.

.

حـــداشــ (11) ـــر  

Posted by: فاتيما in





ياه .. تصور ؟!!
حداشر سنة يا حبيبى عدت
و كلها ساعات معدودات و هتكون تميت
سنة جديدة ف عمرك الصغنن
و كمان الكبير المليان حاجات و احداث أكبر
صحيح مش انتا السبب ف حدوثها بالمرة
و لا اللخبطات اللى جت بعدها
بس أى شىء له علاقة بيك كان علطول
جميل و طيب و برىء زيك



عارف؟
من زماااان ومامتك ف المدرسة
او حتى لما دخلت الجامعة
لما كانوا يسألونى عن احلامى
و اقصى شىء بتمناه ايه؟
كنت بقولهم بتمنى انى أبقى ...ام
و لما كانوا يطلبوا منى أخمن مثلاً
اجمل يوم ف عمرى
مستنياه و بتخيله .. هيكون شكله ازاى ؟
مكنتش باخد وقت افكر
و علطول بقول .. يوم ولادة اول طفل ليا



طول عمرك كنت حلمى وامنيتى
اللى مبتتغيريش بتغير الاحوال
و مجى و مشيان الناس من حواليا



كنت مستنياك من بدرى قوى
و من قبل الزمان بزمان



لما الدكتورة اللى كنت بتابع عندها
شهور الحمل
قالتلى انى حامل ف بنت كنت فرحانة
اصلى بحب البنات جدا
كان نفسى يبقى عندى بنوتة
عشان اعيشها اللى معشتوش



مزعلتش قوى وقتها
لما حماتى وشها قلب و اتضايقت
و مزعلتش برضو
لما باباك ظهر على وشه
شوية احباط و حاول جاهداً يخبيه
كنت الوحيدة الفرحانة ان هيكون عندى بنت
و فرحتى غطت على اى سخافات ظهرت
و كان همى اتخيل ف الفساتين والفيونكات والضحك
و اسامى الدلع اللى هناديها بيه
و قعدت اعد الأيام و استناك




لما ف يوم لقيتك مبتتحركش
ف بطنى كالمعتاد ... قلبى انخلع
و روحت للدكتورة بسرعة اطمن
و لما قالت وقتها لازم تولدى حالا و الا يبقى خطر
مخفتش خالص ... معرفش ليه؟!؟
بس قعدت اتصل بكل الناس اللى بحبها
عشان اسلم عليهم و اسمع صوتهم يمكن لآخر مرة



و انا بفرد ضهرى على سرير اوضة العمليات
اتمنيت امنية واحدة مفيش غيرها
ان لو ربنا يكرمنى .. يخلينى الحق اشوفك
و مش مهم اى حاجة تحصل
كانوا بيقولوا هنضطر نحطك ف حضانة
بعد الولادة علطول
كنت بتمنى لو الحق احضنك
لمرة قبل ما ياخدوك و اكون اول حد




انا اصلااااا زعلت جدا لما عرفت
انى هولد قيصرى
طول عمرى بتفرج على افلام و اشوف الأمهات
بتولد طبيعى و تصرخ و تتألم و مكنش بيهمنى
كل اللى كان بيثير فضولى
لحظة ما بعد الالم
لما صوت البيبى بينسمع
و الام تسأل .... ولد و لا بنت ؟
و تاخده ف حضنها




الالم دا ف نظرى و ما زلت بشوف كدا
مجرد فاتورة عبيطة بتندفع ..المهم المقابل




لما دكتور التخدير قالى عدى من عشرة لواحد
كان خالك ماجد آخر شخص ف بالى
لأنه الطفل الوحيد قبلك اللى حببنى ف الأمومة
و خلانى احس انها اسهل حاجة رغم صعوبتها
تقريبا انا اللى مربياه انا و اخويا الكبير
كان ناقص بس اسمع كلمة .... ماما
و اخيرا خلاص هييجى اللى يقولهالى
انا لوحدى و مفيش ام غيرى




لما فقت ... سمعت امى بتندهلى
قومى ... انتى جبتى يوسف
كنت بين اليقظة و النوم
كنت فاكرة انى بهلوس و بسمع خطاريف !!
يوسف ؟!!؟
هوه احنا صحيح كنا متفقين
لما نجيب ولد ... هنسميه يوسف
بس الدكتورة قالت بنت .. طب خلاص
صحيح قعدنا كتييير نتخانق على اسامى البنات
و قولنا نأجل الخناقة لحد ما تتولد
بس حتى و انا داخلة العمليات
مرضتش افكر تانى و قولت استنى لما نشوفها
مين يوسف دا بقى اللى بيقولولى عليه ؟!!؟





حاولت افوق و انتبه
و لما لقيت حضنى متكوم فيه
كتلة بشرية
بتتحرك بشكل لطيف و بتزغزنى
ميلت راسى التقيلة ناحية اليمين شوية
و أخيرااااا فتحت عينى بصعوبة
عشان المحك لأول مرة




و شوفتك و مكنتش عاوزة أنطق بكلمة
و لا ارد على أى حد
كنت مشغولة بالبص عليك و على كل ملامحك
كنت جميل قوى
و برىء قوى
و ضعيف قوى
و شبههى قوى
و فجأة بقى فيه حد يخصنى لوحدى
و انا مسئولة عنه لأول مرة ف حياتى
و المفروض لآخر نفس ف العمر




