.

.

قــبـل النـــوم  

Posted by: فاتيما in




يسووووفة
يلا يا قطة ... خلاص غسلت سنانك ؟
شممنى الريحة كدا
الله
دى سنان لولى ... و بطعم التفاح
انتا حبيبى و شطورة
أهو كدا السوسة المفترية لما هتيجى بليل
و احنا نايمين ..مش هتلاقى حاجة تاكلها
فهتروح و هيا جعانة كل ليلة
لحد ما تبقى عاملة
زى عضومة الهيكل العضمى .. اللعبة بتاعك



على فكرة
انا مبسوطة منك قوى
عشان دايما بتسمع كلام ماما
يلا نطفى النور و نولع الأباجورة
و هات قصة من ع الرف عشان نقراها




تعرف انى كنت برضو زماااان
بقعد احكى حواديت لخالك و هوه صغير
بس هوه مكنش بيسمع الكلام زيك كدا علطول
و مكنش بييجى ينام اول ما اندهله و يغلبنى
فكنت مخترعاله شخصية مخيفة بتيجى للعيال
اللى مبتسمعش الكلام


لااااااا .. و لا الهوا
و لا كان بيخاف و لا نيلة




س انا مسكتش برضو

و كنت بقوله ان انا اللى بخاف انام لوحدى
فتعالى يا ماجد .. نام جنبى عشان اطمن
فكان بيصدقنى و بصعب عليه
يعنى هيا كانت حيلة منى .. غصب عنى
عشان تانى يوم فيه مدرسة
بس مكنتش مبسوطة من نفسى
عشان الواحد المفروض ميقولش حاجة
مش حقيقة
الا بقى غصب عنه جدا و مضطر
و انتا يا حبيبى راجل ملتزم جداااا
عشان كدا هتيجى ف حضنى
من غير حيل و لا خداع .. صح ؟

ربنا يخليك لماما
يا حبيب قلب ماما



طب اخترت القصة و لا لسه ؟
طب ارجووووك متكونشى
عيد ميلاد المخفية ... فلة

اه ه ه بص لى و اضحك ف الخباثة
دنا لسه بقول راجل اخلاق و محترم و بتاع
لازم شغل الإجرام يطلع برضو

كان قلبى حاسس .... انها هتنقيها

حرام علييييك يابنى
هوه كل يوم

عاااااااااااااااااااا





طب دى البت فلة الشقاوة دى
اتعملها
عيد ميدان عشرتلاف مرة بسببنا
و لا كلنا حتة م التورتة مرة
ولا لعبنا معاها هيا واصحابها ف يوم
و لا حاجة ... ينفع كدا ؟!



لأ يا عم مليش دعوة
هات حاجة تانية تنقرى

هات اى حاجة .. لدقدق بتاع القراءة للجميع
او بكار ... ابو معزة عاوزة تندبح دى
آيوه عارفة ان القصص دى بتخلص بسرعة

طب نقرى استريكس و اوبليكس او لاكى لوك ؟
لأ ...
دى هتبقى طويلة قووووى



طب أقولك
تعالى احكيلك حكاية سيدنا يوسف
اللى انتا متسمى على اسمه
يوووه ....خلاص خلاص انا غلطاااانة
عارفة انك حافظها صم ... معلش حقك عليا



طب اقولك حكاية ليلى و الديب
و انتا صغنونة مكنتش تنام غير لما تسمعها
و لا احكيلك عن سندريلا ؟
و لا الأميرة اللى حست بحبة البسلة
من تحت عشرين مرتبة ؟
او قصة سنووايت و الأقزام السبعة

ايوه حكايات كلها بنات و ماله !!
ما كل بنت ف دول ... عندها امير بيحبها
و لا الامرا دول مش رجالة يعنى و مالين عينك ؟




يووووووووه
حيرتنى ..عاوز تسمع ايه بس ؟
و بعديييين معااااك
هوه احنا كل ليلة
سيادتك تقعد تتعبنى كدا و تتشرط ؟؟



طب انا عندى اقتراح
ايه رأيك نبدل الكراسى النهاردة ؟
و تقعد مكانى و اقعد مكانك
انتا تحكي و انا اسمعك
موافق ؟
طيييييب يلا اتفضل خدنى ف حضنك
و العب لى ف شعرى و قوووول يلا



بس استنىىىىىى عندك
بشرط
قصة قبل النوم بتاعتى
متبقاش من الكارتون ..آه
يعنى مش عاوزة قصة الأسد الملك
و لا حدوتة من بتوع تيمون و بومبة
و لا بات مان ولا سوبر مان ولا سبايدر مان
او أى مان خاااالص بالمرة


