.

.

٭ ۩ ٭ عصافير الجنة بترفرف ف ابو الريش ٭ ۩ ٭  

Posted by: فاتيما in









مفيش بعد كلام 
داليا قوس قزح أى كلام 
دوس هنا 




مبدئيا بيقولوا اللى يحبه ربه يسخره لأخوانه
ف الخير ..مش كدا ؟
بس كمان متهيألى
اللى يحبه ربه برضو
ييسر له فعل الخير و يحبب عمايله للقلب
و يخليه يروحله بالمشوار و هوه فرحان
و متحمس و الفرحة لفاه
و اللى كان يحب يشوف أحلى مشهد
ف نهار رمضانى حار جدا
كان لازم يكون معانا النهاردة فى ابو الريش للاطفال
عشان يشوف عصافير الجنة و هيا بترفرف حوالينا
صحيح من غير عيون تشوفها
لكن القلوب كانت حاسة بنسيم الهوا اللى ناتج
عن رفرفتها
و اللى يركز شوية وسط الزحمة
كان يسمع صوت الزقزقات الصافية بترن ف الودان
من غير نغمة نشاز واحدة حتى








الدعوة الطيبة بتاعة كل سنة من
شهامة الدنيا و جدعنتها
خالد همس الاحباب
و وش الخير داليا
قوس قزح
و من بعيد يحضنها آبى هانم بتنجانى
و من قريب البت الخيخة و ضياء بيتوفل مايند و غيرهم



بسرعة تلقفت القلوب الطيبة الدعوة
عشان تنشرها ف مدوناتها
فى شكل بوستات و تنويهات ف الشريط الجانبى
و حتى اللى كانوا عارفين انهم ميقدروش ييجوا
متأخروش عن المساهمة
و ف أقل من عشر ايام كانت كل الاحباب عارفة
المعاد بالضبط
و المكان و عنوانه
و اسماء الأدوية المطلوبة
و الكل بيكلم بعضه ف ايميلات
و موبايلات و تعليقات
و الكل بيحضر نفسه للمشاركة بكل شكل
متاح و ممكن



عن نفسى بقى كنت قلقانة لما عرفت بالمعاد
لأن ف العادة بيقبضونى متأخر بعد يوم واحد ف الشهر
لكن سبحان الله ..لأن الواحد ناوى خير
و سايبها على ربنا
لقيت الصراف ف الشغل بيندهنى
و لأول مرة ف تاريخ حياتى ف الشغلانة دى
بيقولى تعالى اقبضى يا أستاذة
انا أقبض يوم 26 و كلى ذهول
بس ذهول فرحان و مش متستغرب ابداااا
عشان ربنا كريم و ساند ضهرنا كلنا
اللى بياخد و كمان اللى بيدى






عن طريق الأيميلات و التعليقات عندى عرفت تقريبا
مين هييجى و مين مينفعش يحضر
و عشان الولاد تحس بشوية فرحة وسط كآبة المرض
فكرنا نعمل
فانوس من الكرتون و كانت فكرته سهلة
تتجاب م النت و اتحضرت الحاجة فعلا
و كان فاضل الولاد كل واحد يختار فانوسه و يركبه
و يلونه و ينبسط



النهاردة ..السبت الموافق 28 أغسطس
الساعة اتنين العصر كنت قصاد الباب الرئيسى
لمستشفى ابو الريش اليابانى للأطفال
بكلم خالد همس الاحباب و اقوله
انى وصلت خلاص و اى حد يكلمك ابعتهولى
بعد عشر دقايق كانت كيارا الجميلة
وصلت عشان تونسنى
لحد خالد ما حصلها بعد عشر دقايق هوه كمان
و بدعوة من الاستاذ خالد عونى الأخصائى الأجتماعى
و المشارك الاصيل ف الفرحة دى كل سنة
خرج يستقبلنا و يقول اتفضلوا واقفين برا ليه
كل سنة السؤال دا و الله
يا جماعة المستشفى مستشفاكم .. اتفضلوا جوا




و من جوا دى
بدأت الاحبة تهل علينا
و شوية شوية تتعالى ف ودانى اصوات الزقزقات
و رفرفة الجناحات
و العدد يتزايد
اللى جاى بأدوية مطلوبة
و اللى جاى بلعب
و اللى جاى بهدوم
و اللى جاى بفلوس
و اللى جاى يساعد و يشيل و يوزع
و من بعيد تظهر وش الخير داليا
الخير سابقها و الأبتسامات حواليها و ابتدت بعدحضورها
الخطوات تتسارع اكتر و اكتر عشان نلحق الوقت



مكنش فيه امكانية و لا وقت نلم الولاد
و نركب معاهم الفوانيس
فبدأ المدونين يدبسوا الفوانيس بنفسهم
و اتملت ف تلت ساعة شنطة كبيييييرة عشان
تتوزع ع العيال
مع الحاجة


كان فيه شنط هدايا بتتوزع فيها اللعب
و الهدوم بالتساوى و بالنظام ف حتة
و ف حتة تانية خالد همس الاحباب
بيلم التبرعات المادية و يديهم لداليا و ساجى يعدوهم
و يفرقوهم بالتساوى ع الأظرف عشان كل سرير
ياخد مبلغ مناسب
و رمضان يكرمهم و يكرمنا على حسهم


ف حتة تالتة ادراة المطعم اللى هنفطر فيه
بيتصل عشان يعرف عدد الوجبات المطلوب
تجهيزها بالتحديد
فنعدى ع الحضور عشان كل واحد يختار وجبته
و بعد ساعة و نص تقريبا من التوافد
المحصلة النهائية
كانت
حوالى 9000 جنيها
غير الادوية
و الهدوم
و اللعب
و الفوانيس


و بسرعة عشان الوقت يتحط ف ظرف
مبلغ 50 مع شنطة فيها حاجات كتير
و ظرف تانى يتحط فيه 100 مع شنطة فيها حاجات بسيطة
الشنط و الأظرف عددها ما شاء الله كتيييييير
فداليا تبتدى توزعهم ع الحاضرين
و الكل بيتسابق عشان ياخد ثواب
و يطلع بنفسه يسلم ع العصافير المجروح جناحها
و يقولها كل سنة و انتوا احسن و بخير
و ربنا ياخد بيدكم


تتم المهمة بنجاح
و ف أقل من نص ساعة نكون خلصنا
و على خمسة و نص نكون بنخرج م المستشفى
متجهين للمطعم اللى هنفطر فيه كلنا
و اللى بيبعد مجرد عشر دقايق مشى
عدينا فيهم محطة المترو


عقبال ما قعدنا و كل واحد شاف كرسيه
كان كالعادة خالد و باقى الشباب بيساعد ادارة المطعم
ف تلقى الطلبات و توزيع الاطباق
ولما ابتدينا الساعة تلاتة و نص كنا 40 نفر هيفطروا بس
على ما وصلنا المطعم كنا اكتر من 55 واحد
نفسهم يتلموا سوا
و ياكلوا عيش و ملح مع بعض



المغرب بيقول الله اكبر
و احنا بناكل و نحكى الحكايات و نهزر و نناول بعض
الميه و بنبتسم م القلب
الشباب جدعنة منهم يسيبوا كراسيهم للبنات
لما العدد ميقضيش
و ياكلوا ع الواقف
و ما أن خلصنا حتى بدأت الأقتراحات
بإننا نكمل القعدة ف الحسين
و يزمزق الغالبية عشان الزحمة و صعوبة المواصلات
و بعد نقاش سريع يتفق الكل
اننا نقعد ع البورصة عشان وسط البلد اسهل ف المرواح



مشى ناس و قعد ناس
و توزعنا ع العربيات و التاكسيات و المترو
و عند قهوة الاخ ابراهيم على اطراف البورصة
و ف قول آخر لعادل البلد دى فيها حكومة
المخبر ابراهيم اكمنه راجل طوييييييل كدا و له هيبة
بدأت الناس تقعد
ف حلقات واسعة
و انتهت لحلقات اضيق بمرور الوقت
و قعدنا نشرب ف قهوة و نسكافيه و عصاير
و الاخوة المدخنين محبوش يحرمونا
من حلقات دخانهم
عشان تدى شكل سحابات فوق راسنا
و تعمل جو رعب و اكشن كوميدى ف سماء البورصة


