.

.

لحم مــيــت + تحديث  

Posted by: فاتيما in






تحديث
--------

الاخ الغير معرف الرقيق القلب
اللى سابلى تعليق ولن أنشره
لأنه تهكمى جداااا الصراحة


و مع إحترامى ليك
المعلومات الجديدة عن عمرو هنا
مش هتغير رأيى فى الحادث و ما كتبته

كونه تزوج من قبل ست اكبر منه
أو غاوى انتحار
- و دى مش عيبة على فكرة .. دا معناه انه مريض -

و حكاية مش عاوز يعيش عيشة اهله
و رايح يتجوز تانى جوازة مش على قده


كل دى مش مبرارت تسمح للآخرين
أى كانوا مين
انهم يتشفوا في موته

و يقولوا يستاهل ... و كافر و هلم جرا


و يبدو ان حضرتك مفهمتش قصدى م البوست
لأنك
لو كنت خدت بالك كويس
كنت هتلاقينى بطلب

حاجة واحدة بس ملهاش دعوة بالشخص
فى حد ذاته
اكتر ما ليها دعوة برد فعلنا كبشر ... تجاه بعض


انا بطالب ببعض من الرحمة


و الرحمة يعنى
متدوسش على حد

و تتعالى على جروحه و اخطائه
لمجرد أنك ف موقع الأقوى
او لأنك لحسن الحظ

ظروفك كانت احسن منه ... فمغلطتش زيه


يا أخى الرقيق
الموت له جلال و مهابة و احترام
و هذا فقط ما أطلبه


بس

الله يرحمه و يغفر له و يسامحنا

------------------------------------------
----------------------------------------------------


شاب انتحر ...ايه يعنى

خبر عادى بقينا نقراه كل يوم ف الجرايد
و أى كان سبب الموتة و طريقتها
بنقرى و نسمع و نتصعب و دمتم






لكن المرة دى لما قريت
خبر انتحار عمرو

و اسمحولى اتكلم عنه ... و كأنى أعرفه
لأنى حاسة فعلا انى أعرفه
و انه حد قريب
كان ممكن يكون اخويا الصغير
او ابن عمى
او قريبى من بعيد

او زميلى ف الشغل
او جارى
أو حد معرفة ليا

او حتى شخص بشوفه ف طريقى
و انا مروحة كل يوم لبيتى






عمرو

زى كل شاب انسدت الدنيا ف وشه
و قرر ف لحظة جنون يخلص من ظروفه و قرفها
و يموت بطريقة اقل ما توصف به البشاعة
وتعذيب للذات و الجسد ما بعده تعذيب

و اللى يشوف صور عمرو المنشورة
هيفهم أقصد ايه




ولحد هنا
و الخبر بتفاصيله عادية
و بتحصل



لكن اللى مش عادى
ان حزنى على عمرو و اللى كان هيمر صمتاً
لا يشعر بيه أحد
استفزه شىء
خلانى مش قادرة اسكت




لما قريت التعليقات المصاحبة للخبر
و لقيت قسوة لا حصر لها
من معلقين كثر

ابسط ما يقال عنهم كوصف
انه
قلوبهم حجر




و يمكن حتى الحجر قلبه ارق
لأنه لا يؤذى احد
بهذا الشكل لو انحدف و بغل و كره شديدين





فجأة انصبت اللعنات على عمرو
و بقى كافر




فجأة بقى فيه عشرات الآلهة بتحكم عليه
مع ان محدش ف سلطانه يقول
داخل الجنة و لا النار ...
الا رب العالمين




فجأة الأحكام صدرت على عمرو
انه مات كافر
مع ان الإكتئاب دا مرض نفسى

و المريض ليس عليه أى حرج .. زى ما ربنا قال
و بالتالى قرار التخلص من الحياة هنا

كان قرار من شخص غير سليم عقليا
و لا يحاسب عليه ..يفترض هذا




و بعدين اصلاً محدش ف الدنيا عاقل
هيهزر ف حاجة زى دى
و ينتحر كدا و كدا
محدش بياخد قرار زى كدا

الا اذا كان فعلا عقله غايب ... و لو للحظات
و محدش يقدر يحكم غير اللى قرب م الموت
فيعرف ان الحياة غالية فعلا و ميتفرطش فيها ببساطة




فجأة التسطيح اشتغل على عمرو
و بقى هايف

لأنه موت روحه عشان واحدة
و بكرة تتجوز واحد غيره
و تنبسط
بينما هوه اللى مات فطيس

و كأن (منى) اللى كان عمرو بيحبها
و مش قادر يعيش من غيرها
مش بنى آدمة ؟!!




دا راح يخطبها من اهلها

تلات مرات ..يعنى مش قصة حب و عابرة
حد متخيل شعورها دلوقتى ايه ؟!!




ايه القسوة
و القلوب الحجر دى ؟؟




انا متأكدة ان مشكلة عمرو مش مادية بس
مش التجهيز للجواز و بس

اكيد الموضوع أكبر من كدا بمراحل
احباطه اللى أدى للأكتئاب
مجاش بين يوم و ليلة

دا نتاج شهور و سنين و زمن و عصر بحاله
مخلى بكرة بقى ف عينه زى خرم ابرة
و الدنيا مقفولة قصاده



و كمان قصاد اى إتنين بيحبوا بعض

و عاوزين يتلموا تحت سقف واحد ف الحلال
و بأبسط التكاليف


بس مين يسيبهم ف حالهم ؟

و بلاش حتى يساعدهم





يعنى لو كان عمرو مروق الانانى و مروشها
و بيعرف كل شوية واحدة

و مقضيها علاقات عابرة ... و لا بيفكر ف الجواز و الستر
و تروح منى .... و تيجى عشرة بدالها
و منتحرشى
مكنش هيبقى كافر ؟!!





و ساعتها لو مات
ف حادثة مثلاً ... تجوز عليه الرحمة






طب مش هتكلم عن ان الظروف
اللى عليها البلد هيا السبب ..لأنه واضح جدااا

و لا ان مش كل واحد الدنيا تقفل معاه
المفروض يروح ينتحر
دا ف ظل الظروف العادية .. و مش الضغوط الرهيبة
و لا هتكلم عن دورنا كمجتمع خصوصا الكبار
ف تبسيط الكلاكيع على نفسنا و على عيالنا
عشان الحياة تمشى و نفرح بيهم




بلاش اوسعها ..مع انها وسعت و ع الآخر
لدرجة فقدان البهجة
و الرغبة ف الحياة من اساسه


هتكلم بس عن البشاعة
ف الحكم ع الأشياء و ع البشر

و القسوة اللى بقت عنوان نظرتنا للضعفاء






ايوه
عمرو كان ضعيف




بس مش بمزاجه
محدش قدر يسنده
و يخليه قوى

لا شغل يكفله حياة كريمة
و لا اسرة تصبر عليه
و لا مجتمع يغض الطرف عن ظروفه الملخبطة
و لا بلد يوفرله ابسط الأشياء



محدش بيقوم بدوره ...و الكل متخاذل
خلاص يبقى نحط لساننا ف بوقنا و نسكت
مش ناكل لحمه حى و ميت ؟!!



و الناس اللى بتتكلم عن ضعف الوازع الدينى
ارجوكم افصلوا

المرض النفسى ليس بعيداً عن أى حد فينا
فمتخلطوش الأوراق
و الدين بيدعوا الأهل لتبسيط الحياة مش تعقيدها
و المعيار يكون اخلاقى و اجتماعى قبل المادى
و لما يلاقوا الشاب ظروفه معقدة .. خلاص
ميبقوش عليه هما كمان ..كفاية الدنيا
فبلاش حكاية لا تقربوا الصلاة دى خالص
يا نتبع الدين من البداية للنهاية
يا منجبش سيرته خالص هنا





انا مرعوبة
أيوه



خايفة ف يوم يوسف ابنى
بسبب ضيق اليد و الظروف ... يلقى نفس المصير

خايفة على عيالى و عيالكم و عيال الناس
و معنديش حلول بصراحة




بس عندى طلب وحيد





الرحمة
الرحمة بعمرو و امثاله


و ان مكناش قادرين
نساعدهم فى حياتهم




يبقى على الأقل .. نحترمهم فى موتهم



انا اسفة ليك بالنيابة عنهم يا عمرو

الله يرحمك
و يرحمنا معاك




This entry was posted on الجمعة, يونيو 04, 2010 and is filed under . You can leave a response and follow any responses to this entry through the .

