.

.

شــبابيـــك حـــــى البـــلوجــــر  

Posted by: فاتيما in , ,






سؤااااااااال هام 
احنا بنكتب ليه ؟
هاه 
مش بتكلم عن العالم الشعرا و الادبا 
و لا عن الجماعةالصحفيين والناشطين
 انا بسأل الناس العادية 
اللى زيى حالاتى  كدا
و اللى ملهمش بالكتابة أى صلة مهنية او احترافية
لا بيخدوا من وراها فلوس
و لا عاوزين يثبتوا ذاتهم 
فى عالم الادب و الشعر  و الصحافة و السياسة 
بتكلم عن الناس اللى دخولهم عالم التدوين 
كان صدفة 
مش مترتبة صحيح ..لكن بعد كدا 
بدت و كأنها التصرف الوحيد المنطقى
اللى كان لازم يحصل لأنه مقدر و مكتوب  
 ان الكتابة تبقى جزء اساسى 
من حياتهم اليومية 
و تجربتهم الإنسانية عموما اللى خلتهم 
يمتهنوا مهن تانية خالص ملهاش صلة بحرفة
الكتابة ..زى الهندسة و الطب 
و التدريس و المحاماة ...الخ 
او اللى قاعدين ف بيوتهم مبيشتغلوش 
غير .. ربات بيوت و امهات و زوجات
و كمان الشباب بنات و ولاد 
اللى لسه ف الجامعة 
او المدرسة 
و عالم واسع ملوش حصر او نهاية  
عرف التدوين صدفة و مكنش ف باله 







اختكم مثلاً ... دخلت عالم التدوين
برضو صدفة و عملت المدونة  
لسبب واحد فى البداية و هو
الكلام عن يوسف ابنى 
و افتقادى ليه 
وتأريخ لكل ذكرى مريت بيها معاه 
لأنى كنت خايفة من قلة الكلام عنه والسكوت
يوم بيوم انسى انى كنت أم 
دى كانت البداية 
مساحة للبوح و الفضفضة 
و تنفيس عن الألم اللى كان بيدبحنى صمتاً 
و العياط اللى كان بحور وانهار 
و محاولة تدوير خافتة مش متوقعة قوى
عن طبطبات من قلوب أشخاص افتراضيين
مفكرتش لحظة هقابلهم وجهاً لوجه 
لكن شايفهم بقلبى 
حروف و جمل و اسماء و تعليقات 
كل يوم ..بتونسنى حتماً 
و تنتقدنى نوعا
و تعنفنى احياناً 
و تجاملنى غالبا
و تعرض عليا المساعدة
و تطبطب عليا دائما وابداً




من البداية كنت واخدة قرار عنيد 
انى هكتب و بس
هستخبى ورا ضرف الشباك المتوارب 
و محدش هيشوفنى غير من خلال التدوينات
مكنتش كدا لوحدى ..كان اغلب اللى اعرفهم 
زيى .. علاقات افتراضية و بس
لكن شوية بشوية ابتديت و ابتدينا كلنا 
نخرج من ورا الشاشات 
للعالم الحقيقى و نفتح شبابيكنا 
و صحيح اسباب كل واحد فينا كانت
 متفاوتة بس كان معروف ليه كان فيها توجس
لكن بعدين
و أكيد لحسن الحظ 
ظهرت اسباب اقوى و اكبر من أى خوف
غيرت المشهد و بدلت معالمه 





شبابيكنا المقفولة علينا كان لازم تنفتح 
عشان نبص ف وشوش بعض 
و نبقى إيد واحدة 
ميبقاش كل واحد فينا عامل زى 
اللى بيدون ف مالطة
و محدش بيسمعه 
كلنا تقريباً على أختلاف وظايفنا
و خلفيتنا الأجتماعية و بيئتنا و نشئتنا 
وطباعنا و اتجاهاتنا و ميولنا 
إتلمينا على هدف واحد تقريباً
التغيير 
و لو بالكلمة 
كلنا تقريباً كان عنده انتقادات لواقعه 
كراهية و غيظ من مظاهر سلبية حواليه 
بتأثر عليه جدا او شوية حتى
وبتفسد عليه ايامه و حياته كلها 
و نظرته و آماله و كمان خططه لتربية اولاده 
حتى للى لسه متجوزش و لا بقى عنده اولاد
بس مبقاش نافع يسكت  عن القبح
و يقول مش عاجبنى فى سره  
بينما فيه متنفس للبوح و الكلام 




الجماعة اللى مدوناتهم سياسية الهوى
كان دا واضح جدا فى تدويناتهم
اما اصحاب المدونات اللى بتهتم بالسلوك الانسانى
ركزوا على دور الدين
و التنمية البشرية و علم النفس 
و توصيل فكرة تنقية البنى آدم المستمرة 
لعيوبه و محاولة البدء بنفسه واصلاحها
و اللى بالتبعية هتأثر على المجتمع كله
اما اصحاب المدونات الساخرة ..فكانت طريقتهم 
فى التريقة على بشاعة الواقع بشكل أكثر هزلية 
حتى العالم النكدية اللى زى حالاتى 
انتقدوا واقعم بس بشكل حكايات و شكاوى 
تنفع تندرج تحت سلسلة بعنوان .. أريد حلاً
اما اللى مدوناتهم خواطر و حواديت 
فكانت لسان حال لمشاعر و لحظات صافية 
كلنا بنمر بيها و عاوزين حد يقولها بالنيابة عنا 
ويتصادف انه حساس مرهف  وذوقه حلو





المدونات كانت و ما زالت 
من وجهة نظرى الغلبانة انعكاس لشخصيات
أصحابها و نفسياتهم 
مميزاتهم و عيوبهم
بدءاً من اسلوب الكتابة  سواء كان 
نثر او شعر او مقالة 
او حتى غنوة وكليب او صورة
 اختيار التوقيتات اللى ينزل فيها التدوينات
و طريقة الرد على التعليقات 
و حتى عدم الرد عليها والتجاهل ومعناه
دا حتى شكل المدونة .... القوالب يعنى 
شيفاها بتعبر عن شخصية كل حد فينا 
لون القالب سواء كان غامق ولاّ فاتح
تغييره و مرات حدوث ذلك و معناه 
أو الثبات عليه و التمسك بيه علطول 
الصور والأغانى المصاحبة للمدونة 
او اللى بتتحط مع كل تدوينة
الشريط الجانبى بكل محتوياته و تغييراته 
و اكيد اكيد طبعاااااااااا..اسم المدونة 
والجمل التعريفية بصاحبها
و صورة البروفايل و البروفايل نفسه 
كلها حاجات بتقول كتير عن
  صاحب المدونة دى 
حتى لو محدش شافه و عرفه ف الحقيقة





 شهر بشهر و سنة ورا سنة 
العلاقة بين الجيران بتقوى 
و بنبقى اصحاب و اصدقاء و احيانا زى الاهل 
نتخض على بعض ف الغياب 
و نسأل وقت التعب و المرض 
نتلم فى لقاءات عامة أو مصغرة 
و بينا ايميلات و موبايلات غير التعليقات 
بنعزى بعض ف الملمات 
و نفرح لبعض ف المناسبات 
و نعيد على بعض طول السنة
و نتقهر لما حد فينا يتعرض لظلم 
و فجأة تحس اننا بقينا عيلة كبيرة واسعة 
مش بس برا حدود بلدك الصغنن ا محافظتك 
دى بتتمتد لكل مكان فى الوطن 
و تعدى الحدود لدول عربية حواليك 
و تعبر بحور و محيطات عشان تسكن قلوب 
فى قارات بعيييييييدة عنك بملايين الكيلومترات
إيه دا ؟!!!
حاجة غريبة .... و مؤثرة بجد



و نتلم فى الخير  رغم أى توجس او قلق 
عشان نساعد غيرنا 
و احياناً كمان ... نساعد نفسنا
من غير ما نقصد و لا ناخد بالنا 
الخيط بينا مبينقطعش
مهما المشاغل خدتنا او الزعل احيانا
تلاقيك فاكر حد كان بيعلق عندك
من سنة او اتنين  أو زمن
ويهف على بالك فتقول بعد تنهيدة طويلة 
يا ترى فين أراضيه دلوقت  ؟
و على قد ما تزعل ان حد قفل شباكه
فجأة ف وشك 
او قفله براحة عشان محدش يقوله ارجع 
برضو على قد ما تفرح ان شبابيك جديدة بتنفتح 
و قلوب جيدة بتشارك لحظاتك و احلامك و ايامك
و تقولك انا معاك .. وياك .. وجنبك



الصورة مش وردية علطول الخط اكيد 
فيه عالم اتكعبلنا فيهم  ف السكة
كانوا و ما زالوا ...أوضع من الوضاعة
قادرين يخربوا عليك فرحتك ويقرفوك ف عيشتك
ممكن حتى توصل لأنهم يحاولوا يخربوا شباكك
يتصيدوا اخبارك و ينسجوا اوهام 
عشان يشوهوك 
و لأنهم من الأصل مشوهين 
فيبقى يا ريت بقى
نبقى زى بعض ومفيش حد احسن من حد 
وكلنا آثمون 
و لأنه لا يصح الا الصحيح ف الآخر 
و لإننا متجمعين على خير
فاحنا ف نهاية الامر ...بنكون نفسنا 
مدوناتنا مرايتنا اللى بتعكس ارواحنا 
و المراية بتظهر كل ما فينا من جمال و قبح
و تصرفات راقية او العكس 
و صحيح الزعل احيانا بيلقى طريق بيننا
و يعكر الصفو العام 
لكن ... الغث بيطفو و يستبعد و يتلاشى
و بعد شوية بننسى التفاهات و السخافات 
و نقطع الطريق على العالم دى 
و الناس الطيبة بترجع تانى تتكاتف
و نرجع تانى نتلم بجد و صدق 
بعد أن يذهب الزبد
و يفضل السبب الحقيقى 
اللى كان
صح 
و صحيح 
و لا يصح غيره
وهوه
تغيير واقعنا للاحسن قدر ما يمكننا
عشان يبقى اللى اتربينا عليه و اتعلمناه 
جاى بفايدة و معنى و قيمة





و لو مش هنلمس دا دلوقتى أو عاجلاً 
كفاية ناخد بإيد بعض
و ننتشلنا من اليأس و الحزن 
و أصله مش لازم كل حاجة تؤتى ثمارها سريعا 
احيانا الصبر و الامل وطولة النفس 
بيكونوا هما الدرس و الحكمة
و مش حيلة العاجز ..كما يقال
و اختكم شخصياً شايفة تغيير فعلاً
على الأقل مننا فينا 
احنا بنأثر فى بعض
 بنساعد بعض 
عشان نبقى اشخاص افضل 
و مش هقول لما بنساند بعض فى مشكلة ما 
او ازمة نفسية او حتى لما حد يقرر يقفل مدونته
او لما بنتلم فى عزا او عيد ميلاد
او ناكل سوا عيش و ملح  ف يوم
او نفطر يوم فى رمضان 
وشكلنا اللى وقتها بيبقى يفرح القلب الحزين
يكفى بس افتكر يوم من ايام البؤجة 
او ابو الريش او التبرع بالدم 
او لما حد منعرفوش بيتجوز مثلا
او يعمل عملية و يسيب تعليق عند خيخة
او مستشفى يحتاج لجهاز 
و نلاقى بوست عند داليا قوس قزح 
او لما الناس تتسابق فى بعت حوالات
و ترمى الحمل على خالد همس الاحباب 
او تبعت بكل الحماس فلوس او ادوية
 لأطفال فى ملجأ عند ايناس نهر الحب
يكفى بس اقول الأسامى دى  
عشان اللى اقصده من كلمة 
نشجع بعض و نكون بشر احسن
فالمعنى الخفى دا يتجلى
و يبرق زى نجمة ف عتم ليلة غامقة كحل
و ينور الضلمة ف القلوب




شبابيك حى البلوجر 
قلوب و مفتوحة على بعضيها
و يا ريت كل واحد يعرف قيمة مدونته 
و تدويناته و كلماته 
و قدرته على التأثير فى غيره 
بتكون ازاى 
اول كلمة دايما تخطر ف بالى 
لما آجى اكتب حاجة هنا 
أو عند أى حد من الاحباب 
هى كلمة 
نون 
و القلم 
و ما يسطرون 
الكلمة امانة و مسئولية 
و قوة ملهاش حد
و اللى شايفها عادى كدا مش فارقة 
و مش مؤثرة 
يبقى يا ريت يعيد نظر 
و يثق فى نفسه اكتر من كدا 
و ميستعجلش  و ييأس و يفقد الامل
التغيير حاجة عاملة زى نقطة المية
اللى بتنحت فى الصخر تمام 
 يبان نتيجتها على المدى الطويل 
و بالثبات و المداومة و العزم 
حتى لو كان الهدف تغير نفسك
و بس
دى لوحدها كفاية 



روح قلب ماما ابتدت سنة 2008
عملتها عشان احكى عن ابنى و يوسفياته 
و وسعت قلبكوا اكتر لحكاياتى
عن التدوين و اهله 
اللى ضمونى وبعيش وسطهم احلى ايام
اتجرأت كمان افضفض عن نفسى وهذيانى 
و حتى لما قلبى دق
 لقاله مطرح يفرح فيه 
و يصرخ بعلو صوته ويقول .... انا حبيت 




بس سؤال ف الآخر ويطرح نفسه 
يا ترى يا هل ترى 
انا حالمة ودا تفكيرى لوحدى 
و لا حد متفق معايا فى نظرتى ؟

 يا ريت كل واحد فى حى البلوجر 
ساكن من زمان او لسه جاى جديد 
يتفضل ويقول
امتى شباكه انفتح   ؟
و كان السبب إيه ؟
و شايف نفسه حقق اللى عاوزه 
و تجربته كانت خير فى مجملها 
و لا السيىء كان اكتر ؟




 و كالعادة هقول الجملة الختامية
فى أى بوست للتدوين الجميل
و اهله الأجمل 
و اللى بتليق عليكم
 
بحبكم 
يا احلى  
صحبة و ناس و عالم



--------------------------------------------
ملحوظات لاحقة
---------------------------------------------



(1)
انا قعدت ف حالة 
انزبهلال مرييييييع و النبى
قد ساعة كدا و متنحة 
 بصيت ف صفحة الإشراف مرتين تلاتة 
و مسحت الشاشة خمس مرات 
و دعكت عينى عشر مرات 
و قولت يا ريت ميكونش مقلب
و حد بينتحل سخصيتك و لا حاجة 
عشان انا عاوزة افرح النهاردة بجد 
معقولة انتا يا معتز ؟!!!؟
اخييييييييرا يا بنى رضيت عنا 
و قررت تطمنا عليك 
معقول كل نداءاتى .. مرحتش ف الوبا ؟
و يا عم متخفش مفيش ضرب 
حدش هيمد ايده ... انتا حماية عند اختك هنا 
الف مليون حمدلله ع السلامة 
و وحشتنا دروبشاتك 
و ايه انا جاى اسأل بس دى ؟!!
انتا تسلم و تاخد نفسك 
و بعدين تعمل مدونة جديدة
و متغبش علينا تانى ..ماشى؟
النهاردة عيد بجد .. حمدلله ع السلامة 



(2)
يا خواطر شابة  يا حبيبتى
انتى كنتى ف بالى و انا بكتب البوست 
و كنتى من ضمن الناس اللى اتكلمت 
عن محبتهم و غلاوتهم رغم بعد المسافات 
و الحمدلله ان اللى قولته وصل لقلبك
خليكى وسطنا يا خطورتى 
و متبعديش لو سمحتى  ى ى ى



(3)
و تعالوا هنا 
ايه بقى النوظام ؟!!!!
فيه ناس حلوة بتجاوب ع السؤال 
و دول شاطرين وبيسمعوا الكلام 
ومش هاجى جنبهم
انما العالم اللى بتتهرب
م الإجابة دى  .. اعمل فيهم ايه ؟
هوه انا بقولكو يا عيال اعترفولى بأسرار 
و لا اكتبوا الرقم الكومى و لا حساب البنك 
  و هبيعكو اللى وراك و اللى قدمكوا 
و اللى جنبكو ؟؟
و لا اييييييه 
اجيب الفلكة و أضرب
و لا استنى و الطيب احسن؟!!
نبقى شطااااار بقى و نجاوب 
ومتزعلونيش انا فرحانة بيكم قوى
قوى قوى البوست دا

-----------------------------------

انا هتشّرف .... إنى حاولت




This entry was posted on الأحد, سبتمبر 19, 2010 and is filed under , , . You can leave a response and follow any responses to this entry through the .

156 كــــلام بيطــبطـــب عـــلى قــــلبى و روحــــى

أسفة جدا
عشان البوست طوييييل
بس فيه كلام
مكنش ينفع مكتبوش
و جارة مزعجة
واستحملونى
بقالكم ييجى تلات سنين
خلاص بقى يعنى
الله !!!

:-***********************************************************************

ربنا يبارك ليكى وفى صحتك
ويهبك كل جميل
متفق مع كل حرف
وكل نسمات حروف الهجاء تشكرك
وما دام التدوين لا ينحدر بصاحبه او بغيره

او يتطرق لما يؤذى بنى الانسان او حتى باقى الكائنات الاخرى


التدوين طاقة خرجت للنور
فمن راى فيها الخير يحمد الله
ومن راى فيها الاجتهاد يشكر الله ويسئل زيادة العلم

وهكذا

لك مزيد من التقدير

صراحه البوست طويل
لا مش طويل بس دا طويل وطويل
بس يعنى قراءن مساحه كبيرة منه
عن حبى للتدوين والكتابه
فى اول المشوار مش كنت بحب البرامج السياسيه ولا قراءت الجرائد
ولكن بعد حرب لينان
حبيت السياسه وقرات الجرائد
واتخيلت قلت ياااااااااااااه
الراجل اللى بيكتب كل يوم ده الكلام مش بيتم من دماغه ولا ايه بالضبط
ولا اللى بيألف كتب ده
ايه الناس دى
فبعدها قلت لازم اكتب
اشتركت فى موقع لذيذ وهو لذيذ فعلا
وبعدها كتبت اشياء كتير
ومرت على حياتى ان انا عاوز اعمل مسلسل يدريس قريتنا العزيزه ومعاملتنا
دا حلم الطفوله او احلام اليقظة
ههههههههههههه
وبعدها عرفت التدوين

ف ا ت ي م ا

(:

يعنى فاتيما الغالية

يعنى مامت يوسف اللى نفسى أشوفه بجد

يعنى الجدعنة

يعنى الأمومة بجد مش بس كلام

بجد يا فاتيما

انت عارفه انا شعورى ليكم كلكم و ليكى بالخصوص

عارفه انا حبتكم قد ايه

منغير ما اتكلم

صدقينى انا بسببكم لسة متمسك بكل الحلو اللى جوايا

حاسس ان فى ناس تستحق دة

تستحق منى الحب و الأحترم و التقدير

و انى مقفل شباكى ابدا مهما كان

يارب يارب يارب يارب يارب

أكون عند حسن ظنك و ظن كل الناس الجميلة اللى عرفتها

بجد يا فاتيما مش لاقى كلام بس انتى عارفه

و فهمانى

(:

مع كل اعتزازى و تقديرى و محبتى لله

فيكم

ربنا معاكى يا فاتيما (:

فاتيما

دايما بقول ان المدونات عمرها ما كانت عالم افتراضي
لا دة عالم فيه من الاحاسيس الكثير
والتجارب البشرية الاكثر

برده انا دخلت عالم المدونات بالصدفة
ودخلتها تجربة وتعدي لاقيت نفسي ماقدرش استغني عن الكتابة
المدونة خلتني اقرأ اكتر
واكتب اكتر
ربنا يخليلنا بلوجر واهل وناس بلوجر
وربنا يفك كربك ويسعد ايامك

تحياتي لكي

لا بوست طويل ولا حاجة دا بوست زى الفل
************

المدونات كانت و ما زالت
من وجهة نظرى الغلبانة انعكاس لشخصيات
أصحابها و نفسياتهم
مميزاتهم و عيوبهم
بدءاً من اسلوب الكتابة سواء كان
نثر او شعر او مقالة
او حتى غنوة وكليب او صورة
اختيار التوقيتات اللى ينزل فيها التدوينات
طريقة الرد على التعليقات
و حتى عدم الرد عليها ...والتجاهل ومعناه
دا حتى شكل المدونة .... القوالب يعنى
شيفاها بتعبر عن شخصية كل حد فينا
لون القالب سواء كان غامق ولاّ فاتح
تغييره و مرات حدوث ذلك و معناه
أو الثبات عليه و التمسك بيه علطول
الصور والأغانى المصاحبة للمدونة
او اللى بتتحط مع كل تدوينة
الشريط الجانبى بكل محتوياته و تغييراته
و اكيد اكيد طبعاااااااااا..اسم المدونة
والجمل التعريفية بصاحبها
و صورة البروفايل و البروفايل نفسه
كلها حاجات بتقول كتير عن
صاحب المدونة دى
حتى لو محدش شافه و عرفه ف الحقيقة

تحياتى

يا تيما يا حبيبى ان ماكناش نستحملك انت هانستحما مين دا قدرى ومكتوبى انت وعشقى زمحبوبى انت ههههههههههههه


طبعا متفقه معاكى فى كل كلمه قولتيها

التدوين عدى مرحله انه جرنال خاص

مش مطلوب من المدونين انهم يكونو محترفين

التدوين حاله خاصه اى كان المكتوب فهو بيعبر بس عن وجه نظر صاحبه ممكن كا قراء نتفق او نختلف
التواصل الافاده والاستفاده شباك مفتوح على عالم كبير حياه بنتعلم منها بنقابل الوحش فا نعرف اننا لسه فى الدنيا ونقابل الحلو فانتأكد انها لسه بخير

ماقدرش ادعى معرفتى بكتير من المدونين
ولان اغلب اللى اعرفهم بنات وستات
والرجاله قليلين بس لغايه دلوقتى ماشوفت حاجه وحشه طبعا وخده حظرى مانكرش بس الاساس اللى شايفه احترام متبادل استفاده من اللى بقرائه عند حد او استفاده من مقابلتكم فى تجمع
عندك مثلا انا كنت شغاله هنا فى موضوع التبرعات لوحدى او انا ناس قليله
معاكم حسيت ان الدنيا بخير فى ناس ما كنتش اعرفه مهتمين بدا يبقى اكيد لسه فى ناس تانيه بردو ماعرفهمش لسه مهتمين بردو بيدكى امل اقسملك بالله
يوم ما خيخه نزلت موضوع ادهم دا انا مانمت عندى يأس رهيب وكنت كمان مكتئبه تخيلى اكلم محمد احكيله لحظه ادخل الاقيها بتقول حد دفع المبلغ كله
ليكى تتخيلى الشحنه الرهيبه اللى ملتينى بالامل تانى
اروح عن الصعيدى اقرا شعر جميل استمتع وامشى اتبسط اجى عندك الاقيقى فاتحه دراعك للكل ابقى سعيده اروح لستيته تهزلى مخى ارجع لتركيب يبسطنى ويصحصنى اوشوف سياسه فى عمل فنى اخدلى بلطه عن هيثم فى الفردوس
ارجع كانى قريت التاريخ كله
وغيره وغيره وغيره كل دى فايده بترجعلى
كل دا ومن غير اى مصالح محدش عايز من حد حاجه الكل بيكتب لنفسه وللفايده
حالات بشريه انسانيه بندعم بعض
نفسيا ومديا كمان ليه لاء
والاجمل اننا لما بنتعرف على ارض الواقع كل واحد عارف التانى من غير اى
تعارف ههههههههه

التدوين بقى حكايتى معه مش طويله بء بمعرفتى ببلوج تركيب وعملت الاكونت بتاعى ريتشارد كات هارت علشان ارد بس
ولما بقى يضيف مدونات عنده بقيت ادخل من عنده عليها ومن مدونه لمدونه لانى مابحبش القراءه فاعتبرت دى جرايدى اليوميه بقت انسانيه سياسيه ساخره فنيه بقى عندى كل حاجه
الكل كان بيقولى اعملى بقى مدونه وكتير من اخوانى الى كنت برد عندهم كان بيستغربونى لغاااااااااااااايه ماست الستات وهيثم اتكلمو عن موضوع الاسرى
ولانى عشت دا فى كلام ابويا الله يرحمه زمان
حاسيت انها بتاعتى وانى لازم اشارك بكلمه حتى لو محدش هايسمعها غيرى وخصوصا وانى مقتنعه بالقضيه
وفتحتها مخصوص علشان الواجب بتاع اسرى 67 بس ماقدرش ادعى انى بفيد حد
انا اى شعر او زجل بكتبه عارفه كويس انى مش محترفه بس بكتبه لانه مجرد احساس
حابه انى اشاركم فيه مش علشان افدكم
لاء علشان اتونس واستفاد انا برائيكم
وبعتبره دعم نفسى ليا
بس خلاص
تسلمى يابت يا تيما على البوست والبؤ الجميل اللى فى البوست

روحى ياشيخه ربنا يبارك لك
ده انتى حببتينى فى التدوين
هههههههههههههههه

عمر مدونتى 21 شهر يعنى لسه مش كملت سنتين

السبب فى فتحها انى اكتب احساسى ويوصل لغيرى وبس
اى كلام عبيط بس اهو بيأثر فى الناس أحياااااااااانا

للاسف انا اعتبر متوقفه عن التدوين نوعا ما والسبب هاخليه سر بينى وبينك لما اشوفك هاقوله لك

لكن مش هانكر انى عرفت من التدوين ناس كتير محترمه اتعلمت منهم كتير واضافوا لحياتى كتير جدا
وعرفت من خلاله اهم واقرب اصدقائى حاليا وللاخر العمر باذن الله (حنين القلب)
وكفايا ان التدوين خلانى عرفت يوسف روح قلب ماما وحبيته قبل ما اقابله

