.

.

عـكـــس الإتــجـــاه  

Posted by: فاتيما in






العواف عليكم

وحشتونى جدااااااا
شايفة ان حالة من الملل القاااااااتم
بتغطى سماء التدوين

وعلى فكرة مش رأيى لوحدى دا كلام لمساه
من ناس كتيييير
و قرياه و سمعاه
فعشان
أحاول أكسر حالة الملل دى عندى
و لو بأى كلام
فارغ حتى
هكتب البوست دا و استحملونى
احسن لو الواحد برك مكانه

هياخد زمن طوييييل على ما يقوم
من مطاريحه تانى




هتكلم النهادرة معاكو يا شطار
عن موضوع غاااااااية ف الخصوصية
لدرجة انه ميهمش غير كام حد بس أعرفه
و قابلته ف حياتى
و هوه السخص ... لامؤاخذة
الأشول
يعنى اللى بيكتب بالإيد الشمال
و باللغة العربية الفصحى
الأيسر
أى يستعمل اليد اليسرى
و فى مقام آخر يقال
الأعسر
يعنى اللى بيستخدم
الأيدين الاتنين شمال و يمين




أصلى بالصدفة البحتة من كام يوم
قريت خبر قديم عن الاخ اوباما
إذ لقيت فيه وكالات الانباء
اللى تنوكس و تنشك فى معاميعها
بتتريقأ عليه .. و مستنكرين
و مستعجبين ازاى
انه و هوه بيمضى
اتفاقية نووية دولية لولبية
الجدع يا نضرى ..إستجرى و راح رافع كوعه شوية
عشان ميمسحش الحبر
و يبوظ الورقة بالإمضا اللى عليها
و هذوها التصرف أرجعوا سببه بالتمحيص
فى انه أشول و العياااااذ بالله
و ميصحش كان يحصل منه كدا بوتيتااااا



إيه يا بشر ؟؟
الرادل يعنى مغلطشى ف البخارى
ّّّ!!!!!!

و بعدين بالتدوير و الدعبسة
إكتشفت ان القصة دى
منتشرة عندهم
يعنى إحصائياً ..طلع الاخ أوباما
خامس رئيس امريكى
من سنة 74 بس
يوصل للبيت الأبيض
و يكون بيكتب بالشمال
بعد ترومان و ريغان و بوش الأب و كلينتون
الله !!!!
طب المفروض ينبطوا بقى
و يسكتوا
و ميفتحوش بوقهم من أشاسو
على رأى الواد عادل ابنى





الكلام عن حكاية الإيد الشمال دى
حديث قديم ممل
و اكيد أغلبكم عارفينه
النص اليمين م المخ هوه اللى بيتحكم
ف النص الشمال من الجسم
و العكس صحيح .. النص الشمال م المخ
بيتحكم ف اليمين

و عشان كدا ربنا خلق بعض البشر
ميعرفوش يكتبوا غير بالأيد الشمال
مهما انضغط عليهم



و هذا يذكرنى فيما يذكرنى
بالطفولة المشردة بتاعتى
لما كانت الجماعة عندى فى البيت
حابين و مصرين يخلونى اكتب و اكل باليمين
و انا دماغى جزمة قديمة متربسة معاهم
لا ينكن أبدا يحصل كدا معايا
لحد ما زهقوا منى و سلموا نمر


الموضوع دا أثناء نشأتى و ترعرعى
كان مضايقنى جدااااااااااا


حلوة ترعرعى دى !!؟؟



قولولى ليه ؟؟
أصل تريبيتنا الدينية عموما
بتعتبر الاكل بالشمال حرام و بشكل قاطع
و بالتالى كان هذا مثار انتقاد دائم ليا
و للناس اللى على شاكلتى على مدار عمرى كله
و صحيح حاولت اعود نفسى اكل باليمين
لكن مقدرتش
و فى اوقات كتير لما كنت بحاول بشكل جدى و عنيد
كان بيهاجمنى نوع م الكآبة
مفهمتش سببه وقتها ..لكن فسرتها بعدين
بأنى حاولت اكون غير طبيعتى .. فتعبت
وتوقفت عن المحاولات دى بعد فترة
و قولت المهم ربنا رب قلوب
و عالم بالنيات



و كنت من ضيقى اوقات ابقى متصورة
ان الحال مكنش هيبقى سخيف كدا

لو كنت من سكان اوربا و الدول المتقدمة مثلا
لحد ما قريت بالصدفة برضو
ان زماااااان فى الجزء دا من العالم
كان الأشول بيعتبر صاحب عاهة

و كانوا بيربطوله ايده ورا ضهره عشان يعدلوا
حاله المايل و فيه ثقافات آخرى
كانت بتعتبره سبة فى جبينهم و الشيطان راكبه
ويفترض اخفاء حقيقته عن المحيطين

فبقيت أحمد ربنا
انى من مواليد العصر الحديث

و العالم العربى كمان والف حمد وشكر ليك يا رب



النظرة مكنتش زمان نظرة شكلية و فقط
دى انسحبت كمان على اللغة و التوصيفات
يعنى فى اللغة العربية مثلاً
الشخص اللى بيستخدم ايده الشمال
يطلق عليه لفظة مرتبطة بقسوة العيش و الصعوبة
و هى العسر .. اللى عكس اليسر
مع ان الأيسر .. يعنى الأسهل هى اللفظة الأدق
لكن لفظة الأعسر ...غلاسة كدا بتستخدم اكتر
و هى الأكثر شيوعا و استخداما



اما لفظة الأشول دى فمعرفش جاية منين ؟
و ان كنت أرجع انها تعبير موازى للأعسر
بس بالعامى السهل نطفة بين الناس


و زى ما فيه اسم أيمن و يامن أى
من يستخدم يمناه

فيه كمان اسم ياسر يعنى
من يستخدم اليد اليسرى




مش بس كدا
دا حتى فى حياتنا اليومية
لما حد ييجى يغلط فى حد قولا و فعلا
يقولوا عليه ... ماله داخل فيه شمال ؟؟!!
زى العربية اللى المفروض تركن يمين
مش شمال الطريق و الا الشارع كله يوقف




و يبتقال إن الناس اللى بتقرى لغة الجسد
و عاوزة تكشف صدق
اللى قصاد عينهم من عدمه
المفروض يشوفوا نظرة عينه اثناء الحديث رايحة فين
فلو مثلاً سألت اللى قصادك سؤال
فبص ناحية اليمين
يبقى بيسترجع المعلومة عشان يرد عليك
بينما لو بص ناحية الشمال
يبقى معناه انه بيحاول يتخيل و يألف
او من الآخر بيكدب عليك و ميبقولش الحقيقة



فى ثقافتنا الأسلامية
لما حد يحب يدعى دعوة هايلة لحد
فيقوله
ربنا يجعلك من أهل اليمين
و لما بنتوضى بنبدأ باليمين
و لما بنصلى فى نهاية الصلاة بننهى التسليم باليمين
و لو دخلت على جمع من الناس فيفترض
إن تبدأ سلامك على الجالس الأول فى اليمين


غير انك بتسلم فى المصافحة بإيدك اليمين
و الكتابة فى اللغة العربيةبتبدأ من اليمين
فى الصفحات و السطور
و لما تنام الأصح لبدنك دايما
النوم على الجنب اليمين



أغلب الأشياء عندنا
يمين
يمين
و الشمال غالبا مكروه و مرفوض و مستنكر
فلكم أن تتخيلوا الأرتباك اللى صاحبنى
أنا و امثالى طول حياتنا من جراء السير
عكس الأتجاه





بس برضو الموضوع
لا يخلو من نظرة تدعو للفخر
لأن إخواتى فى الانسانية
اللى داخلين ف الخلق شمال دولا

طلعوا بصراحة أغلبيتهم - مش الكل - حاجة تفرح
نسبتهم فى العالم كله
متقلش عن ربعه تقريباً

من 5% ل 28% حسب الاماكن و التوزيع الجغرافى
و فيهم ناس كتييييييييير على كافة الأصعدة

سياسياً و ادبيا و فنيا و رياضيا
و دا بينفى الكلام اللى بينقال
ان الأيسر
مهاراته تكمن فى الجانب البدنى
و الإبداعى فقط
و ان المهارات العقلية و الذكاء اقل
و أضعف عن الشخص العادى
لكن بنظرة سريعة كدا ع الأسامى
هنلاقى مثلاً

بيل جيتس و البرت اينشتاين و مارى كورى
و ليوناردو دافنشى
و مايكل أنجلو و بيكاسو
و الملكة فيكتوريا
و باخ و نيتشه و أرسطو
و أرمسترونج و مارك توين
و كافكا و الإسكندر الاكبر
و يوليوس قيصر و نابليون
و رمسيس التانى
و شارلى شابلن و مارلين مونرو
و روبرت دينرو

و نااااااااس كتير قوى عالمياً

و للأسف معندناش قايمة مصرية
و ان كنت متوقعة لو وجدت
انها هتكون مليانة اسامى كتير
لا تقل فى اسمائها عن العالم دى
خصوصا على الصعيد الادبى
و السياسى بالذات ؟؟




الدراسات بتقول ان تقريباً
نصف عدد المشاهير

بيكونوا شول او عسروايين
فإيدهم الشمال كانت أحد اسباب نجاحهم
و تميزهم و نبوغهم
و بالتالى شهرتهم

لأن النص الأيمن من المخ و اللى بيتحكم فيهم
مسئول عن الملكات الأبداعية
من لغة و تذوق موسيقى
و أشياء مماثلة
زائد ان فيه نظرية
عن ان النص اليمين م المخ
بيخلى الشخص يبص للأمور
بنظرة شمولية و ملمة

و يمكن عشان كدا هذا التفسير بيقول ليه
فيه فلاسفة و روساء كتير ف القايمة دى
يمكن ؟!!