بشر قعدت و مشيت بعد فترة بسيطة
و ناس جت مكنتش معانا من اول اليوم و الا الفطار
و تقريبا على الساعة الحادية عشر كنا بنقوم
و كله بيتك بيتك


انا الف حاجة ف دماغى دلوقتى
عاوزة اكتبها

و ربنا يقدرنى و افتكر كل حاجة و كل حد


اليوم كانت مفاجأته كتيرة قوى و اولها و اجملها
كان مجيى بابا ابو خالد مع ابنه
بابا بقى الحمدلله زى الفل و صحته احسن كتير
و قعاده وسطنا كان محل امان و اطمئنان زى الاول و اكتر
و عقبال كل مرة تكون وسطنا يا أبو المدونين و المدونات
و لادك اللى فرحوا بيك و بوجودك النهاردة
و خالد ابنك جدع قوى و راجل
و ساجى حملته مسئولية توزيع الفوانيس ع الاطفال
و ادى المهمة بكل نجاح و كان قدها و قدود


تانى مفأجاة كانت وندااااااا
سواحة فى الكون اللى كنت عارفة انها جاية ان شاء الله
بس لما شوفتها انذهلت شوية
و مش هعقد اقول عسولة و رقيقة و هادية الحركات دى
عشان رغم شقاوتها و هيا بتكتب تدويناتها
الا انها ف الحقيقة بتنكثف خاااااالث
و كانت ناوية تمشى بعد المستشفى لولا انا و خالد
كنا هنكلم الامن يمنعها م الخروج عشان متمشيش
و رغم توجسها الرهيب خيفة من اكل المطاعم
الا انها جت على نفسها و عشان خاطرنا قعدت للفطار
و من حسن حظى انها كانت جنبى طول الوقت
و دا ادانى فرصة ذهبية اكتشف بيها ان البت ون ون يا جماعة
عينيها حلوة جدااااا و معبرة و كل براءة
و هذا يدفعنى حثيثاُ (حلوة حثيثاًُ دى) انى افكر ان لازم
انا و خيخة نعمل لوكاااااء حريمى و نجيبها فيه
عشان نقضى على هذه البراءة الفظيعة
و نعلمها شوية تشرد حريمى ستاتى مصرى اصيل
من بتوع ستاتك يا مصر
يا ونداتى الحلوة انتى نورتى مصر و يومنا
و كل سنة و اتنى طيبة عشان كان عيد ميلادها يا عياااااال


تانى عنقود ف شجرة البراءة
و برضو كان عيد ميلادها النهاردة
حفيدة عربى لقد خلقنا الله احرارا
فيدووووو زى ما بحب ادلعها
و صحيح كان فيه طراطيش امنيات و تعليقات انها جاية
بس لما شوفتها برضو اتاخدت
فيدو طيبة قوى
لطيفة قوى
و اتمنى المرة دى تبقى اول خطوة و بعدها متبطلش تيجى
كل مرة هنتلم فيها ان شاء الله
كل سنة و انتى طيبة يا حفيدة عرابى
بجد انتى حد جميل قوى



تالت عنقود بقى ف شجرة البراءة
البت كركبة دماغ
يا لهوووووى ..انا معرفتهاش لما قربت تسلم عليا
يا خرااااااشى
ايه يا اخواتى البنات الرقيقة البسكوتات دول
دحنا كنا غفر بقى
انا حصلى اندهاشة مريعة
لأنها على مدونتها اخر شقاوة و دوشة و مكركبة الدنيا
لكن ف الواقع الفعلى ..كسوووفة جدا
و وشها ف الارض علطول و لازم الواحد ينكشها
بس لما داليا و ساجى قعدوا يعدوا الفلوس
ساهمت معاهم و وزعت ف الاظرف
اخوها كان معاها .. شرفنا برضو
و ابقوا فكرونى نعزمها ف اللوكاء الحريمى
عشان نعلمها شوية اجرام
تواجه بيها الحياة... مينفعش كدا !!


اتخايلت برامى صاحب مدونة بابى
واقف برا الاوضة اللى كنا فيها
انا عرفته من صورته ..هوه يا ناس
طلعت اسلم عليه
كان بيقول انه صعب ييجى عشان سفره بعيد
بس كان قلبى حاسس انه مش هيفوت يوم زى دا
و فعلا ..احساسى صدق
و رغم انى لحد البورصة معرفتش اتكلم معاه كفاية
بس تصرفاته و ذوقه كانوا ظاهرين
انا قولت عليه ر ر يا ناس
يعنى رامى رقيق القلب
و هذه حقيقة بالفعل
ميرسى على هديتك ليوسف يا ر ر
مهما حاولت اشكرك مش هعرف
و بكرة يرجع صاحب الهدية و يشكرك بنفسه  اكيد


ريم رقيقة الرقيقات كان مفرهدة قوى م الحر
و ساكتة اغلب الوقت صحيح بس الفرحة ف عيونها
سواء اتكلمت و لا لأ ..كانت مبسوطة انها وسطنا
كنت حاسة بكدا فعلا



البت كيكى عووووو
خسيتى
خسيتى
خسيتى
يا بت يا شقاوة
و كالعادة خفة دمها و قفشاتها سبقاها
بيطرية و مش بإيدى جبتلها شكولاتة عشان
تبوظ الريجيم اللى معذبنا كلنا دا
و عقبال كل سنة لما نقولك خسيتى يا كيكى
و السنة الجاية مش هيبقى الدالى بقى
هيبقى الجزء الرابع
و مشيها ليالى الحلمية


العصفورة الصغيورة شيماء سمير جت
و لما شافت بابا ابو خالد و الصحبة الطيبة كلمت جوزها
محمود عشان تستأذنه يفطروا معانا
العصفور الطيب قال ..طيب
جت شيماء و جوزها الفطار
الله
حلوة قوى كلمة جوزها دى
انتوا نورتونا يا مشموشتى و زودتونا
و السنة الجاية تحضروا معانا الفطار تلت تنفار
لما البيبى يبقى ف حضنك و تقعدى تاكلى انتى و محمود
و تسيبهولى انا و ملكيش دعوة
يلا فرحونا اكتر منتوا مفرحينا يا حبيبتى


البت الخيخة بعد عوتها من الأراضى الأردوغانية
لسه زى ما هيا برضو
طبق الأصل من الخيخنة الخوخية المستخيخة
لا قلم ناقص و لا قلم زايد
يعنى جاية متأخرة شوية بس معاها مبالغ محترمة زودت الحصيلة
و ما زالت خيخة امدم خفيف
ما زالت جدعة و بميت راجل
و ما زالت ندلة وقت الاكل متعرفناش
بس ما زالت اخلاق اتنازلتى عن كرسيها عشان اقعد ع الحرف
و ما زالت ديموقراطية و لما قولنا الحسين مينفعش
و البورصة افضل مرضتش تخرج عن المجموع
و ما زالت البت الخيخة اللى الكل بيسأل عنها
و ناس جت عشان تشوفها مخصوص
كل يوم خير يا خوختى و انتى جزء اصيل فيه



محمود الدوح براءة الاطفال ف عينيه
انطباعات الناس عنك كلها خير يا واااااد

بورسعيد دايما خيرها هالل علينا متمثل ف ايناس
نهر الحب و نسمة اختها و كان معاهم البركة كلها
مامتهم ربنا يديها الصحة
و الاخ عبد الحميد
و يا جماعة كل مرة بتحرجونا
بالأصالة البورسعيدى دى
ربنا مايقطعلكم عادة ابدا

شفقة و احسان
جوز العصافير بتوعنا دول
ربنا يحرسهم و يخليهم لبعض
ع البورصة طلبوا فانتا تفاح و العيااااااذ بالله
انا شنعت عليهم و قولتلهم ف رومضان الحاجات دى ؟؟


بيطرية و مش بإيدى
كانت ملازمة حفيدة عرابى اغلب الوقت
بس محدش شافها الا و أبدى اعجابه الشديد
بلطفها و ذوقها و ضحكتها و وشها المبتسم



