.

.

شــــبه المـــلايــــكة  

Posted by: فاتيما in



(بصوت متنغم بنده عليه)

يوووووووووااااااااااسيييييييف
تعالى هقولك فزورة 
و لو شاطر تحلها ... ماشى؟





(بثقة كبيرة )

ماشى .. هحلها طبعا  







طيب 
لو معانا برتقانة واحدة بس 
و عاوزين نقسمها عليك و عليا 
و على زوزو القطة 
و كل واحد فينا ياخد نص ..نعمل إييييه؟!!



(ببساطة رهيبة والكلام يندفع منه )

نقسمها تلات حتت طبعاااا



لأ  
هيبقوا كل حتة تلت 
مش نص



(يتفاجىء إنه محلهاش .. فيدور على مخرج)

مممممم .. نعملها عصير 
و نوزعها على تلات كوبايات






لأ 
كدا العصير برضو .. هيبقى تلت 
مش نص 





(محاولة للم الليلة بأى خساير و لو يشيلها هوه)

طب تاخدى انتى و زوزو 
النصين
و انا مش عاوز حاجة يا ماما 



لأ 
انتا متعرفش ان من حضر القسمة
فليقتسم ؟!!
لازم تاخد نصيب معانا يا كابتن 





(نظرة يأس واستسلام واضحة ف عينه )

أوماااال ايه بقى 
طب مش عارف  ؟؟





عادى 
نجيب البرتقانية 
و نقعد نعاكسها و نستفز فيها 
و نقولها 
بقى انتى برتقانة إنتى ؟!!
تقولنا طبعاااااااااا
دنا برتقانة و نص 
نروح مقسمينها علينا احنا التلاتة 
بس خلاص




 (نظرة واحد انضحك عليه ) 
انتى بتهزرى
انتى خدعتينى يا ماما


ههههههههه .. أينعممممم
بس خد بالك  
انتا معرفتش تحلها 
و لهذا ...فرمااااااااان ماماتى
انه بعد استفزاز البرتقانية دى 
و تقسيمها و اكلها 
فيه واحدة اسمها الانسة قفاشة 
بعد ما شربت عصير فيه فيتامينات 
هتبقى نشيطة و مجرمة
و عاوزة تزغزغ حد  ضرورى
و مفيش قصادها غيييييرك
واستعد بقى يا بطل 
للحرب العالمية الرابعة .. الطاااااحنة
اللى هتحصل دلوقتى



(لا مبالى لأنه عارف ان قفاشة دى حبيبتنا )

هههههههههه 
عادى و لا الهوااااااا
وانا مستنيها 



مش همك يعنى 
و لا عشان عارف  و متأكد
انها بتحبك ؟





انا كمان بحبها




هه !!
بتحبها .... اكتر منى ؟!!؟





(مخضوض و عاوز يلحق نفسه بسرعة )

لأ  لأ ... انتى اكتر حد ف الدنيا 
بحبه يا ماما 



طب منا عارفة يا سى منص 




(و هوه مستعجب )
عرفتى منين ؟





م الملايكة  طبعااااااا
اصلها بتيجى تزورنى ساعات 
و تقولى ع الأسرار





(استغراب ع الآخر وعاوز يعرف )

قالتلك ايه؟





قالتلى يسوفة ولد جميل 
و مؤدب و متربى 
و قلبه حنين بيحب ماماته 



(سؤال بجد والموضوع بقى مهم)


هيا شكلها ايه الملايكة دى 
انا عاوز اشوفها 



محدش بيشوفها يا حبيبى 
بس بنحس بيهم حوالينا 
من رقتهم مش بيحاولوا يضايقونا 
او يعاكسونا 
او يخبطوا فينا 
طب انت مثلاً عارف ان عندك
اتنين ملاكين بيحبوك قوى 
و قاعدين علطول على كتافك  
بس بشويش عشان متتعبش 
و لا تتخنق منهم؟




(يبص شمال و يمين ..مركز بشدة )

صحيح ..فين دول  ؟






محنا قولنا محدش بيقدر يشوفهم
أصلهم مخلوقين من نور 
واحد اسمه .... خيرو 
و قاعد على كتفك اليمين

و التانى .... شرو 
و قاعد على كتفك الشمال
 
و جوز الملايكة دول 
  كل شغلتهم ف الحياة 
يكتبوا انتا بتعمل ايه
و يوم ما تقابل ربنا ان شاء الله 
هيطلعوا كل اللى حصل ف حياتك
خيره و شره 
و ساعتها تشوف
انهى دفاتره اتقل و اكبر 
خيرو ..و لا سى شرو
و ربنا برحمته .. لما يلاقيك كنت حد كويس 
والخير عنده كان اكتر قووووى م الشر 
فإن شاء الله 
هيكرمك و مش بعيد يقولك
يلا ع الجنة يا يوسف طوالى




