.

.

مـش كــل مــرة ؟!!  

Posted by: فاتيما in


بجد
انا مكسوفة منكم و من نفسى جدااااا

يعنى ينفع اقعد اكتب بوست طويييييل عريييض
عشان انفعلت لأن تعليق كدا ضايقنى
بينما حد محترم كلنا بنحبه و نقدره
زى نونو عاشقة النقاب
بتتعرض لرعب أزلى يوميا و على مدار الساعة
هيا و اولادها و جوزها
بسبب الظلم و الجبروت

دوس هنا لو تكرمت

و ربنا يحل ازمتها قادر و كريم


فين يا جماعة محامين التدوين الاخلاق
لعل حد فيهم يساعدها و يفيدها بأى شىء
لو سمحتوا ساعدونا


و لو يا اخونا محدش ف ايده شىء زى حالاتى
تعالوا النهاردة ف اول يوم رمضان
و احنا بنفطر ... ندعى لعاشقة النقاب
ان ربنا يفك كربها
و يزيل همها و يرد كيد عدوها
و ينصرها عليه
ربنا سميع مجيب و كريم قوى


وبجد مكسوفة من نفسى جدا
اسفة لأنى دوشتكم
ببعض من هذيانى


ربنا معاكى يا نونو


كل سنة و انتوا طيبين
و رمضان كريم عليكو يا رب

۩

و منحرمشى من طبطباتكم

----------------------------------------------------
------------------------------------------------------------

البوست دا موجه لشخص واحد فقط
هوه عارف نفسه ... لكن انا مش عارفاه
اما اى حد هيقراه فمفيش داعى يتعب نفسه
و يسيب أى تعليق و بعتذرلكو مقدما



أصلى مش ناوية دلوقتى اعمل
اللى بقالى مدة بعمله
و اللى طول عمرى بعمله عموما
انى أتك على روحى و انا متضايقة
و محاولش اشيل حد همى
و ابتسم و اضحك و اتكلم عادى
لأ مش عادى
مش ناوية اعمل كدا
انا تعبت بجد



الاخ الغير معرف للأسف جاب آخرى
و مكنتش اتمنى ذلك
بس اوقات الواحد لازم ينفجر ف وجه شخص ما
بدل ما يجراله حاجة
خصوصا لو هذا الشخص جه وقف قصاده
عامداً متعمداً و قرر يوجعه و عادى كدا يعنى




ف شهر يناير اللى جاى
هيكون عمر المدونة
3 سنين بالتمام و الكمال اذا ربنا ادانى عمر
والمفروض اكون اتعودت بقى و مقعدش اشكتى
بس اعمل ايه ؟
عيلة و بترجع ف كلامها


و ساعات المعيلة بتكون مصدر راحة
آه
مهو مش طول الوقت
هبقى العاقلة الكبيرة الرزينة
محتاجة افصل شوية
حرام


الأخ الغير معرف اللى معرفوش
و ان كنت بخمن من اسلوبه انه حد مقرب
و واضح انه متابعنى لدرجة انه زهق من افعالى
و خايف على منظرى و شايفه بقى مش كويس
و بينصحنى اخد بالى و ان بعض التعليقات متحرجة
تقولى مباشرة كفاية يا فاتيما
انا عاوزة بس افهمك كام حاجة مهمة



عاوزة اعرف بس الاول
هيا مدونتى دى بتاعتى انا و لا بتاعة حد تانى ؟!


يعنى غالبا و الله اعلم بتاعتى
يعنى انا حرة فيما اكتب
و عما أكتب
و مسئولة عنه .... مش كدا ؟!!

طيب
طب ماذا يضيرك لو المكتوب يمسنى
و يمس خصوصياتى
اذا كنت انا راضية و قابلة و موافقة؟!!


شكلى بقى مبتذل ؟


طب مبتذل دى
على أساس ايه؟

رأيك انتا و لاّ الآخرين ؟

حد اشتكالك منى ؟

طب و اللى اشتكى دا ..انا اخصه فى ايه؟

خايف عليا كاخت و صديقة ؟

طب لو خايف عليا بجد
و بيعتبرنى اخت و صديقة
كان فهمنى و فهم كويس
ان اللى بكتبه هنا ..احسن حاجة ممكن اعملها

اعملها عشان اعرف
اعيش يا عزيزى


بص .. شفت الصورة اللى فوق دى
اللى مع البوست


دى حياتى
و حياة ناس كتير زى حالاتى
عانوا من خسارات متعددة ف حياتهم
و تقبلوها قدر طاقتهم
و قالوا الحمدلله انها جت على قد كدا
و بيقولوا كل يوم يا رب .. ميحصلش حاجة تانى


كل يوم بيعدى عليا
بيبقى عندى هموم و مواجع
زى الصخرة الكبييييرة دى
لازم ازقها بعزم ما فيا عشان متقعش
فوق قلبى تدشدشه


بزقها زى ما بزق اليوم
اليوم الفاضى من يوسف
و من حياة كان نفسى اعيشها
زى باقى خلق الله العادية


الحمدلله عندى نعم كتييييير زى الشغل
و الأصدقاء و المعارف و الصحة
و عد بقى زى منتا عايز
بس البنى آدم دايما بيبص للى ناقص عنده
ومتقوليش انى الوحيدة اللى بتفكر كدا
كل البشر زى حالاتى ما عدا الأنبياء و الصالحين
و لست منهم بالتأكيد


وانا مش جاية م المريخ
انا انسانة طبيعية و من حقى اشتاق لأبنى
و من حقى اشتاق لراجل بحبه و بتمناه كزوج
مبطلبش حاجة عجبة و لا مش من حقى


كون ان دا مبيحصلشى لظروف كتير
مينفعش اقولها كلها هنا
يبقى دا معناه انى بقيت مثيرة للرثاء
و شكلى بقى وحش


جايز اكون كتاب مفتوح لكل حد بييجى هنا
بس صدق او لا تصدق انى
رغم انى حكيت عن حاجات كتير
لكن لسه فيه حاجات اكتر
محدش يعرفها و مينفعش اقولها اكيد
انتا بتحكم عليا من اللى قريته و بتخمنه
لكن اللى انتا شايفه ... مش كل حاجة


وانا بصراحة زهقت
و مبقتش عارفة اعمل ايه
و ميكونش فيه اهانة للى بيقرى
و استهانة بنفسى ؟!!


لما بقعد احكى عن يوسف .. بعض الناس بتتعب
بيقولوا او بيلمحوا انك بتوجعى قلبنا
و كفاية جلد لذاتك
طيب حاضر مش هكتب عن يوسف
الا حاجات دمها خفيف

طب كمان لما بكتب عن مشاعر تخص قلبى
بوجع بعض الناس و كفاية جلد لذاتى برضو ؟!


مين قال يا ناس
بس انى بجلد روحى و بعذبها؟

مين قال ان الحب عذابه مؤلم
جايز بالنسبالك انتا
لكن انا لأ .. اصل مش كلنا زى بعض


انا عاملة المدونة دى للفضفضة و البوح
مش عملاها عشان الم الناس حواليا
و اعمل نفسى شخصية عامة
انا بهرب من اى فرصة تخلى مدونتى
معروفة عى نطاق اكبر
مش الإطة .. بالعكس تماما انا بتجنب المشاكل
و مبدورش من ورا المدونة على أى هدف
غير انى اتكلم عن يوسف
و عن نفسى



و لو كنت انانية بحتة و بنكفى على ذاتى
و ببعد عن الناس زى ما بتقول
عاوزاك بس تبص على التسميات
ف الشريط الجانبى
و انتا تلاقى
ان بوستات " التدوين و اهله " هيا
اعلى رقم
ف كل التسميات


عارفة انى بقصر ف حق ناس كتير
و احباب كتير زعلانين منى عشان
حكاية الموبايل و الماسنجر و غيره


بس انا عاوزاك تتخيل نفسك
مخلوق منعزل
عن العالم لمدة ست سنين
كل ما تحتاج تتكلم مع حد او تفضفض معاه
او تضحك او تعيط او تشتكى او ..او .. تلاقى
انه مينفعش
مينفعش تتصل بأى حد
أى حد
و ميبقاش قصادك غير الحيطة تكلمها
خلاص بقت عادة عندى اكون وحيدة
مبقتش تفرق معايا
مبقتش زى باقى الناس
و التواصل المباشر بيريحنى
دا عيب و انا معترفة بيه
بس انا كدا ..اعمل ايه ف نفسى ؟!



و بعدين لما بقرب م الناس قوى
بتعبهم و بيتعبونى
اعتبره هروب او لباقة او ترييح دماغ او اى حاجة
بس دا مش انعزال عن الدنيا
و هروب م الواقع ف الخيالات


طب دنا متهيألى انى بتتداخل ف حياة المدونين
و اللى حواليا عموما بشكل مزعج احيانا
لدرجة ان فيه ناس بتتأذى منى بشكل غير مباشر
و بضطر ابعد عنهم و اتعامل بجفاء
عشان ميحصلهمش مشاكل



انا بكتب البوست دا ليه؟
اكيد عشان ارتاح و اخرج شحنة الغضب
اللى جوايا
و الغضب دا بقاله مدة
و كالعاااادة
مبحبش اقول لحد و لا اشتكى لحد
كل واحد فيه اللى مكفيه ..مش هزوده بهمى


مدونتى هيا المطرح الوحيد
اللى بقدر اشتكى فيه
و احزن و اعيط و اغنى و اضحك و افرح
و ابارك و اعزى و اعمل كل حاجة
من غير قلق و لا خوف


مدونتى هيا الوحيدة تقريبا
اللى مبتعرفش تعاتبنى على اهمالها
او تفرض عليا قيود اتخنق منها
مدونتى هيا المكان الوحيد تقريبا
اللى بحس فيه بالراحة



المدونة دى عاملة زى الطبيب النفسى
حد و مكان مريح قادر تقعد فيه كل فترة
تغسل همومك و تنفض المك و تطرده
و تخرج بعده متوزان


مدونتى او بمعنى اصح
فضفضتى هنا
هيا اللى بتعملى توازن
عشان اقدر اتحمل وجع الدنيا و قرفها
عشان اعرف اصحى كل يوم الصبح
اشيل الصخرة و ارفعها لقمة الجبل و انا راضية
و مش زعلانة و لا حزينة
و لا بفكر كتير ف امتى هبطل اشيل الصخرة دى
و ينتهى هذا العذاب


لأن العذاب دا عمره ما هينتهى
خلق الانسان فى كبد
و اللى فاكر انه جاى الحياة رحلة ينبسط و يلعب
يبقى عبيط قوى ..او غافل
طب دا حتى الرحلات ..بيحصل فيها مشاكل
و حاجات غير متوقعة و ممكن كمان تقلب بغم
و حوادث و موت ..مش كدا ؟!