لكن
انا اكتشفت ان التدوين مش بس عالم افتراضى ده دنيا زى اللى بنعيشها فيها الحلو وفيها الوحش بعد ما كنت متخيله انه جنه
ومش هننكر ان التدوين اتغير عن الاول كتير
الاول كنتى تفتحى المدونات بشغف انك تقرى لناس جميله كلامهم اكتر من رائع
الناس دى معظمهم نوعا ما غابوا دلوقتى
ونسبه الاسفاف علت قوى
(مع احترامى لكل المبدعين انا باتكلم عن فئه معينه كلنا عارفينهم)
الراى ده عبر عنه كيمو بطريقه صحيحه انا متفقه معاه فيها
ادخلى شوفى
http://sotmser22.blogspot.com/2010/09/blog-post_11.html

فى النهايه و بصراحه
نفسى اقولك سر
قلمى مشلول






بدأ العد التنازلى باقى 15 يوم ياجمييييييييييل واشوفك

بحبك ياقلب البحر بحبك مووت

البوست ده طويييييييييييييييل

ده طويل قوى

ده انا بوستاتى العملاقه نص ده

انا فرحان انى قريت البوست ده

بحب انا اللى يكتب حاجه تشمل الناس جميعا فجاه كده

انا بكتب عشان اقول حاجه مبعرفش اقولها

لما بكتب بقول انا

وبقول حسيت

مبلقيش حد اقوله غير مدونتى

حتى اللى بيعلقوا برضك مبيبقوش عارفين انا عاوز ايه

ولازم بس بتريحنى

بحس انى كاتب وانا مكنتش عاوز ابقى كاتب

عادى

بس حاجه ملكى

سلطتى

دى ارضى انا

وفى ناس بتعجب بارضى وبتيجى تشوف الزرع بتاعى

وفى ناس بتروى

وناس تدوس على الزرع

ناس تكلمنى ونتعاون ونزرع مع بعض


ناس بعد ما بنتعاون بنسيب بعض بقى عشان هو زهق من الزرع

بس مفيش اغنام صراحه

عموما

انا بحب التدوين لانى بكتب حاجات مكنتش اعرف انى اقدر اكتبها

وفى ناس بتقولى منعرفش ازاى انت كتبت كده

فعشان كده حسيت انى برتاح فيها

شباكى البلوجرى بيطل على جيران ليا

وجيران كلهم حلوين

حتى المنافقين اللى بكرههم والرخمين والاشرار ومحمود المليجى

بس عالم تانى الواحد عايش فيه

بيريح لما الواحد يلاقى حاجه يهرب ليا

بيت تانى فعلا يقول فيه كل كلامه

بس

وانا منور بقى ومتابع كمان

فاتيما الطيبة
ام يوسف امى الحنونة

رأيك وعرضك للموضوع سليم جدا
انا عن نفسى هدفى من المدونة هوا التفكير وفهم الحياة ومحاولة التغيير فى الآخر بأى شكل
سواء بالاسلوب عنيف اللهجة اللى استخدمته من قبل كدا اول ما بدات اكتب
او باسلوب الخواطر
او بعرض مواقف مؤسفة فى الحياة
او فى حياتى الشخصية
او بتحليل مشاكلى الخاصة من خلال نظرة للحياة
انا مش بفتح شباكى غير لما بلاقى نور من الشمس ممكن يدخل ويدفينى ويدفى روحى ونفسى
والاكيد ان البيت الذى تدخله الشمس لا يدخله الطبيب
فعشان كدا بفتح شباكى التدوينى احيانا
عشان اختلط بالناس لانى تقريبا مليش علاقة بحد
وكل علاقاتى حددتها باكبر شكل ممكن
لأنى فعلا قررت انى ميقربش منى غير الشخصية النقية الطاهرة من جوا اللى تستاهل
الانسان الحقيقى اللى ربنا خلقه على الفطرة
انسان
سواء شاب او فتاة او شخصية محترمة مهما كان صاحبها او صاحبتها
انا شايف بنفسى ناس اختفت من التدوين وبجد اتاثرت جدا باختفائهم
وبطلت اكتب احيانا
لانى فعلا كنت حاسس ان لما حد فيهم بيعلق
انى بلاقى حد فاهم بجد وبيقدر يتواصل ويقول وجهة نظر
هقولك على حاجة
اللى قدر يمشى فهوا اكيد لقى حاجة اهم بكتير من التدوين ربما انقاذ لحياته
زى ما انا عملت قبل كدا وقللت كل اللى بكتبه عالمدونة تماما لما لقيت حياتى بدات تتزن بشكل كبير عالجمب وبرا المدونة وبرا عالم النت
ولما الحياة كشرت عن انيابها انا ملقتش لنفسى غير مدونتى انى الجأ ليها وأحكى لها وأناقشها
أنا إتشرفت بيكى كجارة سواء انا كملت أو إختفيت أو حتى متت
إتشرفت بيكى جدا
وسعيد إنى فى يوم جيت وعلقت هنا وقلبت فى الارشيف بالساعات او نزلت اى لقاء اتجمع فيه المدونين لعمل الخير
سعيد جدا
انا بطبيعتى الفقرية كنت خايف انى الاقى خبر وحش فى اخر البوست
لكن الحمد لله طلع بخير فى الاخر وطلع بسؤال :)
ودا شىء يسعدنى جدا ان مش كل حاجة بتنتهى نهاية مؤلمة :)
ودى اكتر حاجة بحبها فى البوستات هنا
ان مهما كانت الاحداث
فالنهاية ليست مؤلمة لان الحق دايما بيرجع لأصحابه
إلى كل من قرأ لى أو عرفنى وبيقرا التعليق دا
أحبكم فى الله
شاب فقرى

انتي علشان مشاعرك قويه تجاه الاشياء بتحسي بكده

بس في ناس مدوناتهم موش بتكون قريبه منهم كده

بس الاكيد انك قريبه من الكل يا تيما :)

تحياتي

بحب انا اوى بوستاتك ياخالتو لما بتفتحى حوار بحب ارغى عند اوى اوى فوق ماتتصورى

البوست انا مش حسيت انو طويل عادى يعنى لازم يبقى كدة عشان توصلى وجهة نظرك

انا لية بدئت فى التجوين ولية دونت

طبيعى انى دخلت عالم التدوين بالصدفة البحتة انا فى الاول عرفت التدوين من موقع جيران كان تدوين على قدة كدة بس عجبتنى الفكرة وشوية شوية عقبال ماعرفت موقع بولجر نقلت مدونتى
لقيت انى ممكن اعبر عن نفسى افضفض احس بكيانى شوية مع مدونتى وكنت بفرح اوى لما اكتب بوست ولا حاجة
ولما حد يعقلنى بحس انى مهمة وحد بيسمعنى

عجبنى انى اعقد اقرى فى التدوين بجد كنت بستفيد لما اقرى خواطر او قصة حد او لو مش استفد على الاقل كنت بستمتع

اول مابدئت التدوين كنت فاكرة انى مدونتى هتبقى سرية ومش هخلى اى حد يقراها شوية شوية بقيت افتح شباكى ولحد دلوقتى هوة مش مفتوح اوى برضة دلوقتى قابلت بس تغريد صاحبة مدونة دموع القمر لانى اكتشفت بالصدفة انها من محافظتى ومن بلدى ودى كانت صدفة بجد عمرى مااتوقعها


وزى مادخلت مدونة حضرتك من تلات سنين وانا كنت لسة مخلصة ثانوية عامة وداخلة على الكلية وقاعدت اقرى فى مدونتكاسبوع كامل وانا مش مصدقة القصة والحكاية ومنبهرة بالناس اللى بترد عليكى وبشاجعتك انى قادرة تعيشى بعد كل اللى حصللك
كنت لسة مراهقة شايفة الدنيا بمبى مش تواخذينى


انا شايفة ان التدوين دة عرفنى على ناس حلوة كتير اتبسطت اوى انى عرفتهم حتى لو كانتت معرفة سطحية وانى عمرى ماهقابلهم بتمنى انى اقابلهم وانى اكون موجودة فى اجتماعات التدوين اللى بتعملوها بس طبعا بعد المسافات بيمنعنى
وصحيح ياخالتو فتيما انا ماعرفكش
ومش قابلتك لحد دلوقتى بس بحبك فى الله وبتمناللك كل خير ز مابحب اى مدون او مدونة كدة لوجة الله شعور غصبن عنى
انا بحبك وعارفة انك برضة بتحبنى فى الله
الله يوفقك ويسعدك قوللى امين
_________________

عندى سؤال صغيور انتى مرة من زمااااااان كنتى عاملة بوست بتسئلى فية عن اية الكتب اللى بنحبها
وايىة الكتب اللى قرينها فين البوست دة اصلى اعدت ادور كتير والمدونة ماشاء الله مليانة بوستات مش عرفت ادور كويس
ممكن بس تبعتيللى الرابط بتاع البوست

سلامى ليكى ياخالتو

بدايه يا فاتيما اول ما قريت العنوان افتكرت قصيده محمود درويش
(لا أريد لهذه القصيدة أن تنتهى ) حقيقى الواحد بيفكر كتير يتوقف عن التدوين والكتابه اصلا فى المدونه بس فى الاخر بقول القصيده دى لا تنتهى

من زمان متابعه ضربه شمس (صفحه متخصصه معظم اللى بيكتبوا فيها مدونيين فى الدستور الاسبوعى كل اربعاء)
وما كنت اعرف المدونات ساعتها بس نقلت منها كلمات هكتبها حالا وكان السؤال فيها للمدونين اللى مش فاكره الصراحه اساميهم دلوقتى لانى نقلت بس اجابتهم تحت عنوان ضربه شمس

قالوا يا ستى مقولات مهمه هى اجابتى تماما عن سؤال
ليه انا اصلا بدون- او ليه ليا مدونه؟
1-( ليست بالضروره للمدونه رساله - فهى ليست منبرا نقف عليه )

2-( أدون لأننى أحتاج الى فسحه من الحريه )

3-( لا توجد قوانين للمدونه فنحن من نسن القوانين إنها مساحتنا الشخصيه التى نعبر عنها بعفويه)

4-( لا تقل أنا لا شئ بل أنت شئ كما أنا شئ والاخر شئ)

الفكره فى المدونات انا سمحت بعرض اى شئ تريده او تفكر فيه وبالنسبه لى هذه الاشياء التى قد لا تهم احد وجدت
فى المدونات ان هناك اشخاص فى اماكن أخرى (خارج محافظتى على الاقل ) يشاركونى فيها بعد توقعى انى افكر فيها مع نفسى وانا فى عالم والاخرين (على الاقل الى اعرفهم) لا يفهمون فيها شئ وفى عالم اخر تماما
ووجدت المدونين (اللى متابعاهم تحيدا ) فى الاغلب يكتبون ما اريد بكلمات لم استطع تجميعها بدقتهم ولكنها تطابق تماما افكارى
دا السبب الرئيسى لاستمرارى فى مدونتى

وبداياتى كانت صدفه بردوا بعد ان عرفت من منتدى كنت متابعاه كيفيه عمل مدونه وقعدت فتره حتى تعرفت على المدونات الصديقه لى الآن والمتابعه لهم

صراحه لم يكن لى هدف محدد زى ما قلت فى الاول فقط اعتبرها شئ ترفيهى ولكن حاليا اصبحت جزء من متابعه الحياه بمنظور اكبر وخاصه قضايا المجتمع اللى بتناقش فى المدونات الجاده والسياسيه
والحركه الادبيه التى اهتم بها كثيرا

وبالنسبه للسئ او الحسن هى زى الحياه فطبيعى الحياه للاسوأ ولكنى بحمد لله لم
احتك بالجانب السئ دا لان المدونه حتى الأن بالنسبه لى عالم افتراضى لا اتوقع منه الكثير فى الحقيقه

اما من عرفتهم عن قرب او شفتهم فى الواقع لا يختلفون عن المدونات التى اتابعها اعتبرهم اصدقاء فعليين فأتقبل منهم كل حالاتهم كما اريد الاخرين ان يتقبلوا منى كلا الجانبين

طولت اوووووى أنا مش كدا؟

وانتى بلا شك اصبحتى من اصدقائى الفعليين وان شاء الله تيجى فرص تانيه للتقرب اكتر

كل التحية

والله انتي اللي كلامك طبطب على قلبي و قلوب ناس كتير أكيد ...

أنا دخلت عالم التدوين بعد سنوات من عالم مجموعات الياهوو والمنتديات ...كنت اتعرضت لتجربة في المجموعات شبه سياسية ( حطيت مقالين لأخت في الله عن قتل اليهود للأطفال الفلسطينيين ÷ قوم إيه قفلولي المجموعات والإيميلات وعملوني suspended

قوم إيه عملت إيميلات جديدة ومجموعات جديدة و رحت حطيت مقال عن سجن أبو غريب جالي من العراق مباشرة

قوم إيه حصل نفس اللي حصل

وكنت تعبت بقى من ردود بعض أعضاء المجموعات : مرة شتيمه ومرة إهانة ومرة طلب إضافة على الإيميل

قامت أم البنات الحبيبة جزاها اللي خيرا جرت رجلي لعالم التدوين و أنا قبلها كانت كل ما تغيب عني أقولها سيبي المدونات وركزي معايا في الماسنجر

دلوقتي معرفش الماسنجرات وعايشه في المدونات وفي منتدى نون والقلم ( اللي أغلب أعضاؤه من اهل التدوين )

بس خلاص

خالص تحياتي

مساءك جميل ... قريت البوست
وعجبتني الفكرة ...
علشان اجاوب عليكي وعلي اسئلتك الاخيره في البوست ، حاحط عندك حاجتين
الحاجه الاولي ...جزء من مقدمه كتابي ( سيده محترمه دخل اليها من نافذه الحلم ، عن مدونه الشوارع حواديت ) لاني كتبت فيه حكايه التدوين والكتابه ....
---------------------
اكتب منذ سنوات بعيدة..... اكتب عن كل شيء، ويتحول كل شيء اراه احبه اكره انفعل به اسمعه اتذوقه اانس اليه يتحول لحروف وكلمات وجمل وعبارات... اكتب عن حالي وحال الوطن، عن احزاني وافراحي، عن نفسي عن الاخرين... منذ سنوات بعيده اكتشفت هذا الامر في نفسي، تحتلني الكتابه واسكنها، اعيش في عالمها وتعيش في، اكتشفت ذلك الامر فظللت اكتب طيله الوقت، اكتب قصاصات خواطر احاسيس افكار، اوراق ودفاتر املئها بحروفي وكلاماتي واتركها تتلظي بالاهمال، انا قارئها الوحيد، لااكشفها علي الاخرين ولااطالعهم عليها، كان الكتابه سري الشخصي، اكتب ولا انشر بايه طريقه، اكتب لنفسي وكثيرا ماكنت اعود لكلماتي تدهشني كاني لست كاتبتها كانها ولدت من رحم غريب لااعرفه، لكن احتفاظي بالسر لم يوهن اندفاعي في الكتابه وحماستي لها واستمراري فيها، فانا احب الكتابه وتسعدني، فاكتب واكتب، واقرأ مااكتبه فاظنني كاتبه واسعد اكثر بحروفي، لكني لاامتهن الكتابه ولا احترفها ولا امارسها علنا، اظنني كاتبه تكتب في الخفاء مع نفسها، اكتب لنفسي مع نفسي لكني احترق بالغيرة من كل هؤلاء ممن يكتبوا وينشروا ويشتبكوا مع القراء اعجابا ومدحا وذما وتقريظا وغضبا وفرحا، احترق بالغيره لاني لااملك جراءه النشر مثلهم ولااكف عن الكتابه وانصرف لشئوني الاخري واخرج من زمرتهم، احترق بالغيره فاعبر عنها بكلمات تدفن في الادراج مع بقيه اوراقي...

سنوات وسنوات ظللت اكتب ولاافكر في النشر، احس عالم النشر غريبا ليس لي مكان فيه، ومن انا حتي انشر مااكتب، ومالذي يدفع قاريء لاقتناء مااكتبه وقراءته !!! ظللت اكتب ولاانشر ولاافكر حتي في النشر لكني في نفس الوقت وفي اعماقي اتمني عيون وعقول اخري تطالع مااكتبه، اتمني ولاافعل شيئا !!!

لكن الكتابات المدفونه في الدرج تبكي تنتظر انصافا وانا احترق شوقا لقاريء يطالع ماكتبه ويقول فيه رايه، لكني خائفه من اعين الغرباء ومتعاليه علي دور النشر ومستشاريها بما منحوه لانفسهم من حقوق في قراءه الماده المطلوب نشرها وتقييمها واعاده صياغتها ان لزم الامر، خائفه ومتعاليه لكني احترق شوقا لقاريء يطالع مااكتب !!! لكني لاافعل شيئا !!
حتي زارتني يوما واحده من صديقاتي في منزلي احتسينا القهوه وتبادلنا احاديث كثيره وتطرقنا لموضوعات شتي ومر وقت لقاءنا لطيفا وانتهي، وودعتني وقبلتها ووقفنا علي الباب ننهي اخر كلمات لقاءنا، لااعرف مالذي دفعها وقتها لاخباري بانها قرات كتاب جميل اصله مدونه علي الانترنت، قالت هذه الجمله ببراءة وغادرت منزلي كانها لم تفعل شيئا !!!

لكن حياتي تغيرت منذ ذلك اليوم !!! بقيت في مكاني تدوي في اذني عبارتها " مدونه علي الانترنت ".. نعم ربما تكون هذه المدونات هي الحل الجميل للمشكله التي اعاني منها ولاافكر ابدا في حلها، نعم، سانشيء مدونه علي الانترنت اعرض وانشر فيها كتاباتي، وليطالعها من يطالعها، لايهمني، ربما تعجبه كتاباتي وربما يسبني، هذا ايضا لايهمني – هكذا كنت اطمئن نفسي واساعدها للتغلب علي رعبها وخوفها وقراءه الاخرين - سانشر كتاباتي في الاثير، حيث لايعرفني احد، ساخرج اوراقي ودفاتري من مقبرتها وانشر نصوصها امنحها فرصه ولو كانت نظريه بالعثور علي قاريء يطالعها ويتفاعل معها..... اعجبتني الفكره وانتشيت !!!
وبدأت رحله التدوين واطلاق سراح كتاباتي ونشرها........ وهاهي واحده من مدوناتي الاربع " مدونه الشوارع حواديت " بين ايديكم !!!
وده اللينك بتاعها
http://miro18359.blogspot.com/p/blog-page_29.html

لما دخلت التدوين دخلت ف وقت البدايات وانتى عارفة كان فيه وقتها مجموعة من الوحوش اللى معظمهم غاب عن الساحة ف الوقت الحالى

فاكرة لما كنا بنتنح قدام اللى مكتوب وكتير منهم ماشاء الله بقى ليهم كتب عالساحة

من يوم مدخلت التدوين ولغاية يومنا هذا وانا مع كل سطر بقرا بتعلم حاجات كتيرة وكتير قوى دماغى بتتمخول من قدرة البشر العجيبة على الكتابة والوصول بالأفكار لينا بمنتهى البساطة واليسر وببقى ف منتهى السعادة وانا متعلمة حاجة جديدة تخلينى ابص للواقع بشكل أفضل لانى دايما بحب الحاجات اللى تخلينى أبص للدنيا بمنظور مختلف وتخلينى أعيش أنا واللى بحبهم بشكل أفضل

التدوين عرفنى بمجموعة من الأصقاء المقربين اللى الواحد لو دور طول عمره مكنش هيقدر يلاقى زيهم بالسهولة دى - الواحد بيعيش ويقول مفيش أصدقاء بس سبحانه القادر أدالنا ناس قلوبهم من دهب

أنا شخصيا مبعرفشى أكتب بوستات وانتى من اكتر الناس العارفين بده لكن انا عادة او يمكن دائما مش بعلق عند اى شخص غير لما بيستفزنى الكلام لدرجة انى اضيف حاجة او بحس انى مبهورة فعلا

شباك يوسف - روح قلب ماما - ادانا شخصية شافت من الالم ما لا يتحمله اى شخص فينا ولكن تيجى هيه وبمنتهى الصبر والحكمة تعلمنا كل يوم حاجة جديدة وتقولنا احمدوا ربنا قوى عاللى انتو فيه وتمسكو بيومكم الجميل اللى لسه متعكرشى صفوه

بالطبع أشكر التدوين جدا على اول يوم لقاء حريمى عملناه لان فيه اتقابلت بمجموعة متميزة للغاية الى الان انا فخورة انى اعرف قلوب الناس دى

كالعادة انتى شخصية متميزة للغاية وسعيدة بأن لكى جزء من تكوين قلبى انتى وآخرون

البوست متميز للغاية ولو اى حد عاوز يعرف ما معنى التدوين يبقى اكيد لازم يتحط لينك البوست ده


تحياتى
هبة

سؤال مهم بسأله لنفسى دايماوأنا بزور كل مدونة...يمكن صاحب المدونة مش بيجاوب اجابة مباشرة..لكن بلائى الاجابة فى كل كلمة مكتوبة فيها...

تصنيفك للمدونات شامل جدا..دعوية وسياسية وادبية و... بس عارفة..أغلب المدونات اللى زورتها كنت بلائى فيها اجابةمشتركة..أول اجابة كنت بشوفها بين السطور الجملة دى(أنا محتاج صديق أتكلم معاه)..المدونة صديق بيفتحلنا شبابيك كتير على أصدقاء كتير دورنا عليهم في حياتنا وأخيرا لائينهم فى عالم التدوين..

يمكن من دقائق كنت بسأل نفسى ليه أنا بحس ان أصحاب المدونات اللى بزورها قريبيين اوي كده...ليه لما دخلت مدونة ولئيت صاحبتها بتحلم حلم حلمت معاها وليه لما لئيت مدونة صاحبها هش هيكتب فيها تانى فضلت يوم مكتئبة ومش عارفه اعمل حاجه..ليه بفتكرك وانا ساجدة لربنا وادعيلك..وبشوف يوسف في وشوش الاطفال الجميلة واقول يارب جمعكم..ليه بئيتوا دنيتى..لئيتك كاتبة الاجابة فى البوست ده.. ( قلوب و مفتوحة على بعضيها) ..بجد تعبير جميل أوى وصف احساسى بالتدوين وأهله..

كفايه كده بأه علشان انا طولت أوى

احنا كمان بنحبك أوى يا فاتيما
ربنا يفرح قلبك دايما زى ما بتفرحينا بكلامك اللى بيطبطب علينا :)

بتعجبينى اوى يا طماطم لما بتكونى متفائلة:)
متفقة معاكِ طبعا فى كلامك
أما عن
امتى شباكى انفتح ؟
تقريبا انا وانتِ فتحناه مع بعض فى نفس السنة ومش متأكدة فى نفس الشهر ولا لأ:)
كان يا ستى فى فبراير 2008
و كان السبب بالصدفة البحتة برضه:) بس لما عرفت ان فيه حاجة اسمها كده حبيت أوى أنى أطلع اللى بكتبه على الشاشة يمكن حد يقرأه ويستفيد منه أو على الأقل يشاركنى أفكارى وخبراتى البسيطة فى الحياة

والحمدلله شايفة أن مدونتى تعتبر أحسن حاجة حصلتلى وكفاية انى اتعرفت على ناس كتير جميلة وبقى لى أخوات كتير بحبهم ويحبونى من غير حتى مانشوف بعض و دى بالنسبة لى نعمة كبيرة اوى
و مش فاكرة فيها حاجة وحشة لأن الحلو كان أكتر بكتيير

بحبك فى الله

تيماااااااااااااااا حبيبى
وحشااانى اوى بس هانت على راى دودو واشوفك فى اللقاء ان شاء الله
لالالالا مطولتيش ولا حاجة
احنا اللى هنطول:))
انا واحدة من اللى قفلوا شباكهم
بس ممكن تقولى قفلته شوية
وحشتنى الكتابة وحشتنى مدونتى جدااا وحشنى تعليقات اقرب الناس ليا اخواتى واصحابى
وحشنى ريحة المدونة
انا عرفت التدوين بيكى ياتيما وانتى عارفة الحكاية دى عرفت من خلال يوسف وحبك ليه واملك انه يرجعلك
راقبت من بعيد كان جوايا احساس لازم يتكتب عملت المدونة وعبرت وشفت نااااااس وقفوا جنبى وناس اتخلت عنى
وشفت الوحش والكويس
وده الحمد لله قوانى اوى متكسرتش
بظبط فى مدونة دلوقتى ولسة منشرتش فيها حاجة
بس هتبقى تبع سلسلة رحيق الورد
الكابة ادمان صعب تبعدى عنها
مهما حاولنا نوارب الشباك
التدوين مش افتراضى عارفة ليه انا حسيت بده يوم اللقاء لاننا كنا كأننا عارفين بعض دم واحد
ملقتش المشاعر دى موجوده فى اى حد تانى غيرنا احنا وبس
صدقينى وحشنى اصحابى اوى ووحشتنى الكتابة جدااااااااااا
بس لسة بعلق اهو وادعيلى بس اخلص المدونة الجديدة
بحبك ياتيماااااااااااااا ومتزعليش منى لانك بتحسينى من كلامى وعرفانى اوى

وشكررررررررررررررررا ليكى بجد لانك ومضات نور فى حياتنا

السلام علكم ورحمة الله وبركاته

انا شايف ان البوست ده كمين لاى قلب بيحب التدوين

عملت المدونة صدفة كتبت فيها اول وااصعب بوست صدفة اتكلمت مع اول حد صدفة وشوفت بعض الناس صدفة ، كان هدفى انى محدش يشوفنى او يعرفنى نهائى بس فى حاجات حاستها خلتنى اجرى واشوف واتاكد ، احساسى ده صح ولا غلط ، ولاقيته صح حبيتكم اكتر بس محبتش اختلط بحد ، غلطان عارف بس طول عمرى باغلط بالصدفة ،
كنت باكتب قليل جدا بعد المدونة بقيت باكتب اكتر عمرى ما تخيلت انى اكون باكتب كتير كده ايا كان اللى باكتبه واحدة واحدة لاقيت ان الكتابة بقت احمد واتطورت وبقى ليها احلام ولازم تتحقق وباذن الله هتتحقق ،
سمعت وشوفت ناس التدوين حياتهم وناس وخداها هواية وناس بتلعب به وناس بتلعب بمشاعر الناس بس مااهتمتش واكتفيت بمعاملتى لغيرى ، مدونتى كلها قطط لانى باموت فى القطط وعمرى ما غيرتها لانى مش باحب التغير ولونها اخضر لانى باحب اللون ده ، شبابكى مفتوحة لاى حد بس ممنوع حد يدخلها لانى لا املك فى نفسى شىء ، خلاصة فترة تدوينى كلها انى معتبركم شىء واقعى بكل ما فينا

أول زيارة .. بس البوست ده حلو وإحساسه صادق جدا . تحياتى لكى

محمد ناصر الدين الهلالى

بصي مش هاقولك غير بحبك ف الله
يا أحلي فاتيما ف الدنيا

المدونات في رايي المتواضع ... هي التطور الحديث للدفاتر القديمة ...بداية من النقوش علي الجدران والبرديات ... حتي مذكرات شاعر مغمور .. او مراهق يبحث عن ذاته ... وكما ان الدفاتر القديمة تحوي ما ينفع وما يضر ... فبها خطت المزامير والوصايا والحكم ... وبها ايضا نقلت اسفار اليأس واناشيد الكراهية .. من سحر اسود وافكار هادمة .... لعل المدونات فقط تتميز عن ما مضي ... بانها معلنة علي الملأ ... وكل امرئ بحسب اختياره ... عليه ان يتعلم فطرة النحل في اكتشاف مواضع الشهد , والبعد عن مكامن الخطر .... فالكلمات اما سواعد بناء ... او معاول هدم .