حاجة كمان قبل ما أنسى
الحكاية دى فيها جانب وراثى لا يغفل ذكره
يعنى بتبقى وراثية من الأب .. لأولاده
او بتورث من حد ف العيلة
و الحاجة أم فاتيما عندها تلات أخوات
بيستخدموا ايديهم الاتنين او الأيد الشمال فى الكتابة
و أختكم من الجيل اللى جه بعدهم
و ورثت الصفة دى
و متهيألى لو سألت فى العيلة
هلاقى حالات آخرى مشابهة عكس الأتجاه برضو



ناس اتكلمت عن حكاية
الإيد الشمال دى زى أنيس منصور

كمان الاخ بلوجاتى
اللى طلع معانا فى حكاية اللوحة الشمال دى
بتاعة المواصلات و الكتابة
وكاتب بوست لطيف مذيل بأسماء مشاهير عربية
و اغلبهم اعلاميين و فنانين

حد كمان غالى و رفيقة سلاح
لولاّ علا صيدلانية طالعة نازلة
وكاتبة بوست بتحكى عن موقف مرينا بيه سوا
و بتقول على حاجة بتحصلى كتير
فى أى مكان عام أو خاص
لما بيشوفوا أمثالى و انا باكل بالشمال
و يفترضوا انى عامدة متعمدة مبسوطة قاصدة
هذا و عادى بعزم الشيطان
ياكل معايا بسم الله



و زمان لما كان الموقف بيحصل
و حد ينتقدنى الصراحة
كنت بنزعج قوى
و اقعد أدافع عن نفسى

بس دلوقتى خلاص ... مبقتش تفرق
و بقيت أسكت ..
إلا لو حد غالى عليا
و يستحق الشرح و المناهدة
فقول انى ببتدى الاكل
بذكر بالبسملة
و بتمنى ضمنياً ان ربنا يسامحنى
لأنى مش نافع
أغير عادتى فى الأكل باليمين فعلا



اما بالنوسبة للكتابة
فمشاكلها تتلخص فى انى مينفعش أقعد

و حد على شمالى
عشان ايدى متخبطش فى ايده اليمين
و هوه بيكتب
و كنت بتغلب ع الحكاية دى
بالقعدة جنب الحيطة

او على الحرف أو جنب واحدة شولة زى حالاتى
و دى نادرا ما كانت بتحصل الصراحة


مشكلة تانية قالها الاخ بلوجاتى
بصفته دفعة برضو
حكاية النزول
من أى مواصلة دى
خصوصا الأتوبيسات و المينى باصات



اما المشكلة الاكبر بقى عند اختكم
فهى تكمن فى ان الأتجاهات
عندى
فيما يختص بالبنى آدميين
بيبقالها حالات غريبة

زى ان
اللى برتحله لازم يمشى على شمالى

و يقعد على شمالى و ينام على شمالى
بينما اللى على بييجى على يمينى غالبا
بيفقد تركيزى و اهتمامى و احساسى بالراحة معاه

متفهموش ليه بس هوه كدا و خلاص



معلومة قريتها و المفروض متزعجنيش
لأنها دلالة على الصلابة
ان الأشول عنده قدرة على التعايش
فى المجتمعات العنيفة القاسية الظروف
بسبب مواجهته للضغوط من صغره
واستنكار المجتمع فى العموم ليه
بس مش عارفة ليه حساها معلومة رخمة
مش ميزة قوى


لكن الارخم بقى و دى معلومة اخيرة
ليا و للزمن

عشان أفّرح بيها
كل اللى متغاظ و موتضايق منى لأى سبب


أنه أثبتت بعض الدراسات العلمية و المعملية الفذة
ان الناس اللى بتستعمل ايدها الشمال
عمرهم بينقصف
بييجى عشر سنين بدرى

عن الشخص العادى ... فى الرجالة
و بييجى خمس سنين بدرى ... فى الستات
دوس هنا


و بيرجعوا السبب فى ذلوكا
فى إن العالم من حوالينا عموما
مصمم للناس العادية
مش للموكوسين أمثالى
و بالتالى حوادثنا كتيييير مقارنة بالسخص العادى

و بيروح مننا ناس كتير فى الوبا زى هنادى



و طبعا كلام مشابه فى احوال عادية
مكنتش هأهتم بيه قوى


لكن لما قعدت أبص
بنظرة بانورامية على تاريخ حياتى

اكتشفت انه يكاد يكون
التفسير الوحيد و المنطقى جدا لحالتى

إذ أنى و لحد النهاردة بتحصلى حوادث كدا ساعات
ميصحش تحصل لواحدة زيى بعد كل هذوها العمر
و منظنى آنذاك بيبقى ويييحيييش قوى


قوم انا المفروض بقى أتلكك بالدراسة دى
و أسوق فيها عشان محدش ييجى يقولى
يا خايبة أو يا عبيطة
ازاى تعملى كدا و بتاع
و أفضل اسمعلى كلمتين فى جنابى


فبدل ما أقعد ابرر
و بدل كمان ما اطلع كل شوية
شهادة معاملة الاطفال
و افهمه ان جل مل لا يسهو

أروح جايبة م الآخر وأقول
ودمع العين يسبقنى


انا شولة يا بيه

و ربنا ما يوريك فى عزيز لديك

فيروح ساعتها اللى قدامى
مبدل فى ملامح وشه
و يعلو قسمات وجهه شفقة و يرد

لا حول و لاقوة الا بالله

طب ليه مقولتيش كدا يا بنتى م الاول ؟؟

خلاص
عفونا عنك
يلا
روحى لأهلك
و الله يكون فى عونهم
هما و عيالك
و اصدقائك
و زملائك
و جيرانك
و معارفك
و المدونين
اللى هيقروا هذوها البوست كمان
بس خلاث


فوق
تحت

ورا
قدام

يمين
شمال

فى الجو
تحت المية
أو فى الرمال
طلب الكمال
يحرم على الممكن

و الممكنات دول
محرومين م الكمال

عجبى

This entry was posted on الأحد, أبريل 25, 2010 and is filed under . You can leave a response and follow any responses to this entry through the .

50 كــــلام بيطــبطـــب عـــلى قــــلبى و روحــــى

يااااااااااااااه.. مكنتش اعرف ان الشوول بيعانوو اوي كده...
ربنا يعينكم علي ما ابتلاكم... وش بيطلع لسانه...

تعرفي اني بحس اني ايدي الشمال دي مشلولة... مبعرفش اعمل بيها اي حاجة... يعني مثلا وانا باكل ديما الناس بيستغربو من وضعية ايدي الشمال... اني بكون حاطتها علي رجلي ومبقربش للاكل بيها في كل الاحوال... وان كنت بحاول استخدمها حاليا بعض الاستخدامات الخفيفة بدل متبووظ من الركنة...

بجد برده اختي بتعاني نفس هذه المعاناه
وعمتي كذلك
بجد لو حكتلك علي اذاي انهم لاذم يخلوها بالعافيه تكتب باليمين
وعمتي كذلك ومحاولات مستمره علشان تكتب بالليمين:(
ربنا يهدي الجميع

السلام عليكم
ايه الدلجمال ده بجد انتى رهيبه بموت فى طريقه الكتابه دى خصوصا الافيهات اللى فى البوست بجد دمك عسل
ولا يهمك العظماء دايما مميزين وغير باقى الناس
والدراسه اللى بتقول العمر اقل والكلام ده ولا يهمك منها دول اكيد مدسوسين عليكى ههههههههههه
لا بجد الاعمار بيد الله
ودائما الى الامام
تقبلى مرورى
تحياتى

هاي ازيك ؟
يارب تكوني بخير
انا الحمد لله زاي الفل
انا من ساعت ما بدات اقرا وانا مسخسخة علي نفسي من الضحك بشدة
وحالة الملل دي علي الكل علي فكره مش بس في المدونات
ماكلمش حد من اصحابي او صحباتي الا لما يبشرني بالخير ويقولي "زهقان ...ملان ...مخنوق ...وحاسس اني هاطق واموت" ياستر يارب .

