.

.

إنـتا وحــشــتـنـى قوى  

Posted by: فاتيما in






فاكر أونكل شكسبير
يا يوسف ؟
الراجل الأنجليزى اللطيف دا
اللى بيكتب قصص و مسرحيات

بتاع أكون أو لا اكون
اللى كنت حكيتلك عنه يا واااد
اوعى تكون نسيت
هزعل منك قوى .. بجد



أصله دلوقتى حالا
جه ف بالى
لما فكرت فيك


عشان فيه
سؤال شكسبيرى النزعة

بيطرح نفسه بشدة عليا



اكتب أو ... لا اكتب ؟؟
تلك
هى المشكلة


يعنى أكتب و أقول كلام ف قلبى
واجعنى و دابحنى

و لا مفيش داعى بقى اوجع حد معايا
و اولهم انتا
و احسن مقولشى ؟



يعنى اقول مثلاً انى هتجنن
لأنى مش عارفة
اكون زى أى ام عادية ف الكون

وانى حاسة انى خليتك يتيم يا حبيبى
بينما أمك

على قيد الحياة


و انى ساعات اوشك
أن أموت كمدا



لأنى معرفش
انتا خلصت امتحاناتك و لا لسه
و انهى فيها اللى طلع سهل
و إيه اللى معرفتش تحله
و نتيجتك امتى هتظهر


و شكلك كل يوم
و انتا رايح المدرسة

و شايل الشنطة.. بيبقى عامل ازاى؟


و لما بتروّح بتكون ضيعت انهى قلم
الرصاص و لا الجاف
و يا ترى خلصت سندوتشاتك كلها ؟؟



و اتغديت ايه النهاردة
و بتتعشى الساعة كام .. كل ليلة



و بتلعب و مبسوط
و لا مبتخدش مصروف كفاية



مقاس الكوتشى بتاعك
بقى رقمه كام دلوقتى ؟


و خطك اتحسن ف الكتابة
و لا نكش فراخ زى ماهوه ؟


بتتفرج على أنهى قناة كارتون
و بتحبها اكتر م التانية؟


بتقرى مجلات و كتب زى الاول
و لا مبقتش تهتم بالقراية خالص



لسه أهلاوى و لا غيرت الفريق
اللى بتشجعه ؟



و بطلت تخاف م الحقن
و لا بتعمل فضايح ف كل مرة


بتغسل سنانك كل ليلة
و لا بطلت العادة دى


و لسه بترسم و تلون
و لا لقيت هوايات تانية تعملها


أعز اصحابك اسمه إيه
و الولد اللى قاعد جنبك ف الفصل كمان


لسه فاكرنى
يعنى فاكر شكلى و ملامحى
و صوتى و ريحة بارفاناتى
و الوان ايشارباتى
و لا بقوا حاجات منسية
و بعيدة عن ذاكرتك



و الاهم

فاكر حضنى ؟

فاكر حضنى يا حبيبى
و لا نسيته


لسه بيوحشك
كلامنا و ضحكنا
و هزارنا و لعبنا سوا
و لا خلاص


و لسه بتحبنى زى الاول
و لا اكتشفت انى مستاهلش حبك
و قررت تنسانى
يعنى حتى ... عشان تعرف تعيش
و تتحمل الدنيا الجديدة
اللى سيبتك تروحلها
و كأنى زى اللى رماك ف بحر
و قالك عوم
لوحدك
و أتصرف محدش هيكون جنبك يلحقك
و اولهم أنا


أنا
اللى المفروض
مليش حق اسأل
أى سؤال ف دول

لأنك حقى
و محدش أقربلك ... منى


و للأسف و لسخرية الأقدار
إن تقريباً محدش بعيد عنك .. قدى



الأسئلة دى كلها
مش قصدى أقولها عشان أوجعك
و لا أدوشك بيها

و لا كمان عشان اطلب منك تجاوبها
و لا الخبطك
أو حتى ألوم الظروف
او حتى اضايقنى
أو منى ... أزعلك
أنا ببساطة شديدة
عاوزة بس أقولك



يا حبيب ماما


إنتا وحشتنى قوى


على نار
عم يخلص قلبى بغيابك
على نار
مشتاق لعطرك لثيابك



This entry was posted on الأحد, مايو 23, 2010 and is filed under . You can leave a response and follow any responses to this entry through the .

56 كــــلام بيطــبطـــب عـــلى قــــلبى و روحــــى

ربنا يجمعكم على خير ماما فاتيما و تشوفيه مالى الدنيا سعادة و هنا على كل اللى حواليه و حضرتك تكونى أولهم إن شاء الله ،،، الأمل و الصبر متلازمين فى حياتنا كلها ،، كل آت قريب ،، ادعى له بس و ادعى لنا معاه ،،،

وجعتى قلبي يا فاتيما

عارفه ان كل دا جواكى والله واكتر ومع ذلك لما شفت الكلام دا مكتوب وكأنى بسمعه منك وبصوتك وجعنى اوى اوى

انتى يافاتيما احسن من اى ام فينا لانك فضلتى توجعى قلبك وروحك على امل ان هو يكون مرتاح وبعيد عن المشاكل

اعتقد اللى عنده ام زيك عمره ما ينسى اى لحظة معاها وعارفه ان ان اء الله يوسف فاكر كل همسه من همساتك ومستمر يعمل اى حاجة علمتيها ليه

ربنا عالم بيكى يا فاتيما وبكرا افكرك ان شاء الله ويوسف جاى ليكى وبيقولك انتى وحشتينى اكتر

ربنا يخليه لكى يارب ويخليكى ليه

ويرده لكى يارب قريب

اقولك على حاجة

مش قادره اكتب

عاوزه بس احضنك يا فاتيما

يا حبيبتى يا تيما بجد ربنا يفرح قلبك ويارب يرجعه ليكى يارب ويحس إنك إنتى بجد اللى ليه مش عارفة أقول ايه بس بجد حقيقى بجد نفسى يكون بايدى ولو ذرة فرح أهديهالك ومش هبخل بيها عليكى يارب يستجيب لدعايا ويسعد قلبك ويرتاح بالك يارب

دمتى بكل الخير والحب والسعادة والقلب الطيب

ربنا يجمعك بيه على خير ان شاء الله ويقويك كمان وكمان وان شاء الله لما يتلم شملوكوا ويقرا كل اللى كتبتيه عنه ويعرف ازاى الناس حبوه وحبوكى من غير ما يشوفوكوا هايعرف ويفهم ويقدر كل اللى عملتيه واتحملتيه عشانه ربنا معاكى يارب

يا حبيبتي يا فاتيما..أنا حاسة بيكي قوي..و كتيييير بسأل نفسي انتي ازاي قادرة تستحملي كل ده و سنين بتعدي عليكي و انتي بعيد عن يوسف.أنا لما ولادي بيبعدو عني شهر ببقى خلاص حموت..بحس اني مش قادرة أتنفس و لا أعيش..عارفة ساعتها بعمل ايه؟بجري علي بوستاتك عن يوسف و أقراها واحد واحد و بجد بحس انك بتخديني في حضنك و تطبطبي علي قلبي..بس انتي يا فاتيما مين بيطبطب على قلبك و يزيح عنه الحمل التقيييييييييييل ده؟أكيد اللي أكبر من الكل و أرحم من الكل قادر يريح قلبك و يملاه صبر..سبحان الله!!بحبك قوي قوي .
ملحوظة:انتم حتنوروا اسكندرية و ان شاء الله أنا جاية عشان انتي وحشاني قوي قوي و كمان عشان نفسي أشوف عمر.