الملخص عشان اجيب م الآخر
انا داخلة على رمضان
و المواسم و الأعياد بتعملى اكتئاب اصلاً
يوسف وحشنى و مفيش داعى اكتبها كتير
عشان بتوجع
بس هكتبها و خلاص


حزينة على قصة حب بتخلص
و مكنتش عاوزاها تخلص
حقى
و متهيألى اللى بيبقى عارف
انه هيتخلى عن شىء غالى
لازم يبقى عنده دم و يزعل عليه
و كلنا عندنا دم اكيد


بس فيه حد ممكن يكتم المه
و يستتر خلف كبريائه
و فيه حد ممكن يعلن حزنه على الملأ
زى حالاتى
و مش عيب بالمرة


الحب عمره ما كان عيب
و لا الحزن على فقدانه عيب
و مش تقليل من الكرامة يا اخ غير معرف
اللى يعيب امراءة فى اظهار مشاعرها بهذا الشكل
على حد تعبيرك


هوه المرأة دى مش كائن حى برضو ؟
و الأنسان مخلوق اجتماعى اتوجد عشان يعيش
ف جماعات و ليس منفرداً
و الجماعات دى مش مكونة من عائلات ؟
و العائلات دى مش تنبثق عنها اسر صغيرة ؟
و الأسر دى مش مكونة من رجل و ست و اطفال
و لا انا متهيألى ؟!!


و لما انا ابقى بلا رجل و بلا طفل
مش دا يبقى وضع غير عادى لحد ف سنى
وضع محدش يحبه و ان اتعود عليه
بفعل الظروف
فلما انا اسعى لتكلمة نقصى الاجتماعى
و الإنسانى دا ... و ميحصلش
و اخفق .. مش من حقى انى ازعل
و اعبر عن زعلى ؟


ايه اللى يعيبنى كامرأة بقى ..انا مش فاهمة ؟
هل استخدمت ف كتاباتى الفاظ خارجة ؟


الصورة جريئة و لا يصح نشرها
و احنا داخلين على رمضان ؟
طب انا اسفة
يبدو انى فعلا مبقتش اخد بالى
عموما
انا خلاص هديت بعد ما كتبت كل اللى عندى



و عاوزة اقول كام حاجة


(1)
انا مودى العام مش لطيف
و لهذا مبحاولش اكلم
حتى اقرب المقربين ليا عشان مبحبش حد ي
سمع صوتى و انا متضايقة
و كمان مش عاوزة اقابل اى حد وانا رخمة
حتى لو هدفهم يطمنوا عليا و يخرجونى م الحالة
انا بعتذرلهم انى كنت و ما زلت سخيفة كدا
و اصلا محدش ف ايده يعملى حاجة
انا هخرج لوحدى من الكآبة دى لما ربنا يأذن
و زى ما الحزن بيبدأ و بياخد وقت
بينتهى برضو بس بياخد وقت
مش زرار و هندوس عليه يعنى

(2)

الانسان اللى ربنا كرمنى
و صادفته ف حياتى و بحبه
انسان محترم جدا و عمره ما كان
و لا هيكون مصدر تعاسة ليا
بالعكس و الله هو الحاصل
فيه ناس معرفتك بيهم ترجعك لورا
و تقتل فيك حاجات
و فيه ناس معرفتك بيهم تخلقك من جديد
و تدفعك لقدام
هذا الشخص من النوع التانى
وجوده ف حياتى خلانى احسن و افضل و اسعد
و جل حزنى .. انه مينفعش احتفظ بالسعادة
دى علطول
و لأنى طماعة زيى زى كل البشر
كنت اتمنى متبقاش مؤقتة و تروح
و الكلام عن مشاعرى مش نوع من الالم
جايز عند الغالبية كدا ..بس اختكم فاتيما مش منهم
مش شكرانية ف روحى العكس
بس حقيقى تحمل الالم درجات و منازل
و نظرتى مختلفة و تركيبتى مختلفة
تركيبة معيوبة اكيد
انا معترفة
بس مين فينا مفيهوش عيوب ؟
وانا مبسوطة بنفسى كدا و الله
و مينفعش اغيرنى بعد 37 سنة بقى
اصل التغيير مش صعب .. لو الواحد حب
بس هيكون عاصف و مرعب
لو جمدت قلبى و قسيته
و خليته يعدى الخسارة ببساطة
هبقى كدا بعلمه يقسى ف كل حاجة
مش هفضل فاتيما الوديعة الهادية الطيبة اللى بتعرفوها
هتغير و انا مش عايزة اتغير
اتغير ليه و عشان ايه ؟!

(3)

انا بقيت بخطرف كتير الأيام دى و غضبى حاضر
و دا شىء مش كويس بالمرة و لهذا
يبدو انى محتاجة لأجازة اريحكم فيها منى شوية
و فرصة رمضان داخل كل سنة و انتوا طيبين
اصلا مليش نفس اكتب اى حاجة غير اللى بيزعل
فملوش لازمة بقى ..افصل شوية
و يا خالد يا همس الاحباب انتا و وش الخير داليا
لو هتعملوا فطار الصائم ف رمضان ابقوا قولولى
من قبلها عشان اعلن عنه
و الناس تحضر نفسها و تضبط مواعيدها
و ربنا ما يقطعلنا عادة


(4)
الأخ الغير معرف
لو شكلى مبقاش يعجبك
و تغيراتى تتجه للأسوأ
و متعلمتش من اللى مريت بيه
و لا اقدر حب الناس ليا
و كل اللى قولته ... انا برجووووك
متدخليش تانى
انا عارفة ان اللى كتبته من باب الأخوية
و حسيت دا بين سطورك
لأنى لو كنت حسيت العكس مكنتش كتبت البوست دا
من اساسه و لا رديت عليك
و كلفت خاطرى اشرحلك حاجة
بس عاوزة اقولك ان النصايح ف الله بتاعتك دى
خلتنى انفجر ف العياط و صعبت عليا نفسى جدا
مش ان حد يفهمنى غلط كدا و يحكم عليا بقسوة
لأ
ان حد المفروض باين من بين سطوره
انه يعرفنى كويس
و يفهمنى برضو غلط و يحكم عليا بقسوة
حتى النصيحة يا اخى يجب ان تتخير وقتها
اللى تقولها فيه
و الأسلوب كمان
و يا ريتك كنت قولت انتا مين .. كان زعلى هيبقى اقل
والله اعلم
بس انتا مش مسئول لوحدك ..انا مخنوقة من بدرى بدرى
انتا كملت عليا انتا و غيرك من غير المعرفين
مع اختلاف هدفكم
و دا هينقلنا لرقم

(5)

انا هشيل التعليقات المجهولة
و لو انها مش ذات جدوى قوى
بس لعل و عسى الحكاية تقل شوية
و اللى عاوز يدخل يزعلنى يبذل شوية مجهود عشان يزعلنى
و بعتذر لأستاذ عبدالجليل و لأى حد بيدخل بالغير معرف
انا اسفة معلش

(6)
اللى مش عاوز يعلق يا جماعة ميوجعش دماغه
و لا يبقى محرج
انا مش م الناس اللى بتعاتب على الغياب و الحضور
انا بفتقد تعليقاتكم اكيد
بس مش بعلق مشانق لمين كتب و مين مكتبش
و مين سأل و مين مسألش
يبدو انى بدى انطباع طول الوقت
بإنى متطلبة زيادة عن اللزوم
و دا عيب خطير فيا
خطير لأنى اغلب الوقت مش حاسة بيه
عشان احاول اصلحه

(7)
اللى زعلان منى فى أى حاجة بعتذرله
سلفاً من قبل ما اعرف عملت ايه
و اللى زعلتهم و انا عارفة ليه ..يا ريت يسامحونى

(8)
كل سنة بعلق الزينة ف الفيلا بتاعت يوسف
و اطلع الفوانيس ارصهم
السنة دى مش عارفة و لا قادرة
الواد دا وحشنى قوى يخربيت كدا

(9)

مينفعش اخلص البوست دا من غير ما اقول
انى بحبكم
يا احلى ناس و صحبة و عالم
و رمضان كريم عليكم
يا رب

(10)
انا بقيت كويسة خلاص

--------------------------------------------------

الشيكا بيكا
تبقى دى ايه هيا
هيا الحركات اللى مش هيا
الفرقة
و الحرقة
و الغرقة

صلاح جاهين

دوس هنا







This entry was posted on الأربعاء, أغسطس 11, 2010 and is filed under . You can leave a response and follow any responses to this entry through the .

67 كــــلام بيطــبطـــب عـــلى قــــلبى و روحــــى

عزيزتي
ليس لاحد كآن من يكن له الحق علي مشاعرك و حريتك الشخصيه

و لم يكن هناك داعي لهذا البوست الطوييييييييل لتبرير ما تكتبين او لماذا تكتبين

فمن يفهم الموضوع من الجانب المهم لنا يستطيع ان يريح ويستريح
و لكن ان توغل و اعطي لنفسه الحق بالتفسير و استخدام قواميسه او معجمته الشخصيه فهذه مشكلته الشخصيه


و لكنني اتفهم مدي الازعاج الذي تسبب فيه مثل هؤلاء لتحاولي الرد علي فضول مقيت

تحياتي

بعد السلام والتحيايا
إزيك يا فاتيما
اتمني انك تكوني بخير
وتعملي زي مكبرا
أنا عارف ان دا صعب
بس هقولك عن نفسي
انا لما يكون حد حاطط
صورة مش عجباني مش بحاول
ادايقة لانه مسئول
لكن مش بحب ارد علي الموضوع
إلا لو كان موضوع مهم
علي الرغم إني عاصي
ربنا ولكن ربنا يهديني
ويهدي الجميع
أما كونك انك اضايقتي
من الأخ غير معرف دا
فدا حقك لأن دي أرضك
وكل واحد علي أرضه يفرض
شروطه وقوانينه
أنا ممكن اراعي طلبات ناس
يعني مثلا لما الناس طلبوا
ان الخط يكبر رغم انها مدونتي
ومرتاح في الخط بس
أنا اكيد بكتب وافضفض عشان
الناس تقرا اللي بكتبه
فلازم اراعي ولكن
لو مش داخل دماغي الخط لما يكبر
مش هكبره
لأن دي بيتي اللي لازم احكمها
بطريقتي ولما بيتي مش يعجب حد
مش هغيره
عشان هوا مش مرتاح
أنا كسول جدا جدا لدرجة إني
مش بحب انضف الأوضه بتاعتي
ومش بخلي حد ينضفها
لكن دي حريتي واضفت عليها
ضبغة علمية وخلتني من عشان
نظرية الفوضي الخلاقة
أنا شكلي بهلوس عارف
بس هقول حاجة لاي حد
لو الموضوع معجبكش ما تعلقش
وهتكلم بالعموم ومش انتي اللي
اقصدك والله يا فاتيما
بس في علم الدعوا علي ما اعتقد
ولو عايز تنصح حد انصحه بينك
وبينه
لأن النصحية علي الملأ فضيحة
ويكون ليك في الرسول اسوه
لما كان ينصح يا يكلم الناس بالعموم
يا يخصه بينه وبنيه .