مركزتش كتير ف الكلام اللى كان داير
من كل اللى واقفين حوالين السرير
من ان الدكتورة طلعت مبتفهمش
و متزعليش المرة الجاية تجيبى بنوتة
و انك قعدتى ليه تندهى على ماجد و انتى ف البنج؟
و الولد صحته زى الفل الحمدلله و مش محتاج حضانة
و الف مبروك يا ستى



كان فعلا اجمل يوم ف حياتى
بغض النظر عما تبعه من الآم النقاهة اللى طولت
و من المشاكل اللى حصلت بعد كدا
و التغريبة اللى روحنا فيها انا و انتا لسنين
قبل ما نرجع نحط الرحال ف ارضنا من تانى
و بعدها ... نقترق



كل دا مكنلوش معنى و لا قيمة
جنب اول بصة ف وشك
واول مرة جيت ف حضنى
و اول مرة عيطت
و اول مرة ضحكت
و اول مرة ضميتك لصدرى ورضعت
و اول مرة قولت فيه حروف متقطعة
و اول مرة نطقت فيها كلمة ماما
و بقيت تندهنى بيها احيانا عشر مرات ف الدقيقة
و مزهقش من سماعها



حداشر سنة من عمرى و عمرك
عدوا بكل الفرحة و الحزن
اغلب الوقت كنت بتك على نفسى
و اعمل تصرفات غريبة قد تبدو مريحة
و بتخرجنى من حالة الشجن
لما بشتريلك لعب و ارص هدومك ف الدولاب
و اتعامل مع كل حاجاتك و كأنك موجود وممشتشى
لكن الحكاية دى بقت صعبة قوى عليا
مبقاش ينفع مثلا أجيبلك تورتة
و احط عليها شمع و اغنيلك
تصور المشهد بس ... بقى بيتعبنى
و مبقتش قادرة اعملك عيد ميلاد على مدونتك
لأنى بحس انى بتعب اكتر ما برتاح
بقيت بحس انى حبى ليك بقى احساس مؤلم لغيرنا
زى ما هوه مؤلم لينا
وصحيح الألم انواع مش كله شر
بس ف النهاية وجع
شئنا ذلك ... ام قولنا لأ




حداشر سنة عدت اهى
و يا ترى لو ربنا مد ف عمرى
الحداشر الجايين هيكون شكلهم ايه؟
هفضل انا و انتا بعاد كدا .. و لاً حاجة هتتغير ؟
طب الحداشر اللى بعدهم ؟
هكون موجودة ف حياتك بالشكل
اللى بتمناه لنفسى و ليك
و لاً مش هيحصل و السنين هتبعدنا زيادة
و تحولنا لذكريات ف قلوب بعض و بس ؟



طب مش يمكن دا يكون أحسن ؟
يمكن وجودنا سوا يأذيك و يتعبك
و يمكن قعادك بعيد يخليك شخص افضل
يمكن .. لأ اكيد
ربنا أصله مبيعملش حاجة وحشة
احنا بس اللى مش بنشوف كويس
و مشاعرنا و ضعفنا بيغلبنا



حداشر سنة يا حبيبى
ماما شافت فيهم حاجات كان ممكن قوى تقتلها
لولاك ف هذه الدنيا
انا زى اى بشر ف الحياة دى
بيعدى عليه لحظات ضعف كتير و يفكر ف روحه
و يبقى أنانى
لما بفكر كدا احيانا بزعل على عمرى اللى راح
و اقول اجمل سنين شبابى عدت ف هروب و خوف
و راحت ف الفاضى و ملحقتش
اعمل فيها حاجة مفيدة
و لما ربنا يسألنى .. طب هقوله إيه؟؟؟



لكن لما بقيت افكر تانى
لقيت انى عمرى مرحش .. بوجودك
و الحداشر سنة اللى مشيوا دول .. مكنوش هدر
لأنهم محسوبين من عمرك انتا قبل عمرى
و لما رب العرش يسألنى .. عمرك فيما ضاع
هقوله ان الوقت راح ف كونى ام لابنى
و دى كانت شغلى الشاغل
وظيفتى التى أفخر بها
و اللى هيا اجمل و انبل وظيفة ف الكون



كام سنة يا حبيبى فاتوا
و انتا اجمل حاجة ف دنيتى
و كالعادة كان نفسى تكون قصادى
عشان ابوسك ف شعرك و خدودك
و عيونك الحلوة و اخدك ف حضنى
و عشان اقولك انك هتفضل دايما
أسد غابة ماما
الشجاع الشاطر اللى انا فخورة بيه
و اللى بقى عنده خلاص
حداشر سنة



كل سنة و انتا طيب
يا حبيبى
و كل سنة و انتا
ابنى
و كل سنة و أنا
أم يوسف




- بحبك -


-------------------------------------------
آيات ربنا بيثبت بيها العقول و القلوب
ستوتة حبيبتى



This entry was posted on الجمعة, أغسطس 20, 2010 and is filed under .