ربنا يرجعه لحضنك من تانى قريب جداااااا ياااااااااااااارب

والله العظيم يا تيما ربنا هيعوضك

عن كل الصبر ده خييييييييير

ياربى ده انتى جبل يا حبيبتى

الله يقويكى الله يقويكى الله يقويكى

ويصبرك ع قد حبى ليكى يارب اللهم امين

ويقرب البعيد ويجمع الشمل

يارب يارب يارب

يا جامع الناس ليوم

لا ريب فيه اجمع تيما حبيبتى

بابنها يوسف

يا قادر يا كريم

يارب اللهم اميييييييييين

فاتيمااااا ...

بجد يابخت يوسف بالحب ده ...

ربنا يطمن قلبك وبالك ياااااااارب ...

أنا بجد مش عارفه أكتب واقول إيه ..

ربنا يخليكي لكل إللي بيحبوكي وبتحبيهم

... ;) ,,, ;) ...

ياه يافاتيما كل ده جواكى
بجد ربنا يكون فى عونك
وتلاقيه فى عضنك تانى
يارب يرجع لك ويكبر ادامك وتشوفيه عريس كمان
ربنا يريح قلبك بجد قلبى وجعنى اوى
اتكلمى احنا كلنا جنبك وحاسين بيكى اوى
ماتلوميش نفسك اكيد انتى مش معقول عنك كل الامومه دى
وتبقى رميتيه بسهوله
اى كلام مش هايقدم ولا يأخر ولا هايبرد قلبك
انا عارفه بس ياريتنى اختك وجنبك عشان نفسى احضنك اوى واقولك اطمنى
ربنا يريح قلبك ويطمنك على يوسف يارب

سلامو عليكو..
كلامك حنين اوى وكله امومة الله يخلهولك.
برجاء قبولى صديقة للمدونة

ربنا كبير يا حبيبتى
ربنا كبير وقادر يردهولك ويفرح قلبك بيه
مين عارف يمكن يجيلك فى اكتر وقت يكون واحشك فيه
اكتر وقت تكونى محتاجاه
اكتر وقت تكونى قريبة فيه من ربنا
اكتر وقت تكونى بتدعى فيه
مين عارف
بس الاكيد ان شاء الله انه راجع لحضنك ومعاه لهفة السنين اللى تنسيكى حتى انه غاب عنك .. وتحسسك ان عمره ما فارق حضنك
يارب اليوم ده يكون قريب

يارب
يارب ياااااااارب

يا فتيما اينعم انتى بتوجعي قلبي

بس يا حبيتى دايما اكتبي واتكلمنى وفضفضي احنا ما لناش الا بعضينا يا اوختشي

بجد يا فاتيما ان شاء الله ربنا هايعوض صبرك خير

وهاتشوفيه وتاخديه فى حضنك وغصب عن الكل هايفضل ابنك

وما تخافيش هايفضل فاكرك حتى لو نسوه هاتفضلي جواه

اصبري يا فطوم يا جميل ان الله مع الصابرين


وحشاني اووووووي يا فطوم ربنا يبرد قلبك يا جميل ويرضيكى

انتي ماما حلوة قوي
اصبري صبرا جميلا واحتسبي صبرك دا درجات عند ربنا واكيد هتتجازي خير وربنا يقرب البعيد ويرجعه تاني لحضنك

تصدقى بالله
لسه النهارده بقول لنفسى ياترى فاتيما عاملةايه فى موسم الامتحانات
زمانها موجوعة عليه
ونفسها تعيش كل تفاصيل يوسف
ربنا كبير
مش قادرة اقول اكتر من كده

يارب يرجعلك يوسف بألف سلامه وتشوفيه وتعيشي معاه وتشبعي منه وتعرفي كل اخباره وميفارقش حضنك ابدا

يارب طمنها عليه ورجعهولها بالسلامه وخليه دايما فاكرها وحاببها

ربنا يطمن قلبك عليه بسرعه يارب


مـنـى

وجعني قوي النوت دة
وكنت عرضت عليك المساعدة بطريقة ما قبل كدة وما زلت عند عرضي دة يا طمطم لو تحبي

ربنا يردة لحضنك ااقرب ما تتصوري إن شاء الله

ليه بس الرساله دي

على العموم انا متأكد ان يوسف

زي ماهو لان لو كان في تغيير هتحسي

مش كده

انا مش لقيه كلمة اقولها بجد
بس ربنا يصبرك

we all miss something and you Fatum miss your heart
:-*********************************
i wish for you :-) if it will rain today as expected for you to hear his voice and ask him all this questions and tell us the answer

:-XXXXXXXXXXXXXXXXXXXXXXXXXXXXXXXXX

why there is now mornings??

دموع ف عيونى
دعوات من جوه جوه قلبى
وأمل ف بكرة
اللى بيبان بعيد قوى
بس ان شاء الله قريب

ربنا يكون ف عونك
ويردهولك خير
ويحفظهولك بكل خير
ويكونلك أحسن إبن
زى مانتى بجد


أعظم أم

صباح الخير يا طمطم
اكتب أو لا أكتب ؟؟؟

سؤال فعلا مهم بس تستكتي ليه ؟؟ وأنتي ممكن تتكلمي

اتكلمي وطلعي اللي جواكي ولا هو لزوم المدونة يعني ؟؟
ولو مكوناش احنا هاننقرا مين هايقرا ؟؟

ربنا يردهولك وتقر عينيك بيه ويحفظهولك في غيبتك عنه

آآآآمين يارب

فاتيما

حلو اوى الحوار اللى من طرف واحد ومنتظره الاجابه ....
يمكن فى صدى بداخلك بيجاوب لكن انتى نفسك مش تسمعى الصدى نفسك تسمعى صوت يوسف وهو بيرد ويقول اه فاكر كذا وكذا بس نسيت كذا اطمنى مافيش حاجه نساها .....
فى انتظار حوار ثنائى الاطراف يعنى هتسمعى الاجابات عن قريب ان شاء الله وهتقولى ردوده عليكى
انا منتظره واطمنى مش هانتظر كتير لان املى فى رحمة ربنا كبييييييييييير اوى اوى .....
كفايه رغى

" ان الله بالغ امره قد جعل الله لكل شئ سببا "

