.

.

نــــو .... نــــو  

Posted by: فاتيما in







إحنا ع الهوا يا بنى ؟

نطلع يعنى .. طييييييب



إحم إحم



بنو وطنى


لقد فقدت مصرو


قيطتن



من اشجعععععع القطات



قيطتن

من أنبلللل القطات


قيطتن


من الطفففف القطات



بنو وطنى


انتقلت الى رحاب السما
ء
قطتنا الأثيرة
و جوهرتنا المكنونة

الست

شيرى هانم



أثر حادث أليم
أودى بحياتها


و كمان حيا
ة ال 6 أرواح
التانيين بتوعها



و لا أراكم الله مكروها
ف قط
لديكم



متعزونيش يا جماعة
و لا تكلكوا عليا خالص البتة
اختكو متماسكة و ثابتة
و هحكيلكم م الا
ول و بالتفصيل
لأن الشعب الغلبان الطيب دا
من حقه يعرف كل حاجة




وعاوزة أبع
بع معاكو
احسن اناااااااا قربت أقطع الخلف
خلاص ف البيت دا



آل أنا نايمة ف آمان الله
و بتخانق بكل أدب مع الملايكة
على آخر معلقة ف طبق الرز بلبن
و مين هيسيبها للتانى
و النوم مل
ء جفونى


و إذ فجأتن الاقى الحاجة ام فاتيما
فوق
دماغى
و بتشد الغطا من عليا


فيه ايه يا ماما ؟


شيرى مش نايمة معاكى ؟


لأ تلاقيها ف حضن ماجد


لأ مش هناك
و لفيت عليها ف كل الشقة
و مش موجودة





نبرة القلق ف صوت الحاجة بيقولى
خلى عندك دم و قومى دورى معاها
مش معاد صحيانى
و فاضل ساعة يا بشر .. سيبونى انامها
هيه معلش .
.. طب أستذوق
و أشارك ف عملية البحث عن المفقودين
دى شيرى برضو
قطتشى حبيبتشى



طبعا صحيت مضروبة تلاتين علقة
و عملت بحث شامل متفحصة كل مكان
تحت
الكراسى
ف الدواليب
و جوا البلكونات
و لما يئست تماماً
فتحت باب الشقة
و اديتها وصلة
بسبسة
ييجى ربع ساعة
لعلها تأتى
مفيش ف
ايدة


بعد زهق لقيت ماما بتندهنى

تعااااالى .. لقيتها

قولت الحمدلله
روحت على مصدر الصوت
بلكونة اوضة ماما

لقيتها بدتينى الن
ظارة المعظمة
و بتقولى بصى تحت
ببص م البلكونة ... ع المنور بتاعنا
لقيت القطة مم
ددة ع الأرضية
و مبتحطش منطق



أيوه ... و للأسف
قطتنا شيرى سقطت من الدور الحداشر
معرفتش تعدل جس
مها و هيا نازلة
فالسر الألهى طلع




طبعا خدت وقت
على ما أستوعب المنظر
و لو إنه مش جديد يعنى
أصل دى تانى حادثة .
.. تحصل لقطة بنربيها


من سنة تقريبا مات قط سيامى
- كان اسمه تيتو -
بنفس
الطريقة
ومتفهموش ايه الحكاية ؟؟


ايه مزاج
هم بس
ف الوقوف على سور البلكونة ؟؟




و لاّ يكونوش بينتحروا
عامدين متعمدين ؟؟!!


طب
ليه
مع اننا بندلعهم و الله
و محدش بيزع
لهم ف حاجة


و الفقيدة تحديدا
كانت مدلعة إيما دلع


و اصلاً من اول ما اشتريناها
و هيا حاسة بنفسها قوى
اكمنها زى القمر و بنت ناس


الغرض من وجودها كان
عشان نجوز الموكوس ... ميزو
و نلمه بعدي
ن ينحرف
و يبوظ سمعة العيلة


شوفتها ف المحل بتاع الحيوانات
و قعدنا نعاك
س ف بعضنا

وقتها ضربت برجلى على أرضية المحل
زى العياااااال
و قولت لماما هناخدها يعنى هناخدها
أختكو بتتحول لطفلة صغيرة
بفيونكات
ساعات
ميغركوش منظرى انى عاملة عاقلة




اول ما روحنا بيها البيت
ميزو يا خراااابى .... أحول ّ
و وقع ف غرام
ها طوالى


طبعا هيا رسمت عليه التقل
و بعترت كرامته مراراً و تكراراً
والبونى كتم ف ق
لبه الحسرة
و خدها بالراحة و بالحنية
و المسايسة
لحد ما وقعت ف غرامه


و فوجئنا فى يوم
من ذات الأيام
بأن الهانم ..... حااااامل


قولنا نلم الموضوع
و الله ستار حليم


و الشيطان
شاطر صحيح
بس نطلع احنا اشطر منه
و ن
جوزهم



بس يبدو ان شوشو
طلع أشطر و أشطر و لعب ف دماغها
فالبنت مقدرتش تستحمل
عبء هذ
ه الزيجة
و لوم المجتمع و إؤكتئاب الحمل
و قالت منيش مكملة المسيرة

طب بدل الإنتحار يا بنتى
كنتى قولتى أتطلق منه و تسيبيه
و انا اجوزك
سيد سيده
مش تاخدى ف وشك كدا
و تسيبى الدنيا بحالها ؟



و معرفش انا اي
ه حكاية الغباء
بتاع القطط دا ؟!!!!



سور البلكونة أساساً رفيع جدا
إزاى تخيلت انها هتوقف عليه عادى كدا
و ميختلش توزانها ؟؟


وخصوصا بعد ما كلبظت
بسبب الحمل
و غالبا دا السبب ف الحادثة دى
انها تعاملت كما لو كانت لسه خفيفة
زى الاول و
لا إيييه؟؟





كنت بفكر أبل
غ النويابة
تيجى تحقق
فى ملابسات الحادث
ليكون المخفى ميزو
هوه اللى زقها و لا حاجة
اكمنها يعنى كانت طول الوقت
منكدة علي
ه عيشته
و بتاكل أكله
و كمان كانت بتتمنع و هيا الراغبات


قام هوه استنهز الفرصة
و انتقم منها ... لما لقى الوقت المناسب
بحيث يتخلص منها و من الجونين
و ينجو بفعلته ؟


تحليل منطقى أهو بس قولت بلاش
الا بعدين يطلع علينا سمعة ف العمارة
اننا بندفع القطات الحسناوات
إلى الأنتحار
و الواد سوقه يوقف
ومنعرفش ن
جوزه تانى



الغريبة انى دايما الاحظ ان
البيت بتاعنا دايما
القطات البنات فيه كلهم
يلقين نف
س المصير


اللى عمرنا ما جبنا قطة بنت
و عمرتّ
ف جوازة

يا يجيلها مرض جلدى .. فنمشيها
ياتعمل تواليت ف كل حتة الا الحمام .. فنمشيها
يا تبقى شرسة و قليل
ة الادب .. فنمشيها
يا تهرب ف أول فرصة باب الشقة بتاعنا ينفتح
فتجرى بسرعة و منلحقهاش
فمشوها .... نمشيها

و هكذا ...تتع
دد الأسباب
و المشيان ف النهاية واحد


مفيش مؤنث قطقوطة واحدة
بتكمل
عندنا



والمشكلة انهم بيج
بولى انا الكلاااام
لأن الحكاية دى بتنسحب
لا شعوريا
على صاحبة القطة
اللى تصادف و معمرتش فى جوزاتها
هيا روخرا



و نفس النظرة
بلاقيها كل مرة
ترتسم على وش ام فاتيما نظام

اللى ما واحدة فيكو بتكمل
و تستر ف بيت العدل

جاتكو ستين وكسة
ستات خايبة
أشياء من هذوها القبيل


و معرفش ليه نساء منزلنا العامر
قليلات البخت
و ف لحظات عصيبة من عمر الزمن
يا بيرموا روحهم م الحداشر
يا يبقى حد
عاوز يرميهم



عموماااا
انا فقت م الص
دمة خلاص
و وصيت ماما قبل ما انزل الشغل
انها لما تصحى ماجد اخويا
و تبلغه الخبر
ميبقاش اول ما يقوم م النوم لحسن يتسرع


تجبيهاله و
احدة واحدة
الا يا نضرى يتعقد


اصلاً الشاب يا حبيبى .. إتعقد خلاص
ماهو مش م
عكول برضك
كل ما نجيب قطة بنت عشان نجوزها
و نفرح و نقول هتخلفلنا عيال


ييجى فجأة
الوبا ياخده
ا زى هنادى
حرام مش كل مرة يعنى



أقنعه ازاى بعد كدا طيب
انه يفكر ف الجواز
و احنا اللى جوازاتنا ف البيت دايما
بتنتهى بمأساة مروعة كدهوه ؟!!



غالبا بيتنا فيه لعنة



بقولكو
مبيعمرلناش فيه بنات


قصره

كلنا لها


و نظرا لأننا مش هنلحق
نحجز د
ار مناسبات
فالعزا هيكون بعد نص الليل
ف الخرابة اللى موجودة فى جراج العربيات
اللى ورا عمارتنا


و لا عزاء للقططات الحريمات
عشان ميخرطوش ... على قلبنا بصل
و يقعدوا ينونوا و يوجعوا دماغنا
و عشان كمان معنديش
حاجة سودا ألبسها
و سيبونى بقى اتفرغ للترتيبات النوهائية
مع عمال
الفراشة
و بتاع اللبن و اكلم ماما تطلب م السوبر ماركت
اللى جنبنا ... كام علبة تونة
عشان البسابيس الردالة اللى هييجوا يعزوا
ف شيرى هانم


و نو ..نو
محدش واخ
د منها حاجة



إهىء إهىء
عاااااااااااااااااااااااااااااااااااااا




تلغراف عزاء وصلنى
غرقان مليان غطسان
ف بحر من التعاطشف
و التعاضد و الشماتة
من الست
بسكوتة هانم



الله يحظك يا بسكو
تى
انا دمعت من كتر الضحك يا حبيبتى


وشك فقر
نعملك إيه؟؟

This entry was posted on الاثنين, مايو 24, 2010 and is filed under . You can leave a response and follow any responses to this entry through the .