(بشغف و لهفة )
طب انا عاوز اعرف شكلهم ايه؟
عندهم جناحات ؟ 



متهيألى يا يوسف 
بص محدش شافهم 
اصلهم ناس مشغولة ع الآخر 
واحد فيهم مشغول بالحاجات الحلوة الكتيييير 
اللى انتا بتعملها
و قاعد يكتب لما ايده وجعته 
و التانى رايح ف النوم خخخخخخ
عشان انتا مبتعملش وحاشات كتير 
و مريحه ع الآخر 
بس ممكن نشغل خيالنا 
و نركبلهم جناحات 
ليه لأ ؟!!




(سؤال يطرح نفسه بعد سماع الحقايق دى)

طب يعنى انا 
ولد كويس ..  يا ماما ؟




جدا يا حبيبى
و نفسى تكون كدا علطول 
طول عمرك 
و مهما كبرت 
افتكر دايما ان كل حاجة حلوة بتعملها
و لو ضغننة خالص .... بتنكتب 
و ان كمان كل حاجة وحشة
لو فتفوتة ... بتتسجل 
و الشطارة انك تخلى خيرو 
ميبطلش كتابة 
و شرو يفضل كسلاااان 




( ببراءة فى محاولة للأطمئنان )

طب هوه خيرو 
قالك عليا ايه بالظبط  ؟





شوف يا سيدى 
خيرو جالى ف الحلم و قال
يا مامت يوسف 
يوسف بيحبك خالص جدا 
و بيحاول دايما يسمع كلامك 
و ميعملش حاجات وحشة 
لكننننننننن 
اوقات بيعمل حركات نص كم
و يزعلك  ... بس غصب عنه
فمتزعليش 




طيب انتى زعلانة 
منى دلوقتى ؟




لا يا حبيبى .. بقى يبقى عندى ولد 
جميل زيك  .... و ازعل ؟
بس ساعات يعنى
لما بلاقى اللعب مترمية ف كل حتة 
و اقولك لمها و تطنشنى 
او لما اقولك على حاجة 
و متسمعش كلامى 
منكرش انى بزعل و اتنرفز 
و ابقى عاوزة آجى عند كتفك 
و اقعد اصحى ف الأستاذ شرو 
و اقوله ..لو سمحت 
تطلع الكراسة بتاعتك حالااااا
و تكتب ..ان يوسف دلوقتى 
 ضايقنى و كدا




(يبص لكتفه بذعر و يشاور ف الهوا )
لأ ..لأ خليك ناييييم 
و متكتبش حاجة 
انا هلم اللعب علطوووووووول
و اسمع الكلام دايما  
من فضلك تسيب القلم
انا مش هزعل مامااااااااا



(أطبطب ع الكتف الشمال و ابوسه)


خلاص يا شرو .. بلاش
يسوفة شطورة اهو  واخلاق ع الآخر
و هوه حبيبى 
و ملاكى الصغنن  
و خيرو اللى هيطلع دفتره و يكتب 
ان فيه ولد لطيف هيحضن مامته 
و يقولها بحبك



(يفتح دراعاته وسع كداااااا ويضمنى ويقول  )


دا أنا ..دا أنا 
انا بحبك يا ماما





------------------------
-------------------




انظر يداى اللتان هما 
قد طوقاك مخافة البين 
أقسم انك عائد اليهما 
إنى لمدود الذراعين 
ابراهيم ناجى




This entry was posted on الثلاثاء, سبتمبر 14, 2010 and is filed under . You can leave a response and follow any responses to this entry through the .

41 كــــلام بيطــبطـــب عـــلى قــــلبى و روحــــى

يا روح قلبى أنا


ب ح ب ك

تصدقي لو قلت لك كنت سعيد بالحوار
وفي نهايته جسمي قشعر
ربنا يجعمك انت ويوسف علي خير في دنياه
ويبعد عنكوا الشر ويجمعك معاه في فردوسه انتي والمسلمين تحت عرش الرحمن ويرضي عنك .

أمانه عليكي تسلمي لي عليه .. يمكن ان مش عارفه .. بس كفاية إنه طفل بيحب مامته .. وكفاية مشاعره نحيتك .. دا ينكتب فيها دواوين مش تعليق .

