.

.

وضـــع يـــد  

Posted by: فاتيما in






شغلانة سخيفة أجبر عليها
تبقيه لساعات طويلة لوحده
مع الطبيعة و الأفكار

و قط صغير بيلعب معاه
و ياكل من ايده

و ينام على حجره ف أيام البرد
كام شعره بيضا بيظهروا ف راسه
فيحس ان الأيام بتجرى من بين صوابعه

زى حبات الميه تمام
ناس عمالة تبعد لأسباب و ظروف مختلفة
و كأنهم فجأة قاصدين و متعمدين
يتلموا ف توقيت واحد عشان يفارقوه
عقل مزحوم بالتأمل ف الدنيا و الأحوال
و قلب واااااسع .. مليان دفا
فاضى ومحدش سكنه قبل كدا
و فضل قاعد فيه ..للأسف



لحد ف يوم ما قابلها
ف صدفة رتبها القدر


و بدون سبب و منطق
و لا دعوة من صاحب المكان

لقاها داخلة بكل ما تملك
عشان تسكن جوا قلبه
عنوة ..
زقت الباب و دخلت و قعدت
من غير ما تقوله

حتى .. من فضلك و لو سمحت


معترضشى و لا قال ... لأ
بس كمان
مكنش يقدر .. يقول أيوه
آه و لا


ما بين الكلمتين

الف حاجة ... رايحة جاية
ارواح بتتلاقى و بينهم الف فرق

حب و برود و رغبة و عزوف
سكوت كتير و خوف

ونس و آلفة 

و بوح بما يخفى بعاد و قرب
و اشتياق و لهفة
و نسيان محتمل جدا فى أى لحظة
بأن يتبعه صد


هيا بتحبه
واقعة ف غرامه بكل تأكيد
وزى كتاب العشق ما بيقول
بقوانينه و قواعده و صريح نصوصه

هوه ف نظرها كل رجال العالم
مش شايفة غيره
ومبتفكرش فى بكرة .. غير بكل رضا

و قابلة باللى جاى و لو هيكون مؤلم
سعيدة بموقعها المتاخد غصب بين ضلوعه
و بتتمنى لو يكون راضى و سعيد
معاها او حتى مع غيرها

و هى دى حالياً مهمتها اللى هتحس
لما تنتهى من تنفيذها
انها بجد حبيبة مخلصة
فعلا تليق بيه
عرفت تستشعر مدى عظمة و سلطان حبه
و قدرت كمان تحمد ربنا كفاية
على نعمة وجوده ف حياتها




اما ... هوه
فبعيداً عن مجرد حتى التفكير
اذا كان بيحبها
و لا مبيحبهاش
فالمؤكد انه عاوزاها جنبه و متبعدش
و انها بقت جزء من حياته

صحيح قد يتلاشى فى أى وقت
لكنه مبيفكرش .. لأن
بكرة مش بإيده
و ميقدرش يعمله أى حاجة
و مفيش قصاده غير انه يتمسك بالنهاردة
لأنه اللحظة الوحيدة القادرة
انها تجمعهم سوا
و من غير فراق



كل يوم بياخد قرار بالبعد
و يقول خلاص هيبلغها .. 

انه ناوى يقفل قلبه
و ميسكنش فيه أى حد

و يا ريت تعمل حسابها
انها تخلى المكان
و دا إنذار واضح بالطرد

يعقد النية
وبمنتهى الحزم
لثوانى و
يرجع قلبه الطيب
يرق ... و يوجعه


و يشفق على عقد اللولى

اللى هينفرط و تتبعتر حباته
فى كل ارجاء الدنيا
و يضطر يلملم فيهم
لأن محدش غيره هيقدر
و لأنه حاسس انه مسئول و لو انسانياً
عن القلب اللى هيتكسر 

و يبقى ميت الف فتفوتة

يتراجع و يأجل قراره و يسكت
ويقول بلاش

ويخلي إنذار الطرد .. لبكرة أو لبعده
و يسيبها قاعدة و مسيرها تزهق
وتخرج لوحدها ف يوم