بس بجد موضوع الايسر دا موضوع مهم لان في مجتمعتنا الرائعه كان عندهم فهوم غريب ان الاشول دا يا ساتر يارب كائن فضائي مثلا ...انا اتذكر لما وانا صغيره اعمل حاجة بايدي الشمال لان ايدي اليمين متسخه مثلا كانت ستي الله يرحمها ويفشفش الطوبه الي تحت راسها تقول "انتي ليه غاوية الشيطان يكون معاكي في كل حته؟" يعني هي الايد اليمين بتاعة الملائكة والشمال بتاعت الشياطين مش انا بعمل حاجة ؟ هو انا باكل بيها مثلا ولا بشرب؟
لا والاجمل مثلا ان حد يندهش كده ويتخض كانك عندك مرض جلدي لا يمكن ان تعالجي منه لو شافك بتكتبي بالشمال يندهش ويقولك "ايه دا انتي شوله؟" الراجل مندهش كاني حوله ؟
ربنا يهدي ومعلش طولت عليكي

وكلمتون اخري
انبي موش تذعلي علشان موضوع الرسمي ده
بس حسيت ان الموضوع جد شويه قولت مبدهاشي
بس بجد بحب سونسون منك
لو موش قولتيها تاني هذعل
اهو
اهئ اهئ

صباح الفل يا تيما

تصدقي انا مش خدت بالى خالص انك بتستعملى ايدك الشمال

انابكتب باليمين لكن بستعمل الشمال كتييير اوى يعنى لو بشرب حاجة الاقينى ماسكة المج بالشمال ولما اتنبه لدا بنقله لليمين

بس احلى حاجة بئا انى الحمد لله دايما بقعد على شمالك مع انى مش كنت عارفه


عنوان البوست حلو اوى اوى يا فاتيما

لما قرأت العبقريات وكنت بدأتها بعبقرية عمر
كانت من صفات العبقرية الظاهرية ان يكون ايسر أو يكتب بكلتا يدية
- اصلع او كثيف الشعر وهكذا ولما نظرت فى الصفات

وجدتها تبعد عن المألوف المتبع

يمين .. شمال .. في كل الاحوال بحبك يا فاتيما

هى دى الحاجات اللى تستحق تتقرى عالصبح
يا شولة :)
صباحاك زى الفل
بتشوطى بالشمال؟ :)))

جميل
معلومات علمية بلغه بسيطة واعتقد فيه نظرية لعالم اسمه "لمبروز" استخدام اليد اليسري من علامات العبقرية
عن نفسي استفدت منكم كثرا
عبد الجليل

عارفة يا فاتيما
عمر إبني أشول
وكمان ماجد ،، أعز صديق ليا في الدنيا
وطلعت كمان أختي فاتيما تبعهم
مع إنك عمرك ما عرفتي تدخلي في الناس شمال
__________________
KING TOOOT

حلو قوى موضوع الفص اليمين والشمال اللى فى المخ ده
انا دلوقتى عرفت انا غبيه ليه الفُصين واقفين يااوختشى

فرحت بموضوع ان اللى تحبيه يبقى على شمالك دى لانى اكتشفت انك بتموتى فيا(اجمل شئ فيا التواضع)
لما بتمشى جنبى كنت على شمالك ولما قعدنا كنت على شمالك برضه
لالالالالالالالالالا ده انا كده عديت خلاص ومحدش يقدر يكلمنى


بس قوليلى صحيح انتى بتسلمى باليمين ولا بالشمال ؟؟؟
اصلى عمرى ما سلمت عليكى
دايما بالاحضان بالاحضان زى ما قال حليم
هههههههههههههههه


انا اكتسبت معلومه مهمه يابطه من البوست ده لانى باهتم بقرايه لغه الجسد غالبا وبعد كده هاهرى اصحابى اسئله واشوف عينهم رايحه فين
هههههههههههههههههههه
شوريره انا

طب ايه رائيك اني طول عمري اشوف الناس الشوله جذابين
;)

:-)))))))))))))))))))))))))))))))))))))))))))))))))

عفونا عندك يا فطوم روحى انت من الاحرار الى من اهل اليسر :-)

بس فهمينى مارلين مونرو كانت عبقرية فى ايه بالظبط :-)))

و لما نسكت تنزلى ببببببببببببببوووووووستتتتتتتتتتتتتتتتتتتتتتتت رهيب بالشكل ده
لا كله يسكت بعد كده علشان فطوم تكتب
سمعينى يا غجر :-) كل يتكتم تدوينيا

مساء الخير
:-********************************
:-XXXXXXXXXXXXXXXXXXXXXXXXXXXXXXXX

تصنيف سيادتى من الميلين للعسر :-) مش المشاكل :-)))
قصدى استخدام الايدين الاثنين
و لا تخلوا ياتى من المشاكل برضه :-)
تفتكرى مكن تطلعولى الشهادة المذكروزة اياها تنفعنى فى وقت زنقة

حلو البوست دا أوي
بوست ايه بقى دا عدى مرحلة البوست
دا بحث
بحث كامل شامل متكامل
بالنسبة لموضوع الأكل بالشمال والحديث الوارد في الموضوع ده فهو لمن يتعمد الأكل بالشمال مخالفة للنبي صلى الله عليه وسلم
فالرجل قالها كبرا

بس عجبتني أوي حكاية العيون دي
هبقى أركز بعد كده :)

ربنا يجعلك من أصحاب اليمين في الآخرة يارب :)

الا اله الا الله ياجدعاااااااااان
انا قلت اصلا مش فارقة معايا الواحد يكتب اوياكل بايد شمال يمين رجلوا وانا مالى ايش يخصنى كل واحد حر!!!
لللللللللللللللللللكن
طلع الموضوع كبير اوى طلع فى نفسايات ووجع والم ونظرة مجتمع!!
انا مكنتش اعرف ان الموضوع كبير اوى كدة
انا بعد كدة لو شوفت واحد بيكتب بايد الشمال او ياكل
هاخدوا فى حضنى واعيط واقولوا **كلنا ايد واحدة يامرسى ولا اله الا الله ياجدع!!!
**تصدقى فعلا ممكن واحد يشوف الحاجة قد ايه بسيطة بس مايعرفش انه ممكن توجع الى قدامه قد ايه!!
ربنا معاكى يافاتيما ويقويكى على لاناس الرخمه

والله يا تيما انا ليا اصحاب بيستخدمو ايدهم الشمال وعادي مافيش مشاكل
واعتقد والله اعلم ان مافيش مشكلة مادام مش قادرة تغيري دا لليمين فربنا غفور رحيم
يعني وبعدين انتي كبري دماغك من اي حد مادام مابتعمليش حاجة غلط سيبي اللي يزعل يخبط راسه في الحيط
اهم حاجة انك ترضي ربنا وتكوني راضية عن نفسك
بووووووووووووووووسة كبيرة وحضن

فرحينى يا اختلى فرحينى
و كمان عمرنا بيتقصف بدرى
عااااااااااااااااااااا
يعنى مش حينفعنا ذكاءنا الزياده و لا حاجه
حنموت حنموت

دايما كده مفرحانى و مشهيصانى يا تيما

على فكره انا زيك اللى احبه يمشى على شمالى
معرفش ليه برضه
جايز برضه حاجه فى المخ

تخلف او ما شابه
ههههههههههههههههه

واحشانى يا تيما

ميه مسه
اولا انا شايف ان كونك عسراء دة ميزة مش عيب لانى بحب كل شئ مختلف عن الاخرين اما عن موضوع الدين والاكل باليمين وكدة فده شئ خارج عن اراتك ومتهيالى معلكيش ذنب فية بوست جميل وهايل ورائع بس لية ملحوظة هوا ماله صغير كده ليه متبقى تطوليه شوية...هههه
دمتى بكل سعادة

مامتى بتكتب بالشمال

ومامتى اعتبرها من الاذكياء

دماغها حلوة فى الحاجات العلمية والحسابية

موهوبة بتكتب شعر حلو


حكاية ان حد ياكل بالشمال يبقى
وحش وكافر والكلام ده كله
ده انا اعتبره هبل فى هبل

الواحد بدل بيسمى قبل الاكل
يبقى خلاص ان شالله ياكل برجله
لو ايده الاتنين مقطوعين


هو لسة فيه ناس بتفكر بالسذاجة دى
ويقعدوا يركزوا فى مين كل بإيه؟


من اداب الطعام ان الواحد يبص فى طبقه
ومايبصش فى اللى معاه بياكل ازاى؟


وفيه دراسة قرتها زمااااااااان
ان الناس اللى بتكتب بالشمال ده نوع من انواع زيادة مستوى ذكائهم