زهــــراء

ايوه اكتبى وافضلى اكتبى وعلى طول اكتبى

لانك لازم هايجى اليوم ان شاء الله اللى هايتردلك يوسف وساعتها لازم يعرف انك تعبتى اكتر من اى ام عاديه واتعذبتى اكتر من اى ام عاديه واتحرمتى اكتر من اى ام عاديه

اكبى وخليه يعرف اللى عمل كده فيكى وفيه اد ايه ظالم ماعندهوش رحمه واد حاقد وبيتلذذ بعذاب الناس اللى جمعهم بيه فى يوم من الايام كلمه طيبه
اكتبى لانه توثيق ياتيما

وبعد الشر عليكى من اى مكروه واى يتم ليه ماتقوليش كده هو امر الله وقضائه
وقضى الامر الذى كنتم فيه تستفتيان
وربنا هو مغير الاقدار وانا متاكده ان هايجى اليوم اللى القعده فيه تتعدل

اللهم رد لها ضالتها كما رددتهاليعقوب
اللهم رد لها ضالتها كما رددتهاليعقوب
اللهم رد لها ضالتها كما رددتهاليعقوب

بحبك ياتيما ربنا يريح قلبك

اسمحى لى اسألك ، لماذا لا تذهبى لرؤيته؟

ااااه يا فاتيما
قلبى وجعنى اوى والله وانا بقرا البوست ده يمكن لانى دلوقتى حاسة اكتر من اى وقت يعنى ايه ابن ويعنى ايه ام؟؟
فاتيما حبيبتى فضفضى واتكلمى ومتخبيش حاجة عاوزة قتوليها ليوسف هيرجع ان شء الله وهيلاقيكى كنت مستنياه ع نار يا حبيبتى
ربنا يديكى القوة من عنده انك تتحملى بعده ويرجعهولك بالسلامة
بحبك اوى اوى اوى والله ونفسى اديكى حضن ههههههه
بس ببطنى دى مش هينفع :)

بحب اليوسفيات
علشان فيها مش بتجاملي ولا بتتجملي
فيها بتصبي نفسك على مفاتيح الكمبيوتر
وده حقك
بحس ان ده حقك كل لحظة وكل وقت
وانا بحب اليوسفيات
وبحب اطبطب واقول اللي بقوله عن اقتناع وليس عن حب او شفقة
ها يكون فاكرك
ناسي حاجات كتير لكن فاكرك
يمكن يسقط عليكي بعض اللوم او بعض الذنب علشان هو بني ادم وعاوز حد يلومه
لكن بيحبك
محدش بيكره أمه ولو كانت شبه ميدوزا
فما بالك بيكي بحنيتك بطيبتك ببسمتك بضمتك ببابا غنوجك

بيحبك يا فافي
وبيموت فيكي
وفاكر شكلك وصوتك وحضنك
ناسي تفاصيل مش مؤثرة لأن ممكن تتعاد عشر مرات ومائة مرة كمان
لكن فاكرك

شفت غيرك قصص حياتها كانت عجب
أعجب من أعجب فيلم سينيما
وشفت بعيوني حقها في حضنها
وشفت جبر الخاطر لها
وشفت آيات ربنا في اللي ظلمها
أنا شفت بعيوني
يعني معقول مبقاش عارفة انه راجع وهو عالي وانت عالية وكل شيء ولا كأنه عدى؟

ربنا يرده
آمين

بنت الخالي الغاليه

يوسف ابن بنت خالي الغاليه

يا واد يا يوسف انك باذن الله اول ما هترجع
هتلاقي مكتوبالك حاجات تخليك تحس ان امك
ولا صفيه زغلول في امومتها يا بختك يا معلم هتقرا كلام الغاليه وتحسه وتعيشه كمان

مش بحسدك يا واد انا خالك وانت حبيبي
يوسف الا صحيح ومتقوليش انا مبكلمش وارد علي امك وبكلمك انت ليه ليه
اقولك يا سيدي
عشان عشمي في ربنا كبير انك
هتقرا الكلام ده قريب جدا باذن الله

بس بقولك ايه اوعي تيجي تاخدها مننا وتخلينا منشوفهاش وديني وما اعبد
ادبسك في اتينن كشري من ابو طارق من ابو عشره جنيه
تقولي بقي معييش فلوس تقولي مبتدينيش مصروف مليش فيه
بطوط والله العظيم ربنا حكم عدل
والله وبكل ايمان بلله يوسف راجع يوسف خلاص لو رشحه نفسه هتلاقي جروبات ع الفيس بوك
تؤيد وتبايع السيد يوسف
ليكون ملكا متوجا علي قلوب الحالمين بالتخلص من الاستبداد
شوفت ياد يا يوسف بقيت ولا جيفارا اهو
ماشيه معاك يا معلم
فاتيما والله لو ليرجع ونفرح بيه كلنا ربنا يرده بالف خير ليكي ويطمن قلبك عليه

معتقدتش انه هيقدر ينسى حتى ولو فرض عليه دا ع الاقل هيفضل فى قلبه نفس المشاعر اللى بتحسيها اتجاهه ع فكرة كلامك مش موجع بقد ما هو فعلا لازم تبوحى على فترارت بدا لانه الموجع السكوت واكتر حاجة بتريح انك تتكلمى حتى مع صورة او خيال على الاقل هتحسى انه بيشاركك ام الاستماع او الشعور

ربنا يرزقك فيه كل الخير ويجمعك بيه ان شاءالله عما قريب بحق سر كلمة التوحيد وجمعها وبنور الاسم الذى حفظ به القرآن من التحريف بحق من جمع الارواح باجسادها بعد الفناء وبسر ما حفظت به الكعبة وقت الهلاك يا من فردت ونشرت سرك فى كل المخلوقات بحق ما جمعت به لسليمان من الملك اجمع امتك بولديها عما قريب انك على كل شئ قدير يا فعال لما تريد بسر نبيك الكريم اجعل من رحمتك سر الاجابة سريع

اااه بجد :((
وجعتيلي قلبي اوووووووي يا فاتيما وبكيتي عيوني
الله يكون في عووونك ويقويكي يارب ويصبرك
ربنا يرجعهولك ويرده ليكي يااااااااارب
اصبري واتركي امرك لله
ربنا يرده ليكي ياااااااارب ويريح قلبك يارب

:'(


بجد وحشاني اووي اووي اووي و مش قدره اقولك لما كنت بدخل عندي كل فين وفين و اقراء كونتاتك كنت بنبسط ازاي

انشاء الله اول ما اخلاص لازم اشوفك



و بما ان مفيش حاجه اعملهالك... فانا هفضل ادعيلك كل يوم ان يوسف يرجعلك انشاء الله

بجد بحبك اوووي ♥♥♥♥♥♥♥♥♥

طبعا انتى عارفه ان البوست ده بالذات بالنسبه لى زى الى لقى كنز
من فتره نفسى فى بوست فى اليوسيفيات