أنا اتمني انك تكوني بخير
لأن بجد ونعم الأخت
وربنا يلم شملك بيسوفه
حبيب قلبك ويجعله شاب صالح
ويقدف حبه في قلوب الآخرين
حب لا يشوبه زيغ ولا هوا

طولت عليكي انا عارف
استحمليني .

كل سنة وانتي طيبة يا فاتيما

نقطة بدايه
العلاقه بين اتنين يملكها الاتنين دول بس
أحرار تماما فيها دون اي تدخل دا رأيي
خلاص كدا

في العموم بئا

تاني في العموم

لا أقصد حاله بعينها

ما يعتبر فشلا قد ينقلب فجأه ودون مقدمات لنجاح ساحق ماحق

مش فاهمه؟

هتفهمي بعد شويه

قمري
كل سنة وانتي طيبة ويارب ديما بخير وكويسة
انتي ويوسف
حبيبتي هوني علي نفسك
واعرفي كويس اللي يسئ فهمك يبقي العيب عنده مش عندك انتي

ربنا يكتبلك كل خير يارب
ويسعدك قلبك وحياتك كلها

فاتيما قلبي وجعني والله لاني حسيت بكل كلمة قلتيها ومش حأواسيك ولا حأقول اي كلام غير دعاء بظهر الغيب ان ربي يفرج كربك ان شاء
فاتيما والله العظيم بحبك في الله وحاسة انك انسانة قريبة مني أوي وعندي انطباع انك انسانة رقيقة جدا جدا جدا رغم قناع القوة اللي بتحاولي ترتديه
فاتيما كل سنة وانت طيبة ورمضان كريم وصدقيني الحياة لونها بمبي رغم كل المنغصات لازم نعيشها بشكل جميل لاننا حنعيشها مرة واحدة بس
دمت بكل ود حبيبتي

كل سنة و انت طيبة فاتيما ،
علقى الزينة و طلعى الفوانيس و عيشى لحظتك و أيامك فى خيالك فى أحلامك و إن شاء الله اكيد ها تتحقق ، ماهو مش معقول نحرم نفسنا حتى من الأحلام ، عارفة أنا بقول دايما أن الأحلام دى هدية ربنا لينا بتخلينا نعيش لحظات بنتمنى نعيشها فى الدنيا ، ونفوق من نومنا مبسوطين اننا شوفنا ناس وحشينا من زمان يمكن بعدوا عنا بالمكان أو بالموت ، بنشوفهم و بنحس بحضنهم و نكلمهم ، إن شاء الله ها يجى اليوم مهمها طال الزمن و أحلامك تصبح حقيقة ماهو دوام الحال من المحال ، يعنى مش هانعيش حياتنا كلها بنحلم و بس ، لأ ده ربنا كريم قوى قوى ودايما شايل جوايزة للى يستحقها وها تيجى فى وقتها علشان نحس بيها قوى و نعرف قيمتها أكتر .
كل سنةو أنت بخير و سعادة

انا جايه قول كله سنه وانت طيب وبس
وحوي ياوحوي اياحه وكمان وحوي اياحه
ياقمر طالع في فانوس والع

كل سنه وانت ويوسف طيبين وبخير


وعلي مااعرف الشيطان بتخاف من اعوذ بالله من الشيطان الرجيم ابقي استعيذي هتلاقي المجهول اتحرق


اصل بيرم لما اتكلم علي الشياطين نسي يقول ان في شيطان اسمه حاشر مناخيرة في كل حاجه وده حله يتقاله وانت مال اهلك بس كده

لو التعليق في الفاظ تضايقك ياطماطم متنشرهوش ده بسلم بس
يلا بوس ه اموووووووووووواه

يالهوي
يالهوتيني
يا تلات لهاويني

ايه يا تم تم ده
انتى فرستيني يا امي

يا حبيبتى اللى يضايقك
خسارة فيه الحبر اللى كتبتى بيه البوست
و خسارة فيه وجع صباعك على الكى بورد
وو خسارة تمأأآ عنيكي فى الشاشة
يا حبيبتى فى زرار اسمه دليت
اخترعوه علشان كده
علشان الناس اللى تفرس
مووووووووووووووووووووه
كل رمضان و انتى بخير و سلام و سعادة
انتى و مامتك و ابنك و كل اللى تحبيهم
اما الغير معروفين
ف نووووووووووووووووووووووووووو

فاتيما
فين الاصطباحات شلتيها ليه انا باستمتع دوما بقراءتها

أحــوال الهوى
------------

ازى حضرتك يا دكتور
و معرفش ليه بحس ان فيه داعى من حين لآخر انى اوضح حاجات قد تبدو مش واضحة
العلاقة هنا بين اللى بيكتب و اللى بيقرى المفروض تكون تفاعليه و مثمرة
اظن ذلك
انا مبكتبش لنفسى و بس و الا كنت قفلت المدونة او عملتها لبعض الاشخاص و فقط

بس انا بحس ان المدونة دى يعنى انا
لأنها فعلا انا بكل ما فيا
و محدش كل يوم حلو و لطيف و مبيزعلش حد و رايق و زى الفل

غالبا صبرى و بالى طويل
بس فيه اوقات الصبر بيختفى فجأة
و كأنه بيعاندنى
او بمعنى ادق
بيعاقبنى
لأنى محتجزاه رهينة طول الوقت
و بحمله فوق طاقته

اوقات الأنفجار بيكون راحة


بيعز عليا اصحى ف يوم الصبح
افتح المدونة فالاقينى شكلى مشوه و قبيح لهذه الدرجة فى نظر حد
خصوصا لما يكون الحد ا يبدو انه عارفنى و متابعنى و بيكتب من منطلق نصيحة
مظنش يقصد اذى لأنى قادرة و الحمدلله افرق بين التعليق المؤذى من عدمه من كتر ما قريت يعنى


الرد احيانا بحس انه ضرورى
انا كل اللى عاوزة اقوله
انى مش وحشة قوى كدا
و مش قصدى استفز حد
انا بدافع عن حقى الطبيعى ف الحزن
زى ما بفرح من قلب قلبى تمام

حضرتك شرفتنى جدا
و الف شكر ليك






sally
-----

اهلا يا لولى
تعرفى انى بزعل قوى لما حد يقول
ان الدنيا معناها من التدنى ؟
بحس ان دا معنى صعب قوى
احنا جايين الدنيا عشان نخليها اجمل و نعمرها و لا عشان نكرهها و نقفل منها

عارفة بحب اشوف الدنيا ايه؟
الدنيا من الدنو ..
يعنى القرب
يعنى الناس تقرب من بعض بكلمة و احساس و فكرة و مبدأ و اختراع و بناء و حضارات و لغات و الف حاجة
تخليهم يقربوا مش يبعدوا
مش كدا بذمتك
يبقى اسمها احلى و اجمل ؟


عموما
سيبك من فذلكاتى
و دنيا دنيا
خلاص زى ما تحبى

نورتى يا فندم




MR.PRESIDENT
------------

ازيك يا بسام
تحياتك و سلاماتك على راسى
و انتا مبتهيسش و لا حاجة
بالعكس

ساعات الدنيا بتحتاج بعض الجنان
عشان تتوزان فيها مع المنطق الرهيب
اللى بيحكمها و يحكمنا و يكتف مشاعرنا اغلب الوقت

و انا بخير متقلقش عليا
كنت بس منفعلة و فضفضت معاكوا
و بقيت كويسة الحمدلله

طول زى ما تحب
انتا اخويا الصغير الغالى
و منحرمشى منك ابدا
ياللى قلبك
له نصيب كبييير من اسمك





ميرا (وومن)
----------
و انتى طيبة يا ميرا
يا اميرة
يا ست البنات
۩





مصرى جدا
--------

ازيك يا هانى
حمدلله ع السلامة

ف العموم او الخصوص حتى
انا راضية الحمدلله بحالى
و ربنا كريم قوى عليا

انما هذا لا يمنع
انى اطمع ف كرمه اكتر
زى كل حد ف الدنيا
ما بيتمنى يبقى عنده
حاجات كتير

مش لازم كلها تتحقق اكيد
و ساعات عدم تحققها يبقى هوه السعادة بعينها

و كل اللى بعمله انى بتمسك بأحلامى
لحد آخر نفس
و اللى عاوزه ربنا بيكون

اغلب الوقت الواحد راضى و متماسك و سعيد و الله

بس اوقات تانية قليلة بيبقى الواحد محبط و حاسس بالضعف و شوية عكننة

مينفعش حد ييجى لحد ف اللحظات دى
و يدوس على جرحه
حرام يعنى

انا فاهمة قصدك
و مش لازم كمان شوية و لا حاجة

مش مهم انا افهم

المهم غيرى يفهم
انى فاهمة

دا اللى تاعبنىىىىىى



نورتنى
و رمضان كريم عليك
يا رب





زهرة الجنة
---------


و انتى طيبة يا مروة
والله ساعات بخاف
انى اكون بتغير و بتحول لواحدة تانية غيرى و انا مش واخدة بالى يا مرمر

مش وارد دا يحصل برضو ؟!!