51 كــــلام بيطــبطـــب عـــلى قــــلبى و روحــــى

متخافيش .. ربيه بس على الكرامة و هو هيتغلب على كل مشاكله ..

الانسان اللي عنده كرامة بيبقى عنده اصرار و تحدي و بيقدر يواجه الظروف

عندك حق يا طمطم الخبر مفجع ومش مؤسف بس

انا في اكتر من حد قالي انه بكي لما قرا الخبر وعرف قصة عمرو

وفعلا التلعليقات قاسية جداً هو انتم بتوعظوا في مين ؟؟

في اللي مات ولا في اللي بيفكر يموت !!!!

بجد محدش عارف اللحظة اللي حد بيقرر يتخلص فيها من حياتة دي بيبقي شكلها ايه

خلاص بقينا كلنا واعظين مع ان اللي ورا الخبر أخطر

عمرو انتحر ولا اتقتل ؟؟!!

لما نبقي في بلد ولادها بينتحروا علشان مش عارفين يعيشوا يبقي وصلنا لحد فين ؟؟؟

ربنا يستر انا كمان خايفة قوي يا فاتيما

بسم الله الرحمن الرحيم
قُلْ تَعَالَوْاْ أَتْلُ مَا حَرَّمَ رَبُّكُمْ عَلَيْكُمْ أَلاَّ تُشْرِكُواْ بِهِ شَيْئاً وَبِالْوَالِدَيْنِ إِحْسَاناً وَلاَ تَقْتُلُواْ أَوْلاَدَكُم مِّنْ إمْلاَقٍ نَّحْنُ نَرْزُقُكُمْ وَإِيَّاهُمْ وَلاَ تَقْرَبُواْ الْفَوَاحِشَ مَا ظَهَرَ مِنْهَا وَمَا بَطَنَ وَلاَ تَقْتُلُواْ النَّفْسَ الَّتِي حَرَّمَ اللّهُ إِلاَّ بِالْحَقِّ ذَلِكُمْ وَصَّاكُمْ بِهِ لَعَلَّكُمْ تَعْقِلُونَ (الأنعام : 151 )

درجات الاكتئاب تختلف بين البسيط والمعقد فيوجود حوالي 10 درجات تقريبا علي ما أذكر من الإكتئاب .. أقلهم حدة هو البسيط الذي يسهل السيطره عليه وأكثرهم عما اتذكر المعقد أو المركب مش فاكر المسمي .. بس بيوصل أحيانا إن الشخص ميبقاش له القدرة في التحكم في أفعاله .

قال صلى الله عليه وسلم: ((رُفِعَ الْقَلَمُ عَنْ ثلاث: عن الصَّبِى حَتَّى يَبْلُغَ، وَعَنِ النَّائِمِ حَتَّى يَسْتَيْقِظَ، وَعَنِ الْمَجْنُونِ حَتَّى يُفِيقَ)).

معني الحديث إن فيه جنون لحظي .. زي ما فيه جنون دائم أنا امبارح غضبت من عمرو لأني حزنت عشانه ,, بس بما اني شفت درجة من درجات الإكتئاب لشخص عزيز .. كل اللي اقدر اقوله إن ربنا يرحمه .. ومفيش اوسع من رحمة ربنا ,, أما عن سبب اللي حصل فمعدش الكلام له عازه ,., سواء كان حب أو ظروف .. لأن ربما يكون عمرو مكانش عقله يعي ما يفع ,, لذا نطلب المغفرة له .. وكل ما اريد قوله للجميع لو كننا حلوين قوي بالطريقة اللي احنا بنوصف حكمنا عليه فالأولي اننا نسكت .. كل واحد فيه مصايبه ,, ولولا ستر ربنا .. صدقوني لما كنا نشوف بعض في الشارع مكناش سلم علي بعض .

الله يرحمك يا عمرو

الله يرحم ويغفر للجميع

انا والله كنت لسه بتلم عن الموضوع ده وبقول اكيد عليه ضغوط كتيييييييير

تحياتي

لا كلمة الله يرحمه ح ترحمه ولا قلتها ح تضره ولا حتى انتحاره ممكن يكون سبب لعقابه لان العقاب بتاع ربنا وهو وحده اللي عارف كويس ظروف كل واحد واذا كان سليم ولا مريض نفسيا ويدري ما يفعل..مشكلتنا اننا ورثنا حبنا للاصنام وفاكرين ان الله برضة صنم وكل واحد بيدافع وبيفكر له مش العكس ..وفي ناس كتير دلوقتي بيفكرو لربنا وبيغضبو له وهم اللي بيصدرو احكام علي لسانه مع ان الله رحيم وبيقتلو حتى من يختلف معهم في العقيدة حبا لله .. وعلى فكرة الاكتئاب مش سببه الفقر او الفشل ...في ناس عندها كل حاجة وبرضة بتنتحر والدليل ارتفاع نسبة الانتحار في الدول الاسكندنافية...مشكلة عمرو اللي انا معرفوش ولا عمري سمعت عنه الا منك مشكلة جيل بحاله..لكن كل واحد في رد فعله بتختلف ..في اللي بيلجأ للدين وفي بيلجأ للمخدرات والهلس والخمر .. وفي بيجيب عاليها واطيها وبينتحر...وفي اللي ما بيعملشي حاجة خالص ومستني مصيبة تانية وجسمة نحس من كتر البلاوووي....رأي الناس مش مهم ليكي في حاجة خالص ..لان معظم الاكثرية في مصر مش على طول على صواب.. وهذا ما ثبتته وح تثبته الايام ..يا أختي من يمكث في غرفة بها رائحة كريهة لفترة بيتعود عليها ومش يياخد باله انها ريحتها كريهة...

الله يرحمه يا فطوم
و هو العدل اكيد حيحاسبه بعدل مش زى البشر

عارفة انا مكملتش الاصطباحات بعدما شوفت صورته
ياهههههههههههه يا فطوم الصورة قلم فى وش المجتمع و الى بضحك اكيد بيدارى بضحكته الهبلة خوفه ان هو او الى مقربين منه يفكروا و يوصلوا لكده

كلامك فكرنى بنقطتين دروا فى بالى
1- الانتخابات
يعنى الى بتتضوضب و تتزور و تتبلطج لنتيجة معينة علشان منبقاش ايران ثانية ؟؟؟ و قصدهم اننا منبقاش دولة ارهابية :-(( يعن هو المجتمع من جواه بقى ارهابى متشدد؟؟ بقينا متشددين فى كل حاجة و بنلبس كل شئ حرام ؟ بقينا سفهاء و مبنفكرش و منعرفش نحكم على الامور صح ؟؟؟
طيب هما الى عايزين يحكموا مجتمع ارهابى مش خايفين منه ؟؟؟ لما هما عارفين ان ده رائ الناس و فكره ؟ و بيطنشوه و بيقلبوا عمة لكرفاتة يخنقوا بيها؟؟يايموت يا يثور يا يتجنن؟؟؟
الفكرة و النظرية الدولية لحلنا و الانتخابات مخوفانى من نفسنا يا فطوم
احنا كده ؟؟؟؟؟؟؟؟؟؟؟؟
2- لما سمعت عن اول بنت فلسطينية فجرت نفسها فى اتوبيس فى اسرائيل
فى الاول اتفجعت من الخبر
حستها انتحرت على الرغم ان الكل بيقول استشهدت
بس واحدة بتقتل نفسها و عيال و ناس عادين و النتيجة مفيش الا الموت
راى كان قاسى عليها بصراحة جوايا
لحد ما شوفت فيلم الجنة الان الفلسطينى و حسسنى ان المفجرين لروحهم دول معندهمش اختيار يترجعوا و يعيشوا عادى دول ضحايا سياسة قذرة
ربنا يرحم الجميع يا فطوم :-((