عاوزة حاجة عاتيفية كلها مشاعر
و قلوب و ورد
... زى الجميلة والوحش
أو قصة كوميدية .. زى مغامرات بطوط
او حدوتة فيها سحر و خيال .... زى علاء الدين
مش عاوزة عنف
و ناس بتضرب ف بعض
و لا كمان كورة و لا جرايم
و لا دبابات و حروب و مخلوقات فضائية




إيه دا ؟؟
دنا بقيت عاملة زيك بالمللى
و بطلب طلبات انا روخرا ... ف الحكايات ؟؟


غريييييبة !!



دنتا طلعت عندك حق يا يسوفة
الواحد لازم يسمع قصص قبل النوم
على مزاجه و ينبسط

و لما حبيت زيك اسمع حواديت
فكرت و اخترت و اتشرطت

يبقى انتا كمان يا حبيبى
من حقك تختار .. ليه لأ ؟؟



طب خلاص يا سيدى أمرك ماشى
هات الهانم فلة
لما نعملها عيد الميلاد اليومى المعتاد
بس هات كمان بوسة كبيييييرة
قبل ما ابتدى القراية
و لا هقرى ببلاش أنا و دون مقابل !!؟



لاااااا ..دنا استغلاليه قوى
و مقرش حدوتة فلة دى
بأقل من خمس بوسات و حضونتين


و بعد ما نخلصها ... قولى
عاوز تسمع ايه تانى يا روحى
و انا احكى و اقول .. كل اللى نفسك فيه



سكوووووت .... هنبتدى
و تعالى حالااااااااا
ف حضن ماما يا حبيبى

---------------------------------------




بوستات صديقة
-----------
خلاص خلاص هشرب اللبن .... MR.PRESIDENT






الغنوة اللى سمعتها اول مرة
و انا بنت تمن سنين
و عدى الزمن و سمعتها
و انتا معايا يا حبيب ماما

و بقت غنوتنا سوا
دوس هنا



This entry was posted on السبت, يونيو 05, 2010 and is filed under . You can leave a response and follow any responses to this entry through the .

36 كــــلام بيطــبطـــب عـــلى قــــلبى و روحــــى

:-) انامش حرد عليكى بتعليق فى البوست ده
لا ببوست خبط فى بالى النهاردة و انا بتمشى :-))

و بعيد مالها الغردقة :-)) بلاش الغردقة نوديكى شرم ؟؟ و لا دهب ؟؟و لا طابا ؟؟:-)) يا فطوم ده الويك الاند هناك بيبقى بالشى الفلانى :-)
خلاص متزعليش تحبى تروحى فين و متقوليليش اسكندرية ثانى :-) هى حدوتة :-)))))))))))))))))))))))))))))))))))))))))))))))))))
نوديكى طنطا بلد محمد فوزى الاصلى ايه رايك تاكلى حمص و تتفسحى

http://www.youtube.com/watch?v=_4lDNNIkblQ

وانا هرد عليكي بالاغنيه دي عشان للصدفة البحته بسمعها وانا بقرا البوست :)

ربنا يجمعك بيسووووفة مش كبير علي ربنا والله



بحبك

بجد ربنا يخليهولك ويجمعكو علي خير ديما
اللهم امين يارب
انهارده اهو اول يوم امتحان
واتظبطنا تظبييييييييييييييييط:)
احمممممممممممم
يلا يارب الباقي بس يعدي علي خير

فااتيمااااااااااااا

اعشق انا بقى حكاوى الاطفال وكلامهم وضحكهم واعشقهم لما يتخاروا قصصهم اللى بيحبوووووووووها

ربنا يبارك لكى فى يوسف ويقر عيونك به ويفرح قلبك معاه وتشوفيه عريس زى القمر
ربنا يحقق لكى كل احلامك فيه ويحقق كل احلامك فى الحياه

على فكره باعشق ادب الطفل وتحت امر يوسف اول ما تيجوا تعيشوا هنا عندنا فى اليكس كل يوم حكايه جديده ربنا يحفظه فى اى مكان