لكن تظل المدونة في النهاية ... تجربة شخصية كباقي الدفاتر القديمة ...رغم التواصل ... والتفاعل .. والتلاحم احيانا.. لكنها ليست كقاعدة ... انعكاسا صادقا لملامح الانسان ... فضوء القمر ليس دليلا علي روعته .

تحياتي في مرور اول

فـــاتيــما


بوست اكتر من رائع مشاعر - كلمات - حاجات كتير يحتويها البوست مش حسيت انه طويل بالعكس كان نفسى يكون اطول لانه بكل تاكيد كان هيحتوى على مشاعر اجمل .........

عمرى ما كان يجى فى بالى انى اكون من المدونين وما كنتش اعرف يعنى ايه مدونه واتعرفت على عالم تركيب وعجبتنى الفكره اوى اوى وطبقت فيها كل اللى درسته فى النقد الفنى بعد كده عرفت مدونة صعبان عليا حالنا وكانت الدكتوره نورا كل شويه تقولى عاوزه ازورك فى المدونه المهم فى التفره دى المفروض كنت هاسافر الى مكان ما واشتغل فى مجال الاعلام وفجاه الموضوع وقف قولت للولا ايه رايك نعمل مدونه فكرنا شويه قالت ماشى وفى ليله وضحاها عملت المدونه واطلقت عليها الاسم ده لانه كان اسم برنامج احلم باعداده وقد كان ...

تعرفت على ناس اغلى من الماس فيهم اللى قربت منهم وفيهم اللى قولت خلينا بعيد نعلق وخلاويص بجد اكتشفت عالم غريب وفى كل يوم اكتشف ناس جميله
بجد عمرى ما كنت اتخيل ان ده حال المدونين وان فى ناس كده بجد ....

انا رغيت كتير اوى معلش بس بجد حاولت اختصر فى الكلام على قد ما اقدر

تسلم الايادى يا احلى وارق واغلى فاتيما فى الدنيا كلها

زهراء

صباح الخير حبيبتى
معاكى فى كل كلمة قولتيها والله
وموضوع فى غاية الاهمية طبعا
مدونتى فتحتها يونيو 2007 لما عرفت طريق المدونات على النت بمساعدة أحد اصدقائى اللى حببنى فعلا فى ان يكون لى مدونه وشجعتنى على كدا, بكتب فيها ما يجول بخاطرى وفكرى مش مهم انى اكون محترفه الاهم انى اعبر بيها عن نفسى او اكتب اى شىء فى خيالى او حقيقه وانى اكتب كلمات بسيطه اعبر بيها عن اى شىء بداخلى
المهم انى اكون مرتاحه للى بكتبه
وزى ما قولتى صورة او اغنيه بنعبر بيها عن نفسنا..
ابتديت التعليقات يا فاتيما ولو تفتكرى زمان عندك فى اول افتتاحك للمدونه وبعض المدونات الاخرى الجميله
سيبت مدونتى ومكتبتش حاجه وابتديت التعليقات عند المدونات الاخرى وفى نفس الوقت اكتب فى اجندتى الشخصية كل ما يجول بخاطرى ومنشرش حاجه .. مش عارفه يمكن كان فى البدايه كنت خايفة او قلقانة لانه كان عالم غريب بالنسبة لى بس بعد كدا ابتديت اكتب وجات فترة عليا مسحت كل البوستات وضلت اعيط بعد عملتى السودا دى فى مدونتى وابتديت اكتب تانى والحمد لله مش هقفلها تانى الا بقا لو ربنا افتكرنى
لانى مقدرش دلوقتى ابعد عن بيتى التانى اللى باخد فيه راحتى فى التعبير عن نفسى ... وارتباطى بناس كتير جميله وطيبه ومقدرش استغنى ولا ابعد عنكم خااااااااالص
ولا عن مدونتى
بحبكم يا أجمل صحبة ُ عرفتها فى حياتى
بحبك يا فاتيما

صباح الورووووود الجميلة علي احلي فاتيما واحلي يوسف
في الاول كلامك كله حلو اووي وفعلا حقيقي جدا
تعرفي انا عملت المدونة الاول عشان اعرف اعلق ف مدونات اصحابي لانهم كانوا كتير يتكلموا عني وكتير بيحبوا يشوفوا رأي في اللي كتبوه
بعدين كمان كنت شايفة اني لازم اشوف مقالاتي وقصصي شكلها اية في عيون ناس معرفهاش .....تقريبا بدأت 2008 بس بدأت تدوين فعلي ف 2009 والحمد لله بدأت افهم واعرف العالم ده بدأت اكون فعالة في شيء انا حباه من خلال اني اعرض حاجات جويا وحاجات مجتمعي وبلدي اللي بحبها ونفسي تكون احسن وتتغير للأحسن .....بدأت اعرف يعني اية لقاء مدونين ولقاء خير ....يعني بجد استفدت جدا ويمكن اكتر مما افدت المدونين بس ناوية والنية لله اني علي اد ما اقدر اساعد في الخير وبجد بحسدكم علي عمل الخير
حبيبتي يا فاتيما ....بجد بحبكم كتير اوووي وانت عارفة اني كنت تعبانة الفترة اللي فاتت بس الحمد لله فرحتي بالنجاح نسيتني تعبي
بحبك موووووووووووت

(:
البوست جميل بجد ...
خلتيني أفكر .. شباكي اتفتح ولا لسة (:
يمكن يكون متوارب (:
بس بجد خليتيني اتفاءل
تحيتي

يااااااااااااه يافاتي

دايما بتغوصي جوا الواحد كدا بخفة طفلة رقيقة اوي

انا يافاتي فتحت شباكي في نوفمبر 2007 بالاكونت دا

http://www.blogger.com/profile/06277033864840445211

وكنت مشتركة في مدونة ومشيت ايام وجت ايام كنت فيها مشغوله جدا بالدراسة

وكانت تعتبر الفتره دي قافله فيها بلكونة النت بتاعتي اصلي من النوع اللي بزاكر يبقي بزاكر ولما خلصت في يونيو 2008 فتحت الشباك تاني

بالاكونت دا

http://www.blogger.com/profile/09048953537797444566

وكان بمدونتين اسمهم

ضي القمر اللي اتعملها هاك وضاعت في الوبا حسبي الله ونعم الوكيل كل اما اافتكر ازعل بحرقة علي الايام بتاعتها والتعليقات والهزار وكل حاجه

والمدونة التانيه كانت ايام زمان اللي بجد زعلانة اني سايبها دلوقت بس ناوية انشطها تاني باذن الله

بعد الهاك عملت عالم مولان بالاكونت الجديد دا

اللي بقيت ارد بيه

اما السبب فاني كنت عاوزه اتكلم واقول علي السلبيات اللي بشوفها وانا ماشيه في الشارع في البيت في التليفزيون اي حاجه بلاحظها

وفي نفس الوقت كان نفسي اخلي الناس تقرا تاريخ وتحبه

اصلي كنت بتضايق اوي لما الاقي حد بيقول مش بطيقه

اينعم دلوقت انا بئا عندي احساس فظيع مسيطر عليا ان مش بئا في اي فايده لا في دراسة التاريخ ولا اي دراسة تانيه لكن بحاول اكسر الحاجز دا دلوقت

ومش كنت اتخيل اصلا ان ممكن حد يفتح الصفحة بتاعتي مش انه يعرفني

بس اي مكان زي ما فيه حلو فيه شر

زي ما قبلت اني افتح الشباك لازم اقدر اتقبل كلام الوحش قبل الحلو

لازم اتقبل اي شئ واتحمله واكون قده

بعدت كتير وعلي فترات متقاربة او متباعده لكن كنت في الاخر بفتح الشباك وبضحك زي الاول

اتعلمت كتير من شبابيك جيراني وساعدوني كتير في اني امشي ومش اغلط

انا مش ملاك ماشي علي الارض ولا شيطانه في نفس ذات الوقت

انا انسانه بغلط وبحاول اصلح الغلط وابعد عنه

بعترف اني زعلت ناس كتير مني وبعدت عن ناس بدون سابق انذار او تنبيه ولسه متواصله مع ناس واهووو الشباك مفتوح ولسه بكتب وبدون

الله اعلم الفتره الجاية هكون فيها عايشة وبدون ولا لا هيحصل فيها ايه الله اعلم

بحبك اوي يافاتي

علي فكرة لحد الان ماما مش عارفه تخليني احب اللبن :)

بوست عبقرى ياطمطم
الدستور ونوارة نجم وعايزة اتجوز هما اللى عرفونى على العالم الرائع ده
وفى ليلة ماشفتش فيها نوم قررت انى اعمل مدونة انا كمان زى نوارة
وضغطت على الرابط السحرى فى اعلى مدونتها اللى اسمه انشاء مدونة اليكترونية وطبعا كانت معلوماتى عن البلوجر اقل من الصفر بشوية

طيب ليه عملت المدونة
علشان اتكلم ياطمطم
اتكلم واقول كل الحاجات اللى مضايقانى وغايظانى
علشان أحس انى بعمل حاجة تانية غير روتين الحياة والشغل العادى
علشان حسيت ان التدوين فرصة عظيمة جات لى انقذ الباقى منى
حسستنى اوقات كتير بعيوبى
بعصبيتى
انى بطلت أقرأ
انى نسيت اللى قرأته
انى محتاجة الحق نفسى بسرعة جدا وانميها علشان وقفتى مكانى هتضيعنى

والاهم علشان أصحى الحلم القديم قوى
انى اكون صحفية

الفرصة هنا لترقية النفس كبيرة قوى
وخصوصا مع الناس الجميلة اللى بعتبرهم رزقى من عند ربنا اننا نبقى فى طريق واحد

مدونتى ايه بالنسبة لى
كنت دايما بقولهم انها بنتى حبيبتى
غالية عندى حتى فى الفترات اللى بسيبها فيها
العالم السحرى اللى دخلتنى فيه المدونة
جميل شايلاه لعمنا بلوجر طول حياتى
ازاى كان ممكن اصدق انى احب ناس بالطريقة دى من غير مااشوفهم
كنت متأكدة تماما وانا بعملها انى علاقتى بالناس هتكون افتراضية ومحدودة
ومتخيلتش انى ممكن ارتبط بالتدوين وأهله كده
وقلبى يوجعنى عليهم بالطريقة دى
وافرح علشانهم بالقوة دى
حاسة انى عايشة فى دنيتين مش واحدة
وبحكى للدنيا الحقيقية عن اللى بيحصل هنا
دايما كنت بتكلم عن هنا انه افتراضى
وانى مش عايزة اعيش فى اوهام وانى خايفة منى ان تعلقى بالعالم هنا يكون عدم تكيف مع العالم الحقيقى
ومنكرش ان الكلام ده فيه بعض الصحة
بس بمرور الوقت لقيت هنا حقيقى برضه
وجميل
وحتى الوحش اللى فيه اللى كان نادر لحد دلوقت فى طريقى ممكن احتماله

التدوين دلوقت جزء اساسى وأصيل وممتع من حياتى

بمنتهى الامانة مش ممكن اتخيل انى فى لحظة ممكن اقفل مدونتى

فاتيما
مش حتصدقي لاي درجة كنت محتاجة اني اقرا تدوينتك اليوم كلامك كأنه رساللة موجهة لي هذا كان احساسي به
دمت بكل الود عزيزتي

طب هنقول إيه تاني
كل الكلام اتقال

هوه ده بالظبط التدوين
وهيه دي قصة حياتنا معاه

أنا بسلم بس. من غير ضرب، ماشي؟

ههههههههه

طيب أجاوب على ايه تاني

أنا من النوع الي بتقولي عليه بيكتب قصص أدبيه

المدونه لعرض تجاربي وكمان بتشجعني اكتب وتفيدني :)

وطبعا علاقاتي بكل البلوجرز علاقه حب واتعرفت على ناس كتير كويسين وبقينا اصحاب :)

وحتى اللي موش كلمتهم بس في ناس منهم بحس بقرب ليهم :)

تحياتي

اولا اسفة على التاخير
ثانيا
انا بجد فعلا مبسوطة جدا اني دخلت الحي دا
لاني فرغت فيه طاقات كتير
واتعرفت فيه على ناس لو عشت عمري كله مش هلاقي زيهم ابد
ثالثا بقى
حمدالله على سلامة يوسف
ويا رب يفضل معاكي على طول

بوستك جميل ومفيد
بس مش لاقيه اى كلام ممكن اقوله زياده عن ما قيل وقال
لكن اقول من جهتى الشخصيه انا فى رايى ان التدوين عباره عن اخراج شحنه داخل الفرد بيها يقدر يتنفس من الكبت الموجود داخله
لكن ما اقدرش انكر ان التدوين بقى عندى متعه لانى بستفيد كتير كتير ومش عارفه حد بيتسفيد من مدوناتى ولا لا لكن اعتقد ان لكل واحد وواحده له هدف يسعى اليه من خلال التدوين
فانا مثلا بحب الضحك ومش بحب النكد وبزعل قوى لما القى حد مش مبسوط او فى مشكله بالرغم من معظم الشعب المصرى بيعانى من المشاكل لكن بحاول اكون مصدر لابتسامه حقيقيه ترطب على النفس ودى دعوتى ورسالتى ( دعوه للضحك من القلب )
وايضا باقى المدونات كل واحده لها محتوها
واتمنى انهم يكونوا مصدر افاده للاخرين


تمام يا فندم انا سلمت نفسى اهوووو من غير ضرب وبكده انا اترحمت من الفلكه

هههههههه

ههه حاضر يا فاتيما حأجاوب اهه من غير ضرب
انا تعرفت على التدوين من خلال مدونات بنت خيخة واي كلام وعجوز وعندي ثلاثين سنة وجبهة التهييس الشعبية وعايزة اتزوج ظللت لفترة اتابعهم دون ان اعرف اصلا انه يمكنني التواصل معهم بتعليقات كنت افتح دوما وبانتظام لاقرأ جديدهم في صمت بعدها ومن خلال مدوناتهم تعرفت على مدونات كثيرة بمواضيع مختلفة وفي كل مرة اكسب منبر جديد اتابعه بعدها بمدة تسائلت ولم لاتكون لي صفحتي الخاصة.
انا انشأت المدونة في 11 غشت 2009 مرت سنة منذ شهر دون ان انتبه لذلك في البداية مدونتي كان اسمها "ياخوف فؤادي من غدي" لكني لم اتحمل الاسم الا فترة قصيرة وجدته موحيا بالتشاؤم وأنا لست كذلك انا متفائلة بطبعي ومؤمنة في قرارة نفسي ان الغد سيكون افضل لذا غيرت اسم المدونة الى خواطر شابة
المدونة بالنسبة لي شباك على العالم لن اقفله ما حييت يكفيني اني من خلاله تعرفت على شخصيات جميلة يجمعني بها احترام وتقدير ومحبة في الله دون غرض او مصلحة
دمت بكل الود عزيزتي

طمطم

وحشتينى اوى اوى اوى
البوست حلو بس بيجاوب على حاجات جوايا ليه فعلا دونت لقيتك جاوبتينى
انا بحاول اصلح على قد ما اقدر ساعات بكتب وبلاقى نفسى بقع فى اخكا بنتقدها فبصلح نفسى كمان
بكتب علشان افش غلى من خلق الله
علشان اقول للناس فكروا بعقولكم
علشان اكتسب خبره وحد ياخد منى خبره
عارفه انا حبيت ناس كتير فى التدوين وكرهت ناس وانتى عارفه معنديش خط وسط
يعنى اللى بكرهه بيبقى عارف واللى بحبه بيكون متاكد من حبى ليه
شوفت وشوش كتير وشوش ضعيفه ووشوش قويه وشوش منافقه ووشو صادقه
شوفت كل الالوان واتعلمت كل فنون الحرب وكسبت وخسرت
بس مكسبى كبير بناس بحبها
وانتى منهم على الرغم من انك ساعات بتظهرى انط ضعيفه
بس ضعفك ساعات قوانى انا تصدقى دى بقى
خلانى اقول لا مش هعمل كدا هبقى اقوى من دا
شوفتى انى اتعلمت من كل واحد
خيخه زودتنى عند
داليا زودتنى حب وحنيه
مفروسه زودتنى رقه وطيبه
كل واحد حبيته ساب فيه اثر وقوه فى حياتى
مشكلتك الناس فى مواجهه خوفهم قوتنى انا شخصيا
كفايه رغى بقى النهايه برضه كلكم وحشتونى اوى اوى اوى ادعيلى يا طمطم

أولا ..

بجد انا بحبك جدا في الله
وعلي فكرة بتابعك من قبل ما أدخل عالم التدوين دا بكتيررر ♥♥

ثانيا ..
اجابة السؤال ..

انا بكتب ليه ؟

بدون ليه ؟

من زمان وانا بحب أكتب

من أول ماكنت باخد كراسة واقعد جنب جدي الله يرحمه وانا ف ابتدائي
واعمل صحفية واسأله انت اتولدت فين واشتغلت ازاى وعرفت تيتة منين
وليه خلفت ماما :D
ونفسك تحقق ايه ف دنيتك
واتعلمت ايه .. الا صحيح انت عندك كام سنة ياجدو :D:D

كانت ايام عسل :D:D

ووانا فـ اعدادي والمراهقة " البريئة :D "

كنت بكتب خواطر غرامية يا اوختي .. حاجات معرفش اكتبها دلوقتي :D:D

وفـ ثانوي نفس الكلام .. والموضوع زاد عندي أوي

لما اكون متضايقة أكتب .. لما أكون فرحانة أكتب برده ^_^

لما حصار الثانوية العامة اتفك ودخلت النت وعرفت المنتديات

اتعلمت بئة اكتب عن حاجات أوسع وأعم

مش مجرد خواطر وكلام عن الحب كدا

لا .. بقيت مرة اكتب عن مشاكل الشباب

منساش مرة كتبت موضوع عن الاغتصاب :D

والله لو دورت عليه ع النت اكيد هلاقيه ملطوش :DD:

كان بعد مسلسل قضية رأى عام

ودورت البنت ازاى تحمي نفسها من الكلاب الجائرين

وخدتني الجلالة أوي :D:D

كتبت عن مشاكل الحب كتيررررر لحد ماكرهته :D

وابتدبت أكتب ساخر بئة .. حسيت فيه نفسي

دا لاني زي مابتقول عليا انتيمتي مسخرة :D:D

فـ المدونة لما عملتها حسيتها بيتي

بكتب فيها براحتي

حاجة بتاعتي مش منتدي ضيفة فيه ..

عرفت مدونات جميلة وناس أجمل

مش من مصر بس .. لا من أماكن كتير

حسيت خبرتي بقت أكبر .. حبيتكو أوي من غير ما اشوفكو

" وكان نفسي اشوفكو يوم ابو الريش .. بس عاااااااااااا :(( "

بتمني بجد أشوفكو

مكنتش اتخيل في ناس جميلة كدا

بحبكو بجد

بحبك يافاتيما

بحبك ياستيتة

بحبك يامنونة وسارة

بحبك ياسوني

بحبك ياخواطر شاية ..

بحبكو كلكو عشان منساش حد

والشوباب بعزكو مش بحبكو :D:D

انا رغيت كتيرررررر ^_^

نسيت أقولك اني حبيت التدوين أوي عشان بيتيح ليا فرصة الرغي :D:D

ههههههههههههه

يالا همشي بدال ما اطرد

♥♥♥♥♥♥♥♥♥♥♥♥♥♥♥

عاااااااا

بقالي ساعة بكتب تعليق وف الاخر قالي كبير أوي .. ومنشرهوش
ونسيت أعمل كوووووووووبي
:((

هاكتبه تاني واجي

:((

بس خدي دول

♥♥♥♥♥♥♥♥♥♥♥♥♥♥♥♥♥♥♥

كانو فـ آخر الكومنت :D

عارفة أنا امتى شباكي انفتح؟
دلوقتي حالا وأنا بقرأ البوست ده
يمكن في الفترة الأخيرة ملتزمتش بالمدونة ولا بزيارة المدونات الأخرى
لكن دلوقتي حاسة إن البوست ده اداني دفعة جديدة وخلاني أقرر إن الشباك هيتفتح قوى قوي

...........
كل سنة وانتي طيبة
وبجد نفسي أقابلك في أي مناسبة

معلش نسيت أقولك :

شكـــــــراً:)

:-XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

انا من ضمن المهزقين صح
صح
طيب
معلش يا معلمة السماح
بس انا بقيت مبغامرش بتعليقاتى فى مصر
اصل اقعد اقدح زناد عقلى علشان اكتب تعليق يعبر عن واندا و فى الاخر ملاقيهوش
فقولت اجرب بالاشارات الاول

انا مش فاتحة شباك انا فى الكوكب معنديش حيطان اساسا :-)
و عليه قولت بدل ما اكتب ايميلات اكلم الناس و فى الحقيقة انا بكلم نفسى
و الناس تقولى ايوه ضحكينا كمان
قولت ابعت الرسائل للهواء وو خلاص
مش حد معين
و اهى تجربة لمده سنة
اثبت انى عايشة و نشيطة اجتماعيا مش منعزلة و لا متكاسلة و لا اتجننت

و مفضلش فى السنة كثير كلها شهرين
و البوستات فى مصر اتحوشت اغلبها مسودات
و اهو فاضل اسبوع و ارجع لكوكبى ثانى و ساعتها اشوف
المدونة حيحصل فيها ايه

المهم انها عرفتنى على ناس حلوين
يعنى المحصلة لحد دلوقتى انى الكسبانة

صحيح فطوم الايميلات مبتوصلش و لا انت بتكسلى تردى عليها ؟

فاتيما

(:

أنت لست بحالمة يا فاتيما

المدونة كانت ليا بمثابة الأنقاذ قبل ما يجيلى حالة م الجنون الداخلى و بعدين يقلب بجنون خارجى أكتر ما انا مجنون (:

(:

انا شباكى لسه جديد لانج (:

لي خمس شهور و لكن حاسس كأنى معاكم من سنيييين كتير قوى
على قد سنين عمرى

اولا هدفى الأساسى متحققش وانا وراه

حتى لو سابنى (:

مجنون (:(:

لكن جنان مبيأذيش صدقينى

لكن هدفى دة كان سبب أساسى

أنى عرفت شبابيك كل حبايبى

شفت حى بلوجر اللى عرفة فيه حياة تانية

حياة فيها امل

حياة فى حب

حب من قلب لقلب

حب مورهوش مصلحة

حب لله

يارب .......................