أحمد سكر
كان معروف مسبقا انه من اوائل الحاضرين ف ايام زى دى
و عشان كدا لما دخل و قال سلامو عليكو
شكله مكنش مستغرب و هوه شايل ييجى عشرميت شنطة
مليانة حاجات للأطفال غير اللى خرج يجيبها من شنطة العربية
و دايما سباق للخير يا سكررررر



اتنين حسيتهم وجهين لعملة واحدة
اسمها المحبة و الرقة
منونا و كيـــارا
ايه دا ؟
يخربيت كدا بجد اهتمام و مودة و مشاركة
بهمة و حماس
و من غير ما حد يطلب منهم اى حاجة
تلاقيهم بيسالوا نعمل ايه و نشارك ازاى
حظى كان حلو قعدت ارغى مع كيارا
قبل الشعب البلوجرى ما ييجى
بس للأسف منونا معرفتش
معلشى يا قمورتى المهم اننا شوفنا بعض
عقبال كل مرة يا بنات


الاستاذ شريف ...شيرين الكردى
هقولها كل مرة و لن اكل أو امل
الشياكة تتجسد ف هذا الرجل عن حق



البت دعاء مواجهات إحلوت قوى
و وشها نور أكتر ما هوه منور
و لازم ادعبس و اعرف السبب



وليد الدوغرى بقى
مش محتاج اقوله اى حاجة
هوه عارف غلاوته عندى و عند الناس كلها
و عاوزين نفرح بيك يااااض
خ ل ص ن ا

اما مصطفى ريان ..فالطيابة ذاتها
و المشاركة اللى م القلب ف الأيام دى
و الفرحة الكبيرة اللى طالة من عينه
و سبقاها محبة اكبر
كل سنة و انتا معانا يا صفصف


سامح عزت جه يا جماعة
خواطر خاطر زى ما بندهله دايما ... يا خاطر
فرحت لما شوفته
فيييين من ابو الريش رمضان اللى فات
لما شوفناه آخر مرة
البت خيخة لما عرفت انه اتجوز و انشغل
ادته واحدة خيخية معتبرة نظام ..تستاااااااااهل
خاطر م الناس اللى فطرت ع الواقف
و متاخر عشان كان بيشارك خالد حركات الجدعنة
عقبال ما نوقفلك ف فرح عيالك يا بنى


من الجدعان برضو كريم شاب فقرى
اللى كان جاى المستشفى و هيمشى لأنه تعبان
و معدته معذباه
لكن قرر يكمل اليوم معانا
و ساعد ف توزيع الاكل و قعدنا ندورله على شوربة
عشان تدقى معدته التعبانة
و بطل سجاير يا كريم و كول كويس يا جدع
ايه يا خواتى الشباب المهمل ف صحته دا
انتا نورت اليوم يا كريم بجد
و منتاش فقرى خالص يا شيخ



رودى بنوتة مصرية ام نور القمر
هلت من بعد غياب طوييييل
جت و معاها بنت اخو جوزها دعاء ..شخصية لطيفة قوى
رودى كأنها مغبتش لحظة
كانت جايبة لبس للعيال و قعدت توزع ف الشنط الحاجة
و اتدبست بعد ما خلصنا فطار
ف لم الحساب من المدونين
بس وقفت وقفة حريم رجالة و كله تمام
عقبال كل سنة و احنا متجمعين ف الخير يا رودى

ساجى كعادتها
فاكهة اليوم و كلها حسم و خفة دم و شقاوة
و قولوا كل حاجة ف وصف حريم اسكندرية الجدعات
من اول لحظة دخولها المستشفى لحد المرواح
و هيا شعلة نشاط و تنظيم و حماس
كنت فرحانة انى هشوفه
و لما نعمل لوكاء حريمى تعالى يا ساجى
و النبى قعدتك حلوة يا اوختشى



فيه ناس حلوة جت ع الفطار علطول
زى نور الدين و همس مفروسة اند متغاظة
و ناس جت بعد الفطار زى الغالى احمد سوووو
و زيكا العزيز و احمد الصباغ عمدة التدوين
و محمد كمال كيمو صوت من مصر
و ناس تانية اكيد انا مش عارفة اساميهم
و كنت بطلت اكتب بقى عشان قاعدة
بشرب النسكافيه بتاعى يتبعه السحلب المعتبر
بتاع الاخ ابراهيم المخبر


فيه مجموعة كنت بشوفها النهاردة لأول مرة
زى مصطفى ابو زيد صاحب مدونة
تحت الياسمينا
حد محترم قوى .... اتشرفنا بيه



ناس كمان لأول مرة تيجى خالص
زى مروة جابر
شخصية طيبة قوى
كمان بنوتة اسمها بسنت هادية و حبوبة
يا ريت لو قرت البوست تدخل تعلق
عشان يبقى عندى لينكها


و ناس عرفت بالحدث من على الفيسبوك
زى ريهام و نبوية وآية و شيماء
اربع بنات قمرات زى الفل بصراحة و حاجة تفرح
كانوا مكسوفين قوى ف الاول
بس لما قعدوا شوية و شجعناهم
قرروا يحضروا معانا الفطار
كانوا جايين متحمسين شايلين شنط ادوية و هدوم
و رغم انهم مبيدخلوش مدونات
و لا يعرفونا اصلا احنا مين
لكن حبهم للخير سبقهم
و اتمنى نكون عند حسن ظنهم
اصل ربنا بيسخر ناس لناس
عشان ينفعوا ناس تالتة خالص
و قولنا اللى يحبه ربه ..و الحمدلله



كمان جه طارق بوكيه ورد
و احمد و ناس تانية
و اسفة لأنى مش متذكرة الأسامى كويس
احنا عدينا الخمسين نفر فمتزعلوش منى



اللى كانت فرصتى حلوة عشان اعرفها عن قرب
sony2000
بنت زى العسل و آخر شقاوة
كانت فرحانة زى طفلة صغيرة و بتتنطط زى فراشة
بجد فرحانة بإنى شوفتك يا سنسن


فرحانة انى شوفتكم كلكم يا عيااااال



ضياء بيتوفل مايند
هوه انا لسه هدور على كلام يا ضيا
انتا عارف غلاوتك

و صحيح انتا اخويا الصغير سناً
بس بحسك اخويا الكبير
عقلا و ادبا و احتراما و كل حاجة

ربنا عالم و مش لازم احكى


amr
نفس المحبة و الغلاوة
و عسقول عسقلانى ابو العساقيل
اللى وزع علينا شكلاتة
و كل واحد فينا عاش معاها طفولته



وبمونسبة الشكلاتة رامى كمان
وزع علينا شكلاتة كادبورى
آهو و الله العظيم
غير خيخة اللى فرقت عسلية حجم عائلى
اول مرة اشوفه ف حياتى اللى قربت ع الأربعين
و مش عاوزين غيظ و نق و قر و حسد
اللى عاوز يتروق كدا ..ييجى اللقاءات
و متقعدوش تبصولنا ف اللقمة بقى
دى أصلها أرزااااااااااق



الغائبون لكن حاضرون
كتير بصراحة
اولهم آبى هانم بتنجانى
من ارض الكويت الشكيك
السنة الجاية تكونى معانا يا بيبى
انتى و زوجوكى و آبى الصغننة
و راكنة الخرفان البمبى على باب المستشفى
و اياك حد يكلمها لنطلعله برعى بالمفك طوالى
وحشتينا و امبارح جبنا سيرتك بالخير
زمانك شرقتى و حكيتى و عطستى و كله



غايبة و حاضرة ف القلب
د. ستيتة حسب الله الحمش
ستوتة حبيبة الكل
و اللى سأل عنها جمع غفيييييير من البشر
و لفيف من الأساتذة
كنتى معانا برضو يا ستوتى



وليد كنج توت راعى الملك الطيب
و بوبو هبة حبيبته و ام عمر بيكا
ليكم وحشة و امتى بقى هترجعوا تشاركوا
ف الأيام دى بالدفا اللى ف قلوبكم
و بيغمرنا كلنا معاكو؟!