في أمان الله انت ويوسف ومن تحبي من البشر .

تحياتي ليكي يا فاتيما الخير

انا مع يوسف

نعملها عصير

اتنين على واحد

ربنا يخليه ليكى

ويخليكى ليه

حقيقى الاطفال دول ملايكه


حسام ابنى قد يوسف

وتمام بيفكر زيزو

لسه بيقولى شكرا ماما

علشان جبتله توم وجيرى

الكل بينام


وهو اللى بيونسنى ويسهر معايا

وكتير يقولى افتحى مدونتى علشان اكتب


والله خايف وانا مشغوله يفتحها وينزل


الموضوع فاضى

سلميلى على يوسف

تحياتى

حلوة بتاعت البرتقانة دي ياما جننت بيها اصحابي
هي وبتاعت حاجة خضرة ومدورة وفيها بذر بنسميه لب واول حرف نون



ماتعبيش نفسك نص بطيخة دا لو كنتي مش عارفاها
يــــارب يرجعلك يوسف ومش يسيب حضنك ابدا يا فاتيما

يا حبيت قلبى
ربنا ان شاء الله يجمع بنكم ديما ويكون فى حضنك طول الزمان
بحبك قوى يا طمطم
تصبحى على خير

ربنا يخليكى ليه ويخليه ليكى

يا روح قلب منونتك

وان شاء الله يارب تنعاد ايامكم سوا

يارب من تانى يا حبيبتى


وهتبقى احلى كمان وكمان والله

ان الله مع الصابرين

وانتى ماشفتش زى صبرك يا فاتيما

انا كمان بحبك اوى

وبحب يوسف اوى

فاتيما

ازيك
بقالي كتير مش متابعك

كلام يدل انك ام حنينة جدا
ربنا يكرمك
ويرجعلك قرة عينك
يوسف سوفة حبيب قلبك


تحياتي وتقديرى

فاتيما
حلو اوي البوست دا
بجد
حلو

بس ليه البرتقانه مقلتش
انا البرتقانه مني باتنين
كان يبقي ليا حته؟!

تيما وقلبها الطيب بستنا حكاياتك مع يوسف بفارغ الصبر بجد نفسى يكون عندى ولد أمور زيه ويبقى بينا أحلى كلام من النوعية دى حوار كله حب ودفا بجد ربنا ما يحرمك منه أبدا ويرجعه ليك بالسلامة وربنا بجد يبارك لك فيه أنا مش عارفة أقول ايه وأعيد ايه بس انتوا الاتنين بجد حاجة واحدة ده احساسى نبضين لقلب واحد ربنا يسعد أيامكم يارب ويحليها

دمتى بكل الخير والحب والسعادة

http://www.youtube.com/watch?v=rxREaR6nJ5I&feature=related

صباحك قلب ماليه الحب
ربنا يخليه ليكى ويخليكى له
يارب
ويكون يوسف فى حضنك اليوم قبل بكرا
قولى يارب
حاسة بيكِ اوى
ربنا معاكى ويصبرك يارب
مرسيى ياقلب حبوبه على سؤالك عنى
وربنا يديم المعرف
بوسه وحضن لحد ما أشوفك
بحبك

يا خرابى

يا مامت يوسف

انا بأضحك قوى قوى قوى

من السعادة اللى انا فيها

ربنا يخليكى ليوسف و يخليكوا لبعض

و يخليكوا انتوا الأتنين لينا (:

و يخلينا لبعض كلنا

مش كفايه مخلل يا عم رامى

حاضر حاضر (:

مبسوط يا جدعاااان

ربنا معاكى دايما

يا مامت يوسف الغالية

ماما فاتيما ازيك :)
كل سنة و حضرتك بخير و سعادة يارب ،،،،
البوست صافى أوى و ميطلعش غير من حضرتك ،، يارب تشوفيه أحسن من اللى تتمنيه دايماً

طبعاً مش لاقى كلام على الذوق الزايد أوى اللى مستاهلوش أنا خالص :)

كل سنة و حضرتك بخير و سعادة و العيد الجاى تكون الدنيا كلها زى ما بتتمنيها و أحلى بفضل ربنا :)

نفسي اجي هنا واعرف ارد

حقيقي مش بعرف والله

مع اني رغاية اوي

بس مش بلاقي كلام يوصف نشوتي وتاثري باللي بتكتبيه وخصوصا مع يوسف

ربنا يحميه ويحفظه ويخليكوا لبعض

البوسه دى امممممممممممممممممممممممو

ليةسف ربنا يحميه يارب ويفرح قلبك به

انا حسيت ان ماما بتكلمني والله العظيم اصل ماما كانت بتقولي حاجات زي كدا وانا صغننة بس كانت مش بتكلمني علي اللعب كانت بتكلمني عن شرب اللبن طول عمري مغلباها :)