نفس الشعور انتابنى

ودا جرس انذار لكل الناس يسيروووووووو ولا تعسرواااااااا

اقفوا جنب قلب طيب وعاوز يكمل في خير مش يلعب

بس تقولي لمين

مساء الانوار ياتيما ياحبيبى

بصى ياتيما انا كامارو مابجدش مبرر لبنى ادم انتحر
بس ديما اقول الله اعلم به كان فيه ايه

ومش معنى انه انتحر انه مات كافر لاننا مادخلناش جوا عقله وشوفنا ماله وقتها

ربنا وحده اعلم به وهوعز وجل اللى هايحاسبه كا اراد لخلقه

دى وجه نظرى انا فى جزء الكفر من عدمه

الجزء التانى لازم يطلع ناس وكتير يقولو انه كافر علشان الحى يسمع اللى مات دا خلاص فى زمه الله عز وجل
انما اللى عايش ممكن فى لحظه جنون يفتكره
ويعتبر دا حل لازم الكلام بتاع الخوف من الله وعدم الكفر من رحمته عز وجل يتقال كتير فى الوقت دا لاننا بنمر بظروف زفت
ومعنى كده اى شويه اكتاب او زعل يخلى البنى ادام يكره حياته
الموضوع كمان قليل يا تيما دا قتل نفس ونفس مش ملكك مهما كانت الظروف
لازم البنى ادم يكون عنده امل فى الله
وظروف عمرو دى بيمر بيها شباب لاحصر له

نسال له ولنا من الله الرحمه والمغفره
ونسال له الله ان يتغمده بكامل رحمته وواسع مغفرته

تسلمىيا تيما

أولا عاجبني الاحساس اللي كتبتي بيه

ثانيا ربنا هو العدل المطلق أكيدأما يحاسب عمرو ومن ضاعوا مثله مش هيكون حساب لعمرو بس
لاااااااااااااااا
واللي سرق رزق عمرو له نصيب كبير أوي من العقاب

ثالثا بئا مش عاوزه تسأليني عن حاجه؟

ياتيما طول عمر الحياه صعبه

وخلقنا الانسان فى كبد

امى وام محمد لما بتكلم كلامهم بردو ان ايامها الحياه صعبه والاجور قليله بالاضافه للحروب وكل حاجه كانت صعبه يا تيما دانت كنت علشان تكلى فرخه كانو بيعمللهم هده وازمه الشقق اجيال من التمانينات لغايه دلوقتى عايشين فيها

بس فى حد عنده امل فى وجه الله ورحمه
وحد نفسه ضعيفه
وسبحان الله وحده علام الغيوب والنفوس
الله يرحمه

sharm
-----

اهلا يا شارم

يا ريته كان معايا يا شارم عشان أتاكد ان نفسيته هتكون متوازنة و متتأثرش بالظروف كدا

و حتى لو معايا برضو

المجتمع ممكن ف يوم يكون سجنه و خنقته و انا معرفش اعمله حاجة لوحدى

مش يمكن دا يحصل ؟؟!!

ربنا معا كل الناس
منورنى جداا





ميرا (وومن)
----------

للاسف يا ميرا دا الواقع
سؤال جه ف بالى و انا بجرى بين سطور التعليقات ...انتوا بتقولوا الكلام دا لمين؟؟

اما يكفيه ما جراله ؟

ربنا يرحم الجميع يا حبيبتى




فتاة من الصعيد
--------------

ايوه يا مروة

اللى ينهى حياته بالشكل المفجع دا رغم ان فيه حبيبة بتحبه و دنيا ممكن تستناه و أى بارقة امل قد تكون موجودة يبقى اكيد الضغوط كانت ابشع من قدرته ع التحمل

تحياتى ليكى يا حبيبتى انا كمان

انا حاسه بيه
عشان انا كان ليا تجربه مع الانتحار
ماحدش بيقدر يتخيل ايه اللى وجعك اوى لدرجه ان حياتك تهون عليكى
ربنا يرحمه
ياجماعه ماحدش بيهون عليه نفسه بسهوله مهما كان العمر غالى
بس الالم والاكتئاب حاجه مره اوى

MR.PRESIDENT
------------

الله يفتح عليك يا بسام

بص اللى كتبته ف تعليقك هوه ما اقصده تمامااااا

محدش كان معاه قبل ما يقدم ع الكارثة دى عشان يحكم عاقل و لا مخه ضرب ؟؟
يبقى محدش من حقه يحكم مات كافر و لا موحد بالله بقى !!!
و الشك يفسر لصالحه ..زى انا ما حكمت انه مرض نفسى

و بعدين مين وقف جنبه قبلها و عمل اللى عليه تجاهه عشان يحاسبه بناء على ذلك و يقول كافر او هايف او غبى او ..أو ...أو

يا ترى لو كان شاب ف عيلتهم اللى جراله كدا كانوا برضو هيمسكوا مج النسكافيه و لا كوباية القهوة و يقعدوا قصاد النت يكتبوا الكلام البشع دا ؟؟؟

ربنا يتولانا جميعا برحمته
و اولنا عمرو

و اهله
و حبيبته

وكل شاب ف ظروفه يا رب






tarakib
-------

اهلا يا تراكيب

ازى حضرتك
و اسفة لأن اغلب تعليقاتك عندى
كانت بلا رد لأسباب عديدة

حضرتك منورنى و الله

و حضرتك ليه بس مش عاوزنى لما اتكلم عنه حتى اقول الله يرحمه حتى ؟؟!!


الا يستحق الرحمة و الشفقة كأنسان مسكين انهى حياته بالمنظر دا ؟؟

و رأى الناس مهم عمومااا ..مش ليا انا بس يا تراكيب لأنه مؤشر لحال المجتمع اللى حوالينا ...مبقولش انى هتحرك بناء على رأى الناس من عدمه
بس ع الأقل رد فعلهم تجاه الأشياء بيدى دلالات .. و اغلب ظنى ان المناظر اللى علقت دى اشباههم هما اللى سدوا ال
نيا ف وش عمرو و هوه بيقول يا جواز و يا حياة تنعاش


و الريحة مش بس كريهة
دى بقت تسد مجرى التنفس
و قد تؤدى للوفاة

تحياتى و خالص ودى ليك






wanda
------

و يرحمنا جميعا يا ون ون

بخصوص الانتخابات ..قريتى البوست دا ؟؟

عند كلام هشام ..تجربة حية تنقرى ..عشان تعرفى اننا العن من كدا نفسها

http://heshamwords.blogspot.com/2010/06/blog-post.html?utm_source=feedburner&utm_medium=feed&utm_campaign=Feed%3A+blogspot%2FFcYn+%28%D9%83%D9%80%D9%84%D8%A7%D9%85+%D9%87%D9%80%D8%B4%D9%80%D8%A7%D9%85%29


اما عن البنت اللى فجرت نفسها ..فدى استشهادية لا جدال ف ذلك لأنها عايشة ف ظل احتلال و المفروض لو مش قادرين يواجهوا الألة العسكرية الرهيبة للمعتدى لأن قوتهم مش متكافئة ..يبقى يحاربوا بالأسلوب اللى يملكوه و هوه حرب الشوارع و العصابات ... زى ما كل شعب ف الدنيا من ساعة ما اتخلقت لحد النهاردة ما بيقاوموا الاحتلال ...بس هيا الطريقة اختلفت و فقط

و كمان نوع المقاوم ..
بقى فيه بنات و ستات ...
مش اكتر

لكن انتا بتسد باب الحياة ف وجوه الشعب دا فمتستغربش انه بيتجه للموت عشان يمكن ولاده بكرة يعيشوا

السياسة كلمة قذرة جنبها تبقى مدح مش وصف او شتيمة

الله يرحم الجميع يا ونداتى





كيــــارا
---------

يا ريت يا كيارا

تفتكرى الناس هتنتبه ؟!!