ميرا وومن مقدرتش تيجى

لكن حاضرة ف القلب
و ام بتول كلمتنا عشان معاها حاجات
بس ملحقتناش
و منفعش تحضر عشان عندها ضيوف ع الفطار
و مكنش ينفع تعتذر اكيد



كان نفسى قوى بسكوتة تيجى
بس وجود عادل كان فيه بعض العزاء
و رمضان الجاى تكونى معايا يا عيون مامى



المطعم اكله نضيف و حلو و اسعاره كويسة
اغلبنا مقدرش يكمل الوجبة كلها من كترها و جودتها
الخدمة ممتازة مقارنة بالعدد الزيادة
اللى روحنالهم بيه
العيب الوحيد كان الحر بس
غير كدا الاختيار كان موفق جدا
و ممتاز و قريب و كله




مروة زهرة الجنة جت المستشفى
و نيتها تحضر اليوم لآخره

لكن قبل الفطار جالها خبر وفاة اعز صديقاتها
و اضطرت تمشى و رجعت تانى بس
عشان تقول لخالد اسفة معلش
ربنا يصبر قلبك يا مروة
و يجعلها آخر أحزانك يا حبيبتى



ناس كتييييير شاركت من بعيد مادياً و معنويا
هما عارفين نفسهم
و جزاهم الله خيرا


و ناس كمان حلوة غابت عن اليوم دا
لظروف البعد و المسافات و الأنشغال
لكن حرصوا يتكلموا و يقولوا كان نفسنا نكون معاكم
زى
احمد سعيد عنبر العقلاء
دودو عاشقة الرومانسية
حنين القلب ام عمر
مارو قلب القطة و ميرهان بنتها العسولة
علا صيدلانية طالعة نازلة
الحب الجميل
محمود رئيس جمهورية نفسى
محاسن صابر
حنان الشافعى رياح الحنين
ام بتول
غادة محسن



و ناس بعتت السلام الكبير
زى محمد غالية الغالى


مش عاوزة انسى حد
و اللى هيسقط سهوا يسامحنى
انا الزهايمر شغال عند الله ينور
و كويس ان لسه فيه حاجة بتنور ف الأيام الضلمة
اللى ما يعلم بيها الا ربنا دى


و بمناسبة النور فنا خليتهم للآخررررررر
عشان يمكن اكون جمعت كلمتين
اعرف اقولهم
عن العالم الحلوة دى اللى ربنا كرمنى بمعرفتهم
مش لاقية كلام غير انى بس هنطق
بالجملتين السحريتين اللى بيفتحوا القلوب المقفولة
و يحركوا ناس و يجبوهم بالمشوار من البعد
و يخلوا مهمة شاقة تبدو اسهل من السهولة

الجملتين دول هما

داليا قوس قزح وش الخير
خالد همس الاحباب شهامة و جدعنة الدنيا


الأتنين دول اسمهم يأتى مقترن بكلمة تالتة
هيا ...الخير
فتلاقى ربنا مسهلها و مييسرها
و القلوب اتجمعت حواليهم ف لمح البصر


و احنا رايحين ع البورصة كنا بنرغى و نقول
ان العدد كان كبير ما شاء الله
رغم ان الدعاية مكنتش كافية قوى قبلها
كان ليا رأى مختلف شوية
ان فطار رمضان و الخير اللى بيسبقه بقى تمام تماما
زى يوم عيد و مناسبة معلومة
الكل بيستناها و يسأل عنها قبل رمضان ما يهل
خلاص مبقاش حد محتاج يسأل هتعملوا ايه ؟
اكتر ما محتاج يسأل
امتى و فين و نيجى ازاى
و هنفطر فين بعدها ؟
اليوم دا بقى له مشجعينه
و مشاركينه
و مريدينه
واحبابه
و قلوبه
و عصافيره


و كلمة السر
داليا
و خالد



عقبال كل سنة
متجمعين ف الخير
و كل سنة و انا معاكو
فرحانة انى منكم
و فخورة انى وسطكم
فطرانة معاكم
و متونسة بصحبتكم
و مدلعة على حسكم
و يوسف متدفى بدعواتكم
و كل رمضان و انتوا طيبين اكتر و اكتر
يا احلى صحبة و ناس و عالم

---------------------






شوية ملاحيظ ع الهامش

(1)
انا عيدت كتابة البوست من تانى
عشان القديم مكنش واضح
و الذى تسول اليه نفسوياته
و يتصور انى بعد كتابة
هذوها البوست الميطيول

و اعادته هيبقى عندى
صحة و نفس ارد ع التعليقات
يبقى حرام عليييييه


(2)
الغنوة اللى مع البوست
الحالية اهداء لوليد 
عارفة ..مش عارف ليه ؟
المرة الجاية يكون معانا 


(3)
اللى نسيت اقول اسمه
ميزعلش منى
احيااااة اغلى الناس عليه



(4)
تم الأتفاق مبدئياً
مع البت خوخة على عمل
لوكاء حريماتى
بعد العيد ان شاء الله


(5)
الجماعة ف بورسعيد
عندهم مناسبة
يوم الجمعة الجاى
التفاصيل هتكون
عند نهر الحب ف مدونتها


(6)

لما ربنا يأذن
السفرية الجاية هتكون
اسكنكرية الماريا
بس نكون قبضنا بقى
عشان منرجعش مشى

(7)
بحبكم يا عيال
و الله العظيم






شكرا أهل الخير همس ... الاحباب
حدث فى رمضان
خواطر شابة تعيش مع الأخرين

بمبى بمبى بمبىىىىىىى
كيـــارا عالم مولان

لقاء تدوينى متميز + زيارة ابو الريش
كريم يوميات شاب فقرى

يوم الخيييييير.... sony2000
بكل الحب .... كـــركبة دمــــــاغ
بصراحة الخير حلو و اصحابه أحلى
وندا  .... سواحة فى الكون

غيت و جيت ... حد حس بحاجة
همس مفروسة اند متغاظة

تعاطف و حب و ضحك فين .... فى ابو الريش:)
رامى ..... بابى

ذرة سكر كنا بالحب اتجمعنا .. منونا
أخيرا اتحقق .... بيطرية و مش بإيدى
إخواتى و إخوانى فى الله ... الحب الجميل

أبو الريش و الحقيقة المرة  .. شمس النهار 
عن اللقاء بالصور .. كيمو صوت من مصر 
لقاء الخير لقاء المدونين .. سامح خواطر خاطر


-------------------------------------
عن ايام ابو الريش السابقات

دوس هنا
 ------------------------------------------------







This entry was posted on الأربعاء, سبتمبر 01, 2010 and is filed under . You can leave a response and follow any responses to this entry through the .

55 كــــلام بيطــبطـــب عـــلى قــــلبى و روحــــى

اييييييييييه

انا قولت مش هرد ع التعليقات

مقولتش مش هعلق

ايه بقى



انا اسفة جداااااااا
عشان البوست بتاع امبارح كان سيىء و النبى مش غلطتى البلوجر اللهى يجيله و يحط عليه هوه السبب


انا عدت البوست من اول و جديد
و حد فيكم يا غجر كان زعلانى منى امبارح
و بصلى ف البوست
مش تخليكو حلوين كدا
و قلبكوا ابيض ؟!


المهم
اللى كاتبلى تعليقات
اتمسحت مع البوست القديم
اسفة يا داليا
و يا محمد غالية
و يا ن ون
و مش فاكرة مين تانى



البوست دا مش طاله ف الريديرات
هدعى ع البلوجر تانى دلوقتى
و لا أستنى بعد الفطار ؟!!!