على فكره انتى بتعرفى تكتبى سيناريو حلو اوى وحوار رقيق كمان
زهـــــــــراء

جميل اووووى البوست يا تيما


يييييييييييييييييييييا رب تتجمعو على خير

احيه بس انا بحب لكى لوك واستريكس و اوبليكس وكمان تان تان اوىىىىىىىىىىىىى

ادمان ياعنى

يارب تتجمعو على خير عن قريب واحنا كمان ونشوفه ونبوسه كلنا

ربنا يطمنك عليه ويهدهولك يارب

يا تيمه ياروح قلبى

أغنية جميلة قوي
و بوست أجمل

و معلش
شوفي اللينك ده http://www.dostor.org/crime/10/june/4/18209

ههههههههه
ربنا يخليكوا لبعض
انا بقي مليش دعوة
انا عايز اسمع
ابو رجل مسلوخة
او امنا الغولة
حاجة كده تنسي الواحد
انا وانا ضغير كنت بحب اسمع قصة سيدنا يوسف
وحكاية ال3 معيز وعلي فكرة
التدوينة الجاية كانت هتبقي قصة
من بتاع زمان
مليش دعوة بقي انا عايز
ضرب
ورومانسية
واكشن
وتراجيديا
وفلة
اللي انتي شوقتني اشوفك كاتبها
وفي الآخر
مقلتيش منها حرف
أما عني فانا بالنسبة لولاد اخواتي
ابونا الغول
لاني ان الرعب الحقيقي لهم
اصلهم غلسه ومش بيسمعوا الكلام زي عموا ماجد
اما يوسف دا فشطوره
بلغي له تحياتي

حتى كلامك عن يوسف اصبح مبتذل ومن غير روح

لأ انا مليش دحوة
انا حاوزة أغنية
عارف الواد اللي اسمه حادل جه التكتور وحمل له إيه
راح إداله حؤنة كبيرة حارف اداله الحؤنة ليه؟
علشان مبيكولش المش بدودو وكل صحابه ضحكوا عليه
واهو من يومها كبر واتبألظ وأتربى له حول في حينيه
تم تيرارام تيرارام تيرارارارا

ربنا يرد يوسف
ويجي يضحك بسرعه على هبل طنطه ستيتة المزمن
ويحب قلب ماما الجميلة ويبوس خدودها
اجمل ماما

أحساس غريب ينتابني عندما تكتبين اليوسفيات تنتابني رغبة قوية في احتضانك واني أقولك ارمي حمولك على الله ومن يتوكل على الله فهو حسبه

ربنا يجمعك بيع يارب
انا عندى احساس قوى مش عارفه ليه
انوا هايرجع
وتبقى تبوسيه لى كتييييييييييييييير

فكره جديده برضوا ان الاب او الام تاخد مره

دور الابن ويبتدي بقى يحكي الحدوته

حلوه جدا

فكرتيني بالبت اوختشي الصغنتته كل يوم تصمم احكيلها التلت معزات لحد مرة بقولها احكيها انتي بقى (انا واخواتي 3 بنات وولد ) سمت المعزات والديب على اسمنا وكانت فتشيحه في الاوساط العائلية
على فكرة كلامك جميل وفيه دفء واحساس عالي ماتسمعيش كلام الناس الوحشه الي مش بتفهم

هههههههههههههههههههه...
ايه الاغاني الجامدة دي!!

والله انتى جميله يافاتيما
ربنا يخليهولك ويبارك فيه يارب

تصدقى انا كمان باحب قصه سيدنا يوسف
وكنت باحب احكيها للولاد زمان اوى
فكرتينى
:(
ايام ماكانوا صغيرين
ياريتهم فضلوا صغيرين واحكيلهم حودايت وحكايات .......

بسم الله ماشاء الله الولد هيطلع محبوب جدا
ربنا يخليهولك يارب يا طمطم

ربنا يخليهولك ويجمعك بيه على خير يا رب

تحياتي

Wanda
-----


يا للهوووول
و يا خراشى
و يا لهوتينى


يا ون ون

انتى بتطعنينى بسكين ف القلب دلوقتى

شرم
و دهب
و طابااااا


لا لا لا لا لا لا
كدا الموضوع وسع
وانا لا أسمح بهذا التجاوز متلقااااا


انا يتقالى الاماكن دى ؟؟
انتى واخدة عنى
فكرة غلط خالص يا بنتى


يا ماما انا امكانياتى بنها
و اسماعيلية و اسكندرية
لما اكون لسه قابضة المرتب
و يوم واحد دون بيات كمان ...تقوليلى شرم


اخص عليكى
مكنش العشم !!