يعنى بصى انا هتكلم كأم مثلا و ابفترض الأباء و الأمهات هيتبنوا موقفى

لما نسمع حكاية زى دى
قلبنا هيتوجع و نقول لو عيالنا مروا بمواقف شبيهة منقفلهاش عليهم و نعسرها لحد ما يكتئبوا ف يوم و يعملوا ف روحهم كدا


و لا فيه ناس هتقول دا يستاهل ..دا كافر ..دا عبيط ..القصص اللى ف التعليقات دى ؟؟

يا ترى النسبة الأعظم هتكون مين ؟؟

اللى زيى و زيك

و لا بتوع التعليقات ؟؟

آمين يا حبيبتى هقول وراكى
آمييييين

richardCatheart
---------------

مساء النور يا قطاقيطوووو

ماهو يا حبيبتى انتى جبتى مربط الفرس

الله اعلم

ليه ناس تحط نفسها مكان ربنا بقى ؟؟

و معاكى ان عمرو زى كام مليون شاب زيه بس يعنى من وسط الكام مليون دول مفيش حد ضعف و انزوى و اتهد م الظروف زى عمرو و مقدرش يتحمل ؟؟!!

مقدرش يشيل الحمل و يكمل
اتصرف غلط
بجنون
مبيحصلش ان حد يغلط غلطة و تكلفه حياته ؟!!

بتحصل ف كل وقت و الله

يبقى لما تحصل نترفق بأهله و بذكراه و لا نقعد ناكل فى لحمه بدل ما نتمناله الرحمة و المغفرة ؟؟!!!


تعرفى انا بفكر ف ايه؟؟ّّ

يا ترى لو كان أى حد
أى حد معدى جنبه ف الشارع وقت ما فكر يعمل كدا و حاول يتكلم معاه او يرده عن اللى حصل ...حد يمدله ايده
تفتكرى مشكلته دى كان ممكن تتحل بكام و لا بوقت أد ايه ؟؟؟

بلاش مساعدة مادية ..مساعدة نفسية حتى
حد يتكلم معاه و يخرجه من ازمته و يعدله عن قراره ...
لا حول و لا قوة الله بالله

الله يرحمه و يرحمنا جميعا

من توابع التعليق البوست اللى فات
عشان مبردش على تعليقات بوستات من ورا المشربية ...انتى كمان وحشتينى





مصرى جدا
--------

دا احساس الحزن الشديد على عمرو اللى معرفوش يا هانى
و احساس القهر من قسوة البشر على ضعف اخ ليهم ف الدنيا موت روحه بسبب ضغوط مش دلع و هيافة
و ذنبه ف رقبة كل اللى خد حقه
قادر ربنا ينتقم منهم


ثالثاً
انا مبردش على بوستات ما ورا المشربية
بس يعنى مشكرين لأنك بتحسد المذكور ف البوست بس بلاش توصف الوالدة بأى صفات و النبى عشان ممكن يقرى البوست و يتضايق و لا حاجة اصله حمقى قووووى و كبرياؤيه مجننى اصلا ..و مكنتش هنشر تعليقك بس بصراحة التعليق عجبنى

اما بقى بخصوص عملى صاحبتك دى

فيا عم قولنالك
مييييييت مليييييييون مرة
هات المودام نتعرف عليها
و نديها خلاصة تجاربنا العاتيشفية
و نوصيها عليك
و انتا مبترضاش ..نعملك اييييه؟؟؟


طبعا انتا عمرك
ما هتعرفنا على الحكومة بتاعتك (المدام) عشان انتا عارف اننا هنوصيها تنتقملنا منك على كل بوستاتك اللى ضد الجمعية العريقة بتاعتنا ....

و بصراحة
المودام عندها حق
و مهما نصحتها انا ...
مش هتقولك نعم دى خااالص


متحاولش يا بنى
هقولك


اصل الرجالة نوعين سعادتك

فيه رجالة ..
زى محمد فوزى كدا
يتقالهم ايوه و حاضر و نعم
من غير ما يأمروا حتى
او يطلبوا او يفتحوا بوقهم حتى


و فيه رجالة مناكفة ...
مينفعش يتقالهم نعم دى
خااااالص البتة
مهما حصل

ماشى ؟
اظن انا كدا رديت
من غير أسئلة ..صح؟

طواااايب

نورتنى جدا






الشوكة الناعمة
-------------

تعليقك يا شكشوكتى بيفكرنى بالمثل الرائع اللى بحب اقوله
ف المواقف دى


اللى ع البر ..عواااام


محدش يتكلم غير لما يخوض التجربة
او يقرب منها و تلمسه بشكل ما
عند حد قريب
او حتى جار من بعيد
عشان يبقى حكمه عن تجربة طيب
مش كلام ف الهوا


و حتى الحكم
مش من حقه كمان


ربنا هوه العدل و بس

نورتينى يا شكشوكة

و الله يا تيما
مش عارفه اقول ايه
فعلا محدش حيجروء على اتخاذ قرار زى ده و ينهى حياته الا اذا كان مغيب العقل
او مريض نفسى يعنى

ربنا يرحمه و يرحمنا فعلا معاه
منظره اللى جه امبارح فى العاشره مساءا كان بشع و موجع قوى للقلب

كنت حاكتب عن الموضوع ده بس بصراحه انتى قلتى اللى كنت حاقوله و اكتر كمان

والله ما حد عارف الحقيقة فين
النهاردة نشر اليوم السابع خبر بيقول انه متزوج من 12 عام وانه لا يعرف القراءة والكتابة فكيف عثر على خطاب كتبه قبل الانتحار مكتوب فيه ما معناه انه يضحى بالحياة ولا يضحى بحبيبته!!!
على كل حال الله يرحمه ويغفرله ويدخله فسيح جناته يارب العالمين

ردك رائع يا فاتيما

وطبعا انتي عارفه أن قصدي بس أغبطه مش أكتر وأعتذر بشده

برضو لبستيني في الحيطه!!!!!!!!!!



ماشي

طب أعمل ايه؟

أحمد رمزي ما ينفعش يكون محمد فوزي مهما حاول


على فكره


هتسأليني

وهنشوف

تعرفي يافاتيما

ان جار انتيمة ماما انتحر في البلكونة وهو عنده 27 سنة من كام يوم

خريج هندسة بس مش كان لاقي شغل

الناس خلاص مبقتش قادرة تعيش وسط الضيق دا كله

ربنا يرحم الجميع ويرزقهم ويباركلهم ويرزقهم راحه البال يارب

ويرزق الشباب الزوجات الصالحات

والبنات الازواج الصالحين

ويرزق الجوز بئا الذريه الصالحه

تعرفى يا فاتيما إن معظم شبابنا بيفكروا فى الانتحار بس الغالب منهم لما بيفكر فيه علشان حاجة من اتنين يا يهدد اللى مسؤل عنه علشان يتحرك ويعمل حاجة والنوع التانى بيبقى مصر عليها مش عايزة أقول إنهم يأسوا من رحمة الله أنا بصراحة مش فاهمة وكبيرى أشوف حد منتحر كان فى فيلم والحقيقى أسمع عنه لكن لما شوفت الصور بقيت عامله زى اللى بتحلم معقول فى حاجة زى دى بتحصل حقيقى بجد مش عارفة أقول صبره كان قليل ولا الصبر طال معاه ومبقاش متحمل اللى خايفة منه بجد إن ده الحل اللى نلجأ ليه فى حل مشاكلنا أنا مش عارفة الظروف فمقدرش أحكم عليه لا بإنى أتهمه ولا إنى أتعاطف معاه بصراحة مش عارفة بس اللى أعرفه إنى مضايقة وخايفة وأكيد بدعيله إن ربنا يرحمه ويلهم أهله الصبر وربنا يتولانا جميعا برحمته ويقدرنا على الدنيا ويلهمنا الصبر ويقوينا عليه