مش تقلقى يابطه يوسف اكيد فاكرك وبيبعت لك بوسه مع الملائكه كل يوم

هو طفل ومش هيقدر يفهم تضحيتك علشانه دلوقتى
لكن لما يكبر ويقرا مدونتك ويشوف كلامك له ويفهم ايه سبب بعادك عنه هيقدر تضحيتك علشانه قوى ويحبك اضعاف اضعاف
يوسف طفل محظوظ رغم الظروف
محظوظ لانك امه
محظوظ لان بدايات تكوين شخصيته كانت على ايدك
محظوظ لانه عاش جواكى 9 شهور
وفى حضنك 7 سنين تقريبا
وفى قلبك لنهايه العمر
ربنا يخليكم لبعض
وصبرك على فراقه اكيد له جزاء عند ربنا
ربك اسمه العدل يافاطمه


بحبك وبحب يوسف وكلامك عن يوسف ياام يوسف

ربنا يرجعه بالسلامة ان شاء الله
وتفرحي بيه

ربنا يسعد قلبك ويسعدك بيه ...هو طبعا بيحبك لان واضح انك ام جميله وقلبك مليان حنان وطيبه ..وهو مش عنده ام غيرك علشان يحبها مهما بعدت بينكم الايام والظروف هيفضل الحب ده موجود .وبدعى ربنا انه يقربكم من بعض وتشوفيه وهو بيكبر قدامك ومش يفارق احضانك ابدا .

كالعادة


على فكرة حنان الشافعى بتسلم عليكى جدا..دى أمانة ولازم اوصلها

بعد اذنك بقى عشان اروح اعيط على جنب

فاتيما
انا باشوف تعليقاتك دايمافى مدونه صديق
وماكنتش اعرف انك صاحبه مدونه روح قلب ماما

اعذرى جهلى
انا حاسه بيكى جدا
وجعتى قلبى ياحبيبتى

مش عارفه اكتب لك اللى حاسه بيه
ربنا يجمعك بيه على خير يارب

ياااااااااااارب يكون في حضنك اسرع من رمشة عين
ويرد الجوهرة للقلب الالماس

منوووش

ايه يا فاتيما
ااايه يا فاتيما والله حرام
دا انا قاعدة اعيط زي ما يكون ابني انا !
يا فاتيما دا فاكرك والله فاكرك .. احنا كلنا بنحبك من حبك ليوسف و بنحبه من كتر الحب دا ..
حد في الدنيا ينسا ام زيك ؟ ميقدرش والله ينسا .. انا متأكدة انه قبل ما ينام كل يوم يفتكرك و يفتكر وانتو بتلعبو تضحكو مع بعض ..
وكل يوم لما يصحا يجي وشك في باله وكأنك قدام عنيه ..

ميقدرش يا فاتيما ينسا ام زيك يا حبيبة قلبي..
واكيد مشتاق لحضن ماما و برفان ماما..
ربنا يا فاتيما يجمعك فيه ولا يفرقكم بعد كدة ابدا .. والله انتي ام جميلة وانتي صبرتي كتير و ربنا هيكرمك .. انا حاسة ان ربنا هيكرمك ..
يااااااارب يااااااارب رجع يوسف لفاتيما ياارب ... هي بتحبه جدا وهي بني ادمة حلوةوماماية زي العسل .. يا رب اكرمها برجوع ابنها يا رب ..

قطعتي قلبي يا فاتيما انا هقوم اغسل وشي بقا .. و ادعي يا حبيبتي .. مش ربنا بيقول " اني قريب اجيب دعوة الداع اذا دعاني " ادعي وكوني متأكدة انه ربنا هيستجيب .. لان ربنا بيقول " انا عند ظن عبدي بي " ..

تصبحي على خير يا حبيبة قلبي :)

اكيد لسه اهلاوي... الزمالكوية بينقرضو اصلا...

والله مش عارف اقول ايه... جيت اهزر علشان تفكي شوية معرفتش برضه...
ربنا يرجعه لحضنك ويطمن قلبك عليه...

ربنا يجمعك بيه على خير

ممكن سؤال سخيف واعذريني لاني موش كنت متابعه

هو حضرتك موش بتقدري تشوفيه ليه ... ده حقك ؟

تحياتي

فاتيما انا مش عايزة اوجعك ..
بس هو يوسف عنده كم سنة ؟
وانتو فترة حضانة الام كام سنة ؟
احنا عندنا بتاع9 في القانون الجديد ..
وبرضو ليه مش بتشوفيه المفروض انه حقك .. حتى لو الحضانة مش ليكي مش معناتها انك تنقطعي عنه كدة !

الوناتك

منك لله يا فاتيما قلبتي عليا المواجع

ربنا يقذف فى قلبه
الحب لك يا فاتيما
والاشتياق
بحجم كل الاشتياق الذى تحملينه

ربنا يرده لك يا حبيبتى


مشموشتك

مش لاقية كلام أقوله غير دعوة من القلب ان ربنا يجمعك بيه على خير في القريب العاجل ان شاء الله
عارفة كلامك من كثر صدقه بيدخل على القلب مباشرة وبيخلينا نحس بطعم الوحع اللي في كل كلمة
لاتفقدي الامل ابدا وخلي توكلك على الله ومن يتوكل على الله فهو حسبه

أحمد عبدالعدل
------------

الأمل لم ينقطع يا دكتور
و الصبر برضو
بس احيانا لما بتكتب بوست زى كدا
بحس انى اتخففت من الحمل لأنى خرجت من قلبى الكلام اللى مش قادرة اقوله لصاحب نصيبه للأسف

ربنا معاك و يكرمك يا عزيزى







reem
----

انتى يا ريم مش محتاجة تسمعينى
انتى بتحسى بيا ع البعد
دا شىء انا متاكدة منه و مفيهوش فصال
و لازم اكتب بوست يوسفيات
عشان الحضن يتاخد ؟؟؟
لأ طبعا
انا هاخده كدا كدا
من غير حاجة

يوم السبت الجاى إن شاء الله
بوسيلى البنات لحد ما اشوفهم







الزهرة البرية
-----------

كلامك يا جودى فرحنى يا حبيبتى فوق ما تتصورى
اطمنى اختك بخير
انا بفضفض معاكو يا حبايبى





farah
-----
يا إسمك الحلوووو يا فرح

منحرمشى منك





dahlia...
---------

يا حبيبتى

ربنا قبل الكل

لكن انتوا بعده و الله
لن تتصورى حجم تأثيركم و مكانتكم عندى ... انتوا شبكة الأامان بتاعتى يا داليا و من اول يوم يوسف مشى تقريبا مش النهاردة او من سنة فاتت

لأ من زمان

وفرحااااانة قوى انك هتعرفى تيجى
انا
كمان
بحبك

وبشر الصابرين

راجع يا فاتيما

ربك مبينساش حد

والحق بيرجع .. ولو بعد سنين

وربنا بيعوض الصبر بخير

وخير صبرك هيكون بأبنك يوسف

وبحبه الكبييييييير اوي ليكي

بقى حد يكون عنده ماما حلوة اوي كدة ويكون ناسيها ؟؟!

