.

.

بـــحـــبــوووووووه  

Posted by: فاتيما in ,








أيوه 
بـحـبوووووووووووووووه
و هوه شخصيتى المفضلة

لما ف يوم يوسف مرة
سألنى زماااااان هذا السؤال

يا ماما و انتى ضغننة
كنتى بتحبى مين ف شخصيات الكارتون ؟



قولتله و بلا تردد
شخصيتى المحببة كانت
بقلظ حبيبى
دا يا بابا يبقى عروسة خشب

 لابس طرطور
و حاولت الاقيله صورة ف أى حتة
عشان افرجه عليها

لا يمكن لقيت





فرسمتهوله فـ قعد يضحك
قالى
دا اراجوز يا ماما
قولتله ايووووووه
و ماله ؟

بس كان دمه خفيف
و لذيذ موووووت





و أصله بصراحة
كنت بحس قووووى
انه شبههى

على عكس أى شخصية كانت
بتتقدم للاطفال وقتها ف البرامج
و اللى المفروض وقتها برضو
انها تكون مثالية بتسمع الكلام دايما
و مؤدبة و متفوقة ف المدرسة
و حاجة تشل و تعل 
و تجيب المرارة
و معرفش كانوا بيجيبوا العيال 
الحلوة الشاطرة المحترمة المهذبة
 علطووووووول
دى منين
مش فاهمة انا ؟!!




بقلظ بقى
كان العكس بالمرة
و ماما نجوى تبدأ الحلقة زعلانة منه
و بتحكى اللى عمله بقلظ افندى
فيطلع عامل حاجات

 و سبحاااااان الله
زى اللى بعملها تمام 

يا أخى تقولش نسخة بالكربون
مهازل
مصايب
بلاوى
كوارث
و أى لفظة تندرج تحت هذا المسمى
و بعدين تقعد هيا بشياكة و حب
تفهمه الغلط فين
و هوه يتعلم و يقول خلاص
يانى يانى يانى
و مش هعمل كدا تانى



بعترف انى اتعلمت جدااا من الفرجة مش بس إستمتعت
اتعلمت ازاى اشغل خيالى
و ازاى عروسة صامتة
ممكن تتحرك
و يبقى فيها حياة

اكتر من بنى آدم من دم و لحم
و ان الإبداع دا نعمة حتى ف أبسط الأشياء
اتعلمت ازاى العب مع ابنى
و اخلق له بعقلى البسيط 

شخصيات خيالية من العدم و انا عارفة
 انها ممكن تعمل فرق معاه
و تحببه ف الدنيا زى ما اتعمل معايا



بقلظ كان عروسة خشب صحيح
بس كان بيحسسنى

 انه انسان زينا كدا بيضحك و يتشاقى
و يتنرفز و يزعق و ينضرب

و ينام على كتف ماما نجوى
و يستخبى ف حضنها
و يودى وشه الناحية التانية مكسوف
و يسال أسئلة عبيطة كتييييييير
و يعمل غلطات كتيييييييير
و ف الآخر يتحب قوى
و يطبطب عليه

و بيتفرج معانا على الغنوة و لاّ الكارتون
و لا كأن حصل حاجة
و الدنيا مخربتشى يعنى




يعنى م الآخر كان طفلاااااااااا
كما ينبغى أن تكون الطفولة
يعنى
الدلع
يعنى الشقاوة
يعنى الحنان معاه مهما أخطأ
يعنى التعليم براحة

مش الطفولة المشردة اللى أغلبنا شافها

و محدش يتنهد و يقولى 

هيييييييه أيوه أيوه
كلنا هذا الطفل يا عزيزتى
عارفة و النبى من غير ما تقولوا
اومال انا بعمل البوست دا ليه



أيوه صحيح
ليه؟


تخليداااااااا لروح الطفولة المعذبة
فى نفسوية كل واحد فينا
اظن كتير منكم شاف بقلظ و فاكره
ع الأقل جيل التمانينات لحقه برضو
زى جيل السبعينات اللى هما دفعتى
و أهو تخليداااااااا زى ما قولت 

للحرمان الأزلى
و لمحة من زمن جميل راح
و مش راجع



و نوع من التحية البسيطة
لتلات اشخاص
هما السبب ف الفرحة الرهيبة
اللى حسيتها قوى
و انا بتفرج على المشهد الجاى دا
و رجعت معاه عيلة تانى
ف ثوانى





اما
بقلظ حبيبى


فأيوه كنت بحبه
و ما زلت بحبه
جدااااا

و مازلت
بحب العروسة الخشب
و مغرمة بمسرح العرايس
مهما طلع كارتون و جرافيك
و ابصر ايه تانى جاى ف السكة



أنا 

بحبوووووووووووووه
و بس 
خلاص




(1)
--------------

محمود رحمى




صاحب العروسة
و صانعها من عدم

(2)
--------------


سيد عزمى





بقلظ و خفة الدم
اللى ملهاش حل

(3)
--------------

ماما نجوى




اشيك ام شفتها
ع
الشاشة



This entry was posted on السبت, يوليو 10, 2010 and is filed under , . You can leave a response and follow any responses to this entry through the .