أما بقى على يوسف وولادنا جميعا فربنا يحفظهم ولا يرينى مكروه أبداً فيهم ويزرع فى قلوبهم الصبر ويبقى عندهم جلد يارب واحنا كمان ربنا يقوينا على الصبر

ربنا يرزقنا الستر فى حياتنا ومماتنا ويرزقنا جميعا الرحمة والمغفرة ويرحم موتانا ويغفر لهم يارب

صيدلانية طالعة نازلة
-------------------

اكتبى يا لولاّ انتى كمان

هوه و غيره اللى ف نفس ظروفه
يستحقوا كل نظرة اهتمام
و كمان يستاهلوا وقفة حزن تليق بيهم

اكتبى يا حبيبتى







غير معرف
-------

بغض النظر عن الحقيقة ايه بالضبط
الموتة كفيلة بإن نطلب له الرحمة زى انتا ما عملت تمام
و كفاية





مصرى جدا
--------

يا عم انا بقولك كدا
عشان تعتذر ؟!!



انا بس بقولك يعنى
ان سى الأفندى بتاعى طبعه حامى شوية و انا مش عاوزة ازعله لأى سبب يعنى .. او بمعنى ادق انا بستبق الأسباب فميحصلش زعل ان شاء الله ...انا موجودة ف الدنيا دى عشان افرحه اصلاً مش ازعله
و يا ريت اقدر علطول اعمل كدا


و بمناسبة الزعل


النبى يا هانى
الله يكرمك
بلاش الكلام بالألغاز دا
عشان كدا اللى بيقرى تعليقاتك هيقولك الست دى
(اللى هيا أنا سعادتك)
تلاقيها مستلفة منك فلوس و لا حاجة
و انتا منتظر انها تسألك ...
هتبعتهم امتى و لا ازاى ؟؟؟

أسألك عن ايه يا سنيور بس
عشان الشعب البلوجرى اللى بيقرى دلوقتى تعلقك و تعليقى
مش فاهم حاجة
و اختك فاتيما أولهم



أسألك عن ايه ؟!!!


وضح أبن أفصح
عشان ميحصلش لبس ف الحيطة
عندى انا ... ماشى؟

طييييييييب

نورت يا فندم









كيـــارا
--------

لا حول و لاقوة الا بالله


نفسى اعرف ازاى واحد ينفع ينفصل عن اهله و اصدقائه و حبيبته لو فيه حبيبة و قرايبه و الدنيا كلها لدرجة انه يقدم على قرار زى دا كدا من غير ما حد يلحقه بس و يقدر يساعده
ايه حالة الوحدة الشنيعة دى اللى تدفع للتفكير ف اتجاه واحد كدا ملوش رجوع ...

مش يبقى اكتئاب دا
و لا احنا بنبالغ ؟؟


ربنا يتغمده برحمته
هوه و عمرو
و يسمع منك يا حبيبتى
ان شاء الله






الزهرة البرية
------------

كلامك كله صح يا جودى

محدش يعرف كل الظروف عشان يحكم عليه بالقسوة دى

و الأساس ف علاقة الناس ببعض هى الرحمة و المودة و التكافل انسانياً قبل مادياً و اجتماعياً حتى

و ف حالة عمرو لا كان فيه اى نوع من انواع التكافل الإنسانى و الرحمة حتى بعد موته بالبشاعة دى


ربنا يسمع منك يا جودى
و يستجيب يا حبيبتى
إن شاء الله

دا رد واحد في مصراوي اعتقد انه بيفسر السبب بشكل منطقى

********

كيف يعمل العقل قبل الإنتحار؟
مع كل إحترامي للذين قالوا أنه إنتحر بسبب قلةإيمان أو اليأس. أودأن أوضح الأتي:

1- يصيب الإنسان صدمات نفسية عنيفة بشأنهاأن تؤدي إلى إنخفاض حادفي هرمون السريتونينserotonin في المخ.

2- هذا الهرمون يطلق عليه هرمون السعادة, فبزيادته يشعر الإنسان بالرضا والسعادة و توجد أكلات تساعد على زيادة إفرازه وضوء الشمس أيضاً, وبانخفاضه يشعر الإنسان بالضيق والإكتئاب بدرجاته المتفاوتة حسب كمية الإنخفاض.

3- في حالات الإنخفاض الحاد والمفاجيء لهذا الهرمون فإنه يؤدي إلى درجة الإكتئاب الحادأو العميق وهي أقصى حالات الإكتئاب {عفاكم الله} والتي قد تؤدي إلى الإنتحار.

4- يكون مريض الإكتئاب الحادفي حالة فسيولوجية ونفسية مضطربة, ضربات القلب تكون عالية, يرتعش, لا ينام بالأيام, لا يأكل, إحساس بأن الوقت لا يمر, وأكثر من هذا وأصعب يقين بأن هذا الحال سيستمر بقية حياته.

5- يكون القرار المريض بالإنتحار ليس ناتجاً عن يأس أو قلة إيمان, لأن اليائس وقليل الإيمان مازال يحتفظ بعقله, وعملية الإنتحار تحتاج إلى مستوى خرافي من رباطة الجأش لا تتوفر بأي حال في إنسان ما زال عقله يعمل بطريقة سليمة. { تخيل نفسك مكانه في لحظة قفزه من أعلى الكوبري, وما هى أفكارك قبل ثوان من القفز والموت بهذه الطريقة البشعة, وتخيلك لنفسك في لحظة إنفصال وإنكسار فقرات رقبتك نتيجة سقوط ثقل جسمك المفاجىء. كم تحتاج من رباطة الجأش؟}.

6- ما يفعله هرمون السريتونينserotonin عند إنخفاضه الحاد والمفاجىء هو أنه يعمل Blackout للمخ أو إغلاق تام للمخ بحيث أنه يجعل فكرة واحدة مسيطرة على المخ سيطرة كاملة وهي أن الحياة سوف تستمر هكذا في هذا الحال من الإضطراب الفسيولوجي والنفسي وأنه لا يوجد إلا طريقان. الأول هو الإستمرار على هذا الحال بقية العمر, أو مغادرة هذه الدنيا عن طريق الإنتحار. وهذا ما يوفر رباطة الجأش للمريض بطريق غير مباشر على أن يقوم بالإنتحار لأنه ببساطة عقله لا يعمل ولا يستطيع أن يستمر هكذا بقية العمر. أي أن الـ Blackout يجعله مغيباًغير قادر على التفكير السليم. فالمغيب عقلياً تستوي عنده الأمور التي تحتاج رباطة جأش مع غيرها.
وطبعاً تذكرون المهندس الذي خسر أمواله في البورصة فقام وقتل زوجته وأولاده ثم أقدم على الإنتحار.

7- هذه هى صعوبة هذا المرض, أي مريض بأي مرض أخر حتى السرطان لا يغيب عقله عن أن الأمل في الشفاء موجود ولو بنسبة ضئيلة, ولكن في حالة هرمون السريتونينserotonin فإن العقل يغيب عن أي وجود للشفاء من الأصل. مما يجعلك تسير في اتجاه واحد لا رجوع منه.

8- بعض الناس يكون عندهم إستعداد بيولوجي لهذا المرض ويظهر أحياناً بدون سبب يستحق وأحياناًيظهر بعد صدمة نفسية كبيرة.

9- قد يتفهم هذه الحالة وإن كان بشكل جزئي المطلقات و الشباب الذين مروا بتجربة حب ثم صدمة الإنفصال , فإنهم يشعرون بهذا الإحساس وإن كان بشكل مخفف, وفي النهاية كل حسب إستعداده البيولوجي لهذا المرض بعد الصدمة.