ربنا يسعدك يارب يااحلي فاتي ويجمعك بيوسفة يااااااااااارب

انا ممكن اتعلم منك الامومة دى يا فاتسما بجد

دعواتك اوى
خالص
ياريتك عندك تليفون

كنت محتجاكى خالص

بحبك

طب اعمل ايه فيكى :)

ربنا يارب يجمعكم ببعض اللهم امين

انا المرة مكنتش زعلانة قوى زى كل مرة وانا بقرأ اليوسفيات
اللى يتربى التربية الجميلة دى
وتبقى مامته بالطعامة دى
مهما بعد
ومهما الدنيا أخدته
عمرها ماتضيع الروح الحلوة اللى اتغرست فيه وهو صغير
ربنا يفرحك بيه ياطمطم وبنتيجة غرسك فيه

الـــــله على الابداع
ياست انتى ايه؟؟؟؟؟
بجد فنانه وبتعرفى توصلى المعلومه بطريقه ظريفه ومشوقه لطفل فى سن يوسف
كل ما اشوف بوستاتك وكلامك مع يوسف اقول انى هاكون ام فاشله لانى مش هاعرف اكون حتى نصك
ويوسف كمان الله اكبر عليه
طفل ذكى ... وبصراحه كعبلنى فى حبه من اول مره قريت عنه وكأنى سمعاه

(:
ثم ان اللى عندها طفل زى يوسف لازم تكون مُبدعه

ربنا يجمع شملك انتى ويوسف ياقلب البحر عاجلا غير آجل

♥بحبك♥
وبموت فى يوسف
نفسى اشوفه بقى يارب

كل سنة وانت طيبة وبخير وان شاء الله ربي يجمعك بيوسف قريبا ان شاء الله
كلامك يافاتيما بيدخل القلب ويتربع فيه بنحس معاك بكل كلمة بتقوليها صدقك بيوصل لنا وبنتفاعل معه
أحبك في الله فاتيما

ربنا يجمعك به على خير
كل عام انت بخير

يااااااااه يافطيما
والله ولا اروع:)
عشت الحاله ثانيا بثانيا
ربنا يارب يجمعكم قريب
اللهم امين
ملحوظا مقلبظا:عوذين نتجمع الاسبوع اللي جاي
شوفي اليوم اللي يناسبك
وقليلي
يارب اشوفك قريب

كل سنة وحضرتك طيبة
سبحان الله
المعجزة الكبيرة إنه خلقنامن تراب وميه وخلانا بننطق ونتحرك مع إننا ماطلبناش منه.
واللى سهلة وبسيطة خالص إنه يرجعلك يوسف لكن لازم تطلبى بثقة فيه ويقين بيه.

أنا أكتر حاجة مخليانى متفائل إن اسمه يوسف.

سبحان رب يوسف القادر المقتدر

فاتيما
ام الخير
مامت يوسف

كلامك اللى طالع من القلب بيوصل
بكل سلاسة الى عقول وقلوب من يقرأ

ربنا يكرمك ويسعدك
ويديم عليك نعمته وفضله
ويخليلك يوسف ويبارك لك فيه

وكل سنه وانت اسعد وفى اتم الصحة والعافية
تحياتى

ربنا قادر انه يجمعكم
ربنا يصبر قلبك ويكرمك على صبرك ده

حسيت اني شايفة يوسف قدامي
ربنا يخليه ليكي يا رب

السلام عليكم فاتيما هانم (قفاشه)
اعاد الله عليك رمضان بالخير واليمن والبركات ويوسف معاك ان شاء الله
عيد سعيد عليك وعلى يوسف
كل عام وانتى ويوسف بخير
تحياتى

سنة وانتى طيبة يا فاتيما
جات متاخرة معلش بس والله مشغولة بغباء وعبد الرحمن مجننى وكان تعبان يا حبيبى حبة فعشان كده
وحشتينى دى قليلة والله بجد
يا بخت يوسف بيكى بجد ربنا يحفظهولك انا ام ربع كم ان مكنتش كات بجد
يا طولة بالك بحبك اوى
عبودى بيسلم عليكى كمان وباعتلك بوسة كبيرة

ربنا يخليولك ويرجعه فى حضنك امييين
يارب...
حاسه بيكى قوى ..
ولادى عندى بالدنيا ومافيها..
تحياتى

فاتيما
كلامك راقي حنين

وعايزه اقول لك
ان مهما الزمن طال حبيب الحضن الحنين بيرجع له مهما طال الانتظار
بيرجع ورجعته بتكون ابديه مابعدهاش فراق

تحياتي

دايما لما باجي هنا ببقي فعلا عاجزه عن التعبير ..
بيبقي جوايا كم هائل من المشاعر ..
ابتسامه عريضه .. وكم هائل من الحزن !