دى دعوة من قلبى

بس عرفها ربنا بس (:

ايه دا التعليق الاولاني اتنشر
امال بلوجر بيضحك عليا و لا ايه :D

طيب كويس أوي

خدي دول برده
^_^

♥♥♥♥♥♥♥♥♥♥♥♥♥♥♥♥♥♥♥

ياااااااه عليكى يا ام يوسف

هو انتى رقيقه كده وقلبك بيساع العالم كله ازاى

بجد انتى من الناس الطيبه جدا واللى باحبها جداااااااااااااااااااااا

وفعلا التدوين ده تجربه حلوة اوى وشوفت فيها

الحب فى الله من غيراى مصلحه ناس طيبه واخوات بجد

بيخافو على بعض ويسندو بعض وقت الفرح ووقت الحزن

انا بجد التدوين من اجمل الحاجات اللى حصلتلى والناس الحلوة اللى عرفتها من التدوين عمرى ما كنت هاعطر فيهم فى العالم الضيق بتاعى
عالم كده نضيفه وراقيه فى التفكير والتعامل ومميزين بمعنى الكلمه

باحس اننا وحتى لو وشوشنا متقابلتش
عيله واحده واتقابلنا من زماااااااااااان اوى لان قلوبنا وارواحنا هى اللى اتلاقت

انا حقيقى باحبكم اوووووووووووى

السؤال انا دخلت التدوين فى 7 من سنه 2009 وانتى اول حد علق عندى يا تيما
وكنت ساعتها طايرة السما ان حد علق عندى
والسبب كنت سمعت عن مدونه عايزة اتجوز وشوفتها وانا بالف على النت وفضلت الفكرة تلعب فى دماغى لحد ما عملتها

وشايفه ان تجربه التدوين يكفينى اوى منها انى عرفتكم وارواحنا اتلاقت
واتعلمت من ناس كتير حاجات كتير وطلعت حاجات من اللى جوايا وشاركت الناس فى افراحى واحزانى ومجمل التجربه انها بجد تجربه سحريه وعالم سحرى وحقيقى جدا مش افتراضى

تيما ابيبتي
الاغنية عجباني كتيييييييييييير جدا
وبجد متتخيليش انا سعيدة اد اية بكل كلمة وكل حاجة بتكتبيها حتي لو مقدرتش اعلق عليها
عايزة اشوفك بجد وحشاني موووووت
مش عارفة هنبدأ دراسة امتي عشان نعرف نقابلك انا وغادة ورانيا ورضا ....ضروري نشوفك لان الكلام علي البلوج مش نافع
بس تعرفي كل مرة ادخل واقرا واشوف التعليقات بجد بموت فيك اكتر م الاول
بحبك كتير ودايما بدعيلك

طيب فين ردود التعليقات على بوست الاعترافات ده بقىىىى ياست بطه؟؟؟؟؟؟؟؟!!!!!!

طمطم حبيبتي
وحشتيني.. النهاردة اول الدراسة.. يا رب تكون سنة سعيدة على يسوفة وينجح كالعادة بتفوق والترم دا ميخلصش الا وهو قاعد معاكي بتذاكريله وانا على فكرة هديله درس عربي.. كدة عافية يعني من غير ما اخد رايك ولا رايه
انا طبعا موافقة جدا على كلامك في البوست لاني شايفة اننا تحولنا مع الوقت لاسرة واحدة بجد بنخاف على بعض ونسال عن بعض.. موافقة لدرجة اني دخلت اعلق وانتي عارفة ان بقالي زمااااااان مبغلقش عند حد وبعدين انا هجاوب لان معنديش استعداد انضرب النهاردة
انا عملت مدونة قبل مدونتي الحالية سنة 2005 وفي حركة حمقاء المدونة دي اتمسحت سنة 2007.. الاول عرفت التدوين عن طريق اني كنت بعمل سيرش عن ايزابيل الليندي وجوجل الله يباركله حدفني عند مدونة حدوتة رحاب بسام ومدونتها عرفتني على ناس حلوين اوي منهم احمد نصر عجيزة.. فكراه؟ وبعدين ابتديت تدوين لاني كنت مبهورة بفكرة اني اقدر اكتب مذكراتي ف مكان بتاعي ومحدش يقدر يمسحها وف نفس الوقت ماما واخواتي ميقدروش يقروها لاني زمان مكنتش معفاهم ان عندي مدونة واصلا كان التدوين لسه مش معروف اوي وطبعا حققت هدفي بنجاح باهر
المدونة القديمة كنت بحبها لانها كانت سبب من اسباب معرفتي بوليد وبعدين لما اتمسحت عملت بدالها حكايات بوبو اللي عرفتوني بيها.. بس خلاص.. بحبك.. اللوقاء الحريمي امتى؟ عندي شوية رز عاوزة انقيهم معاكي

يانهار ابيض يافاتيما

انت كتبتي كلام زي الفل
موافقه عليه كله

وانتي عايزه اجابه لسؤال سهل خالص

دخلت التدوين من قبل مااعمل مدونتي كنت بدخل من مدونت صديق وفي يوم قال لي لازم تعملي مدونه وعلي ماقررت اني فعلا اعمل مدونه اخدت تفكير شهرين
وعملت المدونه

كنت متردده علشان انا مالييش في الكتابه اصلا ومابعرفش اكتب

ولما عملت المدونه امبسطت جدا
بناتي كبروا واغلب الوقت لوحدي
المدونه ملت فراغ كان موجود عندي
وكمان بناتي شجعوني

وانبسطت بالصداقات الجديده
وان في مكان اقدر اتكلم فيه عن كل حاجه

ولما بنوتي اتجوزت وكنا بنطبخ علي التليفون عملت مطبخ شموسه علشانها هي واللي زيها وقلت اعمل فيه الاكل المصري اللي بنعمله في بيوتنا بعيد عن الاختراعات

هو ده الاجابه ببساطه شديده

صحيح بعد كده اتعرضت لحاجات بايخه من المرضي النفسيين اللي في البلوجر
وبعدت شويه بس رجعت تاني ومش همشي ان شاء الله
وخليهم يموتوا بغيظهم
وصدقيني يافاتيما مش هيبقا في بلوجر غير الناس الكويسه

بوستك جميل وفطري زي ماانتي جميلة
وطيبه

شكرا ليكي

تحياتي

فاتيما

يمكن اول مرة اعلق

لكن مش اول مرة اقرا مدونتك :)

وبجد بحس بتلقائية ودفء في تدويناتك :)

مش عارفة اقول ايه

لكن فعلا حاسة بالبوست ده اوي

ربنا يخليلك يوسف يا رب وتتجمعو على خير يا رب :)

الله يا فاتيما ع الأغنية

كلمات حقيقى

مستنى

و انا كمان يا فاتيما

نفسى انى أقول حاولت

أن شاء الله

(:

يااااااااه قريت البوست اكتر من مرة
ومع ذلك حاسس انى اول مرة اكتب تعليق
لان مع البوست استرجعت كل شىء من بداية دخولى التدوين لحد النهاردة وكم البشر والمدونات اللى قابلتهم او قريت ليهم وتعلمت منهم الكثير واستفدت من خبراتهم وتجاربهم
وطبعا كعادتك البوست مش محتاج اى تعليق لانه وافى وكافى يا ام يوسف
وبما انه فيه ضرب وفلكة ممكن نجاوب باللتى هى احسن
انا فتحتها صدفة او بمعنى كانت غلطة ومش ندمان عليها طبعاوده كان فى 2007 وبعدين نسيتها ورجعتلها فى بداية 2008 وكان السبب فى دخولى عالم التدوين لماضة هانم
وكان اول ناس قابلتهم من المدونين سووووو وابى هانم
موضوع التقييم وحققت اللى كنت عايزاه ده شىء صعب احكم عليه لان الهدف من انشائها كان صدفة
بس الحمد لله اعتقد انها حققت اكتر مما كنت اتمنى لانى استفدت من الجميع وسعدت بمقابلة اشخاص فى منتهى الروعة وما زالت المسيرة مستمرة
تحياتى

السلام عليكم
مدونه جميله
يارب يرجع الغايب لحضن اهاله سالم غانم يارب ويصبر القلوب يارب

انا بتابع مواضيع مدونتك بصراحه من بعيد لبعيد
لانى لم اكن اعرف السبب
وبجد ومن غير زعل موضوع محدش يسألنى عن شخصيتى وكده الكلام اللى مكتوب على يمبن المدونه
خلانى فى حيره من امرى
اعلق ولا بلاش
بس
مش عارف ايه اللى خلانى اتجرأ واكتب
واقول
لان الموضوع ده
جميل قوى
احنا بنكتب ليه
واشمعنى الاسم ده بالذات
واشمعنى
اسم المستخدم خليته كده معلش انا لسه
اولى تدوين اللى انا اتعلمت من المدونه بتاعته اولى تدوين حاجات كتيره قوى
يارب يجعله فى ميزان حسناتك
هقول واتكلم
اولا
باحث عن حب انا بدور على الحب اللى حاسس انه مش موجود وسط الناس
باعمل الناس بلطف وحب وباعلمهم يعنى ايه حب
خصوصا
حب الاصدقاء ودفاهم لانى
كنت مفتقدهم رغم كتره الناس اللى حوليا المصيبه فى اللى قلبك يريده
وهو مش حاسس بيك
غباء فى غباء لى صديق انا احبه جدا من اولى ابتدائى وحتى الان
مستحيل اشعر بالدفاء الا معاه
بس اعمل ايه زى القرع يمد لبره
من هنا تطورت الفكره لمدونه جربت وعملت اتنين ونجحت فى التالته اللى هى باحث
وتوالت الاعمال
الى الشهاب للفضفضه
ولما قلبى لمسه الحب عملت قلبى حبيبى

الحرص ثم الحرص ثم الحرص
علشان فى ناس قلوبها ونفوسها ضعيفه
علشان كده
فى ناس بتلبس اقنعه بس مش بتدوم
ومش بتعرف تمثل صح

دمتى بعز واسف
على الاطاله

* wanda *
--------
الأول
******************
************************
***************************
و
×××××××××××××××××
××××××××××××××××××××××××
×××××××××××××××××××××××××××

عشان الأيام اللى فاتت



ثانياً بقى
ما عاش اللى يهزقك و انا على قيد الحياة ...دنا بكش فيكم بس

ثالثاُ
وصلنى ايميل و رديت عليه
صيغة الجمع دى مقصود بيها كام واحد ؟!!

رابعا
انا لسه فاكرة اول تعليق ليكى عندى
كنتى متميزة و غريبة و انا قولت البت دى ايه نظامها ... انطباعى عنك م اول تعليق كان انك حد غريب بمعنى الغرابة اللى يثير الفضول ..مش الخوف
اصل فيه ناس كدا
تعليقاتهم بتخوفنى منهم
بحس بين سطورها بكدب احيانا
او نفاق
او حاجة غير اللى فيه حقيقتهم

انتى كسيت من كلامك
انك حد زى كل حد دخل التدوين
حاسس بوحدة
و عنده كلام كتير عاوز يقوله
بس لسه مش عارف يعرف نفسه كفاية
كلنا تقريبا فضلنا كدا
لحد ما عملنا مدوناتنا
و ابتدت شخصايتنا تنسكب نقطة نقطة ع الصفحات و البوستات لحد ما اكتملت الرؤية شوية بشوية

انتى مدونتك شبهك
بيضا
صافية
مشحونة افكار
نشيطة
لما بتتحركى محدش يلحقك (سواحة بجد)
و الهم بقى
انك شخص مراعى جدا
يعنى مبتزعليش من حد و تحاولى تضغطى عليه بقيود و التزامات ناحيتك و عمرها ما فرقت معاكى مين علق امتى و كل بوست و لا لأ
و دا بيقول كتير

انتى م الناس اللى لما شوفتهم
ثقتى فى احساسى تجاه البشر ..زاد جداااااااا



خامساً
المعلمة ..سمحت خلاص
و اصلا مزعلتشى ى ى ى

بس لازم نطلع الفلكة و نحطها ع التختة يعنى و نجيبلكم الأسد المرعب يزغرلكم ؟!



دى نجمة عشان جاوبتى

SHAPE YOUR LIFE (ABOALI)
-----------------------

منحرمشى من حضرتك ابدا
و لا من رقة كلامك و تشجيعك
تعليقك جميل
و دايما يظهر كل ما فيه من ود
و حضرتك من الناس اللى لما قابلتها سابت أثر طيب جداااا حتى و لو كنا مش بنعلق عند بعض بإستمرار ..بس انا عارفة ان حضرتك متابعنى
و انا كمان شرحو

حلو تعبير طاقة نور قوى

التقدير ليك انتا اكتر

بس مجاوبتش ليه السؤال ؟!!!

كده مش هديلك نجمة
زى باقى الفصل
هه

وش عامل مقموص

قلــ"بـــلال"ــــــب فارس
-------------------------

معلش يا بلال منا قولت اسفة متقعدوش تقطمونا بقى ..الله !!!!

انا اتشرفت بزياراتك
و ان شاء الله تلاقينى علقت عندك
انا متابعاك دايما
بس مبلاقيش حاجة اقولها قوى
بس دى حالة لن تستمر اكيد
مرة هتلاقينى فتحت ف التعليقات
و مبطلتش

انتا كدا ميت فل و خمآشر
و تاخد نجمة




نورتنى

Ramy
----

ر ر

يعنى رامى رقيق القلب

يعنى رامى الطيب
يعنى الاخوة اللى ملهاش معاد و لا سبب

غير الود و الخير

انتا مش محتاج تقول حاجة يا رامى
انتا واضح يا بنى من اول سطر كتبته
دى نعمة و خلى بالك منها

عارف الدعوة بتاعة الامهات و الجدات
بتاعة روح يا بنى اللهى يحبب فيك خلقه ؟؟

دى تنطبق عليك بالحرف

انتا ربنا مخليك تدخل قلوب الناس
حتى اللى لسه مشافكشى لحد دلوقتى

شباكك قلب مفتوح ع البلوجر
وعلى إخواتك يا رامى
و اظن الفترة البسيطة اللى قعدتها وسطنا و ارتباط الناس بيك .. بيأكد كلامى و يوثقه


هدفك اللى متحققشى بقى
و سبب عمايلك للمدونة
عاجبنى انك وراه و املك مرحشى
و ان شاء الله ميروحشى

يعجبنى انا الناس المتفائلة
و اللى متخليش اليأس يهزمها


مبسوطة جداااا ان الغنوة عاجبكو

رافعين نعنوياتى دايما
انحرمشى منكو يا رب

و بما انك جاوبت السؤال
فانتا تستحق نجمتين

واحدة ليك
و واحدة لبيير

★ ★

:)

الابتسامة دى
عشان ملاكك الجميل

Haytham Alsayes
---------------

ازيك يا هيثم

معاك يا فندم

التدوين حتى و ان كان عالم افتراضى تقنياً
فهو عالم واقعى بما يكتب فيه ... احيانا بينكتب ف التدوينات الواقع بكل قبحه و بشاعاته و ان كانت الصياغة حلوة


ميرسى على دعواتك الطيبة

و انتا جاوبت نص اجابة
بس عديت و نديك نجمة
يلا انشالله ما عن حد حوش
هه



منورنى دايما

sal
---

ميرسى يا سال
دايما كدا انتا
جميل و متفائل
و رافع نعنوياتى
و نعنويات الجميع


حضرتك من الناس اللى الواحد استشعر سريعا انه اكتسبهم و انضموا لعقد لولى غالى حباته نادرة ... بجد

بس يعنى انتا وضعتنى
ف مأزك تاريخى حرج دلوقتى
لما مجوبتش السؤال
و انا ميخلصنش تمشى من غير نجمة
...و بعدييييين بقى

ينفع كدا ؟!!

تحياتى انا اكتر و الله

richardCatheart
---------------

يا قطاقيطووووو
يا جدعنة اسكندرية و شياكتها

انتى من العالم اللى تعليقاتها جذبت الإنتباه ليها من اول ما ابتديتى تعلقى عند الاحباب ...
انتى فعلا دماغك كانت باين عليها متكلفة
هوا اسكندرية اللى يصفى اى ذهن بقى



حكاية التجمع ف الخير دى
ابصم فيها على كلامك بالعشرة
لأنى زيك و يمكن كنت اقل
انا فجأة لقيت ناس محترمة قوى
و جدعة قوى
و بتعمل الحاجة لله قوى
خلونى غصب عنى اتشدلهم رغم انى كنت فار مذعور من حاجات كتيييير قوى

فجأة لقتنى بغير حاجات جوايا
و اتشجع اكون معاهم
اتحامى فيهم
و كانوا و ما زالوا سندى
و امان ليا
و ربنا يديم الود بيننا علطول


انتى من القلوب اللى محدش يعرف يشوفها و يتعرف عليها و ميقعش ف غرامها يا بنتى ...يوم اسكندرية معاكى كان تحفة
انا كل مرة آجى حداكو ..يطلعلى اهل جداد و قرايب ..و لا الأفلام الهندى و حسن الامام يا ناس


حكاية انك مش بتفيدى حد دى
متهيألك
كل حد فينا بيفيد التانى
جايز مش النهاردة
او بكرة
ممكن بعدين
تجاربنا المفروض لما تكون مكتوبة بصدق
و حرفنة كمان ..المفروض تأثر و لو على المدى الطويل
خلى بالك طويل
و متعرفيش
يمكن يوم تلاقى حق باباكى و كل اللى زيه
الله يرحمهم و يلحقنا بيهم
انتصر
مش بعيدة
تعرفى منين يا قطة ؟؟


و بعدين الونس دا لوحده هدف كبير و كفاية انه اتحقق
دنا فرحانة من ساعة ما اتحدد معاد السفر ..و من قبله كمان
الفرحة دى ..ليها قيمة و معنى
و عارفة انه موجود فى قلوب كل حد ناوى يحضر ان شاء الله

كفاية دى لوحدها

انتى بقى عاوزلك تلات نجوم

لمريهان

لمروان

ليكى انتى و الحاج تخمسوا فيها

آه .. متخلصوليش نجومى بقى
لسه فيه ناس وراكوا

هه


بوسات و حضونات
و الفعصات

اهم حاجة الفعصات
دى لن اتنازل عنهاااااا
بوتيتنننننن

مذيعة المدونات فعلا يا احلى فاتيما
كلامك كفى ووفى

انا من الناس اللي مكنتش عايزة افتح شيش الشباك وأطل منه لكن علشان الخير اللي دائما متجمعين فيه ان شاء الله طلعت وشاركت معاكم بره التدوين

طبعا كلنا بنبقى متوجسين خيفة في الأول يا ترى هيتقبلوني
هتبقى ايه انطباعهم ناحيتي وانطباعي ناحيتهم وكام سؤال وسؤال مضروبين في الخلاط كنت بسألهم لنفسي لكن التفاعل مع المدونين في الواقع طلع أحلى بكتير من التفاعل من وره الشاشة وعرفت ناس جميلة وحنينة أوي زيك ناس راقيين بجد ومثقفين وروحهم مرحة

دمتي دائما بخير وسعادة ودمتي جارة جميلة

وبجد أغنية شبابيك كانت على بالي وبحبها أوي:)

اموااااة

عاشقة الرومانسية
---------------

هجاوب اهو يا ست دودو
براحة عليا
مش لما استدرجكو ف الاول
عشان تعترفوا ؟؟!!

و نعم يا هانم
ايه حببتك ف التدوين دى
لتكونى عاوزة تكرهيه و لا حاجة

ليه بقى كدا ؟

قريت بوست كيمو طبعا
و بصراحة محبتوش
طبعا هوه رأيه يشكر عليه
هوه اكيد حر فيه
بس دى نظرته
و دول الناس اللى قابلهم
و يبدو انهم كانوا كتير حواليه
فخلوه يشوف الحال العام كدا

انا رأيى مختلف
العكس تقريبا
عارفة يا قطتى
عندى ف قايمة المدونات الالكتورنية بتاعتى اكتر من 350 مدونة
متخيلة العدد دا ..كام نفر فيه خدلنى و طله اى كلام ؟؟

ميكملوش ستة سبعة
محصلوش عشرة ,,او اصابع اليد الواحدة زى ما بيقولوا

تفتكرى لما اشوف خير من عشرات و اكتر
خير بالفعل
او الكلمة
او حتى الصمت

مش دا يخلينى احبهم


تعرفى ايه اللى يخلينى كدا
و ممكن يخليكى انتى كمان تفكرى بنفس طريقتى ؟؟

انك متنتظريش من حد اكتر من اللى ينفع يديهولك .. دايما حطى اعذار
و متستنيش حاجة ..تلاقى كل حاجة جيالك تسعى ...و لو مطلبتيش

لما بنحمل غيرنا فوق طاقته
طبيعى نحس انه بيخذلنا
و نتضايق

خصوصا بقااااااااا
لما يكون حد زى سيادتك كدا
معطاء بطبيعته
و لما يدى ..يكتشف ان المقابل اقل م الصفر
فيكتئب جداااااا

المشكلة وقتها مش ف اللى قصادك
المشكلة فيكى انتى

انتى اللى كم عطائك كبير
بيصعب الحكاية ع اللى بياخد

بتحطيه ف مزنق يا عروسة البحور
نعملك ايه و انتى البحر علمك الحنية و العطاء الجارف زى الموج بتاعه ؟!!

شباكك قلب مفتوح علينا
ارجوكى متفكريش تقفليه تانى

القلم المشلول
بالعلاج الطبيهى ..ربنا ينفخ ف صورته
كلنا بنمر بالحالة دى
متتلككيش بقى ..هعضك

العد التنازلى دا
مينفعش يبتدى من 3 أو 2
انا مش مستعجلة و لا حاجة
و لا ف دماغى خااااااااالص
و لا مستنية و لا بعد الأيام
و لا حاااااااجة


انا كمان بحبك و الله

بوسات و حضونات
يا عروسة بحورى انااااااااا

The illusionist
---------------

اهلا بيك و منور المطرح
و معلش اعتذرنا عن الاطلة
متقعدوش كل ساعة تبكتونا بقىىىىى
هعيط و انقهر ..عاااااا


حضرتك قولت اللى فيها
التنفيس عن كلام مخنوق جوا الواحد بغض النظر عن الحالة و السبب و الهدف كمان

بس الاكيد ان الدنيا وسعت بشكل غير متوقع مظنش حد فينا كان متوقعه لنفسه

طبيعى ناس دنيتها تحلو
و هم الغالبية
و ناس دنيتها تتلخبط
و احسبهم اقلية ..بتمنى يعنى

حكاية الأشرار دى
موافقك فيها لأن التدوين انعكاس للدنيا بكل ما فيها و الشر جزء اصيل من حياتنا ..اشمعنى هييجى هنا و يختفى ؟

حضرتك منورنى
و شباكك خير ان شاء الله

و النجمة اهى عشان جاوبت
من غير ما الأسد المرعب
ما تزغر و لا حاجة

شاب فقرى
--------

يا لهوى يا كريم
على كلمة
امى الحنونة دى
موشكرين يا فندم

دا اولا


ثانياُ بقى
يا واد خليك متفائل
بقى انا هكتبلكو البوست دا كله عشان ارمى قنبلة ف الىخر و اقول باى باى مثلاااااا ؟!!!
دا بعينكو
تنحرموا من نكدى و هذيانى ؟!!
لااااااا
كان غيركم اشطر يا استاذ


طب دنا ما صدقت لقيت ناس حلوة زيكم يا كريم
امشى ازاى بس
و لا حتى آخد اجازة طويلة
معنديش يأس أنا


حكاية انك متقربش منك غير الناس الكويسة
قرار حكيم جدا ..بس يؤسوفنى اقولك يا بنى انه تقريباً شبه مستحيل
اصل محدش بيعرف مهما عاش ف الدنيا و شاف ..اصل الخداع دا فن يا كريم و فيه ناس بتتقنه جداااا و لازم الواحد ينضحك عليه و ينصدم ..لازم

الصدمة مش هيا المشكلة
المهم ما بعدها

قريت الحكمة دى مرة عند دكتور حر
الله يمسيه بالخير
و ثبتت ف دماغى
بتقول
الجزع عند المصيبة
مصيبة آخرى

و دى حقيقة عشتها كتير
الواحد بيضاعف الالامه بنفسه و بإيده احيانا ..لما يوقف عند الازمة و ميحاولش يتخطاها قدر الامكان


ربنا يسعد ايامك كلها يا كريم
و انتا معانا ف سفرية اسكنكرية يا واد ..هتنبسط ان شاء الله
اهلها احلى ناس و الله

ادى النجمة بتاعتك اهى
عشان جاوبت السؤال بذمة
و صدق .. كعادتك يا بنى


فكرتينى بالذى مضى

بصى ياستى
انا متابع المدونات من اول ما بدأت فى مصر
كان ايانيها فيه ناس قليله قوى
تقريبا اغلبهم اختفى من الساحه دلوقت
وكانت التدوينات من العيار التقيل
لناس موهوبه فعلا
واغلبها ان لم يكن جميعها سياسى

انا كنت بتابع بس
مخطرش فى بالى مرة اعلق
وفى يوم
اكتشفت مدونه نوارة هانم
ومن يومهاوانا بتابعها

حرب غزة
استفزتنى قوىىىىىىىىى تعليقات كتير قريتها عند نوارة عن الحرب
استفزنى قوىىىىى بعض وجهات النظر المتخلفه اللى راجت ايامها

وهنا
بدات اعلق
بس علشان ارد

فيه اخت مدونه
لفتت نظرى قوى
وحبيت اعلق عندها
معرفتش لانها كانت قافله الغير معرف
ولما سالتها
قالت لى طب ما تعمل اكونت وادخل بيه
مجرد اكونت بس

قلت طيب طالما عملت اكونت
ما اعمل مدونه واكمل الخطوات للاخر وخلاص

فى البدايه الموضوع كان هامشى

كتير قوى فكرت اقفلها

انما دلوقتى
مقدرش اتخيل نفسى من غير تدوين

بس ياستى
دى حدوتى مع التدوين وناسه

فتاة من الصعيد
--------------

لازم نهدد بالفلكة عشان تجاوبى يا ست فاتى ؟!!!
طيب خلاص عرفنا الطريقة
و هنحط العصايا ورا عداد المدونة
عشان كل سؤال جااااى


و مش مسألة مشاعر قوية يا فتاة
اكتر من ان احيانا
تعامل الشخص مع مدونته
بيعكسلى طبع عنده هوه كمان