زى اللى خرجوا قبلها




اليوم بيجر يوم تانى بعده
و على شط البحر ماشى
ف مكان بعيد
مزيكا شغالة و السماعات ف ودنه
صديقه القط بيتنطط و يجرى بين رجليه
السما واسعة بتحضن افكاره
البحر قصاده ملوش نهاية زى مخاوفه
ذكريات كتير بتتزاحم ف عقله
احلام مستحيلة بتداعب خياله


حبيبة ساكن
ة جوا قلبه ... بوضع اليد
و قرار طرد ... بيدور لتنفيذه ع اللحظة المناسبة




صوت رنة يعلو تدريجياً
يبص يلاقى
حروف اسمها
بتنور ع شاشة موبايله



يفتح الخط
و ينوى يقلبها جد
عشان يبلغها بقرار الطرد
فيلاقى نفسه بيبتسم
ويقول


ألو

ازيك

وحشتينى

--------------------------------------


كقطة طيبة
أجلس قرب النار

أسمع ما تقصه
الجدة للصغار


عن
فارس

اوقع فى غرامه
الاميرة

وجاءها فى ليلة
واختفت الأميرة



من يومها تعودت

أن تطهو الطعام

تعودت ان تسكن
المدائن الحقيرة

وتجمع الأحطاب
فى الشتاء


تخلت الاميرة الصغيرة

عن كل كبرياء

لفارس علمها
الحياة كأمراءة



وألف قصة

ويرقد الصغار
لكننى أعود من جديد
أحلم بالمدائن البعيدة
بالدار ..
بالاحطاب ..
بالاطفال ..

بأمراءة تسهر فى إنتظار
فارسها الوحيدأحلام مستغانمى

-------------------------
دوس هنا

----------------------------------

This entry was posted on الأربعاء, مايو 19, 2010 and is filed under . You can leave a response and follow any responses to this entry through the .

30 كــــلام بيطــبطـــب عـــلى قــــلبى و روحــــى

كل مرة أقول اني مليش في بوستات الحب والعاطفة ..

بس المرة دي اقول ان المشاعر الموجوده في البوست ده طيبه ..

وهوا بحبها جدا لأنه لو مكنش بشخصيته السابقة كان جابله قرار ازاله من زمان

وهيا متمسكة بيه .. بشده .. لدرجة ان وقفته نهائي عن مقوامة أي عاطفة يشعر بيها نحوها ..

أكثر فقرة عجبتني

"
ما بين الكلمتين
الف حاجة ... رايحة جاية
ارواح بتتلاقى و بينهم الف فرق
حب و برود و رغبة و عزوف
سكوت كتير و خوف
ونس و آلفة و بوح بما يخفى
بعاد و قرب و اشتياق و لهفة
و نسيان محتمل فى أى لحظة أن يتبعه صد
"

لأنها كلها مشاعر انسانية راقيه ..

ومما زاد الطين بالنسبة لي بله

الشعر اللي في نهاية البوست ..

جمع الله بين المحبين بالزواج والرضي التام .. وتسلمي ..

وان شاء الله يتجوزا وهيا تفضل تحبه وهوا ميفكرش كتير .. لانه خلاص تم احتلاله .

الله الله الله يا فاتيما

تسلم إيدك .. أنتِ خلتيني سرحت لبعيــــد قوي بالقصة دي .

بس ف الآخر ما ملكتش غير إني ابتسم وأدعي لك بظهر الغيب بكل خير

:))

ممكن أقول لك كل سنة وأنت طيبة دلوقت ؟ .. "وش مكسوف"

كل سنة وأنتِ طيبة وبألف خير وصحة وسعادة ورضا وراحة بال وفرحة وسعادة اللهم آمين

خالص تحياتي وعميق تقديري واحترامي
:))
ســــلام

صباح الرومانسية يا عزيزتي
الحب هو واحد لكنه قد يكون مفتاحا للجنة وقد يكون مفتاحا للنار به قد نعيش السعادة القصوى مع من نحب وبه ايضا قد نعيش اقسى لحظات التعاسة ونحس اننا موتى رغم اننا نتنفس به به قد نطير الى سابع سماء وبه ايضا قد يخسف بنا الى سابع أرض كل ونصيبه وكما يقول المثل اللي في نصيبك حيصيبك
تحياتي وودي