ودى معلومة اعتقد انها معروفة لدى الغالبية العظمى من البشر


ومافيش حد دلوقتى بيقعد يتريق على الايسر او الاشول

بالعكس اعتقد لو حد شاف قدامه حد اشول وظهر ده على ملامحه

فده مش معناه انه شاف حاجة وحشة
اعتقد ان ده معناه انه شاف حاجة متميزة




سلام
اختك خيخة

سيدنا عمر بن الخطاب كان أعسر على فكرة برده, ابسطى بقى

بس موضوع الأكل بالشمال ده فى قولان, أنا أختى شولة برده بس بابا وماما عودوها من صغرها تاكل باليمين, والحمد لله اتغلبت على مشكلة الأكل بالشمال دى. حاجة تانية كمان, والدى كانت حصلتله إصابة فى إيده اليمين فاضطر بعدها إنه ياكل بالشمال, وسبحان الله قدر, فالموضوع محتاج تعود وصبر مش أكتر

ربنا معاكى

اللي أعرفه إن الأيسر أو مستخدمين اليد الشمال هم عباقرة في أغلبهم
و اللي خلقته كده يبقى عادي جداً و ملوش أي ذنب
لكن الفكرة إن غلط الواحد لو كان أيمن يأكل بالشمال علشان الإيتيكيت أو المنظرة
هو ده اللي الدين حرمه
لكن اللي ربنا خلقه كده يبقى عادي و معليهوش اي ذنب خالص
و مش مطلوب منه إنه يقاوم فطرته اللي خلقه ربنا عليها علشان يرضي الناس

طيب بالنسبة للى بيستخدموا الاتنين زى حالاتى يا ماما فاتيما
فى امل انهم يبقى بدري عشرة عشرين سنة؟!

بس ياماما فاتيما انتى عارفة انها مش مسألة اعسر ولا ايمن!
هنا الناس اى حاجة مش مألوفة عندهم بيبصوا لها على انها غلط !!!
مش حاطين فكرة تقبل الآخر او التعايش معاه ...او حتى تقبل وجوده من غير جرحه!!
بقت حاجة نادرة اوى
بس عسراء ولا يمنى ...احنا بنحبك وعايزين جنبنا على طول
وحشتينى يا ماما فاتيما جدا بجد

طنطى عاوز ابلغك بحاجه مهمة
انا مثلا بكتب باليمين ولكنى بشرب القهوة بالشمال وكمان ايه
الحشيش المضروب بيقولوه عليه شمال

صباح الخير

:-) ايه الاغنية التحفة ديه من دول الى هارين الكاميرا ابتسامات ؟؟ :-))

فطوم يا الى احلى من مارلين منرو
:-) فين الشعر الى كان تحت يا قلبى ؟؟

:-***********************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXX

ههههههههههه يا صباح الورد على الناس الشولا
بصى والله العظيم كان نفسى ابقى شولا تصدقى بقى عندى كذا حد بحبه فى الدنيا اشول من اصحابى اخر حاجه عندى الراجل الاقرع ابو كرش اللى بموت فيه عمرو اديب ههههههههههههه هو كمان اشول
شوفتى بقى هههههههههههه غير كده بشوف الشول مميزين دا حقيقى
هو البوست طويل وشربات بس الحاجه اللى يهمين اعلق عليها وضع الاشول فى الاسلام
عادى خالص صحيح الاكل بالشمال حورم تحريم قاطع بس دا للناس العاديه القادره على دا والله حاولتو تاكلو باليمين وفلحتو خلاص خير وبركه ياسلام ياسلام ياسلام
والله حاولتو ومافلحتوش خلاص ربنا ادرى بيكم خلصت
افتكر حديث عن المصطفى عليه افضل الصلاه والسلام مامعناه ان الحرير حرم على الرجال فى الدنيا وكان رجل كل مايلبس غيره يجيله ماشبه الحاسسيه وحكه ولا بينام سمح له النبى الكريم اكيد بامر الله بلبسه طول عمره ودا بنتعلم ان لكل قاعده شواذها مش معقول يجيلكم اكتاب اؤ تكرهو الاكل ماينفعش
بس المهم انكم تكنو حاولتم وطبعا دى حاجه بنكم وبين ربنا بس خلاص

ياختشى انت ولالا كلو برحت راحتكو بادمتوم صادقين النيه لله وبسم الله الرحمن الرحيم هاتغنى فكك الدنيا ابسط من كده

فكرتينى ببوست لالا لما اتقبلتو فى المحطه وجاتلكم الواعظه هههه يلا الله يسهل للجميع

تقبلى مرورى يام يوسف

ازيك يا فاتيما
شكرا على الاضافه
انا بقى اعرف كمان ان اللى بيكتب بالشمال بيكون خطه حلو ومرسوم
وفى منهم ناس بترسم لوحات جميله
عموما انتى لكى الفخر بانك مميزه مش زى العامه من البشر
ههههههه
تحياتى لأم يوسف

يسرا.. أقصد فاتيما, عاملة إيه إن شاء الله نشوفك يوم بؤجة الخير
عندى كام تعليق كده
1- ليه مدونين كتير إنسحبوا من اللقاءات زى الصباغ مثلا ولي كتير تانيين قفلوا مدوناتهم زى إيناس؟ واضح إن دخولى التدوين كان فال حسن :(
2- تعليق على تعليق واندا.. هى معترضه ليه على عبقرية مارلين مونرو؟!!!
3- تعليق على تعليق خيخة.. الحديث الشريف بيقول( يا غلام سمى الله وكل بيمينك وكل مما يليك.. صدق رسول الله صلى الله عليه وسلم) يعنى نسمى وناكل بإيدنا اليمين مش أى حاجة حتى لو رجلينا طالما سمينا
معذرة على الإطالة

تصدقي انا بحب اللي بيكتبو بالشمال بيبقي شكلهم حلو خالث

اخويا زيك كدا يافاتي

بس مش في الاول كنا بنقوله مش باجبار لكن بعد كدا خلاث

بس الصراحه بيبقي شكله لذيذ خالث وهو بيستخدم ايده الشمال مش زنبه خالث علي فكرة

بحبك ووحشتيييييييييييينى

ماما الله يرحمها كانت بتكتب بالشمال وكل حياتها كانت بتستخدم ايديها الشمال وعمرى ولا عمر اى حد لاحظت عليه انه بيحس ناحيتها كل ده

سمع هوص (Abo 3li)
----------------

الله

هنبتديها تريقة أهو من أولها

أيوه كنا بنعانى يا فندم
على أيامى بقى كان المجتمع بينضطهدنا

و على فكرة اللى بتقوله صحيح بس بالعكس عندى ..يعنى لما بشيل حاجات تقيلة بستخدم الشمال و اغلب الوقت الأعتماد عليها تام بينما اليمين فى أضيق الحدود بستخدمها زى الكتابة ع الكيبورد دلوقتى مثلاً ...

نورت ..بس من غير عداد
وش بيطلع لسانه هوه راخر ..إسمعنى انتوا ؟!!!!




sony2000
--------

بتهرجى يا سنسن ؟!!

طب دنا بتكلم عن زمان
لسه فيه الأفكار دى دلوقتى ؟
هوه ممكن جدا لما بتتاخد من الناحية الدينية و التيمن و كدا

بلاش اهىء اهىء دى مقدرش عليها

يا سنسن
يا سنسن
يا سنسن

خلاث أهو



الشوكة الناعمة
--------------

لطيف اسمك قوى ..غريب و مميز
ميرسى يا فندم على ذوقك و رأيك
و متقبلة مرورك و متشرفة بيه
اهلا بيكى دايما





هبة الحياة
---------
كلامك عن الملل حقيقى يا هبة
دى سمة غالبة و اتمنى تنتهى فى الدايرة المحيطة بيا على الأقل بيوم البؤجة لأنه بيكون يوم مميز و بيحرك الركود النفسى و المعنوى بجد
يا ريت تكونى لسه عند وعدك و تيجى نتشرف بمعرفتك ...ماشى؟؟

ثانيا بقى كلامك عن حكاية الإندهاش دى بشوفها بس م الناس الكبيرة شوية ف السن ..اما الصغيرين فالعكس تماما بيبصولها على انها حاجة متميزة و غريبة و بيخدوها ببساطة

طولى زى منتى عاوزة ..انا كلى آذان مصغية يا حبيبتى





reem
-----

صباح الورد البلدى الاحمريكا يا ريموووو ...وحشتينى ى ى

و ايوه انا المرة اللى فاتت قولتلك تعالى على شمالى عشان نقعد ننقى رز و نحكى و نرغى و كدا ...
بس انا دلوقتى أفشيت سر حربى و بعدين اى حد يقعد على يمينى هيفتكرنى بنفضله ..يا دى الحوسة ماذا أفعل دلوقتى فى الحكاية دى ؟؟!!!!!

منحرمشى منك يا رقيقة الرقيقات
و اشوفك يوم الجمعة على الف خير يا حبيبتى إن شاء الله و بوسيلى البنات قوى






الطائر الحزين
------------

طب يعنى انا دلوجيتيى
إعتبر تعليقك دا محاولة تشجيعية
عالية المستوىبتحاول بيها ترفع نعنويات و نفساويات أختك الغلبانة
اللى إدحدرت منذ الطفولة ؟!!!