خصوصا في البوستات اللي فيها يوسف ..

مش عارفه
بس،
انا هكتفي بالابتسامه دي :)

يمكن توصلك حاجه من اللي جوايا

ربنا يخليهولك يارب

ازيك يا تيما عامله ايه ؟ :)

بالنسبه لخبر الشروق عن طل فلا اعتقد نه صحيح بالمره ... وفيه تواتر وموش حقيقي ..

وبالنسبه للبوست بتاعك .... فبصراحه ماعنديش غير دعائي ليكي ربنا يصبرك ويخليه ليكي ويجمعه بيكي على خير يا رب

تحياتي يا أطيب القلوب :)

انت ياست انت ياللى شبه الملايكه

وحشانى ومستنيه اول الشهر بفروغ صبر

ربنا يحينا يارب

والنبى ياست ياللى انت حببتى وصحبتى ليكى عندى تاج كام سؤال
ياريت تحنى وتعطفى على اختك وترضى تعمليه

يهمنى ويهم كتير اننا نسمعك

وليكى مطلق الحريه فى القبول او الرفض

الاختلاف فى التاج لايفسد للقطط نونوااااااااا

بوسات وفعوصات نتصبر بيها لغايه يوم اللقى

الله
تعرفى
لما البنوته تكبر
حاجى اقرا كل اللى كتبتيه

نفسى ربنا يعينى على تربيتها كويس يا فاتيما ادعيلى

وحشتينى اوى

MR.PRESIDENT
------------

ازيك يا بسام

انا حاسة من تعليقك بكل اللى عاوز تقوله و الجمل و الكلمات لا تسعفك بيه

ربنا ما يحرمنى من دعواتكم ابدا
خالص ودى
يا من يحمل قلبه
نصيب كبير من اسمه






جايدا العزيزى
------------

ربنا يحرسلك حسام و يحفظه من كل شر

انا بشوف عيالنا دول
مش ولادنا بس
اصحابنا كمان

يوسف كان صديقى الغالى
صديقى الصدوق على رأى تيمون و بومبة


مكنش ابن و بس
و عشان كدا بفتقد الكلام معاه قوى
مهما الزمن عدى عليا
و مهما اتكلمت مع أى حد
كبير و لا صغير

حكاياته و حوراتنا كانت شكل تانى

نورتينى جدا




just waiting
------------


البطيخة دى قديمة قوى
قولتها ليوسف
و بصلى بإستخفاف و يقالى
دى فزورة دى ؟؟؟
سهلة جدا و حلها ببساطة رهيبة
منظرى كان ميحيش قوى

معندكيش فكرة كان ذكى ازاى
دا احيانا كان هوه اللى بياخد باله منى و ينبهنى لحاجات انا مش فهماها
منحرمشى منك يا تيتو
و لا من زياراتك
ولا دعواتك يا حبيبتى




mrmr
----

ميرسى يا مرمر
منحرمشى منك يا حبيبتى
انتى كمان حواديتك حلوة قوى
و ممتعة
تصبحى على الف خير
و تتمسى كمااااااان



мαησηα
------
منحرمشى يا منونتى
يا قمورتى

يا بت
بطلى
تدلعينىىىىىى
كدا

هه


انا كمان بحبك يا حبيبتى
و ربنا يسمعنى عنك كل خير دايما
يا رب




Haytham Alsayes
---------------

ازيك يا هيثم
و لا يهمك يا جدع
تعالى وقت ما يعجبك
كفاية طلتك علينا يا فندم

منحرمشى من ذوقك
و دعواتك


تحياتى انا اكتر بجد





sally
-----

ميرسى يا لولى
مبسوطة ان البوست عجبك يا شقاوة

و يا ستى انتى ليكى برتقانة لوحدك
احنا هنديكى نص برضو
عيب !!!