ياااااا بخته بيكي وبحبك

وياااا بختك على صبرك

ربنا يسعد قلبك

ويدفي حضنك .. بيوسف يارب

تحياتي لأجمل أم يوسف

سارة

احاسيس آيوشة
------------

منحرمشى يا آيوشتى



мαησηα
------

يسمع منك ربنا يا منونتى
ميرسى يا حبيبتى





ghada mOhsen
------------

أزيك يا غدغود
يا حبيبتى يوسف عاوز الف حب على حبى
كل واحدة ربنا يكرمها بطفل لازم تبقى كدا و اكتر من كدا

منحرمشى منك يا حبيبتى





الشوكة الناعمة
--------------

مين قال ان الكلام لا بيقدم و لا بيأخر يا شكشوكة ..
مش حقيقى
كلامكم له اكبر معنى عندى
و بيطبطب على قلبى يا حبيبتى
من اول يوم
لحد دلوقتى حالااااا





(ست *جنى *الحسن)
--------------

و عليكم السلام يا ست الحسن
اهلا بيكى طبعااااا
نورتينى





حاجات جوايا
-----------

ياااااااه يا سالى

انتى من القلوب الصافية اللى بتدعيلى من زماااان قوى
فاكرة ؟

بحبك دعواتك دى قوى قوى قوى
ربنا يفرحك بدودو يا حبيبتى
منحرمشى منك أبدااااا

ندى الياسمين
----------

و الله يا صباصيبو انا بحس انى وسط اهلى بجد و انكم حضن واسع بيضمنى

قبل ما اكتب البوست إترددت كتيييير قوى و قولت هوجع قلبكم ليه بس ؟؟
و بعدين اتخنقت قوى قوى
و قولت هكتبه و انتوا هتستحملونى برضو

بعد رجوعنا من اسكندرية ان شاء الله
الدور ع المنصورة يا ست
ماشى؟؟

طوااايب




just waiting
------------

ميرسى يا تيتو
انتى الاحلى يا حبيبتى
و الله





حفيدة عرابى
----------

و الله يا فيدو ظنك ف محله
مش بس الامتحانات
الأيعاد و المناسبات
وقت الاكل
و وقت النوم
فى أى خروجة و مكان بروحه
طول الوقت
طول الوقت

يا حبيبتى ربنا يخليكى
و يخليلى قلبك الطيب الحلو دا




منى
---

ميرسى يا منى
متهيألى أعرفك
قلبى بيقولى كدا

طيب خليها بينى و بينك
و منحرمشى من الدعوات الحلوة





رئيس جمهورية نفسى
----------------

عارفة يا ريس و شيالك لعوزة
ف الوقت الحالى
دعواتك هى ما احتاجه بلا أدنى شك او لحظة تردد و أهى مالية تعليقك

منحرمشى منك يا غالى

ماجد العياطى
------------

معلش يا ماجد
منا لازم كل شوية افضفض و احكى و اطلع اللى جوايا .. صدقنى برتاح و بحس و كأنى كلمت يوسف فعلا ...

انا سعيدة جدا بزياراتك دى




هوبتى
-----

و يسعدك يا هوبتى





wanda
-----

ان شاء الله مقبولة

وحشتينى قووووووى
********************************************************************
و
××××××××××××××××××××××××××××××××××××××××××××××××××××××××××××××××××××

متغبيش علياااا





Doba
----

منحرمشى منك يا دوبى
قلبك يا حبيبتى فيه الخير
و دعواتك ان شاء الله مستجابة
مهو يوسف برضو ابن اختك
و ليكى فيه نصيب
من بدرى بدرى

بوسيلى يسوفة و عمر
و أمهم
و سلامى ليحيى جداااا





ميرا(وومن)
----------

منا خدتها من قصيره يا ميرا
و كتبت البوست اعتمادا بقى على حبكم و دلعكم لياااااا

كان نفسى قوى تيجى اسكندرية
مفيش امل تحاولى
و تبلجى كدا و تاخديه اجازة يوم السبت دا ؟؟

و حياتى تحاولى تانى
نفسى تيجى
ماشى؟
طيييييييييب






لولا و زهراء
-----------

ميرسى يا زوّزا على التعليق المكتوب و اللى موش للنشر كمان

انا حاسة بكل اللى قولتيه لأنى و انا صغيرة مريت بظروف مشابهة شوية لكدا و فاكرة جداااا كل التفاصيل و بحذافيراها ..بس المؤلم منها اكتر من الكويس و دا اللى بيخوفنى ان المؤلم ف حياة يوسف يطغى ع الحلو

فكرة وجوده بعيد عن عينى لوحدها فكرة مؤلمة جدا و كفى

بس ربنا قاسملنا كدا
و الحمدلله ما دام هوه بخير

بوسات و حضونات يا ذات الوجه المشرق
و سعيدة جداااا انى هاشوفك ان شاء الله على ألف خير يوم السبت الجاااااااى

ساعات بزهق من شريف
بتعصب وروحى تبقى فى مناخيرى منه
رغم انه على كلام الناس هادى ومش مشاغب زى اطفال كتير
وانى المفروض احمد ربنا
مش اضايق من شريف واتنرفز عليه

لما بيروح عند هانى واهل هانى
بيوحشنى اوى بطريقة قاتلة
وساعاتها بمسك نفسى واعمل نفسى قوية وانه عادى
ده راجعلى تانى
يبقى مافيش داعى للقلق

والمشكلة انه مش قلق
المشكلة احساسى انه حقى
ولازم كل لحظة فى عمره تعدى
وهو معايا وقدام عنيا
حتى لو متنرفزة عليه

لكن لما بيرجع بيكون اتغير

كبر شوية وتخن حبة
كلمة جديدة بتتقال على لسانه
تجربة جديدة مر بيها من غيرى
اكلة جديدة دقها لاول مرة ومش من ايدى ولا معايا

ساعتها ماعرفش اعمل ايه
اعيط ولا اضحك

ساعتها بتصل بهانى زى المجانين

هى الكلمة دى شريف سمعها من مين؟
قالها لمين؟
قالها بانهى نبرة؟

مين اللى جابله اللعبة دى؟
وايه مناسبتها؟
وشريف عمل ايه لما شافها؟
ومين لعب معاه باللعبة؟

مين اللى عمله الاكل ده ؟
طنط ولا جبتوه من برة؟
لو من برة روحتوا المطعم ولا طلبته بالتليفون؟

لو رحتوا المطعم شريف كل ازاى بايده ولا بشوكة وسكينة ولا حد اكله؟

ومليون سؤال وسؤال
علشان احاول انسج صورة لشريف وهو مش معايا بيعمل ايه


وتبقى الاجابة قاتلة لما هانى يقولى معرفش يا نورا معرفش
انا كنت برة

واطلب منه طلب مليان رجاء
واقوله طب ممكن لما ترجع البيت تعرفلى هو عمل الحاجات دى ازاى؟