غالبا هو كذلك
يا طائرى الحزين الطيب
منحرمشى من تعليقاتك يا إيهاب
إبدااااا

mostafa rayan
-------------

وأختك فاتيما ممتنة و بتعزك جدا
و بتقولك انك بتحرجها بكرم أخلاقك
و بمشاعرك الطيبة دى فوق الوصف
و لدرجة انها مبتعرفش ترد عليها
بما يوازيها من جمال و رقة
إنت اخ غالى عليا قوى يا مصطفى
يا الطيابة ذاتها
بجد





الكلمة نور
-----------

مشكرين يا مالك الاجنحة
و صباحك و مساك زى الفل يا فندم

و على فكرة بقى
اختك فاتيما كانت لعيب كورة معتبرة
ف الطفولة
بس كانوا بيوقفونى جون للأسف
و اكتر من كدا مفيش ..
بس كنت شويطة تمام
و كنت بشوط بالشمال بقوة
...و لما دخلت اعدادى و لعبت سلة
ف المدرسة كنت مميزة برضو
و دا لإن إتجاهاتى المعاكسة كانت بتعمل إرتباك للناس العادية ...


على فكرة دى ميزة محدش كتير بياخد باله منها
بس يمكن عشان كدا الرياضيين المميزين الشول كتير و حسب المقالة اللى قريتها ان لاعبى التنس المصنفين على العالم منهم 17% تبعنا ..

فأنا مش عاوزة أتكلم بقى
أحسن أعقدكو و لا حاجة

نورت يا نور

ونحن نشكر الجناحات اللى جيباك
حدانا بقالها مدة شكر عميق
:)




أستاذ عبدالجليل
--------------

أزى حضرتك يا استاذنا
دايما كدا سباق بالسؤال علينا

تعليقات حضرتك بتطمنا عليك
و البؤجة اللى جاية دى
فكرتنى بغاليين كتير
و حضرتك منهم لأنها كانت اول مرة نتشرف بحضرتك فيها ..
كانت البؤجة برضو
أصلها كلها خير
و متجبش غير الخير حتى فى ناسها ..

واحنا نفيدكم ؟؟
دا حضرتك الخير و البركة كلها






KING TOOOT
---------

صحيح ؟؟
طب هايل
الواد بيكا دا حبيبى
ينضم بقى لطابور المنضهدين هوه و ماجد صديقك .. و نعمل رابطة او جمعية ...إيه رأيك ؟؟

انا فرحانة قوى بكلمة اختى دى
قوى قوى كمان

سلامى لبوبو الجميلة
و الشقاوة لحد ما أشوفكم إن شاء الله
على خير





عاشقة الرومانسية
----------------
بت يا دودووووووووووووووو
مين دى اللى الفصين عطلانين عندها
دنتى عروسة البحور الحلوة بتاعتى ..و كل الفصوص سليمة و ميت فل و خمآشر يا قطتى ..متقوليش كدا

كنت و انا صغيرة بسلم بالشمال فعلا و كنت طبعا بسمع تعليقات و استنكارات بإن كدا حرام و غلط و كدا

بالنوسبة للردالة فبسلم باليمين طبعا
و فيه رجالة بتجيب م الىخر و مبتسلمشى على حريم ..

اما نون النسوة فعلى طريقة عبحليم يا اوختشى ..بالاحضان علطول إحنا لسه نسلم و نضيع الوقت ف الرسميات ؟؟


بوسات و حضونات
يا عروسة البحور





ساره
-----

صحيح يا ساره ؟!!

أخجلتمونا يا فندم
كلك ذوقك يا حبيبتى

wanda
-----

ون ون

الاول
**********************************
و ×××××××××××××××××××××××××××××××××

أساسى يعنى قبل كل حاجة

ثانياً
مالها يا ست مرررين موررو ..مش عاجبكى ليه؟؟
البونية كان مخها فسافيسى و جننت الدنيا بجمالها ..اللى ممكن غيرها كانت تبقى عندها زيه بس معملتش الحالة دى من الجدل و الإعجاب حواليها ... الكاريزما دى مش سهلة تيجى لأى حد مشهور حتى .. و هيا مكنتش ممثلة هايلة بس أتصور لو كانت عاشت و استمرت كانت هتتحسن قوى و تبقى كويسة ..يلا الله يرحم الجميع


انتى بتستخدمى الأيدين الاتنين ؟؟
أتاااااااااريكى يا بنتى مخك نضيف و ذكية
أصلى خالتى كدا برضو و ما شاء الله شعلة ذكاء من الطفولة ...معرفش ليه مطلعتلهاش ..مع ان اسمى على اسمها و فصيلة دمنا واحدة و هيا بتعتبرنى بنتها لأنها مخلفتش بنات و بكتب بالشمال زيها أهو ..بس مطلعتش واعية و فى ذكاءها ..و تعالى هنا شهادة ايه اللى عاوزاها ..بتاعة معاملة الاطفال دى ؟؟!!!
ليه يا ماما .زمن غير شهادة عيشى طفولتك و اللى مش عاجبه يشرب م المحيط
مش البحر كمان ...

الغنوة حسيت اسمها مناسب مع الموضوع .. خلف خلاف
و النبات المبتسمات دول ممثلات ف الفيلم اللى محدش شافه غالبا لأنه فشل ..اسمه لحظات انوثة و الله أعلم

انتى عاملة ايه ف المذاكرة يا هاااااااانم ؟؟!!




يوم جديد
-------

ميرسى يا يم يم

منحرمشى منك يا حبيبتى





كيكى عووووو
-----------

ايوه أيوه و النبى
انا م العالم اللى تحضنيهم دول
الله يكرمك أحسن طفولتى المعذبة
كانت مشردة بسبب الحكاية دى
... جنب أسباب آخرى

بصى يا كيكى
أحكيلك انتى مش غريبة

اختك فاتيما بتتكلم عن طفولة السبعينات يا حبيبتى .. مش دلوقتى


حاليا الحكاية عادى
و مفيش استغراب
لكن على أيامى ..
كانت النظرة علطول مندهشة
بغلاسة (بالنسبة لطفلة) يعنى
نظام انك تقعدى على حرف التختة دى وكانت ميزة مقتصرة على الولاد بس كانت بتعملى مشاكل كتير ..لأنهم كانوا بيستغلسونى قوى ايه اللى مقعدك جنبنا و فى مكاننا و كدا

و الاكل كمان كان مأساة
لأنى كنت بعند مكلش
و كان عندى انيميا باستمرار
و كنت ضعفانة و صحتى مخستعة
فآجى أنضرب ف المدرسة م العيال معرفش ادافع عن نفسى
فيحصل حوادث و بلاوى
واروح اشتكى للمدرسةبتاعتى
تقولى بتلعبى ليه مع الولاد ..
اقولها عشان البنات مبتحبش تلعب كورة ..فتقولى تستاهلى بقى
فيلم كدا هندىىىىىىىىىى
ميعلم بيه الا ربنا
ومش عايزة أخرط على قلبك بصل ...


بس المهم مالآخر
أختك فاتيما كانت عجبة ..
زودها حكاية الكتابة بالشمال دى زيادة .. فبقت عجبتين
بس خلاث

بوسيلى ماما بقى لو سمحتى
وخلى الاحضان ليكى لما أشوفك



just waiting
-------------

انا مكبراها يا تيتو

و بحكى عن زمان يا حبيبتى مش دلوقتى
الحمدلله الرضا موجود و مفيش اى حاجة و ميرسة ع البوسة الحلوة دى و الحضن كمان ..ليكى منى زيهم مضروب فى تلاتة أربعة عشرة





صيدلانية طالعة نازلة
---------------------

يا رفيقة السلاح
لو مكنتش انتا تدلعنى مين هيدلعنى طيب ..عيب يعنى أى خدعة

و فعلا حكاية الغتجاهات دى بتعمل مشكلة جامدة عندى خصوصا فى اختيار المكان اللى بقعد فيه فى أى حتة لأن فيه اماكنى بتخنقنى جدا

و أيوه المخ دا هوه اللى تاعبنا
نعمله ايه

و تعالى هنا
مين دول اللى تخلف يا ست انتى
بقولك عباقرة تقوليلى تخلف ؟!!!
متبقيش نيران صديقة بقى
دنا بقول رفيقة سلاح يا لولاّ
يا ختشى

انتى كمان وحشتنيى





الارمـوطــى
----------

و الله يا أرموطى حاولت أختصر معرفتش
أصلى حسيت ان فيه حاجات لازم تنقال و الا يبقى فيه فجوات ..دا كان فيه حاجات تانية و حودايت بس قولت حرااااااام ...