استنى احسن



عاوزة اعلق عندكم
و لك حد كتب و هيكتب بوست عن اليوم
بس طولوا بالكوا معايا
إننننننن الله مع الصابرين
انام شوية و اتعالج م الحول بسبب القعدة قصاد الجهاز لساعات



انا مروحتش الشغل النهاردة
و خدت اجازة
و مفيش صباحات
معلشى




يا رب يكون البوست دا واضح
و مفيهوش لخبطة
و باين


كل سنة و انتوا طيبين


بس كدا

وانا كماااااااااان مش رحت الشغل

بصراحه يافاتي اليوم مهما نوصف فيه مش هنقدر نقول اي وصف يوصفه

يااااااااارب يدميها علينا


بحبك اووووووووووووووووووووووي

وبحب الناس كلهاااااااااااااااااااااااااااا


وبجد انا بعتبر اليوم دا اسمه

" عملية غسيل قلب "

وانتي طيبة يا ممتي
وربنا يجازيكم خير ان شاء الله :)

انا بقى طلعت ناصحة و اخدت كوبى من التعليق لما لاقيته مخرف
و تعليقى اهو و لا تزعلى


صباحك سكر يا طمطم
بصى يا ستى
الصورة بتاعت العصافير تحففففففة

و البوست الفونت بتاعه على ie عبارة عن علب هدايا ههههههههههههههههه

مين اللى حضروا الفوانيس ؟ انتى مكسوفة تقولى انك اللى عملتى الفوانيس و حضرتها و اشتريتى حاجات الولاد تلزقها عليها و تلونها ؟ انا ذهلت من كمية الفوانيس اللى اكيد اكيد ضهرك اتقضم و انتى بتقصى و توضبى فيها
بس الفرحة فى عيون الاطفال بالفوانيس تخلى اى حد ينسى اى تعب جزاكى الله كا خير يا احن ام

انا نسيت اقولك ان المحصلة بتاعت التبرعات كانت قربت على 9000 بس احنا اخدنا منهم حوالى الف و شوية اشترينا بها جرعة فيجام لطفل مرض و للاسف هو لسه محتاج 3 جرعات تانين

ده لينك بسينت
http://justlittleideas.blogspot.com/

صاحب بوكيه ورد اسمه محمد

طارق صاحب مدونة هتشوفوا
وده اللينك بتاعها
http://hatshofo.blogspot.com/

ايه تانى اممم

اه
انا فرحانة اوى باليوم ده :)))
ربنا ما يقطع لنا عادة

ليه اتاخدتى ياطمطم
علشان الهجوم المباغت عليكى:)
الحمد لله ان ربنا قدر لى انى اكون موجوده فى يوم من الايام الجميلة دى
ربنا يديمها ويتقبل جهدكم وحماسكم

انا كمان استغربت من حكاية الفوانيس
وحسيت انك اكيد ليكى دور فيها

اضافة صغننة
بيطرية تبقى بنت خالتى واستلمتها بورق رسمى وامضاءات وختم النسر وايصالات امانه
علشان كده كنا ملازمين بعض
دى عهدة مش أى كلام:)

فرحانه لفرحتكم
ربنا ميقطع لكم عاده
ودايما متجمعين فى الخير يارب


سيبى البوست كله بقى وتعالى ركزى على الملحوسه
رقم 6

لما ربنا يأذن
السفرية الجاية هتكون
اسكنكرية الماريا
بس نكون قبضنا بقى
عشان منرجعش مشى

أأمرى انتى بس وجهزى لليوم وباذن الله هيكون يوم تحفففففففففه
واللى اتفقنا عليه ماشى ياست الكل
بحبك جداااااااااااا

تعليقات ايه يا ماما اللى تردى عليها

اساسا انا مش فاهم انتى كتبتى الكلام ده كله ازاى؟!
ربنا يديكى الصحه.

عموما ، ربنا يتقبل منكم ان شاء الله عملكم فى مستشفى ابو الريش.
وكنت اتمنى ابقى معاكم على الاقل فى المستشفى ، بس زى ما انا اتصلت وشرحت لخالد عن وضعى ، بس تتعوض ان شاء رب العباد قريب جداً ، حتى اتشرف بمعرفة الكثير من القلوب التى بدأ القلب لرأياها.

بوجه عام كل سنه وانتوا طيبين ، وانا اقترحت على خالد فكره كده ، اتمنى لو ينفع تتنفذ .لعلها تبقى نواة خير مستمره على مدى اجيال كتيره.


كل سنه وانتى والجميع طيب وبخير.

مااااااااااااااااااااااامي
فرحت اني سمعت صوتك
وحشتيني قوي
بسم الله ما شاء الل هالخير علي ايديكم كتير
انا قعدت احكي لكل الناس اللي اعرفها عاليوم ده وانا حاسه اني كنت معاكم واكتر
بجد اكتر حاجه زعلتني اني مجتش
وان شاء الله هحاول السنه الجايه اجي وابات عندكم كمان عشان احضر اليوم من اوله لاخره
:))
ربنا يجعل الخير ديما علي ايديكم وحواليكم ياااااااااااااااارب

كل تجمع وافطار وعمل خير وانتى طيبه
انا بجد غرت قوى لما قريت احداث اليوم الجميل وكان نفسى بجد اكون معاكم
يارب يارب يمنع الموانع واكون معاكم السنه الجايه باذنك يارب
ربنا يجازى كل من عمل خير فى هذا اليوم الحافل

رمضان كريم

آه
أنا من اللي ضاعت تعليقاتهم في البوست التاني اللي اتمسح
معلش
نعلق تاني

بجد أنا سعيد جدا لأني دايما بآجي هنا ألاقي نشرة الأخبار التفصيلية لأي تجمع ولأي حدث .. أنا قلت مافيش غير مدونة فاتيما اللي هلاقي فيها كل حاجة

:-)

ربنا يقدركوا كمان وكمان وعقبال كل سنة ان شاء الله

اتشرفت بيكم و الله العظيم .. كنت سعيد جدا مفيش احسن من عمل الخير و الصحبة الحلوه

حصلي ظرف غريب و اضطريت امشي ع الفطار .. تتعوض قريب ان شاء الله

جزاكم الله خير

البوست ده نزززززل امتىىىىىىىىىىىى


انا من الصبح وانا عماله اجي وادور علييييييييييه

واقول ايه ده هو في فرق توقيت بينا كده ولا ايه

ومش جايلي قلب انزل بوست قبل منك

مش لاقيه ولا كلمه تتقال بجد

غير انك سكر اوي اوي اوي

وان انا بحبك جداااااااااااااااااا

جدا جدا جدا جدا جدا بجد

والله العظيم فرحتي وانبساطي اني شوفتك ما يتوصفش بكلام الدنيا كله

بحبك بحبك بحبك

وكلامك ده بجد كتير عليا اوي

انا كنت رخمممه جداً مع معظم الناس اذا ماكنش الكل

بس انا مكسوفه من نفسي قوي اني كنت بالشكل ده

وناوييه اجي اكتر عدد ممكن من اللقاءات اذا الظروف سمحت ان شاء الله عشان احسن الصورة

حقيقي انا مش عارفه كان في ايه

حاسه ان لساني اتربط وما بقتش اعرف اقول حاجه

مع اني كنت قمة السعادة والانبساط بس حسيت ان لساني اتشل عن الكلام واني مش عارفه اقول حاجه

ولا عارفه اوصف اني فرحانه باني كنت معاكم وشفتكم

بجد يوم من اجمل ايام العمر

واتشرفت بكل الناس اللي كانت موجوده فعلا

انا بحبك

وبحبهم

وبحبكم كلكم بجد

ومش لاقيه حاجه اقولها والله غير الكلمه دي

اللهم لا حسد علي الزاكره الحاضره جداا بالتفاصيل المفصله لكل حد
بس بجد يا فاتيما اليوم كان جميل بيكي وبضحكاتك الجميله وبروحكه اللي بتحبب اي حد فيكي وبمساهماتك الجميله في نجاح اللقاءات دي ..
بصراحه انا بخسر كتير لما افوت لقاء بس ان شاء الله اول واخر مره

الناس الجميله دي كلها حاستها اكتر من اخواتي ارتحت في الكلام معاكم وشوفتكم بعد طول غيبه عن عالم التدوين من اساسه

يارب يا ام يوسف المره اللي جايه اجي اشوف ابنك يوسف في حضنك وميبعدش عنك ابداا

فاتيما
ربنا يحفظك ويعزك ويخليكى لينا
ومازالتى اكتر حد عاملنى كويس من يوم ما بدات تدوين
ربنا يقدرك على فعل الخير يارب
واكتر حد كويس او طيب او نور اللقاء دا
اكيد انتى يا اطيب قلب
تحياتى واحتراماتى الدائمة لك :)
انا بحاول ابطل سجاير اهوه وربنا يسهل
والاكل بقيت باكل
نفسى اتفتحت عالحياة من ساعه اللقاء
ناقص بس شوية حاجات وكل حاجة تبقى تمام :)
ادعيلى يا فاتيما :)
كريم الفقرى