78 كــــلام بيطــبطـــب عـــلى قــــلبى و روحــــى

ههههههههههههه
معلش يا فاتيما يا حبيبتى
كلنا لها
هههههههه بس البوست تحفة والله فكرتينى بالقطة بتاعتنا ساعة لما جبناها برضه كانت بتجننا كده وبابا مش بيحب القطط فكان فيلم انه يوافق ع قطة تدخل ولما دخلت برضو مشيت المشى البطال ده
بس هى هربتا بتاعتنا اكيد مع صاحبها
هههههههههههه
قطط اخر زمن يا حبيبتى معلش بقا تقولى ايه

يااااااااااااااااااه احيه ياتيما

زعلتينى ووجعتى قلبى اوووووووى ياشيخه

اخص عليكى ودخله تهزى والله بعيط وبضحك زى الهبله فى نفس ذات الوقت

احيه صعبت عليا اوى ياعينى
انا عندى جيرانى عندهم قطه شيرازى بيضه
بشوفها وقفه على السور بيجيلى انهيار الاول كنت بنده اقولهم دخلوها بعد كده بقيت ادخل انا علشان اريح نفسى

واللى عندى ماعودتهمش على دخول البلكونات اصلا بخاف من المنظردا
ماهو انا بردو فى السادس ياعنى الوقعه بموته
ياعينى عليكى مابيعشلكيش قطط

بس ولا يهم وان شاء الله ربنا يكرمنى فى اللى عندى وليكى عندى وحده هديه
بأذن الله
والله زعلانه اووووووووى بس اهو نصبها
ونصيب اللى فى بطنها

وبلاش لوسمحتى الربط الغريب بين حريم القطط وحريم بيتكم ههههههههههه

ربنا يعوض عليكى ان شاء الله
وقططك عندى بس قولى يارب ينفخ فى صورتهم
ان شاء الله

بحبك ياست انت هههه

لا حول ولا قوة الا بالله

البقاء لله يا تيماااااااا

قلبى عندك يا اوختشى ههههه

احمدى ربنا طيب يا تيما انك بتلاقيهم

احنا بقه مش بنلاقيهم معرفش

ايه بيحصل

هى سارة تنام تحلم باللى حصل للقطة

الفلانية نصحى مانلاقيش القطة الفلانية

ولا اثر للجثة حتى :(

مش عارفة بقه ده يبقى اسمه ايه ؟؟

عارفة مشكلة القطط ايه انها

بتعلقك بيها اوى

وبجد كل قطة ليها شخصية منفردة

وحركات معينة هما متفقين ف حاجات كتير

بس تلاقى لكل قطة او قط حاجة بتميزه

ونقعد نقول مش هنربى تانى واحنا كل

مانتعلق بواحدة تموت

وبردووووووو بننسى ونربى

عااااااااااااااااااا

يلا خير خدت الشر وراحت يا تيما

ههههههههههههههه اسف على انى بضحك بس مش ع فكرة انها ماتت اصل المقدمه خالتنى احس انها دفعت عبد الحكيم عامر ولا السادات لكن بما إنها قررت الانتحار فتبقى عبد الحكيم خسارة كان فاضلها شوية وتمسك مكان الكبير ويبقالنا وسطة فى الدولة الغريبة الست الارواح الباقين يعنى

دمتِ فى رعاية وحفظ الله دائما يارب وبكل حب و ود

ههههههههههههههههه

البقاء لله بقى يا فاتيما

أنا بقى عندي فوبيا من القطط

مينفعش انا وقطة نكون في مكان وااحد ابدا

الدنيا ممكن تتلم علينا اصلا :D

وصريخ هستييري ولا الي شافت أبو رجل مسلوخة في الليل

حاولت والله اني اتفاهمهم بس فوبيتي منعتني
:D


بس والله زعلت جدا ان قطتك ماتت
يعني اه مش بحبهم بس بيصعبوا على قلبي لما يموتوا
:(

خيرها في غيرها إن شاء الله

أسفة جدا يا مامي
بس مش هقدر اشاركك زعلك عليها
انا اصلا بكره القطط وبالتالي مش زعلانة عليها .... وهكتم فرحتي في قلبي
اصل مينفعش افرح في الموت ولا ايه.

عموما .... هي تستاهل فاكرة نفسها نيلي كريم ولا حنان ترك ... طالعة تلعب باليه على سور البلكونة الرفيع
يلا راحت وريحت... اصل الاستعباط اخرته وحشة
واحدة حامل وحالتها نيلة والمفروض غلط مع القط ..المفروض تتلم وتشوفلها حتة تقعد فيها لا رايحة تتمشى على سور البلكونة ... يمكن يا عيني حبت تثبت لنفسها ان الحمل ما أثرش على رشاقة حضرتها . خلي بقا الرشاقة تنفعها
علشان لما اقولك ان القطط دي كائنات غبية وغريبة وشريرة تصدقيني
وقال ايه تقوليلي حتى لو صغيرين
اااااه بقا يا مامي حتى لو صغيرين

سوري مش هقدر اشاطرك الاحزان ولا اوجب معاكي ... الا اذا كنتي ناوية تعملي بارتي احتفالا بانك خلصتي من ست شيري.

تحيات واحتفالات بسكوتية
:)


http://maggieandjim.files.wordpress.com/2009/04/shrig-im-dead-cat_2.jpg




http://www.istockphoto.com/file_thumbview_approve/4878451/2/istockphoto_4878451-party-objects.jpg

ههههههههه
لا حول ولا قوة الا بالله
وانا بقول كان فيه مظاهرات فى وسط البلد واضراب عند بنك مصر كل ده علشان موت شيرى هانم
يلا ريحت واستريحت هى كانت ناقصة قطط يا جدعان كفاية الشعب كله بقى بينونو فى الشارع
وبعدين ما فيش عمار بينى وبين القطط ولا الكلاب فى البيت بصراحة
وانا مش عارف اربى شابى اروح اربى قطة
يلا ربنا يسهل ونبعت قطط الشارع عندنا العزاء
ههههههههههه
تحياتى

طيب انا راضية ذمتك
ما اضحكش انا ازاي
ربنا يفرح قلبك ده مش بوست رثاء
ده بوست مهزلة
هههههههههههههههههههههههههههههه
وأدي أخرة عشرة الردالة
يا حمل
يا إكتئاب
يا أنتحار
متاخديش في بالك
دي متلازمة إمتحانات اخر السنة
final tests syndrome

وأديني قلبت على التخصص وعيشي

هي تقريبا عانت من تناذر كسرة القلب
broken heart syndrome
بعد ما المنيل قرر إنه ميعلنش الجواز العرفي
ولا يعترف بالعشر قطط اللي هي حامل فيهم
قووووووووم إيه
قوم بيقول لك ان تناذر كسرة القلب ده بيجي معاه اكتئاب وفقدان شهية ووجع في مختلف انحاء الجسم
خدت مضاد الإكتئاب
وهوب قفزت ولا عزاء للبسابيس الردالة متلكا

هههههههههههههههههههههههههه
تصدقي بجد صعبت عليا وحسيت اني زعلت رغم اني بكره القطط جدا وعمري ماخفت منها اصلا انا بترعب بس
لكن بعد ماخلصت ضحك على كلامك جه في خيالي صورة كائن حي وقع ومات حتى لو كنت بكرهه فدا شئ برضو يوجع القلب

هههههههه
والله ضحكتيني بجد اوووي برغم اني زعلت برضه اوووي عشان القطة اصلها فكريتني باللي تنخفي سوكا وسوكا لمن لا يعرفها كانت قطة رزلة اوووي غتت علي بسبوسة قطتي واستولت علي كل حاجة ليها في بيتنا بس برضه يعني برغم اني محبتهاش الا اني كنت بعطف عليها اصل انا طيبة وفجأة ماتت سوكا اة ماتت وسابت لنا قطتين صغيرين مش عارفين نعمل لهم اية وفضلت اتحايل علي بسبوسة انها تعطف عليهم الا انها انتقمت منهم شر انتقام
بس بجد زعلت جدا عليها وسميت بنتها اللي عاشت باسمها واهي برضه رزلة زييها
معلش فاتيما بكره ربنا يحلها ويا ستي متزعليش صدقيني هتلاقي قطة تانية حونينه وهتعمر ان شاء الله في جوازتها وتجيب قطاقيط وقطقوطات كتيرااااات
والبقاء لله يا طمطم

لا متقوليليش هى الحكاية منتشرة للدرجة دى بس انتى فى قطتك إحنا فى الفقيدة الفرخة هانم بعد ما لفينا عليها بعد ما ضاعات قامت بسلامتها نطت من بيتنا للبيت اللى جنبنا إلا إن القدر لعب لعبته ووقعت بسلامتها فى منورنا اتكسرت رقبتها بينى وبينك صعبت عليا فبضحك مع ماما وبقولها أهو علشان تحرم تبص لديك الجيران ولا يمكن هتلاقيها مش عجبته فأخدت الطريق الأسهل الانتحار وبئس المصيرى يالا الله يرحمها عملت فيا معروف وماما بطلت تربى طيور ههههههههههههههههه

تقريبا ياتيما الحيوانا والطيور فقدت الأمل فى البشر ده احنا طلعنا نطهق بلد هههههههههههههه