انتا نورتنى يا فندم





بت خيخة و أى كلام
----------------

الحواديت بتاعتى دى يا خوخة عن زمان
مش دلوقتى ..يعنى ناس السبعينات
و مجتمعى وقتها كان اغلبه أطفال زى حالاتى و كنت عجبة وسطهم و محدش كان فاكرها حاجة حلوة ..كان فاكر الأكل بالشمال نوع من الغلاسة او المشى شمال كدا
اما الكبار فكانوا بيعتبروه عند و عدم سمعان كلام و فى أشيك الأحوال عدم إرادة إنى معلمش نفسى أكل بالشمال

الضغوط دى بالنسبة لدلوقتى عادى
و لا ليها معنى
بس لما تكون جزء من حياتك اليومية كطفلة بتأثر فيكى اكيد
و غالبا انا كنت طفلة حساسة زيادة عن اللزوم ..فخدت الحكاية على قلبى قوى

فعلا دلوقتى الناس شيفاها شىء مميز
و بحس كدا فى العيون لما اكتب بالشمال قصادهم ..بتلفت انتباهم الحكاية دى

نورتى يا خيخة قوى
و بوسس لشريف لو سمحتى كتير
ممكن ظ

السلام عليكم

كيف حالك اختنا ام يوسف لعلك بخير والحمد لله ..

معذرة اتاخرت شويتين لاعمال خاصة ..

على فكرة في انجلترا السير والوقوف على الشمال فاتجاه الطرق عندهم عكسنا تماما ..

المهم النبي صلى الله عليه وسلم يحب التيمن اي استخدام اليمين في امور كثيرة كالطعام وهناك احاديث صحيحة في ذلك واستخدام الشمال والبدء بها في بعض الامور مثل الخروج من المسجد ..

قال تعالى : ( لا يكلف الله نفسا الا وسعها ) سورة البقرة286
والاسلام دين يسر ( عن أنس بن مالك عن النبي صلى الله عليه وسلم قال يسروا ولا تعسروا وبشروا ولا تنفروا) صحيح البخاري
ولماذا لم يناقش احد لبس الدبلة في اليمين فترة الخطوبة ثم في الشمال بعد الزواج ..

تحيتي

heba
-----
و الله يا هبة اختك برافو عليها

ماما حاولت معايا و بعدين محبتش تضغط عليا قوى بقى لأنى كنت طفلة عنيدة من غير حاجة ..فسابتنى على راحتى

و ربنا معايا و مع الجميع
بس مالك بتقوليها زى ما اكون فى مأساة ؟؟
دنا بحكى معاكم يا حبيبتى و بس
مش بشتكى من حاجة و لا كدا
انا زى الفل متتخضيش





مهندس مصرى
----------

يا سلام يا محمد

بيعجبنى سلاستك و عقلك الكبير دا
خصوصا لما الموضوع بيتطرق لناحية دينية فتحاول تيسرها و متخنقهاش على حد ...انا بحترم الناس اللى بتفكر بالشكل دا لأنهم بيستفتوا قلبهم و يتعشموا فى ربنا خير و رحمة اكتر من التشدد و التعسير ع النفس ..يكفى ما ف الدنيا من مصاعب نركز فيها و منبصش للتوافه ...
ربنا يخليك لأختك و لينا
يا عريسنا
هفضل أقولها لحد ما نجوزوك و نفرحوا بيك و فيك يا غالى




reem wageeh
-----------

بعد الشرررررر يا ريم
ليه بس كدا ؟؟


لأ يا حبيبتى دا مجرد خبر عبيط ..
و الأعمار بيد الله
متقلقوناااااش بقى !!!!

و يا ماما انا بحكى معاكو لكن منيش زعلانة و لا متضايقة و لا حاجة دى ذكريات الطفولة المشردة ..و راحت خلاص لحالها ..حاليا حاسة انها ميزة تفرقنى عن غيرى ..و نعمة من ربنا اكيد

انتى كمان يا حبيبتى
ان شاء الله نيجى اسكنكرية قريب و اشوفك يومها بإذن الله



صوت من مصر
----------

ايه حكايتك يا كيمو
شاكيرا و عديناها

كمان بتجيب سيرة الحشيش !!!!

اتقمص روح يوسف بك وهبى دلوقتى
و أقولك


بقى انا ينكتبلى الكلمة دى
فى صفحة تعليقاتى ؟؟

ياللهول

و النبى يا كيمو بلاش الحاجات دى
الله يكرمك .. الا تكون المدونة متراقبة و لا حاجة تقوم تودى اختك فاتيما فى داهية و هيا مبتحبش تقعد جنب حد
بيشرب شيشة حتى .. ماشى ؟


طييييييييييب
المهم انتا ازيك و عامل ايه
اخبار النفساويات يعنى ..يا رب تكون بخير علطول ..إنشالله




richardCatheart
---------------
ازك يا قطقوطتى

ميرسى ع الإيضاح فيما يختص بالاكل بالشمال

و ميرسى كمان على الأعجاب بالشول امثالنا ..وش مكثوف ع الآخر

و ايوه بوست لولاّ كان ملهم .زو افتكرته لما قريت خبر اوباما و قولت لأ بقى ايه الناس دى .زمنطضهدانا ليه من أبسط حد لحد رئيس امريكا يا نضرى محدش سايبنا فى حالنا لييييييييييه ؟؟

حكاية الأكئتاب دى حقيقة يا قطة
فى صغرى رفضت كل المحاولات عندا

لما كبرت ايام الجامعة و بعدها حاولت كتير لقتنى بدخل فى دور اكئتاب ملوش لزمة و نفسى تقفل كدا قفلة كحلى منقط فقولت خلاص بقى

و بلاش و النبى آخر جملة دى فى تعليقك
تكتبيها تانى لو سمحتى
عشان انا متقبلة مرورك جداااا
فوق ما تتصورى
يا قطقوطتى
يا حبيبتى ..ماشى؟

طييييييب





حنين
----
ازيك انتى يا حنين

اختك فاتيما يقال ان خطها حلو بس لما بكتب براحة مش سربعة
و ليا ف الرسم و الأعمال الفنية برضو مش وحش يعنى
تصورى ملاحظتك المعية فعلا
مشكرين جدا يا نونى على ذوقك
جدا جدا



أبو حميد
-------
ازيك انتا يا باشمهندس

1- متخدوش فى بالك .زغلق المدونات و اختفاء البعض امر عادى و بيحصل كتير اختك فاتيما بقالها سنتين و شوية و بأكدلك ان وشك ملوش دعوة خالص و لا كان فال مش حلو و لا بتاع ..أطلاقا ..الاصباغ مشغول بقاله فترة و بقاله كتير مبيحضرش لقاءات زى دى ..اما ايناس و أى حد بيقفل مدونته فدى راجعة لظروف خاصة بيهم و ملهاش دعوة بيك و لا بحد صدقنى ..
2- انا معاك يا ريس ..هوه فيه أحلى من مارلين ؟؟
3- شكرا على التفسير ..بس هيا الفكرة فى إنك للضرورة تستخدم الشمال و تبسمل فكدا متبقاش مشكلة ..انما مش تبقى يمينك طوع امرك و تعاند ...كدا يبقى مينفعشى فعلا و ملكش عذر

و طول زى ما تحب يا أبو حميد
انت شخص عزيز و مرحب بيك فى صفحة تعليقات أى بوست و المدونة مدونتك




كيــــارا
---------

يا بنوتات يا عسولات
يا رافعة نعنوياتى علطوووووول

و اخوكى دا اخلاق من غير حاجة
يكفى انه أخو البنوتات العسولات اللى هما سعادتك

انتى كمان وحشتينى و حاولى تيجى يوم البؤجة ..على قد ما تقدرى يعنى
ماشى ؟؟

بوسات و حضونات يا حبيبتى




مجرد بنت
-------
اولا انتى نورتى يا عزيزتى

ثانياً يشرفنى ان البوست دا
يبقى سبب فى انك تكتبى عن مامتك المعلومة دى و تجيبى سيرتها معانا
و تشاركينا الذكرى دى ..
ثالثا يا حبيبتى حكاياتى عن المشاكل دى كانت فى الصغر
دلوقتى عادى خالص
و يمكن العكس كمان

انتى نورتينى بجد
و يا ريت تكرريها كتير

تحياتى و خالص ودى ليكى

انااول مرة شفت حد بيكتب بالشمال استغربت وكنت طفلة طبعا ..ماما قالتلي عادي فيه ناس ربنا خالقهم كدا.. وخلاص بقوا بالنسبة ليا عادي دول فعلا بيبقوا مميزين واكثر ذكاء ماشاء

أكيد زمان مش زي دلوقتي المفروض دلوقتي كل الناس عارفه انها حاجه طبيعية

بس معرفش هي بتفرق ف الشغلانات بقى ولا ايه يعني لو طبيب جراح او طبيب أسنان أعتقد مش هتفرق

كان عندنا ف الكلية مش بيوافقوا حد أيسر يتخصص كمنجه او اخوتها
معرفش ليه مع ان كل الآلات بنستخدم فيها الايدين
ومع اني مش شوله بس ايدي الشمال أقوى من اليمين