بخاف اسال شريف واستجوبه
مش عايزاه يحس انه بيعمل شئ غريب لما يختبر تجارب جديدة من غيرى

لكن هى حاجة كدة مزروعة فى قلوبنا احنا الامهات
بنبقى عايزين نعرف التفاصيل


ايه مناسبة الكلام ده كله؟
معرفش

يمكن علشان احمد ربنا مثلا انى احسن حالا منك؟
وان ابنى مهما غاب عنى راجعلى؟

او يمكن علشان اقولك انى فاهمة احساسك كويس
وموجوعالك اوى؟

لانى مجربة الاحساس ده
لكن بصورة اخف بكتييييييييييييييييييير من الصورة اللى انتى فيها

لانى لو جربته فهو بيكون احساس مؤقت وبيزول بمجرد ان شريف يرجع يستقر معايا


معرفش يا فاتيما انا كتبت الكلام ده ليه

بس يمكن علشان بسببك بحس انى فى نعمة والمفروض احمد ربنا وانى ابطل نرفزة وعصبية على شريف

وانى ابطل شغل الهبل والجنان اللى بيصبونى لما شريف يبعد عنى
والمفروض ابتدى اتبنى وجهة نظر جديدة فى مسالة شريف و اكبر دماغى من احساسى لما يبعد عنى كام يوم
واقول الحمد لله
انا احسن من غيرى


برضه معرفش انا بقول الكلام ده ليه

اصل لو قلتلك ايوة انا حاسة باللى انتى فيه
هاكون مش بكدب
لكن برضه مش هاكون بقول الصدق

لانى ممكن امر باللى انتى بتمرى بيه ده
بس بمر بيه كام يوم
ولو طولوا شوية هاتبقى كام اسبوع

لكن بصراحة انا ما جربتش انى امر باحساسك ده فترة طويلة اوى

علشان كدة كل اللى انا عارفاه
انك موجوعة اوى
موجوعة بطريقة زفت

يمكن انا معرفش اد ايه وجعك

لكن متاكدة انه وجع كبييييير اوى

وده اللى مخلينى دلوقتى اعيط
اعيط اعيط اعيط
واقول الحمد لله
ويخلينى ماسكة الموبايل وانا بكتبلك
بحاول اتصل بهانى علشان يجبلي شريف

ويخلينى ادعيلك دعوة من القلب بجد
ان ربنا يردلك يوسف ويرجع لحضنك وتعرفى تفاصيل تفاصيله

انا مش عارفة اكتب حاجة تانية وحاسة ان كلامى اللى كتبته عكيت فيه الدنيا

بس انا مضيقالك اوى
ومخنوقة من نفسى ومنك ومن طليقك ومن هانى
ومن الظروف الغبية اللى حطت عيالنا فى المواقف دى واللى خلتنا ...

اللى خلتنا ايه؟
خلتنا ايه يا فاتيما؟
تعرفى انتى خلتنا ايه؟
تعرفى انتى تجاوبى وتكملى كلامى؟

افففففففففففففففف
انا مش قادرة اكمل ولا عايزة اكمل
انا عايزة امشى من هنا
انا تعبت واتخنقت

انا اسفة يا فاتيما
اذا كنت قلت كلام يوجعك اكتر

اسفة بجد


سلام

اختك خيخة

richardCatheart
---------------

حاضر يا قطقوطة

هكتب يا حبيبتى و يا رب يوم ما يرجع و يقرى كل كلمة ..يقراها بقلبه قبل عيونه الحلوة و يعرف كان واحشنى قد إيه

حلو دعائك قوى


و انا كمان بحبك قوى





راجى
----

أهلا يا أستاذ راجى
شكراً لإهتمام حضرتك
اجابة سؤال حضرتك شرحها يطول
قوى ..ان شاء الله تيجى مناسبة و الظروف تسمحلى اجاوبه

نورتنى




Ana keda
--------


لأ ينفع
لما نتقابل إن شاء الله ف أقرب فرصة هتيجى ف حضنى و ملكيش دعوة
هيساعك ..انتى و بيدو كمان
متقلقيش
و منحرمشى منك يا حبيبتى






ستيتة حسب الله الحمش
-----------------

انتى بتحبى اليوسفيات

و انا بحب تعليقاتك ع اليوسفيات

و مبعرفش أرد عليها من كتر جمالها
و من كتر ما اللسان ما
بيعجز عن الشكر
و الغمتنان

و الحب

ربنا يخليكى لينا كلنا
و أولنا يوسف اللى بتدعيله من قلبك
بحبك قوى





هى و ظروفها
-----------

ازيك يا عرينا و ازى سلمى
اوعى تزعلها يا واااد
عارفة انه مش هيحصل ..انا بعمل حماة بس و بجرب فيكو الأول قبل ما ييجى عريس بسكوتة و اعمل عليه حماة بذمة


كلامك عن يوسف و معاه
أقولك ايه؟؟

يا رب يرجع و يقراه
يا رب يا وليد
يرده الرد الجميل
إن شاء الله




thunder
-------

أزيك يا ثندر
انا مبسوطة جدا من تعليقاتك و زيارتك الحلوة دى
و متغاظة جدااا من نفسى عشان مش بعرف اعلق عندك مع انى متابعك و بروح ازورك دايما بس صمتاً

الدعاء اللى كتبته حلو قوى
قوى
قوى
منحرمشى منكم يا رب
و يكتب ليوسف منه نصيب
إن شاء الله

المدونة منورة

أع ـقل مـ ج ـنـونــة
--------------------

ميرسى يا جوجو
منحرمشى منك يا حبيبتى






I'm The CraZy One
-----------------

انتى كمان يا هند
وحشتينى يا بنت الإيه
و كل ما توحشينى اروح اسيب تعليق

و ساعات اقول كفاية تعليقات البنت تتخض و كفاية فيلم الرعب بتاع الامتحانات ...
ابقى طمنينا عليكى كل شوية
و عملتى ايه ف الامتحانات و كدا

سطر كل مرة تخلصى ..موجز أنباء سريع يعنى عشان منقلقشى عليكى
ماشى ؟

بوسات و حضونات
يا حبيبة قلبى
و انا كمان ...اووووووى برضو









عاشقة الرومانسية
----------------

عارفة يا دودو
و ناوية اكتب بوست جديد ان شاء الله
يوسفيات برضو ...بس من غير دموع

يوسف مش محظوظ بأمومتى
انا اللى محظوظة بيه يا دودو

انتى عارفة يعنى ايه تقعدى ست سنين تقريبا لوحدك مع ملاك برىء ميعرفش يكره و لا يأذى و لا يغدر و انتى كل صلته بالدنيا و مصدر حبه و أول و آخر حد بيحبه ؟؟