21 كــــلام بيطــبطـــب عـــلى قــــلبى و روحــــى

ياه يا فاتيما فرحنى جدا البوست دا والله ما اقدر اوصفلك قد ايه انا بموت فى بقلظ انا اول ما شوفت الصوره بدون اى تردد ضغطت اقرا الموضوع وانا بقول بقلظ بصوت عالى فى البيت لدرجة اختى بتقولى بقلظ ايه فقولتلها اللي كنا بنموت فيه والله فى حاجات بجد كانت روعه زمان مش هتتكرر
دلوقتى الاطفال يمكن مش يقنعها الكلام دا وتبص ليه بعين السخريه بس ولا يهمنى برضو بحب بقلظ
لكن عارفه لسه فى اطفال بيعجبها الحاجات دى بس نادره الاطفال دى الطفوله نفسها بقت شىء نادر اصلا
ربنا يخليكى لينا ودايما مفكرانا بالحاجات الجميله دى
وانا من جيل التمانينات وبقول من منبرى هذا انا كنت بعشق برنامج ماما نجوى وبقلظ ولا اخجل
خالص تحياتى واحترامى ليكى

يااااااااااااااها فكرتني يافاتيما بالذي مضي .. كانت أيام كنت مصدق أقعد قدام التليفزيون .. عشان اتفرج علي ماما نجوي أو توم وجيري او برنامج من اللي بتجيب الغباء للعيال زي عروستي ..
علي رغم من حلاوة تلك الأيام إلا أنني أحيانا بتمني مترجعش وفي ثانية تلاقينا بقول ياه لو الواحد رجع تاني ..
أنا مكنتش بحب أستحمي .. إلا لما الضرب يشتغل .. كان الحمي اجباري .
يلا
أنا انا ابريق الشاي إيدي كده .. كنت بحب الإغنية دي .

تحياتي لاختيارتك وتعرفي بصانع الشخصية وممثلها لأني بصراحة مكنتش أعرفهم

بجد كنت عوذه اعاصر الحكايات والحجات دي
علي الاقل بدال الهووووووووووو اللي احنا عايشين فيه
بس لحقنا بردو بوجي وطمطم:)
بس المشكله فاالجايال اللي جايه
مين اللي هيعلمها صح
ربنا يستر عليهم

ملحوظه صغنونه
انا عوذه اعرف اكلمك بس موش عرفه اذاي ع موضوع اللقاء النتدويني احاول اجي بما ان المكان قريب مني:)

مساء الورد فاتيما
مزورتش مدونتك من زماااااان
بس بجد البوست ده يجننن بجد انا بموت ف بقلظ وماما نجوي ولسة تقريبا فاكرة اغنيات زمان دي وبغنيها لاولاد اخواتي لما الاقيهم بيقولولي علي اغنيات زي البندورة الحمرا وعصوم مش عارف اية وبحبك يا حمار وانت طلبتي تطلقي ...اه والله بجد رجعتيني لزمن عمري ما نسيته ولا راح من بالي خصوصا ان بقلظ ده شخصية زي وزيك وزيينا كلنا مش عارفة صحيح كانوا بيجيبوا العيال النضيفة الهادية الساكته الحلوة دي منين ...دا انا كنت شيطانة بس اللي يشوفني يقول هادية وعسل وقمر بس الحقيقة ...كدة يعني ولسة برضه في داء الطفولة والشعننه والجنون وحابة نفسي كدة
بجد بوست جميل تسلم ايدك عليه

ههههههههههههههههههههههههههههههه

يا خرابى كان بيبقى يوم الاتنين عيد
كان ايامى بيجى يوم الاتنين مامانجوى وبقلظ
مش ممكن اجمل مايكون طبعااااااااااااااااا
بحبه وبموت فيه ولعلمك استوعبت على كبر انه عروسه يجى فى سنه ثالثه ابتدائى كده
وبحب سيد عزمى علشان هو اللى بيعمل صوته