واعتقد كلمه (أشول) زي من
شمال...أشول: لما بنصرفها(بس عشان الألف ف النص بقت واو) زي يمين....أيمن
أعتقد يعني مش أكيد على حسب ما أتذكر

ايه ده هوه الاشول مشكلة كبيرة كده مش للدرجة يعين كل اللى اعرفهم شول بيبقوا عساسيل قوي ودماغهم حلوة فعلا وشاطرين قوى فى دراستهم حتى حركتهم بتبقى لذيذة وهما مثلا هيكتبوا تلاقيهم بيتحودوا وية كده ويميوا بحب الحركة ديه قوي :) يا بنتى ربنا بيخلق البني ادم بالصفات اللى مناسبة ليه

ده اول رد ليا على مدونتك الرقيقة وان شاء الله مش هيكون اخر رد واسلوبك حلو قوي فى الكتابة :)

سبحان الله
كل شئ له ميزه وله ضرره

من وانا فى المدرسه كان للاشول دور بارز فى حياتى

كان اشطر تلميذ معاى فى الفصل اشول (ايهاب) و كان متفوق فى القدم
وكان خالى المهندس الكبير (وهو عبقرى) اشول
وكذلك عمى الشاطر (وهو لاعب سله ماهر)
وكانت اختى الصغيره شوله (نوجه)
وكان المعيد صاحبى اشول
وكانت خطيبتى (الاولى) شوله
وكانت السكرتيره شوله
و زوجتى شوله و
بنتى (الشقاوه) شوله
واخيرا اخر شوله اتعرفت عليها وكان نفسى اشوفها من كتر حكايات علا عليها هو انت

يا فاتيما

ايه ده يا فطوم
دنا عينى اشولت
هههههههههههههههههههههه

بصى اشول ولا اعسر ولا اسمر اسمر طيب ماله على رأى الشحرورة

ولا يهمنى

اللى يهمنى هشوفك امتى علشان وحشتينى مووووووووووت
بصى بقى حددى اى يوم فى شهر 5 واحنا وراك يا ريس

السلااااااام عليكم اصحاب المدونة

يااااه هوا حضرتك بتكتبي بالشمال..
كده يعني حضرتك ذكية وشطورة معظم الشول كده على فكرة لدرجة ان العشرة الاوائل في مدرستنا منهم 3 بيكتبوا بالشمال ومن ضمنهم رسامة رهيييييييبة تقوليش بيكاسو ^_^

حلو موضوع بؤجة الخير ده :) اول مرة كنت اسمع بيه وعموما النهارده الاربع لو عرفت اخلص مذاكرتي قبل الجمعة هبعتلك واستفسر شوية عشان انا رخمة :)

وازيك بجىىىىى

فاتيما العزيزة
اليد اليمني او اليسرى وما لحق بهم من عادات منها الصحيح ومنها الخاطئ والمبالغ فيه
يد يمنى او يسري ليست هذه مشكله رغم فعلا كان كثيرون يعتقدون انها مشكله وان به مس من الشيطان وان وان وكل هذا عبارة عن ثقافات غبية جدا سواء استخدام ياليد اليمنى او اليسري فكل هذا ليس له علاقة بالشخص وبعمله وبموقفه من العباد في الدنيا

اسمحيلي هذا رد الحديث والقرآن على موقف اليمين في الاسلام حتى لا يختلط الامر علي البعض
ووجوده في اشايء كثيرة في حياتنا كمسملين من اجل التبرك بها فقط لكن هذا شي وكون الانسان اعسر شئ اخر لا يجب الخلط بينهم

التسمية قبل الطعام والأكل باليمين مما يلي الآكل:

عن عمر بن أبي سلمة رضي الله عنعنه قال: كنت غلاماً في حجر رسول الله صلى الله عليه وسلم وكانت يدي تطيش في الصحفة فقال لي رسول الله صلى الله علية وسلم : يا غلام سم الله وكل بيمينك وكل مما يليك " رواه البخاري ومسلم.

و عن جابر بن عبد الله رضي الله عنه أن النبى صلى الله علية وسلم قال: " لا تأكلوا بالشمال فإن الشيطان يأكل بالشمال " رواه مسلم، وفي رواية له عن عبد الله بن عمر رضي الله عنهما، قوله : " إذا أكل أحدكم فليأكل بيمينه وإذا شرب فليشرب بيمينه فإن الشيطان يأكل بشماله ويشرب بشماله ".

الثقافة الاسلامية عن اليمين اساسها
قال الله تعالى : ( فَأَمَّا مَنْ أُوتِيَ كِتَابَهُ بِيَمِينِهِ فَيَقُولُ هَاؤُمْ اقْرَءُوا كِتَابِيه * إِنِّي ظَنَنتُ أَنِّي مُلاقٍ حِسَابِيه * فَهُوَ فِي عِيشَةٍ رَاضِيَةٍ * فِي جَنَّةٍ عَالِيَةٍ * قُطُوفُهَا دَانِيَةٌ * كُلُوا وَاشْرَبُوا هَنِيئًا بِمَا أَسْلَفْتُمْ فِي الأَيَّامِ الْخَالِيَةِ * وَأَمَّا مَنْ أُوتِيَ كِتَابَهُ بِشِمَالِهِ فَيَقُولُ يَالَيْتَنِي لَمْ أُوتَ كِتَابِيه * وَلَمْ أَدْرِ مَا حِسَابِيه * يَالَيْتَهَا كَانَتْ الْقَاضِيَةَ . . . إلى قوله تعالى : ( إِنَّهُ كَانَ لا يُؤْمِنُ بِاللَّهِ الْعَظِيمِ ) الحاقة/19- 33 .


تحياتي
سيد سعد

أنا بصراحه الناس اللي بتكتب بالشمال دول باحسهم مميزين مش ومختلفين
بغض النظر عن اني لما بالعب كوره بالعب برجليا الاتنين
ودي تعتبر حاله شاذه زي ما كان المدرب بيقولي

بس الا الواد اوباما طلع اشول هو كمان يا حلاوه يا ولاااد

المهم انا أيمن لأ انا مش أيمن أنا أيمن ..يعني انا مانيش أيمن بس انا أيمن

:))

انا في جمله قعدت اضحك عليها لما قلت يا بس في البوست ده
الحته دي تحديدا
"خامس رئيس امريكى من سنة 74 بس"

طبعا عارفه انا باضحك على ايه :)

:-)

ده مش بوست .. دي رسالة ماجستير .. وواضح انك معبية من الموضوع ده قوي

:-)

بس فعلا وأنا صغير كان الموضوع فعلا شاغل الناس وكان فيه لسه بقايا جيل بيحاول يقوم "الأشول" بالعافية وجيل تاني بدأ يناقش الموضوع بطريقة علمية وإن العسر ده شيء طبيعي مش عيب يعني

شوية شوية بدات الناس تفهم وتتفهم وأعتقد إن التعامل مع الموضوع بقى عادي خلاص .. وإنحصر في إطار إنه شيء نادر أو غريب وبس

مش كده وألا لسه فيه مشاكل معاكي؟

:-)

جنى
---

و عليكم السلام يا سعيد
ازيك انتا يا غالى

معلش و لا يهمك المهم انك تطمنا عليك و فقط و تعالى وقت ما تفضى و تحب

ايوع نسيت حكاية انجلترا دى خالص كتر خيرك فكرتنا ...

بس بلاش و النبى حكاية الدبلة دى
الله يخلييك ..
مفيش داعى نفكر الناس
ان القرار المتنيل بنينة دا
بيترسخ و يبقى نهائى و لا فكاك منه
لما الدبلة تروح ف الأيد الشمال
الا يفكروا من غيظهم
انهم يطلبوا بإصدار قانون بانهم يقطعوها و لا حاجة
عشان يخلصوا من شرها
و اللى بييجى من وراها

خلينا ساكتيييييييين احسن
محدش واخد باله

شششش

تحياتى انا اكتر يا جنى ى ى




فراشة
-----
متهيألى يا فراشة بتفرق
استخدام الألات و الاجهزة ..المصممة لليمين
بس فيه حاجات بتبقى الشمال فيها ميزة ...يعنى عارفة مخرطة الملوخية اليدوية دى ..مش المسطحة ..لأ اللى هيا بيتفرم فيها التوم كمان ..و ليها ايد على جنب دى ...الناس الشول بيعرفوا يستخدموها احسن و ايدهم بتبقى أقوى لأن الإيد اللى بتلف بتبقى ع الشمال

و متفقة معاكى ان الأشول تصريف عامى مريح موازى للأيمن

تحياتى ليكى و نورتينى




رنونة حكومة ميخو
-----------------

الله يكرمك يا فندم
طب استنى لما تشوفنى يمكن تغيرى رأيك ؟؟

بس شاطرين فى دراستهم دى لا اتفق معاكى فيها بالنوسبة لحالتى كنت عادية ..و ساعات اقل شوية ..بس كنت متميزة فى مواد آه و مواد لأ ..زى اى حد متوسط يعنى ...
ميرسى على ذوقك و انتى نورتينى