10- تكون أغلب حالات الإنتحار في الصباح الباكر طبقاً للإحصائيات حيث يكون الهرمون في أقل مستوياته وحالة المريض أشد وطأة وتقل شدة الحالة كلما مر اليوم. {لاحظ هذه الحالة وحالة المهندس أيضاًو حالات أخرى كثيرة.}

11- للأسف نحن شعب لا نقرأ كثيراً ونحب أن نقفز إلى النتائج بسرعة, ولا نعترف كثيرًاً بالتخصص. و معلوماتنا عن الأمراض النفسية والعصبية ضئيلة جداً إن لم تكن معدومة.

12- أتمنى أن يجىء الوقت وأن نلتمس الأعذار لبعض قبل القفز للنتائج , وإرجاع الأمور للدراسة والعلم والتخصص, وأن نكون أكثر قراءة وتفهم لما حولنا.

وأسف على الإطالة.

الســـــــــــلام عليكم
الأول بسلم على كل الموجودين
إزيك يافاتيما عاملة إيه يارب تكونى بخير إنتى ويوسف
هقولك إيه ...دايما حنينة ... ربنا يتولى عمرو ويتولانا برحمته
وإدعوا مصير ولادنا ميكنش نفس المصير
لنفس الظروف والأسباب إللى لو فضل الحال على هذا المنوال ربما تزداد سوء
يارب ألطف بعبيدك

عارفه انا معاكى تماما فى كل اللى قلتيه
وزعلتنى جدا قسوه التعليقات
بس اكتر حاجه خلت جسمى يقشعر وعنيا تدمع غصب عنى
الكلمتين دول



خايفة ف يوم يوسف ابنى
بسبب ضيق اليد و الظروف ... يلقى نفس المصير
خايفة على عيالى و عيالكم و عيال الناس
و معنديش حلول بصراحة


عندى نفس الخوف المرعب
ومش قادره اصرح بيه
خايفه على ابنى اوى اوى
وماابقولش الكلام ده خالص
عارفه ليه؟
لسه عندى امل ان ربنا يصلح الاحوال
ولو انه امل كاذب وعارفه ان مفيش حاجه هتتصلح
:(
ربنا يحميهم ويستر

ازيك يا طمطم
بصراحة انا كنت بعيد شوية عن النت للظروف
لكن فى الموضوع ده انت جبت الخلاصة فى الفقرة دى
(..هتكلم بس عن البشاعة
ف الحكم ع الأشياء و ع البشر
و القسوة اللى بقت عنوان نظرتنا للضعفاء ..)
وياريت كلنا نبص كويس جدا فى المراية يمكن نقدر نشوف
ولو شفنا اكيد حنبطل نحكم على الناس من برة وبس
حنبطل العبارات الرنانة والحكم اللى بترف وكاننا ملائكة نازلين بس علشان نرجم الشياطين
حبى وتحياتى

الله يرحمه ويرحمنا جميعا يارب
ومش عارفه ارد اقول ايه
بس الله يعينا

اظن انى انا برضه اسمى عمرو

بجد مش عارف ارد عليه ازاى

بس احنا كلنا عارفين انتحاره ليه

انا نفسي افهم حاجة احنا ساكتين علي اللصوص اللي بتحكمنا ليه وسرقتنا وباعت البلد ليه طيب

من النهاية
معندناش كرامة
وربنا يرحمنا بجد

ربنا يرحمنا برحمتة

وذى ماانتى قولتى لية محدش مدلة ايدة اوكلمة قبل ما ينتحر

ولا دا فى الافلام الابيض والاسود

ماما فاتيما ازيك ،،، يارب بخير إن شاء الله
أنا مكملتش الموضوع قراءة لأنى فعلاً على آخرى اليومين دول و فعلاً الحزن مش على عمرو بس ،،، لكن حبيت أتضامن مع فكرة التماس الأعذار لخلق الله ،،، محدش يعرف يمكن حياته كانت اتحولت لجحيم لأسباب مادية ملموسة أو حتى نفسية و يمكن لو أى حد من الظرفاء اللى معنهمش دم أصلاً يحسوا بيه كان مكانه كان عمل أكتر من كده ،،،،
لكن للأسف احنا بقينا جزر منعزلة عن بعضها واحد بيبكى و واحد بيرقص و محدش شايف حد و المركب بتغرق
الأمل فى الله يعدى الأيام دى على خير لأن فعلاً حالات الانتحار و اعتيادها فى مصر و بالشكل البشع ده مؤشر مرعب للغاية
ربنا يحفظنا و يحفظ مصر من كل مكروه

اولا ربنا يرحمه ومنقدرش نقول مات كافر دي حاجه عند ربنا
وانا بجد اكتر حاجه غيظاني الي بيقولو كلها كام شهر وتتجوز حد تاني
هما عارفين هي حاسه ايه دلوقتي وياترا كان ايه رد فعلها وهتقدر تحب تاني وتعيش حياتها ولا ايه ظروفها
بس تعرفي بقى ياتيما ايه المشكله كل بنت دلوقتي هتقول اشمعنى منى انا عايزة حد ينتحر علشاني
واولهم انا طبعا
اشمعنى هي فيها ايه زيادة عني يعني (طبعا مع كل النكد دا لازم اهزر شوية )

يعني هتسأليني ايه يعني؟

طبعا الدعاء هوا فيه غيره


على فكره

بتبهريني دايما بأدبك الجم

يا ريت الكل يتعلم منك

صباح الخير يا فطوم
:-*****************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

كلامك كله صح انا ايضا امس صدمت من التعليقات المصاحبة للخبر وفكرت في عائلته واقاربه وهم يقرأونها فعلا المحاسبة الله وحده من يملك الحق فيها لانه هو المطلع على القلوب .
ايضا شئ اخر الاعلام احيانا في سبيل تحقيق سبق صحفي ينسى الجانب الاخلاقي والانساني ويتعامى عنه
واخيرا لانملك الا نطلب لعمرو الرحمة وحسابه عند ربه ان شاء غفر وان شاء عذب وانا لله وانا اليه لراجعون

ربنا يرحمه ويغفرله ويغفر لك مواتنا

ويسترها علينا وعلى عيالنا وكل احبابنا وعلى كل المسلمين
ومايحطش حد ابدا في الموقف ده

لان قرار ان الواحد يموت نفسه ده قارار بيجي بعد ازمة ربنا واحدة عارف مداها

تحياتي

فاتيما
هو إنتي ليه ما ردتيش على التعليقات في البوست إللي فات إللي عنوانة (سبب منطقي ) هل يعني إنتي ناسية تردي
ولا متناسية تردي ؟
هههههههههههه وش بيغمز هههههههههه
وهل فيه سبب منطقي لعدم الرد
KING TOOOT

كيـــارا
--------

الف شكر ليكى يا كوكى

كتر ألف خيره
اللى بذل مجهود و تعب نفسه
بكتابة هذا التعليق
و محاولة الشرح لمن قد لا يعلم


و كتر ألف خيرك
انك حرصتى تجيبيه هنا

ميرسى يا حبيبتى





المنسى
-----

ياااااااااه

و عليكم السلام يا منسى ى ى

انتا فين يا بن الحلال ؟!!
عاش من قرى تعليقاتك يا عزيزى
حمدلله على سلامتك

ايوه ادعيله بالرحمة .. و ان الموقف لا يصبح عادة يومية ف ظل الظروف الحالية

و اوعى القطورات تدخل ف بعضيهااااا





دودو
-----

لأ قولى يا دودو و لا تسكتيش
حتى الخوف مش من حقنا نصرح بيه؟!!