بوسات و حضونات يا رؤية

الزهرة البرية
------------

يا حبيبتى ميرسى جداااااا
و عقبال ما تحكى الحواديت دى لعيالك
عن قريب انشالله

الف مبروك ع الخطوبة
يا بستان الزهور البرية كلها




Baskouta
---------

ميرسى يا بسكوتى البمبى الحلوة

تعرفى ان يوسف كان بيحب الغنوة دى
و بنغنيها سوا
مش كلها طبعا
لتفتكرينا بنفهم انجليزى و بتاع
ل
اول جملتين بس
عشان كنا بنقعد نحب ف بعضيشنا و كدا
ميرسى يا حبيبتى
متحرمشى منك ابداااااااا



الحب الجميل
---------

السؤال عنك واجب يا حبوبة
و الواحد برضو مقصر
يا رب تكونى دايما بألف خير
و ميرسى على الدعوات الطيبات

انا كمان متشوقة للمجى عندكو جداااااا
و هانت باقى من الزمن مش كتير

ان شاء الله




Ramy
-----
يا ر ر و لا يهمك
قول اللى يعجبك انا فاهمة و الله

اكيد بيير بينك و بينه حوارت شبيهة بكدا ..بس على اصغر
بكرة يكبر شوية و تعرف تتلامض معاه
ابقى جرب معاه حكاية الملايكة دى
اصلا انا جت ف بالى من الكارتون بتاع توم و جيرى و لما توم او جيرى يفكر فى فكرة شريرة و الملاك بتاعه و الشيطان يظهروا على كتافهم و يحصل صراع

يعنى الفكرة مش بتاعتى
بس بتصرف برضو

منحرمشى منك
يا ر ر





أحمد عبدالعدل
------------

عيد ميلاد سعيييييييد يا دكتور
كل سنة و انتا معانا دايما

بتقول ايه بس المفروض الواحد يحتفى بيك اكتر ...و مين دا اللى ميستاهلوش دا ؟؟؟
هتزعلنى كدا جداااااا

كل سنة و انتا طيب
اكتر
كمان





طالبة مقهورة ..درجة اولى
----------------------

يا حبيبتى متقوليش حاجة
انا حاسة بين السطور و كفاية

انا اللى مبسوطة جدا و متأثرة بجد ان التدوينات بتاعة يوسف خصوصا
بتعجبك
و بتعجب اى حد بيدخل

بحس ان يوسف هوه اللى بيتقاله برافو
و الله عليك
و انتا شاطر
و جميل

بفرح بجد قوى

بوسات و حضونات يا شقاوة





richardCatheart
---------------

اولا
انتى كمان وحشتينى جداااااااا
يا قطاقيطو


ثانياً
ميرسى خالث
ع البوسة
وهاخدها انا لحد يسوفة
ما يرجع و ياخدها بنفسه

ثالثاً
هروح اشوف ايه الواجب
و ربنا يسهل و صحتى تسمح اجاوبة
انا اصلى كبرت بقى ع التاجات و الواجبات ..كل حاجة اتعرفت عنى
هقول ايه تانى
و الناس زهقت يعنى

رابعا
انا كمان بوسات و فعوصات برضو

كيــــارا
---------

ازيك يا كوكى

لأ حوار اللبن دا قصة تانية
يوسف برضو ف الاول كان مزمزق
مش عاوز يشربه
و بعدين جبتها بالعكس بقى

ان معدتى اللى كانت دايما واجعانى و الحقن المسكنة دى
كان سببها انى مكنتش بشرب اللبن بقى و ماما كانت بتنصحنى و مبسمعش الكلام
و بعدين بلاها اللبن خالص
نشرب لبن بالموز او الفروالة
او ناكل ايس كريم
او كريم كراميل و رز بلبن ..وهكذا
لحد ما شوية شوية بقى يشرب اللبن عشان يتجنب يبقى زيى و ياخد حقن

كان عاقل قوى
و زى راجل كبير



بوسات و حضونات
يا بنوتات يا عسولات




shimaa samir
------------

يا حبيبتى انتى هتبقى احسن الف مرة

الأمومة دى فطرة ف الست
بتيجى لوحدها كدا
انا مكنتش محضرة ف دماغى أى حاجة خالص من الكلام دا

طلع لوحده
تلقائى

اكيد الخيال ليه دور كبير
قريتى لمجلات الاطفال و الكتب
الفرجة ع الأفلام و الكارتون معاه
الخلفية الدينية و قصصها
و دمج دا كله سوا
بيخلوكى فجأة تألفى حكاية من الهوا
و تحاولى تمنطقيها قدر الامكان