Ashraf
------

ياااااااااه يا دكتور
ما شاء الله
دحنا مبسوطة جدا من القايمة اللى حضرتك سردتها دى

اتارينا كتير
و حلوين اهو و انا مش واخدة بالى
و فاكرنا أقلية منضطهدة

بس حضرتك يا ترى بما انك خبرة فى العالم اللى ماشية عكس الغتجاه دى ..شايف فى كل الناس اللى جبت سيرتهم دول حاجة مشتركة تجمعهم ؟؟
اكيد مش الذكاء و الا تشيلنى من وسطهم
نقيلنا حاجة تانية الله يخليك


أى كانت الغجابة
اتمنى حضرتك متكونش زعلان م دنيتك المليانة بالناس الشول دول قوى


و الغزالون يهبلون كمان شولة
ياللهوووووول

اشوفكم بكرة على ألف خير
إن شاء الله





حنين القلب
--------

بعد الشر على عيونك يا ام عمر
موش هينفع شهر مايو خااااالث يا حنونة و دودو عارفة ليه و هتقولك بقى خليها الشهر اللى بعده
خلى بالك من نفسك و بوسيلى عمورى حبيبى و امه




SAYAD SAAD
----------

ازيك يا سيد المكسرات

شكرا على كل ما كتبته
جزاك الله خيرا فى التوضيحات

المهم انا براءة بعد دا كله
و لا هيقيموا عليا الحد ؟؟؟

بهزر
بهزر و الله




طالبة مقهورة .. درجة اولى
-------------------------

و عليكم السلام يا فندم
اتفضلوا يا رجالة

يا ريت تشرفينا يوم البؤجة
دا بكرة خلاويص اهو
حاولى تيجى بقى و متتأخريش علينا و التفاصيل عند خالد همس الاحباب
هتلاقى اللينك فوق تحت الصورة بتاعة المدونة ...تحياتى





ZIKA
----

طبعا يا زيكا
عارفة بتوضحك على ايه

على شر البلية يا بنى


و ايوه اوماما طلع اشول ..امال هوه موكوس ليه زى حالاتى ؟!!!

اشوفك دايما على ألف خير





يا مراكبى
---------
أيوالنبى يا شيخ

اخيرا حد من جيلى ..و عارف الوكسة اللى كنت فيها شكلها عامل ازاى

قولهم يا نبع الحكمة و حياتك
كان منظر الاشول و كأنه عجبة ازاى

لأ دلوقتى الحمدلله
و يمكن العكس ..الناس بتبصله بإستغراب لطيف ..انه شىء مخالف للعادى ..بس لسه حكاية الاكل دى عاملة قلق شوية للإعتبارات الدينية المذكورة عاليه

معبية ؟؟
مين دى ؟؟
و لا الهوااااااااااا

خالث
جبت منين الانطباع دا

انا و لا ف دماغى
و لا مركزة
و لا فارق معايا
و لا كانت حاجة بتأثر فيا
او تزعلنى
او تلخبطنى
او تقهرنى
او تروحنى معيطة

او اى حاجة من دى خالص

و مش هعترف و لا هقول اى كلمة تانية غير فى حضور المحامى بتاعى بقى


إهىء إهىء
عاااااااااااااااااااااااا

مساء الخير على العالم الايسيرين الحلوين
:-) الى يهبلون زى مارلين منورون :-)

:-***********************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

طبعا بكرة اجازة
انتم خارجين بالبوج
و انا حقعد هنا اقدم عرض و ربنا يستر

عاااااااااااااااااااااااااا
مليش دعوة
عايزة بوجة بس بنبونى و لبان و حلويات بالذات الفوليات و السمسميات
:-)))))

الا سؤال بس خبيث
لما انت تحبى الى تحبى على شمالك و لولة كذلك
بتقفوا او تقعدوا مع بعض ازى ؟؟؟ خلف خلاف :-))) علشان تفضلوا شمال بعض
انا عندى الى على شمالى و الى على يمين حلوين :-) تاخذونى بافر مابينكم ؟؟

تعرفى ان من اتيكيت مصاحبة الراجل الاستقراطى للمراءة (يعنى يديها ذراعه و هما بيتمشوا ) بيديها اليمين (يعنى بكون على يمينه )
الا العسكرى بتكون على شماله علشان لو شاف ريبة اعلى يضرب تعظيم سلام باليمين قوام :-)))))
انت بقى تبعدى عن طقام الجندية و العسكرية و الشرطية :-)))))))))

دة مش بوست يا طمطم
دة بحث أكثر من راااائع
أحب اقولك ان اخواتى الاتنين الولاد بياكلوا ويكتوبا بالشمال والاتنين أذكياء جدا
سبحان الله

وحشتييييييييييييينى جدا وبقالى فرتة كبيرة ما جيتش هنا
مممموووااااه
بوسة بفعصة
هههههههههه

فاتيماا
ازييك
انتى شولة
طيب هنعمل ايه فى الناس الشولة ؟
ربنا خلقنا مختلفين عن بعضنا ليه محدش بيبص للاختلافات التانية ومركزين شوية مع الايدين
على فكرة لارا كل تعاملاتها بالشمال
ههههههههه
انا مش شايفاها مشكلة او حاجة لازم نلتفت ليها
لانها حاجة مرتبطة بتكوين الانسان الداخلى

ماعلينا كبرى دماغك واتعاملى ب اللى يعجبك واللى يكلمك قوليله نوفا هتيجى تعضك

على جمب كدة

كان نفسى بجد اشترك معاكم فى بؤجة الخير
لكن للاسف يا حبيبتى انا حاليا فى الغردقة سلامات لكل اللى هيحضر

وحضن كبير اوى ليكى وحشانى




مساءك نسكافيه

والله عسل
وسكر ودمك خفيف ربنا يسعد ايامك

السلام عليكم يا فاتيما

انا متابعة قديممممممممممة جدا

و اليوم تجرأت وعملت مدونة عشان ارد عليكي باسم كدة يشرف :)))))))

المهم انا مكنتش عارفة ان الموضوع كبير كدة

انا بكتب وباكل باليمين

بس مثلا لو مثلا هاكل سندوتش مع نسكافيه ولا حاجة سخنة
تلاقيني ماسكة الكباية باليمين والسندوتش بالشمال

وكمان كنت بحس وانا اصغر من كدة انه فعلا تحدي لو اقدر اكتب بالشمال ويطلع خطي حلو .. قال ببقا عبقرية يعني

بصراحة مش بتفرق .. وموضوع الاكل باليمين في الدين سنة :)

ام مجد ومريم ابقي زوريني

wanda
-------

صباح الهناااااااا يا ون ون

**************************************************************************
و ××××××××××××××××××××××××××××××××××××××××××××××××××××××××××××××××××××××××××

يا حبيبتى



سبهللة
------
منحرمشى منك يا سبهللولتى

انتى كمان و الله
وحشتينى ى ى ى ى

انا مقصرة ف السؤال عليكى معلشى
ربنا يطمنا عليكى دايما يا رب

حلوة البوسة ام فعصة دى
انا موافقة عليها و عاوزاها جدااااااا ما دامت منك يا حبيبتى
اصلها هتبقى بقلب
جميل
حنين
زيك



veven
-----

ازيك انتى يا نيفى ى ى

ايوه يا فندم انا مذنبة و اعترف

لارا هتطلع شولة ؟؟
طب هايل
و انا مش مركزة .ززمان كنت بركز وتفرق معايا ..دلوقتى لأ طبعا

و معلشى يا حبيبتى تتعوض فى بؤجات قادمة
احنا هنروح اسكندرية ان شاء الله أخر الشهر و اعملى حسابك بقى لو سمحتى

سلامى لماما الغالية
و بوسيلى لار و سلامنا لباباها
و قبل كل دول بوسيلى روحك يا اجمل صباح و مسا






فضفضه
-----

و انتى شكولاتة و شربات مكرر يا فضافيضوووووو
منحرمشى يا حبيبتى من ذوقك






" يـ ألوناتك ! "
-----------------

اهلا يا الواناتك

الف مبروك ع المدونة
ربنا يجعلها عتبة السعد عليكى

ل الموضوع كبير يا فندم
لما كنت انا صغنونة
انتى عارفة العيال بقى مخهم صغير و اى حاجة بسيطة بتأثر فيهم و اختك فاتيما كانت طفلة حساسة بشكل رخم و بتنقمص من اى منظر ..انا مش عارفة كنت مستحملة نفسى ازاى الصراحة !!!


الحركة اللى بتقولى عليها انا كمان بعملها لما اكون شغالة على الكمبيوتر او بقرى حاجة ..بس بتنفع مع السندوتشات بس ..انما الشوكة و المعلقة ..لايمكن ..بحس انى شخص غريب و مبعرفش اكمل اكل


انتى نورتينى و ردينا الزيارة يا فندم
متقلقيش دحنا نتمنى يعنى تعزمونا
و نجيلكم على نن عيننا

إرسال تعليق