قريت بوست التنانين
و رديت و حقدت عليكوووو

كل عيد و انتى مبسوطة
و متفسحة يا فندم
انا بغبطك مش بحسدك
انتى عارفة


وتعالى هنا

لأ مش عاوزة طنطا

انا عاوزة اروح بلدالمحبوب
قصدى بلد محمد فوزى
التقليد مش الاصلى ...آه
مليش دعوة بقى
عاااااااااا

صباحك زى الفل
**********************************
و
××××××××××××××××××××××××××××××××××





كيــــارا
---------

انا كمان يا كوكى بحبك
يوسف كان بيسمع الغنوة دى برضو
آه فكرتينى بالذى مضى
يا بنوتات يا عسولات انتى

صباحك و مساكى
زى الورد يا حبيبتى






sony2000
---------

لأ يا سنسن
مش عاوزة احممممم دى خالص و النبى
شدى حيلك و الجاى احسن ان شاء الله
ربنا يوفقك ياحبيبتى





الطائر الحزين
------------
منحرمشى منك
يا طائرى الحزين الطيب






لولا و زهراء
-----------

ازيك يا زوزّا
انا كمان زيك يا ذات الوجه المشرق
و فكرة وجود طفل ف البيت و ملاصق للبنى آدم وقت النوم بيعلمه مهارة الحكى و اجادتها نوعا ما لأنه كل شوية يعيد القصة و يظبط فيها احداث و يحصل مفارقات كوميدى اوقات

اضحكك

ساعات كنت بلخبط يوسف و اشوف هيعمل ايه

يعنى مثلا اخلى شخصية مكان التانية فى قصة ليلى و الديب ..الجدة تبقى شريرة و هيا اللى بتبلع الديب

..فيوسف يرتبك و يبصلى
و يسكت شوية
و بعدين يروح موقفنى مستنكراااا

...ماما
ايه اللى بتقوليه دا ؟!!

أروح سألاه و انا لا يرف لى جفن ..
فيه ايه؟!!

فأكتشف انه حافظ التفاصيل كلها
و بيصلحلى و منتبه و كدا

ناهيك بقى عن نظرة الخضة
اللى بتبقى مرسومة على وشه
و تفطس م الضحك اصلا

ايااااام


ميرسى يا حبيبتى على ذوقك
بوسات و حضونات
يا ذات الوجه المشرق






richardCatheart
----------------

بجد يا قطاقيطو عجبك ؟

اكيد عندك تجارب شبيهة يا ماما


انا بعشق ايتريكس و اوبليكس خصوصا قصة كليوباترا و مناخيرهاااااا
اكيد عارفها
و لا اكليل الغار بقى
او المنجل الذهبى


و بعز لاكى لوك قوى
و الكلب العبيط اللى ف قصصه


اما تان تان يا عزيزتى
فيوسؤفنى اقولك انى بقراه و عندى تقريبا كل المجموعة بس معرفش ليه مبحبوش قوى

بحب كابتن هادوك جداااااااا
بتاع الف الف لعنة ولا المغنية بيانكا كاستفيور اللى بتحبه و بتموت فيه
و هوه مش طايقها بتاتاااا
و العالم اللى مبيسمعش حاجة دا

معرفش ليه دايما اتعاطشف مع الناس الغريبة و مبحبش الاذكيا قوى زى تان تان ؟؟

اكمنهم بيفكرونى بروحى ؟
اذ ربما !!


انا رغيت قوى ايه دا
يا لهوى انا ما صدقت اصلى
الاقى حد معايا ع الخط

انتى كمان حبيبتى قوووووى يا قطاقيطو
بوسيلى ميرهان و مروان و النبى

و سلامنا للحاج ريتشارد الاخلاق

مهندس مصرى
---------

ميرسى يا محمد

و شوفت اللينك دا فعلا

شكرا ليك يا عريسنااااا





MR.PRESIDENT
------------

قريت بوستك يا بسام
حلو قوى على فكرة

بص يا سيدى حكاية ست فلة دى تتلخص ف الآتى :

فلة هانم بتصحى الصبحية لما ماما تقولها قومى افطرى
و ييجى اصدقائها القطاقيط عشان ييسلموا عليها و يروحوا يلعبوا و يتنطنطوا و يتمرجحوا ف احضان الطبيعة
و آخر اليوم يروحوا ينفخوا ف شمع التورتة و يدوها الهدايا
و خلا على كدا

كل ليلة العذاااااااب دا يا بسام
و اقوله يا واد خلاص اتنيلت عملت عيد الميدان ..ارحممممنى ..متعرفش الاطفال مبتزهقش و لا تتعبش من التكرار