يا خبر كانت ايام
ماما نجوى دى عثثثثثثثثثثثثثثل
الجميل انها حتى لما رجعت تعمل برامج مسابقات كبيره
زى فكر ثوانى تكسب دقايق
و100 فى 100
كانت بتقابل ناس يقوللها ماما نجوى
وناس كبيره اوى عنها ويقوللها بصى يا ماما نجوى
كنا بنفطس من الضحك بس هو فعلا لقب اقترن بيها
زى ماما عفاف الهلاوى
وماما ساميه
هههههههههههههههههههههه
بس هايفضل اشهرهم ماما نجوى

جميل اوى البوست ورجعنى لايام جميله
يوم الاتنين المحبب عندى لان ماما نجوى بتجى هى وبقلظ وماما بتعتى كانت بتبقى اجازه
ياعنى عصفورين بحجر واحد
هههههههههههههههههه

تحياتى وجميله يارب ديما يا تيما
مريهان بعتالك سلاماااااااات
وبووووووسات
ومحمد مليون سلام وتحيه
وانا فعوصاتى وبوساتى

بمووووووووووووووووووت فيه

ده انا كنت بستنى صباح الخير ده .... وبعدها مساء الخير

يا سلااااام

بس انا كنت مؤدبه ومطيعه على فكره :)

وموش كنت شقيه زيه خاااالص

وفاكره كرنبه وكاميليا العربي.. دي حضرتها طشاش

كانت كرنبه شقيه برضو :)

انتي عسوله خالص وجبتي حاجات جميله لحقناها كده نحن جيل التمانينات :)

بوسه بقا
موووووووووووه

سلام

ومين ميحبوش دة قمر هههههه سيبك بئا ماللي حاصل الوقت وأطفال اليومين دول تلاقيهم سبيس تون وميكولوديا وغيروو يعني بالنسبالهم بقلظ دة حاجة مش مقنعه أنا بحبه هو وماما نجوى وبحب كرمبه كمان :) 

سبحان الله

فكرتيا بأيام الطفولة وشقاوة ومغامرات بقلظ ..........ذكريات من ذهب والله احنا جيل استمتع كتير بالحاجات الجميلة دي

تسلم إيدك 

من فضلك انا مسمحش لحد يقول على بقلظ عروسة خشب.. دا هو كان السبب اني شربت كوباية لبن وانا صغيرة رغم اني كنت وما زلت مبحبش اللبن - او هو مبيحبنيش زي ماما دايما ما بتقول
ازيك؟ وحشتيني اوي.. عارفة اني مقصرة معاكي خالص يا طمطم بس غصب عني.. الظروف ملخبطة اوي ومن كتر اللخبطة مش قادرة حتى اكتب لا على المدونة ولا الايميل.. بس بقلظ خلاني اكتب تعليق عندك اهوه.. خلي بالك من نفسك يا طمطم.. سكتك اليومين دول مش عجباني.. حاسة انك مقابلة فيها وجع.. ربنا يحميكي ويبعد عنك كل شر.. وكل خير جارر وراه شر.. وكل شر متنكر وعامل نفسه خير .. ويا رب يكتبلك الخير الخالص المصفى .. بحبك

انا كمان كنت بشوف بقلظ و البرلمان الصغير :)))
وحشاني خالص
واحتمال كبير احضر اللقاء لاني نازله القاهرة
يارب تكوني بخير وبوسه وحضونه كبيره اد كوكو الارض

مش قادر اواجه الموقف

هههههههههههههههههههههههههه

بجد معظم برامج الأطفال كانت جميلة جدا جدا

على فكرة كانت صباخ الخير و عملوا بعدين صباح الخير مع زيادة الأقبال علية

فكرتينى بحاجات جميلة جدا و برامج

فتحى يا زهور فتحى

http://www.youtube.com/watch?v=5IfoLgXCxs4

بوست مبهج جدا (: و يتعب جدا مع كل المشاعر الجميلة اللى الواحد مفتقدها

عيل بقا (:

شكرا جدا جدا (:

انا كمان بحب بقلظ وماما نجوى
وماما ساميه وبرنامج عروستى
وبحب سينما الاطفال يوم الجمعه لما اصحى عليها
وفيلم الكلبه لاكى
وكارتون سلاحف النينجا
و كارتون كابتن ماجد
وكارتون مازينجر

عيشتينى فى حاله جميييييييله مع الذكريات دى يابطه
تسلم ايدك وافكارك

ب ح ب ك

كنت بحب اتفرج عليه اوووووووووووووي

ايام اما كنت مقيمة عند جدو الله يرحمه

يااااا يافاتي فكرتيني بايام جميله اووووووووووووي

nour shahen
-----------


ازيك يا نور
منورة
:)