دمتى بكل الخير والحب والسعادة ومنعزكيش فى أى قطط

السلام عليكم

لكن أين ومتي انقضت الست أروح الاخري

البقاء لله وحده

وتعيش وتربي-بعد كده كهربوا المنور مثلا

لا بجد انا زعلانه بحق وحقيقى
عشان افتكرت مأساتى مع القطط
انا ربيت قطط بعدد شعر راسى
ولما بيموتوا او يمشوا بيحصل لى
شرخ وحزن عميق فى نفسيتى
فكرتينى دلوقت حالا بحيبيبى مشمش
اللى ماما دبحتنى بسكينه تلمه وسربته
وهو ياعينى شيراز يعنى الشارع بالنسبه له هلاك
ولا المرحوم راشد اللى مات وسابنى لوحدى
تصدقى رغم انوا قط يعنى مش من بنى البشر
بس كان بيفهمنى ويسنمعنى
وكان مالى عليا حياتى
وانا من بعده وحيده
قصره....فداكى يااحلى فاتيما

ههه اضحك الله سنك
اختلطت علي المشاعر في هذه التدوينة بين الحزن على الفقيدة خصوصا وانها حامل وطريقة موتتها كانت بشعة وبين الضحك والابتسام من طريقة سردك للموضوع
ياستي ربي يرحمها برحمة القطط ويعوض على ميزو اللي تنسيه شيري وتخليه يقول هو انا كنت شفت قطط قبلك
تحياتي وودي حبيبتي

والله بجد قلبي وجعني عليها
انا بعشق القطط ... ويوم اسود لو امر يوم من طريق وتكون فيه قطه دايتسها سياره ... اوصل الشغل وانا مش شايفه قدام من البكاء

انا حزينه بجد عشانها :(((

عااااااااااااااااا

فاتيما انتي فكرتيني بقطتي لما ماتت عاااااااااااااا

ههههههههه والله دمك زي العسل
علي الرغم اني مش بحب القطط وباقرف منهم أساسا بس زعلت علي قطتك قوي والموته البشعه اللي ماتت بيها ...زمان ميزو الجبان ولا في دماغه وفلت السافل بعملته ...تحياتي
ولاأراكي الله مكروها في قطقوطه أخري لديكي ....

اهىء اهىء اهىء

يعنى اجى عندك يا ست انتى بعد غياب بوستين

الاقيكى ناصبه عزا يا ست انتى طب اعمل فيكى ايه
اعيط و لا اضحك و الا اجى اعضك و اخربشك من باب التعاطف الانسانى

منجيلكيش فى حاجه وحشه يا تيما يا حبيبتى و ربنا يجعلها اخر الاحزان
و من هنا اؤيد بسكوتى فى اللى هيا قالته كله

طخ طخ طخ
احم احم احم
هنا وكيل نيابة جمهورية القطط الاليفة
نحن وكيل نيابة واندا نقوم باستجواب المتهم ميزو فى التهم الموجه اليه بالتخلص من القطط الحريم كلها فى ظروف غامضة

س: ما قولك فى المنسوب اليك من تهم بالتسبب فى تسريب و تطفيش و انتحار القطط الحريمية فى بيت الحاجة ام فاتيما ؟
ج : نو نو نو
س: دفاعك ده مش حينفعك قصاد المحكمة قر و اعترف احسن لك و الا نحبسك فى غرفة الفيران 3 ايام على ذمة التحقيق :-)))
ج : ننننننننننننننننننننننننننو

:-)))))))))
فطوم بصى انا شكه فى ميزو بصراحة
مش معقولة الصدف القططية المش سعيدة ديه كلها :-)
الحل جواز المسيار و الا جواز المعرف ايه الى بتاع كل واحد عند اهله ده
يعنى تدورا على بيت فيه قطة بنت حلال و تفقوا مع اصحبها على جوازة قصيرة المدى و القطقيط بالنص :-)

اللذيذ انى لسه رجعة من بيت فيه كلبة و قطة و القطة مخلفة ثلاثة اخر شقوة و هيصة

معلش يا فطوم تعيشى و تربى غيرها من بنات ميزو الى حيطلعوا عنية
الا انتم جبته علشان قطة ( حصل للعروسة الاولى ايه ؟؟)
و بعدين بتجيبى العيب فى الحريمات ليه ؟ و مبرئة القطط الردلة ؟؟؟

رجعالك بعد قراية الاصطباحات
:-*********

صباح القناديل
يا سلام ايوه كده شوية كلام عن الناس الى تستاهل الكلام مش كله فى الى ميستهلوش

صباح الإعتصامات
الناس لا لاقية شغل و لا فلوس و لاقية بس الغل و النار جواه ربنا يستر على الكل

صباح الإستغراب
مش فارقة قوى الفرق النتيجة

صباح التوفيقيات


هذه هى الشروط
و من يصب فى حادث دونها يمزح أو هو غير جاد بالتأكيد
يانهار اسود صح
المقال للاسف كله صح :-((

صباح تبادل الاراء
:-) يعنى هى كتبه انها خايفة
و بعدين بتختم بعبارة لا تليق انها تكتبها

صباح النفاق
:-)))))))))))))))))))))))))))))))
حسابه البنكى للتعريف طيب فين الرقم القومى ؟؟

صباح الخيرات
اعتقد هنا فيه اختلاف لمعنى كلمة عدالة هو فاهمها معاجلة و هما فهمنها تعديل :-) و كله من ع د ل

صباح الطاهريات
أن ينتصر وزير الطيران للشركة المصرية علي حساب الشركات العالمية الضخمة؟؟؟

صباح الحزن
تقريبا الى خربوها حيبرروا ده بحمايتها من الطمع

صباح الناس الصادقين
عقبال الى يقول اسف يا حفيدتى

صباح التخاريف
مصطلح البوية ده جديد :-(( بداء يلطش فى العرب :-((

صباح الكهن
نعم :-(0000

:-))بعد التدوينة المؤلمة اللي فاتت ضحكتيني
اشكرك
:-))

الله يرحمها يا اختي ويعوض سي الاستاذ ميزو خير

مش عارفه ايه حكاية القطط الى بتمشي على الحبل دي يا اختي

قدامنا واحد مربي قطه برضه
وبتمشي على السور
وافضل اقول القطه هاتقع عاااااااااا ورضا يقولي لا هى واخده على كده

هههههههههههههههههههه

لازم اضحك الاول يا ماما

ههههههههههههه

والله بوست زى السكر

بصراحه باكره القطط جدا ومع ذلك طلعت عندنا السطح لقيت قطه بنت حلال
والده بتاع 7 قطاقيط نونو ومع انى باكره القطط جدا بقيت اطلعلها اكل من غير ما اقول لحد لانهم بيقرفوا بغباء من القطط
قوم ايه القطط مش راضيين يمشو وشبطو على السطح عندنا ومحتارين نعملهم ايه
فايه رأيك ياماما لو اشحنهم عليكى
يعوضوكى عن شيرى وبدل الشيرى يبقى عندك 8 شيريهات ههههههههههه

بجد حضرتك عسل اووووووووووووووووووى
بحببببببببببببببببببببببببببك

معلش بقي يافاتيما ربنا يعوض عليكي ويخلف عليكي الخلف الصالح
هههههههههههههههه
.............................
ميرسي جدااااااااا علي سؤالك
انا كويس وزي القرد
واسف لاني قلقتكم وازعجتكم (ولو اني مش متعود اني اتأسف علي الازعاج يعني (^-^)

هههههههههههههههه

وانبي انتي عثل

الله يرحمها شيري هانم ^_^

لالاالالالالالالا
انا لامومكن اصدق الكلام ده ابدا...
اكيد الجريمة دي بفعل فاعل...
انا هبلغ الحكومة ... واليحصل يحصل..

ههههههههههههه

لا دي موش دلع... ميزو شكله ماينطقش بقا :))

البقاء لله يا ستي ... ومانجلكيش في حاجه وحشه تاني

وانا اسمي مروه علشان النيك نايم بتاعي :)

تحياتي

انا عرفت السبب مين
السبب ميزو يا فطوم هو اللى مش بيعيش ليه ستات

وانا هبلغ عنه انا قولت ليكى اهه
وممكن اقول انتى اللى مسلطاه
ههههههههههههههههههههههههههههه

شوفى بقى هيتحكم عليه بكام وعليكى بكاااااااااااام

وحشتينى اوى يا حبيبتى

هههههههههههههههههه

ربنا يرحمها

طب تاخديني انا مكانها ؟؟؟؟

بصرف النظر عن ديناميكية وقو القطط على بوز اللي خلفوها


تعمير البيت يستلزم أتنين

واحد بس ما ينفعش حتى لو افنى نفسه في محاولته هيفشل

سيد سيده

صح

فكري كدا

الباقية في حياتك
عمرها كده بقي
يمكن عشان تجيبي غيرها

يا حبيبتي يا طمطم

البقاء لله فكرتيني بـ بيري قططي بس بيري منتحرتش لالالالالالا

بيري اتقلت بفعل فاعل وانا مش مسامحة اللي كان السبب اللي وداها عند خالتو علشان بيخافوا منها

علي فكرة انا بصرح اني مش بطيق الواد ابن خالتي الصغير مع اني انا اللي مربياه بس تربية مش تمام بصراحة :)

كل ما يشوف حاجة عاوزها مش عاوزة زيها لا هي
عاوز موبايلي وكل شوية يقولي تبعيه ؟ ناصح قوي وعاوزني اقوله من غير فلوس يا حبيبي واطلع الشريحة وادهولة بس بعينه

وفضل يزن علي قططتي لحد مخدها وماتت عندهم

عاااااااااااااااااا حاسة ان ذنبها في رقبتي علشان مكنش لازم اديهاله بس ماما تضامنت معاه ومش بترفضلة طلب

ومن الرغي دة نسفيد ايه بقي ؟؟؟

أن انتحار قططك وقلة عقلهم وهروبهم أرحم بكتير من انك تشاركي بشكل مباشر او غير مباشر في موتهم

:((((

وحشاني يا بطوطة ومليش دعوة بقي انتي تجيي بالسلامة من إسكندرية واشوفك هه

احسن افضل اعيط علي سلم المدونة من هنا للسنة الجاية

حااااااااااااااااالة
اجتماعية
!!!!!!!!!!!!!!!