وحشتينى ياطمطم جداااااا
عجبتنى اوى القصة ومعتقدتش هيكون فى قرر بالطرد ابدا

بحبك ياطمطم

مش عارفة يا فاتيما

ممكن يكون تعليقي مختلف

حاسة انه حاببها .. لانه اتعود تكون جمبه

بس مش عارفة قلبه حاببها زي عقله ولا لاء؟

واذا كان فعلا حاببها القلب

ليه من وقت للتاني بتراوده فكرة انه يطردها من جواه؟!!!

انا حابة المشاعر الي جوه البوست جدااااا
بس حاسة ان البطل في حالة لخبطة

فرحت جدا بالنهاية
وخوفت أكتر
إن بعد وحشتيني .. تراوده فكرة الطرد من تاني
خايفة انها تكون لحظت سكينة وتروح لحالها

وهتفضل هي في حياته لحظة

وهيفضل هو في حياتها .. كل اللحظات


بس ياااارب يعيشوا كل لحظاتهم مع بعض

من غير فكرة الطرد دي ابدا

اصلها بتكسر قلوب بلا وعي



البوست جميل يا فاتيما
تسلم ايدك وفكرك عليه

ومقدرش امشي قبل ما اقول

تحياااااااتي لقلبـــــــــك
:D

سارة

كأنك كتبتى تفاصيل حكايتى معاه
كل سطر قريته اثار جوايا دهشه من قدرتك على انك توصلى لاحساس انا عايشاه بالشكل ده

تفتكرى هو عايز يبعد عنها؟
بيحبها بجد؟ ولا بيحب حبها له؟؟!!
ممكن يكون بيمثل انه بيحبها علشان مش يجرحها؟
طب هو سهل ان اى حد يمثل الحب؟
هى اكيد مش محتاجه من الدنيا غير وجوده جنبها
تفتكرى هو مقدر ده؟
اكيد انها محتاجه شويه امان مش اكتر
هى بتحبه بجنون وهو عارف انها مجنونه بيه
يمكن علشان كده مش عارف يقول لأ
ويمكن لانه شايف ان حبها كتير عليه فخايف يبعدها ويضيع حب كبير زى ده من ايده
هو مش عارف يحبها؟؟ يمكن علشان كده مش قادر يقول ايوه بس عاجباه الحاله اللى عايشها معاها
احتمالات كتير واسئله اكتر مش هيقدر يجاوب عنها غير الايااااااااام


فصبرا جميلا

الله يا فطوم

روعه بجد
اكتر فقرة عجبتنى اخرها
لما بيحاول يطردها ويلاقى نفسه بيبتسم

وحشتينى

حستها اوى

تسلم ايديكى يا حبيبتى

ياطمطم
لا بايدينا حبينا
لا بايدينا انكوينا
يبقى ازاى يبقى ساهل علينا الفراق
نفكر واحنا بعيد بعقلنا
لكن ساعة اللقاء لا ينتصر سوى نبض القلب
كان غيره اشطر

كتييييييييييييييييييييير رقيقة !!

فوق ما تتصوري يا فاتيما :)

انا استمتعت جدا وانا بأقراها :)

وخفت لما رن الموبايل :)

بس نهايتها حلوة

ربنا يحلي ايامك يا فاتيما :)

وانا بحب احلام مستغانمي فسلم ايديكي :)

جميلة النهاية

كده يبقى قرار طردها من قلبة اتلغى خلاص

ومن غير ما يحس

ومن غير ما هي تعمل حاجة

وهي سايبة ايديها

:-))

وده لأنه بيحبها جدا وقرار الطرد ده كان من ورا قلبة

قصة رقيقة بنهاية سعيدة

جميييييييييييييييييييله
كلها جميله بس ليه ؟
كل الحب دا من الطرفين وماعرفتش سبب
محولته لطردها
ليه انا زعلت جدا بس فرحت فى الاخر علشان بحب الهابى اند هههههههههه
مقدرش يقولها لاء طيب ليه