انتى يا مشموشتى هتعرفى تعملى كدا
و احسن
انتى فنانة يا بنتى
و شاعرة
و احساسك مرهف
صدقينى هتعرفى تعملى كدا و اكتر
ثقى فى نفسك اكتر من كدا يا عصفورتى
انتى عندك كتييييير
و كله هيطلع فى معاده
و موقعه المناسب
بطلى تضغطى على نفسك
و تحطيها ف زنقات
و تعمليلها ارتبكات
عيبك انك لا ترضى عن نفسك
و بتستعجلى اكتمال الأشياء
و احيانا نقصها بيكون هوه المقصود

من غير تليفون
الأيميل يا ستى عندك
قولى كل اللى ف نفسك
و هرد بسرعة جداااااا


سلامى للعصفور الطيب
و بوساتى و حضوناتى ليكى يا حبيبتى




Mahmood البطراوى
----------------

ايه بس يا محمود
انا اعملتش حاجة خالث
يا اجدع دكتور سنان ف مصر
منحرمشى منك ابداااااااا





حفيدة عرابى
---------


الحمدلله يا فيدو
انكم المرة ابتسمتى و فرحتى
انا عارفة انى بنكد عليكو كتير
بس المرة دى الحوار كله كان لطيف
لأن ف الواقع كان كدا

انا كنت بعيش طفولتى مع يوسف
و برجع عيلة
بفتقد الأحاديث دى قوى
قوى
و بقول اكتبها
عشان متروحش و لا انساها
و هوه كمان يبقى يفتكرها
لما يقراها
و يشوف كان طفل لذيد و لطيف ازاى

بوسات عشان ك
و حضونات لبيطرية الرقيقة





عاشقة الرومانسية
----------------

ليه بس يا دودو ؟!!!!

يا بنتى هوه انتى لسه جربتى طيب؟؟

طب ادى رودينا ربنا يحرسها
هتكبر ف حضنك و تشوفى

هيا و عمر كمان
جربى فيهم
زى انا ما جربت ف الواد ماجد اخويا
هتلاقى نفسك بالفطرة بتقولى حاجات و تتصرفى تصرفات احسن من كدا ميت مرة

متقلقيش

قلب البحر بينادى عروسته
و بيقول هتوحشينى لحد ما اجيلكم

بوسات و حضونات
بعدد موج البحر
اللى انتى عروسته

♥ انا كمان بحبك ♥

خواطر شابة
---------

و انتى طيوبة اكتر يا خطورة
انا كمان يا حبيبتى بحبك قوى

متتأخريش علينا
منقدرشى على غيابك احنا ابدا

انتى كنتى ف بالى و انا بكتب البوست الجديد قووووى

بوسات و حضونات يا حبيبتى



الطائر الحزين
------------
و انتا طيب يا إيهاب
كل سنة و انتا طيب

تحياتى لكل من عندك






sony 2000
----------

ميرسى يا سنسن
منحرمشى منك يا حبيبتى

بخصوص اللوكاء
مش عارفة هينفع و لا إيه
بس الوقت لن يسمح غالباً انى آجى
لأن الحاجة بتحتاجنى ف اجازات
و بناء عليه بفضى ف اجازات تانية و اتفاقى معاها كان و ما زال على سفرية اسكندرية
و مش هينفع اطلعلها مشاوير تانية

معلش يا حبيبتى تتعوض
ف وقت تانى


ان شاء الله تتوفقوا ف لقاءكم
بوساتى و حضوناتى يا سنسنتى





مع اصرارى
----------

و حضرتك طيب


كلامك اكيد صح
و يقينى بالله راسخ و الحمدلله
لدرجة انى بطلت أطلب
و ارجو تكون فاهم قصدى


اسم يوسف من الحاجات القدرية
اللى مخليانى على قناعة شبه تامة
بالمقولة اللى نصها الآتى

لكل منا نصيب من إسمه


انا سميته على اسم سيدنا يوسف عليه السلام ..و ربنا يحفظه و يعوضه خير زى ما عوض نبيه

نورتنى




sal
----

منحرمشى منك يا فندم
انتا علطول كدا
قارينى بقلبك
عشان كدا شايف الكلام طالع برضو من القلب ..و واصلك

كل سنة و انتا بألف خير
يا رب









مجرد حلم صغنتوت
--------------

بجد ؟
يعنى الحوار مش ممل
انا خفت معرفش احكيه كويس
زى ما حصل

طمنتينى يا حبيبتى
منحرمشى منك
و كل سنة و انتى طيبة
و بخير و الحلم الصغنتوت يكبر
و يكبر
لحد ما يساع الكون