بحبك
وطبعا فطست على روحى من الضحك
وفى نفس ذات الوقت
كنت بقكر فى كل كلمة مكتوبة بين السطور

بحبك

مشموشتك

ياستي البقاء لله

ونونو

ان شاء الله تيجي ست ستها

وتعمر وخلف وتبهدل الدنيا برضوا

ماهو مفيش قطط بتقعد ساكته هنقول ايه

بس يالله

ومنجلكيش في حاجه نونو

معانا امر بضبط و احضار المتهم ميزو النيزو كونيزو
بتهم تطفيشية و تكفيرية لقططيطية الحريمية
سلم نفسك يا ميزو المواء لن ينفعك و البربشة و التمطع لن يجدوا معنا

المنزل كله محاصر :-)

عندنا شهادات من شهود قطط حريمية سمعت لشكوى القطط التى تم تطفيشها و تنحيرها من المنزل و كل مياو مياو متسجلة
سلم نفسك :-)

ندخل فى الاصطباحات بس بدرجات

صباح التصريحات اللى زى وشهم
حساكى عايزة تشتميهم
اكثر حتة ضحكتنى لما اسندولهم مهمة و قالوا ده دليل على ثقة المجلس و انجازات اللجنة :-)))))))))))))))))))))))))))))))))))))))))))))))))))))))))))))))
مش بلندا برضه اغلب الاسندات بالعمل علشان تحلى من دماغهم

صباح الهويديات
جميل ايه المقالات التفاؤلية ديه
بس موضوع لجنة الاغاثة عارفها من زمااااااااان
بيخذوا مننا تبرعات اجبارية كل من نخلص ورق فى النقابة :-) الخير حلو بس الاجبار وحش

و ياترى مركز محمد غنيم دلوقتى بعد ما سابه و طلع معاش اخباره ايه ؟؟؟؟

صباح الحرية
و ادى قصة تفاؤلية ثانية :-) مشابه لقصة مزرعة الحيوانات بس بنهاية سعيدة

صباح الإنتخابات
تفرق؟؟؟؟ احمد عن الحج احمد عن سيد احمد عن مستر احمد عن حمادة عن توتو ؟؟؟

فاتيما حرام عليكي

مش عارفة اقولك انا ضحكت ازاي والبرد اصلا مجنني وماما افتكرتها حالة جنان نتيجة مذاكرة ما قبل امتحانات ثانوي عام

البقاء لله وبسبب الحادثة ديه انا مش هجيب قطة انا مش حمل انتحار كفايا

هههههههههههههههه
عظم الله اجرك - لو ينفع تنقال يعني
ايه دا يا بنتي
لا بس انا هقولك الحكاية غير كدة خالص
انا من ملابسات القضية
اتفزلكت وعرفت ان السيد مميزو
وشه نحس جداااا .. مهو يا كدة يا هو اللي بيوقعهم !!
ههههههههههههههههههههههههههه
لا بس بجد يعني تعيشو وتشترو غيرها بقا :)
انا على فكرة كنت بخاف موت من القطط وبعدين حصل موقف بقيت احبهم جدا واول قطة كانت عندي من بتاع 5 سني اسمها مرمر .. ومقولكيش كانت ذكية اد ايه .. هخبقا اكلمك عنها في بوست لوحدها .. اصلها مستاهلها بوست ..
وبعدين من كتر مبتخلف وبتروح تتجوز بقا برا مع ان والله بنجبلها ابناء سولالات
بس ابدن ديل القطة عووومره ما ينعدل برضو
واهي راحت ومرجعتش يا حبة عيني من يجي 6 شهور المرة دي

يلا بقا :)
جيبي وحدة تانية و اقفلي المنور دا ولا شوفيلك حل
وانا بقول ترمو ميزو بقا عشان له يد في الموضوع دا .. هو معفن ولا ايه ؟؟؟

فاتيما
انا كنت بقرى البوست تانى اصله عاجبنى اووووووووووى

وانا بقرى البوست ياختشى
جه على دماغى سؤال غريب

قال ايه
انتى بتقولى انها ماتت هى و6 النونوهات اللى كانوا فى بطنها

الا انتى عرفتى منين انهم 6
عملتوا سونار يعنى ولا فتحتوا المندل ولا ايه؟؟

ارجو الافاده
ههههههههههههههههههههههههههه

فاتيما
انا بالذات في مثل هذا الموقف ماينفعش اقولك غير كلمه واحدة : يلا خدت الشر وراحت
ههههههههههههه
ان شاء الله اشوفك على خير يوم السبت الجاي
تحياتى ليكي يا صديقتى الجميلة

السلام عليكم

ولا يهمك ان شاء الله ربنا يرزقكم غيرها تملا البيت عليكم نونوة ..

معذرة يا ام يوسف ملاحظة بسيطة اعرف انكي ستتقبلينها بصدر رحب ..واعرف انك لا تقصدينها ( و بتخانق بكل أدب مع الملايكة على آخر معلقة ف طبق الرز بلبن و مين هيسيبها للتانى ) فالملائكة لا تأكل ولا تشرب ولا تتخانق ..

تحيتي

السلام عليكم

على فكرة يمكنك عدم نشر التعليق ومش ها اكون زعلان ابدا واحبز ذلك .. لان الملاحظة لكي انتي وليست للاخرين ولو اعرف الميل لارسلت لكي عليه الملاحظة ..
معذرة مرة اخرى

صباح القسوة وصباح الأسئلة
:-( جايز مستنين نقلبها سلطنة الاول ؟

صباح النوم ع الأرصفة
يعنى علشان الزيارة ؟؟ غريبة هنا المظاهرات مظهر الدول بتتباهى بيه بدميقراطية حكومتها

صباح الروقان
تخيلى انهم متقبلوش الا طول حبسهم الا مرة واحدة و ساعتها اتقدملها
بصراحة حركة اخر رومنتييكية مش بعيد بعد كام شهر اشوفها فى فيلم

صباح القمصة
:-) مفهمتش ايه الى مزعلهم و الراجل ده مش حبيطل كلام و يشتغل شوية يطلح الخراب الى عمله ؟

صباح التخاريف
شكله محروق قوى من ثمن الاشعة الى دفعها :-)

صباح الرومانسية
:-) عارفة لما تخرجى من الجنة تعرفيها بجد اعتقد انه كتب الكلام ده لما بداء رحلة ةالسفر والترحال
انا برضه بفتكر كل جنة كنا عايشين فيها قبل ما اجى اعيش فى الى بيقولوا عليها الجنة والى الناس بتحسدنى عليا

تفتكرى علشان كده ربنا خرج ابونا ادم و امنا حواء من الجنة علشان يقدروها ؟؟؟؟

صباح الخير
معلش اصلى من الشغل و الذى منه خلصت امبارح :-************************************
:-XXXXXXXXXXXXXXXXXXXXXXXXXXXXXXXXXXXXX

بس بس بس بس بس :-) ميزو انت لسه هربان ؟؟

وحدوووووا الله .
كلنا لها .
هي من السابقون ونحن من اللاحقون .
وهنيالك يا فاكر ربك .
والبقاء للملك ولا ملك إلا هو
الحل انكوا تغيروا البيت .
طب ما تفكري تجيب سحلفة علي الإقل تعيش ومتطلعش علي السور ..
وافرضي انها حبت تترسم وتطلع لو وقعت مش هيحصل حاجة يعني ..
ومن هتلحق تهرب علي الأقل ..
وبالمرة خلي الواد عتريس تبعكوا يلعب بيها تونسه .

وانا علي فكرة مش شاكك فيه .. لان المتهم بريء حتي تثبت إدانته وانتوا متعرفوش وقت ارتكاب الجريمة .. لذا اطالب بالإفراج عن المذكور " ميزو " حسب القانون الجنائي .

أما عن حيثيات .. فأطالب بدفن المتوفاة بأسرع وقت ممكن لأن ممكن يتطالب بالتشريح واكرام الميت دفنه .

كما أطالب باحالة القط " ميزو " لدكتور نفساوي لأنه يقلب امه تلاقيه مقهور .. والبحث عن حد يكون عامل عمل في رجل نمله والا حاجة ..

تحياتي لكي .

ولا أراكي الله مكروها في أحبائك ..

البقاء لله فاتيما
تسمحى لى أجيب ميشا و نيجى نعزى
يمكن تعجب ميزو و نلمهم المرة دى على بعض فى الحلال من أولها ، و ليكى ياستى كل المحصول هدية منى .... قصدى القطاقيط الصغيرة .

جيت جرى أسلم عليكى ومش لاحقة اقرأ حاجة بس وحشتينى جدااااااااااااااااااااااااااااااا

ويادوب نزلت بوست عندى وجيت أرمى السلام وأجرى

وحشااااااااااااانى

هههههههههههههه عارفه ان الموقف ماسوي بس ايلوبك مخليني هموت من الضحك


يلا ربنا يعوض عليكي

ههههههههههههههههههههه

احسلك كنتي متجيبيش ردالة في البيت
ادي اخرة القطط الرجالة
هههههههه

تحياتي
وتقبليتني صديق للمدونة الجميلة

هههههههههههه
عسل والله يافاتيما ...

مع إن بجد قلبي وجعني من موتتها ..

أنا كل القطط إللي كنت بربيها أنا وأخواتي
كانوا برضو مش بيعمروا ..
كانوا يكتئبوا برضو وإللي تنتحر وإللي تطب ساكته
مش عارفه كان الغلط منا ولا من الزمن
هههههههههههههههه

على العموم لا يأس مع الحياه
هاتي قطه " بسه بلهجتي :) " تانيه عشان تملى البيت قُطيطات كتيييير :)

والبقاء لله في النهايه

يااااارب تكوني كويسه ومبسوطه ياتيما

وكل سنه وإنتي طيبه .. أنا عارفه إنها متأخره أووووي .. بس أنا ماكنتش بدخل كتير مؤخرا
وربنا يسعد قلبك وينولك إللي في بالك اللهم أمين ...

بحبك أوي في الله :)

... ;) ,,, ;) ...