يعنى مثلاً
بدون ذكر أسماء طبعا
عشان محدش يزعل


فيه حد تلاقيه
مبيفتكرناش و يكتبلنا
غير عشان يشتكى من حاجات سخيفة حصلتله ف يومه او حياته
بينما اى مناسبة سعيدة تمر عليه
متسمعيش حسه بالمرة
و لا كأننا نهمه ف حاجة
النوع دا من الناس
انا بقول عليه شكاى و لا يرضى
هوه كدا مهما حصل ..
يبخل بالفرحة على اللى حواليه
لكن ميبخلش بالسخافةوالمشاعر السلبية
دا بيعكس طبع عنده
خصوصا ان المدونة لو عمرها طويل ..المواقف بتتراكم
غصبن عن صاحب المدونة
و بتعرفنا هوه ايه


ممكن مثلا مثال تانى
الناس اللى كل شوية
تقفل مدونتها و تمشى بمعدل عشر مرات ف الدقيقة دى ناس بحس طبعها عصبى قوى
بتزعل علطول يعنى
مش قصدى طبع غير مقبول
انا قصدى بشوفهم كدا و بعرفهم


مثال كمان
الناس اللى مبتردش
ع التعليقات مطلقاً
مهما ناس علقت عندهم
دى ناس الانا عندها عالية شوية
فى حياتهم العادية
عطائهم شحيح
بخلا حتى ف مشاعرهم مع الآخر
مقفولين على روحهم اكتر

بس طبعا دا
مش حكم نهائى

لأن
ممكن ناس تكون خجولة
و ناس ممكن تكون مبتعرفش ترد
او ناس مش عايزة ترد عشان متتعرفش
او تكون صلة حميمية مع الآخرين
او ناس مبتلحقش ترد اصلاً عشان مشغولة
و دول كتير ..منهم احمد شقير صاحب حكاوى آخر الليل
و بنت القمر ..و غيرهم

دول بعرفهم
و بحسهم

لكن فيه ناس تانية فعلا
بتكون متعالية
و متعمدة تتجاهل غيرها
دول محتاجين وقت طويل
عشان تقيمى ادائهم ناحيتك
و ناحية غيرك
و اظن 3 سنين بالنسبالى
نوعا ما كافيين


و لو ان اجابتك جت
ف الدور التانى
بس نمشيها و تاخدى النجمة

و انتى حبيبتى خالص

wella
-----

اولا
ميرسى على خالتو دى
لقب حلو ..ندهنى بيه انس الغالى
صاحب المضيفة
يلا انضمى للنادى ولاد الاخت
و كترونى و فرحونى بيكم

ثانيا
انا زعلانة كدا من نفسى
انى سديت نفسك و انتى لسه زهرة تتفتح يا بنتى ... هههههه

بس لأ
اسد نفسك ليه؟
انا حلوة و كويسة اهو الحمدلله
الواحد مكنش طايل اللى بقى فيه
و لو كنت شجاعة من وجهة نظرك
فالسبب ربنا و انتوا
دى حقيقة
الشجاعة عمرها ما كانت هتيجى و انا لوحدى مش متونسة بيكم و حاسة ان ورايا قلوب بتسادنينى و لو جرالى أى حاجة هتلحقنى و تساعدينى من غير حتى ما اقول ..ساعدونى

المحبة متبادلة يا ويلا
و ربنا يأذن ف يوم
و نتقابل يا حبيبتى
انا اللى هتشرف قوى ساعتها بيكى
و بتمنالك اكتر ما بتتمنيلى و اكتر


و آميييين يا ميلا
آميييييييين


بالنوسبة لبوست الكتب
انا مكملتوش عشان العدد وقتها مكنش كفاية
بس وارد ارجعه فى وقت تانى


و عشان انتى شطورة
النجمة بتاعتك اهىىىى


بسنت
------

اهلا ياارق دكتورة شفتها

حلو العنوان
و صاحب العنوان
و اللى جه على بالها العنوان


وكلامك اظنه هيعكس تجارب آخرين
كتير مع عالم التدوين برضو

طولى يا حبيبتى و لا يهمك

و ان شاء الله
يبقى فيه فرص اكتر للتقارب

خليكى هنا بإستمرار
و انتى تعرفى آخر الاخبار

ايه دا ينفع مطلع غنوة و الله

شفتى
ختخلونى إشعر بقى
و ألف اغانى

النجمة يا شطارة
متمشيش من غير ما تاخديها

كلمات من نور
------------

و الله انتى اللى كمان من الناس الحلوة يا كلمات و دايما تحرجينى بذوقك
و مع انى مقصرة معاكى جداااااا
لكن دايما بتساندينى
بالكلمة الطيبة و المشاركة م القلب

المدونات فيها خصوصية اكتر عن اى مطرح تانى و الواحد بيبقى رئيس تحرير نفسه فعلا و بأقل سخافات تذكر من التعليقات ..لو حصل و بيحصل اكيد

انتى نورتينى
و دايما بتنورى
يا كلمات من نور
و قلب من نور

اتفضلى ..حقك بما يرضى الله
عشان جاوبتى السؤال

أميرة بهى الدين
-------------

ازيك يا استاذة
ما زلت مصرة انك استاذة
قولاً و مقاما و حبا منى ليكى و كرامة


انتى ف اللى كتبتيه لقيت جملة عبقرية تلخص حالنا جميعا أظن

كأنها لم تفعل شيئاً

وقع الجملة دى يختصر حال أى حد مرتبط بمدونته ..اللى افتكر ف الاول انها حاجة كدا ..ميعرفش هويتها
لحد ما اكتشف شوية بشوية
انه الحكاية داهمته ببراءة
و كأنها لم تفعل شيئاً
بينما فعلها كان عظييييييم

ميرسى ع اللينك
و حطيته خلاص ف الريدر

و ليكى نجمة ع الاجابة بذمة
و لو انها متوقعة يعنى



خالص ودى ليكى

Doba
----
يعنى هتبطلى امتى يا دوبا ؟!!!
تبطلى ايه؟

اللى بتعمليه دا

ايه؟؟

الدعم النفسى الرهيب
مهما الوقت عدى
و انا قولت انا جامدة اهو !!

مش هينفع
صح ؟؟

عشان انتى الميس
و مينفعش متكونيش قلبك عليا


انتى كمان من الناس اللى أثروا فيها جدااااااا من اول ما دخلت التدوين
لما اتقابلنا من اول مرة
لما احتضنتونى و انا خايفة و كاشة و رخمة و ما زلت برضو ...

احنا كلنا عيش و ملح
و حياتنا اختلطت ببعضها
و اتعلمنا حاجات من بعض
و سندنا بعض
و عمرى ما هنسى حاجات كتير عشناها
و مواقف على اختلاف درجتها من اقصى الحزن لأقصى الفرحة

اللقاءات الحريمى
العيال و فرحة العيال
يوم ما جيتى عشانى ..فاكرة ؟
و لما روحنا عزا والد خيخة الله يرحمه
و فرح الشنكوتى والزغاريط للركب
و مشاكستى مع خيخة مرة زمان و احتضانك لينا احنا الجوز ..ياااااه
انتى كنتى حاضرة و جزء ف كل دا



ولما قولتيلى ف تعليق مرة
بكل بساطة كدا ... انك حامل
يا لهوووووووووى على دا يوم !!


بطنك و هيا قصادك
و احنا عمالين نعاكسك
و انتظارنا لحضور سى عمر
و لما ولدتى و كان ف الحضانة و قلوبنا اتعصرت خوف عليه و عليكى
و يوم ما روحنا نشوفه و هوه قد العروسة اللعبة و زى القمر
صوره اللى بتبعتيهالى كل فترة
عشان تقولى انتى معانا و بالنا
..و كلامك الدافى الحنين
من اول يوم
يا دوبا
و لحد النهاردة
لحد النهاردة يا دوبا

مش عارفة اقول ايه؟
انتى كمان جزء من قلبى و قلب أى حد يعرفك ..انا اللى افتكرته شوية
فيه حاجات اكتررررر اكيد
بس اقدح زناد فكرى
بعد مج ماكسويل هاوس مفتخر
(من بتاعنا )

انتى بقى تستحقى نجمة عشانك

و نجمة ليسوفة

و نجمة لعمر

و نجمة لأبوهم و لاّ ملوش نفس ؟!


بوسات و حضونات
يا دوبى
يا حبيبتى

story pain
----------

لأ مطولتيش يا ستورى
خالص يا حبيبتى

انتى ف تعليقك دا
فكرتينى بنفسى اول كام شهر تدوين
كنت مبهورة بالاعلم دا و احساسى بيه
و الحمد لله انى لحد النهاردة
ما زلت على انبهارى
اظن دا مرتبط بالشخص كمان
يعنى فيه حد يعرف يشوف ف الحاجة اجمل ما فيها و يعيشه
و فيه حد ممكن يشوف الوحش ..فرأيه و احساسه يبقى مختلف

انتى كتبتى جمل ..خلت عينى ترغرغ و انا مش طالبة معايا عياط
انا البوست دا فرحانة جدااااااا بيكو و مش عاوزة اعيط

انا اتشرفت بيكى يا ستورى
بس من غير باين
ان شاء الله

نجمة كبيرة من السما علشانك اهى

موناليزا
---------


و انتى بتعجبينى يا مون مون
فى كل حالة

انا بحس اننا شبه بعض فى حاجات كتير
اتارينا سكننا حى البلوجر ف توقيت متقارب كمان

بس اوجه الشبه احلى من كدا
التفاؤل
التشبث بالفرحة
حسن الظن بالناس رغم صدمتنا ف غيرهم
التغيير من جوا لنفسية احسن
الحظ الحلو اللى وقعنا ف ناس كتير معرفتهم تشرف و تسعد القلب الحزين


انا بحبك و الله اكتر
و ربنا يكتبلنا مرة نتقابل
و تاخدى كل بوساتك و حضوناتك اللى متحوشة عندى من 3 سنين اهى


مى
---

يا ورد الجناين

يعنى اقول ايه بعد اللى كتبتيه ؟!!
يا بنتى هتخلينى اتغر و انفش ريشى عليكو بعدين متعرفوش تاخدوا معايا حق و لا باطل و افترى بقى

حكاية الكتابة ادمان دى
موافقاكى فيها
و بستغرب يا عيال لما حد فيكم يعتزلها
بيهون عليه ؟؟
و لا بيلاقى متنفس تانى ؟؟
حد مثلاً يسمعه
او اصدقاء
او خطيب او زوج
فالحاجة للفضفضة بتنتهى ؟
يمكن

انا مفرحنى انك راجعة تانى
ان شاء الله
يعنى حتى لو افترضنا ان الكتابة مكنتش مهمة قوى غير لوقت معين
فغحنا عندك مهمين و لوقت علطول
زى منتى ف قلوبنا كلنا
يا ورد الجناين
مش قلبى انا بس


تعرفى ان المصحف بتاعك
مبيقارقش شنطتى ؟

انا كمان بحبك يا حبيبتى
وبوسات
و حضونات
و ورق ورد
يتبدر عليكى
يا عروسة اسكندرية الحلوة
لحد ما شوفك بقى

اسماء و احلام فى وجدانى
-------------------


كمين ليه بس يا احمد ؟!!
دا توثيق لحالة مشتركة بيننا
و زى ما بيقول منير
العاشق بينقط بهواه

عدم تغييرك لقالب مدونتك بيقول انك غالبا شخص كلاسيكى و مخلص قوى و مبتحبش تتغير و لا تبدل ف حالة بدأتها و حبيتها

اما القطط ..فأنتا اخويااااا بقى و بعزك جدا عشان اللى يحب القطط اشيله على راسى ...دى اصلها غية و هواية

انتا من الناس الطيبة ف العالم دا يا احمد و ان شاء الله نشوفك على خير يوم لقاء اسكندرية

النجمة بتاعتك يا فندم

محمد ناصر الدين الهلالى
-------------------

المدونة نورت
اهلا بيك

ميرسى على رأيك
بس مجوبتش ليه السؤال ؟؟

أع ـقل مـ ج ـنـونــة
----------------------


ايوه ايوه

الغجابة انقذتك
تكونيسش فاكرة لما تقولى بحبك و تحطيلى قلوب هينضحك عليا و اسكت بقى
لاااااااااااا
لازم تعترفى

و كيويس انك اعترفتى
عشان تاخدى النجمة عن حق
مش كوسة


و كان لازم اخوفك بالقطة عشان تخضعى للإرهاب النفساوى و تحترفى انك بتحبى كل العالم دى ؟؟؟

يعنى كانوا هينحرموا من الكلام الحلو دا
مش يبقى حرام عليكى ؟؟

الحمدلله على وجود البلوجر يا ستى
و الا كنتى فضلتى تشيلى جواكى كل الأسئلة و الأفكار دى من غير ما تخرج و تتبادليها مع غيرك

انا بحس ان دى من اجمل حسنات الكتابة ف المدونات
التواصل
و مشاركة الىخرين تجاربهم بكل ما فيها
حتى السيىء فيها
الواحد بيتعلم منه

انا كمان بحبك يا حبيبتى
و مسيرنا نتقابل
فكرى ف سفرية اسكندرية
و ان شاء الله تيجى ايام تانية

ربنا ينفخ ف ضورتنا
و نتلم ف الخير دايما


مين اللى يطردك دا ؟؟
دنا اسيبهالك و انطرد انا

النجمة دى جاية صحيح كرت ارهاب
بس تستحقيها عن جدارة
و حواليها قلبى و قلبك

♥ ★ ♥

اندروميدا
----------

اهلا بحضرتك
المدونة نورت

بس حكاية ان المدونة لا تعكس ملامح صاحبها
اظن هختلف معاك فيها

لأن المدونة مش كلام مرسل مكتوب و بس
المدونة قالب و اختيارات للصور
للمزيكا
المدونة تعليقات بيترد عليها
او ميتردش خالص
المدونة كائن حى
على مدى طويل بتعكس حاجات
الواحد يلمها سوا زى قطع بازل
فيكون صورة عامة
قد تخطىء او تصيب اكيد
بس انا مؤمنة بالحكمة بتاعة
انت تستطيع ان تخدع بعض الناس بعض الوقت
لكنك لن تستطيع ان تخدع كل الناس كل الوقت

اللى بيمثل غير نفسه
بيتعب و يزهق و ينكشف

متهيألى كدا


نورت

لا ماانا بطلت خلاص انتظر مقابل من حد حتى ولو كان مجرد الاهتمام

يعنى .. باحاول علشان اريح واستريح ومش اكون عبء على حد حتى لو بالمشاعر


انا كمان مش مستعجله ولا باعد الايام ولا هاموت واشوفك ولا اى حاجه من دى

لولا و زهراء
-----------

ميرسى يا زوزّا
انتى دايما بتقرينى
بقلبك المشرق زى وشك
فعشان كدا بيعجبك الكلام

و شعورنا متشابه
و سبحان الله
التدوين دا علم الواحد يحب ناس بالغيب قبل ما يشوفهم حتى

و تختصرى ليه دنا عاملة البوست للفضفضة و التأريخ يا حبيبتى
الواحد يفتكر احداث حلوة
خلته ف المكان دا ..دى مناسبة تستحق البهجة و الرغى و كل حاجة

اشوفك ان شاء الله على خير
يوم 2 اكتوبر
بس تعالى من بدرى لو سمحتىىىىىىىىى

منحرمشى منك
يا ذات الوجه المشرق
و القلب الاكثر اشراقاااااا

نجمتك يا جميل

أحلى إستقبال من أحلى أخت بجد. معلش، مرت علي أيام عكننة وزنقة مايعلم بها إلا ربنا. أول مافكرت فالإنترنت كان فيكي وفي أختي appy . ربنا يسهل وأرجع تاني اكتب في المدونة.

الحب الجميل
---------

صباح و مساء الفل يا حبوبة

طبعاااا فاكراكى يا حبوبة
معقولة انسى
تعرفى اقولك على حاجة
معرفش مقولتهاش من زمان ليه !1
بس
صورة البروفايل بتاعتك انا بحبها جدااااااااا
فيها دفا رهيب
الورد البلدى حلو خصخصا الاحمر
بس الصورة دى تحديدا دونا عن صور الورد الاحمر عموما ع النت
..حلوة قوى
من زمان و انا بحب اتفرج
عليها قوى

و ان شاء الله يا حبيبتى
ما انوصل لن ينقطع
متتصورييش انا فرحانة قد ايه انى هشوفك المرة دى لما نيجى اسكندرية
بجد نفسى اشوفك قوى

انا كمان بحبك يا حبيبتى

النجمة الجميلة
لحبوبة الجميلة
صاحبة الحب الجميل

re7ab.sale7
------------
صباح الورد و مساه يا رحوب

انتى بالذات بقى
لو متعمليش مدونة هتنضربى
دى شغلتك يا ماما و المدونة وسيط هايل تتدربى فيه و تتواصلى مع الناس
و مجتمع التدوين هوه وسط القراء المستهدف ليكى
لأنهم الطبقة المتعلمة و المثقفة
اللى بتقرى يعنى و بتهتم

سلامتك الف سلامة

و الف مليون مبروك ع النجاح
مش مستغربة يعنى
كنتوا عاوزين متنجحوش و لا غيه؟؟
هجيب الفلكة بجد ساعتها

قولى لغادة و رضا و احمد الف مبروووووووك يا عيال
عقبال كل سنة و تتخرجوا و تخلصونا


ان شاء الله يا حبيبتى نتقابل اكيد عندنا سفر لأسكندرية
متهيألى قريبة منكم
شوفوا كدا هينفع ؟
هيكون يوم سبت 2 اكتوبر


مبسوطة ان الغنوة عجباكى

وانا كمان
بحبك يا حبيبتى


بما انك شطورة
و جاوبتى بضمير صحفى مهنى تمام
فالنجمة جيالك جرررررى
و هتحضنك و تبوسك كمان



يا رب تكون صحتك احسن دلوقتى
الف سلامة عليكى
و الفين مبروك

ميرام
------

يا رب شباكك دايما مفتوح
ع القلوب الحلوة كلها
يا ميرام

انا بسمع عنك دايما سمع خير
و الحمدلله جت فرصة اهى
تزورينى لاول مرة

و ان شاء الله
متبقاش اخر مرة

نورتينى


سيادتك مجاوبتيش
و مينفعش ندى نجمة كوسة

بس مكن
قلب

كيــــارا
--------

اولا
انتى م العالم اللى بتخرعنى لما تاخد قرارت بالمشيان
بس ببقى عارفة انه قرار لحظى
و اننا مش هنهون عليكى
يا بنوتات يا عسولات


ثانياً
اللى مريتى بيه
كلنا تقريبا حصلنا كدا
فيه ناس وقعت ف السكة منا
و احنا وقعنا من ناس
زى ما بيحصل ف الدنيا
بنتغش ف حد و حد يتغش فينا
و كلنا بنغلط و بنصحح ف نفسنا
المهم منكابرش
و اظن وجودنا سوا مع بعض
بيخلينا مرايات بنلحق عيوبنا من الأستفحال

ثالثاُ بقى
حوار اللبن دا مش عاجبنى بالمرة
طب نتحايل عليه
و نأكلك ايس كريم
و كريم كراميل
رز بلبن
اى حاجة من مشتقاته طيب
و لا هتوجعى قلبى معاكى

ادى النجمة يعنى
و اعمل نفسى مش واخدة بالى
م الكوباية اللى متشربتشى دى ؟؟

طوااااايب

اهى
مع البوسة و الحضونة طبعااااااااا

حفيدة عرابى
----------

يا فيدوووووو
انا عمرى ما قريتلك تعليق عندى مفيهوش حب و دلع و حنية
شوفى بقالنا قد ايه ؟؟
و علطول يا حبيبتى ان شاء الله


اظن كلنا هنتفق معاكى
ف امتنانا لعم بلوجر و الحاج جوجل عمومااااااا
لأنه ادنا الفرصة دى
بأبسط مجهود يذكر

انتى بتقولى ف كل سطر احساسى و تجربتى الشخصية

الوحش امكننى احتماله انا كمان
و الحقيقى و الكويس احسن

احلى جملة بقى
حكاية عدم قفل المدونة دى
اان لازم بعدها اقول

انا بحبك قوووووووى بقى

و اقول كمان
بوسات و حضونات

واحدة من الاحرار
اللى من اتباع مدونتك يا فندم

النجمة اهى يا فيدووووو
يا حبيبتى انتى

خواطر شابة
----------


كنتى ف بالى و انا بكتبه اصلاً
ف كل موضع فيه
عشان عارفة ان بيننا مشتركات كتير
تجمعنا رغم بعد المسافات
لكن سبحان الله
البعد مش عن المكان
البعد الروح عن الروح
و احنا ارواحنا ربنا جمعها يا خطورة


و لو مكنتيش جاوبتى
مكنتش هضرب
انا بهدد بس
اجيبلكو صحة منين ؟!!!
هههههه

انا بحب قالب مدونتك يا خواطر
خصوصا الصباح الدباديبى اللى فوق دا

وانا عارفة انك بتحبى الدبايب
مكنتش مستغربة
انتى طفلة اصلاً
و فيكى نقاء و براءة العيال

النجمة تخطى الحدود و تطير لحد عندك يا حبيبتى اهى


د.ياسر عمر عبدالفتاح
--------------------

ايه بقى دا ان شاء الله ؟؟

كدا يا دكتور
دنا كنت عاوزة اديك النجمة بتاعتك
مش هينفع بقى

طب تخيل بقى انك خدتها

و يا عزيزى اجمل ما فينا التشابه الأنسانى العجيب ..حتى احيانا فى مشاهد الحياة اليومية ...
بجد
بيجيلى ذهول من شدة تطابقنا احيانا

نورتنى

وجهة نظرى
----------

استقبال ايه ؟؟
دنا عاوزة اعمل فرح
و بوست مخصوص
بس سبحان الله
انتا جيت ف البوست
اللى ليك فيه برضو



بس خلى بالك
دا جر رجل بس
انتا هتنضرب
هتنضرررررب


بس بغتة
من حيث لا تنتظر
انتى عارفنى
معنديش رحمة
و القتلى و الضحايا
ف مدونتى
اكوام اكوام ف الفسحة


انا مش هسأل ايه
و ليه
هقولك بس
الف حمدلله ع السلامة
و ربنا يفرجها عليك و لا يعيدها ايام
بجد كنت مفتقدة تعليقاتك جدا
انتا غالى علينا يا عم
عودا حميدا و معتزاً و كل حد حلو
عرفته ف البلوج سبوت و اخوانه

يلا افتح مدونتك بسرعة
و احنا ف انتظار الجديد

نورت البلوجر كلاته
يا رهين المرعبين

انتا بقى من غير ما تجاوب
ليك نجمة بمناسبة رجوعك
اهى

كلام من قلبى
----------
اولا
و لا يهمك يا حبيبتى
انتى متأخرتيش و لا حاجة
تعالى براحتك خالص

ثانياً
انتى نورتى البلوجر كله
بس اختصرتى خالص
و مقولتيش تفاصيل ليه
؟؟

ثالثا
يوسف مرجعشى لسه
معرفش ليه قولتى كدا ؟
بس و الله فال حلو
يسمع منك ربنا و تقولهالى عن حقيقة واقعة ان شاء الله


خالص ودى ليكى

mrmr
----

معاكى يا مرمر
الفضفضة اكيد
بس احنا لينا اخوات و اصدقاء و زمايل دراسة و شغل ..نحكى معاهم

اشمعنى المدونات تحديدا استقطبتنا كعالم ؟

اظن ان الكتابة و سحرها
ليهم دور

و مش اى كتابة
الخط اللى بيجمعنا كلنا
بيصب ف النهاية فى حاجة واحدة
عاوزين نغير واقعنا دا
للاحسن
و نغير نفسنا بالتبعية
عشان نكون احسن

خلاص افيشى ضرب
النجمة اهى يا مرمرة

Empress appy
-------------

انتى كمان يا آبى
و دايما اسأل عليكى داليا قوس قزح
ربنا يسمعنى عنك كل خير
يا رب




انا كمان اتعلمت زيك
و الحمدلله
من كل حد صادفته
حتى على مستوى مدونة كل واحد


انتى بكل مفرداتك
أثرتى ف عالم التدوين

خرفانك البمبى

النحلة و الدبور

و برعى ابو مفك

فراشاتك اللى كانت
ف قوالب مدونتك

بطوط و من بعده سى سيمبا

اغانيكى اللى اول باول
جديدة و مميزة

و قايمة مدوناتك
اللى عمرانة ناس اشكال و الوان

صفحة تعليقاتك الساخنة اللى كانت بتقلب بخناقات و تتلم علطول زى ما تكون ساحة عكاظ التدوينية

انا ما زلت فاكرة
و معجبة بعناوين بوستاتك
مميزة و فيه شقاوة و خفة ..شبههك
مصطلحاتك و الدلع اللى فيها

آخر جملة اللى فيها البهاريز و الخلاصة
و اللى تبدأ ب ...كان معكم

انتى مدونتك دايما
كانت شبههك يا بيبى
و لقب قمر التدوين
و بيكيا و حواديتها
بؤجة الخير
و ابو الريش
اللقاءات الحريمى
حاجات كتييييييير
و ذكريات اكتر
الحمدلله
مش باقى منها غير الحلو
و بس

نجمة سيادتك اهى
و انتى وحشتينا كلنا

عاشقة الحب
---------

شكرا على ايه ؟!!
مش عارفة

بس العفو يا ستى

و كل سنة و انتى طيبة
و مبسوطة ان البوست عجبك كدا
و سبب ف الحماسة دى
اتمنى دا يكون شعور الغالبية لإننا بنأثر ف بعض فعلاً
فليه ميبقاش بإيجابية
بدل السلبية و الإنزواء ؟؟

نورتى
جدااااا

ليس فقيراً من يحب
---------------

يا لهوى يا رانيا

انا اول تعليق عندك ؟!!
انا عينى رغرت و اتنيلت و بهتت و ازبهليت و كل حاجة بعد ما قريت الجملة دى ؟؟