لما قريت الخبر اتوجعت على عمرو
و خفت ف يوم الحادث دا يقرب من حد من الشباب الطيب اللى بعرفهم ف التدوين و الشغل و العيلة و الحى بتاعنا

بس لما قريت تعليقات الناس
خوفت قوى على يوسف

لما القسوة و التشفى ف مصايب الناس كدا ..النهاردة ف ظل الظروف دى اللى المفروض نتلم فيها و يبقى القلب ع القلب رحمة
اومال قدام شوية هيحصل ايه؟؟


انا مبسوطة بزيارتك جداااايا دودو
و ربنا يحرسلك ابنك من كل شر يا رب





القدر و انا
-----------


ازيك انتى يا نانو
وحشتينى من يوم السبت اللى فات و الله
و يا ريت تكونى قريتى بوست السفر عشان فيه كلمة عشانك اقل و ابسط ما يقال فى حقك و من قلب قلبى بجد


اما تعليقك فنتى عارفة
انه دايما ف الصميم
انا انفعلت و كتبت البوست دا عشان الجملة دى خصوصا ...
البشاعة بتاعة البشر خضتنى و رعبتنى


بوسيلى العياااال





هوبتى
-----

متقوليش حاجة يا هوبتى
كفاية تدعيله و تطلبى له الرحمة يا حبيبتى




سمع هوص (ABO 3LI)
----------------

ان شاء الله يا سمع هوص
اقرى التحديث و انتا تعرف التفاصيل يا عزيزى

تحياتى ليك






صوت من مصر
---------

الف بعد الشر عليك يا كيمو
ليه بس كدا يا بنى ؟؟؟

Haytham Alsayes
---------------

انتا سألت السؤال
و جاوبته يا هيثم

الله يرحمه و يرحمنا معاه

نورتنى







غير معرف
-------

الخبر المنشور النهاردة بيقول ان حالته كانت معروفة و بقالها سنين و اهله و الناس حاولت تساعد بس يبدو ان الحالة كانت مستفحلة و لا حل لها للأسف

ربنا يغفر له بإذن الله
ليس على المريض حرج
و ماذا بعد فقد الروح ؟!!!






أحمد عبدالعدل
------------

الحمدلله انا بخير يا دكتور
المهم
ازيك انتا و لعلك دايما بخير يا رب

و شكرا على جملة التضامن مع فكرة التماس الأعذار دى ...
و الله الواحد لازم يعمل حملة
فى هذا الخصوص
اسمها
( التمس لأخيك عذرا.. واحد حتى )
عشان البشر بقوا بيدسوا على بعض بمنتهى البرود و القسوة
متفهمش سببها ايه و ليه
و ما الفائدة العائدة عليهم بعد كتابة النوعية من التعليقات
و الأراء
نفسى افهمها دى ؟؟!!


و فعلا الخوف ان الحادث دا
يتكرر بشكل شبه يومى لأن عمرو نفذه بشكل بيوصل فيه رسالة على حد تعبير صديق ... دى رسالة صارخة للمجتمع كله لأنه مشنقش روحه ف اوضة مقفولة .. ربنا يستر على كل الناس الطيبين ف البلد دى

تحياتى ليك





JUST WAITING
------------

شر البلية ما يضحك يا تيتو
و الله ماما قالتهالى ... قالتلى بكرة البنات الهايفة يقولوا نفسنا ف واحد يموت روحه عشاننا اشمعنى منى ؟!!

دايما افتكر المتنبى ف المواقف المؤلمة دى و هوه بيقول

و كم ذا مصر من المضحكات
و لكنه ضحك كالبكــا

تحياتى ليكى يا حبيبتى





مصرى جدا
--------

طب يا عم خلايص
عرفت


ومن غير ما أسألك
انا متأكدة
انك بتدعى يا هانى



وكلك ذوق
بس مخموم ف اختك فاتيما
و اصل لو شايفه ادب جم ..
فدا بسبب شياكتكم انتم
ف التعامل معايا اكيد ...
مش اكتر


و منحرمشى منك




wanda
-----
صباح و مساء الهنا

يا حبيبة فطوم

و روحى ذاكرى ى ى ى ى ى بقى
*********************************************************************
و
×××××××××××××××××××××××××××××××××××××××××××××××××××××××××××××××××××××





خواطر شابة
----------

موقف الاعلام يا خطورة نوعا ما انا شيفاه ف الحالة دى كويس ...

الأصل ف الأعلام الحرية
و كونهم سايبن التعليقات مفتوحة و مفيهاش غربلة ...دا الصح

مش هنزوق الواقع و هوه مشوه كدا

حتى صورة عمرو و هوه متدلى من الكوبرى
قطعت قلبى قووووى ...بس حسيت انها كان لازم تتنشر عشان يكون جرس انذار للكل و عشان حقه علينا اننا نشوف آخر لحظة كان عاوز يوريهالنا لأنه مرحش يموت ف اوضة مقفولة ..هوه اختار الشكل الصادم دا عشان يوصلنا رسالة احتجاج صارخة ... و كويس ان الأعلام بيدور على ظروف حياته و يوضح الصورة عشان محدش يفتكر انه ولد هايف و عمل حركة مجنونة و خلاص ...لأ الحكاية كبيرة و لازم نتعمق فيها و نحسها و نقول كل اللى ممكن يتقال و نطلبله الرحمة و نخلى بالنا من عيالنا

تحياتى يا حبيبتى ليكى



زهور الامل
---------

فعلا يا زهور
كل اللى كتبتيه حقيقى
القرار المرعب دا مفيهوش هزار و لا هيافة و لا استهانة ..و عاقبته عمرو دفع تمنها لوحده ..يبقى نقول الله يرحمه و نسكت مش نعلقله مشانق تانية
نورتينى



KING TOOOT
-----------

يا راعى الملك
اولاااااا
كل سنة و ارق مخلوقة ف الكون بخير و عايشة ف قلبك و ف ضلك و ف عين و بيكا ف التانية و السنة الجاية تبقوا اربعة بقى عشان زهقت انا ...

ثانيااااا
ايوه فيه سبب لعدم الرد
بس معرفش هيكون منطقى عند سيادتك و لا مش منطقى !!!
اصلى واخدة قرار سرى بإنى مش هرد على تعليقات اى بوست من ورا المشربية
مش تجاهلاً للى بيعلق اطلاقا و الله
بس لأنى بكتب البوستات دى لشخص واحد وحيد و بفترض جدلا ان الكلام ممكن قوى ميعجبش حد تانى و لا يهمه و لا يبلعه و لا يبقى عاوز يقراه من اساسه ..فبالتالى بقول اللى هيعجبه هيحس بالحالة و يكتب اللى ييجى على باله
و اللى من الفئات المذكروة عاليه مش هيكتبوا حاجة و خلاص

انما عشان الوش اللى بيغمز و غلاوتك عندى هرد على تعليقك هنا

انتا كالعادة صح
و حاسس بأختك و باللى ف قلبها
و المكتوب بقاله شهور بس فعلا وصل لدرجة انه خلاص بقى مفيش منطق غيره يفسر ما انا فيه

بوسيلى بوبو و عمر بيكا
لحد ما نتقابل قريب ان شاء الله
و هبقى اقولكم اكيد اول ما نرسى على معاد نتلم فيه ..ماشى ؟

كل سنة و اميرة اميرات كنج توت بخير و صحة و سعادة يا رب

اختك المفقوسة من قبل اخيها راعى الملك و هى سعيدة جدااا بذلك

فاتيما
ام يوسف

السلام عليكم
عندك حق فى كل كلامك متفقه معاكى
ياريت كل الناس تفكيرها زيك ويتقوا الله
ويلتمسوا الاعذار للغير ويكون فى قلبهم شوية رحمه
ويترحموا على الميت ومايصدروا احكام بالموت كافر او مؤمن
وانا بقرأ كلامك قلبى وجعنى وحزنت على عمرو الله يرحمه ويغفر له
ادعيلى ربنا يفك همى
تحية وتقدير لكى