كلها بكرة بس وبعده

واللى وعدنى هيوفى بوعده

بحبك

البقية في حياتك
انا قلت اخش اسلم عليكم
اصلي بقالي فترة مشفتكوش

بنت خالي الغاليه

صباح نضيف شريف خالي من كل معكرات الصفو

اولا البقاء لله

ودي نهايه اللي يمشي في الغلط

قطتكم لو كانت التزمت المباديء

واستنت ابن الحلال يجيلها بشكل رسمي

مكنش ده بقي حالها

وبعدين الانتحار هنا يفسر

في خانه قتلت نفسها

حتي لا تفضح امرها

وكان هيتعمل دي ان ايه

وهتبقي سيرتها بين القطط مهزله

ففضلت انهاء حياتها بدرامتيكيا قططيه انتحاريه لولبيه وضيعت فلوسكم ع الارض
يلا ملحوقه بس انتو خلو بالكم ابو القطط اللي ماتت لانه
مش هيسكت وهيحصل مراته
لاتبعوه يا تجوزوه يا تسربوه والاولي يدبح وتأفوروه

___________


جاي ان شاء الله اسكندريه طبعا معاكم هو انا اقدر افوت يوم ام يوسف هتكون معانا فيه

بس هاجي لوحدي

وهحصلكم باذن الله علي هناك وانا لما خالد اتصل يكلمني قولته ليه

اشوفك في اليكس علي خير

فل عليكي

واجمل صبح عرفته البشريه لبنت خالي الجميله

عاااااااااااااااااااا
مش ملاحقة اقراء
متشليش الاصطباحات
ححاول الحقها النهاردة
ممكن تزودى عليها

صباح الخير
:-********************************
:-XXXXXXXXXXXXXXXXXXXXXXXXXXXXXXXX

بداية كدا
تعليق مجمع لكل الاحباب

أنا
اسففففففففة جدا
لأنى إتاخرت ف الرد ع التعليقات

معرفش يرسموا ازاى وش مكثوف
و باصص ف الأرض خجلاااا

بس هسيب الحكاية دى
للتخيل ..
يعنى تخيلونى باصة ف الأرض خجلاااا



أسفة للتأخير تانى
و شكرا لكل اللى إتوغوش عليا
و بعت ايميلات
نحن بخير يا جماعة
قلبكو روهيف ليه كدا !!

Ana keda
--------

إزيك يا ميرووو

أيوه يا اوختشى
قطيعة

مبيجيش من وراهم
غير تعب القلب


وآل على رأى المثل
يا جايبة ف البيت قطات
يا شايلة الهم للممات


بوسيلى بيدو
و قوليله طنطتك فاتيما
بتقولك وحشتنا يا واد
إطلع بقى ..زهقنا






мαησηα
------

أيوه طبعا
الحمدلله اننا عرفنا اراضيها فين ؟


بدل ما كنا نقعد نستناها
و نتعلق بأمل
انها راحت تجيب ورقة بوستة
و راجعة تانى .. مثلا

او يكون خطفوها
بسم الله الرحمن الرحيم
اللهم ما أحفظنا ... مثلا


او ركبت مركبة فضائية
جرشت لدقايق
على سطوح عمارتنا .. مثلا


أو أى حاجة بقى من عينة مثلا

و دماغنا تروح ف ألف حتة


عموما
اللى بيربى قطط عارف المواكف دى
و عشان كدا
نو نو
محدش واخد منها حاجة
زى ما قولنا



بوسات و حضونات
يا منونتى





richardCatheart
---------------

ماهو اختك فاتيما كدا ف الملمات
و النوائب يا قطقوطتى


تلقينى اقلبها ضوحك و اهزر
وكفاية نكدت عليكو
البوست اللى فات


و بعدين اصلها
مش اول حادثة
و لا اول قطة

خلاص جتتى نحست يا اوختشى
و بقيت ابصل لكل قطة بنت
تدخل من باب الشقة
و اقولها
يا ترى نهايتك
عندنا هتبقى ازاى


تصدقى
أن اللى أتعقدت أهو
مش اخويا بس !!

و الربط بين حريم القطط و حريم بيتنا .. مش انا السبب فيه و الله دى نظرات طنطتك ام فاتيما ..علطول مخيبين املها و مش محتاجة تنطق ..انا بحسه ف عيونها
و عنده حق و الله
أصل الخيابة دى ليها ناسها
و نحن ناسها يا حبيبتى



انا كمان بحبك
يا قطقوطتى




thunder
-------

ههههه
ل أضحك على راحتك يا ثندر

و بعدين انا قولت لأمى

بصى
احنا نأجر البلكونة دى مفروش
لأى حد
اخوانا البعدا
عاوزين يتخلصوا منه ...


بدل ما يبعتوه لندن
و يكعوا دم قلبهم ف مصاريف رجوع الجثة و خلافه


ييجوا يحدفوه
من عندنا ارخص


و احنا مش هنغلى عليهم ف الأسعار
أهو كله يسترزق
و نطلع م الحدوتة دى
بسبوبة كويسة

نجوز بيها ميزو
و اصحاب ميزو كمان

نورتنى يا عزيزى

saragebaly
----------

ميصعبش عليكى غالى يا سارة
انتى تنضمى لحلف بسكوتة بقى
اصلها مبتحبهموش برضو
و بتقلق منهم

و مصطفى ريان كمان

ايه يا عيال ؟؟
دا القطط غلابة
و بيوقعوا من الحادى عشر أهو
يعنى ميتخفش منهم

عموما يا ستى مشكرين
على واجب العزاء
و منجليكوش ف حاجة وحشة أبداااا





Baskouta
--------

لا يا بسكوتى أسفك معاكى يا حبيبتى
انا عارفة مشاعيرك ناحية القطط عموما و مفيش حاجة

بس تعالى هنا
بالونات و طراطير يا مجرمة ؟!!

و ايه الصورة التحفة دى ؟؟

انا اول ما فتحتها قعدت أضحك أضحك أضحك لحد ما عينا دمعت ..
اللى يشوفنى و انا قاعدة بضحك قصاد الجهاز يقول الست دى أتجننت م الزعل ع القطة و لا حاجة

اتارينى بضحك على تلغراف العزاء البساكيتى الفظيع دا
ربنا يسعد قلبك يا حبيبتى




خالد همس الاحباب
--------------
آه يا خالد
أدى حال الدنيا نعمل إيه؟؟

لأ يا عم الناس بتوع بنك مصر دول ربنا معاهم و ياخد بيدهم يا رب

و مين دا اللى مش عارف يربى شابى ؟؟

دنتا تربيها و تربى عشرين بنت معاها يا خالود .. ربنا يخليك ليهم
و لينا

و عاوزين لو سمحت آخر تفاصيل السفرية عشان الشعب بيسأل هنتلم فين تحديدا ...ماشى؟؟

سلام مؤقتا يا اغلى اخ




just waiting
------------
ازيك يا تيتو

هوه يا حبيبتى الحادثة مؤلمة
دى لا جدال فيها
بس انا لو كنت شوفتها ..اكيد مكنتش هكتب البوست بالشكل دا
كنت هكتئب و اكتبه حزاينى

عمرها وقف لحد كدا
و ميرسى يا حبيبتى منحرمشى منك





ستيتة حسب الله الحمش
------------------

آه و النبى يا ستاتيو

كانت جيالنا شمعة منورة
و بنوتة كدا دلع و مياصة

مفيش شهرين تلاتة يا اوختشى
و حولت على عبلة كامل كدا
ف مسلسل ريا و سكينة
بقت تضربه و تتخانق معاه
قصاد طبق الاكل و تلطشه و مناظر كدا مش حلوة


فعلا يبدو انها كانت داخلة ف سكة أوكتئاب و احنا مخدناش بالنا
قولنا حامل لاول مرة بقى
و الهرومناط مبوظة نفساويتها

اتارى الموضوع كبير

على فكرة
بعيدا عن ان الحالة طبيا موجعة
لكن لفظة
تناذر كسرة القلب
دا
جميل و حزين
و شجى قوى

رومانتيكى كدا

و ربنا يستر
و ميعديناش احنا نون النسوة
و لا حاجة
محنا قلبنا مبيتوصاش


بحبك قوووووووى
و ربنا يكرم مانوسة
و تعدى متلازمة امتحانات آخر السنة على خير
هيا و مامتها ست السوتيتات
كلهن





re7ab.sale7
-----------

الله
انتى من هواة تربية القطط يا رحوبة
انا برضو لما شوفتك قولت البنت دى فيها حاجة مميزة ..اتاريكى زى حالاتنا مغرمة بيهم

و ربنا يسهل ان شاء الله
احنا بس نعدى الأربعين
و نفوق م الصدمة
و بعدين نقعد نتمحلس للحاجة ام فاتيما لحد ما توافق
و نروح نجيب قطة جديدة لسى ميزو
و ربنا يستر و ينفخ ف صورتها

منحرمشى منك يا حبيبتى
و لو مفيش امتحانات حاليا عندكو
و فيه امل نشوفكوا ف اسكندرية
يا ريت
متتأخروش علينا
ماشى؟
بوسات وحضونات يا حبيبتى




الزهرة البرية
------------
ليه بس يا جودى
و الله ما عملنا حاجة دى كانت مدلعة دلع رهيبى انا صاحبتها مبتدلعوش

و أصول يلغوا المناور م العمارات
لأنها بتعمل مشاكل جامدة أهو

بوسات و حضونات يا حبيبتى



hasona
------
و عليكم السلام يا فندم

الحكيكة معرفشى

بس يعنى هما حداشر دور
و عليهم أول دور محلات
يعنى 12

فلو كل دورين طلعوا روح
يبقوا اتنين ع ال 12
ستة

غير السابعة اللى موجودة أصلاً
و راحت أول ما انزلقت رجلها من فوق السور

ونكهرب المنور ؟؟
الله يحظك يا شيخ

بس طب ما هى كدا
هتموت محروقة ؟!!!