بجد انا فرحانة جداااااا
بتعليقك دا
و انتى كمان فرحتك بتقول حاجات كتير
انك واخدة الحكاية بحب و بتحاولى تشوفى فيها الحلو
عارفة فكرة النضارة
لو بمبى هتشوفى الدنيا حلوة
و لو نضارتك سودا
مش هتعرفى تلاقى حاجة كويسة
الواحد اصله جرب الأسود كتير لقى نفسه بيتراجع ..بينما عنده فرصة يختار
أيوه
على رأى د.ستيتة
السعادة ارداة
دى حقيقة بحسها جدا

انتى جاوبتى احلى اجبة
عشان كدا ليكى نجمتين
مش واحدة

★★

بوسات و حضونات
و تأثرات رهيبات

بوبو
----

ازيك يا بوبى
انتى كمان يا حبيبتى وحشتينى جدااااا
و النبى عاوزة اشوفك و سوقت العالم على خيخة و باينها مشغولة
بس بعد الرجوع من اسكندرية
يمكن يكون فيه حاجة
هبقى اقولك اكيد
ازى سى بيكا و باباه
يا رب تكونوا دايما بألف خير

و يا ستى يوسف يرجع
و اديله انشالله درس كيميا
اى حاجة منك مقبولة و زى الفل
على قلبنا زى العسل

و انتى متنضربيش
انتى من اعضاء هيئة التدريس
يعنى معاكى حصانة تدريسية
زى الحصانة البرلمانية كدا

انتى و وليد و عمر
بحسكم من باقى اهلى
و الله بجد
اهلى اللى اخترتهم
و بحبهم قوووووى

مدونتك الحالية كفت و وفت
كفاية انها حتة منك
و بتعكس كتير عنك
خصوصا ردك ع التعليقات يا بوبو
انا بحب قووى اقرى ردودك ع الناس
فيها حنية و خفة
مش بقول ارق مخلوقة ف الكون
ابقى مغلطش بقى

النجوم دى عشانكم
انتوا التلاتة
و لو ان سى وليد مجاش
بس عمر تبعك برضو
و انتى تنوبى عنهم
فرض كفاية يعنى

★ ★ ★

بوسات و حضونات
يا حبيبتى

شمس النهار
---------

يا لهوتينى
شمس نهار المدونات و قمرها
ها هنا

اتارى البلوج منور
ع الآخر



هوه بصى بقى
من ناحية الفراغ
انا اشهد انها ملته جدا
بس المهم ملته
بشى مفيد و بناء
و الصداقات فعلاً
اكنت و الحمدلله ف الخير
انا بتكلم عن نفسي ع الاقل
بس غالبا دايرة اللى اعرفهم
تقريباً كلهم زى حالاتى


اصلنا بنجذب بعضينا
بنبقى شبه بعض
فيه حاجات مشتركة بتجمعنا
و اظنها غالبا الحد المعقول
من الأخلاق و الدين و التصرفات
ناس تطلع فوق شوية
و ناس تنزل شوية
لكن فيه خيط رابط بيننا
مخلينا كتلة واحدة
و الحمدلله


انا عاجبنى جداااااا
روح التفاؤل بتاعتك
و فعلا
المفروض منسيبسش الحاجة الحلوة
للمخربين ..ينهشوها
نقعد و نعاند
و المفروض احنا اقوى
على الأقل نيتنا احنا خير
دا سبب كافى لمنح القوة


انا معجبة كمان جدااااااا
بالجملة التعريفية بتاعة مدونتك ...بجد حلوة و فيها طبطبة

النجمة اهى
و لو ان نورك كفاية يا حبيبتى

heba : )
---------

اهلا بيكى يا هبة
يللى الأبتسامة ملاحقاكى


ميرسى على ذوقك
و يا ريت تعلقى دايما
و تسمعينى صوتك

انتى نورتى

همس الاحباب
---------

انتا من الناس اللى حضورها كان طاغى و انا بكتب البوست دا يا خالد
انتا من العلامات المشرقة ف التدوين و العالم بتاعى
انتا اخويا الغالى
و شهامة و جدعنة الدنيا
انتا ايام الخير بكل ما فيها
بؤجة
و ابو الريش
و التبرع بالدم
و اى مناسبة سباق
السفريات اللى من غيرك متنفعش
و ماما لم تسمع اسمك و تسكت عشان عارفة انى فى حماية اخويا و رعايته
لقاءات التدوين العامة
و حفلات توقيع الكتب
اى حد بيتقل عليك و يحملك امانات توصيل الفلوس و الادوية و البؤج لأصحابها و مكانها
حرصك على لمتنا مهما كان فيه شد او توتر و كلمة الخير يا جماعة ملوش دعوة بأى حاجة
مفتكرش من ساعة ما دخلت التديون و عرفناك
ان حد زعل منك و لا يقدر حتى
انتا اخ لينا كلنا يا خالد
انا اصلاً مش عارفة اتكلم
انا كمان


احلى كلمة
المسيرة مستمرة دى
هيا خلاصة كل حاجة
كنت عاوزة اقولها ف البوست

اننا نستمر
ربنا يكافئك خير عنا
و يقعده لشابى و همس


تعرف ؟
انا مش هديك النجمة
عشان...
انتا النجمة نفسها
يا غالى

محمود باحث عن حب
---------------


يا اخ محمود
اولا
الكلام اللى ف الشريط الجانبى
مقتصر على نمرة التليفون و الموبايل و الماسنجر و الفيسبوك و دى حاجات بسيطة خالص زى منتا شايف

بهزر بهزر

دى قاعدة عامة

لكن الأيميل موجود
و كمان المدونة هنا بترحب بكل حد
و اللقاءات التدوينية كمان

فلأ متتحيرش و لا حاجة
اهلا بيك دايما
علق زى كل الناس الحلوة
هنا ما بتعلق


و ميرسى لأن البوست عجبك
كلك ذوق

و عندك حق
فيه وشوش مزيفة اكيد
بس مساحة الصدق مش قليلة برضو

و طول زى منتا عاوز
يا محمود
انت مرحب بيك و الله



و بما انك جاوبت
النجمة بتاعتك اهى
اتفضلها

Lady-E
------

انا مذيعة ؟
هنبتديها تريقة يا لولو
هجيب الفلكة و لا يهمنى
لو جاوبتى السؤال عشر مرات
هه

انا غيرت الغنوة
و يا رب الجديدة تعجبك

و خلى الشباك مفتوح
دا يوم بورسعيد لما اتلمينا
كان من اجمل الأيام يا لولو
افتكرى دايما الحاجات الحلوة
يا حبيبتى

سلامى لخالتك الغالية
و دمتى انتى كمان اجمل جارة
و ارق الناس


نجمة سيادتك
القفى بقى

احمد سعيد
--------

البوست دا كان لازم يتسمى
الليلة عيد

آه
بجد



نوراة عاملة حالة جميلة
سواء تدوينياً
او مقالاتها ف الدستور او عموما
و احنا عاوزين نتشكرلها و النبى
ع الفرصة السعيدة دى
و نقولها ميرسى
هيا و المدونة الاخت التانية
اللى شجعوك تعمل مدونة


غالبا كلنا كدا
انا برضو اتشجعت من
د.زين صاحب مدونة تسابيح
و من نبضات الجميلة
انى اعمل مدونة


التواصل و التشجيع دا
أكيد مش جاى كدا
اعتباطياً او بلا معنى
احنا بنأثر ف بعض
حتى من اول خطوة مشيناها
ف حى البلوجر


حدوتك حلوة
و شبه حواديت
باقى الاحباب يا احمد

نورت روح قلب ماما
يا صاحب العنبر

النجمة بتاعتك
بتلالى اهى
اتفضلها



ومنتحرمشى
من تعليقاتك
يا فندم

عاشقة الرومانسية
---------------

بت يا دودو
ينفع كدا
ترميلى سطر ف تعليق موش للنشر
و تهربى كدا ؟!!!

ماشى ماشى

طب روحىىىىى و ربنا .. يكرمك يا رب
و اسمع كل الخير عنك

و مش قصدى من تعليقى انك تكونى عبء يا بت
هتخلينى انتكب حماقة و اطلع الفلكة بجد

انا قصدى تكبرى دماغك
و بس
انما عبء دى كلمة صعبة قوى
و لو افترضنا صحتها

مهو لازم لما حد يحب حد
يبقى عبء عليه
طبيعى
مش الحب مسئولية
و لا اى كلام ؟؟

امشى من قصادى الساعة دى
عشان هتنضروبى بقى

نجمة تانية اهو
هييجينى اعز منك ؟؟


انتى صدقتى ؟؟
دى عشان رودينا

وش بيطلع لسناه

كيــــارا
----------

انا كمااااااااان
يا كوكى

جميلة جدا مدونتك

تعبيرك صادق جدا و كلامك ممتع

ما قادنى للتدوين شبيه الى حد كبير بما حكيتى

كل مننا بداخلة وجع و هنا متنفس قد يقينا الاكتئاب او ربما ما هو أكثر

انا ح اجاوب اهوه ليس انصياعا وخوفا من الضرب لا سمح الله لانى عارف ومتأكد ومستيقن
ان مامت يوسف مش ممكن تلجأ لمثل ذلك الاسلوب
ولكن ح اجاوب باختصار لان اللى عندى كتبته فى تدوينة سابقة لى تحت اسم بطاقة بدون
رقم قومى .....
انا ابتديت تدوين بالصلاة ع النبى فى نوفمبر 2007 يعنى كلها شهرين ويبقى عمرى التدوينى
3 سنوات ....ودافعى الاساسى كان ولا يزال الاشارة ولفت الانتباه الى قيمة عليا احسبها مهمة فى حياة
المجتمعات الراشدة وهى قيمة ال لا اكراه واحترام الاختلاف واحترام الاخر
وكنت ولا زلت اؤمن بانه كلما اتسعت صدورنا وعقولنا لتلك القيمة ازدادت مساحة الحرية
وتحررت العقول من التفكير الاحادى الضيق الى سعة افق عقلى وشعورى يعود علينا بالسلام
الداخلى والتصالح مع انفسنا ومع الكون كله بما فيه من جماد ونبات وحيوان وانسان وما كل ذلك
الا صنعة الله الذى لا يريد لخلقه الا الخير
ماشى يا ست الكل .....
ماشى...
هل حققت ما تصبوا اليه
بقدر ضئيل ....نعم ولكنى اؤمن بان النتائج ليس على انتظارها ولكنها ستأتى حتما يوما ما
الاعمال بالنيات....وما عليك الا ان تلقى بحجرك فى البحيرة الراكدة محاولا تحريك مائها الاسن
وسياتى بعدك من يكمل حتما ...
وعلى رأيك
مش لازم كل حاجة تؤتى ثمارها سريعا@@
احيانا الصبر و الامل وطولة النفس
بيكونوا هما الدرس و الحكمة
و مش حيلة العاجز ..كما يقال
و اختكم شخصياً شايفة تغيير فعلاً
على الأقل مننا فينا
احنا بنأثر فى بعض""""
وتجربتى على كل حال
كانت خير فى مجملها
وانا مش ممكن اخليك يا ام الخير
ف مأزك تاريخى حرج ابدا
بس حافضل مستخبى برضو
هههههه
اوعى تنطى ع البوست دا ببوست جديد لغاية ما الحبايب ياخدوا وقتهم

تحياتى وكامل تقديرى

هو دا امتحان
؟!

طب هو الواد اللي قدام دا مخبي وراقته ليه؟

ها؟

واللهي
امتحانات الاوبن بوك
دي
بتبقي صعبة

..
طيب
بصي يا ستي
اعترف انا
المدعوة سالي
اني
دخلت التدوين
في
6/2007

وجرجني للدخول صحابي
هما اللي غرروا بيا
منة وياسمين
قاعدوا يقولولي اني بتكتبي حلو
وجربي
وهتفلحي متغفيش
بس انا سيادتك مش بيرمي التهمة عليهم

انا معترفة
بس واللهي نيتي كانت حلوه يا سعادة الريس


دخلت ليه
قولت اكتب اللي في دماغي
وان لدماغك عليك حق

مش قصدي حاجة بتطلع دخان واللهي
مع انه ساعات يا ست الريسة بيطلع من غيرها

طبعا مبسوطة يا ست الريسة
دا كفاية اني واقفة قدام حضرتك دالوقتي

ها يا ريسة
براءه؟

انا سايبة العيال منشورين ع الحبل
وابوهم مسافر وسيب هم لي امانه في رقابتي

ها يا ست
براءة؟

الله يخليك

دا انا غلابانة

وبحبك
:]

كل سنة وانتي طيبة يا صديقتى الجميلة
انا معاكي ان المدونة انعكاس لصاحبها في مقالاته وتعليقاته وحتى شكل المدونة مع اعتبار واحد زيي مالوش خبرة كتير في شكل المدونات وقوالبها فبستسهل الشكل العادي بتاع بلوجر .. حتى بردو في الحاجات الموضوعة جانبا فبما انك طابلة اننا نتكلم عن روحنا هقولك اني رفضت احط ساعة او شكل جذاب قوي للمدونة لاني عايز اللي يدخل يشنغل بيا انا وبس وبكلامي انا وبس من غير عنيه ماتبص على الساعة او يتوه مع قالب المدونة ودة بردو انعكاس لشخصيتى في الواقع انا ماحبش حد ينشغل عنى او مايهتمش بكلامي زي مابكون منصتلك وانت بتتكلم انت كمان لازم عنيك تبقي عليا طول مانا بكلم
اما بدون من قد ايه في عيد الاضحي الجاي هيبقي 3 سنة .. ايوة من 3 سنين بعد ماضربت اللحمة واهلي مشيو من عندنا دخلت الاوضة وقلت لنفسي يا واد يا درشاوي يا جميل لازم تدشن بقي مشروعك التدويني العظيم وتفتح شباك الناس تتطل منه على ابداعك الرائع
- طبعا رائع قوي وجامد اخر حاجةولا حد عنده اعتراض ولا راي تاني -
اما عرفت التدوين ازاي كنت بسمع ان في شيء اسمه بلوجر بس مش عارف ايه هو كنت بدخل على موقع غادة عبد العال ماعرفش ان دي التدوين اللي بسمع عنه من زمان كل اللي اعرفه ان ده موقع صاحبته بتتكلم فيه عن حكاياتها مع عرسانها واني بموت من الضحك وانا بقرأه ( كانت غادة لسة بتكتب بتلقائية وعفويه قبل ما تتدخل في دوامة النشر وتحط على نفسها 100 حاجز وتفكر في الكلمة مليون مرة
اما دخلت ليه لاني كنت عايز انشر قصصي واشعاري وابداعي الادبي كنت محتاج محيط اكبر من اصدقائي اعرف رأيهم فيما اكتب ماكانش فيه فرصة للنشر الورقي فجأة لاقيت الفرصة دي من خلال النت .. علشان كدة دخلت باسمي الحقيقي من غير ماافكر لحظة واحدة في اي اسم مستعار
عملت المدونة وفضلت 4 شهور ماحدش عارفنى لحد لما نشرت قصة (الحل الامثل ) ولاقيت التعليقات بتنهمر عليا 27تعليق لواحد ماكانش بيجيله اكتر من 3او4 تعليقات طبعا كانت انجاز كبير قوي
اه انا استفدت من من المدونة من نواحي كتير
حصل تواصل بيني وبين الناس بقى عندي ثقة في نفسي اكتر اتاكدت من اني كاتب موهوب وقلمي بيأثر في الناس ودة كان بيظهر من خلال التعليقات اللي كانت دايما بتتعامل مع القصص على انها واقع حصل مش قصة من خيالي دة كان بالنسبة ليا اكبر نجاح .. رغم حدة التعليقات وحدة الاراء الناتجة عن سوء الفهم
اتعرفت كمان على ناس حلوة كتير اكتر من ان يعدو نا بعتبرهم اصحابي واخواتي ( طبعا زيك انتي وصفاء جلال ووليد الزهيري وتايه في وسط البلد وخالد وسو) وناس تانية كتير قوي مش هينفع اقولهم كلهم هنا
عيب التدوين انه بيسرق الوقت جامد
وانك ساعات بتتكعبليفي السكة بناس كدة ملهمش اي لازمة ( مرة دخلت خطأ في مدونة واحدة سحاقية كانت قايلة كلام لحبيبتها ايه كله رومانسية ملتهبة .. قلتلها لو بنت قالتلي الكلام دة هبقي اسعد راجل في الدنيا)
غير كمان بعض المدونات النسائية اللي كلها بتبقي شتيمة في الرجالة رغم اننا بنكمل بعض راجل وست مش في حرب ولا خناق
وبس يا ستي انا كدة ابقي عملت كل المطلوب منى من خلال هذا البوست وبوناءا على تعليمااتك ..وطبعا احلام حضرتك اوامر عندنا يا فندم
وماليش دعوة بقي لو كنت طولت

**************
ملحوظة اخيرة مهمة جدا اهم من كل الكلام دة:
______________________________
حضرتك لازم تقرأي الكتاب علشان تعرفي ايه هو الحل الامثل وايه هي اعترافات الرئيس السابق وايه هي اغنية الوردة اليضاء .. وكل التفاصل دي
وسلام عليكم بقي

أبو الطماطيم
إزيك من هنا ليوم القيامة
يا رب تكوني بخير و في خير بعون الله
بصي بقى البوست ده ممكن أكون أنا واحد في المكعب الأرضي قرأه و فصفصه و ماحسش بطوله ( زي ما بتقولي ) أبدا أبدا أبدا مطلقا أصلا
بس تقولي إيه بقى يا طمطم
مشغوليات مشغوليات مشغوليات
طهقت يا أختي
مش عارف البلد دي من غيري كانت عايشة إزاي
إحم
نخيّش في الموضوع أحسن :)
مشوار التدوين معايا ده له حكايات و أساطير و مغامرات و شغل خيال علمي يعني هاحاول أجيبلك الملخص بتاعه و البرشام في الكام سطر الجايين دول
أول ما سمعت عن التدوين خالص مالص بالص كان طبعا من صفحة مدونين و مدونات اللي كان بيشقلطها عبد المنعم محمود في الدستور .. زي بقية البشريين يعني
بس ماكنتش مهتم بالموضوع قوي
كانت عاجباني الفكرة بس ما كانتش مستهوياني
أول مدونة دخلتها مش فاكرها الصراحة
بس فاكر إن لما دخلتها كان صاحبها فارش موضوع عن فيلم عمر و سلمى الأولاني أول ما نزل
و نازلين فيه شتايم و سب و قذف و لعن و حاجة كده يا أختي أستغفر الله العظيم
المهم أنا اصلا ماكنتش فاهم ده إيه ولا اللي بيتكلموا دول إزاي أصلا بيكتبوا كده و كلامهم يطلع على الشاشة
حاكم أخوكي أصله وقتها لا كان عنده كمبيوتر ولا كان عندي نت ولا أفهم الألف من عود القصب في المواضيع دي
و كبيري لما حد يقولي اطفي الكمبيوتر كنت باطفي الشاشة
كنت فاكره تليفزيون
بس كانت عجباني فكرة إن الناس تقعد تكلم بعضها في مجموعات على النت جوا الكمبيوتر :)
و أنا في دورة التربية العسكرية في الكلية في سنة رابعة لقيت واحد صاحبي بيقولي تسمع عن المدونات
قلته على خفيف كده
قاللي أنا عندي مدونة
لقيت نفسي بصتله ويكأنه كائن فضائي
و قلتله بقى احكيلي ايه موضوع المدونات ده
قعد يشرحلي و يشرحلي و يشرحلي و أنا تقريبا كده ما فهمتش غير بتاع اتنين و نص في المية من كلامه
قلتله طب ما تديني لينك مدونتك برنس
واخدة بالك انت من لينك دي
مانا اصلي كان بقالي بتاع تلات اربع شهور شاري كمبيوتر و مدخّل نت من أسبوعين بقى و بقيت باتكلم بلغة السايبرات و نظام دوت كم
دخلت على مدونته انبهرت بيها و لقيته عامل شغل عالي الصراحة
طبعا انبهاري ده وقتها كان ما يفرقش كتير عن انبهار العيال الصغيرة أيامنا بالأتاري أبو عصاية في النص
قلتله أنا عاوز اعمل مدونة زيك .. أعمل ايه ؟
قعد يشرحلي و يشرحلي و يشرحلي و برضه ما فهمتش منه حاجة
دخلت دورت في جوجل لغاية ما عترت على مدونة زينب ( بنت مصرية ) اللي عاملة فيه شرح تفصيلي دقيق من الإبرة للصاروخ عن إنك إزاي تعمل مدونة
و كانت أول مدونة أعملها و كانت اسمها الفراشة
أيون .. الفراشة
أقولك
سبب إن أنا كنت عاوز اعمل مدونة
إن وقتها كنت لسه باعاني تبعات كصة حب عميقة مشتعلة من طرف واحد - اللي هو أنا طبعا - بعد ما اللي كنت باحبها ادتني صابونة و اتخطبت
كنت فاتح المدونة نظام شحتفة بقى و بتاع و إني أعيش دور العاشق الولهام المخلص الأمين اللي حبيبته ما قدرشت كمية المشعوريات دي و فلسعته
و مستني بقى الناس تخش تتشحتف هي كمان و تنهنه ز تديني تعليقات نظام يا قلب أمك يا خويا و حركات من دي يعني
اسبوعين بالتمام و كنت مأستكها بأستيكة من العالم الإلكتروني
آه .. حاكم اصل احنا رجالة و ماينفعش ندوس في حوار الشحتفة ده
بس الفكرة برضك شعشعت في نافوخي تاني
و قمت زالط " بهذا حدّثتني نفسي "
عاوز أقولك يا أبو الطماطيم إني أكاد أجزم إن لولا الخطوة دي في حياتي كان زماني حد تاني غير اللي بيكلمك دلوقت
حد تاني أسوأ
بعقلية منغلقة و فكر محدود
العالم ده وسّعلي مداركي و غيّرلي نظرتي للحياة و لنفسي بشكل أسطوري
أكاد أجزم برضه إني اكتشتف نفسي من أول و جديد و احترمتها و احترمت آرائها و رغباتها ؛ تقدري تقولي كده اكتشفت شخصيتي
طبعا عاوز أقولك إن 40 % من النقطة الإيجابية دي كان سببه خلف الشاشة و 60 % سببه أرض الواقع
مع أول لقاء تدويني اللي هو كان التبرع بالدم التاني
و مقابلتي لناس اقل ما يُقال عنها إنها راقية بصورة عاالمية في تفكيرها و تصرفاتها و احترامها لعقلية و شخصية غيرها
انبهرت بيها جدا
و لقيت نفسي وسطهم و بدأت أعرفها كويس
من هنا يا طمطم بدأ نيجرو ياخد أو خطوة في اكتشاف محمد النجار الحقيقي و بدأوا الاتنين يندمجوا مع بعض و يتوحدوا في شخصية أقدر أؤكدلك إنك لو كنتِ شوفتيها من تلات سنين ماكنتيش هتقولي أبداً إن هي هي الشخصية اللي بتكتبلك الكلام ده دلوقت
شكراً ليكِ يا فاتيما و لكل حد فتح شباكه ليّ و خلاني من غير ما يقصد أحترم نفسي
:)

سلامـُـه عليكم

Tears
-----

اهلا يا تيرز

المدونة نورت
و ميرسى على ذوقك
و رأيك
و زيارتك

اظننا نتشابه فى حاجات كتير
و عشان كدا بحس ان الرابطة دى قوية و تستحق نتكاتف بيها و نعمل منها حاجة كويسة و لا نيأس

حكاية الاكتئاب دى مقولكيييييش
دى كانت قصة حياتى
و سبب لبداية المدونة حقيقى
و الحمدلله
جلسات البوح الجماعى بين الأحباب هنا
خلتنى نفسياً الحمدلله
فوق المرتفع و العالى و الممتاز
و الحمدلله


نورتى جدااااااا

sal
---

لأ لأ ضرب ايه؟!!
دنا بوء ع الفاضى
حتى إسأل الناس الحلوة
هنا عنى
انا اقف اجعجع بس
انما وقت الجد
عيلة
و اول واحدة تعييييييط

و حاااااضر
من غير حضرتط ما تقول
انا ناوية اسيبه مدة
عشان الناس تقول و تفضفض
كانت نيتى من البداية و الله
و دى م الحاجات اللى بتربط بينا برضو دون قصد
اننا بنفكر كتير زى بعض
و نحس ببعض
و نساعد بعض


حضرتك جاوبت اجابة شافية
و لهذا النجمة جيالك تسعى اهى
بكل فرحة

sally
------

ههههههه

انا كمان
بحبك يا لولى


و خلاص خلاص
مصدقاكى و شكلك بنت ناس
و انضحك عليكى

بس ابقى شوفى
محامى كويس


و ف ساعته و تاريخه
يتم اخلاء سبيلك
من سراى النويابة
بضمان محل خطوبتك
والواد الغلبان اللى لابس دبلة
عليها اسمك دا

براءة
ان شاء الله


و تقدرى تروحى


بس صحبتينك دول
لسه قاعدين معانا شوية


متبصيش البصة دى !!



احنا مش هنعمل فيهم حاجة
و خليكى ف حالك
واتكلى ع الله
روحى لمى العيال
قبل ما يقعوا
ف بلكونة اللى تحتيكوا


النجمة اللولى
عشان اللولى الحلوة
اللى جاوبت حلو


mostafa rayan
-------------
و انتا طيب يا صفصف

حكاية ان حد يركز ف اللى بتكتبه دى
منهج و طريقة تفكير يا مصطفى
و انعكست بشكل مباشر ف مدونتك
انا كمان حسيت بكده
لما دخلتها اول مرة
حسيت انها معمولة عشان تسلط ضوء على مصطفى الاديب ..مش المدون


انتا بطبيعتك شخص واضح
لونك محدد
و اختيارك لأسمك م البداية
بيقول انك مش م الناس اللى بتضيع وقت ف الجدال و تخبية مشاعرها
و لما شوفتك اتاكدت من كدا

انتا مية صافية
بلا تعكير يا صفصف

انتا الطيبة ذاتها يا بنى

ضحكتنى على حكاية مدونة الأخت اللى بتحب دى ...الواحد لازم برضو يتفرج ع اللامعقول عشان يمعقل نفسه ..حلوة يمعقل دى ؟؟!!