بنت خالي العزيزه

ههههههههههههههههههههههههههه

بقي يتمسحلك مواضيع يا بطوط اي بوست ليكي بتكتبيه التاريخ سيتذكره بشيء من العزه وكثير من الأحترام وسوف تتلقفه الاجيال القادمه كنوع من الكوميديا الاجتماعيه
ههههههههههههههه

اليوم كان حلو وانتي بتنوري اي مكان تكوني فيه
ويارب السنه الجايه يكون يوسف معاكي ومعانا وربنا يفرح قلبك ويسترك دنيا واخره يا فاطمه

فاتيما
انا حبيتك من حب الناس ليكى ^^
باين عليكى شخصية جميلة خالص
بس انا زحلانة اوى
هوا انا كل اما ادخل مدونة الاقى الناس كلها بتتكلم عن موضوع المستشفى ده
غظتونى اوى كنت عاوزة اكون معاكو :( صحيح انا لسه جديدة ومش عارفة حد بس اكيد كنت هستمتع بعمل الخير وانى اتعرف على ناس سكر زيكو كده لو فى حاجة تانية عرفووووووووونى

جزاكم الله خير
وجعله في ميزان حسناتكم
ربنا يتقبل منكم
ويرزقكم الاخلاص
ويعينكم علي الحب فيه يارب

كنت عارفة أنى هازعل أكتر بعد ما أقراء البوست بتاعك ، زعلت أنى كنت محرومه من أنى اشارك فى الخير فى اليوم دة ، لكن فرحت قوى لما لقيت أن الدائرة كبرت و أتسعت ، وبقى ليها صحبة جميلة ، بشبهها بالسبحة الى بنسبح بيها ربنا بعد الصلاة ، ماهو عمل الخير بردوا تسبيح لله عز وجل و شكر ليه على نعمه علينا ، يعنى نرد الخير الكتير الى ربنا مديه لنا بجزء بسيط منا ، ربنا يتقبل منكم دايما صالح الأعمال ، و إن شاء الله لو فى فى العمر بقيه السنة الجاية مش هافوت اليوم دة مهما كانت الظروف ، أول حاجة أنشاء الله هاخده أجازة من الشغل ، ومش هايكون فى أى عزومات اليوم دة مهما يكون .
المحروم من المشاركة فى اليوم بيحس أنه فاته كتير قوى قوى , كل سنة و انت كلكم بخير و ربنا يزيدكم دايما . شكرا فاتيما على التقرير الممتع الجذاب و اعتقد أنك ما نسيتى حد من الموجودين ، ربنا يبارك فيك أنت وداليا وش الخير وقم الخير ودايما يارب الخير يكون فى ركابها زى ما بيقولوا يعنى اينما حلت يحل معها الخير كله ، خالد ربنا يبارك فيك و يبارك فى أولادك و أكيد الخير الى أنت بتعمله ربنا بيجعل لك منه نصيب كبير .

صباح الخير يا فاتيما
أولاً: جزاكم الله كل الخير يارب ودايما سابقين لفعل الخير
ثانياً:طبعا كنت هتجن أنى مش مع الصحبه الطيبه اللى قلوبها مليها كل خير
بس برضوا فرحانه لفرحكم ونجاح اليوم وكل سنه ان شاء الله يكون يوم متميز وناجح بأذن الله

ثالثا : مبسوطه لعصافير الجنه أنكم دخلتكم الفرحة فى قلوبهم ورسمتم البسمة على قلوبهم ربنا يشفيهم يارب

رابعا : مبسووووووطه انى سمعت صوتك وصوت منونه وداليا قوس قزح وطبعا أ. خالد أبو همس الجدع ورامى الطيب

خامسا :(4)
تم الأتفاق مبدئياً
مع البت خوخة على عمل
لوكاء حريماتى
بعد العيد ان شاء الله
معااااكم فيه أن شاء الله

سادسا :هستنى لقاء اسكندريه بفارغ الصبرررر ويارب أكون كويسه لأنى متلغبطة صحيا اليومين دول والحمد لله بس برضوا لو دخلت مستشفى ههرب منها وأجى لكم
ههههههههههه
أدعيلى ونبى يا أختى
ربنا يسعدك يارب ويكون يوسف فى حضنك عن قريب
قولى يارب اللى مفيش أحسن منه
دمتى بأحلى صُحبة

كل سنه وانتى طيبه يافاتيما ورمضان
كريم عليكى وعلى كل احبابك
وحشتينى جدا
ولما سمعت عن اليوم من حفيده عرابى
ودلوقتى قريت وصفك الجميل له
كل اللى كنت اتمناه انى ابقى معاكم
ربنا يقدركم دايما على الخير

تحياتى وحبى لكى ياطمطومه

لالالالا كدا مش هاقدر اكمل لاخر النهار هافرفر منكم والله
روحت عند منونه اتفلقت من العياط جيت هنا اتفلقت من العياط

لالالالالالالالالالالالالالا مش هاقدر الكمل البوستات

هاعلق بعد الفاصل

يووووووو قصدى الفطار هريتينى

السلام عليكم يا فاتيما
يا أحن أم انا مش عارفه انتى قريتى تعليقى عليكى ولا لأ بس يا ستى انا عارفاكى وعارفه يوسف بنا يحميه ويخليهولك من كتاب انا انثى
انا سعدت فعلا بمعرفتك السريعه جدا
يعنى انا ما كنت اعرف حد من الحاضرين حتى داليا اول مره اشوفها وادخل عندها المدونه بس اعرفها من الفيس بوك
وكل الناس الجميله اللى اتكلمتى عنهم كدا عرفت كل الاسامى فاضل نعيد اليوم من تانى بقى علشان اعرفهم فردا فردا
وفى انتظار الوكاءات الحريمى القادمه لازم تبلغينى بالميعاد قبلها بفتره
وشكرا يا فاتيما على روحك الجميله
وحقيقى انا كنت حاسه ان الوجوه كلها مش غريبه عليا بس فى الحقيقه بعد اللقاء دا اكتسبت مدونات صديقه كتير
اكيد هيكون فى تواصل مستمر مستقبلا ان شاء الله
وكل رمضان وانتى صاحبه الخير كله
وسلامى ليوسف

كل سنه وانتى طيبه يا فاتيما بجد التجمع من غيرك كان هيبقى ناقصه حاجه كبيره اوى ....انا عاجز عن كتابة اى حاجه غير ميرسى على وجودك ... كل سنه وانتى طيبه

فاتيما

مامت يوسف العزيزة جدا جدا على قلوبنا كلنا

مش عارف أقول ايه الصراحة

كلامك كتير عليا بأمانة انا اللى فرحت جدا لما شفتك بجد

و متشكرنيش ع حاجة خالص بجد دى حاجة بسيطة جدا

و بأذن الله السنة اللى جاية أديله الهدية بنفسى

و بعدين شوفى البوست بتاعى و انت هتحمدى ربنا ع البوست بتاعك (:

و على رأيى المثل

اللى يشوف بوست غيره يظأطط ببوسته

ربنا معاكى يا فاتيما

كنتِ مثال حقيقى يحتذى بيه

ربنا يفرح قلبك دايما يا فاتيما زى ما فرحتينا كلنا

قولى امييييين

انا جيييييييييييت

انا اسفة انى اتاخرت اوى عليكى يا تيما بس انا كنت لسه ماروحتش ولما روحت امبارح
مقدرتش اكتب البوست ولا ارد عند حد خالص كنت مفستكة بقالى شهرين مبرطعة ف البيت وجيت خرجت مرة واحدة وكان تقريبا من يوم ماعرفت الميعاد مش عارفة انام علشان قلقانة هاجى ولا مش هاجى بس الحمد لله جيييييت

ومن فرحتى لما روحت مانمتش :)

تيما انتى بجد حد جميل اوى اوى يا حبيبتى ووالله العظيم اليوم كان حلو اوى باهتمامك وباحتوائك للكل

ومش تقلقى عليا يا قلب منونتك قمورتك انا بخييييير اوى الحمد لله

عايزاكى بس تبقى كويسة اوى

كنت كل شوية احس انى عايزة اشبع منك علشان كده كنت كل شوية بروح احضنك وابوسك :)

زهقتك انا عارفة ف الحر ده ومارحمتكيش :)

بس هاعمل ايه يعنى انا عايزة اخد
تموين لحين ميسرة واشوفك تانى

تيما يارب يفرح قلبك فرحة قد اللى ربنا فرحها بينا وقد ما احنا كلنا فرحنا

تيما يا تيما انا بحبك اوووووى

تيمااااا العسوووله

بجد وحشاااااني أووي
وكان نفسي اشوفك أوي أوي
بس مبسوطه كتير عشان سمعت صوتك
أهي تصبيره لما ربنا يكتبلي وأشوفك في أقرب لقاء يااااااارب

وأنا متأكده إن يومكم حلو عشان قلوبكم حلوه وصافيه ومليانه خير

ربنا يجمعكم ويجمعنا دايما بالخير ياأهل الخير ...