بس انا مكنتش بسكت
و ارضى بهذا القهر برضو ..
لاااااا

كنت ساعات اقعد
ازود ف تفاصيل و نقول حاجات غريبة


يعنى اقعد اتساءل
يا ترى لفات الهدايا فيها ايه؟؟


و نقعد نقترح بقى

نبلة مخصصة لفقع العين
مطوة قرن غزال
مسدس كاتم صوت
ساطور
حاجات رقيقة بناتى كداااا


وان شاء الله لما يرجع يوسف بالسلامة
هبلغه اكيد يا بسام




غير معرف
--------

رأيك على راسى من فوق

بس الحقيقة اول مرة حد يقولى على اليوسفيات انها مبتذلة
عادة الكلمة دى بتجيلى عن التدوينات العاطفية بشكل عام
لكن ف كتاباتى عن يوسف .. محصلش


بس تبقى كارثة لو كلامك دا صح

عارف ليه؟؟

لأن كل سطر ف البوست دا
عبارة عن حوار فعلى
كان بيدور بينى و بين يوسف كل ليلة تقريبا لسنوات متتالية


يعنى انا كنت ببتذل ف كلامى مع ابنى و انا مش حاسة بكدا ؟؟

طب مش يمكن حضرتك تكون قريت البوست فى توقيت منتاش رايق فيه ؟؟

يا ريت ترجع تقراه تانى
يمكن تغير رأيك


لو رأيك فضل زى ما هوه

يبقى العيب ف اسلوبى بقى

لأن بصراحة شديدة
الروح متغيرتش ..بالعكس
يوسف واحشنى جداااا الأيام دى فوق ما تتصور و وحشنى حضنه وقت النوم و لهذا تحديدا كتبت البوست

يمكن يكون خاننى التعبير
فانكتب بشكل مبتذل زى انتا ما قولت

عموما
شكرا ليك

ع الأقل عبرت عن رأيك
بشكل محترم و راقى


تحياتى ليك





ستيتة حسب الله الحمش
-----------------


يا لهوتينى يا ستاتيتو

دا مش هبل مزمن

دى براءة يا حبيبتى


و هوه العيال دىينفع نتواصل معاهم غير اما نعيش معاهم طفولتهم دى بكل ما فيها من براءة ؟!!!


حلوة الغنوة
بس انا من ساعة ما عرفت عادل و انا واخدة منها موقف ..اكمنه اصلااا رفيع و رجليه زى الفتلة تبق الاصل اللى قاله محمد فوزى ..فنا مبحبش احرجه بقى ... يعنى ابوظ نفسوية الولد عشان غنوة ؟؟
اينفعشى خالث

منحرمشى من دعواتك الحلوة

خواطر شابة
----------
احساسك مش غريب يا خطورتى

احساسك جميل و صادق و برىء
و مواسى و بيطبطب عليا و بيحضنى فعلا

منحرمشى منك ابداااا






الشوكة الناعمة
-------------

ان شاء الله يا شكشوكة
يسمع منك ربنا يا حبيبتى
و يا ستى يرجع و اللى عاوز تبوس براحتهااااا قوى مش هقول لأ أنا
انتوا ليكم فيه نصيب

خلى بالك من نفسك






ماجد العياطى
------------

ايوه يا ماجد
محنا لازم نعاملهم
على انهم شخص ناضح كبير
له نفس الحقوق و نحترمه و نقدره

ساعات كنت بحس انى بنته ...
مش امه


طول الوقت كنت بتعامل معاه
و انا شايفاه راجل كبير
عنده عشرين سنة مثلا
و فاهم كل حاجة كويس
فبقيت مستخفش بذكاءه ابداااا
و لا اكدب عليه (الا قهراً)
او اشوه اشخاص ف عينه زى باباه مثلا
لأنى عارفة انه ف يوم هيكبر
و يحاسبنى و لو صمتا أنى كدبت
او اتعاملت معاه على انه عيل
و مبيفهمشى


بجد الأطفال نعمة بس تتقدر
و تتصان
و تتحب صح





just waiting
------------


ههههههههه

فكرتينى بأبويا يا تيتو

كان برضو بيقعد يحيكلى حواديت
و انا صغيرة
عن معزة اسمها أمل
(اسمى ف البيت بيندهولى كدا متاخديش ف بالك)
و المعزة امل دى بقى
كانت بتعمل كل البلاوى اللى انا بعملها
و تروح للجزار عشان تندبح
و ينقذوها ف آخر لحظة و كدا ...