الشوكة الناعمة
--------------

معلشى زعلتك يا شكشوكة
بس يا حبيبتى اختك فاتيما قعدت هيا روخرا كمان تربى ف قطط بعدد شعر راسها لما خلاص بقت متوائمة مع أى حوادث و حاجات تحصلهم

و فعلا منهم قطط بتكون زى البنى ىدم

الواد ميزو كدا
نظرات عينيه كأنه فاهمنى لما بكلمه
و حافظ خطواتى و خط سيرى انا و ماما و ماجد و ممكن يسبقنا على المطرح اللى هنروحه و كأنه بيقرى افكارنا
و وقت زعلنا ييجى يقعد جنبنا و كأنه بيواسى بس صمتا

البت شيرى كانت براوية و يمكن عشان كدا متعلقتش بيها قوى
بس الحادث جلل برضو
و ساعة القدر محدش بيعرف يستخبى

و قولنا
نون نو
محدش واخد منها حاجة

نورتينى يا شكشوكتى

خواطر شابة
----------

يا حبيبة قلبى يا خطورتى
عارفة ؟
احساسك هوه نفسه اللى جالى اول ما لقيتها ممدة ع الأرض و انا ببص عليها من فوق كدا ...كذا احساس أختلطلوا ببعض ما بين زعل على البيبى اللى ف بطنها
و الشفقة على موتها بالشكل دا
و الضيق لأن ماجد متعلق بيها و بيحبها
و الغيظ لأنها وقفت عالسور كدا
و القلق ان يطلع علينا سمعة ف العمارة اننا قاتلين قططة

كدا

بوسات و حضونات يا حبيبتى





سارة
----

معلشى يا سارة
انا عارفة ان قلبك روهيف يا حبيبتى
بس انا نكدت عليكم البوست اللى فات
و محبتش انكد كمان المرة دى
يكفى ان باطن الخبر مؤلم
حقك علياااااااا
و دا عمرها يا حبيبتى
نعمل ايه بس قصاد كدا ؟

راسك ابوسها بقى و متزعليش




هوبتى
----

منا قولت
لا عزاء للسيدات
عشان عارفة اللى هيحصل

العياااااط هيشتغل
و كل واحدة تفتكريلى قطتها بقى
و تخرطوا على قلبنا كام كيلو بصل ..

خلاص يا ستى
نجاملك بعيوطة احنا كمان
عااااااااااااااااااا




البنفسج الحزين
------------

ازيك يا بنفسجاية

آه يا ماما
انتى عارفة الراجل اول ما مراته تفلسع م الدنيا

اصلا يا أمى دا بيبقى واقف ف العزا و بيعييييييط و عمال يحضن ف الناس اللى جاية تعزى

بيعيط م الفرحة
و مش مصدق انه خلص م المودام طبعا
فبيقول للناس تحضنه عشان يعرف انه صاحى و انه مش بيحلم

نورتينىىىىى
و حمدلله على السلامة





صيدلانية طالعة نازلة
------------------

طب بتعيطى ليه دلوقتى
يا ست انتى !!!! ؟؟


وخلاص انضمتى
لحلف بسكوتة الاطلنطى ؟؟


ماشى


عددكم كتر قوى
و هبتدى اقلق كدا

بوسيلى العيال
و سلامى لدكتور اشرف




wanda
-------
اهلا بالحابيب
اللى بيهلوا ورا بعضيهم


حلو قوووووى يا سعادة الباشا التحقيق دا
بصراحة
ميزو محطش منطق و معرفش يرد

و قطة الفيران أيه؟؟
دنتى كدا بتدخليه الجنة يا ماما

قولى اوضة الكلاب ..تمشى


و لوزة اللى جبناها جالها مرض جلدى تقريبا و مشيناها ..على ما اذكر اصل الحكاية بقالها مدة

و هوه اللى قعد ف الآخر اهو
و على رأى ماما ..ما يقعد على المراود غير شر البقر

ملوش لازم امر الضبط و الاحضار
ما هو ملقح ف البلكونة
و لا الهوا و كا، اللى ماتت دى
قطة و لا تسوى


و بخصوص الصباحات القديمة

ربنا يا حبيبتى يرجعك لقارورة عطرك قريباً و الناس يا حبيبتى بتحسد لأن كل شىء بعيد و مش ف ايدهم بيبقى مرغوب و حلو ..محدش بيحس قوى غير لما يجرب بنفسه و مش كل حد على فكرة بيتغرب احساسه بيبقى متقد كدا
دى ليها علاقة بطبيعتك الإنسانية
انتى حد حنين و بيرتبط بالاشياء و لا العكس ..ربنا يردك لينا بألف مليون سلامة يا ونادتى

و بخصوص الصباحات عموما
احنا قافلين جمعة و سبت و براحتك ف القراية ع الآخر

******************************************************************************************************
و ××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××
يا ون ون


و العيب مش فالحريمات يا ونداتى
انا بقول بختهم
هوه اللى معيوب

بنت القمر
---------
امااااانى
أزيك يا حبيبتى ؟؟

انا اللى بشكرك انك قولتى كدا
لأن فعلا كان سبب من اسباب كتابتى للبوست دا بالشكل دا ..انى امحى نكد البوست اللى قبله

أنا كمان
:-))))






ندى الياسمين
----------

دى غية يا صباصيبو
متعرفيش كان نفسهم يشتغلوا ف السيرك و منفعشى و لا إيه؟؟

انا عاوزاكى بقى تتفرجى على القطط لما بتلعب بكورة صغننة كدا و تجرى وراها شوية ...يعنى منتخب البرازيل يقعد يتعلم منهم المهارات اللى على أصولها ...سبحان الله القطط عندها لياقة غريبة
بس العبط بقى ..لما يتغروا ف نفسهم و يقفوا على سور و هما حوامل و فاكرين انهم زى الاول خفاف خفاف


تعرفى
القطط البلدى ذكية جدا
و السيامى ذكى شوية
الرومى اقل ف الذكاء
و الشيرازى بروتات تقريبا مفيش مخ

ميزو سيامى
عشان كدا مخه كويس
مبيوقفشس على سور البلكونة الرفيع دا خالص و بيروح يوقف على السور العريض بتاع بلكونتى أنا
و ميوقفش كتير برضو ..
يا دوب بس ثوانى يشوفنى ببص
على ايه ويروح نازل علطول
آه بقولك .. واعى

سلميلى على الاستاذ رضا و العياااال
بحبك قوووووى يا صبصوبتى





ليس فقيرا من يحب
--------------

يا لهوتينى يا رانيااااا

8 شيريهات ؟!!!

دى الحاجة ام فاتيما ترمينى انا م البلكونة ساعتها و لا عزا و لا خرابة و لا تونة و لا حاجة خااااالث

الطيب أحسن
و هيا قررت معاقبة ميزو و حرمانه من لقب متزوج لمدة
و جارى اقناعها ان شاء الله
بعدم تمييل بخته ...كفاية الحريم
هيبقوا الردالة كمانى ؟!!

انا كمان بحبك يا حبيبتى
و منحرمشىىىىىىى منك





Manamino
--------

يا عم لا تأسف على أى أزهاج
لأنك مش أزعجتنا منك

انتا ازعجتنا عليك بس
و هذا النوع من الازعاج ..على قلبنا زى العسل و موافقين ..بس تطمنونا بتعليق زى اللى انتا كتبته دا دلوقتى ..فنروح ساكتين

ربنا يريح قلبك

و يا ريت
اى لقاء تدوينى قادم ..
لو ظروفك سمحت تحاول تيجى
عشان مفتقدينك
وانا شخصيا مفتقدة قعادك
و صمتك و نظرتك الطيبة
ماشى؟

طيييييب




أعقل مجنونة
----------

و انتى سكرررررر

منجليكوش ف حاجة وحشة أبدا

سمع هوص (abo 3li)
----------------

معلش يا سمع هوص
ينوبك فينا ثواااااب

عاوزين نلم الحكاية
ابعدنا عن النويابات و الأقسام الله يخليك بعدين ييجوا يلمونا احنا ..مش ميزو ..يقولوا علينا قتالين قططة

انتا يرضيك ذلوكا ؟؟!
عشان خاطر نانسى
و كعب جزمتها
الذى ينم عن أنوثة طاغية

انا حلفتك بالغالية أهو
اما نشوف




فتاة من الصعيد
--------------

هوه مبينطقش فلا يا مروة
بس من كتر الفرحة يا ماما

مش مصدق انه هيوقف قصاد طبق الاكل لوحده من غير خناقات
اصل الله يرحمها كانت مفترية قوى
نقول ايه بس
اذكروووووا محاسن موتاكم بقى

و خلاص عرفنا الأسم عشان ندلع بقى على أساسه

نورتينى يا رورى




حنين القلب
---------

يا لهوى ؟؟

عاوزة تجرجرينى وراه كمان ؟؟

أهون عليكى ؟؟

لأ أنا زعلااااانة

صالحينى بقى

لما أجيلكم عاوزة بوسة و حضن معتبر
عشان انسى اللى قولتيه دا

ماشى؟؟

هانت يا حبيبتى
و انتوا كمان وحشتونىىىىى
قوى
انتى و عمورى
بحبكم انتوا الجوز
♥♥




sweet angel
-----------

يا خراااااشى يا انجل ؟؟

يا بنتى بقولك البنات
بييجوا عندنا
بختهم يميل


اتهونيش عليا
قلبى ميطاوعنيش






مصرى جدا
-------

انا بتريقأ يا هانى
انما برضو الامر لا يخلوا من مصادفة غريبة ...دا حتى لما جبت عصافير ليوسف مرة ..طلعوا الاتنين رجالة
مبيعشلناش بنااااات

مش غريبة دى ؟

adel
----

يا لهوتينىىىىىىىىىىىىى

لازم يعنى تحصل عندنا
حالة وفاة أثر حادث مروع
عشان اشوف اسمك
منور صفحة التعليقات
يا شقاوة انتا ؟؟