والله بموت فيكم كتييير
وبحبك يافاتيما اووووي

وربنا يسعد قلوبكم ويجازيكم خير اللهم أمييين

تحيه ملونه بقوس قزح لقلبك
^_^

و كمان خليتى البوست بتاعى من ضمن البشوات دول

لالالالالالالالا

دة كتيييييير عليا دة كله (:


شكرا ليكى يا مامت يوسف (:

متجمعين في الخير دائما ان شاء الله

والله ماعرفه اقول ايه
شويه وهدمع اساشا
اهئئئئئئئئئ
عااااااااااااا
بجد موش عرفه اقول ولا اكتب ايه علي كتبتيه:)
ويارب نتقابل تاني كلنا قريب بجد
يااااااااااااااارب

حبيبتى ربنا يخليكى ليا

وشكرا على التهنئة الجميلة هنا وفى مدونتى

بحبك بقى :))

آه يا فاتيما
بجد علي اد ما فرحت علي اد ما زعلت
كان نفسي اكون موجودة
بس بجد دعيت لكم كتييييير جدا جدا جدا
كان معايا رقم داليا قوس قزح واستاذ خالد همس الاحباب بس بصراحة اتكسفت اتكلم وكل ما افتح الموبايل واجيب الرقم اتكسف وارتبك ومش اعرف اتكلم مع اني والله كان نفسي اكلمك اوووي
ربنا يجمعكم علي خير دايما
وانا مستنية اللوكاء الحريمي ده وان شاء الله الظروف تسمح واقدر اجي ...
دعيت لك وبدعيلك كتير بجد انت وخيخة ونفسي اشوفكم تاني علي خير ان شاء الله وانت وكل المدونين والمدونات ...
بس انا اكتشفت شيء مهوووووول جدا ..انت تعرفي دعاء عمرو ...دعاء موجهات زي ما بنقولها ...يا خبر ...دي بقي من اعز صديقاتي وبجد انسانة كتيييييييييير بحبها وتتحب ويارب يكتب لها الخير دايما
يارب يجمعكم علي خير ونتقابل علي خير

تسلمى يا طمطم من كل شر وانا بجد بشكر كل الناس اللى سالت عنى واللى اهتمت تعرف اخبارى واحب اطمنهم من عندك انى زى القرده زى ما انا وكويسه الحمد لله
اما عن الخرفان وابى الصغننه فمضمنش الحقيقه لانها هتطلع زى امها والخروف زى مامته برضه ههههههههههههههه
فى النهايه ربنا يعينكم علينا يا رب وان شاء الله اشوفكم كلكم قريب
ربنا يبارك فيكم يا طمطم ويريح قلبك يا رب ويخليكى نواره وسطنا ويرجع اللى غايب ليكى

السلام عليكم
انا زعلان منك يا فاتيما
عشان ما حدش قال لى على الحكايه دى
انا فوجئت عن اللقاء دا يومها وما كانش فيه فرصه للحضور
بس لما قريت البوست وعرفت ان ابو خالد كان هناك قلت يا خساره
اصلى بكون العجوز الوحيد اللى موجود ولما يكون هناك حد عجوز زى يبقى كان لازم اروح
عموما ربنا يبارك فيكم ويجعله فى ميزان حسناتكم
كل لقاء وانتم بخير
وكل رمضان وانتم بخير
ورمضان كريم
تحياتى

مساء الخير يا فاطيما :)
يارب تكونى بخير يا احن ام فى الدنيا

انا قريت بوستات كتير عن اللقاء دا وكنت فرحانة بنجاح اليوم اووى
ربنا يجمعكوا ع الخير دايما ويجعلكوا سبب فى تخفيف الالم عن الاطفال يارب


مبسوووووطة جداااا بجد انه كان يوم جميل ع الكل
وكان نفسى اكون معاكوا اووى والله :(

ربنا يبارك فيكى
ويجعلوا فى ميزان حسناتكوا يارب

تحياتى :)

جاى متاخر ولكن
بجد شكرا يا اجدع اخت
واليوم من غيرك ولا يسوى

كل سنة وانتي طيبة يا فاتيما يا جميلة وطبعا مش محتاج اقولك انى فرحان قوي انى شوفتك وشوفت كل الناس الحلوة اللي كانت موجودة واللي للاسف ماقدرتش اتكلم مع بعضهم او اتعرف عليهم اكتر لكن ان شاء الله تتعوض يوم قريب تانى
ربنا يسعد قلبك ويصلحلك كل الأحوال

السلام عليكم

ازيك يا ام يوسف

يارب تكوني بخير

كل سنه وانتي طيبه ويوسف طيب وبخير

قوليلي جبتيله فانوس

:)

بجد مش عارف اقول ايه

بصراحه البوست فيه كل التفاصيل

وعرفت منه إن فيه ناس ماكنتش اعرف انها حضرت اللقاء وطبعا هقوم معاهم بالواجب

D:

بجد كلام الناس حلو قوي

ووصف اليوم ما بين الاطفال والخير حلو قوي

خلاني زعلان إني ماجتش

:((

وباقي اليوم ما بين الصحبه الجميله ديه بصراحه خساره بجد

ده غير كلامك ووصفك للناس

ولناس كتير نعرفها وبنحبها فعلا حتي ولو ماشوفنهاش :)

بجد ربنا يكرمكم ويجعل عملكم صدقه جاريه يقربكم من ربنا ويحبب ربنا فيكم وإيانا

شكرا يا ام يوسف علي العرض الجميل ده

ورغم كبر حجم البوست إلا إنه من جمال الناس واليوم كملته للأخر من غير ملل

:)

ربنا ما يقطعلكم عاده

ويارب اقدر بعد كده ابقي معاكم

كل سنه وانتي طيبه

ورمضان كريم عليكي وعلي حبايبك

:)

تحياتي

كل سنه وكلكم طيبين
كل سنه وانتم دايما للخير سباقين

لقاء لذيذ حسيت بيه أوى وكأنى معاكم

جزاكى الله كل خير يا طمطم
على نشر التنويه عن هبة

فاتيما حبيبى قلبي انتى والله
اليوم كان بجد راااائع

اكتر حاجة فرحت بيها كانت المستشفى
فرحت جدا بالناس هناك واول ما دخلت وشفت الفوانيس حسيت بحالة من البهجة الغير عادية
وطبعا واضح اوى انها افكار القمر فاتيما
وفرحت اوى اوى اوى بالناس الكويسين العسولين اللى جايين في يوم حر جداوصايمين علشان يلبو نداء الخير

بجد حاجة تفرح

وانا طبعا زى ما قلتي كنت غلسة جدا ومش بتكلم كتير
وساكتة
ومش عارفه ازاى اتحملتونى

هههههههههههههههههههه
بس كنت مرهقة جدا ومش نمت قبلها بيوم



ومع ذلك كان يوم جميل جدا جدا وشفت فيه ناس سعدت جدا بمعرفتهم لاول مرة

وطبعا انتى عارفه يا فاتيما انا بحب اوى قعدة البورصة وبحس انها مختلفة جدا

واليوم دا كانت القعدة هناك تجنن وسط العدد الجميل دا
كنت ساكته يا فاتيما بس تابعت ضحكحات العيون وابتيامات الرضا مرسومة على الوجوة