فشكووول
-------
يا عم فشكووول
كل سنة و انتا عمنا كلنا
و منور وسطنا
و نفسى بقى تحاول تيجى لقاء اسكندرية
اهو منه تغير جو
و منه تشوف ولادك و اخواتك الصغيرين اللى نفسهم يشوفوك بقى
و هات سوما الجميلة ف ايدك
فكر و النبى
و شوف كدا

و هات احمد
آه ... هاته يبلبط ف المية شوية
فكر و شوف

منحرمشى منك يا رب
و لا من تعليقاتك الطيبة دى

Ana Keda
-------


و انتى طيبة يا مروة
و يا حبيبتى خليكى على راحتك
ما قولنا اول ست سبع شهور مرواح للدكاترة
دا العادى متتخضيش
و ربنا يسلملك سى بودى من كل شر يا رب
و اجمدى كدا
مش حتة واد اسد هيهتنا و يخلينا نقول حقى برقبتى ...انشفى يا بونيتى و لا يهمك ...بكرة يتعودى على نظامك و انتى كمان تاخدى ع التعب و يبقى عادى ...بوسيهولى لحد ما اشوفه الشقاوات دا و اعضه ف الظؤظة على حد قول البت الخيخة الجميلة ....

بوسات و حضونات يا حبيبتى





بنت الغربة
---------

ميرسى يا حبيبتى
ربنا يخليك الولاد يا رب
و تفرحى بيهم دايما
تحياتى ليكى اكتر
نورتينى جدا




شمس النهار
---------

ميرسى يا شمس نهار المدونات
و قمرها

انا لسه فاكرة كلامك يوم الزراعيين
لو قعدت اقولك تأثيره فيا كان ازاى ..مهما حاولت مش هعرف اوصف
انتى كمان راقية قوى
و حنينه
و انا فخورة بإنى قابلتك
و عرفتك
و كلمتك

منحرمشى من دعواتك الطيبة
و لا قلبك الطيب
و لا كلامك الطيب

تحياتى
و بوساتى
و حضوناتى



Hager Za3bal
-------------

وصلت و كفى يا هاجر

انتى بتعليقك قولتى اللى جوايا
بوستات يوسف بكتبها و انا ببتسم
و الحزن حواليا محاوطنى
بس فيه الف نوع م المشاعر حساه
فرحانة انى لسه فاكره حاجات اكتبها
زعلانة انه مش معايا
مبسوطة ان حد ممكن يقرى و يدعيله
وبخاف يكون كلامى هيضايق حد
و بتحمس لما برد ع التعليقات
بطمن انى لسه قادرة اهزم الحزن
و بقلق لكون خلاص خدت على غياب يوسف
و بفكر لحد امتى هفضل اكتب ف اليوسفيات دى ... و امتى هبطلها
الف حاجة يا هاجر

تعليقك اصاب كبد الحقيقة و قلبها يا حبيبتى

بجد
:)




dr.lecter
---------

و يخليك يا ليكتر
انتا طيب قوى على فكرة




فتاة من الصعيد
-------------

انا بخير يا فاتى
ازيك انتى يا حبيبتى

بجد ؟
طب يا ريت يكون الخبر كدب
و ربنا يخرجها من كربها دا على خير

منحرمشى من دعواتك يا حبيبة قلبى
أبدااااااااااا




dodda
-----

يا ستى اقرى و احفظى و قولى
المدونة و البلوجر كله
تحت امرك
و امر مليكة
دحنا قعدنا نستناها بفروغ صبر


و بعدين متخافيش
انتى كمان
هيبقالك تأليفتك الخاصة

انتى ما شاء الله عليكى
و خيالك واسع
اما قلبك بقى
فاوسع ييجى مليار مرة

هتلاقى نظرياتك و شخصياتك الخيالية العجيبة المميزة برضو ..
متقلقيش

بوسيلى المليكة
بسايس كتير
و خدى انتى الحضونات
عشان انتى كمان وحشتينى قوى قوى قوى

الله الله الله على جمال الحوار
يااااااااااااه انا كنت بقراه وانا مبسوطة
فكرنى بكلام ماما معايا وانا صغيرة
تعرفى احلى حاجة اية انى كنت بصدق الللى ماما بتقولة اى حاجةة كانت بتقولها كنت بصدقها طفلة بريئة باه


يارب يجمعك مع يوسف ياخالتو على خير يارب مهما طالت الايام هتتجمعوا فى الاخر

إرسال تعليق