بس المرة دى مش حاسة بكدا خالص

حاسة بظلم نوعا ما كبير ف الحكم عليا
عارفة اسوا مشكلة بتقابلنى ف الكاية دى ايه ؟؟

ان بعض الناس بصالى على إنى ام و فقط
مش قادرين يتكيفوا مع فكرة ان الام دى واحدة ست ممكن تحب و تحب قوى كمان لدرجة كبيرة و تعلن عن دا

سببتلهم صدمة يمكن ؟
و نزلت من نظرهم يمكن ؟
غالبا دا التفسير الأريح بالنسبالى
عشان مزعلش منهم

بس المهم يكون تفسيرى صح
لأن العكس تماما يبقى معناه انى اتغيرت فعلا زى هما ما بيقولوا
و دا شىء مرعب جدا لو كان الحقيقة


منحرمشى منك
و سلامى لأسماء الجميلة

رمضان كريم عليكى
و على بابا و ماما يا حبيبتى

۩

مش هينفع يجى رمضان ومش اقولك كل سنه وانتى طيبه يابطتى
اما بالنسبه للبوست فاحب اقولك كلمه واحده
TOZZZZZ
طظ فى اى حد يضايقك
انسى اى حد مش له لازمه
لو هو حد محترم فعلا كان ظهر باسمه
وللاسف فى ناس نصيحتها بتبقى موجعه واسلوبهم زفت

ياستى كبرى مخك وبصى لجانب الكوب الممتلئ
بمعنى
ان لو واحد ولا اتنين غير معروف بيضايقوكى
بس فى المقابل مئات بيحبوكى

ثم ان فى مقوله انا ماشيه بيها عمرى كله
* انت حر مالم تضر*
بس كده
اى شئ يحصل بعد الجمله دى تحت رجلك مش بس ورا ظهرك

مفروسه اتفرست وانا اتعصبت

كل سنه وانتى طيبه يابطتى
بحبك موت
هاتى الحلوله بتاعتى بقى
امووووووووووووووووه

مساء الخير

للاسف البوست وجعنى اووى
:(
ربنا معاكى ويبعد عنك اى سوء


كل سنة وانتى طيبة يا فاطيما
رمضان كريم عليكى وعلى يوسف
باذن الله
تحياتى :)

خواطر شابة
---------

و انا كمان يا خطورتى
و الله بحبك جدا و ربنا عالم اللى ف القلوب
من غير ما نتقابل اوقات احس اننا فكر واحد و قلب و ضمير واحد كمان
ظروفنا مختلفة صحيح
لكن احيانا عذاباتنا واحدة
و افراحنا كمان بتتوحد ساعات كتير

و متقلقيش عليا يا خطورة
انا فعلا قوية

قوية بامومتى ليوسف رغم البعد
قوية بحب الناس ليا بظهر الغيب و علنا و حواليا كل يوم
قوية بأفكارى و لو فيها شطط و غرابة
قوية بأهلى اللى متخلوش عنى ف ازماتى
قوية بأصدقائى و احبابى اللى كل يوم بيزيدوا مش بيقلوا
قوية بقلبى اللى مش ناوى يقضى العمر اللى فاضله بيكره حد او حاجة
قوية بصحتى اللى متخلينيش عبء على حد او تقيلة
قوية بشغلى و لو كنت ترس ضعيف ف آلة كبيرة و ممكن دورى يكون بسيط بس انا موجودة بيه و مؤثرة
قوية بالإنسان اللى بحبه و مفيش بينى و بينه غير كل خير و مفيش و لا لحظة اذى او شر
الحمدلله انا عندى اسباب كتير بحس فيها بالقوة و السند يا خواطر
و اللى بيوجعنى ان ييجى حد بعد كل هذا و يفتكرنى ضعيفة و متخاذلة و مبعرفش امشى حياتى و كمان يقولى شكلك وحش ؟!!!

الصباحات هتعود يا حبيبتى
معلش مكنش فيه وقت جنب الزعل الحق اكتب فيه .. وحاضر من عينيا
هكتبها

كل سنة و انتى طيبة
يا اجمل ساكنى ارض المغرب الطيب

♥ ۩ ♥



ام بتول
-------

ازيك يا بوتى
كل سنة و انتى بالف خير يا حبيبتى انتى و بتول و الولاد

و الله انتى عندك حق
بس معرفش ليه السنة دى الحكاية تقيلة على قلبى قوى و عمالة أأجل فيها ..يأس تسلل لقلبى و لا ايه معرفش !!

بس انا هروح النهاردة اعلق الزينة و اطلع الفوانيس لعل و عسى يوسف ييجى السنة دى فيشوفها موجودة و كأنه ممشيش
يا رب

بوسيلى روحك
رمضان كريم عليكى يا حبيبتى



mayada
------
التعليق جميل يا قاف ميم
كفاية الغنوة اللى اوله
و صاحب التعليق لم يبد عليه انه عاوز ياذينى اكتر ما كان عاوز ينصحنى
بس النصيحة مؤلمة جدا و ف غير محلها و لا وقتها و قناعاته دى غريبة جدا و فيها ظلم شديد ليا و لأى واحدة زى حالاتى ...كان بيتكلم بصدق عشان كدا رديت عليه

بوسيلى ماما الغالية
و السنة الجاية نقولهالك و انتى ف بيتك
كل سنة و انتى طيبة يا حبيبتى
و رمضان كريم عليكى
۩
و فانوسك اهو صامتا
و الغنوة خلاص انتى غنيتيها
بوسات و حضونات يا ميودتى




واحدة مفروسة
------------
انا كمان اتفرست قبلك يا فروستى
و والله دوست دليت
بس بعد ما قريت
و انفرست و بكيت
انا هشعر اهو و لا إيه؟!!

انا اللى مزعلنى ف الحكاية كلها ان التعليق يبدو لو كان عنده خلاصة الحقيقة و انه صح و كأنه عارفنى اكتر من نفسى ... حاجة غريبة جدا


كل سنة و انتى فروستى حبيبتى
رمضان كريم عليكى و على كل احبابك
يا رب
خصوصا طنط (مامى ) ربنا يديها الصحة

۩

بوسات
و حضونات
و فرسات



мαησηα
-------
و انا كمان يا منونتى يا قمورتى
و عارفة انك مش زعلانة
و معتمدة على كدا و مطمنة

رمضان كريم عليكى يا حبيبتى
و منحرمشى منك

بوسيلى ايد طنط و رمضان كريم عليكو يا حبيبتى ان شاء الله
۩

قلب العصفورة
اللى مش عاوزة تعليقها يتنشر
---------------------------

تصدقى بالله
انى كنت عارفة من غير ما تقولى حاجة
بلاش كنت عارفة دى
كنت حاسة

مين
و مالك
و لحد امتى

عارفة العصفورة اللى قلبها جامد يخترق السما و يطير مسافات رهيبة
بينما ف اوقات تانية يبقى اضعف من انه يتحمل يشيل حباية قمح

ساعتها بينزوى و يركن ف عشه
يطوى الجناحين و يضم حزنه و يسكت لحد ما الحالة تعدى و يرجع يرفرف تانى
انتى قلب العصفورة
الجبار ف فرحته
و الجبار ف حزنه


عشان كدا مسألتش مالك ؟
و لا حابيت اغلس كالعادة
و الح ف السؤال
لأنى عارفة و حاسة اللى فيكى
احنا شبه بعض اكيد
و الحاجة الصغيرة عند كل الناس
عندنا كبيرة


عارفة حدوتة الاميرة و حبة البسلة ؟
احكيهالك
دى اميرة جميلة رقيقة زوجة ابوها حبت تطردها من المملكة عشان تستفرد بالعرش
حاجة زى قصة سنوايت كدا
و الاميرة هربت من محاولة قتلها ف اللحظة الاخيرة

و راحت خبطت على اول باب قابلها

كان قصر نبيل من النبلاء
امه شافتها
صعبت عليها و حبتها
بس مصدقتهاش لما قالتها انها اميرة
كانت بتخبط عليهم غرقانة ف المطرة و هربانة
تبقى اميرة ازاى ؟!!!
حبت تحطها ف اختبار
نيمتها ف اوضة اى كلام
بتاعة واحدة من الخدم
بس قالتلها هنعاملك معاملة متميزة و هتنامى على سرير عليه عشر مراتب فوق بعض
عشان ترتاحى
قبل ما الاميرة تدخل الاوضة و الخدم فرشوا المراتب فوق بعض
الام حطت حبة بسلة تحت اول مرتبة
بس
نامت الاميرة الليلة دى
و الصبح ع الفطار سألتها الام
نمتى كويس ؟

فشكرتها جدااا ع المعاملة الطيبة
بس اشتكت على استحياء
ان ضهرها وجعها لأنها حست ان السرير مش مريح متعرف ليه ؟!!!

ساعتها الام قررت تجوزها ابنها
لأنها عرفت انها حساسة و رقيقة
و اميرة بجد

انا برغى
و بقول كل دا ليه ؟؟
يمكن عشان اقولك انك زيها
حساسة و رقيقة
و زى ما بتقدرى قيمة ابسط و اصغر شىء بيتقدملك و بتردى عليه بحب شديد
برضو اصغر و ابسط حاجة تزعل بتقابليها بحزن شديد

يا قلب العصفورة
ربنا يروقلك الحال
و خدى وقتك
و لو عاوزة تفضفضى معايا
الايميل بتاعى اهو
modynoty@gmail.com
و سيبك من اللى انا فيه
انا زى الفل

اللى تعرف قلوب زيكم و متروقش و تحمد ربنا عليكم
يبقى بصراحة تنضرب

ميرسى ع الغنوة
و دى منى ليكى
-------------------------
http://www.mawaly.com/music/Fairouz/track/8864
-------------------------
رمضان كريم عليكى
و انا كمان يا حبيبتى
بحبك جدا






عاشقة الرومانسية
---------------
مفروسة اتفرست و انتى اتعصبتى
انا اتفرست و اتعصبت و عيطت
و استفزيت انى ارد
و مقدرتش اسكت
اصله مش كل مرة بقى

و ايه حكاية مئات بيحبوكى دى
يا لهوتينىىىىىىى
طب ما اخل استنخابات مجلس الشيعب بقى يمكن الواحد يطلعله بحاجة ف السبوبة دى ؟؟!!

انا مكبرة مخى طول الوقت
بس فيه اوقات الواحد مخه بيصغر
غصب عنه بيبقى على آخره

و ايه حلولة دى يعنى ايه ؟
شكلها فلوس و هتقّلب كدا
انتوا المفروض تلملولى عشان انا عمالة اوزع ف فوانيس هنا و ف المدونات الشكيكة لما المرتب خلص

و انتى طيبة و بألف خير يا دودو
رمضان كريم عليكى
يا عروسة البحور
و قطتى الحلوة
انا كمان بحبك
و بحب قلبك الطيب
اللى بيسامح دايما





silver eyes
-----------

مساء و صباح الورد يا سيلفر
اسفة عشان البوست ضايقك
بس اتمنى اى حد قبل ما يكتب اى كلمة او يقولها يفكر كويس فى صداها عند الآخرين ايه و يحسبها شوية مش اكتر

كل سنة و انتى بالف خير
و رمضان كريم عليكى يا رب


ميرسى يا حبيبتى جدا على ذوقك
و شعورك الطيب اللى وصلنى

۩

ماعنديش تعليق يتكتب عشان انا شويه مابعرفش اطلع كل اللي عايز اقوله عن طريق الكيبورد

بس انا فيه آيات قعدت ادور عليهم
متعلقه بالموضوع ده جدا

بسم الله الرحمن الرحيم
وهو الذي ينزل الغيث من بعد ما قنطوا وينشر رحمته وهو الولي الحميد
صدق الله العظيم

والآيه التانيه مش فاكرها بس هي في سورة الأنعام

الأولانيه ماعرفش بلاش احراج بقا :)

اهو كده الكلام ربنا ما يحرمنا من اصطباحاتك

مش عارف ..... عايز اناديكى بفاطمه
فى البوست ده.

