطة ايشاربك
حلوة الضفيرة اللى كنتى عملاها بالايشارب


سلام
اختك خيخة

أزيك ياطنط فاتيما

أتمنى إن الفترة إلغبت فيهاإنك تكونى فى أحسن حال واتمنى إن الشباب أل فمصر يكونوا كلهم كدة

جزاكى الله كل خير

Mohannad

صباح الخير :-)
انا جيت اهو
:-*******************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

اما عن الشعر بعدين اناقشك فيه
بس هو مناسب قوى لحالتى المعدنية اليومين دول :-((

SPIDER BOY
----------
أهلا يا عيون طنط فاتيماااااااااااا

ازيك يا مهند يا حبيبى

انتا وحشتنى قوى

عامل ايه؟؟

ميرسى على تشجعيك الطيب دا لينا
المرة الجاية تكون معانا يا حبيبى ان شاء الله

و كل شباب مصر بخير
و شبابها الصغنن اللى زيك و زى يوسف كمان بخير دايما يا بابا


سلامى لبابا الغالى و لكل العيلة

سلام كبير عشانك
من طنطتك فاتيما
الفرحانة قوى بتعليقك





WANDA
-------

مالك بس يا ون ون يا جميل انتا

انا قولت قفل المدونة شوية مش حركة واندية عادية ..قلبى مبيكدبش عليا اهو

سلامة روحك المعدنية يا حبيبتى
احنا قرينا عليكى و لا إيه؟؟
دنتى الأشراقة بتاعتنا

سلامتك من اى هم يا حبيبتى

روقى و سيبيها على ربنا
تتحل و تفرج ان شاء الله
*******************************
و ×××××××××××××××××××××××××××××××

على ما قسم كدا






بت خيخة و أى كلام
----------------

كلك رقة و ذوق يا خوخة
و يا ستى مشكرين على التشجيع
ابقى هاتى معاكى المرة الجاية اربع ايشاربات و انا اعلمك تعمليها ازاى

بس هاخد نسبة
و لا مبشوفش منكو حاجة انا
اى مصلحة يعنى !!!
بوسس لشريف كتير لو سمحتى
ممكن ؟؟؟






الغير معرفة
---------

بصى بقى
محدش بيقول البسلبيس دى غير اتنين

دودا هانم و ست الهوانم

و مىيومة البهية مى بهاء


انتى مين فيهم ؟؟

معقول تكونى دودا ؟؟؟

مش معقول ..طب ممكن تطمنيى عليكى عشان انا خايفة اسال و تعبت اسأل مى و مردتش عليا لحد ما بقيت اخاف اسأل تانى ...

اى كانت احوالك
اتمنى تكونى بخير يا ودودا
و مش هقول وحشتينى عشان الكلمة دى عبيطة قوى مقارنة بواقع الحال

لو كنتى مى
فبرضو اكتر من كلمة وحشتينى


ادينى هستنى لحد ما تردى


خالص حبى ليكو انتوا الجوز
يا مى و يا دودوااااااا
و بوسات و حضونات
و بسابيس و حضاضين

ازيك يا فاتيما
واللهى دى حاجه جميله جدا
ربنا يكرمكم وييسر لكم اعمال الخير
دايما يارب
تحياتى وتقديرى

صباحك ورد فاتيما
تعرفي انت دخلتي قلبي علي طول وانا بجد حبيتك وحبيتكم كلكم برغم اني مش كلمتكم كتير لاني كنت تعبانة تخيلي اربع ساعات سفر مش سهل علي وخصوصا اني كنت مش اكلت من يومين لاني كنت فرحانه بجد اني هشوفكم وبرغم انه كان وقت قليل بس صدقيني فرحت وانبستط جدا وحسيتكم كلكم مألوفين ليا وحبيتكم جدا وبتمني اشوفكم تاني وعلي فكرة انا اتعملي فضايح علي المدونات بسبب الريجيم ...طيب لو قلت لكم بقي اني مش بعرف اكل حاجة بقشرها تقوليلي اية ...؟ والله بزعل لما اصحابي يقولولي اني بسكوتاية ويفر والا شيكولاتاية بس اعمل اية طيب ...؟ دي طبيعتي ومش عايزة اقولك انا حصلي اية بعد ما سيبناكم كنا هنرجع تاني المستشفي بسببي والله بس الحمد لله عدت علي خير
http://hayatty.blogspot.com/
ودهلينك مدونتي تنوريها

الحمد لله إن الفلوس كفت و فاضت
و إنه كان يوم جميل
ربنا يتقبل الخير من كل اللي بيعمله لوجه الله
و يجازيكم كل خير

يارب دايما متجمعين على فعل الخير

جزاكم الله جميعا الف خير

ويقدركم على فعل الخيراكتر اكتر

ويجعله في ميزان حسناتكم جميعا


تحياتي للجميع

دمتم في سعادة قلب ورضاء من الله

سارة

صباح الخير يا فطوم
:-*****************************************************************ط

:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

وحشنى الرغى معاكى فى المواضيع بس انت مشغولة و انا خلصانة :-)

ممكن تشوفى اخر تعليق على بوست درجات؟؟

حنين
-----
ازيك انتى يا حنين
ميرسى يا فندم
و كلك ذوق





re7ab.sala7
------------
صباحك يا سمين يا رحوبة
انتى كمان يا حبيبتى دخلتى قلبى قوى
و كان باين عليكى الأرهاق فعلا
و انا بقيت عمالة اقول يا رب منكون مضايقنهم او مش عارفين نحتفى بوجودهم بشكل مناسب و لا حاجة ..و كمان موضوع الريجيم دا عملى اذبهلال شوية
من غير ما تقولى اللى حصل انا متوقعة يجيلك هبوط من الاكلبطريقة و بكمية غلط يا بنتى وكدا مينفعشى و لما اشوفك المرة الجاية عمسك ودانك و ارغى براحتى و اديكى نصايح بقى و استحملينى ...ميرسى ع اللينك
ان شاء الله تلاقينى عندك كتير بإذن الله
سلامى لغادة و رانيا و رضا و احمد و كلكم يا حبيبتى





مهندس مصرى
-------
الحمدلله يا محمد
عقبال ما تبقى معانا المرة الجاية
انتا و العروسة يا رب





saragebaly
----------
ميرسى يا سارة
دايما اخلاق و بتكسفينى بذوقك و تشجعيك الجميل دا و انا داميا مقصرة معاكى
معلش سامحينى
بوسات و حضونات يا حبيبتى




wanda
-----

صباح الهنا يا ون ون

ازيك انتى
و اسفة ع التأخير
الشغل مخلينى بلف حوالين نفسى و الله
**********************************
و
××××××××××××××××××××××××××××××××××






الست dodda المتخفية بنضارة
و بتعلب معايا استغماية


رديت و الله
بصى على التعليق اللى قبل تعليقك
ب 7 انفار كدا هتلاقينى رديت
ماشى ؟؟

ربنا معاكى يا فاتيما يا حبيبتى
النهاردة نازلة اشوف هدوم بتاعة بودا بقى :)
وحشتينى والله وربنا يعينك يا حبيبتى ع الى انتى فيه
وبودا كمان بعاتلك بوسة كبيرة :)

متتأخريش
لأنك وحشتيني جدا
والبلوجات من غيرك ولا ليها طعم
ووحشتيني فعلا من هنا لحد آخر طريق مصر مارينا الصحراوي :)
يالا خلصي بقى
عاااااااااااااااااااااا

صباح الخيرات و المطرات و الشغلات الى مش عايزة تخلص :-)))
نفسى فى اجازة يا فطوم
:-*******************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

:-)))
اقر عليكى ؟؟
:-)) و الشغل حيتبخر (مش قصدى الوظيفة :-)
بس مش حقر
صحيح نفسى اكون مكانك :-) على الرغم انى تقريبا ماشية فى الشارع الموازى :-)
بسرح بعربية بطاطا جانبك :-) سمعانى

اولا الصورة :-))))))))))))))))))))))))))))))تحفة
لما شوفتها قولت يا عينى فطوم طلعت من نفوخها :-))))
بس احسن
ربنا يرزقك شغل كمان و كمان :-) و يسرهولك و يعليكى بيه

ثانيا ليه بقى التحديثات جوا البوستات مكونتى نزلت بوست جديد (ايه الشح البوستى ده :-))

ثالثا المزيكا :-) دماااااااااااااااااااغ

رابعا
سبتنى لاخبار الى هنا و حزن ز جنازة و خناقة
حسانى مبقتش عارفة مصر فيها ايه :-(
بس انا محترمة رايك و ده مش زن بس افتقاد :-((

اخيرا و اولا :-)
:-**************************************************
صباح الخيرات
:-xxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

يارب دايما متجمعين على الخير
انا كنت جاية اقولك كدا انا زعلانة منك علشان مش قولتيلي كل سنة وانتي طيبه وانا اخيرا مبقتش قاصر بس لقيتك بقى مطحونة في الشغل الله يكون في عونك
وخلاص مش زعلانة
وخدي دي اموااااااااااااااااااااااااااااااااااه
على ماتخلصي وترجعيلنا ان شاء الله بالسلامه

ربنا يجعله فى ميزان حسناتم يا رب

انتم كلكم وحشتونى اوي انا بخير وصلنى سلامك وسؤالك عليا يا طمطم معلش انا كمان الشغل واخدنى اوي وهنا غير مصر هنا شغل يعنى شغل صعب اوي ولازم اثبت نفسي ادعيلى خلى بالك من نفسك اوي
بوسات كتير ليكى ولكل حبايبى

إرسال تعليق