انا كمان كنت زيك ..لست وحدك
و مش بعيد تلاقى كل البلوجر
عنده فتايشح مماثلة يا ماما


نورتينى يا حبيبتى
و بوسيلى اختك العسولة





سمع هوص(abo 3li)
---------------

دول الفور ام يا عزيزى

شريكط دبدوبة التخينة دا من ايقونات شرايط الاطفال ف مصر

لما طلع ف أوائل التمانينات عمل جو و ثورة اصلاااا

و الفور ام وقتها كانوا ف عزهم و مختلفين عن السائد ف التوزيع و الستايل

معلوماتى ان محمد منير غنى الغنوة دى
و دخلت مرة ف نقاش مش فاكرة مع مين بصراحة عن ان الغنوة بتاعت الفور ام و هوه اصر انها لمنير ..و قولت الفور ام اقدم يا اخوانا .زو موصلناش لنتيجة يومها


المهم ان كلماتها كانت مختلفة و حلوة و زى ما عجبتنى عجبت كمان يوسف


تحياتى ليك






دودو
----

الله يخليكى يا دودو


و اذا كانوا العيال كبرو ع الحواديت

بكرة تحكى لعيالهم إن شاء الله

بس من غير عصاية
وش بيغمز


بوسات و حضونات يا حبيبتى





صوت من مصر
----------

ميرسى يا كيمو

هوه لسه هيطلع محبوب ؟!!!

منتوا مغرقينه حب أهو
و بقى محبوب جاهز من دلوقتى

خلى بالك من نفسك

أن شاء الله ها يرجع لحضنك
وها يخليك تعوضى كل الى فات من حواديت
يعنى لازم تجهزى نفسك على ....... كام حدوته أمممم 1000 ولا اكتر ....
ربنا يرجعه لك بألف سلامة و تتهنى معاه و يتهنى بحضنك وما يسيبك أبدا إلا وهو رايح لعروسته .

جميل جدا كل المشاعر الجميلة دى

بتفكرينى بزمان بس مكنتش لوحدى كان اخويا واختى معايا

انا اكبرهم بس مش اكبر كتير

كانت تجبنا وتحكلنا و تصلى لنا

بجد كانت ايام جميلة قوى (:(:(:

ربنا يخلهولك ويسعدك بيه


تصبحو على خير (:(:(: دة لزوم البوست

ام يوسف الجميلة
ربنا يسعدك معاه وتحكى حواديت لاحفادك يارب بس خلى بالك الجيل الجديد شقى مش طيوب زى يوسف
بكرة ان شاء الله ينزل لى بوست جديد مهم
ضرورى تقريه وتناقشينى فيه
حبى وتحياتى

ايه دا بقى دا ؟
أنا مليش دعوة بقى أنا عايزة حدوتة
وما تقوليش على فلة مخفية لو سمحتي
أنا معرفهاش صحيح بس طالما حدوتة يبقى ممنوع الاقتراب و التصوير
عارفة اني عمري ما اتحكى لي حدوتة وأنا صغيرة؟؟

أقولك حاجة
وأنا صغيرة في ابتدائي كده تقريبا
في مرة كنت بايتة عند خالتي وبنتها أصغر مني بحوالي 6 سنين فكنت بحكي لها حدوتة
واتشدت لها جدا وعجبتها أوي وبعد ما خلصتها قالت لي اللـــــــه حلوة أوي سمعتيها فين دي ؟
قلت لها والله أول مرة أسمعها دلوقتي وأنا بحكيها لك
كنت بألفها وأنا بحكيها
ومن يومها عرفت إني بعرف أحكي حواديت :)

لما يوسف يرجع هيجيلي مخصوص ويقولك عايز أروح عند خالتو اللي بتحكي حواديت حلو :)

بحس ان اجمل لحظات قبل النوم
اللى بين الام وابنها ونحكى الحدوتة ..

وسبحان الله بظن ان دى اكتر حاجة بتفضل عالقة بذهن الطفل ..

ربنا يردوهلك عن قريب وتقعدوا تحكوا سوا اجمل حواديت يارب ..

دمتِ بخير ..