بس ماشى خلينا ماشيين زى الناس ماهى ماشيه "فاتيما"

فاطمه (برده :))

ما اجمل رقة غضبك .
واليوم عرفتك

وابشرك ، فأنتى انسانه فعلا متصالحه مع نفسك. (حتى ولو تضمنتك عيوب ،فمن منا ليس له عيوب)

انثى بمعناها الجميل.

وأسأل الله من كل قلبى ، ان يزين الاسلام بكى.
وان يزين به الله قلبك.

من كل قلبى .... دمتى بخير

اخوكى ويكا

انا عديت من هنا
وزعلت يومين ....
بس لما قريت التعليقات
سعدت بانها سحابة صيف وانقشعت
...حلوة انقشعت

مامت يوسف...انت انسانة تستاهلى كل خير
وانا متأكد انك باذن الله قادرة
على " التجاوز "

يارب تكون الفوانيس طلعت واترصت ونورت

وكل رمضان وانت بالف خير
صباحاتك هايلة واختياراتك اكثر من
رائعة ...بس انا سرحت معاها وخدت وقت منى ولما جيت اقول كلمتين
لاختى فاتيما لقيت نفسى سر..حان...

البوست رغم انه فضفضة بس مليان افكار حلوة ومعانى جميلة باحترمها واقدرها

اسعد الله ايامك بكل خير

بعيدا عن كونك عيطتينى وانا قاعد فى الصحرا لوحدى
وبعيدا عن كون البوست مش محتاج حد يفهمه محتاج حد يحسه وزى ما قاله اللى عنده احساس اغنى م اللى عنده فلوس فمش هتلاقيهم كتير
----------
كل سنه وانتى طيبه يا دره عقد المدونيين
يا اطيب قلب فى عالم التدوين
رمضان كريم عليكى وعلى كل حبايبك وربنا يتقبل منك صالح الاعمال
وانا عارف انى مقصر معاك بس والله غصب عنى

-----------
فاتيما
بجد انا باعزك وباحترمك جدا وسعيد جدا ان الفرصه اتاحت انى اتعرف على انسانه رائعه زيك
فعشان كده محبش اشوفك متضايقه فوحياه يوسف متزعليش نفسك
البوست على الرغم انه فضفضه وبسبب موضوع غلس الا ان فيه اجزاء لمست قلبى جدا ودمعتنى الله يسامحك بقى
يعنى الواحد يبقى قاعد فى حر وصحرا وتعيطينى كمان
ربنا معاكى يا طم طم

فاتيما
انا بجد بكيت ...من جوايا مش دموع وبس ..تعرفي اني خفت ادخل مدونة يوسف عشانك ..؟ لاني قولت لنفسي اكيد هتكتبي حاجات تزعلك وهزعل عشانك ...دايما بيقولوا عني طيوبة اووي واصحابي مسميني اطيب قلب وارق انسانة ف الوجود عشان حساسة وطييييبة اوووووووي ..دلوقت بقول لأصحابي انك انت اللي فيك الصفات دي اكتر مني ...انا اصلا دخلت المدونة عشان اقولك كل سنة وانت طيبة ورمضان كريم وكمان عشان اقولك نفسي اشوفك تاني انا وغادة ورانيا ورضا بعد العيد ان شاء الله ...بس لما دخلت ولقيت الكلام ده ...مش هقولك اني مش زعلت لاني لو قلتكدة هيبقي حاجة من اتنين يا اما معنديش دم ولا احساس يا اما انا منافقة ...والحمد لله انا مش الاتنين ...بجد كان نفسي تكون جنبي دلوقت مش هقولك عشان تبكي ف حضني لاء عشان انا ابكي ف حضنك وتخففي عني وتحسي اد اية احنا كلنا بنحبك وعمري ما دخلت مدونتك مغصوبة عشان تعليق ولا عشان اظهار نفسي ولا نفاق بل لاني احببتك ف الله وهذا يكفي ...بجد انت انسانة قلما نجدها ف هذا الزمان ...بجد بتمني لك كل خير وسعاده وحب وهنا ...ويا ريتك متقفليش المدونة عشان احنا كلنا بنحبك وعايزين نفضل شايفينك علي طول هنا ادامنا ...فاتميا متبصيش لناس بينصحوا الناس وينسوا انفسهم ...وفي ناس تانية بينصحوا بشكل غبي انا معرفش هو مين فيهم بس بجد لا تزعلي نفسك عشان اي حد ومش معقول كل ما مرة هتشرحي ظروفك للناس ..يعني لو واحد شافك ماشية مع اخوكي وفكر انه حبيبك لازم تشرحيله انه اخوك ومش البوي فريند بتاعك ...!!!؟ يكفي علاقتك مع ربك ولا يهمك كلام الناس
طولت عليك بس بجد بحبك كتيييير اووي وبتمني تكوني بخير وف خير دايما ورمضان كريم يا اطيب قلب وارق انسانه ف الوجود

كل سنة و انت طيبة يا فاتيما ورمضان كريم..ربنا يفرح قلبك و يهدي سرك و يزيح همك.بحبك

انا رحت وجيت كذا مرة ومعرفتش اقولك ايه
بس والله ياطمطم عن نفسى اتعلمت منك كتير
اخر حاجة اتعلمتها
انى مش عيب اتمنى السعادة وحطى تحت دى خطوط كتيرة قوى
هو بس ياحبيبتى اختلاف وجهات نظر ونصيحة جت فى وقت انت مش مستحملة فيه
ربنا يفرح قلبك ياطمطم باللى فيه الخير لك
يمكن بس الفرح اتأخر شويه علشان ييجى مع بعضه
ويفرحك بيوسف ومحمد فوزى مرة واحدة:)
مش كتير ابدا على ربنا

اللهم امين
كل سنة وانت بالف خير وكل احبابك معاك

كل سنة وانتي طيبة يافاتي انا رديت علي في الميل امبارح


رمضان كريم عليكي

وربنا يسعدك ويحقق ليكي اللي بتتمنيه

ورمضان الجاي يكون يوسف معاكي

والله ما بعيده عن ربنا

انا خالتو مش شافت مصطفي ابنها 9 سنين

وفي يوم وليلة جالها البيت وقعد معاها وبيزورها دلوقت وبيكلمها في التليفون

انا قولت بلاش نعلق
بس لما لاقيت كل دول بيعلقوا قولت اشمعنا انا :-)))))

انا بس جاية اقول
لللللللللللللللللللللللللللللللللللللللللللللللللللللللوووووووووووووووووووووووووووووووووووووووووووووووووووووووووووووىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

اخيرا قفلت الغير معرف
و حتستريحى شوية منه

يا فطمطم كلنا اغراب عن بعض بس على الاقل بنتمسك باسم و شكل يعرف الناس بينا و باسلوبنا و افكرنا
انما الى بيستخبى وراء الغير معرف
خجل او جبن او استظراف
بيخليى دماغك تودى و تجيب و تشكى فى ناس و ناس تتخدعى فيهم

المهم
يارب يبرد شوية من لوعة قلبك بمكالمة او حتى رؤية بيوسف
و اكتبى الى على هواكى يا فطوم
و لو كل يوم بكاء او حزن او رح او ضحك
مدونتك و انت حرة فيها
تكويها تطبقيها تنشريها تكشكشيها تقليها :-))) و انت حرة فيها :-)))

صحيح انا من ضمن الغلسين الى بيطلبوكى بطلبات كل شويتين ثلاثة و خصوصات الاصطباحات

بس و لا يهمك اول ما يفيض من زن
واندا افقعيها بوست :-))) و انا برضه حعلق عليه :-)))

يارب يكون رمضان سعيد يافطمطم سعيد قوى
و علىالعيد نقرالك بوست تقولى قلبى حيفرقع من السعادة ياناس
:-))))

:-************************************************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

كل سنة وحضرتك طيبة وبألف خير وصحة وسلامة إن شاء الله
:)
رمضان كريم

كل سنه وانتي طيبه يا فاتيما
رمضان كريييييييييييييييييييييييم

أقر الله عينك فى رمضان
بلذة الأسحار وصحبة الاخيار
ورحمة الغفار وجنة الأبرار


رمضان كريم

ان شاء الله هنعمل فطار طبعا
و نروح للاطفال زى كل سنة
هاظبط الدنيا و ابلغك
ربنا يكرمك يا طمطم

zika
----


نعم ؟!!

مين دا اللى مبيعرفش يطلع ع الكيبورد اللى عاوز يقوله ؟!!

امال اللى سمعناه و قريناه ف المخرد يبقى ايه؟؟

لو بتعرف هيبقى ازاى بقى ؟


متحيرش نفسك بالتدوير يا زيكا
انا و الله فاهمة و حاسة
من اول سطرين تلاتة
انتا عايز تقول ايه
و مش عارفة اردلك الشكر ..لأنه هيكون موازى فى حجمه لحجم طيبتك و حرصك على الطبطبة على زعلى

فبلا إحراج
منحرمشى منك






حواطر شابة
----------

انا بحبك يا خطورتى
و كل سنة و انتى طيبة يا حبيبتى




ويكا
----

انده زى ما تحب يا ويكا
منا فاطمة برده

و شكرا على كل ما كتبته
كل سنة و انتا بألف خير






sal
----

ظنك ف محله يا سال
انا اصلا مجرد ما كتبت آخر سطر ف البوست كنت هديت جدا

و فكرت امسح التدوينة و غيرت رأيى
قولت يمكن تكون لسان واحدة تانية زى حالاتى بس مش عارفة او قادرة او نفسها جايبة تكتب الكلام دا او حتى مكسوفة تقوله عشان ميت سبب
فقولت اسيبه
لعل و عسى

انا مش بكتبه عشان ارد ع الغير معرف عشان ابهدله ..لأ
انا و الله بتمنى يحصل تقريب لوجهات النظر
او يسيبنى ف حالى انا و غيرى


خلاص طلعت الفوانيس و رصيتها امبارح
و علقت الزينة

كل سنة و انتا طيب
و بألف خير





رحلة البحث
----------

يا لهوى يا محمد ليه بس كدا ؟
انا أسفة جداااااااا
انتا راخر اللى قلبك روهيف و دمعتك قريبة و اصلا دخلة رمضان و الوحدة و التفكير ف العايلة و ميت الف حاجة
انا عارفة
او بمعنى ادق
انا فاهمة ان كلامى كانله صدى لحاجات كتير عندك
و انتا مش مقصر و لا حاجة متقولش كدا يا محمد انتا زى ماجد اخويا الصغير و ربنا يديم الود بيننا

انا مش متضايقة خلاص
انا زى الفل

بيكم و وسطكم
و بطبطباتكم


خلى بالك بس انتا من نفسك
و ترجع بألف سلامة





Re7ab.sale7
-----------


انتى كمان يا رحاب ؟
انا اسفة يا حبيبتى حقك عليا

و المدونة ان شاء الله مفتوحة مين قال بس انى هقفلها دول شوية زعل و بفضفض معاكو يا عيال ايه الخضة دى ؟!!