طمنتيني عليكي
ربنا يكتب لك السعادة
يااااااااا رب
KING TOOOT

فاتيما

انا صاحبة التعليق اللى بقوللك فية انى اتمنى تكونى اخت او صديقة ليا

وانا فاهمة قصدك من البوست اية

ان المفروض كل واحد فينا يحط نفسة مكان التانى وبلاش نصدر احكام على الناس لكن الناس فهماكى انك بتشجعى على الانتحار

انا معاكي جدا فى كلامك

انا مش موافقه على اصدار الاحكام وكافر ومش كافر

وقلت كده

اينعم برضه متغاظه منه عشان عمل فى نفسه كده

لكن ده ما يمنعش انى متعاطفه معاه عشان الروح غاليه اوي ودي فطره فينا
لما تهون على البنى ادم اكيد ده حاجه مش سهله


وانا دايما باقول المرض النفسي مش بعيد علينا كلنا اصلا مش بس مرضى نفسيين ده احنا كلاكيع وعقد مالهاش حد

ربنا يعافينا ويسترها معانا ومع ولادنا

فيه فتاوى كثير على حكم من مات منتحرا
هل هو كفر يخرج من الملة ام ليس كذلك

فطوم
روحتى فين ؟؟ اوعى تكونى روحتى الغردقة الويك اند هده :-)
مرة بورسعيد مرة اسكندرية و الثالثة فين ؟؟؟
انت مواليد مدن ساحلية و لا اصلك حورية ؟؟؟:-) وش بيعاكس :-)))

مساء الانوار
:-******************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

فضفضة
-----
و عليكم السلام يا فضفض

اشكرك يا حبيبتى على ما كتبتيه
و ربنا يزيل عنك الهم ان شاء الله
طولى بالك و ما صبرك الا بالله يا حبيبتى
نورتينى ى ى ى




KING TOOOT
----------

منحرمشى منك يا وليد أبدااا

سلامى لبوب الجميلة و لعمورى





غير معرف
-------
انا معرفش حضرتك لحد دلوقتى
بس اشكرك على توسمك فيا خير و كتر خيرك

و صاحب التعليق الرقيق دا مش فاكر انى بشجع ع الأنتحار و لا حاجة دا حب بس يقولى انى بعمل مناحة على حد ميستاهلش و انه متجوز قبل كدا و القصص دى فيما معناه اسكتى و لا تعاطف مع امثال عمرو ....دا اللى فهمته ع الأقل

و يا ريت حضرتك تختاريلك اسم افتراضى اى كان عشان ميحصلش أى لبس
و شكرا ليكى





ندى الياسمين
----------

ايوه يا صبصوبة
فيه احساس قليل بالغيظ ..
بينتاب الواحد عموما
لما يسمع الخبر لأول مرة ..

و بعدين الغيظ دا بيتلاشى لما نقرى التفاصيل و نلاقيه يا غلبه الدنيا اسودت ف وشه لدرجة انه يضحى بأغلى ما يملك اى بشر و هى الروح

ربنا يستر ع الجميع يا صباصيبو
نورتى المدونة يا ست الستات




الطائر الحزين
-------------

شكرا يا إيهاب
منحرمشى منك بخصوص التعليق الاول
اما التعليق التانى
فبغض النظر عن الفتوى و غيرها
احنا نشغل عقلنا على قد ما نقدر آه
بس ما نحكمش ع الناس ..و بالقسوة دى
لأ ...لا يجوز اللى انكتب عنه دا باى حال من الاحوال لأن الموت له حرمة و ربنا وحده يقول مين كافر و مين مؤمن
مش كدا ؟؟

دايما منور صفحة التعليقات بالخير
يا طائرى الحزين الطيب





WANDA
-----

كان عندى شغل بخلصه على كمبيوتر البيت يا حبيبة قلب فطوم

و اخص عليكى ؟؟
كدا تشتمنى ؟؟

انا يتقالى الغردقة ف صفحة التعليقات كدا عينى عينك
لأ و يتقالى الويك إند كمان

...انتى حد قالك عنى حاجة لا سمح الله
يعنى تعرفى عنى انى وش ذلكوا برضك؟!!!

يا ماما انا آخرى شوارع وسط البلد
و بس

آل غردقة قال

اسحبيها فوراااااا


ميرسى ع السؤال يا حبيبتى
و انا كتبت بوست جديد اهو عندى و عند يسوفة

خدى التعيين بقى
*********************************************************************************************************
و
×××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××

في بنوته انتحرت النهارده من الدور 15

ربنا يعافينا يااااااااارب

كلامك كله صح

مين فينا مفهوش مصيبة جواه يعنى خلاص

هو عمرو اللى الموذنب الوحيد فى مدينة البراءة

ربنا يحفظ لك ابنك و يحفظنا جمبعا

اول زيارة ومش هتكون الأخيرة

كيــــارا
---------

ما هو علماء النفس بيتوقعوا المزيد يا كيارا للأسف و بالشكل الصادم دا و كأنها عدوى

ربنا يرحم الجميع يا حبيبتى
و يزيح عنهم






samy
----

فعلا
محدش منا برىء عشان ينصب نفسه قاضى
شكرا ليك و المدونة اتشرفت
اهلا بيك دايما

و معلش فيه اشراف ع التعليقات لظروف آخرها تزهيق الناس و اولها التعليقات اللى فيها شتايم و قلق اللى بتيجى للأسف

تحياتى تانى

للاسف وقعت فى يدى الجريده المنشور فيها الخبر ونادرا ما تصلنى هنا جرائد مصريه وللاسف لانى لو لم تقع فى يدى لما كنت عرفت هذه الحادثه المروعه لان وقتها لم يكن عندى نت ولا دش وبالتالى كنت منعزل
بكيت هذا الشاب و انا لا اعرفه بكيت عندما رايت تلك الصوره ولا اعلم ما هى فائده نشرها ولا اعلم لماذا اصبحنا نستهين بحرمه الموت بهذا الشكل العجيب
اوجعنى اكثر عندما دخلت الفيس بووك اليوم ووجدت احد اصدقائى ويفترض انه خريج اعلى الكليات حاطط لين الخبر وكاتب "عاش خايب ومات كافر" مش عارف ليه بقينا كدا مش عارف مين نصب مين على مين يحاسبهو يدخله نار او جنه
هوا حد فينا عارف هيموت ازاى؟ او هيموت على ايه؟ او هيدخل جنه ولا نار؟
وليه بنحكم على ماضى حد واحنا مش نعرف عنه حاجه وليه بنحكم على مصير حد واحنا بشر عاديين وربما كان الانسان دا افضل مننا
جاء موت عمرو الذى لا اعرفه ليزيد وجعى وجعا
وذكرنى بما وصلنا اليه من التخلف
تذكرت واقعه غريبه وقتها وجعتنى جدا برضه احد العمال العامليين معى شيعى عدت من اجازتى المعتاده استلم من زميلى المصرى المفترض انه ملتزم دينيا فسالته عن اخبار الشباب فاخبرنى ان هذا العامل توفت ابنته البالغه من العمر عاميين او ثلاثه فتاثرت جدا ولم اجد ما اقوله غير لا حول ولا قوه الا بالله فلما احس التاثر على وجهى قال:
يا عم زعلان ليه الحمد لله كويس احسن لها بدل ما كانت تكبر وتبقى شيعيه وتدخل النار"
اوجعتنى كلماته اكثر مما اوجعنى الخبر فانا لم افكر مطلقا فى هذا فكرت فى اب فقد وليدته فى طفله ماتت ليس اكثر ولا اقل
اسف على الاطاله ولكن فعلا الموضوع دا كان تاعبنى جدا
والى كل من لا يعلمون الغيب لا تصدر احكاما فما انت الا بشر ممكن ان تخطىء او تموت على غير الهدى فان رايت ما لا يعجبك فاحمد الله على نعمه عليك وادعو الله ان يحسن خاتمتك
مره اخرى اعذرينى على الكومنت الطويل دا
تحياتى يا فندم

إرسال تعليق