على بلد المحبوب ودينى زاد وجدى و البعد كاوينى :-))) الاانور وجدى و لا وجدى العربى ؟؟
خلينا فى الاصطباحات احسن لفطوم
تبعتنى للمشترى و الدنيا هناك رطوبة :-)

صباح معنى الحصار
الحصار انك متختاريش
ملكيش حق حتى تودى نفسك بداهية بنفسك :-) لا لازم يكون حد حدفك فى النار علشان مصلحتك :-(((
ربنا يفك حصارهم

صباح المطالب
قال يعمى الراجل خايف المئؤلين يقروا :-))) هما بيعرفوا كوز الذرة ؟؟؟

صباح الرجال
ربنا يستر من الجيش التركى و ادماغتهم

صباح اللخبطات
اعتقد فودافون باعت مصر كسوق مش جايب همه و شكلنا كده حنسمع على فضيحة رشاوى الفودافون :-))) عالميا زى المرسيدس
ربنا مع الشباب الى شغال

صباح الأنتحارات
جملة ان الاسرة المصرية فقدت وظيفتها و دورها كلام يوجع قوى
ياترى اخواته بينغز ضميرهم حالته ؟؟
و لا زى المسئولين مش فارقة معاهم ؟؟؟
ربنا يرحم الكل

صباح النوار
ده مش موش دماغ اسمه جنان :-))و الى بيركز قوى بيلبسوه قميش الاكتاف

صباح الخيرات
مش قولت البلد عايزة غاندى
يلبس توب من الكتان و يلف البلد
و يعلم ساسيتها
البردعى لسه بيلبس بدلة لما يقلعه نبقى نشوف

صباح التخاريف
انا بحب اللاففاش كيرى المستودة :-))
و متقوليليش نقلبها طعمة :-((
بلاها جبنة ساعتها احسن

صباح النيابات
انا مفهمتش حاجة :-(

صباح الصدمات يا عينى
جبتنى جملة ان الراجل قال كلام لا يصح يكتب فى جريدة :-) لا فعلا نائب شعب و اكيد عنده شهادة فى قلع الحذاء :-)

صباح الطاهريات
الواد ياعينى اتزنق
فكرة لله علشان يكتب

صباح الأشعار
لا للمستحيل :-**

صباح الأغانى والدندنات
:-) انا قاعدة مش ماشية
حروح فين يعنى :-)) متهشيش

تصبحى على خير
:-**************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXX

يابختهم بيكي ربنا يحرسهم

كلامك جميل قوى
ربنا يرجعه لحضنك
و ميحرمكمش من بعض تانى
امين يارب العالمين

فتاة من الصعيد
--------------

ميرسى يا فاتى

منحرمشى من رقتك و دعواتك






أم بتول
-------


يااااااه
1000 قصة ؟
تفتكرى هيبقى عنده استعداد يسمع حواديت يا بوتى ؟

ساعات كتير أحس اننا خلاص فون\تنا حاجات و مش هينفع ترجع تانى مهما عملت

يمكن تتبدل بحاجات تانية غيرها
و لما يتجوز و يخلف اعيشها مع احفاده لو ليا عمر بقى و مفلسعتش بدرى بدرى اشاساً

شوفتى الإشراق و التفاوءل ؟!!

بهزر طبعاااا

ربنا يعوضنه و يعوضنى و يعوض الناس كلها خير خصوصا الطيبين اللى زيك

منحرمشى منك يا حبيبتى






samy
-----


و انتا من اهله يا سامى

لزوم التعليق
:):):)

نورتنى






القدر و أنا
------------

حاضر يا نانو
انتى انشريه
و انا هعلق أكيد و اقولك رأيى

بوسيلى العياااال







يوم جديد
---------

ايه دا ؟؟

يم يم اللى سايبة التعليق دى ؟!!

دحنا زاعقلنا نبى النهاردة انا و يوسف و لا إيه؟؟؟

و بتهرجى ؟

عمر ما انحكالك حدوتة و انتى صغننة !!
ليه يا ماما دنتى لو ف معكسر اعتقال زميلاتك هيحكوا حواديت قبل النوم برضو !!!
كنتى بتنامى آخر نفر ف البيت و لا إيه؟؟


عموما يا فندم متقلقيش
يوسف يرجع و انا ابعتهولك تحكى براحتك
و هقول على فلة مخفيه عشان عذبتنى سنين بليالى طوال كل يوم احكى حكاية عيد ميلادها لما كرهتنى ف نفسى

تعرفى بجد بقى
الناس اللى بتكتب ادب الاطفال دول متهيألى ربنا هيغفرلهم سيئاتهم بالقصص دى ...دى زى الصدقة الجارية كدا كل ما تنقرى و تفرح قلب طفل كل ما تمحى ذنوب اصحابها