طولّ زى ما تحب
دى مدونة اختك ياااااض

و ان شاء الله اشوفك على الف خير
يوم السبت 2 اكتوبر فى ميدان رمسيس عشان نسافر اسكنكرية مع باقى الاحباب
انتا جاى
دا مش طلب

أمر ؟

لأ مش امر

دا رجاء
من اختك اللى بتعزك
و عاوزاك تكون جزء
م اليوم الحلو دا
ان شاء الله

نجمة عشان جاوبت يا اديب
يا فنان
بس نجمة طيبة ..زيك

ňįĝŗő
-----

من ابو الطماطيم
الى ابو النجاجير

حولّ

ازيك انتا يا غالى
و لا يهمك خالص
تعالى وقت ما تفضى
و اى بلد تروحها يا فندم لازم يحصلها كدا ..هيهرجوا و لا إيه؟!!


تعرف من الشكل العام كدا
للأجابات و التجارب
كلنا دخلنا التدوين ..صدفة بحتة

لكن

غيرنا من جوا
نفسياً
و انسانياً


و خلانا نكتشف
ان معرفتنا ببعض و باحوالنا
مش لازم يعدى صدفة
و لازم نستغله
و نتونس ببعض اكتر
و ننفع بعض
و لو مش عمداً
عارف فكرة ان النصيحة
تيجى فى شكل مش نصيحة
لأن اول ما حد يقولك بنصحك ..بتنصرف عنه و متسمعش !!


و الحاجة غالبا لما تيجى عفوياً
بتبقى اوقع ف النفس



تعليقك حلو قوووووى يا نيجرو
يا أبو قلب دهب

و اجمل ما فيه و
انا معاك قلباً و قالباً
الشكر لكل حد فتح شباكه
و خلانى شخص أفضل

ترجعلنا بألف سلامة
يا رب


النجمة بتاعتك اهى
دهب
يا ابو قلب دهب


تصدقى .. والله انا اول واحد قرأالبوست ده و كنتى لسه انتى ناشراه وقعدت بعدها متنح شوية وعايز اكتب اى تعليق ومش عارف اصله الكلام كان جميل قوى و كله مشاعر و حب و أخوية وحاجات كتير ومعرفتش الرد عليه يكون ايه قلت استنى شوية أقوم ارجع الاقى كل العالم دى علقت قبلى وكل البشرية دى دخلت من الشباك وانا اللى لسه بره بصراحة حسيت ان شكلى وحيييييييييييش جدا قدامك و انتى عارفة معزتك عندى.
فاكره زمااااان اول ما فتحتى شباكك ده وقعدت اقولك تعالى شاركينا ذلك العالم الافتراضى الجميل و فاكر اول تعليق ليكى عندى لما قلتى انك حاسة انك طايرة فوق فى السما.
فاكرة تسابيح الدكتور زين ذلك الرجل الحكيم الذى اختطفه منا الفيس بوك لكن يكفى ان له الفضل فى ان تعرفى طريقك الى عالمنا .
حاجات كتير و ناس كتير عشناها منذ فتحنا شبابيكنا على ذلك العالم الجميل لكن فى اعتقادى ان اجملها هى تلك الروح التى تجمعنا مهما طال الغياب و بعدت المسافات وضلت الحروف طريقهاالى مدوناتنا لكن تظل هى الملجأ والمكان السرى الذى نجرى اليه كلما ضاقت بنا الدنيا .
فاطمة ... ايتها العزيزة
بفضلك انتى لا زلنا نعود مهما طال البعد الى شبابيكنا لنطل منها على الدنيا الجميلة و الناس الطيبة
بفضلك انتى لازلت تلك القلوب تنبض بالحب و الخير و الامل
بفضلك انتى لا زلنا نحلم

فاطمة شكرا لكِ
شكراً على كل شئ و أهم شئ وهو وجودك معنا

دمتى لنا و دام شباكك مفتوح الى الابد
ودام لك كل هؤلاء الاخوة و الاصدقاء الذين إمتلأت قلومن هنا .. من حدود المجرة
بهم حباً لكِ فى الله

وتقبلى كل الود و التقدير و الاحترام

أنا قولت اجى اسلم
وأقول لحضرتك كل سنة وانتى طيبة

يا حبيبتي يا طمطم
انا الحمد لله بخير والله واحسن م الاول ...وخلاص مش رايحة للدكتور تاني مش كفاية اه ضحك علي وقالي انه مش هيقصلي شعري واكتشفت ان شعري بقي ربع شعر مش شعر كامل هههههههه...الحمد لله بجد ..بالنسبة للكلية والله احنا ذاكرنا كتير بس الامتحانات كانت صعبة لكن ربنا اكرمنا والحمد لله تقديرات حلوة...شوفي انا دبستك في واجب تدويني عندي علي مدونتي ...لازم تردي علية والا هزعل واعيط وارجع تاني للدكتور ....ههه بوسات وحضونات كتييييرة

كل سنة و انتى طيبة يا فاطيما (العيد و رمضان و كدة)...متأخرة شوية بس معلش:)))

ما تغيبيش تانى:)

السلام عليكم

كيف حالك فاتيما وكل سنة وانتي بالف خير .. معلش متاخرة شوية ..

من اروع واجمل ما كتبتي والله بقولها من قلبي بلا مجاملة وتعلمين مدي احترامي لكي .. وانا اتفق معك في كل ما كتبتيه .. وقرأت التدوينة كاملة حتى ولو كانت أطول عدة مرات .. بس ملاحظة واحدة اوتساؤل وحيد بماذا تقصدين باول كلمة هي ن والقلم اول كلمة ؟

وما شاء الله ناقدة ممتازة للمدونات .. وها اجاوب على سؤالك وها اطمع منك في نقد لمدونتي بكل صراحة وبكل النقاط التي ذكرتيها ..

اما جواب سؤالك ( يتفضل ويقول امتى شباكه انفتح ؟ و كان السبب إيه ؟ و شايف نفسه حقق اللى عاوزه و تجربته كانت خير فى مجملها و لا السيىء كان اكتر ؟ )

فتح الشباك لأول مرة عندما طلب مني شخص من المدونين الاتصال به للاستفسار عن شئ ما وظل هذا الاتصال مستمر لأكثر من عام بصداقة واخوة وهو الشخص الوحيد الذي اتصل به تليفونيا وبالماسنجر .. ليقيني بان من الافضل عدم الانفتاح الزائد في عالم التدوين ..اما اني حققت ما اريده بالطبع لا اللهم الا اني اكتب لاحقق ذاتي اولا ولافادة غيري ثانيا .. والتجربة خير في مجملها والحمد لله وانا راض عن نفسي وعن ما اكتبه بصرف النظر عن رأي الآخرين ..

وانتظر منكي نقد شامل لمدونتي ..

على فكرة أنا ارى كثير من المدونين والمدونات اثر رقيا من كثير من كتاب الصحف فيما يكتبون وهم احق بالعمل الصحفي او الأدبي ..

تحيتي

صباحك افراح يا تيما

عملا بمبدا انك ف الفرح بردو مدعية مش منسية

انا جاى اقولك انى النهاردة ا اخويا حبيبى شبكته النهاردة

وهابقى حمااااا هههههههههه

عقبال ماتشوفى يسوفه يارب يا حبيبتى ان شاء الله

وده اللى شاغلنى عنك الفترة اللى فاتت ومخلينى مش عارفة اتابع معاكى يا حبى ولا اسال عنك

بعد الفرح وما الى ذلك لينا رغى كتير اوى

ياربى تكونى بخير يارب

بحبك اوى يا وش الهنا والسعد

يمكن انا تقريب لسه جديد فى التدوين
بس اقدر اقولك سبب دا

ان المدونه بتاعتك قريبه منك اوى...بتعبر عنك...عن حاجات انتى شايفها ..حاجات انتى بتعيشى فيها...و طبيعى انها تكون غاليه عندك كداو تتعجبى من الناس اللى مختلفه عنك

ازيك يا فاتيما..وحشاني قوي قوي..بقالي 4 أيام كل ما اجي اكتب الرد يطلعلي حاجة تعطلني..المدارس بقى كل سنة و انتي و يوسف بخير يا رب.أما بالنسبة لموضوع التدوين و المدونات أنا أول مرة ادخل العالم ده كان بعد ما اشتريت بالصدفة كتاب أرز باللبن لشخصين بتاع رحاب و عجبني قويب و خدت اللينك بتاعها من الكتاب و فتحته..عرفت ساعتها يعني ايه مدونة و يعني ايه ناس تحكي و ناس ترد عليها..بس ساعتها مفكرتش اني اعمل مدونة.و من مدونة رحاب زرت مدونات تانية و بعدين قريت التعليق بتاعك عند حد مش فاكرة مين و جيت مدونتك..ساعتها كان فارس و يحيي مع باباهم و دي كانت أول مرة في حياتي يبعدو عني مدة طويلةو لما قريت بوستاتك لقيت نفسي مش قادرة أبطل عياط..كنت لوحدي يومها و بعتلك ايميل لو فاكرة و من ساعتها حسيت اني مرتبطة قوي بالعالم ده و الفضل كله ليكي..و عملت مدونة عشان انا كانت مشكلتي من زمان اني كل فين و فين يجيلي الالهام و اكتب حاجة و بعدين ملقهاش..قلت اهي حاجة للزمن.وبعد ما اتقبلت معاكم مرة و اتنين..حسيت ان المدونة و التدوين و أهله بقى جزء مهم جدا في حياتي.. بحس اني كدة كل يوم بتقابل مع صحابي و نقعد مع بعض نتكلم و نسمع بعض و نخفف عن بعض و نشيل هموم بعض..شكرا يا فاتيما لأنك انتي سبب تعلقي بالعالم الحلو قوي ده
ب ح ب ك

حازم شلبى
--------

ياااااااه يا حازم
انتا فين اراضيك دلوقتى يا عصفور
او بمعنى أدق
فين سماواتك ؟


تعليقك حلو
و رقيق و موجع لدرجة خلتنى ابهت شوية
لأنه رجعنى بالزمن لورا
كأنى اول يوم بدخل مدونات


انا مرضتش احكى بالتفصيل
زى انتا ما حكيت
مع انها كانت تفاصيل حلوة
بس عارف ليه محكتيش؟


عشان كنت هرجع برضو بالذكريات
لأيام كانت صعبة عليا قوى
اللى هيا مشيان يوسف
و انا محبتش اكتب البوست دا
و انا زعلانة لثانية واحدة حتى

د.زين وحشنى جدا
و نسيت تتكلم عن نبضات الجميلة
اللى تنبأت بمدونتى
و سألتنى عنها من قبل ما تتعمل حتى


و انتا يا حازم
فاكر لما كنت عمال تشجعنى
و تقولى اكتبى
و احنا معاكى
اقولك ايش وصلنى ليكم و انتوا فوق محلقين ف السما


فاكر لما كتبتنى فى قايمة احبابك
فاطمة فوق السحاب
لأنى حسيت وانا بعزمك تزورنى
انى فعلا بقيت معاكم لأول مرة
بركب جناحات
و اهرب للسما الواسعة
و اسيب الأرض بتاعتى بكل
خنقتها و سجونها


اهدائك ليا ببوست جميل مرة
و لقب ست الحزن اللى اطلقته
انا على فيروز
و بشياكة انتا ندهتنى بيه


اما لقبك انتا
فإخترته بنفسك
لما عرفت روحك بإنك عصفور
و سافر
ثم آرقه الحنين



احداث كتير مرت علينا
و انتا يا عصفور
اللى كل شوية تختفى
و نروح نندهك من على حدود المجرة
عشان مشتاقين لأشعارك الرقيقة

غطسانك الرهيب
اسابيع و شهور
و الامل انك دايما ترجع
تفاجئنا بتعليق
وغالبا اختك فاتيما
بتكون المحظوظة بهذا الشرف


كلمة شكرا بتاعتك
اللى كررتها كتير ف تعليقك
ميصحش تتقال يا حازم
لأننا كدا لازملنا كلمة جديدة
تتعدى كلمة شكراً دى
و تتخطاها


انا مبعرفش اسميه الشعور دا
غير اننا بنتونس ببعض
و نطبطب على قلب بعض
و نساعد بعض
و غيرنا كمان


يا ريت لو عاوز تشكرنى بجد
تكتب بوست جديد
لو سمحت
ممكن ؟


انتا مجاوبتش السؤال
بس بما انك من الأعضاء المؤسسين
و ليك حصة ف الأرض بتاعة المدونة
فالنجمة أهى يا فندم

mohamed ghalia
--------------

ازيك يا غالية
يا غااااااالى

مجوبتش ليه ع السؤال ؟

بتاخدنى ف دوكة يعنى
طيب

كل سنة و انتا طيب يا فندم
و منحرمشى من سؤالك يا رب ابدا

كون دايما بألف خير
ان شاء الله

re7ab.sale7
------------


ازيك يا رحوب ؟

يا ستى الشعر بكرة يطول و لا يهمك
المهم انك الحمدلله احسن

بالنوسبة للواجدب التدوينى بقى
يا جماعة انا اصلى جاوبته تقريبا قبل كدا فمينفعش اكتبه من جديد ف بوست
بس انا ممتنة جدا و الله
انك فكرتى فيا

منحرمشى ابداً منك

بوسيلى روحك و احضنيها
و مش عاوزة اسئلة محرجة
من نوعية ازاى احضن نفسى و ابوسها
و اصله مينفعش و كدا

إياكش تولع
---------


يا سلاااااااااام


تلات غلطات ف التعليق دا

(1)
بعد العيد ميتفتلش كحك
و بالتالى ميتقلش
كل سنة و انتا طيب
و اعديها كدا

(2)
غطسان و قولنا بيرمضن و يعيد
و هنمشيها راحة و استجمام
لكن خلاص خلصنا بقى
فين البوستات الجديدة
ف اياكش تولع و براالصندوق ؟

(3)
كمان تيجى لحد هنا
و تقرى البوست
و لا يرف لك جفن
و تفكر تجاوب السؤال ..


ايه بقى ؟
هه

التهديد بالضرب
مبيجبش معاكو نتيجة يعنى ؟

طنت عاوزة اديك النجمة
بس انتا انضطرتنى احجزها
لحد ما حاجة م التلاة تحصل

تكتب بوست جديد
تجاوب السؤال
تبطل تغطس الغطسات دى


كل سنة و انتا طيب
و وسطنا يا دكتور

جنى
---
و عليكم السلام يا سعيد

الله يخليك و ميرسى جدا
انتا علطول ساندنى


لا ناقدة و لا حاجة
انا بحبكو بس شوية كتييير
و مركزة معاكو
بس رأيى طبعا انطباعى
اكتر منه موضوعى


المقصود يا سيدى
باول كلمة
...يعنى اول كلمة بتخطر على بالى
لما اجى أكتب أى حاجة هنا
او عموما
اصلها آية موحية جدا جدا
و كأنها بتفكرك كدا
خلى بالك مما تسطره
و تأثيره


يمكن اكون عبرت غلط
و اتفهمت بشكل تانى ..
هصلحها حاضر


دايما عينك ناقدة يا جنى
بس ف الخير


و دا ينقلنى لأجابة سؤالك
مدونتك يا عزيزى
اعتقد فيه انعكاس كتير ليك
اصحاب المدونات الغامقة خصوصا السوداء دى ...حسهم بالنقد عالى
و عينهم بتروح ع الغلط دايما
فى اى حاجة
صادمين احيانا ف جدالهم
مع الآخر
بس عندهم قدرة عجيبة
على احتواء اى خلاف
برقة و سماحة
اختلافهم مع غيرهم مش مقصود بيه العكننة و الرخامة
دا بيبقى نوع من الفلسفة
و حب الجدل مع الآخر
ليس ألا


مصطلحاتهم قاسية احيانا
بس عشان توصل فكرة
مبيهتموش قوى بشكلهم قصاد غيرهم
ما داموا ع الطريق الصح
و شايفين روحهم على حق


مبيتغيروش بسهولة
و ثابتين على المبدأ
و الرأى


عشان كدا نادراً لما حد فيهم
بيغير قالب مدونته
غالبا كمان نادراً لما بيحب
يغير حياته
بس لما يحب يغيرها
بيكون التغيير رهيب
و كبير
واحدة واحدة بياخد القرار
بس لما بينفذه
بيبقى مرة واحدة
و دمتم

مبيبصش وراه
لأنه واخد القرار
بدراسة و تأنى
بس محدش كان واخد باله قوى
لأن عنده قدرة ع الاختفاء
و الظهور غريبة
كأنه مرحش ف حتة


هتقولى كل دا
بنتيه على اللون الأسود

اقولك ايووووون
و خدنى على قد عقلى


تعليقاتك يا جنى
بتقول انك شخص طيب القلب
حمقى و حمش و و بتغير على
اللى بتحبهم
و ممكن تتحشر لحد سلف
عشان حاسه اضعف
من انه يدافع عنه نفسه
بتحامى الفكرة و المبدأ اكتر
...مش بقولك فلاسفة و مفكرين


حكاية ان بعض المدونين و المدونات
اسلوبهم ارقى من صحافيين
و كتاب كتير
اشهد معاك بذلك

لأن للأسف التعيين ف الموسسات الصحفية له قواعد و شروط و غالبا الكويسين مبيكتوبش اللى هما عاوزينه
او مبيكتبوش خالص من اصله

التدوين عمل حالة تنفس صناعى
لرئة الكتابة فى مصر
عملها انعاش
بمعنى اصح
فتح شبابيك قلوب كتير
خلاها عايشة
و بتتنفس هوا نضيف
مش هوا قديم زى
اللى كان موجود زمان


تحياتى انا اكتر يا سعيد
و ربنا يديم الود بيننا دايما
ياغالى

мαησηα
------

الف مبروووووووووك يا منونتى

عقبالك يا قمر
طب انا مش هدق بقى و اقولك مجاوبتيش ليه و بتاع
نفرح بالعريس و ابقى تعالى على مهلك

الف مبروك يا حبيبتى
و عقبال ليلتك يا قمورتى


لما انا وش هنا و سعد
اومال انتى يتقال عليكى اييييييه؟؟


النجمة دى عشانك و عشان الفرحة الحلوة بتاعتك

السلام عليكم :)
منقدرش نزوغ طبعاً

مقريتش التعليقات لأني عايز أنام
:D
بس قريت الموضوع ومرتين كمان علشان الحسد

الإجابة تتلخص في الآتي

معاليكم حالمة عموماً ... يعني الغالبية أو الكتلة العامة لسه موصلتش لدرجة التعاون المثالي والتكامل كمجتمع صغير حتى لو افتراضي ودايماً بيكون في منغص من عائلة المنغصات :)

لكن بشكل انتقائي ... اه العالم ده ممكن لو شاورنا بشكل انتقائي كده هنطلع بمجتمعنا الاختياري

اللي عوضنا عن صعوبة الواقع أو استحالة تكوين مجتمع أو صداقات فيه

بالنسبة لي المدونة كانت مجرد حساب فضولي على موقع مفهمتش ظروفه ونسيته

لحد ما اتشجعت بعدين من روان الله يرحمها وفتحت المدونة على إيدها بعد سنة .. 2007 وكتبت فيها سنتين
وبعد كده بقيت مقل جداً

ليه بقى؟
اتسألت بضعة مرات وزوغت لأني عندي عقدة الإجابة بأمانة شديدة وبالتالي باخد وقت :(

بس هقول باختصار
لأن الكتابة بالنسبة لي فعلاً زي أغلب الناس عبارة عن إخراج وتفريغ طاقة ما ... من الآخر متعة حتى لو بكتب حروف ملهاش علاقة ببعضها وكلامي محتاج خبير هيروغليفي

+ إنها لازم يكون لها هدف تاني. متعلق بالآخرين اللي هيدخلوا صدفة ويشوفوا كتابتي ولو بعد ألف سنة ده بفرض إن صفحة المدونة هتسمح الظروف إنها تعيش كل ده

المهم .. السببين دول. المتعة والفائدة المطلوب أنقلها للآخرين
مش شايف نفسي مؤهل للسعي وراهم .. مش أستحقهم
لذلك عقاباً لنفسي أنا متوقف حتى إشعار آخر بإذن الله
ده باختصار

+ ظروف تانية بتؤدي للإنشغال أو عدم روقان البال للكتابة :)

بس بنعوض كده بتعليقات عند اللزوم أو رسايل بريدية بالحمام الزاجل الإنترنتي

أو تعليقات هنا وهناك على بعض ما يستحق التعليق في عالم الفيس بوء الافتراضي

عجبني الموضوع عموماً حتى لو كان زي ما قلت مثالي شوية في العموم
ويستحق يبقى معلقة من معلقات العالم التدويني

ويتعلق في قلب ميدان
ال
blogspot
دمتي بخير يا أم يوسف :)
والسلام ختام


التعليق هبعته تاني زيادة تأكيد لأني حاسس إنه ممكن يتوه كده ولا كده
لو وصل مفيش داعي لنشره مرتين

علومجى ..وربنا يستر علينا
-----------------------

ياه يا علوحجى
دنتا ما شاء الله
جبت تفسير صح جدا
مدونتى فعلا جزء أصيل منى
بكل ما فيها انعكاس عنى
و عن مشاعرى
و فعلا هيا غالية عندى
لأن بسببها عرفت اغلى الناس


انتا نورتنى بجد

و يا ريت تكرر الزيارة

dahlia...
---------
طبعا فاكرة يا داليا
عمرى ما هنسى ابداً
انتى كنتى مرايتى وقتها
و كنت زعلانة عشانك قوى
و عاوزة اتصرف و اعمل حاجة او اقول حاجة
أى حاجة اساعدك بيها
بس مكنتش عارفة ازاى ؟

فاكرة اول مرة شفنا بعض ف اسكندرية؟
ساعتها اتقابلنا وجهأص لوجه
و انا رايحة الحمام و انتى داخلة النادى
لما وشة جه ف وشك
قولت انا اعرف الست دى
معرفش ليه عينى لما جت ف عينك
اتهيألى كدا


مدونتك شبههك يا داليا
رقيقة
هادية من فوق السطح
و بركان بيغلى تحته
غيرك اهم عندك
عشان كدا اغلب بوستاتك عن حد
و احيانا حد متعرفيهوش بالمرة
بس انفعلتى عشانه
بتخافى لسه من حاجات كتير
بحكم اللى شوفتيه
بس مع الحزن بين سطورك
فيه امل مستخبى

مبتحبيش تتعبى حد
و لا تطلبى حاجة من حد
عشان كدا بتيجى و تختفى على استحياء


لسه الخوف ساكنك
عشان كدا بتنزوى كتير
و مبتحبيش تكونى تحت بؤرة ضوء

انتى حكايتك كانت
و ما زالت ملهمة ليا يا داليا
و فرحت قوى لما لقيتك خرجتى نوعا ما القفص لدنيا اوسع و ارحب
لقيتى حد يعوضك عن اللى فات
و حد جميل و طيب
انا فرحت لما شوفته المرة اللى فاتت اكتر ما فرحت لما شوفتك ..ايه رأيك بقى ؟!!
ربنا يخليكم لبعض
و يعوضكم خير
و عاوزة لو سمحتى تشدى حيلك
و تنفذيلى رغبتى
ممكن عاوزين بنوتة
اومال مين اللى هيتدبس ف يوسف غيركو ؟!!

انا كمان
ب ح ب ك


نجومك انتى و فارس و يحيى

★ ★ ★

Diyaa
------

و عليكم السلام يا ضيا
يا من الخير فى ركابه

معلش ابقى اقرى التعليقات على مهلك
لما تصحى ان شاء الله

كنت عارفة انك هتقولى انك حالمة
انتا دايما باصصلى كدا
و بحس ف تعليقاتك دايما
انك عاوز تخلينى بعيد عن مرمى اى نيران و بتحوطانى بالحماية زى اخ بجد
و اخ غالى كمان

بس الحلم مش دايما ضعيف
و سهل ينكسر
فمتقلقش عليا


متفقة مع كلامك
بس بحس ان لينا دور مهم فى البقاء على تماسك العالم دا او انهياره

يعنى لقينا بعض
ناس افكارهم و اتجاهاتهم و حماسهم تقريباً واحد
يقل شوية او يزيد
بس ممكن يتجمع .. بلا قيود
على هدف
كويس غالبا
يبقى ليه منمسكش ف دا بعزم ما فينا ؟

كان نفسى تستفيض اكتر
و انتى بتحكى على روان و تعرفنا بيها للى ميعرفش .. بس ماشى
اللى تشوفه

اسبابك للأنقطاع شبههك
قاسي على نفسك
و بتحطلها قواعد صارمة
لأنك شخص مثالى
معندكش رماديات
يمكن تقبلها فى غيرك
و تستوعبها جدا
بس لحد عندك
متحبش حياتك تكون باللون دا

و يا عم هيروغليفى سومرى بلغة اهل المريخ ..اكتب انتا بس و ملكشى دعوة بينا


كالعادة لازم ترفع معنوياتى
و تشد على إيدى
و تقولى كلام خير
زيك

منحرمشى منك يا ضيا
و لا من اخوتك الغالية

اتفضل النجمة بتاعتك
يا سى ونسان


حنان الشافعى
-------------

ان شاء الله
يسامحنى يا حبيبتى
و يمكن ييجى وقت
وتشوفى اللى انا شيفاه
وانى كنت قاصدة خير

ربنا يسعد ايامك
و يروقلك الحال
يا رب

السلام عليكم

الله الله الله الله عليكي وعلى نقدك الجميل .. كل دا وبتقولي مش ناقدة ولا حاجة دا انتي استاذة .. انا ها اخد النقد واعمله مدونة ان شاء الله بعد اذنك ..