بجد كان يوم من الايام اللى مش هنساها في حياتي

ربنا يقدركم على فعلا الخير يارب

فاتيما انتى وداليا والاستاذ خالد

بجد شكرا لكم
تعبتو جدا ومع ذلك كنتو حريصين على راحة كل الناس

وربنا يجمعنا دايما على محبته
ومتجمعين دايما على الخير يارب

وربنا يجازيكم يارب كل خير

وبحبك يا فاتيما جداااااا
واسفه بجد اوى لكي وللكل لانى مش عرفت اقعد مع حد ولا اتكلم كتير

هاتعملو ايه بقى حد قالكم تكون صديقتكم واحدة غلسة زيي كدا ؟؟؟

على فكرة انتى لسا وحشانى جدا جدا ومش عرفت اشبع منك

ربنا يبارك فيكي يارب يافاتيما
وبجد شكرا علي وقوفك معايا يومها
وشوشو كمان اللي مش سابتني علي التليفون

معلش غلست عليكم في اليوم ده
بس تتعوض باذن الله
وديما نتجمع في الخير يارب

الحمد لله
الذى بنعمته تتم الصالحات
ربنا يجازيكى خيرا على مجهودك ووجودك المميز ومشاركتك الفعالة على جميع المستويات
شكراليكى بجد
تحياتى

متجمغين فى الخير دايما قريت البوست كأنى جيت الله ينور يافاطيما

ربنا يجازيك خير
يا ام الخير يا مامت يوسف
انا زعلت لانى مكنتش اعرف
خاصة اننى اليومين دول فى مصر
ربنا يبارك فيكم
ويجعلكم سباقين للخير دائما
على رأى فشكول كنا شلة العواجيز
مع بعض ....خيرها فى غيرها

تحياتى وتقديرى

حبيبت قلبى
روح قلبى انا
مش هقولك
غير بحبك أوى
ونفسى أشوفك بقاااا
بوسات أكتررررر
وحضونات كتيررررررره
من هنا لحد القاهرة
لحد ما أشوفك

بصراحه يا فاتيما
مش عارفه اقول اية على الكمات الجميله الى انت كاتبها عن كل الناس
والى كاتباه عنى ده كثير قوى انا مستهلش كل الوصف الجميل ده - ده انتى انسانه كلك حنيه ولطف

انا بعشق الحنيه لأنى بحسها روح الحياة ومن غيرها نموت

ربنا يكثر حنانك ورقة قلبك

ويارب ابقى رقيقه وحنينه زيك يا سكره

بارك الله فيكي

العزيزة الغاليه و الاخت الحنونه الطيبه اللي بتدفي بودها و قلبها الكبير كل الناس

حينما يسعدني الحظ بقراءة ما تخطه اناملك اشعر بمنتهي السعادة لان مازالت هناك من البشر مخلوقات شفافة لا تعرف غير الحب و الخير ليس بقلبها ذرة من حقد ولا شائبة من غل

البهجة و السعاده هو عنوان لمقالك المستفيض
بهجه لعمل الخير و سعادة بالغه به و بمقابلة الاصدقاء جعلك الله دائما طريقا للخير و جزاك بخطاكي خيراي الدنيا و الاخرة

اشكر لك منك و كرمك بالسؤال عني فنعم الاخت انت

و لك كل الامتنان

تحياتي

كل سنة وأنت طيبة فاتيما

ربنا يخلي لنا مدونتك
ويحفظها ويحفظ بوستاتها

فكرني كل اللي قولتيه
بذكريات السنة اللي فاتت

ومتشكر أووي على الكلمتين دوول
"الغنوة اللى مع البوست
الحالية اهداء لوليد
عارفة ..مش عارف ليه ؟
المرة الجاية يكون معانا"

وإن شاء الله تسمح لي الظروف
بزيارة أخرى لأبو الريش قريبة بإذن الله
في معية الناس الجميلة دي

طمطومة
تسلميلى يا غالية
متحرمش منك حبيبتى
كل لحظة وانتى سعيدة وفرحانة و ماليا علينا البلوجر ونس ومحبة
ذوقك فوق الوصف يا طمطومة
ربنا يفرحك فى احب الامانى عندك
ويردلك يوسف يسكن حضنك وضى عنيكى

:)
بحبك مووووووت

فاتيما مش عارف تنشريه و لا لأ

عارفة يا انا مش عارف اقول أيه الصراحة

اولا انا مكسوف منك جدا اه بأمانة

ثانيا محرج منك جدا

طب ايه الفرق يا عم رامى

مفيش فرق بس مكسوف و خلاص (:

بس أطمنك انا كويس جدا جدا

و كويس بسببك وسبب كل المدونيين المحترمين اللى سألوا عليا

بجد انا كنت هشيل البوست بس هخليه علشان أفتكر ان محاولش حتى افكر فى حاجة تانى زى كده

انا عارف انا هأعمل زى عاطف فى العيال كبرت و هأقر وأعترف (:(:(:

جميله الأغنية (:

دى انا حاططها فى كارت التعريف بتاعى

وكمان عاملها بوست لوحدها (:

فاتيماالغاليه مامت يوسف الغالى

متزعليش منى علشان خاطر ربنا

فطوم
وحشانى جدا
انا لولا انى خلصانة ده نمرة 1 :-((
و بدات الاستعاد للعودة و ده نمرة 2
:-(((((
و مكتومة كتمة الكحك الى لسه مكلتوش من الكلام الى كتبتيه عنى و ده نمرة 3 :-*
انا كنت عملتلك دش تعليقات و انت عارفة :-) مقدرتى التعليقية الى خستعت فى مصر خالص :-))

اولا كل سنة و مواليد سبتمبر طيبين
اصلى منهم :-) بس العيد الميلادى ده بقى سر :-) مينفعش معاه احتفالات خالث

و انا عايدت على سالى حاجات جواليا عندها
بس استغل منبرك و اعيد على كنج توت هنا علشان الاتيكيت يقول نعيد عند اخته ولى :-) كل سنة و ابو عمر طيب و يعيش و يجوز احفاده من عمر

افتكرته اول امبارح لما حطتى شعر على سلامة
فاكرة موضوع كان كتبه اسمه عم ابراهيم مات و انه بكى عليه
و ساعتها علقت انه لازم يشرح لابنه ان الدموع عند الرجال مش عيب و تعبير جسدى للحزن الوقور
الشعر الى كتبه عم سلامة ابلغ شعر عن علاقة الاب باينه
كان ماشى مع مقال الاب الى كانت فى اول الصبحيات

اسكتى مش اتوكست بالاخبار مؤخرا
يعنى لما احمد عز يبقى من الاشراف :-(
و لما السيد البدوى يبقى صيدلى :-(

ايه ده ؟:-) البلد بتشقلب :-)

الا صحيح قولتلك مرسى على المصاصات و لا بلاش لا الناس تغير منى :-)
شريرة مش كده لا و فى رمضان :-))

صحيح
بمناسبة ليلة القدر
انا بسجل دعوتى اهو فى محضر تعليقاتك
ربنا يكرم كل ام فى مولودها و تقر عينها برؤيته و هو ناجح و فرحان بالدنيا و ملتزم برضوان الاخرة
قولى امين :-)

خذ دول علشانك و وزعى الباى على الحبايب الى ممكن تخبط قريب على الباب
يا رب
:-*******************************************************************************************************************************
:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

ربنا يزيد أيامكم سعادة و عمل خير

ماماتى ازيك
انا بجد بحسدكم كدا على اللقاءات الجميله دى
لذلك قررنا نحن من موقعنا هذا ان شاء الله تشاركينا فى مشروع شجعنى شكرا
بجد نفسى انه يتم
تحياتى هستناكى :)

كل سنة وانتى طيبة يا فاتيما
وعيد سعيد عليكى وعلى الاسرة
تقضيه ان شاء الله بمنتهى راحة البال والاطمئنان

الله اسم طارق منك زي العسل يا فاتيما تصدقي اول مره اشوفك فيها يوم ما جيتي المنصورة مش عارف يومها مشفتكيش ازاي احسن مني طبعا وعرفتيني :))

إرسال تعليق