عارفه انا لو مكانها وهى بتحبه كده وهو بيحبها كده اتجوزو حتى لو يوم واحد ويموت بعدهااو انا اموت بعده مش مهم
بس هايبقى اسعد يوم فى تاريخ البشريه

تسلمى يا تيما ويسلم كلامك الحساس الجميل

ومتشكرين على الاعلان الجامد اللى خلى الحبايب كلها تيجى عندى والله لو كنت عملت اعلان عند عمرو فى القاهره اليوم ماكانش كل الحبايب دى كلها جت
فاتيما اجدع ناس

انا ماليش في حوارات الحب دي

هاتخليني ارجعلها ليه بئة :D

تحفة بجد واحساس رائع بجد

تسلمي

حلوة اوى يا فاتيما
بجد حلوة وتسلسل الاحداث فيها جميل ويشدك وياخدك لحد اخرها
ع فكرة انا برضو عندى نفس الحركة دى ممكن ابقى عاوزة قاول حاجة وانا زعلانة واول ما اتكلم بقول الو وحشتنى بقا ههههههههه
ده اكبر دليل ان العقل مش مسيطر ع الحالة الى جواه وانها حالة عشقية بحت
وده جميل وهى متمسكة بيه يبقى مالوش لزمة الرخامة فى الحب
الانتظار والقلق بيقللوا الحب
انا بقول للبطل
استرجل واشرب بيريل
ههههههههههه
وحشتينى ع فكرة

ومش هايقدر يقول لها بره
لانهامش ساكنه قلبه وبس
لأ روحه و عقله قبل قلبه
كنت متوقعة النهاية على فكرة من أول ما بدأت القراءة
وكنت عارفة أنه مش هايقدر ينفذ القرار
ربنا يسعدهم

مادام هماالاتنين بيحبو بعض ومالهمش غير يعض وهما الاتنين عارفين دة يبقي ليه بقي البعد والحاجات دي انا رايي تقرب منه وتعيش معاه وتنهي اي تردد من جواها

البوست حلو اوى
وفيه شاعر مختلفه بس عجبتنى جدا
ادامك الاتنين بيحبوا بعض ليه الهروب
حلوه اوى كمان الفقره بتاعه التيلفون
اسلوبك رائع
دومتى متألقه

الله عليكي والله جميلة .. يابختهم ببعض وربنا يبعد كل القوانيين العقارية عنهم لا طرد ولا ازالة ولا حتى تنكيس.. بس هو سؤال انن كدة ع الماشي ..القصة دي كان فيها بدل القطة كلب؟ لان مفيش قطة بتخرج كده على البحر وتجري زي الكلب كدة اللي بيمشي على طول مع صاحبه...القطة مرتبطة اكتر بالمكان مش الشخص اما الكلب فمع صاحبه مهما راح... شكلك بتحبي القطط وشيلتي الكلب وحطيتيه قطة مكانه ... عشان يامى بتخافى م الكلاب يا أمى مش بتحبيهم ياامى معتقده عنهم حاجات زي معظم الناس مش صح.. وبجد مفيش اجدع م الكلاب وخصوصا بين الاحباب

:)

جميله وحساسه اوي

بس هو كده حب حبها موش حبها هي للأسف

تحياتي

قصه بجد
حلوة قوي
رقيقه قوي
ناعمه وحساسه قوي
مستني وحسيتها قوي قوي قوي
مع اني معشتش الحاله دي قبل كده بس غصب عني لقيت نفسي باحط نفسي مكان بطله القصه وباعيش نفس أحاسيسها ...
الحب لو مش متبادل بين الطرفين بنفس القدر أو لو حد منهم مخبي حقيقه مشاعرة عن التاني بيبقي صعب قوي ...