انا كنت تلك المحظوظة بحبه

ربنا يطمنى عليكى يا حبيبتى
و عروسة بحورى
و قطتى الحلوة






Haytham Alsayes
---------------

قلبك فيه الخير يا هيثم
الف شكر ليك





SHAPE YOUR LIFE (ABOALI)
-----------------------

منحرمشى من حضرتك يا فندم

حضرتك متفكرشى تيجى معانا لقاء إسكندرية ؟؟

هيكون يوم جميل إن شاء الله
يا ريت تنورنا








enjy
----

يا شقاوة ع الآخر

لما نيجى حداكم ... بإذن الله
هرد السلام بتاع حنان و بتاعك ..
فى شكل بوسات و حضونات أعوضكم بيها عن العياااط الرهيبى بتاع كل مرة ...يمشى معاكم النوظام دا ؟؟

طيب
سلامى لماما الغالية





دودو
----

الصديق المشترك بينى و بينك
مبيجيش من وراه
غير كل خير
و كتر خيره
ع المعرفة الحلوة دى
اللى ان شاء الله تدوم و تكبر


و متقوليش حاجة خالص
انا حاسة بين سطورك .. بما يكفى
لإنى اشكرك عليه من قلب قلبى

و اقولك انك
نورتي المدونة
و نورتى قلبى كمان بالزيارة دى




MaNoOoSh
--------
منحرمشى منك يا منوشتى

جاية اسكندرية
ولا هتنفضيلنا يا ست ؟؟؟


آه

بوسات و حضونات

" يـ ألوناتك ! "
----------------


بتمنى يا لولى يكون دا حقيقى
أكون بوحشه فعلا بس من غير زعل منى


متتعبيش روحك بحكاية القانون و السن و الكلام دا لأنه مش كل حاجة

يوسف من حقى قانونا و سناً
لكن مش كل حق ينفع يتاخد لأن وراه تبعات أخرى هتمنعك من اخده

و لو الحق دا أخدتيه
مش هتعرفى تمتعى بيه

قصة طوييييلة يمكن ييجى فرصة
و احكيهالك .. ان شاء الله
منحرمشى منك
و سلامة قلبك م الوجع يا حبيبتى





سمع هوص (abo 3li)
----------------

لأ هزر و لآخر مدى يا ابو على
انا بهزر ..عشان صلاح جاهين قال بدل ما نطق يا ولا نضحك ..صح؟
دى نصيحة ذهبية ..اوعى تفوت ايامك من غير ما تنفذها قدر إمكانك يا بنى

و الزملكاوية بينقرضوا فعلا
دى حكيكة علمية لا جدال فيها





فتاة من الصعيد
--------------


اهلا يا توتة
(دا اسم دلعك ..معلشى بقى )

السؤال موش سخيف خالص
بس اجابته يا حبيبتى هيا اللى سخيفة و محتاجة شرط و طوييييل
ان شاء الله ييجى وقته
و اقولهولك

تحياتى انا كمان اكتر





مطلق
----

ازيك يا كريم

المواجع موجودة يا عزيزى
و تقليبها لازم يكون من المسلمات عشان الواحد يعرف يتعايش مع الحال

اصلك مينفعشى تتجاهل المواجع دى كل يوم ..هتتعب اكتر

يعنى لو حاولت اتجاهل منظر الاطفال و هما رايحين المدارس الصبح مع الامهات
شكلهم و ضحكهم و تفاصيلهم الدقيقة
و كل الحاجات دى تربطها باللى مفروض يكون عندك انتا كمان
لكن هوه مش موجود ..و ناقص

تفتكر لو تجاهلت دا ..و كرهته
هتتحول لبنى آدم شكله ايه؟؟

هتتحول لمسخ كريه كدا
بيكره نفسه و اللى حواليه
و بيكره يبص لعيال غيره
و يمكن يحدسهم كمان على نعمتهم
و يبقى بيتعذب اكتر و اكتر
بينما ..الحل موجود

انه يقلب المواجع بنفسه كل شوية
و يعتبر عيال الناس عياله
و يحبهم و يحضنهم و يفرحهم
كأنهم ابنه او بنته
و يتمنى من ربنا
ان روح قلبه القابع فى مكان آخر
يلاقى حد يحبه و يحضنه و يفرحه
و يقول يا رب

يا رب تحفظه و تصونه من كل شر

و يحاول يحافظ يعنى
على روحه المعنوية قدر الممكن
عشان ابنه او بنته لما ترجع
تلاقيه لسه قادر يحبها
و يحضنها
و يفرحها

انا رغيت كتير قوى ..صح ؟
بس انتا عارف إن قلبى
و قلوبنا كلنا معاك
و عليك يا كريم
و ربنا ينعم عليك بحضن زينة
و عقبال ما تسلمها لعريسها يا رب
و تشيل عيالها




شيماء سمير
---------
يا حتة الدانتيلا

دعوتك كمان دانتيلا زيك
حلوة قوى قوى قوى

سلامى للعصفور الطيب
♥♥




خواطر شابة
----------
حاضر يا خطورتى
تأكدى يا حبيبتى ان عمر الامل ما هيروح من قلبى

يبقى فقط وجع البعاد و الإشتياق

بحبك قوى




saragebaly
----------

يا سارة كل مرة تسيبى تعليق
تأسرينى بحبك اللى بيتطنط ما بين السطور زى يوسف لما كان بيبقى فرحان و متحمس و لطيف و برىء

منحرمشى منك و مش عارفة أقولك ايه بس ؟؟

بت خيخة و أى كلام
---------------

بالعكس يا خوخة

تعليقك متعبنيش ..
بالعكس
فرحنى جدااااا

حسسنى ان كلامى اللى بكتبه
و المفروض يكون موجه لشخص واحد بعينه ..قادر يسيب آثر
و لو بسيط ف حد تانى خالص


كل اللى قولتيه سببه
انك ام
أم زى الكتاب ما بيقول
و زى انتى ما قولتى بين سطور تعليقك
عشق التفاصيل مهمة امومية
و انثوية بحتة
هيا اللى بتميزنا عن الأباء و الرجالة عمومااااا


بس فيه حاجة تانية
بتخلينا كدا يا خوخة

مش بس الطلاق

حاجة قريتها زمان
عن الطفل الوحيد
اللى بيتربى مع امه
و بيتعلق بيها جدا
و هيا كمان بتتعلق بيه بشدة


لأنهم بيبقوا مش أم و ابنها بس
بيبقوا أصدقاء و اصحاب و كل حاجة لبعضيهم لأن ملهموش غير بعضيهم
خصوصا لما الأب يختفى من الخريطة
زى حالاتى ..علطول
و زى حالاتك ..بعض الوقت


شريف و يوسف
مش ولادنا بس
دول أكتر بكتيييير

و اكاد أجزم ان لو كان عندنا
ولاد تانية كانت درجة التعلق دى هتخف حدتها ...