طب دنا على كدا
معنديش مانع ابقى
قتالين قططة
و سفاحين سوفحة
و اموتلك كل يوم قطة
عشان اشوف اسمك علطول


فكرت ف مشوار اسكنكرية
و لا لسه الدنيا ملخبطة؟؟


يا رب تكون بخير
مفتقدة تعليقاتك جداااا
حمدلله ع السلامة
يا حتة من قلب مامتك

ميرا (وومن)
----------
الواد ابن خالتك دا
عنده كام سنة ؟؟


لو مضايقك قوى كدا
أقولك


متجيبيه
يوقف ف بلكونتنا شوية ؟؟




بهزر بهزر
بعد الشر طبعا


و من غير عياط يا حبيبتى
انتى كمان وحشااااانى جدااااا
و بصى بقى
اللقاء القادم هيكون المنصورة غالبا
و يوم جمععععععععععععععة
احنا هنشترط عليهم ذلوكا
عشان تعرفى تيجى ...ماشى؟
بوسات و حضونات
يا ست البنات





shimaa samir
------------

يا مرهفة يا قلب العصفورة
يا شاعرة يا فنانة يا حبيبتى
يا مشموشتى و عصفورتى الصغيورة

انا كمان بحبك
و سلامى لعصفورك الطيب
♥♥




ماجد العياطى
------------


نو نو
ف حياتك يا ماجد

و متقلقش على ميزو
ربنا يخلف عليه و علينا

نو نو
أدى حال الدنيا


و نو نو
انتا
نو رتنى





طالبة مقهورة ..درجة اولى
------------------------

سلامتك م البرد
و جنان الأمتحانات يا حبيبتى

و هاتى قطط متخافيش
و هعملك زى تصريحات الحكومة ف الاحوال دى و اقولك
دا حادث فردى ...
و القطة دى مختلة عقليا
و تنتمى لتنظيم القاعدة
بتمويل من ايران و حزب الله


ربنا يوفقك ف المذاكرة
و بالنجاح أن شاء الله
و بتفوق

" يـ ألوناتك ! "
-----------------

ازيك يا لونى


ان شاء الله نجيب واحدة تانية
بس ماما ترضى لحسن معصلجة خالص

و مينفعش نقفل البلكونات ف الحر دا هنفطس يعنى .. حراااام

و ميزو قد يكون دفعها الى إنتحار
لكن دفعها بنفسه م البلكونة
أشك

اصله مبيحبش ييجى جنب السور دا و بيخاف منه ..فأكيد مزقهاش بنفسه

هوه يعتبر محرض ع ارتكاب الجريمة
فماما قررت تعاقبه انه يقعد من جواز شوية ..لحد ما يتربى

هستنى بوست قطتك الجميلة
المعطاءة دى
بوسات و حضونات يا حبيبتى


mostafa rayan
-------------

يا صفص انا عارفة مشاعرك الطيب ناحية القطط عمومااااااا

انتا تنضم لحلف بسكوتة الاطلنطى
اللى بيكره القطط و يتمنى محوهم من الوجود .... ماشى؟

اشوفك على ألف خير يوم السبت
فرحتنى و الله بالخبر دا ..
انك جاى إن شاء الله

جنى
--

و عليكم السلام يا جنى
ليه منشرش التعليق ؟؟


انتا اخ يا جنى
و دايما تعليقاتك فيها الخير
محدش عمره بيشوف بين سطورك
حاجة غير كدا


و بعدين مش يمكن
لعل و عسى حد تانى غيرى
لما يقراه يستفيد
و تاخد انتا ثوابه ؟؟

انا عارفة يا عزيزى
ان الملايكة لا تأتى
بأفعال البشر .. اكيد

بس انا بستخدم مصطلح لغوى دارج
قد يكون غلط او خطأ .. اكيد


بس هوه بيستخدم للدلالة على الأستغراق ف النوم و لذته
مجرد شطح بالخيال مش اكتر
و اكيد مش مقصود بيه
العيب ف مخلوقات الله


بالعكس


لما كنت بحكى ليوسف حكايات ..
كنت بتكلم عنهم بشكل مشابه
لحكاية الرز بلبن دى ..
عشان يقرب منهم
و يحبهم رغم انهم مش متشافين


يعنى لما بقوله حكاية
ان الملايكة بتروح للأطفال
ف الاحلام تزغزهم و تضحكهم
و عشان كدا ممكن نشوف طفل بيضحك
و هوه نايم؟؟

فكرة ان الملاك بياخد البوسة
او السلام و يشيله على جناحه
و يروح بيه من حد لحد

فكرة الملاك
لما بيقعد على كتفنا اليمين
و الشيطان ع الشمال
زى افلام الكارتون
و يقعدوا يتجادلوا
عشان يقنعوا صاحبهم
و حد يغلب
و حد يتغلب ...



لكه افكار قد تبدو غريبة
لكنها بتقر الفكرة
و الكيان من ذهن الطفل عموما



و صحيح انا مش عيلة
و كبيرة اهو
بس ساعات بفكر بمنطق
طفولى بحت



الاقينى حاسة بفرحة
و رضا اكتر
جايز
او أكيد أكون غلط


بس مش حاسة انه حرام
و حاسة ان ربنا هيسامحنى لو حرام
لأن قصدى مش سخرية و لا تريقة
و لا عيب ف مخلوقات نورانية كتلك

بالعكس
دا حب فيهم


اتمنى متكونش زعلان من ردى

و الخلاف ف الرأى عمره
ما هيفسد الود بيننا اكيد

اختك فاتيما
الباصة دايما
ف طبق الرز بلبن
طمعا ف أكله
لآخر معلقة

MR.PRESIDENT
------------

يا خراشى يا بسام ..سحلفة؟؟

دنا اعصابى تبوظ يا بنى
انقهر كدا

دنا مكنتش مصاحبة شيرى قوى عشان كانت تقيلة و مبتتحركشى كتير
تقولى هاتى سحلفة؟؟

و متقلقش على ميزو
هوه معندوش اوكتئاب و لا حاجة
اصله متعووووود ..داااايما
زينا ع المواكف الاليمة دى
و جتته نحست ..

لأن المخفى
مفيش قطة بتعمر معاه


و مشكرين يا فندم
على واجب العزا

نو نو
منجليكوش ف بوست مشابه أبداااا






sharm
----

و الله اغلب زوار المدونة زى منتا شايف يا شارم بيربوا قطط و بيحبوها برضو زيك

نورت




أم بتول
-------

فيكى الخير يا بوتى و تعرفى الأصول

احنا من ناحية ميشا
نتمنى النسب دا و الله

بس الحاجة ام فاتيما حالفة ما تدخل عندنا قطة رومى و لا شيرازى تانى

عشان شعرهم مغرق السجاجيد و الأرض و هيا بتتضايق قوى م الحكاية دى

فقالت لو هنجيب تانى
تبقى سيامى عشان شعرهم قصير شوية

منحرمشى منك
و بوسيلى بتول قوى

طبعا مش هقولك تعالى اسكندرية
لأن الولاد ف عز الامتحانات بتاعتهم
ربنا يوفقهم يا رب
بحبك قووووووى





bos bos بسمه عبدالباسط
-----------------------

انتى كمان يا بسبسة
و لا يهمك يا حبيبتى

كفاية السلام
هوه دا شوية ؟؟

و ابقى اقرى على مهلك
بوسات و حضونات يا حبيبتى



صمت المشاعر
----------

يا حبيبتى انا فرحانة
انكم بتضحكوا كدا

أصل الخبر لوحده يزعل كفاية
عنكتبه كمان بزعل أكتر ؟؟

Haytham Alsayes
---------------

مينفعشى يا هيثم

محنا لما بنجيب قطة بنت

لازم نجيبلها قط ولد

عشان تتجوزه

عارف البيضة و لا الفرخة
و الحلقة المفرغة
و القصص دى


انتا نورتنى و اهلا بيك






ghAdA mOhsen
-------------

الغلط ف أحمد عز
يا غدغود

مش هوه اللى احتكر الحديد
و خلى العالم التانية تشحت

و راح مغلى الاسعار
براحته بقى
لأن مفيش منافسين


قوم لما هوه غلى السعر
بقوا الحدادين اللى بيشتروا منه
مش عارفين يكسبوا


قوم لما المقاول جه يشطب العمارة
راح لحدادا من اياهم
و قاله تعملى على قد الفلوس


قوم الحداد مسترخص
عشان ميكعش دم قلبه


قوم لما استرخص نقى ماسورة رفيعة

قوم لما القطة وقفت عليها
معرفتش تتوازن


قوم وصلنا للى احنا فيه دلوقتى

شوفتى بقى ؟؟


و انتى طيبة يا حبيبتى
كلك ذوق
أى وقت و لا يهمك
مفيش بيننا الكلام دا
كفاية تفتكرى و تقوليلى
كل سنة و انتى طيبة
و كتير عليا كمان قوى

بوسات و حضونات يا غدغودى





t3ban
-----

ازيك يا تعبان
حمدلله ع السلامة







هى و ظروفها
------------

يا ولييييييد

متظلمش البونية و بلاش النعرة الذكورية دى ف الحكم عليها

يعنى احنا نحط البنزيم حنب النار و تقولى هيا الغلطانة ؟؟

و بعدين يعنى مجبتش سيرة الذئب القططى سى ميزو و لا قولت عليه ربع كلمة ...
مش بقولك احنا يا ستات غلابة


و تعالى هناااا
ايه كل دا

كفاية تقول انا جاى و خلاص
ملوش لازمة تقول تفاصيل
و لا تشرح أسباب
و لو اننا هنفتقدك ف رحلة المرواح لأن صحبتك طيبة يا بن عمتى


ان شاء الله نشوفك ف اسكنكرية على ألف خير

تحياتى لسلمى
و متنساش تجيب صور الخطوفة عشان نتفرج يا واااااد

طيب وما فكرتيش ليه في ان المخابرات هي اللي قامت بالإغتيال ده؟ مش يمكن كان ليها نشاط سياسي ومخابراني وخافوا لا تكشفهم؟