الله عليكي بجد

قصة في منتهى الروعة

طول ما انا بتابع بعينيا القصة مرعوبة وخايفة احسن يجي يطردها من قلبه ويقفله بعدها

بس الحمدلله انتي محبتيش تزعلينا وتزعليها


وطلع بيحبها وبيموت فيها كمان


تسلم ايدك

هوا انا شفاف أوي كدا؟

ولا صدفه؟

ليه مُعظم ضيوفك شايفين ان نهايه القصه سعيده مع انها لسه مش انتهت؟؟؟؟!!!!
نهايه كلامك مجرد هدنه
الله اعلم خاتمتها ايه؟

الله الله الله بجد

خلتينى سرحت لبعيد اوى

تسلم ايدك

ياااااااااااااالهوي يا فاتيما انتي جبتي اكترررررر قصيدة انا بحبها لاحملام مستغمني بجد الست دي بعشقها وهي مثلي الاعلي


اما بالنسبه للقصة دي انتي اتكلمتي عني وعن مشكلتي بوضووووح تام وشديد بس الفرق انه من فتره اداني انظار الطرد


اما ... هوه
فبعيداً عن مجرد حتى التفكير
اذا كان بيحبها و لا مبيحبهاش
فالمؤكد انه عاوزاها جنبه و متبعدش
و انها بقت جزء من حياته
صحيح قد يتلاشى فى أى وقت
لكنه مبيفكرش .. لأن بكرة مش بإيده
و ميقدرش يعمله أى حاجة
و مفيش قصاده غير انه يتمسك بالنهاردة
لأنه اللحظة الوحيدة القادرة
انها تجمعهم سوا و من غير فراق

فكرتيني بالذي مضي

السلام عليكم ورحمة الله وبركاته

اولاً كل سنة وانتي بالف الف الف خير وسعادة وحب يا احلى ام لاحلى يوسف
زهرة عملت لحضرتك عندنا بوست لعيد ميلادك وانا عشان مكنتش موجودة دخلت كتبت تعليق لحضرتك هنا يارب دايماَ حياتك تبقى للاحسن والافضل ويملاها حب وسعادة وفرح


نيجي للبوست الجميل ده انا بقالي 3 ايام بدخل اقرا واطلع ادخل اقرا واطلع
مش عارفة اعلق اقول ايه بجد وربنا تحفففففففة مش لاقية كلام يوفي احساسك حقه

اقولك على شئ الشخص ده اللي قلبه تم وضع اليد عليه مستحلي الحكاية وانا مش لاقية مبرر يخليه يسبها او ينزرها بالطرد لانه قضى حياته كلها وقلبه دافي لكنه خاوي وبدأ يحس بتسلل شئ ناعم داخله لحد ما صدق ان فيه شئ ملى عليه حياته وقدر ينتزعه من صمته ووحدته ..حلوة الابيات بتاعت الشاعرة احلام انا دخلت ع اللينك وهقرأ ليا ربنا يعزك يارب


لـــولا

عايزه اقولك اني قريت البوست ودمعت ودموعي نزلت في اخر مقطع كتبتيه


يفتح الخط
و ينوى يقلبها جد
عشان يبلغها بقرار الطرد
فيلاقى نفسه بيبتسم
ويقول


ألو

ازيك

وحشتينى





بجد مش عارفه اوصفلك احساسي ازاي وانا بقرا المقطع ده حسيتو بجد بكل مشاعري كأني انا اللي كنت بتكلم وبيترد عليا بالكلام ده
حسيت ان القصه كلها عليا انا وبتحكي حكاياتي وواقعي الاليم

انا بحسد عيوني انها قرت كلامك الجميل وبحسد قلبي انه حس بكل الكلام والمشاعر الجميله دي كلها

تسلم اديكى يا قمر القصه جميله واجمل من رائعه ربنا يوفقك

رائعه ياتوما
فكرتني بأغنية انغام كل مانقرب لبعض
وبالذات المقطع دا
ولا اقولك مش مهم الجي ايه احنا نتعب روحنا من دلوقتي ليه لو حتى فرقنا الوداع لو حتى ضعنا في الهوى مش برضو ياحبيبي الضياع احساس هيجمعنا سوا

منحرمشى منكم
و لا من تعليقاتكم الطيبة

إرسال تعليق