بوسيلى روحك لحد ما تيجى فرصو و ابوسك بنفسى يا يم يم






لجين ابو الدهب
------------

يااااااااه يا لجين

انتى فين يا بنتى ؟
وحشتيناااا كلنا

كلامك صح جدا و اللى بيحكى الحواديت دى للطفل ام او اب او أخ علاقته بالطفل دا بتتوطد جداااا و بيبقى بينهم لينك كدا محدش تالت يعرفه

تحياتى ليكى و متغبيش علينا





wanda
-----

صباح الهنا يا ون ون
بخصوص الصباحات احنا متفقين فيها كلها

بس بتاعة النيابات دى يا ستى ملخصها ان النقاد و العالم بتوع الرياضة بقالهم شهور بيهاتوا ف ميزانية اتحاد الكورة خصوصا من بعد كاس الامم اللى فاتت اللى خزنته دخلها ملايين هدايا و عطايا و بلاوى و محدش عارف راحت فين ول ا اتقسمت ازاى و لا اى بتنجان ف الفاصوليا ...فتوا ما افتكروا بعد الهنا بسنة انهم يحولوا المخالفات دى للنيابة تحقق ..بعد ما كترت السكاكين ع الزاهر و تشكيله العوصابى و يظهر ان الدور عليهم عشان يكونوا فرجة الرأى العام الفترة الكادمة عل و عسى الناس تنشغل بيهم زى ما انشغلوا بابو الوسام ابراهيم سليمان و غيره ..عشان كله ينزل على مفيش ف النهاية

بس خلاويص

بتوع النهاردة اهم
**********************************
و
××××××××××××××××××××××××××××××××××




dr.lecter
---------


لا بختهم و لا حاجة
انت بس اللى بتجاملنى يا دكتور
ميرسى ع الدعوة
نورتنى بجد






بنت و ولد
----------
ميرسى جدااااا يا بنوتة

مبروك عليكى و علينا مدونتك
دخول للعالم التدوينى
موفق ان شاء الله

السلام عليكم
ربنا يحفظ يوسف ويحميه ويخليه لكى يارب
ويفرحك بيه
بس معلش فى السؤال هو كام سنه, هو مسافر ؟ اسفه لو سؤالى مش فى محله او غلط
وبشكرك على اهتمامك وتواصلك معى
تحية وتقدير لكى

وحشتني اليوسيفيات اوي يا فاتيما

بحس فيها بقلبك وبحنانك الي مش طبيعي دة

لما بقراهـا بسمع نبض قلبك بيحكي

وبشوف في سطورك نظرات حب عميقة جداا جدااااا

بشوف فيها صدق روحك
وحبك لابنك .. الي بجد ملهوش اي حدود

ربنا يردلك يوسف يارب

وتخبيه جوة حضن حضنك

وتحكيله ويحكيلك

قريب .. إن شاء الله


تحياتي لقلبك الجميل يا
أم يـوسف

ربنا يردلك يوسف ويكون في حضنك ديما

وتفرحي بيه

وحشتيني جدا يا فاتيما

ميرا (وومن)
----------

و انا معاكى يا ميرا بقول
يا رب


وحشتينى يا شقاوة







فضفضه
-----

و عليكم السلام يا فضفض

مفيش داعى للأسف يا حبيبتى و لعلك بخير دلوقتى و احسن عن الاول ان شاء الله

يوسف عايش مع والده فننا منفصلين
المفروض يكون ف حضانتى لأنى مش متجوزة
بس انا سته لدواعى و اسباب كتير اهمها الأستقرار و الامان ليه كطفل بيتربى و يكبر و بأسباب تانية تخص اهلى و تخصنى متعلقة بظروفنا و مشاكلنا و حياتنا اللى ممكن تتشقلب لو دخلنا فى خصومة مع طليقى تانى ....
هيا قصة طويييييلة مش عاوزة ادوشك بيها بس شكرا على سؤالك يا حبيبتى و اهتمامك





saragebaly
-----------

وحشتينى يا سارة
ازيك يا حبيبتى


انا كمان بحب اليوسفيات زيك
عشان بتخلينى اشوف يوسف بيتجسد قدامى و بيتنطط بين السطور
و التدوينات

بفتكره لما بكتب كل التفاصيل دى
و كأنى برجع ف الزمن لورا
و هو كأنه لسه ف حضنى


الكتابة فعل مدهش غريب
فعل قادر يستحضر الذكرى ف ثانية
فتلاقيها حية قصادك

سبحان الله



بوسات و حضنات ليكى يا حبيبتى

زهرة الجنة
---------

انتى كمان يا مروة

وحشتينى ى ى ى ى ى

إرسال تعليق