أصل هو ده السبب الوحيد اللي بسببه بيرموا المصريين من البلكونة .. تقريبا يعني

يا مراكبى
---------

يا نبع الحكمة
ازيييييك ؟؟

و الله انتا بتقرى افكارى

انا لسه قايلة لماما امبارح الحكاية دى

قولتلها
احنا نأجر البلكونةدى
مفروش للى عاوز يرمى حد مزعله

بدل لندن
و السفر
و التحقيقات
و وجع القلب

عندنا الحدوتة
هتتلم علطول
بتصريحات من نوعية
ان الفقيدة كان عندها اكتئاب
او الفاعل مختل عقليا
او كان فيه جاموسة معدية قصاد البلكونة
مش هنغلب يعنى
أو حتى نعتم ع الحكائك
ببوست زى دا
و الناس طيبة
هتنسى

مش زى بتوع لندن
اللى نفسهم طويييل
و نمكيين ع الفاضى
و برضو مش هنعرف كل حاجة

أهى المرحومة راحت
و خدت سرها معاها

نستنى سمير صبرى
لما يعمل حلقات عنها بقى
و منطلعشى منها بحاجة
ف الآخر برضو


بس انا مبسوطة
ان فيه حد مشترك معايا
ف الحس المخابراتى
الامنى القومى الامبريالى
التعبوى المؤامرتى دا
لحسن كنت فاكرة انى بخطرف

نورتنى يا نبع الحكمة الخالص

خلى بالك الاصطباحات اتغيرت
انت بتشتغلى يوم الاجازة
امسكوها :-))) و احبسوها فى السرير :-))))

قولت الحق شوية قراية
و انا خلاص خلصت قراية

صباح النوار
ياعينى يا بنتى ، البنت بتكلم نفسها خلاص :-)
ايه المشكلة فى عالم اغلب شغلتهم الكلام و مبنخذش منها الا كلام و بس

صباح الهويديات
انشاء لما الريئس يطلع معاش حيشتكى لابنه و هو يرجعلنا حقنا :-))))
او الاحسن نموت قبل ال60

صباح الكلام الصح
ميهمنيش برادعى يهمنى الناس و التوقيعات علشان تغير غلط و خلاص و تدينا اختيار

صباح آخر الرجال المحترمين
بلد فخوره انها بتخوف و مبتخفش :-)
ياترى العيشة فى الوضع المهدد ده عملة ازى ؟؟؟ ربنا يكون فى عونهم

صباح المستشارين
ياسلام الواحد اطمن بشكل :-)

صباح التوفيقيات
:-((((( الدكتور يدعى على الى دخله كلية الطب بدون وسطة قبلها و اثنائها و بعدها

صباح الإنطباعات السلبية
ايوه كده يا منصورين
سيرى يا شجرة الدر و احنا وراكى :-)

صباح الهيافة
ينفع نجمد الملوخية ؟؟ و لا تبوظ :-))))))))))))))))))))))))))))))))))))))))))))))))))))))))))))))))

صباح الخيرات
اقولك يا فطوم المستشفى ده للاسف غايظنى من بدايته
اقولك ليه
عبى مليان فيران و صراصير منه
اولا ده مكان ؟؟؟؟؟؟؟ و محدش يقولى قرب معهد الاورام الى شكلها حتتنقل هى اساسا
مكان اصح من ده بدل السلاخانة القديمة :-(((((((
ثانيا ده تصميم مبنى خارجى (ده اكيد راح فيه فلوس بالهبل على شكل غير قابل للتعديل و التطوير و لا للترميم بعد زمن :-((((( منظره بفلوس الخير ؟؟
و صحيح ايههههههههههههه الدعاية ديه كلها و فيه اماكن ثانية محتاجة نقطة خير و بتخدم اضعاف مضعفة

الى بينادوا بيه صح
الحقيقة اكبر مشجع للخير

مش قادرة ارد فى تعليق واحد
:-) يا مفترية :-))))
و بكرة رايحة اسكنكرية مش كده (انشاء الله )

رجعالك :-) ثانى :-******************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

كنت اتمنى ان اعود فى ظروف احسن من كده بس امر الله ومفيش حد مننا فى ايده حاجة خالص تعازى فى المرحومة بس حقيقى مش قادر امسك نفسى من الضحك بجد اسلوبك الساخر اللى وصفتى بيه الحادثة امتعنى و اعتقد ان ده شعور الجميع و لأنى مريت بنفس التجربة مع قط سيامى كان عندى بس التانى انتحر بسم الفيران من طفاسته فانا حاسس بكل حرف فى البوست ....... هييييييييييييه فكرتينى بالمرحوم عكاشة الله يرحمه ده كان اسمه على فكرة

جميل البوست و الاجمل الروح التى كتب بها .. شكرا على سؤالك مع وعد بالجديد قريبا جدا ... خالص تحياتى وتحيات اهل المجرة وسيبينى بقى ارجع لكل البوستات اللى فاتتنى فى فترة غيابى

هههههههههههه اتقى الله انا كنت حعيط وبعدين بكلامك ضحكتينى معليش يا فاتيما ممكن يكون مش عاجبها سيبيه فى الشرع يدور على واحده يحبها زى ما انا عملت فى العصفور بتاعى كان مش طايق عصفورته لحد ما ماتت قمت مطيراه قولت يشوف رزقه فى حته تانيه

هههههههههههههههههههههههههه
معلش يا فاتيما
البقاء لله بقى
ضحكتينى والله فى الحادث المأساوى ده
هو اه ضحكتينى ومأساوى مايمشوش مع بعض
بس حصل والله
وله فى خلقه شئون
انا من رأيى العيب فى سور البلكونه مش فى القطه حرام تظلميها
ان شاء الله اللى جايه تعمر وتشوفى ولاد ولادها كمان

يارب يصبر قلبك يافاتومة
يارب ويبعد عنكم شبح النهايات الغير سعيدة
وتبقى نكتة تحول في مسار حيات كل تاء تأنيث في البيت وكمان البيوت اللي جنبكو وتبقى دي اخر الاحزان واخر النهايات الغير سعيدة
انا اسفة انا جيت مش لابسة اسود خلاص ايام العزا خلصت اكيد معلش بقى
انا عارف انك عندنا منورة اسكندرية وكان نفسي اكون معاكم بس المرة دي طلعت اوت يارب المرة الجاية ربنا يكتبلي اني اشوفك

هههههههههههههههههههههه
الموضوع صياغته تضحك رغم إنه عن شئ محزن

ازيك يا فاتيما

بصى انا قريت البوست ده من فترة

تقريبا كان فى نفس اليوم اللى قريت فيه بوست انت وحشتنى اوى

بس البوست انت وحشتنى اوى
ساعتها استفزنى انى اعلق عليه
ونسيت اعلق على البوست ده
رغم انى كان نفسى اعلق عليه

هو انا مش عايزة اعلق على المضمون
ولكنى هاعلق على اسلوب كتابة البوست

بصراحة اسلوبك عاجبنى وضحكنى جدا
خصوصا الكوبليه ده

يا يجيلها مرض جلدى .. فنمشيها
ياتعمل تواليت ف كل حتة الا الحمام .. فنمشيها
يا تبقى شرسة و قليلة الادب .. فنمشيها
يا تهرب ف أول فرصة باب الشقة بتاعنا ينفتح
فتجرى بسرعة و منلحقهاش
فمشوها .... نمشيها

و هكذا ...تتعدد الأسباب
و المشيان ف النهاية واحد


اكتر حتة عاجبتنى فى الكوبليه

فمشوها ... نمشيها

دى بصراحة فطستنى على روحى من الضحك
وعاجبنى اوى الاسلوب بتاعها
و وقع الجملة على الاذن
ليها موسيقى لذيذة



المهم
انا كنت جاية علشان حاجة كمان

انا كنت مستنية انى اعرف منك عملتوا ايه فى اسكندرية

لكن لاقيت وليد هى وظروفها سابقك وكتب عن اليوم

والحمد لله انا استشفيت من البوست بتاعه
انك كنتى مبسوطة واليوم كان كويس

بس وليد قال فى البوست بتاعه انكم رجعتوا الساعة اتناشر ونص بليل

فده قلقنى عليكى شوية
لانى فهمت منك قبل كدة ان طنط شديدة

فاتمنى انك تكونى وصلتى بالسلامة
وما يكونش حد فى البيت عندك
زعلان منك لانك اتاخرتى

ونحن مازلنا فى انتظار تفاصيل يوم اسكندرية بعيونك انتى يا طمطومة


سلام

اختك خيخة

صباح معطر بالورود والياسمين يافتيما
وحشتنى جدا وكل ماتوحشينى أقرأ اخر موضوعاتك عشان اطمن عليكى
بصراحه مش لاقيه كلام أقوله بخصوص الموضوع البوست بس مكسوفة أقولك انى بجد ضحكت موووووووووت وانا بقرأه اسلوبك جميل اوى يافاتيما بس والله زعلت على القطه كانى اعرفها بجد...الموته صعبه برده..عموما تعزياتى لك
انا الحمد لله بخير لسه مخلصه امتحانات امبارح أما موضوعى متوقف شويه ...على فكره ياريت لو اتجمعتم فى يوم تعلمينى فى مدونتى لانى نفسى اشوفك واشوفكم كلكم مفتقده القاعده الحلوه معاكم أصلى دائما حظى وحش بفتح مدونتك بعد ماتكونو اتقابلتم بيوم

وحشتنى جدااااااااااااا
اتمنى اشوفك قريبا
على فكره انا قريت كل البوستات اللى فاتتنى

سلام
وصباح معطر ويوم سعيد

هو ايه دا بقا
انا دلوقتي شوفت صورة ست الحسن !
دا شوغل عفاريت اشتات اشتوت يا فاتيما
دي الخالق الناطق مرمر !!!!!!!!!!!
القطة بتاعتي
تنااااااااااسخ ارواح فظيع
بس قطتي اكبر حتة وحتة

إرسال تعليق