المحبة هتكون اكيد بدرجتها الرهيبة دى لا أشك ف ذلك ..

بس شكل العلاقة مكنش
هيبقى كدا ...


لأن شريف مثلاً
كان هيبقاله أخ أو أخت
يعيش معاها تفاصيل
مش هيعيشها معاكى
و انتى هتسيبيله مساحة اكبر للإنطلاق
و مطمنة انه عايشها برضو معاكى
و قصاد عينك
و مع حتة تانية منك


حتة الاستحواذ اللى انتى حساها
و انا كمان كنت بحسهامع يسوفة
..
امر منطقى


لأننا حاسين بمسئوليتنا الرهيبة عن تشكيل المخلوقات الرقيقة دى
اللى ربنا انعم علينا بيها


حتة الصلصال اللى انتى قولتى عليها زمان ف بوست من بوستاتك ..فكراه؟

و رغبة كل واحدة فينا
كبنى آدمة و كأم
انها تأثر ف حتة الصلصال دى إيجابياً
و تديله جنب
الحب و الحنان و الرعاية ..
العقل و الخبرة و الشرح الوافى ..


عشان كدا انتى بتسألى
عن أدق ادق التفاصيل
و بتتمنى لو كانت تحت نظرك طول الوقت


دا حب عظيم يا حبيبتى
ربنا بعتله للعيال دى ممثل فينا ..
و يا ريتنا نقدر نعبر عنه كما يجب
و كما ينبغى أن يكون

هوه حب عظيم
و حمل عظيم كمان


عشان كدا الظروف الغبية
عاكستنا
فخلتنا كدا


خلتنا مقدرناش نحقق لعيالنا
الحياة المستقرة اللى المفروض
عايشها كل طفل زيهم


بين ام و أب عاديين
انشالله يتخانقوا كل يوم

بس آخر الليل بيناموا معاه
ف بيت واحد

و ف المناسبات و الأعياد
تفاصيلهم و احداث يومهم واحدة

مشاكلهم
و احزانهم
و افراحهم واحدة

الحياة المشتركة بكل ما فيها
حلو و وحش طبيعى
و زى باقى البشر


احنا معرفناش نحقق لعيالنا
الحياة دى يا خوخة
لأن عشان نحققها
كان لازم ندوس على نفسنا


و لو دوسنا على نفسنا
مش هيفضل فينا روح
و لا قلب
نقدر نعيش بيهم
و نعرف بعد كدا نحب العيال دى
كما يجب


المعضلة اللى ملهاش حل


غير بقاء الحال كما هو مؤقتا
و محاولة تحسينه
قدر الممكن مستقبلاً


و أصل فيه طفل
بيعيش يتيم
لا أب و لا ام
و بيطلع احسن الناس


و فه طفل يبقى عنده اب بس
او ام بس
مش المفروض احسن؟؟


طب اللى عنده الاتنين
و كل واحد ف ناحية ؟؟
أحسن و أحسن

دا المنطقى يعنى

فياه لو كانوا كويسين مع بعض
رغم البعاد زيك كدا يا نونو انتى و هانى


يبقوا احسن و أحسن

فمتتخنقيش يا حبيبتى
و لا تعيطى


شريف محظوظ بحبك و امومتك
و ربنا يطرحلك فيه الخير



وانتى معكتيش ابدا
ربنا يا حبيبتى ادى كل واحدة فينا الحمل على قد ما تقدر تشيله
.. لا أقل و لا اكتر

حملك انتى قادرة عليه
و حملى أنا كمان
ربنا مقدرنى عليه

بس هيا اوقات كدا
بستخيخ ... شوية من نفسى
و انخ و قلبى يرق
و يوسف يوحشنى
فأكتب بوست حزين زى دا ..
معتمدة على حبكم و طبطباتكم عليا


بس كدا


بوسس لشريف لو سمحتى

كلامك حلو اوى وحسيتة اوى يا ماما ..

لو تسمحى أقولك ماما ^_^

ربنا يرجع لك يوسف بألف سلامة

إنتى سكر اوى

وأنا بحبك فى الله

ايميل يجعلك من اصحاب الملايين

بقلم الدكتور محسن الصفار

جلس سعيد أمام جهاز الكمبيوتر اللذي اشتراه حديثا وتعرف للتو على عالم الانترنت الواسع , اخذ يقرا بريده الالكتروني وأخذ يتفحص الرسائل الواحدة تلو الأخرى حتى وصل إلى رسالة باللغة الانجليزية عنوانها (شخصي وسري للغاية) فتح سعيد الرسالة وقرأ نصها فكان مضمونه أن المرسل هو ابن لرئيس أفريقي سابق خلع من السلطة وأن والده أودع مبلغاً وقدره 100 مليون دولار في أحد البنوك وأن الأسرة لا تستطيع استخراج المبلغ إلا عن طريق حساب مصرفي لشخص ثالث ويعرض مرسل الرسالة على سعيد أن يعطيه 40% من المبلغ أي 40 مليون دولار فقط إن كان هو مستعداً لتقبل هذا المبلغ على حسابه الشخصي.

لم يعر سعيد أهمية كبيرة للرسالة في باديء الأمر ولكن الفكرة في امتلاك 40 مليون دولار دون أي جهد بدأت تحلو له شيئاً فشيئاً واخذ الطمع يتغلغل في نفسه , أرسل سعيد رسالة رد إلى المرسل وسأله:

- هل هنك من مخاطر في هذه العملية؟

جاء الرد بسرعة:

- لا لا أبداً ليس هناك من مخاطر أبداً أبداً ولكنك يجب ان تحافظ على السرية الكاملة ضمانا لنجاح العملية .

ردّ سعيد على الرسالة:

- هل من مصاريف يجب أن أدفعها؟

جاءه الرد:

- لا لا أبداً فنحن نتكفل بكل شيء أرجوك يا سيدي ساعدنا وستصبح أنت أيضاً من أصحاب الملايين.

من أصحاب الملايين!! كم هي جميلة هذه الكلمة وأخذ سعيد يحلم بأنه يسكن قصراً ويركب أفخم السيارات ويمتلك طائرة خاصة وو……

وفجأة وجد سعيد نفسه وقد أرسل رسالة فيها رقم حسابه المصرفي واسم البنك، وبعد يومين جاءه بريد الكتروني مرفقة به رسالة عليها أختام حكومية تفيد بأن وزارة المالية في ذلك البلد الأفريقي لا تمانع من تحويل المبلغ إلى حساب سعيد….

باقى القصة و المزيد من مقالات الدكتور محسن الصفار الهادفة الخفيفة الظل موجودة بالرابط التالى

www.ouregypt.us

عيوني لم تستطع ألا تدمع

وفقك الله و سهل لك أمورك ... و إن شاء الله مش بس يبقى عندك يوسف ... لأ و إخوان يوسف برضو و هو أخوهم الكبير و رئيس العصابة :)

قولي اميـــن و تفائلي بالخير :)

إرسال تعليق