فرحان اكيد ان البوست فرحك
و انا رجعت عيلة فى ثوانى بمجرد ما شغلت الفيديو دا و اتفرجت عليه و اصلا من زمان عاوزة اكتب عن العرايس الخشب لأنى بحبها و بقلظ اولها

نورتينى اكتر حد
يليقه الكلمة دى
:)








MR.PRESIDENT
------------

انا كماااااان يا بسام
بحب الغنوة دى قوى


و بخصوص رجوع الأيام دى
تعالى هنا

نعمممممممممم

مين قال انى عايزاها ترجع ؟؟!!
مش بقولكو طفولة مشردة

حد عاوز يتشرد تانى ؟؟؟
لأ طبعا

بص يا بسام من الآخر

كل سن و له جماله
و له تشريده برضو

و حيث انى عشت الطفولة خلاص
بتشريدها و حلوها
فمش عاوزة ارجعلها تانى خلاص

بس مفيش مانع
الواحد لما يلاقى حاجات تفكره بحلوها
يفتكر اكيد
ماهو مش كله ضرب ضرب
عاوزين شتيمة


تحياتى ليك يا مستر بريذدنت





sony2000
--------


فين الهوووووو دا يا سنسن
ايام طفولتك كان يها حاجات حلوة برضو و كما ذكرتى منهم بوجى و طمطم كنت بشوفه مع ماجد اخويا
و حاجات كتيييير تانية يا شقاوة

بخصوص اللقاء التدوينى معلش بقى انه اتلغى بس اول ما يتحدد معاد تانى هتعرفى اكيد من هنا و هيكون فيه نمرة تتكلمى منها و تسألى زى ما تحبى

خالص حبى ليكى
يا سنسنتى





re7ab.sale7
-----------

و لا يهمك يا رحاب
انا بزورك صمتاً انا كمان
بس متابعكى

و انتى ؟!!!
شكلك كنتى زى حالاتى طفلة مشاغبة
و مش بالشكل اكيد انا كنت سوفيفة كدا و ساكتة و شكلى غلبانة بس كنت بعمل مصايب قولنا ... عاتى


نورتينى يا حبيبتى
و مساكى و صباحك و كل اوقاتك
ورد و ياسمين




richardCatheart
---------------


انا كمان قعدت فترة اقول
الصوت دا بيطلع منين ؟؟؟؟
محدش فهمنى خالص

قوم بقى يوسف انا مستنش يسألنى
قعدت اشرحله و افهمه عشان حالة الغموض الحيثى اللى كنا فيها متجيلوش و يتأزم نفسوياً

انا كمان كنت بحبها
كنت بعتبرها ام شيك و راقية
شكلها حلو و ابتسامتها ف وشها طول الوقت و حنوة و بتقول بقلظ يا حبيبى علطول .. و لأنى مكنتش بسمع الكلمة دى كتير و انا صغننة فبقيت اقولها ليوسف طول الوقت و كأنها اسمه .... عشان انا عارفة قد ايه ممكن تفرق ف النفسية و عدم قولانها يبقى بخل بلا مبرر ...هيييييه
أيام


بوسيلى ميرهان جداااا
الحاج محمد ببعتله السلامات والأحترامات
و مروان اللى مطنشنى برضك ابعتيله بوسة حتى لو قال لأ عشان راجل
و هينكسف

واما الحضونات ام فعصات دى تبعك انتى لوحديكىىىىىىى







فتاة من الصعيد
--------------


إيه دا ؟؟؟

انتى كنتى من معسكر الأعداء

الناس المؤدبة دى
إيا ياه كسيكي لياه
هتزعلينى منك كدهون قوى

كرنبة كانت لطيفة
بس اصل التحاور مع العروسة سبب مهم ف حبك ليها
و انا بعتبر نجوى ابراهيم اقدر المذيعات فى جيلها تعاملاً مع الأطفال و اقربهم ف البساطة و الشياكة ف نفس الوقت
الباقيات كنت بحس كل واحدة فيهم بعيب ما
واحدة دمها تقيل
واحدة متكلفة و مصطنعة
واحدة بترغى زيادة عن اللزوم
واحدة شكلها بينرفزنى
كدا

زماااااااااان قوى
شفت حلقة لواحدة اسمها سلوى حجازى و للأسف كانت مذيعة رائعة و ماتت ف حادث طيارة و هيا صغيرة
شفت حلقة ليها مع الاطفال و كانت حنونة جداااااااااا و حبيتها قوى
اتصور لو كانت عاشت و كملت ف شغلها كانت هتفوق نجوى ابراهيم و تبقى ايقونة ف المجال دا
بس العمر بقى و امر ربنا
كانت شاعرة كمان و الشعر خلاها اكثر رقة عما هي كانت عليه اكيد
الله يرحمها