تعليقك المرة دى يا رحاب خلانى مش لاقية كلام اقوله
غير انى ممتنة جداااا لكل حرف فيه

ان شاء الله نتجمع و قبل العيد
لما نعمل افطار الصائم اذا ربنا أذن
و رمضان كريم عليكى يا حبيبتى
انتى و كل الاسامى الحلوة اللى كتبتيها

۩

بوسات و حضونات و تشكرات





dhalia..
--------

و انتى بالف خير يا داليا
و حبيب قلبك بألف خير
و العيال بألف ألف خير
و رمضان الجاى يبقوا تلات فوانيس ماشى ؟
طيييييب






shimaa samir
--------------

انا كمان يا مشمشوتى
بحبك

بس مش ناوية بقى
تكسرى جدار الصمت
و تخترقى حاجز الحزن دا شوية
و تقوليلى مالك ؟!


انا كمان بدعيلك
ربنا يفرح قلبك دايما





حفيدة عرابى
----------
من غير ما تقولى انا حاسة يا فيدو
و عارفة غلاوتى عندك
و انتى عندك حق
الكلام معاده و طريقته مش وقتها خالص و لا لايق عليا و ينفعنى

كتر خيره برضو
بس يا ريت يخلى باله
انه الكلمة ساعات تدبح
من غير قصد


مفيش حاجة كتير على ربنا
الواحد بس طماع شويتين

كل رمضان و انتى حبيبتى يا فيدووو
ربنا يسمعنى عنك دايما
كل خير يا حبيبتى
اللهم أمين انا كمان اقولها






كيــــارا
----------

قريته يا كوكى
و عندك حق ف كل كلمة فيه
و ربنا يفرح قلب خالتك بمصطفى
و يكحل عينيها برؤيته طول العمر
هوه و ولاده و ولاد ولاده

كل سنة و انتى بالف خير يا حبيبتى
و يتحققالك اللى بتتمنيه يا بنوتات يا عسولات و احسن

wanda
-----

و لما انتى متعلقيش مين يعلق يعنى ؟!!

صفحة التعليقات ينقصها ياما من غيرك

تعرفى محستش اللى بتقوليه عن الغير معرف دا خالص
حسيته حد قارينى و عارفنى و قريب منى و صعبان عليه حاجات معينة و عاوزة يخلينى اغيرها و يكاد عاوز يكسرلى دماغى لو مسمعتش الكلام ..حد مهتم بجد ..بس الطريقة و التعبيرات و التوقيت كان صعب قوى

انا بقيت زى الفل خلاص

و انتى م الغلسين أه
بس الغلاسة الحلوة اللى بحبها
الغلاسة اللى هيا اهتمام و طبطبة

و طلباتك يا ون ونو بتفرحنى و تحسسنى ان ليها غلاوة عندك و انتى متعشمة فيا و انى ممكن انفع حد
خصوصا لما يكون حد بحبه
تخيلى بقى غلاستك عاملة ازاى ؟؟

صباح الفل و الياسمين
يا ونداتى الحلوة
*************************
******************************
*******************************
*********************************
و
×××××××××××××××××××××××××
××××××××××××××××××××××××××××××
×××××××××××××××××××××××××××××××××
××××××××××××××××××××××××××××××××××





P A C H A
----------

و انتا بألف خير يا شريف
السنة الجاية نقولك رمضان كريم عليك
و على المدام ان شاء الله

لكن دلوقتى
رمضان كريم عليك
انتا و خطيبتك
يا رب




حنان الشافعى
------------

الله اكرم يا نونتى
و يا رب تكونى دايما بخير يا حبيبتى

۩





قوس قزح
-------

و انتى طيبة يا دوللى

و انا ف انتظارك يا وش الخير
وقت ما تقولى و تؤمرى




мαησηα
------

انا بخير يا منونا
متقلقيش يا حبيبتى

معرفش انتى ناوية تعملى ايه
بس بخمنه

و يا ريت لو بلاش احسن
لأن فيه حاجات لما بتتعمل كدا بتتعب اكتر ما بتفرح

معرفش اشرحها ازاى
بس انا حاسة و اتمنى انتى كمان تفهمينى

كفاية سؤالك
و الله كفاية
و مش محتاجة أى دليل تانى ينعمل
رمضان كريم عليكى يا حبيبتى
وع لى كل من عندك




حبيبتى اللى بتبدأ بحرف الميم
-------------------------
حاضر التعليق مش للنشر
و منحرمشى منك ابدا
رمضان و العمر كله كريم عليكى يا رب
و ترجعى بالف سلامة

ميرسى لأنك افتكرتى يوسف كمان
منحرمشى منك ابدااااا






abu sho sho
-----------

ليه حضرتك بتقول كدا
كتر خيرك انك بتسأل و عاوز تتطمن
فيك الخير

و كل سنة و انتا طيب





قلب العصفورة
------------

تعليقك وصل و مرحش ف الوبا و لا حاجة

رديت عليه فوق
و ميرسى تانى
على غنوة فيروز يا حبيبتى

ربنا يطيب جرحك
و بحبك قوى

كل سنة وانتى طيبة ورمضان كريم عليكى
ولا يهمك ولا تشغلى بالك باى حاجة من دى

فاتيما
كل سنة وإنت طيبة

ياحبيبة القلب من جوة
اوعي تنسي الكلام اللي بتشجعيني بيه
وبشرالصابرين
فعلا انا زيك حاسة ان الدونة الطبيب النفسي لي
اكتبي كمان وكمان بجد انا لو ما قلتش وكتبت وصرخت وقلت اه في اي حتة زي المدونة كدة بيتهيالي هموت
ربنا يخليكي لي يارب يا اجمل اخت وصديقة
كل عام وانتي منورة ولربنا مقربة يارب يقرعينك ويريح قلبك يارب ويفرحك بيوسف وبالحب الكبير اللي يدفي قلبك يارب
رمضان كريم

اولا كل سنه وانتي طيبه وبخير

ثانيا ربنا مع عاشقه النقاب يا رب

ثالثا كلمه حكمه ... دي مدونتك وانتي حره :)

تهيسي تكتئبي تزعقي براحتك

تحياتي

يا فاتيما انا مستغرب كلامك .. اصل اكيد دى مدونتك و انتى حره تقولى فيها اللى انتى عيزاه
يعنى انتى مش بتدينا فلوس عشان نيجى نقرا ولا بتربطينا بحبل او بتكوينا بمعلقه سخنه عشان نعلق
اللى مش عاجبه مش يدخل
و اللى مش عاجبك تعليقه امسحيه
كبرى دماغك و خليكى كووول :)
كل سنه و انتى طيبه

أم يوسف
فاطيما
هده مدونتك
ونحن الضيوف هنا
وقولى وأحكى ما تريدى
فيها وليس لأحد تحديد او الحجر
عليكى فيما تقولين......

أيه رأيك فى النحوى
اللى فات دا :)
نتكلم بلدى
علشان
البلدى يوووكل:)

كل سنة وأنتى
بألف مليون خير
ورمضان مبارك عليكى
وعلى يوسف وعلى أمتنا
الأسلامية كلها.

حبيبتى
سيبك منه
ولا يهمك منه
ربك أقوى واحسن
منـــــــــــــــه

فاطيما الحبيبه
مامه يوسف
بجد شكرا ليكي علي سؤالك عني وعن بابا ديمن
واحب اقولك
قولي اللي انتي عوذاه
واللي نفسك فيه تكتبيه
وفي ناس كدا سكوتهم احيانا احسن من كلامهم
موش هقثلك سيبك منهم لان كلامهم بيوجع اوي
انا عرفه
بس احسن حاجه انك عملتي الاشراف
غير كدا دي ارضك
اكتبي فيها اللي حساه
وأويدك وبشده
دي حاجه تخصك
ولو في كلام بنحسه وبنتكب كومنت عليه
فدا لاننا كلنا والحمد لله قريبين من بعض
ويارب يذينا قرب ونفضل كدا مترابطين علطول
اللهم امين
ورمضان سعيد عليكي يارب
والسنه اللي جايه مع يوسف بأذن الله
وانتي بشر....ليكي حق تحذني وتفرحي وتقولي اللي عوذاه
اتمنالك كل خير
وقولي ياااااااااااارب:)

ليــــــــــــــــــــــــــــه يادنيــــــــــــــــــــــــا
بالقسوة محوطانا
ومن الفرح منعانا
كل مانق
ول خلاص
نرجع تانى للى فات
ونغرق فى بحر الذكريات
ليــــــــــــــــه يادنيــــــــــــــــــا
معاندانا
وعلى البسمه مش مهنيانا
صبرنا على غلبنا
ورضينا بفراق حبايبنا
ولنا هو ده نصيبا
وبرضو قاسيه علينا

ليـــــــــــــــــه يادنيــــــــــــــــــا

بتحرمينا من بسمتنا
وترمينا فى غربتنا
وتهجرينا فى حياتنا
ليــــــــــــــــــــــــــــــه يا دنيــــــــــــــــــــــــا
يروح فين المسكين فيكى
والقلب الطيب اللى اتعذب فى هواكى
علشان نعيش ونمتع بيكى
لازم نطمع ونستغل كل مافيكى
ليـــــــــــــــــــــــــــــــــــــــــه يادنيـــــــــــــــــــــــــــا
هى دى الدنيا لا تحزنى ولا تعتبى على كل جاهل لم يفهم ما تقصديه
اهم شىء ترضى ربنا وتكونى راضيه على نفسك
دى الدنيا مفيش فيها فرحه بتدوم لازم شىء يعكر الصفو
كل سنه وانتى طيبه
ويعلم ربنا انى بحبك ف الله
وبزعل لو عرفت انك مدايقه
ربنا يكرمك ويجازيكى خير على طيبه قلبك
تحياتى