وها اخد بالي مما اكتبه في التدوينات وفي تعليقاتي ايضا ..ماكنتش فاكر ان فيه ناس واخده بالها للدرجة دي ..

بس على فكرة اختياري للقالب الاسود لسبب علمي وقد يكون كما ذكرتي دون ان ادري .. اما السبب العلمي فهو :

ان اللون الاسود موفر للطاقة ..

اللون الاسود غير ملوث للبيئة ( الاشعاعات التي تصدر عنه قليلة جدا عكس اي لون آخر ..

اللون الاسود يحفظ شاشة الكمبيوتر ..

واستشرت البعض من قبل في التغيير فرفض ..

ولكني غيرت البنر الخاص بالمدونة اكثر من مرة حسب الاحداث ..

تحيتي وربنا يخليكي لينا

اه يا فطوم
تخيلى انا اتبهدل و اتسوح بجد فى مصر
:-((((
روحت اسكندرية امبارح فى مؤتمر و رجعت فى ديزل 6 وصلت القاهرة الساعة 10:45
تخيلى سكك حديد مصر بوظت التأثير السكندرى خالص
و توبتنى من هذوه المدينة تماما

بالمناسبة
انا كنت بعتلك اميلين واحد بخصوص لولة
و الثانى بعدها و مردتيش على الاثنين
يظهر و الجوجل بيهيس معانا و بياكل الايميلات :-((0
شوفت بهدلة بالشكل ده ماديا و معنويا

اول تعليق بتاع الشعر بتاع الشمس و القمر ؟؟
كنت ساعتها قرايت قصة من مجموعة الشفق
و الشعر فى بالى و اقراء بوستك و الاقيك بتوصفى الحالة ثانى

تعرفى بعد ما كتبت و ناس تعرفى شخصيا قرات الى كتبته
حسيت بقيود من ارائهم و انتقدتهم
المدونة كنت بكتب حاجات كثيرة
و اغلبها حاجات معرفش احكيها لمين و مع مين و اكيد مواضيع متتكتبش فى ايميل لحد
لايترد عليا انت غريبة قوى ايه الى يهمك فى بركان هناك و مسلسل هنا و خبر كذا و...؟

تغير لا معتقدش حغير
معلومة ياريت اكون اديت لحد معلومة

انا كل سنة غربة بندمجفى حاجة
اول سنة فيس بوك و نفرت منه
ثانى سنة المدونات لحد ما تون الشتيمة و النفاق زاد قوى
و ثالث سنة المدونة
و ادينى داخلة رابع سنة :-) مش عارفة حعمل فيها ايه ؟ طبعا ححاول اخلص الرسالة بس الوقت الفاضى ؟؟؟؟؟


كنت عايزة ارغى معاكى فى كذا حاجة
بس مصر مش مخليانى عارفة اعمل حاجة بنفسى و مزاجى و خلاص هانت 5 ايام و اعود لارض المعركة و اكتبلك من هناك
:-**********************************************************************8
الاحضان سماح القوى البدنية فيصت خلاص
:-)))

لن أستفيض في الرد وأطرح تجربتي لكن فقط سأقول لكِ أحسنتِ

مساء معطر بالورود ..انا حظى كل مااعلق ماتروديش على التعليقات بقالى كذا مره
عموما بوست جميل انا دخلت التدوين رغبة فى التعبير عن أفكارى ومشاركة الاخريين وشجعتنى صديقتى الجميله عاليا حليم ...وانا سعيده بهذه التجربه الجميله فى حياتى التى جعلتنى اتعرف على ناس كتير اصحاب فكر وأصدقاء فضائين فى منتهى الرقه والجمال والانسانيه والعمق واخص بالذكر انت يافاتيما
ربنا يسعد ايامك ودائما منوره وفاتحه شباكك فى عالم التدوين

تحياتى
عرافتك الساحرة

:-)

بوست جميل

بس أنا أحب أضيف - من خلال تجربتي - إنه برغم إن الأهداف الرئيسية لأي حد من دخول عالم التدوين بتكون محدده طبعا إلا إن الموضوع بيتطور تطور كبير بعد كده .. عامل زي المُدَرب اللي بيحط خطة للمباراة وبعد شوية من بدء اللعب بيكتشف إن ظروف المباراة محتاجة تغغير أو تطوير للخطة

لما بفتكر اللحظة اللي بدأت فيها التدوين وكنت ساعتها بفّكّر في إيه بينما النهاردة أنا وصلت لإيه بكتشف الحكاية اللي اتكلمت عليها فوق دي

حتى إنتي كمان الموضوع اتطور جدا بالنسبة ليكي .. زيك وزيي وزي كتير من المدونين

المهم إن التدوين كان من أجمل الحاجات اللي حصلت في حياتنا .. وغيّرت مننا كتير جدا .. ولسّه

انا جايه اخد النجمه بتاعتي غصم واقتدار

مش غصم اوي يعني لاني هجاوب وانتي اللي هتحددي انا جاوبت الاجابه المطلوبه ولا لا

التدوين بدأ معايا من يوليو 2009
وقتها كنت مخلصه امتحانات وقررت اخد الخطوة اللي انا عماله اهرب منها بقالي كتير
لاني متابعه من قبل كده بكتير جدا جدا جدا جدا

بس كنت تانيه ثانوي بقى ودي تعتبر ثانويه ومفيش وقت وكل اما الواحد يقعد ع النت الناس تبقى واقفه ع ودانه وقوم ذاكر والكلام ده

بس زي ما انتي شايفه بعد تعب السنتين ده كله ولا طلعنا باي حاجه منه

المهم يعني

السبب اني اعمل مدونه

اني رغايه

بحب اكتب اي كلام

هو هبل اه
مفيش منه فايده اه كمان
بس انا بحب كده
بحب احكي اي حاجه وكل حاجه

عارفه اني اللي بقوله ما يخصش حد الا انا يعني حكاوي عني انا
محدش هيطلع منها باي فايده
بس هو كده وخلاص

ما بكتبش عشان حد
بكتب عشان افضي وافرغ الشحنات اللي جوايا

كلام الناس وتعليقاتهم على اللي بقوله اثمن واقيم ويهمني اكتر من اللي انا كاتباه

بفرح بيه قوي
وبيحرجني قوي
وبيحسسني اني ليا قيمة قوي
وبيرفع معنوياتي قوي
وبيعلقني بيكم قوي
وبحس اني منكم قوي
وبالاقي معاكم اللي محرومه منه واللي مفتقداه


التدوين بالنسبالي حياة
عرفت منه ناس مش موجوده في حياتي وانا بتمناها

تعوووووويض عن كل المرار اللي بندوووقه في الحياة

زي البلسم
الايد الحنينه اللي تطبطب عليك وقت الزعل

مش عارفه اقول ايه بصراحه انتي عارفاني كل مرة ببقى فاشله في التعبير

ومش بعرف اوصف الكلام اللي جوايا صح

هكتفي بالكلام ده دلوقتي ولو حسيت ان ماسورة المشاعر انفجرت عندي هاجي تاني

بحبك يا بطابيطووووو

انا كتبت كلام كتيييير

فجاة البتاع قفل في وشي

مش عارفه وصل ولا لا

وصل خير وبكره
ما وصلش في اقرب وقت هاجي واحط اخوه ويمكن اكترررر ان شاء الله

حتى حظي في التعليقات ضارب

اولع في نفسي ولا اعمل ايه

جميل يا فـــاتــيما


:)

ربنا يجازيكي خير ويفرح قلبك بيوسف اللهم آمين

بالنسبة للأسئلة .. مممم

أفكر وأرجع أجاوب !

دخلت عالم التدوين في ديسمبر 2008 وقفلت المدونة وبعِدت شوية ورجعت تاني بنفس الاسم في ديسمبر اللي فات !

التدوين بالنسبة لي حاجتين :
1- رصد زمني : لفترة من حياتي – كان الفراغ فيها سبباً رئيسياً – كنت باحاول أقيم نفسي فيها وأعبر عنها بالكتابة زي ألبوم الصور كده اللي كل فترة تفتحيه وتشوفي ملامحك قد إيه اتغيرت وأنتِ فين منك .
2- فضفضة : بارتاح في الكتابة - لما - باكتب لنفسي !

مع الوقت (اكتشفت) حاجة تالته جميلة جداً .. يمكن بجد أجمل من الحاجتين الأولانيين .. وهي : العلاقات الحقيقية بين المدونين .. وبالذات في عمل الخير .. حقيقي اتشرفت جداً بناس من أروع ما يكون .. وكونت علاقات وصداقات مع ناس أصبحوا قريبين مني جداً جداً جداً .. وحتى اللي ما اتشرفتش بمقابلتهم بانبسط جداً لما بادخل مدوناتهم وأقرالهم .. باتعلم واتعلمت منكم كتير .. وبفضلكم – بعد المولى عز وجل - تطورإدراكي ونظرتي للحياة بصفة عامة والكتابة بصفة خاصة .. كتير منكم وقفوا جنبي وساندوني ونصحوني وساعدوني في محن ومواقف مريت بيها .. وكتير منكم بجد فرحولي في أفراحي وخللوا لها معنى وطعم ولون !
طب وبعدين ؟
ما فيش !
بقيت باعيش عشان أدون وأكتب عشان أملا المدونة وتعلقوا واستنى اللقاءات بفارغ الصبر عشان نتجمع ونتقابل ونتطمن على بعض !
وبعد فترة .. قلبت في ألبومي – مدونتي – ما لقيتنيش !
هههههههههههههههه
أه وربنا !
لا هو ده إحساسي اللي أنا حاسس بيه ولا هو اللي أنا عاوز أكتبه وحتى لو هو اللي عاوز أكتبه لازم أذوقه وأقننه وأعمل له مونتاج ورقابة عشان الناس اللي بتدخل تقرا !
وغالباً – بنسبة 90% - اللي كانوا بيعلقوا كانوا بيسقفوا ويطبطبوا ! نظام أنا جيت لك أهه وعلقت ابقى تعالى بقى وعلق عندي !
وحتى اللي كان بيعلق تعليق موضوعي .. كان بيعلق ع اللي فهمه وحسه .. مش اللي أنا أقصده ! وطبعاً ده مش ذنبه لإن أنا أصلاً كنت بانسى أنا كاتب الكلام ده ليه ؟ وفي الغالب كنت باحط أي كلام وخلاص .. المهم يكون محترم !
" نصر آخر ونكون قد انهزمنا تماماً"
دي كلمة قالها أحد الملوك بعد ما انتصر في الحرب .. وما فضلش معاه من جيشه إلا هو وجندي واحد !
افتكرت الكلمة دي وقتها .. وقلت : إستووووب
جميل التدوين .. بس الحياة أحلى بكتير .. جميل لما يكون حاجة من ضمن .. مش كل !
جميلة العلاقات اللي كسبتها من وراه .. وبادعي ربنا بظهر الغيب بكل خير للناس اللي عرفتهم بسببه .. أو .. على الأقل سمحوا لي إني أعرفهم بنفسي وأقحم بعضهم في حياتي ومشاكلي .. لكن أهلي لا زالوا هم الأقرب فعلياً وكذلك أصحابي اللي بقالهم معايا أكتر من عشرين سنة دول سندي بجد – بعد ربنا سبحانه وتعالى – واللي اكتشفت إني قصرت معاهم قوي الفترة اللي فاتت وانشغلت عنهم بالتدوين !
واللي للأسف ما حدش منهم عارف إني بادون أصلاً ! .. بإستثناء خطيبتي اللي عملنا أنا وهي مدونة تانيه خاصة بينا احنا الاتنين .
باعترف إني فقدت القدرة – لا إرادياً - على عمل توازن بين : حياتي في التدوين والحياة كـ مدونة !
يمكن .. بافتقد مساحة الفضفضة في المدونة وتعليقاتكم ولقاءاتكم .. بس حقيقي بالاقي نفسي في سطور ناس كتير منكم بتكتب حلو .. وبتعبر بصدق عن إحساسها .. اللي هو في الغالب إحساس كتير مننا ! .. دول بجد باتابعهم دايماً وبانبسط بكتاباتهم حتى لو ما علقتش عندهم !
باعيش معاكم لقاءاتكم من البوستات اللي بتوصف اللقاء وباحس فعلاً إني كنت معاكم ووسطكم .
الفترة دي .. ممممم .. باعتبرها هدنة .. أو بوست طويل شوية في مدونة تانية .. مدونة الحياة !
ولحد ما أظبط تنسيق البوست ده هناك .. أشوفكم على خير يا أحلى ناس وأجمل صحبة وعالم .. ربنا يكرمكم جميعاً ويجازيكم ألف ألف مليون خير إن شاء الله اللهم آمين

إدعوا لي بظهر الغيب بالهداية وبصلاح الأحوال وبالرزق الحلال

أخوكم / شريف

*
ملحوظة :
أختي الفاضلة أم يوسف .. مش عارف أنا سرحت ف الكلام قوي كده ليه عندك .. يمكن عشان بقالي كتير ما دونتش هههههههههه .. شاكر لك حسن إستضافتك وسعة صدرك .. ولو حسيتي إن السوبر بيج تعليق ده ممل وكئيب بلاش تنشريه .. دي مدونتك وأنتِ حرة فيها ووالله العظيم ما هازعل !
ربنا يفرح قلبك بيوسف ويرجعه لحضنك عاجلاً اللهم آمين

جنى
---

ياللهووووووول
و سايبنى عمالة ارص الرصة دى عن ذوى المدونات السوداء و كلى ثكة كدا
و يطلع السبب ف الآخر علمى و صديق للبيئة

دنا منزنى بقى ويحيش قوى دلوقت


بس لأ

انا شيفاك فى باقى الحاجات التانية
بتاعة المبدأ و الفلسفة و الحمقة و كدا ...دول نابعين من قرايتى لأسلوبك و تدويناتك
و كمان تعليقاتك



منحرمشى منك يا غالى
و ربنا يسعد ايامك دايما
سعيد

wanda
-----


انا اتبهدل و اتسوح بجد فى مصر

انتى بتهرجى يا ون ون
بقى بعد كل الصباحات اللى انا بكتبها دى اسمع منك الجملة دى ؟؟

ايش ما كنت بهيئك يا ماما لللى هتشوفيه لما ترجعى ارض الوطن
و لا تكونيش فاكرة الجنسية المصرية دى كدا ...لازم تتمتعى بالامتيازات بتاعتها كاملتنننننننننننننن
اومال


السكة الحديد آخرتك شوية
احمدى ربناااااااا يا ست
ركوب القطر ف مصر
له 3 احتمالات
1- انك متلقيش قطر عشان السواقين عاملين اعتصام
2- انك توصلى متآخرة اربع خمس ساعات
3- انك متوصليش عشان الجاموسات الحمقاوات اللى بتقف ع القضبان

انتى حصلك احسن حاجة
يبقى ليه الطمع ؟
هوه مفيش حمد و شكرانية
ف البلد دى ابدااااا


الايميلات
هدعبس عندى
لحسن ايميلى ف حال يرثى له
وعاوز ترتيب و تنظيم رهيب



التقييد اللى بتقولى عليه امر طبيعى
بس صدقينى بينفع التقارب دا احيانا فى انك تفهمى النفسيات اكتر
القرب زى البعد
سلاح ذو حدين
و الواحد لازم يحاول يقبل كدا
حتى لو مكنش عاجبه قوى


خليكى براحتك و احنا ف انتظارك
**************************************************************************************************************************************
و
×××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××

احمد شريف
--------

شكراً لحضرتك

نورت

نبضات
------

يا عراااااافتى الساحرة

وحشتينى يا حبيبتى
قوى
قوى

و لولا ان انشغالك ان شاء الله كما اتمنى ف حاجات حلوة ..كنت عاتبت عشان بتوحشينى

عاليا وش خير
و انا عاوزة اشكرها انا كمان
لأنها عخلتك تعملى مدونتك
و خلتك تعلقى عند دكتور زين الغالى
و خلتنى بالصدفة اشوفك هناك
و تبدى اعجابك بتعليقاتى
لدرجة انك تسألينى ..فين مدونتك؟
و تتنبأ ليا بيها من قبل ما تنعمل و مكنش ف بالى ابدا اعملها
و تعليقاتك عدنى من وقتها
و صباحاتك المعطرة
و الورد و الياسمين
و الموسيقى
و عمر خيرت
و كل حاجة حلوة بيننا يا منمن من ساعة ما عرفتك لحد النهاردة

تحياتى انا اكترررررر
و بوساتى و حضوناتى
يا عرافتى الساحرة

حتى لو مكنتيش جاوبتى
كنتى هتاخديها برضو
النجمة ..اهى

يا مراكبى
--------

حلو التشبيه دا يا نبع الحكمة

فعلا خطة لعب و ظروف مباراة
و فيه ناس بتقلب معاهم لنصر
و ناس هزيمة
و احيانا تقيلة


عجبنى قوى
كلمة
لسه

كانت تنفع عنوان للبوست
و تختصر كل ما فيه

انه لسه

طول ما فينا افكار
و آمال و رغبة ف التواصل
هيبقى لسه
فيه حاجات لسه


منحرمشى منك
يا نبع الحكمة الخالص

انتا مجوبتش على فكرة
بس انتا م المؤسسين
و ليك حصة ف الأرض

اتفضل سيادتك

كركبة دماغ
----------

اولاً
هتاخدى النجمة اكيد
وبلاش التهديدات و شغل المطاوى دا
ايش ما كنت شوفتك ف الواكع
و لو كنت نفخت فيكى
كنتى طرتى ؟
بلاش اللماضة دى معايااااااا


ثانياً
بلاش رياح اليأس اللى هابة عليكى دى تنتقل كمان للتعليقات ..
يا بنتى ربنا كريم ..و ان شاء الله تروق و تحلى


ثالثاً
كلنا رغايين
هوه انتى لوحدك يا بنتى ؟
و كلنا كتبنا عشان حد يسمعنا
و يطبطب علينا



رابعا
الحتة دى حسيت انى انا اللى كتباها
--------
بفرح بيه قوي
وبيحرجني قوي
وبيحسسني اني ليا قيمة قوي
وبيرفع معنوياتي قوي
وبيعلقني بيكم قوي
وبحس اني منكم قوي
وبالاقي معاكم اللي محرومه منه واللي مفتقداه
--------


خامساً
كل دا و معرفتيش تعبرى؟
يا لهوتينى
الطم يوقولا فاتيما اتجننت !!


سادساً
انا كمان بحبك
يا كراكيبووووووو



سابعا
ان شاء الله
ابعتلك ايميل كريباااااااا



P A S H A
----------

بتهرج يا شريف!!!

بلاش انشره
لأ طبعا
دا يتنشر و نص و تلتربع

انتا باللى كتبته لسان ناس كتير
جت و مسيت
او جت و توقفت
و الأسباب كانت مبهمة عندنا
فيه ناس قالت ليه
و ناس مقلتش
نادراً لما سمعت من حد اعترافك الجميل دا
ان التدوين خدك م الدنيا الحقيقة
بينما فيها ناس مستنياك
و ناس غاليين عليك

انا فاهمة قصدك جدا
لأنى منغمسة ف العالم دا
و مبسوطة بيه
و معرفش لو عندى غيره يشغلنى
كنت هفضل فيه
و لا اتوقف انا كمان

ل
مظنش هتوقف
بس مش هبقى بنفس النشاط
الظروف بتحكم البنى آدم
مهما حاول يكسرها قوى

يعنى اظن لو كان شغلى مفيهوش كبيوتر و نت .زمكنتش هدخل بشكل يومى غير بليل مثلا
مكنتش هكتب صباحات
لو كنت ام و زوجة مكنش هيبقى سهل اتحرر من المسئوليات و اجى كل لقاء او مناسبة كدا
لو مكنتش محظوظة بيكم و لقيت ناس سيئة كنت هكتفى بالفرجة و بس و مكنتشش هنخرط ف العالم دا من رأسى حتى قدمى

معرفش
انتا طرحت سؤال من وسط اجابتك على سؤالى ..و سؤال مهم

ف كل الاحوال
مدونتك شبههك قوى يا شريف
فعلا
بكل ما فيها
مش هعرف اعزمك بقى على سفرية اسكندرية ...و مش هزعل انك مش جاى
لأنى عارفة الأسباب اهو
و ربنا يروقلك الأاحوال
و يسعدك انتا و بنت الحلال


النحمة يا فندم
متمشيش قبل ما تاخدها

مبسوطة جداً إنك حاطة صورة مدونتى فى البوست ... ده معناه انك شرفتينى بالزيارة على الأقل بسرعة كده . اتمنى تكرريها و نكون أصحاب . انا عجبانى مدونتك جدا ..دافية

آخر ايام الخريف
--------------

اولا
اهلا بيكى



ثانياً
للاسف
مزورتش مدونتك
قبل كدا
بس بسمع عنك خير
من زياراتك لمدونة
عادل البلد دى فيها حكومة


ثالثاً
اكيد هرد الزيارة
و اتشرف بمعرفتك اكتر

رابعا
الصورة عجبتنى جداااا
لما عملت سيرش على كلمة
شباك مفتوح
و الوانها كانت حلوة ومريحة
و حسيتها ونس كدا
و لو جاز لى انى اختار شباكى
فختاره يكون شبه كدا
عشان افتحه ع اللى بحبهم
و اختيارك ليها من قبلى صدفة
معناه انك تقريباً اسبابك
قريبة من اسبابى
انا كمان بحب استدخم مصطلح الدفا
فى وصف حاجات كتير
كدا بقى ... نبقى دفعة واحدة
و هذا هينقلنى ل

خامساً
انتى نورتينى بجد

روح قلب ماما

شكلنا هنبقى اصحاب قوى فعلاً . مستنية تشرفينى و أنا حقيقى سعيدة و فخورة بمعرفتك

شبابيك حى بلوجر .... من يوم حضرتك ما كتبتيه كان نفسى اعلق عليه فأنا تعرفت على كتاباتك من عند العرابيه الاصيله .... عجبنى جداا تعبير حد يقفل الشباك فى وشك .... فلقد حدث معى ولا زال تأثيره النفسى موجود عندى حاصه وانا رجل لست صغير فى السن فبداية كانت لمتابعة احدى المدونات لانسانه أقل ما يقال عنها أنها جميله فى كل شئ فى ايمانها بالله وفى قلبها الناصع البياض ولكن يا سبحان الله حدثت لها ظروف صعبه جعلتها تعتزل الجميع تقريبا او تقفل الشباك ربنا يحميها ويجبر بخاطرها لم اكن اتابع او حتى افكر فى متابعة اى مدونة غير مدونتها فهى مثل ابنتى لدرجة انها اصبحت الصفحة الرئيسية للكمبيوتر فى البيت وكان بيتابعها زوجتى وابنائى وكانوا ولا زالوا دائموا السؤال عنها .. اسف للاطالة ولكن من خلالها تعرفت على كتابات العرابيه بنت مصر الايله ومن عند العرابيه عرفت الاستاذه فاتيما دايما تلاقينى غير معرف عند العرابيه لكن بوقع باسمى الحقيقى ( مدحت ) ولكن وجدت حضرتك لاتقبلى غير المعرف المهم تعرفى كان نفسى يوم تجمعكم اروح واشوفكم ولو من بعيد بس للاسف مسافر لمأمورية بعد صلاة ظهر الجمعه ولمدة 10 ايام متصله ..جذبنى ايضا حديثك وكتابتك عن يوسف ولا اخفيكى سرا كتاباتك جعلت الافكار تتزاحم على ذهنى .. كل ما املك قوله ربنا يحميكم وعلى فكره كل ما يريده الله خير واختباراته للمؤمن كتيره اووى ربنا يسعدك ويبارك لك ويحميكى تحياتى لحضرتك وللعرابيه الاصيله التى تعرفت من خلال كتاباتها على كتابات حضرتك وكل التحية للابنهة الغاليه جداا ......... والتى من عندها تعرفت عليكم وبقولها يشهد الله ان اخوتك مشتاقون لكى ولكلامك النابع من القلب ويارب تكون بتدخل تقرأ لك فهيه قارئة ومونة ممتازه .. خالص تحياتى وامنياتى ... والسلام عليكم ورحمة الله وبركاته.

آخر أيام الخريف
---------------

ان شاء الله يا فوفو

هتلاقينى عندك اكيد
انا اللى إتشرفت بمعرفتك يا حبيبتى




راجل صعيدى
-----------

اهلا يا أستاذ مدحت

معرفش ليه مقولتش اسم المدونة اللى تقصدها حضرتك ؟

تكونش الغالية ام مالك؟
معرفش ليه شوفتها بين السطور كدا
يمكن تكون عشان وحشتنى فكرت كدا
بس ف كل الاحوال انا متشرفة بمجييى حضرتك و اسفة لو كنت إتأخرت ف الرد عليك ...

اللى ييجى من حدا فيدوووو
نشيله ع الراس
و احنا عندنا تبرع بالدم ف اول شهر نوفمبر يا ريت ظروف حضرتك وقتها تسمح و تيجى تنورنا بإذن الله

معلش انى اجبرتك تدخل بحساب ..
بس اصل الغير معرف اختك فاتيما عانت منه الآمرين و كان لازم الغيه بعد عناء و على نن عينى والله تعبكم

و عليكم السلام يا فندم

إرسال تعليق