معرفش اكيد عاصرتى بابا ماجد
كان حد حلو و طيب قوى كمان
و كنت بحبه برضو

لكن
لا أحد يعلو على بقلظ
رمز طفولتى المشردة


بوساتى
و حضوناتى
يا فاتى

مخنوقة بجد
--------

يعنى متفقين أهو
طييييييب

و كل جيل و له جماليته
اطفال اليويمن دول عندهم تنوع
و دى ميزة مش قليلة
و بكرة يبقالهم هما كمان ذكرياتهم
دا المهم
نورتينى






كلمات من نور
-------------


و تسلميلى
انتى كمان يا كلمتى







بوبو
----

حاضر مش هقول عروسة خشب

بس طب يعنى
اليست هيا الحكيكة
و بعدين انتى مسمعتيش الطقطوقة بتاعت الست صفاء بنت ابو السعود لما كانت بتقول فى اول مذهب

مع انه خشب
ف خشب
ف خشب
انما
يستاهل
تقله دهب

فنا مش بغلط فيه بالمرة مستجريش دنا بقول بحبووووووه


و لا يهمك من اى حاجة
انا بس ببقى عاوزة اطمن عليكى و بوستات وليد تطمنى الحمدلله و خليكى على راحتك

متقلقيش عليا اختك فاتيما بخير و ربنا ما يحرمنى من قلبك اللولى دا يا ارق مخلوقة ف الكون

بوسيلى عمر
و سلامى الشديد لابو عمر

انا كمان يا حبيبتى
بحبك






اميرة على كوكب مهجور
--------------------

شوفت البرلمان دا مع ماجد اخويا
كان لطيف

اللقاء اتلغى
بس ان شاء الله يتحدد غيره و هتعرفى اكيد و نتقابل
انتى كمان وحشتينى
و وحشنى موضوع الكوكو دا قوى
بوسات و حضونات يا قمر
سلام لتاليا و مامتها




Ramy
----
آه شفت يا رامى

كان مثقف و لذيذ جدا
سيد عزمى فعلا موهوب و خفة دمه دى نعمة من ربنا مش بيديها لأى حد و الجميل انها استغلت فى مصلحة ملايين الاطفال على مدى اكتر من 25 سنة و دا لوحده سبب كافى يترد بيه ع العالم اللى بتقول الفن حرام و الموسيقى حرام و اى نوع من الاعمال المشابهة حرام ..ان لأ مش حرام
عروسة خشب زى دى قادرة تقوم سلوك طفل ما و تخليه احسن لو استعملت صح
يعنى الفن وسيلة ترقى بيها الناس و بالتالى المجتمعات ...بس تبقى صح


ميرسى ع اللينك

تحياتى ليك
يا ر ر





غير معرفة المتخفية بنضارة
-----------------------
-----------------------
و انا كمان يا قلبى
كنت بحب كل ودل و بتفرج عليهم
بس بقلظ الالفة بتاعهم

تسلميلى انتى يا قطتى
و فرحااااااانة جدا
بالتعليق دا

يااااااا مسهل

بحبك انا كمان





كيـــارا
--------

انتى اللى جميلة يا كوكى
يلا ما هو بوست الذكريات
و الحمدلله انها ذكريات حلوة
عند الكل

بوسات و حضونات
يا بنوتات يا عسولات

وانا كمان بحبه

اول مرة اعرف انو سيد عزمى هوة اللى كان بيعمله
انا فرحت اوى اوى بالبوست كنت مبسوطة وانا قاعدة بقراه
عجبنى كلامك عن بقلظ اوى:)

اه والله

الله يرحمه

شقيقة الروح
آه يا فاتيما وجعتيني وفكرتيني بكل اللي فات بلمحة
هو انتي جميلة كده ليه ؟ وقريبة كده ليه؟
عارفة انا بحمد ربنا على وجود اصدقاء في حياتي ومنهم انتي حبيبتي

بوسات وحضونات وسع الكون
وبوسة على ايد ماما
وكل سنة وانتو طيبين يا رب وقريب تعملي حج مع يوسف وماما ياااااااااااارب
3>3>3>

كلنا هذا الرجل ههههههههههههه
انا كمان كنت بحب حركات بقلظ جدا وكنت بتفرج عليه عشان كمان كان بيجيب كرتون مازينجر هههههههههههه
كل سنه وانت طيبه يا فاتيما

إرسال تعليق