أتفق معك في
إن من حق كل شخص أن يكتب (يدون ) ما يود أن يدونة
دون خوف من بطش أو تجريح وخلافة
خصصوصاً وإن الكتابة مستخدمة كما في حالتك وحالتي وحالة الكثيرين غيرنا
في التنفيس في الخروج من الحالة في وضع الحالة داخل إطار كي نتمكن من حفظها داخل قالب
قبل أن تلتهمنا أو تشوه ما هو موجود حولنا
شأن أي إنسان حساس يتعامل مع الحياه بإحساسة ومشاعرة وأعطي شيء من الخيال
...
لا أكذب عليك
أعلق عندك وعندالكثيرين غيرك كمجهول تحاشياً للتعليقات السخيفة من كل نوع
حتي أني غيرت عنوان مدونتي أكثر من مرة هرباً من النصائح وقواعد الإرشاد والذكاء الفطري المعتاد الذي ينهمر علينا كثيراً بمبرر ودونة
..
إن كنت أغلقت أنت التعليقات من المجهولين فقد أغلقت التعليقات تماماً ومن أي شخص علي كثير من الموضوعات
بعد أن يأست أن يتفهم أحد أو حتي يقول خيراً
...
أتعاطف مع قضيتك كثيراً
فهي قضية حرية التعبير والرأي نفسها
...
كتبت كل هذا التعليق للتأكيد
ليس كل المجهولين
متصيدي أخطاء أو أشخاص آتون لتصففية الحسابات
ربما هم أشخاص مثلي يفضلون المشاركة ولكن من بعيد
...
تحياتي
 

Ramadan Kareem Ya Fatema

كل سنة وانتي طيبة

كل سنة وانتى بالف خير يا احن قطة يا فاتيماااااااااااااا
وحشااااانى جدا رمضان كريم عليكى ياقطتى وليكى فانوس صغنون عندى
فاتيما انتى ليكى حق تنفجرى من جواكى وتصرخى لانك انسانة حساسة جدا
بس لازم تعرفى اننا بنحبك واننا كلنا مش مجبرين على ده ده بمزاجناااااااااااااااااا انتى انسانة محترمة جدا وام مثالية حتى لما حد بيزعلك انتى اللى بتعتذرى
اييييييييييييه انتى اكيد مش بشررررررر ازاى بتبقى كده
اوعى تزعلى احنا معاكى وصدقينى بنحبك فى الله
كل سنة وانتى طيبة والسنة الجاية منتظرين برضه يوسف فى حضنك ان شاء الله

السلام عليكم

ازيك يا فاتيما ربنا يسعد قلبك ويجمعك بيوسف على خير ان شاء الله ..

وكل سنة وانتي طيبة

كل عام واتنى بالف خير وصحه وعافيه

مش عارفه اقولك ايه لكن كل اللى اقدر اقوله ليكى انكاستعينى بالله وا\لب من ربنا دايما السداد والرشاد فى كل خطواتك وامشي بقلبك الطيب واللى احن من البشر وزى ماقلتلك قبل كده ربنا له حكمه انك تبقى ام بالحنيه دى ومش قادره تشوفى ابنك
وغيرك مش طايقين ولادهم وعايشين معاهم بالغصب


وصدقينى دايما الخير ادامنا فى كل ازمه بس مش شايفينه وصدقينى كمان الخير هييجى مره واحده بس نفضل متعلقين برحمه ربنا التى وسعت كل شئ


ربنا يبارك فى عمرك ويرضى عنك
ويهديك الى سواء السبيل

كل سنه وانتى طيوبه

ورمضان كريم

تيمااااا ...

بجد واحشااااني
وأنا عارفه إني مقصره بس غصبا عني ...

عشان خاطر ربنا يافاتيما ماتعطي إنتباهك لناس مايستحقوا ده
بتبقى نفوسهم مريضه .. وإنتي بالشكل ده ممكن تقويهم أكتر ..

دي مدونتك وإنتي ليكي الحريه الكامله تعملي فيها إللي إنتي عايزاه ...

فالناس إللي زي دي لاتعيريها اي إهتمام ...

بجد ربنا يسعد قلبك ويطمن بالك يارب
وبجد إنتي في بالي على طول ...
حتى بنقعد أنا والبنوته رحاب ورضا ورانيا ننم عليكي إنتي وكم مدونيين ومدونات كل فتره والتانيه ههههههه
بس بالخير والله :) ...

ماتشغليش بالك بأي شي ...
وصفي ذهنك لأحلى شهر فضيل
وكل سنه وإنتي طيوبه وعسوله
ويارب يتحققلك مرادك بالخير ...

وربنا مع عاشقة النقاب اللهم أمين ...

تحياتي الملونه لأحلى روح ( أم يوسف ) ...
^_^

طمطم
انا و خالد نزلنا البوست
همتك بقى معنا :)

توما
كل سنة وانتي طيبه وبألف خير وسعادة
ورمضان كريم عليكي وعلي يوسف والامةالاسلامية جميعا
دومتي بكل خير

على فكرة انتى وحشانى قووووووووى قوووووووووووى

وبحبك قوى قوى قوى بقى

وشفت البوست بتاعك وما بقتش عارفة أرد أقول إيه ولكنى كنت متأكده انك هتعدى المود ده

وكل سنه وانتى طيبة ورمضان كريم عليكى وعلى كل الناس إن شاء الله

كل سنة وانتى طيبة يا ام يوسف
ورمضان كريم
وان شاء الله مرحلة وهتعدى
مع انى زعلان منك بس يلا رمضان كريم
وهاجى اعزمك على الفطار الجماعى ههههههههه
*كما تعودنا منك على فعل الخير
ندعوك للمشاركة فى يوم خير جديد
التفاصيل هنا
http://kouskoza7.blogspot.com/2010/08/blog-post_12.html
و هنا
http://hams07.blogspot.com/2010/08/blog-post.html

انا جاية بس اقولك كل سنة وانتي طيبة ورمضان كريم عليكي يا فتوما وان شاء الله السنة الجاية مع يوسف في حضنك
ربنا يسعدك امووووووووووووووواه
بوسات وحضونات كتييييييير

كل سنة وانتى بالف صحة وخير يا ام يوسف
ربنا يثبتك ويقويكى
ومتنسيناش من دعائك

mohamed ghalia
--------------

و انتا طيب يا غالية
يا غالى

حاضر




أبوحميد
--------

و انتا طيب يا باشمهندس
كل سنة و انتا بألف خير
و اسرتك الكريمة عايشة ف حسك
و يا ريت تحاول تيجى فطار رمضان
هيكون يوم مميز ان شاء الله
خالص ودى ليك




عاشــــــ النقاب ـقــــة"نونو"
-------------------------------

حاضر يا نونو
انا اصلا لما قريت البوست بتاعك انكسفت جداااا من نفسى و حسيت انى بدلع قوى و مكنش المفروض انفعل و اطلع انفعالى كدا ...بس زى انتى ما قولتى ..الواحد لازم يخرج اللى جواه و ميكتموش الدنيا مش مستاهلة

ربنا يا حبيبتى يفك كربك
قلبى معاكى و بدعيلك كل يوم
و ربنا كريم و يستجيب يا رب

خلى بالك من نفسك
رمضان كريم يا حبيبتى
عليكى ان شاء الله




فتاة من الصعيد
-------------

و انتى طيوبة يا فاتى
ادعيلها و حياتك هى احوج ما تكون لدعائنا جميعا
و منحرمشى منك ابداااااااا




che
---

حاضر يا عمرو
هخلينى كووول اهو

كل سنة و انتا طيب يا فندم
و رمضان كريم عليك




norahaty
--------

نحوى نحوى احنا بيهمنا ؟!!
انتوا مش ضيوف يا نورهنتى
انتوا اصحاب مكان زيى تمام
دايما احس انى عموما مش ف التدوين بس ملك ناس تانين و لو بدرجات
لأن برضو كل حد فيهم بحبه ليا فيه نصيب و يعز عليا ان حد يكون زعلانى منى و عليا قوى كدا و السبب غلط مش صح

كل سنة و انتى بألف خير يا حبيبتى




sony2000
---------


عيب يا سنسن كلمة شكرا دى
يا حبيبتى الحمدلله انه بقى بألف خير
و يا رب دايما

اما التعليقات فخلاص شلنا المجهول
و الحمدلله مرتاحة جداااا


منحرمشى منك يا سنسنتى
بوسات و حضونات يا جميلة




emymony
--------

ميرسى يا أيمى
دى غنوة و لا شعر و لا بتاعتك و لا إيه؟؟

حلوة و منحرمشى منك

رمضان كريم عليكى يا حبيبتى
ان شاء الله

سندباد مصرى
----------

اولا
اهلا بيك يا سندباد
و اتمنى كل زياراتك القادمة متكونش خفيه و تعلق لأنى كتير جدا بحتاج اسمع كلامكم و طبطباتكم

العلاقة هنا تفاعلية
المفروض كدا
محدش مهما كان مخنوق عاوز يكلم روحه بس
مش طول الوقت حابب الوحدة يعنى
و مش معنى ان حد ضايقك تبقى تبطل تتكلم مع حد ..كدا يبقى الواحد انهزم و انا محبش اكون انهزامية و عشان كدا كتبت البوست ..لأن مش كل مرة بقى اخد الكلام على قلبى و اسكت و بلا نهاية هفضل كدا يعنى ؟؟
انا حرة ف عرض مشاعرى و لو معجبتش حد ..اناقشه فيها
لكن الاحكام القاسية دى ..مش هفضل طول الوقت اسمعها و اسكت

فيه ناس معدية المرحلة دى بقى لعدم الالتفات ليها اساساً
معرفش اكون كدا الا لما اقول كل اللى عندى ..يمكن و لعل و عسى الحوار ينفع

انتا نورتنى
و ف انتظارك دايما

رمضان كريم عليك




Ahmed Shokeir
---------------

يا لهوتينىىىىىىىى

احمد شقير عندنا ف المدونة

اناشايفة صح ؟

لأ دا رمضان كريم بجد

كل سنة و انتا طيب
يا صاحب الحكاوى
احنا زارنا النبى والله


علطول كدا رافع معنوياتى
قبل أن تنخفض
اقوكل ايه بس ؟
منحرمشى منك ابدا

۩




مى
---
الكلام الكبير دا يا مى
انا مش قده و لا عارفة ارد عليه
اقول ايه طيب ؟!

منحرمشى منك يا حبيبتى
رمضان كريم عليكى
يا رب





جنى
---


و انتا طيب يا سعيد
و كل سنة و ربنا مجمعنا ف الخير

رمضان كريم عليك يا جتنى




GiGi world
----------
ازيك يا جيجى
كل سنة و انتى طيبة اكتر منتى يا حبيبتى
و حاضر هسيبها على ربنا
انا خلاص روقت و بقيت زى الفل
و لولا بعاد يوسف كنت قولت انى الفل نفسه ..و مش ناقصنى حاجة

رمضان كريم عليكى يا حبيبتى
فانوسك اهو
۩




داليـ ـ ـ ـ ـ ـ ــــا
---------------------

كل سنة و انتى بألف خير يا داليا
و يا حبيبتى ارجوكى متزعليش
مش كل بوست انا برد عليه ..
و انتى مرحب بيكى و متقبل مرورك و اهلال بيكى دايما و دون اى سؤال او استفسار او معرفة و لا حاجة
العالم الإفتراضى مفيهوش الحكاية دى
تأدكى ان حضورك مرغوب فيه بشدة

يا بنتى طولى بالك
و ميبقاش نفسك قصير كدا ؟

رمضان كريم عليكى ان شاء الله

ghAdA mOhsen
-------------

انتى كمان يا غدغود
و كلكم وحشتونى
خلاص معاد فطار رمضان اتحدد و يا ريت تحاولوا تيجو اليوم دا و ان شاء الله نتجمع زى المرات اللى فاتت

انا بخير يا حبيبتى
منحرمشى منك ابداااااا
و كل سنة و انتى طيبة
تحياتى لرانيا و لكل الاحباب عندك




قوس قزح
-------

علم و تم التنفيذ يا دوللى
اشوفك يومها على ألف خير
يا وش الخير




Mano
----

و انتا طيب يا مانوووو
فينك يا بنى ؟
هتيجى فطار ابو الريش و لا هتنطش ؟؟
كل سنة و انتا طيب يا عزيزى
و رمضان كريم عليك




bos bos بسمه عبدالباسط
-----------------------

متقوليش حاجة يا بسبس
انا عارفة من غير حاجة

انتى كمان وحشتينى قووووووى
و بحبك قووووووى
و حاولى تيجى فطار رمضان
عشان عاوزين نشوفك قوووووووووى

بوسيلى ماما يا حبيبتى
و سلامى لبدرية بدارة القمر





همس الأحباب
-----------

يا لهوتينى ابو همس و ببش زعلانى منى
حقك عليا من غير ما اعرف اى حاجة
بس انا بعتذر مسبقا عن ندالتى و حركاتى الأى كلام عموما
و علم و تم كتابة البوست

ربنا يخليك لينا
و اشوفك يومها على ألف خير
و لو فيه اى حاجة اقدر اعملها قوليلى يا جماعة

رمضان كريم و الدنيا كلها كريمة بناس زيك يا خالد انتا و داليا

۩ - ۩
دول عشان همس و شابى




just waiting
------------

و انتى طيبة يا تيتو
رمضاتن كريم عليكى يا حبيبتى
ميرسى ع البوسات و الحوضنات خاااالث





الكلمة نور
----------

و انتا بألف خير يا نور
فيك الخير يا مالك الاجنحة

و ربنا يرزقك بالخير كله
يا رب

السلام عليكم

اولا كل سنه وانتى طيبه يا ام يوسف

بحلول الشهر الكريم

هذه اول زيارة لمدونتك وقد سبق وان زرت مدونة يوسف

ولكن كنت احب زيارة مدونتك انتى


لما قراته فيها
انها حقا شيقه

وايضا لكم اعجب بحرصك الشديد على الموده بينك
وبين الاخوه المدونين
وحرصك على التعليق لديهم

ولكم تمنينا لكى انا وزوجى

وطائرى الحبيب السعيد
وطائرى الطيب ابو الابناءوابنائنا
الاحباء ان تسعدى قريبا بجوار يوسف
اعاده الله اليكى
وطمئنكى عليه وجعله ابر خلق الله عليكى

حقا لكى كل الحق فى ممارسة حياتك الشحصيه كيفما يحلو لكى
طالما
انك لا تجورين على حق احد
او تجرحين احد او تغتصبى حق من حقوق الغير
او تجورى على حرية الاخرين

فيما غيرذلك فهو حق لك
وطالما انك تخشى الله فيما يغضبه
وتعاملى الاخرين بما يرضيه عز وجل
وتتقى الله فى نفسك وبدنك وولدك

وتاتمرى بما امر الله به وتنتهى عما نهى الله عنه

وتراعى ضميرك فيما تعملين وتفعلين

وبعد لك انت حرة فى ان تعيشى حياتك
كما يحلو لكى

طالما امتثلتى وراعيتى كل ما سبق

واكرر لكى دعائى انا وطائرى الطيب
زوجى وطائرى الحبيب
ان يجمعك بولدك قريبا
وان تريه احسن الناس
واكرر شكرى لكى لحرصك الدائم والمستمر
على التعليق لدى زوجى وطائرى الطيب

ابو الابناء
كما ادعوكى
لزيارة مدونتى المتواضعه واتمنى
ان تداومى التعليق بهاكما تفعلى مع
زوجى وطائرى الطيب
وبالطبع باقى الاخوه والاخوات المدونين
والمدونات
مع امنياتى لكى بحياه موفقه
الا ضميرك

فمن حقك ان تعيشى وتفرحى كالاخرين

فاتيما مامت يوسف العزيزة

أزيك كل سنة و انتى طيبة

و يارب تشوفى يوسف قريب

صدقينى انت كلامك كله صح بأمانة مش مجملة

لأن مأظنش ان الواحد يحكى عن نفسه عن اللى مضايقه دة يزعل حد

صدقينى انا مقدر كل المشاعر اللى انتى بتقوليها دى

المشكلة ان الناس مش مقدره ان الواحد فاهم كل كلمهم و مقدر منطقية اللى بيقلوا

بس فى اوقات كتير المنطق مبيكونش حل

مع الأحتفاظ ان الواحد مش هيعمل حاجة تغضب ربنا الناس فاكرة لما تحكى عن مشاكلك بالطريقة دى يبقى انت منهار لأ بس الواحد بيكون تعبان محتاج يقول علشان يهدى علشان يقدر يستحمل اللى جى

صدقينى انا عارف و مقدر وقع التعليق اللى جالك عليكى حتى لو مشفتهوش
لأن الناس مش قادرة تحس باللى انتى فيه او مقدرة ان الكلام بالمنطق مش هو الحل
لأن احنا فى منطق دلوقت حياتنا عبارة عن أفرازات لهذا المنطق اللى الواحد مش عاوز يفكر فيه او بيه لما يكتب ع الأقل

انا مش عاوز اطول عليكى بس عاوز اقولك انا لما قريت البوست بتاعك اتشجعت و نزلت بوستك
عارفة ليه لأن انتى اتكلمتى بالمنطق اللى واحد زى الأخ بتاع التعلي مش عاوز يدركه

فاتيما اكتبى و قولى اللى انت عاوزة تقوليه و تكتبيه

دى مشاعرك مبتضريش بيها حد

دى مدونتك دى حياتك

اللى مش قادر يفهم او يقدر خلاص

ميجيش

ربنا يوفقك و يكون معاكى دايما يا مامت يوسف

انا اسف جدا ع التأخير دة

حبيبتي الجميلة ذات المشاعر المرهفة ذات الامومة الطاغية ذات الاحساس الجميل
ام يوسف ... بحبك...ومتلفتيش لاي حد خليكي على طبيعتك...ربنا يعزك...ويسعد دايماَ قلبك... ويفك كربك

لولا

كل سنه وانتى طيبه وبخير ويوسف بخير
رمضان كريم

ام الأبناء
---------

و عليكم السلام يا فندم

و كل سنة و انتى و طارئك الحبيب السعيد
و طائرك الطيب ابو الابناء
بألف خير


و انتى نورتى روح قلب ماما بزيارتك دى
و اهلا بيكى ف أى وقت

و شكراً على رأيك ف التدوينة
و تأكدى ان دا كل همى
انى مغضبش ربنا
و لا اجور على حق حد
و اراعى ضميرى

بس يبدو ان بعض الناس
بتفتكر انى بعمل العكس
و ان ضميرى فيه اشياء اخرى
غير ما اظهر
و اصدقك القول انى احيانا مبخدش بالى لما بتعامل بحسن نية و ببساطة
اللى ضميرهم وحش
بيقولوا انى حد منفلت او قد ينفلت
اما اللى ضميرهم كويس
بس عندهم حاجات يخافوا عليها منى و من غيرى
فبيقلقوا و يجيلهم حالة لخبطة
و يسيبولى تعليقات مجهولة بإنى
يا غما بقيت ست مش كويسة
او ناوية ابقى كدا
فبينصحونى اخلى بالى
لأنهم بيعزونى و عاوزين مصلحتى
و انا عارفة
ان اغلبهم بيبقى مخلص ف النصيحة
بس اللى بيزعلنى حاجة واحدة بس

انهم ظالمينى
لأنى مش كدا



ان شاء الله
ازورك ف مدونتك
و ربنا يديم الود بيننا


دعائك انتى و طائرك الحبيب
زوجك و طائرك الطيب
على راسى من فوق


الف شكر ليكى




Ramy
----

بص يا رامى انتا جبت يا بنى التايهة
اللى بقالى تلات سنين اهو بقولها و مش عارفة

مش معنى انى بكتب بوست حزين او مؤلم شوية
ابقى بشتكى و عاوزة حلول
دى فضفضات مش اكتر

و مش منهارة و لا حاجة
دى ممكن تكون نرفزة و بمجرد ما افش خلقى معاكو بتخلص

زى حد رايح الكلية الصبح او الشغل متعكنن و بمجرد ما يحكى مع زمايله او اصدقائه بيروق

انتوا كدا بالنسبالى
صحبة الخير كله
و الطبطبة و الونس


انتا كمان يا ر ر
من نفس النوعية
يا بنى احنا عاوزين نعمل وربطية
ايه رأيك

بس نسميها ايه ؟؟
نسميها ايه؟؟

مش عارفة

غير
ان منحرمشى منكم ابداااا




لولا و زهراء
-----------

انا كمان يا لولا بحبك
و ميرسى على كل الدعوات الحلوة دى
رمضان كريم عليكى يا حبيبتى
♥ ۩ ♥




الحب الجميل
---------

و انتى طيبة يا حبوبة
يا طيوبة

رمضان كريم عليكى
و على كل احبابك يا حبيبتى
٭ ۩ ٭

كل سنة وحضرتك طيبة رمضان كريم اولا

ثانيا الناس اللى زى دول مينفعش نديهم اهمية ببوست طويل عريض ..

فيه كذا اسلوب كنت بتبع واحد منهم بغض النظر عن ماهيته

بس متضايقيش نفسك خالص ..:)

لا يا فاتيما ماينفعش تبطلي تتكلمي عن يوسف لمجرد إن الناس بتتضايق من كدة .. ده إبنك ومن حقك تخرجي كل اللى جواكي واللى مش عاجبه مايقراش بكل بساطة


أما عاشقة النقاب فيارب يفك كربها عن قريب بحق صيامنا والأيام المفترجة دي ياااارب

أخبارك أيه ؟؟؟

ها(:

عارف الصيام فى الحر ده كتر خيركوا صراحة (:


ربنا معاكى (:

يا مامت يوسف العزيزة

إرسال تعليق